លីកកំពូលនៃប្រទេសតាជីគីស្ថាន គឺជាលីកកំពូលតែមួយគត់ក្នុងតំបន់អាស៊ី ដែលមិនបានទទួលរងឥទ្ធិពលធ្ងន់ធ្ងរឡើយ និងមិនបានផ្អាកសកម្មភាពបាល់ទាត់របស់ខ្លួនឡើយ ដោយសារតែមិនមានការឆ្លងទាល់តែសោះនៅក្នុងប្រទេសមួយនេះ សូម្បីតែ 1ករណី។
ទោះជាមិនបានផ្អាកមែន តែប្រទេសនេះបានអនុវត្តការប្រកួតបាល់បែបបិទទ្វារកីឡដ្ខាន ពោលគឺ មិនអនុញ្ញាតឱ្យមានអ្នកចូលរួមទស្សនាការប្រកួតឡើយ។
គួរបញ្ជាក់ថា គិតមកទល់នឹងថ្ងៃទី27 ខែមេសា ឆ្នាំ2020 នេះ មានប្រទេសចំនួន 215ហើយ ដែលមានករណីឆ្លងកូវីដ-19 តែមិនទាន់មានករណីណាមួយកើតឡើងនៅក្នុងប្រទេសតាជីគីស្ថាននេះនៅឡើយ៕
នៅឆ្នាំ2020 នេះ កុមារា Loic Chan បានចុះកិច្ចសន្យាជាមួយភ្នាក់ងារដោះដូរកីឡាករ ទទួលស្គាល់ដោយ FIFA ពីប្រទេសអេស្ប៉ាញ ដើម្បីធ្វើជាអ្នកតំណាងឱ្យរូបគេក្នុងការប្រកបអាជីពបាល់ទាត់ និងត្រូវធ្វើតេស្តនៅក្នុងក្លិបផ្សេងៗពីគ្នាទៀតនៅអេស៉្បាញ ប៉ុន្តែត្រូវបាន COVID-19 រារាំងអ្វីៗទាំងអស់ សម្រាប់ពេលនេះ ប៉ុន្តែរូបគេទើបតែបានធ្វើតេស្តនៅ RCD Mallorca រួចហើយ និងកំពុងរង់ចាំការឆ្លើយតបពីក្លិបខាងលើ។
កាលពីពេលកន្លងទៅនេះ កុមារា Loic Chan វ័យ 15ឆ្នាំ ដែលជាកូនកាត់ខ្មែរ-បារាំង ត្រូវបានក្លិបលីកកំពូលនៅអេស្ប៉ាញ RCD Mallorca ពេញចិត្ត និងកំពុងតែរៀបចំកុងត្រាជាមួយនឹងកីឡាករវ័យក្មេងរូបនេះ។
គួរបញ្ជាក់ដែរថា យុវជន Loïc Chan បច្ចុប្បន្ន កំពុងលេងឱ្យក្លិប Balma SC ក្បែរទីក្រុង Toulouse ជាមួយលីកយុវជន U15 Elite ដោយឪពុករបស់គេ គឺលោក Maurice Chan ដែលជាតួ Stunt(តួសម្ដែងជំនួស) ដ៏ល្បីល្បាញនៅប្រទេសបារាំង៕
កាលពីថ្ងៃទី20មេសា មហាសេដ្ឋីមកពីទីក្រុងសៀងហៃនៃប្រទេសចិន ឈ្មោះ Colin Huang បានក្លាយជាអ្នកដែលរកបានប្រាក់ច្រើនជាងបង្អស់ក្នុងពិភពលោក ជាមួយនឹងទំហំទំទឹកប្រាក់ឡើងដល់2.9ពាន់លានដុល្លារអាមេរិក។
តម្លៃមូលបត្ររបស់ Pinduoduo បានកើនឡើង12.7% ដោយមានតម្លៃ50,11ដុល្លារ/ហ៊ុន នៅលើផ្សារហ៊ុន Nasdaq កាលពីថ្ងៃទី20មេសា បន្ទាប់ពីព័ត៌មានស្ដីអំពីការវិនិយោគទៅលើ Gome ដែលជាផ្សារលក់រាយអនឡាយធំជាងគេបង្អស់មួយនៅប្រទេសចិន ត្រូវបានប្រកាស។ ប្រការនេះបានជួយឱ្យ Colin Huang រកបានប្រាក់ 2.9ពាន់លានដុល្លារបន្ថែមទៀត ដោយប្រើពេលតែ1ថ្ងៃប៉ុណ្ណោះ។
