Category: សង្គម និងសេដ្ឋកិច្ច

ក្នុង Premier League មានតែក្លិបមួយនេះទេ ដែលឡូយជាងគេ អត់កាត់ប្រាក់ខែកីឡាករ…
កូវីដ-19 កំពុងក្លាយជាប្រធានបទនៃវិបត្តិហិរញ្ញវត្ថុរបស់ក្លិបបាល់ទាត់នីមួយៗនៅជុំវិញពិភពលោក ដោយសារតែមិនមានការប្រកួត ហើយលុយគិតតែពីហូរចេញដូចទឹកបាក់ទំនប់។
ក្នុងនោះដែរ លីកកំពូលអង់គ្លេស English Premier League ក្លិបស្ទើរតែទាំងអស់ បានកាត់បន្ថយប្រាក់ខែបុគ្គលិកទៅតាមសមត្ថភាពក្លិប។
ដោយឡែកក្លិបមិនសូវជាល្បី និងខ្សត់ធនធានមួយ គឺ Southampton បានប្រកាសជំហរថា នឹងមិនកាត់បន្ថយប្រាក់ខែបុគ្គលិកខ្លួនឡើយ។
ផ្ទុយទៅវិញគឺ ក្លិបសុំជំពាក់សិន ដោយក្នុងនោះបើក 90% នៃប្រាក់ខែដូចធម្មតា និងជំពាក់តែ 10%ទេ។ ដោយការជំពាក់នេះ នឹងចាប់ផ្តើមពីខែក្រោយតទៅ៕

April 13, 2020
Loic Chan កំពុងចរចាកុងត្រាជាមួយក្លិបនៅ La Liga
កុមារាសញ្ជាតិខ្មែរ-បារាំង Loic Chan វ័យ 14ឆ្នាំ កំពុងទទួលបានការចាប់អារម្មណ៍ខ្លាំង តាមរយៈវីដេអូបង្ហាញសមត្ថភាព ដែលត្រូវបានគេចែករំលែកតៗគ្នានៅតាមបណ្ដាញសង្គមហ្វេសប៊ុក ដោយដឹងថា កុមារារូបនេះ ជាកូនរបស់តារាសម្ដែងខ្មែរ-បារាំង Maurice Chan ដែលជាតារាសម្ដែងក្បាច់គុនដ៏ល្បីឈ្មោះមួយរូប។
បន្ទាប់ពីបាត់មុខមួយរយៈធំ នៅពេលនេះគេកំពុងតែចរចា ដើម្បីស្វែងរកលទ្ធភាពក្នុងការផ្ទេរទៅលេងឱ្យក្លិប RCD Mallorca នៅក្របខ័ណ្ឌ La Liga នេះបើតាមការបញ្ជាក់ពីលោក Maurice Chan ដែលជាឪពុកបង្កើតរបស់ Loic Chan។
លោក Maurice Chan បានឱ្យដឹងថា កូនរបស់លោកមានក្តីស្រមៃ ចង់ពាក់អាវជម្រើសជាតិកម្ពុជា ហើយលោកសង្ឃឹមថា កូនប្រុសរបស់លោក នឹងអាចជាប់ជម្រើសជាតិកម្ពុជា នាពេលអនាគត៕
April 13, 2020
អូនតូចអាយុ 8ឆ្នាំម្នាក់ ត្រែះបាល់ដូចកីឡាករអាជីព
កុមារា Marco Antonio សញ្ជាតិប្រេស៊ីល ត្រូវបានគេឱ្យរហស្សនាមថា ជា Ronaldo សម័យថ្មី ដែលត្រូវបានគេស្គាល់តាមរយៈវីដេអូលេងបាល់យ៉ាងឡូយ ពូកែដូចជាកីឡាករអាជីព និងកំពុងតែទទួលបានប្រជាប្រិយភាពយ៉ាងខ្លាំងក្នុងបណ្តាញសង្គមតាមរយៈវីដេអូរបស់គេ។
