សង្គម និងសេដ្ឋកិច្ច - La Reine Media

ក្រុមហ៊ុនអាកាសចរណ៍ រកបានចំណូលច្រើនសន្ធឹក ដោយសារដឹកជ្រូកនិងម៉ាស់ នៅក្នុងវិបត្តិសុខភាព

ប្រាក់ចំណូល4ខែដើមឆ្នាំរបស់ក្រុមហ៊ុន Volg-Dnepr បានកើនជាង30% ឡើងដល់630លានដុល្លារ ដោយសារសេវាកម្មដឹកជ្រូកទៅកាន់ប្រទេសចិន និងដឹកម៉ាស់ទៅកាន់អឺរ៉ុប។

COVID-19 បានបំផ្លាញវិស័យអាកាសចរណ៍ពិភពលោកស្ទើរតែទាំងស្រុងទៅហើយ ប៉ុន្តែសម្រាប់ក្រុមហ៊ុន Volga-Dnepr Group វិញ ជើងហោះហើរនានានៅតែដំណើរការជាធម្មតា។

Volga-Dnepr បានដឹកជ្រូកពូជជាង3,000ក្បាលពីប្រទេសបារាំងទៅកាន់ប្រទេសចិននៅក្នុងដើមឆ្នាំនេះ ដើម្បីប៉ះប៉ូវប្រភពផ្គត់ផ្គង់នៅក្នុងទីផ្សារដែលមានតម្រូវការសាច់ជ្រូកធំជាងគេក្នុងពិភពលោក (ចិន) ក្រោយពីការវាយប្រហារពីរោគរាតត្បាតគ្រុនផ្តាសាយជ្រូកអាហ្វ្រិក។ ជ្រូកដែលនាំចូលប្រទេសចិនត្រូវបានដាក់នៅក្នុងទ្រុងឈើ ក្នុងកាប៊ីនរបស់យន្តហោះ Boeing 747 និងត្រូវឆ្លងកាត់រយៈចម្ងាយ 10,400គីឡូម៉ែត្រ។

លោក Alexey Isaikin ប្រធានក្រុមហ៊ុន Volga-Dnepr Group

វិធានការដើម្បីទប់ស្កាត់ការឆ្លងរាលដាលរបស់វីរុសCOVID-19 បានបង្កើនកង្វះខាតសាច់ជ្រូក ធ្វើឱ្យប្រទេសចិនត្រូវបន្ថែមល្បឿន និងទំហំក្នុងការបង្កាត់ពូជជ្រូក និងចិញ្ចឹមជ្រូក។ ក្នុងរយៈពេល4ខែដើមឆ្នាំនេះ ប្រទេសចិនបាននាំចូលសាច់ជ្រូកពីសហរដ្ឋអាមេរិកជាង250,000តោន ខណៈដែលពេញមួយឆ្នាំ2019កន្លងទៅ តួលេខនេះមានត្រឹមតែ245,000តោនតែប៉ុណ្ណោះ។

COVID-19 បានផ្លាស់ប្ដូររូបភាពនៃការដឹកជញ្ជូនទំនិញតាមផ្លូវអាកាស។ Alexey Isaikin ប្រធានក្រុមហ៊ុន Volga-Dnepr Group បានឱ្យដឹងថា ដើមឡើយ ទំនិញដែលដឹកជញ្ជូនតាមផ្លូវអាកាសប្រមាណជាជាងពាក់កណ្ដាល ត្រូវបានដឹកដោយយន្តហោះពាណិជ្ជកម្ម (យន្តហោះដឹកអ្នកដំណើរ)។ ប៉ុន្តែ ចាប់តាំងពី COVID-19 បានរាតត្បាតខ្លាំង ក្រុមហ៊ុនអាកាសចរណ៍ពាណិជ្ជកម្មនានាក៏បានផ្អាកដំណើរការ ដែលនេះបានធ្វើឱ្យតម្រូវការនៃការដឹកជញ្ជូនតាមយន្តហោះដឹកទំនិញកើនឡើងច្រើន ហើយនាំឱ្យថ្លៃដឹកជញ្ជូនកើនឡើងខ្ពស់ជាងទ្វេដងផងដែរ។

ក្រៅពីជ្រូក ក្រុមហ៊ុនអាកាសចរណ៍ Volga-Dnepr ក៏ថែមទាំងដឹកម៉ាស់ សម្ភារការពារមេរោគ ឧបករណ៍វេជ្ជសាស្ត្រ និងមធ្យោបាយសម្រាប់កម្ចាត់មេរោគទៅកាន់ប្រទេសជាច្រើនក្នុងពិភពលោក ដូចជារុស្ស៊ី បារាំង អាល្លឺម៉ង់។ល។ មុននោះ ក្រុមហ៊ុនរបស់លោក Alexey Isaikin ផ្ដោតទៅលើតែការដឹកទំនិញដែលទាក់ទងនឹងអាកាសចរណ៍ប៉ុណ្ណោះ ដែលវាជាប្រភពចំណូលចម្បងរបស់ក្រុមហ៊ុននេះ។ ក្នុងឆ្នាំនេះ ប្រភពចំណូលនេះបានថយចុះជាង30% ប៉ុន្តែចំណូលសរុបរបស់ Volga-Dnepr នៅតែកើនឡើងខ្ពស់។ ក្នុងរយៈពេល4ខែដើមឆ្នាំ2020នេះ ចំណូលរបស់ក្រុមហ៊ុន Volga-Dnepr បានកើន32% ធៀបនឹងរយៈពេលដូចគ្នាក្នុងឆ្នាំ2019 ដែលនេះបានជួយឱ្យ Volga-Dnepr រកបាន630លានដុល្លារនៅត្រីមាសទី1នៃឆ្នាំ2020។

លោក Alexey Isaikin ថ្លែងថា “ក្រុមហ៊ុនអាកាសចរណ៍កំពុងតែឆ្លងកាត់ដំណាក់កាលលំបាកបំផុតមិនធ្លាប់មានពីមុនមក។ ប៉ុន្តែ ចំពោះក្រុមហ៊ុនអាកាសចរណ៍ដឹកទំនិញដូចយើងខ្ញុំវិញ នេះគឺជាឱកាសល្អមួយ”។

លោក Alexey Isaikin បានព្យាករថា ប្រាក់ចំណូលឆ្នាំនេះរបស់ Volga-Dnepr អាចឡើងដល់2ពាន់លានដុល្លារ។ យោងតាម Bloomberg Billionaires Index (សន្ទស្សន៍មហាសេដ្ឋីដែលស្រង់ស្ថិតិដោយសារព័ត៌មាន Bloomberg) ចំនួនភាគហ៊ុនដែល Isaikin កំពុងកាន់កាប់នៅក្នុងក្រុមហ៊ុនអាកាសចរណ៍ដឹកទំនិញរបស់រុស្ស៊ីនេះ បច្ចុប្បន្នមានតម្លៃប្រមាណជា 700លានដុល្លារអាមេរិក។

ប្រភេទទំនិញដែលទាក់ទងនឹងសុខាភិបាល មានចំនួនជាងពាក់កណ្ដាលនៃទំនិញសរុបដែលត្រូវបានដឹកតាមយន្តហោះនៅទូទាំងពិភពលោក។ វិសាលភាពនៃសកម្មភាពដឹកជញ្ជូនរបស់ Volga-Dnepr ក៏កំពុងតែរីកធំឡើងៗ ដោយសារតែ COVID-19។ លោក Isaikin ថ្លែងថា “ដំបូងឡើយ យើងដឹកតែទំនិញជាសម្ភារសុខាភិបាលពីប្រទេសចិនទៅកាន់ទ្វីបអាហ្វ្រិកតែប៉ុណ្ណោះ ប៉ុន្តែពេលនេះយើងកំពុងតែទទួលបានសំណើដំបូងពីតំបន់អាមេរិកឡាទីន។ ខ្ញុំគិតថា នាពេលដ៏ខ្លីខាងមុខ យើងនឹងពង្រីកការហោះហើរទៅកាន់ឥណ្ឌា”។

