Category: សង្គម និងសេដ្ឋកិច្ច

“សុនកដែកឃ្វាលចៀមជំនួសសុនកសាច់” ជាគន្លឹះជោគជ័យក្នុងវិស័យកសិកម្ម(វីដេអូ)
ពីមួយថ្ងៃទៅមួយថ្ងៃ គេឃើញមានរ៉ូបូតជាច្រើនប្រភេទត្រូវបានគេប្រើប្រាស់នៅក្នុងអាជីវកម្ម ក៏ដូចជានៅក្នុងជីវភាពប្រចាំថ្ងៃ ដូច្នេះយុគសម័យនៃរ៉ូបូតដំណើរការដោយស្វ័យប្រវត្តជិតមកដល់មែនទែនហើយ។
ពួកវាបានបង្ហាញវត្តមានកាន់តែច្រើននៅលើវាលដំណាំ ចំការឈើហូបផ្លែ។ល។ រ៉ូបូតស្វ័យប្រវត្តទាំងនេះ មិនត្រឹមតែជាម៉ាស៊ីនជំនួយ ឬម៉ាស៊ីនប្រមូលផលដ៏អស្ចារ្យនោះទេ ប៉ុន្តែពួកវាគឺជាសុនកយន្ត និងយន្តហោះគ្មានមនុស្សបើកជាដើមដែលមានប្រភេទខ្លះមានរូបរាងតូចច្រឡឹង អាចដើរ រត់ ហក់លោតបានដោយស្វ័យប្រវត្ត ក្នុងនោះក៏មានសុនកយន្ត Boston Dynamics ជាឧទាហរណ៍។
ពួកវាត្រូវបានបំពាក់កម្មវិធីគ្រប់ប្រភេទ ចាប់ពីកាមេរ៉ា កាំរស្មីអ៊ីនហ្វ្រារ៉េដ បច្ចេកវិទ្យាស្កេនរូបភាព3D រហូតដល់ថ្នាក់មានសមត្ថភាពបង្កើតផែនទីទៅតាមពេលវេលាជាក់ស្ដែងទៀតផង។
បណ្ដារ៉ូបូត ដូចជា Dynamics នេះ កាន់តែមានភាពឆ្លាតវៃ និងរហ័យរហួនជាងមុន និងអាចដើរនៅលើផ្ទៃដែលមានឧបសគ្គច្រើន ព្រមទាំងអាចធ្វើការម្នាក់ឯងបានល្អនៅក្នុងកសិដ្ឋាននានា។
ពួកវាអាចធ្វើការជំនួសសុនកដែលមានជំនាញខាងឃ្វាលចៀម ដោយមិនបាច់មានការឃ្លាំមើលច្រើនពីមនុស្ស។ សុនកយន្តអាចដេញហ្វូងចៀមទៅកាន់ទីតាំងដែលត្រូវបានកំណត់នៅក្នុងកម្មវិធីកុំព្យូទ័រ ព្រមទាំងអាចគ្រប់គ្រងតួលេខចៀមក្នុងហ្វូន និងបញ្ជូនព័ត៌មានជាបន្តបន្ទាប់ទៅកាន់ម៉ាស៊ីនផ្ទុកទិន្នន័យគ្រប់ពេល និងគ្រប់ទីកន្លែង។
នេះគឺជាគន្លឹះជោគជ័យមួយរបស់វិស័យកសិកម្ម។ នៅក្នុងអនាគត រដូវកាល ផលិតភាព ឬទិន្នផលនឹងត្រូវព្យាករបានយ៉ាងសុក្រឹត ហើយបញ្ហានៃការប្រើប្រាស់កម្លាំងមនុស្សក៏នឹងត្រូវបានដោះស្រាយ។
ស្វ័យប្រវត្តភាពកំពុងតែប្ដូរផ្លាស់វិធីដែលកសិករកំពុងធ្វើនាបច្ចុប្បន្ន។ រ៉ូបូតនេះនឹងជួយបង្កើនទិន្នផលកសិកម្ម ក៏ដូចជាផលិតភាពនៃកម្លាំងពលកម្ម។ល។
ប្រភព៖ សារព័ត៌មានបរទស
May 24, 2020
ពីរោះទាក់ចិត្ត!! ហ៊ិន លីដា ចាប់ដៃគូងថ្មីបទស្រាយបទ «អំពើល្អ» អត្ថន័យអប់រំពីជីវិតរស់នៅក្នុងសង្គមល្អ
កញ្ញា ហ៊ិន លីដា អតីតបេក្ខភាពឆ្នើម Cambodian Idol រដូវកាលទី2 បានបង្ហើរសំនៀងបទថ្មីជាការចាប់ដៃគូជាមួយស្ថាបនិកគ្រួសារតារាកម្ពុជាក្នុងបទ «អំពើល្អ» ដែលជាការរួមចំណែកផ្សព្វផ្សាយអំពីការសាងកុសលបុណ្យ អំពើល្អនៅក្នុងសង្គមជាតិ។ បទថ្មីត្រូវបានតាក់តែងនិពន្ធ ទំនុកច្រៀង និងមេឡូឌីថ្មី ស្ថាបនិកគ្រួសារតារាកម្ពុជា។
កញ្ញា ហ៊ិន លីដា បានថ្លែងនូវអារម្មណ៌មោទនភាពផងដែរ បន្ទាប់ពីបទ«អំពើល្អ» ដែលនាងមានឱកាសធ្វើជាម្ចាស់បទ ទទួលបានការគាំទ្រខ្លាំង តាំងពីមានបង្ហោះជាទម្រង់ព័ត៌មាន។ កញ្ញា និយាយថាសប្បាយ ដែលបទចម្រៀងមានអ្នកចាប់អារម្មណ៏ ហើយនាងក៏ត្រៀមខ្លួនក្នុងការថតបំផុសដើម្បីឱ្យបទចម្រៀងនេះ ក្លាយជាស្នាដៃមួយជួយដល់សង្គមដោយមិនគិតកម្រៃផងដែរ។
សូមជម្រាបបន្ថែមថា បទចម្រៀងដែលមានអត្ថន័យចាក់ដោតនេះ គឺជាការនិពន្ធឡើងដើម្បីលើកទឹកចិត្តដល់រាល់អំពើល្អនៅក្នុងសង្គម និងដើម្បីបំផុសឱ្យកាន់តែមានអំពើល្អនៅក្នងបរិបទដែលមនុស្សដែលតែឱ្យតម្លៃលើសកម្មភាពចែករំលែកនាពេលនេះ។ បទចម្រៀងមួយបទនេះ ក៏គម្រោងផលិតជា MV ដោយឆ្លុះបញ្ចាំងពីទង្វើល្អច្រើនទម្រង់ ក្រោមការសហការផលិតពីក្រុមហ៊ុនផលិតស្ពតធំមួយ គឺ អំណាត មេឌា ផងដែរ។
