សង្គម និងសេដ្ឋកិច្ច - La Reine Media

Google នឹងផ្ដល់កញ្ចប់លុយ 1ពាន់ដុល្លារដល់បុគ្គលិកម្នាក់ៗ ដែលធ្វើការពីផ្ទះ

លោក Sundar Pichai ជានាយកប្រតិបត្តិ Google បច្ចុប្បន្ន បានឱ្យដឹងថា Google នឹងផ្ដល់កញ្ចប់លុយ 1ពាន់ដុល្លារ (ឬជារូបិយប័ណ្ណផ្សេងទៀតដែលមានតម្លៃស្មើគ្នា សម្រាប់ប្រទេសដទៃ) សម្រាប់ធានារ៉ាប់រង លើការចំណាយលើគ្រឿងសង្ហារិម ឬគ្រឿងប្រើប្រាស់ចាំបាច់ដទៃទៀតដូចជាម៉ាស៊ីនកុំព្យូទ័រ ខណៈដែលបុគ្គលិករបស់ពួកគេធ្វើការងារពីផ្ទះ។ នេះបើតាមការចុះផ្សាយជាផ្លូវការពី Blog.google ផ្ទាល់តែម្ដង។

ដើម្បីជាការជំរុញទឹកចិត្តបុគ្គលិក ឱ្យបុគ្គលិកមានសុខភាពល្អទាំងផ្លូវកាយ និងផ្លូវចិត្ត Googleក៏នឹងបង្កើតជាកម្មវិធីឱ្យបុគ្គលិកអាចមានសកម្មភាពជុំគ្នាតាមរយៈអនឡាញបាន ដូចជាការរៀនពីការចម្អិនម្ហូបពីចុងភៅ Google និងការរៀនធ្វើលំហាត់ប្រាណតាមអនឡាញជាដើម។

គួររំឭកដែរថា ទំនោរថ្មីនេះ ត្រូវបានក្រុមហ៊ុនបច្ចេកវិទ្យាដទៃទៀតកំពុងតែត្រៀមធ្វើដូចគ្នា ខណៈដែលជំងឺកូវីដ19 នៅតែបន្តវាយលុក ដើម្បីជាការលើកទឹកចិត្ត ដល់បុគ្គលិកទាំងឡាយដែលធ្វើការពីផ្ទះ៕

May 29, 2020

អ៊ីស្រាអែល បង្កើតម៉ាស់ពិសេស អាចញ៉ាំអាហារបាន ដោយមិនបាច់ដកម៉ាស់ចេញ

ក្រុមអ្នកច្នៃប្រឌិតជនជាតិអ៊ីស្រាអែល បានបង្កើតម៉ាស់ការពារមេរោគកូរ៉ូណាជាមួយមាត់បញ្ជាពីចម្ងាយ ដែលអាចអនុញ្ញាតឱ្យមនុស្សបរិភោគអាហារបាន ដោយមិនចាំបាច់ដកម៉ាស់ចេញ ជាឧបករណ៍ដែលពួកគេនិយាយថា អាចធ្វើឱ្យការចូលទៅភោជនីយដ្ឋានមិនសូវមានគ្រោះថ្នាក់។

ដង្កៀបច្របាច់ ដែលធ្វើប្រតិបត្តិការដូចហ្វ្រាំងដៃកង់ដែរនោះ នឹងបើកមាត់នៅខាងមុខម៉ាស់ដើម្បីឱ្យអាហារឆ្លងកាត់បាន។ ដំណើរការនេះអាចមានភាពច្របូកច្របល់ ជាមួយនឹងការ៉េម ឬទឹកជ្រលក់ ប៉ុន្តែបើជាអាហារដែលរឹងៗជាងនេះ អាចចូលបានយ៉ាងងាយស្រួល។

លោក អាសាហ្វ ជីតេលីស អនុប្រធានក្រុមហ៊ុន Avtipus Patents and Inventions បាននិយាយកាលពីថ្ងៃអង្គារទី19 ឧសភាថា “ម៉ាស់នឹងបើកមាត់ ដោយប្រព័ន្ធមេកានិច តាមរយៈការបញ្ជាពីចម្ងាយដោយដៃ ឬបើកមាត់ដោយស្វ័យប្រវត្តិនៅពេលណាដែលមានសម ឬស្លាបព្រា មកនៅពីមុខម៉ាស់។ បន្ទាប់មកអ្នកអាចញ៉ាំ ឬផឹកដោយគ្មានការបារម្ភ ហើយពេលអ្នកដកសម ឬស្លាបព្រាចេញវិញ វានឹងបិទវិញដោយស្វ័ប្រវត្តិ ហើយអ្នកថែមទាំងត្រូវបានការពារពីវីរុស និងមនុស្សផ្សេងទៀតដែលអង្គុយជាមួយអ្នកទៀតផង។

ក្រុមហ៊ុនបាននិយាយថា ខ្លួនគ្រោងនឹងចាប់ផ្តើមផលិតម៉ាស់នេះក្នុងរយៈពេលប៉ុន្មានខែទៀត ហើយបានដាក់ស្នើសុំប៉ាតង់រួចហើយ។ ក្រុមហ៊ុនបាននិយាយថា ខ្លួនទំនងជានឹងលក់វាក្នុងតម្លៃពី ៣ ទៅ ១០សេគែល (ប្រមាណ 0.85ដុល្លារទៅ 1.85ដុល្លារអាមេរិក)៕

May 29, 2020

YouTube លុបចោលដោយស្វ័យប្រវត្តិ ឱ្យតែមានពាក្យជា ភាសាចិនមួយនេះ នៅក្នុងប្រអប់ Comment

រយៈពេលប៉ុន្មានសប្ដាហ៍ចុងក្រោយនេះ អ្នកប្រើប្រាស់ YouTube ដែលជាជនជាតិចិន បានបង្ហោះនូវការរិះគន់ខ្លាំងៗ ត្រង់ចំណុចភាសាចិន ដែលមាននៅលើវីដេអូ ឬក្នុងប្រអប់ Comment ដែលត្រូវបាន YouTube លុបចោលដោយគ្មានមួលហេតុ។