អ្នកជំនួញជនជាតិរុស្ស៊ីរូបនេះយល់ថា ទីផ្សារដឹកជញ្ជូនសម្ភារសុខាភិបាលនឹងត្រូវរួមតូចមកវិញក្នុងពាក់កណ្ដាលចុងឆ្នាំ2020នេះ ខណៈដែលថ្លៃដឹកជញ្ជូនចាប់ផ្ដើមធ្លាក់ចុះ។ ទោះជាយ៉ាងនេះក្ដី លោក Isaikin នៅតែព្យាករថា ទំហំនិងថ្លៃដឹកជញ្ជូននឹងនៅតែស្ថិតក្នុងកម្រិតខ្ពស់ជាងដំណាក់កាលមុនវិបត្តិសុខភាព ព្រោះថាយន្តហោះដឹកអ្នកដំណើរនៅតែធ្វើសកម្មភាពតិចតួចនៅឡើយ៕

ប្រភព៖ Bloomberg

June 11, 2020

តារាចម្រៀងស្រី ឈូរ ស្រីរ័ត្ន ម្ចាស់បទល្បី«បុរស» បាត់មុខពីសិល្បៈយូរព្រោះមូលហេតុមួយ

តារាចម្រៀងស្រីមានទឹកដមសំឡេងពីរោះប្រចាំផលិតកម្មសាស្ត្រាហ្វៀមគឺអ្នកនាង ឈូរ ស្រីរ័ត្ន ជាម្ចាស់បទល្បីៗជាច្រើនសម្រាប់ប្រកបភាពយន្ដតូចធំដូចជាបទ បុរស , ទឹកភ្នែកកក , មួយលានបែកមួយលានជួប ជាដើម។ តារាចម្រៀងស្រីរូបនេះ ត្រូវបានមហាជាច្រើនគាំទ្រ និងទទួលស្គាល់ចាប់តាំងពីអ្នកនាងចូលប្រលងនៅក្នុងកម្មវិធីលំដាប់ពិភពលោក Cambodian Idol។

ស្រីរ័ត្ន បានឃ្លាតឆ្ងាយពីអារម្មណ៍របស់ប្រិយមិត្តអ្នកស្ដាប់ចម្រៀងនាងអស់រយៈពេលយូរមកហើយ ទើបធ្វើឱ្យអ្នកគាំទ្រនឹករឭកដល់អ្នកនាង។ ជួបជាមួយអ្នកសារព័ត៌មានឡារ៉ែន ស្រីរ័ត្នបានរៀបរាប់ប្រាប់ថា ការងារសិល្បៈរបស់អ្នកនាងសព្វថ្ងៃរៀងរយាលបន្ដិចហើយ ដោយសារតែអ្នកនាងពុំសូវមានពេលគ្រប់គ្រាន់សម្រាប់ការថតសំឡេងបទចម្រៀងថ្មីឱ្យផលិតកម្ម។ « ខាងផលិតកម្ម សាស្ត្រាហ្វៀម នៅតែបន្ដទាក់ទងមកប្អូនឱ្យទៅថតសំឡេងរហូតបង! តែប្អូនពុំសូវមានពេលវេលាគ្រប់គ្រាន់ឱ្យផលិតកម្ម ទើបសម្រេចចិត្តផ្អាកមួយរយៈសិនទៅបង! ណាមួយបេប៊ីនៅតូចពេក ទើបមិនហ៊ានបណ្ដោយឱ្យគេមើលថែជំនួស» នេះបើតាមសម្ដី ស្រីរ័ត្ន។

តារាចម្រៀងស្រី ឈូរ ស្រីរ័ត្ន បានប្រាប់ដោយមិនលាក់បាំងថា អ្នកនាងមានគ្រួសារមក 5ឆ្នាំហើយ ព្រមទាំងមានកូនប្រុសបងអាយុ1ខួប និងកូនស្រីទើបតែមានអាយុ3ខែប៉ុណ្ណោះ។ ដោយសារតែជាប់រវល់មើលថែទាំកូនទាំងពីរនេះហើយ ទើបធ្វើឱ្យអ្នកនាងផ្អាកចេញបទចម្រៀងសិន។ ក៏ប៉ុន្ដែអ្នកនាងបានអះអាងថា អ្នកនាងមិនបានចោលការងារសិល្បៈទាំងស្រុងនោះទេ។ រហូតដល់មានពេលវេលាគ្រប់គ្រាន់វិញ អ្នកនាងនឹងងាកមកបន្ដចូលសិល្បៈដូចដើម។

សូមជម្រាបផងដែរថា សំឡេងរបស់តារាចម្រៀងស្រី ឈូរ ស្រីរ័ត្ន នៅតែដក់ជាប់ក្នុងបេះដូងអ្នកស្ដាប់ ជាពិសេសគឺបទ «មួយលានបែក មួយលានជួប» នៅក្នុងផលិតកម្មសាស្ត្រាហ្វៀម បានអង្រួនចិត្តអ្នកគាំទ្រ ជាមួយនិងមនោសញ្ចេតនានៅក្នុងបទចម្រៀង ដែលបទនេះបង្ហោះនៅថ្ងៃដំបូង មានអ្នកចូលទស្សនាដល់ទៅជាង 1លាននាក់ទៅហើយ។ យ៉ាងណាវិញ អ្នកគាំទ្រនៅតែទន្ទឹងចាំបទចម្រៀងថ្មីរបស់អ្នកនាងនាពេលឆាប់ៗខាងមុខនេះ៕

June 11, 2020

កំពូលផ្លែឈើដែលស្ត្រីមានគភ៌មិនគួរខកខាន

ក្នុងអំឡុងពេលមានគភ៌ អ្នកម្តាយត្រូវថែបំប៉នរាងកាយឱ្យបានច្រើនជាងប្រក្រតី ព្រោះសារធាតុអាហារផ្សេងៗដែលស្រ្តីមានគភ៌បានទទួលនោះនឹងហុចផលទៅដល់កូនតូចដែលនៅក្នុងផ្ទៃផងដែរ។ ផ្លែឈើក៏ជាអាហារថែបំប៉នគភ៌ដែលល្អ និងមានប្រយោជន៍ដ៏ច្រើនមួយដែលស្រ្តីមានគភ៌ត្រូវតែទទួលទានឱ្យបានរាល់ថ្ងៃ ព្រោះនៅក្នុងផ្លែឈើមានសារធាតុអាហារ និងវីតាមីនដែលសំខាន់សម្រាប់ស្រ្តីមានគភ៌ និងកូនក្នុងផ្ទៃ។ ប្រហែលជាចង់ដឹងហើយមែនទេថា តើមានផ្លែឈើអ្វីខ្លះទៅ? សូមតាមដានជាបន្តទាំងអស់គ្នា។

