សង្គម និងសេដ្ឋកិច្ច - La Reine Media

នៅអាមេរិក ការបង្ហោះការតវ៉ា សុំមិននៅក្នុងផ្ទះ ត្រូវបាន Facebook លុបចោលទាំងអស់

ប៉ុន្មានសប្ដាហ៍ចុងក្រោយនេះ ការតវ៉ាប្រឆាំងនឹងបទបញ្ជាឱ្យស្ថិតនៅតែក្នុងផ្ទះ និងវិធានការគម្លាតសុវត្ថិភាព បានផ្ទុះឡើងជាបន្តបន្ទាប់ នៅតាមទីក្រុងនៃរដ្ឋជាច្រើនក្នុងសហរដ្ឋអាមេរិក ដោយបាតុករទាំងអស់ បានអំពាវនាវឱ្យលុបចោលវិធានការទាំងនេះ មុនពេលកំណត់ គឺមុនថ្ងៃទី4 ខែឧសភា។

Facebook បានធ្វើការលុបចោលការបង្ហោះដែលផ្សព្វផ្សាយអំពីការតវ៉ា សុំមិននៅដាច់ដោយឡែក ដែលកំពុងកើតមានឡើងនៅក្នុងរដ្ឋ California, New Jersey និង Nebraska សហរដ្ឋអាមេរិក។

អ្នកនាំពាក្យរបស់ក្រុមហ៊ុន Facebook បានប្រាប់ CNN ថា ពួកគេកំពុងពិភាក្សាជាមួយរដ្ឋចំនួន 4ទៀត រួមមាន New York, Wisconsin, Ohio និង Pennsylvania ដើម្បីកំណត់ថា តើការតវ៉ាដែលបានផ្ទុះឡើងនៅក្នុងទីតាំងទាំងនោះ មានល្មើសនឹងបទបញ្ជាដែលតម្រូវឱ្យអ្នករាល់គ្នានៅផ្ទះឬអត់?៕

April 24, 2020

វិធីសាស្ត្រសន្សំសំចៃអគ្គីសនីក្នុងរដូវកាលភ្លើងឡើងខ្លាំង

មួយរយៈនេះមានបងប្អូនប្រជាពលរដ្ឋជាច្រើនបានលើកឡើងស្រដៀងគ្នាថា តម្លៃភ្លើងក្នុងផ្ទះចាប់ផ្តើមកើនឡើងខ្លាំងជាងខែមុនៗ។ កត្តានេះត្រូវបានស្ថាប័នអគ្គិសនីកម្ពុជាបញ្ជាក់ថាអាចបណ្តាលមកពីការកើនឡើងនូវបរិមាណប្រើប្រាស់អគ្គិសនីក្នុងខែក្តៅ ឬអាចបណ្តាលមកពីបញ្ហាឧបករណ៍អេឡិចត្រូនិកនានាដែលឆ្លងភ្លើង ឬខូចជាដើម។

ដើម្បីជាវិធីសាស្រ្តក្នុងការជួយឱ្យការប្រើប្រាស់អគ្គិសនីសម្រាប់ប្រជាពលរដ្ឋមានភាពសន្សំសំចៃ និងចំណេញច្រើនជាងមុន អាជ្ញាធរអគ្គិសនីកម្ពុជា បានបង្ហាញវិធីសាស្រ្តមួយចំនួនដើម្បីជួយកាត់បន្ថយការចំណាយលើការប្រើប្រាស់អគ្គិសនីដូចតទៅ៖

1.ឆ្នាំដាំបាយ

– គួរជ្រើសរើសទំហំដែលសមរម្យសម្រាប់គ្រួសារនីមួយៗ

– ជៀសវាងបើកគម្របឆ្នាំងពេលបាយមិនទាន់ឆ្អិន

– ដកខ្សែភ្លើងចេញពេលបាយឆ្អិន

កង្ហារ

– សម្អាតកង្ហារឱ្យបានញឹកញាប់

– ជ្រើសរើសទំហំកង្ហារដែលសមល្មមនឹងតម្រូវការ

– ដកខ្សែភ្លើងពេលឈប់ប្រើ

អំពូលភ្លើង

– គួរប្តូរមកប្រើអំពូលដែលស៊ីភ្លើងតិចដូចជាអំពូល LED ជាដើម

– សម្អាតអំពូល ចានអំពូល ឱ្យបានញឹកញាប់

ម៉ាស៊ីនត្រជាក់

– ធ្វើការសម្អាតម៉ាស៊ីនត្រជាក់រាល់ 6ខែម្តង

– កុំយករបស់ក្តៅចូលក្នុងបន្ទប់ម៉ាស៊ីនត្រជាក់

– កម្រិតសីតុណ្ហភាពកុំឱ្យត្រជាក់ពេក អាចត្រឹម 25អង្សារសេ

– ជ្រើសរើសទំហំម៉ាស៊ីនត្រជាក់ដែលសមស្របនឹងទំហំទីតាំង ឬទំហំបន្ទប់

– បិទទ្វារ និងបង្អួចនៅពេលដែលម៉ាស៊ីនត្រជាក់កំពុងដំណើរការ

ឆ្នាំងអ៊ុត

– អ៊ុតខោអាវច្រើនតែម្តង កុំអ៊ុតខោអាវតិចៗច្រើនដង ហើយពេលអ៊ុតកុំបាញ់សើមពេក

– រលាស់ខោអាវមុនហាល ដើម្បីកាត់បន្ថយកុំឱ្យមានភ្លឺច្រើនដែលធ្វើឱ្យអ៊ុតយូរ

ម៉ាស៊ីនបោកខោអាវ

– ដាក់ខោអាវឱ្យច្រើនតាមដែលម៉ាស៊ីនកំណត់

– ត្រាំខោអាវមុនដាក់បោកជួយឱ្យសម្អាតបានស្អាតល្អ

7.កុំព្យូទ័រ

– បិទម៉ូនីទ័របើមិនប្រើលើសពី 10នាទី

– ជ្រើសរើសកុំព្យូទ័រសន្សំសំចៃអគ្គិសនី

– បិទកុំព្យូទ័រនៅពេលមិនប្រើប្រាស់រយៈពេលយូរ (ច្រើនជាង 30នាទី)

ទូទឹកកក

– ដាក់ទូទឹកកយ៉ាងតិច 15សង់ទីម៉ែត្រពីជញ្ជាំង

– ជ្រើសរើសទំហំទូទឹកកកដែលសមរម្យ ហើយកុំក្លាស្សេរបស់ដែលមិនចាំបាច់

– ជ្រើសរើសកន្លែងដាក់ទូទឹកកកដែលឆ្ងាយពីរបស់ដែលមានចំហាយក្តៅ

– ជៀសវាងបើកទូទឹកកកញឹកញាប់

ទូរទស្សន៍

– កុំបិទទូរទស្សន៍ដោយប្រើតេឡេ ត្រូវចុចប៊ូតុងបិទទូរទស្សន៍តែម្តង ហើយដកខ្សែភ្លើងចេញបើឈប់មើល

– ដាក់ទូរទស្សន៍ឱ្យឃ្លាតពីជញ្ជាំង 10សង់ទីម៉ែត្រ និងកន្លែងដែលមានខ្យល់ចេញ ចូល

10.កុំសៀវដាំទឹក

– ដាំទឹកក្នុងចំណុះដែលត្រូវការប្រើ

– ដកខ្សែភ្លើងចេញពេលទឹកពុះ

– សម្អាតកំសៀវដាំទឹកឱ្យស្អាតជានិច្ច ជៀសវាងការថយចុះនៃកម្តៅកំសៀវ៕

April 24, 2020

មិនគួរឱ្យជឿ!! “លុយ$ 1លាន 7សែន” កប់នៅក្នុងកាបូបលុយ 4ខែ!!!

