Category: សង្គម និងសេដ្ឋកិច្ច

ធុរកិច្ចជប៉ុន ទប់កូវីដ-19 លែងរួច ដាក់លិខិតក្ស័យទុនច្រើនជាប្រវត្តិសាស្ត្រ…សណ្ឋាគារ ភោជនីយដ្ឋាន សេវាកម្មទេសចរណ៍ រងគ្រោះធ្ងន់ធ្ងរជាងគេ។

លទ្ធផលជំរឿនមួយចេញផ្សាយដោយ ថេកូគុ ដាតាប៊ែងក៍ ក្រុមហ៊ុនវិភាគក្រេឌីត បានបញ្ជាក់ថា តាំងពីដើមឆ្នាំរហូតមកដល់ថ្ងៃពុធ ទី8មេសា មាន 42ក្រុមហ៊ុននៅក្នុងប្រទេសជប៉ុនបានដាក់លិខិតក្ស័យទុន ឬបិទដំណើរការ ដោយសារតែចំនួនលក់បាន ដែលធ្លាក់ចុះជាបន្តបន្ទាប់ដោយសារការឆ្លងរាលដាលរបស់មេរោគវីរុសកូរ៉ូណាប្រភេទថ្មី ឬកូវីដ-19។

ក្នុងចំនួននេះ មាន19ក្រុមហ៊ុន បានដាក់ពាក្យសុំការពារទ្រព្យសម្បត្តិដោយបំណុលតម្លៃជាង 10លានយ៉េន និង 23ក្រុមហ៊ុន បានបិទដំណើរការទាំងស្រុង និងចាប់ផ្ដើមប្រឹក្សាជាមួយមេធាវី ក្នុងរឿងក្ដីការក្ស័យទុន ដើម្បីនាំយកក្រុមហ៊ុនទៅលក់ដេញថ្លៃលើទីផ្សារតាមច្បាប់។
ចំពោះតែក្នុងខែមីនា ដែលវីរុសកូវីដ-19 ចាប់ផ្ដើមរាតត្បាតយ៉ាងធ្ងន់ធ្ងរទាំងក្នុងប្រទេសជប៉ុន និងទូទាំងពិភពលោក មានក្រុមហ៊ុនដាក់លិខិតក្ស័យទុន ចំនួន 740កន្លែង កើនឡើងពីខែកុម្ភៈ 12% ក្នុងចំនួននេះ 12ក្រុមហ៊ុនប្រកាសថា ក្ស័យទុន ព្រោះផលប៉ះពាល់ពីការឆ្លងរាលដាលរបស់វីរុសកូវីដ-19។

ឈានចូលខែមេសា ត្រឹមតែ 1សប្ដាហ៍ មាន 7ក្រុមហ៊ុនដាក់លិខិតក្ស័យទុនដោយសារផលប៉ះពាល់ពីវីរុសកូវីដ-19។
បើញែកតាមប្រភេទឧស្សាហកម្ម ក្រុមហ៊ុនដែលពាក់ព័ន្ធនឹងវិស័យទេសចរណ៍ ដូចជាសណ្ឋាគារ និងទីកន្លែងសម្រាកលម្ហែ ដែលបានរងផលប៉ះពាល់ពីការដែលអ្នកទេសចរអន្តរជាតិលុបចោលការកក់ មានចំនួនច្រើនបំផុត រួមទាំងក្រុមហ៊ុនក្នុងឧស្សាហកម្មភោជនីយដ្ឋាន ដែលមានចំនួនលក់ធ្លាក់ចុះ ដោយសារតែមនុស្សម្នាបានចៀសវាងពីការចេញក្រៅផ្ទះ។

ក្រុមហ៊ុនដែលដាក់លិខិតក្ស័យទុន ភាគច្រើនមានបំណុល 100លានឡើងទៅ ជាក្រុមហ៊ុនខ្នាតកណ្ដាល និងខ្នាតធំល្មម តែក្រុមហ៊ុនយក្សៗ ក៏រងផលប៉ះពាល់ដូចគ្នាដែរ ដូចជា 3ក្រុមហ៊ុនយក្សៗនៃឧស្សាហកម្មរថយន្ត ដូចជា នីសសាន់ មីតស៊ុយប៊ីស៊ី និងម៉ាសដា ក៏មានផែនការផ្អាកការធ្វើការងាររបស់បុគ្គលិកនៅក្នុងប្រទេសជប៉ុនច្រើនជាង 20,000នាក់ដែរ៕
ប្រភព៖ សារព័ត៌មានបរទេស