ក្នុងនោះសូម្បីតែសិល្បករសិល្បការិនីនៅក្នុងរង្វង់សិល្បៈច្រើនរូប ក៏បានប្រកាសខ្លួនថានឹងចូលរួមសម្ដែងនៅក្នុងបទនេះ ដើម្បីធ្វើជាសារបំផុសពីអំពើល្អផងដែរ។ អ្វីដែលធ្វើអោយបទនិពន្ធថ្មីនេះ ចាប់អារម្មណ៏គឺទំនុកច្រៀងនិង សាច់ភ្លេង ដែលមានភាពរស់រវើក និងចាក់ដោតពីអំពើល្អនោះតែម្ដង។
ចង់ដឹងថា តើបទអំពើល្អ មានខ្លឹមសារល្អ និងពីរោះទាក់ចិត្តកម្រិតណាសូមរីករាយទស្សនា៖

May 23, 2020
Facebook នឹងក្លាយជាអ្នកនាំមុខគេក្នុងការផ្លាស់ប្ដូររបៀបធ្វើការថ្មី
ក្រុមហ៊ុន Facebook នឹងអនុញ្ញាតឱ្យបុគ្គលិកយ៉ាងតិចពាក់កណ្ដាលធ្វើការពីចម្ងាយទាំងស្រុងក្នុងបំណងក្លាយជាក្រុមហ៊ុននាំមុខគេក្នុងការផ្លាស់ប្ដូរវិធីធ្វើការក្នុងពិភពលោកនាពេលដ៏ខ្លីខាងមុខ។
CEO របស់ក្រុមហ៊ុន Facebook លោក Mark Zuckerberg បានចែករំលែកព័ត៌មាននៅលើទំព័រផ្ទាល់ខ្លួនរបស់លោកថា បុគ្គលិករបស់ខ្លួនអាចដាក់ពាក្យធ្វើការពីចម្ងាយ ដោយមិនចាំបាច់មកក្រុមហ៊ុន ចាប់ពីចុងឆ្នាំនេះ។ “យើងនឹងអនុវត្តលើកិច្ចការនេះយ៉ាងយកចិត្តទុកដាក់បំផុត និងប្រកបដោយការទទួលខុសត្រូវ។ ការផ្លាស់ប្ដូរនេះនឹងត្រូវចំណាយពេលចាប់ពី5ទៅ10ឆ្នាំ ប៉ុន្តែវាអាចលឿនជាងនេះ”។ លោក Zuckerberg សង្កត់ធ្ងន់ថា “ប្រហែល50% (នៃបុគ្គលិក) នឹងប្ដូរទៅធ្វើការពីចម្ងាយជារៀងរហូត”។
បច្ចុប្បន្ន Facebook មានបុគ្គលិកជាង48,000នាក់ ធ្វើការនៅក្នុងការិយាល័យចំនួន70នៅទូទាំងពិភពលោក។
Facebook បានរៀបផែនការបើកការិយាល័យរបស់ខ្លួនឡើងវិញនៅថ្ងៃទី6កក្កដាខាងមុខ។ តាមគម្រោង ក្រុមហ៊ុននេះនឹងមានបុគ្គលិកតែ25%ប៉ុណ្ណោះដែលនឹងមកធ្វើការនៅក្នុងការិយាល័យ។ ស្ថាបនិករបស់ Facebook បានឱ្យដឹងថា បន្ទាប់ពីបានចូលរួមកិច្ចប្រជុំតាមអនឡាញមួយ លោក “ត្រូវបានបញ្ចុះបញ្ចូល” ទាក់ទិននឹងទៅផលប្រយោជន៍នានានៅពេលអនុញ្ញាតឱ្យបុគ្គលិកធ្វើការពីចម្ងាយ ពិសេសគឺការសន្សំសំច័យថាមពលអគ្គិសនី និងការការពារបរិស្ថាន។
តាមគម្រោង ក្រុមហ៊ុន Facebook នឹងជ្រើសរើសបុគ្គលិកសរុបប្រមាណជា10,000នាក់បន្ថែមទៀតនៅក្នុងឆ្នាំនេះ។ បន្ទឹមនឹងនេះ Facebook ក៏នឹងបង្កើតមជ្ឈមណ្ឌលមួយចំនួននៅ Atlanta, Dallas និង Denver នៃសហរដ្ឋអាមេរិកផងដែរ។ ប៉ុន្តែ Zuckerberg បញ្ជាក់ថា នេះគ្រាន់តែជាទីកន្លែងសម្រាប់បុគ្គលិកមកប្រជុំតែប៉ុណ្ណោះ មិនមែនជាការិយាល័យនោះទេ។
បុគ្គលិករបស់ Facebook ម្នាក់សុំមិនបញ្ចេញឈ្មោះ បានប្រាប់ NYTimes ថា ក្រុមការងារដែលធ្វើការពីចម្ងាយ មានការលំបាកណាស់នៅពេលត្រូវត្រួតពិនិត្យខ្លឹមសាររាប់មិនអស់នៅលើ Facebook ពិសេសគឺព័ត៌មានក្លែងក្លាយទាក់ទងនឹង COVID-19៕
ប្រភព៖ សារព័ត៌មានបរទេស
May 22, 2020
អាហារបន្ថែម 10 យ៉ាងដែលមានគុណតម្លៃខាងភោជនាហារសម្រាប់កូនតូច
ក្នុងរយៈពេលមួយថ្ងៃៗអ្នកម្តាយប្រហែលជាខំព្យាយាមស្វែងរកមុខម្ហូបអាហារបន្ថែមឱ្យកូនតូចបានញ៉ាំ ដើម្បីកុំឱ្យច្រំដែលៗហើយមែនទេ?។ ក្រៅពីបាយដែលជាប្រភពអាហារចម្បងរបស់កូនហើយនោះ អ្នកម្តាយអាចបន្ថែមដោយអាហារផ្សេងៗឱ្យកូនបានញ៉ាំដើម្បីសុខភាពបានច្រើនយ៉ាងច្រើនមុខទៀតដូចតទៅនេះ ៈ
