សង្គម និងសេដ្ឋកិច្ច - La Reine Media

Bloomberg៖ ម្ចាស់ Facebook ក្លាយជាអ្នកមានបំផុតលំដាប់ទី3ក្នុងពិភពលោក

បើទោះជាមានការរំខានពីវីរុសCOVID-19 ប៉ុន្តែទ្រព្យរបស់ Zuckergerg នៅតែកើនជិត20ពាន់លានដុល្លារក្នុងរយៈពេលប្រហែល1ខែចុងក្រោយនេះ ដែលនេះបានជួយឱ្យគាត់មានជាង Bernard Arnault និង Warren Buffett នៅក្នុងតារាងចំណាត់ថ្នាក់របស់ទស្សនាវដ្ដី Bloomberg។

នៅក្នុងបញ្ជីចំណាក់ថ្នាក់មហាសេដ្ឋីពិភពលោករបស់ Bloomberg គេឃើញ CEO របស់ Facebook គឺលោក Mark Zuckerberg ទើបតែបាន “លោតរំលង” ម្ចាស់ក្រុមហ៊ុន Louis Vuitton លោក Bernard Arnault និងមហាសេដ្ឋី Warren Buffett ហើយបានក្លាយជាអ្នកមានបំផុតលំដាប់ទី3ក្នុងពិភពលោក។

Zuckerberg មានទ្រព្យសរុប 87,8ពាន់លានដុល្លារ ខណៈដែល Arnault មាន 81,1ពាន់លានដុល្លារ និង Buffett មាន 68,9ពាន់លានដុល្លារ។

នេះគឺជាប្រការដែលខុសឆ្ងាយបើធៀបនឹង1ឆ្នាំមុន ដែលកាលណោះ Zuckerberg មានទ្រព្យត្រឹមតែ72,5ពាន់លានប៉ុណ្ណោះបើគិតត្រឹមថ្ងៃទី22ឧសភា2019 ខណៈដែល Arnault មាន 89,6ពាន់លានដុល្លារ និង Buffett មាន 83,5ពាន់លានដុល្លារ។

ជាងនេះ កាលពី1ខែមុន ទាំង Buffett ទាំង Arnault សុទ្ធតែមានទ្រព្យច្រើនជាង CEO របស់ Facebook។ កាលពីថ្ងៃទី20មេសា2020 ទ្រព្យរបស់ Zuckerberg មានត្រឹមតែ68,1ពាន់លានដុល្លារ គឺតិចជាង6,2ពាន់លានដុល្លារបើធៀបជាមួយនឹងទ្រព្យរបស់ Buffett និងតិចជាង12,1ពាន់លានដុល្លារបើធៀបនឹងទ្រព្យរបស់ Arnault។

មហាសេដ្ឋី Jeff Bezos (ស្ដាំបង្អស់) Bill Gates(ឆ្វេង) Zuckerberg(កណ្ដាល)

ទ្រព្យរបស់ Zuckerberg បានកើនឡើងលឿនបន្ទាប់ពី Facebook ប្រកាសអំពីរបាយការណ៍ហិរញ្ញវត្ថុដែលមានលទ្ធផលល្អជាងការព្យាករ ក៏ដូចជាការកើនឡើងនៃតួលេខអ្នកចូលប្រើ Facebook នៅក្នុងត្រីមាសទី1។ ទុនសរុបរបស់ Facebook ក៏បានកើន44ពាន់លានដុល្លារបន្ថែមទៀតដែរ។

ថ្មីៗនេះ ក្រុមហ៊ុន Facebook បានលោតចូលក្នុងវិស័យពាណិជ្ជកម្មអេឡិកត្រូនិក នៅពេលដែលបានបញ្ចេញមុខងារ Facebook Shop ដែលអនុញ្ញាតឱ្យក្រុមហ៊ុននានាបង្កើតតូបលក់ដូរនៅលើ Facebook។ កាលពីខែមេសាកន្លងទៅ ក្រុមហ៊ុននេះក៏បានឧទ្ទេសនាមមុខងារ Messenger Rooms ផងដែរដើម្បីប្រជែងជាមួយ Zoom នៅក្នុងបច្ចេកវិទ្យា “ប្រជុំអនឡាញ”។

