សង្គម និងសេដ្ឋកិច្ច - La Reine Media

Huawei ចេញលក់កាសថ្មី តម្លៃ 110ដុល្លារ បំពាក់មុខងារទប់សំឡេងរំខាន

Huawei បានបង្ហាញចេញ កាស FreeBuds 3i សម្រាប់ទីផ្សារអឺរ៉ុប កាលពីដើមខែមុន ដែលមានបំពាក់មកជាមួយនូវមុខងារទប់សំឡេងរំខាន Active Noise Cancellation ជាមួយតម្លៃប្រមាណ 110ដុល្លារប៉ុណ្ណោះ ដែលធៀបនឹង AirPods Pro គឺធូរថ្លៃជាង។

ទាំងនេះជាលក្ខណពិសេសរបស់កាស Huawei FreeBuds 3i ៖
-មានសមត្ថភាពធន់នឹងទឹកកម្រិត IPX4
-អាចទ្រាំទ្រការស្ដាប់ចម្រៀងបាន 3ម៉ោងកន្លះ
-សម្រាប់ការនិយាយទូរស័ព្ទគឺបាន 2ម៉ោងកន្លះ
-ប្រអប់របស់វាអាចបន្ថែមរយៈពេលនៃការស្ដាប់ចម្រៀងបាន 14ម៉ោងកន្លះ ឬការនិយាយទូរស័ព្ទបាន 10ម៉ោងកន្លះ បន្ថែមទៀត។
-សាកថ្មកាសក្នុងប្រអប់ ត្រូវចំណាយពេល 1ម៉ោងទើបពេញ
-សាកថ្មប្រអប់វិញចំណាយពេល 115នាទី។
-ការបញ្ជាកាសនេះ គឺធ្វើឡើងតាមការចុច ដូចជាចុចឱ្យជាប់ដើម្បីបើក ឬបិទមុខងារ AN
-ចុច 2ដងដើម្បីចាក់ ឬផ្អាកចម្រៀង និងទទួលទូរស័ព្ទ ឬបញ្ចប់ការនិយាយទូរស័ព្ទ។

FreeBuds 3i នឹងដាក់លក់នៅចក្រភពអង់គ្លេសជាមួយពណ៌ Ceramic White នៅលើ Huawei Store នាថ្ងៃទី20 ខែឧសភា ហើយនៅថ្ងៃទី1 ខែមិថុនា នឹងមានលក់នៅតាមហាងលក់រាយមួយចំនួន ដោយមានបន្ថែមជម្រើសពណ៌ Carbon Black៕

June 8, 2020

Real Madrid យកកន្លែងហ្វឹកហាត់ ធ្វើជាកីឡដ្ឋានប្រកួត

La Liga នឹងចាប់ផ្តើមការប្រកួតឡើងវិញនៅសប្តាហ៍ក្រោយនេះហើយ ក្រោយពីបានផ្អាកការប្រកួតទាំងអស់របស់ខ្លួន តាំងពីខែមេសាកន្លងមក ដោយការប្រកួតដែលនឹងវិលត្រឡប់មកវិញនេះ គឺជាការប្រកួតបិទទ្វារ មិនមានអ្នកទស្សនាឡើយ៕

ក្នុងនោះដែរ ក្លិបបាល់ទាត់ Real Madrid នៃក្របខណ្ឌ La Liga បានប្រកាសថា ក្លិបនឹងប្រើប្រាស់ កីឡដ្ឋានហ្វឹកហាត់របស់ខ្លួន Estadio Alfredo Di Stefano ដែលអាចផ្ទុកអ្នកទស្សនាបានត្រឹមតែ 6ពាន់នាក់ សម្រាប់រៀបចំការប្រកួតនាពេលខាងមុខនេះ។

គួរបញ្ជាក់ដែរថា ទីលានបាល់ទាត់ Santiago Bernabeu ផ្លូវការរបស់ Real Madrid ត្រូវបានសាងសង់ឡើងកាលពីឆ្នាំ1947 ហើយមកដល់ពេលបច្ចុប្បន្ននេះ កីឡដ្ឋាននេះអាចដាក់មនុស្សបានជាង 8ម៉ឺននាក់ ឯទីលានហ្វឹកហាត់ Di Stefano ឯណេះវិញ សាងសង់ឡើងនៅឆ្នាំ2006 ដោយអាចដាក់មនុស្សចូលមើលបាន 6ពាន់នាក់៕

June 8, 2020

សហព័ន្ធគុនខ្មែរ នឹងយកមេដាយស៊ីហ្គេម ដែលដណ្តើមបាន ទៅរក្សាទុកនៅសារមន្ទីរ

សហព័ន្ធកីឡាប្រដាល់គុនខ្មែរ បានរៀបចំពិធីប្រគល់ និងទទួលមេដាយជយលាភីស៊ីហ្គេម 2ជំនាន់ចុងក្រោយ គឺស៊ីហ្គេម លើកទី29 ឆ្នាំ2017 នៅម៉ាឡេស៊ី និងស៊ីហ្គេម លើកទី30 ឆ្នាំ2019 នៅប្រទេសហ្វ៊ីលីពីន ព្រមទាំងទទួលគ្រឿងឥស្សរិយយស ដើម្បីធ្វើសៀវភៅប្រវត្តិកីឡាករ-កីឡាការិនីកម្ពុជា និងតម្កល់ទុកក្នុងសារមន្ទីរកីឡាកម្ពុជា។ ពិធីនេះ ត្រូវបានធ្វើឡើងនៅសាលប្រជុំនាយកដ្ឋានអប់រំកាយ និងកីឡាសិស្សនិស្សិត នៃពហុកីឡដ្ឋានជាតិអូឡាំពិក។