ក្រុមហ៊ុន Gome ដែលមានការិយាល័យកណ្ដាលនៅទីក្រុងប៉េកាំងប្រទេសចិន កាលពីថ្ងៃទី19មេសា បានឱ្យដឹងថា ក្រុមហ៊ុន Pinduoduo នឹងទិញមូលបត្រមួយចំនួនធំ តម្លៃ 200លានដុល្លារពីក្រុមហ៊ុន Gome ដែលមូលបត្រទាំងនេះអាចនឹងត្រូវបានប្ដូរទៅជា 5.6% នៃភាគហ៊ុនរបស់ Gome។ 1ថ្ងៃគត់ បន្ទាប់ពីដំណឹងខាងលើត្រូវបានប្រកាស តម្លៃមូលបត្ររបស់ក្រុមហ៊ុន Gome នៅផ្សារហ៊ុនហុងកុង បានឡើងថ្លៃ16%។
ក្រុមហ៊ុន Pinduoduo ត្រូវបានបង្កើតឡើងកាលពីឆ្នាំ2015 និងបានរីកចម្រើនយ៉ាងខ្លាំងក្លា ហើយក៏បានក្លាយជាអាជីវកម្មលក់រាយនៅលើអនឡាញធំបំផុតមួយនៅប្រទេសចិន ជាមួយនឹងតម្លៃទុនសរុបនាបច្ចុប្បន្ន ឡើងដល់58ពាន់លានដុល្លារអាមេរិក។
យោងតាមទស្សនាវដ្ដី Forbes មហាសេដ្ឋី Huang ដែលបច្ចុប្បន្នមានអាយុ40ឆ្នាំ កំពុងកាន់កាប់ទ្រព្យសម្បត្តិប្រមាណជា26.4ពាន់លានដុល្លារអាមេរិក ជាអ្នកមានជាងគេលំដាប់ទី3នៅប្រទេសចិន(ដីគោក) និងកំពុងឈរលំដាប់លេខរៀងទី35 នៅលើតារាងចំណាត់ថ្នាក់ទូទាំងពិភពលោក។
ប៉ុន្តែ ភាពអស្ចារ្យនេះមិនទាន់ធ្វើឱ្យ Huang អាចលោតរំលងអតីតថៅកែរបស់ខ្លួន គឺលោក Larry Page (សហស្ថាបនិករបស់ Google ដែលមានទ្រព្យ 55.9ពាន់លានដុល្លារ និង Sergey Brin មានទ្រព្យ 53.9ពាន់លានដុល្លារ) នៅឡើយ។ ទោះជាយ៉ាងនេះក្ដី Huang សម្រេចបានពាក់កណ្ដាលផ្លូវហើយ ខណៈបានលោតរំលងអតីតនាយកប្រតិបត្តិរបស់ Google គឺលោក Eric Schmidt ដែលបច្ចុប្បន្នមានទ្រព្យ 14.2ពាន់លានដុល្លារ។
ក្រុមហ៊ុន Gome ត្រូវបានបង្កើតឡើងកាលពីឆ្នាំ1987។ ចាប់ពីឆ្នាំ2007 មកដល់ពេលនេះ តម្លៃមូលបត្ររបស់ក្រុមហ៊ុននេះ បានថយចុះដល់ទៅ95% ធ្វើឱ្យតម្លៃទុនក្នុងទីផ្សារនៅសល់ត្រឹម 2.4ពាន់លានដុល្លារ។ លោក Wong Kwong Yu ដែលជាស្ថាបនិករបស់ Gome បច្ចុប្បន្ន ត្រូវជាប់ពន្ធនាគារក្រោមបទចោទពុករលួយ និងកេងបន្លំក្នុងការរកស៊ី។
ប្រទេសចិន គឺជាប្រភពនៃមហាសេដ្ឋីធំជាងគេលំដាប់ទី2នៅក្នុងពិភពលោក បន្ទាប់ពីសហរដ្ឋអាមេរិក។ បើទោះជាស្ថិតក្នុងស្ថានភាពវិបត្តិសុខភាព ប៉ុន្តែប្រទេសចិននៅតែមានសមាជិកថ្មីម្នាក់ទៀត បានឡើងដល់លំដាប់មហាសេដ្ឋីកំពូលៗរបស់ពិភពលោក៕
ប្រភព៖ Forbes
ក្រសួងអប់រំ យុវជន និងកីឡា ថ្មីៗនេះបានប្រកាសពីកិច្ចសហការជាមួយនឹងអង្គការសិស្សល្អ (Good Learning General Incorporated Association) ក្នុងការសិក្សាតាមប្រព័ន្ធអេឡិចត្រូនិក លើគេហទំព័រ។