គឺជារឿងពិត មិនមែនប្រឌិតឡើយ…

ហើយរឿងដែលយើងកំពុងតែ ប្រុងរៀបរាប់តទៅនេះ គឺជា “រឿងពិត” 100ភាគរយ
ជារឿងពិត ដែលអាចធ្វើឱ្យមនុស្សជាច្រើន មានអារម្មណ៍ “ច្រណែន” បែបមិនដឹងខ្លួនទៀតផង…
ព្រោះ វាជារឿងរបស់លុយដែលមានចំនួនដល់ទៅ 1លាន 7សែនដុល្លារ!!!
ហាស ហាស ហា!!

ទាំងអស់ខាងលើ ត្រូវបានរៀបរាប់ថា នេះគឺជា “ដំណឹងល្អ” មួយដែលកើតឡើងចំពោះស្ត្រីជនជាតិអូស្ត្រាលីម្នាក់ ក្នុងទីក្រុងស៊ីដនីដែលទើបតែដឹងថា ខ្លួនឯងត្រូវឆ្នោតរបស់ក្រុមហ៊ុន $30 Million Megadraw បានប្រាក់រង្វាន់ដល់ទៅ 1លាន 7សែនដុល្លារ

ស្ត្រីមហាសំណាងដែលត្រូវឆ្នោត ក្នុងអំឡុងជីវិតកំពុងធ្លាក់ក្នុងបរិយាកាស “បិទទីក្រុង” បានរៀបរាប់ថា
នាងបានទិញឆ្នោតទុក តាំងពីខែធ្នូ ឆ្នាំទៅ(2019)ម្ល៉េះ និងទុកសន្លឹកឆ្នោតនោះនៅក្នុង “កាបូបលុយ” រហូតទាល់តែទើបនឹងរើយកមកផ្ទៀងលេខរង្វាន់កាលពីពេលថ្មីៗនេះឯង ក្រោយពីទុកចោលឱ្យពេលវេលាកន្លងទៅដល់ទៅ 4ខែ!!!

នាងប្រាប់ថា នាងតាំងចិត្តថា នឹងបែងចែកលុយរង្វាន់ឱ្យទៅមិត្តភក្តិ និងសាច់ញាតិខ្លះ
ចំណែកថា នឹងយកលុយហ្នឹងទៅធ្វើអ្វីខ្លះនោះ នាងប្រាប់ថា “ខ្ញុំកំពុងនៅរាងភាំងៗ និងនឹកមិនទាន់ឃើញនៅឡើយ”

“ហើយក្នុងអំឡុងពេលដែលត្រូវបង្ខាំងខ្លួននៅតែក្នុងផ្ទះបែបនេះ ខ្ញុំនៅមានពេលអង្គុយគិតទៀតម៉ាគំនរ…”
…
ប្រភព៖ សារព័ត៌មានបរទេស

April 24, 2020

កម្មវិធី Messenger Kids របស់ Facebook នឹងដាក់ឱ្យដំណើរការនៅកម្ពុជា ថ្ងៃនេះ

Facebook បានប្រកាសនៅថ្ងៃនេះ(ទី23មេសា)ថា ក្រុមហ៊ុន នឹងដាក់ឱ្យកម្មវិធី Messenger Kids ដំណើរការក្នុងប្រទេសចំនួន70 លើពិភពលោក ដោយមានការបញ្ចូលនូវចំណុចពិសេស ថ្មីៗជាច្រើន ដើម្បីផ្តល់ភាពងាយស្រួលដល់ឪពុកម្តាយ ក្នុងការជួយឱ្យកូនៗ របស់ពួកគាត់រក្សាការភ្ជាប់ទំនាក់ទំនងជាមួយនឹងមិត្តភក្តិរបស់ពួកគេ។ ជាមួយគ្នានេះដែរ មាតា-បិតា និងអាណាព្យាបាល ក្នុងប្រទេសកម្ពុជា ក៏អាចទាញយកកម្មវិធីនេះ ដើម្បីឱ្យកូនៗរបស់ខ្លួន បានប្រើប្រាស់ចាប់ពីថ្ងៃនេះ(ទី23មេសា)តទៅ ទាំងលើប្រព័ន្ធ Android និង IOS ផងដែរ។

ខណៈដែលសហគមន៍ជាច្រើនកំពុងតែស្វែងរកវិធីសាស្ត្រផ្សេងៗដើម្បីឆ្លើយតបទៅនឹងវិបត្តិវីរុសកូវីដ-19 និងស្របពេលដែលសាលារៀននានាបានបិទជាបណ្តោះអាសន្ន ហើយប្រជាពលរដ្ឋទូទៅកំពុងអនុវត្តវិធានការ រក្សាគម្លាតក្នុងសង្គម ឪពុកម្តាយជាច្រើន កំពុងតែចាប់អារម្មណ៍កាន់តែខ្លាំងក្នុងការប្រើប្រាស់បច្ចេកវិទ្យា ដើម្បីជួយឱ្យកូនៗរបស់ពួកគាត់ រក្សាទំនាក់ទំនងជាមួយនឹងមិត្តភក្កិ និងក្រុមគ្រួសារ ប៉ុន្តែ ក៏ត្រូវស្ថិតក្រោមការគ្រប់គ្រងរបស់ពួកគាត់ដែរ។

Messenger Kids ជាកម្មវិធីផ្ញើសារ និងជជែកកម្សាន្តជាវីដេអូ។ កម្មវិធីនេះនឹងជួយឱ្យកុមារៗ រក្សាការភ្ជាប់ទំនាក់ទំនងជាមួយនឹងមិត្តភក្តិ និងក្រុមគ្រួសាររបស់ពួកគេបានយ៉ាងសប្បាយរីករាយ ក្នុងកម្រិតមួយដែលស្ថិតក្រោមការគ្រប់គ្រងរបស់ឪពុកម្តាយរបស់ពួកគេ។ Facebook បានធ្វើការយ៉ាងប្រកៀកជាមួយនឹងទីប្រឹក្សាយុវជន ឬ Youth Advisors ដែលជាក្រុមជំនាញផ្នែកសុវត្ថិភាពលើប្រព័ន្ធអនឡាញ ការអភិវឌ្ឍរបស់កុមារ និងបណ្តាញសារព័ត៌មាន ដើម្បីរួមគ្នាបង្កើតកម្មវិធី Messenger Kids នេះឡើង។

Facebook នៅតែបន្តធ្វើការពិភាក្សាជាមួយនឹងអ្នកជំនាញក្នុងវិស័យអប់រំ និងទីប្រឹក្សាផ្នែកសុវត្ថិភាពកុមារ ដើម្បីធានាឱ្យបានថា ក្រុមហ៊ុនកំពុងតែផ្តល់សេវាមួយ ដែលជួយឱ្យមានតុល្យភាពរវាងការគ្រប់គ្រង របស់ឪពុកម្តាយ និងមុខងារទាំងឡាយណា ដែលជួយឱ្យកុមារបានរៀនអំពីរបៀបភ្ជាប់ទំនាក់ទំនង ជាមួយគ្នាលើអនឡាញ ប្រកបដោយការទទួលខុសត្រូវ។

