Category: សង្គម និងសេដ្ឋកិច្ច

ប៉ុន្មានម៉ោងមុន បើយោងតាមគណនីហ្វេសប៊ុករបស់តារាកំប្លែង ខាត់ សុឃីម ទើបតែបានបង្ហោះរូបភាពជាច្រើនសន្លឹកទៀតដោយប្រកាសថា “ផ្ទះជួលរបស់ខ្ញុំធ្វើការ បញ្ចុះតម្លៃ50% 015225221” ដោយប្រកាសបញ្ចុះតម្លៃបែបនេះធ្វើឱ្យតារាស្រីរូបនេះទទួលការគាំទ្រយ៉ាងខ្លាំង។ បន្ទាប់មកទៀត តារាស្រីសម្តីចាក់ទឹកមិនលេចរូបនេះ កាលពីព្រឹកមិញ ក៏បានរៀបរាប់យ៉ាងវែងអន្លាយថា៖

“ចាប់ផ្តើមមានអារម្មណ៍ថាស្មុគស្មាញហើយ! មួយជីវិតមិនចេះនៅទំនេរទេ ទោះឈឺក្តីក៏ខ្ញុំនៅតែទ្រាំទៅធ្វើការដែរដើម្បីជីវិត តែដល់ពេលកូវីដវាយលុកការងារទាំងអស់ត្រូវបានផ្អាក តែលោកធនាគារមិនបានផ្អាកទេ ចឹងជម្រើសរបស់ខ្ញុំគឺមានតែស្នើរសុំទៅធនាគារតែ 2ចំណុចទេបើសិនមិនអាចពន្យាការបង់បានខណៈខ្ញុំបាត់បង់ចំណូល

_ទី1៖ អាចយកដីផ្ទះខ្ញុំទៅលក់ឡៃឡុងចុះឱ្យរួចគ្នាទាំងពីរធនាគារ ដែលដីខ្ញុំតំលៃលើសបំណុលនៅឡើយ

_ទី2៖ ហាមដាក់ Black List ឈ្មោះខ្ញុំក្នុងCBCដាច់ខាតព្រោះក្នុងកាលៈទេសៈប្រទេសជួបកល្យយុគ្គ (គ្មានចំណូលតែនៅចំនាយ)

ហេតុដូចនេះសូមអស់លោកធនាគារទាំងឡាយធ្វើតាមការគួរចុះ តែប្រវត្តិ Credit ខ្ញុំបានបង់ធនាគារកន្លងមកគឺល្អទាំងអស់ ដូច្នេះដំណាក់កាលនេះតាមដំណើរចុះ! គ្មាននរណាចង់ទេ!សូមអរគុណ ” ក្រោយការបង្ហោះបែបនេះគេឃើញមានអ្នកគាំទ្រជាច្រើនបានបញ្ចេញមតិយោបល់ផ្សេងៗគ្នាជាច្រើន៕

មិនចាំបាច់ទាល់តែទៅស្វែងរកសេវាកម្មថែរក្សាសម្រស់ ក៏លោកអ្នកអាចទទួលបានភាពស្រស់ស្អាតដែរ ព្រោះថា ការដែលអ្នកមានទម្លាប់ល្អសម្រាប់អនុវត្តហើយនោះ ភាពស្រស់ស្អាតក៏ពិតជាមិនរត់ទៅណាចោលអ្នកដែរ។ កាន់តែពិសេសជាងនេះទៅទៀតនោះគឺ ប្រសិនបើអ្នកអាចធ្វើជាអ្នកដឹកនាំគ្រប់សមាជិកនៅក្នុងគ្រួសារឱ្យមានទម្លាប់ថែរក្សាភាពស្អាតឱ្យបានត្រឹមត្រូវដូចអ្នកដែរនោះ ធានាថា គ្រប់គ្នាពិតជាបានស្រស់ស្អាតជាមិនខាន។ សូមចាំថា ការអនុវត្តវិធីងាយៗនៅផ្ទះដោយខ្លួនឯងឱ្យបានញឹកញាប់ វានឹងក្លាយជាទម្លាប់ ហើយនៅពេលដែលគ្រប់គ្នានៅក្នុងគ្រួសារមានទម្លាប់ល្អហើយនោះ សូមធានាថា ក្តីបារម្ភដែលទាក់ទងនឹងការថែរក្សាសម្រស់ក៏ពិតជាមិនអាចមករំខានអ្នកណាម្នាក់នៅក្នុងផ្ទះរបស់អ្នកបានឡើយ។ សូមអនុវត្តដូចខាងក្រោមនេះ៖

1. ស្បែកស្អាតត្រូវចាប់ផ្តើមពីការសម្អាត : ការសម្អាតស្បែកជាប្រចាំនាពេលព្រឹក និងពេលយប់ជាអ្វីដែលអ្នកត្រូវតែធ្វើឱ្យបានជាប់ជាប្រចាំ។ ក្នុងករណីដែលអ្នកចង់ឱ្យការសម្អាតផ្ទៃមុខរបស់អ្នកកាន់តែមានលក្ខណៈពិសេស និងមានប្រសិទ្ធភាពខ្ពស់ ព្រមទាំងផ្តល់នូវគុណប្រយោជន៍ជាច្រើនដល់សម្រស់ស្បែករបស់អ្នកទៀតនោះ អ្នកអាចយកទឹកឃ្មុំបន្តិចលាយជាមួយទឹកដោះគោឆៅមួយស្លាបព្រា រួចយកវាទៅកម្តៅ3-4វិនាទីក្នុងម៉ាស៊ីនមៃក្រូវេវ ហើយយកមកលាបឱ្យសព្វលើផ្ទៃមុខ និងក រួចលាងសម្អាតចេញជាមួយទឹកក្ដៅតិចៗជាការស្រេច។

