សង្គម និងសេដ្ឋកិច្ច - La Reine Media

ថៃ នឹងអវត្តមានកីឡាករឆ្នើម 4រូប នៅក្នុងពាន Suzuki Cup

ការប្រកួតពានរង្វាន់ AFF Suzuki Cup 2020 បានគ្រោងនឹងធ្វើឡើងនៅថ្ងៃទី23 ខែវិច្ឆិកា ឆ្នាំ2020 ដល់ថ្ងៃទី31 ខែធ្នូ ឆ្នាំ2020 តាមរូបមន្តប្តូរទឹកដី និងលេង 2ជើង។

ចំពោះថៃ ដែលជាក្រុមជើងឯក 5សម័យកាលនោះ នឹងត្រូវអវត្តមានកូនក្រុមចំនួន 4រូប គឺ Teerasil Dangda, Chanathip Songkrasin, Theerathon Bunmathan និង Kawin Thamsatchanan ព្រោះទាំង 4នាក់នោះ មានភារកិច្ចជួយក្រុមរបស់ខ្លួន បន្តការប្រកួតក្នុងក្របខ័ណ្ឌលីកកំពូលជប៉ុន ដែលមិនបានសម្រាកឡើយក្នុងអំឡុងពេលប្រកួតដណ្ដើមពាន Suzuki Cup។

គួរបញ្ជាក់ដែរថា កីឡាករទាំង 4រូបនេះ គឺសុទ្ធសឹងតែជាគ្រាប់ពេជ្រនៃក្រុមបាល់ទាត់ជម្រើសជាតិថៃទាំងអស់ និងសុទ្ធតែជាកីឡាករឆ្នើមដែលធ្លាប់ជួយថៃ ឱ្យបានលើកពានរង្វាន់ AFF Suzuki Cup នេះជាច្រើនលើករួចមកហើយ៕

May 4, 2020

តាជីគីស្ថាន ប្រកាសបិទក្របខ័ណ្ឌលីកដែរហើយ តែមិនមែនដោយសារវិបត្តិមេរោគកូវីដ-19 ទេ

ក្របខ័ណ្ឌលីកកំពូលនៃប្រទេសតាជីគីស្ថាន បានបង្កភាពភ្ញាក់ផ្អើលទៅកាន់ពិភពលោក ដោយសារតែលីកបាល់ទាត់របស់ប្រទេសនេះ បានប្រកាសបិទក្នុងសប្តាហ៍នេះ ដោយសារតែមានមូលហេតុ ខុសពីប្រទេសដទៃ ក៏ដូចជាពិភពលោកទាំងមូលដែរ នោះគឺដោយសារតែប្រទេសនេះមានការរាតត្បាតយ៉ាងខ្លាំងពីជំងឺផ្តាសាយជ្រូកទៅវិញ។

ចំពោះការផ្អាកនេះ ត្រូវបានសហព័ន្ធបាល់ទាត់ប្រទេសតាជីគីស្ថាន បញ្ជាក់ថា គឺជាការគោរពតាមបម្រាម របស់រដ្ឋាភិបាល ដើម្បីប្រឆាំងនឹងជំងឺផ្តាសាយជ្រូកដែលកំពុងតែរាតត្បាតយ៉ាងខ្លាំងក្លានៅក្នុងប្រទេសនេះ។

គួរបញ្ជាក់ដែរថា ប្រទេសតាជីគីស្ថានបានបើកការប្រកួតក្របខ័ណ្ឌលីកជាផ្លូវការរបស់ខ្លួន កាលពីថ្ងៃទី៤ ខែមេសា ខណៈដែលក្រុម Istiklol FC បានទទួលស្វាគមន៍ក្រុម Khujand ដោយគ្មានអ្នកគាំទ្រ៕

May 4, 2020

វីដេអូដំបូងបង្អស់របស់ YouTube និងរឿងរ៉ាវដ៏អស្ចារ្យនៅពីក្រោយ

វីដេអូដំបូងគេបង្អស់នៅលើ Youtube មានរយៈពេលត្រឹមតែ18វិនាទីប៉ុណ្ណោះ ប៉ុន្តែ នៅខាងក្រោយវីដេអូនេះ គឺជារឿងរ៉ាវដ៏អស្ចារ្យដែលនាំឱ្យ Youtube ក្លាយជាបណ្ដាញសង្គមចែករំលែកវីដេអូធំបំផុតក្នុងពិភពលោកនាបច្ចុប្បន្ន។

កាលពី15ឆ្នាំមុន ពោលគឺនៅថ្ងៃទី23មេសាឆ្នាំ2005 សហស្ថាបនិករបស់ Youtube គឺលោក Jawed Karim ដែលត្រូវបានគេស្គាល់ថាជាម្ចាស់គណនី “jawed” នៅលើ Youtube បានបង្ហោះវីដេអូខ្លីមួយដែលមានរយៈពេល18វិនាទី និងមានចំណងជើងថា “ខ្ញុំនៅឯសួនសត្វ” (Me at the zoo)។

ខ្លឹមសារនៃវីដេអូនេះ គឺជាទិដ្ឋភាពដែលលោក Jawed Karim កំពុងឈរនៅក្នុងសួនសត្វ ដោយមានទ្រុង និងសត្វដំរីជាច្រើនក្បាលនៅខាងក្រោយ។ លោក Jawed Karim ចាប់ផ្ដើមដោយការនិយាយថា “បានហើយ យើងកំពុងនៅឯសួនសត្វ នៅខាងមុខសត្វដំរីជាច្រើនក្បាល”។