កម្មវិធីនេះផ្តល់ជំនួយដល់ការសិក្សារបស់សិស្សថ្នាក់ទី1 ដល់ថ្នាក់ទី6 ដោយស្ថាប័នសំខាន់ៗទាំងពីរខាងលើបានបកប្រែមាតិការអប់រំជាភាសាខ្មែរ ដើម្បីដាក់ឱ្យប្រើប្រាស់នូវការសិក្សាតាមរយៈប្រព័ន្ធអេឡិចត្រូនិក លើគេហទំព័រដែលមានអាសយដ្ឋាន htttp://km.khanacademy.org/ សម្រាប់សិស្សានុសិស្សកម្រិតបឋមសិក្សាលើមុខវិជ្ជាគណិតវិទ្យា ដែលសិស្សអាចសិក្សាបានដោយឥតគិតថ្លៃ។ បើតាមការបញ្ជាប់ពីក្រសួងអប់រំ បានឱ្យដឹងថាគេហទំព័រនេះមានមាតិកាអប់រំ ជាវីដេអូចំនួន 280មេរៀន និងលំហាត់ចំនួន 300វីដេអូ៕
“ស្នេហ៍គ្រាដំបូង” មើលទៅប្រៀបដូចជាក្ដីចងចាំដ៏ល្អមួយក្នុងជីវិត និងគ្រប់ពេលដែលនិយាយអំពីឈ្មោះរបស់បុរស ឬនារីម្នាក់នោះ យើងតែងតែមានអារម្មណ៍រំភើបញាប់ញ័រ និងមានអារម្មណ៍ត្រេកអរយ៉ាងចម្លែក រកថ្លែងមិនត្រូវ…ទោះជាស្នេហ៍គ្រាដំបូង នឹងសមដូចបំណង ឬខកបំណងក៏ដោយ តែ វាក៏ជាបទពិសោធស្នេហាគ្រាដំបូងរបស់ជីវិត ដែលពេញទៅដោយក្ដីរំភើបញាប់ញ័រ និងគួរឱ្យចង់សាកល្បងខ្លាំងណាស់។
ថ្ងៃនេះ អ្នកគ្រូ ឆវី នឹងនាំប្អូនៗទាំងអស់ មកស្គាល់ពីស្នេហ៍គ្រាដំបូងរបស់គូស្នេហ៍ 1គូ ដែលដើរកាន់ដៃគ្នាមករហូត 73ឆ្នាំ…ស្ត្រីម្នាក់នោះគឺ បារ៍បារ៉ា ប៊ូស (Barbara Bush) អតីតស្ត្រីទី1 របស់សហរដ្ឋអាមេរិក ភរិយាលោក ចច អេចឆ៍ ដាបប៊ើលយូ ប៊ូស (George H.W. Bush) អតីតប្រធានាធិបតី ទី41 របស់សហរដ្ឋអាមេរិក ហើយក្រៅពីនោះ កូនប្រុសរបស់គាត់ លោក ចច ដាបប៊ើលយូ ប៊ូស (George W. Bush) ក៏ធ្លាប់ជាអតីតប្រធានាធិបតី ទី43 របស់សហរដ្ឋអាមេរិក ដូចគ្នាដែរ។
សេចក្ដីស្នេហារបស់នាង(បារ៍បារ៉ា) ជាមួយ ចច អេចឆ៍ ដាបប៊ើលយូ ប៊ូស ក៏ជាស្នេហាគ្រាដំបូង និងជាស្នេហាតែមួយគត់រហូតមកដែរ គឺជាស្នេហា ដែលមនុស្សជាច្រើនចង់ឱ្យកើតមានចំពោះខ្លួនឯងដូចគ្នា។ នាង និងគាត់ ជួបគ្នាលើកដំបូង នៅក្នុងពិធីរាំរែកនាពេលរាត្រីមួយ ទោះជានៅលើវេទិកា មានមនុស្សជាច្រើនក្ដី តែអ្នកទាំង2 ក៏បានមកចាប់គូគ្នា…។ ក្នុងគ្រានោះ បារ៍បារ៉ា ទើបតែអាយុបាន 16ឆ្នាំ ឯ ចច អេចឆ៍ ដាបប៊ើលយូ ប៊ូស ក៏ទើបតែ 17ឆ្នាំ។ បន្ទាប់ពីនោះមក រឿងរ៉ាវរបស់គេទាំង2 ក៏ប្រៀបដូចជារឿងល្ខោនយុវវ័យ ហើយទាំង 2នាក់ចាប់ផ្ដើមភ្ជាប់សម្ព័ន្ធស្នេហា ប្រៀបដូចគ្រាប់កាំជ្រួចដែលឆេះភ្លើង ផ្ទុះចេញជាពន្លឺនៃសេចក្ដីស្នេហាដ៏ស្រស់ស្អាត។
តែ ដោយសារតែទាំង 2នាក់រស់នៅឆ្ងាយពីគ្នា ទើបអាចធ្វើបានត្រឹមតែសរសេរសំបុត្រទៅ-មករកគ្នាប៉ុណ្ណោះ…ពួកគេសរសេរសំបុត្រឆ្លើយឆ្លងគ្នាជានិច្ច និងញឹកញាប់បំផុត។
នេះគឺជាសំណេរមួយដែល ចច អេចឆ៍ សរសេរក្នុងសំបុត្រស្នេហាទៅបារ៍បារ៉ា “ខ្ញុំអាចតោងឡើងទៅលើកំពូលដែលខ្ពស់បំផុត តែក៏មិនអាចក្លាយជាស្វាមីរបស់អ្នកបានដែរ ខ្ញុំត្រូវព្យាយាមបង្អោនខ្លួនទៅខាងមុខយ៉ាងប្រញាប់ប្រញាល់ គឺដើម្បីឱ្យស័ក្តិសមធ្វើជាគូនឹងអ្នក”