2. ចំហុយជាកូនសោបើកទ្វារនៃភាពស្រស់ស្រាយ : ចំហុយមុខរបស់អ្នកឱ្យបានម្ដងក្នុងមួយសប្ដាហ៍ ដើម្បីសម្អាតជាតិពុល មុនក្បាលខ្មៅ និងស្នាមតូចៗចេញពីស្បែកមុខ។ ការបន្ថែមប្រេងផ្សេងៗឱ្យត្រូវទៅតាមប្រភេទស្បែករបស់អ្នក គឺជាការជួយឱ្យការចំហុយស្បែកមុខកាន់តែមានប្រសិទ្ធភាពខ្ពស់ឡើង។ សូមចាំថា ការចំហុយស្បែកគឺជាវិធីដែលជួយឱ្យស្បែកមានភាពស្រស់ស្រាយ និងសុខភាពល្អជាប់ជានិច្ច។

3. គ្រឿងម៉ាស្សានៅផ្ទះ : ការម៉ាស្សាសម្អាតស្បែកដោយប្រើផលិតផលដែលមានស្រាប់នៅក្នុងផ្ទះម្តង ឬពីរដងក្នុងមួយសប្តាហ៍គឺជាទម្លាប់ដ៏ប្រសើរមួយ ដែលអ្នកគួរតែនាំគ្នាអនុវត្ត។ គ្រាន់តែយកប្រេងអូលីវបន្តិចលាយជាមួយនឹងស្ករត្នោតបន្តិច ហើយយកមកត្រដុសថ្នមៗលើស្បែក រួចសម្អាតចេញដោយទឹកក្តៅឧណ្ហៗ។ ក្រោយមកបន្តិចកុំភ្លេចបិទរន្ធញើសរបស់អ្នកដោយការសាចទឹកត្រជាក់លើផ្ទៃមុខផង។ វិធីនេះនឹងចូលរួមចំណែកធ្វើការកម្ចាត់ និងសម្អាតស្បែកចាស់ៗចេញ ដើម្បីផ្តល់ឱកាសឱ្យស្បែកថ្មីបានបង្ហាញវត្តមាននៅលើផ្ទៃមុខរបស់អ្នកវិញជាមិនខាន។

4ចងចាំជានិច្ចថាស្បែកត្រូវមានសំណើម : ប្រេងបន្លែ ដូចជា ប្រេងអាល់ម៉ុនជាដើមត្រូវបានគេទុកថាជាជំនួយការដ៏ល្អបំផុតក្នុងការនាំមកនូវសំណើមដល់ស្បែក និងកាត់បន្ថយស្នាមជ្រួញ។

5. កុំបំភ្លេចម៉ាសជំនួយផ្ទៃមុខ : ការប្រើម៉ាសបិទមុខដែលអ្នកទិញមកស្រាប់ៗអាចនឹងធ្វើឱ្យស្បែករបស់អ្នកប្រឈមនឹងបញ្ហាផ្សេងៗ ហើយអ្នកក៏អាចនឹងត្រូវចំណាយប្រាក់ច្រើនបន្តិច ដូច្នេះប្រសិនបើអ្នកចង់ឱ្យមានភាពចំណេញ និងមិនមានក្តីបារម្ភទៀតនោះ សូមសាកល្បងនាំសមាជិកក្នុងគ្រួសារបិទម៉ាសដែលអ្នកធ្វើឡើងដោយខ្លួនឯងដែលបានមកពីការផ្សំចូលគ្នានៃគ្រីម មួយស្លាបព្រា ចេកទុំកិនម៉ដ្ឋ មួយផ្លែ និងវីតាមីនEមួយគ្រាប់។ លាបលើផ្ទៃមុខទុកចោលប្រហែលជា15នាទី សិមសម្អាតចេញជាការស្រេច។

ទាំងនេះសុទ្ធតែជាវិធីដែលអាចនាំអ្នក និងសមាជិកក្នុងគ្រួសាររបស់អ្នកទៅរកភាពស្រស់ស្អាត ប៉ុន្តែសូមចងចាំផងថា ក្រៅពីការធ្វើតាមវិធីទាំងនេះហើយនោះ អ្នកក៏ត្រូវថែរក្សាស្បែកដោយការលាបឡេការពារកម្តៅថ្ងៃឱ្យបានជាប្រចាំ កុំជក់បារី ត្រូវទទួលទានទឹកឱ្យបានគ្រប់គ្រាន់ មិនថាជាទឹកធម្មតា ឬទឹកបន្លែ ផ្លែឈើដែលចម្រាញ់ចេញពីបន្លែផ្លែឈើស្រស់ៗនោះទេ៕

កាលពីព្រឹកថ្ងៃទី 25 ខែមីនា ឆ្នាំ2020 នេះ ក្រសួងសេដ្ឋកិច្ច និងហិរញ្ញវត្ថុបានចេញសារាចរណែនាំថ្មីមួយពាក់ព័ន្ធនឹងការលើកលែងពន្ធលើប្រាក់បំណាច់​អតីតភាពការងារចាប់ពីឆ្នាំពីឆ្នាំ 2020តទៅ។

នៅក្នុងសេចក្តីប្រកាសបានបញ្ជាក់ថា ក្រសួងនឹងលើកលែងពន្ធលើប្រាក់បៀវត្ស​ចំពោះប្រាក់រំលឹកអតីតភាពការងារមុនឆ្នាំ 2019 និងប្រាក់បំណាច់អតីតភាពការងារ​ឆ្នាំ 2019 របស់កម្មករនិយោជិត​ជាជនជាតិខ្មែរនៃផ្នែកវាយនភណ្ឌ​កាត់ដេរ និងផលិតស្បែកជើង និងផ្នែកដទៃទៀត ដោយ​អនុវត្ត​តាម​សារាចរណែនាំលេខ 003 សហវ ចុះថ្ងៃទី11 ខែមេសា ឆ្នាំ2019 ស្តីពីការលើកលែងពន្ធ​លើប្រាក់រំលឹក​អតីតភាពការងារមុនឆ្នាំ 2019 និងប្រាក់អតីតភាព​ការងារ​ចាប់ពីឆ្នាំ 2019 តទៅមុខ និងសេវាការងារ​ធ្វើ បណ្តុះបណ្តាល​ បញ្ជូន និង​គ្រប់គ្រង​ពលករ ឬកម្មសិក្សាការី​ទៅធ្វើការនៅបរទេស។

