Category: សង្គម និងសេដ្ឋកិច្ច

របស់មិនល្អពេលមានផ្ទៃពោះរបស់ស្រ្តី
ស្រ្តីមានផ្ទៃពោះត្រូវតែប្រយ័ត្នឱ្យបានច្រើនលើគ្រប់ៗរឿង ជាពិសេសក្នុងត្រីមាសដំបូង (1-3 ខែដំបូង) រឹតតែត្រូវប្រយ័ត្នខ្លាំង ជាងអំឡុងពេលណាទាំងអស់ ព្រោះជារយៈពេលដែលអាចនឹងកើតការរលូតបានយ៉ាងងាយ ជាអំឡុងពេលដែលកូនកំពុងសាងអវយវៈ និងកំពុងតោងជាប់នឹងជញ្ជាំងស្បូន។ ក្នុងអំឡុងពេលមានគភ៌ ប្រព័ន្ធការពារជំងឺរបស់អ្នកម្តាយនឹងធ្លាក់ចុះទាប ដែលជាការសម្របសម្រួលខ្លួនដើម្បីបន្ថយការបដិសេធគភ៌ ដែលប្រៀបដូចជារឿងផ្លែកចម្លែកមួយដែរ។
ដូច្នេះ យើងនឹងមើលឃើញថា ស្រ្តីមានគភ៌មានឱកាសឆ្លងមេរោគបានយ៉ាងងាយជាងមនុស្សធម្មតាទូទៅ និងនៅពេលឆ្លងមេរោគហើយ ក៏នឹងកើតសភាវជ្រៀតជ្រែកពីជំងឺផ្សេងកាន់តែងាយឡើង ដូចជា បើឆ្លងមេរោគគ្រុនផ្តាសាយធំ ឱកាសក្នុងការកើតសភាវរលាកសួតមានខ្ពស់ជាងមនុស្សប្រក្រតីទូទៅ ប្រព័ន្ធរំលាយអាហារក៏ដូចគ្នាដែរ បើបានទទួលអាហារដែលមិនស្អាត ស្ទើរឆៅ ស្ទើរឆ្អិននោះ ក៏ធ្វើឱ្យងាយមានការឆ្លងមេរោគក្នុងប្រព័ន្ធរំលាយអាហារ ដែលជាមូលហេតុធ្វើឱ្យស្រ្តីមានគភ៌មានអាការរាករូស ក្អួតចង្អោរ ឈឺពោះ និងត្រូវមកគេងសម្រាកព្យាបាលនៅក្នុងមន្ទីរពេទ្យ ដើម្បីបញ្ចូលសេរ៉ូមជំនួសជាតិទឹកដែលបាត់បង់ចេញពីរាងកាយដោយសារការក្អួត ឬបន្ទោបង់រាគជាទឹកច្រើនៗដង និងឱ្យញ៉ាំថ្នាំសម្លាប់មេរោគ ដូច្នេះស្រ្តីមានគភ៌គួរតែផ្តល់ភាពសំខាន់ និងផ្ចិតផ្ចង់រឿងអាហារការហូបចុកឱ្យបានដិតដល់ជាពិសេស ដោយសារតែ បើសិនជាមានអាការធ្ងន់ធ្ងរខ្លាំងរហូតរាងកាយទប់ទល់នឹងការឆ្លងមេរោគលែងរួច (ដូចជា ធ្ងន់ធ្ងររហូតទទួលទានអាហារ និងទឹកមិនបាន រហូតធ្វើឱ្យតុល្យភាពទឹក និងសារធាតុរ៉ែក្នុងរាងកាយខុសប្រក្រតី)នោះ រាងកាយអាចកាត់បន្ថយបន្ទុកការធ្វើការងារដោយការទម្លាក់កូនចេញ ដែលធ្វើឱ្យកើតការរលូតតាមមកហ្នឹងឯង។
ទើបអ្នកម្តាយដែលកំពុងមានគភ៌គួរចៀសវាងអាហារទាំងនេះ ទាំងដែលក្នុងអំឡុងពេលមុនមានផ្ទៃពោះអាចទទួលទានបានក៏ដោយ ព្រោះសភាពរាងកាយស្ថិតក្នុងអំឡុងពេលដែលខុសផ្លែកពីគ្នា គួរចៀសវាងអាហារឆៅ ដូចជា ត្រីឆៅផ្សេងៗ តែបើចង់ទទួលទានមែនទែននោះ ក៏ត្រូវជ្រើសរើសហាងណាដែលជឿទុកចិត្តបានក្នុងរឿងភាពស្អាត និងអនាម័យ។
ចំណែក ទឹកតែ កាហ្វេ បើឈប់ញ៉ាំក្នុងខណៈពេលតាំងគភ៌បានគឺជារឿងល្អ ព្រោះទោះជាកាហ្វេអ៊ីននៅក្នុងទឹកតែ និងកាហ្វេគ្មានចំណែកធ្វើឱ្យកើតភាពពិការចំពោះកូននៅក្នុងផ្ទៃក៏ដោយ តែវាមានចំណែកជំរុញការធ្វើការងាររបស់បេះដូងអ្នកម្តាយមានគភ៌ឱ្យធ្វើការកាន់តែខ្លាំងឡើង ព្រោះបេះដូងរបស់ស្រ្តីមានគភ៌នឹងធ្វើការកើនឡើង 10 – 15 ភាគរយ ជាប្រក្រតីរបស់ការប្រែប្រួលក្នុងអំឡុងពេលមានគភ៌។ ការបន្ថែមបរិមាណកាហ្វេអ៊ីនចូលទៅទៀត អាចនឹងធ្វើឱ្យអ្នកម្តាយមានគភ៌មានអារម្មណ៍ញ័រដើមទ្រូង ឆាប់ហត់ និងថាមពលផ្សេងៗដែលគួរបញ្ជូនទៅឱ្យកូនក្នុងផ្ទៃអាចត្រូវបាននាំទៅប្រើក្នុងការធ្វើការងាររបស់ម្តាយ ធ្វើឱ្យកូនក្នុងផ្ទៃបានទទួលសារជាតិអាហារផ្សេងៗថយចុះ ហើយក្នុងរយៈពេលវែងអាចនឹងហុចផលឱ្យកូនក្នុងគភ៌ខ្លួនតូច ចម្រើនធំធាត់យឺត និងមានទម្ងន់ខ្លួនតិចនៅពេលកើតដំបូង។ ចំពោះស្រ្តីមានគភ៌ដែលញៀនកាហ្វេខ្លាំង ឬអ្នកខ្លះបើមិនបានញ៉ាំហើយនឹងមានអាការឈឺក្បាលនោះ សូមណែនាំថា អាចញ៉ាំបានក្នុងមួយថ្ងៃ មួយកែវដែលជាបរិមាណអាចទទួលយកបាន ឬជ្រើសរើសញ៉ាំកាហ្វេប្រភេទដែលចម្រាញ់យកជាតិកាហ្វេអ៊ីនចេញគឺជាការល្អបំផុត៕
May 20, 2020
