Category: សង្គម និងសេដ្ឋកិច្ច

Facebook បង្កើតប្រព័ន្ធ AI ថ្មីមួយទៀត ដើម្បីតាមដានព័ត៌មានមិនពិត អំឡុងពេលផ្ទុះកូវីដ-19
ព័ត៌មានមិនពិត គឺជារឿងដ៏រសើបបំផុតមួយ ក្នុងការធ្វើឱ្យមនុស្សមានការភាន់ច្រឡំចំពោះព្រឹត្តិការណ៍ផ្សេងៗ ជាពិសេស នៅពេលដែលពិភពលោកទាំងមូលកំពុងធ្វើការប្រយុទ្ធប្រឆាំង និងទប់ស្កាត់យ៉ាងខ្លាំង ទាក់ទងទៅនឹងមេរោគកូវីដ-19។
ក្នុងនោះប្រទេសកម្ពុជាយើង ក៏បាននិងកំពុងតែខំប្រឹង និងតាមដានស្រាវជ្រាវដើម្បីទប់ស្កាត់ព័ត៌មានក្លែងក្លាយទាំងនោះដែរ។
ដើម្បីទប់ស្កាត់ការផ្សព្វផ្សាយព័ត៌មានមិនពិត និងបំភាន់នៅលើបណ្តាញសង្គម ក្រុមហ៊ុនហ្វេសប៊ុកបានប្រើប្រព័ន្ធ AI ដើម្បីធ្វើការតាមដានព័ត៌មានមិនពិតទាក់ទងទៅនឹងមេរោគកូវីដ-19 ដែលអាចធ្វើឱ្យលោកអ្នកមានការភាន់ច្រឡំទៅលើការរីករាលដាល ឬការព្យាបាលនៃជំងឺនេះ។
ជាក់ស្តែងវាពិតជាមានការលំបាកខ្លះៗហើយ ក្នុងទប់ស្កាត់ និងបង្ក្រាបការលក់ផលិតផលក្លែងក្លាយសម្រាប់ការពារការឆ្លងនៃមេរោគកូវីដ-19 ដែលមានដូចជា ម៉ាស់បិទមុខ ទឹកលាងដៃ និងឧបករណ៍ធ្វើតេស្តទាំងនោះ ដោយសារតែមានជនខិលខូចធ្វើការកែរូបភាពតែបន្តិចបន្តួច ក៏អាចបំភាន់ភ្នែកអ្នកតាមដាន ឬប្រព័ន្ធ AI បានបាត់ទៅហើយ។ ព្រោះតែពិបាកក្នុងការវិភាគព័ត៌មាន ក៏ដូចជារូបភាពក្លែងក្លាយទាំងនោះ ក្រុមហ៊ុនបានប្រើប្រព័ន្ធ SimSearchNet ដែលជាប្រព័ន្ធបង្កើតឡើងដើម្បីចាប់ភ័ស្ដុតាងក្នុងរូបភាពដែលសឹងតែដូចគ្នាបេះបិទទាំងនោះ។
ដោយការប្រើប្រាស់បច្ចេកវិទ្យាថ្មីៗ ក្រុមហ៊ុនហ្វេសប៊ុកបានធ្វើការដាក់ជាបម្រាមតាមបណ្តាញសង្គមរបស់ពួកគេជាង ៥០លានបម្រាមរួចមកហើយ ទាក់ទងទៅនឹងការឆ្លងរីករាលដាលនៃមេរោគកូវីដ-19 កាលពីអំឡុងខែមេសាកន្លងទៅនេះ។ ដោយឡែកចាប់ពីថ្ងៃទី1 ខែមីនាមក ហ្វេសប៊ុកបានលុបចោលនូវការផ្សព្វផ្សាយលក់ ម៉ាស់បិទមុខ ទឹកលាងដៃ ឧបករណ៍ធ្វើតេស្តរកមេរោគកូវីដ-19 បានប្រមាណជា 2.5លាន ហើយក្រុមហ៊ុន ក៏បានសហការជាមួយអង្គការប្រមាណជា 60ផ្សេងទៀត ដើម្បីត្រួតពិនិត្យតាមដានព័ត៌មានក្លែងក្លាយ ជុំវិញពិភពលោកដែលសរសេរជាភាសាផ្សេងៗគ្នាប្រហែល 50ភាសាផងដែរ៕
ប្រភព៖ នាយកដ្ឋានប្រឆាំងបទល្មើសបច្ចេកវិទ្យា
May 15, 2020
ភ្នាក់ងារ FBI អាមេរិក ចោទចិនថា លួចទិន្នន័យស្រាវជ្រាវវ៉ាក់សាំងកូវីដ-19
Hacker របស់ចិន បាននិងកំពុងប៉ុនប៉ងលួចទិន្នន័យជំងឺកូរ៉ូណាពីការព្យាបាល និងវ៉ាក់សាំងការពារមេរោគនេះពីអាមេរិក ដោយអាជ្ញាធរអាមេរិក បានព្រមានកាលពីថ្ងៃទី13 ខែឧសភា ឆ្នាំ2020 ថា ភ្នាក់ងារ FBI និងភ្នាក់ងារសន្តិសុខហេដ្ឋារចនាសម្ព័ន្ធ និងសន្តិសុខប្រព័ន្ធអ៊ីនធើណិត (CISA) បានបញ្ជាក់ថា ស្ថាប័នដែលស្រាវជ្រាវអំពីមេរោគកូវីដ-19 កំពុងស្ថិតក្នុងហានិភ័យនៃការក្លាយជាគោលដៅរបស់ចិន។
ភ្នាក់ងារខាងលើ បានព្រមានថា រដ្ឋាភិបាលចិនមានការជាប់ពាក់ព័ន្ធជាមួយក្រុមលួចទិន្នន័យ ដើម្បីប្រមូលយកនូវទិន្នន័យសុខភាពពាក់ព័ន្ធវ៉ាក់សាំង ការព្យាបាល និងការធ្វើតេស្ត ចេញពីបណ្តាញ និងអ្នកដែលពាក់ព័ន្ធក្នុងការស្រាវជ្រាវមេរោគកូវីដ-19។ កិច្ចប្រឹងប្រែងរបស់ចិន លើវិស័យទាំងនេះ បានបង្កការគំរាមកំហែងដល់ប្រទេសរបស់យើង ក្នុងការដោះស្រាយបញ្ហាកូវីដ១៩។
