Category: សង្គម និងសេដ្ឋកិច្ច

Apple នឹងរើរោងចក្រពីប្រទេសចិនទៅកាន់ប្រទេសឥណ្ឌា
ក្រុមហ៊ុន Apple ត្រូវបានគេជឿថា កំពុងរៀបចំផែនការដើម្បីរើរោងចក្រផលិតឧបករណ៍បច្ចេកវិទ្យារបស់ខ្លួនចំនួន20% ចេញពីប្រទេសចិន ទៅកាន់ប្រទេសឥណ្ឌា ដែលក្នុងនោះក៏មាន iPhone ផងដែរ។
យោងតាម Economic Times នាយកប្រតិបត្តិមួយចំនួនរបស់ក្រុមហ៊ុន Apple បានពិភាក្សាជាមួយបណ្ដាមន្ត្រីជាន់ខ្ពស់ឥណ្ឌាកាលពីប៉ុន្មានថ្ងៃកន្លងទៅនេះ ទាក់ទងទៅនឹងក្រុមហ៊ុនអាមេរិកាំងនេះ ចង់បានការ “បើកផ្លូវ” ដើម្បីអាចបង្កើនចង្វាក់ផលិតកម្មរបស់ខ្លួននៅក្នុងប្រទេសឥណ្ឌា រួមទាំងការរើកម្លាំងផលិតកម្មចំនួន1/5ពីប្រទេសចិន មកកាន់ឥណ្ឌា។
បើសិនជាការផ្លាស់ទីនេះក្លាយជាការពិត Apple ក៏នឹងអាចក្លាយជាក្រុមហ៊ុននាំចេញធំជាងគេនៅឥណ្ឌា។
មន្ត្រីរដ្ឋាភិបាលមួយរូបបានបង្ហើបឱ្យដឹងថាឥណ្ឌាសង្ឃឹមថានឹងផលិតស្មាតហ្វូនដែលមានទំហំទឹកប្រាក់ដល់ទៅ40ពាន់លានដុល្លារអាមេរិកនៅក្នុងប្រទេសនេះក្នុងរយៈពេល5ឆ្នាំខាងមុខ ដែលភាគច្រើនគឺដើម្បីនាំចេញ។ ការផលិតនេះ ភាគច្រើនត្រូវបានធ្វើឡើងដោយក្រុមហ៊ុន Wistron និងក្រុមហ៊ុន Foxconn ដោយយោងទៅលើផលប្រយោជន៍ពីកម្មវិធីលើកទឹកចិត្តទាក់ទាញការផលិត PLI។
PLI (Production Linked Incentive Scheme) គឺជាកម្មវិធីដែលត្រូវបានឥណ្ឌាបង្កើតឡើងក្នុងបំណងលើកទឹកចិត្តដល់ការផលិតក្នុងស្រុក ទាក់ទាញការវិនិយោគ និងការផលិតពីបណ្ដាក្រុមហ៊ុនបរទេស។ Apple នឹងក្លាយជាក្រុមហ៊ុនមួយក្នុងចំណោមបណ្ដាក្រុមហ៊ុនដំបូងគេដែលទទួលបានផលប្រយោជន៍ពីគោលនយោបាយនេះ បន្ទាប់ពីមាត្រាមួយចំនួនត្រូវបានផ្ដើមអនុវត្តចាប់ពីសប្ដាហ៍ក្រោយ មុនពេលអនុវត្តពេញលេញចាប់ពីថ្ងៃទី1សីហា។
ទាក់ទិននឹងរឿងរ៉ាវខាងលើ ភាគីក្រុមហ៊ុន Apple មិនទាន់មានការបញ្ចេញមតិអ្វីនៅឡើយ។
ប្រទេសឥណ្ឌាមិនមែនជាទីផ្សារធំរបស់ Apple នោះទេ ព្រោះថាក្រុមហ៊ុននេះរកបានចំណូលត្រឹមតែ1.5ពាន់លានដុល្លារប៉ុណ្ណោះពីការលក់ iPhone នៅក្នុងប្រទេសនេះ រាប់ចាប់ពីឆ្នាំ2018ដល់2019 ពោលគឺកាន់កាប់ចំណែកទីផ្សារប្រមាណពី2ទៅ3%ប៉ុណ្ណោះ គឺមិនដល់0.5ពាន់លានដុល្លារនៃតម្លៃឧបករណ៍ដែលត្រូវបានផលិតក្នុងប្រទេសនេះ។ ផ្ទុយទៅវិញ Apple កំពុងតែពឹងផ្អែកច្រើនទៅលើប្រទេសចិន ទាំងការផលិត ទាំងទីផ្សារ។ នៅក្នុងអំឡុងពេលដូចគ្នា បើធៀបជាមួយប្រទេសឥណ្ឌា ក្រុមហ៊ុន Apple នៅប្រទេសចិនបានផលិតឧបករណ៍ដែលមានទំហំទឹកប្រាក់ដល់ដល់220ពាន់លានដុល្លារ ក្នុងនោះមាន185ពាន់លានដុល្លារបានមកពីការនាំចេញ។ ក្រៅពីនេះ Apple ក៏ប្រើប្រាស់កម្មករប្រមាណជា4.8លាននាក់នៅប្រទេសចិន ទាំងការផលិតផ្ទាល់ និងទាំងប្រយោល៕
ប្រភព៖ សារព័ត៌មានបរទេស
May 13, 2020
ក្លិបអង់គ្លេស2 ក្តោបតំណែងជាក្លិបបាល់ទាត់ ដែលមានកីឡាករថ្លៃជាងគេបង្អស់លើពិភពលោក
ខណៈដែលក្លិបបាល់ទាត់នានានៅជុំវិញពិភពលោក កំពុងតែជួបវិបត្តិហិរញ្ញវត្ថុ មានក្លិបបាល់ទាត់មួយចំនួន កំពុងតែពិចារណាក្នុងការលក់កីឡាករចេញខ្លះ ដើម្បីយកប្រាក់មកទប់ជីវភាពក្លិប ក៏ដូចជាសម្រាលបន្ទុក ដោយសារតែកីឡាករមួយចំនួនមានតម្លៃខ្លួនខ្ពស់ជាងគេដល់ទៅរាប់សិបដងឯណោះ។