ចំពោះប្រាក់អតីតភាពការងារ​ចាប់ពីឆ្នាំ 2020 របស់កម្មករនិយោជិត នៃផ្នែកវាយនភណ្ឌកាត់ដេរ និងស្បែកជើង និងផ្នែក​ដទៃទៀត​ត្រូវអនុវត្ត​តាមគោលការណ៍ដូចជាលើកលែងពន្ធលើប្រាក់បៀវត្ស​ចំពោះប្រាក់បំណាច់​អតីតភាពការងារ ដែលមានទឹកប្រាក់មិនលើសពី 4លានរៀលក្នុងមួយឆ្នាំ។ ចំពោះប្រាក់បំណាច់អតីតភាព​ការងារដែលមានទឹកប្រាក់លើសពី 4លានរៀលក្នុងមួយឆ្នាំត្រូវជាប់ពន្ធលើប្រាក់បៀវត្ស។ ក្នុងករណីដែលប្រាក់បំណាច់អតីតភាពការងារ​ត្រូវបើកក្នុងមួយឆ្នាំ2ដង ការគណនាពន្ធលើប្រាក់បៀវត្សចំពោះប្រាក់បំណាច់អតីតភាពការងារត្រូវអនុវត្តដូចជា៖

– ការបើកប្រាក់បំណាច់លើកទី1៖ ត្រូវ​យកចំនួនទឹកប្រាក់បំណាច់អតីតភាពការងារដែលត្រូវទទួលដក 2លានរៀល ហើយចំនួននៅសល់ត្រូវបូកបញ្ចូលទៅក្នុងមូលដ្ឋាន​ប្រាក់បៀវត្ស​ជាប់ពន្ធប្រចាំខែដែលប្រាក់បំណាច់អតីតភាពការងារ​ត្រូវបានបើក។

– ការបើកប្រាក់បំណាច់លើកទី2៖ ត្រូវអនុវត្ត​ដូចការបើកប្រាក់បំណាច់អតីតភាពការងារលើកទី1ដែរ ដោយត្រូវយកចំនួន​ទឹកប្រាក់បំណាច់អតីតភាពការងារ​ដែលត្រូវទទួលលើកទី2 ដក2លានរៀល ហើយចំនួន​នៅសល់ត្រូវ​បូកបញ្ចូល​ទៅក្នុងមូលដ្ឋាន​ប្រាក់បៀវត្ស​ជាប់ពន្ធប្រចាំខែដែលប្រាក់បំណាច់ត្រូវបើក។

ចំពោះការចំណាយលើការទូទាត់ប្រាក់បំណាច់អតីតភាពការងារ ត្រូវ​បានអនុញ្ញាតឱ្យកាត់កងពីប្រាក់ចំណូលជាប់ពន្ធសម្រាប់ឆ្នាំជាប់ពន្ធដែលមានការទូទាត់លើប្រាក់អតីតភាពការងារ៕

ថ្មីៗនេះ កំពូលតារាចម្រៀងស្រីពីរដួងប្រចាំផលិតកម្មហង្សមាសរួមមាន អ្នកនាង ឱក សុគន្ធ កញ្ញា និងពេជ្រ​ សោភា បានបង្ហោះរូបភាពជាច្រើនសន្លឹក ដែលគេមើលឃើញពីការគាំទ្រផលិតផលបន្លែធម្មជាតិរបស់កូនខ្មែរ ដែលកំពុងដាក់លក់នៅក្នុងផ្សារកសិផល ឡេង ណាវ៉ាត្រា។

ជាពិតណាស់ ដើម្បីឱ្យកាន់តែមានទំនុកចិត្តលើកសិផលខ្មែរ ដែលកំពុងដាក់លក់ក្នុងផ្សារបន្លែធម្មជាតិ ឡេង ណាវ៉ាត្រា ថ្មីៗនេះក្រុមអ្នកជំនាញខាងកសិកម្ម បានបង្ហាញលក្ខណៈ ពិសេសរបស់បន្លែ ផ្លែ ឈើ ត្រី សាច់ និង ផលិតផលជាច្រើនទៀត ដល់សាធារណជន និងបានដាក់ឱ្យដំណើរ ការសាកល្បង ជិតកន្លះខែមកហើយ ដោយទទួលបានគាំទ្រពីបងប្អូនខ្មែរយើង ដោយសារតែផ្សារមួយនេះ ប្រមូល ទិញតែផលិតផលធម្មជាតិ របស់កសិករខ្មែរលក់ តែកសិផលធម្មជាតិ របស់កសិករខ្មែ​រ​ ។

