Category: សង្គម និងសេដ្ឋកិច្ច

កូនក្អួតក្រោយពេលបញ្ចុកថ្នាំ តើត្រូវបញ្ចុកម្តងទៀតឬទេ?
ឡារ៉ែន ជឿថានៅរៀងរាល់ពេលបញ្ចុកថ្នាំក្នុងពេលដែលកូនតូចមានអាការឈឺថ្កាត់ម្តងៗនោះ គឺពិតជារឿងមួយដែលធ្វើឱ្យលោកឪពុកអ្នកម្តាយឈឺក្បាលវឹលមុខមិនស្ទើរឡើយ ព្រោះណាមួយកូនមិនព្រមញ៉ាំ ឬលេបថ្នាំនោះសោះ និងមួយទៀត គឺលេបចូលទៅហើយ តែក្អួតចេញមកវិញអស់ ធ្វើឱ្យលោកឪពុកអ្នកម្តាយកើតមានការស្ទាក់ស្ទើរក្នុងចិត្តថា តើគួរបញ្ចុកម្តងទៀតឬយ៉ាងណា?
ដូច្នេះ ខាងក្រោមនេះគឺជាចម្លើយចំពោះចម្ងល់នេះ។
មូលហេតុកូនក្អួតក្រោយពេលបញ្ចុកថ្នាំរួច
អាការក្អួតរបស់កូនក្រោយពេលត្រូវប៉ាម៉ាក់បញ្ចុកថ្នាំរួច ជាបញ្ហាដែលជួបញឹកញាប់ និងកើតឡើងដដែលៗ។ កូនក្អួតក្រោយការបញ្ចុកថ្នាំច្រើនតែបណ្តាលមកពីការយំយ៉ាងខ្លាំងក្លាព្រោះមិនចូលចិត្តរសជាតិរបស់ថ្នាំ មិនចូលចិត្តក្លិនរបស់ថ្នាំ កូនត្រូវការបដិសេធទើបព្យាយាមធ្វើឱ្យកើតអាការក្អួត ឬកើតពីតិចនិកក្នុងការបញ្ចុកថ្នាំមិនល្អ ធ្វើឱ្យរសជាតិថ្នាំទៅប៉ះនឹងបរិវេណគល់អណ្តាតនាំ ឱ្យកើតប្រតិកម្មការខ្ជាក់ចេញមកវិញដោយស្វ័យប្រវត្តិ ដែលខាងវេជ្ជសាស្រ្តហៅថា gag reflex ធ្វើឱ្យក្មេងក្អួតចេញមក ។
កូនក្អួតក្រោយពេលបញ្ចុកថ្នាំ តើត្រូវបញ្ចុកថ្នាំម្តងទៀតឬទេ?
1 – ត្រូវបញ្ចុកឡើងវិញម្តងទៀត ៈ ក្នុងករណីបញ្ចុកហើយក្អួតភ្លាម (មិនមែនក្អែចេញមកបន្តិចបន្តួចទេ) ចូរអ្នកម្តាយបញ្ចុកថ្នាំក្នុងបរិមាណដដែលឡើងវិញម្តងទៀតក្រោយពីកូនឈប់ក្អួតហើយ។
2 – មិនបាច់បញ្ចុកម្តងទៀតទេ ៈ ក្នុងករណីដែលកូនក្អួតបន្ទាប់ពីការបញ្ចុកថ្នាំកន្លងផុតទៅយូរក្រែលហើយ ឬចាប់ពីកន្លះម៉ោងឡើងទៅនោះ មិនចាំបាច់បញ្ចុកឡើងវិញម្តងទៀតទេ ព្រោះថ្នាំមួយចំនួនអាចត្រូវបានបឺតជ្រាបចូលទៅក្នុងរាងកាយខ្លះហើយ តែត្រូវបញ្ចុកតាមពេលវេលាដែលពេទ្យកំណត់នៅលើកក្រោយទៀត។
តិចនិកការបញ្ចុកថ្នាំ ឱ្យកូនបានទទួលថ្នាំគ្រប់ចំនួនតាមវេជ្ជបញ្ជា
1- បញ្ចុកថ្នាំសម្រេចគ្រប់ពេល ត្រូវមានអារម្មណ៍ល្អតាំងពីលើកដំបូង។ លើកដំបូងរបស់ការបញ្ចុកថ្នាំត្រូវបបួលកូនតូចលេងឱ្យមើលនេះមើលនោះ ចាប់ កាន់ ឧបករណ៍ផ្សេងៗ បើស្ថិតក្នុងវ័យយល់ដឹងខ្លះហើយត្រូវអធិប្បាយ ឱ្យពេលវេលា និងកុំបង្ហាញអាការធុញថប់តានតឹងឱ្យកូនឃើញឱ្យសោះ។
2- ឧបករណ៍សម្រាប់បញ្ចុកក៏សំខាន់ដែរ ត្រូវជ្រើសរើសឱ្យស័ក្តិសម ដូចជាថ្នាំដែលមានរសជាតិល្វីង ឡារ៉ែនណែនាំឱ្យប្រើបំពង់ម្ជុលចាក់ថ្នាំ បាញ់បញ្ចូលមាត់កូនតែម្តង រួចឱ្យញ៉ាំទឹកតាមក្រោយ ចំណែកថ្នាំដែលមានរសជាតិផ្អែមអាចប្រើស្លាបព្រាបញ្ចុកបាន
3- ឥរិយាបថរបស់កូនក្នុងពេលបញ្ចុកក៏សំខាន់ដូចគ្នាដែរ កុំបញ្ចុុកដោយឱ្យកូនគេងរាបស្មើ ព្រោះកូននឹងលេបមិនទាន់ ធ្វើឱ្យក្អួតព្រួសចេញមកវិញ ឬអាចឈ្លក់ថ្នាំបាន គួរបញ្ចុកថ្នាំកូនក្នុងឥរិយាបទដែលក្បាលនៅខ្ពស់ជាងខ្លួន។
4- ត្រូវត្រៀមទឹកទុកជាមុនបន្តិចបន្តួច បន្ទាប់ពីបញ្ចុកថ្នាំហើយ ចូរឱ្យទឹកញ៉ាំបន្តិច ព្រោះថ្នាំប្រភេទទឹកស៊ីរ៉ូធ្វើឱ្យស្អិតក្នុងបំពង់ក អាចធ្វើឱ្យកូនក្អក ហើយការឱ្យញ៉ាំទឹកបន្តិចអាចការពារអាការក្អកបាន។
5- ប្តូររសជាតិរបស់ថ្នាំ ពីល្វីងឱ្យទៅជាផ្អែម តែត្រូវសួរនាំលោកគ្រូពេទ្យជាមុនសឹន ព្រោះថ្នាំខ្លះអាចកើតប្រតិកម្មខាងគីមីជាមួយទឹកស៊ីរ៉ូ អាចមានផលប៉ះពាល់ដល់ការបឺតជ្រាបរបស់រាងកាយបាន។
បានដឹង និងស្គាល់ពីតិចនិកល្អៗពាក់ព័ន្ធនឹងវិធីបញ្ចុកថ្នាំកូនហើយ ឡារ៉ែនសង្ឃឹមថា ក្មេងតូចៗទាំងឡាយនឹងលែងសូវក្អួត ឬព្រួសថ្នាំចេញទៀតហើយ តែអាការក្អួតនេះក៏អាចបណ្តាលមកពីការកើតប្រតិកម្មចាញ់ថ្នាំដែលញ៉ាំនោះដែរ ដូច្នេះអ្នកម្តាយគួរសង្កេតមើលអាការរួមផ្សេងទៀតផង ដូចជា ឡើងកន្ទួលរមាស់ ភ្នែកហើម មាត់ហើម ពិបាកដកដង្ហើមជាដើម បើឃើញកូនតូចកើតមានអាការទាំងនេះក្រោយពេលបញ្ចុកថ្នាំរួចនោះ អ្នកម្តាយគួរប្រញាប់នាំកូនទៅមន្ទីពេទ្យជាបន្ទាន់កុំបង្អង់យូរ៕
April 22, 2020
អតីតកម្មកររោងចក្ររបស់ Samsung ក្លាយជាអ្នកមានជាងគេលំដាប់ទី2នៅកូរ៉េខាងត្បូង
មហាសេដ្ឋី Seo Jung-jin ដែលជាសហស្ថាបនិកក្រុមហ៊ុនឱសថ Celltrion បានក្លាយជាមហាសេដ្ឋីមួយរូបក្នុងចំណោមមហាសេដ្ឋីតិចតួចបំផុតដែលទ្រព្យបានកើនឡើងយ៉ាងឆាប់រហ័សនៅក្នុង “សម័យ COVID-19 ដោយសារតម្លៃមូលបត្ររបស់ក្រុមហ៊ុននេះ ស្ថិតក្នុងលំដាប់ “មហាលោតផ្លោះ”។