ក្នុងនោះដែរ Transfermarket បានបង្ហាញស្ថិតិតម្លៃខ្លួនកីឡាករទាំងអស់ប្រចាំក្លិបនីមួយៗក្នុងអំឡុងពេលមានវិបត្តិកូវីដ-19 ដោយគេមើលឃើញថា ក្លិបបាល់ទាត់ Manchester City និង Liverpool របស់អង់គ្លេស បានឈរនៅលំដាប់កំពូលលេខ1 និងលេខ2 ខណៈដែលក្លិប 2ទៀតមកពីអេស្ប៉ាញ Real Madrid និង Bacelona បានក្តោបតំណែងលេខ3 និងលេខ4 តាមពីក្រោយដោយក្លិបយក្សបារាំង PSG ដែលស្ថិតក្នុងលំដាប់ទី5៕

May 12, 2020
ទោះធុរេន និងផ្លែឈើខ្មែរធ្លាក់ថ្លៃបន្តិចតែកសិករនៅតែសប្បាយចិត្ត
នៅក្នុងដំណាក់កាលនៃការរីករាលដាលជំងឺ Covid-19 នេះ ការដឹកទំនិញនៅតាមបន្ទាន់ព្រំដែនហាក់មានសកម្មភាពយឺតយ៉ាវ ខណៈបន្លែផ្លែឈើបរទេសជាច្រើនប្រភេទមិនសូវហូរចូលខ្លាំងដូចកាលពីមុនឡើយ។ ចំណុចនេះបានអនុញ្ញាតឱ្យកសិផលខ្មែរយើងបានចេញមកយ៉ាងព្រោងព្រាតក្នុងទីផ្សារដើម្បីបម្រើឱ្យសេចក្តីត្រូវការរបស់ប្រជាជននៅក្នុងស្រុក។
សម្រាប់កសិករនៅខេត្តព្រះសីហនុ ក្នុងខែនេះពួកគាត់កំពុងប្រមូលផលធុរេន សាវម៉ាវ ម្ឃុត និងផ្លែឈើហូបផ្លែជាច្រើនមុខទៀត។ ក្នុងទឹកមុខសប្បាយរីករាយ អុំស្រី យឹម ធា អ្នកមើលការខុសត្រូវចំការផ្លែឈើនៅស្រុកព្រៃនប់ បានលើកឡើងថា ផ្ទៃដីរបស់គាត់មានចំនួន 30ហិកតា ដែលបានដាំដំណាំហូបផ្លែជាច្រើនមុខដូចជាធុរេន សាម៉ាវ និងម្ឃុត ដោយផលទាំងនោះនឹងត្រូវចែកចាយទៅរាជធានីភ្នំពេញ ខេត្តព្រះសីហនុ ខេត្តកំពត ខេត្តសៀមរាប និងបណ្តាខេត្តមួយចំនួនទៀត។
នៅឆ្នាំនេះផលសាវម៉ាវអាចលក់បានក្នុងមួយគីឡីក្រាម 7,000រៀលសម្រាប់អ្នកលក់បោះដុំ និងធុរេនលក់បានតម្លៃ 15,000រៀល ដោយឈ្មួញបោះដុំមកទិញដល់ទីតាំងតែម្តង។ អុំស្រីបញ្ជាក់ថាទោះបីជាតម្លៃនេះមើលទៅធូរថ្លៃជាងឆ្នាំមុន តែគាត់នៅតែសប្បាយចិត្តព្រោះផលទាំងអស់បានចេញទៅកាន់ទីផ្សារបានទូលំទូលាយ ហើយតម្រូវការក៏មានការកើនឡើងដែលធ្វើឱ្យផ្លែឈើត្រូវលក់អស់ៗពីចំការ មិនដូចឆ្នាំខ្លះត្រូវសល់ចោលនោះទេ។ បន្ថែមពីលើនេះ អ្វីដែលជាចំណុចពិសេសបន្ថែមទៀតនោះគឺផលផ្លែឈើទាំងអស់សុទ្ធតែដាំដោយធម្មជាតិ និងមានរសជាតិឆ្ងាញ់ ហេតុនេះដំណាក់កាលនេះបានធ្វើឱ្យប្រជាជនខ្មែរយើងកាន់តែច្រើនងាកមកគាំទ្រផលិតផលក្នុងស្រុក និងដឹងកាន់តែច្បាស់ពីគុណភាពបន្លែផ្លែឈើខ្មែរដែលឆ្ងាញ់ជាងផ្លែឈើនាំចូល។ អុំស្រីរំពឹងថាចាប់ពីឆ្នាំនេះទៅ អតិថិជននៅទូទាំងប្រទេសនឹងចាប់ផ្តើមគាំទ្រផលិតផលក្នុងស្រុកកាន់តែច្រើនឡើងៗ បើទោះបីជាមានផលិតផលនាំចូលមកខ្លះក៏ដោយ ព្រោះគាត់ជឿជាក់ថាប្រជាជននឹងជក់ចិត្តជាមួយនឹងផ្លែឈើដែលមានគុណភាពល្អនៅក្នុងស្រុក និងបន្តស្វែងរកនៅពេលបន្តបន្ទាប់ទៀត៕
May 12, 2020
រ៉ុកកែតទម្ងន់17.8តោនរបស់ចិន ធ្លាក់ត្រឡប់ចូលស្រទាប់អូហ្សូនរបស់ផែនដី ដោយគ្មានគោលដៅពិតប្រាកដ
រ៉ុកកែត Long March 5B របស់ប្រទេសចិន ក្លាយជាវត្ថុដែលមានទម្ងន់ធ្ងន់ជាងគេបង្អស់នៅលើគន្លងគោចរ ដែលបានបាត់បង់ទំនាក់ទំនងជាមួយទីបញ្ជាការនៅលើដី និងពិបាកដឹងបានថា វានឹងរសាត់ទៅទីណាឱ្យប្រាកដ។
យោងតាមក្រុមហោះហើរត្រួតពិនិត្យអវកាសលេខ18របស់កងទ័ពអាកាសអាមេរិកាំង រ៉ុកកែត Long March 5B របស់ចិន វិលត្រឡប់មកកាន់តំបន់ស្រទាប់អូហ្សូននៅវេលាម៉ោង10និង33នាទី ថ្ងៃទី11ឧសភា(ម៉ោងនៅកម្ពុជា) ស្ថិតនៅពីលើតំបន់លម្ហសមុទ្រភាគខាងលិចទ្វីបអាហ្វ្រិក ដោយឆ្ពោះទៅកាន់តំបន់ Nouakchott នៃប្រទេស Mauritania។