បណ្ដាក្រុមហ៊ុនអាកាសចរណ៍នៅតំបន់អាស៊ីអាគ្នេយ៍កំពុងធ្លាក់ក្នុងវិបត្តិដោយសារ COVID-19
មិនត្រឹមតែ Thai Airways នោះទេ ដែលកំពុងជួបការលំបាកខ្លាំង បណ្ដាក្រុមហ៊ុនអាកាសចរណ៍របស់ប្រទេសដទៃក្នុងតំបន់អាស៊ីអាគ្នេយ៍ដទៃទៀត ក៏កំពុងជួបបញ្ហាធំផ្នែកហិរញ្ញវត្ថុដោយសារវីរុសCOVID-19នេះដែរ។
>ព័ត៌មានទាក់ទង៖ ថៃ៖ ក្រុមហ៊ុន Thai Airways កំពុងត្រៀមខ្លួនដើម្បី “ក្ស័យធន”
ក្រុមហ៊ុនអាកាសចរណ៍របស់ថៃ
នៅប្រទេសថៃ រដ្ឋមន្ត្រីក្រសួងហិរញ្ញវត្ថុថៃ បានឱ្យដឹងថា “ក្រសួងហិរញ្ញវត្ថុ និងក្រសួងដឹកជញ្ជូន រួមនឹងស្ថាប័នតាមដាន Thai Airways ក្នុងនាមជាក្រុមហ៊ុនរដ្ឋ បានពិភាក្សាគ្នារួចហើយដើម្បីលើកឡើងអំពីផែនការរុះរើ និងបង្កើតឡើងវិញនូវក្រុមហ៊ុនអាកាសចរណ៍ Thai Airways។
មុននេះ យោងតាមទិន្នន័យពីនាយកដ្ឋានគ្រប់គ្រងផ្សារមូលបត្រថៃ បានឱ្យដឹងថា ក្រុមហ៊ុនអាកាសចរណ៍ Thai Airways បានខាតបង់ 2.11ពាន់លានបាតនៅក្នុងឆ្នាំ2017 ឡើងដល់11.6ពាន់លានបាតនៅក្នុងឆ្នាំ2018 និង12ពាន់លានបាត ដែលស្មើនឹង374,299,650ដុល្លារអាមេរិក ក្នុងឆ្នាំ2019។
កាលពីចុងខែមេសាកន្លងទៅ ក្រុមហ៊ុន Thai Airways បានស្នើសុំជំនួយជាទឹកប្រាក់ចំនួន10ពាន់លានបាត (307លានដុល្លារ) ពីរាជរដ្ឋាភិបាលថៃដើម្បីបើកប្រាក់ខែជូនបុគ្គលិកចំនួន1ខែ ព្រោះតែ COVID-19។ ក្រុមហ៊ុននេះក៏បានស្នើឱ្យមានការអនុម័តផ្ដល់ប្រាក់កម្ចីចំនួន70ពាន់លានបាត (ជាង 2,183,414,000ដុល្លារអាមេរិក) ផ្សេងទៀត ដោយមានក្រសួងហិរញ្ញវត្ថុជាអ្នកធានា ដើម្បីអាចបន្តសកម្មភាពជំនួញទៅមុខទៀត។
ក្រុមហ៊ុនអាកាសចរណ៍របស់ឥណ្ឌូនេស៊ី
ទន្ទឹមនឹងក្រុមហ៊ុនថៃ ក្រុមហ៊ុនដឹកជញ្ជូនឥណ្ឌូនេស៊ី ឈ្មោះ Garuda Indonesia បានព្យួរការងាររយៈពេល3ខែចំពោះបុគ្គលិកប្រមាណជា800នាក់ រាប់ចាប់ពីថ្ងៃទី14ឧសភាតទៅ នៅក្នុងស្ថានភាពដែលក្រុមហ៊ុននេះកំពុងស្វះស្វែងរកវិធី “ការពារជីវិត” ក្នុងសម័យ COVID-19 នេះ។
នាយកប្រតិបត្តិក្រុមហ៊ុន Garuda Indonesia លោក Irfan Setiaputra ថ្លែងថា វិធានការនេះគឺជាការសម្រេចចិត្តដ៏លំបាក ប៉ុន្តែពួកគេត្រូវបង្ខំចិត្តធ្វើដើម្បីធានាចំពោះវត្តមានរបស់ក្រុមហ៊ុន មុនពេលចាប់ផ្ដើមដំណើរការឡើងវិញជាធម្មតា។ “យើងសម្រេចធ្វើបែបនេះ បន្ទាប់ពីបានសិក្សាលម្អិតទៅលើបុគ្គលិក និងផលប្រយោជន៍របស់ក្រុមហ៊ុន ដើម្បីជៀសវាងការបញ្ឈប់បុគ្គលិកពីការងារ” នេះបើតាមលោក Irfan Setiaputra ដែលបានថ្លែងកាលពីថ្ងៃទី17ឧសភាកន្លងទៅ។
COVID-19 បានធ្វើឱ្យក្រុមហ៊ុនអាកាសចរណ៍ Garuda Indonesia ត្រូវចតយន្តហោះចំនួន100គ្រឿងក្នុងចំណោម142គ្រឿងរបស់ខ្លួន។ ជើងហោះហើរប្រចាំថ្ងៃរបស់ក្រុមហ៊ុននេះក៏បានថយចុះ70% បើធៀបជាមួយនឹងថ្ងៃធម្មតា។ ត្រីមាសដំបូងនៃឆ្នាំ2020 ប្រាក់ចំណូលដែលបានពីអ្នកដំណើរ និងការដឹកទំនិញរបស់ Garuda Indonesia ត្រូវថយចុះ31.9%។
កន្លងមក ក្រុមហ៊ុន Garuda Indonesia ក៏ធ្លាប់បានអនុវត្តវិធានការមួយចំនួនដើម្បីដោះស្រាយបញ្ហាក្នុងគ្រាលំបាកនេះ ក្នុងនោះមានការកាត់បន្ថយប្រាក់ខែរបស់បុគ្គលិក និងនាយកប្រតិបត្តិ កាត់បន្ថយការចំណាយលើការផលិត និងធ្វើការចរចាឡើងវិញនូវកិច្ចការដែលជាប់ពាក់ព័ន្ធនឹងបំណុលជាមួយដៃគូរកស៊ី និងភាគីឱ្យជួលយន្តហោះ។
ក្រុមហ៊ុនអាកាសចរណ៍របស់សិង្ហបុរី