កម្មវិធីនេះ ត្រូវបានបង្កើតឡើងសម្រាប់កុមារ ប៉ុន្តែក្រោមការគ្រប់គ្រងរបស់ឪពុកម្តាយ

Messenger Kids មានលក្ខណៈពិសេសជាច្រើនសម្រាប់ក្មេងៗ ដើម្បីជួយឱ្យពួកគេរក្សាការភ្ជាប់ទំនាក់ទំនង ជាមួយនឹងមនុស្សជាទីស្រឡាញ់របស់ពួកគេបាន។ នៅពេលដែលឪពុកម្តាយបង្កើតគណនីឱ្យកូនៗ កូនៗក៏ អាចចាប់ផ្តើមជជែកកម្សាន្តជាវីដេអូ 1ទល់នឹង1 ឬជាក្រុមក៏បាន។ ជាមួយគ្នានេះ ឪពុកម្តាយ អាចចូលទៅត្រួតពិនិត្យមើលបញ្ជីឈ្មោះមនុស្ស ដែលកូនៗរបស់ពួកគាត់បានភ្ជាប់ទំនាក់ទំនងជាមួយ និងមើលថា តើអ្នកទាំងនោះ បើកអនឡាញនៅពេលណា។

រូបភាពតំណាងឱ្យម៉ាស់ការពារ រូប emoji ដ៏សម្បូរបែប និងសំឡេងនិមិត្តផ្សេងៗ នឹងធ្វើឱ្យការសន្ទនាមានភាពរស់រវើក។
ក្រៅពីការជជែកជាវីដេអូហើយ ក្មេងៗក៏អាចផ្ញើរូបថត ឃ្លិបវីដេអូ ឬសារជាអក្សរ ទៅកាន់មិត្តភក្តិ របស់ពួកគេ ក៏ដូចជាផ្ញើសារចូលទៅកាន់កម្មវិធី Messenger ធម្មតា របស់អ៊ុំៗ ពូៗ និងមីងៗ របស់ពួកគេបានដែរ ប៉ុន្តែត្រូវស្ថិតក្រោមការគ្រប់គ្រងរបស់ឪពុកម្តាយ។
កម្មវិធីសម្រាប់ក្មេងៗដ៏សម្បូរបែប ដូចជា GIF ស៊ុមរូបថត ស្ទីកឃើរ ម៉ាសការពារ និងកម្មវិធី គូររូបផ្សេងៗ នឹងអនុញ្ញាតឱ្យក្មេងៗ អាចបង្កើតមាតិកាជាច្រើន ក៏ដូចជាបង្ហាញពីការយល់ឃើញ របស់ពួកគេផងដែរ។
Messenger Kids ផ្ដល់ជូនឪពុកម្តាយ នូវលទ្ធភាពកាន់តែច្រើន ដើម្បីគ្រប់គ្រងកូនៗ បញ្ជីមិត្តភក្តិរបស់កូនៗ ព្រមទាំងអាចចូលទៅពិនិត្យមើល ថាតើកូនៗកំពុងតែប្រើប្រាស់កម្មវិធីនេះ ដើម្បីធ្វើអ្វីខ្លះទៀតផង។ លើសពីនេះទៅទៀត ឪពុកម្តាយក៏អាចគ្រប់គ្រងគណនី និងបញ្ជីមិត្តភក្តិ របស់កូនៗបានផងដែរ តាមរយៈប្រអប់ Messenger Kids Parent Dashboard នៅក្នុង Facebook ផ្ទាល់របស់ពួកគាត់តែម្ដង ដែលដំណើរការបាន ទាំងលើប្រព័ន្ធ iOS និង Android។

វិធីប្រើប្រាស់កម្មវិធី

រាល់គណនីរបស់កុមារទាំងអស់ដែលមាននៅលើ Messenger Kids ត្រូវតែបង្កើតឡើងដោយឪពុកម្តាយ របស់ពួកគេ។ មាតា-បិតា អាចបង្កើតគណនី Messenger Kids សម្រាប់កូនៗបានតាម 4ឌំណាក់កាល ខាងក្រោមនេះ៖

ទាញយកកម្មវិធី៖ ដំបូង ត្រូវទាញយកកម្មវិធី Messenger Kids ដើម្បីដំឡើងលើ iPad, iPod ឬទូរស័ព្ទ iPhone ពី App Store។
ផ្ទៀងផ្ទាត់៖ បន្ទាប់មក ត្រូវធ្វើការផ្ទៀងផ្ទាត់ជាមួយនឹងឧបករណ៍ដែលកូនលោកអ្នកត្រូវប្រើ តាមរយៈការប្រើប្រាស់ឈ្មោះ (Username) និងលេខសម្ងាត់ (Password) Facebook ផ្ទាល់ខ្លួនរបស់អ្នក។ សូមបញ្ជាក់ថា នេះមិនមែនជាការបង្កើតគណនី Facebook ថ្មីមួយសម្រាប់កូនរបស់អ្នក ឬជាការផ្ដល់សិទ្ធិឱ្យកូនៗចូលប្រើគណនី Facebook របស់លោកអ្នកនោះឡើយ។
បង្កើតគណនី 1៖ ដើម្បីបញ្ចប់ដំណើរការនៃការដំឡើង លោកអ្នកត្រូវតែបង្កើតគណនី 1 សម្រាប់កូនរបស់អ្នក ខណៈដែលក្នុងគណនីនោះ អ្នកនឹងត្រូវតែបញ្ចូលឈ្មោះរបស់ពួកគេ ក៏ដូចជា កំណត់ និងជ្រើសរើសបន្ថែមនូវលក្ខណៈពិសេសផ្សេងៗ។ បន្ទាប់មក លោកអ្នកអាចប្រគល់ឧបករណ៍ ដែលត្រូវបានដំឡើងគណនី Messenger Kids នោះ ទៅកូនរបស់លោកអ្នកបាន ដើម្បីឱ្យពួកគេអាច ចាប់ផ្តើមជជែកកម្សាន្តជាមួយនឹងក្រុមគ្រួសារ និងមិត្តភក្តិ។
បញ្ចូលមិត្តភក្តិ៖ ដើម្បីបញ្ចូលមិត្តភក្តិក្នុងបញ្ជីមិត្តភក្តិកូនៗរបស់អ្នក សូមចូលទៅកាន់ប្រអប់ Messenger Kids Parent Dashboard នៅក្នុងគណនី Facebook ផ្ទាល់ខ្លួនរបស់អ្នក។ ដើម្បីចូលទៅកាន់ប្រអប់នោះ សូមចុចលើពាក្យ «More» ឬ «មើលច្រើនទៀត» ដែលមាន នៅឯជ្រុងខាងស្ដាំនៃ ផ្នែកខាងក្រោមនៃអេក្រង់ នៅក្នុងគណនី Facebook ផ្ទាល់ខ្លួនរបស់អ្នក ហើយចុចលើពាក្យ «Messenger Kids» នៅក្នុងប្រអប់ Explore។