លោក សម ពិទូ អ្នកគ្រប់គ្រងបច្ចេកទេសកសិកម្ម និងត្រួតពិនិត្យផលិតផល បានប្រាប់អ្នកសារព័ត៌មានឡារ៉ែនថា ផលិតផលដែលបានដាក់លក់ក្នុងផ្សារទាំងអស់ គឺក្រុមហ៊ុនបានទិញពី ប្រជាកសិករស្ទើរគ្រប់ ខេត្តពោលគឺមានចំនួន១៨ខេត្ត ដោយនៅក្នុងនោះ ក្រុមការងារលើជំនាញកសិកម្ម បានចុះទៅដល់តាមបណ្ដាខេត្តក្រុងទាំងនោះ ដែលមានការដាំដុះ បន្លែ ផ្លែ ឈើ ធម្មជាតិ ។ ក្នុងនោះដែរ យើងបានចងក្រងជាភ្នាក់ងារ ដាំ បន្លែ ផ្លែ ឈើ តាមលក្ខណៈបច្ចេកទេសត្រឹមត្រូវ សម្រាប់ផ្គត់ផ្គង់មកផ្សារ ដោយខាងក្រុមហ៊ុន នឹងចាំទទួលទិញកសិផល របស់ពួកគាត់យកមកលក់បន្ត នូវតម្លៃ ដែលពួកគាត់អាចទទួលយកបាន ។ លោកបន្តថាទន្ទឹមគ្នានោះដែរ បន្លែ ផ្លែ ឈើ ក៏ដូចជា ត្រី សាច់ ដែលបងប្អូនកសិករផលិតមកនោះ សុទ្ធតែត្រូវបានធ្វើតេស្តជាមុន ហើយបញ្ជាក់ថាគ្មានជាតិគីមី ទើបអាចយកមកដាក់លក់ក្នុងផ្សារទំនើបនេះបាន ។

គួរបញ្ជាក់ទៀតថា «ផ្សារកសិផលធម្មជាតិ ឡេង ណាវ៉ាត្រា» មានទីតាំងស្ថិត នៅអគារ #S3-17 តាមបណ្តោយ ផ្លូវ ឧកញ៉ា ទេពផន st. (182) ផ្នែកខាងមុខនៃផ្សារទំនើប អូឡាំព្យា ។លោកអ្នកអាចកុម្មង់ទិញតាមរយៈ វិបសាយ «ផ្សារកសិផលធម្មជាតិ ឡេង ណាវ៉ាត្រា»ឬ Mobile App (Playstore) ៖ Navatra Market [សូមដោនឡូត] និងលេខ ទូរស័ព្ទ 0000 (សម្រាប់ Cellcard ឥតគិតថ្លៃ ) និង ០១១ ៤៤៤ ៤៤៤ ឬមួយលោកអ្នក គ្រាន់តែចុចកុម្ម៉ង់ ទិញតាមវិបសាយ ឬ Mobile app ក៏បាន នោះក្រុមការងារ នឹងដឹកជូនភ្លាមៗ ដោយឥតគិតថ្លៃ ក្នុងរយៈពេលតែ ២០នាទី ប៉ុណ្ណោះ​ ៕

ដោយសារតែជំងឺជាច្រើនបានវាយលុក នៅលើវិស័យកសិកម្ម នៅតាមតំបន់ និងប្រទេស​ជិតខាង ដូចជាជំងឺសារ៍(SARS) ជំងឺH1N1, ជំងឺគ្រុនផ្តាសាយបក្សី និងជំងឺប៉េស្តជ្រូកអាហ្វ្រិក ជាដើម ហើយថ្មីៗនេះក៏មានជំងឺកូវីដ19 ទៀតផងនោះ បានធ្វើ​ឱ្យ​ប្រទេសកម្ពុជាទទួលរងនូវជំងឺទាំងនោះផងដែរ និងបាន​ធ្វើឱ្យ​វិស័យកសិកម្មកម្ពុជា នៅតែមិន​អាច​វិវឌ្ឍ​ខ្លួន​ឱ្យរីកចម្រើនបាននៅឡើយ។

ប៉ុន្តែទោះជាយ៉ាងណាក្តី​ យើងសង្កេតឃើញពីការខិតខំប្រឹងប្រែងរបស់កសិករ និងរដ្ឋាភិបាល ដែលបានជម្នះ​បញ្ហាទាំងនេះ បង្កើនការចិញ្ចឹមសត្វ​ ក្នុងវិស័យកសិកម្មឱ្យបានរីកចម្រើន។ ដូចជាក្រុមហ៊ុន 3PLE FARM ដែលបានធ្វើកសិដ្ឋាន​ចិញ្ចឹមមាន់​សាច់ មួយរយៈកន្លងមក និងបច្ចុប្បន្នកំពុងតែពង្រឹងខ្លួន ​ដើម្បីស្វែង​​រកទីផ្សារផ្គត់ផ្គង់សាច់មាន់សម្រាប់អតិថិជនកម្ពុជា ​និងនាំចេញ។

លោក ថុល រិទ្ធិស័ក្តិ អ្នកគ្រប់គ្រងទូទៅ ដែលមានជំនាញផ្នែកលក់ បានប្រាប់កាសែតឡារ៉ែន​ពាណិជ្ជ​ឱ្យ​ដឹងថា៖«ខ្សែចង្វាក់ផលិតកម្មរបស់សត្តឃាតដ្ឋានយើង ដែលបានចាប់​ផ្តើមសាកល្បងដំណើរ​ការ​កាលពីខែមេសា ឆ្នាំកន្លងទៅ មានទីតាំងនៅភូមិឈើទាល ឃុំជម្ពូវ័ន្ត ស្រុកជុំគីរី ខេត្តកំពត»។

លោកបន្តថា៖«សត្តឃាត​ដ្ឋាន​នេះ​បានបំពាក់ទៅដោយឧបករណ៍ និងសម្ភារបច្ចេកទេស​ទំនើបស្វ័យ​ប្រវត្តិមក​ពីសហភាពអឺរ៉ុប អាមេរិក និងអូស្រ្តាលី ដោយសហការវិនិយោគជា​មួយក្រុមហ៊ុន​ម៉ា​ឡេស៊ី។​ ​ដោយ​ឧបករណ៍បច្ចេកទេសទាំងនេះ ធានាបាននូវអនាម័យ គុណភាព និងសុវត្ថិភាព​លើ​ផលិត​ផលសាច់ ​ឆ្លើយ​តប​បានយ៉ាងពេញលេញតាមតម្រូវការទីផ្សារ និងតម្រូវចិត្តអ្នកបរិភោគ ដែលតែងតែ​គិត និងបារម្ភ​អំពី​គុណ​ភាពសាច់ខ្វះអនាម័យនាពេលបច្ចុប្បន្ន»។

