សង្គម និងសេដ្ឋកិច្ច - La Reine Media

សហរដ្ឋអាមេរិក ចេញច្បាប់ហាមក្រុមហ៊ុនអ៊ីនធើណិត មិនឱ្យប្រើប្រាស់ឧបករណ៍បច្ចេកវិទ្យារបស់ក្រុមហ៊ុនចិន Huawei

ប្រធានាធិបតីសហរដ្ឋអាមេរិក លោក Donald Trump កាលពីម្សិលមិញ បានចេញច្បាប់ហាមក្រុមហ៊ុនអ៊ីនធើណិតក្នុងប្រទេសនេះ មិនឱ្យយកប្រាក់ជំនួយរបស់រដ្ឋាភិបាល ទៅទិញឧបករណ៍បច្ចេកវិទ្យាពីក្រុមហ៊ុនចិន Huawei។

ទន្ទឹមនឹង Huawei ច្បាប់នេះក៏ហាមក្រុមហ៊ុនទូរគមនាគមន៍នៅសហរដ្ឋអាមេរិក ទិញឧបករណ៍ពីបណ្ដាក្រុមហ៊ុនផ្សេងដែលត្រូវបានសហរដ្ឋអាមេរិក ចាត់ទុកថាជា “ការគំរាមកំហែងដល់សន្តិសុខជាតិ”។

ច្បាប់នេះក៏បានស្នើឱ្យគណៈកម្មការទូរគមនាគមន៍សហរដ្ឋ FCC (Federal Communications Commission) បង្កើតកម្មវិធីជំនួយដល់បណ្ដាក្រុមហ៊ុនអ៊ីនធើណិតតូចៗផងដែរ។ ក្រុមហ៊ុនតូចទាំងនោះ នឹងទទួលបានប្រាក់ជំនួយពីរដ្ឋាភិបាល បើសិនពួកគេយល់ព្រមបោះបង់ឧបករណ៍ ឬសេវាកម្មរបស់ចិន ដែលត្រូវបានហាមដោយអាមេរិក ចេញពីប្រព័ន្ធទូរគមនាគមន៍។

កាលពីថ្ងៃទី27មីនា សភាជាន់ខ្ពស់សហរដ្ឋអាមេរិក បានបោះឆ្នោតយល់ព្រមទម្លាក់កញ្ចប់ថវិកាជំនួយ ចំនួន1ពាន់លានដុល្លារ សម្រាប់ក្រុមហ៊ុនទូរគមនាគមន៍ណាដែលមិនប្រើប្រាស់ឧបករណ៍ដែលផលិតឡើងដោយក្រុមហ៊ុន ចិន Huawei និង ZTE។ កញ្ចប់ជំនួយនេះ នឹងប្រើប្រាស់ដើម្បីជួយដល់ក្រុមហ៊ុនអ៊ីនធើណិតតូចៗ ដែលកំពុងធ្វើសកម្មភាពនៅតាមតំបន់ជនបទ នៅទូទាំងសហរដ្ឋអាមេរិក។ នេះបើតាមការចុះផ្សាយរបស់សារព័ត៌មាន SCMP។

សមាគមទូរគមនាគមន៍មិនប្រើខ្សែនៅជនបទរបស់សហរដ្ឋអាមេរិក RWA (Rural Wireless Association) បានសរសើរអំពីកាយវិការនេះរបស់សភាជាន់ខ្ពស់ ប៉ុន្តែ សមាគមនេះយល់ថា 1ពាន់លានដុល្លារ គឺវា “មិនសមស្រប” នោះទេ។ នេះបើតាមសារព័ត៌មាន Reuters។

បច្ចុប្បន្ន ក្រុមហ៊ុនទូរគមនាគមន៍ជាច្រើននៅសហរដ្ឋអាមេរិក បានបំពាក់ឧបករណ៍ផ្សេងៗដែលផលិតដោយក្រុមហ៊ុនចិន Huawei និង ZTE ដោយសារតែវាមានតម្លៃទាប។ ប៉ុន្តែ ឧបករណ៍ទាំងនោះ ភាគច្រើន ត្រូវបានបំពាក់តាំងពីប៉ុន្មានឆ្នាំមុនមកហើយ។