បច្ចុប្បន្ន មហាសេដ្ឋី2រូបដែលមានទ្រព្យច្រើនជាងគេបង្អស់ក្នុងពិភពលោករបស់ទស្សនាវដ្ដី Bloomberg នៅតែជា Jeff Bezos និង Bill Gates។ បើទោះមានទ្រព្យតិចជាងច្រើនបើធៀបជាមួយមហាសេដ្ឋី Jeff Bezos និង Bill Gates ប៉ុន្តែ Zuckerberg កំពុងតែកាត់បន្ថយគម្លាតយ៉ាងឆាប់រហ័ស។

យ៉ាងណាក៏ដោយ នៅលើតារាងចំណាត់ថ្នាក់តាមពេលវេលាជាក់ស្ដែងរបស់ទស្សនាវដ្ដី Forbes ម្ចាស់ Facebook នៅតែជាមហាសេដ្ឋីដែលមានទ្រព្យច្រើនជាងគេលំដាប់ទី4ក្នុងពិភពលោក បន្ទាប់ពី Jeff Bezos, Bill Gates និង Bernard Arnault ដោយមានទ្រព្យសរុប 87ពាន់លានដុល្លារ។

ប្រភព៖ Businessinsider

May 26, 2020

(វីដេអូ)-ទារកអាយុ8សប្ដាហ៍សោះចាប់ផ្ដើមរៀនឈរ ហើយដល់អាយុ15សប្ដាហ៍ស្រាប់តែចេះឈរមែនទេ

ទារិកាម្នាក់ឈ្មោះថា Lula បានចាប់ផ្ដើមរៀនឈរនៅពេលមានអាយុទើបតែ8សប្ដាហ៍ ហើយដល់អាយុ15សប្ដាហ៍ ទារិកានេះក៏អាចឈរបានដោយខ្លួនឯង ដោយមិនបាច់មានអ្នកណាជួយទប់។

Tezra Finn-Johnston អាយុ31ឆ្នាំ និងប្រពន្ធរបស់គាត់គឺនាង Emily Derrick អាយុ23ឆ្នាំ រស់នៅក្នុងតំបន់ Kingswood នៃទីក្រុង Bristol ប្រទេសអង់គ្លេស។ ពួកគេបានចាប់ផ្ដើមចាប់អារម្មណ៍ទៅលើភាពរឹងមាំខុសធម្មតារបស់កូនស្រី Lula បន្ទាប់ពីបានចាកចេញពីមន្ទីរពេទ្យក្រោយពេលឆ្លងទន្លេរួច។

Lula កើតនៅថ្ងៃទី31មករាឆ្នាំ2020 និងមានទម្ងន់តែ2.5គីឡូក្រាមប៉ុណ្ណោះ គឺស្រាលជាង5%បើធៀបជាមួយទារកទូទៅពេលទើបចាប់កំណើត។ កាលពីទើបមានអាយុ5ថ្ងៃ Lula អាចងើបក្បាលឡើងដោយខ្លួនឯង។ ពេលមានអាយុ1ខែ Finn-Johnston បានដឹងថា ជើងទាំងពីររបស់កូនស្រីគាត់មានសភាពមាំមួនខុសប្រក្រតី។

Tezra Finn-Johnston ប្រាប់ថា “កូនស្រីខ្ញុំចេះតែរពឹស និងយំ ខ្ញុំក៏ឱ្យនាងអង្គុយលើក្បាលជង្គង់។ នាងមិនអង្គុយទេ នាងបែរជាចេះតែចង់ឈរនៅលើជង្គង់ខ្ញុំទៅវិញ”។

Tezra Finn-Johnston បន្តថា “ប៉ុន្មានសប្ដាហ៍ក្រោយមក កូនស្រីខ្ញុំចាប់ផ្ដើមចង់ឈរញឹកញាប់ជាងមុន។ ពេលនោះខ្ញុំគិតថា បើសិនជាធ្វើបែបនេះពេលនាងយំ នាងក៏ប្រហែលជាធ្វើបែបនេះពេលនាងសប្បាយចិត្ត”។

Finn-Johnston ក៏សម្រេចចិត្តសាកល្បង។ គាត់ជួយទ្រ និងកាន់ដៃកូនដើម្បីឱ្យនាងឈរ។ នៅពេលមានអាយុ15សប្ដាហ៍ Lula ក៏អាចក្រោកឈរដោយមិនបាច់មានអ្នកណាជួយលើក។