1 – ប៊័រសណ្តែក
មានសារជាតិអាហារដែលសំខាន់ៗដូចជា ប្រូតេអ៊ីន អាស៊ីតខ្លាញ់ ដែលជាប្រយោជន៍ វិតាមីនE និងសារធាតុរ៉ែ ដូចជា ម៉ងហ្កានេស ប៉ូតាស្យូម និងសារធាតុដែក។ អ្នកម្តាយអាចឱ្យកូនញ៉ាំជាអាហារបន្ថែមបានតែម្តងតាំងពីកូនអាយុបាន 6 ខែ តែអ្នកម្តាយត្រូវប្រាកដក្នុងចិត្តជាមុនសិនថា កូននឹងមិនមានប្រតិកម្មចាញ់អាហារទាំងនេះទេ ដោយពិនិត្យ និងស៊ើបប្រវត្តិមនុស្សក្នុងក្រុមគ្រួសារបាន។

2 – ស៊ុត
ស៊ុត អាចរាប់បានថាជាអាហារដែលពិសេសខ្លាំងណាស់សម្រាប់មនុស្សគ្រប់រូប តាំងពីពេលដែលអ្នកម្តាយចាប់ផ្តើមតាំងគភ៌ ក៏ត្រូវទទួលទានស៊ុតយ៉ាងហោចណាស់មួយថ្ងៃ 1 គ្រាប់ដែរ ដើម្បីបំប៉នទារកក្នុងគភ៌ និងនៅពេលកូនតូចចាប់ផ្តើមញ៉ាំអាហារបន្ថែមបានហើយនោះ ក៏ត្រូវចាប់ផ្តើមពីស៊ុតក្រហមជាមុនសិន។ នៅក្នុងស៊ុតមានសារធាតុអាហារសំខាន់ៗដូចជា សារធាតុដែក ហ្វូលេត និងខូលីនដែលជាប្រូតេអ៊ីន ដែលមានគុណភាពខ្ពស់ រួមទាំងវីតាមីនA .D និង E ដែលជាចំណែកបង្កើនប្រព័ន្ធប្រសាទ និងខួរក្បាលរបស់កូនបានយ៉ាងល្អ។
3 – ប៊័រ
ពេលនិយាយអំពីប៊័រ សូមកុំអាលទៅគិតពីរឿងខ្លាញ់អី តែប៊័រអាចជួយបំប៉នខួរក្បាល និងប្រព័ន្ធសរសៃប្រសាទបានល្អ និងជួយបឺតជ្រាបវីតាមីនផ្សេងៗបានល្អទៀតផង។ ការប្រើប៊័រធ្វើជាអាហារនឹងធ្វើឱ្យបានរសជាតិអាហារដែលឈ្ងុយ និងឆ្ងាញ់ឡើងទៀតផង។
4 – ត្រី
អាហារបន្ថែមរបស់កូនតូចមួយទៀតដែលមិនអាចខ្វះបានឡើយនោះគឺ សាច់ត្រី។ ចូរឱ្យញ៉ាំមួយសប្តាហ៍ម្តងក៏ល្អដែរ ព្រោះសាច់ត្រីនឹងជួយបំប៉នប្រព័ន្ធប្រសាទ និងខួរក្បាលរបស់កូនតូចបាន។
5 – សណ្តែក
ជាអាហារដែលស័ក្តិសមសម្រាប់មនុស្សគ្រប់រូបក្នុងក្រុមគ្រួសារ មិនមែនចំពោះតែក្មេងតូចប៉ុណ្ណោះទេ ព្រោះនៅក្នុងសណ្តែក មានសារធាតុដែក ហ្វូលេត ស័ង្កសី ម៉ង់ហ្កានេស។ សណ្តែកអាចយកទៅចម្អឹនជាអាហារបានយ៉ាងងាយ ដូចជា ធ្វើស៊ុប ឬស្ងោញ៉ាំលេងក៏បាន។
6 – ឱសថបុរាណ
ក្មេងតូចដែលមានអាយុលើស 12 ខែឡើងទៅអាចញ៉ាំអាហារដែលធ្វើមកអំពីឱសថបុរាណបានហើយ ដូចជា ទឹកឱសថបុរាណ ឬអាហារចម្បងដែលមានដាក់ឱសថបុរាណចូលទៅបន្តិចបន្តួច។
7 – តៅហ៊ូ
ជាអាហារសម្រាប់ក្មេងតូចដែលចាប់ផ្តើមញ៉ាំអាហារបន្ថែមបានហើយ គ្រប់គ្នាមិនគួរខកខានឡើយ ព្រោះជាអាហារដែលទន់ងាយស្រួលលេប និងថែមទាំងមានរសជាតិឆ្ងាញ់ទៀតផង ក្មេងៗអាចញ៉ាំបានទាំងតៅហ៊ូស៊ុត និងតៅហ៊ូសណ្តែក។
8 – នំប៉័ង
នំប៉័ងចំហុយស្រួយ នំប៉័ងដែលធ្វើពីស្រូវសាលី នំប៉័ងជាប្រភពអាហារសំខាន់មួយទៀតមិនចាញ់បាយឡើយ។ បើកូនតូចចាប់ផ្តើមធុញទ្រាន់បាយនោះ អ្នកម្តាយអាចឱ្យកូនញ៉ាំនំប៉័ងជំនួសបាន អាចយកទៅអាំងបន្តិច រួចលាបជែម លាបប៊័រ ឬធ្វើជានំសេនវិចក៏ឆ្ងាញ់ និងឆ្អែតពោះដែរ។
9 – យ៉ាអួ
ជាប្រភពអាហារដែលបានមកពីធម្មជាតិដូចគ្នាដែរ បើញ៉ាំយ៉ាអួ កូននឹងបានទទួលកាល់ស្យូមខ្ពស់ និងធ្វើឱ្យប្រព័ន្ធរំលាយអាហារធ្វើការបានយ៉ាងប្រក្រតីល្អទៀតផង។
10 – សាច់សត្វ
ក្មេងតូចគួរគួរបានញ៉ាំសាច់សត្វយ៉ាងជាប់លាប់ ព្រោះសាច់សត្វសម្បូរទៅដោយ សារធាតុដែក និងស័ង្កសី អ្នកម្តាយអាចយកសាច់សត្វមកកិន ស្ងោ ឬស្ងោឱ្យផុយ រួចយកមកធ្វើជាម្ហូបឱ្យកូនញ៉ាំជាមួយបាយបានគ្រប់ពេល៕