សេតវិមាន ធ្លាប់បានលើកឡើង និងសង្ស័យថា Huawei បានប្រើប្រាស់បណ្ដាញទូរគមនាគមន៍ដើម្បីបើកដៃឱ្យរដ្ឋាភិបាលចិន ធ្វើសកម្មភាពចារកិច្ច។ រដ្ឋាភិបាលសហរដ្ឋអាមេរិក ក៏មានការព្រួយបារម្ភ ខ្លាចក្រុមហ៊ុនចិននឹង “បង្កការគំរាមកំហែងដល់សន្តិសុខជាតិ” បើសិនជាទទួលបានការអនុញ្ញាតឱ្យដំឡើងប្រព័ន្ធ 5G នៅលើទឹកដីសហរដ្ឋអាមេរិក។ ប៉ុន្តែ ក្រុមហ៊ុន Huawei តែងតែបដិសេធរាល់ការចោទប្រកាន់នេះ៕

ប្រភព៖ សារព័ត៌មានបរទេស

March 13, 2020

កម្មវិធីប្រដាល់គុនខ្មែរតាមស្ថានីយទូរទស្សន៍ សម្រាប់ថ្ងៃសៅរ៍ ទី14 ឆ្នាំ 2020

March 13, 2020

កម្មវិធីប្រដាល់គុនខ្មែរ ចុងសប្ដាហ៍ប្រចាំស្ថានីយទូរទស្សន៍ (ថ្ងៃសុក្រ ទី13 ខែមីនា ឆ្នាំ2020)

March 13, 2020

បេសកកម្មទៅកាន់ពិភពព្រះអង្គារ ដើម្បីស្វែងរកសភាវរស់ ត្រូវបានពន្យារពេល ដោយសារតែ…

ផែនការបញ្ជូនរ៉ូបូតឡើងទៅស្វែងរកសភាវរស់នៅលើពិភពព្រះអង្គារ របស់រុស្ស៊ី និងទីភ្នាក់ងារអវកាសអឺរ៉ុប(ESA) ត្រូវបានពន្យារពេលចំនួន2ឆ្នាំ ដោយសារបញ្ហាបច្ចេកទេស និងផលប៉ះពាល់របស់រោគរាតត្បាត COVID-19។

ទីភ្នាក់ងារអវកាសរុស្ស៊ី(Roscosmos) និងទីភ្នាក់ងារអវកាសអឺរ៉ុប(ESA) បានសម្រេចចិត្តពន្យាពេលក្នុងការបាញ់បង្ហោះយានអវកាសរបស់ពួកគេទៅខែសីហា ឬខែកញ្ញា ឆ្នាំ2022 ពោលគឺយឺតជាង2ឆ្នាំ ធៀបនឹងផែនការដែលបានគ្រោងទុក។ ក្រុមអ្នកគ្រប់គ្រងគម្រោងបានឱ្យដឹងថា ពួកគេត្រូវធ្វើការពិសោធជាច្រើនទៀត ដើម្បីធានាឱ្យបានថា រាល់ផ្នែកនៃយានអវកាស ដំណើរការល្អបំផុតក្នុងបេសកកម្មទៅកាន់ឋានព្រះអង្គារ។

“នោះគឺជាការសម្រេចចិត្តដ៏លំបាកមួយ ប៉ុន្តែវាចាំបាច់ណាស់” Dmitry Rogozin អ្នកដឹកនាំទីភ្នាក់ងារអវកាស Roscosmos របស់សហព័ន្ធរុស្ស៊ី ថ្លែងអំពីការពន្យាពេលលើការបាញ់បង្ហោះយានអវកាសទៅកាន់ពិភពព្រះអង្គារ។ តាមផែនការដំបូង យានអវកាសគ្មានមនុស្សបើកបរ ExoMars ដែលនឹងមានភារកិច្ចនាំរ៉ូបូតឡើងទៅកាន់ពិភពព្រះអង្គារដើម្បីស្វែងរកសភាវរស់នេះ នឹងត្រូវបាញ់បង្ហោះនៅចុងឆ្នាំ បន្ទាប់ពីបានពន្យាពេលជាច្រើនលើក ប៉ុន្តែពេលនេះ វានៅតែត្រូវបានពន្យាពេលម្ដងទៀត។