ព័ត៌មានបន្ថែម និងផែនការបន្ទាប់

នៅលើ Messenger Kids មិនមានការផ្សាយពាណិជ្ជកម្មឡើយ ហើយព័ត៌មានរបស់កូនលោកអ្នក មិនត្រូវបានយកទៅប្រើប្រាស់ដើម្បីប្រយោជន៍ផ្សាយពាណិជ្ជកម្មឡើយ។ លោកអ្នកអាចទាញយកកម្មវិធីនេះបាន ដោយឥតគិតថ្លៃ ហើយក៏គ្មានការបង់ថ្លៃអ្វីបនែ្ថមក្នុងកម្មវិធីនេះដែរ។ Messenger Kids ក៏ត្រូវបានបង្កើតឡើង ដោយអនុលោមតាមច្បាប់ស្ដីអំពីឯកជនភាព និងការការពារការអនឡាញរបស់កុមារ ផងដែរ (COPPA)។

យើងបន្តធ្វើការជាមួយនឹងឪពុកម្តាយ អ្នកជំនាញផ្នែកសុវត្ថិភាព និងសន្តិសុខ ដើម្បីធ្វើឱ្យកម្មវិធី Messenger Kids កាន់តែមានភាពល្អប្រសើរ ហើយនៅថ្ងៃនេះ យើងក៏បានប្រកាសពីវិធីថ្មីៗក្នុងការជួយឱ្យឪពុកម្តាយ រក្សាការភ្ជាប់ទំនាក់ទំនងរបស់កូនៗជាមួយនឹងមិត្តភក្តិរបស់ពួកគេ ផងដែរ។ កម្មវិធីនេះ នឹងដាក់ឱ្យដំណើរការទូទាំងពិភពលោក នៅប៉ុន្មានខែខាងមុខនេះ។

សម្រាប់ព័ត៌មានលម្អិតបន្ថែមទៀតអំពីកម្មវិធីនេះ សូមចូលទៅកាន់គេហទំព័រ messengerkids.com។

សម្រាប់ព័ត៌មានថ្មីៗ អំពីរបៀបប្រើប្រាស់ Messenger Kids សូមចូលទៅកាន់មជ្ឈមណ្ឌលផ្តល់ជំនួយ ឬ Help Center របស់យើង៕

April 24, 2020

កម្ពុជាចំណាយប្រាក់ចន្លោះ 2,000ដុល្លារ ទៅ 2,500ដុល្លារ សម្រាប់ព្យាបាលអ្នកមានវីរុសកូវីដ-19 ម្នាក់

រដ្ឋលេខាធិការក្រសួងសុខាភិបាល បានឱ្យដឹងថា ការព្យាបាលអ្នកមានផ្ទុកវីរុសកូវីដ-19 ម្នាក់ត្រូវការចំណាយទឹកប្រាក់ចន្លោះពី 2,000ដុល្លារ ទៅ 2,500ដុល្លារអាមេរិក នេះបើតាមការថ្លែងក្នុងសន្និសីទសារព័ត៌មានស្តីពីបច្ចុប្បន្នភាពវីរុសកូវីដ-19 នៅថ្ងៃទី20 ខែមេសា ឆ្នាំ2020។

លោកជំទាវ យក់ សម្បត្តិ រដ្ឋលេខាធិការក្រសួងសុខាភិបាល បានថ្លែងឱ្យដឹងថា៖«ថវិកាដែលនឹងចំណាយពាក់ព័ន្ធនឹងរឿងនេះគឺ ជាង 1ពាន់ដុល្លារ សម្រាប់ចំណាយទៅលើការធ្វើតេស្តរកមេរោគ។ ដោយឡែកជាង 1ពាន់ដុល្លារទៀត ចំណាយទៅលើថ្លៃថ្នាំ អាហារហូបចុក ថែទាំ និងការស្នាក់នៅជាដើម»។

លោកជំទាវបានបន្ថែមថា ការចំណាយនេះអាស្រ័យទៅលើរយៈពេលនៃការព្យាបាល ពោលបើការព្យាបាលចំណាយពេលយូរ ការចំណាយក៏ច្រើនឡើងដែរ ហើយបើការព្យាបាលមានរយៈពេលខ្លី ការចំណាយក៏តិចទៅតាមហ្នឹងដែរ ហើយតម្លៃនេះ ក៏ប្រែប្រួលទៅតាមការព្យាបាលរវាងមន្ទីរពេទ្យរដ្ឋ និងឯកជនផងដែរ។ ការចំណាយនេះ មិនទាន់បូករួមការឧបត្ថម្ភដល់គ្រូពេទ្យអ្នកព្យាបាល 1ថ្ងៃម្នាក់ 20ម៉ឺនរៀល(50ដុល្លារ)ថែមពីលើប្រាក់បៀវត្សរ៍នៅឡើយផង។

មិនទាន់មានការបញ្ជាក់ពីការចំណាយសរុបក្នុងប្រតិបត្តិការប្រយុទ្ធប្រឆាំងវីរុសកូវីដ-19 ក៏ដូចជាព្យាបាលអ្នកជំងឺនៅឡើយនោះទេ។ ប៉ុន្តែលោកស្រីរដ្ឋលេខាធិការ បានឱ្យដឹងថា ក្រសួងបានចំណាយថវិកាប្រមាណ 4.5លានដុល្លារអាមេរិក ជាថវិការបស់រដ្ឋ និងថវិកាសប្បុរសជន 5លានដុល្លារទៀត ដើម្បីទិញសម្ភារនានា សម្រាប់ក្រុមគ្រូពេទ្យប្រើប្រាស់។

សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ធ្លាប់បានបញ្ជាក់ថា ការព្យាបាលអ្នកជំងឺកូវីដ-19 ទាំងជនបរទេស និងពលរដ្ឋខ្មែរ មិនត្រូវបានគិតថ្លៃពីអ្នកជំងឺនោះទេ។ ការសម្រេចនេះ បានបង្ហាញពីការទទួលខុសត្រូវខ្ពស់ និងទឹកចិត្តសប្បុរសធម៌ដ៏ជ្រាលជ្រៅរបស់រាជរដ្ឋាភិបាលកម្ពុជាទៅលើអ្នកជំងឺ ខណៈបណ្តាប្រទេសជាច្រើនទៀត សុទ្ធតែបានយកថ្លៃព្យាបាលពីជនបរទេស។

អ្នកមានវីរុសCovid-19 ជាជនជាតិខ្មែរ និងជនបរទេស ដែលនៅក្នុងកម្ពុជា អាចចាត់ទុកថា ជាអ្នកមានសំណាងធំណាស់ ដោយសារតែពួកគេមិនតម្រូវឱ្យបង់ប្រាក់ឡើយ ព្រោះប្រមុខរាជរដ្ឋាភិបាលកម្ពុជា តាមរយៈក្រសួងសុខាភិបាល បានបង្ហាញពីការទទួលបន្ទុក និងមានភាពទទួលខុសត្រូវយ៉ាងខ្ពស់ ដោយបានចំណាយថវិកាទាំងស្រុង ទៅលើថ្លៃព្យាបាលអ្នកមានវីរុសCovid-19 ចម្រុះជាតិសាសន៍ទាំងនោះ។