“ប្រការដែលអស្ចារ្យអំពីបុរសទាំងនេះ នោះគឺពួកគេមានភ្លុកយ៉ាងវែងៗ” Karim បានបញ្ចប់វីដេអូរបស់ខ្លួន ដោយមិនអាចធ្វើឱ្យខ្លីជាងនេះបាន។

វីដេអូដំបូងគេបង្អស់នេះ មិនបានប្រើពាក្យពេចន៍ដែលពួក YouTuber សព្វថ្ងៃនិយាយគ្រប់ៗគ្នានោះទេ ដូចជាឃ្លា “សូមជួយចុច like បើសិនជាអ្នកចូលចិត្តខ្លឹមសារនេះ” ឬថា “ដើម្បីតាមដានវីដេអូថ្មីៗបំផុតរបស់យើងខ្ញុំ សូមចុចsubscribe និងចុចរូបកណ្ដឹង” ។ល។ វីដេអូនេះក៏មិនត្រូវបានបន្ថែម-បន្ថយពន្លឺ ឬពណ៌ ឬមួយកម្មវិធីទីបីណាមួយទាំងអស់។ ទិដ្ឋភាពទាំងមូលត្រូវបានថតយ៉ាងសាមញ្ញជាទីបំផុតដោយកំលោះម្នាក់ដែលមិនមានគេស្គាល់ច្រើន ហើយក៏មិនមានគោលបំណងច្បាស់លាស់។

វីដេអូនេះ បើសិនជាត្រូវបានបង្ហោះនៅក្នុងពេលបច្ចុប្បន្ន នោះប្រហែលជាពិបាកនឹងទាក់ទាញមនុស្សឱ្យចូលមើលសូម្បីត្រឹមតែ100លើក។ ក៏ប៉ុន្តែ ដោយសារតែជាវីដេអូដំបូងគេបង្អស់នៅលើ Youtube វីដេអូនេះបានទាក់ទាញអ្នកចូលមើលដល់ទៅជាង93លានលើក និងការចុច “like” ជាង3លានលើកផងដែរ។

ការចាប់ផ្ដើមរបស់បណ្ដាញសង្គម “យក្ស” ក្នុងពិភពលោក

Jawed Karim កើតឆ្នាំ1979 និងធំឡើងនៅប្រទេសអាល្លឺម៉ង់ តែបានធ្វើដំណើរជាមួយគ្រួសារមករស់នៅសហរដ្ឋអាមេរិកកាលពីឆ្នាំ1992។ បុរសនេះបានបញ្ចប់ការសិក្សានៅវិទ្យាល័យ Central ហើយក៏បានបន្តការសិក្សានៅសាកលវិទ្យាល័យ Illinois។

Karim បានចាកចោលសាលារៀននៅមុនពេលបញ្ចប់ការសិក្សា ដើម្បីក្លាយជាបុគ្គលិករបស់ក្រុមហ៊ុន PayPal ប៉ុន្តែ ក្រោយមកគាត់ក៏បានបន្តការសិក្សារហូតបានទទួលសញ្ញាបត្រផ្នែកវិទ្យាសាស្ត្រកុំព្យូទ័រក្នុងឆ្នាំ2004។

ក្នុងអំឡុងធ្វើការឱ្យ Paypay លោក Karim ក៏បានស្គាល់ Chad Hurley និង Steve Chen។ អ្នកទាំង3 ក្រោយមកក៏មានគំនិតបង្កើតគេហទំព័រចែករំលែងវីដេអូដែលមានឈ្មោះថា Youtube នៅក្នុងឆ្នាំ2005។

គំនិតខាងលើនេះ បានកើតឡើងបន្ទាប់ពី Karim យល់ថា មានការលំបាកខ្លាំងក្នុងការស្វែងរកទិន្នន័យនៅលើអ៊ីនធើណិតដែលពាក់ព័ន្ធនឹងព្រឹត្តិការណ៍សំខាន់ៗក្នុងពិភពលោក ដូចជាគ្រោះមហន្តរាយរលកយក្សនៅមហាសមុទ្រឥណ្ឌានាឆ្នាំ2004 ឬហេតុការណ៍លេចសុដន់របស់កំពូលតារាចម្រៀង Janet Jackson នៅលើឆាកតន្ត្រីជាដើម។ល។

Karim មានគំនិតបង្កើតគេហទំព័រចែករំលែកវីដេអូ ហើយក៏បានយកគំនិតនេះទៅពិភាក្សាជាមួយ Hurley និង Chen។ ពួកគេក៏បានរួមដៃគ្នា បង្កើតគេហទំព័រ Youtube នេះឡើង។

បន្ទាប់ពីការបង្ហោះវីដេអូដំបូងដែលមានចំណងជើងថា “Me at the zoo” ដូចដែលបានលើកឡើងខាងដើម Youtube ក៏ចាប់ផ្ដើមដំណើរការកំណែសាកល្បងនៅក្នុងខែឧសភា ឆ្នាំ2005 ហើយមកដល់ខែវិច្ឆិកា ពួកគេមានកំណែផ្លូវការ។ ចាប់តាំងពីពេលនោះមក Youtube កាន់តែមានមនុស្សចូលប្រើប្រាស់ ដោយការបង្ហោះ និងចែករំលែកវីដេអូកាន់តែច្រើនឡើងពីមួយថ្ងៃទៅមួយថ្ងៃ។