អគ្គនាយកនៃទីភ្នាក់ងារអវកាស ESA លោក Jan Worner សង្កត់ធ្ងន់ថា “ទាំង2ភាគី សុទ្ធតែចង់ឱ្យបេសកកម្មនេះទទួលបានជោគជ័យ 100%។ សកម្មភាពសាកល្បងនានានឹងជួយធានាសុវត្ថិភាពសម្រាប់ការបាញ់បង្ហោះ ហើយតាមរយៈនេះ យើងនឹងទទួលបានលទ្ធផលល្អបំផុតផ្នែកវិទ្យាសាស្ត្រ”។ នេះបើតាមសារព័ត៌មាន AFP។

ទន្ទឹមនឹងមូលហេតុបច្ចេកទេស ការពន្យារពេលខាងលើក៏បានកើតឡើងដោយសារផលប៉ះពាល់ពីរោគរាតត្បាត COVIVD-19 ផងដែរ។ Rogozin បានឱ្យដឹងថា បទបញ្ជារឹតបន្តឹងការធ្វើដំណើររវាងបណ្ដាប្រទេស បានធ្វើឱ្យក្រុមអ្នកវិទ្យាសាស្ត្រជួបបញ្ហាក្នុងការសហការគ្នា ដើម្បីអនុវត្តគម្រោងការនេះ។

កម្មវិធីអវកាសរួម ExoMars ត្រូវបានគេមើលឃើញថាជានិមិត្តរូបសំខាន់ក្នុងកិច្ចសហប្រតិបត្តិការ រវាងរុស្ស៊ី និងអឺរ៉ុប នៅក្នុងស្ថានភាពតានតឹងជាមួយអ៊ុយក្រែន និងស៊ីរី។ ទីភ្នាក់ងារអវកាស Roscosmos របស់រុស្ស៊ី នឹងផ្ដល់កន្លែងបាញ់បង្ហោះ កន្លែងចុះចត និងម៉ូឌុលដើម ចំណែកទីភ្នាក់ងារអវកាសអឺរ៉ុប ESA នឹងទទួលខុសត្រូវក្នុងការអភិវឌ្ឍ និងគ្រប់គ្រងដំណើរការរ៉ូបូត Rosalind Franklin។

រ៉ូបូតខាងលើនឹងត្រូវបានបញ្ជាពីមជ្ឈមណ្ឌលអវកាសមួយ នៅក្នុងតំបន់ Torino ភាគខាងជើងប្រទេសអ៊ីតាលី ដែលជាកន្លែងកំពុងរងគ្រោះខ្លាំងដោយសាររោគ COVID-19 នៅអឺរ៉ុប។ Rosalind Franklin គឺជាឧបករណ៍ដំបូងគេដែលមានសមត្ថភាពស្វែងរកសភាវរស់នៅក្រោមដី ជម្រៅ 2ម៉ែត្រ៕

ប្រភព៖ សារព័ត៌មានបរទេស

March 13, 2020

Apple Store កំពុងតែខ្វះខាតគ្រឿងបន្លាស់សម្រាប់ការជួសជុលឧបករណ៍ដែលខូច

បើតាមការចុះផ្សាយរបស់សារព័ត៌មាន Bloomberg ដែលប្រាប់ដែរថា មានហាងមួយចំនួនកំពុងតែខ្វះខាតគ្រឿងបន្លាស់មួយចំនួន សម្រាប់ការជួសជុលឧបករណ៍ដែលខូច ខណៈពេលដែលវីរុសកូរ៉ូណា កំពុងវាយលុកខ្លាំង។ Apple បានធ្វើការជូនដំណឹងដល់បុគ្គលិករបស់ខ្លួនថា គ្រឿងបន្លាស់របស់ iPhone ដែលបានបម្រុងទុកសម្រាប់ប្ដូរជូនអតិថិជន នឹងមានការខ្វះខាតនៅខែបន្ទាប់ទៅទៀតនេះហើយ។

ប្រភពដដែលបានពន្យល់ថា Apple បានប្រាប់ដល់បុគ្គលិកផ្នែកបច្ចេកទេសនៅហាងលក់រាយទាំងឡាយថា គ្រឿងបន្លាស់ iPhone សម្រាប់ប្ដូរជូនអតិថិជន នឹងមានកង្វះខាតយូរបំផុតពី 2 ទៅ 4សប្ដាហ៍។