Jonathan McDowell បានឱ្យដឹងថា នៅក្នុងរយៈពេល30នាទីចុងក្រោយដែលស្ថិតនៅលើគន្លងគោចរ រ៉ុកកែតនេះបានហោះកាត់លើតំបន់ Hollywood រួមនឹង Colorado Springs និងឧទ្យាននៅក្នុងរដ្ឋនីវយ៉កនៃសហរដ្ឋអាមេរិក។ បញ្ហាបាត់បង់ទំនាក់ទំនងនៃរ៉ុកកែតខាងលើនេះ គឺបណ្ដាលមកពីឥទ្ធិពលរបស់អាកាសធាតុអវកាសក្នុងរយៈពេលប៉ុន្មានថ្ងៃកន្លងទៅនេះ។ សារធាតុដែលបាញ់ចេញពីព្រះអាទិត្យ អាចបង្កជាឧបសគ្គ និងធ្វើឱ្យការហោះហើររបស់រ៉ុកកែតនេះត្រូវច្របូកច្របល់ នាំឱ្យមានការពិបាកក្នុងការព្យាករអំពីទិសដៅរបស់វា។
Jonathan McDowell ដែលជាតារាវិទូម្នាក់នៅសាកលវិទ្យាល័យ Harvard នៃសហរដ្ឋអាមេរិក បានឱ្យដឹងថា មុនហេតុការណ៍ខាងលើនេះ ក៏ធ្លាប់មានហេតុការណ៍មួយស្រដៀងគ្នានេះដែរ ដែលបានកើតឡើងកាលពីឆ្នាំ1991 ក្នុងគ្រាដែលស្ថានីយអវកាស Salyut-7 ដែលមានទម្ងន់39តោនរបស់សូវៀត បានធ្លាក់នៅលើតំបន់អវកាសផ្នែកខាងលើប្រទេសអាហ្សង់ទីន។
កាលពីខែកក្កដា ឆ្នាំ2019 ស្ថានីយអវកាសចិន Tiangong-2 ក៏បានធ្លាក់មកក្នុងស្រទាប់អូហ្សូនរបស់ផែនដី។ ក៏ប៉ុន្តែ Tiangong-2 ដែលមានទម្ងន់ត្រឹមតែ8.6តោន ត្រូវបានអ្នកវិទ្យាសាស្ត្រប្រើប្រាស់ថាមពលចុងក្រោយរបស់វា ដើម្បីបញ្ជាឱ្យចុះចតនៅលម្ហសមុទ្រដ៏សែនឆ្ងាយនាកណ្ដាលសាគរ។ ឆ្នាំ2018 កំណែដំបូងរបស់ Tiangong-2 គឺ Tiangong-2 8.5តោន ក៏បានធ្លាក់បាត់បង់ការគ្រប់គ្រង ចូលទៅក្នុងមហាសមុទ្រប៉ាស៊ីហ្វីកផងដែរ៕
ប្រភព៖ សារព័ត៌មានបរទេស
May 12, 2020
អាណាព្យាបាលគួរការពារកូនបែបណាពីគ្រោះថ្នាក់នៃបច្ចេកវិទ្យាក្នុងពេលរៀនតាមអនឡាញ?
នៅក្នុងរយៈពេលនៃការរីករាលដាលជំងឺ Covid-19 នេះអង្គការ UNICEF បានបញ្ជាក់ថា កុមារ និងមនុស្សវ័យក្មេងជាង 320លាននាក់ បានរងផលប៉ះពាល់ដោយសារតែការបិទសាលារៀននៅអាស៊ីបូព៌ា និងប៉ាស៊ីហ្វិក។
ក្រៅពីផលប៉ះពាល់នៃការមិនបានទៅរៀនសូត្រនៅក្នុងសាលាផ្ទាល់ អង្គការដែលធ្វើការងារដើម្បីកុមារខាងលើបានបញ្ជាក់ផងដែរថា ការសិក្សាតាមអនឡាញជារឿងល្អ តែក្នុងនោះបើអាណាព្យាបាលមិនបានយកចិត្តទុកដាក់ឱ្យបានល្អនោះទេ កុមារអាចនឹងរងគ្រោះថ្នាក់ដូចជាធ្វើឱ្យកុមារងាយរងគ្រោះដោយសារតែបញ្ហាកេងប្រវ័ញ្ចផ្លូវភេទ និងការល្បួងតាមប្រព័ន្ធអនឡាញ ដោយសារតែជនខិលខូចតែងតែព្យាយាមទាញយកប្រយោជន៍តាមបណ្តាញបច្ចេកវិទ្យានៅក្នុងពេលរាតត្បាតជាសកលនៃជំងឺ Covid-19 នេះ។
ដើម្បីដោះស្រាយបញ្ហាទាំងអស់នេះ UNICEF ណែនាំឱ្យ អាណាព្យាបាល គួរនិយាយទៅកាន់កូនៗអំពីសុវត្ថិភាពអនឡាញដើម្បីធានាថាពួកគេបានយល់ពីវិធីសាស្រ្តក្នុងការបញ្ចៀសខ្លួនឯងកុំឱ្យជនដែលមានបំណងមិនល្អដឹងពីទីតាំង ឬសកម្មភាពប្រចាំថ្ងៃ។ ចំណុចបន្ទាប់គឺគួរស្វែងយល់ពីឧបករណ៍រក្សាសុវត្ថិភាពតាមអនឡាញ ដើម្បីការពារកូនៗឱ្យជៀសផុតពីការល្បួង ឬការបោកបញ្ឆោតតាមរយៈអនឡាញ។ បន្ថែមពីលើនេះអាណាព្យាបាលគួរស្វែងយល់ពីហានិភ័យ ដែលកុមារអាចជួបប្រទះនៅពេលប្រើប្រាស់អនឡាញ និងជួយតម្រង់ទិសក្នុងករណីដែលគេចូលទៅក្នុងតំបន់គ្រោះថ្នាក់ ឬមានសកម្មភាពណាដែលអាចប្រឈមនឹងគ្រោះថ្នាក់ដោយសារតែបណ្តាញអនឡាញ។ ចុងក្រោយគឺអាណាព្យាបាលត្រូវតាមដានដើម្បីសម្គាល់ដឹងពីសញ្ញាពិបាកចិត្តដែលកើតឡើងពីការប្រើប្រាស់អនឡាញច្រើនហួសកម្រិត និងដឹងពីកន្លែងស្វែងរកជំនួយដូចជាការប្រឹក្សាជាមួយសាលារៀន ឬគ្រូពេទ្យចិត្តសាស្ត្រជាដើម៕
May 12, 2020
និន្នាការថ្មី! CEO “Live” លក់ផលិតផល រកបានប្រាក់រាប់លានដុល្លារ ដោយប្រើពេលតិចតួចប៉ុណ្ណោះ
Dong Mingzhu ជាប្រធានក្រុមហ៊ុន Gree Electric អាចលក់បានទំនិញដែលជាគ្រឿងប្រើប្រាស់ក្នុងផ្ទះ ដែលតម្លៃសរុប 43.7លានដុល្លារអាមេរិក ដោយការឡាយ (livestream) ត្រឹមតែ3ម៉ោងប៉ុណ្ណោះ។