ឯកឧត្ដម តែម ម៉ឺន ប្រធានសហព័ន្ធកីឡាប្រដាល់គុនខ្មែរ បានលើកឡើងថា នេះគឺជាការប្រមូលផ្តុំនូវសមិទ្ធផលជយលាភីមេដាយមាស ប្រាក់ និងសំរឹទ្ធ ដែលកីឡាករ កីឡាការិនីកម្ពុជាដណ្តើមបានជាលក្ខណៈអន្តរជាតិ ជាពិសេសគឺស៊ីហ្គេម រួមទាំងគ្រូបង្វឹកដែលដឹកនាំ ដើម្បីតម្កល់ទុកស្នាដៃ និងមេដាយទាំងអស់នៅក្នុងសារមន្ទីរកីឡា តាមការណែនាំជាគោលការណ៍របស់ក្រសួងអប់រំ យុវជន និងកីឡា។ ការតម្កល់ស្នាដៃនេះ មានដូចជា មេដាយ ឯកសារពាក់ព័ន្ធនឹងប្រវត្តិរូប និងរូបថត នៃស៊ីហ្គេមទាំង 2លើកនេះ។ ឯកឧត្តម បន្ថែមថា នេះគឺជាតម្លៃដ៏ថ្លៃថ្លាណាស់ ដែលបានកើតចេញពីការខិតខំប្រឹងប្រែងរបស់កីឡាករ កីឡាការិនី គ្រូបង្វឹក ដែលស្នាដៃនេះនឹងមិនត្រឹមតែតម្កល់ទុកក្នុងមជ្ឈមណ្ឌលវប្បធម៌កីឡាកម្ពុជានៃក្រសួងអប់រំ យុវជន និងកីឡាប៉ុណ្ណោះទេ ប៉ុន្តែទៅថ្ងៃខាងមុខ អាចនឹងតម្កល់ទុកជាស្នាដៃនៅតាមស្ថាប័នរាជរដ្ឋាភិបាលទៀតផង។

សូមបញ្ជាក់ថា មេដាយស៊ីហ្គេម 2ជំនាន់នេះ គឺស៊ីហ្គេម2017 នៅម៉ាឡេស៊ី មានចំនួន 4គ្រឿង ក្នុងនោះមានមេដាយមាស1 ដណ្តើមបានដោយកីឡាករ ឃុន ឌីម៉ា, ប្រាក់ 1គ្រឿង ដណ្តើមបានដោយកីឡាករ ម៉ឺន សុភា និងសំរឹទ្ធ 2គ្រឿង។ ចំពោះស៊ីហ្គេម លើកទី30 នៅហ្វ៊ីលីពីន ឆ្នាំ2019 ដណ្តើមបានសំរឹទ្ធ 3គ្រឿង និងកីឡាប្រដាល់ឃីកបុកស៊ីង (Kick-Boxing) ដណ្តើមបានមេដាយសំរឹទ្ធ 3គ្រឿងដែរ៕

June 8, 2020

ជប៉ុនផ្តល់ហិរញ្ញប្បទានឥតសំណង 41លានដុល្លារ ដល់កម្ពុជា

ជាការឆ្លើយតបនឹងសំណើរបស់រាជរដ្ឋាភិបាលកម្ពុជា និងក្នុងទស្សនៈពង្រឹងទំនាក់ទំនងមិត្តភាព និងសហប្រតិបត្តិការរវាងជប៉ុន និងកម្ពុជា រដ្ឋាភិបាលជប៉ុនបានសម្រេចផ្តល់ជំនួយឥតសំណង ODA ក្នុងទឹកប្រាក់ចំនួន 4,501លានយ៉េន ដែលស្មើប្រមាណជា 41លានដុល្លារសហរដ្ឋអាមេរិក សម្រាប់គម្រោង3 ដល់ប្រទេសកម្ពុជា។

លិខិតប្តូរសារផ្តល់ហិរញ្ញប្បទានឥតសំណងសម្រាប់គម្រោងចំនួន3 ខាងលើនេះ ត្រូវបានចុះហត្ថលេខាដោយឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងឯកឧត្តម មិកាមិ ម៉ាសាហ៊ីរ៉ូ ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុនប្រចាំព្រះរាជាណាចក្រកម្ពុជាកាលពីថ្ងៃទី5 ខែមិថុនា ឆ្នាំ2020 នៅទីស្តីការក្រសួងការបរទេស និងសហប្រតិបត្តិការអន្តរជាតិ។

គម្រោងទាំង 3នេះ ផ្តោតទៅលើ ទី1 គម្រោងធ្វើឱ្យប្រសើរឡើងនៃមន្ទីរពេទ្យបង្អែកក្នុងខេត្តសៀមរាប ដែលនឹងត្រូវចំណាយទឹកប្រាក់ប្រមាណជា 2,153លានយ៉េន។ ទី2 គម្រោងកម្មវិធីអាហារូបករណ៍អភិវឌ្ឍន៍ធនធានមនុស្សដែលនឹងត្រូវចំណាយទឹកប្រាក់អស់ប្រមាណ 348លានយ៉េន និងទី3 គម្រោងកម្មវិធីអភិវឌ្ឍន៍សេដ្ឋកិច្ច និងសង្គម ដែលនឹងត្រូវចំណាយទឹកប្រាក់អស់ប្រមាណ 2,000 លានយ៉េន។

គម្រោងនេះនឹងធ្វើការកែលម្អអគារ និងសម្ភារបរិក្ខារ នៃមន្ទីរពេទ្យបង្អែកខេត្តសៀមរាប និង មន្ទីរពេទ្យបង្អែកស្រុកចំនួន4 នៅក្នុងខេត្ត ក្នុងគោលដៅបង្កើនចំនួនវះកាត់ប្រចាំឆ្នាំ នៅមន្ទីរពេទ្យខេត្តសៀមរាប ពីចំនួន 3,306 ក្នុងឆ្នាំ2018 ដល់ 4,732 ក្នុងឆ្នាំ2026 ជាឆ្នាំដែលគម្រោងនឹងត្រូវបានបញ្ចប់រយៈពេល 3ឆ្នាំ។ គម្រោងនេះត្រូវបានរំពឹងថា នឹងពង្រឹងប្រព័ន្ធសុខាភិបាល និងធ្វើឱ្យប្រសើរឡើងនូវការទទួលបានសេវាសុខាភិបាល និងសុខភាពជាមូលដ្ឋាននៅក្នុងខេត្តសៀមរាប។