គ្រឿងបន្លាស់ iPhone ទាំងនេះ គឺ Apple ទុកសម្រាប់ប្ដូរជូនអតិថិជន នៅពេលអតិថិជនជួបបញ្ហាលើ iPhone ហើយ iPhone នោះមិនអាចជួសជុលបានុ។

ដើម្បីដោះស្រាយបញ្ហានេះ Apple បានប្រាប់ដល់បុគ្គលិកផ្នែកបច្ចេកទេសរបស់ខ្លួនថា ពួកគេអាចផ្ញើគ្រឿងបន្លាស់ iPhone សម្រាប់ប្ដូរ ទៅដល់អតិថិជន និងអាចផ្ដល់ឧបករណ៍សម្រាប់ឱ្យអតិថិជនខ្ចីប្រើប្រាស់ជាបណ្ដោះអាសន្នសិនបាន៕

March 13, 2020

អ្នកជំនាញ៖ ការជូតសម្អាតទូរស័ព្ទ ក៏ជាវិធីការពារខ្លួនពីវីរុសកូរ៉ូណាមួយដែរ

យោងតាមប្រភពពីអង្គការសុខភាពពិភពលោក(WHO)បានឱ្យដឹងថា WHO បានចេញសារាចរណែនាំដល់ប្រជាជនទូទាំងពិភពលោក ឱ្យអនុវត្តតាមចំណុច 3យ៉ាងសំខាន់ៗ ដើម្បីកាត់បន្ថយហានិភ័យក្នុងការឆ្លងវីរុស Covid-19ដូចខាងក្រោមនេះ៖

1. លាងសម្អាតដៃឱ្យបានញឹកញាប់ ដោយប្រើទឹកអាល់កុលសម្លាប់មេរោគ ឬជាមួយសាប៊ូ និងទឹកស្អាត។
2. ប្រើក្រដាសអនាម័យ ឬកែងដៃ ខ្ទប់មុខនៅពេលក្អក ឬកណ្ដាស់ រួចបោះក្រដាសចោលភ្លាមៗ និងលាងសម្អាតដៃឱ្យបានស្អាត។
3. ចៀសវាងការប៉ះពាល់អ្នកដែលមានជំងឺផ្ដាសាយ និងក្អក។

យ៉ាងណាក្ដី អ្នកជំនាញបានរកឃើញថា COVID-19 អាចទំជាប់លើស្គ្រីនទូរស័ព្ទបានរហូតដល់ 1អាទិត្យឯណោះ។ អ្នកជំនាញការបានឱ្យដឹងថា វីរុសអាចរាលដាលតាមរយៈដំណក់ទឹក ដែលត្រូវបានបញ្ចេញតាមរយៈការក្អក និងកណ្តាស់ ហើយមេរោគអាចនៅរស់ និងសេសសល់នៅលើផ្ទៃទូរស័ព្ទដៃ បាន 7ថ្ងៃ។

សាស្រ្តាចារ្យ William Keevil មកពីសាកលវិទ្យាល័យ Southampton បានប្រាប់ថា “អ្នកអាចលាងដៃរបស់អ្នកបាន ប៉ុន្តែប្រសិនបើអ្នកចាប់ផ្តើមប៉ះអេក្រង់ស្មាតហ្វូនរបស់អ្នកទៀត ហើយបន្ទាប់មកយកដៃមកប៉ះមុខរបស់អ្នក វាអាចមានសក្តានុពលនៃការឆ្លងមេរោគ”។

ដើម្បីជាការទប់ស្កាត់ការចម្លងមេរោគតាមរយៈទូរស័ព្ទដៃនេះ អ្នកជំនាញការបានណែនាំឱ្យឧស្សាហ៍ជូតសម្អាតស្គ្រីនទូរស័ព្ទ ជាមួយអាល់កុលឱ្យបានយ៉ាងហោច 2ដងក្នុង 1ថ្ងៃ៕

March 13, 2020

បំណងល្អ! …បើកំពុងប្រើកម្មវិធី VPN ចូរឆាប់លុបចោលទៅ ព្រោះមានគេរកឃើញថា អ្នកដែលបង្កើតកម្មវិធីនេះមក គឺដើម្បីលួចយក Data របស់អ្នក