May 22, 2020
ចិត្តល្អកម្របានជួប! រើសបានប្រាក់ជិតមួយលានដុល្លារអាមរិក តែប្រគល់ឱ្យម្ចាស់ដើមវិញ
គ្រួសារមួយនៅក្នុងរដ្ឋ Virginia ទទួលបានការកោតសរសើរយ៉ាងខ្លាំងពីសមត្ថកិច្ច នៅពេលដែលសម្រេចចិត្តប្រគល់ប្រាក់ជិតមួយលានដុល្លារដែលពួកគេរើសបាននៅលើដងផ្លូវ ទៅឱ្យម្ចាស់ដើមវិញ។
ប្ដីប្រពន្ធ លោក David និងនាង Emily Schantz កាលពីថ្ងៃទី16ឧសភា បានបើកឡានដឹកកូនៗចាកចេញពីផ្ទះនៅតំបន់ Caroline ភាគខាងជើងទីក្រុង Richmond រដ្ឋ Virginia នៃសហរដ្ឋអាមេរិក។ ក្នុងពេលធ្វើដំណើរ រថយន្តបានកិនចំថង់មួយនៅលើផ្លូវ។ ដំបូងឡើយ ពួកគេនឹកស្មានថាជាថង់សំរាម ប៉ុន្តែពេលឈប់ដើម្បីពិនិត្យមើល ស្រាប់តែឃើញថង់មួយផ្សេងទៀតនៅក្នុងប្រឡាយមួយដែលនៅក្បែរនោះ។
រហូតមកដល់ផ្ទះ ទើបពួកគេដឹងថា បានរើសបានប្រាក់ជិតមួយលានដុល្លារអាមេរិក។ ប្រាក់ទាំងនេះត្រូវបានដាក់នៅក្នុងថង់ផ្លាស្លឹក។
ជំនួសឱ្យការរក្សាទុក “ទ្រព្យដែលទេវតាប្រទាន” នេះ គ្រួសារ Shantz ក៏បានសម្រេចចិត្តយកវាទៅប្រគល់ឱ្យសមត្ថកិច្ចនៃតំបន់ Caroline។ មន្ត្រីនគរបាលម្នាក់ ឈ្មោះ Scott Moser បានថ្លែងថា “មនុស្សដែលចិត្តល្អបែបនេះ គឺកម្របានជួបណាស់។ យើងពិតជាមានមោទនភាពចំពោះពួកគេ ហើយពួកគេគឺជាតំណាងនៃភាពស្មោះត្រង់”។
ចំណេកនាង Schantz វិញ បាននិយាយថា គ្រួសាររបស់ពួកគេគ្រាន់តែធ្វើរឿងមួយដែល “ត្រឹមត្រូវ” ប៉ុណ្ណោះ។ “ប្រាក់ទាំងនេះមិនមែនជារបស់គ្រួសារខ្ញុំទេ”។
សមត្ថកិច្ចមិនទាន់បានដឹងច្បាស់អំពីមូលហេតុដែលនាំឱ្យមានថង់ប្រាក់ដ៏ច្រើនបែបនេះធ្លាក់នៅលើផ្លូវនេះនៅឡើយ ប៉ុន្តែជឿជាក់ថា ប្រាក់ទាំងនេះប្រាកដជាបានធ្លាក់ក្នុងពេលម្ចាស់របស់វាកំពុងដឹកទៅកាន់ធនាគារ។ ប្រាក់ជិតមួយលានដុល្លារនេះត្រូវបានបញ្ជូនត្រឡប់ទៅកាន់ម្ចាស់ដើមវិញ តាមរយៈប្រៃសណីយ៍៕
ប្រភព៖ សារព័ត៌មានបរទេស
May 22, 2020
Facebook “បើកផ្សារអេឡិកត្រូនិក” ៖ Amazon និង eBay ព្រួយបារម្ភ ខណៈអ្នកខ្លះថាជា “កាំបិតមុខពីរ”
យុទ្ធសាស្ត្រ “មុខទល់នឹងមុខ” ជាមួយនឹងក្រុមហ៊ុនធំៗក្នុងវិស័យពាណិជ្ជកម្មអេឡិកត្រូនិកដូចជា Amazon និង eBay ជាដើម នឹងអាចនាំមកនូវផលប្រយោជន៍ជាទីគាប់ចិត្តដល់ Facebook ក៏ប៉ុន្តែ វាក៏កង្កប់ទៅដោយហានិភ័យច្រើនសម្រាប់បណ្ដាញសង្គមខ្នាត “យក្ស” មួយនេះដែរ។
អត្ថបទទាក់ទង>Facebook នឹងបង្កើតផ្សារអនឡាញ ទាំងនៅលើ Facebook ទាំងនៅលើ Instagram
កាលពីថ្ងៃទី19ឧសភាកន្លងទៅ បណ្ដាញសង្គមធំជាងគេបង្អស់ក្នុងពិភពលោកបានឧទ្ទេសនាមមុខងារថ្មីមួយ ឱ្យឈ្មោះថា Facebook Shops ដែលអនុញ្ញាតឱ្យអ្នកជំនួញទាំងឡាយបង្កើត “តូបស្រមោល” ដើម្បីដាក់លក់ផលិតផលរបស់ខ្លួននៅលើ Facebook ផង និងនៅលើ Instagram ផង។
CEO របស់ Facebook បានឱ្យដឹងថា Facebook Shops នឹងកែលម្អបទពិសោធន៍ជំនួញដែលធ្វើឡើងតាមរយៈគេហទំព័រនៃផ្សារអនឡាញបច្ចុប្បន្ន ដោយការរក្សាទិន្នន័យពាក់ព័ន្ធនឹងការទូទាត់ដែលត្រូវបានបញ្ជាក់ដោយអ្នកប្រើប្រាស់នៅកន្លែងតែមួយគត់ ហើយក្រោយមក ពួកគេអាចប្រើប្រាស់ទិន្នន័យរបស់ខ្លួននៅគ្រប់ផ្សារអនឡាញ ឱ្យតែផ្សារទាំងនោះស្ថិតនៅក្នុងបណ្ដាញសង្គម Facebook ឬ Instagram។