Celltrion គឺជាក្រុមហ៊ុនឱសថបច្ចេកវិទ្យាជីវសាស្ត្រ ប៉ុន្តែ នៅពេល COVID-19 បានកើតឡើង តម្រូវការផ្នែកសម្ភារសុខាភិបាលក៏បានកើនឡើងខ្ពស់ ដូច្នេះ ក្រុមហ៊ុននេះក៏បានងាកទៅផលិតសម្ភារសុខាភិបាល និងអភិវឌ្ឍថ្នាំព្យាបាល COVID-19។
ក្ដីសង្ឃឹមរបស់ទីផ្សារទាក់ទិននឹងឈុតឧបករណ៍ធ្វើតេស្តថ្មី និងថ្នាំព្យាបាល COVID-19 ដែលផលិតដោយក្រុមហ៊ុនកូរ៉េខាងត្បូង Celltrion បានជួយឱ្យទ្រព្យរបស់ស្ថាបនិក Seo Jung-jin កើនឡើងយ៉ាងឆាប់រហ័សដែលនឹកស្មានមិនដល់។
ចាប់តាំងពី Forbes បានចេញផ្សាយបញ្ជីរាយនាមនៃបណ្ដាអ្នកមានបំផុតនៅក្នុងពិភពលោកកាលពីថ្ងៃទី18មីនា ទ្រព្យរបស់អ្នកជំនួញ Seo Jung-jin អាយុ62ឆ្នាំ ក៏បានកើនបន្ថែម2.2ពាន់លានដុល្លារ ធ្វើឱ្យទ្រព្យសរុបរបស់លោកកើនឡើងដល់8.3ពាន់លានដុល្លារ ខណៈដែលតម្លៃមូលបត្ររបស់ Celltrion បានឡើង37.6%។
ភាគហ៊ុនិកនានាដែលកំពុងវិនិយោគទៅលើ Celltrion សង្ឃឹម និងជឿជាក់ថា ក្រុមហ៊ុននេះនឹងទទួលបានជោគជ័យក្នុងការអភិវឌ្ឍ និងផលិតថ្នាំព្យាបាល COVID-19 នាពេលឆាប់ៗខាងមុខ។
លោក Kwon Ki-sung ដែលជានាយកផ្នែកស្រាវជ្រាវ និងអភិវឌ្ឍន៍របស់ក្រុមហ៊់ុន Celltrion បានឱ្យដឹងថា “ជាមួយនឹងដំណាក់កាលនៃការអភិវឌ្ឍអង្គបដិប្រាណប្រឆាំងនឹងវីរុស COVID-19 យ៉ាងឆាប់រហ័ស យើងនឹងចាប់ផ្ដើមធ្វើតេស្តថ្នាំនៅលើមនុស្សក្នុងខែកក្កដាខាងមុខ”។
ឧបករណ៍សម្រាប់ធ្វើតេស្តរកវីរុសCOVID-19
លោក Kwon Ki-sung បន្តថា “យើងខ្ញុំក៏កំពុងតែស្ថិតក្នុងដំណាក់កាលអភិវឌ្ឍអង្គបដិប្រាណដ៏អស្ចារ្យមួយ ដែលត្រូវបានហៅថា cocktail អង្គបដិប្រាណ ហើយតាមគម្រោង យើងនឹងបញ្ចេញឧបករណ៍ធ្វើតេស្តលឿនដោយស្វ័យប្រវត្ត នៅក្នុងរដូវក្ដៅនេះ”។ លោកបញ្ជាក់ថា ឧបករណ៍ធ្វើតេស្តរកមេរោគ COVID-19 របស់ Celltrion អាចឱ្យដឹងលទ្ធផលដោយប្រើពេលត្រឹមតែពី15-20នាទីប៉ុណ្ណោះ។
ពីកម្មកររោងចក្រ ក្លាយជាមហាសេដ្ឋីពិភពលោក
មហាសេដ្ឋី Seo ធ្លាប់ជាកម្មករធ្វើការនៅក្នុងរោងចក្រផលិតគ្រឿងបន្លាស់អេឡិចត្រូនិចរបស់ក្រុមហ៊ុន Samsung ក្នុងអំឡុងទសវត្សរ៍ឆ្នាំ1980។ ក្រោយមក លោកក៏បានក្លាយជានាយកប្រតិបត្តិជាន់ខ្ពស់នៃរោងចក្រផលិតរថយន្តកូរ៉េខាងត្បូង Daewoo Motor ប៉ុន្តែ លោកបានចាកចេញពីក្រុមហ៊ុននេះ ក្នុងវិបត្តិហិរញ្ញវត្ថុអាស៊ីកាលពីឆ្នាំ1999។
លោក Seo បានរៀបរាប់អំពីអតីតកាលរបស់លោកថា “ម្ដាយក្មេករបស់ខ្ញុំបានហៅទូរស័ព្ទមកខ្ញុំ ដោយសួរខ្ញុំថា តើខ្ញុំនឹងធ្វើអ្វីដើម្បីរកប្រាក់? ពេលនោះ ខ្ញុំមានអារម្មណ៍ថា ហត់នឿយ ធុញទ្រាន់ជាមួយនឹងសម្ដីរអ៊ូរទាំរបស់គាត់ខ្លាំងណាស់ ដូច្នេះ ខ្ញុំក៏បានសម្រេចចិត្តបើកក្រុមហ៊ុនផ្ទាល់ខ្លួនមួយ”។
ជាមួយនឹងមិត្តភក្ដិមួយចំនួននៅឯក្រុមហ៊ុន Daewoo លោក Seo បានបង្កើត Celltrion កាលពីឆ្នាំ2020 ហើយបច្ចុប្បន្ន លោកបានក្លាយជាអ្នកមានបំផុតលំដាប់ទី2នៅប្រទេសកូរ៉េខាងត្បូង។
Celltrion ដែលមានទីស្នាក់ការធំនៅទីក្រុង Incheon បានចូលទីផ្សារភាគហ៊ុនកាលពីឆ្នាំ2008។ ក្រោយរកស៊ីរយៈពេល10ឆ្នាំ តម្លៃទីផ្សាររបស់ក្រុមហ៊ុននេះ បានកើនដល់ 27.7លានលានវ៉ុន(ប្រមាណជា 22.8ពាន់លានដុល្លារអាមេរិក)។
Celltrion មិនមែនជាក្រុមហ៊ុនបច្ចេកវិទ្យាជីវសាស្ត្រតែមួយគត់នៅកូរ៉េខាងត្បូងនោះទេ ដែលកំពុងចូលរួមប្រកួតក្នុងការអភិវឌ្ឍ និងផលិតថ្នាំព្យាបាល COVID-19។ គូប្រជែងដ៏សំខាន់របស់ពួកគេនោះគឺ Samsung BioLogics ដែលជាក្រុមហ៊ុនបុត្រសម្ព័ន្ធរបស់ Samsung ដែលបានប្រកាសកាលពីថ្ងៃទី10មេសាថា ខ្លួនកំពុងសហការជាមួយ Vir Technology របស់សហរដ្ឋអាមេរិក តាមរយៈកិច្ចព្រមព្រៀងដែលមានតម្លៃ 362លានដុល្លារដើម្បីផលិតថ្នាំប្រឆាំងនឹងវីរុស COVID-19៕
ប្រភព៖ Forbes
April 21, 2020
សាកលវិទ្យាល័យ NTU សិង្ហបុរី បង្កើតបានរ៉ូបូត អាចធ្វើចលនាស្វ័យប្រវត្តិ សម្លាប់មេរោគបាន
ក្រុមអ្នកស្រាវជ្រាវនៅប្រទេសសិង្ហបុរី បានបង្កើត រ៉ូបូត (មនុស្សយន្ត) មួយឡើង ដើម្បីបាញ់សម្លាប់មេរោគ ដោយមានដៃមួយ អាចធ្វើត្រាប់តាមចលនារបស់មនុស្សជួយសម្រាលបន្ទុកការងារដល់អ្នកសម្អាតក្នុងពេលកំពុងផ្ទុះកូវីដ-19។