“ការទទួលស្គាល់របស់ឪពុកម្តាយ នឹងជួយឱ្យកូនកើតមានមោទនភាពចំពោះខ្លួនឯង ធ្វើឱ្យគេអាចធ្វើរឿងផ្សេងៗបានល្អដូចគ្នាដែរ”នៅពេលកូនធ្វើអំពើល្អ ឬមានស្នាដៃក្នុងការធ្វើអ្វីមួយគួរជាទីពេញចិត្តនោះ លោកឪពុកអ្នកម្តាយកុំភ្លេចពោលពាក្យសរសើរ ឬឱ្យរង្វាន់ជាការតបស្នងទៅវិញផង ព្រោះរូបកូនខ្លួនឯងក៏ត្រូវការ ការទទួលស្គាល់ចំពោះខ្លួនគេដែរថា គេអាចធ្វើបាន ដូច្នេះពាក្យរីករាយសរសើរ ឬរង្វាន់ក៏ប្រៀបដូចជាកម្លាំងដឹកនាំចិត្តមួយដែរ។

តែការឱ្យរង្វាន់ មិនមែនជាការសូកប៉ាន់កូននោះទេ មានជាច្រើនដងណាស់ដែលលោកឪពុកអ្នកម្តាយតែងប្រើរង្វាន់ធ្វើជារឿងជន្លរចិត្តឱ្យកូនធ្វើនូវរឿងអ្វីម្យ៉ាងឱ្យបាន ឬបញ្ឈប់ទង្វើដែលមិនល្អ ដូចជា បើកូនញ៉ាំបាយអស់ពីចាន ម៉ាក់នឹងទិញសៀវភៅតុក្កតារឿងថ្មីមកឱ្យ ឬបើកូនឈប់យំ ម៉ាក់នឹងនាំទៅទិញនំញ៉ាំ ឬក៏ បើកូនប្រឡងបានលេខ 1 ម៉ាក់នឹងទិញកង់ថ្មីឱ្យ ជាដើម។
រឿងទាំងអស់នេះ នឹងហុចផលឱ្យកុមាររៀនយល់ដឹង និងជ្រួតជ្រាបថា ការនឹងធ្វើអ្វីក៏ដោយ តែងតែមានចំណុចដូរដោះគ្នា ឬផលតបស្នងដែលគេពេញចិត្តជានិច្ច បើគ្មានរង្វាន់ គេនឹងមិនធ្វើទេ ដូច្នេះយើងហៅទង្វើបែបហ្នឹងថា ការសូកប៉ាន់កូន។

ការឱ្យរង្វាន់ មិនគួរឱ្យប្តេសប្តាស់ ឬមិនចាំបាច់ត្រូវតែជារបស់របរ វត្ថុ ឬលុយកាក់ជានិច្ចនោះទេ អាចជាការសរសើរដោយវាចាក៏បាន គួរឱ្យរង្វាន់នៅពេលដល់ពេលវេលាដែលស័ក្តិសម និងតាមភាពសមរម្យ។ គ្រប់ពេលដែលឱ្យ គួរប្រាប់ពីហេតុផលផងថា ដោយសារហេតុអីទើបកូនគួរតែបានទទួលរង្វាន់នេះ ដើម្បីឱ្យរង្វាន់នេះក្លាយជារង្វាន់ដែលមានតម្លៃ និងស័ក្តិសិទ្ធ ត្រូវនឹងមនុស្សដែលស័ក្តិសមនឹងវាដូចគ្នា ដូចជា នៅពេលកូនជួយលើកមិត្តភ័ក្តិដែលជំពប់ជើងដួលរងរបួសនៅក្នុងទីលានក្មេងលេង ហើយក្រោកឡើងវិញមិនរួច លោកឪពុកអ្នកម្តាយគួរឱ្យរង្វាន់ដោយការនិយាយសរសើរ និងលើកតម្កើងនូវអ្វីដែលកូនបានធ្វើ ហើយដែលកូនក៏មាន
មោទនភាពលើខ្លួនឯង និងរៀនយល់ដឹងក្នុងការធ្វើល្អតទៅទៀតដែរ៕

តើបងៗស្រ្តីមេផ្ទះដឹងឬទេថា ស្រ្បៃយ៍ដែលនៅលើតុគ្រឿងម្សៅក្នុងបន្ទប់របស់យើងអាចប្រែកាឡាខ្លួនក្លាយជាឧបករណ៍ជួយសម្អាតផ្ទះបាន បើមិនជឿទៅរួមពិសោធន៍ជាមួយគ្នាតែម្តងថា ស្រ្បៃយ៍តែងម៉ូដសក់អាចជួយក្នុងរឿងការងារផ្ទះបានច្រើនតិចប៉ុនណា។

