Category: សង្គម និងសេដ្ឋកិច្ច

ក្រុមហ៊ុន Xiaomi ផលិតស្មាតហ្វូន 5G តម្លៃធូរថ្លៃជាងគេបំផុត តែ 285ដុល្លារ
ក្រុមហ៊ុន Xiaomi បានផលិតចេញនូវស្មាតហ្វូនម៉ូដែល Redmi K30 (5G) ដែលមានបំពាក់នូវប្រព័ន្ធ 5G តែតម្លៃត្រឹមតែ 285ដុល្លារប៉ុណ្ណោះ (ឬ 1999 យន់) ដែលនេះជាតម្លៃលក់រាយនៅប្រទេសចិន និងបានចេញលក់កាលពីខែមករាកន្លងមក។
Redmi K30 បានចេញលក់លើទីផ្សារហើយ តម្លៃនេះអាចជាប់ក្នុងបញ្ជីស្មាតហ្វូន 5G ដែលមានតម្លៃធូរថ្លៃជាងគេបំផុតមួយ នាពេលបច្ចុប្បន្ន។
ចំពោះលក្ខណសម្បតិ្តរបស់ K30 នេះវិញ គឺបំពាក់កាមេរ៉ាក្រោយ 4គ្រាប់ ប្រើបន្ទះឈីប Snapdragon 765G មាន 5G, មានថ្មទំហំ 4500 mAh, តែប្រើអេក្រង់រាងអន់បន្តិចគឺ LCD ដែលមាន Refresh Rate 120Hz។
មួយវិញទៀត ក្រុមហ៊ុនក៏គ្រោងនឹងបញ្ចេញ ស្មាតហ្វូនម៉ូដែល Redmi K30i ជាសិស្សប្អូនចេញមកមួយទៀត ហើយដាក់តម្លៃកាន់តែទាបជាងសិស្សបងផងដែរ។ បើសិន Redmi K30i អាចចេញលក់នោះ គេរំពឹងថា នឹងលក់រាយក្នុងតម្លៃត្រឹមតែ 255ដុល្លារប៉ុណ្ណោះ(1799 យន)។ បើដូចនេះ កំណត់ត្រាថ្មី នឹងអាចធ្វើឱ្យវាក្លាយជាទូរស័ព្ទ 5G ដែលមានតម្លៃធូរថ្លៃជាងគេបំផុត ប្រចាំឆ្នាំ2020នេះ៕
April 29, 2020
មិនធម្មតាទេ! កម្មវិធីប្រជុំតាមអនឡាញ Zoom មានអ្នកប្រើជាង 300លាននាក់កើនឡើង 50%
Zoom បានក្លាយជាកម្មវិធីពេញនិយមបំផុតមួយ ដោយអាចស្ថិតនៅលើតំណែងកំពូល ទាំងនៅលើ Apple App Store និង Google Play Store កាលពីខែមីនា។ អ្នកប្រើប្រាស់កម្មវិធីប្រជុំ Zoom បានកើនឡើងដល់ចំនួនជាង 300លាននាក់ គិតជាភាគរយគឺ 50% បើធៀបនឹងចំនួនអ្នកប្រើប្រចាំថ្ងៃដែលមាន 200លាននាក់កាលពីដើមខែកុម្ភៈកន្លងទៅ។
ស្របពេលជាមួយគ្នានេះដែរ Zoom ក៏ត្រូវបានគេរាយការណ៍ពីរឿងសុវត្ថិភាព នៃភាពជាឯកជនរបស់អ្នកប្រើប្រាស់។ គេបានរកឃើញមានចន្លោះប្រហោង ដែលអាចឱ្យ Hacker អាចចូលរំខានការប្រជុំណាមួយបានយ៉ាងងាយ ហើយថែមទាំងអាចលួចយកព័ត៌មានបានយ៉ាងងាយទៀតផង។
តែយ៉ាងណាមិញ Version ថ្មីនេះ បានបញ្ចេញមក ដើម្បីអាប់ឌែតជូនលើកង្វះខាតដែលគេរាយការណ៍កន្លងមកនោះ។
រំឭកផងដែរថា ដោយសារតែវីរុសកូវីដ-19 បានតម្រូវឱ្យរដ្ឋអំណាចនៃប្រទេសនីមួយៗអនុវត្តវិធានការគម្លាតសុវត្ថិភាព និងការតម្រូវឱ្យមនុស្សរាល់គ្នាស្ថិតនៅក្នុងផ្ទះ តាមតែអាចធ្វើទៅបាន ទើបបានជាគេណែនាំឱ្យងាកមកប្រើប្រាស់កម្មវិធីប្រជុំតាមអនឡាញ ដើម្បីអាចបន្តធ្វើកិច្ចការងារជាក្រុម និងភ្ជាប់ទំនាក់ទំនងជាមួយមិត្តភក្ដិ ក៏ដូចជាក្រុមគ្រួសារបាន។ ហេតុដូចនេះ Zooom ក៏បានល្បី និងកើបលុយបានមួយរំពេច៕
April 29, 2020
បើមានដីតូច មិនដឹងដាំអ្វី គួរសាកល្បងដំណាំត្រប់ស្រួយ ព្រោះងាយថែទាំ និងឆាប់បានផល
ការធ្វើ ប្រហុក ផ្អក និងសម្លខ្មែរ មួយចំនួនមិនអាចអវត្តមានត្រប់ស្រួយបាននោះទេ ព្រោះបន្លែប្រភេទនេះភាគច្រើនត្រូវបានប្រជាជនយើងស្គាល់ និងចេះទទួលទានតាំងពីតូចរហូតដល់ធំ។