រ៉ូបូតនេះឈ្មោះថា “XDBOT” មានរាងដូចប្រអប់មួយ មានកង់ដែលអាចចូលទៅដល់ទីតាំងចង្អៀតៗមួយចំនួន ដូចជានៅក្រោមតុ និងក្រោមគ្រែជាដើម។
រ៉ូបូត ដែលសាងសង់ដោយអ្នកស្រាវជ្រាវនៅសាកលវិទ្យាល័យ Nanyang Technological University (NTU) របស់រដ្ឋក្នុងទីក្រុងនេះ មានក្បាលថាមពលខ្ពស់សម្រាប់បាញ់ថ្នាំសម្លាប់មេរោគ និងអាចបាញ់សម្អាតលើផ្ទៃទីធ្លាធំៗបានយ៉ាងឆាប់រហ័ស។
រ៉ូបូត នេះអាចបញ្ជាបានពីចម្ងាយដោយប្រើកុំព្យូទ័រយួរដៃ ឬថេប្លេត ដោយជួយកាត់បន្ថយហានិភ័យដល់អ្នកសម្អាតក្នុងការឆ្លងមេរោគកូរ៉ូណា ដែលបានសម្លាប់មនុស្សជាង 140 0000 នាក់នៅទូទាំងពិភពលោក។
អ្នកវិទ្យាសាស្រ្តនៅសាកលវិទ្យាល័យ NTU ដែលដឹកនាំគម្រោងនេះ បាននិយាយថា “ដោយប្រើប្រាស់រ៉ូបូតថ្មីរបស់យើងពីចម្ងាយ ប្រតិបត្តិករជាមនុស្សអាចគ្រប់គ្រងបានយ៉ាងច្បាស់លាស់នូវដំណើរការនៃការបាញ់សម្អាតមេរោគដោយមិនចាំបាច់ប៉ះពាល់ជាមួយនឹងផ្ទៃរបស់វត្ថុទាំងនោះឡើយ”។
មនុស្សយន្ត XDBOT ត្រូវបានសាកល្បងនៅបរិវេណសាកលវិទ្យាល័យ NTU ហើយអ្នកបង្កើតវាសង្ឃឹមថា នឹងធ្វើតេស្តវានៅតំបន់សាធារណៈ និងក្នុងមន្ទីរពេទ្យច្រើនទៀត៕
April 21, 2020
Tottenham Hostpur ក៏ប្រកាសកាត់ប្រាក់ខែបុគ្គលិក និងកីឡាកររបស់ខ្លួនដែរ
ក្លិបបាល់ទាត់ Tottenham Hostpur បានប្រកាសការសម្រេចចិត្តដ៏លំបាកមួយ ក្នុងគោលបំណងការពារមិនឱ្យបាត់បង់ការងារ ដោយក្លិបសម្រេចកាត់ប្រាក់ខែបុគ្គលិក និងកីឡាករ ចំនួន 2ខែ គឺខែមេសា និងខែឧសភា ដូចក្លិបឯទៀតនៅក្នុងលីកកំពូលអង់គ្លេស English Premier League ដែរ។
ក្នុងនោះក្លិបមានគោលការណ៍កាត់ប្រាក់ខែតែចំពោះកីឡាករដែលមានប្រាក់ឈ្នួលថ្លៃៗប៉ុណ្ណោះ ដោយទុកប្រាក់បើកឱ្យសម្រាប់កីឡាករដែលមានប្រាក់ចំណូលទាប។ តាមការបញ្ជាក់របស់ក្លិប កីឡាកររបស់ខ្លួនចំនួនតែ 80%ប៉ុណ្ណោះ ដែលត្រូវកាត់ប្រាក់ខែ ខណៈដែលកីឡាករចំនួន ២០%ទៀត នៅបើកប្រាក់ខែជាធម្មតា ព្រោះពួកគេទាំងនោះ មានប្រាក់ចំណូល ឬប្រាក់ខែទាប។
គួរបញ្ជាក់ដែរថា ក្លិបបាល់ទាត់ស្ទើរតែទាំងអស់នៅលើពិភពលោកទទួលរងនូវឥទ្ធិពល នៃវិបត្តិកូវីដ-19 ដែលធ្វើឱ្យប៉ះពាល់យ៉ាងខ្លាំងដល់ហិរញ្ញវត្ថុរបស់ក្លិបនីមួយៗ ដែលតម្រូវឱ្យធ្វើការកាត់ប្រាក់ខែដើម្បីទប់ទល់នឹងស្ថានការណ៍នេះ៕
April 21, 2020
អាការ 4 យ៉ាងរបស់កូនដែលអាចមើលថែឱ្យបាត់ទៅវិញខ្លួនឯងដោយមិនបាច់ពឹងថ្នាំ
តើទារកទើបនឹងកើតអាចញ៉ាំថ្នាំបានឬទេ? អ្នកម្តាយថ្មោងថ្មីជាច្រើននាក់ប្រហែលជានឹកកង្វល់ចំពោះរឿងនេះមិនតិចឡើយមែនទេ? ចំពោះចម្ងល់នេះ គ្រូពេទ្យជំនាញបានប្រាប់ថា ទារកទើបនឹងកើតអាចញ៉ាំថ្នាំបានយ៉ាងគ្មានបញ្ហាអ្វីឡើយ ព្រោះក្នុងពេលបច្ចុប្បន្ននេះក៏មានថ្នាំសម្រាប់ក្មេងទើបនឹងកើតជាច្រើនដែរ តែអ្វីដែលសំខាន់បំផុតនោះគឺ ការមើលថៃទាំ និងរក្សាសុខភាពរាងកាយរបស់កូនឱ្យរឹងប៉ឹង មាំមួន និងចាក់វ៉ាក់សាងការពារឱ្យគ្រប់ ដើម្បីចៀសវាងមិនឱ្យទារកញ៉ាំថ្នាំដោយមិនចាំបាច់។ អាការបន្តិចបន្តួច ក៏យើងអាចមើលថែទាំ និងចាត់ការដោយខ្លួនឯងបានដែរ ដូច្នេះសូមអ្នកម្តាយថ្មោងថ្មីមកមើលថា តើមានអាការអ្វីខ្លះរបស់កូនតូចដែលលោកឪពុកអ្នកម្តាយអាចមើលថែទាំឱ្យបាត់ទៅវិញបានដោយខ្លួនឯង ដោយមិនចាំបាច់ពឹងថ្នាំ និងគ្រូពេទ្យឡើយ។
1 – នៅពេលកូនត្អើក ៈ ដោយសារតែទារកប្រញាប់បៅទឹកដោះ ឬបៅច្រើនជ្រុលពេក ធ្វើឱ្យក្រពះពង្រីកខ្លួនទៅរុញក្បាំងខ្យល់ធ្វើឱ្យកូនកើតអាការត្អើក ដូច្នេះចូរដាក់កូនឱ្យអង្គុយ ឬពដោយពាក់ខ្លួនកូនលើស្មារប្រមាណ 5 – 10 នាទី អាការត្អើកនោះនឹងថយចុះ រហូតដល់បាត់ដូចប្រក្រតីឡើងវិញ។
2 – នៅពេលកូនក្អែរទឹកដោះចេញមកវិញ ៈ លោកឪពុកអ្នកម្តាយត្រូវបែងចែកឱ្យច្បាស់ថា តើជាអាការក្អួត ឬក៏ជាការក្អែរទឹកដោះ ព្រោះទារកជាង 90% សុទ្ធតែធ្លាប់ក្អែរទឹកដោះចេញមកទាំងអស់ មិនថាទឹកដោះម្តាយ ឬទឹកដោះគោនោះឡើយ។ អាការក្អែរទឹកដោះកើតឡើងដោយសារប្រព័ន្ធរំលាយអាហាររបស់ទារកនៅមិនទាន់រឹងមាំល្អឥតខ្ចោះ ធ្វើឱ្យកូនតូចក្អែរទឹកដោះចេញមកវិញ តែអាការក្អួតវិញកើតឡើងដោយសារក្មេងតូចបៅទឹកដោះ ឬញ៉ាំអាហារច្រើនពេកហួសនឹងក្រពះទប់ទល់រួចហ្នឹងឯង។
3 – កូនមានអាការភ្ញាក់ៗ ឬភ័យ រួចស្រែកយំវ៉ា ៈ ទារកតូចៗច្រើនតែរហ័សចំពោះសំឡេង និងការប៉ះពាល់ ព្រោះប្រព័ន្ធប្រសាទទាំង 5 កំពុងចម្រើនធំធាត់ធ្វើឱ្យគេបានឮសូរសំឡេងអ្វីថ្មីៗគ្រប់ពេលវេលា ទើបក្មេងតូចច្រើនតែភ្ញាក់ៗភ័យៗ ឬឆ្លើយតបនឹងសំឡេងទាំងនោះ មិនមែនជាអាការខូលិក ដូចដែលឪពុកម្តាយយល់ច្រឡំនោះទេ។