លោកបានឱ្យដឹងថា សត្តឃាតដ្ឋានរបស់ក្រុមហ៊ុន 3PLE FARM មានសមត្ថភាព ​ពិឃាត​មាន់ បានចំនួន 12ពាន់ក្បាល ក្នុង​1ថ្ងៃ ដោយប្រើកម្លាំងពលកម្ម 50នាក់។

លោក រិទ្ធិស័ក្តិ បានឱ្យ​ដឹងទៀតថា៖«កសិដ្ឋានមាន់របស់ក្រុមហ៊ុន 3PLE FARM របស់ខ្ញុំ ក្នុង1ឆ្នាំ ចិញ្ចឹម​មាន់បានប្រមាណជាង 1លានក្បាល ជាប្រភេទ​មាន់សាច់។ ក្នុងការចិញ្ចឹម​មាន់​សាច់នេះ កសិដ្ឋាន​របស់​ខ្ញុំ បានចាប់ផ្ដើមតាំងពីឆ្នាំ2016 មករហូតដល់បច្ចុប្បន្ន យើងមានរោងចក្រ​សត្តឃាតដ្ឋានដែលបានដំណើរការនៅឆ្នាំ2018 លើផ្ទៃដី 8ហិកតា»។
លោកបានមានប្រសាសន៍ឱ្យដឹងថា៖«ក្នុង 1ថ្ងៃ កសិដ្ឋានរបស់ខ្ញុំមានសមត្ថភាព​បញ្ចេញ​មាន់បាន 3,000ក្បាលទៅក្នុងទីផ្សារ ដោយការចិញ្ចឹមមាន់សាច់នេះ ត្រូវប្រើរយៈពេលចិញ្ចឹម 35ថ្ងៃ​ទៅ 40ថ្ងៃ យើងនឹងបានទទួលផលហើយ ដោយមាន់ 1ក្បាល អាចមានទម្ងន់ជាមធ្យមពី ​2.2 ទៅ 2.4គីឡូ​​ក្រាម»។

លោក រិទ្ធិស័ក្តិ ក៏បានបញ្ជាក់ផងដែរថា ក្រុមហ៊ុន 3PLE FARM មានលក្ខណៈប្លែកពីគេត្រង់ថា ​ក្រុម​ហ៊ុន​​មាន​កន្លែងពន្លះសាច់ លាងសម្អាត និងវេចខ្ចប់ដោយខ្លួនឯង ដែលជាក្រុម​ហ៊ុនដំបូងគេនៅ​ស្រុកខ្មែរ។ មានន័យថា យើងធ្វើដោយខ្លួនឯង ដោយ​​​កាត់ជាផ្នែកៗ រួចយើងរៀបចំវេចខ្ចប់ដោយម៉ាស៊ីនស្តង់ដាទំនើប រួចទើបបញ្ជូនទៅ​ឱ្យអតិថិជន ដូចជាភោជនីយដ្ឋាន និងសណ្ឋាគារធំៗ​។

លោកបញ្ជាក់ទៀតថា សម្រាប់មាន់សាច់​នៅស្រុកខ្មែរយើង មាន់សាច់ក្នុងកសិដ្ឋានរបស់លោក មាន​ទីផ្សារ​គោលដៅគឺ​ហាងធំៗ ដោយហាងទាំងនោះ ត្រូវការគុណភាពសាច់មាន់ប្រភេទនេះ។ ដូច្នេះ​គេ​បាន​ទទួលស្គាល់មាន់សាច់របស់យើង ដែលយើងបានចរាចរលើទីផ្សារកន្លងមក។

លោក រិទ្ធិស័ក្ត បានបញ្ជាក់ឱ្យដឹងថា៖«ក្នុងការលក់ តាមសាច់មាន់របស់ខ្ញុំ គឺមាន់ទាំង​មូល​លក់​ក្នុងតម្លៃ 3.5ដុល្លារ ក្នុង 1គីឡូក្រាម។ សាច់ទ្រូងសុទ្ធតម្លៃ 4.8ដុល្លារ ក្នុង 1គីឡូក្រាម​, ស្លាប​លក់​តម្លៃ 4ដុល្លារ ក្នុង 1គីឡូក្រាម។​ ការលក់សាច់មាន់តាមផ្នែកនេះ គឺយើងមានកម្មករដែលរៀបចំ​សាច់តាមផ្នែក ដោយមានជំនាញ ស្តង់ដា ​ហើយក្នុងមាន់មួយ យើងអាចលក់បានតាំងពីជើង ដល់​គ្រឿងក្នុង ហើយ​ការ​​​លក់ គឺលក់ជាប្រចាំតែម្តង ដោយពុំឱ្យមានអាក់ខានឡើយ»។

លោកបានបញ្ជាក់ឱ្យដឹងថា៖«មាន់នៅកសិដ្ឋានខ្ញុំ ខ្ញុំបានប្រើម៉ាក PAMAK All Natural CHIC​KEN ហើយការធ្វើកសិដ្ឋាននេះ ​ខ្ញុំប្រើកម្មករប្រមាណ 50នាក់ ដែលពួកគាត់មានជំនាញ ​និង​បទពិសោ​ធច្បាស់លាស់ រួមទាំងជនជាតិអារ៉ាប៊ីសាអ៊ូឌីត​ និងហ្វីលីពីនដែលជាកម្មករជំនាញផងដែរ ​ហើយយើង​ក៏មា​ន​​​​ការ​រក្សា​សុវត្ថិ​ភាព និងការ​ពារ​សុខភាពពួកគេទៀតផង»។