នេះគឺយុទ្ធសាស្ត្រមួយដែលជួយឱ្យ Facebook ក្លាយជាគូប្រជែងដ៏ធំ និងផ្ទាល់របស់បណ្ដាផ្សារអនឡាញវ័យចំណាស់ ដូចជាផ្សារ Amazon ផ្សារ eBay ឬផ្សារ Etsy ជាដើម។ល។ ការដែលក្រុមហ៊ុន “យក្ស” ដូចជា Facebook ប្ដេជ្ញាដណ្ដើមចំណេកទីផ្សារក្នុងវិស័យពាណិជ្ជកម្មអេឡិកត្រូនិកបែបនេះ ប្រាកដណាស់ថា វានឹងធ្វើឱ្យ Amazon និង eBay ជាដើម ត្រូវ “ដេកមិនលក់ បក់មិនល្ហើយ” មិនខាន។
ក៏ប៉ុន្តែ បើទោះជាយុទ្ធសាស្ត្រនេះរបស់ Facebook ត្រូវបានគេមើលឃើញថា “ដើរទាន់សភាពការណ៍” យ៉ាងណាក៏ដោយ Business Insider បានវាយតម្លៃថា Facebook កំពុងតែប្រថុយប្រថាន ហើយថានឹងអាចប្រឈមនឹងហានិភ័យច្រើនផងដែរ។ មូលហេតុដែលត្រូវបាន Business Insider លើកឡើង នោះគឺថា បណ្ដាញសង្គមដែលមានតម្លៃ607ពាន់លានដុល្លារនេះ ធ្លាប់ជួបរឿងអាស្រូវជាច្រើនដែលជាប់ទាក់ទិននឹងព័ត៌មានផ្ទាល់ខ្លួនរបស់អ្នកប្រើប្រាស់ និងព័ត៌មានក្លែងក្លាយ។ ទន្ទឹមនឹងនេះ នៅលើបណ្ដាញសង្គម Facebook ក៏នៅមានទិន្នន័យដែលមានខ្លឹមសារអាក្រក់ជាច្រើន រួមនឹង ទំនិញហាមឃាត់ និងខ្លឹមសារខុសច្បាប់ផ្សេងទៀតដែលមិនទាន់មានការត្រួតពិនិត្យឱ្យបានត្រឹមត្រូវ និងពេញលេញនៅឡើយ។
បើសិនជា Facebook សម្រេចចិត្តពង្រីកទំហំពាណិជ្ជកម្មអេឡិកត្រូនិក ប៉ុន្តែមិនអាចគ្រប់គ្រងខ្លឹមសារអាក្រក់ ទំនិញហាមឃាត់ ឬខ្លឹមសារខុសច្បាប់ជាដើម វាប្រៀបដូចជា “កាំបិតមុខពីរ” ដែលអាចនាំឱ្យក្រុមហ៊ុននេះ ត្រូវប្រឈមនឹងបញ្ហាអាស្រូវថ្មីៗបំផុតនាពេលខាងមុខ៕
ប្រភព៖ សារព័ត៌មានបរទេស
May 21, 2020
ធ្ងន់ធ្ងរហើយ!! ស្ថានភាពជំងឺរបស់លោកតា សង់ ស៊ីស ដល់ថ្នាក់វង្វេងដើរចោលផ្ទះ
ឆ្នាំ2020នេះ តារាកំប្លែងជើងចាស់ប្រចាំប្រទេសកម្ពុជា លោកតា សង់ ស៊ីស មានអាយុ 75ឆ្នាំទៅហើយ។ លោកតាមានជំងឺប្រចាំកាយលើសឈាម ត្រូវការព្យាបាលឱ្យបានដិតដល់ រហូតដល់ពេលខ្លះត្រូវបញ្ចូនទៅសង្គ្រោះបន្ទាន់នៅមន្ទីរពេទ្យជាប្រចាំខែទៀតផង។
តាមការបញ្ជាក់របស់កូនៗលោកតា បានឱ្យដឹងថា ស្ថានភាពជំងឺរបស់លោកតាកាន់តែធ្ងន់ធ្ងរពីមួយថ្ងៃទៅមួយថ្ងៃ។ សព្វថ្ងៃលោក មានកម្រិតឈាមឡើងខ្ពស់ រហូតដល់ធ្វើឱ្យទាញដៃទាញជើង វៀចមាត់ និងនិយាយលែងចេញក៏មានដែរ។ ជុំវិញស្ថានភាពជំងឺនាយកំប្លែងជើងចាស់នេះ វិវត្តន៍បែបណានោះ អ្នកនាង សុន ស្រីពេជ្រ ដែលជាកូន និងជាតារាចម្រៀងលេចធ្លោ បានឱ្យដឹងថា ជំងឺលោកឪពុករបស់នាង មានភាពប្រសើរ សុខភាពល្អធម្មតា ប៉ុន្តែគាត់វង្វេងច្រើនណាស់ ឧស្សាហ៍ដើរទៅនេះ ទៅនោះបើមិនតាមមើលគាត់ឱ្យល្អិតល្អន់ទេនោះ គឺរកគាត់មិនឃើញនោះទេ។
អ្នកនាងបន្តថា មានពេលមួយគាត់ដើរចេញពីផ្ទះ ដោយមិនមានអ្នកដឹង ទៅទើនៅហាងកាហ្វេមួយកន្លែងម្តុំផ្ទះ គេក៏ឃាត់គាត់ទុក ដើម្បីកុំឱ្យសាច់ញាតិតាមរកឆ្ងាយ។ គ្រានោះកូនចៅបាននាំគ្នាជិះម៉ូតូរករូបគាត់ឡើងបុកពោះ តែគេស្គាល់គាត់ក៏ឃាត់គាត់ទុកមួយកន្លែង ។ យ៉ាងណា ឪពុកនាងនៅប្រើថ្នាំពេទ្យម្តងម្កាល ដើម្បីជំនួយសុខភាព បើការនិយាយវិញ គាត់និយាយឡុលៗ មិនច្បាស់នោះទេ៕

May 21, 2020
ខាត់ សុឃីម ៖«…មនុស្សដែលយើងទុកចិត្តបំផុត ក៏ជាមនុស្សដែលគ្រោះថ្នាក់បំផុតសម្រាប់យើង..»