1 – ផ្លែត្របែក

ជាផ្លែឈើដែលងាយស្រួលរកទទួលទានណាស់ សម្បូរទៅដោយវីតាមីន C និងវីតាមីន A ច្រើន ។ វីតាមីនដែលមាននៅក្នុងផ្លែត្របែកនឹងជួយការពារមិនឱ្យកើតជំងឺផ្តាសាយ និងធ្វើឱ្យអញ្ចាញ និងធ្មេញរបស់ស្រ្តីមានគភ៌រឹងមាំល្អ។

2 – ផ្លែដូងខ្ចី

មានគុណតម្លៃខាងអាហារខ្ពស់ ជួយបំបាត់ការស្រេកទឹក ជួយកាត់បន្ថយអាការនឿយល្វើយ មានសារធាតុអាហារដូចជា ប្រូតេអ៊ីន កាល់ស្យូម និងស្ករ។ ស្រ្តីមានគភ៌ដែលជិតប្រសូតជាច្រើននាក់និយមញ៉ាំទឹកដូងខ្ចី ព្រោះជឿថា នឹងធ្វើឱ្យកូនមានសាច់ និងស្បែកសភ្លឺរលោងតាំងពីពេលកើតភ្លាម។

3 – ផ្លែចេកទុំ

នៅក្នុងផ្លែចេកទុំមានសារធាតុអាហារដែលសំខាន់ៗដូចតទៅនេះ សារធាតុដែក ផូស្វ័រ ណៃអាស៊ិន វីតាមីន A, B1, B2, B6 និងវីតាមីន C និងសារធាតុថេបតូភែន។ នៅក្នុងផ្លែចេកទុំនៅមានកាកសរសៃអាហារខ្ពស់ ធ្វើឱ្យប្រព័ន្ធបន្ទោបង់របស់ស្រ្តីមានគភ៌ដំណើរការល្អ បន្ទោបង់បានតាមប្រក្រតី និងថែមទាំងជាផ្លែឈើដែលងាយស្រួលរកទទួលទានបានទៀតផង។

4 – ផ្លែល្ហុងទុំ

នៅក្នុងផ្លែល្ហុងទុំមានសារធាតុប្រឆាំងអនុមូលឥស្សរៈ និងមានកាកសរសៃច្រើន ស្រ្តីមានគភ៌ណាដែលច្រើនតែមានអាការទល់លាមកខណៈពេលមានគភ៌ញឹកញាប់នោះ គួរទទួលទានផ្លែល្ហុងទុំឱ្យបានច្រើនដើម្បីការបន្ទោបង់ដែលល្អ។

5 – ផ្លែភ្រូន (Prune)

នៅក្នុងផ្លែភ្រូនមានសារធាតុដែកខ្ពស់ ជាផ្លែឈើថែបំប៉នគភ៌ដ៏ល្អបំផុតសម្រាប់ស្រ្តីមានគភ៌ដែលមានសភាវស្លេកស្លាំង ក្រៅពីសារធាតុដែកហើយនោះ ផ្លែភ្រូននៅមានកាល់ស្យូមដែលជួយសាងឆ្អឹង និងធ្មេញ ហើយនិងវីតាមីន B2 ដែលជួយសាងគ្រាប់ឈាមក្រហមទៀតផង។

6 – ផ្លែក្រូចពោធិ៍សាត់

មានកាកសរសៃអាហារខ្ពស់ ស្រ្តីមានគភ៌គួរតែទទួលទានជាប្រចាំដើម្បីឱ្យប្រព័ន្ធបន្ទោបង់ដំណើរការតាមប្រក្រតី ហើយផ្លែក្រូចថែមទាំងមានវីតាមីន C ខ្ពស់ទៀតផង ជាផ្លែឈើដែលទទួលទានហើយអាចប្រឆាំងនឹងជំងឺគ្រុនផ្តាសាយបានទៀតផង។

7 – ផ្លែប៉ោម

ជាផ្លែឈើដែលមានវីតាមីន និងសារធាតុអាហារច្រើនណាស់ ដូចជា មានវីតាមីន A, B1, B2, B6, បៃអូឌីន អាស៊ីតហ្វូ៉លិក អំបិលរ៉ែ កាល់ស្យូម ផូស្វ័រ ប៉ូតាស្យូម សូដ្យូម។ សារធាតុអាហារដែលរៀបរាប់មកទាំងអស់នេះ មានប្រយោជន៍ចំពោះរាងកាយស្រ្តីមានគភ៌ និងទារកក្នុងផ្ទៃណាស់។ ស្រ្តីមានគភ៌គួរទទួលទានផ្លែប៉ោមក្នុងមួយអាទិត្យឱ្យបានពី 1 – 2 ដងជាការល្អប្រសើរណាស់។

ផ្លែឈើជាអាហារថែបំប៉នគភ៌ដែលមានប្រយោជន៍ និងងាយស្រួលទទួលទានណាស់ ហើយនៅក្នុងប្រទេសយើងក៏មានផ្លែឈើច្រើនយ៉ាងដើម្បីឱ្យស្រ្តីមានគភ៌ជ្រើសរើសទទួលទានបានតាមរដូវកាលដែរ៕

June 11, 2020

ទីបំផុតកញ្ញា បរ៉ាម៉ី ចេញមុខបំភ្លឺការពិតរឿងបទ “កណ្តៀវអូនស្រួយ” និងសុំទោសជាសាធារណៈហើយ

បន្ទាប់ក្រុមប្រឹក្សាវិន័យ និងលើកសរសើរនៃក្រសួងវប្បធម៌ និងវិចិត្រសិល្បៈ កោះហៅអ្នកនិពន្ធ និងម្ចាស់បទចម្រៀង «កណ្តៀវអូនស្រួយ» មកប្រជុំជាបន្ទាន់ និងធ្វើការព្រមាននៅព្រឹកថ្ងៃទី10 ខែមិថុនា ឆ្នាំ2020 នេះរួចមក រហូតមកទល់នឹងពេលនេះ គឺទទួលបានលទ្ធផលជាផ្លែផ្កាហើយ ដោយទាំងអ្នកនិពន្ធ និងអ្នកចម្រៀង ព្រមទទួលស្គាល់កំហុសរបស់ខ្លួន និងសន្យាថា នឹងប្រើប្រាស់ចំណេះដឹងឱ្យមានសីលធម៌ និងជាប្រយោជន៍ដល់សង្គម ឈប់និពន្ធបទដែលបង្កប់ន័យ អសុរសបែបនេះទៀតហើយ។

យ៉ាងណាមិញបន្ទាប់ពីរងការរិះគន់បទ ចម្រៀងមួយបទនេះក៏ត្រូវបានលុបចេញពី YOUTUBE ហើយកាលពីម្សិលមិញ។ ក្នុងនោះផងដែរ អ្នកចម្រៀងស្រី បរ៉ាម៉ី ដែលមានវ័យទើប18ឆ្នាំ ក៏បានបំភ្លឺការពិតរឿងបទ ”កណ្តៀវអូនស្រួយ” និងចេញមុខសុំទោសជាសាធារណៈ។ ជួបជាមួយអ្នកសារព័ត៌មានអ្នកចម្រៀងស្រីរូបនេះបានអះអាងថា នាងមិនបានគិតពីមុនមកថា បទចម្រៀងមួយនេះនឹងផ្ទុះការរិះគន់ដល់ថ្នាក់នេះនោះទេ ។ នាងបន្តថា ពាក្យពេចន៍រិះគន់របស់មហាជន ពិតជាត្រឹមត្រូវនឹងឱ្យខ្លួនដឹងពីកំហុសក្នុងការបកស្រាយពិតមែន ហើយនាងក៏មានតែពាក្យសុំទោសដល់មហាជនជាសាធារណៈ និងព្រមកែប្រែឈប់ច្រៀងបទដែលបង្កភាពអសីលធម៌ដល់សង្គមជាតិ។