សូមបញ្ជាក់ថា មន្ទីរពេទ្យខេត្តសៀមរាប ជាមន្ទីរពេទ្យមូលដ្ឋានមួយ នៅភាគខាងជើងនៃប្រទេសកម្ពុជាដែលទទួលអ្នកជំងឺជាច្រើន ជាពិសេសអ្នកជម្ងឺដោយសារគ្រោះថ្នាក់ចរាចរណ៍ដែលមកពីខេត្តសៀមរាបផ្ទាល់ និងបណ្តាខេត្តជុំវិញនានា។

លើសពីនេះ ដោយសារកង្វះខាតឧបករណ៍បរិក្ខារ និងធនធានមនុស្សនៅតាមមណ្ឌលសុខភាពក្នុងតំបន់ក្នុងខេត្តសៀមរាប បណ្តាលឱ្យអ្នកជំងឺដែលគួរតែទទួលការព្យាបាលនៅតាមមណ្ឌលសុខភាពទាំងនោះ ត្រូវមកទទួលការព្យាបាលនៅមន្ទីរពេទ្យខេត្ត ដែលជាលទ្ធផលធ្វើឱ្យមានចំនួនអ្នកជំងឺច្រើនលើសលប់ ហើយភាពចាស់ទ្រុឌទ្រោមនៃសំណង់អគារ ដែលបានសាងសង់ក្នុងទសវត្សរ៍ឆ្នាំ1970 និងកង្វះខាតឧបករណ៍បរិក្ខារ ធ្វើឱ្យមន្ទីរពេទ្យមិនអាចផ្តល់សេវាវេជ្ជសាស្ត្របានគ្រប់គ្រាន់។

នៅប្រទេសកម្ពុជា ធនធានមនុស្សដែលមានទេពកោសល្យជាច្រើន ត្រូវបានបាត់បង់ដោយសារសង្គ្រាមស៊ីវិល ដែលបានបន្តអស់រយៈពេលប្រមាណជាង 20ឆ្នាំ ចាប់តាំងពីទសវត្សរ៍ឆ្នាំ1970 និងដោយសារតែកង្វះខាតនៃគ្រឹះស្ថានឧត្តមសិក្សា ការអភិវឌ្ឍធនធានមនុស្សដែលមានគុណភាព ខ្ពស់ គឺជាបញ្ហាបន្ទាន់ និងសំខាន់ដែលត្រូវដោះស្រាយ។

ដូច្នេះហើយ ទើបប្រទេសជប៉ុន បាននិងកំពុងគាំទ្រដល់ប្រទេសកម្ពុជាក្នុងការពង្រឹងហេដ្ឋារចនាសម្ព័ន្ធសេដ្ឋកិច្ច និងសង្គមរបស់ខ្លួនបន្ថែមទៀត ហើយជាផ្នែកនៃកិច្ចសហប្រតិបត្តិការនេះ ជប៉ុនបាននិងកំពុងជួយបណ្តុះបណ្តាលមន្ត្រីវ័យក្មេងរបស់ប្រទេសកម្ពុជា ឱ្យទទួលបានសញ្ញាបត្រ អនុបណ្ឌិត បណ្ឌិត ពីគ្រឹះស្ថានក្រោយឧត្តមសិក្សានៅប្រទេសជប៉ុន។

តាមរយៈកិច្ចសហប្រតិបត្តិការនេះ មន្ត្រីវ័យក្មេងកម្ពុជាចំនួន 26នាក់ នឹងអាចទៅសិក្សានៅ សាកលវិទ្យាល័យនានាក្នុងប្រទេសជប៉ុន។ យើងរំពឹងថា ធនធានមនុស្សក្រោមកិច្ចសហប្រតិបត្តិការនេះ នឹងចូលរួមចំណែកអភិវឌ្ឍប្រទេសកម្ពុជានាពេលអនាគតលើវិស័យនីមួយៗ ហើយក៏ជាការយោគយល់គ្នាទៅវិញទៅមក និងការកសាងទំនាក់ទំនងមិត្តភាពរវាងជប៉ុន និងកម្ពុជាផងដែរ។

នៅក្នុងពិភពសកលភាវូបនីយកម្មនាពេលបច្ចុប្បន្ននេះ ការរីករាលដាលនៃវីរុសកូវីដ-19 គឺជាការគំរាមកំហែងដ៏ធំធេងដល់សេដ្ឋកិច្ច និងសង្គមនៃប្រទេសទាំងអស់ រួមទាំងប្រទេសជប៉ុនផងដែរ។ សហគមន៍អន្តរជាតិទាំងមូលត្រូវតែធ្វើការរួមគ្នាប្រឆាំងនឹងវីរុសកូវីដ-19។ ខណៈពេលដែលរាជរដ្ឋាភិបាលកម្ពុជាកំពុងគ្រប់គ្រងស្ថានការណ៍លំបាកនៅក្នុងប្រទេស ដែលវីរុសកូវីដ-19 អាចមានលទ្ធភាពចាប់ផ្តើមរីករាលដាលជាថ្មីម្តងទៀតក្នុងប្រទេស និងតំបន់ដោយសារតែប្រព័ន្ធសុខាភិបាលនៅមានកម្រិត។ ដើម្បីឆ្លើយតបនឹងវិបត្តិនេះ ការពង្រឹងប្រព័ន្ធសុខាភិបាល ដើម្បីទប់ទល់នឹងជំងឺឆ្លងពិតជាមានសារៈសំខាន់ខ្លាំងណាស់៕

June 8, 2020

អ្នកក្រុងហុងកុងសម្រុកទៅរង់ចាំទិញផ្ទះ បើទោះនយោបាយនិងសេដ្ឋកិច្ចកំពុងជួបបញ្ហា

ផ្ទះចំនួន93ល្វែងដែលស្ថិតក្នុងគម្រោងមួយរបស់ក្រុមហ៊ុនអចលនទ្រព្យ China Vanke ត្រូវបានលក់ដាច់អស់គ្មានសល់ ដោយប្រើពេលត្រឹមតែ 8ម៉ោងប៉ុណ្ណោះ ដែលនេះបានជួយឱ្យក្រុមហ៊ុនរកបានប្រាក់ 880លានដុល្លារហុងកុងដោយមិនបាច់ហត់យូរ។