1 – បណ្តេញសត្វល្អិតបង្កមេរោគឱ្យចេញផុតពីផ្ទះ
សត្វល្អិតគឺជាវត្ថុកខ្វក់មួយក្នុងចំណោមវត្ថុកខ្វក់ដែលយើងត្រូវតែកំចាត់ចេញឱ្យផុតពីផ្ទះដោយការបាញ់ហ៊ែរ៍ស្រ្បៃយ៍បណ្តេញចេញ និងថែមទាំងមិនប៉ះពាល់ដល់សុខភាពរបស់សមាជិកក្នុងគ្រួសារទៀតផង ព្រោះសារធាតុគីមីដែលមាននៅក្នុងហ៊ែរ៍ស្រ្បៃយ៍នោះមានតិចជាងស្រ្បៃយ៍គីមីដែលប្រើកំចាត់សត្វល្អិតដោយត្រង់ទៅទៀត។

2 – កំចាត់រោមសត្វចញ្ចឹមដែលជាប់នៅតាមគ្រឿងសង្ហារិម
សត្វចិញ្ចឹមដ៏គួរឱ្យស្រឡាញ់ច្រើនតែជ្រុះសរសៃរោមនៅលើគ្រឿងសង្ហារិម ដូច្នេះបើឃើញនៅពេលណា ចូរប្រញាប់យក
ស្រ្បៃយ៍តែងម៉ូដសក់មកបាញ់នៅលើក្រណាត់ក្រាស់ៗ ហើយយកទៅជូតសម្អាត សរសៃរោមទាំងនោះនឹងត្រូវស្រ្បៃយ៍បឺតចេញមករហូតទាល់តែអស់រលីង។
3 – ការពារធូលីដីតោងជាប់តាមក្រណាត់វាំងនន មិនឱ្យមើលទៅឃើញចាស់មុនពេលកំណត់
បន្ទាប់ពីការសម្អាតក្រណាត់វាំងននរួចរាល់ហើយ យើងគួរតែបាញ់ស្រ្បៃយ៍តែងម៉ូដសក់ស្រោបឱ្យសព្វលើក្រណាត់វាំងនននោះមុននឹងយកទៅចង តែប៉ុណ្ណឹងនឹងមិនជួបបញ្ហាធូលីដីតោងជាប់លើក្រណាត់វាំងនននាំឱ្យមើលទៅឃើញកេកកាកទៀតហើយ។

4 – លាងស្នាមជ័រកាវស្អិតៗឱ្យអស់ពីដបកែវ
កុំអាលបោះចោលដបកែវដាក់ទំនិញដែលទិញមកជាដាច់ខាត ព្រោះអាចយកវាមកប្រើប្រាស់ឱ្យកើតប្រយោជន៍ផ្សេងៗបានទៀត គ្រាន់តែយកស្រ្បៃយ៍តែងម៉ូដសក់បាញ់លើស្លាកយីហោដែលមានស្នាមជ័រកាវស្អិតៗ រួចហើយដុសចេញ តែប៉ុណ្ណឹងយើងនឹងបានដបកែវដែលថ្លាឆ្វង់សម្រាប់យកទៅប្រើជាប្រយោជន៍ផ្សេងទៀតបានហើយ។

5 – ជូតសម្អាតថ្នាំលាបក្រចកឱ្យស្អាតភ្លឹងដោយប្រើពេលត្រឹមតែ 1 នាទីប៉ុណ្ណោះ
មិនចាំបាច់ភ្ញាក់ផ្អើលទេបើសិនជាទឹកថ្នាំលាបក្រចកកំពប់ ឬស្រក់លើគ្រឿងសង្ហារិម ឬកម្រាលព្រំរបស់យើង ព្រោះគ្រាន់តែបាញ់ស្រ្បៃយ៍តែងម៉ូដសក់នៅលើស្នាមប្រឡាក់ទឹកថ្នាំលាបក្រចកនោះ ទុកចោល 1 នាទី បន្ទាប់ពីនោះយកក្រណាត់ក្រាស់ៗប្តិតស្នាមប្រឡាក់ដ៏រំខានចិត្តនោះចេញ តែប៉ុណ្ណឹងឯង។