4 – កូនមិនបន្ទោបង់ រួមទាំងឆ្អល់ហើមពោះ និងក្អួត ៈ អាការខុសប្រក្រតីរបស់ក្មេងតូចអាចសង្កេតឃើញបានតាមរយៈការបន្ទោបង់ ទារកទើបកើតដំបូងរយៈពេល 2 – 3 ថ្ងៃ លាមកដែលជុះចេញមកមានពណ៌ប្រផេះ ឬបៃតងលាយលឿង រួចហើយទើបចាប់ផ្តើមក្លាយជាពណ៌លឿងទាំងអស់។ ជាប្រក្រតី បើទារកដែលបៅទឹកដោះម្តាយ នឹងជុះចេញមកមានលាយពពុះ ខ្លះជាគ្រាប់លាយសាច់ល្អិតៗ ដែលនឹងជុះមួយថ្ងៃ 6 – 10 ដង គឺជារឿងប្រក្រតីមិនមែនជាអាការរាករូសនោះទេ តែបើបៅទឹកដោះម្តាយគួបផ្សំជាមួយទឹកដោះគោម្សៅវិញ នឹងជុះក្នុងមួយថ្ងៃ 2 – 3 ដង។ យ៉ាងណាក៏ដោយ បើក្មេងតូចមិនជុះមក 2 – 3 ថ្ងៃ និងមានអាការហើមខ្លួន រួមទាំងមានអាការក្អួតផងនោះ គួរនាំទៅជួបលោកគ្រូពេទ្យ ព្រោះអាចមានសភាវឆ្លងមេរោគ ប្រតិកម្មចាញ់ប្រូតេអុីនក្នុងទឹកដោះគោ ឬសភាវពោះវៀនស្ទះណែន។
ចូចាំទុកថា ថ្នាំមិនមែនជានំ ឬចំណីអាហារនោះទេ បើអាចទៅរួច សម្រាប់ទារកទើបនឹងកើតរហូតដល់ 2 ឆ្នាំ បើចៀសវាងក្នុងការឱ្យញ៉ាំថ្នាំបាននោះ ចូរចៀសវាង ព្រោះជំងឺខ្លះមិនខ្លាំងក្លាដូចដែលយើងគិតនោះទេ និងអាចធ្វើឱ្យធូរស្រាលបានដោយខ្លួនឯងដោយមិនចាំបាច់ពឹងថ្នាំឡើយ តែបើមិនប្រាកដក្នុងចិត្តលើអាការ ឬអាការមិនធូរស្រាលក្នុងអំឡុងពេល 2 ថ្ងៃទេនោះ គួរប្រញាប់នាំកុនតូចទៅមន្ទីរពេទ្យកុមារជាបន្ទាន់៕
April 21, 2020
គន្លឹះ4 សំខាន់ៗពី Facebook៖ វិធីសាស្ត្រក្នុងការរក្សាសុវត្ថិភាព ពេលធ្វើការពីផ្ទះ
ភ្នំពេញ ថ្ងៃទី១៥ ខែមេសា ឆ្នាំ២០២០៖ ស្របពេលដែលមនុស្សកាន់តែច្រើននាក់តម្រូវឲ្យបំពេញការងារពីផ្ទះរបស់ខ្លួន និងប្រើប្រាស់កម្មវិធីសូហ្វវ៉ែរ ក៏ដូចជាបណ្តាញសង្គមផ្សេងៗគ្នាជាច្រើន ដើម្បីធ្វើការងារប្រកបដោយប្រសិទ្ធិភាព វាពិតជាសំខាន់ណាស់ក្នុងការការពារខ្លួនរបស់អ្នកកុំឲ្យរងនូវការឆបោក និងការបោកប្រាស់ផ្សេងៗលើប្រព័ន្ធអ៊ីនធើណិត ដែលទាក់ទងនឹង វីរុសកូវីដ–១៩។
ដើម្បីជួយឲ្យអ្នកប្រើប្រាស់ទាំងអស់ រក្សាបាននូវសុវត្ថិភាពជានិច្ច ក្នុងពេលបំពេញការងារពីផ្ទះរបស់ខ្លួន ឬក៏រក្សា ទំនាក់ទំនងជាមួយនឹងមិត្តភក្តិ និងក្រុមគ្រួសារ ក្រុមហ៊ុន Facebook នឹងចែករំលែកនូវគន្លឹះសំខាន់ៗចំនួន៤ ដើម្បីធ្វើឲ្យលោកអ្នកប្រើប្រាស់អនឡាញប្រកបដោយសុវត្ថិភាព។
1)   ការការពារលេខសម្ងាត់របស់អ្នក
លោកអ្នកត្រូវប្រើប្រាស់លេខសម្ងាត់ខុសៗគ្នា សម្រាប់គណនីអនឡាញនីមួយៗរបស់លោកអ្នក។ លេខសម្ងាត់គណនី Facebook របស់អ្នក គឺត្រូវតែខុសគ្នាពីលេខសម្ងាត់គណនីផ្សេងទៀត។ លេខសម្ងាត់របស់លោកអ្នក គួរតែមានលក្ខណៈពិបាកទាយ និងស្មុគស្មាញ ហេតុនេះ សូមកុំប្រើប្រាស់ឈ្មោះរបស់អ្នកក្នុងលេខសម្ងាត់ ឬក៏ពាក្យដែលគេស្គាល់ច្រើន ជាដើម។
លោកអ្នកមិនត្រូវប្រាប់ ឬចែករំលែកព័ត៌មានពីការចូលក្នុង (login) គណនីរបស់លោកអ្នក ជាមួយនឹង នរណាម្នាក់នោះឡើយ។
ដើម្បីស្វែងយល់បន្ថែមទៀតអំពីសុវត្ថិភាពលេខសម្ងាត់ និងរបៀបបង្កើតលេខសម្ងាត់ដ៏មានសុវត្ថិភាពបំផុត ក្រុមហ៊ុន Facebook បានបង្កើតកម្មវិធីមួយដែលហៅថា «Privacy Checkup Tool» (ឧបករណ៍ត្រួតពិនិត្យ ព័ត៌មានឯកជន)។
2) បើកមុខងារប្រាប់ដំណឹងក្នុងពេលចូលក្នុងគណនី ឬ login alerts
វិធីសាស្ត្រមួយទៀតដើម្បីធ្វើឲ្យគណនី Facebook កាន់តែមានសុវត្ថិភាពខ្ពស់នោះ គឺការបើកមុខងារប្រាប់ដំណឹង ក្នុងពេលដែលមានអ្នកដ៏ទៃព្យាយាមចូលក្នុងគណនីរបស់អ្នកដោយប្រើប្រាស់ ឧបករណ៍ ឬ browser ចំឡែកដែលអ្នកមិនធ្លាប់ប្រើ។
យើងអាចកំណត់មុខងារប្រាប់ដំណឹងទាំងនេះបាន នៅក្នុង Privacy Checkup tool ដែលមានរៀបរាប់ខាងលើ។
ការធ្វើបច្ចុប្បន្នភាពអាសយដ្ឋានអ៊ីម៉ែល និងលេខទូរស័ព្ទ អាចជួយធានាបានថា ម្ចាស់គណនី នៅតែអាចចូល ក្នុងគណនីរបស់ខ្លួនបាន ទោះជាគាត់ ភ្លេចលេខសម្ងាត់ក៏ដោយ។
3)   ពិនិត្យមើលសកម្មភាពប្រើប្រាស់គណនីរបស់អ្នក
ការត្រួតពិនិត្យមើលទីតាំង និងពេលវេលា ដែលលោកអ្នកបានចូលក្នុងគណនី Facebook និង Instagram និងប្រវត្តិចំនួនម៉ោងដែលគណនីនោះបានអនឡាញតាមឧបករណ៍ដែលមិនធ្លាប់បានប្រើប្រាស់ពីមុន គឺសំខាន់ដូចគ្នា ហើយលោកអ្នកអាចធ្វើការត្រួតពិនិត្យចំណុចនេះបានតាមរយៈប្រអប់ Security Settings (ការកំណត់សុវត្ថិភាព)។