ត្រប់ស្រួយជាបន្លែមួយប្រភេទដែលមានរសជាតិឆ្ងាញ់ និងអំណោយផលល្អសម្រាប់សុខភាព ព្រោះវាមានវីតាមីន និងជួយឱ្យរាងកាយមានតុល្យភាពល្អ។ បន្លែប្រភេទនេះភាគច្រើនមានស្ទើរតែគ្រប់ផ្ទះនៅតំបន់ជនបទ តែសម្រាប់អ្នកទីក្រុងវិញ ដោយសារតែមិនសូវសំបូរដីដាំ និងដោយសារតែភាពសំបូរបែបនៃបន្លែ ដែលជាពិសេសបន្លែនាំចូលច្រើននៅក្នុងទីផ្សារ ទើបធ្វើឱ្យមិនសូវមានអ្នកនិយមដាំ។
នៅថ្ងៃនេះ ឡារ៉ែន សូមណែនាំលោកអ្នកឱ្យសាកល្បងដាំដំណាំត្រប់ស្រួយនេះនៅតាមគេហដ្ឋាន ព្រោះស្ថិតក្នុងស្ថានភាពដែលប្រទេសយើងកំពុងប្រឈមជាមួយនឹងការប្រយុទ្ធប្រឆាំងមេរោគ Covid-19នេះ ការនាំចូលបន្លែមិនសូវងាយស្រួលដូចពីមុននោះទេ ហើយវាក៏ជាពេលវេលាល្អផងដែរក្នុងការចាប់ផ្តើមដាំដុះដោយខ្លួនឯង ដើម្បីទទួលបានបន្លែធម្មជាតិគ្មានជាតិគីមី។
តាមកសិករដែលមានបទពិសោធន៍ដាំដំណាំត្រប់ស្រួយជាច្រើនឆ្នាំនៅខេត្តកំពង់ចាម លោក សុខខេង បានប្រាប់ឡារ៉ែនថា លោកបានដាំត្រប់ស្រួយលើដីប្រមាណ 2ហិកតា ដែលអាចប្រមូលផលបានចន្លោះពី 300 ទៅ 400គីឡូក្រាមក្នុងមួយខែ បើគិតជាប្រាក់គឺអាចទទួលបានប្រហែលពី 7 ទៅ 8លានរៀល។
វិធីសាស្ត្រដាំ ដំបូងឡើយយើងត្រូវសម្រាំងយកគ្រាប់ពូជណាដែលសុទ្ធល្អដើម្បីដាំ ព្រោះកាលណាពូជសុទ្ធយើងនឹងទទួលបានផលល្អ ហើយក៏ងាយលក់ទៅទីផ្សារដែរ។ បន្ទាប់មកទៀតយើងត្រូវយកគ្រាប់នោះមកត្រាំទឹកប្រហែលជា 2ម៉ោង ទើបចងវេចខ្ចប់ដើម្បីយកមកត្រាំផ្អាប់ក្នុងទឹកត្រជាក់ ឬទឹកកកប្រមាណ 3 ទៅ4ថ្ងៃបន្ថែមទៀត ដើម្បីតាមដានឱ្យដឹងថាគ្រាប់ណាខ្លះដុះ និងគ្រាប់ណាខ្លះមិនដុះ។
បន្ទាប់ពីរៀបចំតាមលំដាប់លំដោយរួចរាល់ហើយ យើងត្រូវជ្រើសរើសយកគ្រាប់ដែលមានពន្លកមកដាំលើដីដែលបានរៀបចំតាមបច្ចេកទេស ដោយដីត្រូវឆូតជារងទាបៗដែលមានទទឹងប្រហែលជាងកន្លះម៉ែត្រ និងគ្របកៅស៊ូដែលចោះប្រហោងរួចជាស្រេចដើម្បីការពារមេរោគពីខាងក្រៅ។ ចំពោះការដាំគឺត្រូវដាក់កូនត្រប់ឃ្លាតពីគ្នាប្រវែង 1ម៉ែត្រពីគ្នា ដើម្បីឱ្យវាមានទីលានដើម្បីលូតលាស់មិនប៉ះគ្នា។ បន្ទាប់មកទៀតយើងគ្រាន់តែមើលថែទាំស្រោចទឹក និងដាក់ជីធម្មជាតិវានឹងរីកលូតលាស់រហូតចេញផ្លែ។ ក្រោយពេលត្រប់ចេញផ្លែ យើងអាចប្រមូលផលបានរហូតដល់ទៅ 3ខែ ដោយរយៈពេលមួយអាទិត្យយើងអាចបេះវាបានពី 2 ទៅ 3ដង ទៅតាមស្ថានភាពដើមនីមួយៗដែលមានផ្លែតិច ឬច្រើនតែប៉ុណ្ណោះ។ សម្រាប់អ្នកនៅទីក្រុង អាចសាកល្បងដាំក្នុងផើង ឬនៅទីតាំងសមរម្យណាមួយមុខផ្ទះក៏អាចទទួលបានផលគួរសមសម្រាប់ទទួលទានដោយសុវត្ថិភាព៕

April 29, 2020
វេសឡាញ បញ្ចុះតម្លៃសិក្សា 30% ដើម្បីសម្រាលបន្ទុកដល់អាណាព្យាបាល និងបង្កើនគុណភាពសិក្សាអនឡាញ
ក្នុងដំណាក់កាលដែលពិភពលោកកំពុងប្រយុទ្ធប្រឆាំងជាមួយនឹងជំងឺ Covid-19 នេះ គ្រប់ប្រទេសទាំងអស់សុទ្ធតែឆ្លងកាត់ការលំបាកទាំងអស់ ជាពិសេសបញ្ហាហិរញ្ញវត្ថុ ដោយក្នុងនោះកម្ពុជាក៏ត្រូវជួបប្រទះបញ្ហាប្រឈមជាច្រើនផងដែរ។ ដើម្បីសម្រាលបន្ទុកដល់អាណាព្យាបាល វេសឡាញនឹងបញ្ចុះតម្លៃសិក្សា ៣០% សម្រាប់វគ្គសិក្សាថ្មីថ្ងៃទី១១ ខែឧសភាសខាងមុខនេះ និងបង្កើនគុណភាពសិក្សាអនឡាញ ។
