សង្គម និងសេដ្ឋកិច្ច - La Reine Media

Alibaba អាចដើរបញ្ច្រាសទិសឆ្លងកាត់មហាវិបត្តិសុខភាពពិភពលោកដោយរបៀបណា?

SARS បានជាន់ពន្លិចក្រុមហ៊ុនធំៗជាច្រើន ប៉ុន្តែវាក៏ជាតំណភ្ជាប់ដែលជួយបង្កើតបានជា “មេមាន់ពងមាស” Taobao ហើយដូចគ្នានេះដែរ Alibaba ក៏កំពុងតែរកបានប្រាក់ចំណេញរាប់លានដុល្លារនៅក្នុងសម័យ COVID-19។

កាលពី17ឆ្នាំមុន នៅពេលដែលរោគរាតត្បាត SARS ឆ្លងរាលដាលពេញទឹកដីចិន បុគ្គលិកទាំងអស់របស់ Alibaba ត្រូវបានតម្រូវឱ្យរក្សាគម្លាតសង្គម និងយកការងារក្រុមហ៊ុនទៅធ្វើនៅឯផ្ទះ។ ដំណាក់កាលនោះ ក្រុមហ៊ុន Alibaba ទើបតែមានអាយុ4ឆ្នាំប៉ុណ្ណោះ និងត្រូវប្រឹងប្រែងគិតគូរអំពីប្រាក់ចំណេញតាមបែបក្រុមហ៊ុនថ្មី (startup)។

ប៉ុន្តែ ដោយសារតែវិបត្តិសុខភាព SARS នោះហើយ បានរុញច្រាន Alibaba ឱ្យបង្កើត Taobao ដែលជាផ្សារអនឡាញមួយដើម្បីទប់ទល់ និងប្រើប្រាស់ប្រយោជន៍ដែលបានមកពី SARS។ មកដល់បច្ចុប្បន្ន Taobao គឺជាទីផ្សារលក់រាយធំជាងគេមួយនៅក្នុងពិភពលោក។

ចំណែក COVID-19 វិញ បើទោះជាបានក្លាយជាក្រុមហ៊ុនពាណិជ្ជកម្មលំដាប់កំពូលរបស់ពិភពលោក ប៉ុន្តែ Alibaba នៅតែមិនអាចគេចផុតពីរលកវិបត្តិសុខភាព ហើយត្រូវការចាំបាច់នូវការសម្របខ្លួនដើម្បីឆ្លងកាត់ឧបសគ្គនេះ។ ក្រុមហ៊ុន “យក្ស” មួយនេះ បានរកឃើញឱកាសដើម្បីធ្វើឧបនីយកម្មឌីជីថលទៅលើសកម្មភាពតាំងពិព័រណ៍វិស័យពាណិជ្ជកម្មនៅក្នុងពេលដែលគម្រោងតាំងពិព័រណ៍បែបបុរាណនានាត្រូវបានពន្យារពេល ឬលុបចោល ដោយសារវីរុសCOVID-19។ យោងតាម Alibaba សកម្មភាពខាងលើនេះអាចជួយធ្វើឱ្យ “ផ្លូវដើរ” របស់បណ្ដាក្រុមហ៊ុនតូចៗ មានភាពរាបស្មើល្អជាងមុន។

កាលពីថ្ងៃទី9កន្លងទៅ Abibaba បានប្រកាសបញ្ចេញមុខងារថ្មីៗជាច្រើនសម្រាប់ Alibaba.com ក្នុងបំណងជំរុញការតភ្ជាប់រវាងអ្នកផ្គត់ផ្គង់អន្តរជាតិជាមួយនឹងអតិថិជន។ ក្នុងចំណោមផលិតផលថ្មីជាច្រើនដែលទើបត្រូវបានឧទ្ទេសនាមក៏មាន Online Trade Show USA ផងដែរ ដែលផ្ដល់ជូនបទពិសោធន៍ជាច្រើនក្នុងការតភ្ជាប់ក្រុមហ៊ុនជាមួយនឹងក្រុមហ៊ុន (B2B) ជាកន្លែងដែលក្រុមអ្នកលក់និងអ្នកផលិតនៅសហរដ្ឋអាមេរិកអាចចាប់យកអតិថិជនថ្មី។