យោងតាមប្រភពពីកាសែត The Verge បានបកស្រាយថា ប្រការនេះអាចបណ្ដាលមកពីកំហុសបច្ចេកទេស Machine learning ឬ AI translate ដែលមានក្នុងបណ្ដាញវីដេអូដ៏ធំមួយនេះ ធ្វើការខុសប្រក្រតី។ ម្យ៉ាងទៀត ពាក្យដែលគេសង្កេតឃើញថា ត្រូវបានលុបលឿនជាងគេ មិនដល់ 15វិនាទីផងនោះ គឺពាក្យ “共匪” or “五毛” ឬ “Gongfei” ដែលមានន័យថា communist bandit ឬមនុស្សប្រកាន់ទស្សនៈកុម្មុយនីស្តផ្តាច់ការ។

លើសពីនេះ YouTube ក៏បានលុបចោលដោយស្វ័យប្រវត្តិផងដែរ នូវឃ្លាឃ្លោងណា ដែលមានអត្ថន័យប្រមាថ ឬក្នុងន័យអវិជ្ជមានដល់វីដេអូណាមួយនោះ។

គួរជម្រាបជូនផងដែរថា មុខងារ AI blocked posts ខាងលើ ត្រូវបាន YouTube ទទួលស្គាល់ថា ដំណើរការមិនទាន់បានល្អប្រសើរនៅឡើយទេ បើលោកអ្នកជួបបញ្ហា លោកអ្នកអាច report មកក្រុមការងាររបស់ពួកគេបាន៕

May 29, 2020

(វីដេអូ) យន្តហោះអគ្គិសនីធំបំផុតក្នុងពិភពលោក ហោះហើរសាកល្បងជាលើកដំបូងដោយជោគជ័យ

យន្តហោះដែលបំពាក់ប្រព័ន្ធរុញច្រានដោយថាមពលអគ្គិសនី ដែលមានកម្លាំង750សេះ បានធ្វើការហោះហើរសាកល្បងជាលើកដំបូងបង្អស់របស់ខ្លួន ដោយប្រើពេល30នាទី នៅក្នុងរដ្ឋវ៉ាស៊ីងតោន កាលពីម្សិលមិញ (28ឧសភា)។

យន្តហោះអគ្គិសនី eCaravan ដែលមានកៅអីចំនួន9នេះ ជាលទ្ធផលនៃកិច្ចសហការរវាងក្រុមហ៊ុន MagniX និងក្រុមហ៊ុនអាកាសចរណ៍ AeroTEC។ eCaravan ហោះហើរសាកល្បងនៅលើអាកាសរបស់ទីក្រុង Moses Lake នៃរដ្ឋវ៉ាស៊ីងតោន ក្រោមការបញ្ជាពីអ្នកបើកបរម្នាក់ ហើយតាមពីក្រោយវាគឺជាយន្តហោះការពារប្រភេទតូចមួយគ្រឿង។ យន្តហោះអគ្គិសនីនេះបានចាប់ផ្ដើមហោះឡើងនៅវេលាម៉ោង16និង02នាទី (ម៉ោងក្នុងស្រុក) និងចុះចតនៅវេលាម៉ោង16និង32នាទី។ eCaravan ហោះឡើងដល់កម្ពស់762ម៉ែត្រ បន្ទាប់មកវាបានបន្ទាបខ្លួននៅត្រឹម305ម៉ែត្រ និងចំណាយពេល25នាទីក្នុងការហោះឆ្វែលពីលើមូលដ្ឋាននៃព្រលានយន្តហោះ Moses Lake។

ដើម្បីអភិវឌ្ឍបានយន្តហោះអគ្គិសនីនេះ ក្រុមវិស្វករបានប្រើប្រាស់យន្តហោះប្រភេទមធ្យម Cessna Grand Caravan រួចបំពាក់ម៉ូទ័រអគ្គិសនីបន្ថែមទៅក្នុងយន្តហោះនេះ។ MagniX សង្ឃឹមថា ពួកគេអាចបញ្ចេញកំណែពាណិជ្ជកម្មរបស់ eCaravan ដែលអាចហោះបានរយៈចម្ងាយ160គីឡូម៉ែត្រ នៅចុងឆ្នាំក្រោយ។

Roei Ganzarski ដែលជាអគ្គនាយកប្រតិបត្តិរបស់ក្រុមហ៊ុន MagniX បានឱ្យដឹងថា ម៉ូទ័រអគ្គិសនីមានសារសំខាន់ខ្លាំងណាស់សម្រាប់ប្រើប្រាស់នៅលើយន្តហោះ ដើម្បីកាត់បន្ថយបរិមាណនៃផ្សែងពុល។ Roei Ganzarski ថ្លែងថា យន្តហោះអគ្គិសនីនឹងជួយកាត់បន្ថយការចំណាយទាក់ទិននឹងការប្រើប្រាស់ថាមពលផងដែរ។ ប្រាក់ចំណាយសម្រាប់ការហោះហើរក្នុង1ម៉ោងរបស់យន្តហោះអគ្គិសនី គឺថោកជាងពី40% ទៅ70% បើធៀបជាមួយនឹងយន្តហោះធម្មតា។

Ganzarski ព្យាករថា យន្តហោះអគ្គិសនីនឹងគ្រប់គ្រងការហោះហើរទាំងអស់ដែលមានរយៈចម្ងាយក្រោម1,600គីឡូម៉ែត្រ នៅក្នុងរយៈពេល15ឆ្នាំខាងមុខ ប៉ុន្តែដំបូងគេត្រូវតែអភិវឌ្ឍបច្ចេកវិទ្យាអាគុយសម្រាប់ផ្ទុកថាមពលឱ្យបានច្រើនជាងសព្វថ្ងៃ។ នាពេលបច្ចុប្បន្ន យន្តហោះអគ្គិសនីសមស្របជាមួយនឹងជើងហោះហើរដែលមានរយៈចម្ងាយខ្លី ពោលគឺប្រមាណជា160គីឡូម៉ែត្រ។