លោក ប៉ិច បូឡែន អគ្គនាយកក្រុមហ៊ុន វេសឡាញ អេឌ្យូខេសិនគ្រុប បានលើកឡើងថា ក្នុងស្ថានភាពប្រយុទ្ធប្រឆាំងនឹងជំងឺ Covid-19 នេះ ប្រជាពលរដ្ឋគ្រប់គ្នាសុទ្ធតែទទួលរងនូវផលប៉ះពាល់សេដ្ឋកិច្ច ដោយក្នុងនោះរួមទាំងបុគ្គលិក គ្រូបង្រៀន និងអ្នកអាណាព្យាបាលសិស្សផងដែរ។ យើងទាំងអស់គ្នាសុទ្ធតែមានក្រុមគ្រួសារ និងកាតព្វកិច្ចចំណាយត្រូវរ៉ាប់រង ចំណែកឯសាលារៀនក៏ត្រូវប្រើប្រាស់ថ្លៃសិក្សាសិស្សដែលនៅសល់ និងកម្ចីបន្ថែមពីធនាគារសម្រាប់រ៉ាប់រងចំណាយបៀវត្សគ្រូ បុគ្គលិកសិក្សា ការវិនិយោគ និងការចំណាយលើការផលិតមេរៀនអនឡាញជាដើម។ បន្ថែមពីលើនេះយើងក៏ត្រូវការចំណាយលើការទិញឧបករណ៍សម្រាប់ថត និងផ្សាយខ្លឹមសារមេរៀន ការចំណាយថ្លៃអគារ ថ្លៃភ្លើង ចំណាយរដ្ឋបាលបន្ទាប់បន្សំ និងការប្រាក់ធនាគារផងដែរ។ វាជាស្ថានភាពលំបាកទាំងអស់គ្នាដែលត្រូវការការសហការ ការយល់ពីគ្នាទៅវិញទៅមកខ្ពស់ដើម្បីយើងអាចឆ្លងផុតវិបត្តិនេះទាំងអស់គ្នា ជាពិសេសគឺដើម្បីបន្តធានាគុណភាព និងស្ថិរភាពសិក្សារបស់សិស្សទាំងអស់គ្នា។
លោក ប៉ិច បូឡែន បាននិយាយថា៖ «ក្នុងស្ថានភាពលំបាកនេះ យើងពិតជាត្រូវជួយគ្នាខ្លាំងណាស់។ សាលារៀនបានសម្រេចចិត្តលែងគិតប្រាក់ចំណេញអំឡុងពេលលំបាកនេះ ដោយយើងបានកាត់បន្ថយចំណាយដែលមិនចាំបាច់ទាំងអស់ ទុកតែចំណាយថែទាំអគារតិចតួច និងចំណាយសម្រាប់បង្រៀនអនឡាញប៉ុនណោះ។ ក្នុងដំណាក់កាលលំបាកនេះ យើងបានសុំការបញ្ចុះថ្លៃជួលទីតាំងខ្លះ ហើយបុគ្គលិកគ្រូបង្រៀនទាំងអស់ក៏ត្រូវបានសុំការយោគយល់បន្ថយបៀវត្សន៍ និងប្រាក់ឈ្នួលប្រចាំខែផងដែរ។ សាលារៀន និងបុគ្គលិកធ្វើបែបនេះក្នុងគោលបំណងធំមួយគឺអាចមានលទ្ធភាពបញ្ចុះតម្លៃ 30% ដើម្បីជួយសម្រួលបន្ទុកចំណាយជូនសិស្សានុសិស្ស និងអាណាព្យាបាលទាំងអស់ក្នុងស្ថានភាពលំបាកនេះ ជាពិសេសគឺការលៃលក និងប្រឹងប្រែងបន្តបង្រៀនសិស្សជាទីស្រឡាញ់របស់យើងក្នុងកម្រិតគុណភាពខ្ពស់មួយក្នុងស្ថានភាព Covid-19 នេះ»។
អ្នកដឹកនាំគ្រឹះស្ថានអប់រំខាងលើបានបញ្ជាក់បន្ថែមទៀតថា ទោះជាស្ថិតក្នុងស្ថានភាពបែបណាក៏ដោយ យើងនៅតែគិតគូរពីគុណតម្លៃ និងគុណភាពសិក្សាសម្រាប់សិស្សានុសិស្សរបស់យើង។ ចំណូលដែលនៅសេសសល់ប៉ុន្មាន គឺយើងព្យាយាមធ្វើយ៉ាងណា ដើម្បីឱ្យចំណាយទទួលបានគុណភាពខ្ពស់បំផុត ដោយយើងលើកទឹកចិត្តគ្រូបង្រៀនដែលក្រាញននាលលើសមរភូមិបង្រៀនអនឡាញនេះប្រកបដោយការយកចិត្តទុកដាក់។ នៅក្នុងស្ថានភាពនេះ មនុស្សជាច្រើនយល់ថាការងាររបស់គ្រូបង្រៀន និងបុគ្គលិកប្រហែលជាមានតិចជាងមុន តែស្ថានភាពជាក់ស្តែងគឺគ្រូបង្រៀន និងបុគ្គលិកត្រូវធ្វើការច្រើនជាងមុន ព្រោះគាត់ត្រូវស្រាវជ្រាវឯកសារផង ថតមេរៀនជាវីដេអូផង ឆ្លើយសំណួរសិស្ស និងអ្នកអាណាព្យាបាលសិស្សគ្រប់ពេលផង និងត្រូវព្យាយាមបង្រៀនច្រើនលើកច្រើនសារទៅតាមក្រុមតូចៗ និងបត់បែនទៅតាមពេលវេលាទំនេររបស់សិស្ស និងអ្នកអាណាព្យាបាលផង។ ពួកគាត់ត្រូវធ្វើការងារទាំងព្រឹក រសៀល ល្ងាច និងចុងសប្តាហ៍ ដោយទទួលបានប្រាក់កម្រៃមធ្យម សម្រាប់ទ្រទ្រង់ជីវភាពក្រុមគ្រួសារ និងកាតព្វកិច្ចហិរញ្ញវត្ថុជាច្រើនផ្សេងទៀត។ ហេតុនេះហើយទើបយើងពិតជាមិនអាចបន្ទាបតម្លៃបន្ថែមទៀតបាននោះទេ ព្រោះវាអាចនឹងប៉ះពាល់បន្តគ្នាទៅដល់បៀវត្ស ប្រាក់ឈ្នួល និងជីវភាពរបស់គ្រូបង្រៀន និងបុគ្គលិកដែលគាត់ខិតខំប្រឹងប្រែងបង្រៀនកូនៗរបស់យើងទាំងអស់គ្នា។