ចច អេចឆ៍ បានបង្ហាញពីសេចក្ដីស្នេហាដែលមានចំពោះបារ៍បារ៉ាក្នុងគ្រប់ទីកន្លែង គ្រប់ពេលវេលាយ៉ាងជាប់លាប់។ ក្នុងឋានៈជាអតីតអ្នកបើកយន្តហោះទម្លាក់គ្រាប់បែក គាត់បានដាក់ឈ្មោះយន្តហោះទាំង 3គ្រឿងរបស់គាត់ជាឈ្មោះរបស់បារ៍បារ៉ា ទាំងអស់។ ក្រោយពី ចច អេចឆ៍ ត្រូវបែកពីបារ៍បារ៉ា ទៅឆ្ងាយរយៈពេលជាង 4ឆ្នាំ នៅទីបំផុត នៅពេលដែល ចច អេចឆ៍ ត្រឡប់មកពីសមរភូមិវិញ គេសម្រេចចិត្តរៀបការជាមួយនាង។ បារ៍បារ៉ា ជានារី ដែលមានគំនិត និងគោលការណ៍របស់ខ្លួនឯង…ក្រោយពេលរៀបការ នាងក៏ស្ម័គ្រចិត្តបោះបង់ចោលឱកាសរៀនបន្ត…។
ឪពុករបស់បារ៍បារ៉ា ក៏មិនបានមកពាក់ព័ន្ធ ឬធ្វើឱ្យលំបាកអ្វីដែរ តែបានផ្ដល់នូវការណែនាំដ៏សំខាន់ 3យ៉ាង គឺ៖
1.បន្ទាប់ពីមានកូនហើយ ចាំបាច់ត្រូវតែឱ្យកូនបានទទួលការសិក្សារៀនសូត្រឱ្យល្អបំផុត តាមដែលអាចធ្វើបាន។
2.ត្រូវធ្វើជាគំរូដ៏ល្អចំពោះកូនៗ។
3.ត្រូវឱ្យកូនៗ មានអារម្មណ៍ដឹងពីសេចក្ដីស្រឡាញ់ដ៏គ្មានលក្ខខណ្ឌរបស់ឪពុកម្ដាយ ដែលមានចំពោះពួកគេ។
នេះគឺ 3ចំណុចដែលធ្វើឱ្យបារ៍បារ៉ា អាចគ្រប់គ្រងជីវិតអាពាហ៍ពិពាហ៍របស់នាងបានយ៉ាងយូរអង្វែង…។
ក្រោយពេលសង្គ្រាមចប់សព្វគ្រប់ ចច អេចឆ៍ ក៏ចូលរៀននៅមហាវិទ្យាល័យ យេល(Yale University) ទាំង 2នាក់ត្រូវរើផ្ទះជាច្រើនដង ដល់ទៅ 29លើក និងធ្វើដំណើរផ្លាស់ប្ដូរកន្លែងរស់នៅជាង 17ទីក្រុង តែមិនថា ចច អេចឆ៍ នឹងផ្លាស់ទៅនៅទីណា ក្បែរកាយរបស់គាត់ ត្រូវតែមានបារ៍បារ៉ាជានិច្ច។ ក្នុងខណៈដែល ចច អេចឆ៍ កំពុងប្រឹងប្រែងតស៊ូនៅក្រៅផ្ទះ បារ៍បារ៉ា ស្ត្រីដ៏តូចស្ដើង តែងតែធ្វើជាកម្លាំងជំនួយដល់ស្វាមី ដោយទង្វើដ៏ឆ្លាតវៃ និងនឹងធឹងយ៉ាងស្ងាត់ស្ងៀម។
នាងចិញ្ចឹមមើលថែកូន 5នាក់ ហើយគ្រប់គ្នាសុទ្ធតែទទួលបានជោគជ័យក្នុងជីវិតទាំងអស់ តែកូនប្រុសរបស់ពួកគេ គឺ ចច ដាបប៊ើលយូ ប៊ូស គឺជាមនុស្សដែលលេចធ្លោបំផុត ព្រោះគេ ជាអតីតប្រធានាធិបតី ទី43 របស់សហរដ្ឋអាមេរិក។
បារ៍បារ៉ា ទៅតាមស្វាមីទៅគ្រប់ទីកន្លែង…ពីស្ត្រីដែលស្មោះត្រង់បរិសុទ្ធ រ៉ូមែនទិក រហូតក្លាយជាសុភាពនារីទី1 ដែលស្រស់សង្ហា រហូតដល់ក្លាយជាលោកយាយជនជាតិអាមេរិក ដែលមនុស្សជាច្រើននាំគ្នា កោតសរសើរ និងលើកតម្កើង។
ក្នុងថ្ងៃគម្រប់ខួបអាពាហ៍ពិពាហ៍ 72ឆ្នាំរបស់នាង បារ៍បារ៉ាបានផ្ដល់បទសម្ភាសថា “ទោះជាខ្ញុំចាស់ហើយមែន តែខ្ញុំនៅតែស្រឡាញ់បុរសម្នាក់ហ្នឹង ដូចកាលពី 72ឆ្នាំមុនដដែល…ដែលខ្ញុំសម្រេចចិត្តរៀបការជាមួយគាត់ គឺជាសេចក្ដីស្នេហាដែលគ្មានថ្ងៃប្រែប្រួល…គាត់បានប្រគល់ពិភពលោកទាំងមូលមកឱ្យខ្ញុំ”។