ឪពុករបស់ Lula បាននិយាយថា “អ្នកណាៗក៏យល់ថា នេះជារឿងចម្លែក ព្រោះថាអាយុប៉ុនហ្នឹង ក្មេងមិនទាន់អាចងើបក្បាលឡើង ឬអង្គុយបាននោះទេ កុំថាឡើយក្រោកឈរដោយខ្លួនឯង។ បើតាមសៀវភៅ ក្មេងត្រូវមានអាយុចាប់ពី9ខែដល់1ឆ្នាំទើបអាចឈរដោយខ្លួនឯងបាន”។

Tezra Finn-Johnston ចូលចិត្តមើលភាពយន្តឯកសារទាក់ទងនឹងក្មេងៗជាមួយកូនស្រីរបស់គាត់។ គាត់ក៏ចូលចិត្តមើលកម្មវិធីអ្នកមាំមួនបំផុតក្នុងពិភពលោកផងដែរ។ Tezra Finn-Johnston ជឿថា Lula ប្រហែលជាបានចាប់អារម្មណ៍ទៅលើសកម្មភាពក្នុងវីដេអូដែលពួកគេបានមើលជាមួយគ្នា៕

ប្រភព៖ សារព័ត៌មានបរទេស

May 25, 2020

Adisak Kraisorn មិនប្រាថ្នាទៅលេងដល់ជប៉ុនឡើយ សុំត្រឹមលីកក្នុងអាស៊ានបានហើយ

ខ្សែប្រយុទ្ធជម្រើសជាតិថៃ វ័យ 29ឆ្នាំ បាននិយាយថា ខ្លួនចង់លេងនៅត្រឹមលីកកំពូលវៀតណាម (V-League) ឬលីកកំពូលម៉ាឡេស៊ី (Malaysia Super League) តែប៉ុណ្ណោះ មុននឹងដល់ពេលចូលនិវត្តន៍ពីអាជីពបាល់ទាត់។

ខ្សែប្រយុទ្ធវ័យ 29ឆ្នាំរូបនេះ បច្ចុប្បន្នលេងឱ្យក្លិប Muangthong United ដោយត្រូវបានក្លិបនេះដាក់ឱ្យក្លិប Port FC ខ្ចីជើងក្នុងរដូវកាលនេះ ដោយលេងបាន 4ប្រកួតរកគ្រាប់បាល់បាន 2គ្រាប់។ ចំពោះជម្រើសជាតិវិញ គេបានជាប់ឈ្មោះលេងចាប់តាំងពីឆ្នាំ 2009មក ដោយលេងបាន 60ប្រកួត និងរកបាន 32គ្រាប់៕

May 25, 2020

សាហាវ! Sturridge ផ្លាស់ទៅលេងនៅលីកកំពូលថៃ

ក្លិបបាល់ទាត់ Burriram United បានបញ្ចេញពត័មានថា ខ្លួននឹងយកកីឡាករសញ្ជាតិអង់គ្លេស មកចូលរួមក្រុម នារដូវកាលក្រោយ ឆ្នាំ2021 ខាងមុខនេះ។

កីឡាករមានដើមកំណើតនៅអង់គ្លេសរូបនេះ ធ្លាប់លេងនៅក្លិបជាច្រើនក្នុងលីកកំពូលអង់គ្លេស មានដូចជា Manchester City, Chelsea, Bolton Wenderer, Liverpool, West Bromwich Albion, Trabzonspor។

គួរបញ្ជាក់ដែរថា កីឡាកររូបនេះធ្លាប់លេងឱ្យជម្រើសជាតិអង់គ្លេសចាប់តាំពីឆ្នាំ2004មក ដោយប្រកួតបាន 65លើក ទាត់បញ្ចូលទីបាន 31គ្រាប់៕

May 25, 2020

Hudson-Odoi ត្រូវប៉ូលិសឃាត់ខ្លួន ពីបទរំលោភផ្លូវភេទ

នារីម្នាក់ត្រូវបានបញ្ជូនទៅកាន់មន្ទីរពេទ្យជាបន្ទាន់ ក្រោយពីត្រូវបានគេរាយការណ៍ថា នាងបានទទួលរងនូវការរំលោភផ្លូវភេទ ដោយកីឡាករខ្សែបម្រើ Chelsea វ័យ 19ឆ្នាំ Callum Hudson-Odoi។