លោកបានបញ្ជាក់ផងដែរថា សាលារៀន គណនាយក បុគ្គលិក គ្រូបង្រៀនរបស់យើងបានខិតខំប្រឹងប្រែងបន្តគិត និងព្យាយាមឱ្យអស់ពីលទ្ធភាព សមត្ថភាព និងធនធានដែលមាននៅសល់ទាំងប៉ុន្មាន ដើម្បីបន្តបង្រៀនតាមអនឡាញជូនកូនៗរបស់យើង។ ក្នុងដំណាក់កាលនេះសាលាបានធ្វើសកម្មភាពជាច្រើនដើម្បីរៀចចំបន្ថែមជូនសិស្ស និងអ្នកអាណាព្យាបាលទាំងអស់ដោយយើងបានផលិតវីដេអូបង្រៀនប្រមាណជាង 1,500បន្ថែមទៀតសម្រាប់បង្រៀនសិស្ស។ ក្រៅពីនេះក៏មានផ្តល់ជូននូវវេទិកាសិក្សាអនឡាញថ្មីមួយចាប់ពីខែឧសភាតទៅ សម្រាប់សិស្សរៀនតាមវីដេអូ មើលមេរៀន និងប្រឡងអនឡាញជាដើម។ យើងក៏បានដាក់ឱ្យដំណើរការប្រព័ន្ធគ្រប់គ្រងទំនាក់ទំនងសាលារៀននៅចុងខែឧសភា ឆ្នាំ2020នេះ។ លើសពីនេះទៅទៀត យើងបានបង្កើនកម្មវិធីអប់រំតាមទូរទស្សន៍អនឡាញ ដោយមានកម្មវិធីអប់រំ ប្រឹក្សាយោបល់ និងកម្សាន្តជាច្រើនសម្រាប់សិស្សានុសិស្សរបស់យើងដែលកំពុងនៅផ្ទះផងដែរ។ ទន្ទឹមនឹងនេះដែរ វេសឡាញបានដាក់ឱ្យដំណើរការកម្មវិធីបង្រៀនដោយមានកាលវិភាគសិក្សា ម៉ោងចូល ម៉ោងចេញ ការតាមដានវត្តមាន និងស្រង់ពិន្ទុជាក់លាក់កដូចជាការរៀននៅក្នុងសាលាដែរ ដើម្បីធានាពីគុណភាពក្នុងការអប់រំ។ យើងក៏បានរៀបចំកញ្ចប់សម្ភារសិក្សា និងឧបករណ៍កម្សាន្តបែបអប់រំជូនកុមារតូច និងផ្តល់ជូននូវកម្មវិធីបណ្តុះបណ្តាល និងពិគ្រោះយោបល់ការងារ និងអាជីវកម្មជូនអ្នកអាណាព្យាបាលដោយឥតគិតថ្លៃ ដើម្បីជាការឆ្លើយតបជាមួយនឹងតម្រូវការជាក់ស្តែងទាំងសិស្ស និងអ្នកអាណាព្យាបាល។ ស្របជាមួយគ្នានេះដែរយើងបានបង្កើតវេទិកាលក់ដូរអេឡិចត្រូនិចមួយសម្រាប់ស្តា និងជំរុញមុខរបរមាតាបិតាសិស្សឱ្យបានប្រើសើរឡើងមួយកម្រិត និងបន្តគិតគូរពីយន្តការនានាបន្ថែមទៀតដើម្បីធានាឱ្យបាននូវការអប់រំពេញលេញមួយសម្រាប់សិស្ស និងអ្នកអាណាព្យាបាល។
ទន្ទឹមនឹងនេះលោក ប៉ិច បូឡែន ក៏បានសំណូមពរផងដែរឱ្យអាណាព្យាបាលសិស្សទាំងអស់សូមជួយសហការឱ្យកាន់តែជិតស្និទ្ធ ជាមួយនឹងសាលារៀននៅក្នុងការគាំទ្រការសិក្សាតាមអនឡាញ របស់បុត្រធីតា តាមរយៈការប្រាស្រ័យទាក់ទងមកសាលារៀនដើម្បីស្វែងយល់ពីបច្ចេកវិទ្យាក្នុងការអប់រំ និងកម្មវិធីសិក្សាអនឡាញ ក៏ដូចជាមាតិកាអនឡាញនានា។ សូមអាណាព្យាបាលភ្ជាប់ទំនាក់ទំនងល្អជាមួយលោកគ្រូ អ្នកគ្រូ និងគណៈគ្រប់គ្រងសាលាឱ្យបានជិតស្និទ្ធបំផុតព្រោះស្ថានភាព Covid-19 ជារឿងបណ្តោះអាសន្ន តែបច្ចេកវិទ្យាក្នុងការសិក្សាអនឡាញជារឿងអនាគត ខណៈទំនាក់ទំនងរវាងគ្រូបង្រៀន សាលារៀន និងអាណាព្យាបាលជារឿងអចិន្ត្រៃយ៍សម្រាប់ការអប់រំបុត្រ បុត្រធិតារបស់យើងទាំងអស់គ្នា៕

April 29, 2020
ល្អសម្រាប់អ្នកទីក្រុង ឬអ្នកគ្មានដីធំ! ដាំបន្លែលើទឹកមិនព្រួយពីការស្រោចទឹក មេរោគ និងបានបន្លែធម្មជាតិយ៉ាងស្រស់បំព្រងក្នុងផ្ទះ
បច្ចុប្បន្ននេះ ប្រជាជននៅទីប្រជុំជនចាប់ផ្តើមមើលឃើញពីតម្លៃនៃការដាំដុះ ផលដំណាំផ្ទាល់ខ្លួន និងស្វែងរកអាហារសុវត្ថិភាពសម្រាប់ទទួលទានក្នុងគ្រួសារ តែអ្វីដែលបញ្ហាគឺអ្នកទីក្រុងជាគ្មានទីតាំងធំសម្រាប់ធ្វើជាសួនដំណាំដូចនៅតំបន់ជនបទនោះទេ។