កាលពីប៉ុន្មានឆ្នាំចុងក្រោយនេះ livestream ត្រូវបានគេនិយមប្រើប្រាស់ច្រើននៅប្រទេសចិន។ បុគ្គលល្បីៗ និងអ្នកមានឥទ្ធិពលនៅលើអ៊ីនធើណិត តែងត្រូវបានក្រុមហ៊ុននានាជួលឱ្យជួយឃោសនាអំពីផលិតផលិតផលរបស់ពួកគេដោយការផ្សាយផ្ទាល់លើអ៊ីនធើណិត។ ប៉ុន្តែ ថ្មីៗនេះ មាននិន្នាការថ្មីមួយទៀតដែលកំពុងពេញនិយម នោះគឺថ្នាក់ដឹកនាំក្រុមហ៊ុនផ្ទាល់ ចេញមុខនៅតាមកម្មវិធីផ្សាយផ្ទាល់ (livestream) របស់ពួកគេដើម្បីណែនាំ និងលក់ផលិតផល។
Li Jing ដែលជានាយកក្រុមហ៊ុនជំនាញខាងតុបតែងគ្រឿងសង្ហារិម Mendale Textile រកបានប្រាក់3.5លានដុល្លារតាមរយៈការឡាយ ដោយចំណាយពេលត្រឹមតែ4ម៉ោងប៉ុណ្ណោះ កាលពីខែមីនា។ James Liang ដែលជាប្រធានក្រុមហ៊ុនទេសចរណ៍ Trip.com រកបានប្រាក់ចំនួន8.4លានដុល្លារជូនក្រុមហ៊ុន បន្ទាប់ពីបានឡាយ5លើក ដោយក្នុង1លើកៗ លោកចំណាយត្រឹមតែ1ម៉ោងប៉ុណ្ណោះ។ ដូចគ្នានេះដែរ កាលពីថ្ងៃទី10មីនា អ្នកស្រី Dong Mingzhu ដែលជាមេដឹកនាំរបស់ក្រុមហ៊ុន Gree Electric ក៏រកបានប្រាក់43.7លានដុល្លារ បន្ទាប់ពីបានឡាយលក់ផលិតក្នុងរយៈពេល3ម៉ោង។
អ្នកស្រី Dong Mingzhu ជាប្រធានក្រុមហ៊ុន Gree Electric
កម្មវិធី ឬអែប(App) ដែលពេញនិយមសម្រាប់ការឡាយលក់ផលិតផលនៅប្រទេសចិន នោះគឺគេហទំព័រពាណិជ្ជកម្ម Taobao និង JD ខណៈដែលបណ្ដាញសង្គមដូចជា Douyin (កំណែភាសាចិនរបស់ TikTok) និង Kuaishou ក៏កំពុងទទួលបានចំណាប់អារម្មណ៍កាន់តែច្រើនឡើងៗផងដែរ។
Livestream កំពុងតែផ្លាស់ប្ដូរទម្លាប់ទិញដូររបស់អតិថិជននៅទូទាំងពិភពលោក ពិសេសគឺមនុស្សទាន់សម័យ និងយុវវ័យ។ បើសិនជាចង់ទិញផ្កា បន្លែផ្លែឈើ គឺមាន “តារាកសិករ” ជាច្រើនបង្ហាញខ្លួនរៀបរាប់អំពីផលិតផលនៅលើគេហទំព័រ Kuaishou។ ជាងនេះ កន្លងមក អ្នកលេងអ៊ីនធើណិតនៅប្រទេសចិនក៏ធ្លាប់បានជួបប្រទះអតិថិម្នាក់ ហ៊ានចំណាយប្រាក់ដល់ទៅ5.6លានដុល្លារអាមេរិកដើម្បីទិញរ៉ុកកែតពាណិជ្ជកម្ម Kuaizhou-1A 1ដើមទៀតផង តាមរយៈការឡាយលក់មួយនៅលើគេហទំព័រ Taobao។
COVID-19 បានផ្ទុះឡើងនៅប្រទេសចិន បណ្ដាលឱ្យមនុស្សត្រូវនៅផ្ទះ កន្លែងធ្វើការត្រូវបិទទ្វារ នាយកក្រុមហ៊ុននានាក៏ត្រូវស្វែងរកយុទ្ធសាស្ត្រថ្មីដើម្បីអាចរស់បន្តទៅមុខ។ យុទ្ធសាស្ត្រមួយដែលត្រូវបានគេប្រើប្រាស់ច្រើនជាងគេនោះគឺការឃោសនាលក់ផលិតផល ឬសេវាកម្មដោយការផ្សាយផ្ទាល់នៅលើអ៊ីនធើណិតដែលគេហៅថា “ឡាយ”។ ក្រៅពីមេដឹកនាំក្រុមហ៊ុននានាដូចបានរៀបរាបខាងលើ គេក៏ឃើញមានលោក Qian Jinbo ដែលជាប្រធានក្រុមហ៊ុនស្បែកជើង Red Dragonfly រួមនឹងលោក Liu Minghui ជាស្ថាបនិកក្រុមហ៊ុន China Gas និងលោក Chen Xiaodong ដែលជា CEO របស់ក្រុមហ៊ុន Intime Retail Group ជាដើម ក៏បានចូលរួមក្នុងការឡាយលក់ផលិតផលរបស់ពួកគេដែរ។
លោក Liu Minghui ជាស្ថាបនិកក្រុមហ៊ុន China Gas Holdings
បើទោះជាយ៉ាងនេះក៏ដោយ អ្នកជំនាញក្នុងវិស័យច្នៃប្រឌិតនានាយល់ថា ការបង្ហាញវត្តមានរបស់មេដឹកនាំក្រុមហ៊ុន អាចបង្កើតឱ្យមានភាពប្លែកភ្នែកគ្រាដំបូងៗ ប៉ុន្តែបើសិនជាពួកគេចេះតែនិយាយអំពីប្រធានបទដដែលៗក្នុងរយៈពេលយូរ នោះចំនួនអ្នកចូលមើលការឡាយរបស់ពួកគេនឹងថយចុះបន្តិចម្ដងៗ។ CEO និងមេដឹកនាំក្រុមហ៊ុននានា ត្រូវតែមានការច្នៃប្រឌិតជានិច្ចនៅពេលពួកគេចង់រក្សា និងទាក់ទាញទស្សនិកជន។