នៅក្នុងពិធីលាគ្នាមួយរបស់បារ៍បារ៉ា លោក ចច អេចឆ៍ ដាបប៊ើលយូ ប៊ូស បានបោះពុម្ពសំណេរ1ឃ្លា ដែលធ្វើឱ្យមនុស្សទូទាំងប្រទេសស្រក់ទឹកភ្នែកថា “73ឆ្នាំនៃជីវិតអាពាហ៍ពិពាហ៍ បារ៍បារ៉ា នឹងក្លាយជានារីម្នាក់ដែលខ្ញុំស្រឡាញ់តាំងពីពេលឃើញដំបូង និងរហូតតទៅ…”
***អ្នកគ្រូ ឆវី ចង់និយាយពាក្យ 1ឃ្លាថា “ការរស់នៅក្បែរគ្នា រហូតដល់ចាស់ គឺជាការសារភាពស្នេហាចំពោះគ្នាដ៏ល្អបំផុត” ប្រៀបដូចសេចក្ដីស្នេហារបស់បារ៍បារ៉ា និង ចច អេចឆ៍ ដាបប៊ើលយូ ប៊ូស ដែលអាចទៅកាន់ដៃគ្នាតាំងពីវ័យក្មេង ទៅរហូតដល់ចាស់រៀងៗខ្លួនដូច្នោះដែរ។ ពីក្រដាសសំបុត្រស្នេហាធម្មតាៗ រហូតក្លាយជាជីវិតអាពាហ៍ពិពាហ៍ដែលទទួលបានជោគជ័យ ជាសេចក្ដីស្នេហាដ៏គួរឱ្យច្រណែន ទោះជាទីបំផុតទៅ ភាពចាស់ជរា នឹងធ្វើឱ្យពួកគេត្រូវឃ្លាតចាកពីគ្នាក៏ដោយ តែក្ដីចងចាំដ៏មានសេចក្ដីសុខទាំងនោះ នឹងក្លាយជាអាហារខាងចិត្តវិញ្ញាណដ៏ល្អបំផុតអស់មួយជីវិតរបស់ពួកគេទាំង2។
អ្នកគ្រូ ឆវី សូមលំអោនកាយគោរពដោយចិត្តស្មោះបំផុត ចំពោះសេចក្ដីស្នេហាដ៏ស្មោះស្ម័គ្របំផុតនេះ…៕
ប្រជាកសិករនៅខេត្តកោះកុង ដែលបានដាំដំណាំធុរេន ហាក់បង្ហាញភាពរីករាយនៅពេលប្រមូលផលក្នុងឆ្នាំនេះ ដោយសារតែតម្លៃធុរេនក្នុងស្រុកនាពេលបច្ចុប្បន្នមានតម្លៃល្អជាងឆ្នាំកន្លងទៅ។
កសិករដាំធុរេននៅស្រុកស្រែអំបិល លោក សាយ សាវឿន ក្នុងទឹកមុខញញឹម រាប់ធុរេនបណ្តើររៀបរាប់ប្រាប់អ្នកយកយកព័ត៌មានយើងបណ្តើរថា ធុរេនជាប្រភេទផ្លែឈឺហូបផ្លែមួយប្រភេទដែលប្រជាជនខ្មែរយើង ក៏ដូចជាបណ្តាប្រទេសជិតខាងចូលចិត្ត ព្រោះវាមានក្លិនឈ្ងុយ និងរស់ជាតិឆ្ងាយប្លែកពីដំណាំហូបផ្លែដទៃទៀត។ ដោយសារតែការដាំដំណាំធុរេននេះ លោកបានផ្លាស់ប្តូរជីវភាពពីលំបាកលំបិនកាលពីប៉ុន្មានឆ្នាំមុន មកទទួលបានចំណូលគួរសមគ្រាន់ចិញ្ចឹមជីវិត និងឱ្យកូនបានរៀនសូត្រគ្រប់ៗគ្នានាពេលបច្ចុប្បន្ននេះ។
លោក សាវឿន រៀបរាប់បន្ថែមទៀតថា នៅក្នុងសហគមន៍របស់លោក មានអ្នកដាំធុរេនប្រហែល 40% ទៅ 50% ដោយសារតែស្ថានភាពដីនៅតំបន់នេះអំណោយផលជាមួយដំណាំធុរេន និងម្យ៉ាងវាជាប្រភេទផ្លែឈើដែលមានទីផ្សារ និងតម្លៃល្អផងដែរ។ សម្រាប់គ្រួសារលោក គឺមានដីប្រមាណ កន្លះហិកតា ដែលគាត់បានវាស់វែងដាំបាន 20ដើម ដោយទុកចន្លោះពីមួយដើម ទៅមួយដើមចម្ងាយ 10ម៉ែត្រ។ ចំពោះតម្លៃកូនធុរេនវិញ ក្នុងមួយដើមតម្លៃប្រហែលជា 2,5000រៀល ហើយសម្រាប់ទំហំដីរបស់លោកគឺត្រូវចំណាយអស់ប្រហែល 50ម៉ឺនរៀល។