ច្បាប់សន្តិសុខហុងកុងដែលទើបត្រូវបានបង្កើតឡើងដោយទីក្រុងប៉េកាំង គំរាមកំហែងខ្លាំងដល់ “តំណែង” ជាមជ្ឈមណ្ឌលហិរញ្ញវត្ថុពិភពលោករបស់ទីក្រុងហុងកុង ក៏ប៉ុន្តែ វាហាក់មិនមានឥទ្ធិពលច្រើនទៅលើទីផ្សារអចលនទ្រព្យលំដាប់ថ្លៃបំផុតនេះទេ។ កាលពីសប្ដាហ៍មុន មនុស្សរាប់សិបនាក់បានមកតម្រង់ជួររង់ចាំដេញថ្លៃទិញផ្ទះចំនួន94ល្វែងនៅក្នុងគម្រោង The Campton នៅក្នុងមជ្ឈមណ្ឌល Kowloon។

ក្រុមហ៊ុន China Vanke បានឱ្យដឹងថា ផ្ទះចំនួន94ខាងលើ ត្រូវបានលក់ក្នុងតម្លៃចាប់ពី 6.8លានដុល្លារហុងកុង (872.400 USD) សម្រាប់ល្វែងដែលមានបន្ទប់គេងចំនួនមួយ។ ផ្ទះល្វែងចំនួន93ខ្នងត្រូវបានលក់អស់ក្នុងរយៈពេល8ម៉ោង ដែលនេះបានជួយឱ្យក្រុមហ៊ុន China Vanke រកបានប្រាក់ 880លានដុល្លារហុងកុង (113,546,570 USD)។

អ្នកស្រី Li ដែលជាអតិថិជនម្នាក់របស់ក្រុមហ៊ុន China Vanke បានឱ្យដឹងថា “នៅពេលដែលប្រព័ន្ធនយោបាយ និងសេដ្ឋកិច្ចជួបអស្ថិរភាព ប្រាក់សុទ្ធនឹងបាត់បង់តម្លៃយ៉ាងលឿន។ ខ្ញុំចង់យកប្រាក់ទៅទិញផ្ទះដើម្បីការពារតម្លៃរបស់វា”។

នៅពេលគេមើលមួយក្រឡេក គេនឹងឃើញថា បច្ចុប្បន្នមិនមែនជាពេលល្អបំផុតសម្រាប់ទិញអចលនទ្រព្យនៅហុងកុងនោះទេ។ អនាគតរបស់ហុងកុងកំពុងចាប់ផ្ដើមអាប់អួដោយស្រមោលនៃច្បាប់សន្តិសុខហុងកុងរបស់ទីក្រុងប៉េកាំង ដែលនាំឱ្យសហរដ្ឋអាមេរិកគំរាមដកហូតអាទិភាពពិសេសរបស់ទីក្រុងនេះ។

ច្បាប់សន្តិសុខហុងកុងក៏បានធ្វើឱ្យមានការព្រួយបារម្ភចំពោះទុនវិនិយោគដែលនឹងអាច “រត់ចោល” ហុងកុង ផងដែរ បណ្ដាលឱ្យមានបាតុកម្មជាច្រើនកើតឡើង និងបង្កើនអស្ថិរភាពក្នុងតំបន់សេដ្ឋកិច្ច “យក្ស” មួយនេះ។ GDP របស់ហុងកុងត្រូវបានព្យាករថានឹងធ្លាក់ចុះដល់ទៅ7% ក្នុងឆ្នាំ2020នេះ។

បើទោះជាយ៉ាងណាក៏ដោយ សម្រាប់មនុស្សមួយចំនួនយល់ថា អស្ថិរភាពសេដ្ឋកិច្ច និងនយោបាយ បានធ្វើឱ្យអចលនទ្រព្យក្លាយជារបស់ផ្សងព្រេងដែលមានសុវត្ថិភាពជាងទ្រព្យដទៃ។ កាលពីខែមុន Sun Hung Kai Properties លក់បាន 97% ក្នុងចំណោមផ្ទះចំនួន298ល្វែង ប្រមូលបានប្រាក់2ពាន់លានដុល្លារហុងកុង (258,060,386 USD) ក្នុងរយៈពេលតែមួយថ្ងៃ។

Prospective buyers waiting in line outside the sales office for the Campton residential project by China Vanke in Hong Kong, on June 2, 2020

អ្នកស្រី Li វ័យ40ឆ្នាំ ជឿជាក់ថា ទីផ្សារអចលនទ្រព្យអាចទប់ទល់នឹងឱនភាពនៃសេដ្ឋកិច្ច ដោយសារតែគិតថា “ដីមិនកើន តែមនុស្សកើន”។ អ្នកស្រីបន្តថា “ហុងកុងតូចណស់។ បើប្រៀបធៀបតម្លៃផ្ទះកាលពី20ឆ្នាំមុន និងពេលនេះ លោកនឹងឃើញថា អចលនទ្រព្យដែលបានទិញកាលណោះ កំពុងតែនាំមកនូវចំណេញយ៉ាងសម្បើម”។

អ្នកស្រី Li និយាយមិនខុសទេ។ ទិន្នន័យរបស់ក្រុមហ៊ុន Centaline Property Agency បានបង្ហាញថា តម្លៃអចលនទ្រព្យនៅហុងកុងបានកើនឡើង230% ចាប់ពីឆ្នាំ2000មកនេះ។ ប្រការនេះបានធ្វើឱ្យពលរដ្ឋហុងកុងកាន់តែជឿជាក់ទៅលើការយល់ឃើញរបស់ពួកគេដែលថា “អចលនទ្រព្យតែងតែជាទ្រព្យសុវត្ថិភាព”។

ទោះបីជាសេដ្ឋកិច្ចកំពុងមានឱនភាព ប៉ុន្តែតម្លៃផ្ទះនៅទីក្រុងហុងកុងបែរជាឡើងថ្លៃ1.2% ក្នុងឆ្នាំនេះ ហើយបច្ចុប្បន្នវាបានឡើងដល់ចំណុចកំពូលរាប់ចាប់ពីខែវិច្ឆិកា ឆ្នាំ2019។