ក្រោយរយៈពេល1ឆ្នាំនៃការបង្ហាញខ្លួន នៅខែតុលា ឆ្នាំ2006 ក្រុមហ៊ុន Google បានប្រកាសទិញ Youtube ក្នុងតម្លៃ1.65ពាន់លានដុល្លារអាមេរិក។ ក៏ប៉ុន្តែ ទឹកប្រាក់ដ៏ច្រើនសន្ធឹកសន្ធាប់ដែល Google បានចំណាយ គឺពិតជាមហាស័ក្ដិសម ខណៈដែលពេលនេះ Youtube បានក្លាយជាកម្មវិធីចែករំលែកវីដេអូធំជាងគេបង្អស់ក្នុងពិភពលោក ដោយទាក់ទាញមនុស្សចូលមើលប្រមាណជាជាង2ពាន់លានលើកជារៀងរាល់ខែ និង1ពាន់លានម៉ោងក្នុង1ថ្ងៃៗ។

លោក Karim កាលណោះត្រូវបានជ្រើសរើសជាទីប្រឹក្សាសម្រាប់ Youtube ខណៈដែលគាត់កំពុងជានិស្សិតនៅសាលាStanford។ Karim ក៏ទទួលបានភាគហ៊ុនចំនួន 137,443ហ៊ុននៅក្នុងក្រុមហ៊ុន Google ដែលប្រហាក់ប្រហែលនឹង 185លានដុល្លារនាបច្ចុប្បន្ន(ខែឧសភា ឆ្នាំ2020)៕

ប្រភព៖ សារព័ត៌មានបរទស

May 4, 2020

មិនស្រួលខ្លួនខណៈមានផ្ទៃពោះ ត្រូវមើលថែទាំខ្លួនឯងយ៉ាងណា?

ត្រឹមតែមានផ្ទៃពោះតែម្យ៉ាងក៏ធ្វើឱ្យអ្នកម្តាយមានអារម្មណ៍ថានឿយហត់ និងចង់សម្រាកឱ្យបានច្រើនៗណាស់ទៅហើយ តែបើអ្នកម្តាយមានគភ៌មានអាការឈឺថ្កាត់ ឬមិនស្រួលខ្លួនរួមជាមួយទៀតផងនោះ ក៏រឹតតែធ្វើឱ្យអ្នកម្តាយមានអារម្មណ៍ថាយ៉ាប់យ៉ឺនទុរុនទុរា ព្រោះអ្នកម្តាយនឹងអស់កម្លាំងខ្លាំងឡើងដល់ទៅទ្វេរដង និងមិនដឹងថានឹងចាត់ការចំពោះខ្លួនឯងយ៉ាងណាស្រួល ដូច្នេះថ្ងៃនេះ ឡារ៉ែន មានវិធីដែលអ្នកម្តាយមានគភ៌ត្រូវធ្វើពេលមានអាការឈឺថ្កាត់ ឬមិនស្រួលខ្លួនមកជម្រាបជូន។

1 – ពិនិត្យមើលខ្លួនឯង ៈ តើអ្នកគ្រុនក្តៅមិនស្រួលខ្លួនដោយសារអ្វី? អ្នកម្តាយមានគភ៌គួរប្រញាប់ទៅជួបគ្រូពេទ្យ ដើម្បីឱ្យគ្រូពេទ្យពិនិត្យមើលថា អាការដែលអ្នកឈឺថ្កាត់នោះបណ្តាលមកពីឆ្លងមេរោគបាក់តេរី ឬមេរោគវីរុស ព្រោះក្នុងអំឡុងពេលមានគភ៌អ្នកម្តាយនឹងមានប្រព័ន្ធប្រឆាំងជំងឺទាបជាងប្រក្រតីស្រាប់ហើយ និងគួរតែឱ្យគ្រូពេទ្យរកមើលមូលហេតុឱ្យឃើញឱ្យបានលឿនបំផុត។

2 – នៅពេលដឹងថា ឈឺដោយសារអ្វីហើយ គួរតែបញ្ឈប់ទង្វើនោះ ៈ ដើម្បីកុំឱ្យកើតមានទៀតនៅលើកក្រោយ ដូចជា ប្រឡូកប៉ូកប៉ាកជាមួយអ្នកជំងឺញឹកញាប់ ឬចេញទៅនៅក្នុងកន្លែងដែលមានមនុស្សម្នាច្រើនកុះករញឹកញាប់ជាដើម។

3 – បើមានអាការដូចតទៅនេះ ស្រ្តីមានគភ៌គួរប្រញាប់ទៅជួបពេទ្យ ៈ គ្រុនក្តៅខ្លួនខ្លាំង នឿយល្វើយខ្លាំងជាងធម្មតា ឈឺ-ក មានអាការហើម ណែនថប់ក្នុងដើមទ្រូង ពិបាកដកដង្ហើម ខ្លួនប្រាណស្លេកស្លាំង វឹលមុខ ឈរទប់ខ្លួនមិនជាប់ អាការទាំងអស់នេះត្រូវប្រញាប់ទៅជួបគ្រូពេទ្យជាបន្ទាន់។