មុននេះនៅលើបណ្ដាញសង្គមហ្វេសប៊ុក តារាស្រីល្បីចេះច្រើនជំនាញទាំងបុរាណ និងសម័យអ្នកនាង ខាត់ សុឃីម បានបង្ហោះរូបភាពមួយសន្លឹករួមកូនស្រីបណ្ដូលចិត្ត អមដោយសារទូន្មានកូនស្រីយ៉ាងមានអត្ថន័យចាក់ដោតខ្លាំងហាក់ចង់បង្ហាញពីអត្តចរិត និងភាពមិនស្មោះត្រង់ដែលមនុស្សមួយចំនួនក្នុងសង្គមបច្ចុប្បន្ន កំពុងប្រើប្រាស់ដើម្បីជាឈ្នាន់ សម្រេចភាពអាត្មានិយមរបស់ខ្លួន។
សំណេរខ្លីតែមានអត្ថន័យ សម្រាប់មនុស្សគ្រប់គ្នាស្វែងយល់ដឹងឱ្យច្បាស់នូវធាតុពិតនៃពពួកមនុស្សប្រើប្រាស់សម្ព័ន្ធភាពក្លែងក្លាយ កុហកបោកប្រាស់ដើម្បីផលប្រយោជន៍ផ្ទាល់ខ្លួន ត្រូវបានអ្នកនាង ខាត់ សុឃីម រៀបរាប់ដោយពាក្យពេជន៍ ប្រៀនប្រដៅកូនស្រីសំណព្វដូចនេះថា«ត្រូវចាំណាកូន ថាមនុស្សដែលយើងទុកចិត្តបំផុត ក៏ជាមនុស្សដែលគ្រោះថ្នាក់បំផុតសម្រាប់យើងដែរ»៕

May 21, 2020
ម៉ានិត ត្រៀមខ្លួនជាស្រេចក្នុងការស្វែងរកតារាចម្រៀងវ័យក្មេងតាមរយៈកម្មវិធី The Amazing Voice
ថ្មីៗនេះគេបានឃើញតារាចម្រៀង ម៉ុង ម៉ានិត បានប្រកាសនៅលើបណ្ដាញសង្គមហ្វេសប៊ុកថា លោកនឹងចូលខ្លួនធ្វើជាគ្រូបង្វឹកយ៉ាងស្វិតស្វាញ ដើម្បីស្វែងរកតារាចម្រៀងវ័យក្មេងជាច្រើនដួង តាមរយៈការប្រកួតប្រលងចម្រៀងក្នុងកម្មវិធី The Amazing Voice។ TheAmazingVoice ដែលជាកម្មវិធីប្រកួតប្រជែងជ្រើសរើសអ្នកចម្រៀង Cover ដ៏ថ្មីសន្លាងតែមួយគត់នៅក្នុងប្រទេសកម្ពុជា។
ម្ចាស់បទ «គ្មាននាងក៏ធុញ មាននាងក៏ធុញ » រូបនេះបានបង្ហើបថា ប្រសិនប អ្នកមានសំឡេងល្អ និងមានទេពកោសល្យផ្នែកចម្រៀង អ្នកមិនគួរខកខានឱកាសដ៏ពិសេសមួយនេះឡើយ។ក្ដីស្រមៃចង់ក្លាយជាអ្នកចម្រៀងម្នាក់ កំពុងតែរំកិលខ្លួនចូលកៀកអស់លោកអ្នកហើយជាមួយកម្មវិធី The Amazing Voice ដែលមានរូបលោកផ្ទាល់ជាគ្រូបង្វឹកនៅក្នុងកម្មវិធី ទាំងតិកនិកច្រៀង ការលើកដាក់សំឡេង ការផ្ទៀងផ្ទាល់ភ្លេង ទាំងការសម្រួលតន្ត្រីនិងបទចម្រៀង ដែលបទពិសោធល្អៗទាំងនេះត្រូវបានចែករំលែកដោយលោកផ្ទាល់ ក្នុងការចម្រាញ់រកបេក្ខភាពឆ្នើមក្នុងកម្មវិធី។
នេះ គឺជាក្ដីសង្ឃឹមថ្មី សម្រាប់អនាគតតារាចម្រៀងវ័យក្មេង ដែលមានសមត្ថភាព និងក្ដីស្រមៃ ប្រកបដោយទំនុកចិត្តខ្ពស់ មានឱកាសបង្ហាញទេពកោសល្យផ្នែកចម្រៀងរបស់ខ្លួន។ The Amazing Voice គឺជាកម្មវិធីប្រកួតចម្រៀងដ៏ថ្មីស្រឡាងមួយ ដែលផ្ដល់ឱកាសឱ្យអ្នកដែលមានទេពកោសល្យផ្នែកចម្រៀង បានបង្ហាញសមត្ថភាពដណ្ដើមយកជ័យលាភីជាទឹកប្រាក់ 5000 ដុល្លារ។ បើចាប់អារម្មណ៍ សូមចាប់ផ្តើមធ្វើ Video ចាប់ពីពេលនេះតទៅរហូតដល់ថ្ងៃទី 5 ខែ មិថុនា ឆ្នាំ 2020 ព័ត៌មានបន្ថែមយើងនិងធ្វើការ Live ក្នុង page ផ្លូវការនៅម៉ោង 6យប់នេះ ។

May 21, 2020
8 ដំណាក់កាល ត្រៀមកូនទៅសាលារៀន