6 – កំចាត់ព្រុយសំលីនៅលើសម្លៀកបំពាក់ ជូតតែមួយខ្វាច់ចប់
តឱ្យបោកគក់សម្អាតក្រណាត់ដែលមានជាប់ព្រុយសំលីប៉ុនណា ក៏វានៅតែជាប់សសំព្រុះរំខានចិត្តយើងដដែល ឥលូវសរុបថា ពេលបោកគក់រួចរាល់ហើយ ចូរបាញ់ស្រ្បៃយ៍នៅលើសម្លៀកបំពាក់ដែលមានជាប់ព្រុយសំលីនោះ ហើយយកក្រណាត់ក្រាស់ៗដុសចេញ ព្រុយសំលីដែលថាពិបាកកំចាត់ចេញនោះនឹងត្រូវបឺតយកចេញអស់មិនខាន។
7 – លុបស្នាមក្រែមលាបមាត់ដែលប្រឡាក់លើសម្លៀកបំពាក់
ចូរយកស្រ្បៃយ៍តែងម៉ូដសក់មកលាយជាមួយទឹកថ្នាំកំចាត់ស្នាមប្រឡាក់លើសម្លៀកបំពាក់ ដើម្បីយកទៅដុសលើស្នាមប្រឡាក់ក្រែមលាបមាត់នោះចេញឱ្យអស់ជាមុនសិន រួចសឹមនាំយកទៅបោកសម្អាតម្តងទៀត។

8 – លុបស្នាមគូសវាសដោយដី-សនៅតាមជញ្ជាំងរបស់កូនៗឱ្យជញ្ជាំងស្អាតដូចដើម
មិនបាច់បារម្ភពីស្នាមគូសវាសដោយដី-សតាមរយៈក្តីស្រមើស្រមៃរបស់កូនតូចនឹងធ្វើឱ្យជញ្ជាំងផ្ទះមួហ្មងនោះទេ គ្រាន់តែបាញ់ស្រ្បៃយ៍តែងម៉ូដសក់តិចៗពីលើស្នាមដី-សទាំងនោះ ហើយជូតចេញ ស្នាមទាំងនោះនឹងរលាយបាត់អស់ក្នុងតែមួយប៉ព្រិចភ្នែកប៉ុណ្ណោះ។

9 – បាញ់ស្រ្បៃយ៍ស្រោបកេសរផ្កាការពារការជ្រុះរោយ
បើបងៗស្រ្តីមេផ្ទះចូលចិត្តតុបតែងផ្ទះដោយផ្កាស្រស់ត្រូវប្រយ័ត្នឱ្យខ្លាំង ព្រោះវាអាចបង្កបញ្ហាដល់អ្នកមានអាការប្រតិកម្មចាញ់លម្អងកេសរផ្កាបាន ដូច្នេះគួរបាញ់ស្រ្បៃយ៍តែងម៉ូដសក់ស្រោបពីលើកេសរផ្កាជាមុនសិនមុននឹងរៀបចូលថូ ដើម្បីការពារកេសរផ្កាជ្រុះរោយ និងខ្ចាត់ខ្ចាយសាយភាយពេញផ្ទះ។

10 – ស្រោបរលោងស្បែកជើងធ្វើពីស្បែកបន្ទាប់ពីខាត់រួច
បើស្បែកជើងឃ្លុបធ្វើពីស្បែកដែលមិនសូវភ្លឺរលោង និងមានស្នាមឆ្កូតរហូតធ្វើឱ្យបងៗបុរសលែងចង់ពាក់នោះ ឡារ៉ែនសូមណែនាំឱ្យយកហ៊ែរ៍ស្រ្បៃយ៍បាញ់ស្រោបពីលើស្បែកជើងឃ្លុបនោះបន្ទាប់ពីខាត់រួច តែប៉ុណ្ណឹងស្បែកជើងឃ្លុបមួយគូនោះនឹងភ្លឺរលោងតាំងពីព្រឹករហូតដល់យប់ឯណោះ។

11 – ជួយកំចាត់ស្នាមប្រឡាក់ខ្លាញ់ពីក្រណាត់ ទោះជាប្រឡាក់ជាប់ស្អិតប៉ុនណាក៏ដោយ
បើភ្លេចខ្លួនច្រឡំធ្វើអាហារកំពប់លើកៅអីសាឡុងធ្វើពីក្រណាត់នោះ ចូរប្រញាប់យកស្រ្បៃយ៍តែងម៉ូដសក់មកបាញ់លើស្នាមប្រឡាក់ខ្លាញ់នោះ ទុកចោលមួយសន្ទុះ ហើយជូតចេញ មុននឹងដោះយកស្រោមកៅអីសាឡុងនោះទៅបោកគក់សម្អាតឱ្យស្អាតដូចប្រក្រតី។ តិចនិកនេះក៏ប្រើជាមួយសម្លៀកបំពាក់បានដែរ៕