ការមើលថែទាំខ្លួនឯងរបស់អ្នកម្តាយមានគភ៌នៅពេលឈឺថ្កាត់

ជាប្រក្រតីអ្នកម្តាយដែលមានគភ៌ បើឈឺថ្កាត់បន្តិចបន្តួចមិនចាំបាច់ទៅជួបគ្រូពេទ្យក៏បាន អាចព្យាបាលខ្លួនឯងបានបែបងាយៗដោយការទទួលទានទឹកឱ្យបានច្រើន សម្រាកឱ្យបានគ្រប់គ្រាន់ និងមិនគួរប្រើថ្នាំក្នុងការព្យាបាលខ្លួនឯងឡើយបើគ្មានវេជ្ជបញ្ជា។

អ្វីដែលអ្នកម្តាយគួរធ្វើនៅពេលមានអាការឈឺថ្កាត់ គ្រុនក្តៅ មិនស្រួលខ្លួននោះគឺ ទទួលទានទឹកឱ្យបានច្រើនៗ ព្រោះពេលមិនស្រួលខ្លួន រាងកាយនឹងត្រូវការទឹកច្រើនជាងពេលប្រក្រតី ដូច្នេះការទទួលទានទឹកច្រើនធ្វើឱ្យរាងកាយរបស់ស្រ្តីមានគភ៌ឆាប់ស្រួលខ្លួនឡើងវិញ និងមានអារម្មណ៍ល្អឡើង។ ទឹកដែលគួរទទួលទានគឺ ទឹករ៉ែ ទឹកបរិសុទ្ធ បើទទួលទានអាហារមិនបាន គួរទទួលទានទឹកផ្លែឈើច្រ-បាច់ស្រស់ៗ ដើម្បីឱ្យទារកក្នុងគភ៌បានទទួលសារធាតុអាហារដែលចាំបាច់ និងភេសជ្ជៈដែលមិនគួរទទួលទានសោះនោះគឺ ភេសជ្ជៈដែលមានកាហ្វេអ៊ីន និងភេសជ្ជៈដែលមានជាតិអាល់កុល៕

May 4, 2020

ត្រៀមខ្លួនគយគន់ព្រះចន្ទពេញវង់ធំបំផុតលើកចុងក្រោយបង្អស់ក្នុងឆ្នាំ2020 នាសប្ដាហ៍នេះ រួមនឹងទេពច្យុតដ៏ស្រស់ស្អាត

នេះគឺជាឱកាសល្អចុងក្រោយសម្រាប់អ្នកដែលចូលចិត្តសង្កេតមេឃា ព្រោះថាពួកគេនឹងអាចគយគន់ព្រះចន្ទដែលមានទំហំធំជាងគេ និងភ្លឺជាងគេក្នុងឆ្នាំ2020។

យោងតាមទីភ្នាក់ងារអវកាសសហរដ្ឋអាមេរិក NASA មហាព្រះចន្ទ ឬព្រះចន្ទពេញវង់ធំជាងគេសម្រាប់ឆ្នាំ2020 នឹងកើតឡើងនៅក្នុងថ្ងៃទី7ឧសភាខាងមុខ។ នៅក្នុងយប់នៃថ្ងៃនោះ ព្រះចន្ទនឹងពេញវង់ ហើយមានទំហំធំជាងធម្មតានៅវេលាម៉ោង17និង45នាទី ថ្ងៃទី7 ខែឧសភា។ នេះគឺជាមហាព្រះចន្ទលើកទី3 ហើយក៏ជាព្រះចន្ទធំជាងគេលើកចុងក្រោយបង្អស់សម្រាប់ឆ្នាំ2020។ ព្រះចន្ទពេញវង់លើកនេះ ត្រូវបានគេហៅថា “បុប្ផាចន្ទ”។

ទីភ្នាក់ងារអវកាស NASA បានបកស្រាយថា មូលហេតុដែលត្រូវគេហៅថា “បុប្ផាចន្ទ” គឺហៅទៅតាមក្រុមកុលសម្ព័ន្ធជនជាតិដើមភាគតិចនៅក្នុងតំបន់ភាគឦសាននៃសហរដ្ឋអាមេរិក ព្រោះថា “នេះក៏ជាពេលដែលដើមផ្កាយទាំងឡាយនៅក្នុងតំបន់នោះចេញផ្កាយគ្រប់ទីកន្លែង។ ក្រៅពីនេះ ព្រះចន្ទពេញវង់នាថ្ងៃទី7ឧសភាខាងមុខក៏ត្រូវបានគេហៅថា ព្រះចន្ទដាំពោត ឬព្រះចន្ទទឹកដោះផងដែរ”។

បាតុភូត “មហាព្រះចន្ទ” នេះ កើតឡើងដោយសារតែការផ្លាស់ទីរបស់ព្រះចន្ទដែលគោចរជុំវិញផែនដី។ នៅពេលគោចរមកជិតផែនដី ក្នុងរយៈចម្ងាយប្រមាណជា360,000គម មនុស្សនៅលើផែនដីក៏មើលឃើញព្រះចន្ទធំជាង និងភ្លឺជាងធម្មតា។