សូមជម្រាបថា អ្នកនិពន្ធឈ្មោះ អ៊ិច ចន្ថា ក៏បានទទួលស្គាល់កំហុសនិងបានសរសេរកិច្ចសន្យាថានឹងមិននិពន្ធបទចម្រៀងដែលបង្កឱ្យមានការប៉ះពាល់ដល់វប្បធម៌សង្គមជាតិតទៅទៀតទេ។ កិច្ចសន្យានោះ មានខ្លឹមសារទាំង ថា «ខ្ញុំបាទឈ្មោះ អ៊ិច ចន្ថា កើតថ្ងៃទី8 ខែឧសភា ឆ្នាំ1981 ជាអ្នកនិពន្ធបទចម្រៀង ដែលមាន ចំណងជើងថា ( កណ្តៀវអូនស្រួយ ) និងបទ ( ស្រណោះអង្រែ) ជាបទចម្រៀង ដែលប្រើពាក្យពេចន៍ អសុរស ធ្វើឱ្យប៉ះពាល់ដល់សីលធម៌សង្គម ដែលធ្វើឱ្យមហាជនមានការមិនពេញចិត្ត និងបណ្ដាលឱ្យប៉ះ ពាល់ដល់តម្លៃសីលធម៌សង្គម។ ខ្ញុំបាទ អ៊ិច ចន្ថា សូមធ្វើការសុំទោសជាសាធារណៈ ដល់មហាជន និងសូមសន្យាថា មិនតែងនិពន្ធបទចម្រៀងដែលបង្កឱ្យមានការប៉ះពាល់ ដល់វប្បធម៌សង្គមជាតិតទៅទៀតទេ។ ខ្ញុំនឹងធ្វើការចុះបញ្ជីផលិតកម្មឱ្យបានត្រឹមត្រូវ តាមច្បាប់ និងយកទេពកោសល្យដែលខ្ញុំមាន មក ប្រើប្រាស់ក្នុងផ្លូវវិជ្ជមាន ដើម្បីជួយលើកស្ទួយតម្លៃសិល្បៈវប្បធម៌ជាតិ»៕

June 11, 2020

Marseille និង Rennes រួចផុតពីគ្រោះធំ ខណៈដែល PSG គ្រងជើងឯក 3ឆ្នាំជាប់គ្នា

លីកកំពូលបារាំង ត្រូវបានរំសាយចោល ក្រោយពីលោក Philippe អ្នកតំណាងលីកកំពូលបារាំង មានប្រសាសន៍នៅក្នុងសន្និបាតជាតិកាលពីខែមុនថា៖«ព្រឹត្តិការណ៍កីឡាធំ មិនអាចកើតឡើងមុនខែកញ្ញាបានទេ រដូវកាលបាល់ទាត់អាជីព 2019-20 ក៏នឹងមិនអាចវិលត្រឡប់មកវិញបានដែរ»។

ក្នុងនោះដែរគណៈកម្មការរៀបចំការប្រកួតបានគណនាពិន្ទុតាមរូបមន្តពិន្ទុមធ្យមក្នុង 1ប្រកួត ដោយជើងឯកបានទៅលើក្រុម Paris Saint Germain (PSG) ដែលជាបានក្លាយជាជើងឯក 3ឆ្នាំជាប់ៗគ្នា។

គួរបញ្ជាក់ដែរថា ក្លិបចំនួន2 គឺ Marseille និង Rennes ដែលកាន់កាប់កន្ទុយតារាងនៃក្របខ័ណ្ឌនេះមិនត្រូវបានកាត់ចេញឡើយ ខណៈក្លិប Lille ត្រូវទទួលបានកៅអីមួយកន្លែងនៅក្នុងក្របខ័ណ្ឌ Europa League៕

June 10, 2020

ឥណ្ឌូនេស៊ីបញ្ចុះបញ្ចូលក្រុមហ៊ុនអាមេរិកាំងឱ្យចាកចេញពីចិន មករកស៊ីក្នុងប្រទេសខ្លួន

ប្រទេសឥណ្ឌូនេស៊ីកំពុងតែបញ្ចុះបញ្ចូល និងពិភាក្សាជាមួយរដ្ឋាភិបាលសហរដ្ឋអាមេរិក អំពីការរើក្រុមហ៊ុននានារបស់សហរដ្ឋអាមេរិកដែលកំពុងរកស៊ីនៅប្រទេសចិន ឱ្យមកកាន់ឥណ្ឌូនេស៊ី។

លោក Luhut Panjaitan រដ្ឋមន្ត្រីក្រសួងកិច្ចការវិនិយោគនិងដែនសមុទ្ររបស់ឥណ្ឌូនេស៊ីបានឱ្យដឹងថា រដ្ឋាភិបាលប្រទេសនេះ កំពុងតែឧទ្ទេសនាមទីតាំងមួយចំនួនសម្រាប់អ្នកវិនិយោគមកពីសហរដ្ឋអាមេរិក ក្នុងនោះមានតំបន់ឧស្សាហកម្ម Kendal នៅខេត្តជ្វាកណ្ដាល (Central Java) ជាតំបន់សេដ្ឋកិច្ចពិសេសដែលទទួលបានអត្ថប្រយោជន៍ផ្នែកពន្ធគយ និងតំបន់ឧស្សាហកម្ម Brebes ដែលជាគម្រោងមួយក្នុងចំណោមគម្រោងអាទិភាពទាំង89របស់រដ្ឋ ដែលត្រូវបានជ្រើសរើសដោយប្រធានាធិបតី Joko Windodo។

លោក Panjaitan ថ្លែងថា ក្រុមហ៊ុនប្រមាណជា20 បានសម្ដែងការចាប់អារម្មណ៍ទៅលើការរើក្រុមហ៊ុនពីប្រទេសចិនមកកាន់ប្រទេសឥណ្ឌូនេស៊ី។

អ្នកនាំពាក្យរបស់ក្រសួងកិច្ចការវិនិយោគនិងដែនសមុទ្រឥណ្ឌូនេស៊ីបានឱ្យដឹងថា លោក Panjaitan ក៏បានជួបពិភាក្សាជាមួយប្រធានប្រតិបត្តិនៃក្រុមហ៊ុនហិរញ្ញវត្ថុអភិវឌ្ឍអន្តរជាតិសហរដ្ឋអាមេរិក និងស្ថាប័នរដ្ឋាភិបាលមួយ ក្រោយពីប្រធានាធិបតី Widodo បានទាក់ទងទៅកាន់ប្រធានាធិបតី Trump។

ឥណ្ឌូនេស៊ីជាប់ចំណាត់ថ្នាក់ល្អជាងកម្ពុជាបើនិយាយអំពីសន្ទស្សន៍ប្រកួតប្រជែកផ្នែកឧស្សាហកម្ម (CIP/Competitive Industrial Performance) ឆ្នាំ2018 នេះបើតាមរបាយការណ៍របស់ UNIDO របស់អង្គការសហប្រជាជាតិ។

ប៉ុន្តែ ឥណ្ឌូនេស៊ីនៅតែជួបការលំបាកក្នុងការទាក់ទាញវិនិយោគដោយផ្ទាល់ពីក្រៅប្រទេស។ ឆ្នាំ2018 ប្រទេសនេះបានទាក់ទាញការវិនិយោគផ្ទាល់ពីបរទេស (FDI/Foreign Direct Investment) ត្រឹមតែ1.8% ប៉ុណ្ណោះបើធៀបជាមួយនឹង GDP (Gross Domestic Product/ផលិតផលក្នុងស្រុកសរុប) ដែលនេះទាបជាងបណ្ដាប្រទេសក្នុងតំបន់ ដូចជាវៀតណាម ថៃ និងម៉ាឡេស៊ី។