ទោះជាយ៉ាងណាក៏ដោយ ភ្នាក់ងារទាំង2 បានត្រឹមតែចោទចិនប៉ុណ្ណោះ ព្រោះមិនទាន់មានភស្តុតាងណាមួយមកបង្ហាញឡើយ៕
May 15, 2020
Facebook សាងសង់បណ្ដាញខ្សែកាបអ៊ីនធើណិតក្រោមសមុទ្រ ប្រវែងជិត1ជុំផែនដី
Facebook ត្រៀមកសាងបណ្ដាខ្សែកាប់អ៊ីនធើណិតក្រោមសមុទ្រ ដែលមានប្រវែងសរុប37,000គីឡូម៉ែត្រ តភ្ជាប់ប្រទេសចំនួន23នៅទ្វីបអាហ្វ្រិក ជាមួយនឹងទ្វីបអឺរ៉ុប និងមជ្ឈិមបូពា៌។
តំណាងរបស់ក្រុមហ៊ុន Facebook បានឱ្យដឹងថា គម្រោងខាងលើនេះមានឈ្មោះថា 2Africa (ឈ្មោះដំបូងគឺ Simba)។ គម្រោងនេះមានការសហការគ្នាជាមួយក្រុមហ៊ុនអ៊ីនធើណិតជាច្រើន រួមមាន China Mobile របស់ចិន MTN របស់ប្រទេសអាហ្វ្រិកខាងត្បូង Orange និង Vodafone របស់បារាំង ក៏ដូចជាបណ្ដាក្រុមហ៊ុនរកស៊ីក្នុងវិស័យទូរគមនាគមន៍ជាច្រើនទៀតនៅពាសពេញទ្វីបអាហ្វ្រិក ជាកន្លែងដែលខ្សែកាបអ៊ីនធើណិតទៅដល់។ ប្រព័ន្ធខ្សែកាបអ៊ីនធើណិតក្រោមសមុទ្រនេះនឹងត្រូវបានផ្គត់ផ្គង់ដោយក្រុមហ៊ុន Nokia ហើយក្រុមហ៊ុន Alcatel នឹងជាអ្នកសាងសង់។
ជាមួយនឹងប្រវែង37,000គីឡូម៉ែត្រនេះ Facebook ប្រកាសថា វាគឺជាបណ្ដាញខ្សែកាប់អ៊ីនធើណិតក្រោមសមុទ្រដែលវែងជាងគេបង្អស់មួយនៅក្នុងពិភពលោក ពោលគឺវា “ជិតស្មើនឹង1ជុំផែនដី”។
2Africa នឹងប្រើប្រាស់ខ្សែកាបដែលសរសៃខាងក្នុងរបស់វាធ្វើអំពីអាលុយមីញ៉ូម ជំនួសឱ្យសរសៃធ្វើអំពីស្ពាន់ ក្នុងបំណងដើម្បីបង្កើនសមត្ថភាពនៃការបញ្ជូនអ៊ីនធើណិត។ បន្ទាប់ពីកសាងរួចរាល់ បណ្ដាញខ្សែកាបនេះនឹងអាចផ្គត់ផ្គង់អ៊ីនធើណិតល្បឿន150Terabit/វិនាទី (1Terabit=1,000Gigabit)។ សមត្ថភាពនេះខ្លាំងជាង3ដងបើធៀបជាមួយនឹងបណ្ដាញខ្សែកាប់ទាំងអស់ដែលមាននៅទ្វីបអាហ្វ្រិកនាបច្ចុប្បន្ន បូកចូលគ្នា។
Kevin Salvadori ដែលជានាយកផ្នែកវិនិយោគលើអ៊ីនធើណិតរបស់ Facebook បានឱ្យដឹងថា ក្រុមហ៊ុននេះបានចាប់ផ្ដើមពិភាក្សាជាមួយដៃគូនានាអំពីគម្រោង 2Africa ចាប់តាំងពីឆ្នាំ2018។ គម្រោងនេះនឹងត្រូវសាងសង់រួចរាល់នៅក្នុងឆ្នាំ2023 ឬដើមឆ្នាំ2024 ហើយត្រូវដាក់ឱ្យដំណើរការភ្លាមៗ ក្រោយពីកសាងរួចរាល់។
តំណាងរបស់ Facebook បានបដិសេធមិនប្រាប់អំពីខ្ទង់ប្រាក់ដែលត្រូវចំណាយទៅលើគម្រោងនេះទេ។ ប៉ុន្តែ Michael Ruddy ដែលជានាយកផ្នែកសិក្សាស្រាវជ្រាវអន្តរជាតិនៃក្រុមហ៊ុនវិភាគទីផ្សារ Terabit Consulting Inc បានគន់គូរឃើញថា បណ្ដាញខ្សែកាបអ៊ីនធើណិតខាងលើនេះ នឹងត្រូវចំណាយប្រាក់យ៉ាងតិច 800លានដុល្លារអាមេរិក។
កន្លងមក ក្រុមហ៊ុន Facebook ក៏ធ្លាប់មានបំណងផ្គត់ផ្គង់ Wifi ទៅកាន់តំបន់ដាច់ស្រយាលនានានៅទូទាំងពិភពលោក ដែលក្នុងនោះក៏មានតំបន់នានាក្នុងទ្វីបអាហ្វ្រិកផងដែរ ដោយប្រើ Aquila (គម្រោងបាញ់រលកសញ្ញា Wifi តាមរយៈយន្តហោះគ្មានមនុស្សបើកដែលដំណើរការដោយថាមពលព្រះអាទិត្យ) ប៉ុន្តែគម្រោងនេះត្រូវបានផ្អាកចាប់ពីឆ្នាំ2018។
ក្រៅពី Facebook ក្រុមហ៊ុន Google ក៏កំពុងដំណើរការគម្រោងសាងសង់ខ្សែកាបអុបទិកមួយទៀតដែលមានឈ្មោះថា Equino ដែលនឹងតភ្ជាប់ទ្វីបអាហ្វ្រិកជាមួយនឹងអឺរ៉ុប។ Google ក៏កំពុងមានមហិច្ឆតាក្នុងការបាញ់រលកសញ្ញាអ៊ីនធើណិត 4G ទៅកាន់តំបន់ដាច់ស្រយាលនៅទូទាំងពិភពលោក ដោយគម្រោង Project Loon ដែលប្រើប្រាស់បាឡុងហោះ។ បច្ចុប្បន្ន គម្រោងនេះកំពុងធ្វើការសាកល្បងនៅក្នុងប្រទេសមួយចំនួននៅទ្វីបអាហ្វ្រិក ក្នុងនោះក៏មានប្រទេស Mozambique ផងដែរ។