ព្រះចន្ទពេញវង់ តែងតែកើតឡើងរៀងរាល់មួយខែម្ដង ប៉ុន្តែបាតុភូត “មហាព្រះចន្ទ” វិញ គឺកើតឡើងតែប៉ុន្មានដងប៉ុណ្ណោះក្នុងមួយឆ្នាំ។

ត្រៀមខ្លួនគយគន់ព្រះចន្ទពេញវង់ធំបំផុតលើកចុងក្រោយបង្អស់ក្នុងឆ្នាំ2020 នាសប្ដាហ៍នេះ — ទេពច្យុតគឺជាស្នាមពន្លឺដ៏ស្រស់ស្អាតដែលកើតឡើងពីចំហេះនៃអាចម៍ផ្កាយ ឬធូលីរបស់ផ្កាយដុះកន្ទុយ ខណៈពេលដែលវាធ្លាក់ចូលក្នុងបរិយាកាសនៃភពផែនដី

ក្នុងអំឡុងពេលដែលមានបាតុភូតមហាព្រះចន្ទ អ្នកស្នេហាវិស័យតារាសាស្ត្រក៏អាចទស្សនាទេពច្យុត (ទេពច្យុតគឺជាស្នាមពន្លឺដ៏ស្រស់ស្អាតដែលកើតឡើងពីចំហេះនៃអាចម៍ផ្កាយ ឬធូលីរបស់ផ្កាយដុះកន្ទុយ ខណៈពេលដែលវាធ្លាក់ចូលក្នុងបរិយាកាសនៃភពផែនដី) 2ក្រុមផងដែរ គឺក្រុមទេពច្យុត Eta-Aquariids និងក្រុមទេពច្យុត Eta-Lyrids។ ប៉ុន្តែ NASA បានឱ្យដឹងថា ពន្លឺរបស់មហាព្រះចន្ទ អាចឧបសគ្គនៃការគយគន់សម្រស់ទេពច្យុតក្នុងខែនេះ។

មុននេះ ប្រជាជនក្នុងតំបន់ជាច្រើនក្នុងពិភពលោក បានមានឱកាសទស្សនាបាតុភូតព្រះចន្ទធំបំផុតក្នុងឆ្នាំ2020 ដែលត្រូវបានគេដាក់ឈ្មោះថា “ព្រះចន្ទផ្កាឈូក” ដែលកើតឡើងកាលពីថ្ងៃទី8មេសាកន្លងទៅ។

មូលហេតុដែលព្រះចន្ទពេញវង់ក្នុងខែមេសាត្រូវបានគេហៅថា “ព្រះចន្ទផ្កាឈូក” គឺហៅទៅតាមឈ្មោះរបស់ផ្កាមួយប្រភេទដែលមានពណ៌ផ្កាឈូក និងមានឈ្មោះថា phlox ដែលភាគច្រើនដុះនៅអាមេរិកខាងជើងនារដូវផ្ការីក៕

ប្រភព៖ សារព័ត៌មានបរទេស

May 4, 2020

ចិនសាកល្បងប្រើប្រាស់ប្រាក់យន់អេឡិចត្រូនិក! អនាគតដ៏ខ្លីខាងមុខ ក្រដាសប្រាក់យន់អាចនឹងលែងមានក្នុងពិភពលោក

ចាប់ពីដើមសប្ដាហ៍នេះ រដ្ឋាភិបាលចិននឹងចាប់ផ្ដើមដំណើរការសាកល្បងទូទាត់ដោយលុយយន់អេឡិកត្រូនិកនៅក្នុងទីក្រុងចំនួន4នៃប្រទេសនេះ។

ក្នុងរយៈពេលជាច្រើនខែចុងក្រោយនេះ ធនាគារប្រជាជនចិន បានដុតដៃដុតជើងជំរុញការអភិវឌ្ឍប្រាក់យន់អេឡិកត្រូនិក ដែលនេះនឹងក្លាយជាខឿនសេដ្ឋកិច្ចធំជាងគេបង្អស់ក្នុងពិភពលោកដែលដំណើរការប្រាក់អេឡិកត្រូនិកមានអធិបតេយ្យភាពដំបូង ខុសពី bitcoin ដែលមិនមានព្រំដែន។

ចាប់ពីខែឧសភា បុគ្គលិករដ្ឋនៅក្នុងទីក្រុង Shenzhen, Chengdu, Suzhou និងទីក្រុង Baoding នឹងទទួលបៀវត្សជាប្រាក់អេឡិកត្រូនិក។ នៅចំពោះមុខ ប្រាក់អេឡិកត្រូនិកនេះ ត្រូវបានប្រើដើម្បីទូទាត់ទៅលើមធ្យោបាយធ្វើដំណើរសាធារណៈ ផ្សារទំនើប ហាងទំនិញផាសុកភាព(ហាងលក់ទំនិញគ្រប់មុខដែលចាំបាច់សម្រាប់ប្រើរាល់ថ្ងៃ) ក្រុមហ៊ុនដែលស្ថិតក្នុងវិស័យទេសចរណ៍ និងសណ្ឋាគារ ហើយក្រោយមកនឹងត្រូវបានពង្រីកទៅក្នុងវិស័យផ្សេងៗទៀត។