ឧទាហរណ៍ដូចជា Hou Yi ដែលជា CEO របស់បណ្ដាញផ្សារទំនើប Hema នៃក្រុមហ៊ុន Alibaba បានចូលរួមប្រកួតបកសម្បកបង្កងនៅក្នុងការឡាយជាមួយ Viya ដែលជាបុគ្គលល្បីឈ្មោះនៅលើបណ្ដាញសង្គមចិន ឬក៏ដូចជា James Liang ដែលបានប្រើប្រាស់សម្លៀកបំពាក់តាមអ្នកស្រុកនៅតំបន់ផ្សេងៗដើម្បីឃោសនាអំពីកញ្ចប់សេវាកម្មទេសចរណ៍របស់ក្រុមហ៊ុន Trip.com ។ល។
ពិសេសទៀតនោះគឺករណីរបស់ Luo Yonghao ជា CEO របស់ក្រុមហ៊ុនទូរស័ព្ទ Smartisan ដែលរកបានប្រាក់15.5លានដុល្លារអាមេរិក តាមរយៈការឡាយ3ម៉ោងកាលពីខែមេសា។ អ្វីដែលគួរឱ្យចាប់អារម្មណ៍ នោះគឺ Luo Yonghao មិនបានលក់ផលិតផលណាមួយទាំងអស់ ប៉ុន្តែជំនួសមកវិញ គាត់បានសហការជាមួយបណ្ដាញសង្គម Douyin ដើម្បីបានធ្វើជា livestreamer (អ្នកផ្សាយផ្ទាល់/អ្នកឡាយ) ដោយការលក់ផលិតផលច្រើនមុខ ចាប់ពីអាហារ រហូតដល់ផលិតផលរបស់ក្រុមហ៊ុនផ្សេងៗ។
Luo Yonghao ជា CEO របស់ក្រុមហ៊ុនទូរស័ព្ទ Smartisan
ករណីរបស់ Luo បានបង្ហាញថា CEO របស់បណ្ដាក្រុមហ៊ុន គឺពិតជាអាចក្លាយជាបុគ្គលដ៏មានឥទ្ធិពលខ្លាំងនៅលើបណ្ដាញអ៊ីនធើណិត ដែលអាចនាំមកនូវប្រភពចំណូលថ្មី និងច្រើនសន្ធឹកសន្ធាប់ដល់ក្រុមហ៊ុន។
យោងតាម iiMedia Research ទំហំទឹកប្រាក់ដែលត្រូវបានទូទាត់តាមរយៈការឡាយលក់ផលិតផលនៅប្រទេសចិន បានកើនដល់61ពាន់លានដុល្លារអាមេរិកក្នុងឆ្នាំ2019។ ដោយសារតែឥទ្ធិពលរបស់ COVID-19 វិស័យខាងលើនេះកំពុងមានការរីកចម្រើនខ្លាំងឡើងៗ រហូតដល់មានការព្យាករថា ទំហំទឹកប្រាក់់ដែលត្រូវបានទូទាត់តាមរយៈការឡាយនឹងឡើងដល់129ពាន់លានដុល្លារក្នុងឆ្នាំ2020នេះ៕
ប្រភព៖ សារព័ត៌មានបរទេស
May 12, 2020
វិធី 6 យ៉ាងពិនិត្យមើលវិវឌ្ឍនាការរបស់កូនពីវ័យ 0 – 24 ខែ ថាតើត្រូវតាមវ័យឬទេ?
ទារកទើបនឹងកើតអាចនឹងធ្វើអ្វីបានមិនច្រើនប៉ុន្មានទេក្នុងអំឡុងពេលកើតដំបូង តែនៅពេលកន្លងទៅ 1 – 2 ខែ នឹងចាប់ផ្តើមមានវិវឌ្ឍនាការមួយចំនួនដែលអ្នកម្តាយអាចសង្កេតឃើញបាន ឬអ្នកម្តាយអាចសាកល្បងពិនិត្យមើលវិវឌ្ឍនាការរបស់កូនបាន ថាតើត្រូវទៅតាមវ័យដែរឬទេ ដូចខាងក្រោមនេះ។
1 – ការសម្លឹងមើលរូបភាព សម្រាប់ក្មេងវ័យ 4 – 12 ខែ ៈ អ្នកម្តាយអាចយករូបភាពដែលជាពណ៌ខ្មៅ ក្រហមអ្វីក៏បានមកចាប់ឱ្យកូនមើល រំកឹលទៅខាងឆ្វេងម្តង រំកឹលទៅខាងស្តាំម្តង ឡើងលើ ឬចុះក្រោម បើកូនបែរមុខមើលតាមនោះ បញ្ជាក់ថាកូនមានវិវឌ្ឍនាការខាងការមើលឃើញត្រឹមត្រូវតាមវ័យហើយ។
2 – កណ្តឹង ឬវត្ថុព្យួរលើអង្រឹងពណ៌ផ្សេងៗសម្រាប់ទារក 2 – 4 ខែ ៈ អាចនឹងព្យួរកណ្តឹង ឬរូបតុក្កតាពណ៌ផ្សេងៗដែលស្រស់ស្អាត ឬមានសម្លេងនៅលើអង្រឹងកូន ឬពីមុខកៅអីរទេះកូនក៏បាន កូននឹងបានហ្វឹកហាត់ការប្រើភ្នែក និងការបានឮ។ ក្រៅពីរឿងការប្រើខ្សែភ្នែក និងការបានឮហើយនោះ ក្មេងខ្លះនឹងប្រើដៃឈោងចាប់ទៀតផង គឺជាការបានហ្វឹកហាត់ប្រើសាច់ដុំដៃផងដែរ។ ក្រៅពីនេះក្មេងមួយចំនួននៅបញ្ចេញសំឡេងទៀតផង អាចនិយាយបានថាជាវត្ថុដើម្បីវិវឌ្ឍនាការសម្រាប់ក្មេងតូចដែលល្អមែនទែន។
3 – សាកល្បងតម្រូវការរបស់កូនវ័យ 6 – 12 ខែ ៈ ដាក់វត្ថុ 2 យ៉ាងដែលមានលក្ខណៈស្រដៀងគ្នានៅចំពីមុខកូនរបស់អ្នក ដើម្បីឱ្យកូនបានសម្លឹងមើលមួយស្របក់ ហើយធ្វើការចាប់យកវត្ថុណាមួយចេញមក ឬរំកឹលទៅផ្នែកខាង រួចចាំមើលប្រតិកម្មរបស់កូនថា នឹងលូកដៃមកចាប់ឬទេ?។ ក្មេងខ្លះនឹងញញឹម ឬអាចធ្វើមុខជូរសម្តែងពីភាពមិនពេញចិត្ត ឬងឿងឆ្ងល់ នោះបញ្ជាក់ថា វិវឌ្ឍនាការរបស់កូនស្ថិតក្នុងកម្រឹតសមតាមវ័យហើយ។
