Category: សង្គម និងសេដ្ឋកិច្ច

NASA បញ្ចេញរូបថតដ៏អស្ចារ្យ1សន្លឹក របស់កាឡាក់ស៊ី M77 ដែលមានចម្ងាយពីផែនដី 47លានឆ្នាំពន្លឺ
តេឡេស្កូបអវកាស Hubble របស់ទីភ្នាក់ងារអវកាសអាមេរិកាំង NASA ថតបានរូបភាពច្បាស់ត្រជាក់ភ្នែករបស់កាឡាក់ស៊ី1 ដែលត្រូវបានគេដាក់ឈ្មោះឱ្យថា Messier 77 ស្ថិតនៅក្នុងកញ្ចុំផ្កាយ Cetus។
ទីភ្នាក់ងារអវកាសអាមេរិកាំង NASA កាលពីថ្ងៃទី17មីនាកន្លងទៅ បានបញ្ចេញរូបថត1សន្លឹកដ៏អស្ចារ្យរបស់កាឡាក់ស៊ី Messier 77 (M77) ដែលមានចម្ងាយពីភពផែនដី ប្រមាណជា 47លានឆ្នាំពន្លឺ (ពន្លឺព្រះអាទិត្យ ត្រូវធ្វើដំណើរ8នាទី និង20វិនាទី ទើបមកដល់ផែនដី)។ ត្រង់ចំណុចពណ៌ក្រហមដែលនៅពាសពេញកាឡាក់ស៊ីនេះ គឺបញ្ជាក់ថា Messier 77 សម្បូរទៅដោយឧស្ម័ន អ៊ីដ្រូសែន(hydrogen)។ ពន្លឺភ្លឺចែងចាំងនៅចំកណ្ដាលកាឡាក់ស៊ី គឺជាស្នូលរបស់វា។ ចំណែកនៅជុំវិញស្នូល គឺជាដៃរបស់កាឡាក់ស៊ី ដែលមានរាងដូចគូទខ្យង និងគ្របដណ្ដប់ដោយពពកធូលីដ៏ក្រាស់។ តំបន់ដែលមានពន្លឺពណ៌ក្រហម ស្ថិតនៅជុំវិញក្បែរស្នូលរបស់កាឡាក់ស៊ី គឺជាកន្លែងកកើតរបស់ផ្កាយថ្មី។
តារាវិទូជនជាតិបារាំង Pierre Méchain បានរកឃើញកាឡាក់ស៊ី M77 កាលពីឆ្នាំ1780។ កាលណោះ តារាវិទូរូបនេះ យល់ថា M77 គឺជា nebula ដែលជាពពកធូលីយក្ស សម្បូរដោយឧស្ម័នអ៊ីដ្រូសែន អេលីយ៉ូម និងឧស្ម័នអ៊ីយ៉ុងផ្សេងទៀត នៅក្នុងទីអវកាសដ៏សែនឆ្ងាយ។ ប៉ុន្តែ តាមការពិត M77 គឺជាកាឡាក់ស៊ីដ៏មហាសែនធំមួយ។ នៅលើផែនដី តារាវិទូអាចពិនិត្យមើល M77 បានច្បាស់បំផុត នៅក្នុងខែធ្នូ រៀងរាល់ឆ្នាំ។
កាឡាក់ស៊ី M77 គឺដូចទៅនឹង Seyfert ផងដែរ ដែលវាជាកាឡាក់ស៊ីមានស្នូលធ្វើសកម្មភាពខ្លាំងក្លាបំផុត ហើយត្រូវបានគ្របដណ្ដប់ដោយឧស្ម័ន និងធូលីអវកាស ដែលនៅជុំវិញ។ M77 គឺជាកាឡាក់ស៊ី1 ក្នុងចំណោមកាឡាក់ស៊ីមានពន្លឺចែងចាំងជាច្រើន ដែលត្រូវបានសិក្សាស្រាវជ្រាវល្អិតល្អន់បំផុត។ កាលពីថ្ងៃទី24វិច្ឆិកា ឆ្នាំ2018 ក្រុមអ្នកវិទ្យាសាស្ដ្រក៏បានសង្កេតឃើញផ្កាយ1កំពុងតែផ្ទុះ (ដែលគេហៅថា ការផ្ទុះ supernova) នៅក្នុងកាឡាក់ស៊ី M77 នេះផងដែរ៕
ប្រភព៖ សារព័ត៌មានបរទេស
March 19, 2020
ក្រសួងជំរុញអនុវត្តគោលនយោបាយថ្មី សម្រាប់ផលិតកម្មនាំចេញគ្រាប់ស្វាយចន្ទី
ក្រសួងពាណិជ្ជកម្មបានសម្រេចបង្កើតក្រុមការងារ ដើម្បីរៀបចំគោលនយោបាយយុទ្ធសាស្ត្រអភិវឌ្ឍគ្រាប់ស្វាយចន្ទីនៅកម្ពុជា ដើម្បីលើកកម្ពស់ផលិតផល និងការនាំចេញគ្រាប់ស្វាយចន្ទី ដោយលោក ចាន់ រ៉ាស៊ី អនុរដ្ឋលេខាធិការក្រសួងពាណិជ្ជកម្ម ជាអ្នកដឹកនាំក្រុមការងារដែលទើបបង្កើតថ្មីនេះ នឹងធ្វើការសិក្សា ប្រមូលព័ត៌មានទាក់ទងនឹងចង្វាក់ផលិតកម្មគ្រាប់ស្វាយចន្ទី ជាការបណ្តាក់ទុនខាងវិស័យកសិកម្ម ។
សេចក្តីប្រកាសព័ត៌មាន បានឱ្យដឹងថា៖ “ក្រុមនេះមានសមាសភាព 13រូប មកពីក្រសួងពាណិជ្ជកម្ម និងអង្គការសង្គមស៊ីវិល។ ក្រុមការងារបច្ចេកទេស នឹងសម្របសម្រួលផែនការ សកម្មភាព កិច្ចប្រជុំផ្តល់យោបល់លើរបាយការណ៍បច្ចុប្បន្នភាពចង្វាក់ផលិតកម្មគ្រាប់ស្វាយចន្ទី និងសិក្ខាសាលាពិគ្រោះយោបល់ សិក្សាស្រាវជ្រាវ សែ្វងរកដៃគូ និងសហប្រតិបត្តិការជាមួយដៃគូពាក់ព័ន្ធ និងដៃគូអភិវឌ្ឍន៍ក្នុងគោលបំណងបង្កើតគោលនយោបាយគ្រាប់ស្វាយចន្ទីកម្ពុជា”។
យោងតាមសេចក្តីថ្លែងការណ៍ ដែលបានចុះហត្ថលេខាដោយ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម កាលពីថ្ងៃទី25 ខែកុម្ភៈ បានឱ្យដឹងថា ព័ត៌មានប្រមូលបាន នឹងត្រូវបានបញ្ចូលសម្រាប់ការរៀបចំគោលនយោបាយ សម្រាប់ដំណាំនៅកម្ពុជា។ ក្រុមការងារត្រូវបានចាត់ឱ្យធ្វើការសិក្សា និងស្រាវជ្រាវ ដើម្បីប្រមូលព័ត៌មាន ទាក់ទងនឹងខ្សែចង្វាក់ផលិតកម្មគ្រាប់ស្វាយចន្ទី ស្វែងរកធាតុចូលសម្រាប់ធ្វើសេចក្តីព្រាងគោលនយោបាយយុទ្ធសាស្ត្រ លើគ្រាប់ស្វាយចន្ទីនៅកម្ពុជាទៀតផង។