ប្រាក់យន់អេឡិកត្រូនិក ដំណើរការដូចទៅនឹងក្រដាសប្រាក់ធម្មតា ប៉ុន្តែវាជាទម្រង់កូដក្នុងកាបូបលុយអេឡិកត្រូនិកដែលត្រូវបានទទួលស្គាល់ដោយធនាគារកណ្ដាលរបស់ចិន។ ប្រាក់អេឡិកត្រូនិក អនុញ្ញាតឱ្យអ្នកប្រើប្រាស់ ទូទាត់ ទទួល និងផ្ទេរប្រាក់ដូចទៅនឹងកម្មវិធីទូទាត់ប្រាក់តាមអនឡាញដែល Alipay និង WeChat Pay កំពុងធ្វើយ៉ាងដូច្នោះដែរ។ ដើម្បីទូទាត់ ឬទទួលប្រាក់ អ្នកប្រើប្រាស់គ្រាន់តែយកទូរស័ព្ទប៉ះគ្នាគឺជាការស្រេច។

តាមការសន្និដ្ឋាន វត្តមានរបស់លុយអេឡិកត្រូនិករបស់ប្រទេសចិននេះ អាចនឹងធ្វើឱ្យក្រដាសប្រាក់យន់បាត់ខ្លួនពីទីផ្សារពិភពលោកនាពេលខាងមុខមិនខាន។

ជារៀងរាល់ឆ្នាំ កម្មវិធី Ailpay និង WechatPay ត្រូវបានរាយការណ៍ថា ទំហំនៃការទូទាត់មិនប្រើក្រដាសប្រាក់ បានឡើងដល់ 15លានលានដុល្លារអាមេរិក។ ប្រទេសចិនសង្ឃឹមថា ប្រភេទប្រាក់ថ្មីនេះនឹងរួមចំណែកក្នុងការកាត់បន្ថយការទូទាត់នៃប្រភេទប្រាក់ដទៃដែលគំរាមកំហែងដល់ស្ថិរភាពនៃប្រព័ន្ធហិរញ្ញវត្ថុ៕

ប្រភព៖ សារព័ត៌មានបរទេស

May 4, 2020

ត្រីមាសទី2 ឆ្នាំ2020 ការនាំចេញផលិតផលវាយនភណ្ឌ សម្លៀកបំពាក់ និងស្បែកជើងរបស់កម្ពុជានឹងរងផលប៉ះពាល់ 60%

មន្ត្រីជាន់ខ្ពស់នៃក្រសួងការងារ ថ្លែងថា ការនាំចេញផលិតផលវាយនភណ្ឌ សម្លៀកបំពាក់ និងស្បែកជើងរបស់កម្ពុជាទៅកាន់ទីផ្សារអន្តរជាតិ នឹងរងផលប៉ះពាល់ប្រមាណ50% ទៅ60% នៅត្រីមាសទី2 ឆ្នាំ2020 នេះ។ នេះជាការថ្លែងក្នុងសន្និសីទសារព័ត៌មានស្ដីពីបច្ចុប្បន្នភាព នៃការធ្វើចត្តាឡីស័កចំពោះកម្មកររោងចក្រ ដែលឈប់សម្រាកនាអំឡុងពេលបុណ្យចូលឆ្នាំថ្មី។

ឯកឧត្តម ហេង សួរ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានថ្លែងបែបនេះថា ការរងផលប៉ះពាល់ប្រមាណ50% ទៅ60% នៅត្រីមាសទី2 ឆ្នាំ2020 ក្នុងការនាំចេញផលិតផលវាយនភណ្ឌ សម្លៀកបំពាក់ និងស្បែកជើងរបស់កម្ពុជាទៅកាន់ទីផ្សារអន្តរជាតិ តម្រូវឱ្យភាគីពាក់ព័ន្ធរួមគ្នារិះរកដំណោះស្រាយ ពិសេសភាគីរាជរដ្ឋាភិបាល និយោជក សហជីព-កម្មករ និងអង្គការដៃគូនានា។

ឯកឧត្តម ហេង សួរ ដែលជារដ្ឋលេខាធិការ នៃក្រសួងការងារ និងបណ្ដុះបណ្ដាលវិជ្ជាជីវៈដែរនោះ បានបន្តថា៖« នាពេលនេះ បណ្តាប្រទេសនៅទ្វីបអឺរ៉ុប និងអាមេរិករងផលប៉ះពាល់ ដោយសារជំងឺកូវីដ-19 ដូច្នេះគេសម្រេចបិទទីផ្សារលក់ដូរជាបន្តបន្ទាប់ រីឯប្រជាពលរដ្ឋក៏គ្មានអ្នកណាចាយវាយខ្ជីខ្ជាទៀតដែរ ដែលជាហេតុធ្វើឱ្យតម្រូវការសម្លៀកបំពាក់ ស្បែកជើង សម្ភារវាយនភណ្ឌនានា និងទំនិញផ្សេងទៀតនោះ ត្រូវបានកាត់បន្ថយយ៉ាងគំហុក»។

ឯកឧត្តម បានបន្ថែមថា រោងចក្រផលិតសម្ភារវាយនភណ្ឌ សម្លៀកបំពាក់ និងស្បែកជើងមួយចំនួនធំនៅកម្ពុជា បានដាក់ពាក្យស្នើសុំព្យួរដំណើរការផលិត និងសុំបិទទ្វារជាបន្តបន្ទាប់រហូតជាង 100រោងចក្រ។ ដែលគិតមកដល់ពេលនេះ មានរោងចក្រប្រមាណជាង 130ហើយ ដែលបានដាក់ពាក្យស្នើសុំព្យួរ ក្នុងនោះមានកម្មករនិយោជិតប្រមាណជិត 10ម៉ឺននាក់ ដែលរងផលប៉ះពាល់ ពីការព្យួរនេះ។