លោក រិទ្ធិស័ក្តិ បានឱ្យដឹងទៀតថា៖«មាន់សាច់នៅក្នុងកសិដ្ឋានរបស់ខ្ញុំ មានមនុស្សជា​ច្រើន​ក្នុងសង្គម​បច្ចុប្បន្ន ដែលចង់បានគុណភាព ស្អាត អនាម័យ ដូច្នេះកសិដ្ឋាន​របស់ខ្ញុំ គឺមានសាច់មាន់​ប្រភេទ​ហ្នឹងដាក់លក់នៅទីផ្សារ»។

ជាមួយគ្នានេះដែរ លោកបានបញ្ជាក់ថា កសិដ្ឋានលោក ក៏មានគំនិត​ចិញ្ចឹមមាន់សាច់នេះ​ ក្នុងលក្ខណៈមួយដែលទីផ្សារក្នុងស្រុកកំពុងត្រូវការ នាពេលបច្ចុប្បន្នដែរ គឺ៖

ទី1-កសិដ្ឋានចិញ្ចឹមមាន់ និងផលិតសាច់មាន់នេះ បានចិញ្ចឹម​មាន់​ និង​ផលិតសាច់មាន់ក្នុង​គោល​បំណងជួយទប់ស្កាត់ និងការពារ និងកាត់បន្ថយការនាំចូលមាន់ពីខាងក្រៅ និងផ្គត់ផ្គង់​ទី​ផ្សារ​ក្នុងស្រុក​ឱ្យ​បានគ្រប់គ្រាន់។

ទី2-គឺជាផលិតផលខ្មែរសុទ្ធសាធ ដែលខ្មែរអាចធ្វើ និងផលិតបាន និងជាផលិតផល​នាំមុខ​​គេ ក្នុងស្រុកខ្មែរផងដែរ។

លោកថុល រិទ្ធិស័ក្តិ បានបញ្ជាក់ថា៖«រោងចក្រកសិដ្ឋាន សម្អាត និងវេចខ្ចប់​មាន់សាច់​របស់​​ខ្ញុំ នេះ ខ្ញុំ​បានប្រើ​ប្រាស់​ថវិកាប្រមាណជិត 10លានដុល្លារសម្រាប់ការងារនេះ ហើយមាន់​សាច់របស់ខ្ញុំ​បាន​លក់​ចូលក្នុងទីផ្សារ ដែលមាន់នេះមាន​ការសហការ និងយក​ពូជមក​ពីប្រទេសថៃ។ ចំពោះ​​ចំណី​អា​ហារវិញ យើងមានរោងចក្រផលិតជាក្រុមហ៊ុនក្នុងស្រុក ដែលផលិតចំណីសត្វរបស់ប្រទេសកូរ៉េ។

ទោះជាយ៉ាងណាក្តី លោក រិទ្ធិស័កិ្ត បានឱ្យដឹងថា កសិដ្ឋានចិញ្ចឹមមាន់សាច់របស់​លោក មិន​ទាន់​បាននាំចេញទៅក្រៅប្រទេសទេ បានត្រឹមតែផ្គត់ផ្គង់ទីផ្សារក្នុងស្រុកប៉ុណ្ណោះ ប៉ុន្តែ​យើងមានការទំនាក់​ទំនង​ពីទីផ្សារខាងក្រៅមកច្រើនហើយ យើងកំពុងតែជជែក​គ្នាសិន។

លោក ថុល រិទ្ធិស័ក្តិ បានបញ្ជាក់ថា៖«ខ្ញុំសង្ឃឹមថា នឹង​រៀបចំធ្វើការ​ងារនេះ ​​​ តែពេលស្ថិត​ក្នុងដំណាក់កាលជជែកគ្នានេះ ខ្ញុំក៏មានគម្រោងពង្រីកការផលិត សម្រាប់​ការនាំចេញ​ទៅ​ទី​ផ្សារក្រៅប្រទេសដែរ។​ ចំពោះ​ការដាក់​លក់​​មាន់សាច់នៅក្នុងគ្រប់ទីផ្សារទំនើប ​ក៏ជាទិស​ដៅ​របស់កសិដ្ឋានខ្ញុំ​ដែរ ហើយក្រុមហ៊ុន​របស់ខ្ញុំក៏កំពុងចរចាផងដែរ តែពុំទាន់បានលទ្ធផលនៅឡើយ ក៏ប៉ុន្តែខ្ញុំជឿជាក់ថា​វានឹងទទួលបានផលវិជ្ជមានក្នុងពេល​ឆាប់ៗនេះ៕

ក្រសួងអប់រំ យុវជន និងកីឡា កាលពីពេលថ្មីៗនេះបានចេញសេចក្តីប្រកាស​ដល់អាណាព្យាបាល​ និងសិស្សានុសិស្សដើម្បីទទួលបានមេរៀនភាសាខ្មែរ និងគណិតវិទ្យាថ្នាក់ទី1 ទី2 និងទី3។

នៅក្នុងសេចក្តីប្រកាសព័ត៌មាននោះបានលើកឡើងថា ក្នុងអំឡុង​ពេលនៃការអនុវត្តវិស្សមកាលតូចមុនកាលកំណត់ ក្រសួងបាន និងកំពុងអនុវត្តកម្មវិធីសិក្សាដោយប្រើប្រាស់បច្ចេកវិទ្យាបង្រៀនពីចម្ងាយ ដើម្បីគាំទ្រ​ដល់ការរៀនសូត្រតាមប្រព័ន្ធអេឡិចត្រូនិក (e-learning) សម្រាប់ជួយដល់សិស្សដែលកំពុងិក្សាតាមផ្ទះ។ មាតាបិតាអាណាព្យាបាល និងសិស្សានុសិស្សថ្នាក់ទី1 ទី2 និងទី3 អាចចូលមើល​ និងសិក្សាពីវីដេអូបង្រៀនដោយលោកគ្រូ អ្នកគ្រូចំណានៗ​តាមមធ្យោមួយចំនួនដូចជា៖