4 – សាកល្បងវិវឌ្ឍនាការ ដៃ និងជើង របស់ទារកវ័យ 2 – 6 ខែ ៈ យករបស់លេងដែលមានសំឡេងមកអង្រួនតិចៗនៅក្បែរដៃ ឬជើងរបស់កូន កូនតូចនឹងព្យាយាមឈោងដៃចាប់ដែលជាការហ្វឹកហាត់គ្រប់គ្រងដៃ និងជើងរបស់កូនហ្នឹងឯង។ ជាប្រក្រតី ទារកនឹងមានវិវឌ្ឍនាការពីផ្នែកខាងលើ ចុះទៅផ្នែកខាងក្រោម រឿងនេះអ្នកម្តាយអាចសាកល្បងហ្វឹកហាត់ផ្ទុយពីធម្មជាតិបន្តិចលមើលក៏បានដែរ។
5 – សាកល្បងសម្ពាធអំពីរាងកាយឱ្យមាត់ហារឡើងចំពោះទារកវ័យ 0 – 6 ខែ ៈ ដាក់កូនឱ្យគេងផ្ងារាបនឹងកម្រាលដោយដែលដៃទាំងពីរបស់កូនដាក់នៅលើក្បាល ហើយអ្នកម្តាយក៏យកមេដៃទាំង 2 ខាងដាក់ពីលើបាតដៃរបស់កូនថ្នមៗ កូននឹងចាប់ម្រាមមេដៃរបស់អ្នក ព្រមទាំងហារមាត់ឡើងភ្លាមដែរ។
6 – ដាក់ឱ្យអង្គុយលើកៅអីខ្ពស់ សម្រាប់ក្មេងវ័យពី 6 – 24 ខែ ៈ កូននឹងចាប់ផ្តើមអង្គុយបានតាំងពីខែទី 5 ឡើងទៅ អាចនឹងយឺតជាងនេះបន្តិចបន្តួច។ នៅពេលក្មេងតូចចាប់ផ្តើមអង្គុយលើកៅអីខ្ពស់សម្រាប់ក្មេងបានហើយនោះ អ្នកម្តាយគួរអង្គុយលេងជាមួយ ជជែកលេងជាមួយ ឬច្រៀងឱ្យកូនស្តាប់ រឹតតែបានអង្គុយញ៉ាំអាហារជាមួយគ្នាផង រឹតតែជារឿងល្អទៅទៀត កូននឹងមានបដិសម្ព័ន្ធជាមួយសមាជិកក្នុងគ្រួសារបានល្អ ធ្វើឱ្យវិវឌ្ឍនាការរបស់កូនតូចកាន់តែអភិវឌ្ឍទៅយ៉ាងឆាប់រហ័សទៀតផង។
សាកល្បងនាំយកវិធីខាងលើទៅកែសម្រួលប្រើជាមួយកូនតូចលមើលថា តើកូននឹងមានប្រតិកម្មយ៉ាងណាខ្លះ។ ការពិតទៅនៅមានជាច្រើនវិធីទៀតដែលអាចនាំទៅសាកល្បងរឿងវិវឌ្ឍនាការរបស់កូនបាន អាស្រ័យលើភាពងាយស្រួលរបស់លោកឪពុក អ្នកម្តាយហ្នឹងឯង៕
May 12, 2020
ក្លិប4 នៅលីកកំពូលអង់គ្លេស កំពុងប្រជែងគ្នាយកខ្សែប្រយុទ្ធអ៊ីរ៉ង់ ដែលបានស៊ុតហ៊ែតទ្រីក កម្ពុជា
កីឡាកររបស់ក្លិប Zenit St.Petersburg Sardar Azmoun កំពុងទទួលបាននូវការចាប់អារម្មណ៍យ៉ាងខ្លាំងពីសំណាក់ក្លិបធំចំនួន4 នៅ Premier League ដែលមាន Leicester City, Westham United, Eveton និង Arsenal ក្រោយពេលរូបគេបានបង្ហាញទម្រង់លេងយ៉ាងល្អក្នុងវគ្គជម្រុះ UEFA Champions League។
កីឡាកររូបនេះ ក៏ជាចំណែកមួយដែលបានបង្កើតប្រវត្តិសាស្ត្រជូរចត់ដល់ក្រុមបាល់ទាត់ជម្រើសជាតិកម្ពុជាផងដែរ ដោយបានយកឈ្នះយ៉ាងមិនសំចៃដៃ មកលើក្រុមជម្រើសជាតិគោព្រៃ កាលពីឆ្នាំ2019កន្លងទៅ នៅក្នុងវគ្គជម្រុះ FIFA World Cup ឆ្នាំ2022 ក្នុងលទ្ធផល 14ទល់នឹង0។
គួរបញ្ជាក់ដែរថា កីឡាករក្លិប Zenit St.Petersburg រូបនេះទំនងជាអាចនឹងទៅចូលរួមជាមួយនឹង Arsenal ប្រសិនបើការចរចា ត្រូវរ៉ូវជាមួយនឹងក្លិបនេះ ដោយសារតែកីឡាកររូបនេះហាក់មានចំណាប់អារម្មណ៍ខ្លាំងជាងគេជាមួយក្លិបនេះ៕

May 12, 2020
ADB គ្រោងនឹងផ្តល់ហិរញ្ញប្បទាន ប្រមាណ 1300លានដុល្លារអាមេរិក ដើម្បីឆ្លើយតបតម្រូវការអភិវឌ្ឍកម្ពុជាពីឆ្នាំ2021-2023
ធនាគារអភិវឌ្ឍន៍អាស៊ី ឬADB គ្រោងនឹងផ្តល់ហិរញ្ញប្បទានប្រមាណ ប្រមាណ 1.3ប៊ីលានដុល្លារអាមេរិក តាមរយៈកម្មវិធី/គម្រោងអភិវឌ្ឍន៍ និងជំនួយបច្ចេកទេស (COBP) ឆ្នាំ2021-2023 ដែលនឹងចូលរួមយ៉ាងសកម្មក្នុងការធ្វើយ៉ាងណាឱ្យការអនុវត្តយុទ្ធសាស្រ្ត ភាពជាដៃគូសម្រាប់អភិវឌ្ឍន៍កម្ពុជាឆ្នាំ2019-2023 របស់ADB សម្រេចបានជោគជ័យ ក៏ដូចជាដើម្បីឆ្លើយតបទៅនឹង តម្រូវការនៃកិច្ចអភិវឌ្ឍន៍របស់កម្ពុជាដែរ។