John Caplan ប្រធានក្រុមហ៊ុន Alibaba ប្រចាំសហរដ្ឋអាមេរិកនិងអឺរ៉ុប បានឱ្យដឹងថា “ពិព័រណ៍ពាណិជ្ជកម្មអនឡាញសំដៅទៅលើបណ្ដាក្រុមហ៊ុនខ្នាតតូច។ ដោយមានជម្រើសផ្នែកឌីជីថល ពួកគេនឹងមិនចាំបាច់ចំណាយពេលច្រើនថ្ងៃ និងប្រាក់រាប់ពាន់ដុល្លារដើម្បីធ្វើដំណើរទៅចូលរួមពិព័រណ៍ offline នោះឡើយ”។

ថ្មីៗនេះ ការបង្កើនមុខងារឌីជីថលសម្រាប់វេទិកាពាណិជ្ជកម្ម Alibaba.com បានក្លាយជាគោលដៅយុទ្ធសាស្ត្រអាទិភាពរបស់ក្រុមហ៊ុន Alibaba។ ក្រុមហ៊ុននេះមិនរំលងចោលទីផ្សារដ៏មានសក្ដានុពលរបស់វេទិកា B2B នៅក្នុងសម័យ COVID-19 នេះឡើយ ខណៈដែលក្រុមហ៊ុនខ្នាតតូចនាំគ្នាបង្កើនការស្វែងរកឧបករណ៍ឌីជីថលដើម្បីបម្រើ និងស្វែងរកអតិថិជន។

ក្រៅពីនេះ Alibaba បានឱ្យដឹងថា ខ្លួននឹងបន្ថែមមុខងារជាច្រើនផ្សេងទៀតទាក់ទិននឹងជំនួយផ្នែកហិរញ្ញវត្ថុពាណិជ្ជកម្ម និងដឹកជញ្ជូនទំនិញ ក្នុងបំណងកែលម្អសេវាកម្ម និងដោះស្រាយបញ្ហា “ឈឺចាប់” ក្នុងទីផ្សារពាណិជ្ជកម្មរបស់ពិភពលោកផងដែរ។ ជាមួយនឹងជម្រើសជំនួយពាណិជ្ជកម្ម អតិថិជនដែលបានឆ្លើយតបនឹងលក្ខខណ្ឌដែលបានកំណត់នឹងអាចបញ្ជាទិញទំនិញតាមរយៈឧបករណ៍ឌីជីថល និងធ្វើការទូទាត់ក្នុងរយៈពេល60ថ្ងៃ ក្រោយពីទទួលបានទំនិញ។ ជាធម្មតា ការដោះដូរពាណិជ្ជកម្មឆ្លងព្រំដែនរវាងក្រុមហ៊ុនខ្នាតតូច តែងតម្រូវឱ្យទូទាត់មុន100% មុននឹងផ្ញើទំនិញ ដែលនេះបង្កជាឧបសគ្គធំចំពោះចរន្តសាច់ប្រាក់របស់អ្នកទិញ។

Alibaba ឱ្យដឹងថា ខ្លួនកំពុងធ្វើការជាមួយ MSTS ដែលជាក្រុមហ៊ុនឥណទានប្រភេទ B2B ដើម្បីកំណត់ថា អ្នកទិញណាខ្លះមានលក្ខខណ្ឌគ្រប់គ្រាន់។ ក្រុមហ៊ុននេះក៏កំពុងសហការជាមួយ Freightos ដែលមានជំនាញក្នុងវិស័យដឹកជញ្ជូនទំនិញបែបឌីជីថល ដើម្បីជួយដល់បណ្ដាក្រុមហ៊ុនក្នុងការប្រៀបធៀបតម្លៃ និងគ្រប់គ្រងការដឹកជញ្ជូនសម្រាប់សកម្មភាពដឹកទំនិញដោយប្រើកម្មវិធីអនឡាញ។