អូនតូចរូបនេះ ជាហ្វ៊ែនរបស់ក្លិបបាល់ទាត់ធំៗល្បី2 គឺ Real Madrid និង Bacelona ហើយបានបង្ហើបប្រាប់សារព័ត៌មានថា គេមានក្តីស្រមៃថា នឹងទៅលេងនៅក្នុងក្លិបទាំង2 នេះ នាពេលអនាគត។
ទោះជាជួបបញ្ហាជំងឺរលាកពោះវៀនមែន តែឪពុករបស់គេគិតថា កូនរបស់គាត់ កើតមកមានទេពកោសល្យខាងបាល់ទាត់ស្រាប់ និងជាកាដូពីធម្មជាតិ។ ក្ដីស្រមៃរបស់ Marco ចង់ក្លាយជាកីឡាករបាល់ទាត់អាជីពម្នាក់។ Marco Antonio ចាប់ផ្ដើមមានអ្នកស្គាល់តាមរយៈវីដេអូត្រែះបាល់នៅក្នុងផ្ទះ ទទួលបានអ្នកចូលមើល 12លានដងលើ Instagram៕
April 13, 2020
ក្រសួងអប់រំអំពាវនាវឱ្យធនាគារជាតិអន្តរាគមន៍បញ្ចុះអត្រាការប្រាក់ និងពន្យាការទូទាំត់ដល់សលាឯកជន
ក្រសួងអប់រំ យុវជន និងកីឡា បានចេញសេចក្តីប្រកាសនៅព្រឹកនេះដោយជំរុញឱ្យមានការអន្តរាគមន៍ពីធនាគារជាតិនៃកម្ពុជា ចំពោះគ្រឹះស្ថានឯកជនដែលរងផលប៉ះពាល់ដោយសារតែបញ្ហា Covid-19 និងជំរុញឱ្យម្ចាស់ទីតាំងដែលជួលអគារឱ្យគ្រឹះស្ថានអប់រំជួយបញ្ចុះតម្លៃ។
នៅក្នុងសេចក្តីប្រកាសរបស់ក្រសួងដែលចេញនៅព្រឹកថ្ងៃទី 13 ខែមេសា ឆ្នាំ2020នេះបានបញ្ជាក់ថា ក្រសួងអប់រំ យុវជន និងកីឡា សូមអំពាវនាវដល់ម្ចាស់ទីតាំងដីដែលត្រូវបានជួលសម្រាប់ដំណើរការគ្រឹះស្ថានសិក្សាមួយចំនួនឱ្យបញ្ចុះតម្លៃឈ្នួលតាមភាពជាក់ស្តែង ដើម្បីដោះស្រាយបន្ទុកមួយចំនួនដែលរងផលប៉ះពាល់ពីជំងឺ covid-19 និងរកដំណោះស្រាយឈ្នះៗទាំងអស់គ្នា។
នៅក្នុងនោះដែរក្រសួងអប់រំ ក៏បានអំពាវនាវផងដែរដល់ធនគារជាតិនៃកម្ពុជា សូមធ្វើអន្តរាគមន៍ជាមួយធនាគារពាណិជ្ជ និងគ្រឹះស្ថានហិរញ្ញវត្ថុទាំងអស់ ដែលបានផ្តល់ប្រាក់កម្ចរីដល់គ្រឹះស្ថានសិក្សាមួយចំនួន សូមឱ្យពិចារណាបញ្ចុះអត្រាការប្រាក់ និងពន្យារការទូទាត់សំណងទៅតាមលទ្ធភាព ដើម្បីដោះបន្ទុកមួយចំនួនដែលរងផលប៉ះពាល់ពីជំងឺ covid-19៕
April 13, 2020
គ្រោះរាំងស្ងួត…កសិផលធ្លាក់ថ្លៃ…កូវីដ-19 វាយលុក…ផ្សារបិទ…អត់អ្នកទិញ កសិករថៃនាំគ្នាដឹកផ្លែក្រូចទៅចាក់ចោលទាំងតោនៗ