អ្នកជំងឺដែលផ្ទុកវីរុសកូវីដ-19 ដែលសម្រាកព្យាបាលនៅក្នុងប្រទេសកម្ពុជា ភាគច្រើន គឺជាជនជាតិបរទេស ហើយមានការប្រែប្រួលទៅតាមអាការ និងការធ្វើតេស្តនៅក្នុងរង្វង់10 ទៅ11ដង។

លោកជំទាវបានលើកឧទាហរណ៍ថា ដូចជា ជនជាតិបារាំង 2នាក់ប្ដីប្រពន្ធ រួមជាមួយនឹងកូនតូចអាយុ 4ខែ ដែលសម្រាកនៅមន្ទីរពេទ្យកុមារជាតិ គឺពួកគាត់ឈ្លោះគ្នា ពេលពិនិត្យឃើញឪពុកវិជ្ជមាន ម្តាយអវិជ្ជមាន ពេលម្ដាយវិជ្ជមាន ឪពុកអវិជ្ជមានម្ដង អ៊ីចឹងមានន័យថា វាមានការប្រែប្រួលអាស្រ័យទៅលើកត្តានៃការរស់នៅប្រចាំថ្ងៃផងដែរ។

លោកជំទាវបានបញ្ជាក់ថា៖«ក្រោយពេលយើងធ្វើតេស្តម្ដងឃើញមានវិជ្ជមាន គឺតម្រូវឱ្យគាត់សម្រាកនៅពេទ្យពី 5-7ថ្ងៃ បានយើងកុងត្រូល (គ្រប់គ្រងជំងឺ)គាត់។ អ៊ីចឹងពេលដែលកុងត្រូលអវិជ្ជមានលើកទី1 ក្រោយរយៈពេល 48ម៉ោង យើងធ្វើកុងត្រូលលើកទី2»។

ជាមួយនឹងការទទួលបន្ទុកការចំណាយទាំងស្រុង ទៅលើការព្យាបាលអ្នកជំងឺ Covid-19 របស់រដ្ឋាភិបាលកម្ពុជា គឺជាទង្វើមនុស្សធម៌ដ៏ថ្លៃថ្លា ដែលបច្ចុប្បន្ននេះ រដ្ឋាភិបាលបានត្រៀមថវិកាបម្រុងជាច្រើនលានដុល្លារ សម្រាប់ចំណាយរួចជាស្រេច បន្ថែមពីលើការចូលរួមបរិច្ចាគថវិកា និងធនធានផ្ទាល់ខ្លួនរបស់មន្ត្រីរាជការ និងបណ្តាសប្បុរសជននានានៅទូទាំងប្រទេស។

ដោយឡែកនៅបណ្តាប្រទេសមួយចំនួន ដូចជាប្រទេសសិង្ហបុរី ត្រូវបានប្រកាស នៅលើគេហទំព័ររបស់ក្រសួងសុខាភិបាល ឱ្យដឹងថា៖«ចាប់ពីខែមីនា ការព្យាបាលការឆ្លងមេរោគ ផ្លូវដង្ហើមធ្ងន់ធ្ងរនៅក្នុងមន្ទីរពេទ្យរដ្ឋរបស់ប្រទេសសិង្ហបុរី ត្រូវបានអនុវត្តលើជនបរទេស ដែលជាធម្មតាមានតម្លៃចន្លោះពី 4,300 ទៅ 4,800ដុល្លារអាមេរិក»។

ចំណែក នៅឯសហរដ្ឋអាមេរិកវិញ សម្រាប់តម្លៃការព្យាបាល ការឆ្លងមេរោគផ្លូវដង្ហើមធ្ងន់ធ្ងរនៅក្នុងមន្ទីរពេទ្យរដ្ឋ ចំពោះប្រជាជនអាមេរិកទូទៅ គឺមានតម្លៃចន្លោះពីជាង 40,000 ទៅ 70,000ដុល្លារអាមេរិក។

សូមបញ្ជាក់ថា មកដល់ត្រឹមថ្ងៃទី22 ខែមេសា ឆ្នាំ2020 កម្ពុជារកឃើញអ្នកឆ្លងវីរុសកូវីដ-19 ចំនួន 122នាក់ ពលរដ្ឋខ្មែរ 51នាក់ ជនបរទេស71នាក់។ មកដល់បច្ចុប្បន្នព្យាបាលជា 110នាក់ ហើយកំពុងព្យាបាល 12នាក់៕

April 24, 2020

តម្លៃប្រេងអាច “ថោក” រហូតដល់ -100ដុល្លារក្នុង1បារ៉ែល នៅខែក្រោយ

ពិភពលោកប្រឈមនឹងការអស់កន្លែងសម្រាប់ដាក់ប្រេងនៅចុងខែឧសភាខាងមុខ ក្នុងពេលដែលការទិញដូរប្រេងឆៅមិនមានការកំណត់តម្លៃអប្បបរមា អាចជាន់ពន្លិចតម្លៃប្រេងចុះដល់ចំណុច “ហៅលែងឮ” ថែមទៀត។

ត្រូវបានបាញ់បង្ហោះឡើងទៅកាន់គន្លងគោចរតាំងពីឆ្នាំ2014 ផ្កាយរណប Sentinel-1 មានតួនាទីថត និងផ្ញើមកកាន់ផែនដីនូវរូបភាពច្បាស់បំផុតស្ដីអំពីសកម្មភាពនៅលើផ្ទៃភពផែនដី រួមទាំងអាងដាក់ប្រេង និងបណ្ដាកប៉ាល់ដឹកប្រេងផងដែរ។ ទិន្នន័យទាំងនេះត្រូវបានគេប្រើដើម្បីគន់គូរអំពីបរិមាណប្រេងឆៅដែលត្រូវបានរក្សាទុក។ ថ្មីៗនេះ រូបភាពពី Sentinel-1 បានផ្ញើសារដ៏គួរឱ្យប្រកាសអាសន្នមួយ នោះគឺ “បណ្ដាឃ្លាំងដាក់ប្រេងបានពេញអស់ទៅហើយ”។

នេះគឺជាបញ្ហាដែលមិនធ្លាប់បានកើតឡើងពីមុនមក។ ក្រុមអ្នកជំនាញបានឱ្យដឹងថា ប្រហែលជាប៉ុន្មានសប្ដាហ៍ទៀតប៉ុណ្ណោះ ពិភពលោកនឹងអស់កន្លែងសម្រាប់ដាក់ប្រេង។ ជាលទ្ធផល តម្លៃប្រេងនៅក្នុងតំបន់ខ្លះ ត្រូវបានព្យាករថានឹងធ្លាក់ដល់0ដុល្លារ ឬទាបជាងនេះ។

Florian Thaler អ្នកជំនាញមកពីក្រុមហ៊ុន Oilx ជាក្រុមហ៊ុនស្រាវជ្រាវទិន្នន័យដែលបានពីផ្កាយរណប Sentinel-1 បានឱ្យដឹងថា “ទិន្នន័យពីផ្កាយរណប Sentinel-1 បានបង្ហាញថា នៅចុងខែឧសភា ឬដើមខែមិថុនា ពិភពលោកនឹងធ្លាក់ទៅក្នុងស្ថានភាពអស់ទីតាំងដាក់ប្រេង”។