ក្រោយពីអ្នកម្តាយជ្រើសរើសសាលាមតេយ្យឱ្យកូនបានហើយ ដំណាក់កាលតទៅទៀតដែលគួរមានដើម្បីការត្រៀមរួចជាស្រេចតាំងពីដំបូងៗនោះ គឺការត្រៀមខ្លួនកូនសម្រាប់ការទៅសាលា។ គឺជារឿងសំខាន់មួយដែលអ្នកម្តាយគួរតែបង្ហាត់ឱ្យកូនបានយល់អំពីការទៅសាលារៀន និងបង្ហាត់ឱ្យកូនបានសាកល្បងធ្វើអ្វីៗដោយខ្លួនឯង ដែលត្រូវប្រើពេលវេលាក្នុងការហ្វឹកហាត់ ដើម្បីឱ្យការរស់នៅនៅឯសាលារបស់កូនដំណើរការទៅយ៉ាងមានសេចក្តីសុខ។
1 – សាងភាពស៊ាំធ្លាប់
សាងអារម្មណ៍ល្អៗដល់កូនក្នុងការជិតទៅសាលារៀន ឱ្យកូនស៊ាំធ្លាប់ជាមួយនឹងគំនិតក្នុងការទៅសាលារៀន អាចតាមរយៈការនិយាយថា នៅពេលកូនទៅសាលានឹងបានទៅជួបពួកម៉ាក បានលេងរបស់លេងជាច្រើន ហើយគួរសាកល្បងនាំកូនទៅមើលសាលាផង ដើម្បីឱ្យគេដឹងថា តើសាលាមានរូបរាងយ៉ាងណា និងមានអ្វីខ្លះ?។
2 – រកឧទាហរណ៍ល្អៗ
បើមានបង ឬសាច់ញាតិដែលធ្លាប់ទៅរៀនមុនឱ្យឃើញជាគំរូផងនោះគឺជារឿងល្អខ្លាំងណាស់ ព្រោះនឹងធ្វើឱ្យកូនស៊ាំធ្លាប់ ឆាប់សម្របសម្រួលខ្លួនបាន។ លោកឪពុកអ្នកម្តាយអាចឱ្យប្អូនជូនបងទៅសាលានៅពេលព្រឹកឱ្យបានញឹកញាប់ នឹងធ្វើឱ្យកូនតូចបានយល់ដឹងថា ការទៅសាលារៀនវាយ៉ាងដូចម្តេច។
3 – សាងបរិយាកាសការទៅសាលា
បបួលកូនទៅជ្រើសរើសសម្លៀកបំពាក់ របស់ប្រើប្រាស់ផ្ទាល់ខ្លួន ឧបករណ៍ការរៀនដែលត្រូវប្រើប្រាស់ ដើម្បីឱ្យកូនមានអារម្មណ៍ថាមានចំណែករួម សាងបរិយាកាសការទៅសាលាឱ្យកូនរំភើប និងទន្ទឹងរង់ចាំថ្ងៃដែលនឹងបានទៅសាលារៀនមែនទែន។
4 – បង្ហាត់ឱ្យចេះប្រាប់ពីតម្រូវការ
ការធ្វើឱ្យកូនអាចប្រាប់បានថា គេត្រូវការអ្វីរយៈដំបូងៗ ដូចជា ឈឺនោម ឃ្លានបាយ ស្រេកទឹក រួមទាំងប្រាប់ពីអារម្មណ៍យ៉ាងងាយៗ ដូចជាមិនពេញចិត្ត ខឹង ចូលចិត្ត ជាដើមនោះ នឹងជួយធ្វើឱ្យកូនតូចអាចទំនាក់ទំនងឱ្យគ្រូដឹងបាន ដើម្បីនឹងបានចាត់ការជាមួយបញ្ហាតទៅទៀតបាន ដោយអ្នកម្តាយមិនគួរតបស្នងតម្រូវការរបស់កូនលឿនពេកទេ គួររង់ចាំឱ្យកូនប្រាប់ ឬអាចសួរនាំកូន និងព្យាយាមស្តាប់ពេលគេនិយាយ។
5 – បង្ហាត់ឱ្យកូនចេះជួយខ្លួនឯង
ញ៉ាំអាហារខ្លួនឯងបាន ស្លៀកពាក់ខោអាវ ឬចូលបន្ទប់ទឹកបានដោយខ្លួនឯង រឿងទាំងអស់នេះជាមូលដ្ឋានគ្រឹះដែលនឹងធ្វើឱ្យកូនអាចជួយខ្លួនឯងបានពេលនៅក្នុងសាលា ទោះជាអំឡុងពេលដំបូងៗកូនអាចនឹងធ្វើបានមិនសូវជាល្អរៀបរយក៏ដោយ តែនៅពេលទៅសាលារាល់ថ្ងៃ ការបានហ្វឹកហាត់ញឹកញាប់ នឹងធ្វើឱ្យកូនចេះជួយខ្លួនឯងបានកាន់តែល្អឡើង ជាការសាងក្តីមោទនៈដល់កូន
និងធ្វើឱ្យកូនកើតមានភាពជឿជាក់ក្នុងចិត្តចំពោះខ្លួនឯងថា គេអាចធ្វើបានដោយខ្លួនឯង ហើយទោះជាគេអាចនឹងធ្វើបានមិនសូវជាល្អមែន តែការបានស្ថិតនៅក្នុងសភាពជុំវិញខ្លួនដែលមិត្តភ័ក្តិធ្វើបាន នឹងធ្វើឱ្យកូនចេះជួយខ្លួនឯងបានកាន់តែល្អឡើងមិនខាន។
6 – បង្ហាត់ជំនាញចូលសង្គម
ការទៅសាលារៀនគឺជាការហ្វឹកហាត់ឱ្យកូនរស់នៅរួមជាមួយអ្នកដទៃបាន មុនទៅសាលារៀនអ្នកម្តាយត្រូវរកឱកាសឱ្យកូនបានមានបដិសម្ព័ន្ធជាមួយអ្នកដទៃដោយការនាំទៅកន្លែងក្មេងលេង លេងជាមួយអ្នកជិតខាង ទៅសួនច្បារសាធារណៈ ឬសារមន្ទីរ