ក្នុងពេលដែលតម្លៃ និងចំនួនផ្ទះនៅក្នុងបណ្ដាទីផ្សារពិភពលោក ដូចជាទីក្រុងឡុងដ៍ ឬសិង្ហបុរីជាដើម កំពុងតែដាំក្បាលចុះ ទីក្រុងហុងកុងឯណោះបែរជាងើបក្បាលឡើង ដោយមានការជួញដូរចំនួន 6,885លើកត្រូវបានធ្វើឡើងក្នុងខែឧសភាកន្លងទៅ។ នេះគឺជាតួលេខខ្ពស់បំផុតក្នុងអំឡុង12ខែមកនេះ។

របាយការណ៍មួយរបស់ Morgan Stanley កាលពីថ្ងៃទី26ឧសភា បានព្យាករថា ក្នុងរយៈពេលវែង ប្រភពផ្គត់ផ្គង់មានកំណត់ និងតម្រូវការខ្ពស់ដោយសារតែអត្រាមានផ្ទះនៅទាបនៅឡើយ រួមនឹងការប្រាក់ជិតស្មើនឹង0% នឹងជំរុញឱ្យទីផ្សារអចលនទ្រព្យនៅហុងកុងកាន់តែងើបឡើងខ្ពស់។

យ៉ាងណាក៏ដោយ ទីផ្សារអចលនទ្រព្យមិនមែនមិនមានហានិភ័យនោះទេ។ ក្រុមហ៊ុននានាកំពុងតែផ្អាកដំណើរការ។ អត្រាបាត់បង់ការងារក៏កំពុងស្ថិតនៅក្នុងកម្រិតខ្ពស់បំផុត ហើយបើទោះចំនួនការងារដែលបានបាត់បង់ភាគច្រើនជាការងារលំដាប់ទាប ដូចជាវិស័យលក់រាយ ឬសេវាអាហារជាដើម ប៉ុន្តែវាជះឥទ្ធិពលរាលដាលដល់ការងារលំដាប់ខ្ពស់ផងដែរ ដែលប្រការនេះក៏នឹងមានផលប៉ះពាល់ដល់លទ្ធភាពនៃការបង់រំលស់ទ្រព្យរបស់អ្នកទិញ។ Simon Smith ដែលជាប្រធានផ្នែកស្រាវជ្រាវទីផ្សារនិងប្រឹក្សាយោបល់របស់ក្រុមហ៊ុន Savills បានព្យាករថា តម្លៃផ្ទះនៅហុងកុងនឹងធ្លាក់ចុះ5% ក្នុងឆ្នាំនេះ៕

ប្រភព៖ Bloomberg

June 8, 2020

តើការលេងអាចអភិវឌ្ឍខួរក្បាលរបស់កូនតូចបានមែនឬ?

មែនឬដែលមានអ្នកនិយាយថា ក្មេងតូចដែលបានទទួលការគាំទ្រឱ្យលេងនឹងឆ្លាត ហើយពូកែជាងក្មេងដែលត្រូវបានហាម និងមិនបានទទួលការជំរុញឱ្យលេង។ ក្មេង និងការលេងគឺជារឿងគូគ្នាតាមធម្មជាតិ ដូច្នេះហើយទើបកើតមានចម្ងល់មួយពីអាណាព្យាបាល ឬឪពុកម្តាយថា តើការលេងអាចអភិវឌ្ឍខួរក្បាលរបស់កូនតូចបានមែនឬ?។

តាមពិតទៅ ក្មេងចម្រើនធំធាត់ឡើងមកព្រមជាមួយវិវឌ្ឍនាការដែលពាក់ព័ន្ធនឹងការលេង នោះគឺ ក្មេងអាចលេងបានដោយមិនចាំបាច់មានអ្នកណាបង្រៀនឡើយ បើសង្កេតមើលឱ្យច្បាស់នឹងបានដឹងថា ក្មេងអាចលេងរបស់លេងដែលដាក់នៅចំពីមុខគេដោយឯកឯង ដោយមិនចាំបាច់មានអ្នកណាប្រាប់ ឬចង្អុលណែនាំពីវិធីការលេងនោះទេ ហើយក្មេងម្នាក់ៗមានវិធីការលេងរបស់លេងខុសផ្លែកពីគ្នា។

មានភស្តុតាងអះអាងបញ្ជាក់ថា ការលេងមានចំណែកសំខាន់យ៉ាងខ្លាំងក្នុងការផ្លាស់ប្តូរគ្រោងសាងរបស់ខួរក្បាល ដោយការលេងនឹងជំរុញឱ្យមានការកើនឡើងរបស់ការបញ្ជូនសញ្ញាប្រសាទ និងបង្កើនការទំនាក់ទំនងការងាររវាងគ្នានិងគ្នារបស់កោសិកាខួរក្បាល។ ការផ្លាស់ប្តូរនេះបានទទួលការអះអាងពីច្រើនស្ថាប័ន និងតាមរយៈការសិក្សាស្រាវជ្រាវនៅលើសត្វពិសោធន៍ក៏បានរកឃើញដែរថា ខួរក្បាលរបស់សត្វដែលត្រូវបានជំរុញឱ្យមានកិច្ចការលេងដូចគ្នានេះកើតការបង្កើនការបញ្ជូនសញ្ញាប្រសាទរវាងកោសិកាខួរក្បាលច្រើនជាងសត្វដែលមិនបានមានកិច្ចការលេងដល់ទៅ 25%ឯណោះ ក្រៅពីនោះនៅបានរកឃើញទៀតថា សត្វដែលមិនសូវមានកិច្ចការលេងឬមិនត្រូវបានជំរុញនោះ កោសិកាខួរក្បាលធំនឹងរួញតូច។ លោកវេជ្ជបណ្ឌិតជំនាញការនៃមហាវិទ្យាល័យស៊ែនឌីអេហ្គោ បានរាយការណ៍ថា កោសិកាខួរក្បាលរបស់ក្មេងអាយុ 3 ឆ្នាំដំបូងដែលចម្រើនធំធាត់ឡើងក្នុងសភាពជុំវិញខ្លួនដែលមានភាពរស់រវើក មានការលេង និងការជំរុញយ៉ាងល្អប្រសើរនោះ នឹងមានការកើនឡើងរបស់ការបញ្ជូនសញ្ញាប្រសាទ ឬរលកចរន្តអគ្គិសនីក្នុងខួរក្បាល និងការតភ្ជាប់គ្នារវាងកោសិកាប្រសាទ។ ការកើនឡើងក្នុងផ្នែកនេះ ហុចផលសំខាន់ដល់វិវឌ្ឍនាការរបស់ខួរក្បាល ជាពិសេសបំផុតក្នុងរឿងរបស់ភាពឆ្លាតវៃ។