ចំណែក Paul Sankey ដែលជាអ្នកជំនាញក្នុងការវិភាគបញ្ហាប្រេងប្រចាំ Mizuho Bank ក៏បានឱ្យដឹងដែរថា “យើងត្រូវងាកទៅប្រើយុទ្ធសាស្ត្រគ្រប់គ្រងវិបត្តិជារៀងរាល់ថ្ងៃ”។ អ្នកជំនាញរូបនេះធ្លាប់បានព្រមាន និងព្យាករដ៏ត្រឹមត្រូវអំពីតម្លៃ0ដុល្លាររបស់ប្រេងនៅក្នុងខែមីនា ហើយពេលនេះ លោកក៏បន្តព្យាករប្រកបដោយទុទិដ្ឋិនិយមខ្លាំងជាងមុនទៅទៀត។ គាត់និយាយថា “តើយើងនឹងបានឃើញតម្លៃប្រេងធ្លាក់មកនៅ-100ដុល្លារក្នុង1បារ៉ែលនៅក្នុងខែក្រោយនេះ? ប្រការនេះពិតជាអាចកើតឡើង”។

បញ្ហាសំខាន់បំផុត គឺថា តម្លៃប្រេងឆៅត្រូវបានកំណត់ដោយយោងទៅលើការផ្គត់ផ្គង់ និងការបញ្ជាទិញ ពោលគឺវាមិនមានតម្លៃអប្បបរមាដែលកំណត់ដោយរដ្ឋាភិបាលណាមួយនោះទេ។ ក្រោយហេតុការណ៍ក្នុងសប្ដាហ៍នេះ បញ្ហាអ្វីក៏អាចកើតឡើងបានដែរ។

បើទោះបីជាការព្យាករអាចមានភាពខុសគ្នាខ្លះមែន ប៉ុន្តែ ប្រការដែលប្រាកដប្រជានោះគឺថា រូបភាពពីផ្កាយរណប Sentinel-1 បានបង្ហាញថា ពិភពលោកកំពុងតែសល់ប្រេងយ៉ាងច្រើនសន្ធឹក។ ប្រេងចំនួន50លានបារ៉ែល ត្រូវបានដឹកទៅកាន់បណ្ដាឃ្លាំងជារៀងរាល់សប្ដាហ៍ ដែលតួលេខនេះ គ្រប់គ្រាន់សម្រាប់តម្រូវការប្រើប្រាស់របស់អាល្លឺម៉ង់ បារាំង អ៊ីតាលី អេស្ប៉ាញ និងអង់គ្លេសបូកចូលគ្នា។

នៅក្នុងផ្សារហ៊ុនកាលពីថ្ងៃទី21មេសា ប្រេងត្រូវបាន “លក់ឡាយឡុង”។ កិច្ចសន្យាប្រេង Brent ដែលនឹងផ្គត់ផ្គង់ក្នុងខែមិថុនា បានថយចុះ15% នៅសល់តែ16ដុល្លារក្នុង1បារ៉ែល ដែលជាតម្លៃទាបបំផុតក្នុងអំឡុងជិត21ឆ្នាំមកនេះ។ ប្រេងឆៅដែលមានប្រភពពីអឺរ៉ុប និងអាហ្វ្រីក ដែលធ្លាប់តែមានតម្លៃទាបជាងប្រេង Brent ក៏ត្រូវបានលក់ក្នុងតម្លៃក្រោម10ដុល្លារក្នុង1បារ៉ែល ហើយមានកន្លែងខ្លះ តម្លៃរបស់វាត្រូវបានគេលក់ក្រោម5ដុល្លារទៀតផង។

នៅឥណ្ឌា ឃ្លាំងដាក់ប្រេងនៅក្នុងបណ្ដារោងចក្រចម្រាញ់ប្រេង បច្ចុប្បន្នបានពេញរហូតដល់95%ទៅហើយ។ ក្រុមហ៊ុនចម្រាញ់ប្រេងក៏មិនអាចទិញប្រេងបន្ថែមទៀតដែរ ព្រោះតម្រូវការប្រើប្រាស់បានថយចុះយ៉ាងគំហុក។

ក្រុមហ៊ុនផលិតប្រេងមួយចំនួនបានផ្អាកដំណើរការ ប៉ុន្តែក៏នៅតែមានក្រុមហ៊ុនខ្លះ ត្រូវបូមប្រេងឡើងផងដែរ។ ជាមួយនឹងបណ្ដាក្រុមហ៊ុនដែលពោរពេញទៅដោយបំណុល សូម្បីតែតម្លៃ4-10ដុល្លារក្នុង1បារ៉ែល ក៏ពួកគេចាត់ទុកថាគ្រាន់បើជាងមិនមានអ្វីសោះ។ មិនមានកន្លែងសម្រាប់លក់ចេញ ប្រេងឆៅមានតែនៅសម្ងំក្នុងឃ្លាំង។ ទិន្នន័យពី Sentinel-1 នៅតែត្រូវបានគេយល់ថា នៅមានសង្ឃឹម។ មានឃ្លាំងដាក់ប្រេងជាច្រើននៅទំនេរ ក៏ប៉ុន្តែ ទាំងនោះត្រូវបានគេជួលតាំងពីមុនអស់ទៅហើយ វាគ្រាន់តែរង់ចាំគេចាក់ប្រេងបំពេញតែប៉ុណ្ណោះ។

Pierre Andurand ដែលជាស្ថាបនិកនៃមូលនិធិការពារប្រេង បានឱ្យដឹងថា “យើងយល់ថា តម្លៃប្រេងនឹងធ្លាក់ចុះដល់កម្រិត0ដុល្លារ ឬទាបជាងកម្រិត0ដុល្លារទៅទៀត។ ទីផ្សារបច្ចុប្បន្នកំពុងគ្រោះថ្នាក់ខ្លាំងណាស់ក្នុងការទិញដូរ”។

នៅទីផ្សារសហរដ្ឋអាមេរិក អ្នកវិនិយោគបានងាកទៅរក Cushing ដែលជាមជ្ឈមណ្ឌលជួញដូរប្រេងដ៏ធំប្រចាំរដ្ឋ Oklahoma។ នៅទីនេះអាចដាក់ប្រេងបានដល់ទៅជិត80លានបារ៉ែល។ ក៏ប៉ុន្តែ ព័ត៌មានមុននេះបានឱ្យដឹងថា ទីនេះអស់កន្លែងសម្រាប់ដាក់ប្រេងទៅហើយដែរ។

បញ្ហានៅមានបន្តទៀត៖ Plains All American Pipelines ដែលជាក្រុមហ៊ុនដឹកជញ្ជូនប្រេងដ៏ធំបំផុតមួយនៅសហរដ្ឋអាមេរិក បានស្នើឱ្យក្រុមហ៊ុន Eastern Kansas Common ចំណាយឱ្យខ្លួន55ដុល្លារសម្រាប់1បារ៉ែល បើសិនជាចង់លក់ប្រេងឆៅដែលក្រុមហ៊ុននេះផលិត។