ម្ចាស់ចម្ការក្រូចនៅក្នុងខេត្ត ស៊ុខូថៃ ក្នុងប្រទេសថៃ កំពុងរងគ្រោះធ្ងន់ ក្រោយពីជួបនឹងគ្រោះរាំងស្ងួតវាយលុក តម្លៃកសិផលធ្លាក់ចុះ រោគរាតត្បាត ផ្សារបិទ គ្មានអ្នកទិញ លក់មិនដាច់ ផ្លែក្រូចចាប់ផ្ដើមស្អុយខូច ត្រូវនាំគ្នាដឹកយកទៅចាក់ចោលទាំងតោនៗ ហើយបន្តិចទៀត ស្វាយ និងក្រូចឆ្មារ ក៏ប្រហែលនឹងរងវាសនាកម្មដូចគ្នាដែរ…។
កសិករអ្នកដាំក្រូចឃ្វិច នៅក្នុងឃុំមែស៊ីន ស្រុកស៊ីសាត់ឆណាល័យ ខេត្តស៊ុខូថៃ នៅប្រទេសថៃ ដែលជាប្រភពទិន្នផលក្រូចឃ្វិចដ៏ធំបំផុតមួយរបស់ប្រទេសថៃ ខណៈពេលនេះ កំពុងរងផលប៉ះពាល់យ៉ាងធ្ងន់ធ្ងរដោយសារបញ្ហាការឆ្លងរាលដាលយ៉ាងខ្លាំងក្លារបស់មេរោគកូវីដ-19 ធ្វើឱ្យគ្មានឈ្មួញកណ្ដាលមកទទួលទិញ រហូតកសិករទាំងនោះត្រូវបង្ខំចិត្តដឹងផ្លែក្រូចទាំងនោះយកទៅចាក់ទាំងតោនៗ។
ប្រភព៖ សារព័ត៌មានបរទេស
April 13, 2020
តួឯកល្ខោនបាសាក់ អុល សំអាង ចូលរួមប្រឆាំងកូវីដ19
មិនមែនត្រឹមតែស្រទាប់មហាជន និង សិល្បករបែបសម័យប៉ុណ្ណោះទេដែលបានផលិតបទចម្រៀង ឬ ផលិតជាសារអប់រំ ដើម្បីបំផុសពីការចួលរួមបំផុសពីជម្ងឺកូវីដ19 នោះទេ សូម្បីតែតារាឯកល្ខោនបាសាក់ លោក អុល សំអាង ក៏បានបញ្ចេញបទចម្រៀងរៀបរាប់ពីផលប៉ះពាល់ និង ការការពារជម្ងឺកូវីដ19 ដើម្បីជាការចូលរួមផងដែរ។ បទចម្រៀងរបស់លោក ក៏ត្រូវបានគេបន្លឺនៅលើកញ្ចក់ទូរទស្សន៍ TVK ផងដែរ។
បទចម្រៀងដែលបានបន្លឺនោះ ម្នាក់ៗមានការសរសើរ និងចាប់អារម្មណ៍មិនតិចទេ ខណៈដែលលោកមិនត្រឹមតែចូលរួមក្នុងសកម្មភាពប្រយុទ្ធប្រឆាំងជម្ងឺកូវីដ19 តាមរយៈការបង្ហាញខ្លួនក្នុងសកម្មភាពសង្គមចាប់តាំងពីជំងឺនេះផ្ទុះឡើងទេ ដោយចូលរួមផលិតជាបទចម្រៀងបកស្រាយដោយផ្ទាល់ទៅទៀត។ លោក អុល សំអាង និយាយថា ក្នុងនាមជាទីប្រឹក្សាក្រសួងព័ត៌មាន លោកពិតជាមានអារម្មណ៍សប្បាយចិត្តយ៉ាងខ្លាំង ដែលបានរួមចំណែកក្នុងការលើកស្ទួយ និង អភិរក្សល្ខោនបាសាក់ ហើយបានទាំងចូលរួមផលិតបទចម្រៀង2បទ ដើម្បីចូលរួមប្រយុទ្ធប្រឆាំងនឹងជម្ងឺកូវីដ19។ លោកក៏ទទូចឱ្យមហាជនគ្រប់ជាន់ថ្នាក់កុំមើលស្រាលជំងឺកូវីដ19 ដោយរួមចំណែករក្សាអនាម័យ និងកាត់បន្ថយពិធីជួបជុំគ្រប់កាលៈទេសៈ ដើម្បីបញ្ចប់ការរីករាលដាលដោយជំងឺកូវីដ19។ លោកក៏ប្រកាសបន្តធ្វើយុទ្ធនាការប្រយុទ្ធប្រឆាំងជម្ងឺកាចសាហាវមួយនេះ ដោយនឹងផលិតឃ្លីបអប់រំ ឬ បទចម្រៀងក្នុងពេលបន្តបន្ទាប់ផងដែរ៕