ចំណែកក្រុមហ៊ុនអាកាសចរណ៍ Singapore Airlines (SIA) របស់ប្រទេសសិង្ហបុរីវិញក៏កំពុងមានបញ្ហាហិរញ្ញវត្ថុស្រដៀងនឹងក្រុមហ៊ុនអាកាសចរណ៍ដទៃក្នុងតំបន់អាស៊ីអាគ្នេយ៍នេះដែរ។ កាលពីចុងសប្ដាហ៍កន្លងទៅ ក្រុមហ៊ុននេះបានឱ្យដឹងអំពីខ្ទង់ប្រាក់ខាតបង់សុទ្ធរហូតដល់212លានដុល្លារអាមេរិកសម្រាប់ឆ្នាំសារពើពន្ធដែលបានបញ្ចប់កាលពីថ្ងៃទី31មីនាកន្លងទៅ។ នេះគឺជាខ្ទង់ខាតបង់ដំបូងបង្អស់ក្នុងប្រវត្តិ48ឆ្នាំរបស់ក្រុមហ៊ុននេះ។
នាយកប្រតិបត្តិរបស់ SIA លោក Goh Choon Phong បានកាត់បន្ថយជើងហោះហើរចំនួន96%។ “យើងដំណើរការក្នុងកម្រិតដ៏តិចតួចប៉ុណ្ណោះ ហើយស្ទើរតែមិនមានចំណូល” លោក Goh បន្ថែមថា ក្រុមហ៊ុននេះកំពុងស្វែងរកទុន15ពាន់លានដុល្លារអាមេរិកបន្ថែមទៀតតាមរយៈការបោះផ្សាយលក់មូលបត្របំណុល។
ក្រុមហ៊ុនអាកាសចរណ៍របស់ម៉ាឡេស៊ី
ចំណែកម៉ាឡេស៊ី កាលពីពាក់កណ្ដាលខែមេសា រដ្ឋមន្ត្រីក្រសួងពាណិជ្ជកម្ម និងឧស្សាហកម្មអន្តរជាតិ លោក Mohamed Azmin Ali បានរំឭកអំពីការច្របាច់បញ្ចូលគ្នារវាងក្រុមហ៊ុនអាកាសចរណ៍ Malaysia Airlines ជាមួយនឹងក្រុមហ៊ុនអាកាសចរណ៍តម្លៃទាប AirAsia Group ដើម្បីជាការសង្គ្រោះ Malaysia Airlines ដែលបាន និងកំពុងខាតបង់ ហើយពេលនេះត្រូវជួបនឹងបញ្ហាវិបត្តិសុខភាពទៀត។
ការពិភាក្សាអំពីការច្របាច់បញ្ចូលគ្នារវាងក្រុមហ៊ុនអាកាសចរណ៍ខាងលើត្រូវបានធ្វើឡើងកាលពីឆ្នាំ2019 មុនពេល COVID-19 កើតឡើង។ ប៉ុន្តែលោក Azmin Ali ថ្លែងថា ពួកគេត្រូវការបន្តការពិភាក្សាដើម្បីស្វែងរកវិធីល្អបំផុតដើម្បីជួយសង្គ្រោះក្រុមហ៊ុនអាកាសចរណ៍។
ក្រុមហ៊ុនអាកាសចរណ៍របស់ហ្វីលីពីន
Cebu Air ដែលជាក្រុមហ៊ុនអាកាសចរណ៍តម្លៃទាបបំផុតរបស់ហ្វីលីពីន បានឱ្យដឹងថា ក្រុមហ៊ុននេះបានពន្យារគម្រោងទិញយន្តហោះ Airbus SE ប្រមាណជា30គ្រឿងទៀតដែលមានតម្លៃ6.8ពាន់់លានដុល្លារដែលត្រូវបានលើកឡើងកាលពីឆ្នាំមុន។
Cebu Air ក៏កំពុងតែពិភាក្សាជាមួយរដ្ឋាភិបាលដើម្បីស្វែងរកជំនួយផ្នែកហិរញ្ញវត្ថុដោយសារតែរងឥទ្ធិពលពីបញ្ហា COVID-19៕
ប្រភព៖ សារព័ត៌មានបរទេស
May 19, 2020
រឿងតុក្កតាគ្មានសំឡេងនិយាយគ្រោះថ្នាក់ដល់កុមារបើគ្រប់គ្រងមិនល្អ
បច្ចុប្បន្ននេះ ដោយសារតែការរីកចម្រើនខ្លាំងផ្នែកបច្ចេកវិទ្យា បានធ្វើគ្រប់គ្នាមានទូរស័ព្ទដៃឆ្លាតវៃ (smart phone) ប្រើប្រាស់ ដោយក្នុងនោះរួមទាំងកុមារតូចៗផងដែរ។ ជារៀងរាល់ថ្ងៃគេសង្កេតឃើញថា កុមារខ្មែរយើងជាច្រើនកំពុងត្រូវបានអាណាព្យាបាលបណ្តែតបណ្តោយឱ្យប្រើប្រាស់ទូស័ព្ទដើម្បីមើលវីដេអូ ឬដើម្បីលេងស្ទើររៀងរាល់ថ្ងៃ។ បញ្ហានេះត្រូវបានអ្នកចិត្តសាស្រ្តបញ្ជាក់ថាអាចគ្រោះថ្នាក់ដល់កុមារតូចៗប្រសិនបើអាណាព្យាបាលគ្រប់គ្រងមិនល្អ។
តាមគេហទំព័រ Psychology today បានបញ្ជាក់ថា កុមារតូចអភិវឌ្ឍសមត្ថភាពតាមរយៈការបញ្ចូលព័ត៌មានពីគ្រប់ទិសទៅទៅកាន់ខួរក្បាល ដូចជាការរៀននិយាយ ការរៀនគិត និងការរៀនបញ្ចេញសកម្មភាពជាដើម។ រូបភាព ឬសំឡេងទាំងឡាយណាដែលចូលទៅក្នុងខួរក្បាលរបស់គេ នឹងក្លាយជាប្រភពព័ត៌មានដែលបកប្រែឱ្យក្លាយជាបញ្ញា ឬឥរិយាបថជាក់ស្តែងរបស់ក្មេង។
បញ្ហាដែលកំពុងជួបប្រទះនៅក្នុងសង្គមកម្ពុជានាពេលបច្ចុប្បន្ននេះ គឺក្មេងកាន់តែច្រើនឡើងៗមិនចេះនិយាយ បើទោះពីជាពួកគេដល់វ័យត្រូវនិយាយ ឬហួសវ័យដែលត្រូវចេះនិយាយហើយក៏ដោយ។ ជាក់ស្តែង មានកុមារខ្លះមានអាយុជិត4ឆ្នាំទៅហើយ តែពួកគេមិនដែលនិយាយ ឬទំនាក់ទំនងជាមួយមនុស្សធំនោះទេ។ បញ្ហានេះ ត្រូវបានស្ថាប័នចិត្តសាស្ត្រខាងលើបញ្ជាក់ថាអាចបណ្តាលមកពីការទំនាក់ទំង និងបញ្ចូលព័ត៌មានមិនល្អទៅកាន់ខួរក្បាល។ ជាធម្មតាក្មេងត្រូវការរស់នៅដោយសង្កេតពីសកម្មភាព សន្ទនា និងរៀនតាមមនុស្សធំ តែពេលពួកគេប្រើប្រាស់ពេលវេលាភាគច្រើននៅជាមួយឧករណ៍បច្ចេកវិទ្យា ដែលធ្វើឱ្យគេមិនចង់និយាយ ឬមិនចង់ទាក់ទងជាមួយមនុស្ស។