អ្នកប្រើប្រាស់ Instagram គួរតែពិចារណាទៅលើការបន្ថែមប្រព័ន្ធសុវត្ថិភាពមួយកម្រិតទៀតលើគណនីរបស់ខ្លួន តាមរយៈការប្រើប្រាស់មុខងារបញ្ជាក់លេខសម្ងាត់២លើក ឬ two-factor authentication ដែលជាកូដ សុវត្ថិភាពបន្ថែមមួយ នៅពេលដែលលោកអ្នកព្យាយាមចូលក្នុងគណនីតាមឧបករណ៍ថ្មី ដែលមិនធ្លាប់ប្រើ។
4)   ត្រូវតែមានការប្រុងប្រយ័ត្នខ្ពស់លើសារបោកប្រាស់ និងការឆបោកផ្សេងៗ
ក្រុមឆបោកតាមអនឡាញ អាចនឹងព្យាយាមបោកបញ្ឆោតលោកអ្នកតាមរយៈការបង្ហោះព័ត៌មានអំពី វីរុសកុរ៉ូណា ឬសារបំភិតបំភ័យផ្សេងៗអំពីការរាតត្បាតជាសកលនេះ ហេតុនេះ វាពិតជាសំខាន់ណាស់ ដែលលោកអ្នក មិនត្រូវចុចទៅលើលីង ឬដំណរភ្ជាប់គេហទំព័រដែលគួរឲ្យសង្ស័យនោះទេ និងត្រូវតែរាយការណ៍ ពីសារដ៏គួរឲ្យសង្ស័យ ទាំងឡាយ ដែលព្យាយាមសួររកព័ត៌មានផ្ទាល់ខ្លួនរបស់អ្នក។
យ៉ាងណាមិញ លោកអ្នកអាចបញ្ជាក់បានយ៉ាងងាយស្រួលថា អ៊ីម៉ែល និងសារផ្សេងៗ គឺត្រូវបានផ្ញើរចេញ ដោយផ្ទាល់ពី Facebook ដោយគ្រាន់តែពិនិត្យមើលថា សារ និងអ៊ីម៉ែលទាំងអស់នោះ ត្រូវបានផ្ញើរចេញពីគេហទំព័រ facebookmail.com ឬយ៉ាងណា និងតាមរយៈការត្រួតពិនិត្យអ៊ីម៉ែលថ្មីៗ នៅក្នុងប្រអប់ Security and Login Settings (សុវត្ថិភាព និងការកំណត់ការចូលគណនី)។ បណ្តាញសង្គម Instagram ក៏ប្រើវិធីសាស្ត្រដូចគ្នានេះដែរ ដើម្បីពិនិត្យមើលចំណុចទាំងនោះ។ សូមចាំថា Facebook នឹងមិនស្នើសុំ ឬសួររកលេខសម្ងាត់របស់លោកអ្នកតាមរយៈអ៊ីម៉ែលឡើយ។
ដើម្បីជៀសឲ្យផុតពីការឆបោកផ្សេងៗ អ្នកត្រូវមានការប្រុងប្រយ័ត្នខ្ពស់ចំពោះអ្នកដែលស្នើសុំប្រាក់ពីអ្នក ទាំងដែលលោកអ្នកមិនស្គាល់គេនោះសោះ ឬសំណើពីនរណាម្នាក់ដែលអះអាងថាគេជាមិត្តភក្ដិ ឬជាសាច់ញាតិរបស់អ្នក ដែលកំពុងស្ថិតក្នុងសភាពគ្រោះថ្នាក់ណាមួយ។
ទាំងនេះ គឺជាវិធីសាស្ត្រសំខាន់ៗមួយចំនួនដែលលោកអ្នកអាចយកទៅអនុវត្តបាន ដើម្បីធានាឲ្យបានថា ការធ្វើការងារពីផ្ទះ និងការរក្សាទំនាក់ទំនងជាមួយនឹងអ្នកផ្សេងទៀតតាមអនឡាញ នៅតែមានសុវត្ថិភាព និងផ្តល់នូវលទ្ធផលជាវិជ្ជមាន ជានិច្ច។ សម្រាប់ព័ត៌មានថ្មីៗអំពីការរាតត្បាតរបស់វីរុសកូរ៉ូណា សូមតាមដានក្នុង «មជ្ឈមណ្ឌលព័ត៌មាន កូវីដ-១៩» របស់ Facebook ដែលមានបង្ហាញជូននៅលើទំព័រដើមលើគណនី Facebook របស់លោកអ្នក៕
April 21, 2020
ការនាំចេញកៅស៊ូ ក្នុងខែមីនា ធ្លាក់ចុះ តែសរុប 1ត្រីមាសទី1 កើនឡើង 10%
យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ការនាំ ចេញជ័រកៅស៊ូរបស់កម្ពុជាបានកើនឡើង 10% នៅក្នុងត្រីមាសទី1 នៃឆ្នាំនេះ បើប្រៀបធៀបទៅនឹង រយៈ ពេលដូចគ្នាកាលពីឆ្នាំមុន(2019) ប៉ុន្តែតម្លៃទំនិញបានធ្លាក់ចុះបន្តិច។
របាយការណ៍ បានបង្ហាញតួលេខ ចាប់ពីខែមករា ដល់ខែមីនា ប្រទេសកម្ពុជាបាននាំចេញ កៅស៊ូចំនួន 53,057តោនកើនឡើង 10% ដោយតម្លៃជាមធ្យម 1,397ដុល្លារក្នុង 1តោន ដែល តំណាងឱ្យការធ្លាក់ចុះ 1.2%។ ជារួមសម្រាប់រយៈពេលនេះវិស័យជ័រកៅស៊ូ បាននាំមកនូវប្រាក់ ចំណូលប្រមាណ 74លានដុល្លារ ។
របាយការណ៍បានបញ្ជាក់ដែរថា បើទោះបីជាមានការធ្លាក់ចុះ 15% នៃបរិមាណនាំចេញក្នុងខែមីនា បើប្រៀបធៀបនឹងខែកុម្ភៈ ពី 12,913 ដល់ 11,751តោន ដែលជាលទ្ធផលនៃការរំខានដល់ ពាណិជ្ជកម្មដែលបណ្តាលមកពីការរឹតត្បិតនៃសកម្មភាពពាណិជ្ជកម្មឆ្លងកាត់ព្រំដែនឆ្លើយតបទៅនឹងការរាលដាលវីរុសកូវីដ-19។
លោកឧកញ៉ា លឹម ហេង អនុប្រធានក្រុមហ៊ុន អានម៉ាឌី ដែលជាម្ចាស់ចម្ការកៅស៊ូ និងនាំចេញផលិតផលបានមានប្រសាសន៍ថា ការធ្លាក់ចុះនៃការនាំចេញកាលពីខែមីនា ភាគច្រើន គឺកាត់បន្ថយការបញ្ជាទិញពីអ្នកនាំចូលធំបំផុតរបស់ពួកគេ។
ប្រទេសចិនដែលយើងមើលឃើញថា ជាទីផ្សារកៅស៊ូដ៏ធំបំផុតរបស់យើង បានដាក់កម្រិតយ៉ាងតឹងរ៉ឹងលើពាណិជ្ជកម្មនាំចូល ដោយសារតែជំងឺរាតត្បាតកូវីដ-19។ ជាហេតុនាំឱ្យមានលទ្ធផលនាំចេញ និងប្រាក់ចំណេញបានធ្លាក់ចុះ។
កសិករកំពុងចាក់ជ័រកៅស៊ូចូលធុង
ក្រៅពីប្រទេសចិន ដែលជាទីផ្សារសំខាន់នៃទំនិញ ជ័រកៅស៊ូកម្ពុជាក៏ត្រូវបាននាំចេញទៅកាន់ប្រទេសម៉ាឡេស៊ី វៀតណាម និងសិង្ហបុរីផងដែរ ដែលសុទ្ធសឹងជាប្រទេសមានវិបត្តិវីរុសកូវីដ-19 ជាហេតុនាំឱ្យការនាំចេញមានការរឹតត្បិត ក្នុងសកម្មភាពពាណិជ្ជកម្ម។