មុននោះ បន្ទាប់ពី COVID-19 បានផ្ទុះឡើងនៅប្រទេសចិនភ្លាម Alibaba ក៏បានប្រកាសវិធានការជំនួយចំនួន20ចំណុចដើម្បីជួយដល់បណ្ដាក្រុមហ៊ុនដែលរងផលប៉ះពាល់ពីរោគរាតត្បាត។ ក្នុងពេលដែលហាងនានានៅចិនបានបិទទ្វារ អ្នកលក់ក៏បានងាកមកប្រើ Taobao Live ដើម្បីស្វែងរកអតិថិជន និងដើម្បីរក្សាចំណូល។ Taobao Live ថែមទាំងបានបើកទ្វារទទួលកសិករពីគ្រប់ទិសទីក្នុងប្រទេសចិន ដើម្បីជួយពួកគេក្នុងការដាក់លក់កសិផលតាមអនឡាញទៀតផង។

ជាក់ស្ដែង ជាមួយនឹងកម្មវិធី “Rural Support Program” ដែលបានបង្ហាញវត្តមានចាប់ពីខែកុម្ភៈ កសិករចិនអាចចូល និងប្រើប្រាស់ឆាណែលផ្សាយផ្ទាល់របស់ Taobao Live ដោយមិនគិតថ្លៃ។ Taobao Live ប្រកាសថា នឹងជួយដល់ហាងលក់រាយ offline ចំនួនជាង200,000កន្លែងក្នុងការបណ្ដុះបណ្ដាលបុគ្គលិកជាង10,000នាក់របស់ហាងទាំងនោះ ឱ្យក្លាយជាអ្នកដឹកនាំ livestream ប្រកបដោយប្រសិទ្ធភាព។

Taobao Live បានដាក់ផែនការបង្កើតប្រាក់ចំណូល 2.1ពាន់លានដុល្លារពីការលក់កសិផលរបស់ខេត្តចំនួន16នៅប្រទេសចិនក្នុងឆ្នាំនេះ។

Freshippo ដែលជាបណ្ដាញហាងលក់រាយគ្រឿងចាបហួយថ្មីរបស់ Alibaba ក៏រកបានចំណេញច្រើនក្នុងសម័យ COVID-19 នេះដែរ។ Freshippo អនុញ្ញាតឱ្យអតិថិជនបញ្ជាទិញផ្ទាល់នូវអាហារស្រស់តាមរយៈកម្មវិធីអនឡាញជាមួយនឹងជម្រើសប្រគល់ទំនិញដោយមិនប៉ះពាល់គ្នា។

ឧបករណ៍អនឡាញផ្សេងមួយទៀតរបស់ Alibaba គឺ DingTalk ក៏បានបន្ថែមមុខងារថ្មីដែលអនុញ្ញាតឱ្យបុគ្គលិកជាង200លាននាក់មកពីក្រុមហ៊ុនជាង10លាននៅប្រទេសចិន រក្សាទំនាក់ទំនងដើម្បីរៀនសូត្រ ធ្វើការជាដើមនៅក្នុងសម័យវិបត្តិសុខភាពនេះដែរ។

ប្រតិបត្តិការជីឌីថលគឺជាឧបករណ៍ដ៏អស្ចារ្យក្នុងសង្គ្រាមប្រឆាំង COVID-19។ លោក Jack Ma ធ្លាប់បានថ្លែងថា អ្នកដែលមានឧបករណ៍អនឡាញស្រាប់នឹងមានប្រៀបជាងអ្នកដទៃក្នុងការបង្កើនការលក់នៅក្នុងសម័យ COVID-19នេះ៕

ប្រភព៖ សារព័ត៌មានបរទេស

June 12, 2020

ដំរីជាង3,000ក្បាល កំពុង “អត់ការងារធ្វើ” ដោយសារ COVID-19 (វីដេអូ)

ឥទ្ធិពលរបស់ COVID-19 បានបណ្ដាលឱ្យទីតាំងគ្រប់គ្រងសត្វដំរីនានានៅប្រទេសថៃ ត្រូវបង្ខំចិត្តប្រគល់ដំរីដែលកំពុងប្រឈមនឹងហានិភ័យនៃការស្លាប់ដោយសារអត់អាហារ ទៅឱ្យម្ចាស់ដើមវិញ។