បន្ទាប់ពីចងក្រងព័ត៌មានរួចហើយ សេចក្តីព្រាងគោលនយោបាយ នឹងត្រូវដាក់ជូនរាជរដ្ឋាភិបាល ដើម្បីត្រួតពិនិត្យ និងអនុម័ត មុនពេលអនុវត្តជាគោលនយោបាយជាតិស្តីពីការអភិវឌ្ឍគ្រាប់ស្វាយចន្ទីនៅកម្ពុជា។ ក្រុមនេះក៏នឹងរៀបចំសិក្ខាសាលា និងរៀបចំព្រឹត្តិការណ៍ប្រកួតអាជីវកម្មនៅក្នុងឧស្សាហកម្មស្វាយចន្ទី និងឧស្សាហកម្មកសិកម្មដទៃទៀតផងដែរ។
សេចក្តីព្រាងគោលនយោបាយនេះ ត្រូវបានអនុវត្ត ពីព្រោះផលិតកម្មគ្រាប់ស្វាយចន្ទីរបស់ប្រទេសកម្ពុជាមានការកើនឡើងគួរឱ្យកត់សម្គាល់ ក្នុងរយៈពេលប៉ុន្មានឆ្នាំចុងក្រោយនេះ។ ទោះយ៉ាងណាក្ដីដោយសារតែការអភិវឌ្ឍដំណាំកសិផលនេះ កង្វះដំណើរការខាងកែច្នៃគ្រាប់ស្វាយចន្ទីឆៅនៅក្នុងស្រុក ហើយគ្រាប់ឆៅនេះ នៅតែសំខាន់សម្រាប់ការនាំចេញ និងត្រូវការបណ្តាក់ទុនឱ្យបានពេញលេញផងដែរ។
ប្រធាននាយកដ្ឋានកសិ-ឧស្សាហកម្មនៃក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា មន្ត្រីមកពីនាយកដ្ឋាននេះ នឹងចូលរួមជាមួយក្រសួងពាណិជ្ជកម្ម ដើម្បីធ្វើសេចក្តីព្រាងគោលនយោបាយជាតិថ្មី។
លោក ខាន់ សំបាន ប្រធាននាយកដ្ឋានកសិ-ឧស្សាហកម្មមានប្រសាសន៍ថា៖“យើងកំពុងធ្វើការ ដើម្បីជំរុញការផលិតគ្រាប់ស្វាយចន្ទីនៅក្នុងប្រទេស ដូច្នេះការធ្វើការងារជាមួយក្រសួងពាណិជ្ជកម្ម មន្ត្រីក្រសួងកសិកម្មនឹងចូលរួមជាមួយចំណេះដឹងខាងបច្ចេកទេស”។
លោកបន្ថែមថា តម្លៃគ្រាប់ស្វាយចន្ទី បច្ចុប្បន្នគឺ 1.25 ទៅ 1.5ដុល្លារក្នុង 1គីឡូក្រាម អាស្រ័យលើគុណភាពនៃគ្រាប់ ដោយការផលិតគ្រាប់ស្វាយចន្ទីនៅតែរំពឹងថា នឹងមានកំណើនល្អ នៅឆ្នាំ2020។
យោងតាមទិន្នន័យពីក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ប្រទេសកម្ពុជា បាននាំចេញគ្រាប់ស្វាយចន្ទីចំនួន 202,318តោនកាលពីឆ្នាំមុន ទៅកាន់ទីផ្សារបរទេសកើនឡើង ជិត 100% ពីចំនួន 101,973 តោនក្នុងឆ្នាំ2018។
ដូច្នេះ នៅឆ្នាំ2019 កម្ពុជាបាននាំគ្រាប់ស្វាយចន្ទីឆៅ ទៅលក់លើទីផ្សារអន្តរជាតិ បានដល់ទៅជាង 20ម៉ឺនតោន ពោលគឺ ច្រើនជាងការនាំចេញឆ្នាំ2018 ដល់ទៅ 2ដង។ នេះបើតាមតួលេខផ្តល់ដោយក្រសួងកសិកម្ម រុក្ខាប្រមាញ់ និងនេសាទ។
កាលពីឆ្នាំ2018 សមាគមស្វាយចន្ទីវៀតណាម បានចុះហត្ថលេខាលើអនុស្សរណៈយោគយល់គ្នា (MoU) ជាមួយក្រសួងកសិកម្មកម្ពុជា ដើម្បីធ្វើយ៉ាងណាជំរុញការនាំចេញគ្រាប់ស្វាយចន្ទីឆៅរបស់កម្ពុជា ឱ្យបានដល់ 1លានតោននៅឆ្នាំ2028។ តាមរយៈអនុស្សរណៈនេះ គេត្រូវមានការវិនិយោគធំ និងពន្លាតផ្ទៃដីដាំដើមស្វាយចន្ទី នៅក្នុងប្រទេសកម្ពុជាបន្ថែមទៀត។
សូមបញ្ជាក់ថា ពេលចុះហត្ថលេខាលើអនុស្សរណៈនេះ កម្ពុជាមានផ្ទៃដីដាំស្វាយចន្ទីចំនួន ប្រមាណតែ 10ម៉ឺនហិកតា ដែលផ្តល់ទិន្នផលបានជាង 10ម៉ឺនតោន។ ដូច្នេះ កម្ពុជាត្រូវពង្រីកផ្ទៃដីដាំដុះ 1ជា5 ពោលគឺ 50ម៉ឺនហិកតា នៅឆ្នាំ2022 និងត្រូវសហការជាមួយអ្នកជំនាញវៀតណាម ដើម្បីបង្កើនទិន្នផល។ នៅប្រទេសវៀតណាម ដើមស្វាយចន្ទី 1ហិកតា ផ្តល់ផលប្រមាណ 2តោន ពោលគឺច្រើនជាងកម្ពុជាចំនួន 2ដង។
វៀតណាម បានជំរុញលើកទឹកចិត្ត ឱ្យកម្ពុជាបង្កើនការដាំដុះដើមស្វាយចន្ទី ដោយផ្តល់ជាគ្រាប់ពូជ និងបច្ចេកទេសដាំដុះ។ ការធ្វើវិនិយោគនៅកម្ពុជា សម្រាប់វៀតណាមជាការងាយ ព្រោះកម្ពុជានឹងក្លាយជាប្រទេសអ្នកផ្គត់ផ្គង់ដ៏ជាក់លាក់មួយ ហើយនៅជិតគ្នា។ ផ្នែកមធ្យោបាយដឹកជញ្ជូនក៏ជិត ចំណាយក៏តិច មិនបាច់ស្តុកទុកយូរ ដូច្នេះ គ្រាប់ស្វាយចន្ទី នឹងរក្សាគុណភាពបានខ្ពស់ ប្រសើរជាងគ្រាប់ស្វាយចន្ទីឆៅ នាំចូលមកពីអាហ្វ្រិក។
លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានប្រាប់កាសែតឡារ៉ែនពាណិជ្ជឱ្យដឹងថា៖ “ខ្ញុំធ្លាប់ឃើញក្រសួងកសិកម្មបានទំនាក់ទំនងទីផ្សារដែរ ហើយបានជំរុញឱ្យក្រុមហ៊ុនវៀតណាមខាងផលិតស្វាយចន្ទី ដែលមកជួបរដ្ឋមន្ត្រីកសិកម្មកន្លងមក ឱ្យជួយរកទីផ្សារគ្រាប់ស្វាយចន្ទីរបស់កសិករខ្មែរ។ ចំណែកក្រុមហ៊ុន គឺគាត់ចង់ឱ្យកសិករខ្មែរដាំស្វាយចន្ទីផ្គត់ផ្គង់ឱ្យគាត់ ហើយឱ្យតែមាន(គ្រាប់ស្វាយចន្ទី) ប៉ុន្មានក៏គាត់ទិញយកទាំងអស់។ ព្រោះគាត់ធ្លាប់ទិញគ្រាប់ស្វាយចន្ទីពីប្រទេសអាហ្វ្រិកមានតម្លៃថ្លៃពេក”។
លោកឧកញ៉ាបានមានប្រសាសន៍ថា៖“ខ្ញុំគិតថា នេះជាការរកទីផ្សារដល់កសិករយើងសម្រាប់ដំណាំស្វាយចន្ទី នេះជាការល្អ តែប្រសិនបើមានគោលនយោបាយ ដូចដែលក្រសួងពាណិជ្ជកម្មបានរៀបចំឡើងនេះទៀត វារឹតតែប្រសើរសម្រាប់ដំណាំស្វាយចន្ទី។ ខ្ញុំគាំទ្រការបង្កើតក្រុមការងារបច្ចេកទេសសម្រាប់សិក្សា ដែលមានភារកិច្ចស្រាវជ្រាវ និងចងក្រងសេចក្តីព្រាងគោលនយោបាយយុទ្ធសាស្ត្រអភិវឌ្ឍន៍ស្វាយចន្ទីនៅកម្ពុជា នេះជាការល្អ”។
លោកឧកញ៉ា លឹម ហេង បានបញ្ជាក់ថា៖ “គោលនយោបាយស្វាយចន្ទី នឹងជួយលើកកម្ពស់ចង្វាក់ផ្គត់ផ្គង់ ខណៈកម្ពុជាកង្វះរោងចក្រកែច្នៃគ្រាប់ស្វាយចន្ទី។ ខ្ញុំគិតថា ប្រសិនបើយើងមានគោលនយោបាយស្វាយចន្ទី គឺជាសញ្ញាល្អ ដែលវានឹងផ្តល់ជាជំនួយបច្ចេកទេសដល់កសិករ ហើយក៏នឹងជួយទាក់ទាញអ្នកវិនិយោគនៅពេលអនាគតផងដែរ។ ម្យ៉ាងទៀត ដើម្បីកុំឱ្យឈ្មួញកំណត់តម្លៃ ឬទម្លាក់តម្លៃ ស្រេចតែនឹងចិត្ត”។
តាមរបាយការណ៍ របស់ក្រសួងកសិកម្ម បានបង្ហាញតួលេខថា ផ្ទៃដីសរុបនៃការដាំដុះស្វាយចន្ទីមាន149,660 ហិកតា ទូទាំងប្រទេស។ ជិត 60% ត្រូវបានប្រមូលផល ដែលអាចផ្តល់ទិន្នផលបាន 116,343តោន កាលពីឆ្នាំមុន ហើយដើមស្វាយចន្ទីជាង 500,000ហិកតា ត្រូវបានគ្រោងនឹងដាំ។ ចំណែកទិសដៅសំខាន់ៗសម្រាប់ការនាំចេញគ្រាប់ស្វាយចន្ទីរបស់ប្រទេសកម្ពុជា គឺប្រទេសវៀតណាម រុស្ស៊ី កូរ៉េខាងត្បូង ចិន មីយ៉ាន់ម៉ា ប៉េរូ ឥណ្ឌា អូស្ត្រាលី កោះតៃវ៉ាន់ សិង្ហបុរី ម៉ាឡេស៊ី និងអារ៉ាប៊ី សាអ៊ូឌីត៕
March 19, 2020
ខាត់ សុឃីម និងប្រជាពលរដ្ឋជាង 300នាក់ អំពាវនាវដល់សម្ដេច តវ៉ាមុខតុលាការខេត្តសៀមរាប
កាលពីព្រឹកថ្ងៃទី19 មីនា ឆ្នាំ2020 តារាចម្រៀងល្បីល្បាញអ្នកនាង ខាត់ សុឃីម និងស្វាមី បានរួមគ្នាជាមួយអ្នកតវ៉ាប្រមាណ៣០០នាក់ផ្សេង រួមគ្នាលើកបដាទាមទាឱ្យតុលាការខេត្តសៀមរាប ដោះលែង លោក ឌឹម សួនណាត អគ្គនាយកក្រុមហ៊ុន Enarita បន្ទាប់ពីតុលាការខេត្តសៀមរាប បន្តឃុំខ្លួនលោក បណ្ដាលឱ្យលោក ឌឹម សួនណាត មិនអាចចេញមកសស្រាយបំណុលដល់ដៃគូវិនិយោគទាំងឡាយបាន។ អ្នកនាង ខាត់ សុឃីម និងអ្នកតវ៉ា បញ្ជាក់ថា បើគ្មានការដោះលែងអគ្គនាយកក្រុមហ៊ុន Enarita រូបនេះទេ ការបង់ខាតរបស់គ្រួសាររាប់ពាន់គ្រួសារក៏គ្មានដំណោះស្រាយនោះដែរ។
អ្នកនាង ខាត់ សុឃីម និយាយថា លោកឌឹម សួនណាត គឺជាមនុស្សល្អ តែលោកត្រូវបានចោទប្រកាន់ពីបទលក់ដីខ្យល់ និងឆបោក ហើយត្រូវឃុំក្នុងតុលាការខេត្តសៀមរាប ដែលបណ្ដាលឱ្យអ្នកវិនិយោគគម្រោងជាមួយលោក រាប់ពាន់គ្រួសារគ្មានការសងត្រលប់។ អ្នកនាងលំត្រាតែលោក ឌឹម សួនណាត ត្រូវបានដោះលែង ទើបក្រុមអ្នកបណ្ដាក់ទុនវិនិយោគទាំងអស់ ទទួលបានយុត្តិធម៌ ក្នុងការទទួលបានប្រាក់វិនិយោគជាមួយក្រុមហ៊ុនកន្លងមក។ អ៊ីចឹងហើយ ទើបអ្នកនាង និង គ្រួសារដែលជាដៃគូវិនិយោគជាមួយលោក ឌឹម សួនណាត សរុបប្រមាណ ៣០០នាក់ ត្រូវរួមគ្នាធ្វើញត្តិយាអន្តរាគមន៍ពីសម្ដេចនាយករដ្ឋមន្ត្រី និង នាំគ្នាមកតវ៉ានៅមុខតុលាការខេត្តសៀមរាបតែម្ដង ដើម្បីស្នើឱ្យតុលាការខេត្តសៀមរាប ដោះលែង លោក ឌឹម សួនណាត ដើម្បីកុំឱ្យលោកបន្តជាប់ឃុំ និងអាចឱ្យលោកមករកស៊ីដោះស្រាយបំណុលកូនក្រុមទាំងអស់ ដែលបានដាក់ហ៊ុនមុនពេលតុលាការធ្វើការចោទប្រកាន់។ អ្នកនាងថា បើលោក ឌឹម សួនណាត ជាមនុស្សឆបោកដូចការចោទប្រកាន់ ប្រហែលអ្នកនាង និង គ្រួសារដែលវិនិយោគផ្សេងទៀត មិនប្រឹងចំណាយពេលទេ ប៉ុន្តែមកពីអាណិតលោក និងចង់ឱ្យលោកបានចេញមកវិញ ដើម្បីដោះស្រាយប្រាក់ដើម ដែលគ្រួសារទាំងអស់បានបណ្ដាក់ទុនជាមួយ ទើបនាំគ្នាតវ៉ា។