សូបញ្ជាក់ថា ប្រទេសកម្ពុជាមានចម្ការកៅស៊ូចំនួន 405,485 ហិកតាដែលក្នុងនោះ 250,750 ហិកតា (62%) គឺជា“ ដំណាំសាច់ប្រាក់” ដែលមានអាយុគ្រប់គ្រាន់នឹងទទួលផលហើយ។
ជាមួយគ្នានេះដែរ ថ្មីៗនេះ រដ្ឋាភិបាលក៏បានកែសម្រួលពន្ធលើការនាំចេញកៅស៊ូក្នុងគោល បំណងជួយដល់កសិករ ដើម្បីជំរុញការប្រកួតប្រជែងទំនិញនៅលើទីផ្សារ៕
April 21, 2020
ឆ្លើយតបនឹងចំណុចសង្ស័យ 7 រឿងដែលអ្នកម្តាយមានគភ៌ចង់ដឹងបំផុត
អ្នកម្តាយដែលទើបតែមានគភ៌ថ្មោងថ្មីដែលកើតមានក្តីសង្ស័យ និងមិនប្រាកដក្នុងចិត្តថា តើក្នុងអំឡុងពេលមានគភ៌នោះ ត្រូវ
មើលថែទាំអ្វីខ្លះទៀត បន្ទាប់ពីជ្រើសរើសមុខម្ហូបត្រូវតាមភោជនាការរបស់ស្ត្រីមានគភ៌ហើយ ហាត់ប្រាណយ៉ាងត្រឹមត្រូវ និងសម្រាក
យ៉ាងគ្រប់គ្រាន់ហើយ តើនៅមានរឿងអ្វីដែលគួរធ្វើបន្ថែមទៀតឬទេ? និងតើមានរឿងអ្វីខ្លះដែលគួរចៀសវាង? កិច្ចការងារពីមុនដែល
ធ្លាប់ធ្វើ តើអាចធ្វើបានទៀតឬទេ? ឬហុចផលអាក្រក់ប៉ុនណា?។ ចំណុចសង្ស័យទាំងនេះសុទ្ធតែជារឿងដែលអ្នកម្តាយមានគភ៌នៅសង្ស័យច្រើនគ្នាណាស់ ដូច្នេះយើងនាំគ្នាមកបកស្រាយចំណុចសង្ស័យទាំងនេះទាំងអស់គ្នា។
1 – ទម្ងន់ខ្លួនដែលស័ក្តិសមសម្រាប់អ្នកម្តាយមានគភ៌
បើអ្នកម្តាយមានគភ៌ទទួលទានអាហារតាមការណែនាំហើយ (ប្រូតេអុីន វិតាមីន សារធាតុរ៉ែ អុីយ៉ូដ កាល់ស្យូម ហ្វូលេត សារធាតុដែក) នោះ ទម្ងន់ខ្លួននឹងកើនឡើងប្រមាណជា 12 – 15 គីឡូក្រាម ជាមធ្យមកើនមួយខែ 2 គីឡូក្រាម តែក្នុងត្រីមាសដំបូង
ទម្ងន់អាចថយចុះបាន ដោយសារតែអាការចាញ់កូនដែលក្អួតចង្អោរញឹកញាប់ ឬមិនអាចញ៉ាំអាហារបានច្រើន។ ក្នុងត្រីមាសទី 2 ជា
អំឡុងពេលអស់អាការចាញ់កូនហើយ អ្នកម្តាយអាចហាត់ប្រាណបានយ៉ាងត្រឹមត្រូវ ដើម្បីគ្រប់គ្រងកុំឱ្យទម្ងន់កើនឡើងលឿនជ្រុលពេក ចំណែកត្រីមាសចុងក្រោយ ត្រូវប្រយ័ត្នប្រយែងបន្តិច ព្រោះឱកាសប្រសូតមុនកំណត់មានខ្ពស់ណាស់បើសិនបញ្ចេញកម្លាំងធ្វើអ្វីមួយខ្លាំងជ្រុលពេក ក្នុងត្រីមាសនេះ ទម្ងន់ខ្លួនអ្នកម្តាយនឹងកើនឡើងខ្ពស់បំផុត។
2 – បើចាក់វ៉ាក់សាំងការពារជំងឺផ្សេងៗ ក្នុងអំឡុងមានគភ៌ត្រីមាសដំបូងព្រោះតែមិនដឹង តើនឹងមានគ្រោះថ្នាក់ទេ?
បើវ៉ាក់សាំងដែលចាក់នោះជាវ៉ាក់សាំងការពារតេតាណូស គ្រុនផ្តាសាយធំ ឬកញ្រ្ជឹល មិនជាគ្រោះថ្នាក់ដល់ទារកក្នុងផ្ទៃទេ
និងជាការសាងប្រព័ន្ធការពារជំងឺឱ្យខ្លួនទារកទៀតផង។ ពេញមួយរយៈពេល 9 ខែ អ្នកម្តាយអាចត្រូវចូលទៅទទួលការចាក់វ៉ាក់សាំង
ការពារជំងឺយ៉ាងត្រឹមត្រូវ ដើម្បីទារកចម្រើនធំធាត់រឹងប៉ឹង និងពេញលេញ ប្រាសចាកជំងឺដង្កាត់។
3 – វីតាមីនបន្ថែម ចាំបាច់ដែរឬទេ?
សារធាតុអាហារដែលអ្នកម្តាយគួរទទួលទានបន្ថែមនោះគឺ សារធាតុដែក ដែលជួយគាំទ្រការធ្វើការងាររបស់ហ៊ីម៉ូគ្លោប៊ីនក្នុង
គ្រាប់ឈាមក្រហមដែលជាអ្នកនាំអុកស៊ីហ្ស៊ែនឆ្ពោះទៅទារកដែលនៅក្នុងផ្ទៃ បើអ្នកម្តាយបានទទួលសារធាតុដែកមិនគ្រប់គ្រាន់ នឹង
ធ្វើឱ្យកើត សភាវលោហិតស្លេក ហុចផលឱ្យអ្នកម្តាយកើតអាការនឿយល្វើយ ហត់ និងដកដង្ហើមមិនស្រួល។ ទាំងអស់នេះ ការទទួលទានសារធាតុដែកគួរស្ថិតក្នុងបរិមាណដែលសមល្មមតាមដែលរាងកាយត្រូវការ ចំណែកវិតាមីន និងសារធាតុអាហារផ្សេងទៀត
បើទទួលទានអាហារគ្រប់ 5 ប្រភេទក្រុមតាមពាក្យណែនាំរបស់គ្រូពេទ្យហើយនោះ មិនចាំបាចទទួលទានវីតាមីនបន្ថែមក៏បានដែរ តែ
គួរញ៉ាំទឹកដោះគោជាប្រចាំដើម្បីបង្កើនភាពរឹងមាំរបស់ឆ្អឹងទារកនៅក្នុងផ្ទៃ មិនគួរទទួលទានថ្នាំសារធាតុដែកលាយគ្នាជាមួយទឹកដោះ
គោឡើយ ព្រោះវាធ្វើឱ្យមានគុណវិបត្តិច្រើនជាងគុណសម្បត្តិ។
4 – ស្វាមីទ្រាំមិនបាន សុំមានភេទសម្ព័ន្ធក្នុងអំឡុងពេលមានគភ៌
ការមានភេទសម្ព័ន្ធមិនមែនជារឿងគ្រោះថ្នាក់ដល់ទារកក្នុងផ្ទៃទេ លើកលែងតែខាងប្រុសមានជំងឺកាមរោគ។ ក្នុងអំឡុងត្រីមាសទី 3 សូមឱ្យលោកឪពុកអត់ទ្រាំបន្តិច ព្រោះជាដំណាក់កាលសំខាន់ណាស់ គភ៌របស់អ្នកម្តាយមិនគួរទទួលរងកម្លាំងញ័ររញ្ជួយអ្វី
ទាំងអស់ ដើម្បីការពារការប្រសូតមុនកំណត់ និងអាចធ្វើឱ្យទារកមិនរឹងប៉ឹងបាន។ បើត្រីមាសទី 1 និង 2 អ្នកម្តាយគួរសង្កេតមើលផងថា តើមានអាការខុសប្រក្រតីឬទេ ដូចជា ឈឺពោះមុនពេលកំណត់ និងមានឈាមធ្លាក់ចេញពីមាត់ស្បូន ជាដើម បើមានអាការទាំង
នេះ គួរបញ្ឈប់ការមានភេទសម្ព័ន្ធ និងទៅជួបគ្រូពេទ្យភ្លាម។