បន្ថែមពីលើនេះ កុមារតូចៗដែលមិនទាន់ចេះនិយាយ ភាគច្រើនចូលចិត្តមើលតុក្កតាដែលមិនមានសំឡេង។ បញ្ហានេះត្រូវបានអ្នកជំនាញចិត្តសាស្ត្រយល់ឃើញថា វាអាចប៉ះពាល់យ៉ាងខ្លាំងដល់សមត្ថភាពនិយាយរបស់កុមារ ព្រោះក្មេងតូចៗមិនបានរៀនភាសាអ្វីទាំងអស់ក្រៅពីសកម្មភាពដែលគេមើលរាល់ថ្ងៃ។ ហេតុនេះបន្តិចម្តងៗ ពួកគេនឹងប្រើភាសាកាយវិកាដើម្បីជំនួសឱ្យការនិយាយស្តី ដែលបង្កើតជាក្តីព្រួយបារម្ភយ៉ាងធំសម្រាប់អាណាព្យាបាល៕
May 19, 2020
“5G ខ្លាំងក្លាជាងគ្រាប់បែកនុយក្លេអែរទៅទៀត”
នៅពេលប្រទេសចិនទទួលជោគជ័យក្នុងការសាកល្បងគ្រាប់បែកនុយក្លេអែរ ដែលជាអាវុធប្រល័យលោក សហរដ្ឋអាមេរិកពេលនោះបានធ្វើព្រងើយ ដោយមិនបានចាត់ទុកថាជាស្ថានភាពអាសន្នអ្វីនោះឡើយ ប៉ុន្តែ នៅពេល Huawei ក្លាយជាអ្នកត្រួសត្រាយផ្លូវក្នុងការអភិវឌ្ឍប្រព័ន្ធអ៊ីនធើណិត 5G សេតវិមានបែរជាព្រួយបារម្ភទៅវិញ។
ប្រទេសចិន បច្ចុប្បន្នបាននាំមុខគេក្នុងការប្រកួតប្រជែងលើវិស័យអ៊ីនធើណិត 5G។ បើទោះជាមានឥទ្ធិពលពី COVID-19 ប៉ុន្តែ គិតមកដល់ដើមខែមេសា ឆ្នាំ2020 មានទូរស័ព្ទ 5G ចំនួនជាង30លានគ្រឿងត្រូវបានលក់ចេញនៅប្រទេសចិន ហើយមានអង់តែន 5G រាប់ពាន់កន្លែងកំពុងត្រូវបានសាងសង់នៅក្នុងប្រទេសនេះ ដើម្បីសម្រេចគោលដៅក្នុងការដាក់ប្រព័ន្ធ 5G ឱ្យមាននៅពាសពេញពិភពលោក។
Lu Tingjie ដែលជាសាស្ត្រាចារ្យម្នាក់មកពីសាកលវិទ្យាល័យទូរគមនាគមន៍ប៉េកាំង (Beijing University of Posts and Telecommunications) បានថ្លែងថា “5G គឺជាបដិវត្តន៍មួយ ដោយវាមានសារសំខាន់ដូចជាអគ្គិសនីដែរ។ បើសិនជាគេប្រើអគ្គិសនីដើម្បីបំភ្លឺ វានឹងមានឥទ្ធិពលដល់ជីវិតឯកជន និងគ្រួសារ។ ប៉ុន្តែ នៅពេលអគ្គិសនីត្រូវបានប្រើទូលំទូលាយក្នុងវិស័យឧស្សាហកម្ម នោះបដិវត្តន៍ 2.0 ត្រូវបានបង្កើតឡើង។ ជាចុងក្រោយ 5G នឹងបំផ្លាស់ទីពីការប្រើប្រាស់លក្ខណៈឯកជន ទៅកាន់វិស័យឧស្សាហកម្មមិនខាន”។
“5G ខ្លាំងជាងគ្រាប់បែកនុយក្លេអែរទៅទៀត” នេះបើតាមសម្ដីរបស់លោក Lu Tingjie។ បន្ទាប់ពីមានការរិះគន់ខ្លាំងក្លា សហរដ្ឋអាមេរិកក៏បានចេញបទបញ្ជាមួយ ស្នើឱ្យក្រុមប្រទេសដែលជាសម្ព័ន្ធមិត្តរបស់ខ្លួន ហាមមិនឱ្យក្រុមហ៊ុន Huawei ដាក់ពង្រាយប្រព័ន្ធ 5G ក្នុងប្រទេសទាំងនោះ។ នេះគឺជាភ័ស្ដុតាងយ៉ាងច្បាស់ដែលបង្ហាញអំពីឥទ្ធិពលដ៏ខ្លាំងក្លារបស់បច្ចេកវិទ្យា 5G។
យោងតាមអ្នកជំនាញកំពូលក្នុងបច្ចេកវិទ្យាអ៊ីនធើណិតរបស់ចិន នៅចំពោះមុខរលកឥទ្ធិពលរបស់ 5G បណ្ដាប្រទេសមានពីរជម្រើស។ ទី1គឺជឿថា បច្ចុប្បន្នមានប្រព័ន្ធ 4G គឺវាគ្រប់គ្រាន់ហើយ ខណៈប្រព័ន្ធខ្សែកាបបញ្ជូនអ៊ីនធើណិតមានស្ថិរភាពជាងបច្ចេកវិទ្យា 5G។ ទី2នោះគឺ ពួកគេត្រូវប្រកួតប្រជែងក្នុងការអភិវឌ្ឍបច្ចេកវិទ្យា 5G នេះ ដើម្បីកុំឱ្យអន់ថយជាងគេ។