សារព័ត៌មានផ្នែកបច្ចេកវិទ្យា WSJ បានឱ្យដឹងថា នាបច្ចុប្បន្ន ទ្វីបអាហ្វ្រិកមានប្រជាជនសរុបជាង 1.2ពាន់លាននាក់កំពុងរស់នៅ។ ក៏ប៉ុន្តែ ពួកគេភាគច្រើនមិនបានប្រើប្រាស់អ៊ីនធើណិត ឬបានប្រើដែរ តែតាមរយៈឧបករណ៍ 2G ប៉ុណ្ណោះ៕
ប្រភព៖ សារព័ត៌បរទេស
May 15, 2020
ប្រជាជនបន្តដាំដុះបន្លែត្រសក់ខណៈពេលនេះកំពុងមានហាងឆេង
ដោយសារតែគ្រប់បណ្តាប្រទេសជាច្រើនរួមទាំងប្រទេសកម្ពុជាផងកំពុងសហការទប់ស្កាត់នៃការរីករាលដាលនូវជំងឺកូវីដ19 បង្ខំឱ្យច្រកជាច្រើននៅតាមតំបន់ព្រំដែនត្រូវបិទ ហើយតម្រូវការទីផ្សារមានការកើនឡើងធ្វើឱ្យតម្លៃបន្លែបន្លែផ្លែឈើជាច្រើនបានឡើងថ្លៃគួរសម។
ក្នុងចំណោមបន្លែទាំងអស់ ត្រសក់ដែលជាបន្លែមានប្រជាប្រិយភាពជាងគេនៅកម្ពុជា ក៏កំពុងមានទីផ្សារល្អផងដែរ ដែលចំណុចនេះធ្វើឱ្យកសិករនៅក្នុងតំបន់នានាចាប់ផ្តើមបន្តមើលថែទាំ និងដាំដុះកាន់តែច្រើនឡើង។
ប្រជាកសិកជាដាំបន្លែត្រសក់នៅចំណុចភូមិចំការសំរោង1 សង្កាត់ចំការសំរោង ក្រុងបាត់ដំបង បានលើកឡើងថា ពួកគាត់បានចាប់យករបរដាំដំណាំបន្លែត្រសក់នេះជាច្រើនឆ្នាំមកហើយ ចំណែកឯតម្លៃវិញ កន្លងមកមានការឡើងចុះមិនសូវថេរនោះទេ។ មានពេលខ្លះត្រសក់ត្រូធ្លាក់ថ្លៃមកនៅក្រោម1,000រៀលឬរហូតមកដល់200រៀលក៏មាន តែមួយរយៈចុងក្រោយនេះបន្ទាប់ពីមានផ្ទុះជំងឺCovid-19កើតឡើងបានធ្វើឱ្យតម្រូវការត្រសក់កើនឡើងខ្ពស់ដែលធ្វើឱ្យតម្លៃក៏ឡើងខ្ពស់តាមនោះដែរ។ នៅក្នុងស្ថានភាពនេះ តម្លៃត្រសក់ក្នុងរដូវប្រមូលផលបានហក់ឡើងខ្ពស់គួរសម ដោយពួកគាត់អាចលក់បានតម្លៃចាប់ពី 2,000រៀលរហូតទៅដល់3,000រៀលក្នុងមួយគីឡូក្រាម។ តម្លៃនេះអាចធ្វើឱ្យកសិកររកប្រាក់ចំណូលបានច្រើនគួរសមសម្រាប់ផ្គត់ផ្គង់ជីវភាពគ្រួសារ និងជាទុនសម្រាប់ដាំដុះបន្ត។
ពួកគាត់បានបញ្ជាក់បន្តថាបច្ចុប្បន្នពួកគាត់ដាំដំណាំត្រសក់អន្លក់នេះក្នុងម្នាក់ៗនៅលើផ្ទៃដីទំហំកន្លះហិកតា ហើយចំពោះការប្រមូលផលវិញគិតចាប់ពីថ្ងៃប្រមូលផលដំបូងរហូតអស់ផ្លែមានរយៈពេលជាង20ថ្ងៃនិងទទួលបានផលចាប់ពីជាង10តោនទៅ20តោន។
ប្រជាកសិករដដែលបានបញ្ជាក់បន្ថែមថា នៅរដូវកាលប្រមូលផលនេះត្រសក់ដែលមានប្រភពចេញពីតំបន់ក្នុងភូមិសាស្ត្រសង្កាត់ចំការសំរោង ភាគច្រើនត្រូវបានឈ្មួញនាំយកទៅលក់នៅផ្សារភួពុយ ស្ថិតក្នុងក្រុងបាត់ដំបង សម្រាប់ចែកចាយបន្តទៅរាជធានីភ្នំពេញ និងតាមបណ្តាខេត្តផ្សេងៗផងដែរ៕
May 15, 2020
បើកទម្លាយអាថ៌កំបាំង!! អ្នកនាង ម៉េង កែវពេជ្ជតា Live Video ឆ្លើយតបអតីតស្វាមីនិងភរិយាថ្មី
តាំងពីថ្ងៃទី10 ខែឧសភា ឆ្នាំ 2020 ដែលចំថ្ងៃទិវាស្រឡាញ់មាតពិភពលោក តារាចម្រៀង ម៉េង កែវពេជ្ជតា ជាកំពូលតារាចម្រៀងល្បីមួយរូបនៅក្នុងប្រទេសកម្ពុជា បានចេញមុខនិយាយនៅក្នុងវីដេអូ Live Facebook ទាំងអស់អះអាថា អ្នកនាងចង់ជ្រះភាពមន្ទិលនៃខួប 10ឆ្នាំ ក្នុងការលែងលះរបស់អ្នកនាងជាមួយអតីតស្វាមីលោក មួង ឃឹម ដោយប្រពន្ធតុលាការ ហើយរឹតតែមិនពេញចិត្តចំពោះទង្វើហិង្សា ដែលអីតតស្វាមីរបស់អ្នកនាងធ្វើមមកលើរូបអ្នកនាង។