ក្រៅពី MagniX ក៏មានក្រុមហ៊ុនផ្សេងៗជាច្រើនដែលកំពុងអភិវឌ្ឍយន្តហោះអគ្គិសនី ក្នុងនោះក៏មានក្រុមហ៊ុនផលិតយន្តហោះ Airbus ក្រុមហ៊ុន Embraer និងក្រុមហ៊ុន Rolls-Royce ផងដែរ។

ប្រភព៖ CNN

May 29, 2020

ភាពយន្ដខ្នាតធំ «ខ្មោចចូល» ស្រេចចេញជាសៀវភៅ ខណៈរោងភាពយន្ដនៅមិនទាន់បើកទ្វារ

ខណៈដែលរោងភាពយន្ដទូរទាំងប្រទេសបិទទ្វារ ដើម្បីចូលរួមទប់ស្កត់ការរីករាលដាលនៃរោគជំងឺកូវីដ១៩ មានភាពយន្ដថ្មីៗជាច្រើនត្រូវបង្កកទុកមួយរយៈសិន។ ពេលវេលាជាក់លាក់នៃការបើកដំណើរការចាក់បញ្ចាំងភាពយន្ដឱ្យមហាជនបានទស្សនាជាថ្មីឡើងវិញ នៅមិនទាន់បានប្រកាសជាផ្លួវការនៅឡើយទេ។ ស្របពេលដែលមហាជនរលឹកដល់ភាពយន្ដល្អៗរបស់ផលិតករភាពយន្ដខ្មែរនោះ លោក ហ៊ុយ យ៉ាឡេង អ្នកដឹកនាំរឿង និងជាផលិតករកុនខ្មែរមួយរូប បានសម្រេចចិត្តប្រើយុទ្ធសាស្ត្រថ្មីមួយ ដើម្បីស្អំចិត្តអ្នកគាំទ្រឱ្យនៅតែដក់ជាប់នូវអារម្មណ៍ស្រឡាញ់យន្ដខ្មែរ។

អ្នកដឹកនាំរឿងរូបនេះបានសម្រេចិត្ត បោះពុម្ភសៀវភៅរឿង «ខ្មោចចូល» ដែលជាការដក់ស្រង់ចេញពីភាពយន្ដ ចេញផ្សាយចែកជូនអ្នកគាំទ្រ។ នៅក្នុងទំព័រហ្វេកប៊ុកផេកផ្លូវការ របស់អ្នកដឹកនាំរឿង ហ៊ុយ យ៉ាឡេង ដែលឈ្មោះថា កថាជ័យ បានបង្ហាញផ្ទាំងផូស្ទ័រភាពយន្តថ្មីដែលមានចំណងជើងថា រឿងខ្មោចចូល ហើយលោកបានរៀបរាប់ថា ដោយសារតែប្រទេសយើងនៅមានវិបត្តិជំងឺកូវីតហើយរោងភាពយន្តមិនទាន់បើកទ្វារ ទើបលោកសម្រេចចិត្តចេញផ្សាយភាពយន្តថ្មី របស់លោកជាសៀវភៅភាពយន្តសិន ទម្រាំដល់រោងភាពយន្តបើកទ្វារនិងអាចចេញផលិតជាភាពយន្តបាន ហើយខ្សែភាពយន្តថ្មីនេះជាប្រភេទភ័យរន្ធត់ដែលត្រូវចិត្តយុវវ័យចង់បាន បន្ទាប់ពីលោកផលិតភាពយន្តជីវិតរឿងដើម្បីកូនដែលជាភាពយន្តជិវិតពិតបង្ហាញពីជីវិតអ្នកធាក់ស៊ីក្លូរួចមក ។

ហើយអត្ថន័យភាពយន្តនេះលោកបានរៀបរាប់ដោយសង្ខេបថា៖«ខ្មោចចូល» ឧត្តមជានាយទាហានដែលបាត់ខ្លួនក្នុងរបបសាធារណរដ្ឋ គ្រួសារគិតថាឧត្តមស្លាប់ ក៏ប៉ុន្តែស្រាប់តែថ្ងៃមួយបានលេចវត្តមានឧត្តមនៅមុខផ្ទះ គ្រប់គ្នាស្រឡាំងកាំងពិសេសគឺសុភាដែលជាភរិយាឧត្តមស្ទុះមកឧិបប្តីទាំងទឹកភ្នែក នៅរាត្រីនោះគ្រួសារឧត្តមបានធ្វើពិធីជប់លាងអបអរប្តីត្រឡប់មកវិញ ឧត្តមស្រវឹងបានអួតហេតុអ្វីគេមិនស្លាប់ព្រោះគេមានខ្នាយបារមីដែលគ្រូគេបានអោយ គ្រប់គ្នាភ្ញាក់ផ្អើលនឹងខ្នាយនោះ ឧត្តមស្រវឹងដល់ក្អួតសន្លប់ត្រូវកូនទាហានសែងចូលដេក ។ ព្រឹកឡើងឧត្តមត្រូវភរិយាហៅកាត់សក់ ឧត្តមដើរធ្នឹងមិននិយាយស្តីទៅកន្លែងកាត់សក់ ពូសុខជាងកាត់សក់រៀបយកកន្រ្តៃកាត់សក់តែត្រូវឧត្តមធ្វើកាយវិកាចង្អុល អោយកោរពុកមាត់សិន ទាំងអស់គ្នាខ្លាចឧត្តមដែលបើកភ្នែកធំៗមិននិយាយស្តីសោះ ជាងកោរពុកមាត់ឧត្តមទាំងភ័យខ្លាច គ្រាន់តែកោរ ពុកមាត់រួចឧត្តមរាងញញឹមបន្តិច ជាងទាញកន្រ្តៃរកកាត់សក់ម្តង គ្រាន់តែជាងទាញកន្ត្រៃ រកកាត់សក់ ឧត្តមឆក់យកកន្ត្រៃចាក់ចំកណ្តាលភ្លៅជាង ជាងស្រែកអូយដោយក្តីឈឺចាប់ កូនទាហានរត់មកចាប់ឧត្តមសោភារត់មកតក់ស្លុតយ៉ាងខ្លាំង ឧត្តមស្រែកដូចបីសាចហើយក៏សន្លប់ រឿងរ៉ាវខ្មោចចូលត្រូវចាប់ផ្តើមឡើង ។