5 – ទឹកដោះដែលគួរញ៉ាំ
ក្នុងអំឡុងពេលមានគភ៌អ្នកម្តាយអាចញ៉ាំទឹកដោះបានគ្រប់ប្រភេទ ទាំងទឹកដោះគោ ទឹកដោះពពែ ឬទឹកសណ្តែកលឿង
(មិនចាំបាច់តែទឹកដោះសម្រាប់ស្រ្តីមានគភ៌ក៏បានដែរ) និងគួរញ៉ាំឱ្យបានទ្វេរដង ព្រោះរាងកាយរបស់អ្នកម្តាយត្រូវការកាល់ស្យូម និងកូនតូចក៏ត្រូវការកាល់ស្យូមដែរ ព្រោះកាល់ស្យូមនេះនៅបានជួយការពារសភាវលើសឈាមបានទៀតផង។
6 – មុនប្រើថ្នាំក្នុងអំឡុងពេលមានគភ៌
ប្រឹក្សាជាមួយគ្រូពេទ្យសម្ភពគឺជាវិធីដែលល្អបំផុត ព្រោះថ្នាំប្រភេទខ្លះមានគ្រោះថ្នាក់ដល់ទារក ដូចជាអ្មកម្តាយមានគភ៌ដែលរក្សាសម្ផស្សត្រូវការញ៉ាំថ្នាំព្យាបាលមុន ដែលថ្នាំព្យាបាលមុនខ្លះជាប្រភេទលាប និងខ្លះទៀតជាប្រភេទលេបដែលអាចចាត់ទុកថាជា
ប្រភេទថ្នាំគ្រោះថ្នាក់ដែលមានផលទៅដល់ទារកនៅក្នុងគភ៌ អាចធ្វើឱ្យកើតភាពពិការបាន ដូច្នេះមុននឹងប្រើថ្នាំគួរប្រឹក្សាជាមួយគ្រូពេទ្យ និងត្រូវប្រាប់គ្រប់ពេលថាខ្លួនឯងមានគភ៌ ដើម្បីបានទទួលការផ្តល់ថ្នាំដែលត្រឹមត្រូវ។
7 – មានដុំសាច់ដុះក្នុងអំឡុងពេលមានគភ៌
ភាពគ្រោះថ្នាក់អាស្រ័យលើទីតាំង និងលក្ខណៈរបស់សាច់ដុះនោះ នៅពេលអ្នកម្តាយស្ទាបប៉ះ គួរទៅប្រឹក្សាជាមួយគ្រូពេទ្យជំនាញដើម្បីប៉ាន់ប្រមាណពីដុំសាច់ដុះនោះ និងធ្វើការព្យាបាលជាបន្ត។ យ៉ាងណាក៏ដោយ ការត្រៀមខ្លួនជាស្រេចមុនពេលមានគភ៌គឺជារឿងចាំបាច់ ដូចជា ពិនិត្យរកមើលសាច់ដុះ និងធ្វើការព្យាបាលឱ្យជាសះស្បើយមុនការមានគភ៌ ដែលវាជួយកាត់បន្ថយសភាវគភ៌ប្រថុយប្រថានបាន។
ការមើលថែទាំគភ៌យ៉ាងត្រឹមត្រូវតាមគោលភោជនាហារ និងពាក្យណែនាំរបស់ពេទ្យ ទារកនឹងធំធាត់ឡើងយ៉ាងឥតខ្ចោះ និងរឹងប៉ឹង នៅពេលគេធំឡើងលោកឪពុកអ្នកម្តាយនឹងមានមោទនភាពដែលបានមើលថែទាំគភ៌យ៉ាងល្អ។ បើអ្នកម្តាយមានចំណុចសង្ស័យអ្វីផ្សេងក្រៅពីនេះ ការប្រឹក្សាជាមួយពេទ្យសម្ភព នឹងទទួលបានការណែនាំយ៉ាងត្រឹមត្រូវ ព្រោះរាងកាយអ្នកម្តាយម្នាក់ៗមិនដូចគ្នាទេ ដូច្នេះហើយការទៅប្រឹក្សាជាមួយគ្រូពេទ្យជំនាញពេញមួយរយៈពេល 9 ខែនោះនឹងយល់បានច្បាស់ល្អជាង៕
April 21, 2020
Guangzhou Evergrande ប្រកាសគម្រោងសាងសង់កីឡដ្ឋានផ្ទុកបាន 10ម៉ឺននាក់
ក្លិប Guangzhou Evergrande ជើងឯកលីកកំពូលរបស់ចិនឆ្នាំ2019 បានប្រកាសបើកការដ្ឋានសាងសង់កីឡដ្ឋានថ្មីរបស់ខ្លួនហើយ ដែលមានរូបរាងគួរឱ្យទាក់ទាញយ៉ាងខ្លាំង។
កីឡដ្ឋាននេះអាចផ្ទុកអ្នកទស្សនាបាន 10ម៉ឺននាក់មានទីតាំងនៅតាមបណ្ដោយផ្លូវរថភ្លើងសង្កាត់ Pahyu ក្នុងក្រុង Guangzhou។ ប្រភពរបស់ក្លិបមួយនេះបានបន្តទៀតថា កីឡដ្ឋាននេះនឹងក្លាយជាទីតាំងលេងបាល់ទាត់មួយធំជាងគេបំផុតក្នុងពិភពលោក បន្ទាប់ពីសាងសង់រួចជាស្ថាពរនៅឆ្នាំ2022។
គួររំឭកផងដែរថា ក្លិបបាល់ទាត់នេះ គឺជាក្លិបរបស់មហាសេដ្ឋីចិនម្នាក់ ដែលមានភាគហ៊ុន 50% របស់ក្រុមហ៊ុន Evergrande, 40% របស់ Alibaba និង 10% ទៀតរបស់ក្រុមហ៊ុនផ្សេងៗទៀត៕

April 21, 2020
ពីអ្នកចិញ្ចឹមជ្រូក ក្លាយជាមហាសេដ្ឋីផ្សារទំនើបធំលំដាប់ទី3 នៅសិង្ហបុរី ក្នុងសម័យCOVID-19
ប្រាក់ចំណូលរបស់ផ្សារទំនើបនានានៅសិង្ហបុរី កើនឡើងខ្ពស់ នៅពេលបម្រាមគោចរត្រូវបានរដ្ឋាភិបាលប្រទេសនេះអនុវត្ត។ ដោយសារមូលហេតុនេះហើយ ទើបបងប្អូនត្រកូល Lim ទាំង3នាក់ រកប្រាក់បានច្រើនសន្ធឹកពីប្រព័ន្ធផ្សារទំនើបធំជាងគេលំដាប់ទី3នៅដែនកោះមួយនេះ។
កំពូលអ្នកជំនួញ Lim Hock Chee និងបងប្អូន2នាក់ទៀត គឺ Lim Hock Eng និង Lim Hock Leng មានភាគហ៊ុនសរុបដល់ទៅ57% នៅក្នុងបណ្ដាញផ្សារទំនើបធំជាងគេទី3របស់សិង្ហបុរី ដែលមានឈ្មោះថា Sheng Siong បន្ទាប់ពីផ្សារទំនើប NTUC Fairprice និង ផ្សារទំនើប Dairy Farm International។
ភាគហ៊ុនរបស់ Sheng Siong កើន39% ចាប់ពីថ្ងៃទី19មីនា ឆ្នាំ2020 បានជួយឱ្យទ្រព្យសម្បត្តិសរុបរបស់បងប្អូនពួកគេ កើនដល់1ពាន់លានដុល្លារសហរដ្ឋអាមេរិកជាលើកដំបូងបង្អស់។
នៅពេលតម្លៃភាគហ៊ុនកំពុងតែកើនឡើងយ៉ាងឆាប់រហ័ស Hock Chee ក៏បានទិញភាគហ៊ុនរបស់ក្រុមហ៊ុននេះបន្ថែមទៀតកាលពីចុងខែមីនា ដើម្បីបានក្លាយជា CEO របស់ប្រព័ន្ធផ្សារទំនើបនេះ ក៏ដូចជាក្លាយជាតំណាងរបស់ ក្រុមហ៊ុន Sheng Siong នាពេលខាងមុខ។