នាងបានរៀបរាប់រឿងរ៉ាវយ៉ាងលម្អិតថា នាងត្រូវបានកីឡាកររូបនេះហៅមកលេងផ្ទះ ក្រោយពីបានសាសងគ្នាតាមបណ្តាញសង្គម ហើយពេលមកដល់ នាងក៏ត្រូវបានកីឡាករជម្រើសជាតិអង់គ្លេសខាងលើ រំលោភបានសម្រេចតែម្តង។

គួរបញ្ជាក់ដែរថា កីឡាកររូបនេះទើបតែបានជាសះស្បើយពីជំងឺកូវីដ-19 តែប៉ុន្មានថ្ងៃប៉ុណ្ណោះ ក្រោយពេលដែលរូបគេបានឆ្លងជំងឺនេះកាលពីដើមខែមេសា ខណៈដែលកីឡាកររូបនេះ កំពុងតែត្រូវហាមឃាត់ឱ្យស្នាក់នៅក្នុងផ្ទះរយៈពេល 14ថ្ងៃសិន មុននឹងចេះដើរហើរជាធម្មតាវិញ៕

May 25, 2020

Ronaldo ចាប់ផ្តើមហ្វឹកហាត់ជាមួយគេហើយ ក្រោយពីនៅតែក្នុងផ្ទះអស់ 14ថ្ងៃ

កីឡាករខ្សែប្រយុទ្ធជួរមុខ ជម្រើសជាតិព័រទុយហ្គាល់ Christiano Ronaldo បានធ្វើការហ្វឹកហាត់ជួបជុំជាមួយនឹងមិត្តរួមក្រុម Juvenuts ហើយ កាលពីថ្ងៃចន្ទកន្លងទៅនេះ។

មុននឹងបានហ្វឹកហាត់ជុំគ្នាជាមួយនឹងក្រុម Ronaldo ត្រូវបានគេដាក់ឱ្យនៅដាច់ដោយឡែកក្នុងផ្ទះ អស់រយៈពេល14ថ្ងៃ ដោយសារតែរូបគេទើបតែត្រឡប់មកពីស្រុកកំណើត នៅឯប្រទេសព័រទុយហ្គាល់វិញ។

គួរបញ្ជាក់ដែរថា ក្លិបបាល់ទាត់ Juventus របស់លីកកំពូលនៃប្រទេសអ៊ីតាលី (Italy Seria A) បានចាប់ផ្ដើមធ្វើការហ្វឹកហាត់វិញហើយ កាលពីថ្ងៃចន្ទ ទី18 ខែឧសភា ឆ្នាំ2020 កន្លងទៅនេះ ដើម្បីគ្រោងនឹងចាប់ផ្តើមការប្រកួតរបស់ខ្លួនឡើងវិញ នៅថ្ងៃទី15 ខែឧសភា ឆ្នាំ2020 ខាងមុខនេះ៕

May 25, 2020

កម្មវិធីពានរង្វាន់សហគ្រិនថ្នាក់ជាតិ 2020 ផ្តល់រង្វាន់ជយលាភី 1ម៉ឺនដុល្លារ បើកទទួលពាក្យហើយ…

តើកម្មវិធីពានរង្វាន់សហគ្រិនថ្នាក់ជាតិជាអ្វី? គឺជាគំនិតផ្តួចផ្តើមដំបូងក្នុងការគាំទ្រប្រព័ន្ធអេកូឡូស៊ីសហគ្រិន ដែលលើកកម្ពស់ការចែករំលែកថ្មីៗ ការរៀនសូត្ររបស់សហគ្រិន និងការលើកកម្ពស់សហគ្រិនក្នុងស្រុកទូទាំងព្រះរាជាណាចក្រកម្ពុជា។

សហគ្រិន ស្ថាបនិក និងអ្នកគ្រប់គ្រងអាជីវកម្មដែលមានចំណាប់អារម្មណ៍ អាចដាក់ពាក្យបានទាំងអស់គ្នា។ កម្មវិធីនេះត្រូវបានរៀបចំ និងបង្កើតឡើងដោយវិទ្យាស្ថានជាតិសហគ្រិនភាព និងនវានុវត្តន៍ និងសហគ្រិនខ្មែរ ដែលមានការគាំទ្រផ្នែកហិរញ្ញវត្ថុ ដោយក្រសួងសេដ្ឋកិច្ច និងហិរញ្ញវត្ថុតាមរយៈសហគ្រិនខ្មែរ និងធនាគារស្ថាបនា។