បន្ទាប់ពីដាក់ដាំ និងមើលថែទាំយ៉ាងយកចិត្តទុកដាក់ រយៈពេលប្រមាណជា 6 ទៅ7ឆ្នាំ ទើបកសិករអាចប្រមូលផលមកវិញបាន ដោយក្នុងមួយដើមនៅឆ្នាំនេះកសិករដាំធុរេនអាចរកបានកម្រៃពី 500$ ទៅ 700$។ បើគិតតម្លៃរាយវិញ ក្នុងមួយគីឡូក្រាម កសិករអាចលក់ជូនអតិថិជនក្នុងតម្លៃ 3,5000រៀល។
ចំពោះវិធីមើលថែទាំធុរេនវិញ កសិករខាងលើបានបញ្ជាក់ថា ដំណាំប្រភេទនេះថ្វីត្បិតតែមានតម្លៃខ្ពស់ និងទីផ្សារល្អ តែការមើលថែទាំក៏ត្រូវយកចិត្តទុកដាក់ខ្លាំងដែរ។ ចំណុចសំខាន់ដែលកសិករដាំធុរេនត្រូវតែដឹងគឺរក្សាសំណើមដីឱ្យបានល្អ ដោយចាំបាច់ត្រូវតែបូបទឹកស្រោយចដីឱ្យបានយ៉ាងហោចណាស់ 2ដងក្នុងមួយសប្តាហ៍ដើម្បីកុំឱ្យដីស្ងួត។ បន្ទាប់មកទៀតត្រូវប្រុងប្រយ័ត្នជាមួយនឹងជំងឺនានាដែលអាចធ្វើឱ្យធុរេនចេញទឹករលួយឬស និងគល់របស់វា។ ក្រៅពីនេះ មានរឿងលំបាកផ្សេងមួយទៀតគឺ រយៈពេលប្រហែលជា 10ឆ្នាំ ដំណាំធុរេននឹងចាប់ផ្តើមមានរោគច្រើន ដោយដើមខ្លះមានរោគព្យាបាលមិនកើត ក៏ងាប់ទៅវិញក៏មាន៕
តើអ្នកដែលគិតដែរឬទេថា ចង់បានគូជីវិតជាមនុស្សបែបណា? និងនាពេលអនាគត តើជីវិតគូរបស់លោកអ្នកនឹងក្លាយជាយ៉ាងណា?
តើអ្នកចង់មានមនុស្សម្នាក់ ដែលត្រៀមខ្លួនជាស្រេចក្នុងការស់នៅក្បែរគ្នា ទៅរហូតដល់ចាស់ជរារៀងៗខ្លួន ដូចលោកតា និងលោកយាយ 2នាក់នេះដែរឬទេ?
គឺជាទិដ្ឋភាពដ៏សែនរំភើបចិត្ត ដែលចៃដន្យ មានមនុស្សធ្វើដំណើរឆ្លងកាត់មកឃើញ នៅក្នុងកន្លែងចតឡានរបស់ហាងលក់អៃស្គ្រីមមួយ នៅក្នុងទីក្រុង Nashville រដ្ឋ Tennessee សហរដ្ឋអាមេរិក។ គឺជារូបភាពដែលលោកតាម្នាក់ កំពុងអង្គុយបញ្ចុកអៃស្គ្រីមឱ្យលោកយាយញ៉ាំ ក្នុងថ្ងៃដែលធាតុអាកាសកំពុងក្ដៅហប់…គឺជាទិដ្ឋភាពមួយ ដែលធ្វើឱ្យមនុស្សជាច្រើន ដល់ថ្នាក់រលីងរលោងទឹកភ្នែកទាំងមិនដឹងខ្លួន។
បព្វជិត 1រូប ឈ្មោះ Brent Kelly បានរៀបរាប់ថា ថ្ងៃនោះ លោកបាននាំក្មេងៗទៅហែលទឹក និងនៅតាមផ្លូវត្រឡប់មកផ្ទះវិញ លោកបានឆៀងចូលទិញអៃស្គ្រីម ឱ្យក្មេងៗញ៉ាំ ហើយខ្សែភ្នែក ក៏ចៃដន្យក្រឡេកទៅឃើញ លោកតាម្នាក់អាយុប្រហែលជា 80ជាង កំពុងអង្គុយនៅលើគែមទ្វារឡាន…។
រួចហើយ នៅពេលលោកសម្លឹងមើលទៅក្នុងឡាននោះ ក៏បានដឹងថា នៅខាងក្នុង មានលោកយាយម្នាក់ ដែលគួរតែមានអាយុប្រហាក់ប្រហែលនឹងលោកតាដែរ អង្គុយនៅលើកៅអី កំពុងញ៉ាំអៃស្គ្រីមដែលលោកតាបញ្ចុក ក្នុងថ្ងៃដ៏សែនក្ដៅហប់ ដែលមានសីតុណ្ហភាពខ្ពស់ដល់ទៅ 37អង្សាC។ ទិដ្ឋភាពដែលបានឃើញ ធ្វើឱ្យលោកមានអារម្មណ៍រំភើបចិត្តយ៉ាងខ្លាំង រកថ្លែងមិនរួច រហូតដល់អត់មិនបាន ក្នុងការថតរូប និងស៊ែររឿងរ៉ាវរបស់លោកតា និងលោកយាយ 2នាក់នេះ នៅលើបណ្ដាញសង្គម ព្រមជាមួយ Caption ថា “នេះគឺការបង្ហាញពីសេចក្ដីស្រឡាញ់ដែលស្រស់ស្អាតជាទីបំផុត”។