ប្រភពព័ត៌មាន BuzzFeed News បានផ្សព្វផ្សាយថា យ៉ាងហោចណាស់ក៏មានជាង 20កម្មវិធីដែរ ដែលក្រុមហ៊ុន Sensor Tower បានប្រើប្រាស់ដើម្បីលួចយកទិន្នន័យរបស់អ្នកប្រើប្រាស់។ ក្រុមហ៊ុន Sensor Tower បានប្រើកម្មវិធីដ៏ពេញនិយមរបស់គេមានដូចជា Luna VPN និង Unlimited VPN នៅក្នុង Google Play Store ហើយ Luna VPN និង AdBlock Focus នៅក្នុង Apple App Store ដើម្បីលួចយកទិន្នន័យរបស់អ្នកប្រើប្រាស់។

ក្រុមហ៊ុន Sensor Tower អាចជ្រៀតចូលក្នុងទូរស័ព្ទ ដោយតម្រូវឱ្យអ្នកប្រើប្រាស់បញ្ចូលកម្មវិធី (Root Certificate) ជាកម្មវិធីដែលគេអាចប្រើដើម្បីទាញយកទិន្នន័យ។

ចាប់តាំងពីឆ្នាំ2015 មក ក្រុមហ៊ុននេះ បានដាក់ឱ្យប្រើកម្មវិធីចំនួនប្រមាណ 20 សម្រាប់ទាំងប្រព័ន្ធប្រតិបត្តិការ Android និង iOS។

នៅពេលថ្មីៗនេះ ក្រុមហ៊ុន Apple បានលុបចោលកម្មវិធី AdBlock Focus ចំណែកឯក្រុមហ៊ុន Android វិញ បានលុបចោលកម្មវិធី Mobile Data ហើយ។

នាយកដ្ឋានប្រឆាំងបទល្មើសបច្ចេកវិទ្យា សូមណែនាំដល់អ្នកប្រើប្រាស់ឱ្យលុបចោលកម្មវិធីពីក្រុមហ៊ុន Sensor Tower ព្រមទាំងកម្មវិធីណាដែលលោកអ្នកមានការសង្ស័យ ព្រោះថា អ្វីដែលគ្រោះថ្នាក់បំផុតនោះ គឺលោកអ្នកប្រហែលជាគិតថា កម្មវិធីទាំងនោះមានអត្ថប្រយោជន៍ណាស់សម្រាប់លោកអ្នក តែការពិត វាគ្រាន់តែជានុយដើម្បីទាក់លួចយកទិន្នន័យរបស់លោកអ្នកប៉ុណ្ណោះ៕

March 13, 2020

កីឡាគុនដាវ សាកលវិទ្យាល័យអាស៊ាន ឆ្នាំនេះ កម្ពុជាបានមេដាយច្រើនជាងឆ្នាំមុន

សហព័ន្ធកីឡាគុនដាវកម្ពុជា បានបញ្ជូនអត្តពលិកគុនដាវ ទៅចូលរួមប្រកួតជ្រើសរើសជើងឯកកីឡាគុនដាវសាកលវិទ្យាល័យអាស៊ីអាគ្នេយ៍លើកទី4 ឆ្នាំ2020 នៅទីក្រុងគូឡាឡាំពួ ប្រទេសម៉ាឡេស៊ី ចាប់ពីថ្ងៃទី5 ដល់ថ្ងៃទី10 ខែមីនា ឆ្នាំ2020 ដោយខាងសហព័ន្ធ បានបញ្ជូនកីឡាករចំនួន 9នាក់ និងគ្រូបង្វឹក 3នាក់ទៅចូលរួម។

ជាលទ្ធផល កីឡាកររបស់កម្ពុជាទទួលបានមេដាយមាស ១គ្រឿង ប្រាក់ ១គ្រឿង និងមេដាយសំរឹទ្ធចំនួន ៣គ្រឿង ដែលមានកីឡាករ-កីឡាការិនី ដូចខាងក្រោមនេះ៖
១- កីឡាការិនី ឆាយ លីនលី ទទួលបានមេដាយមាស ១គ្រឿង សម្រាប់វិញ្ញាសានារីឯកត្តជនដាវតូច
២- កីឡាការិនី យី លីហ្សា ទទួលបានមេដាយប្រាក់ ១គ្រឿង សម្រាប់វិញ្ញាសានារីឯកត្តជនដាវតូច
៣- កីឡាការិនី សន និច ទទួលបានមេដាយសំរឹទ្ធ ១គ្រឿង សម្រាប់វិញ្ញាសានារីឯកត្តជនដាវតូច និងមេដាយសំរឹទ្ធ ១គ្រឿង សម្រាប់វិញ្ញាសានារីឯកត្តជនដាវធំ
៤- កីឡាករ ថុង តាំងជីន ទទួលបានមេដាយសំរឹទ្ធ 1គ្រឿង សម្រាប់វិញ្ញាសាបុរសឯកត្តជនដាវតូច