ថ្ងៃផុតកំណត់នៃការទទួលពាក្យ៖ 30 ខែឧសភា ឆ្នាំ2020

*លក្ខខណ្ឌ៖

-ជាពលរដ្ឋខ្មែរទាំង 2ភេទ

-ស្ថាបនិក ឬអ្នកគ្រប់គ្រងអាជីវកម្ម (តម្រូវឱ្យមានលិខិតបញ្ជាក់ពីម្ចាស់អាជីវកម្ម) ក្នុងវិស័យកសិកម្ម (Agriculture) ទេសចរណ៍ (Tourism) កម្មន្តសាល (Manufacturing) និងបច្ចេកវិទ្យាព័ត៌មាន (ICT)

-អាជីវកម្មបានចុះបញ្ជីពាណិជ្ជកម្ម ឬទទួលស្គាល់ដោយស្ថាប័នណាមួយ

-សហគ្រាសខ្នាតតូច និងមធ្យមក្នុងស្រុក

-លើកទឹកចិត្តអាជីវកម្មផលិតផលក្នុងស្រុក

តើអ្នកអាចដាក់ពាក្យបានតាមរបៀបណា?

-ផ្ញើឯកសារពាក់ព័ន្ធតាមរយៈអ៊ីមែល៖ [email protected] និងចម្លងជូន (cc) តាមរយៈអ៊ីមែល៖

[email protected]

-ប្រវត្តិរូបសង្ខេប

-លិខិតបញ្ជាក់ពីការទទួលស្គាល់អាជីវកម្មដោយស្ថាប័នសាធារណៈពាក់ព័ន្ធ

-បំពេញពាក្យចូលរួមប្រកួតប្រជែងតាមរយៈ link ៖ https://docs.google.com/forms/d/e/1FAIpQLSea9ptCE9zeGZrRSOwhuphaleQxnGbs_6b2aVL3q_GU3ArAKw/viewform

May 25, 2020

UNDP Cambodia ប្រកាសរក បេក្ខជនប្រកួតកម្មវិធី “តើនរណា នឹងក្លាយជាស្ថាបនិកបន្ទាប់ទៀត?

តើអ្នកជាវិស្វករ ឬជាអ្នកបង្កើតកម្មវិធី Software ដែលកំពុងចង់ចាប់ផ្តើមអាជីវកម្ម មែនទេ?

កម្មវិធី “តើនរណា នឹងក្លាយជាស្ថាបនិកបន្ទាប់ទៀត? ឬ Will you be the next founder?” ត្រូវបានលេចចេញរូបរាងឡើង និងកំពុងតែប្រកាសស្វែងរកបេក្ខជន។ តើអ្នកមានចំណូលចិត្តក្នុងការបង្កើតគម្រោងនានា ដែលទាក់ទងនឹងបច្ចេកវិទ្យាដែរឬទេ?

ប្រសិនបើអ្នកមានទាំងជំនាញផ្នែកបច្ចេកវិទ្យា ព្រមទាំងចំណង់ចំណូលចិត្តបង្កើតអាជីវកម្ម អ្នកអាចចូលរួមក្នុងកម្មវិធីថ្នាលបណ្តុះបណ្តាលអាជីវកម្ម Bluetribe ដែលកំពុងស្វែងរកអ្នកដែលមានទេពកោសល្យផ្នែកបច្ចេកទេស ដើម្បីជួយឱ្យការបណ្តាក់ទុនក្នុងអាជីវកម្មឱ្យកាន់តែមានកំណើនខ្ពស់។

កម្មវិធីថ្នាលបណ្តុះបណ្តាលនេះមានការគាំទ្រដោយ រដ្ឋាភិបាលនៃសហព័ន្ធរុស្ស៊ី និងចូលរួមសហការគាំទ្រដោយ Khmer Enterprise – សហគ្រិនខ្មែរ ក្រុមហ៊ុន Smart Axiata និងក្រុមហ៊ុន 3E-Fii។

គោលបំណងនៃការបង្កើតកម្មវិធីនេះឡើង គឺដើម្បីជួយដល់ស្ថាបនិកវ័យក្មេងនានា ពង្រឹងការវិនិយោគកាន់តែរឹងមាំបន្ថែមទៀត ក្នុងភាពជាសហគ្រិនភាពក្នុងប្រទេសកម្ពុជា។ កម្មវិធីនេះ នឹងជួយឱ្យអ្នកឈានឡើងទៅដល់កម្រិតថ្មីមួយទៀត។ ត្រឹមតែជាគំនិតតូចមួយក៏ដោយ ប៉ុន្តែវាអាចនឹងលេចចេញជារូបរាងបាន ជាមួយនឹងកម្មវិធីប្រកួតប្រជែងនេះ។