បើគិតទាំងសហហិរញ្ញប្បទានពីដៃគូអភិវឌ្ឍន៍ផ្សេងៗ រួមជាមួយថវិកាបដិភាគ របស់រាជរដ្ឋា ភិបាល កម្មវិធី/គម្រោងអភិវឌ្ឍន៍ និងជំនួយបច្ចេកទេសឆ្នាំ2021-2023 របស់ ADB មានទឹកប្រាក់ ចំនួនប្រមាណ 1.5ប៊ីលានដុល្លារអាមេរិក។
រដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុ និងលោកស្រី Sunniya Durrani-Jamal នាយិកាស្ថានតំណាង ធនាគារអភិវឌ្ឍន៍អាស៊ី (ADB)ប្រចាំកម្ពុជា កាលពីថ្ងៃទី8 ខែឧសភា ឆ្នាំ2020 នៅទីស្តីការក្រសួងសេដ្ឋកិច្ច និងហិរញ្ញវត្ថុ បានដឹកនាំកិច្ចប្រជុំ Country Operation Business Plan-COBP 2021-2023 តាមរយៈ Video Conference ដើម្បីធ្វើការពិភាក្សា និងផ្លាស់ប្តូរមតិយោបល់ស៊ីជម្រៅអំពីស្ថានភាព បញ្ហាប្រឈម និងជម្រើសនៃដំណោះស្រាយជាយុទ្ធសាស្រ្តក្នុងវិស័យអាទិភាពសំខាន់ៗ។
ឯកឧត្តម វង្សី វិស្សុត រដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុ មានប្រសា សន៍ថា៖«រាជរដ្ឋាភិបាលបានផ្តល់នូវអាទិភាពខ្ពស់បំផុតលើកិច្ចការប្រយុទ្ធប្រឆាំងនឹងវីរុសកូវីដ-19 ដើម្បីទប់ស្កាត់ការឆ្លង ការចម្លង និងការពារអាយុជីវិតរបស់ប្រជាជន។ ជាក់ស្តែង ចំនួននៃការឆ្លង មានត្រឹមតែ 122 ករណីប៉ុណ្ណោះ ដែលភាគច្រើននៃការឆ្លងជំងឺនេះ គឺការនាំចូល ឬមានប្រភពមកពីខាង ក្រៅ និងមួយចំនួនតូច ជាការឆ្លងបន្តទៅប្រជាពលរដ្ឋក្នុងស្រុក»។
ទន្ទឹមនឹងនេះ រាជរដ្ឋាភិបាលក៏ផ្តោតការយកចិត្តទុកដាក់លើការជួយអន្តរាគមន៍ ដើម្បីការ រក្សាលំនឹងជីវភាពប្រជាជន ពិសេសសម្រាប់ប្រជាជនក្រីក្រ និងក្រុមជនងាយរងគ្រោះ ព្រមទាំងអ្នក បាត់បង់ការងារ តាមរយៈការដាក់ចេញនូវគោលនយោបាយ និងកម្មវិធីជំនួយសង្គម ការបន្តអនុវត្ត គម្រោងសាច់ប្រាក់ពលកម្ម និងការរៀបចំវគ្គបណ្តុះបណ្តាលជំនាញទន់ និងការផ្តល់ប្រាក់ឧបត្ថម្ភ ដល់កម្មករ នៅពេលដែលរោងចក្រព្យួរអាជីវកម្ម។
ឯកឧត្តមក៏បានលើកឡើងផងដែរថា ថ្មីៗនេះ ក្រសួងសេដ្ឋកិច្ច និងហិរញ្ញវត្ថុ បាននិងកំពុង រៀបចំនូវសេចក្តីព្រាងផែនការសម្រាប់ជំរុញសេដ្ឋកិច្ច ដោយផ្អែកលើសភាពការណ៍វិវឌ្ឍន៍ និងគោល ការណ៍សំខាន់ៗចំនួន 4 គឺ៖ 1-និន្នាការសកល បន្ទាប់ពីវិបត្តិវីរុសកូវីដ-19។ 2-ការកំណត់ និងជ្រើស រើសវិស័យដែលអាទិភាព និងមានសក្តានុពលខ្ពស់។ 3-ការកែទម្រង់រចនាសម្ព័ន្ធស៊ីជម្រៅ និងប្រាកដនិយម និង 4-ការបង្កើនចំណាយថវិកាកាន់តែធំជាងមុន និងកាន់តែមានប្រសិទ្ធភាពខ្ពស់ ជាងមុន តាមរយៈការបង្កើនទំហំនៃការខ្ចី ទាំងពីដៃគូអភិវឌ្ឍន៍នានា និងតាមការបោះសញ្ញាបណ្ណក្នុង ស្រុក នាពេលខាងមុខ។
ជាក់ស្តែង កម្មវិធីគាំទ្រចំណាយ និងការឆ្លើយតបទៅនឹងជំងឺកូវីដ-19 (COVID-19 Active Response and Expenditure Support Program) ដែលមានទឹកប្រាក់សរុបចំនួន 250លាន ដុល្លារអាមេរិក ត្រូវបានផ្តល់ការអនុម័តដោយក្រុមប្រឹក្សាភិបាល ADB កាលពីពេលថ្មីៗនេះ តាម សំណើបន្ទាន់របស់កម្ពុជាផងដែរ។
បន្ថែមពីនេះ ក្នុងកិច្ចគាំទ្រដល់ការអភិវឌ្ឍសហគ្រាសធុនតូច-មធ្យម (SME) នៅកម្ពុជា ក្រសួងសេដ្ឋកិច្ច និងហិរញ្ញវត្ថុក៏បានស្នើឱ្យ ADB ពិនិត្យមើលការបញ្ចូលនូវសមាសភាព នៃធនាគារឥណទាន (Guarantee) សម្រាប់ SME ទៅក្នុងគម្រោងជំរុញការអភិវឌ្ឍ កសិ-ធុរកិច្ច ប្រកបដោយការប្រកួតប្រជែង (Competitive Agribusiness Development Project) ដែលមានទឹកប្រាក់សរុបចំនួនប្រមាណ 111លានដុល្លារអាមេរិក ដែលនឹងជួយដោះស្រាយបញ្ហាប្រឈមជាគន្លឹះរបស់ SME។