ប្រធានាធិបតីឥណ្ឌូនេស៊ី លោក Joko Widodo និងលោក Trump

យោងតាមទំព័រ Nikkei Asian Review គិតត្រឹមខែតុលា2019 ក្នុងចំណោមក្រុមហ៊ុនចំនួន33ដែលបានរើចេញពីប្រទេសចិន មាន23ក្រុមហ៊ុនបានចូលមករកស៊ីនៅប្រទេសវៀតណាម ក្រៅពីនេះបានរើមកម៉ាឡេស៊ី ថៃ និងកម្ពុជា។ World Bank បានបញ្ចេញមតិថា “ក្រុមហ៊ុននានាដែលកំពុងចាកចេញពីប្រទេសចិន ប៉ុន្តែមិនបានមកកាន់ឥណ្ឌូនេស៊ីទេ ព្រោះប្រទេសជិតខាងរបស់ឥណ្ឌូនេស៊ីមានភាពទាក់ទាញខ្លាំងជាង”។

សូម្បីតែនៅក្នុងអំឡុងវិបត្តិសុខភាព COVID-19 ដែលនាំឱ្យមានការរើរោងចក្រចេញពីប្រទេស ប្រទេសឥណ្ឌូនេស៊ីនៅតែបាត់បង់ឱកាស នេះបើតាម Citigroup។

របាយការណ៍របស់ Citigroup បានឱ្យដឹងថា “បណ្ដាតំបន់សេដ្ឋកិច្ចដែលអាចទទួលបានប្រយោជន៍គឺជាភាគីដែលមានអត្រានាំចេញខ្ពស់ប្រហាក់ប្រហែលប្រទេសចិន និងមានបណ្ដាញផ្គត់ផ្គង់ស្រាប់”។ Citigroup យល់ថា ប្រទេសឥណ្ឌា វៀតណាម ម៉ាឡេស៊ី តៃវ៉ាន់ និងប្រទេសថៃ អាចជាទីតាំងដែលទទួលបានផលប្រយោជន៍ក្នុងរយៈពេលខ្លី។

លោក Sanny Iskandar ប្រធានសមាគមអចលនទ្រព្យឧស្សាហកម្មឥណ្ឌូនេស៊ីបានសរសើរថា ប្រទេសឥណ្ឌូនេស៊ីជា “កន្លែងល្អដើម្បីមកតាំងនៅជាថ្មី ព្រោះយើងជាទីផ្សារដែលមានសក្ដានុពល ដោយមានប្រជាជនច្រើនជាងគេបំផុតក្នុងតំបន់អាស៊ីអាគ្នេយ៍”។

ប៉ុន្តែ លោក Sanny Iskandar ក៏បានទទួលស្គាល់ថា ប្រទេសនេះត្រូវការកែលម្អប្រភពធនធានមនុស្ស និងបញ្ហាការិយាធិបតេយ្យ និងការកំណត់ផ្សេងៗទៀត។ លោកបន្តថា “កញ្ចប់កំណែទម្រង់សេដ្ឋកិច្ចដែលបានសន្យា ចុងក្រោយមិនទាន់បានចេញជាលទ្ធផលនៅឡើយ ដែលនេះបានបង្កការខកចិត្តដល់អ្នកវិនិយោគ ក៏ដូចជាអ្នកជំនួញ”៕

ប្រភព៖ សារព័ត៌មានបរទេស

June 10, 2020

Facebook ធ្វើទំនើបកម្ម chatbot ដើម្បីបង្កើនប្រសិទ្ធភាពថែទាំអតិថិជនរបស់អ្នកប្រើប្រាស់

ការកែលម្អថ្មីរបស់បណ្ដាញសង្គមខ្នាតយក្សនេះនឹងជួយឱ្យកម្មវិធី chatbot ដើរតួនាទីជាជំនួយការដ៏សំខាន់ និងមានប្រសិទ្ធភាពសម្រាប់បណ្ដាក្រុមហ៊ុនលក់រាយដែលប្រើប្រាស់ Facebook។

កាលពីសប្ដាហ៍មុន ក្រុមអ្នកបច្ចេកវិទ្យារបស់ Facebook បានប្រកាសអំពីការកែលម្អមុខងារ chatbo ដើម្បីជួយឱ្យអ្នកប្រើប្រាស់របស់ខ្លួនកាន់តែមានភាពងាយស្រួលក្នុងការទិញដូរតាមអនឡាញនៃបណ្ដាញសង្គមនេះ។

ជំនួយការស្រមោល chatbot ដែលត្រូវបាន Facebook អភិវឌ្ឍ មានលទ្ធភាពចាត់ការទៅលើរូបភាពដែលអ្នកប្រើប្រាស់ និង chatbot អាចមើលឃើញជាមួយគ្នាក្នុងពេលវេលាពិត។ ការអភិវឌ្ឍនេះ ជាមូលដ្ឋាន គឺអនុញ្ញាតឱ្យ chatbot ដឹងបានថា វាកំពុងតែមើលរូបភាពដូចគ្នាណាមួយជាមួយនឹងអ្នកប្រើប្រាស់ ហើយឆ្លើយតបនឹងសំណួរអំពីរូបភាពនោះ (ឧទាហរណ៍៖ ពណ៌របស់ស្បែកនោះជាពណ៌អ្វី?។ល។)។

ការកែលម្អខាងលើនេះនឹងជួយឱ្យ chatbot មានសមត្ថភាពក្នុងការពិភាក្សាបានរលូនជាងមុនអំពីលក្ខណៈ ឬស្ថានភាពរបស់ទំនិញ ហើយឆ្លើយតបនឹងសំណួរជាក់លាក់អំពីផលិតផលដែលអតិថិជនបានរំឭកដល់។ ប៉ុន្តែ មិនទាន់ដឹងថា Facebook នឹងដាក់ឱ្យដំណើរការកំណែថ្មីនេះនៅពេលណានៅឡើយ។ យ៉ាងនេះក្ដី ក្រុមអ្នកវិភាគវាយតម្លៃថា នេះគឺជាជំហានថ្មីមួយទៀតដែលបង្ហាញថា chatbot នឹងក្លាយជាកម្មវិធីដ៏មានប្រយោជន៍សម្រាប់អ្នកប្រើប្រាស់។

កម្មវិធី chatbot ទទួលបានការប្រើប្រាស់ពីក្រុមហ៊ុនចំនួន18%នៅក្នុងទីផ្សារសហរដ្ឋអាមេរិក នេះបើតាមស្ថិតិកាលពីខែមករា ឆ្នាំ2020 របស់ ZipWhip ដែលត្រូវបានដកស្រង់និងចុះផ្សាយដោយគេហទំព័រ eMarketer។

ការកែលម្អកម្មវិធី chatbot របស់ Facebook ត្រូវបានគេសង្ឃឹមច្រើន នៅពេលសំណួរដ៏ច្រើននឹងត្រូវបានដោះស្រាយក្នុងពេលតែមួយដោយបច្ចេកវិទ្យា។ ប្រការនេះក៏នឹងកាន់តែពង្រឹងមហិច្ឆតារបស់ Facebook ក្នុងការលោតចូលធ្វើពាណិជ្ជកម្មនៅលើបណ្ដាញសង្គមនេះផងដែរ។