សាស្ត្រាចារ្យ Lu Tingjie និយាយថា “អ្នកដែលបានរិះគន់ទៅលើ 5G ពួកគេគឺជាមនុស្សដែលមិនយល់អ្វីអំពីវា”។ លោក បានលើកឧទាហរណ៍ថា មនុស្សមួយចំនួនយល់ថា គ្រាន់តែមានប្រព័ន្ធ Wi-Fi ដែលមានស្ថិរភាពនៅគ្រប់កន្លែង អ្នកប្រើប្រាស់នឹងមិនត្រូវការដល់ 5G នោះទេ។ ប៉ុន្តែជាក់ស្ដែង Wi-Fi មិនអាចធានាសុវត្ថិភាពនៃទិន្នន័យនោះទេ ហើយបណ្ដារោងចក្រក៏មិនអាចប្រើប្រាស់ Wi-Fi ដើម្បីគ្រប់គ្រងផលិតកម្មរបស់ខ្លួនប្រកបដោយប្រសិទ្ធភាពខ្ពស់នោះដែរ។ អនាគតរបស់ 5G មិនត្រឹមតែផ្លាស់ប្ដូរនូវពិសោធន៍ក្នុងការប្រើប្រាស់របស់អតិថិជននោះទេ តែវាក៏មានឥទ្ធិពលផ្ទាល់ទៅលើជំនួញ ជំរុញការធ្វើពាណិជ្ជកម្មអនឡាញ និងការប្រើប្រាស់ផ្ទាល់នៅក្នុងវិស័យឧស្សាហកម្មទៀតផង។
ការសាកល្បងគ្រាប់បែកនុយក្លេអែរដំបូងបង្អស់របស់ចិន កាលពីថ្ងៃទី16តុលា ឆ្នាំ1964 នៅក្នុងតំបន់ស៊ីនជាំង
Lu Tingjie សង្កត់ធ្ងន់ថា 5G នឹងក្លាយជាឆ្អឹងខ្នងរបស់វិស័យបច្ចេកវិទ្យាក្នុងពេលអនាគត។ រដ្ឋាភិបាលប្រទេសនេះ កំពុងតែបង្កើនល្បឿនក្នុងការកសាងហេដ្ឋារចនាសម្ព័ន្ធ និងផ្ដល់ប័ណ្ណសិក្សាស្រាវជ្រាវ និងប័ណ្ណកម្មសិទ្ធិបញ្ញាទាក់ទិននឹងវិទ្យាសាស្ត្រ បច្ចេកវិទ្យា ក្នុងនោះមាន 5G ផងដែរ។
ក្រុមអ្នកវិភាគយល់ថា បច្ចេកវិទ្យា 5G គឺជាមូលដ្ឋានគ្រឹះសម្រាប់ធ្វើការអភិវឌ្ឍ និងបង្កើតប្រព័ន្ធ 6G និង 7G នាពេលអនាគតខាងមុខ៕
ប្រភព៖ សារព័ត៌មានបរទេស
May 19, 2020
ចុំ អីក៏ខ្លាំងម្ល៉េះ!? បុរស 3នាក់ លួចគោ 1ក្បាល និងចៀម 2ក្បាល ញាត់ចូលរថយន្តតូចមួយ បានយ៉ាងស្រួល…(មានឃ្លីប)
នៅលើពិភពអនឡាញ បានបង្ហាញឃ្លីបវីដេអូដ៏មហាសែនភ្ញាក់ផ្អើលមួយ ជាហេតុការណ៍ដែលបុរស 3នាក់កំពុងប្រតិបត្តិភារកិច្ច “Mission Imposible” នាំគ្នាលួចសត្វគោ 1ក្បាល និងសត្វចៀម 2ក្បាល ញាត់ចូលទៅក្នុងឡានតូច 1គ្រឿងបានយ៉ាងស្រួល មុននឹងបើកចេញទៅយ៉ាងប្រហើរ។
នៅក្នុងឃ្លីបវីដេអូនោះ បានបង្ហាញឱ្យឃើញរថយន្តតូចមួយយីហោ នីសសាន់ សាន់នី កំពុងចតនៅជិតរោងបិទជិតមួយ ដែលគេសន្និដ្ឋានថា ប្រហែលជាក្រោលសត្វចិញ្ចឹម ដោយមានបុរសពាក់អាវពណ៌ខៀវម្នាក់នៅចាំមើលផ្លូវឱ្យពួកគេ។
បន្ទាប់ពីមក គេឃើញបុរសម្នាក់ពាក់អាវពណ៌ប្រផេះ បានអូសសត្វចៀម 1ក្បាលចេញមក ហើយទាំង 2នាក់ក៏ជួយគ្នាលើកសត្វចៀមនោះដាក់ចូលទៅក្នុងកាប៉ូខាងក្រោយឡាន រួចហើយបុរសម្នាក់ទៀត ក៏អូសសត្វចៀម 1ក្បាលទៀតចេញមក ព្រមទាំងចាប់លើកវា ញាត់ចូលទៅក្នុងកាប៉ូឡានដដែល រួមជាមួយសត្វចៀម 1ក្បាលដំបូង។
ប៉ុណ្ណឹងមិនទាន់គ្រប់គ្រាន់ទេ ប៉ុន្មានវិនាទីតមកទៀត ស្រាប់តែបុរសពាក់អាវពណ៌ប្រផេះដដែល ដើរទៅដឹងគោមាឌធំ 1ក្បាលចេញមកទៀត ហើយព្យាយាមរុញវាឱ្យឡើងចូលទៅក្នុងកន្លែងអ្នកជិះខាងក្រោយ ដោយមានបុរសម្នាក់ទៀតជួយ រហូតបានសម្រេច មុននឹងទាំងអស់គ្នា បើកឡាននោះរត់គេចបាត់ទៅ។
https://www.youtube.com/watch?time_continue=56&v=u5BnZ_YjOeU&feature=emb_logo
ពីដំបូង ព័ត៌មានអំពីឃ្លីបវីដេអូនេះ មិនមានភាពច្បាស់លាស់ទេ តែអ្នកផូស្តឃ្លីបនេះប្រាប់ថា ជាហេតុការណ៍ដែលកើតឡើងនៅក្នុងទីក្រុងគែរ ប្រទេសអេហ្ស៊ីប តែមិនបានប្រាប់ថា កើតឡើងនៅពេលណាឡើយ ដោយប្រាប់តែត្រឹមថា វាជាហេតុការណ៍ប្រើរថយន្តនីសសាន់ សាន់នី តូចមួយគ្រឿង លួចគោ និងចៀមតែប៉ុណ្ណោះ។
ដោយសារនៅមិនទាន់មានការអះអាងថា វាជាហេតុការណ៍ចោរលួចមែនទែន ឬយ៉ាងណានោះ? អ្នកដែលបានឃើញឃ្លីបនេះមួយចំនួន បានដាក់ការសង្ស័យថា ជួនកាលវាអាចជាឃ្លីបដែលកាត់ត តែអ្នកខ្លះជឿថា វាជាហេតុការណ៍ដឹកជញ្ជូនសត្វទាំងនោះមែន ក្រៅពីនោះ មានអ្នកខ្លះទៀតបានបញ្ចេញយោបល់ថា វាអាចជាផែនការផ្សាយពាណិជ្ជកម្មរបស់ក្រុមហ៊ុនផលិតរថយន្តនីសសាន់ផង ក៏មិនដឹង…៕
ប្រភព ៖ សារព័ត៌មានបរទេស
May 19, 2020
ឈឺពោះខណៈពេលមានគភ៌ តើជារឿងដែលអ្នកម្តាយត្រូវកង្វល់ដែរឬទេ?