ពាក់ព័ន្ធនឹងបញ្ហានេះ កសិករដែលបានដាំបន្លែលើទឹកនៅក្នុងខេត្តបាត់ដំបង លោក ស៊ឺនហាច បានណែនាំឱ្យអ្នកដែលស្រឡាញ់ដំណាំសាកល្បងច្នៃទីតាំងតូចៗដែលមាននៅក្នុងផ្ទះដើម្បីដាំដំណាំលើទឹក ឬដាំដំណាំក្នុងបំពង់ទីបវិញម្តង។ ការដាំដំណាំលើទឹកនេះជាបច្ចេកទេសថ្មីដែលមិនត្រូវការទីតាំងធំ មិនចាំបាច់ត្រូវបារម្ភពីមេរោគនៅក្នុងដី មិនភ័យរឿងសត្វល្អិតបំផ្លាញ និងមិនចាំបាច់បារម្ភពីការស្រោចទឹកនោះទេ។ អ្នកដាំគ្រាន់តែត្រូវការថែទាំឱ្យត្រូវពន្លឺឱ្យបានគ្រប់គ្រាន់ និងជ្រើសរើសគ្រាប់ពូជឱ្យបានល្អជាការស្រេច។
ជាបច្ចេកទេសដាំ ដំបូងឡើយយើងគួរជ្រើសរើសពូជដែលអាចដាំលើទឹកល្អដូចជាស្ពៃ សាឡាដ ខាត់ណា ផ្កាស្ពៃ ឬបន្លែបៃតងមួយចំនួនទៀត។ បន្ទាប់មកយើងយកគ្រាប់ពូជដែលទិញពីផ្សារ មកបណ្តុះជាមួយអេប៉ុងរយៈពេល 2យប់2ថ្ងៃ ឬ3យប់3ថ្ងៃទៅតាមប្រភេទដំណាំ មុននឹងដាក់វាឱ្យត្រូវពន្លឺថ្ងៃល្មមក្នុងរយៈពេលមួយសប្តាហ៍មុននឹងដាក់ដាំនៅក្នុងបំពង់ទុយោទឹក។ នៅក្នុងបំពង់ទុយោនោះអ្នកដាំគួរចោះវាឱ្យមានចន្លោះពី 15ទៅ 30សង់ទីម៉ែត្រ ដើម្បីឱ្យដើមរុក្ខជាតិដែលយើងបានបណ្តុះមានចន្លោះលូតលាស់ល្អមិនចង្អៀតពេក។
បន្ថែមពីលើនេះ យើងអាចបញ្ចូលជីប្រភេទ AB នៅក្នុងទឹកដែលដាក់នៅក្នុងទុយោទឹក ហើយបូម បង្ហូរទឹកដែលនៅក្នុងទុយោនោះឱ្យវឹលចុះឡើងរហូត ដើម្បីកុំឱ្យទឹកឡើងកម្តៅជាមួយនឹងពន្លឺថ្ងៃខ្លាំង។ ក្រោយពេលដាក់ដាំ និងមើលថែទាំអស់រយៈពេលប្រមាណ 40 ទៅ 45ថ្ងៃស្ពៃអាចនឹងប្រមូលផលបានហើយ តែប្រសិនបើប្រភេទដណាំខាត់ណាវិញគឺអាចប្រមូលបានត្រឹមរយៈពេល 20 ទៅ 25ថ្ងៃប៉ុណ្ណោះ។
អ្នកនៅតំបន់ប្រជុំជនអាចសាកល្បងវិធីសាស្ត្រដាំដំណាំបែបនេះនៅក្នុងលើដំបូលផ្ទះ ឬទីតាំងណាដែលមានពន្លឺគ្រប់គ្រាន់ ដើម្បីទទួលបានអាហារធម្មជាតិគ្មានជាតិគីមីផង និងដើម្បីជាការសម្រាកកម្សាន្តលម្ហែក្រោយមមាញឹកជាមួយនឹងការធ្វើការ ឬរកស៊ីផង៕

April 28, 2020
អ្នកវិភាគថា សាលារៀនឯកជនអាចបញ្ចុះថ្លៃបានខ្លះ តែមិនអាចធ្វើបានច្រើនភ្លាមៗនោះទេ
រយៈពេលប៉ុន្មានថ្ងៃចុងក្រោយនេះ មានការតវ៉ាមួយចំនួនពីអាណាព្យាបាលសិស្សដែលមានកូនសិក្សានៅសាលាអន្តរជាតិថ្លៃៗមួយចំនួន ក្នុងគោលបំណងសុំបញ្ចុះថ្លៃសិក្សាកូននៅពេលដែលពិភពលោក ក៏ដូចជាកម្ពុជាត្រូវប្រឈមជាមួយនឹងបញ្ហាហិរញ្ញវត្ថុដែលកើតឡើងដោយវិបត្តិនៃជំងឺ Covid-19។
ពាក់ព័ន្ធនឹងបញ្ហានេះ លោក ចាន់ សុផល អ្នកជំនាញសេដ្ឋកិច្ច បានបញ្ហាញការយល់ឃើញរបស់លោកក្នុងបណ្តាញសង្គមថា សាលារៀនអាចនឹងបញ្ចុះថ្លៃសិក្សាដល់សិស្សបានខ្លះប្រសិនបើគាត់ព្យាយាមកាត់បន្ថយការចំណាយក្នុងរយៈពេលវែង តែក្នុងរយៈពេលខ្លី សាលាទំនងជាមិនអាចធ្វើបាននោះទេ។
លោក ចាន់ សុផល បានសរសេរថា តាមការយល់ឃើញរបស់លោក ម្ចាស់សាលារៀនគួរតែពន្យល់មាតាបិតារបស់សិស្សានុសិស្សឱ្យបានច្បាស់លាស់ និងទន់ភ្លន់។ មុខចំណាយខ្លះសាលាអាចសន្សំបាន រីឯមុខចំណាយខ្លះសន្សំមិនបាននោះទេ ហើយចំណាយលើអ៊ីនធើណិតអាចនឹងកើនឡើងក្នុងរយៈពេលខ្លីនេះ។