លោកអ្នកអាចធ្វើការកក់សៀវភៅរឿង ខ្មោចចូល ប្រភេទភ័យរន្ធត់ កក់ឥឡូវនេះតម្លៃត្រឹមតែ 24000 រៀល 1អាទិត្យក្រោយទទួលបានសៀវភៅ រួសរាន់ណាព្រោះចំនួនមានកំណត់។ ចូលទៅកាន់websiteដើម្បីមើលប្រភេទទំនិញនេះ https://www.l192.com/product/362378

May 29, 2020

អាហារពិសេសសម្រាប់កូនសម្លាញ់

ឡារ៉ែន សូមបបួលអ្នកម្តាយដែលជាប្រិយមិត្តអ្នកអានដែលតែងតែតាមដានទំព័រសុខភាពមាតា និងទារកមកសាកល្បងធ្វើមុខម្ហូបដែលងាយស្រួលធ្វើ ងាយស្រួលញ៉ាំ និងញ៉ាំហើយសប្បាយពោះសម្រាប់កូនតូច ដូចជាមុខម្ហូប បបរ និងស្ងោ ដែល ឡារ៉ែនធានាថានឹងក្លាយជាអាហារដ៏ពិសេសមួយនៅក្នុងចំណោមអាហារដែលកូនតូចដ៏ជាទីស្រឡាញ់របស់អ្នកម្តាយចូលចិត្តមិនខាន។

អាហារសម្រាប់កូនតូចវ័យ 6 – 8 ខែ

ស៊ុបប្រូខូលី

គ្រឿងផ្សំ

– ប៊័រ 30 ក្រាម – ទឹកដោះ 1/2 ពែង

– ខ្ទឹមសចិញ្រ្ចាំ 1 កំពិស – ខ្ទឹមបារាំងចិញ្ច្រាំ 1 មើម

– ទឹកស៊ុបសាច់មាន់ 2 – 3 ពែង

– ប្រូខូលីកាត់ជាចំណិតតូចៗ 2 ពែង

– ឈីសសេតតារ៍កោសជាខ្សែៗ 1 ពែង

វិធីធ្វើ

1- រំលាយប៊័រ ដាក់ខ្ទឹមបារាំងចិញ្រ្ចាំ និងខ្ទឹមស ឆាត្រឡប់រហូតឡើងទន់ ដាក់ប្រូខូលីចូលហើយឆាឱ្យឆ្អឹន រួចសឹមដាក់ទឹកស៊ុបសាច់មាន់ចូលឱ្យលិចបន្លែ។

2- ស្ងោឱ្យពុះ ហើយកិនឱ្យហ្មត់

3- ដាក់ទឹកដោះចូល ហើយស្ងោឱ្យពុះម្តងទៀត រួចដាក់ឈីសចូល កូរឱ្យរលាយសព្វ។

អាហារសម្រាប់កូនតូចវ័យ 9 – 10 ខែ

មាន់ស្ងោបន្លែ

គ្រឿងផ្សំ

– សាច់ភ្លៅមាន់ 1 ដុំ – ខ្ទឹមបារាំងចិញ្រ្ចាំ 1/4 មើម

– ទឹកស៊ុបសាច់មាន់ 1/2 ពែង – ខ្ទឹមសចិញ្រ្ចាំ 1 កំពិស

– មើមការ៉ុតហាន់ដុំជ្រុងតូចៗ 1 មើម – ប្រេងម្កាក់ 1/2 ស្លាបព្រាបាយ

– ដំឡូងបារាំងបកសំបកហើយ ហាន់ដុំជ្រុងតូចៗ 1 មើម

– ឃឹនឆាយបកសំបក ហើយហាន់ខ្លីៗ 1 ធាង

– ទឹកប៉េងប៉ោះខាប់ 1/2 ស្លាបព្រាបាយ

វិធីធ្វើ

1- ដាក់សាច់ភ្លៅមាន់ចូលក្នុងខ្ទះដែលមានខ្លាញ់បន្តិច ទុកឱ្យឆ្អឹនទាំងសាច់ និងស្បែក

2- ទុកឱ្យត្រជាក់បន្តិច រួចហើយបកស្បែក និងជៀរយកតែសាច់ចេញមកចិញ្រ្ចាំឱ្យតូចៗ

3- ឆាខ្ទឹមបារាំងចិញ្រ្ចាំនៅក្នុងឆ្នាំងមួយផ្សេងទៀតជាមួយប្រេងម្កាក់រហូតដល់ឡើងឆ្អឹនទន់

4- ដាក់សាច់មាន់ ការ៉ុត ឃឹនឆាយ ដំឡូងបារាំង ខ្ទឹមស និងទឹកប៉េងប៉ោះចូលទៅឆាត្រឡប់ឱ្យចូលគ្នា

5- ដាក់ទឹកស៊ុបសាច់មាន់ចូលទៅ ហើយស្ងោឱ្យពុះ បន្ថយភ្លើង និងស្ងោតទៅទៀតប្រមាណ 20 នាទី ឬរហូតទាល់តែបន្លែឡើងទន់