1.ការផ្សាយផ្ទាល់​ស្តីពីការបង្រៀនភាសាខ្មែរ និងគណិតវិទ្យា​ថ្នាក់ទី1 ទី2 និងទី3 តាមរយៈទំព័រ Facebook ផ្លូវការរបស់កម្មវិធីកុមាររៀនកុមារចេះ www.facebook.com/123komar
2.បណ្តាញ YouTube ផ្លូវការរបស់ក្រសួង​អប់រំយុវជន និងកីឡា www.youtube.com/moeys
3.ទំព័រ Facebook ផ្លូវការរបស់ក្រសួង​គឺ www.facebook.com/moeys.gov.kh
4.មជ្ឈមណ្ឌល​សិក្សាអេឡិកត្រូនិក​របស់ក្រសួងគឺ elearning.moeys.gov.kh
5.App របស់ E-School Cambodia តាមផ្នែក EG1 សម្រាប់ថ្នាក់ទី1 EG2សម្រាប់សិស្សថ្នាក់ទី2 និង EG3សម្រាប់សិស្ស្ថថ្នាក់ទី3៕

ក្រសួងសេដ្ឋកិច្ច និងហិរញ្ញវត្ថុ និងទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (Japan International Cooperation Agency ឬ JICA ប្រចាំនៅកម្ពុជាបានចេញសេចក្តីប្រកាសព័ត៌មានរួមមួយ ស្តីពីពិធីចុះហត្ថលេខា ក្នុងការផ្តល់ហិរញ្ញប្បទានដល់គម្រោងចំនួន5 ដែលមានទឹកប្រាក់ជិត 600លានដុល្លារអាមេរិក។

ពិធីចុះហត្ថលេខាក្នុងការផ្តល់ហិរញ្ញប្បទានដល់គម្រោងចំនួន5 ក្នុងនោះលើលិខិតប្តូរសារចំនួន5 និងលើកិច្ចព្រមព្រៀងឥណទានសម្បទានចំនួន2 ត្រូវបានរៀបចំឡើង ក្រោមអធិបតីភាពរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា កាលពីព្រឹកថ្ងៃទី24 ខែមីនា ឆ្នាំ2020។
ក-ការចុះហត្ថលេខា៖ លោក ប្រាក់ សុខុន ឧបនាយករដ្ឋមន្រ្តី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ជាមួយលោក Masahiro MIKAMI ឯកអគ្គរាជទូតជប៉ុន ប្រចាំនៅកម្ពុជា លើលិខិតប្តូរសារ(Exchange of Notes)ស្តីពីការផ្តល់ហិរញ្ញប្បទានដល់គម្រោងចំនួន5 ដែលមានទឹកប្រាក់សរុបប្រមាណ 312.37លានដុល្លារអាមេរិក។ លិខិតប្តូរសារចំនួន5 នេះរួមមាន៖

1- គម្រោងពង្រីកប្រព័ន្ធផ្គត់ផ្គង់ទឹកស្អាតក្នុងក្រុងតាខ្មៅ (ទឹកប្រាក់ចំនួន 3,421 លានយ៉េន ត្រូវជាប្រមាណ 30.7លានដុល្លារអាមេរិក)។
2- គម្រោងសមាហរណកម្មការបោសសម្អាតមីន និងសង្គ្រោះជនពិការដោយសារមីន (ទឹកប្រាក់ចំនួន1,000លានយ៉េន ត្រូវជាប្រមាណ 8.97លានដុល្លារអាមេរិក)។
3- គម្រោងកម្មវិធីអភិវឌ្ឍន៍សេដ្ឋកិច្ច និងសង្គម តាមរយៈការផ្ដល់ជារថយន្ត និងសម្ភារដល់កម្ពុជា សម្រាប់កិច្ចប្រជុំអាស៊ាន 2022(ទឹកប្រាក់ចំនួន 300លានយ៉េន ត្រូវជាប្រមាណ 2.7លានដុល្លារអាមេរិក)។
4- គម្រោងធ្វើឱ្យប្រសើរឡើងនូវកំណាត់ផ្លូវជាតិលេខ5 (ពីស្ពានព្រែកក្ដាម – ធ្លាម្អម ខេត្តពោធិ៍សាត់) ដំណាក់កាលទី3 ដែលមានទឹកប្រាក់ចំនួន 11,715លានយ៉េន ត្រូវជាប្រមាណ 108 លានដុល្លារអាមេរិក។
5- គម្រោងធ្វើឱ្យប្រសើរឡើងនូវកំណាត់ផ្លូវជាតិលេខ5 (ពីធ្លាម្អម ខេត្តពោធិ៍សាត់ – ក្រុងបាត់ដំបង និងពីក្រុងសិរីសោភ័ណ – ក្រុងប៉ោយប៉ែត) ដំណាក់កាលទី2 ដែលមានទឹកប្រាក់ចំនួន 17,702លានយ៉េន ត្រូវជាប្រមាណ 162លានដុល្លារអាមេរិក។

ខ- ការចុះហត្ថលេខា៖ អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្ត្រីក្រសួង សេដ្ឋកិច្ច និងហិរញ្ញវត្ថុ ជាមួយលោក SUGANO Yuichi ប្រធានទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន (JICA) ប្រចាំនៅកម្ពុជា លើកិច្ចព្រមព្រៀងឥណទានសម្បទានចំនួន2 ដែលមានទឹកប្រាក់សរុបប្រមាណ 270លានដុល្លារអាមេរិក។ កិច្ចព្រមព្រៀងឥណទានសម្បទាន ចំនួន2 នេះ ជាកញ្ចប់ឥណទានសម្រាប់បន្ថែមដល់គម្រោងទាំង2 រួមមាន៖