រូបភាពនេះ បានទទួលការចាប់អារម្មណ៍នៅលើបណ្ដាញសង្គមយ៉ាងខ្លាំង និងមានអ្នកចូលមកសម្ដែងគំនិតយោបល់ផ្សេងៗគ្នាយ៉ាងច្រើន ដូចជា៖ “ឃើញហើយ នៅសុខៗ ស្រាប់តែខ្ញុំរលីងរលោងទឹកភ្នែក”, “នេះហើយ គឺសេចក្ដីស្រឡាញ់ដ៏ពិតប្រាកដ”, “លោកយាយនៅតែជាកូនក្រមុំដែលស្រស់ស្អាតបំផុតសម្រាប់លោកតាជានិច្ច”, “ខ្ញុំឃើញហើយ ខ្ញុំនឹកច្រណែនលោកយាយខ្លាំងណាស់ ដែលបានគូជីវិតដ៏ល្អបែបនេះ”…។
នេះគឺជាផ្នែកមួយ ដែលបង្ហាញឱ្យឃើញពីភាពស្រស់ស្អាតមួយផ្នែកទៀតរបស់សេចក្ដីស្រឡាញ់…មនុស្សជាច្រើនតែងនិយាយថា វាមិនមែនជារឿងងាយឡើយ ក្នុងការជួបនឹងស្នេហាពិត…អ្នកខ្លះត្រូវបរាជ័យ និងខកបំណងជាមួយសេចក្ដីស្នេហា មិនដឹងជាប៉ុន្មានដង ទល់ប៉ុន្មានដងទេ រហូតដល់ថ្នាក់ ខ្លាចក្នុងការមានស្នេហាតែម្ដង ក៏មាន…។
សេចក្ដីស្រឡាញ់ គឺជារឿងដែលស្រស់ស្អាតជានិច្ច អ្នកដែលមិនសមបំណងជាមួយសេចក្ដីស្នេហា សូមឱ្យអ្នកកុំអាលរួញរា និងអស់សង្ឃឹម…ចូរជឿចុះថា ថ្ងៃណាមួយ នឹងមានមនុស្សដែលស័ក្តិសម និងជាគូពិតប្រាកដសម្រាប់អ្នកមិនខាន ចំណែកអ្នកដែលកំពុងមានគូស្នេហ៍ស្រាប់ហើយ ចូរមើលថែទាំ និងរក្សាគ្នាឱ្យបានល្អ កុំឱ្យគេត្រូវខូចចិត្ត និងសោកស្ដាយដែលគេខំជ្រើសរើសយកអ្នកមកធ្វើជាគូជីវិត…។
អ្នកគ្រូ ឆវី សូមជូនពរឱ្យអ្នកទាំងអស់គ្នា រួចផុតពីមេរោគកូវីដ-19 ដ៏ចង្រៃ និងមានសុភមង្គលក្នុងជីវិតគូ រហូតតទៅ៕
រោងចក្រ Dongfeng Honda ត្រូវបានគេដឹងថា គឺជារោងចក្រ ដែលរួមបង្កើតដោយ Dongfeng Motor Group និង Honda Motor Company) ដែលមានមូលដ្ឋាននៅក្នុងទីក្រុងវូហាន ប្រទេសចិន បានបើកដំណើរការឡើងវិញហើយ ដោយមានការត្រួតពិនិត្យយ៉ាងហ្មត់ចត់ដើម្បីទប់ស្កាត់ កុំឱ្យមានការផ្ទុះជំងឺកូវីដ-19ជាលើកទី2។
សេចក្ដីរាយការណ៍ក៏បានឱ្យដឹងដែរថា បុគ្គលិកដែលចូលធ្វើការវិញ គឺត្រូវមានពាក់ស្រោមដៃ និងពាក់ម៉ាស់ទាំងអស់គ្នា ហើយនៅក្នុងរោងចក្រមានបិទប្រកាសព័ត៌មានប្រាប់ឱ្យបុគ្គលិកស្ថិតនៅឆ្ងាយពីគ្នាចម្ងាយ 1ម៉ែត្រផងដែរ។
បុគ្គលិកដែលវិលត្រឡប់ចូលធ្វើការវិញ ត្រូវបានសាកសួរ និងត្រូវរាយការណ៍ប្រាប់ថា ចាប់តាំងពីការផ្ទុះជំងឺកូវីដ-19មក តើពួកគេបានទៅកាន់ទីណាខ្លះ? និងមានការដំឡើងទីតាំងសម្រាប់វាស់កម្ដៅទៀតផង។ នេះបើតាមការលើកឡើងរបស់ជំនួយការអ្នកចាត់ការនៅរោងចក្រឈ្មោះ Li Shiquan។