ក្លិបបាល់ទាត់ជាច្រើន រួមទាំង Juventus ផង កំពុងជួបវិបត្តិហិរញ្ញវត្ថុ ដោយសារតែមិនមានការប្រកួត។ កត្តានេះ អាចនឹងធ្វើឱ្យក្លិបសេះបង្កង់មួយនេះ ត្រូវតែលក់ចេញកីឡាករមួយចំនួន ដើម្បីទទួលបានប្រាក់ខ្លះមកវិញ ក្នុងការស្រោចស្រង់ក្លិប។

ខ្សែប្រយុទ្ធរបស់ក្លិបបាល់ទាត់ Juventus គឺកីឡាករ Cristiano Ronaldo ត្រូវបានក្លិបរបស់ខ្លួនប្រកាសលក់ទៅឱ្យក្លិបចាស់របស់គេ Real Madrid វិញឱ្យបានមុនរដូវកាលក្រោយនេះ ដើម្បីយកលុយមកដោះទាល់ក្លិប ដែលកំពុងតែមានវិបត្តិហិរញ្ញវត្ថុនាពេលបច្ចុប្បន្ន។
ក្លិប បានបង្ហើបឱ្យដឹងថា Juventus អាចនឹងលក់ Ronaldo ឱ្យទៅ Real Madrid វិញ ក្នុងតម្លៃខ្លួនតែ 50លានផោនប៉ុណ្ណោះ ខណៈដែលតម្លៃខ្លួនរបស់គេកាលពីដើមរដូវកាល2019 ថ្លៃដល់ទៅ 100លានដុល្លារឯណោះ៕

វីរបុរសរបស់ក្លិប Barcelona កីឡាករខ្សែប្រយុទ្ធ Ronaldinho ត្រូវបានអាជ្ញាធរប្រទេសប៉ារ៉ាហ្គាយ ​អនុញ្ញាតឱ្យទៅនៅក្នុងសណ្ឋាគារជាបណ្តោះអាសន្នសិន និងត្រូវបានគេដឹងថា Ronaldinho និង​បងប្រុសរបស់គេ បានបង់ប្រាក់អស់ 1.5លានដុល្លា ដើម្បីធានាថា ពួកគេនឹងមិនរត់ទៅណា។
ដូចនេះ ​​Ronaldinho នឹង​ត្រូវ​ស្ថិត​ក្រោម​ការ​ឃុំ​ខ្លួន​ក្នុង​បន្ទប់ នៅ​ឯ​សណ្ឋាគារ  Palmaroga ក្នុង​ទីក្រុង Asuncion ប្រទេស​ប៉ារ៉ាហ្គាយ។ អតីត​កីឡាករ​របស់​ក្លិប Barcelona​ និង​​បង​ប្រុស ត្រូវ​បានអនុញ្ញាត​ឱ្យ​ចេញ​ពី​ពន្ធនាគារ បន្ទាប់​ពី​ជាប់​អស់រយៈពេល​ 32​ថ្ងៃ ជាមួយ​នឹង​ការ​ប្រឈម​​ដាក់​ទោស​ 6​ខែ។

គួររំឭកដែរថា កីឡាកររូបនេះត្រូវបានប៉ូលិសប្រទេសនេះឃាត់ខ្លួន ពីបទប្រើប្រាស់លិខិតឆ្លងដែនក្លែងក្លាយ និងត្រូវបានអាជ្ញាធរប្រទេសនេះឃាត់ខ្លួនទុកនៅក្នុងសណ្ឋាគារមួយកន្លែង៕

តើកូនរបស់អ្នកស្គមពេកឬទេ? ទាំងបានទទួលអាហារបន្ថែម និងទឹកដោះគោយ៉ាងពេញទំហឹង និងពេញទៅដោយគុណភាពហើយនោះ។ ឪពុកម្តាយជាច្រើននាក់សុទ្ធតែចង់កូនមានទម្ងន់ខ្លួនល្អ គួរឱ្យស្រឡាញ់ ម៉ាប់ៗ និងស្ថិតនៅក្នុងកម្រឹតដែលស័ក្តិសមហើយមិនធាត់ជ្រុលពេក។  តើធ្វើយ៉ាងណាឱ្យទម្ងន់ខ្លួនកូនល្អឡើង?  តើអាហារដែលគួរឱ្យញ៉ាំមានអ្វីខ្លះ? ដូច្នេះថ្ងៃនេះ ឡារ៉ែនមានអាហារ 10 យ៉ាងដែលចង់ណែនាំអ្នកម្តាយ ដើម្បីឱ្យកូនជាទីស្រឡាញ់ទាំងអស់មានទម្ងន់ខ្លួនកើនឡើងក្នុងកម្រឹតស័ក្តិសមនឹងវ័យរបស់គេមកជម្រាបជូន។