ម្ចាស់ហ្វេសប៊ុក លោក ខេម ណារ៉ា ដែលត្រូវគេស្គាល់ថាជាផលិតករផង និងជាតួសម្ដែងផង បានអះអាងថាក្រោយការតវ៉ាមួយព្រឹក ខាងអយ្យការតុលាការខេត្តសៀមសៀម បានហៅតំណាង៣នាក់ឱ្យចូលចចារដោយខាងតុលាការសន្យារថានឹងជួយរកដំណោះស្រាយ។ យ៉ាងណាមិញលោកថា ក្រុមអ្នកតវ៉ា នឹងនៅតែបន្តតវ៉ា ប្រសិនបើខាងតុលាការនៅតែបន្តឃុំខ្លួនលោក ឌឹម សួនណាត បន្ទាប់ពីការឃុំខ្លួនអស់៨ខែមិនមានដំណោះស្រាយរាប់ខែហើយ៕

March 19, 2020
ការអានធ្វើឱ្យគុណភាពនៃភាពឆ្លាត ខាងអារម្មណ៍ (EQ) ល្អប្រសើរ
នៅក្នុងពិភពលោក នាយុគសម័យថ្មីនេះ មនុស្សគ្រប់គ្នាត្រូវការសមត្ថភាពកាន់តែច្រើនដើម្បីរស់នៅប្រកបដោយភាពអភិវឌ្ឍ និងសេចក្តីសុខ។ ខុសពីពីអតីតកាល ដែលគិតថាមានត្រឹមតែគុណភាពនៃបញ្ញា្ញា (IQ) បច្ចុប្បន្ននេះ មនុស្សគ្រប់គ្នាត្រូវការភាពឆ្លាតខាងអារម្មណ៍ (EQ) ដើម្បីរស់នៅក្នុងភាពស្ងប់សុខ ដោះស្រាយបញ្ហាក្នុងជីវិតបានល្អ និងអាចធ្វើការងារជាក្រុមបានល្អនៅគ្រប់ទីកន្លែងទាំងអស់។
នៅក្នុងចំណោមវិធីសាស្រ្តបង្កើនភាពវៃឆ្លាតខាងអារម្មណ៍ (EQ) ទាំងអស់ ការអានសៀវភៅត្រូវបានគេមើលឃើញថាជាវិធីសាស្រ្តប្រកបដោយប្រសិទ្ធភាពក្នុងការគ្រប់គ្រងអារម្មណ៍ បង្កើនភាពរឹងមាំផ្នែកផ្លូវចិត្ត និងសមាធិខ្ពស់។
លោក គីម ដារ៉ា ស្ថាបនិកស្ថាប័នបណ្តុះបណ្តាល Start Up Cambodia បានលើកឡើងថា តាមការសង្កេតរបស់លោក ការអានអាចជួយឱ្យការរស់នៅទទួលបានលទ្ធផលល្អប្រសើរយ៉ាងច្រើន។ លោកថានៅពេលលោកធ្លាក់ទឹកចិត្ត លោកចាប់ផ្តើមអានសៀវភៅ ហើយជាលទ្ធផលក្រោយពេលអានរយៈពេល 2ម៉ោង ទៅ3ម៉ោងក្រោយ អារម្មណ៍របស់លោកបានចាប់ផ្តើមល្អប្រសើរ។ បន្ថែមពីលើនេះ ពេលលោកបាត់បង់ជំនឿចិត្ត លោកចំណាយពេលអានប្រមាណជា 2 ទៅ3ម៉ោង ក៏ចាប់ផ្តើមមានអារម្មណ៍ថាល្អប្រសើរផងដែរ។ មានពេលខ្លះទៀតលោកមានអារម្មណ៍ថាខ្ជិល លោកក៏ចាប់យកសៀវភៅមកអានផងដែរដើម្បីឱ្យមានអារម្មណ៍ចង់ធ្វើការឡើងវិញ។
លោក គីម ដារ៉ា បាននិយាយថា៖ «ទោះបីជាខ្ញុំមិនមែនជាអ្នកលក់សៀវភៅ ឬជាអ្នកនិពន្ធសៀវភៅលក់ ក៏ខ្ញុំនៅតែឱ្យតម្លៃដល់ការអាន ព្រោះការអានបានជួយខ្ញុំច្រើន»។
អ្នកអប់រំខាងលើបានលើកឡើងថា ក្រៅពីបញ្ហាខាងលើ សៀវភៅក៏អាចធ្វើឱ្យយើងគ្រប់គ្រងកំហឹងបានល្អផងដែរ ព្រោះនៅពេលយើងខឹងនឹងអ្នកណាម្នាក់ ក្រោយពេលអានសៀវភៅប្រហែលជា2 ម៉ោងអារម្មណ៍ក៏ចាប់ផ្តើមស្រស់ស្រាយឡើងវិញ។ មានពេលខ្លះទៀតនៅពេលយើងគាំងគំនិតគិតអ្វីមិនចេញ ការអានអាចជាវិធីល្អមួយក្នុងការដោះស្រាយបញ្ហាទាំងអស់នោះ ព្រោះសៀវភៅអាចផ្តល់គំនិតច្រើនដើម្បីពិចារណា ឬបង្ហាញជាពន្លឺច្រើនសម្រាប់ជួយឱ្យការគិតកាន់តែទូលំទូលាយ។
ពាក់ព័ន្ធនឹងបញ្ហានេះដែរ លោក ហម សុខនី សហស្ថាបនិកក្លិបយុវជនអ្នកអានសៀវភៅ បានលើកឡើងថាក្រោយពេលអានសៀវភៅច្រើនស្ថានភាពអារម្មណ៍របស់មនុស្សនឹងប្រែប្រួល។ ជាក់ស្តែងយើងឃើញថាអ្នកចំណាយពេលវេលាអានសៀវភៅជាទៀតទាត់ភាគច្រើនជាមនុស្សដែលអាចប្រមូលអារម្មណ៍ និងមានភាពផ្តោតខ្ពស់ ព្រោះការអានសៀវភៅជាប្រភេទល្អនៃការសមាធិម្យ៉ាងដែលអាចធ្វើឱ្យអារម្មណ៍របស់យើងស្ងប់ និងផ្តោតបានល្អ។