6- កិនឱ្យហ្មត់ មុននឹងយកទៅបញ្ចុក

អាហារសម្រាប់កូនតូចវ័យ 11 – 12 ខែ

ស្ទីវតៅហ៊ូ

គ្រឿងផ្សំ

– ប្រេងល្អ 1 – 2 ស្លាបព្រាបាយ – ខ្ទឹមឥណ្ឌាហាន់ជ្រុងដុំតូចៗ 1 មើម

– តៅហ៊ូដុំហាន់ដុំជ្រុងតូចៗ 1 ដុំ – ទឹកស្ងោបន្លែ ឬសាច់មាន់ 1 ពែង

– ការ៉ុតហាន់ដុំជ្រុងតូចៗ 1/4 ពែង – ស្លឹកខ្ទឹមហាន់ល្អិតៗ 1/4 ពែង

– ប៉េងប៉ោះពុះខ្វេះគ្រាប់ចេញ រួចហានដុំជ្រុងតូចៗ 1 ពែង

វិធីធ្វើ

1- ឆាខ្ទឹមឥណ្ឌា និងការ៉ុតឱ្យទន់នៅក្នុងប្រេងល្ង ដាក់ប៉េងប៉ោះចូលឆាជាមួយ

2- ចាក់ទឹកស្ងោបន្លែ ឬសាច់មាន់ ស្ងោជាមួយបន្លែ ស្ងោឱ្យទឹករីងអស់ពាក់កណ្តាល

3- ដាក់តៅហ៊ូចូលទៅ ស្ងោឱ្យទន់ទាំងអស់រហូតនៅសល់ទឹកខាប់ៗ

4- ដាក់ស្លឹកខ្ទឹមកូរច្របល់ឱ្យសព្វ

អាហារសម្រាប់ក្មេងតូចអាយុ 1 ឆ្នាំឡើង

សណ្តែកគួចំហុយស្រួយ ជាមួយទឹកជ្រលក់ប៉េងប៉ោះ

គ្រឿងផ្សំទឹកជ្រលក់ប៉េងប៉ោះ

– ផ្លែប៉េងប៉ោះបកសំបកហើយ 2 ផ្លែ – ខ្ទឹមសចិញ្រ្ចាំ 1 កំពិស

– ខ្ទឹមបារាំងចិញ្ច្រាំ 1/2 មើម -ការ៉ុតហាន់ជ្រុងដុំតូចៗ 1/2 មើម

– ស្លឹកវ៉ាន់ស៊ុយបារាំងចិញ្រ្ចាំ 1 ស្លាបព្រាបាយ – ប្រេងម្កាក់ 1 ស្លាបព្រាបាយ

– ទឹកប៉េងប៉ោះខាប់ 1/2 ស្លាបព្រាបាយ

គ្រឿងផ្សំសណ្តែកគួចំហុយស្រួយ

– សណ្តែកគួ កាត់កង់ៗ 100 ក្រាម – ស៊ុត 1 គ្រាប់ – អំបឹល ម្រេច

– ផាមេហ្សានឈីសកោស 1/4 ពែង – កំទេចនំប៉័ង 1/2 ពែង

វិធីធ្វើទឹកជ្រលក់ប៉េងប៉ោះ

1- ឆាការ៉ុត ខ្ទឹមបារាំង និងខ្ទឹមសឱ្យឆ្អឹន ជាមួយប្រេងម្កាក់

2- ដាក់ទឹកប៉េងប៉ោះខាប់ និងប៉េងប៉ោះចូលឆា ផ្សំរសជាតិដោយ អំបឹល ម្រេច តាមចូលចិត្ត

3- រំងាស់ឱ្យឡើងខាប់តាមតម្រូវការ ភ្លក្សកែកុនរសជាតិតាមចូលចិត្ត ដាក់ស្លឹកវ៉ាន់ស៊ុយបារាំងចូលច្របល់ឱ្យសព្វ

វិធីធ្វើសណ្តែកគួចំហុយស្រួយ

1- លាងសណ្តែកគួឱ្យស្អាត ជូតផ្តិតឱ្យស្ងួត

2- យកទៅច្របល់ជាមួយស៊ុត ហើយយកមកប្រមៀលៗលើកំទេចនំប៉័ងដែលលាយជាមួយឈីសរួចស្រេច

3+ យកទៅដាក់ចំហុយស្ងួតក្នុងកំដៅ 170 អង្សា ប្រមាណជា 15 នាទី ឬរហូតទាល់តែឆ្អឹន៕

May 29, 2020

តារាស្រី ម៉ៅ គីមធីតា បកស្រាយរឿងមានផ្ទៃពោះជាមួយ គូម៉ា មុនរៀបការ

នៅថ្ងៃម្សិលមិញនេះ មហាជនជាច្រើនបានទទួលដំណឹងគូស្នេហ៍តារាចម្រៀងគូម៉ា មានផ្ទៃពោះមុនពេលរៀបការ ដោយគ្រាន់តែឃើញរូបភាពប៉ុន្មានសន្លឹកបង្ហោះនៅលើបណ្ដាញសង្គមហ្វេសប៊ុក។ យ៉ាងណាមិញ ក៏មានការរិះគន់ចំពោះទំនាក់ទំនាក់ស្នេហារវាងអ្នកទាំងពីរភ្លាមៗ ទើបធ្វើឱ្យតារាស្រី ម៉ៅ គីមធីតា ជាគូស្នេហ៍របស់គូម៉ា ចេញមុខបកស្រាយភ្លែតតែម្ដង។

ដោយឡែកចំពោះរឿងនេះ ត្រូវបានសាម៉ី ខ្លួនប្រាប់អ្នកសារព័ត៌មានឱ្យដឹងទាំងស្រស់ស្រាយ និងសើចតិចៗផងថា៖ «អូហ៍ រូបហ្នឹងថតរឿងម្សិលមិញតើបង ថតឲ្យផលិតកម្ម MKR ជិតដាក់បញ្ចាំងហើយ ព្រោះថតជិតចប់ដែរសាច់រឿងនេះ»។

បន្ថែមពីសម្ដីបដិសេធចំពោះការលេចឮនាងមានផ្ទៃពោះមិនរៀបការដូច្នោះ ម៉ៅ គីមធីតា រៀបរាប់បន្ថែមថា៖ «មិនមានផ្ទៃពោះជាមួយបង គូម៉ា ទេ…ពួកយើងស្រលាញ់គ្នាមែន តែមិនធ្វើចឹងទេ។ យ៉ាងណាមិញ សល់ពេលមិនយូរទៀតទេពួកយើងនឹងរៀបចំកម្មវិធីតាមប្រពៃណីហើយ ដូច្នេះសូមបងប្អូនកុំយល់ច្រឡំ និងវាយតម្លៃគ្រាន់តែឃើញរូបមួយសន្លឹកនេះអី»៕