ប៉ុន្តែដោយសារការខិតខំសម្របសម្រួលគ្នា រវាងភាគីពាក់ព័ន្ធទាំងឡាយ ទាំងភាគីរាជរដ្ឋាភិ បាល ភាគីនិយោជក និងកម្មករនិយោជិត បានសម្រួលពីការស្នើសុំបិទទ្វារ មកនៅត្រឹមការព្យួរបណ្ដោះអាសន្នសិន ហើយរាជរដ្ឋាភិបាល បានដាក់ចេញវិធានការជាបន្តបន្ទាប់ ដើម្បីរក្សានូវការងារ រក្សាប្រាក់ចំណូលខ្លះសម្រាប់កម្មករនិយោជិតទាំងនោះដែរ។

ថ្វីដ្បិតភាគីទាំងឡាយហាក់បន្ធូរបន្ថយឱ្យគ្នាទៅវិញមកក៏ពិតមែន ប៉ុន្តែចំពោះការនាំចេញផលិតផលវាយនភណ្ឌ សម្លៀកបំពាក់ និងស្បែកជើងក៏កំពុងរងផលប៉ះពាល់ជាបណ្ដើរៗហើយដែរ ដោយមកដល់ត្រីមាសទី1 នៃឆ្នាំ2020 ការនាំចេញផលិតផលវាយនភណ្ឌ សម្លៀកបំពាក់ និងស្បែកជើងនៅសល់ប្រមាណ 80% បើប្រៀបធៀបនឹងរយៈពេលដូចគ្នានៅឆ្នាំ2019។

ឯកឧត្តម ហេង សួរ បានបញ្ជាក់ថា គិតត្រឹមថ្ងៃទី27 ខែមេសា ឆ្នាំ2020 នេះ កម្ពុជាមិនទាន់ទទួលបានការបញ្ជាទិញ ពីអ្នកបញ្ជាទិញនៅឡើយទេ សម្រាប់ខែឧសភា និងខែមិថុនា។ លោកបានថ្លែងយ៉ាងដូច្នេះថា «យើងទទួលស្គាល់ថា ការនាំចេញរបស់យើង គឺពិតជាប៉ះពាល់មែន ជាពិសេសក្នុងត្រីមាសទី2 នេះតែម្ដង ដែលយើងគិតថា អាចប្រហាក់ប្រហែល 50%ទៅ60% នៃតួលេខឆ្នាំទៅ»៕

May 4, 2020

តម្លៃមាសពិភពលោក កើនឡើងខ្លាំងនាចុងសប្ដាហ៍នេះ

ក្រោយរយៈពេល1សប្ដាហ៍ដើរថយក្រោយ តម្លៃមាសក៏បានកើនឡើងជាង33ដុល្លារនៅក្នុងថ្ងៃចុងសប្ដាហ៍ ជួយឱ្យតម្លៃរបស់លោហធាតុនេះឡើងដល់1,703ដុល្លារក្នុង1អោន សម្រាប់សប្ដាហ៍នេះ។

ប្ដូរទៅតាមអត្រាប្ដូរប្រាក់ តម្លៃមាសពិភពលោកនាចុងសប្ដាហ៍នេះ មានតម្លៃប្រហាក់ប្រហែលនឹង 2,101ដុល្លារក្នុង1តម្លឹង។ ក្រោយការធ្លាក់ថ្លៃរយៈពេល1សប្ដាហ៍មកនេះ ចុងក្រោយតម្លៃមាសក៏បានវិលទៅរកចំណុច1,700ដុល្លារក្នុង1អោន(ounce)។ ប៉ុន្តែ តម្លៃនេះនៅតែទាបជាង1.6% បើធៀបជាមួយនឹងតម្លៃខ្ពស់់បំផុត (1,730ដុល្លារ) កាលពីចុងសប្ដាហ៍មុន។

ក្រុមអ្នកជំនាញបានព្យាករថា តម្លៃទាបរបស់មាស គឺគ្រាន់តែជាបញ្ហាបណ្ដោះអាសន្នប៉ុណ្ណោះ ហើយថាតម្លៃរបស់លោហធាតុមួយនេះនឹងកើនឡើងនៅក្នុងវិបត្តិនយោបាយ និងសេដ្ឋកិច្ចនាសម័យ COVID-19នេះ។ Gainesville Coins ដែលជាអ្នកជំនាញមកពី Everret Millman ថ្លែងថា “និយាយរួម មាសនៅតែមានពន្លឺ។ ក្រោយពីការធ្លាក់ថ្លៃ យើងនឹងបានឃើញតម្លៃរបស់វាកើនឡើងក្នុងសប្ដាហ៍ខាងមុខ”៕

ប្រភព៖ សារព័ត៌មានបរទេស

May 3, 2020

ក្រុមហ៊ុនរបស់ Warren Buffett ខាតបង់50ពាន់លានដុល្លារព្រោះតែវីរុសCOVID-19

ការលក់ឡាយឡុងនៅលើទីផ្សារមូលបត្រដោយសារតែCOVID-19 បានធ្វើឱ្យក្រុមហ៊ុន Berkshire Hattaway របស់មហាសេដ្ឋី Warren Buffett ខាតបង់អស់50ពាន់លានដុល្លារនៅក្នុងត្រីមាសទី1 ឆ្នាំ2020នេះ។