កាលពីចុងខែមុន Facebook បានធ្វើឱ្យអ្នកប្រើប្រាស់មានការភ្ញាក់ផ្អើលខ្លាំង នៅពេលប្រកាសលោតចូលក្នុងវិស័យពាណិជ្ជកម្មអេឡិកត្រូនិក ដោយការឧទ្ទេសនាម Facebook Shop។ មុខងារនេះអនុញ្ញាតឱ្យក្រុមហ៊ុននានាបង្កើតតូបទំនិញអនឡាញ និងផ្សាយពាណិជ្ជកម្មផលិតផលជាក់លាក់តាមរយៈឆាណែលផ្ដាច់មុខរបស់ Facebook។

ការដាក់បញ្ចូលជំនួយការស្រមោល chatbot អាចជួយអតិថិជនសក្ដានុពល ស្វែងយល់អំពីផលិតផលបានយ៉ាងលម្អិត។ ប្រការនេះនឹងនាំមកនូវផលប្រយោជន៍ច្រើនដល់បណ្ដាក្រុមហ៊ុនដែលខ្វះបុគ្គលិកសម្រាប់ឆ្លើយនឹងសំណួរភ្លាមៗរបស់អតិថិជន។

ក្រៅពីនេះ ជំនួយការស្រមោល chatbot ក៏ជួយឱ្យ Facebook ប្រើប្រាស់អស់ពីលទ្ធភាពនៃទិន្នការទិញដូរតាមរយៈបណ្ដាញសង្គមដែលកាន់តែកើនឡើងពីមួយថ្ងៃទៅមួយថ្ងៃ។ ប្រាក់ចំណូលដែលបានមកពីការលក់រាយនៅលើបណ្ដាញសង្គម តាមការព្យាករ វានឹងកើនទ្វេដងក្នុងរយៈពេល5ឆ្នាំទៀត ដោយវានឹងឡើងដល់ 53.94ពាន់លានដុល្លារក្នុងឆ្នាំ2024។ នេះបើតាមការគន់គូរថ្មីបំផុតរបស់ Business Insider៕

ប្រភព៖ Business Insider

June 10, 2020

Elon Musk ផលិតយានអវកាសដឹកមនុស្សម្ដង100នាក់ឡើងទៅកាន់ពិភពព្រះអង្គារ

មហាសេដ្ឋី Elon Musk បានដាក់គោលដៅនាំមនុស្សឡើងទៅកាន់ឋានព្រះចន្ទ និងផ្កាយព្រះអង្គារដោយប្រើប្រាស់កាំជ្រួចយានអវកាស Starship ដែលអាចប្រើឡើងវិញទាំងស្រុងជាច្រើនដង។

នៅក្នុងសារមួយច្បាប់ដែលត្រូវបានផ្ញើទៅកាន់បុគ្គលិកទាំងអស់របស់ក្រុមហ៊ុន SpaceX កាលពីថ្ងៃទី6មិថុនាកន្លងទៅ ប្រធានក្រុមហ៊ុន SpaceX លោក Elon Musk បានស្នើឱ្យបុគ្គលិកពាក់ព័ន្ធរបស់លោក ពន្លឿនការអភិវឌ្ឍកាំជ្រួចរុញច្រានជំនាន់ថ្មី Starship។ “លោកអ្នកសូមមេត្តាផ្ដល់អាទិភាពលំដាប់កំពូលរបស់ SpaceX ដល់ Starship”។ មហាសេដ្ឋី Elon Musk សរសេរបែបនេះ។

ក្រុមហ៊ុន SpaceX បានទទួលជោគជ័យក្នុងបេសកកម្មជាប្រវត្តិសាស្តក្នុងការបញ្ជូនអ្នកអវកាសរបស់ NASA ឡើងទៅកាន់ទីអវកាសកាលពីថ្ងៃទី30ឧសភា។ កាំជ្រួច Falcon 9 និងយានអវកាស Crew Dragon ដែលបានដឹកអវកាសចររបស់ទីភ្នាក់ងារអវកាសអាមេរិក (NASA) ឡើងទៅកាន់ស្ថានីយអវកាសអន្តរជាតិ (ISS) នឹងបញ្ជូនពួកគេត្រលប់មកផែនដីវិញក្នុងរយៈពេលជាច្រើនខែខាងមុខ។

ទិដ្ឋភាពបាញ់បង្ហោះកាំជ្រួចរុញច្រាន Falcon 9 របស់ក្រុមហ៊ុន SpaceX

កាំជ្រួច Falcon 9 គឺជាមធ្យោបាយស្នូលរបស់ក្រុមហ៊ុន SpaceX ដោយបានធ្វើការហោះហើរចំនួន85លើកនៅក្នុងទសវត្សរ៍កន្លង។ ប៉ុន្តែ Starship វិញ គឺជាតំណាងនៃមហិច្ឆតាធំធេងនិងវែងឆ្ងាយជាង Falcon 9 ទៅទៀត។ Falcon 9 គឺជាកាំជ្រួចរុញច្រានដែលមួយផ្នែករបស់វាត្រូវបានប្រើប្រាស់ឡើងវិញ ដោយក្រុមហ៊ុន SpaceX តែងអនុញ្ញាតឱ្យក្បាលរុញច្រានរបស់កាំជ្រួចចុះចតនៅលើផែនដី រួចដោះយកក្បាលផ្នែកខាងដើមរបស់វា។ គោលដៅរបស់លោក Musk គឺការធ្វើឱ្យ Starship ក្លាយជាកាំជ្រួចដែលអាចប្រើប្រាស់ឡើងវិញបានទាំងស្រុង ដែលវាជិតដូចទៅនឹងយន្តហោះពាណិជ្ជកម្មនាបច្ចុប្បន្ន។

កាលពីឆ្នាំទៅ លោក Musk បានឧទ្ទេសនាមយានអវកាស Starship ដែលច្នៃពីដែកអ៊ីណុក ជាមួយនឹងទំហំធំជាងឆ្ងាយបើធៀបនឹងយានអវកាស Dragon។ ក្រុមហ៊ុន SpaceX អភិវឌ្ឍ Starship ក្នុងគោលបំណងបញ្ជូនអវកាសចរម្ដង100នាក់ឡើងទៅកាន់ឋានព្រះចន្ទ និងពិភពព្រះអង្គារ។ ក៏ប៉ុន្តែ កម្មវិធី Starship របស់ SpaceX នៅ Boca Chica ក្នុងរដ្ឋ Texas បានទទួលបរាជ័យចំនួន4លើកមកហើយក្នុងអំឡុងពេលថ្មីៗកន្លងទៅនេះ។ បើទោះជាក្រុមហ៊ុនតែងតែធ្វើការអភិវឌ្ឍនិងកែប្រែចំណុចអវិជ្ជមានជារៀងរាល់លើក ក្រោយពីការសាកល្បងម្ដងៗ តែទោះជាយ៉ាងនេះក្ដី កំណែថ្មីបំផុតដែលទើបត្រូវបានសាកល្បងកាលពីថ្ងៃទី29ឧសភាក៏បានទទួលបរាជ័យ ដោយសារវាបានផ្ទុះនៅពេលកំពុងសាកល្បងម៉ាស៊ីនរ៉ុកកែត៕