ទាំងអស់នេះ ការលេងអាចជួយអភិវឌ្ឍ និងសាងការគិតស្រមៃ និងគំនិតច្នៃបង្កើតឱ្យកើតឡើងនៅក្នុងខ្លួនក្មេងបាន ដែលប្រយោជន៍របស់ការលេងនេះមានភាពសំខាន់ដល់ការអភិវឌ្ឍន៍ និងបង្កើនកម្រឹតការគិត និងសតិប្រាជ្ញាទៀតផង។ ការលេងនៅបានជួយបង្កើនឱ្យកុមារស្គាល់ពីរបៀបវិន័យ និងកតិការបស់ការលេង ហ្វឹកហាត់ឱ្យក្លាយជាមនុស្សមានវិន័យ រួមទាំងហ្វឹកហាត់ក្នុងរឿង ការចងចាំ ជំនាញ និងភាពវាងវៃ ជាពិសេសការលេងនេះជួយបង្កើនការប្រើប្រាស់ប្រព័ន្ធប្រសាទប៉ះពាល់ទាំង 5 ទៀតផង។

ការលេងប្រភេទខ្លះថែមទាំងបានជួយជម្រុញវិវឌ្ឍនាការខាងរាងកាយ ដែលមានដូចជា វិវឌ្ឍនាការខាងផ្នែកសាច់ដុំ ធ្វើឱ្យក្មេងមានសុខភាពល្អ និងជួយបង្កើនជំនាញខាងផ្នែកភាសា និងសង្គមទៀតផង។

ដូច្នេះទើបការលេងអាចរាប់បានថាមានប្រយោជន៍យ៉ាងខ្លាំងចំពោះកុមារ និងគួរផ្តល់នូវការគាំទ្រ និងជាពិសេសអាណាព្យាបាលគួរមានការជ្រើសរើសប្រភេទនៃការលេងឱ្យបានស័ក្តិសមទៅតាមវ័យរបស់កូន និងកុំភ្លេចពីរឿងសុវត្ថិភាពផង៕

June 8, 2020

ចិនចាប់ផ្ដើមសាងសង់ស្ពានឆ្លងសមុទ្រប្រវែង31គីឡូម៉ែត្រ (វីដេអូ)

ស្ពានឆ្លងសមុទ្រ Huangmao (Huangmao Sea Bridge) ដែលមាន6ជួរសម្រាប់ធ្វើដំណើរទៅ-មក តភ្ជាប់ពីទីក្រុង Zhuhai ទៅកាន់ទីក្រុង Jiangmen ត្រូវបានចាប់ផ្ដើមសាងសង់ពីថ្ងៃទី6មិថុនា ឆ្នាំ2020។

សារព័ត៌មាន CGTN (China Global Television Network) បានឱ្យដឹងថា ស្ពាននេះមានចំណុចចាប់ផ្ដើមពីតំបន់សេដ្ឋកិច្ចកំពង់ផែ Gaolan (Gaolan Port Economic Zone/GPEZ) នៃទីក្រុង Zhuhai និងបញ្ចប់នៅក្នុងទីរួមស្រុក Doushan នៃទីក្រុង Taishan។

ស្ពានឆ្លងសមុទ្រ Huangmao នេះ មានប្រវែងប្រមាណជា31គីឡូម៉ែត្រ និងប្រើប្រាស់ស្ដង់ដាផ្លូវល្បឿនលឿនដែលមាន6ជួរសម្រាប់ធ្វើដំណើរទៅនិងមក ជាមួយនឹងការកំណត់ល្បឿនត្រឹម100គីឡូម៉ែត្រ/ម៉ោង។

Huangmao គឺជាស្ពានឆ្លងសមុទ្រថ្មី បន្ទាប់ពីស្ពាន Hong Kong-Zhuhai-Macao និងស្ពាន Shenzhen-Zhongshan នៅក្នុងតំបន់ឈូងសមុទ្រ Greater Bay។

តាមផែនការ គម្រោងសាងសង់ស្ពានឆ្លងសមុទ្រ Huangmao នេះ នឹងត្រូវបានបញ្ចប់ជាស្ថាពរនៅក្នុងឆ្នាំ2024៕

ប្រភព៖ CGTN

June 8, 2020

រៀបការពេលអាយុ 28 – 32 ឆ្នាំ ជីវិតគូនឹងស្ថិតស្ថេរយូរអង្វែង

អ្នកសង្គមវិទ្យា នែមហាវិទ្យាល័យ យូថាហ៍ សហរដ្ឋអាមេរិក បានបង្ហាញពីលទ្ធផលនៃការសិក្សាស្រាវជ្រាវមួយដែលបានរកឃើញថា ក្នុងអំឡុងអាយុចន្លោះពី 28 – 32 ឆ្នាំ គឺជាវ័យដែលស័ក្តិសមសម្រាប់ការរៀបអាពាហ៍ពិពាហ៍ខ្លាំងបំផុត ព្រោះជាអំឡុងវ័យដែលស្គាល់ពីអារម្មណ៍របស់ខ្លួនឯង រកឃើញដំណើរជីវិត និងមានភាពទទួលខុសត្រូវក្នុងកម្រឹតមួយហើយ។ ការស្រាវជ្រាវបានរកឃើញផងដែរថា អ្នកដែលរៀបការក្រោយអាយុ 32 ឆ្នាំ មានអត្រាការលែងលះកើនឡើង ខណៈដែលគូស្នេហ៍វ័យជំទង់អាយុ 15 – 19ឆ្នាំ លែងលះគ្នាច្រើនបំផុត។