កាលបរិច្ឆេទឈប់ទទួលពាក្យ៖ ថ្ងៃទី31 ឧសភា 2020

ព័ត៌មានបន្ថែមពីការដាក់ពាក្យចូលរួម សូមចូលទៅកាន់៖ ៖ https://www.bluetribecambodia.com/?fbclid=IwAR034ZQ5-S98uRKXKzTvn0t4ENIdB7CMnOKYFjGDT2OdZPgvWZ5uupoj8MQ

May 25, 2020

សំឡេងមិនធម្មតា!! កូនស្រី ហួរ ឡាវី ចេញមុខមកម្នាក់ទៀតបកស្រាយបទចម្រៀងCover

ជាការពិតណាស់ តារាចម្រៀងស្រីនៅក្នុងផលិតកម្មរស្មីហង្សមាស កញ្ញា វី ឌីណែត អាចនិយាយបានថា ជាតារាចម្រៀងស្រីម្នាក់ ដែលមានភាពលេចធ្លោខ្លាំងនៅក្នុងចង្កោមសិល្បៈក្រោមឈ្មោះជាកូនស្រីតារាចម្រៀងជើងចាស់ ហួរ ឡាវី ។ បើទោះបីជា រូបនាង ទើបប្រឡូកសិល្បៈយ៉ាងណាក្តី ដោយគិតមកទល់ពេលនេះប្រជាប្រិយភាពរបស់នាងបានលោតខ្លាំង រហូតបណ្តាកម្មវិធីនានាឬបណ្តាខនសឺតធំៗ បានអញ្ជើញរូបនាងឱ្យទៅច្រៀង ជាតារាកិត្តិយសមិនដែលខាន។

ជាក់ស្តែង ប្រិយមិត្តក៏បានជ្រាបផងដែរថា តារាស្រីរូបនេះ ក៏ជាកូនស្រីបង្កើតរបស់តារាចម្រៀងជើងចាស់ លោក ហួរ ឡាវី ដែលជាជាប់ឈ្មោះជា តារាចម្រៀងសំឡេងស្អក។ បើនិយាយពីសំឡេងឱ្យកាន់តែច្បាស់ទៀតនោះ បើអ្នកណាបានស្តាប់ហើយ ពិតជា លង់នឹងសំឡេង ស្តាប់មិនចេះជិនណាយផងដែរ។ ប៉ុន្តែថ្មីៗនេះ នៅមិនទាន់មានអ្នកគាំទ្រច្រើននាក់បានដឹងនោះទេថា វី ឌីណែត មានបងស្រីម្នាក់ទៀត ដែលពេលខ្លះស្ទាយ៍លេងខ្លួន ពិតជាដូចគ្នាខ្លាំងណាស់ គ្រាន់តែខុសរូបរាងបន្តិចតែប៉ុណ្ណោះ ដែលរូបនាងមានឈ្មោះថា វី ឌីណា ដែលជាអ្នករកស៊ីរបរខាងក្រៅ មិនមែនជាអ្នកសិល្បៈដូចជារូបនាងនោះទេ។

ទើបថ្មីៗនេះ វី ឌីណា ក៏បានបញ្ចេញនូវវីដេអូចម្រៀងដ៏ក្រអួនក្រអៅ ជាមួយនឹងការCover បទចម្រៀងរបស់ ឪពុករបស់នាង ដែលពិតជាពីរោះខ្លាំង សឹងតែមិននឹកស្មានដល់ថា មានសំឡេងល្អយ៉ាងនេះសោះ ហើយបើនិយាយពីរូបសម្រស់ក៏ស្រស់ស្អាតមិនចាញ់បងស្រីប៉ុន្មាននោះដែរ៕

May 25, 2020

ព្រឺសម្បុរគ្រប់ៗគ្នា ខណៈបានឃើញវីដេអូ ព្រលឹងលោកគ្រូ ទិត្យ សែម ចូលសណ្ឋិតចៅប្រុស

ក្រៅពីការសោកស្ដាយអាឡោះអាល័យ នៅការបាត់បង់ធនធានសិល្បៈ ដ៍សំខាន់មួយនេះ អ្វីដែលធ្វើឱ្យមហាជនមានការចាប់អារម្មណ៍នោះ គឺធ្វើពិធីបុណ្យសពតាមប្រពៃណី ដើម្បីជាកិច្ចជូនដំណើរលោកទៅកាន់ទីឋានដែលសុខសាន្តនោះ ស្រាប់តែមានហេតុការណ៍មួយបានកើតឡើងដែលធ្វើឱ្យមានការភ្ញាក់ផ្អើលយ៉ាងខ្លាំងនៅក្នុងរោងពិធីបុណ្យ។