បណ្ដាឃ្លាំងប្រេងនៅ Rotterdam ដែលជាមជ្ឈមណ្ឌលចម្រាញ់ប្រេងរបស់អឺរ៉ុបខាងលិច រួមនឹងឃ្លាំងប្រេងនៅលើកោះមួយចំនួននៅតំបន់ Caribbean និងនៅសិង្ហបុរី នឹងអស់កន្លែងដាក់ប្រេងនាពេលដ៏ខ្លីខាងមុខ។ បណ្ដាកប៉ាល់ដឹកប្រេងដែលត្រូវបានយកមកធ្វើជាឃ្លាំងដាក់ប្រេងបណ្ដោះអាសន្ន ក៏នឹងលែងមានកន្លែងដាក់ទៀតដែរ។

Royal Vopak ដែលជាក្រុមហ៊ុនផ្ដល់សេវាកម្មជួលឃ្លាំងដាក់ប្រេងឯករាជ្យធំបំផុតក្នុងពិភពលោក បានឱ្យដឹងថា ពិភពលោកទាំងមូលកំពុងស្វែងរកកន្លែងសម្រាប់ដាក់ប្រេង។ “សមត្ថភាពផ្ទុកដែលអាចរកបាននៅទូទាំងពិភពលោក ពេលនេះត្រូវបានគេទិញស្ទើរតែទាំងអស់ទាំងស្រុងទៅហើយ” នេះបើតាម Gerard Paulides ដែលជានាយកផ្នែកហិរញ្ញវត្ថុរបស់ក្រុមហ៊ុន Royal Vopak៕

ប្រភព៖ សារព័ត៌មានបរទេស

April 23, 2020

PSG ដំឡើងប្រាក់ខែ ចងជើង Neymar ឱ្យនៅបន្តដល់ឆ្នាំ2025

កីឡាករ Neymar JR សញ្ជាតិប្រេស៊ីល ត្រូវបានទាក់ទងឱ្យវិលត្រឡប់ទៅកាន់កីឡដ្ឋាន Nou-Camp វិញ ជាកន្លែងដែលគេធ្លាប់លេងឱ្យ Barcelona រវាងឆ្នាំ2013-2017 មុនពេលចាកចេញមកទីក្រុងប៉ារីស ក្នុងតម្លៃខ្លួនកំណត់ត្រាពិភពលោក គឺ 198លានផោន។

ដោយសារតែនៅលីកបារាំង ការប្រកួតប្រជែងហាក់មិនសូវមានភាពខ្លាំងដូចនៅអេស្ប៉ាញ ហើយ Neymar ក៏ហាក់បង្ហាញកាយវិការដូចជាចង់យកឱកាសនេះដើម្បីទៅកាន់អតីតក្លិបរបស់ខ្លួនផងនោះ ក្លិបបច្ចុប្បន្នរបស់គេ Paris Saint Germaint បានប្រកាសបង្កើនប្រាក់ថ្លៃឈ្នួលរបស់កីឡាកររូបនេះល់ទៅ 64ម៉ឺនផោនក្នុង 1សប្ដាហ៍។

គួរបញ្ជាក់ដែរថា Neymar រកបាន 18គ្រាប់ និង Assist 10គ្រាប់ គិតគ្រប់កម្មវិធីឲ្យ PSG រដូវកាលនេះ និងបច្ចុប្បន្នមានចំណូល 60ម៉ឺនផោនក្នុង 1សប្ដាហ៍៕

April 23, 2020

ដំណាំត្រកួន ងាយដាំ ងាយបានផល តែមានផលប្រយោជន៍ច្រើន

ត្រកួនជាប្រភេទបន្លែដែលងាយដាំ ងាយថែទាំ ឆាប់ទទួលបានផល និងមានផលប្រយោជន៍ច្រើនសម្រាប់សុខភាព។ មិនថាមុខម្ហូបឆា សម្ល ជ្រក់ ឬធ្វើជាអន្លក់នោះទេ ត្រកួនអាចត្រូវបានគេច្នៃ និងចូលរួមចំណែកបង្កើនរសជាតិដល់ម្ហូបអាហារជាច្រើនសម្រាប់ប្រជាជនខ្មែរយើង។ ក្រៅពីនេះ ដំណាំប្រភេទនេះក៏មានតម្លៃគួរសម ហើយសំបូរទីផ្សារផងដែរ។

លោក ខ្នុរ ខាន់ កសិករដាំត្រកួននៅខេត្តកណ្តាលបានលើកឡើងថា ដំណាំត្រកួនជាដំណាំដែលមានប្រជាប្រិយភាព និងទទួលបានការគាំទ្រច្រើនពីប្រជាជនគ្រប់រូបនៅកម្ពុជា។ ផលដែលទទួលបានពីត្រកូនមិនសូវខ្វះទីផ្សារនោះទេ ព្រោះមានម៉ូយមកទទួលទិញដល់ផ្ទះតែម្តង ដែលសម្រាប់គ្រួសារគាត់ អាចទទួលបានចំណូលប្រមាណ 2 ទៅ3លានរៀល ក្នុងពេលប្រមូលផលម្តងៗលើផ្ទៃដីប្រមាណ 70អាដែលគាត់បានដាំដុះ។

ចំពោះវិធីដាំវិញ គឺមានលក្ខណៈងាយស្រួលបំផុត ហើយក៏មិនលំបាកថែទាំដែរ។ ដំបូងកគ្រាន់តែភ្ជូររាស់ ឬកាប់ឆាយជារងទុកចោលរយៈពេល 2ថ្ងៃដើម្បីឱ្យងាប់ស្មៅ ឬសម្លាប់មេរោគនៅក្នុងដី។ ក្រោយលើករងហើយ គ្រាន់តែព្រួសគ្រាប់ត្រកូនដែលទិញពីផ្សារ និងស្រោចទឹកមួយថ្ងៃ 3ដងសម្រាប់រដូវប្រាំង ឬទុកឱ្យត្រូវទឹកភ្លៀងធម្មតាសម្រាប់រដូវវស្សារង់ចាំរហូតដល់រយៈពេល 18ថ្ងៃនឹងទទួលបានផលជាក់ជាមិនខាន។

ក្រោយពេលត្រកូនដុះហើយ អ្នកដាំគ្រាន់តែឧស្សាហ៍មើលថែទាំចំពោះគុណភាពដី និងដកស្មៅ ឬរុក្ខជាតិនានាដែលរំខានដល់ការលូតលាស់របស់ត្រូកួន នោះយើងនឹងអាចទទួលផលបានច្រើនដងលើដីដែលដាំលើកទី1នេះ។ ហើយដំណាំប្រភេទនេះមិនទាមទារឱ្យមានការថែទាំច្រើន ក៏វាដុះលូតលាស់ដោយខ្លួនឯងឡើងមកវិញដែរក្រោយពេលច្រូត ឬប្រមូលផលរួច។

សម្រាប់ទីផ្សារវិញឈ្មួញកណ្តាលដែលតែងតែប្រមូលទិញត្រកូនតាមផ្ទះយកទៅលក់នៅផ្សារ លោក ឆុំ បានប្រាប់អ្នកយកព័ត៌មានយើងថា ខុសពីដំណាំដទៃ ត្រកួនជាបន្លែដែលងាយលក់ ព្រោះវាត្រូវជាមួយនឹងមុខម្ហូបច្រើនរបស់ខ្មែរយើង។ ក្រៅពីនេះចំពោះហាងឆេងតម្លៃវិញក៏ដូចគ្នា វាមានហាងឆេងល្អជាងបន្លែផ្សេងៗ ដោយបន្លែខ្លះឡើងចុះក្នុងរយៈពេលយូរ តែសម្រាប់ត្រកួនចុះថ្លៃមិនយូរទេ ហើយសម្រាប់រដូវប្រាំង ឬរដូវមិនសូវសំបូរទឹកវិញ តម្លៃត្រកួនកាន់តែឡើងខ្ពស់ថែមទៀត៕