លោកថា មុខចំណាយដែលអាចសន្សំបានមានដូចជាថ្លៃអគ្គិសនី ថ្លៃទឹក ថ្លៃជួលរថយន្តដឹកសិស្ស ឬថ្លៃប្រេងឥន្ធនៈរថយន្ត រួមទាំងថ្លៃអាហារសម្រាប់សិស្សបានជាវនៅសាលាជាដើម តែមុខចំណាយដែលមិនអាចសន្សំបានក្នុងរយៈពេលខ្លីមានដូចជាថ្លៃឈ្នួលអគារ ប្រាក់ឈ្នួលគ្រូបង្រៀន និងបុគ្គលិក ការចំណាយលើកម្មវិធីសិក្សាអន្តរជាតិ (ប្រសិនបើមាន) និងការបង់ប្រាក់សម្រាប់ទុនវិនិយោគ។ បន្ថែមពីលើនេះ មុខចំណាយដែលត្រូវបង្កើននៅពេលនេះ គឺថ្លៃប្រើប្រាស់អ៊ីនធើណិត និងកម្មវិធី Zoom ជាដើម។
អ្នកជំនាញខាងលើបានបញ្ជាក់ផងដែរថា នៅក្នុងរយៈពេលវែង សាលាអាចកាត់បន្ថយបុគ្គលិក ជំនួយការគ្រូបង្រៀន អ្នកបើកបរ កម្មករ និងការជួលអគារប្រសិនបើសាលាបន្តការបង្រៀនអនឡាញ។ ការធ្វើដូចនេះនឹងធ្វើឱ្យសាលាអាចកាត់បន្ថយថ្លៃសិក្សាបាន ក៏ប៉ុន្តែនៅក្នុងរយៈពេលខ្លី សាលាមិនអាចធ្វើដូចនេះបានទេ។ នេះបើតាមការយល់ឃើញរបស់លោក៕

April 28, 2020
អូស្ត្រាលីបង្កើនការផលិតមាសប្រភេទ1គីឡូក្រាម ដើម្បីដោះស្រាយ “ការស្រេកឃ្លាន” នៅសហរដ្ឋអាមេរិក
រោងចក្រចម្រាញ់មាសធំជាងគេរបស់ប្រទេសអូស្ត្រាលី Perth Mint បានចាប់ផ្ដើមបង្កើនផលិតកម្មរបស់ខ្លួន ដោយផ្ដោតទៅលើមាសប្រភេទបន្ទះក្រាស់ដែលមានទម្ងន់1កីឡូក្រាម ដើម្បីជួយកាត់បន្ថយបញ្ហាផ្គត់ផ្គង់ដែលកំពុងមានតម្រូវការខ្លាំងនៅសហរដ្ឋអាមេរិក។
តាមធម្មតា យន្តហោះដឹកអ្នកដំណើរ តែងតែត្រូវបានប្រើដើម្បីដឹកជញ្ជូនផលិតផលធ្វើអំពីមាស ប៉ុន្តែការដួលរលំនៃវិស័យអាកាសចរណ៍ និងអាក់ខានដោយសារវិបត្តិសុខភាព COVID-19 បានធ្វើឱ្យរាំងស្ទះដល់ដំណើរការផ្គត់ផ្គង់មាសនៅលើទីផ្សារអន្តរជាតិ។ ដុំមាសប្រភេទទម្ងន់1គីឡូក្រាម តែងត្រូវបានប្រើដើម្បីដោះស្រាយបញ្ហានៃកិច្ចសន្យា ឬកិច្ចព្រមព្រៀងអនាគតរបស់ Comex។
COMEX គឺជាទីផ្សារអនាគត ដែលជាកន្លែងជួញដូរផលិតផលលោហធាតុ ដូចជា មាស ប្រាក់ ស្ពាន់ និងអាលុយមីញ៉ូម។ កន្លងមក COMEX ត្រូវបានគេហៅថាជាក្រុមហ៊ុនជួញដូរផលិតផល COMEX ក្រោយពីបានច្របាច់បញ្ចូលគ្នាជាមួយក្រុមហ៊ុន New York Mercantile Exchange នាឆ្នាំ1994 ហើយក៏បានក្លាយជាផ្នែកមួយដែលទទួលបន្ទុកក្នុងការជួញដូរផ្នែកលោហធាតុមានតម្លៃ។
Richard Hayes ដែលជានាយកប្រតិបត្តិរបស់ Perth Mint បានឱ្យដឹងថា “បច្ចុប្បន្ន យើងខ្ញុំប្រឹងប្រែងធ្វើយ៉ាងណាដើម្បីផលិតមាសប្រភេទបន្ទះក្រាស់ទម្ងន់1គីឡូក្រាម ឱ្យបានច្រើនតាមដែលអាចធ្វើទៅបាន។ យើងប្រហែលជាអាចផលិតបាន7តោនកន្លះក្នុង1សប្ដាហ៍ ហើយយើងនឹងលក់វាទាំងអស់ដោយងាយនៅក្នុងខែឧសភាខាងមុខ។ ភាគច្រើនលើសលុបនៃផលិតផលមាសដែលនឹងត្រូវបានផលិតនេះ គឺដើម្បីផ្គត់ផ្គង់ដល់ទីផ្សារ COMEX”។
នៅក្នុងរយៈពេលប៉ុន្មានថ្ងៃនៃខែមីនាដែលទីផ្សារមាសត្រូវច្របូលច្របល់ ថ្លៃឈ្នួលធានារ៉ាប់រងអនាគតមាសរបស់ New York ធៀបនឹងតម្លៃផ្គត់ផ្គង់ភ្លាមៗនៅទីក្រុងឡុងដ៍ បានកើនលើស70ដុល្លារ ដែលជាតម្លៃខ្ពស់បំផុតក្នុងអំឡុង4ទសវត្សរ៍កន្លងមកនេះ។ បន្ទាប់មក ការឡើងថ្លៃនេះក៏បានរាលដាលទៅក្នុងទីផ្សារផ្សេងៗ ហើយក្រោយមកតម្លៃរបស់វាក៏បានចុះមកនៅត្រឹម21ដុល្លារ។