ស្រ្តីជាច្រើននាក់ដែលមុនពេលមានគភ៌ ភាគច្រើននឹងមានអាការឈឺពោះពេលមានវដ្តរដូវរាល់ខែ លុះដល់ពេលមានគភ៌ក៏គិតថា ការមានគភ៌នឹងធ្វើឱ្យលែងមានអាការឈឺពោះ តែការពិតវិញនោះ មិនមែនដូច្នេះឡើយ ព្រោះស្រ្តីមានផ្ទៃពោះសឹងតែគ្រប់គ្នាតែងតែមានអាការឈឺពោះខណៈពេលមានគភ៌ អ្នកខ្លះឈឺខ្លាំង អ្នកខ្លះឈឺតិច ដែលអាការម្នាក់នឹងខុសប្លែកពីគ្នា។ បើជាការឈឺពោះបន្តិចបន្តួច អ្នកម្តាយមិនចាំបាច់កង្វល់ឡើយ ព្រោះជារឿងប្រក្រតីទេ តែបើមានអាការឈឺបែបធ្ងន់កន្តុកទៅក្រោម ឬឈឺខ្លាំងឡើងៗជារឿយៗនោះ ក៏គួរតែត្រូវសង្កេតមើលអាការផ្សេងៗរួមជាមួយផងហើយ។
ហេតុអីទើបអ្នកម្តាយមានអាការឈឺពោះខណៈពេលមានគភ៌
ការតាំងគភ៌ក្នុងត្រីមាសដំបូង រាងកាយរបស់អ្នកម្តាយនឹងមានអាការប្រែប្រួលផ្សេងៗយ៉ាងឆាប់រហ័ស រហូតដល់អ្នកម្តាយអាចនឹងទប់ទល់មិនទាន់ ទើបធ្វើឱ្យអ្នកម្តាយមានអាការឈឺពោះ និងមូលហេតុសំខាន់នោះគឺ ស្បូនរបស់អ្នកម្តាយកំពុងចាប់ផ្តើមពង្រីកខ្លួនឱ្យធំឡើងហ្នឹងឯង។
ក្នុងអំឡុងពេលដំបូងៗដែលតាំងគភ៌ អ្នកម្តាយអាចចាប់ផ្តើមឈឺពោះផ្នែកខាងស្តាំ ឬ ឆ្វេង ឈឺបែបបន្តិចបន្តួចដោយសារតែការទម្លាក់ខ្លួនរបស់កូនជីវិត។ អាការឈឺពោះដែលបណ្តាលមកពីមូលហេតុនេះនឹងមិនកើតឡើងយូរទេ និងនៅពេលទម្លាក់ខ្លួនរួចរាល់ហើយ អ្នកម្តាយអាចមានអាការឈឺពោះពីអាការឈឺស្បូនដែលចាប់ផ្តើមមានការប្រែប្រួលដើម្បីពង្រីកឱ្យធំឡើងជារឿយៗយ៉ាងយឺតៗដើម្បីមិនឱ្យអ្នកម្តាយមានអារម្មណ៍ថាទើសទែងខ្លាំងពេក។
ប្រាកដណាស់ថា ការតាំងគភ៌មិនបានចប់ក្នុងអំឡុងពេល 2 – 3 ខែនោះទេ ស្បូននឹងពង្រីកខ្លួនធំឡើងទៅជារឿយៗរហូតទាល់តែដល់កំណត់ប្រសូត ក្រៅពីនេះក្នុងអំឡុងពេលមានគភ៌ បើអ្នកម្តាយមានភេទសម្ព័ន្ធ ឬការដើរ ការហាត់ប្រាណ ការដើរឡើងចុះជណ្តើរនោះ ក៏អាចធ្វើឱ្យអ្នកម្តាយមានអាការឈឺពោះផ្នែកខាងក្រោមបានដែរ ដោយសារតែការប្រើការរបស់សាច់ដុំលើផ្នែកនោះហ្នឹងឯង។
តើត្រូវធ្វើយ៉ាងណានៅពេលមានអាការឈឺពោះក្នុងអំឡុងពេលមានគភ៌?