May 29, 2020

មូលបត្រនៅផ្សារហ៊ុនសហរដ្ឋអាមេរិក ត្រូវលក់ឡាយឡុង ដោយសារលោក Trump ចេញបទបញ្ជារឹតបន្តឹងលើក្រុមហ៊ុនបណ្ដាញសង្គម

មូលបត្រ Twitter បានធ្លាក់ថ្លៃ4.5% និង Facebook ធ្លាក់1.6% បន្ទាប់ពីប្រធានាធិបតីអាមេរិកាំង បានចុះហត្ថលេខាលើបទបញ្ជាដកហូតសិទ្ធិលើកលែងផ្នែកច្បាប់ពីក្រុមហ៊ុនបណ្ដាញសង្គមទាំងនេះ។

ចប់ការជួញដូរនៅថ្ងៃទី28ឧសភា សន្ទស្សន៍ DJIA បានថយចុះ 0.58% មកនៅត្រឹម25,400ពិន្ទុ។ សន្ទស្សន៍ S&P 500 បាត់បង់ 0.21% មកនៅត្រឹម 3,029ពិន្ទុ។ ចំណែក Nasdaq Composite ថយចុះ 0.46% មកនៅត្រឹម 9,368ពិន្ទុ។

ភាគហ៊ុននានានៅផ្សារមូលបត្រអាមេរិកបានឡើងថ្លៃជាបន្តបន្ទាប់នៅពេលចាប់ផ្ដើមការជួញដូរកាលពីម្សិលមិញដោយសារតែវិនិយោគិនមានការពេញចិត្ត និងសង្ឃឹមទៅលើការងើបឡើងនៃសេដ្ឋកិច្ច ក្រោយពីសហរដ្ឋអាមេរិកបានឆ្លងផុតពីចំណុចកំពូលនៃការរាតត្បាតរបស់ COVID-19។ សន្ទស្សន៍ S&P 500 បច្ចុប្បន្នបានកើនខ្ពស់គួរសមបើធៀបនឹងកម្រិតទាបបំផុតក្នុងខែមីនា ដោយសារតែសេដ្ឋកិច្ចបានចាប់ផ្ដើមដំណើរការឡើងវិញជាបណ្ដើរៗ រួមនឹងកញ្ចប់ថវិកាជំនួយសេដ្ឋកិច្ចដ៏ច្រើនសន្ធឹកសន្ធាប់របស់រដ្ឋាភិបាល។ ចំណែកក្រុមហ៊ុន Boeing ក៏បានឱ្យដឹងថា បានចាប់ផ្ដើមការផលិតយន្តហោះ 737 MAX នៅក្នុងរដ្ឋវ៉ាស៊ីងតោន បើទោះជាដំណើរការយឺតៗក៏ដោយ។

Twitter កាលពីថ្ងៃទី27ឧសភា បានដាក់ tag នៅលើសារចំនួន2ឃ្លារបស់លោក Trump ហើយបានបន្ថែមឧទានសញ្ញានៅខាងក្រោមសារទាំងនេះ។ ពេលចុចទៅលើតំណភ្ជាប់(link) ដែលត្រូវបានភ្ជាប់ទៅនឹងសារនោះ អ្នកប្រើប្រាស់នឹងត្រូវបាននាំទៅកាន់ទំព័រមួយដែលគ្រប់គ្រងដោយ Twitter ដែលមានសរសេរថា ប្រសាសន៍របស់ម្ចាស់សេតវិមានគឺមិនត្រឹមត្រូវនោះទេ។ នេះអាចជាមូលហេតុមួយដែលធ្វើឱ្យលោក Trump ខឹងសម្បា

ក៏ប៉ុន្តែ តម្លៃមូលបត្រខាងលើបានដើរថយក្រោយនៅចុងការជួញដូរនៃថ្ងៃដដែលនោះ។ មូលបត្ររបស់ក្រុមហ៊ុនបណ្ដាញសង្គម Twitter និង Facebook បានដាំក្បាលចុះ បន្ទាប់ពីប្រធានាធិបតី Donald Trump ថ្លែងថា នឹងចុះហត្ថលេខាលើបញ្ជាទាក់ទងនឹងក្រុមហ៊ុនបណ្ដាញសង្គម។ ចប់ការជួញដូរកាលពីម្សិលមិញ តម្លៃមូលបត្ររបស់ Twitter បានថយចុះ4.4% ខណៈ Facebook ធ្លាក់ចុះ1.6%។

មូលហេតុមួយចំនួនផ្សេងទៀតដែលនាំឱ្យមូលបត្រនៅផ្សារហ៊ុនអាមេរិកធ្លាក់ថ្លៃ នោះគឺ ភាពតានតឹងរវាងអាមេរិកាំងជាមួយចិន ពិសេសគឺបញ្ហានៅហុងកុង បញ្ហា COVID-19 និងបញ្ហាសង្គ្រាមពាណិជ្ជកម្ម។ល។

ប្រភព៖ សារព័ត៌មានបរទេស

May 29, 2020

ផែនដីនិងព្រះចន្ទមានទិដ្ឋភាពបែបណា នៅពេលមើលពីពិភពសៅរ៍ដែលមានចម្ងាយ1.4ពាន់លានគម?