ក្រុមហ៊ុន Berkshire Hattaway ល្បីឈ្មោះខ្លាំងនៅក្នុងការវិនិយោគទៅលើ Goldman Sachs នៅក្នុងអំឡុងវិបត្តិហិរញ្ញវត្ថុ។ ប៉ុន្តែ នៅក្នុងត្រីមាសកន្លង ផ្សារហ៊ុន S&P 500 Index (S&P 500) បានធ្លាក់ចុះ 20% ហើយភាគហ៊ុនដែលក្រុមហ៊ុន Berkshire កំពុងកាន់កាប់មួយចំនួនធំ ក៏បានដាំក្បាលចុះលឿនជាងគេ ក្នុងនោះមាន American Express, Bank of America, Wells Fargo និងក្រុមហ៊ុនអាកាសចរណ៍ចំនួន4ផ្សេងទៀត (American, Delta, Southwest និង United)។ បិទការជួញដូរកាលពីថ្ងៃទី1ឧសភា Berkshire បានធ្លាក់ចុះប្រមាណជា19%។

ការខាតបង់ដ៏ធ្ងន់ធ្ងររបស់ក្រុមហ៊ុន Berkshire គឺដោយសារមូលបត្រដែលនៅជួរមុខក្នុងតារាងវិនិយោគ ទទួលរងផលប៉ះពាល់ពីវិបត្តិសុខភាព(COVID-19)។ បណ្ដាក្រុមហ៊ុនដែលមានភាគហ៊ុនរបស់ Berkshire សុទ្ធតែរងផលវិបាកពីវីរុសនេះ ដោយមានការធ្លាក់ថ្លៃចាប់ពី 5.2-34%។ ក្នុងនោះ ក្រុមហ៊ុនសាងសង់ផ្លូវដែក BNSF ដែលត្រូវបាន Berkshire បានទិញកាលពីឆ្នាំ2010 និងបណ្ដាក្រុមហ៊ុនលក់រាយ សុទ្ធតែត្រូវផ្អាកសកម្មភាព។

នេះគឺជាលើកទីពីរហើយដែលក្រុមហ៊ុនរបស់មហាសេដ្ឋី Warren Buffett បានប្រកាសខាតបង់ បើគិតចាប់ពីត្រីមាសទី4 ឆ្នាំ2018។ ប៉ុន្តែ ក្រុមហ៊ុនរបស់មហាសេដ្ឋីនេះក៏នៅមានចំណេញពីវិស័យធានារ៉ាប់រងផងដែរ ដោយរកបានប្រាក់ចំណេញ5.9ពាន់លានដុល្លារ ដោយសារតម្លៃមូលបត្រវិស័យនេះកើន6%។

Warren Buffett គិតមកដល់បច្ចុប្បន្ន មានទ្រព្យសរុប 72ពាន់លានដុល្លារអាមេរិក។ បុរសវ័យ89ឆ្នាំរូបនេះ គឺជាមហាសេដ្ឋីលំដាប់ទី4 នៅក្នុងពិភពលោក៕

ប្រភព៖ Bloomberg

May 3, 2020

Chanathip និង Theerathon ជាប់ជម្រើស 11នាក់ ល្អបំផុត នៅ J-League

លីកកំពូលជប៉ុន (J-League) បានបញ្ចេញសមាភាពកីឡាករ 11នាក់ ដែលល្អជាងគេបំផុត ប្រចាំលីករបស់ខ្លួនក្នុងរដូវកាល2019 ដែលបានកន្លងផុតទៅហើយនោះ។ អ្វីដែលគួរឱ្យចាប់អារម្មណ៍នោះ គឺមានកីឡាករថៃដល់ទៅ 2រូបបានជាប់នៅក្នុងបញ្ជីឈ្មោះនោះដែរ ខណៈដែលនៅក្នុងក្របខ័ណ្ឌលីកកំពូលជប៉ុននេះ មានកីឡាករថៃតែ 3រូបតែប៉ុណ្ណោះដែលកំពុងប្រកបអាជីពនៅទីនោះ។

ក្នុងនោះមានកីឡាករ Chanathip Songkrasin ដែលលេងជាខ្សែបម្រើប្រយុទ្ធនៅក្លិប Hokkaido Consadole Sapporo ក្រោយធ្វើបានយ៉ាងល្អ ដោយបង្ហាញខ្លួនបាន 28ប្រកួត រកបាន 4គ្រាប់ និងបញ្ចូនបាល់ឱ្យមិត្តរួមក្រុមទាត់បញ្ចូលទីបានដល់ទៅ 6គ្រាប់។

ចំណែកឯម្នាក់ទៀតជាខ្សែការពារស្លាបឆ្វេង Theerathon Bunmathan ដែលលេងនៅក្លិប Yokohama F. Marinos ក្រោយជួយឱ្យក្លិបឈ្នះពានលីកកំពូលជប៉ុនកាលពីរដូវកាលមុននេះ៕

May 2, 2020

Category: សង្គម និងសេដ្ឋកិច្ច