វេបសាយទស្សនាវដ្តី ថាម បានរាយការណ៍ពីលទ្ធផលនៃការសិក្សាស្រាវជ្រាវរបស់ និគ វូហ្វ៊ីងហ្គើរ៍ អ្នកសង្គមវិទ្យាដែលបានរកឃើញថា អំឡុងអាយុដែលស័ក្តិសមសម្រាប់ការចាប់ផ្តើមជីវិតគូនោះគឺ 28 – 32 ឆ្នាំ ដោយអ្នកស្រាវជ្រាវបាននាំយកព័ត៌មានការពិនិត្យពីសភាវគ្រួសារជនជាតិអាមេរិកក្នុងចន្លោះឆ្នាំ 2006 – 2010 និង 2011 – 2015 មកវិភាគ និងរកឃើញថា គូអាពាហ៍ពិពាហ៍ដែលស្ថិតក្នុងវ័យនេះមានអត្រាការលែងលះទាបជាងអ្នកដែលរៀបការក្នុងវ័យផ្សេងទៀត ជាពិសេសក្នុងអំឡុងពេល 5 ឆ្នាំក្រោយពេលរៀបការមានអត្រាការចែកផ្លូវគ្នាតិចបំផុត។

វូហ្វ៊ីងហ្គើរ៍បានអធិប្បាយថា ហេតុផលដែលមនុស្សវ័យ 28 – 32 ឆ្នាំស័ក្តិសមល្អក្នុងការរៀបការនោះមានច្រើនចំណុចដូចជាៈ

– មនុស្សវ័យនេះធំគ្រប់គ្រាន់ក្នុងការដឹងទាន់ពីអារម្មណ៍របស់ខ្លួនឯងថា តើខ្លួនចូលចុះជាមួយដៃគូបានមែន ឬគ្រាន់តែជាអារម្មណ៍រំជើបរំជួលរបស់អ័រម៉ូន?។

– រូបគេ ឬនាងបានជ្រើសរើសដំណើរផ្លូវជីវិតដែលខ្លួនឯងត្រូវការហើយ និងចាប់ផ្តើមមានភាពទទួលខុសត្រូវចំពោះរឿងផ្សេងៗហើយ។

– មានស្ថិរភាពខាងហិរញ្ញវត្ថុបានមួយកម្រឹតហើយ។

– នៅមិនទាន់ចាស់ជ្រុលក្នុងការសម្របសម្រួលខ្លួន កែសម្រួលនិស្ស័យ ឡៃហ្វ៍ស្តាយល៍ ជីវិតរស់នៅប្រចាំថ្ងៃ -ល- ឱ្យចូលគ្នាជាមួយដៃគូឡើយ ដែលនេះគឺជារឿងសំខាន់ណាស់ក្នុងការមានជីវិតគូ។

“អ្នកខ្លះអាចហៅការសិក្សាស្រាវជ្រាវនេះថាជា “ទ្រឹស្តីមាសរបស់ការរៀបការ” ដែលគូរអាពាហ៍ពិពាហ៍ត្រូវតែមិនក្មេង ឬចាស់ជ្រុលពេក ក្រៅពីនេះនៅមានហេតុផលជាច្រើនទៀតដែលគាំទ្រថា ក្នុងអំឡុងអាយុ 20 ឆ្នាំក្រាស់ និង 30 ឆ្នាំស្តើង គឺជាអំឡុងពេលដ៏ល្អក្នុងការចាប់ផ្តើមជីវិតអាពាហ៍ពិពាហ៍ជាមួយនរណាម្នាក់នោះ” អ្នកសង្គមវិទ្យាពីមហាវិទ្យាល័យ យូថា អះអាង។

វូហ្វីងហ្គើរ៍ បានបន្ថែមទៀតថា គូអាពាហ៍ពិពាហ៍ដែលទទួលជោគជ័យក្នុងជីវិតគូ ភាគច្រើនៗតែជាគូដែលស្គាល់ពីនិស្ស័យចិត្តថ្លើមគ្នា។

ការរៀបអាពាហ៍ពិពាហ៍ក្នុងអំឡុងវ័យ 15 – 19 ឆ្នាំ នឹងធ្វើឱ្យកើតមានការលែងលះច្រើនបំផុត បន្ទាប់មកគឺក្នុងអំឡុងវ័យ 20 – 24 ឆ្នាំ 28 – 32 ឆ្នាំ តាមលំដាប់ ក្រៅពីនេះ មានបច្ច័យជាច្រើនទៀតដែលអ្នកសង្គមវិទ្យាជឿថា នឹងជួយឱ្យជីវិតគូស្ថិតស្ថេរយូអង្វែងនោះ មានដូចជា ស្ថិរភាពខាងផ្នែកហិរញ្ញវត្ថុ ការសិក្សាដែលល្អ ការរៀបការមុនមានបុត្រ-ល- សុទ្ធតែមានចំណែកធ្វើឱ្យគូអាពាហ៍ពិពាហ៍មានជីវិតប្រកបដោយសុភមង្គល និងគង់វង្សស្ថិតស្ថេរយូរអង្វែងបានទាំងអស់៕

June 8, 2020

ខេមរៈ សិរីមន្ត ចាប់ផ្ដើមមមាញឹកជាមួយមុខរបរថ្មី ក្រៅអាជីពសិល្បៈ

តារាចម្រៀងប្រុសដ៏ល្បីក្នុងប្រទេសកម្ពុជា លោក ខេមរៈ សិរីមន្ត បានទទួលការគាំទ្រខ្លាំង រហូតដល់សព្វថ្ងៃ ដោយសារតែទេពកោសល្យសិល្បៈ ជាពិសេសទឹកដមសំឡេងដ៏ពិរោះរបស់លោកតែម្ដង ដែលត្រូវចិត្តមហាជនជាច្រើន។ ក្រៅពីការងារសិល្បៈ តារាប្រុសសាច់ដុំធំៗរូបនេះ ក៏មានជំនួញក្នុងដៃជាច្រើនផងដែរ។ ថ្មីៗនេះ បើទោះបីជាស្ថិតក្នុងស្ថានភាពរដូវកាលកូវីដ19 តារាចម្រៀងប្រុសរូបនេះ មិនមានការមមាញឹកនឹងសិល្បៈឡើយ ទើបធ្វើឱ្យមានពេលទំនេរក្នុងការបង្កើតមុខរបរថ្មីមួយទៀត។