បើអាការឈឺពោះផ្នែកខាងក្រោមរបស់អ្នកម្តាយជាអាការឈឺពោះបែបប្រក្រតីមិនពាក់ព័ន្ធជាមួយសភាវរលូតអ្វីទេនោះ អ្នកម្តាយអាចសម្រាលអាការឈឺពោះបែបនេះបាន ដូចខាងក្រោមនេះ ៈ
– បញ្ឈប់កិច្ចការងារផ្សេងៗដែលកំពុងធ្វើនោះភ្លាម ដើម្បីអង្គុយ ឬគេងសម្រាកឱ្យរាងកាយបានធូរស្រាល មួយស្របក់អ្នកម្តាយនឹងមានអារម្មណ៍ថា ការឈឺពោះថយចុះ និងមានអាការល្អប្រសើរឡើងវិញមិនខាន។
– ទម្លាក់ខ្លួនគេង និងសង្កេតមើលថា តើមានអាការឈឺផ្នែកខាងណា ហើយសាកល្បងគេងផ្អៀងខាងឆ្វេង ឬ ខាងស្តាំមើលថា តើគេងផ្អៀងខាងណានឹងធ្វើឱ្យអាការឈឺពោះនោះធូរស្រាលឡើងវិញ?។
– ងូតទឹកក្តៅឧណ្ហៗ ព្រោះការងូតទឹកក្តៅឧណ្ហៗនឹងជួយកាត់បន្ថយអាការឈឺពោះតាមរាងកាយបានល្អ ឬអាចញ៉ាំថ្នាំប៉ារ៉ាសេតាម៉ុលដើម្បីបន្ថយអាការឈឺបាន។
តែក្នុងករណីដែលមានអាការឈឺពោះខ្លាំង ធ្វើយ៉ាងណាក៏មិនធូរស្រាលឡើងដែរនោះ ចូរប្រញាប់ទៅជួបគ្រូពេទ្យដើម្បីពិនិត្យមើលគភ៌ និងរាងកាយ ឬសុំការប្រឹក្សាក៏បាន៕
May 19, 2020
ក្លិបឈៀងម៉ៃ ចុះកុងត្រាយកកីឡាករជម្រើសជាតិមីយ៉ាន់ម៉ា
ក្លិបបាល់ទាត់ឈៀងម៉ៃ បានបង្ហោះរូបកីឡាករជម្រើសជាតិមីយ៉ាន់ម៉ា Kyaw Koko ជាមួយនឹងវិញ្ញាបនបត្រសុខភាពរបស់កីឡាកររូបនេះ ក្នុងនាមជាកីឡាករ កូតាអាស៊ាន។
ក្នុងនោះដែរ កីឡាករជើងខ្លាំងខាងស៊ុតទម្លុះទីគូប្រកួតរូបនេះ បានធានាយ៉ាងមុតមាំក្នុងការស្វែងរកជើងឯកក្នុងពានរង្វាន់លីកទី2 របស់ថៃ ឱ្យខាងតែបានក្នុងរដូវកាលនេះ។ បន្ទាប់ពីទៅដល់ឈៀងម៉ៃ កីឡាកររូបនេះបានទទួលការពិនិត្យរាងកាយយ៉ាងល្អិតល្អន់ពីវេជ្ជបណ្ឌិតរបស់ក្លិប ដោយលទ្ធផលនៃការពិនិត្យរាងកាយ និងសម្បទា គឺល្អ និងគ្មានបញ្ហាអ្វីឡើយ។
កីឡាករវ័យ 27ឆ្នាំរូបនេះ ត្រូវបានគេចាត់ទុកថា ជាកីឡាករដែលមានបទពិសោធខ្ពស់ ខ្លាំងក្នុងក្រុម ដ្បិតអីធ្លាប់លេងក្នុងក្របខ័ណ្ឌពានលំដាប់អន្តរជាតិ និងជម្រើសជាតិជាច្រើនរួចមកហើយ និងថែមទាំងធ្លាប់លេងឱ្យក្រុមលីកកំពូលៗរបស់ថៃ ជាច្រើនទៀតផង ដូចជា Singha Chiang Rai United, Samut Prakan City និង Sukhothai FC ក៏ដូចជាស្ថិតនៅក្នុងក្រុមជម្រើសជាតិមីយ៉ាន់ម៉ា ដោយលេងបាន 53លើក និងរកបាន 16គ្រាប់៕
May 18, 2020
បន្ទាប់ពីចែកអង្ករហើយ ម្ចាស់ក្លិបអង្គរថាយហ្គើរ នឹងជូនភ្ញៀវទេសចរ ដែលមកលេងសៀមរាប ម្នាក់ 200ដុល្លារទៀត
លោក Akihiro Kato ម្ចាស់ក្លិបបាល់ទាត់អង្គរថាយហ្គើរ បានធ្វើការចែកអង្ករជូនប្រជាជនក្នុងស្រុកចំនួន 400គ្រួសារ ដោយក្នុង 1គ្រួសារ ទទួលបាន 20គីឡូ ក្នុងខែឧសភា មិថុនា និងកក្កដា ពោលគឺ ចំនួន 3ខែ។ ហើយលោកបានបន្តថា អាចនឹងធ្វើការចែកជូនបន្តទៅមុខទៀត ប្រសិនបើស្ថានភាពកូវីដ-19 នេះ មិនទាន់បានធូរស្បើយ។
បន្ទាប់ពីគម្រោងនេះទទួលបានជោគជ័យ លោកបានបង្ហើបឱ្យដឹងអំពីគម្រោងថ្មីរបស់លោកទៀតថា គឺលោកនឹងជួយឧបត្ថម្ភជនជាតិជប៉ុនចំនួន 50នាក់ ដោយម្នាក់ៗនឹងទទួលបានទឹកប្រាក់ចំនួន 200ដុល្លារ នៅពេលដែលពួកគេមកលេងខេត្តសៀមរាបដោយផ្ទាល់៕

May 18, 2020
អ្នកនាង យក់ ឋិតរដ្ឋា ចាប់ផ្ដើមទាញប្រជាប្រិយភាពជាមួយអ្នកគាំទ្រតាមរយៈការ Live Video រំឭកបទចម្រៀងល្បីចាស់ៗ