April 12, 2020
មួយឈុតច្នៃពីដើមត្នោត លើកសម្រស់ សុគន្ធ នីសា ដូចរាជិនីរុក្ខជាតិ
ពិតជាស្រស់ស្អាតណាស់ សុគន្ធ និសា គ្រងឈុត «ត្នោតខ្មែរប្រសិទ្ធសិរី» បង្ហាញពីគុណតម្លៃដើមត្នោត ជារុក្ខជាតិដ៏មានប្រយោជន៍។
អ្នកនាង សុគន្ធ និសា ខណៈគ្រងឈុតដែលមានឈ្មោះថា «ឈុតត្នោតខ្មែរ ប្រសិទ្ធសិរី» ដែលជាការច្នៃដោយសម្អាងការ ប្រសិទ្ធសិរី ធ្វើឲ្យមហាជនស្ងើចសរសើរមិនដាច់ពីមាត់។ នេះជាឈុតដែលគេកម្រឃើញ ហើយក៏ជាឈុតដែលរំលេចពីគុណតម្លៃរបស់ដើមត្នោតខ្មែរ ដែលរុក្ខជាតិដ៏មានប្រយោជន៍របស់ដូនតាខ្មែរផងដែរ។
នៅលើបណ្ដាញសង្គមរបស់ ប្រសិទ្ធ សិរី សម្អាងការ បានបង្ហោះកាលពីថ្ងៃទី9 ខែមេសា ឆ្នាំ2020 អមដោយកំណាព្យមួយឃ្លា ដែលបង្ហាញពីដើមត្នោតខ្មែរ។ រូបថតជាច្រើនសន្លឹករបស់តារាចម្រៀង អ្នកនាង សុគន្ធ និសា ត្រូវបានមហាជនសរសើរទាំងសម្រស់ និង ឈុតដែលបានច្នៃឡើង ដោយមានការចែកចាយគួរឲ្យសរសើរនោះផង ដោយសារតែឈុតនេះ ទាក់ទាញ ហើយជាឈុតដែលកែច្នៃឡើងដើម្បីបង្ហាញពីគុណតម្លៃរបស់ដើមត្នោត ដែលគេចាប់អារម្មណ៍ច្នៃឡើង ទាំងមិននឹកស្មានដល់៕
April 11, 2020
Ronaldo រកបានប្រាក់ពីការផ្សាយពាណិជ្ជកម្មច្រើនជាងពីវិស័យបាល់ទាត់ទៅទៀត
កំពូលតារាបាល់ទាត់ Cristiano Ronaldo រកបានប្រាក់ពីបណ្ដាញសង្គម Instagram ច្រើនជាងពីក្លិបបាល់ទាត់ Juventus ទៅទៀត នៅក្នុងឆ្នាំ2019។
សារព័ត៌មាន Business Insider បានចេញផ្សាយថា Ronaldo រកបាន47.8លានដុល្លារពីអត្ថបទផ្សាយពាណិជ្ជកម្មនៅលើបណ្ដាញសង្គម Instagram។ កីឡាករបាល់ទាត់រូបនេះ បានក្លាយជាអ្នកមានបំផុតនៅលើបណ្ដាញសង្គមមួយនេះក្នុងឆ្នាំ2019។ អត្ថបទផ្សាយពាណិជ្ជកម្ម1អត្ថបទរបស់ Ronaldo ដែលបង្ហោះនៅលើ Instagram មានតម្លៃជាមធ្យម 975,000ដុល្លារអាមេរិក។