តារាចម្រៀងស្រីចាស់វស្សារូបនេះ បានអះអាងទៀតថា ខ្លួនពិតជាមិនសុខចិត្ត ដែលត្រូវរងកម្មពារអស់រយៈពេលជាច្រើនឆ្នាំហើយ នៅត្រូវបានបាត់ទឹកទាំងកេរ្ដិ៍ឈ្មោះ និងរងឈ្មោះជាស្ត្រីជេរប្ដីថែទៀត។ នៅក្នុងវីដេអូឡាយចំនួន 3ឃ្លីប ដែលមានរយៈពេលជាច្រើនម៉ោងនោះ អ្នកនាង ម៉េង កែវពេជ្ជតា សង្កត់ហើយសង្កត់ទៀតទៅលើចំនុចត្រង់ថា ប្ដីប្រពន្ធឈ្លោះប្រកែកគ្នា ជេរគ្នា ហេតុអ្វីក៏ត្រូវបញ្ចេញសំឡេងរបស់អ្នកនាងដែលត្រូវអតីតស្វាមីលួចថត តែភាគីអ្នកនាងម្ខាង ឱ្យពិភពលោកបានស្ដាប់អ៊ីចឹង ហើយចុះសំឡេងអតីតប្ដីដែលជេរអ្នកនាងក្ដែងៗ ម៉េចមិនបញ្ចេញសំឡេងមកក្រៅផង វាហាក់បីដូចជាអយុត្តិធម៌ពេកចំពោះអ្នកនាង ដែលកន្លងមកខិតខំថែរក្សាកិត្តិយសឱ្យប្ដីអស់ជាច្រើឆ្នាំ ទាំងបិទមាត់សង្កត់ចិត្ត។
តែអ្នកនាងក៏បានបញ្ជាក់បែបឌឺដងទៅកាន់ លោក មួង ឃីម និងភរិយាបច្ចុប្បន្ននោះ ផងដែរថា ប្រពន្ធថ្មីដែលមកក្រោយនោះ ខ្ញុំគិតថា នាងហ្នឹង មកទទួលកម្មពីខ្ញុំហើយ ។ដោយសារតែម្នាក់ស្រីហ្នឹង ដែលនាំឱ្យខ្ញុំបែកគ្នា ព្រោះ ខ្ញុំអត់ដែលចេះជេរគ្នា តែការលេចចេញការជេរនោះ គឺក្រោយទេ ព្រោះគេធ្វើបាបខ្ញុំខ្លាំងពេក អ៊ីចឹងហើយបានធ្លាយការជេរគ្នានោះ បើចេះតែជេរគ្នាព្រឹកល្ងាចនោះ ប្រហែលមិនអាចរស់នៅជាមួយគ្នាបាន 5ឆ្នាំ និងបានកូន2នាក់នោះទេ។ ទាក់ទងនឹងការឡើងឋានៈរបស់លោក មួង ឃីម ពីស័ក្តិ5 មកផ្កាយពីរក្នុងអំឡុងពេលរស់នៅជាមួយគ្នាក្នុងនាមជាប្តីប្រពន្ធស្របច្បាប់នោះ ត្រូវបានតារារូបនេះ និយាយថា បើអ្នកនាងអសីលធម៌មែន លោក មួង ឃីម ក៏មិនបានឡើងពីស័ក្តិ៥មកផ្កាយពីរដែរ។ ជុំវិញការលេចឮពាក្យចចាមអារ៉ាមថា អ្នកនាងមានទំនាក់ទំនងស្នេហាជាមួយអ្នកផ្សេងនោះ ត្រូវបានតារារូបនេះ បញ្ជាក់ថា នោះជាការចោទប្រកាន់របស់លោក មួង ឃីម ។
នៅមានរឿងវ៉ាវជាច្រើនទៀតដែលកំពូលតារាចម្រៀងរូបនេះបានទម្លាយចេញឱ្យមហាជនបានស្ដាប់ និងពិចារណាពីជីវិតរបស់អ្នកនាង ដែលរងនូវឈ្មោះជាស្ត្រីជេរប្ដី តែជាការពិតនោះអ្នកនាងកាន់តែចង់និយាយ គឺនិយាយទាល់តែភាពអយុត្តិធម៌ដែលកើតតមានលើរូបអ្នកនាងជាង10ឆ្នាំ ត្រូវបានបើកមុខអស់ ។ អ្នកនាងបានសូមជម្រាបថា ភាពវេទនារបស់អ្នកនាងនិងកូនៗ គឺមានច្រើនណាស់ក្នុងរយៈ10ឆ្នាំមកនេះ ។ ដើម្បីជាក់ច្បាស់បន្ថែមសូមទស្សនាវីដេអូខាងក្រោមនេះ៖

May 15, 2020
ក្រោយមានឋានៈជាលោកជំទាវ អតីតតារាចម្រៀងសាន់ដេ អ្នកនាង ផាន់ ម៉ូលីកា ត្រៀមផលិតចម្រៀងឡើងវិញ រំឭកអាជីពសិល្បៈ
ម្ចាស់បទចម្រៀងល្បីបំផុតនៅសាន់ដេ « បើគ្មានបងតើឱ្យអូនស្នេហ៍អ្នកណា » គឺអ្នកនាង ផាន់ ម៉ូលីកា បានលាឈប់ពីសិល្បៈអស់រយៈពេលជាច្រើនឆ្នាំណាស់មកហើយ ដោយសារអ្នកនាងបានរៀបការមានគ្រួសារហើយត្រូវចំណាយពេលវេលាមើលថែទាំកូនៗ។ អ្នកនាងបានប្រើប្រាស់បណ្ដាញសង្គមហ្វេសប៊ុកក្នុងការទំនាក់ទំនងជាមួយមិត្តសិល្បៈ និងអ្នកគាំទ្រអ្នកនាងមួយចំនួន។ ជានិច្ចជាកាលគេឃើញអ្នកនាងបង្ហោះរូបជាមួយគ្រួសារ និងកូនៗ ក៏ប៉ុន្ដែអ្វីដែលគេចាប់អារម្មណ៍ខ្លាំងជាងគេនោះគឺ រូបសម្រស់មិនប្រែប្រួលរបស់អ្នកនាង។
ជាក់ស្ដែងរូបភាពជាច្រើនសន្លឹកនៅលើហ្ចេសប៊ុកកាលពីពេលថ្មីៗ រឹតតែធ្វើឱ្យគេមើលឃើញថាអ្នកនាងគឺជាអតីតសិល្បការិនី ដែលមានសុភមង្គល និងមានសំណាងក្នុងជីវិតអាពាហ៍ពិពាហ៍។