យានអវកាស Cassini ដែលមានភារកិច្ចស្រាវជ្រាវពិភពសៅរ៍ ថតបានរូបភាពផែនដី និងព្រះចន្ទនៅពេលដែលយាននេះស្ថិតក្នុងដំណាក់កាលចុងក្រោយនៃជីវិតរបស់វា បន្ទាប់ពីបានបំពេញបេសកកម្មនៅក្នុងលម្ហអវកាស។

រូបថតបង្ហាញអំពីទិដ្ឋភាពផែនដីនិងព្រះចន្ទដែលយើងលើកយកមកនិយាយនៅទីនេះ។

កាលពីថ្ងៃទី27ឧសភា អង្គការ NASA បានចែករំលែករូបភាពនៃផែនដី និងព្រះចន្ទដែលត្រូវបានថតកាលពី3ឆ្នាំមុនដោយយានអវកាស Cassini។ ពេលនោះ ព្រះអាទិត្យត្រូវបានពិភពសៅរ៍បាំងពន្លឺអស់មួយរយៈពេលខ្លី បង្កបានជាឱកាសល្អសម្រាប់យាន ដើម្បីបង្វែរកាមេរ៉ាទៅរកតំបន់កណ្ដាលនៃប្រព័ន្ធព្រះអាទិត្យ។ ផ្កាយព្រះសៅរ៍គឺជាពិភពទី6 បើរាប់ពីព្រះអាទិត្យ ចំណែកផែនដីគឺជាភពទី3 មានន័យថាផែនដីស្ថិតនៅក្នុងតំបន់កណ្ដាលនៃប្រព័ន្ធព្រះអាទិត្យ។

ជាមួយនឹងរយៈចម្ងាយ1.4ពាន់លានគីឡូម៉ែត្រ ផែនដីនិងព្រះចន្ទនៅក្នុងរូបថត គឺគ្រាន់តែជាចំណុចតូចល្អិតនៅកណ្ដាលរង្វង់ខ្សែក្រវាត់នានារបស់ពិភពសៅរ៍ដ៏មហិមាតែប៉ុណ្ណោះ។ នៅផ្នែកខាងស្ដាំនៃរូបភាពគឺជារង្វង់ខ្សែក្រវាត់A របស់ពិភពសៅរ៍ ចំណែកនៅក្បែរជ្រុងខាងស្ដាំងគឺជាលម្ហEncke ដ៏ធំល្វឹងល្វើយ ខណៈដែលលម្ហKeeler រាងចង្អៀតបន្តិចដែលស្ថិតនៅក្បែរចំណុចកណ្ដាលនៃរូបភាព។ រីឯនៅជ្រុងខាងឆ្វេងគឺជាខ្សែក្រវាត់F ដែលមានការប្រែប្រួលជាប្រចាំ។

យានអវកាស Cassini ត្រូវបានបាញ់បង្ហោះទៅកាន់អវកាសពីរដ្ឋ Florida នៃសហរដ្ឋអាមេរិកកាលពីថ្ងៃទី15តុលា1997។ ឆ្នាំ2004 យានដែលមានតម្លៃ3.3ពាន់លានដុល្លាររបស់ NASA នេះ បានហោះទៅដល់ពិភពសៅរ៍ និងបានចាប់ផ្ដើមការស្រាវជ្រាវរបស់ខ្លួន។ ឆ្នាំ2017 យាននេះក៏អស់ថាមពល។ អ្នកវិទ្យាសាស្ត្របានបញ្ជាឱ្យយានអវកាសនេះ ហោះចូលក្នុងបរិយាកាសរបស់ភពសៅរ៍ដើម្បីកម្ចេចចោលនៅទីនោះ។ ការ “ធ្វើអត្តឃាត” បែបនេះគឺដើម្បីបញ្ជៀសមិនឱ្យវាអណ្ដែតត្រសែតគ្មានគោលដៅ ដែលអាចហោះធ្លាក់ទៅលើព្រះចន្ទនានាដែលអាចមានជីវិតរបស់ភពសៅរ៍ បង្កការឆ្លងជីវិតពីផែនដី៕

ប្រភព៖ សារព័ត៌មានបរទេស

May 28, 2020

Quantum Levitation នឹងក្លាយជាបច្ចេកវិទ្យាហោះហើរថ្មីដ៏អាស្ចារ្យបំផុតសម្រាប់អនាគត

បន្ទះវត្ថុធាតុដ៏ស្ដើងមួយអាចផ្ទុកវត្ថុដែលមានទម្ងន់ធ្ងន់ជាងវាដល់ទៅ 70,000ដងឯណោះនៅក្នុងលម្ហបរិយាកាស ជាមួយនឹងគន្លងគោចរប្រកបដោយមហាស្ថិរភាព។ នេះគឺជាបច្ចេកវិទ្យាមហាចម្លង Superconductivity ដែលត្រូវបានគេសង្ឃឹមថានឹងក្លាយជាគ្រឹះដ៏រឹងមាំសម្រាប់បង្កើតយានយន្តដែលអាចហោះបានប្រកបដោយភាពអស្ចារ្យជាងយន្តហោះ ឬយានអវកាសនាបច្ចុប្បន្នទៅទៀត ដោយសារវាមិនទទួលឥទ្ធិពលនៃដែនទំនាញពីផែនដី។

ជាដំបូង សូមទស្សនាឃ្លីបវីដេអូមួយដែលបង្ហាញអំពីដំណើរការនៃបច្ចេកវិទ្យាខាងលើនេះនៅឯតូបឧទ្ទេសនាមផលិតផលរបស់សាកលវិទ្យាល័យ Tel Aviv នៃប្រទេសអ៊ីស្រាអែល ដែលបានធ្វើឡើងនៅក្នុងព្រឹត្តិការណ៍ ASTC (Association of Science and Technology Centers) កាលពីឆ្នាំ2011 នាមជ្ឈមណ្ឌលវិទ្យាសាស្ត្រ Maryland ក្នុងទីក្រុង Baltimore សហរដ្ឋអាមេរិក។

នៅក្នុងវីដេអូនេះ យើងឃើញថា មានបន្ទះវត្ថុធាតុមួយដែលត្រូវបានក្លាសេយ៉ាងត្រជាក់ដោយប្រើអាសូតរាវ (Liquid nitrogen) អាចបណ្ដែតខ្លួនក្នុងបរិយាកាសដែលមានគម្លាតពីមេដែកក្នុងរយៈចម្ងាយខ្លី។ នៅពេលបន្ទះវត្ថុធាតុនេះត្រូវបានដាក់ពីលើក្បែរប្រព័ន្ធមេដែកដែលមានរាងរង្វង់មូល ហើយយកដៃរុញវាតែបន្តិច វានឹងហោះទៅតាមរង្វង់មូលនៃមេដែកនេះ។