រោងចក្រផលិតមាស Perth Mint ជាកន្លែងដែលបានបើកដំណើរការចង្វាក់ផលិតកម្មមួយផ្នែកឡើងវិញដើម្បីផលិតមាសប្រភេទបន្ទះក្រាស់ទម្ងន់1គីឡូក្រាមសម្រាប់ទប់ទល់នឹងវិបត្តិនៃប្រភពផ្គត់ផ្គង់ បានព្យាករថា តម្រូវការមាសបច្ចុប្បន្ន គ្រាន់តែជាបញ្ហាដែលកើតឡើងក្នុងរយៈពេលខ្លីប៉ុណ្ណោះ។
វិបត្តិសុខភាពបច្ចុប្បន្ន បាននាំមកនូវការងារច្រើនសម្រាប់រោងចក្រចម្រាញ់មាស ក្នុងការស្វែងរកប្រភពវត្ថុធាតុដើមបន្ថែមពីអ្នកផ្គត់ផ្គង់នៅអូស្ត្រាលី និងបណ្ដាប្រទេសជិតខាង ដែលក្នុងនោះក៏មាន Papua New Guinea ផងដែរ។
Hayes បានឱ្យដឹងថា “ក្រុមហ៊ុនផលិតមាស Perth Mint បានចុះកិច្ចព្រមព្រៀងថ្មីជាមួយនឹងបណ្ដាក្រុមអ្នកផលិត និងធ្វើសកម្មភាពទាក់ទិននឹងមាសក្នុងរយៈពេល12ខែកន្លងមក ដើម្បីជួយចាត់ចែងវត្ថុធាតុដែលពួកគេរុករកបាន។ ចាប់តាំងពីបណ្ដាញផ្គង់ផ្គង់បានអាក់ខានដោយសារ COVID-19 បណ្ដាក្រុមហ៊ុនរុករករែទូទាំងពិភពលោក បានស្វែងរកកិច្ចសហប្រតិបត្តិការជាមួយបណ្ដារោងចាក់ចម្រាញ់មាស”។
Hayes ថ្លែងថា បច្ចុប្បន្នតម្រូវការទិញ និងលក់រាយផ្នែកលោហធាតុមានតម្លៃនៅអាមេរិក និងអឺរ៉ុប មានការកើនឡើង។ Hayes បន្តថា “ចំពោះរាល់លោហធាតុដែលយើងរកបាន ដូចជាមាស ឬប្រាក់ យើងអាចលក់បានយ៉ាងឆាប់រហ័ស។ ខ្ញុំយល់ថា តម្រូវការខ្លាំងក្លានោះនឹងអូសបន្លាយយូរបន្តិច ព្រោះអ្នករាល់គ្នា មានការភ័យខ្លាចពេកនៅចំពោះមុខសោកនាដកម្ម COVID-19នេះ”៕
ប្រភព៖ សារព័ត៌មានបរទេស
April 27, 2020
ម៉ាឡេស៊ី កំពុងបញ្ចុះបញ្ចូលកីឡាករជម្រើសជាតិបែលហ្ស៊ិកម្នាក់ ឱ្យចូលជម្រើសជាតិខ្លួន
ក្រុមជម្រើសជាតិម៉ាឡេស៊ី មានគម្រោងអញ្ជើញកីឡាករកូនកាត់ម៉ាឡេស៊ី-បែលហ្ស៊ិកម្នាក់ឈ្មោះ Dion Johan Cools ឱ្យមកចូលរួមជាមួយក្រុមជម្រើសជាតិរបស់ខ្លួន ដែលនឹងលេងក្នុងពានរង្វាន់ AFF Suzuki Cup 2020 នៅចុងឆ្នាំនេះ។
កីឡាកររូបនេះ ទោះជាមានឈាមជ័រជាជាតិសាសន៍ម៉ាឡេស៊ី តាមរយៈឪពុកជាជនជាតិម៉ាឡេ និងម្តាយជាជនជាតិបែលហ្ស៊ិកក្តី តែគេបានធំធាត់ និងលេងបាល់ទាត់អាជីពនៅប្រទេសបែលហ្ស៊ិក រហូតបានជាប់ជម្រើសជាតិបែលហ្ស៊ិក និង ធ្លាប់ទៅលេងនៅ World Cup ទៀតផង មិនតែប៉ុណ្ណោះ គេទើបតែទទួលបានកុងត្រា ទៅលេងនៅក្លិបដាណឺម៉ាក រយៈពេល 3ឆ្នាំ ក្រោយពីបង្ហាញទម្រង់លេងយ៉ាងល្អ នៅក្នុងក្របខ័ណ្ឌលីកប្រទេសបែលហ្ស៊ិករបស់ខ្លួន។
គួរបញ្ជាក់ដែរថា ក្នុងពេលដែលពិភពលោក កំពុងតែរងផលប៉ះពាល់យ៉ាងខ្លាំងពីវិបត្តិកូវីដ-19 សហព័ន្ធកីឡាបាល់ទាត់ម៉ាឡេស៊ី បានឆ្លៀតយកឱកាសនេះទាក់ទង និងបញ្ចុះបញ្ចូលកីឡាករជម្រើសជាតិបែលហ្ស៊ិករូបនេះ ឱ្យមកមកលេងនៅក្នុងក្របខ័ណ្ឌរបស់ខ្លួនវិញ តែហាក់ដូចជាមិនទទួលបានផ្លែផ្កាអ្វីសោះ បើទោះបីជាខំផ្តល់សញ្ជាតិម៉ាឡេស៊ី មួយទៀតដល់កីឡាករខាងលើនេះហើយក៏ដោយ៕

April 27, 2020
កសិករបង្ហាញវិធីដាំស្លឹកខ្ទឹមឱ្យទទួលបានដើមថ្លោស និងស្រស់ល្អ