ចំពោះការប្រកួតនេះ គឺជាលើកទី4 ហើយ ដែលសហព័ន្ធកីឡាគុនដាវកម្ពុជាបានចូលរួមប្រកួតក្នុងពានរង្វាន់មួយនេះ ដោយមានការកើនឡើងនូវចំនួនមេដាយរង្វាន់ ដោយឆ្នាំនេះកម្ពុជាទទួលបានមេដាយមាស 1គ្រឿង ខណៈឆ្នាំមុនមិនទទួលបានមេដាយមាសឡើយ។ គួរបញ្ជាក់ដែរថា ចំនួនកីឡាករ កីឡាការិនីចូលរួមលើកនេះមានការថយចុះ ដោយមានប្រទេសតែ6 ប៉ុណ្ណោះចូលរួមប្រកួត គឺដោយសារតែជំងឺ COVID-19 ដែលកំពុងរាតត្បាតនៅទូទាំងពិភពលោកហ្នឹងឯង៕

March 13, 2020

ឥណ្ឌូនេស៊ី ផ្តល់សញ្ជាតិដល់កីឡាករបរទេសម្នាក់ ដើម្បីត្រៀមជួយក្រុមក្នុងវគ្គជម្រុះ World Cup

កីឡាករ Marc Klok គឺជាខ្សែបម្រើបរទេសមួយរូប ដែលលេងនៅក្លិប Persija Jakarta លីកកំពូលឥណ្ឌូនេស៊ី បានទទួលសញ្ជាតិឥណ្ឌូនេស៊ី ដោយរូបគេនឹងត្រូវបានក្លាយជាកីឡាករជនបរទេសមួយរូបថ្មីទៀត ដែលបានចូលសញ្ជាតិឥណ្ឌូនេស៊ី។

កីឡាករមានវ័យ 26ឆ្នាំ ដែលលេងក្នុងតំណែងខ្សែបម្រើការពារខាងលើនេះ មានដើមកំណើតសញ្ជាតិដើម ហូឡង់ ខណៈរូបគេទើបតែឈានជើងមកស្គាល់ទឹកដីឥណ្ឌូនេស៊ីកាលពីឆ្នាំ2017 មកទល់ពេលបច្ចុប្បន្នប៉ុណ្ណោះ តែក៏បានស្នើសុំចូលសញ្ជាតិតែម្តង ហើយក៏បានសម្រេចដូចបំណងទៀតផង។ យោងតាមអ្នកនាំពាក្យរបស់ក្រសួងយុវជន និងកីឡា នៃប្រទេសឥណ្ឌូនេស៊ី បានឱ្យដឹងថា សម្រាប់ Marc Klok ពេលនេះ គឺមានសិទ្ធិជាពលរដ្ឋឥណ្ឌូនេស៊ីពេញលេញ ចំណែកឯការកោះហៅចូលលេងឱ្យក្រុមជម្រើសជាតិឥណ្ឌូនេស៊ី នៅតែរង់ចាំការសម្រេចអនុញ្ញាតជាលើកចុងក្រោយពីសហព័ន្ធបាល់ទាត់ពិភពលោក (FIFA) តែប៉ុណ្ណោះ។

វាហាក់ជារឿងគាប់ជួនមួយ ដែលកីឡាកររូបនេះបានទទួលសញ្ជាតិឥណ្ឌូនេស៊ី ខណៈដែលក្រុមជម្រើសជាតិមួយនេះ កំពុងធ្លាក់ទម្រង់លេងយ៉ាងខ្លាំង ដោយសារមិនទាន់ស្គាល់រសជាតិឈ្នះ ឬស្មើម្តងឡើយចាប់តាំងពីខែតុលា ឆ្នាំ2019 មកទល់នឹងពេលនេះ ដោយក្នុងនោះការប្រកួតវគ្គជម្រុះ World Cup មិនទាន់មានពិន្ទុរាប់នឹងគេនៅឡើយ៕