ការសរសើរចេញពីមាត់មហាជននេះ គឺបន្ទាប់ពីអ្នកនាង ផាន់ ម៉ូលីកា ទទួលបានការថ្នាក់ថ្នម និងការយកចិត្តទុកដាក់ពីសំណាក់ស្វាមីរូបសង្ហា បើទោះជាអ្នកនាងមានកូន2កូនធំៗណាស់ទៅហើយ និង បន្ទាប់ពីអ្នកនាង បង្ហាញពីជីវិតជោគជ័យនៅលើហ្វេសប៊ុកជារឿយៗ។
អ្នកនាង និង ឯកឧត្តម គង់ សុខម៉េង ជាស្វាមី ដែលត្រូវគេស្គាល់ថាទើបតែបានតំណែងជាទីប្រឹក្សាសម្ដេចក្រឡាហោម ស ខេង រមែងបង្អួតភាពផ្អែមល្ហែមក្នុងដំណើរកម្សាន្តជាលក្ខណៈជាគ្រួសារមិនសូវដាច់ ដែលមានន័យថាគូស្នេហ៍មួយគូនេះ នៅតែស្រលាញ់គ្នាមិនប្រែប្រួល ក្នុងរយៈពេលជិត10ឆ្នាំមកនេះ។ អ្នកនាងត្រូវគេដឹងថា មានឋានៈជាលោកជំទាវ និងកំពុងជោគជ័យក្នុងមុខជំនួញនាំចូលផលិតផលរក្សាសម្ផស្សយ៉ាងខ្លាំង បន្ថែមពីលើមុខរបរហាងស៊ុប និង ហាងលក់សំលៀកបំពាក់។ អ្នកនាងធ្លាប់អះអាងប្រាប់អ្នកគាំទ្រក្នយងម៉ោង Live ឃោសនា ពីផលិតផលរក្សារសម្ផស្សជារឿយៗថា អ្នកនាងមិនបោះបង់សិល្បៈទេ ប៉ុន្តែមកពីអ្នកនាងមិនទាន់មានពេលគ្រប់គ្រាន់ទើបអ្នកនាងនៅតែមិនទាន់គិតគូរ។
សូមជម្រាប អតីតតារាចម្រៀងស្រីសាន់ដេរូបនេះធ្លាប់បានបង្ហើបថា នឹងអាចមានការផលិតចម្រៀងជាលក្ខណៈឯករាជ្យក្នុងពេលខាងមុខ ដើម្បីរំឭកអាជីពសិល្បៈ ស្របពេលដែលអ្នកនាងរវល់ច្រើន មិនអាចចូលច្រៀងក្នុងផលិតកម្មដូចមុន។ ក្នុងនោះស្វាមីដែលមានឋានៈជាឯកឧត្តមរបស់អ្នកនាង ក៏មិនដែលហាមប្រាមរឿងអ្នកនាងចង់ផលិតចម្រៀងជាលក្ខណៈឯកជននោះផង ទើបអ្នកនាងអាចនឹងបង្ហាញស្នាដៃឆាប់ៗ។

May 15, 2020
ក្រុមហ៊ុន Facebook ចេញផ្សាយរបាយការណ៍ស្តីអំពីការពង្រឹងស្តង់ដាសុវត្ថិភាព សហគមន៍
ក្រុមហ៊ុន Facebook បានចេញផ្សាយរបាយការណ៍ចុងក្រោយបំផុតរបស់ខ្លួន ស្តីពីការពង្រឹងស្តង់ដាសុវត្ថិភាពសហគមន៍ កាលពីថ្ងៃអង្គារ ដោយរៀបរាប់លម្អិតអំពីមធ្យោបាយដែលក្រុមហ៊ុនកំពុងប្រើប្រាស់ដើម្បីតាមដាន និងដោះស្រាយបញ្ហាមាតិកាដែលបានផ្សព្វផ្សាយមិនស្របតាមគោលការណ៍ស្តង់ដាសុវត្ថិភាពសហគមន៍របស់ក្រុមហ៊ុននៅលើបណ្តាញទំនាក់ទំនងសង្គម Facebook និង Instagram។
របាយការណ៍ស្តីពីការពង្រឹងសុវត្ថិភាពស្តង់ដាសហគមន៍លើកទី5 នេះ មានរៀបរាប់អំពីវិធានការ ដែលក្រុមហ៊ុន Facebook បានប្រើដើម្បីពង្រឹងការអនុវត្តគោលការណ៍របស់ខ្លួន ពីចន្លោះខែតុលា ឆ្នាំ2019 ដល់ខែមីនា ឆ្នាំ2020 (ចាប់ពីត្រីមាសទី4 ឆ្នាំ2019 ដល់ត្រីមាសទី1 ឆ្នាំ2020) ប៉ុន្តែ របាយការណ៍នេះ មិនបានបញ្ចូលទិន្នន័យក្នុងអំឡុងពេលនៃការរីករាលដាលនៃមេរោគរកូវីដ-19 (COVID-19)ទេ។
Facebook បានឱ្យដឹងថា ក្រុមហ៊ុនបានរកឃើញសារបង្ហោះដែលប្រើប្រាស់ភាសាបែបរើសអើង និងស្អប់ខ្ពើម ជិត 90ភាគរយ ហើយក្រុមហ៊ុនបានលុបវាចេញ មុនពេលដែលមានគេរាយការណ៍ទៅទៀត ហើយតួលេខនេះ បានកើនឡើង 24ភាគរយ បើធៀបនឹងតួលេខក្នុងរបាយការណ៍ដំបូងរបស់ក្រុមហ៊ុន ដែលបានចេញផ្សាយក្នុងឆ្នាំ2018។
នៅលើបណ្តាញសង្គម Instagram ក្រុមហ៊ុន Facebook បានឱ្យដឹងថា ទោះបីមិនមានការរាយការណ៍ពីអ្នកប្រើប្រាស់ក៏ដោយ តែក៏ក្រុមហ៊ុនបានរកឃើញច្រើនជាងមុនចំនួន 89.7ភាគរយ នូវការបង្ហោះដែលពាក់ព័ន្ធនឹងការសម្លាប់ខ្លួន និងការបង្ករបួសស្នាមលើខ្លួនរបស់អ្នកបង្ហោះ ក្នុងត្រីមាសទី1 ពោលគឺល្អប្រសើរជាងមុនដល់ទៅ 12ពិន្ទុ បើគិតចាប់ពីរបាយការណ៍នាពេលមុនៗមក។ ជាលទ្ធផល ចំនួនមាតិកាដែលក្រុមហ៊ុន Facebook បានចេញវិធានការ បានកើនឡើង 40%។