សូមជម្រាបថា លោកគ្រូ ទិត្យ សែម សាស្ត្រាចារ្យផ្នែកល្ខោនខោលបានទទួលមរណភាពហើយ កាលថ្ងៃទី23 ខែឧសភា ឆ្នាំ2020 នៅថ្ងៃបុណ្យសព្វ វិញ្ញាណរបស់លោកបានចូលសណ្ឋិតចាំប្រុសដែលមិនដែលចេះរាំសោះ ទៅរាំនៅមុខមជ្ឈូស ធ្វើឱ្យម្នាក់ៗដែលចូលរួមពិធីបុណ្យនោះ ព្រឺសម្បុរគ្រប់ៗគ្នា។ បើតាមរយៈគណនីហ្វេសប៊ុកឈ្មោះ ព្រហ្ម ពុធវិសាល បានសរសេរថា «លើកទីមួយដែលខ្ញុំមើលផ្ទាល់និងភ្នែក វិញ្ញាណគាត់នៅតែល្ខោនខោល ចៅប្រុសរបស់គាត់មិនមែនអ្នកល្ខោនខោលទេ គាត់អត់ចេះរាំទេ»។ វីដេអូ និងរូបភាពទាំងនេះ ត្រូវបានគេចែកចាយយ៉ាងច្រើន។

គួរបញ្ជាក់ដែរថា នៅមិនមានឯកសារណាមួយ បានលម្អិតពីប្រវត្តិ លោកគ្រូ ទិត្យ សែម នោះទេ ប៉ុន្តែលោកត្រូវបានមហាជនស្គាល់ថា សាស្ត្រាចារ្យផ្នែកល្ខោនខោលជំនាញតួយក្ស និងជាអ្នកដំឡើងរាល់ស្នាដៃរបស់សិស្ស ដែលសិក្សានៅសាលាមធ្យមវិចិត្រសិល្បៈផ្នែកល្ខោនខោលជាង40ឆ្នាំមកហើយ។ ជាង40ឆ្នាំ នៃជីវិតលើវិថីសិល្បៈនេះ លោក ទិត្យ សែម បានសាងស្នាដៃជាច្រើនធ្វើឲ្យសិស្សានុសិស្សដែលបានសិក្សាជាមួយលោក គោរពស្រលាញ់ជាខ្លាំង។ ក្នុងនោះដែរ ក្រៅពីសម្ដែងក្នុងស្រុក លោកធ្លាប់បានចេញសម្ដែង ជំនាញសិល្បៈរបស់លោកនៅក្រៅប្រទេសជាច្រើនប្រទេស។ លោក បានទទួលមរណភាពកាលថ្ងៃទី23 ខែឧសភា ឆ្នាំ 2020ដោយរោគាពាធ។ បុរសម្នាក់ដែល គេស្គាល់ថា ជាចៅបង្កើតរបស់ លោក បានងើបឡើងរាំ ក្បាច់យក្សនឹងក្បាច់ស្វា ស្របពេលដែលភ្លេងពិណពាទ្យកំពុងតែលេងកំដររោង ដោយចៅប្រុសម្នាក់នោះកន្លងមក មិនធ្លាប់ចេះរាំ សូម្បីតែបន្តិច។ ដំណើរនៃការរាំរបស់ចៅប្រុសម្នាក់នោះ អ្នកដែលចូលក្នុងពិធី និយាយថា មានលក្ខណៈដូចនឹងលោកគ្រូ ទិត្យ សែម តែម្ដង ហើយម្នាក់គិតថា វិញ្ញាណរបស់លោកបានចូលសណ្ឋិត ។ ពេលឃើញសកម្មភាពរាំរបស់ ចៅប្រុសម្នាក់នោះ ម្នាក់ៗបានទាញទូរស័ព្ទថត ទាំងព្រឺសម្បុរគ្រប់ៗគ្នា៕

May 25, 2020

Category: សង្គម និងសេដ្ឋកិច្ច