ជាពិសេស វត្ថុធាតុនេះនៅតែអាចបណ្ដែតខ្លួនក្នុងបរិយាកាស បើទោះជាវាត្រូវបានដាក់ពីខាងក្រោមមេដែកក៏ដោយ។ បាតុភូតនេះត្រូវបានគេឱ្យឈ្មោះថា quantum levitation ឬ quantum trapping។ Quantum levitation គឺជាបច្ចេកវិទ្យាមួយដែលអ្នកវិទ្យាសាស្ត្រប្រើប្រាស់លក្ខណៈពិសេសរបស់រូបវិទ្យាកង់ទិកដើម្បីលើកវត្ថុអ្វីមួយ (ក្នុងករណីនេះគេប្រើប្រាស់វត្ថុធាតុមហាចម្លង Superconductivity) ឱ្យអណ្ដែតទៅលើ នៅខាងលើប្រភពដែនទំនាញ (ករណីនេះ គេប្រើប្រព័ន្ធផ្លូវមេដែករាងរង្វង់មូល) ជាក់លាក់មួយ។

យើងគួរបកស្រាយបែបណា?

Superconductivity គឺជាបាតុភូតដែលកើតឡើងនៅពេលវត្ថុធាតុជាក់លាក់មួយស្ថិតក្នុងសីតុណ្ហភាពទាបជាងសីតុណ្ហភាពដល់កម្រិតជាក់លាក់មួយ ដែលពេលនោះកម្លាំងរារាំងការចន្លងអគ្គិសនីរបស់វាក៏បានថយចុះភ្លាមៗដល់ចំណុច 0។

ជាមួយនឹងវត្ថុធាតុឌីយ៉ាម៉ាញេទិក (Diamagnetic materials) ធម្មតា លំហូរនៃអគ្គិសនី Foucault ដែលមាននិន្នាការប្រឆាំងទៅនឹងមូលហេតុដែលបានបង្កើតវាឡើង (នៅក្នុងករណីនេះគឺចលនាប្រហាក់ប្រហែលគ្នារវាងដែនម៉ាញេទិក និងវត្ថុធាតុ) បានចុះខ្សោយយ៉ាងលឿន ដោយសារតែ រ៉េស៊ីស្ទ័រ (resistor) ដែលជាកម្លាំងរារាំងនៅខាងក្នុងវត្ថុធាតុនោះ។ ប៉ុន្តែ ដោយសារវត្ថុមហាចម្លង Superconductivity មិនមានរ៉េស៊ីស្ទ័រ ដូច្នេះលំហូរ Foucault ដែលកើតឡើង ក៏មិនមានការចុះខ្សោយ។ ហេតុនេះហើយ ដែនម៉ាញេទិកបន្ទាប់បន្សំដែលត្រូវបានបង្កើតឡើងក៏មិនថយចុះ ហើយវាកម្ចាត់ដែនទំនាញទាំងស្រុងពីក្នុងខ្លួនវា ដែលវាទទួលបានពីខាងក្រៅ (ដូចជាទំនាញផែនដីជាដើម)។ ពេលនោះ ដែនទំនាញនៅក្នុងវត្ថុធាតុមហាចម្លង Superconductivity នេះមានប្រហាក់ប្រហែលនឹង 0 ហើយក៏ត្រូវបានរុញច្រានចេញទៅខាងក្រៅទាំងស្រុង។ ប្រការនេះ ធ្វើឱ្យវត្ថុធាតុមហាចម្លង Superconductivity អាចបណ្ដែតខ្លួនក្នុងបរិយាកាសដែលមានចម្ងាយពីមេដែកបន្តិច។

យោងតាមអ្នកវិទ្យាសាស្ត្រអ៊ីស្រាអែល បើសិនជាវត្ថុធាតុ Superconductivity រុញច្រានដែនទំនាញពីខាងក្រៅចេញអស់ពីខ្លួន វាអាចហោះឡើងទៅលើ ប៉ុន្តែ ទីតាំង និងគន្លងគោចររបស់វាមិនមានលំនឹង ដោយសារតែវាចេះតែប្រឹងហោះ ដើម្បីជៀសពីដែនទំនាញខាងក្រៅ។ វត្ថុធាតុមហាចម្លងនេះត្រូវបានគេហៅថា ធាតុមហាចម្លងប្រភេទទី1។

ការប្រើប្រាស់បច្ចេកវិទ្យា Quantum Levitation ក្នុងវិស័យឧស្សាហកម្ម

បើទោះជាបណ្ដាក្រុមហ៊ុនផលិតរថភ្លើងល្បឿនលឿននៅជប៉ុន បានប្រើប្រាស់ទ្រឹស្ដីនៃបច្ចេកវិទ្យា Quantum Levitation នៅក្នុងការបង្កើតរថភ្លើងល្បឿនលឿនដែលអាចធ្វើដំណើរបានជិត600គីឡូម៉ែត្រ/ម៉ោង ប៉ុន្តែ វាមិនមែនជាបច្ចេកវិទ្យាពិតប្រាកដរបស់ Quantum Levitation នោះទេ។ វាគ្រាន់តែជាបច្ចេកវិទ្យា Maglev – Magnetic Levitation តែប៉ុណ្ណោះ។

យោងតាមអ្នកវិទ្យាសាស្ត្រនៃប្រទេសអ៊ីស្រាអែល ឱ្យដឹងថា វត្ថុធាតុ Superconductivity ដែលប្រើប្រាស់ក្នុងវីដេអូខាងលើ មានកម្រាស់ត្រឹមតែ 0,5មីក្រូមម (micromet) ប៉ុណ្ណោះ ប៉ុន្តែ វាអាចលើកវត្ថុមួយដែលធ្ងន់ជាងវាដល់ទៅ70,000ដងឯណោះ។ មានន័យថា វត្ថុធាតុ Superconductivity មួយបន្ទះដែលមានអង្កត់ផ្ចិត 7,62សម និងកម្រាស់ 2មម អាចលើករថយន្តដែលមានទម្ងន់1តោនបាន។

ប្រភព៖ សារព័ត៌មានបរទេស

May 28, 2020

Category: សង្គម និងសេដ្ឋកិច្ច