បន្ថែមពីលើនេះ អ្នកអានសៀវភៅច្រើនក៏ជាមនុស្សដែលគ្រប់គ្រងកំហឹងបានល្អផងដែរ ព្រោះជាក់ស្តែង យើងឃើញថាមនុស្សឆេវឆាវដែលចាប់ផ្តើមអានសៀវភៅច្រើនឆ្នាំទៅ គាត់បែរជាក្លាយជាមនុស្សថ្មីដែលគិតវែងឆ្ងាយជាងមុន ស្គាល់ពីអារម្មណ៍របស់មនុស្សខាងក្រៅច្រើនជាងមុន និងក្លាយជាមនុស្សម្នាក់ដែលចាប់ផ្តើមប្រើប្រាស់ហេតុផលក្នុងការដោះស្រាយបញ្ហាបានយ៉ាងល្អ។
លោក ហម សុខនី បាននិយាយថា៖ «យើងគ្រប់គ្នាតែងតែព្យាយាមធ្វើគ្រប់លទ្ធភាពដើម្បីរក្សាសុខភាពផ្លូវកាយ ដូចជាការហាត់ប្រាណ ការញ៉ាំអាហារសុខភាព ឬការបង្កើតទម្លាប់ល្អក្នុងការរស់នៅជាដើម តែពេលខ្លះយើងភ្លេចគិតថាសុខភាពផ្លូវចិត្តក៏សំខាន់ផងដែរក្នុងការកសាងក្តីសុខក្នុងជីវិត។ ក្នុងចំណោមវិធីសាស្រ្តល្អៗជាច្រើនក្នុងការកសាងសេចក្តីសុខក្នុងចិត្ត ការអានសៀវភៅ ក៏ជាផ្នែកចម្បងមួយផងដែរក្នុងការជំរុញឱ្យស្ថានភាពផ្លូវចិត្តមានភាពនឹងនរ»។
លោក សុខនី បានបន្ថែមទៀតថា សម្រាប់អ្នកមិនទាន់បានអានសៀវភៅ ហើយកំពុងមានអារម្មណ៍ថាខ្លួនឯងឆេវឆាវ មានអារម្មណ៍ឆាប់ខឹង ឆាប់ភ័យ ឆាប់ភ្លេច ឬធ្វើការងារមិនសូវផ្តោត អាចសាកល្បងចាប់សៀវភៅអានដើម្បីព្យាបាលបញ្ហាទាំងអស់នោះ។
ការអានសៀវភៅដំបូងអាចជារឿងលំបាកសម្រាប់អ្នកមិនសូវចូលចិត្តអាន ព្រោះវាអាចធ្វើឱ្យយើងងងុយគេង ធុញទ្រាន់ ស្ត្រេស ឬអាចធ្វើឱ្យយើងមានអារម្មណ៍នៅមិនសុខជាដើមតែក្រោយពេលចាប់ផ្តើមស្វែងរកចំណុចជក់ចិត្ត ឬបង្កើតចំណូលចិត្តអានបានហើយ យើងនឹងមានអារម្មណ៍ថាវាចាប់ផ្តើមធ្វើឱ្យជីវិតរបស់យើងកាន់តែមានសេចក្តីសុខ។ ជាក់ស្តែង អារម្មណ៍នៅពេលអានសៀវភៅ គឺជាពេលដ៏ស្ងប់ស្ងាត់ បិទភាពទុក្ខកង្វល់ និងរឿងជ្រួលច្របល់ទាំងឡាយក្នុងការរស់នៅ ហើយចូលទៅក្នុងពិភពនៃការស្រមើស្រមៃប្រកបដោយភាពស្រស់ស្អាត វិជ្ជមាន និងក្តីសង្ឃឹម។ ក្រៅពីនេះ យើងឃើញថាសៀវភៅបច្ចុប្បន្ននេះមានគ្រប់ប្រភេទ និងសម្បូរបែប ហេតុនេះសៀវភៅក៏អាចក្លាយជាទីប្រឹក្សាដ៏ល្អផងដែរនៅពេលយើងមានបញ្ហា។ ពិតណាស់ថាក្នុងសម័យបច្ចេកវិទ្យាយើងអាចប្រើប្រាស់អ៊ីនធើណិតដើម្បីដោះស្រាយចម្ងល់បាន តែប្រភពជាច្រើនក្នុងអ៊ីនធើណិតមិនប្រាកដថាមានតម្លៃ ឬត្រឹមត្រុវនោះទេ ខុសពីសៀវភៅដែលមុននឹងចេញផ្សាយត្រូវឆ្លងកាត់ការត្រួតពិនិត្យ និងវាយតម្លៃយ៉ាងល្អិតល្អន់។ ហេតុនេះសូមចាប់ផ្តើមអានដើម្បីបង្កើនគុណភាពជីវិតឱ្យកាន់តែខ្លាំង ដើម្បីអភិវឌ្ឍខ្លួនឱ្យក្លាយជាធនធានមនុស្សប្រកបដោយប្រសិទ្ធភាពខ្ពស់៕
March 19, 2020
អ្នកបើកយន្តហោះម្នាក់ បើកយន្តហោះអំពាវនាវឱ្យប្រជាជនក្នុងពិភពលោកប្រយុទ្ធនឹង “COVID-19” ដោយការ “ស្ថិតនៅក្នុងផ្ទះ”
វីរុសធ្វើឱ្យពួកយើងត្រូវតែ “ឈានរំលង” ក្ដីភ័យខ្លាចទៅមុខឱ្យបាន
និងរួមកម្លាំងកាយ កម្លាំងចិត្តគ្នា ធ្វើនូវអ្វីដែលម្នាក់ៗអាចធ្វើបានដោយមិនពិបាក
ដើម្បី “បញ្ឈប់ការឆ្លងរាលដាល” របស់មេរោគវីរុសកូវីដ-19
ដោយវិធីមួយ គឺ “ផ្អាកការធ្វើដំណើរ” និង “ស្ថិតនៅក្នុងផ្ទះ” ក្នុងអំឡុងពេលនេះ។
វេបសាយព័ត៌មាន UPI បានរាយការណ៍ថា ថ្មីៗនេះ មានអ្នកបើកយន្តហោះជនជាតិអូទ្រីសម្នាក់
បាននាំយន្តហោះម៉ាស៊ីន1 ប្រភេទ ដៃម៉ន់ ឌីអេ 40 ដៃម៉ន់ ស្តារ៍
បើកហោះឡើងចេញពីអាកាសយានដ្ឋាន វីនើ ណយឆ៍ ដាត់ថ៍ ក្នុងប្រទេសអូទ្រីស
ឆ្ពោះទៅទីក្រុង ហ្គ្រាស ភាគខាងត្បូងទីក្រុង វៀនណា ដោយប្រើរយៈពេលហោះហើរ 24នាទី…។
ទាំងអស់នេះ គឺមិនមែនដើម្បី “ដឹកជញ្ជូនអ្នកដំណើរ” នោះទេ
តែ ត្រូវការ “ផ្ញើសារ” ឱ្យមនុស្សគ្រប់គ្នា ពួតដៃគ្នា “ស្ថិតនៅក្នុងផ្ទះ”
ផ្អាកការធ្វើដំណើរដែលមិនសំខាន់ ឬមិនចាំបាច់ក្នុងអំឡុងពេលនេះ
ដើម្បីជួយគ្នាបញ្ឈប់ការឆ្លងរាលដាលរបស់វីរុសកូវីដ-19 ដោយខ្សែផ្លូវហោះហើរ ដែលអ្នកបើកយន្តហោះរូបនោះបានហោះឆ្លងកាត់
ពេលគូសភ្ជាប់គ្នាជាខ្សែតាមប្រព័ន្ធរ៉ាដាហើយនោះ វាចេញជាតួអក្សរដែលមានន័យថា “STAY HOME”
ឬ “ស្ថិតនៅក្នុងផ្ទះ” ណា៎ទាំងអស់គ្នា!!!