ឯកឧត្តម វង្សី វិស្សុត បានថ្លែងអំណរគុណយ៉ាងជ្រាលជ្រៅចំពោះ ADB ដែលបានផ្តល់ការ ជឿទុកចិត្ត និងជឿជាក់លើការដឹកនាំរបស់រាជរដ្ឋាភិបាលកម្ពុជា តាមរយៈការអនុម័តផ្តល់ហិរញ្ញប្ប ទានសហប្រតិបត្តិការសម្រាប់ការអភិវឌ្ឍនានានៅកម្ពុជា កាន់តែច្រើនជាងមុន និងទាន់ពេលវេលា តាមសំណើរបស់កម្ពុជា ដែលនឹងរួមចំណែកយ៉ាងធំធេង ក្នុងការអភិវឌ្ឍកម្ពុជា សំដៅជំរុញសេដ្ឋកិច្ចកម្ពុជាឡើងវិញនៅក្នុងបរិការណ៍វីរុសកូវីដ-19 នេះ។
គិតចាប់ពីឆ្នាំ1992 រហូតដល់បច្ចុប្បន្ន ADB បានផ្តល់ហិរញ្ញប្បទានសហប្រតិបត្តិការដល់ប្រទេសកម្ពុជា សម្រាប់ហិរញ្ញប្បទានគម្រោងអភិវឌ្ឍន៍នានា មានទឹកប្រាក់សរុបចំនួនប្រមាណ 3485 លានដុល្លារអាមេរិក ដែលក្នុងនោះ ឥណទានសម្បទានចំនួនប្រមាណ 2983លានដុល្លារអាមេរិក និងហិរញ្ញប្បទានឥតសំណងចំនួនប្រមាណ 502លានដុល្លារអាមេរិក៕

May 12, 2020
ស្ងាត់ៗ បាត់មុខតារាចម្រៀង 2ដួងក្នុងពីផលិតកម្មកាឡាក់ស៊ីណាវាត្រាឱ្យឈឹង
ខណៈដែលមហាជនជាច្រើនបានឃើញតារាចម្រៀងស្រីវ័យក្មេងនៅក្នុងផលិតកម្ម កាឡាក់ស៊ីណាវាត្រា គឺកញ្ញា តន់ ចន្ទសីម៉ា និងប្អូនស្រី អ៊ុក សុវណ្ណារី សម្រុកចេញបទចម្រៀងថ្មីៗជាច្រើននៅលើបណ្ដាញសង្គមយូធូប ភ្លាមៗនោះគេស្រាប់តែនឹកឆ្ងល់ក្នុងចិត្តថា តារាចម្រៀងល្បីឈ្មោះ 2 ដួងទៀត ហេតុអ្វីបាត់មុខពីផលិតកម្មខាងលើ ដែលសុទ្ធសឹងតែជាម្ចាស់បទល្បីៗ ដូចជាបទ ប្រមូលអ្នក Sigle , ថ្ងៃនេះខ្ញុំការហើយ ,ខ្ចប់ទឹកភ្នែកគប់កណ្ដាលមុខ និង ស្រីសល្អឯក ជាដើម។
អស់រយៈពេលមួយឆ្នាំហើយដែលគេខានបានឃើញអ្នកនាង រ័ត្ន រចនា និងលោក ចាន់ សម័យ ចេញបទចម្រៀងនៅក្នុងផលិតកម្មនេះទៀត។ យ៉ាងណាមិញ គេបានដឹងថា អ្នកនាងរ័ត្ន រចនា បានសាងប្រជាប្រិយល្បីបានមួយឆាវនៅលើបណ្ដាញសង្គមហ្វេសប៊ុកតាមរយៈបទ « មេម៉ាយសប្បាយចិត្ត » រហូតដល់អ្នកនាងបានបង្ហាញវត្តមាននៅក្នុងផលិតកម្មកាឡាក់ស៊ី។ ភាពល្បីល្បាញរបស់អ្នកនាង បានបន្ដឱ្យមហាជនចាប់អារម្មណ៍បទចម្រៀងថ្មីសន្លាងរបស់អ្នកនាងគឺបទ «ប្រមូលអ្នក Sigle » ដែលជាចង្វាក់រាំបែបប្រជាប្រិយ ចេញក្នុងអំឡុងពេលចូលឆ្នាំប្រពៃណីខ្មែរមួយឆ្នាំមុន រហូតដល់មានបទបន្ដបន្ទាប់បាន 2 ទៅ3 បទ ហើយក៏បាត់មុខវិញ។ រីឯតារាចម្រៀង ចាន់ សម័យ វិញ គេមើលឃើញថា លោកបានបាត់មុខអស់រយៈពេលជាយូរនៅក្នុងពិភពសិល្បៈដោយភាពដុនដាបនៃជំងឺប្រចាំកាយ។ ក៏ប៉ន្ដែ លោកបានបង្ហាញវត្តមានក្នុងសិល្បៈជាថ្មីម្ដង ដោយមានការជួយជ្រោមជ្រែងពីមិត្តរួមអាជីពផង និងពីសំណាក់ម្ចាស់ផលិតកម្មមួយនេះផងដែរ។
រហូតមកដល់សព្វថ្ងៃនេះ នៅក្នុងផលិតកម្មកាឡាក់ស៊ីណាវាត្រា ត្រូវបានដាក់បង្ហាញតារាចម្រៀងក្មេងៗចំនួន 4រូប ក្នុងនោះរួមមាន ប្អូនស្រី អ៊ុក សុវណ្ណារី ប្អូនប្រុស ធឿន បុរី លោក Tempo និងកញ្ញា តន់ ចន្ទសីម៉ា តែប៉ុណ្ណោះ។ ចំពោះវត្តមានតារាចម្រៀង អ្នកនាង រ័ត្ន រចនា និងលោក ចាន់ សម័យ ត្រូវបានគេសង្ស័យថា បានចាកចេញពីផលិតកម្មហើយ។ លោក ចាន់ សម័យ សង្ស័យអាចបណ្ដាលមកពីស្ថានភាពសុខភាព រីឯ រចនា ត្រូវគេឃើញបង្ហាញវត្តតែតាមរយៈកម្មវិធីច្រៀងការ និងកម្មវិធីប្រគំតន្ត្រីមួយចំនួនតែប៉ុណ្ណោះ។ ជាក់ច្បាស់យ៉ាងណានោះ អ្នកគាំទ្រគ្រប់គ្នាមានតែរង់ចាំការបកស្រាយពីខាងផលិតកម្ម ក៏ដូចជាអ្នកគ្រប់គ្រងធ្វើការស្រាយបំភ្លឺបន្ថែម៕

May 12, 2020