គោលការណ៍ត្រួតពិនិត្យមាតិកាផ្សព្វផ្សាយរបស់ក្រុមហ៊ុន Facebook រួមមាន ការរើសអើង និងស្អប់ខ្ពើម រូបភាពអាក្រាតរបស់មនុស្សពេញវ័យ និងសកម្មភាពផ្លូវភេទ មាតិកា និងរូបភាពហិង្សា ព្រមទាំងការសម្លុត និងការយាយីសម្រាប់ Instagram ក៏ដូចជាទិន្នន័យអំពីបណ្តឹងតវ៉ា និងការសម្រេចចិត្តដែលយើងបានបដិសេធ។
ក្នុងរយៈពេល 3ខែដំបូងនៃឆ្នាំ2020 ក្រុមហ៊ុន Facebook បានលុបចោលការបង្ហោះមាតិកាផ្សព្វផ្សាយចំនួន 4.7លាន មាតិកា នៅតាមបណ្ដាញសង្គម Facebook ដែលទាក់ទងនឹងការប្រើប្រាសភាសារើសអើង និងស្អប់ខ្ពើម ពោលគឺកើនឡើងចំនួន 3លានមាតិកា បើប្រៀបធៀបទៅនឹងត្រីមាសមុន។
លើសពីនេះទៀត ដោយមិនមានរបាយការណ៍ពីអ្នកប្រើប្រាស់ជាមុន ក៏ក្រុមហ៊ុនបានរកឃើញច្រើនជាងមុននូវការប្រើប្រាស់ភាសាបែបរើសអើង និងស្អប់ខ្ពើម ដែលមានលក្ខណៈគ្រោងទុកជាមុន ព្រមទាំងរកឃើញ និងបានដកចេញច្រើនជាងមុន នូវមាតិកាមិនសមរម្យ មុនពេលដែលមានគេរាយការណ៍មកក្រុមហ៊ុន Facebook ពោលគឺកើនឡើងពីចំនួន 89.6ភាគរយក្នុងត្រីមាសទី4 ក្នុងឆ្នាំ2019 មកនៅត្រឹមចំនួន 96.7ភាគរយ ក្នុងត្រីមាសទី1 ក្នុងឆ្នាំ2020។
ក្រុមហ៊ុន Facebook ក៏បានធ្វើបច្ចុប្បន្នភាពលទ្ធផល នៃយុទ្ធនាការប្រឆាំងនឹងព័ត៌មានមិនពិតទាក់ទងនឹង វីរុសកូវីដ-19 (Covid-19) របស់ខ្លួន ដោយក្រុមហ៊ុនបានឱ្យដឹងថា នៅក្នុងខែមេសា ក្រុមហ៊ុនបានដាក់សញ្ញា ព្រមានដល់ការបង្ហោះមាតិកាផ្សព្វផ្សាយមិនពិត ទាក់ទងនឹងវីរុសកូវីដ-19 ចំនួនប្រហែល 50លានមាតិកា លើបណ្ដាញសង្គម Facebook ដោយផ្អែកលើអត្ថបទប្រហែល 7,500អត្ថបទ ដោយមានការត្រួតពិនិត្យពីដៃគូឯករាជ្យរបស់ខ្លួន។
ក្រុមហ៊ុន Facebook និយាយថា 95ភាគរយនៃអ្នកដែលបានឃើញមាតិកាព័ត៌មាន ដែលមានស្លាកព្រមាននេះ មិនបានចុចចូលមើលមាតិកានោះទេ។
ចាប់តាំងពីថ្ងៃទី1 ខែមីនាមក ក្រុមហ៊ុន Facebook បាននិយាយថា ខ្លួនបានលុបចោលមាតិកាទាំងឡាយដែលផ្សព្វផ្សាយលក់ ម៉ាស់ ទឹកលាងដៃសម្លាប់មេរោគ ក្រដាសជូតសម្លាប់មេរោគ និងឧបករណ៍ពិនិត្យរកវីរុសកូវីដ-19 ចំនួនជាង 2លាន 5សែនមាតិកា។
ដើម្បីលុបមាតិកាទាំងនេះបាន ក្រុមហ៊ុនបានប្រើប្រាស់បច្ចេកវិទ្យាពិនិត្យមើលរបស់កុំព្យូទ័រ ដែលក្រុមហ៊ុនធ្លាប់បានប្រើកន្លងមកអស់រយៈពេលជាច្រើនឆ្នាំ ដើម្បីស្វែងរក និងដកចេញមាតិកាដែលទាក់ទងនឹងការលក់អាវុធ និងគ្រឿងញៀន។
ក្រុមហ៊ុន Facebook បានឱ្យដឹងទៀតថា ការដែលក្រុមហ៊ុនអាចត្រួតពិនិត្យ និងលុបចោលមាតិកាគ្រោះថ្នាក់ទាំងនេះបានល្អជាងមុននោះ គឺដោយសារតែបច្ចេកវិទ្យា AI របស់ក្រុមហ៊ុនបានអភិវឌ្ឍកាន់តែប្រសើរជាងមុនហ្នឹងឯង។ ការអភិវឌ្ឍនោះ រួមមានសមត្ថភាពកាន់តែខ្ពស់លើផ្នែកយល់ច្បាស់ នូវអត្ថន័យរបស់ភាសាផ្សេងៗគ្នា និងសមត្ថភាព យល់ដឹងពីខ្លឹមសារទាំងមូលនៃមាតិកា ជាជាងការដែលគ្រាន់តែយល់ន័យរបស់រូបភាព ឬអត្ថបទ៕
May 15, 2020
ទង្វើ 7 យ៉ាងដែលឪពុកម្តាយធ្វើបាបកូនដោយមិនដឹងខ្លួន
ការចិញ្ចឹមមើលថែទាំកូនត្រូវធ្វើឡើងបែបសន្សឹមៗ ព្រោះទង្វើមួយចំនួនរបស់លោកឪពុកអ្នកម្តាយអាចនឹងធ្វើបាបកូនៗដោយមិនដឹងខ្លួន ថ្ងៃនេះ ឡារ៉ែនមានចំណេះដឹងក្នុងការចិញ្ចឹមមើលថែកូនដែលមិនធ្វើឱ្យកូនៗធ្លាក់ទឹកចិត្តមកជម្រាបជូនថា តើឪពុកម្តាយត្រូវកែខៃយ៉ាងណាដូចខាងក្រោមនេះ។