ប្រភព៖ សារព័ត៌មានបរទេស
March 19, 2020
ម្ចាស់បទចាបយំល្វើយៗ ដាក់មួយបទថ្មី «Covid 19 អង្រួនពិភពលោក» ប្រាប់ពីវិធីការពារសុខភាព
មុននេះបន្ដិច នៅលើបណ្ដាញសង្គមយូធូបរបស់ក្រសួងព័ត៌មាន បានបង្ហោះបទចម្រៀងថ្មីរបស់លោក ចាន់ មករា ដែលគេស្គាល់ថាម្ចាស់បទ «ចាបយំល្វើយៗ» ក្រោមចំណងជើងថា «Covid 19 អង្រួនពិភពលោក» ជាការច្រៀងរៀបរាប់អំពីវិធីការពារសុខភាពពីការឆ្លងវីរុសងថ្មីដ៏សាហាវមួយនេះ។
ខ្លឹមសារនៃបទទាំងមូលឆ្លុះបញ្ចាំងអំពីជំងឺផ្លូវដង្ហើមថ្មីកូវីដ១៩ នឹងផ្ញើសារទៅកាន់មហាជនខ្មែរទាំងអស់ឱ្យតាមដានព័ត៌មានពិត ប្រើម៉ាសឬក្រម៉ាជាប្រចាំ ធ្វើអនាម័យដោយការលាងសម្អាតដៃជាញឹកញាប់ ហើយក៏ជាសារផ្ញើទៅកាន់អាជីវករ កុំព្យាយាមឡើងថ្លៃម៉ាសក្រមា អំឡុងពេលដែលជំងឺនេះរីករាលដាលនេះ។
គួរឱ្យដឹងដែរថា មួយបទនេះមិនត្រឹមត្រូវប្រកបដោយការផ្ដាំផ្ញើនោះទេ ជាពិសេសគឺផ្ដោតសំខាន់ទៅលើការលើកទឹកចិត្តពីការភ័យខ្លាចផងដែរ។ ចង់ដឹងថា អត្ថន័យ និងអត្ថរសនៃបទចម្រៀងនេះរណ្ដំយ៉ាងនោះ សូមទស្សនាវីដេអូខាងក្រោមនេះ ៖
https://youtu.be/6EmIiBfAMVk
March 19, 2020
អ្នកដឹកនាំសម្ដែង រិទ្ធ អូមេហ្កា បង្ហាញមុខអ្នកឆបោកប្រាក់១៥ ម៉ឺនដុល្លារ
ថ្មីៗនេះ នៅលើបណ្ដាញសង្គមហ្វេសប៊ុកគេមើលឃើញថា អ្នកដឹកនាំសម្ដែង លោក រិទ្ធ អូមេហ្កា បានទម្លាយមុខមាត់មនុស្ស២នាក់ ដែលទទួលប្រាក់កក់លោករហូតដល់១៥ម៉ឺនដុល្លារដើម្បីកុម្ម៉ង់ម៉ាស់ ប៉ុន្តែហួសថ្ងៃកំណត់បែរជាគ្មានម៉ាស់ឱ្យលោក និងមិនព្រមបង្វិលលុយសង១ជាពីរតាមការព្រមព្រៀង។ លោកប្រកាសប្ដឹងអ្នកទាំងពីរ ខណៈដែលការបង្ហោះរបស់លោក ក៏ជាការទម្លាយពីសង្គ្រាមលក់ម៉ាស់ ក្រោយពេលផលិតផលមួយនេះត្រូវប៉ាន់ ឡើងថ្លៃ។
លោក រិទ្ធ អូមេហ្កា បានប្រកាសនៅលើហ្វេសប៊ុកកាលពីថ្ងៃទី១៦ មីនា ឆ្នាំ២០២០ ថា”សូម បងប្រុស មុំ សុខុម និង បងស្រី គង់ ដាលី ចូលខ្លួនមកដោះស្រាយជាមួយខ្ញុំឱ្យបងលឿនបំផុតក្នុងថ្ងៃនេះ រឺ ថ្ងៃស្អែកជាមួយបញ្ហាលុយកក់ចំនួន 150000$ (១៥ម៉ឺនដុល្លារ) និងក្នុងកុងត្រាគឺគ្មានអីវ៉ាន់ 1សងនឹង2 = 300000$(៣០ម៉ឺនដុល្លារ)ព្រោះពេលនេះតេទៅក៏មិនលេីក ក្រុមហ៊ុនក៏បិទទ្វារ។ បេីមិនដូចនេះទេ ខ្ញុំនឹងឱ្យមេធាវីខ្ញុំរៀបចំចាត់វិធានការទៅតាមផ្លូវច្បាប់ ព្រោះខ្ញុំទុកពេលឱ្យយូរដែលហេីយ…. សូមជួយ Share ឱ្យបុគ្គលខាងលេីចូលខ្លួនដោះស្រាយជាមួយខ្ញុំផងនឹងនៅមានអ្នកផ្សេងៗទៀត ត្រៀមខ្លួនឱ្យហេីយទៅ”។
លោក រិទ្ធ អូមេហ្កា ទម្លាយថានេះជាមូលហេតុដែលធ្វើអោយលោកមានបញ្ហាជំពាក់បំណុលមនុស្សមួយចំនួន ដោយសារតែលោកគ្មានម៉ាស់ដើម្បីលក់តាំងពេលឡើងថ្លៃ ហើយលុយដើមដែលកក់ទិញម៉ាស់ក៏កប់ក្នុងបណ្ដឹង។ នៅមិនទាន់ដឹងថា សាមីខ្លួនទាំង២ដែលជាប់ពីបទឆបោក និង រំលោភលើសេចក្ដីទុកចិត្តរបស់ លោក រិទ្ធ អូមេហ្កា នឹងឆ្លើយតបបែបណានៅឡើយទេ ក្រោយពីមានការបង្ហោះនេះ៕

March 19, 2020
ដើម្បីអាចគេចផុតពីរោគរាតត្បាត ជនជាតិអាមេរិកាំង1ក្រុម បង្កើត “ជំរំស្វ័យការពារ” នៅតំបន់ព្រៃភ្នំ
ផ្លូវលំតូចមួយនៅឯតំបន់ Virginia ខាងលិច ក្បែរជើងភ្នំ Appalachia នាំទៅកាន់ជំរំមួយដែលស្ថិតនៅក្នុងព្រៃរបស់មនុស្សមួយក្រុមដែលគេចាត់ទុកថាជាអ្នកកាន់ “លទ្ធិការពារខ្លួន” (survivalism)។
ក្រុមនេះ បានចាប់ផ្ដើមត្រៀមតាំងពីយូរមកហើយ សម្រាប់ការដួលរលំនៃអរិយធម៌របស់មនុស្សជាតិ មុនពេលរោគរាតត្បាត COVID-19 បានមកដល់។
ជាមួយនឹងសម្ភារប្រើប្រាស់ ស្បៀងអាហារដែលមានសុពលភាពប្រើប្រាស់ដល់ទៅ25ឆ្នាំ រួមនឹងអង្ករ និងម្សៅមីជាដើម មនុស្សទាំងនេះ បាននាំគ្នាគេចចេញពីតំបន់ដែលអាចឆ្លងរោគ COVID-19 ទៅរស់នៅក្នុងតំបន់សុវត្ថិភាពដែលស្ថិតនៅក្នុងព្រៃជ្រៅ។ ស្បៀងអាហាររបស់ពួកគេត្រូវបានតម្រៀបយ៉ាងមានរបៀប នៅក្នុងឃ្លាំងក្រោមដី ដែលធ្វើអំពីបេតុង និងដែកយ៉ាងរឹងមាំ។
ក្រុមមនុស្សកាន់ “លទ្ធិការពារខ្លួន” ដែលគេហៅក្រុម Fortitude Ranchនេះ សម្បូរទៅដោយសម្ភារចាំបាច់ដែលកំពុងត្រូវបានគេតាម “ប្រមាញ់” នៅទូទាំងពិភពលោក នោះគឺ ក្រដាសអនាម័យ និងម៉ាស់។
Steve Rene ជាអ្នកគ្រប់គ្រងជំរំលាក់ខ្លួនដែលមានផ្ទៃដីទំហំ 40ហិកតា បានឱ្យដឹងថា “ពេលនេះ វា (ជំរំលាក់ខ្លួន) មានតម្លៃខ្លាំងណាស់”។