ក្នុង 1ថ្ងៃ បុគ្គលិកនីមួយៗត្រូវបំពេញពាក្យដែលមានសំណួរអំពីស្ថានភាពសុខភាព ដូចជាតើមានក្អក ឬមានបានប៉ះពាល់ជាមួយអ្នកដែលមានបញ្ហាសុខភាពដែរឬអត់? ដោយម្នាក់ៗអាចបំពេញពាក្យតាមរយៈការស្គែន QR Code ជាមួយទូរស័ព្ទដៃ ហើយតាមការលើកឡើងរបស់លោក Li បានឱ្យដឹងថា ចាប់តាំងពីបន្តដំណើរការឡើងវិញមក គឺមិនមានកើតមាននូវករណីជំងឺកូវីដ-19នោះទេ នៅរោងចក្ររបស់លោក៕
ក្តារចុច MIIIW Air 85 មានរូបរាងទាក់ទាញគួរឱ្យស្រលាញ់ មានកម្រាស់ស្តើង ហើយលើគ្រាប់ប៊ូតុងនៃ Key នីមួយៗ រចនាជារាងរង្វង់ទៀតផង។
ក្តារចុចនេះ ត្រូវបាន MIIIW ដែលជាក្រុមហ៊ុនកុលសម្ព័ន្ធរបស់ Xiaomi បានចេញផ្សាយនូវ Keyboard ឥតខ្សែម៉ូដែល MIIIW Air 85។ មូលហេតុប្រើលេខ 85ពីខាងក្រោយ គឺតំណាងឱ្យក្តារចុចដែលមាន Keys ចំនួន 85 ដោយមិនមានខ្វះ សូម្បី Keys មួយណា។
វាអាចតភ្ជាប់ទៅកាន់ឧបករណ៍2 ក្នុងពេលតែមួយ តាមរយៈប្រព័ន្ធ Bluetooth ឬតភ្ជាប់បែប Wireless។ គាំទ្រទាំងការភ្ជាប់ទៅកាន់ឧបករណ៍ Windows, Android, iOS និង macOS ពោលគឺ អាចប្រើទាំងលើស្មាតហ្វូន ថេប្លិត ឬកុំព្យូទ័រ ដែលលើក្តារចុចមានប៊ូតុងមួយអនុញ្ញាតឱ្យអ្នកងាយស្រួលក្នុងការផ្លាស់ប្ដូរឧបករណ៍។
ចំពោះតម្លៃរបស់ Keyboard MIIIW Air 85 នេះគឺ 159យន់ ឬប្រមាណ 22ដុល្លារ និងមានលក់ហើយនៅលើគេហទំព័រ Xioami YouPin៕
ក្រុមហ៊ុន Facebook បានសម្រេចដាក់ឱ្យប្រើប្រាស់ជាផ្លូវការនូវកម្មវិធី Gaming សម្រាប់ប្រព័ន្ធ Android ដែលកម្មវិធីនេះបានចេញផ្សាយមុនកាលកំណត់ដែល ដំបូងឡើយ Facebook គ្រោងចេញនៅខែមិថុនា។
កម្មវិធីនេះផ្តល់ភាពងាយស្រួលសម្រាប់អ្នកនិយមទស្សនា ឬចូលចិត្តលេងហ្គេមតូចៗនៅលើ Facebook ដែលអាចបើកបានឆាប់រហ័ស និងមិនស្មុគស្មាញក្នុងការស្វែងរកដូចមុន ដោយប្រើប្រាស់ App ដាច់ដោយឡែកពីកម្មវិធីមេតែម្តង។
The New York Times បានចេញផ្សាយថា ដោយមើលឃើញពីតួលេខកើនឡើងយ៉ាងលឿននៃអ្នកលេងហ្គេម ដែលមានដល់ 700លាននាក់ក្នុងចំណោម 2.5ពាន់លាននាក់នៃអ្នកប្រើប្រាស់សរុប ទើប Facebook សម្រេចបោះទុនធំ លើការវិនិយោគបង្កើត App នេះឡើងយ៉ាងឆាប់រហ័សបែបនេះ ណាមួយគឺដើម្បីសម្របទៅនឹងស្ថានភាព COVID-19 ដែលមនុស្សជាច្រើនកំពុងសម្ងំនៅផ្ទះផង។ ឥឡូវមានសម្រាប់តែ Android Version ប៉ុណ្ណោះ ដោយសម្រាប់ឧបករណ៍ iOS នឹងត្រូវបានចេញផ្សាយនាពេលឆាប់ៗខាងមុខនេះ៕