ប្រភព៖ CNBC

June 10, 2020

15ចំណុច ឪពុកម្តាយត្រូវធ្វើពេលកូនៗរៀនអនឡាញ ក្នុងសម័យកូវីដ

ការដាក់ចិត្ត និងសកម្មភាពក្នុងភាពជាម្ចាស់ការ និងការសហការជាវិជ្ជាមានរបស់អ្នកអាណាព្យាបាលជាមួយសាលារៀនជារឿងចាំបាច់ណាស់ក្នុងអំឡុងពេលសិក្សាអនឡាញ និងពីចម្ងាយនេះ។

លោក ប៉ិច បូឡែន អគ្គនាយកក្រុមហ៊ុន វេសឡាញ អេឌ្យូខេសិន គ្រុប បានលើកឡើងថា អាណាព្យាបាលពិតជាសំខាន់ណាស់ក្នុងការចូលរួមជាមួយនឹងការសិក្សារបស់កូនក្នុងដំណាក់កាលនៃការសិក្សាពីចម្ងាយនេះ។ ហេតុនេះអាណាព្យាបាលគួរអនុវត្តនូវគោលគំនិត និងសកម្មភាពអប់រំមួយចំនួនដូចខាងក្រោម៖

ក្រៅពីការបំពេញការងារ ឬសកម្មភាពរកស៊ីខាងក្រៅ សូមចំណាយពេលវេលាឱ្យបានច្រើនតាមដាន និងផ្តល់កម្លាំងចិត្តដល់កូន។
កាត់បន្ថយសកម្មភាពជួបជុំមិត្តភ័ក្រខាងក្រៅ ហើយនាំកូនដើរកំសាន្តក្នុងធម្មជាតិខាងក្រៅឱ្យបានច្រើន ដូចជាវាលស្រែ ដើមឈើ រុក្ខជាតិបៃតង ភ្នំ សមុទ្ទ ស្រូបខ្យល់បរិសុទ្ធ។
ចំណាយពេលលេងល្បែងកំសាន្តផ្សេងៗជាមួយពួកគេ ដើម្បីបង្វែរកុំឱ្យកូនៗចំណាយពេលលើអេក្រង់អេឡិកត្រូនិកបន្ថែមទៀត បន្ទាប់ពីសិក្សាតាមអនឡាញហើយ។
នាំកូនធ្វើសកម្មភាពកិច្ចការផ្ទះនានា ដូចជាចម្អិនម្ហូប ឬធ្វើសួនផ្សេងៗ ឬលេងកីឡា។
ដាស់តឿនអប់រំកូនជាប្រចាំពីផលប៉ះពាល់ និងហានិភ័យនានាតាមបណ្តាញសង្គម ដូចជាគេហទំព័រដែលមិនគួរមើល ព័ត៌មានដែលល្អ ឬមិនល្អ ព័ត៌មានពិត ឬក្លែងក្លាយ។ ព័ត៌មានក្នុងបណ្តាញសង្គមភាគច្រើននៅជាព័ត៌មានបំពុល គ្រោះថ្នាក់ និងអាចឱ្យយុវជនជំទង់ភាគច្រើនមានការគិត វិភាគ និងធ្វើសកម្មភាពខុស។
កាត់បន្ថយការប្រើទូរស័ព្ទដែលឥតប្រយោជន៍ ពេលនៅក្បែរកូន។ លោកអ្នកគួរចំណាយពេលដ៏មានតម្លៃនេះនិយាយលេង ស្ទង់អារម្មណ៍ និយាយលើកទឹកចិត្តកូនវិញ។ ប្រសិនបើលោកអ្នកកាន់ទូរស័ព្ទមកកំសាន្តនោះ កូនរបស់លោកអ្នកក៏នឹងធ្វើតាមដែរ។
អាចមើលកុន ឬទូរទស្សន៍រួមគ្នាជាលក្ខណៈគ្រួសារនៅផ្ទះ ជាមួយនឹងអាហារ និងភេសជ្ជៈដែលកូនចូលចិត្តក្នុង1សប្តាហ៍ ឬ2សប្តាហ៍ម្តង នៅល្ងាចចុងសប្តាហ៍ណាមួយ។ វានឹងជាបទពិសោធន៍ដ៏អស្ចារ្យ និងសប្បាយរីករាយ1។
ប្រសិនបើលោកអ្នកចេះ យល់ដឹងខ្លះពីសមាធិ ឬយ៉ូហ្កា លោកអ្នកគួរបង្រៀន និងបបូលកូនៗចូលរួមជាមួយលោកអ្នក។ សកម្មភាពទាំងអស់នេះអាចជួយកូនៗរបស់លោកអ្នកគ្រប់គ្រងអារម្មណ៍ និងការពារខ្លួនរបស់ពួកគេពីភាពតានតឹងផ្លូវចិត្តបានខ្លះ។
ក្នុងក្រុមគ្រួសារ បង្កើតបរិយាកាសរស់នៅ ជាពិសេសការនិយាយស្តីវិជ្ជមាន ល្អៗ នឹងគ្នា។ ចៀសវាងបរិយាកាសហឹង្សាក្នុងគ្រួសារ។
អ្នកអាណាព្យាបាលត្រូវស្វែងរក និងប្រើប្រាស់សេវាប្រឹក្សាយោបល់ ជាមួយសាលារៀន ឬអ្នកជំនាញប្រឹក្សាយោបល់ភ្លាម ប្រសិនបើលោកអ្នកយល់ថាអ្នកមានអារម្មណ៍តានតឹងខ្លួនឯងដែរ។
ព្យាយាមកន្លែងកូនរៀនឱ្យបានល្អ។ មានពន្លឺគ្រប់គ្រាន់ លំហូរខ្យល់ល្អ ស្រឡះ និងមានឧបករណ៍រៀនសូត្រគ្រប់គ្រាន់។ បើមានលទ្ធភាព សូមប្រើប្រាស់កុំព្យូទ័រ ឬឧបករណ៍អេឡិកត្រូនិកដែលមានអេក្រង់ធំ (13អ៊ិញឡើង) ដើម្បីឱ្យកូនរៀន។
ពិភាក្សាជាមួយសាលារៀន និងគ្រូ ស្វែងយល់ពីកម្មវិធីសិក្សា របៀបសិក្សា និងរបៀបប្រើឧបករណ៍សិក្សាអនឡាញ។
ប្រសិនបើមានមេរៀនក្នុងសៀវភៅពុម្ភ សូមណែនាំកូនឱ្យអានសៀវភៅវិញ ជំនួសឱ្យអានក្នុងសៀវភៅអេឡិចត្រូនិច។
ជំនួសកាសដាក់ផ្ទាល់នឹងត្រចៀក សូមប្រើសម្លេងផ្ទាល់ពីកុំព្យូទ័រ ឬទិញកូនបាស់តូចៗ ហើយភ្ជាប់ប្ល៊ូទូសឱ្យគាត់ប្រើវិញ។ ហើយលោកអ្នកគួរតែទិញវ៉ែនតាការពារពន្លឺជូនពួកគេ ពេលគេមើលឧបករណ៍អេឡិចត្រូនិច។
ចំពោះកុមារតូចៗ សូមស្វែងយល់ និងប្រើប្រាស់ឧបករណ៍ សម្ភារអប់រំតាមបែបល្បែងកំសាន្តឱ្យបានច្រើនបំផុត រួមនឹងសន្លឹកកិច្ចការដែលយកមកពីសាលា។
វាមិនមែនជាការងាយស្រួលទេ សម្រាប់ទាំងសាលារៀន គ្រូ និងអ្នកអាណាព្យាបាលក្នុងការបង្រៀនកូនអនឡាញ និងពីចម្ងាយបែបនេះ។ វាត្រូវការភាពអត់ធ្មត់ ក្តីស្រលាញ់ និងការយកចិត្តទុកដាក់ខ្ពស់ណាស់ ជាពិសេសវាកាន់តែលំបាកប្រសិនបើពីមុនមកអ្នកអាណាព្យាបាលមិនដែលបានធ្វើ ឬធ្វើបានតិចតួចបំផុតនូវសកម្មភាពខាងលើ។