1- គម្រោងធ្វើឱ្យប្រសើរឡើង នូវកំណាត់ផ្លូវជាតិលេខ5 (ពីស្ពានព្រែកក្ដាម – ធ្លាម្អម ខេត្តពោធិ៍សាត់)ដំណាក់កាលទី3 ដែលមានទឹកប្រាក់ចំនួន 11,715លានយ៉េនត្រូវជាប្រមាណ 108លានដុល្លារអាមេរិក។
2- គម្រោងធ្វើឱ្យប្រសើរឡើងនូវកំណាត់ផ្លូវជាតិលេខ5(ពីធ្លាម្អម ខេត្តពោធិ៍សាត់ – ក្រុងបាត់ដំបង និងពីក្រុងសិរីសោភ័ណ – ក្រុងប៉ោយប៉ែត) ដំណាក់កាលទី2 ដែលមានទឹកប្រាក់ចំនួន 17,702 លានយ៉េន ត្រូវជាប្រមាណ 162 លានដុល្លារអាមេរិក
ជារួម គម្រោងធ្វើឱ្យប្រសើរឡើងនូវកំណាត់ផ្លូវជាតិលេខ5 (ពីស្ពានព្រែកក្តាម-ក្រុងប៉ោយប៉ែត) ក្នុងក្របខ័ណ្ឌឥណទានសម្បទានជប៉ុន មានប្រវែងសរុប 366គម បានបែងចែកជា 3ផ្នែកធំៗគឺ៖
1- ភាគខាងជើង (ពីក្រុងបាត់ដំបង – ក្រុងសិរីសោភ័ណ) កំណាត់ផ្លូវមានប្រវែងសរុប 84.74គម ក្នុងនោះ ផ្លូវមេមានប្រវែង 51.48គម និងផ្លូវវាងក្រុងបាត់ដំបង មានប្រវែង 23.92គម និងផ្លូវវាងក្រុងសិរីសោភ័ណ មានប្រវែង 9.34 គម។
2- ភាគខាងត្បូង (ពីស្ពានព្រែកក្តាម – ធ្លាម្អម ខេត្តពោធិ៍សាត់) កំណាត់ផ្លូវមានប្រវែងសរុប135.24គម ក្នុងនោះផ្លូវមេ មានប្រវែង 117.97គម និងផ្លូវវាង 2ខ្សែ គឺ ផ្លូវវាងក្រុងឧដុង្គ មានប្រវែង5.2គម និងផ្លូវវាងក្រុងកំពង់ឆ្នាំង មានប្រវែង 12.07គម។
3- ភាគកណ្តាល (ពីធ្លាម្អម ខេត្តពោធិ៍សាត់-ក្រុងបាត់ដំបង និងពីក្រុងសិរីសោភ័ណ-ក្រុងប៉ោយប៉ែត) កំណាត់ផ្លូវមានប្រវែងសរុប 146.04គម។ ក្នុងនោះពីធ្លាម្អម ខេត្តពោធិ៍សាត់ ទៅក្រុងបាត់ដំបង មានប្រវែង 99.21គម ជាផ្លូវ 4គន្លង, ផ្លូវវាងក្រុងពោធិ៍សាត់ 11.69គម និងកំណាត់ផ្លូវពីក្រុងសិរីសោភ័ណ ទៅក្រុងប៉ោយប៉ែត មានប្រវែង 35,14គម។

ដោយសារ តម្រូវការហិរញ្ញប្បទានសម្រាប់ផ្នែកនីមួយៗមានតម្រូវការធំ ដូចនេះ ការផ្តល់ឥណទានសម្រាប់ផ្នែកនីមួយៗ បានធ្វើឡើងជាដំណាក់កាលៗ ទៅតាមការវិវឌ្ឍនៃការរៀបចំអនុវត្តគម្រោង។ ជារួម កំណាត់ផ្លូវជាតិលេខ5 (ពីស្ពានព្រែកក្តាម-ក្រុងប៉ោយប៉ែត) ដែលមានប្រវែងសរុបចំនួន 366គម មាន​តម្រូវការឥណទានសម្បទានពីរដ្ឋាភិបាលជប៉ុន សរុបប្រមាណ 840លានដុល្លារអាមេរិក៕

ក្រោយពីទំនេរនៅផ្ទះ បន្ទាប់ពីការប្រកួតបាល់ទាត់ត្រូវបានផ្អាក ក្នុងអំឡុងពេលរាតត្បាតនៃរីរុសកូវីដ-19 កីឡាករល្បីល្បាញជាច្រើននាក់នៅលើពិភពលោក បានជួយជាថរិកាមួយចំនួនដើម្បីរួមចំណែកទប់ស្កាត់ការរាតត្បាតរបស់មេរោគដ៏ចង្រៃមួយនេះ។

ក្នុង​យុទ្ធនាការ​ប្រឆាំង​នឹង​វីរុស​កូរ៉ូណាប្រភេទថ្មី ​កីឡាករ​​បាល់ទាត់​លំដាប់​កំពូល​​​ 3​នាក់ ​​រួម​មាន Lionel Messi, Cristiano Ronaldo និង Robert Lewandowski បាន​បរិច្ចាគ​ប្រាក់​សរុប​​រួម​គ្នា ចំនួន 3​លាន​អឺរ៉ូ (3.2លាន​ដុល្លារ) ដើម្បីជួយ​ដល់​មន្ទីរពេទ្យ។

គួរបញ្ជាក់ដែរថា ការប្រកួតបាល់ទាត់ទូទាំងទ្វីបអឺរ៉ុប បានផ្អាកទាំងស្រុងហើយ និងថែមទាំងមិនទាន់កំណត់ថ្ងៃចាប់ផ្តើមការប្រកួតវិញនៅឡើយទៀតផង ដោយត្រូវរង់ចាំស្ថានការណ៍វិលទៅរកភាពស្ងប់ស្ងាត់វិញសិន៕