March 13, 2020

វិស័យសំណង់ក្នុងខេត្តកំពត នៅតែមានសម្ទុះរីកចម្រើនខ្លាំង នៅដើមឆ្នាំ2020

ក្រសួង និងមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកំពត បានអះអាងថា វិស័យសំណង់ក្នុងខេត្តកំពតនៅតែមានសម្ទុះរីកចម្រើនខ្លាំងនៅដើមឆ្នាំ2020 នេះ ខណៈកាលពីឆ្នាំ2019 រដ្ឋបាលខេត្តនេះ បានចេញលិខិតអនុញ្ញាតសាងសង់បានចំនួន 238គម្រោង ក្រោមទុនវិនិយោគសរុប ជាង 3លានដុល្លារអាមេរិក។

ការលើកឡើងពីសំណាក់ក្រសួង និងមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកំពតនៅពេលនេះ ត្រូវបានធ្វើឡើងក្នុងពិធីបើកវគ្គផ្សព្វផ្សាយស្ដីពី “ច្បាប់សំណង់” នៅសាលប្រជុំសាលាខេត្តកំពត កាលពីចុងខែកុម្ភៈ ឆ្នាំ2020 កន្លងទៅនេះ។

នាឱកាសនោះ អភិបាលខេត្តកំពត លោក ជាវ តាយ បានលើកឡើងថា វិស័យសំណង់នៅក្នុងខេត្តកំពតក្នុងរយៈពេលប៉ុន្មានឆ្នាំកន្លងមកនេះ មានសម្ទុះរីកចម្រើនគួរឱ្យកត់សម្គាល់ ខណៈរដ្ឋបាលខេត្ត បានបង្កើនការត្រួតពិនិត្យ និងគ្រប់គ្រងសំណង់បានល្អប្រសើរ។ ជាក់ស្តែង លោកថា កាលពីឆ្នាំ2019 រដ្ឋបាលខេត្តបានចេញលិខិតអនុញ្ញាតសាងសង់បានចំនួន 238គម្រោង ក្រោមទុនវិនិយោគសរុប 3,187,300ដុល្លារអាមេរិក បើប្រៀបធៀបទៅនឹងឆ្នាំ2018 គឺមានកំណើន 80ភាគរយ។

លោកបន្តថា ក្នុងឆ្នាំ2019 កន្លងទៅនេះ ខេត្តកំពតបានបង្កើតគណៈកម្មការត្រួតពិនិត្យ និងគ្រប់គ្រងសំណង់ ដោយមានកិច្ចសហការចូលរួមពីគ្រប់ជំនាញពាក់ព័ន្ធ ធ្វើឱ្យវិស័យសំណង់ក្នុងខេត្ត មានសម្ទុះរីកចម្រើន និងមានលក្ខណៈល្អប្រសើរ។ ជាងនេះទៀត លោកថា រដ្ឋបាលខេត្ត ក្រុង ស្រុក បានចេញលិខិតអនុញ្ញាតសាងសង់ បានចំនួន 238គម្រោង ដែលមានផ្ទៃក្រឡាសរុប 90,299ម៉ែត្រការ៉េ, ទុនវិនិយោគសរុប 3,187,300 ដុល្លារអាមេរិក បើប្រៀបធៀបទៅនឹងឆ្នាំ2018 មានកំណើន 80 ភាគរយ ដោយមានត្រឹមតែ 142គម្រោង មានផ្ទៃក្រឡាសរុប 52,008 ម៉ែត្រការ៉េ ប៉ុណ្ណោះ។

លោកអភិបាលខេត្តកំពតរូបនេះអះអាងថា “ប្រជាពលរដ្ឋខេត្តកំពត មានជីវភាពរស់នៅកាន់តែល្អប្រសើរឡើង ពី 1ថ្ងៃទៅ 1ថ្ងៃ។ ចំណែកទីផ្សារអចលនទ្រព្យ កាន់តែមានតម្លៃខ្ពស់ សំណង់ធំៗជាច្រើនមានការសាងសង់ឡើង ពិសេសនៅក្នុងក្រុងកំពត និងស្រុកទឹកឈូ រួមទាំងតំបន់ទីប្រជុំជននៅតាមបណ្ដាស្រុកដទៃទៀត”។