បាវចនារបស់ក្រុម Fortitude Ranch គឺ “ត្រៀមរួចរាល់សម្រាប់ស្ថានភាពអាក្រក់បំផុត និងរីករាយនឹងបច្ចុប្បន្នភាព!”។ ជារៀងរាល់ឆ្នាំ សមាជិកក្នុងក្រុមនេះ មានពេល2សប្ដាហ៍ដើម្បីមកលេង និងសម្រាកលម្ហែកាយក្នុងតំបន់ដាច់ស្រយាល និងពោរពេញដោយសម្រស់ធម្មជាតិ ព្រមទាំងអាចដើរកម្សាន្ត ឬស្ទូចត្រី នៅក្នុងទន្លេដែលមានឈ្មោះថា “Lost”។ ក្រុមនេះ ក៏មានសាខាមួយផ្សេងទៀត នៅក្នុងរដ្ឋ Colorado ផងដែរ។
លោក Rene ដែលសមាជិកម្នាក់ក្នុងក្រុម “លទ្ធិការពារខ្លួន” Fortitude Ranch បានឱ្យដឹងថា “នេះមិនមែនជាក្រុមមនុស្សល្ងង់ល្ងីល្ងើ ដែលចេះតែគិតអំពីថ្ងៃអវសាននៃពិភពលោកនោះទេ។ យើងមិនបានរើសអើង ហើយយើងក៏មិនមានទំនាក់ទំនងជាមួយក្រុមប្រដាប់អាវុធណាមួយនោះដែរ”។
ប៉ុន្តែ នៅលើទីតាំងនៃមុមទាំង4របស់ជំរំនៃក្រុម Fortitude Ranchនេះ សុទ្ធតែមានប៉មយាម ហើយក្នុងបន្ទប់ទទួលភ្ញៀវក៏មានកាំភ្លើងកាណុងវែង1ដើមផងដែរ ដើម្បីបង្ហាញថា ក្រុមនេះ ធ្វើសកម្មភាពយ៉ាងហ្មត់ចត់។ Rene និយាយថា “ក្រុមមនុស្សដែលអស់សង្ឃឹម គឺគេធ្វើរឿងអស់សង្ឃឹម”។
ក្រុម Fortitude Ranch នេះ មិនបានចាត់ទុកកម្លាំងបរទេស ឬកម្លាំងពិភពខាងក្រៅ ជាការគំរាមកំហែងលើពួកគេនោះទេ ប៉ុន្តែ ពួកគេបានចាត់ទុកជនជាតិអាមេរិកាំងខ្លួនឯង ដែលមានភាពច្របូកច្របល់ អាចមានសកម្មភាពប្លន់ស្បៀងអាហាររបស់ពួកគេ នៅពេលមានការវាយប្រហារដោយអាវុធនុយក្លេអែរ ឬអាវុធជីវសាស្ត្រ ការបះបោរផ្នែកនយោបាយ និងមហារោគរោគរាតត្បាត។ល។
“ជាក់ស្ដែងបញ្ហាខាងលើនេះ កម្រនឹងកើតឡើង ប៉ុន្តែ វានៅតែមានលទ្ធភាពអាចកើតឡើង។ បើសិនអ្នកមិនបានត្រៀមខ្លួន អ្នកនឹងមិនដឹងថាត្រូវទៅណា និងធ្វើអ្វីនោះទេ។ ពេលមានអាសន្នធំកើតឡើង ភាពច្របូកប្របល់នឹងធ្វើឱ្យមនុស្សអាចដណ្ដើមគ្នារស់ ហើយនិងមានបញ្ហាជាច្រើនហួសពីសមត្ថភាពទប់ទល់របស់យើង” លោក Rene រៀបរាប់។
គណៈកម្មការនៃក្រុមខាងលើនេះ មានសមាជិកចំនួន5នាក់ ក្នុងនោះមាន Rene ផងដែរ។ ក្នុងករណីបន្ទាន់ Rene នឹងសម្រេចចិត្តថាតើត្រូវប្រកាសអាសន្នដែរ ឬអត់។ ពេលនោះ សមាជិកនៃគណៈកម្មការ នឹងត្រូវបានអញ្ជើញមកកាន់ជំរំខាងលើ។ អ្នកដែលមានបំណងចូលកាន់ជំរំរបស់ក្រុម Fortitude Ranch គឺត្រូវតែប្រើប្រាស់ពាក្យសម្ងាត់ដែលក្រុមនេះបានកំណត់។
ករណីមានមហារោគរាតត្បាតកើតឡើងទូទាំងប្រទេស អ្នកចំណូលថ្មីដែលចូលមកកាន់ជំរំនេះ នឹងត្រូវវាស់កម្ដៅខ្លួន មុនពេលត្រូវបានអនុញ្ញាតឱ្យចូលក្នុងតំបន់ដែលមានប្រព័ន្ធអេកូឡូស៊ី ដែលអាចចិញ្ចឹមជីវិតដោយខ្លួនឯងបាន។ នៅក្នុងជំរំនេះ មានអណ្ដូងទឹក ប្រព័ន្ធថាមពលព្រះអាទិត្យ វិទ្យុ ផ្ទះកញ្ចក់ សត្វចិញ្ចឹមផ្សេងៗ ដូចជា មាន់ ពពែ គោ រួមនឹងកន្លែងរំលាយសាកសពអ្នកជំងឺដែលស្លាប់ដោយសាររោគរាតត្បាត។
ស្ថាបនិករបស់ Fortitude Ranch គឺ Drew Miller ដែលជាអតីតអ្នកជំនាញផ្នែកចារកម្មយោធា ដែលបានបញ្ចប់ការសិក្សានៅសាកលវិទ្យាល័យ Harvard។
ខុសពីប្រព័ន្ធបន្ទប់លាក់ខ្លួននៅក្រោមដីដ៏មានតម្លៃថ្លៃ ដែលមហាសេដ្ឋីនានាបានសាងសង់ Fortitude Ranch របស់ Drew Miller ផ្ដោតទៅលើក្រុមមនុស្សដែលមានទ្រព្យធម្យម និងទាប។ អ្នកដែលចូលមកសម្រាកនៅទីនេះ គ្រាន់តែចំណាយ1,000ដុល្លារអាមេរិកប៉ុណ្ណោះក្នុង1ឆ្នាំ សម្រាប់កញ្ចប់ទាបបំផុតដែលមានគ្រែ1នៅក្នុងបន្ទប់ក្រោមដី។
ថ្មីៗនេះ Rene ទទួលបានការស្នើ និងសាកសួរព័ត៌មានជាច្រើនតាមរយៈអ៊ីម៉េល ខណៈដែលរោគរាតត្បាត COVID-19 កំពុងបង្កភាពវឹកវរនៅពាសពេញសហរដ្ឋអាមេរិក៕
ប្រភព៖ សារព័ត៌មានបរទេស
March 18, 2020
អាថ៌កំបាំងថែទាំស្បែកមុខរបស់បុរស
ក្រៅពីរូបរាងសង្ហា និងសម្លៀកបំពាក់ដែលស័ក្តិសមនឹងខ្លួនប្រាណហើយនោះ នៅមានរឿងមួយទៀតដែលបុរសមិនអាចធ្វើព្រងើយកន្តើបានឡើយ ដើម្បីភាពស្អាតសង្ហាដ៏ឥតខ្ចោះ នោះគឺរឿងសម្រស់ស្បែក ជាពិសេសគឺសម្រស់ស្បែកមុខតែម្តង។ មនុស្សប្រុសជាច្រើនមិនដឹងថាប្រភេទស្បែកនីមួយៗរបស់ខ្លួននោះ គួរបានទទួលការមើលថែទាំខុសប្លែកពីគ្នានោះទេ ហើយដោយនិស្ស័យរបស់មនុស្សប្រុសដែលមិនចូលចិត្តអ្វីដែលរញេរញ៉ៃផងនោះ ទើបធ្វើឱ្យអ្នកខ្លះព្រងើយកន្តើយនឹងវិធីមើលថែស្បែកមុខដែលត្រឹមត្រូវ ឬមិនប្រើផលិតផលសម្អាតមុខឱ្យត្រូវនឹងប្រភេទស្បែកមុខរបស់ខ្លួន។ ដូច្នេះថ្ងៃនេះ ឡារ៉ែន សូមនាំយកនូវវិធីថែទាំផ្ទៃមុខតាមប្រភេទស្បែកមុខនីមួយៗមកជម្រាបជូនមិត្តអ្នកអានដែលជាសុភាពបុរសឱ្យបានដឹង ដើម្បីបន្ថែមនូវភាពស្រស់សង្ហាឱ្យបានគ្រប់គ្រឿងតែម្តង។