ដូចមហាជនជាច្រើនបានទទួលស្គាល់ពីប្រជាប្រិយភាពរបស់កំពូលតារាចម្រៀង យក់ ឋិតរដ្ឋា នៅអំឡុងឆ្នាំ2000ជាង ដែលមានបទចម្រៀងល្បីបញ្ចេញនៅលើទីផ្សារសិល្បៈបានច្រើនជាងគេជាពិសេសដូចជាបទ ភ្លើង , ត្រឹមមនុស្សម្នាក់លួចស្នេហ៍ , ស្អប់ប្រុសសក់High Light និង បទ អ្នកផ្សេងមិនដូចបង ជាដើម។ ដោយឡែកអ្នកនាងយក់ ឋិតរដ្ឋា នៅពេលថ្មីៗនេះ បានងាកមកសាងប្រជាប្រិយភាពជាមួយអ្នកគាំទ្រជាថ្មីម្ដងតាមរយៈការឡាយវីដេអូ ដើម្បីសំណេះសំណាល និងទទួលសំណូមពរបទចម្រៀងពីអ្នកគាំទ្រ ក៏ដូចជាជាការជូនដំណឹងដល់អ្នកគាំទ្រ ចំពោះការបើកមុខរបរ លក់ផលិតផលរបស់ខ្លួនផងដែរ។
ចំពោះការឡាយវីដេអូនេះ អ្នកនាងបានសរសេរថា «17/05/20 តោះតោះ ! បងប្អូនសូមចូលមើលការរបស់ខ្ញុំ ដែលខ្ញុំបានលើកយកបទចម្រៀងចាស់ៗយកមកចែកជូនបងប្អូនបានស្តាប់កម្សាន្ត ហើយក៏សូម អរគុណចំពោះការគាំទ្រព្រមទាំងក្នុងការជួយ like នឹងshare របស់បងប្អូនទាំងអស់គ្នាផងដែរអរគុណខ្លាំងមែនទែនចា»។ នៅក្នុងវីដេអូនេះ តារាចម្រៀងស្រីរូបនេះ បានលើកឡើងថា «ថ្ងៃនេះដែរ បើបងប្អូនណាមានសំណួរចង់សួរនាងខ្ញុំ ជាពិសេសសួរទាក់ទងទាំងការរស់នៅ ហើយនិងបទចម្រៀងថ្មីៗសម្រាប់នាងខ្ញុំនៅក្នុងផលិតកម្មថោន និងបទពិសោធន៍ខ្លះ…ជាមួយនឹងបងប្អូនយើងជាអ្នកចម្រៀងឥឡូវ…បើនាងខ្ញុំអាចផ្ដល់ជាយោបល់បាន នាងខ្ញុំនឹងចូលរួមផ្ដល់ជាយោបល់សម្រាប់បងប្អូន»។
ក្នុងពេលសំណេះសំណាលឆ្លើយនឹងសំណួររបស់អ្នកគាំទ្រដែលថា តើអ្នកនាងមានកូនប៉ុន្មាននាក់នោះ? តារាចម្រៀងផលិតកម្មថោនរូបនេះ បានបញ្ជាក់ថា បើទាំងក្នុងពោះនេះទៀត3 ប៉ុន្តែចង់ក្រោយនេះ សប្បាយចិត្តឡើងអត់ដឹង ចង់និយាយអីចេញ ព្រោះកូនទី3នេះ បានសម្រេចពិតប្រាកដ..ចង់និយាយថា យើងចង់បានកូនស្រី ប៉ុន្តែអារម្មណ៍របស់យើងមួយ បើសិនយើងចង់បានខ្លាំងពេក ខ្លាចមិនបានដូចចិត្ត យើងវាទៅជាខកចិត្តវិញ ដល់ចឹងខ្ញុំធ្វើអារម្មណ៍ឱ្យធម្មតា តែដល់ពេលចេញអេកូមក បានឃើញស្រីចឹង យើងសឹងតែអត់ជឿថាបានស្រីចឹង»។
សូមជម្រាបផងដែរថា អ្នកនាង យក់ ឋិតរដ្ឋា និង លោក ឃុំ ប៉ុណ្ណាដែត បានដឹកដៃគ្នា ក្រាបផ្ទឹមដល់កន្ទេលតាមប្រពៃណីខ្មែរតាំងពីថ្ងៃទី13 ខែឧសភា ឆ្នាំ 2006 ហើយគិតមកដល់ថ្ងៃនេះ មានរយៈពេលជាង10ឆ្នាំហើយ ដោយអ្នកទាំងពីរទទួលបានចំណងដៃនៃក្តីស្នេហ៍ផ្អែមល្ហែមនេះ នូវកូនប្រុសដែលមានមុខមាត់គួរឱ្យស្រឡាញ់ពីរនាក់ រួមនឹងកូនក្នុងផ្ទៃម្នាក់ទៀត។ចំពោះទិដ្ឋភាពរូបភាពមង្គលការរបស់ពួកគេវិញ អស់រយៈពេលយ៉ាងយូរមកនេះ ក៏ទើបតែបង្ហាញកាលពីអំឡុង ខែកញ្ញា ឆ្នាំ2019កន្លងទៅនេះប៉ុណ្ណោះ បង្កការភ្ញាក់ផ្អើល និងចាប់អារម្មណ៍ជាខ្លាំងពីសំណាក់អ្នកគាំទ្ររបស់ពួកគេ៕

May 18, 2020
បើបានសម្រេចមែន…ចិននឹងមានកីឡាករចូលសញ្ជាតិ 6រូប ក្នុងឈុត 11នាក់ដំបូងរបស់ខ្លួន
គិតមកទល់នឹងពេលនេះ សហព័ន្ធកីឡាបាល់ទាត់ចិន មានកីឡាករបរទេសចូលសញ្ជាតិចិន ចំនួន 6រូបហើយ ក្នុងឈុតធំរបស់កីឡាករជម្រើសជាតិរបស់ខ្លួន ដោយមាន 3នាក់ធ្លាប់លេងឱ្យជម្រើសជាតិចិន ខណៈដែល 3រូបទៀតកំពុងតែរៀបចំឯកសារចូលសញ្ជាតិចិន។
អ្វីដែលគេកត់សម្គាល់នោះ គឺក្លិប Guangzhou Evergrande បានជួយឱ្យសហព័ន្ធកីឡាបាល់ទាត់ចិន ចំណេញបានកីឡាករបរទេសបានចូលសញ្ជាតិ និងលេងឱ្យចិនទៀតផង ក្នុងនោះដែរមានកីឡាករ 6រូបហើយដែលក្លិបមួយនេះជួយឱ្យបានសញ្ជាតិចិន។
កីឡាករទាំង 6រូបនេះ មានដូចជា៖ Elkeson (Ai Kesen), Aloisio (Luo Guofu) និង Nico Yennaris (Li Ke) ដែលបានចូលសញ្ជាតិរួចរាល់ហើយ ខណៈដែល Ricardo Goulart (បម្រើកណ្ដាល), Alan Carvalho (ប្រយុទ្ធ) និង Fernando Henrique ប្រយុទ្ធ) នឹងមកចូលហ្វឹកហាត់ជាមួយជម្រើសជាតិ ពេលដែលពួកគេបំពេញឯកសារនានានៃការចូលសញ្ជាតិចិនរួចរាល់៕
May 18, 2020