ពាក់ព័ន្ធនឹងការលើកឡើងនេះ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់លោក លាង មុនីរិទ្ធ បានថ្លែងថា ការសាងសង់សំណង់ធំខ្ពស់ៗ ដែលសម្ទុះនៃការរីកចម្រើនរបស់វិស័យសំណង់នេះ បានទាមទារតម្រូវការនៃការពង្រឹងការគ្រប់គ្រង រាល់ដំណើរការ និងប្រតិបត្តិការក្នុងវិស័យសំណង់ រួមជាមួយអ្នកពាក់ព័ន្ធជុំវិញការងារ សំណង់កាន់តែមានភាពចាំបាច់ជាសារវន្ត។

លោកបន្តថា ដោយសារវិស័យសំណង់កាន់តែធំ កាន់តែខ្ពស់ និងកាន់តែស្មុគស្មាញ គឺកាន់តែទាមទារឲ្យមានការអនុវត្តយ៉ាងត្រឹមត្រូវ តាមបទដ្ឋានគតិយុត្ត បច្ចេកវិទ្យាស្តង់ដា និងបទប្បញ្ញត្តិបច្ចេកទេស ដើម្បីធានាភាពរឹងមាំ គុណភាព សោភណភាព និងចីរភាពនៃសំណង់ រៀបចំខ្លួនសម្រាប់សេដ្ឋកិច្ចឌីជីថល (Digital) ដើម្បីឆ្លើយតបនឹងបដិវត្តន៍ឧស្សាហកម្មទី 4 ផង ដើម្បីលើកតម្កើងអត្តសញ្ញាណជាតិ និងភាពសុខដុមរមនានៅក្នុងសង្គមផង។

គួររំឭកដែរថា ពាក់ព័ន្ធនឹងភាពរីកចម្រើននៃវិស័យសំណង់នៅខេត្តកំពតនេះដែរ បើយោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា ហៅកាត់ថា CDC បានបង្ហាញថា ចាប់តាំងពីឆ្នាំ2016 ដល់ដំណាច់ខែសីហា ឆ្នាំ2019 កន្លងមក ការវិនិយោគពីប្រទេសចិន នៅតាមបណ្តាខេត្តជាប់មាត់សមុទ្រ ដូចជាខេត្តព្រះសីហនុ ខេត្តកោះកុង និងខេត្តកំពត លើកលែងតែខេត្តកែប ទទួលបានទុនវិនិយោគប្រមាណ 2.6ពាន់លានដុល្លារអាមេរិក ដែលស្មើនឹងប្រមាណ 11.5ភាគរយ នៃទំហំវិនិយោគសរុបនៅកម្ពុជា ។

របាយការណ៍នោះបានបង្ហាញថា ការវិនិយោគនៅខេត្តកោះកុងមានទំហំវិនិយោគប្រមាណ 470លានដុល្លារអាមេរិក ខេត្តព្រះសីហនុ មានទំហំវិនិយោគចំនួន 2ពាន់លានដុល្លារអាមេរិក និងខេត្តកំពត មានទំហំវិនិយោគប្រមាណជាង 100លានដុល្លារអាមេរិក។

យ៉ាងណាក្ដី ភាគីពាក់ព័ន្ធ ដែលបានចូលរួមក្នុងពិធីបើកវគ្គផ្សព្វផ្សាយស្ដីពី “ច្បាប់សំណង់” នាខេត្តកំពត ក៏បានអះអាងដែរថា តាមរយៈច្បាប់សំណង់នឹងឈានទៅលើកកម្ពស់សុខុមាលភាពសាធារណៈគណនេយ្យភាព និងប្រសិទ្ធភាពក្នុងការប្រកបការងារ និងប្រកបវិជ្ជាជីវៈក្នុងវិស័យសំណង់ ដោយបង្កើនការជឿទុកចិត្ត របស់វិនិយោគិននៅក្នុងវិស័យសំណង់ និងជំរុញទីផ្សារអចលនទ្រព្យនៅក្នុងខេត្តកំពត កាន់តែរីកចម្រើនខ្លាំង នៅក្នុងឆ្នាំ2020 នេះ បន្ថែមទៀត៕

March 13, 2020

Category: សង្គម និងសេដ្ឋកិច្ច