ដើម្បីឱ្យកូនបានស៊ាំធ្លាប់ជាមួយទីកន្លែងដែលមានមនុស្សច្រើនៗ រៀនយល់ដឹងពីរបៀបវិន័យក្នុងការរស់នៅរួមជាមួយអ្នកឯទៀត ដែលរឿងទាំងអស់នេះកូនអាចរៀនយល់ដឹងបានពីលោកឪពុកអ្នកម្តាយផងដែរ ជាពិសេសរឿងការអត់ធន់ ការរង់ចាំចំពោះរឿងផ្សេងៗ។ អ្វីទាំងអស់នេះគឺជាការរៀបចំត្រៀមខ្លួនឱ្យកូន មុននឹងឆ្ពោះទៅក្នុងរបងសាលារៀន។
7 – រៀបចំប្រព័ន្ធជីវិតវ័យរៀន
នៅពេលកូនទៅសាលារៀន ជីវិតរបស់គេនឹងកើតការផ្លាស់ប្តូរ ពេលភ្ញាក់ ពេលគេងក៏នឹងផ្លាស់ប្តូរ មានការញ៉ាំ លេង និងគេងតាមពេលម៉ោងទៀងទាត់។ មុនទៅសាលាអ្នកម្តាយត្រូវចាប់ផ្តើមកែសម្រួលប្រព័ន្ធការរស់នៅប្រចាំថ្ងៃរបស់កូនឱ្យត្រូវនឹងពេលវេលារបស់សាលារៀន ដើម្បីចៀសពីអារម្មណ៍មួម៉ៅ ឬងង៉ក់រករឿងនៅពេលដល់ថ្ងៃដែលត្រូវទៅសាលាមែនទែននោះ។
8 – តួនាទីឪពុកម្តាយ
លោកឪពុកអ្នកម្តាយគឺជាបច្ច័យសំខាន់ក្នុងការបញ្ជូនកូនចេញឆ្ពោះទៅរកពិភពដ៏ធំទូលាយយ៉ាងជឿជាក់ក្នុងចិត្ត បើទាំងលោកឪពុក និងអ្នកម្តាយមានទស្សនគតិដែលល្អចំពោះសាលា និងគ្រូ រួមទាំងត្រៀមកូនដោយការបង្ហាត់ជំនាញការមើលថែទាំខ្លួនឯងយ៉ាងជាប់លាប់មុនទៅសាលា រួមទាំងថ្ងៃដែលទៅសាលារៀនរយៈដំបូងផងនោះ។ អ្នកម្តាយមិនគួរបង្ហាញពីភាពអាឡោះអាល័យពេលកូនដើរចូលសាលារៀននោះទេ តែត្រូវត្រៀមខ្លួនជាស្រេចក្នុងការធ្វើជាអ្នកជួយបង្កើនកម្លាំងចិត្ត និងដោះស្រាយបញ្ហានៅពេលកូនត្រូវការ ក្រុមគ្រួសារក៏នឹងឆ្លងផុតអំឡុងពេលឈានបន្តទៅចូលរៀនបានយ៉ាងរលូនមិនខាន។

Check list
តើកូនដល់ពេលល្មមទៅសាលារៀនហើយឬនៅ?
អ្នកម្តាយជាច្រើននាក់អាចមានការសង្ស័យថា តើកូនរបស់ខ្លួនល្មមដល់ពេលទៅសាលារៀនហើយឬនៅ? ចំពោះចម្ងល់នេះ យើងមានឆេកលិសត៍ 10 រឿង ដែលគួរត្រៀមខ្លួនកូនមុនទៅសាលារៀន បើសិនកូនរបស់អ្នកខ្វះចំណុចណាមួយ អាចត្រៀមចំណុចនោះឱ្យកូនបន្ថែមបាន។
– ស្គាល់ពេលវេលា ដូចជា យប់ ថ្ងៃ ព្រឹក ល្ងាច ហើយ
– អាចធ្វើតាមច្បាប់ របៀបវិន័យស្រួលៗបាន
– អាចប្រាប់នៅពេលឈឺនោម ឬឈឺពោះ និងចូលបន្ទប់ទឹកដោយខ្លួនឯងបាន
– ស្លៀកពាក់ដោយខ្លួនឯងបាន ដូចជា បិទឡេវអាវ ស្លៀកសំពត់ រូតខ្សែរូតបានដោយខ្លួនឯង
– អាចញ៉ាំបាយដោយខ្លួនឯងបាន
– នៅឆ្ងាយពីឪពុកម្តាយបានដោយមិនយំ
– និយាយជាប្រយោគដែលអាចទំនាក់ទំនងយល់គ្នាបាន
– ប្រាប់ពីតម្រូវការបាន ដូចជា ឃ្លាន ស្រេកទឹក ងងុយគេង ជាដើម
– ចេះរង់ចាំ
– គេងខ្លួនឯងបាន មិនបាច់បំពេ
– លេងជាមួយពួកម៉ាកឯទៀតបាន

បើពិនិត្យមើលហើយ កូនតូចអាចធ្វើបាន 3 ភាគ 4 នោះបញ្ជាក់ថា កូនតូចអាចទៅសាលារៀនបានហើយ តែលោកឪពុកអ្នកម្តាយគួរបង្ហាត់បន្ថែមលើផ្នែកដែលកូនតូចនៅខ្វះខាត តែបើសាកល្បងបង្ហាត់ហើយមិនទាន់ពេលវេលានោះ អ្នកម្តាយត្រូវប្រាប់ទៅអ្នកគ្រូឱ្យបានដឹងថា កូនត្រូវបន្ថែមលើចំណុចណាខ្លះទៀតផង៕
May 21, 2020