ជួនកាលយើងអាចមិនដឹងខ្លួនផងថា អ្វីដែលនិយាយទៅ អ្វីដែលធ្វើ ឬបង្ហាញឡើងចំពោះកូននោះ ក្លាយជាទង្វើបំផ្លាញផ្លូវចិត្តកូនទៅវិញ នៅពេលកើតឡើងញឹកញាប់នោះក៏នឹងហុចផលប៉ះពាល់ដល់បុគ្គលភាពរបស់កូនបាន ៈ
1 – មិនឱ្យធ្វើ
និយាយងាយៗក៏គឺ អ្នកជាអ្នកគ្រប់គ្រងចាត់ការអ្វីៗគ្រប់យ៉ាង (ម៉ាក់ធ្វើម្នាក់ឯង) ដោយកូនមិនបានមានចំណែកចូលរួម ឬបានជួយធ្វើអ្វីឡើយ ដែលការធ្វើបែបនេះស្មើនឹងការកាត់ចរន្តការរៀនយល់ដឹងរបស់ក្មេងលើផ្នែកផ្សេងៗ ធ្វើឱ្យជំនាញក្នុងការជួយខ្លួនឯងថយចុះ និងធ្វើឱ្យកូនបាត់បង់ភាពជឿជាក់លើខ្លួនឯង ជាដើម។
2 – គ្មានដែនកំណត់
គឺតាមចិត្តកូនគ្រប់យ៉ាងដោយភ្លេចពីអ្វីត្រូវអ្វីខុស ឬអ្វីគួរអ្វីមិនគួរ ព្រោះតែគិតថាកូននៅតូច ដែលផលប៉ះពាល់នោះគឺ នៅពេលកូនចូលទៅក្នុងសង្គមធំ រស់នៅរួមជាមួយអ្នកដទៃទៀតនោះ ក៏នឹងក្លាយជាក្មេងដែលពិបាកសម្របសម្រួលខ្លួន យកតែចិត្តខ្លួនឯងជាធំ ខ្វះភាពអំណត់អត់ធន់ មានសម្ព័ន្ធភាពជាមួយបុគ្គលផ្សេងមិនរលូនល្អ និងមានបញ្ហាផ្សេងៗទៀតជាច្រើន។
3 – មិនចេះបត់បែន
ព្រោះអ្នកត្រូវការចង់ឱ្យអ្វីគ្រប់យ៉ាង ល្អ ត្រឹមត្រូវឥតខ្ចោះជានិច្ច រឹតតែកូនធ្វើមិនបានដូចចិត្តផងនោះ ក៏នឹងខឹង ទិតៀន គ្រាន់តែរឿងតូចមួយ ក៏ធ្វើឱ្យក្លាយជារឿងធំ។ ការធ្វើបែបនេះនឹងធ្វើឱ្យវិវឌ្ឍនាការដែលគួរនឹងទៅបានរបស់កូនធ្លាក់យ៉ាប់យ៉ឺន ដោយសារតែមានអារម្មណ៍អស់សង្ឃឹម មានអារម្មណ៍ថា ខ្លួនគ្មានតម្លៃ គ្មានអ្វីល្អ គ្មានសមត្ថភាព ធ្វើអ្វីក៏មិនដែលត្រូវចិត្តឪពុកម្តាយ។
4 – មិនទទួលស្គាល់ការពិត
ការដែលអ្នកច្រើនតែវិតក្កកង្វល់ហួសហេតុពេក ដូចជា មិនឱ្យកូនទៅណាជាមួយមិត្តភ័ក្តិ ព្រោះខ្លាចកូនមានគ្រោះថ្នាក់ ឬឧបត្តិហេតុ ខ្លាចកូនមានរឿង ខ្លាចកូនត្រូវគេបោកប្រាស់ មិនឱ្យចេញពីផ្ទះ ខ្លាចកូនមិនស្រួលខ្លួន នេះឯងគឺបញ្ហានាពេលអនាគតដែលនឹងធ្វើឱ្យកូនក្លាយជាក្មេងងាយនឹងវិតក្កកង្វល់ ភ័យខ្លាចរហូតគ្មានសេចក្តីសុខ និងបាត់ភាពជឿជាក់លើខ្លួនឯង។
5 – មិនចេះការពារ
គឺរឿងសុវត្ថិភាពហ្នឹងឯង ព្រោះជាច្រើនដងណាស់ដែលមានហេតុការណ៍ដែលមិននឹកស្មានដល់កើតឡើង។ មានស្ថិតិតួលេខកើនឡើងរបស់ឧបត្តិហេតុដែលបណ្តាលមកពីការដែលអាណាព្យាបាល ឬឪពុកម្តាយមិនបានប្រយ័ត្នប្រយែង ដូចជាភ្លេចបិទទ្វាផ្ទះ ជក់និយាយទូរស័ព្ទពេក ឬការប្រើប្រាស់សូសៀលណេតវើករហូតភ្លេចខ្លួន ជាដើម។ ចូរកុំភ្លេចថា សភាពបរិស្ថានជុំវិញខ្លួនក៏ជារឿងមួយសំខាន់ដែរ។
6 – មិនចេះនិយាយសរសើរ
មានតែពាក្យបន្ទោសទិតៀន ប្រមាថផ្សេងៗ ព្រោះមិនជឿថា កូននឹងមានសមត្ថភាពអាចធ្វើបាន មិនជឿថាកូននឹងធ្វើបានសម្រេច។ ទង្វើដែលរៀបរាប់មកនេះ ប្រៀបដូចជាអាវុធដែលបំផ្លាញផ្លូវចិត្ត បំផ្លាញគំនិតល្អៗរបស់កូន ធ្វើឱ្យកូនៗរបស់អ្នកខ្វះភាពជឿជាក់ និងមោទនភាពលើខ្លួនឯង។ សូមជម្រាបថា រឿងបែបនេះគ្រាន់តែគិត ក៏ខុសស្រេចទៅហើយ។
7 – មិនយល់អំពីកូន
ព្រោះអ្នកគិតថា ហេតុអីបានកូនមិនពូកែដូចក្មេងឯទៀត ដែលការពិតទៅ ក្មេងគ្រប់គ្នាមានភាពជាខ្លួនរបស់ខ្លួនឯង មានឧបនិស្ស័យ មានសមត្ថភាពផ្សេងៗពីគ្នា ទើបអ្នកមិនគួរប្រៀបធៀបកូនជាមួយក្មេងដទៃទៀតឡើយ ព្រោះជាការសាងអារម្មណ៍ថាខ្លួនឯងអន់ឱ្យកើតឡើងចំពោះកូនបាន ហើយផលអាក្រក់ដែលធ្ងន់ធ្ងរជាងទៀតនោះគឺ អាចធ្វើឱ្យកូនមានអារម្មណ៍ឈឺចាប់ សុខចិត្តចុះចាញ់បោះបង់ក្តីព្យាយាម ឬកើតគំនិតដែលផ្ទុយ ធ្វើបាបគូប្រជែងរបស់ខ្លួន។ អ្នកគួរនិយាយសរសើរនូវអ្វីដែលកូនមាន គាំទ្រនូវអ្វីដែលដែលកូនចាប់អារម្មណ៍ ឬចូលចិត្តវិញទើបជាការប្រសើ៕