ក្លិប Juventus ក៏ត្រូវចំណាយ65លានដុល្លារដែលជាប្រាក់រង្វាន់(មិនទាន់គិតពន្ធ) ទៅឱ្យ Ronaldo ផងដែរ។ ប៉ុន្តែ តារាបាល់ទាត់រូបនេះ ទទួលបានត្រឹមតែ34លានដុល្លារប៉ុណ្ណោះ ដោយសារត្រូវបង់ពន្ធ43% នៅអ៊ីតាលី ខណៈដែលប្រាក់ដែលត្រូវបង់ពន្ធលើសកម្មភាពផ្សាយពាណិជ្ជកម្មរបស់ Ronaldo មិនដល់120,000លាននោះទេ។
កំពូលតារាបាល់ទាត់ Ronaldo គឺជាតួអង្គដែលត្រូវបានគេតាមដាន(follow)ច្រើនបំផុតនៅលើបណ្ដាញសង្គម Instagram ដោយមានអ្នកតាមដានចំនួន212លាននាក់។ គាត់គឺជាមនុស្សដំបូងបង្អស់ និងតែមួយគត់ដែលមានអ្នកតាមដានច្រើនជាង200លាននាក់នៅលើបណ្ដាញសង្គម Instagram។ កំពូលកីឡាករបាល់ទាត់ល្បីឈ្មោះជាងគេ1រូបទៀត នោះគឺ Lionel Messi។ កីឡាករបាល់ទាត់របស់ក្លិបBarcelona រូបនេះ ក៏មានអ្នកតាមដានចំនួន147នាក់ផងដែរ នៅលើ Instagram។ ប្រាក់ចំណូលរបស់ Messi ដែលបានមកពីបណ្ដាញសង្គមនេះ គឺប្រមាណជា23.3លានដុល្លារ (ជិតស្មើនឹងពាក់កណ្ដាល Ronaldo)។
ប្រាក់ចំណូលសរុបរបស់ Ronaldo ក្នុងឆ្នាំ2019 មានចំនួន109លានដុល្លារអាមេរិក។ ចំណែកទ្រព្យសរុបរបស់កីឡាកររូបនេះ ឡើងដល់500លានដុល្លារអាមេរិក។ នេះបើតាមសារព័ត៌មាន celebritynetworth។ Ronaldo នឹងក្លាយជាមហាសេដ្ឋីដែលមានទ្រព្យរាប់ពាន់លានដុល្លារ នាពេលដ៏ខ្លីខាងមុខមិនខាន៕
ប្រភព៖ សារព័ត៌មានបរទេស
April 11, 2020
Google ដាក់កំហិត មិនឱ្យបុគ្គលិកខ្លួនប្រើកម្មវិធីល្បី Zoom
ក្រុមហ៊ុន Google បានចេញបម្រាមមួយ ហាមឃាត់មិនឱ្យបុគ្គលិករបស់ខ្លួនប្រើប្រាស់កម្មវិធីសន្និសីទតាមអនឡាញ Zoom នោះឡើយ។
ក្រុមហ៊ុនដដែលខាងលើ បានលើកហេតុផលថា ក្រុមហ៊ុនមានការព្រួយបារម្ភលើសុវត្ថិភាព ដែលបញ្ហាផ្នែកសុវត្ថិភាពនេះ កាន់តែបន្តកើនឡើង ចាប់តាំងពី Zoom បានក្លាយជាកម្មវិធីពេញនិយមជាងគេ អំឡុងការផ្ទុះមេរោគកូវីដ-19។
កាលពីសប្ដាហ៍មុន Google បានផ្ញើអ៊ីមែលទៅប្រាប់បុគ្គលិក អំពីការហាមឃាត់នេះ ដោយបានប្រាប់ថា បុគ្គលិកណាដែលបានដំឡើងកម្មវិធី Zoom លើម៉ាស៊ីនដែលផ្ដល់ដោយ Google នោះប្រាកដជានឹងលែងអនុញ្ញាតឱ្យ Zoom ដំណើរការបានតទៀតហើយ។