1- ប៊័រទឹកដោះគោ : កុំទៅគិតថាអាហារមួយនេះគ្មានប្រយោជន៍ ឬមិនល្អឱ្យសោះ  អ្នកម្តាយអាចប្រើប៊័រមកធ្វើនំ ឬអាហារឱ្យកូនញ៉ាំបានរាល់ថ្ងៃ តែត្រូវទិញនៅក្នុងផ្សារដែលជឿទុកចិត្តបាន និងជាប៊័រដែលមានម៉ាកល្បី និងមានគុណភាពល្អ។
2- ប៊័រសណ្តែក : អ្នកម្តាយអាចរកទិញប៊័រធ្វើពីសណ្តែកមកធ្វើជានំស៊ែនវិចឆ៍ឱ្យកូនញ៉ាំបានរាល់ថ្ងៃ  ជាប៊័រធ្វើពីសណ្តែកដី ឬប៊័រធ្វើពីសណ្តែកអាល់ម៉ុនក៏បាន ព្រោះប៊័រសណ្តែកជាអាហារដែលមានជាតិខ្លាញ់មិនបង្កកខ្លួន និងមានប្រូតេអុីនខ្ពស់ទៀតផង។
3- ទឹកដោះ : មានសារធាតុអាហារទាំង កាល់ស្យូម និងខាបូហាយដ្រេត កូនគួរបានញ៉ាំយ៉ាងតិចក្នុងមួយថ្ងៃ 2 កែវ  បើកូនធុញ ឬទ្រលាន់ មិនចង់ញ៉ាំរាល់ថ្ងៃនោះ អ្នកម្តាយអាចថែមផ្លែឈើចូលជាមួយដើម្បីបង្កើនភាពឈ្ងុយឆ្ងាញ់ក៏បាន។
4- ស៊ុត : ជាអាហារដែលផ្តល់នូវប្រូតេអុីនខ្ពស់ មានវីតាមីន A  វីតាមីន B12 ដែលជាអាហារចាំបាច់សម្រាប់ការចម្រើនធំធាត់របស់រាងកាយ។ ក្មេងៗគួរបានញ៉ាំស៊ុតក្នុង 1 ថ្ងៃយ៉ាងតិច 1 គ្រាប់។
5- ផ្លែចេក : ជាប្រភពអាហារដែលល្អសម្រាប់ក្មេងៗ  ព្រោះផ្តល់នូវកម្លាំងថាមពលខ្ពស់ និងមានខាបូហាយដ្រេត និងជាតិខ្លាញ់ដែលមានភាពចាំបាច់ជាមួយរាងកាយរបស់ក្មេងៗវ័យកំពុងចម្រើនធំធាត់។
6- ផ្លែប៊័រ(អាវ៉ូខាដូ) : ជាផ្លែឈើដែលក្មេងៗគ្រប់គ្នាគួរបានញ៉ាំ ព្រោះមានជាតិខ្លាញ់ជួយបំប៉នប្រព័ន្ធប្រសាទ និងខួរក្បាលរបស់ក្មេងគ្រប់វ័យ និងនៅបានជួយក្នុងរឿងការចម្រើនធំធាត់របស់ក្មេងៗទៀតផង។
7- សាច់មាន់ : មានប្រូតេអុីនខ្ពស់ជួយក្នុងរឿងការសាងសាច់ដុំ  សាច់មាន់ជាអាហារដែលរកញ៉ាំបានយ៉ាងងាយ តម្លៃមិនថ្លៃសាច់ទន់ អាចធ្វើជាមុខម្ហូបបានច្រើនយ៉ាង។
8- មើមដំឡូងបារាំង : បើញ៉ាំដំឡូងបារាំងរាល់ថ្ងៃធានាថា កូនជាទីស្រឡាញ់របស់អ្នកនឹងមានទម្ងន់កើនឡើងយ៉ាងពិតប្រាកដ ព្រោះដំឡូងបារាំងមានខាបូហាយដ្រេតខ្ពស់ ក្មេងៗនឹងបានទទួលកម្លាំងថាមពលយ៉ាងពេញទំហឹងប្រាកដណាស់។
9- សាច់សត្វ : ចាំបាច់ណាស់ជាមួយកុមារដែលស្ថិតក្នុងវ័យកំពុងចម្រើនធំធាត់  ព្រោះសាច់សត្វមានប្រូតេអុីនស័ក្តិសមសម្រាប់ក្មេងគ្រប់វ័យ។
10- បន្លែ ផ្លែឈើ : ការញ៉ាំបន្លែ និងផ្លែឈើនឹងធ្វើឱ្យក្មេងៗញ៉ាំអាហារបានច្រើនឡើង ព្រោះប្រព័ន្ធរំលាយអាហារនឹងធ្វើការបានល្អ និងអាចញ៉ាំអាហារបានជារឿយៗ  ក្រៅពីនេះ ក្មេងៗនៅបានទទួលវីតាមីន និងសារធាតុរ៉ែដែលចាំបាច់សម្រាប់រាងកាយ និងថែមទាំងអាចញ៉ាំបានរាល់ថ្ងៃទៀតផង។
ចំណុចគួរចងចាំសម្រាប់លោកឪពុកអ្នកម្តាយនោះ គឺការញ៉ាំតែអាហារអាចនឹងធ្វើឱ្យកូនឡើងទម្ងន់តែម្យ៉ាងប៉ុណ្ណោះ តែមិនរឹងមាំឡើយ ដូច្នេះក្មេងៗគួរបានញ៉ាំអាហារដែលស័ក្តិសមព្រមជាមួយការហាត់ប្រាណយ៉ាងត្រឹមត្រូវទៅតាមវ័យផង៕