April 23, 2020

រកឃើញសត្វថ្មី30ប្រភេទ៖ សត្វខ្លះប្រវែង47ម៉ែត្រ(មានវីដេអូ)

មហាសមុទ្រនានាត្រូវបានគេចាត់ទុកថាជាព្រំដែនចុងក្រោយរបស់ភពផែនដី។ ថ្មីៗនេះ ក្រុមអ្នកវិទ្យាសាស្ត្របានធ្វើការរុករកមួយនៅឯលម្ហសមុទ្រនៃប្រទេសអូស្ត្រាលីភាគខាងលិច ហើយបានរកឃើញសត្វសមុទ្រយ៉ាងតិច30ប្រភេទ ក្នុងនោះមានសត្វខ្លះ មានដងខ្លួនវែងមិនធ្លាប់បានឃើញពីមុនមក។

ការរុញរកខាងលើនេះ ត្រូវបានធ្វើឡើងដោយក្រុមអ្នកវិទ្យាសាស្ត្រមកពីសារមន្ទីរជាតិអូស្ត្រាលីខាងលិច សាកលវិទ្យាល័យ Curtin នាយកដ្ឋានភូមិសាស្ត្រអូស្ត្រាលី វិទ្យាស្ថានស្រាវជ្រាវមហាសមុទ្រ Scripps និងវិទ្យាស្ថានស្រាវជ្រាវមហាសមុទ្រ Schmidt។ ក្រុមអ្នកវិទ្យាសាស្ត្រនេះ បានប្រើពេល180ម៉ោង និងបានមុជចូលក្រោមសមុទ្រ20លើក ដើម្បីស្រាវជ្រាវតំបន់ជ្រលងភ្នំ Ningaloo នៅតំបន់មហាសមុទ្រឥណ្ឌា ដែលមានជម្រៅ4,500ម។

ដោយប្រើប្រាស់រ៉ូបូតបញ្ជាពីចម្ងាយដែលមានឈ្មោះថា ROV SuBastian ក្រុមអ្នកស្រាវជ្រាវថតបានទិដ្ឋភាពសត្វសមុទ្រចម្លែកៗជាច្រើន។ មានសត្វខ្លះ គេមិនធ្លាប់បានឃើញនៅទីនេះពីមុននោះដែរ រួមមាន មឹក Taning ដែលមានចម្រុះពណ៌ ត្រសក់សមុទ្រកន្ទុយវែង និងបណ្ដាសត្វដែលមានរូបរាងទន់ផ្សេងៗទៀត។

ក្រុមអ្នកវិទ្យាសាស្ត្រក៏បានរកឃើញសត្វ Hydra ដ៏ធំមួយ ដែលមានពណ៌ក្រហមស្រស់ និងប្រវែងជាង1ម៉ែត្រ។

នៅក្នុងចំណោមសត្វសមុទ្រថ្មីៗដែលទើបត្រូវបានរកឃើញ ក៏មានសត្វ Apolemia ថ្មី មានប្រវែងរហូតដល់47ម៉ែត្រ ជាសត្វសមុទ្រវែងជាងគេបង្អស់ក្នុងចំណោមសត្វដែលមានដងខ្លួនវែងជាងគេនៅលើភពផែនដី។ ត្រីបាឡែនពណ៌ខៀវ មានប្រវែងជិត30ម៉ែត្រ។

Apolemia មិនមែនជាសត្វទោលតែឯងនោះទេ ប៉ុន្តែវាគឺជាបណ្ដុំនៃសត្វតូចៗជាច្រើនដែលហៅថា zooids ដោយពួកវាត្រូវពឹងលើគ្នាទៅវិញទៅមក ដោយរួមគ្នាអនុវត្តភារកិច្ច ដូចជាការការពារខ្លួន ការបង្កើតកូន និងការរំលាយអាហារជាដើម។

លោក Logan Mock-Bunting អ្នកនាំពាក្យរបស់វិទ្យាស្ថានស្រាវជ្រាវមហាសមុទ្រ Schmidt បានឱ្យដឹងថា “ជាក់ស្ដែង សត្វនេះអាចមានដងខ្លួនវែងខ្លាំងណាស់។ យើងបានប៉ាន់ប្រមាណឃើញថា វាអាចមានប្រវែងដល់ទៅជាង120ម៉ែត្រឯណោះ”។

Rebecca Helm ដែលជាជំនួយការរបស់សាស្ត្រាចារ្យនៅសាកលវិទ្យាល័យ Carolina Asheville ខាងជើង (University of North Carolina Asheville) ឱ្យដឹងថា “ខ្ញុំធ្លាប់បានឃើញសត្វ siphonophore (Apolemia) នេះ ប៉ុន្តែ ទាំងអស់សុទ្ធតែមានប្រវែងត្រឹម20សម ហើយវែងបំផុតក៏ត្រឹមតែ1ម។ ប៉ុន្តែ លើកនេះគឺផ្សេង។ នេះគឺជា siphonophore ធំបំផុត និងស្អាតបំផុតដែលខ្ញុំធ្លាប់បានឃើញ។

លទ្ធផលនៃការរុករកខាងលើនឹងត្រូវបានដាក់តាំងនៅក្នុងសារមន្ទីរអូស្ត្រាលីខាងលិច។ ទិន្នន័យនៃការសិក្សាស្រាវជ្រាវនេះក៏នឹងប្រកាសឱ្យដឹងជាសាធារណៈដើម្បីជាជំនួយដល់ការសិក្សាស្រាវជ្រាវផ្សេងៗទៀត៕

ប្រភព៖ សារព័ត៌មានបរទេស

April 23, 2020

តើនរណាជាកីឡាករបាល់ទាត់អាជីព ដែលទទួលកាតក្រហមច្រើនជាងគេ?

ក្នុងពិភពបាល់ទាត់ ចៀសមិនផុតឡើយពីការលើសលស់លើគ្នាបន្តិចបន្តួច ដែលពេលខ្លះក៏ប៉ះគ្នាខ្លាំងៗ ឈានទៅដល់ការទទួលបានកាតលឿង និងក្រហមក៏មាន។

កីឡាករខ្សែបម្រើការពារ សញ្ជាតិកូឡុំប៊ី Gerardo Bedoya ត្រូវបានចារិកឈ្មោះក្នុងប្រវត្តិសាស្រ្តក្នុងនាមជាកីឡាករ ដែលបង្កកំហុសច្រើនជាងគេបង្អស់ នៅក្នុងការលេងបាល់ទាត់អាជីព ដោយទទួលបានកាតក្រហមដល់ទៅ 46លើក។

ចំពោះកីឡាករដែលឈរនៅលំដាប់លេខ2 ដែលទទួលបានកាតក្រហមច្រើនជាងគេនោះគឺ ខ្សែការពារបារាំង Cyril Rool ដែលទទួលបានកាតក្រហមចំនួន 27លើកក្នុងអាជីព៕

April 23, 2020

Category: សង្គម និងសេដ្ឋកិច្ច