ដំរីជាង3,000ក្បាលនៅប្រទេសថៃគឺជាដំរីដែលស្និទ្ធស្នាលជាមួយមនុស្ស ប៉ុន្តែដោយសារតែឥទ្ធិពលរបស់ COVID-19 កន្លែងគ្រប់គ្រងដំរីជាច្រើនត្រូវបានបិទទ្វារចាប់ពីខែមីនា2020 នាំឱ្យដំរីជាង3,000ក្បាលនេះបានធ្លាក់ទៅក្នុងវិបត្តិ “គ្មានការងារធ្វើ” និងប្រឈមមុខទៅនឹងការបាត់បង់ជីវិតដោយសារដាច់អាហារ។

“នៅពេលនេះ យើងមិនមានប្រភពចំណូលអ្វីទៀតនោះទេ ប៉ុន្តែ ដំរីទាំងនោះនៅតែត្រូវការចំណីដូចធម្មតា” នេះបើតាមគ្រូបង្វឹកដំរី លោក Sinchai Joroenbunpod។

ប្រាក់ចំណាយទៅលើការថែទាំដំរីមួយក្បាល អាចឡើងដល់30ដុល្លារសម្រាប់មួយថ្ងៃ។ ប៉ុន្តែ អ្វីដែលជាបញ្ហាគួរឱ្យព្រួយបារម្ភជាងនេះ នោះគឺហានិភ័យនៃការកើតមាន “ជម្លោះ” រវាងដំរីជាមួយនឹងប្រជាជនក្នុងភូមិ។

ដំរីនានាអាចដើរវង្វេងផ្លូវក្នុងព្រៃ និងចូលដល់ភូមិឋាន ឬចំការរបស់ពលរដ្ឋដើម្បីស្វែងរកអាហារ។ ប្រការនេះអាចបង្កឱ្យកើតមានការប៉ះទង្គិចគ្នាជាមួយនឹងមនុស្ស។

ប្រភព៖ AFP

June 12, 2020

តើស្រ្តីមានគភ៌អាចងូតត្រាំទឹកក្តៅបានទេ? និងមានសុវត្ថិភាពដែរឬទេ?

នៅពេលអ្នកដឹងថា ខ្លួនមានផ្ទៃពោះហើយនោះ អ្នកតែងតែមានសំនួរ និងចំណុចសង្ស័យកើតឡើងនៅក្នុងចិត្តជាច្រើនថា តើពេលមានផ្ទៃពោះយើងអាចធ្វើបែបនេះ ឬបែបនោះបានដែរឬទេ? រស់នៅ និងធ្វើការងារដូចដែលធ្លាប់បានធ្វើមកបានដែរឬទេ? និងសំនួរដែលជួបប្រទះញឹកញាប់មួយរឿងទៀតនោះគឺ តើការងូតទឹកក្តៅឧណ្ហៗ ឬការត្រាំទឹកក្តៅឧណ្ហៗអាចធ្វើបានទេ? ហើយបើត្រូវការងូតទឹកក្តៅឧណ្ហៗ ឬគេងត្រាំទឹកក្តៅឧណ្ហៗយូរដើម្បីឱ្យរាងកាយបានធូរស្រាលនោះ តើត្រូវធ្វើយ៉ាងណាដើម្បីឱ្យមានសុវត្ថិភាព? សម្រាប់សំនួរទាំងអស់នេះ ឡារ៉ែនមានចម្លើយមកជម្រាបជូន។

1 – ស្រ្តីមានគភ៌អាចងូតទឹកក្តៅឧណ្ហៗបាន តែត្រូវកុំឱ្យក្តៅជ្រុលពេក មិនត្រូវឱ្យក្តៅលើសសីតុណ្ហភាពរបស់រាងកាយរបស់អ្នកនៅពេលនោះឡើយ ព្រោះបើអ្នកងូតទឹកដែលក្តៅខ្លាំងពេក អាចធ្វើឱ្យបេះដូងរបស់អ្នកលោតញាប់ និងប្រព័ន្ធឈាមរត់ដែលហូរវឹលលឿនជ្រុលពេកអាចធ្វើឱ្យទារកក្នុងគភ៌មានសភាវតានតឹងធុញថប់បាន។