May 15, 2020
Twitter អនុញ្ញាតឱ្យបុគ្គលិកធ្វើការពីផ្ទះអស់មួយជីវិត
បន្ទាប់ពីបានធ្វើការពីចម្ងាយអស់រយៈពេលច្រើនខែដោយសារ COVID-19 ក្រុមហ៊ុនបណ្ដាញសង្គម Twitter យល់ឃើញថា បុគ្គលិកអាចបន្តធ្វើបែបនេះ សូម្បីនៅពេលកូរ៉ូណាបានបញ្ចប់។
“បើសិនជាទីកន្លែង និងស្ថានភាពរបស់បុគ្គលិកនោះសមស្របសម្រាប់ពួកគេធ្វើការនៅឯផ្ទះ ហើយពួកគេក៏ចង់បន្តធ្វើបែបនេះអស់មួយជីវិត យើងខ្ញុំនឹងអនុញ្ញាត” នេះជាសម្ដីរបស់នាយិការងរបស់ក្រុមហ៊ុន Twitter ទទួលបន្ទុកធនធានមនុស្ស អ្នកស្រី Jennifer Christie ដែលបានថ្លែងប្រាប់ CNN កាលពីថ្ងៃទី12មេសាកន្លងទៅ។ អ្នកស្រីបន្តថា “បើមិនដូច្នោះទេ ការិយាល័យរបស់យើងក៏នៅតែទទួលស្វាគមន៍ពួកគេត្រឡប់មកធ្វើការក្នុងការិយាល័យវិញ នៅពេលដែលយើងខ្ញុំគិតថា មានសុវត្ថិភាពអាចបើកទ្វារឡើងវិញបាន”។
ការសម្រេចចិត្តនេះអាចបង្ហាញបានខ្លះថា វិធានការដែលគេប្រើប្រាស់ក្នុងសម័យមេរោគរាតត្បាតនេះ អាចបង្កើតបានជានិន្នាការ ឬស្ថានភាពធម្មតាថ្មីមួយសម្រាប់ក្រុមហ៊ុននៅសហរដ្ឋអាមេរិក។ Twitter មិនបានឱ្យដឹងថា មុខតំណែងណាខ្លះដែលទទួលបានផលប្រយោជន៍នេះនៅឡើយ ប៉ុន្តែ ពួកគេបានបញ្ជាក់ថា បទពិសោធន៍ធ្វើការពីចម្ងាយក្នុងរយៈពេលច្រើនខែមកនេះ បានបង្ហាញថា វិធីនេះអាចអនុវត្តបន្តទៅមុខទៀតបាន។
Twitter មិនមានគម្រោងបើកទ្វារការិយាល័យ ឬចាប់ផ្ដើមដំណើរបំពេញបេសកកម្មរបស់ខ្លួននៅមុនខែកញ្ញានោះទេ។ ពួកគេក៏បានលុបចោលព្រឹត្តិការណ៍ផ្ទៃក្នុងទាំងអស់របស់ខ្លួននៅក្នុងឆ្នាំនេះផងដែរ ហើយបញ្ហានេះអាចពន្យារពេលដល់ឆ្នាំ2021។ នេះបើតាមសេចក្ដីប្រកាសមួយរបស់ Twitter។
ក្រៅពី Twitter ក៏មានក្រុមហ៊ុនជាច្រើនផ្សេងទៀត បានសម្រេចចិត្តឱ្យបុគ្គលិករបស់ខ្លួនធ្វើការពីចម្ងាយផងដែរ។ ក្រុមហ៊ុន Facebook និង Google កាលពីសប្ដាហ៍មុនបានបញ្ជាក់ថា ពួកគេអនុញ្ញាតឱ្យបុគ្គលិករបស់ខ្លួនធ្វើការពីចម្ងាយរហូតដល់ដំណាច់ឆ្នាំ2020។ ចំណែកក្រុមហ៊ុន Amazon វិញ បានសម្រេចថា អនុញ្ញាតឱ្យបុគ្គលិកធ្វើការពីផ្ទះរហូតដល់ដើមខែតុលា៕
ប្រភព៖ សារព័ត៌មានបរទេស
May 13, 2020
វៀតណាម អាយុក្រោម 19ឆ្នាំ ដាក់គោលដៅឱ្យដល់់វគ្គពាក់កណ្តាលផ្តាច់ព្រ័ត្រ AFC U19 Championship
សហព័ន្ធកីឡាបាល់ទាត់វៀតណាម បានគូសបង្ហាញអំពីគោលដៅរបស់ខ្លួនថា ត្រូវឡើងឱ្យដល់វគ្គពាក់កណ្តាលផ្តាច់ព្រ័ត្រ ក្នុងពានរង្វាន់ AFC U19 Championship ឆ្នាំ2020 ឱ្យបាន ដើម្បីដណ្តើមកៅអីទៅលេង FIFA World Cup U-20 នាឆ្នាំក្រោយ។
ក្រុមវៀតណាម ទទួលបានសិទ្ធិចូលរួមវគ្គចែកពូល AFC U19 Championship ក្នុងនាមជាក្រុមលេខ2 ល្អបំផុត ដូចកម្ពុជាដែរ ដូច្នេះក្រុមមួយនេះត្រូវធ្វើយ៉ាងណាលេងឱ្យដល់វគ្គពាក់កណ្តាលផ្តាច់ព្រ័ត្រទើបមានសិទ្ធិចូលលេង FIFA World Cup U-20 បានដូចបំណង។
គួរបញ្ជាក់ដែរថា ពានរង្វាន់ FIFA World Cup U-20 ឆ្នាំ2021 ដែលគ្រោងធ្វើឡើងនៅប្រទេសឥណ្ឌូនេស៊ី នឹងចាប់ផ្តើមពីខែឧសភា ឆ្នាំ2021 រហូតដល់ខែកក្កដា ឆ្នាំ2021៕

May 13, 2020