ខេមរៈ សិរីមន្ត បានចាប់ផ្ដើមបើកហាងលក់សម្លៀកបំពាក់ ដែលនាំចូលពីប្រទេសក្រៅ ជាម៉ូដសម្លៀកបំពាក់បែបយុវវ័យ។ ដើម្បីទាក់ចិត្តមហាជនអ្នកគាំទ្រ និងជួយប្រូម៉ូតហាងលក់សម្លៀកបំពាក់មួយផងដែរ លោកបានធ្វើការឡាយច្រៀងផ្ទាល់ជាមួយអ្នកគាំទ្រ តាមរយៈការសំណូមពរបទចម្រៀង ដោយលើកយកបទចាស់ៗពិរោះៗចំនួនពីរបទ គឺបទ៖ «អន្ទងស្នែហ៍» និង «ធុញបងមែនទេ» ច្រៀងប្រគំជាមួយហ្គីតាសាំប៉ុណ្ណោះ ឃើញថាពិតជាពិរោះខ្លាំងមែនទែន ។

តាមរយៈការច្រៀងគោកដ៏កម្រនេះផងដែរ លោក ខេមរៈ សិរីមន្ត ក៏បាននិយាយថា លោកពុំធ្លាប់ដែលច្រៀងគោករបៀបនេះទេ ប៉ុន្តែ វាស្ទៃល៍ប្លែកថ្មីមួយសម្រាប់ថ្ងៃនេះ ដោយសារតែមានការជំរុញកម្លាំងចិត្តបងប្អូនទាំងអស់គ្នា៕

https://youtu.be/G1kVFm92m3A

June 8, 2020

តារាវ័យក្មេង4 ដួង ត្រៀមបង្ហាញមុខក្នុង MVបទចម្រៀង « អំពើល្អ »

នៅថ្ងៃទី8 មិថុនា ឆ្នាំ 2020 ខាងមុខនេះ បទចម្រៀង« អំពើល្អ » នឹងធ្វើការចេញថត MV ជាទ្រង់ទ្រាយធំរបស់ខ្លួនជាផ្លូវការ ដែលបទនេះផ្ទាល់គឺរួមសហការណ៍ផលិតដោយក្រុមហ៊ុន អាំណាតមេឌា ជាដៃគូរផ្ទាល់ជាមួយគ្រួសារតារាកម្ពុជា ដែលជាក្រុមហ៊ុនផលិតស្ពតពានិជ្ជកម្មធំមួយនៅក្នុងប្រទេសកម្ពុជា។ យ៉ាងណាក៏ដោយបទចម្រៀងនេះនឹងចូលរួមសម្ដែងដោយតារាសិល្បៈករសិល្បៈការិនីចាស់ក្មេងប្រមាណ 50រូប ក្នុងនោះគេកត់សម្គាល់ឃើញតារាយុវវ័យកំពុងទទួលបានការចាប់អារម្មណ៍ក្នុងអាជីបសម្ដែង4រូបក៏លេចវត្តមានក្នុង MV បទនេះផងដែរ។

តួអង្គបួនរូបដែលជ្រើសឱ្យសម្ដែងជាតួអង្គសំខាន់នៅក្នុងបទនេះ គេសង្កេតឃើញរួមមាន កញ្ញា អាង សុជាតា ( ហៅឈូឈូ ) ដែលកញ្ញាគឺជាតារាវ័ក្មេង មួយរូបកំពុងតែក្ដោបបានទីផ្សាសិល្បៈនាពេលចុង្រោយនេះ កញ្ញាត្រូវបានគេស្គាល់ថាកូនបង្កើតរបស់តារាសម្ដែងជើងចាស់អ្នកនាង សឿន ផាភួង ។ កញ្ញា ដាវណ្ណ ជេន្នី និងប្អូនប្រុសរបស់នាងគឺ ដាវណ្ណ រីគី ដែលជាកូនប្រុសស្រីរបស់តួអង្គម្ដាយគឺអ្នកស្រី រ៉េត រ៉ូស អ្នកទាំងពីគឺជត្រូវបានគេស្គាល់ថាបានចូលប្រឡូកក្នុងវិស័យសម្ដែងតាំងតែពីកុមារភាព មិនតែប៉ុណ្ណោះអ្នកទាំងពីរក៏បានលេចមុខនៅក្នុងខ្សែរភាពយន្តធំៗរបស់ទូរទស្សន៍នានា និងស្ពតពានិជ្ជកម្មផ្សេងៗជាច្រើនផងដែរ។ រួមលោក រុន ណាកូ ដែលត្រូវបានគេស្គាល់ថាជាតារាសម្ដែងនិងមូឌែល និងជាតារាចម្រៀងរបស់ផលិតកម្មក្លាស៊ិក ហើយមួយរយៈពេលចុងក្រោយនេះដែរ លោកក៏បានលេចមុខនៅជាពិធីករកម្មវិធីទូរទស្សន៍ផ្ទះតារាផងដែរ។ យ៉ាងណាមិញអ្នកទាំងបួនសុទ្ធសឹងតែជាតារាដែលមានវ័យក្មេងហើយក៏កំពុងទទួលបានភាពល្បីល្បាញ ហើយក៏ត្រូវបានផលិតករជ្រើសរើសឱ្យសម្ដែងជាតួអង្គសំខាន់នៅក្នុងសាច់រឿងក្នុងចម្រៀងមួយបទនេះ។

យ៉ាងណាមិញគេពុំទាន់ដឹងថាអ្នកទាំងបួនត្រូវសម្ដែងជាតួអង្គដែលមានចរិតលក្ខណៈបែបណា ឬនៅក្នុងប្លង់ឬឈុតឆាកណាមួយនៃបទចម្រៀងនោះទេ។ តែផលិតបានបង្ហើបថាពួកគេទាំងបួន និងសិល្បៈករសិល្បៈការិនីដែលនឹងចូលរួមសម្ដែងដ៏ទៃទៀតសុទ្ធសឹងតែត្រូវសម្ដែងឆ្លុះបញ្ចាំងអំពីអំពើល្អនៅក្នុងសង្គមដូចៗគ្នា ។

June 8, 2020

Category: សង្គម និងសេដ្ឋកិច្ច