វាមិនងាយស្រួលទេក្នុងការធ្វើជាអ្នកអាណាព្យាបាលល្អម្នាក់។ តែលោកអ្នកគួរតែអបអរខ្លួនឯងប្រសិនបើលោកអ្នកអាចតាំងចិត្តមើល ស្វែងយល់ខ្លឺមសារជូនយោបល់ដ៏វែងដែលខ្ញុំតាំងចិត្តសរសេរពីលើមកនេះ ដើម្បីយកទៅប្រើប្រាស់ជាគុណប្រយោជន៍ដល់កូនៗរបស់យើង។

លោកជឿជាក់ថាស្ថានភាពនេះ វាក៏នឹងដាស់តឿនទាំងសាលារៀន គ្រូបង្រៀន ឱ្យអភិវឌ្ឍខ្លួនកាន់តែប្រសើរឡើងលើភាពជាដៃគូអភិវឌ្ឍកុមារ យុវជនរបស់យើងទាំងអស់គ្នា។

សូមជូនពរលោកគ្រូ អ្នកគ្រូ អ្នកអាណាព្យាបាល និងកូនក្មួយទាំងអស់ឱ្យមានសុខភាព និងសុវត្ថិភាពល្អគ្រប់ៗគ្នា និងសូមចូលរួមបន្តការពារទប់ស្កាត់ការរីករាលដាលជម្ងឺកូវីដ19ទាំងអស់គ្នា៕

June 10, 2020

កសិករដាំគូលែនវៀតណាម កំពុងពិបាកចិត្ត កូវីដ-19ធ្វើឱ្យការនាំចេញផ្លែឈើលំបាក នៅសល់ហៀរទីផ្សារ និងធ្លាក់ថ្លៃ

នៅកណ្ដាលគំនរផ្លែគូលែនដ៏ច្រើនសន្ធឹកសន្ធាប់នៅក្នុងទីផ្សារលក់ដុំ មួយកន្លែងក្នុងខេត្ត បាក់យ៉ាង ភាគខាងជើងប្រទេសវៀតណាម កសិករជាច្រើននាក់កំពុងរអ៊ូ រឿងតម្លៃផ្លែឈើដែលកំពុងធ្លាក់ថ្លៃយ៉ាងបន្តបន្ទាប់ ដោយមូលហេតុពាណិជ្ជករបរទេសត្រូវបានហាមឃាត់ដោយសារជំងឺកូវីដ-19។

តាមរយៈការឆ្លើយតបទៅនឹងការឆ្លងរាលដាលរបស់វីរុសកូវីដ-19 បែបវាយលុក បានធ្វើឱ្យវិថីជីវិតរបស់ប្រជាជនវៀតណាមវិលត្រឡប់មករកសភាវប្រក្រតីឡើងវិញ កម្មករបានប្រមូលផ្ដុំគ្នាដោយមិនពាក់ម៉ាស់អនាម័យការពារ ដោយនៅលើទោចក្រយានយន្តរបស់ពួកគេមានកញ្ឆេធំមួយនៅពីក្រោយ ដែលផ្ទុកណែនដោយផ្លែគូលែនទុំទើបនឹងបេះថ្មីៗពីចម្ការ។

ជាប្រក្រតី វៀតណាមបាននាំចេញផ្លែគូលែនស្រស់ប្រមាណជា 100,000តោនក្នុង 1រដូវកាល គិតជាតម្លៃសរុប ច្រើនជាង 30លានដុល្លារ ដោយមានប្រទេសគោលដៅធំៗ ដូចជា ចិន ជប៉ុន អូស្ត្រាលី និងសហរដ្ឋអាមេរិក តែធុរកិច្ចនេះ ត្រូវជាប់គាំងក្នុងឆ្នាំនេះ នៅពេលដែលវៀតណាមនៅតែមានវិធានការបិទព្រំដែន។

កសិករម្នាក់ឈ្មោះ ង្វៀង វ៉ាន់ ធែង បាននិយាយថា “ដោយសារតែការឆ្លងរាតត្បាតរបស់ជំងឺកូវីដ-19 ធ្វើឱ្យពួកយើងលែងឃើញអ្នកទិញជនជាតិចិនចូលមក ហើយឥឡូវពួកយើងភាគច្រើន លក់ឱ្យអតិថិជនក្នុងប្រទេស ទើបធ្វើឱ្យធ្លាក់ថ្លៃយ៉ាងខ្លាំង” លោកបន្តថា ជាប្រក្រតី ផ្លែគូលែនរបស់លោក ជាងពាក់កណ្ដាល បានលក់ឱ្យបរទេស។

អ្នកម៉ៅទិញបរទេស ច្រើនតែធ្វើដំណើរមកផ្សារនេះដោយផ្ទាល់ ដោយបើករថយន្តក្នុងចម្ងាយផ្លូវពីព្រំដែនចិនមក ត្រឹមតែមិនប៉ុន្មានម៉ោងប៉ុណ្ណោះ តែសារព័ត៌មានផ្លូវការក្នុងស្រុកមួយបានរាយការណ៍កាលពីសប្ដាហ៍មុនថា មានជនជាតិចិន និងជប៉ុនជាច្រើនរយនាក់ត្រូវបានហាមឃាត់ និងបង្ខាំងខ្លួន ដើម្បីសង្កេតតាមដានមើលមេរោគរយៈពេល 14ថ្ងៃ។

ទោះជាអាជ្ញាធរបានអះអាងថា ពួកគេនឹងជួយជំរុញការផ្សព្វផ្សាយអំពីការបរិភោគនៅក្នុងស្រុកក៏ដោយ តែតម្លៃបានធ្លាក់ចុះដល់ទៅជាងពាក់កណ្ដាលនៃតម្លៃដែលពួកគេធ្លាប់លក់បានកាលពីឆ្នាំកន្លងទៅ។

កសិករអាយុ 47ឆ្នាំខាងលើ ដែលបានរំពឹងទុកថា ក្នុងរដូវកាលនេះ លោកនឹងប្រមូលប្រាក់បានមិនលើសពី 4,000ដុល្លារ បានបន្តទៀតថា “យើងត្រូវធ្វើធ្ងន់ពេញមួយឆ្នាំ តែប្រាក់ចំណូល បែរជាមិនគ្រប់ចិញ្ចឹមជីវិត”

ក្នុងអំឡុងច្រើនឆ្នាំមកនេះ វៀតណាមដែលជាប្រទេសអ្នកនាំចេញកាហ្វេ អង្ករ និងត្រីអណ្ដែងជាចម្បងស្រាប់ហើយនោះ បានចាប់ផ្ដើមងាកមកផ្ដល់ចំណាប់អារម្មណ៍លើដំណាំផ្លែឈើរបស់ខ្លួនវិញម្ដង ដោយកាលពីឆ្នាំ2018 វៀតណាមបាននាំចេញបន្លែ និងផ្លែឈើក្នុងតម្លៃសរុបប្រមាណជា 3,760លានដុល្លារ៕

ប្រភព៖ សារព័ត៌មានបរទេស

June 10, 2020

Category: សង្គម និងសេដ្ឋកិច្ច