ស្រ្តីដែលកំពុងមានគភ៌ អាចត្រូវប្រយ័ត្នប្រយ៉ែងក្នុងការទទួលទានអាហារឱ្យបានខ្លាំងបន្តិច  អាហារដែលមិនមានប្រយោជន៍ ឬបើទទួលទានហើយកើតមានផលអាក្រក់ដល់រាងកាយ បើអាចចៀសវាងបាន ក៏គួរតែចៀសវាង ជាពិសេសអាហារដែលមានដាក់ម្សៅប៊ីចេងច្រើនៗ ព្រោះការទទួលទានម្សៅប៊ីចេងចូលទៅច្រើនៗនោះ មិនមែនជាផលល្អចំពោះអ្នកម្តាយ និងកូនក្នុងផ្ទៃឡើយ។

ម្សៅប៊ីចេង ឬឈ្មោះខាងវិទ្យាសាស្រ្តហៅថា ម៉ូណូសូដ្យូមគ្លុយតាមេត( monosodiumglutamet ) ក្នុងកម្មវិធីផលិត គេនឹងប្រើប្រាស់ម្សៅដំឡូងមី និងកាកស្ករ ជាវត្ថុធាតុដើមចម្បង ឆ្លងកាត់កម្មវិធីខាងគីមីជាច្រើនយ៉ាង ប្រើសារធាតុគីមីជាច្រើនមុខ ដូចជា អាស៊ីតស្ពាន់ធ័រ អាស៊ីតអំបិល យូរៀ និងម្សៅសូដា ចូលមកធ្វើជាប្រតិកម្មរំលាយ បន្ទាប់ពីនោះក៏ជ្រលក់ពណ៌ឱ្យសារធាតុរលាយក្លាយជាដុំម្សៅប៊ីចេង។

ម្សៅប៊ីចេង ធ្វើឱ្យយើងមានអារម្មណ៍ថា អាហារកាន់តែឆ្ងាញ់ឡើង ព្រោះថាម្សៅប៊ីចេង ធ្វើឱ្យរន្ធរោមក្នុងអណ្តាតបើកធំពេញទំហឹង ធ្វើឱ្យយើងអាចទទួលយករសជាតិបានកាន់តែច្រើនឡើង ទើបធ្វើឱ្យយើងយល់ថា អាហារនោះឆ្ងាញ់។ ការទទួលទានម្សៅប៊ីចេងមិនលើសពី 2 ស្លាបព្រាកាហ្វេចំពោះទម្ងន់ខ្លួនមនុស្ស 50 គីឡូក្រាមក្នុងមួយថ្ងៃ អាចគ្មានគុណវិបត្តិអ្វីដល់រាងកាយឡើយ  តែបើបានទទួលក្នុងបរិមាណច្រើនជ្រុលពេកនោះ ពិតជាមិនមែនជាផលល្អឡើយប្រាកដណាស់។