Sheng Siong ដែលជាប្រព័ន្ធផ្សារទំនើបមួយ មានផ្សារទំនើបសរុប61នៅពាសពេញប្រទេសសិង្ហបុរី។ ដោយដឹងច្បាស់អំពីតម្រូវការខ្ពស់នៅពេល COVID-19 កំពុងតែឆ្លងរាលដាលនៅទូទាំងពិភពលោក Sheng Siong បានប្រញាប់ប្រញាល់នាំចូល និងដឹកជញ្ជូនទំនិញយ៉ាងច្រើនសន្ធឹក ទៅរក្សាទុកក្នុងឃ្លាំងចាប់ពីដើមខែមីនា2020។
ការលក់សរុបរបស់បណ្ដាផ្សារទំនើបនៅសិង្ហបុរី កើន15.5% បើធៀបនឹងឆ្នាំ2019 និង15.4%បើធៀបនឹងខែកុម្ភៈឆ្នាំ2020 នៅពេលដែលប្រទេសនេះបានប្រកាសដំឡើងកម្រិតអាសន្ននៃរោគរាតត្បាត COVID-19 ដល់ “ពណ៌ទឹកក្រូច” ពោលគឺស្មើនឹងកម្រិតអាសន្ននៃអាសន្នរោគ SARS ឆ្នាំ2013។
ប្រព័ន្ធផ្សារទំនើប Sheng Siong បានស្នើឱ្យអតិថិជនរបស់ខ្លួន ទិញទំនិញតាមអនឡាញ ដោយប្រើ App របស់ផ្សារទំនើប Sheng Siong។
Juliana Cai ដែលជាអ្នកវិភាគម្នាក់របស់ធនាគារ RHB បានព្យាករថា ប្រាក់ចំណូលរបស់ផ្សារទំនើបនានា នៅតែបន្តកើនឡើងខ្ពស់នៅក្នុងខែមេសា ហើយវាក៏នឹងបន្តកើនឡើងរហូតដល់ក្រោយថ្ងៃទី4ឧសភាទៀតផង បន្ទាប់ពីបម្រាមគោចរអស់សុពលភាព។ អ្នកស្រីថ្លែងថា បើទោះជាប្រជាជននឹងចេញទៅខាងក្រៅដើម្បីទទួលទានអាហារក្រោយបម្រាមគោចរអស់សុពលភាព តម្រូវការទិញទំនិញរបស់អាហារដ្ឋាន ភោជនីយដ្ឋានផ្សេងៗនឹងកើនខ្ពស់ ហើយវានឹងជួយរក្សាលំនឹងដល់ផ្សារទំនើបនានា។
ក៏ប៉ុន្តែ អ្នកស្រីក៏បានព្រមានថា ផ្សារទំនើបនានានឹងជួបលំបាកនៅពេលបម្រាមគោចរនឹងធ្វើឱ្យតម្លៃនាំចូលទំនិញ ខ្ពស់ជាងពេលធម្មតា។
ប្រាក់ចំណូលសរុបរបស់ក្រុមហ៊ុន Sheng Siong ក្នុងឆ្នាំ2019 បានឡើងដល់737លានដុល្លារ ជាមួយនឹងប្រាក់ចំណេញសរុបឡើងដល់56លានដុល្លារអាមេរិក។
ពីកុមារដែលរស់នៅក្នុងកសិដ្ឋានចិញ្ចឹមជ្រូក ក្លាយជាថៅកែផ្សារទំនើប
Sheng Siong ត្រូវបានបង្កើតឡើងកាលពីឆ្នាំ1985 ដោយបងប្អូនត្រកូល Lim ទាំង3នាក់។ ពួកគេរស់នៅ និងធំឡើងនៅក្នុងកសិដ្ឋានចិញ្ចឹមជ្រូកមួយកន្លែងនៅក្នុងភូមិនេសាទមួយនៅភាគឦសានប្រទេសសិង្ហបុរី ដែលទីនេះ ដើមឡើយគឺជាតំបន់ចិញ្ចឹមសត្វ ពិសេសគឺជ្រូក ក៏ប៉ុន្តែពេលនេះ វាក្លាយជាតំបន់ទីក្រុងដែលមានមនុស្សរស់នៅយ៉ាងច្រើនកុះករ។ បីនាក់បងប្អូនត្រកូល Lim នេះ បានចាប់ផ្ដើមងាកមកធ្វើជំនួញដោយបង្កើតផ្សារទំនើប ក្រោយពីរដ្ឋាភិបាលសិង្ហបុរី បានបំបាត់ចោលកសិដ្ឋានចិញ្ចឹមជ្រូកកាលពីទសវត្សរ៍ឆ្នាំ1980។
នៅពេលមុខជំនួញគ្រួសារនេះត្រូវបានបង្កើតឡើង តួនាទី និងកិច្ចការក៏ត្រូវបានបែងចែកយ៉ាងច្បាស់លាស់។ Hock Eng ដែលជាបងប្រុសធំ ធ្វើជាអគ្គនាយកប្រតិបត្តិ គ្រប់គ្រង់ការបើកហាងថ្មី ចំណែក Hock Chee គ្រប់គ្រងតូបលក់សាច់ ខណៈដែលប្អូនពៅ Hock Leng ធ្វើជានាយកប្រតិបត្តិ ទទួលបន្ទុកជំនួញផ្នែកជលផល។
ប្រពន្ធរបស់ពួកគេក៏បានចូលរួមក្នុងការលក់ដូររបស់គ្រួសារ ដោយប្រពន្ធរបស់ Hock Chee គឺអ្នកស្រី Lee Moi Hong ធ្វើជានាយិកា និងជាអ្នកគ្រប់គ្រងតូបទំនិញស្ងួត ដែលមានភារកិច្ចក្នុងការគ្រប់គ្រងការវេចខ្ចប់ និងផ្គត់ផ្គង់ទំនិញគ្រប់ប្រភេទ តាំងពីនំ biscuit រហូតដល់ឱសថបុរាណចិន។ Tan Bee Loo ដែលជាភរិយារបស់ Hock Eng ក៏ជានាយិកាគ្រប់គ្រងទំនិញផ្នែកបន្លែ ដែលមានតួនាទីនាំចូល កំណត់តម្លៃ រហូតដល់គ្រប់គ្រងគុណភាពទំនិញ។
ក្រៅពីការគ្រប់គ្រង បច្ចុប្បន្ន គ្រួសាររបស់ពួកគេក៏កំពុងតែបណ្ដុះបណ្ដាលអ្នកជំនាន់ក្រោយផងដែរ៖ កូនស្រីរបស់អគ្គនាយក Hock Eng គឺនាង Lin Ruiwen គឺជានាយិកាប្រតិបត្តិ។ កូនប្រុសរបស់ Hock Leng គឺលោក Nigel Lin Junlin ជាជំនួយការរបស់ CEO Hock Chee ដែលជាអ៊ំរបស់ខ្លួន។
នៅក្នុងដំណាក់កាលពង្រីកទីផ្សារទៅខាងក្រៅប្រទេសជាលើកដំបូង ក្រុមហ៊ុន Sheng Siong បានបើកការិយាល័យនិងផ្សារទំនើប1កន្លងនៅប្រទេសចិនកាលពីឆ្នាំ2017 ហើយក៏បានបន្តបើកផ្សារទំនើប1ផ្សេងទៀតក្នុងឆ្នាំ2019។
ក្រៅពី Sheng Siong គ្រួសារត្រកូល Lim ក៏កំពុងតែបង្ហាញអំពីមហិច្ឆតារបស់ពួកគេក្នុងវិស័យផ្សេងទៀតផងដែរ។ តាមរយៈ Sheng Siong Holdings (ក្រុមហ៊ុនបុត្រសម្ព័ន្ធរបស់ Sheng Siong) ក្រុមហ៊ុនរបស់ពួកគេ បានសុំលិខិតអនុញ្ញាតបើកដំណើរការធនាគារអេឡិចត្រូនិកមួយ ដោយមានការចូលរួមធ្វើជាទីប្រឹក្សាពីសំណាក់សហស្ថាបនិកក្រុមហ៊ុនផលិតឧបករណ៍លេងហ្គេមដ៏ល្បីល្បាញនៅសិង្ហបុរី គឺលោក Min-Liang Tan៕
ប្រភព៖ Forbes
April 20, 2020