ស្លឹកខ្ទឹមជាប្រភេទដំណាំដែលត្រូវជាមួយនឹងមុខម្ហូបច្រើនមុខ ព្រោះវាជាគ្រឿងផ្សំដែលមិនអាចខ្វះបានចំពោះសម្ល ឆា ឬទឹកជ្រលក់ជាដើម។ ក្រៅពីមានក្លិន និងរសជាតិឈ្ងុយឆ្ងាញ់ ស្លឹកខ្ទឹមក៏ផ្តល់ផលល្អដល់សុខភាពផងដែរ។ មិនថានៅជនបទ ឬនៅទីក្រុងនោះទេ ស្លឹកខ្ទឹមត្រូវបានគេដាំនៅតាមផ្ទះដើម្បីដកមកធ្វើម្ហូបប្រចាំថ្ងៃផង និងដើម្បីលម្អ ឬដាំដើម្បីកែអប្សុកនៅខាងក្នុងផ្ទះផង។
បង្ហាញវិធីដាំស្លឹកខ្ទឹមឱ្យបានថ្លោស និងស្រស់ល្អ កសិករនៅខេត្តកណ្តាល លោក ភា បានបញ្ជាក់ថាដំណាំស្លឹកខ្ទឹមជាដំណាំមួយដែលមនុស្សគ្រប់គ្នាចូលចិត្តដាំ ព្រោះវាត្រូវជាមួយម្ហូបច្រើនមុខ ហើយប្រសិនបើវាបានផលល្អគឺបង្កើនសោភណ្ឌភាពស្រស់ស្អាតគួរឱ្យចង់ថែទាំថែមទៀតផង តែក្នុងចំណោមអ្នកដាំទាំងអស់ក៏មានអ្នកខ្លះមិនទទួលបានផលល្អដែរ។ ដើម្បីដាំស្លឹកខ្ទឹមឱ្យទទួលបានផលល្អ អ្នកដាំគួរយកចិត្តទុកដាក់ថែទាំតាមលំដាប់លំដោយ ទើបទទួលបានផលល្អ។
ជាដំណាក់កាលដំបូង អ្នកដាំចាំបាច់ត្រូវស្វែងរកទីតាំងដីឱ្យបានសមរម្យសម្រាប់អ្នកនៅជនបទ និងអាចដាំក្នុងពីដុង ឬផើងជាដើមសម្រាប់អ្នកនៅទីក្រុង។ មុននឹងដាំត្រូវភ្ជួរដី ឬជ្រោយដីឱ្យបានផុសល្អ បន្ទាប់មកហាលដីចោលឱ្យបានពីរទៅបីថ្ងៃដើម្បីឱ្យងាប់មេរោគ និងកូនរុក្ខជាតិនានាដែលអាចរំខានដល់ការរីកលូតលាស់របស់ដើម និងស្លឹកខ្ទឹម។ បន្ទាប់ពីហាលដីបានល្អហើយ យើងអាចយកលាមកគោ ឬជីកំប៉ុសមកបាចហើយភ្ជួរលុប ឬត្រឡប់ឱ្យសព្វសាច់សម្រាប់អ្នកដាំជាលក្ខណៈតូចៗ មុននឹងលើករង ឬដាំ។
បន្ទាប់ពីរៀបចំដីហើយ យើងគួរជ្រើសរើសពូជណាដែលល្អដើម្បីយកមកដាំ និងគ្របចំបើងពីលើគល់ដើម្បីឱ្យជក់ទឹកល្អនៅពេលស្រោចទឹក។ បន្ទាប់មកទៀត គឺត្រូវស្រោចទឹកជាប្រចាំឱ្យបានមួយថ្ងៃ 2ដង គឺព្រឹកម្តង និងល្ងាចម្តងជាប្រចាំឱ្យបានជាប់លាប់ ព្រមទាំងមូលថែទាំដកស្មៅ និងសម្លាប់សត្វល្អិតតាមបែបធម្មជាតិប្រសិនបើយើងឃើញថាមានសត្វមកស៊ីដំណាំរបស់យើង។
ក្រោយការយកចិត្តទុកដាក់ថែទាំអស់រយៈពេល 40ថ្ងៃ យើងនឹងទទួលបានផលហើយ។
ប្រសិនបើយើងដាំដុះច្រើនយើងនឹងអាចដកលក់បានចន្លោះពី 5 ទៅ 6តោន លើផ្ទះដៃប្រមាណកន្លះហិកតា តែប្រសិនបើយើងដាំជាលក្ខណៈគ្រួសារក៏អាចទទួលបានផលបានច្រើនគួរសមដែរ ដោយគ្រួសារខ្លះហូបមិនអស់អាចដកចែកគ្នាទទួលទានបានថែមទៀងផង៕

April 27, 2020
ក្លិបឈៀងម៉ៃ ចុះកុងត្រាយកអតីតកីឡាករជម្រើសជាតិថៃម្នាក់ ក្រោយធ្លាក់ខ្លួនយ៉ាងខ្លាំងដោយសារបំណុល
អតីតកីឡាករខ្សែបម្រើជម្រើសជាតិថៃ Sarawut Masuk ត្រូវបានក្លិបបាល់ទាត់ឈៀងម៉ៃ ក្លិបនៅលីកលំដាប់ទី2 របស់ថៃ ចុះកុងត្រាទទួលយក ក្រោយពីកីឡាកររូបនេះ ត្រូវបានគេរកឃើញវិញ ខណៈដែលបានបាត់ខ្លួនអស់ជាង 2ខែ ដោយសារតែរត់គេចពីបំណុល។
ចំពោះមូលហេតុដែលធ្វើឱ្យកីឡាកររូបនេះ ធ្លាក់ខ្លួនពីកីឡាករកំពូលជម្រើសជាតិថៃ អស់ទ្រព្យសម្បត្តិដែលខិតខំរកបានពីអាជីពបាល់ទាត់អស់ជាង 60ម៉ឺនដុល្លា ថែមទាំងជំពាក់បំណុលគេវ័ណ្ឌក និងអាជីពបាល់ទាត់ត្រូវធ្លាក់ដល់ចំណុចសូន្យនេះគឺ ដោយសារតែបានលង់ខ្លួននឹងល្បែងភ្នាល់ខុសច្បាប់៕
គួររំឭកដែរថា អតីតខ្សែប្រយុទ្ធ Sarawut Masuk ធ្លាប់លេងឱ្យក្លិបធំៗនៅក្នុងប្រទេស រួមមាន Muangthong United, Pathum United និង Nakhon Ratchasima ជាដើម៕

April 27, 2020