គ្រោះថ្នាក់របស់ម្សៅប៊ីចេងមកពីចំណែកប្រកប 2 ប្រភេទចម្បង គឺ សូដ្យូម និងម្សៅប៊ីចេងពិតប្រាកដ ទោះជាម្សៅប៊ីចេងមានសូដ្យូម (ដែលបានមកពីម្សៅសូដា) តិចជាងអំបឹលស្លមែន តែអ្វីដែលធ្វើឱ្យវាមានគ្រោះថ្នាក់ខ្លាំងជាងនោះគឺ ការដែលម្សៅប៊ីចេងគ្មានរសជាតិប្រៃ ព្រោះដូច្នេះ តឱ្យយើងញ៉ាំចូលទៅច្រើនប៉ុនណាក៏មិនមានអារម្មណ៍ថាប្រៃដែរហ្នឹងឯង។

សូដ្យូមនៅក្នុងម្សៅប៊ីចេង មានផលប៉ះពាល់ដល់រាងកាយដោយត្រង់  តាំងពីការធ្វើឱ្យប្រព័ន្ធប្រឆាំងជំងឺថយចុះ កើតទឹកក្នុងខួរក្បាលក្មេង រហូតក្លាយជាក្មេងមិនគ្រប់ទឹក ធ្វើឱ្យទារកប្រកាច់បាន អ្នកម្តាយមានគភ៌ហើមខ្លួន រួមទាំងជាគ្រោះថ្នាក់ចំពោះអ្នកជំងឺដែលគ្រូពេទ្យហាមទទួលទានអាហារប្រៃ ដូចជា អ្នកដែលកើតជំងឺក្រលៀន លើសឈាម និងបេះដូងទៀតផង។ គ្រោះថ្នាក់ពីម្សៅប៊ីចេងពិតប្រាកដនៅបានធ្វើឱ្យកើតអាការផ្សេងៗទៀតជាច្រើន ជាពិសេស អាការប្រតិកម្មចាញ់ម្សៅប៊ីចេងដែលអាចនឹងចាប់ផ្តើមតាំងពីមានអារម្មណ៍ថាស្ពឹក ក្តៅភាយៗនៅលើមាត់ អណ្តាត ផ្ទៃមុខ ផែនថ្ពាល់ កញ្ចឹងក ដើមទ្រូង អ្នកខ្លះមានកន្ទួលក្រហមកើតឡើងនៅលើខ្លួនប្រាណ ណែនទ្រូង បេះដូងដើរយឺត ដកដង្ហើមមិនស្រួល។

ក្រៅពីនេះ ម្សៅប៊ីចេងនៅបំផ្លាញខួរក្បាលផ្នែកខាងមុខ ឬហាយប៉ូថាឡាម៉ាស់ ដែលគ្រប់គ្រងការចម្រើនធំធាត់ រួមទាំងប្រព័ន្ធបន្តពូជរបស់រាងកាយ បំផ្លាញប្រព័ន្ធប្រសាទភ្នែក ធ្វើឱ្យខូចភ្នែក ឬខ្វាក់ បំផ្លាញឆ្អឹង និងខួរឆ្អឹងរហូតអាចនឹងកើតជំងឺស្លេកស្លាំងទៀតផង។

គ្រោះថ្នាក់ពីម្សៅប៊ីចេងចំពោះអ្នកម្តាយមានគភ៌ដែលហុចផលដល់ទារកក្នុងផ្ទៃ
ការដែលអ្នកម្តាយមានគភ៌ញ៉ាំម្សៅប៊ីចេងនោះ នឹងហុចផលដល់ការផ្លាស់ប្តូរខ្រូម៉ូហ្សូមនៅក្នុងរាងកាយដែលអាចធ្វើឱ្យទារកក្នុងគភ៌បាត់បង់ជីវិត ឬប្រសូតមកហើយពិការ ដូចជា មានខួរក្បាលនៅខាងក្រៅលលាដ៍ក្បាល ផ្ទៃមុខខុសប្រក្រតី ឆែបមាត់ គ្មានភ្នែកដៃជើងខុសប្រក្រតី និងដែលសំខាន់បំផុតនោះគឺ ជាសារធាតុបង្កមហារីក ព្រោះនៅពេលម្សៅប៊ីចេងត្រូវបាននាំយកទៅចម្អឹនដោយការប៉ះនឹងកម្តៅដោយត្រង់ក្នុងសីតុណ្ហភាពខ្ពស់ ដូចជា ការអាំង ឬដុតនោះ គ្រោងសាងគីមីរបស់វានឹងប្រែប្រួលក្លាយជាសារធាតុគីមីថ្មី គឺ គ្លូភី 1 និងគ្លូភី 2 ដែលជាមូលហេតុរបស់មហារីកប្រព័ន្ធរំលាយអាហារ ថ្លើម និងខួរក្បាល៕​