គួររំឭកផងដែរថា Google ក៏មានកម្មវិធីមួយឈ្មោះ Meet ដែលស្រដៀងនឹង Zoom ដូចគ្នាដែរ ដោយជាផ្នែកមួយនៃផលិតផល G Suite ដើម្បីមកប្រកួតប្រជែងនឹង Zoom៕
April 11, 2020
ចិន បានបង្កើត “ម៉ាស់ប្រឆាំងវីរុសអេឡិចត្រូស្តាទិក” មានប្រសិទ្ធភាពខ្ពស់ជាងម៉ាស់ N95
ជំនួយការសាស្រ្តាចារ្យម្នាក់ បានចែករំលែកព័ត៌មានអំពីគុណសម្បត្តិនៃម៉ាស់ថ្មីនេះធៀបនឹងម៉ាស់ស្តង់ដារ N95។ ប្រទេសចិន បានបង្កើត “ម៉ាស់ប្រឆាំងវីរុស អេឡិចត្រូស្តាទិក” ដែលមាន “ឧបករណ៍បន្សុទ្ធខ្យល់”។
ម៉ាស់ថ្មីនោះ គឺជាស្នាដៃរបស់សាលាវិស្វកម្មមេកានិក និងអគ្គិសនី នៅសាកលវិទ្យាល័យវិទ្យាសាស្ត្រអេឡិចត្រូនិក ស៊ីអាន។
លោកសាស្រ្តាចារ្យ Tong Xufeng និយាយថា មេរោគកូវីដ-19 មិនអាចរស់រាននៅក្នុងខ្យល់តែមួយមុខបានទេ វារីករាលដាលជាចម្បង ដោយភ្ជាប់ខ្លួនវាទៅនឹងភាគល្អិតតូចៗ។
ដូច្នេះ មេរោគដំបូងបំផុតត្រូវតែតោងអ្វីមួយសិន ដែលខ្លូនវា មានអង្កត់ផ្ចិតនៃភាគល្អិតបែបនោះ ដែលជាធម្មតាមានទំហំតូចជាង PM 2.5 ឬប្រហែលនឹង 1មីក្រុង។
លោកនិយាយថា “គុណប្រយោជន៍នៃម៉ាស់ថ្មីនេះ គឺភាគច្រើនវាអាចច្រោះយកភាគល្អិតដែលមានអង្កត់ផ្ចិតតិចជាង 1មីក្រុង។ ក្រោយស្រូបយកភាគល្អិតទាំងនោះ ម៉ាស់នេះនឹងប្រើកាំរស្មី និងតុងស្យុងខ្ពស់ដើម្បីសម្លាប់មេរោគ។ ប្រសិនបើអ្នកប្រើម៉ាស់ធម្មតាដែលត្រងភាគល្អិតទំហំ PM 2.5 ពួកវានឹងមិនច្រោះភាគល្អិតតូចជាង 2,5 មីក្រុងទេ”។
មុនពេលផ្ទុះមេរោគកូវីដ-19 នៅពេលសាលារៀនបិទទ្វារនៅស៊ីអាន ដោយសារតែមានផ្សែងអ័ព្ទខ្លាំង ក្រុមអ្នកស្រាវជ្រាវរបស់លោក តុង ស៊ូហ្វេង បានផលិតម៉ាស់នេះឡើង ដើម្បីការពារប្រឆាំងនឹងភាគល្អិតតូចៗ និងធូលីដី។
លោក និយាយថា ក្រុមរបស់លោកបានដាក់ពាក្យទៅមន្ទីរពាក់ព័ន្ធរួចហើយ ដើម្បីបញ្ជាក់អំពីការអនុញ្ញាតលើម៉ាស់ថ្មីប្រឆាំងនឹងមេរោគនេះ ហើយបច្ចុប្បន្នកំពុងរង់ចាំការផ្ទៀងផ្ទាត់ និងការយល់ព្រម។ ទន្ទឹមនឹងនេះការផលិតម៉ាស់ទ្រង់ទ្រាយធំ ក៏កំពុងត្រៀមរួចរាល់ហើយដែរ។
ម៉ាស់នេះត្រូវបានទទួលស្គាល់នៅក្នុងទីផ្សារ។ ម៉ាស់ថ្មីនេះរំពឹងដាក់លក់លើទីផ្សារក្នុងរយៈពេលប្រហែល 2ខែទៀត។
April 11, 2020