– បុរសស្បែកមុខស្ងួត
លក្ខណ: ៖ អាចសង្កេតឃើញតាមរយ:ស្បែកដែលស្ងួតប្រេះ ឬមានឡើងស្នាមក្រហមញឹកញាប់ រួមទាំងអាចមានអារម្មណ៍ដឹងថា មានភាពស្ងួតក្រៀមនៅលើស្បែកមុខ ឬពេលលុបលាងមុខរួចនឹងមានអារម្មណ៍តឹងៗនៅលើស្បែកមុខ។
ការមើលថែទាំ ៖ ចូរជ្រើសរើសហ្វូមលាងមុខប្រភេទរក្សាភាពសើម និងប្រើគ្រីមបំប៉នស្បែកមុខរាល់ពេលព្រឹកក្រោយពេលកោរពុកមាត់ និងមុនពេលចូលគេង រួមទាំងរកហ្វូមខាត់ (Scrub) មកប្រើមួយសប្តាហ៍2ដង ដើម្បីកម្ចាត់កោសិកាស្បែកចាស់ៗចេញផង។
– បុរសស្បែកមុខឡើងខ្លាញ់
លក្ខណ: ៖ អ្នកអាចដឹងពីភាពឡើងខ្លាញ់នេះដោយគ្រាន់តែយកម្រាមដៃអង្អែលលើផ្ទៃមុខ ភាពរលោងខ្លាញ់នឹងដឹតជាប់នៅលើម្រាមដៃរបស់អ្នកយ៉ាងច្បាស់តែម្តង ទោះជាអ្នកទើបតែលាងសម្អាតមុខហើយថ្មីៗក៏ដោយ ក្រៅពីនេះនៅមានកើតមុនច្រើនជាងស្បែកមុខប្រភេទផ្សេងទៀតផង។
ការមើលថែទាំ ៖ គួរងាកមកប្រើជេលលាងមុខដែលមានផ្សំដោយអាស៊ីត សាលីសៃលិក ដែលជួយឱ្យមុនស្រកចុះ និងកាត់បន្ថយជាតិខ្លាញ់នៅលើផ្ទៃមុខ ហើយក្រោយពេលលាងមុខ អ្នកក៏គួររកថូនើរ៍មកជូតសម្អាតស្បែកម្តងទៀត ដើម្បីកាត់បន្ថយការកើតមុន។ អ្វីដែលមិនគួរភ្លេចនោះគឺ ផលិតផលបំប៉នស្បែកមុខក្រោយពេលកោរពុកមាត់រួច ក៏ជាវត្ថុដ៏ចាំបាច់បំផុតផងដែរ ព្រោះផលិតផលថែទាំស្បែកមុខទាំងនេះនឹងជួយបន្ថែមភាពស្រស់ស្រាយ និងជួយកាត់បន្ថយជាតិខ្លាញ់នៅលើផ្ទៃមុខបានច្រើនទៀតផង។
– បុរសដែលមានស្បែកងាយប្រតិកម្ម
លក្ខណ: ៖ ស្បែកងាយកើតស្នាមអុចៗ កន្ទួលដោយសារធូលីដី ឡើងអាការក្រហមដោយសារស្ថានភាពជុំវិញខ្លួន ឬឡើងខ្មៅក្រៀមដោយសារកម្តៅថ្ងៃដែលក្តៅខ្លាំងជាដើម។
ការមើលថែទាំ ៖ គួរប្រឹក្សាជាមួយអ្នកជំនាញ ដើម្បីជ្រើសរើសប្រើផលិតផលដែលស័ក្តិសមនឹងស្បែកមុខរបស់អ្នក ដោយគោលការណ៍ភាគច្រើនគឺ ព្យាយាមជ្រើសយកផលិតផលណាដែលផលិតពីធម្មជាតិឱ្យបានច្រើនបំផុតតាមដែលអាចទៅរួច។ ចៀសវាងប្រើផលិតផលណាដែលមានក្លិនក្រអូប ឬមានចំណែកផ្សំរបស់អាល់កុល។
– បុរសដែលមានស្បែកផ្សំ
លក្ខណ: ៖ បុរសភាគច្រើន ច្រើនតែមានស្បែកក្នុងលក្ខណ:នេះ ដោយស្បែកបែបផ្សំនេះនឹងមានភាពឡើងខ្លាញ់នៅម្តុំ T-zone ដែលមានដូចជា ម្តុំថ្ងាស ច្រមុះ និងចង្កា ចំណែកឯថ្ពាល់វិញមានលក្ខណ:ជាស្បែកស្ងួត។
ការមើលថែទាំ ៖ អ្នកចាំបាច់ត្រូវប្រើទាំងផលិតផលសម្រាប់ស្បែកស្ងួត និងស្បែកឡើងខ្លាញ់ មើលថែទាំតាមចំណុច T-zone ដោយប្រើផលិតផលថែទាំសម្រាប់ស្បែកខ្លាញ់។ រីឯកន្លែងថ្ពាល់វិញ ក៏មើលថែទាំដោយផលិតផលសម្រាប់ស្បែកស្ងួត ហើយអ្វីដែលសំខាន់នោះគឺ គួរប្រើប្រាស់គ្រីមការពារកម្តៅថ្ងៃ និងគ្រីមថែបំប៉នស្បែក ដើម្បីការពារស្បែកមុខឱ្យបានល្អផង។
បានដឹងពីប្រភេទ និងវិធីមើលថែទាំស្បែកមុខគ្រប់ប្រភេទបែបនេះហើយ ឡារ៉ែន សង្ឃឹមថា ប្រហែលជាធ្វើឱ្យបុរសៗយើងនាំគ្នាបែរមកមើលថែទាំស្បែកមុខកាន់តែច្រើនឡើងហើយ ព្រោះផ្ទៃមុខគឺជាកន្លែងមួយដែលមនុស្សយើងតែងក្រឡេកមើលមុនគេបង្អស់ ដូច្នេះមិនគួរធ្វេសប្រហែស ឬធ្វើព្រងើយកន្តើយឡើយ បើសិនជាអ្នកចង់បានផ្ទៃមុខស្អាតស្រស់សង្ហា ក្មេងជាងវ័យ និងរលោងភ្លឺថ្លា៕
March 18, 2020
Ronaldo ចេញមុខមកបកស្រាយថា មិនបានបើកសណ្ឋាគាររបស់ខ្លួនដាក់អ្នកជំងឺ COVID-19 ទេ
កាលពីប៉ុន្មានថ្ងៃមុននេះ មានព័ត៏មានជាច្រើនបានចុះផ្សាយថា កីឡាករជម្រើសជាតិព័រទុយហ្គាល់ Christiano Ronaldo បានប្រកាសដាក់សណ្ឋាគាររបស់ខ្លួន ធ្វើជាមន្ទីរពេទ្យសម្រាប់ព្យាបាលអ្នកជំងឺ COVID-19។
ពាក់ព័ន្ធនឹងព័ត៏មានបោកប្រាស់ ដែលបានផ្សព្វផ្សាយពាសពេញពិភពលោកនេះ បានធ្វើឱ្យកីឡាកររូបនេះ ចេញមុខមកប្រតិកម្ម ដោយបានបកស្រាយថា សណ្ឋាគាររបស់គេ គឺមិនមែនជាមន្ទីរពេទ្យឡើយ ដូចនេះវាមិនអាចទៅរួចឡើយដែលលោកនឹងប្រើវិធីដ៏ល្ងង់ខ្លៅបែបនេះដើម្បីជួយទប់ស្កាត់ជំងឺនោះ។
គួរបញ្ជាក់ថា ប្រមុខសណ្ឋាគារក្នុងទីក្រុង Lisbon របស់ Cristiano Ronaldo បានចេញមកបដិសេធចំពោះព័ត៌មានថា ពួកគេអនុញ្ញាតឱ្យយកកន្លែងរបស់ពួកគេ ធ្វើជាមន្ទីរពេទ្យបណ្ដោះអាសន្ន សម្រាប់ដាក់អ្នកជំងឺកូរ៉ូណា៕
March 18, 2020