2 – ក្នុងអំឡុងពេលតាំងគភ៌ 3 ខែដំបូងអាចងូតទឹកក្តៅឧណ្ហៗ ឬត្រាំទឹកក្តៅឧណ្ហៗបាន តែត្រូវមិនឱ្យក្តៅជ្រុលពេកនោះទេ ព្រោះទឹកដែលក្តៅជ្រុលពេក អាចធ្វើឱ្យឆ្អឹងកងខ្នង និងតួកំណើតជីវិតកើតសភាវមិនសមប្រកបបាន។

3 – មិនគួរងូតត្រាំទឹកក្តៅឧណ្ហៗយូរលើសពី 15 នាទីទេ ព្រោះអំឡុងពេលដែលអ្នកងូតត្រាំទឹកក្តៅឧណ្ហៗនោះ សីតុណ្ហភាពក្នុងរាងកាយរបស់អ្នកនឹងកើនឡើងទៅតាមនោះដែរហ្នឹងឯង។

4 – បើអ្នកស្ថិតក្នុងអំឡុងពេលតាំងគភ៌ 3 ខែដំបូង អាចនឹងកើតមានអាការវិលមុខ ក្អួតចង្អោ ខ្យល់គ ដូច្នេះបើត្រូវការងូតត្រាំទឹកក្តៅឧណ្ហៗនោះ គួរតែត្រៀមទឹកភេសជ្ជៈទុកញ៉ាំបំបាត់អាការវិលមុខផង និងមិនគួរដាក់គន្លឹះទ្វាបន្ទប់ទឹកឡើយ។

5 – ការដែលស្រ្តីមានគភ៌ងូតត្រាំទឹកក្តៅឧណ្ហៗនេះនឹងធ្វើឱ្យមានការធូរស្រាលសាច់ដុំក្នុងផ្នែកផ្សេងៗបានល្អ ជាពិសេសសាច់ដុំបាតជើង និងខ្នង។ នៅពេលរាងកាយបានធូរស្រាល នឹងធ្វើឱ្យស្រ្តីមានគភ៌គេងលក់រឹតតែស្រួលឡើងដែរ។

6 – ស្រ្តីមានផ្ទៃពោះដែលមានអាការហើមតាមរាងកាយដូចជា ដៃ ជើងជាដើមនោះ យើងណែនាំឱ្យងូត ឬត្រាំទឹកក្តៅឧណ្ហៗ ព្រោះវានឹងជួយកាត់បន្ថយអាការហើមតាមរាងកាយបានល្អខ្លាំងណាស់។

7 – ការងូតទឹកក្តៅឧណ្ហៗនឹងជួយសម្រាលអាការបង្រួញខ្លួនរបស់ស្បូនមុនកំណត់ និងថែមទាំងជួយឱ្យទឹកភ្លោះស្ថិតក្នុងកម្រឹតល្អទៀតផង។

ការងូតទឹកក្តៅឧណ្ហៗក្នុងអំឡុងពេលមានគភ៌ មានទាំងចំណុចល្អ និងចំណុចត្រូវប្រយ័ត្ន ដូច្នេះស្រ្តីមានគភ៌ដែលចូលចិត្តងូត ឬត្រាំទឹកក្តៅឧណ្ហៗអាចធ្វើបានតាមប្រក្រតី តែត្រូវគ្រប់គ្រងកម្រឹតកម្តៅរបស់ទឹកដែលនឹងងូត ឬត្រាំនោះឱ្យស្ថិតក្នុងសីតុណ្ហភាពដែលសមរម្យល្មមក៏គ្រប់គ្រាន់ហើយ៕

June 12, 2020

Drone តាក់ស៊ីហោះ145គម/ម៉ោង ចាប់ផ្ដើមដំណើរការដឹកទំនិញហើយ

ម៉ូដែលតាក់ស៊ីហោះ EHang នឹងអាចដឹកទំនិញទៅដល់ផ្ទះរបស់ប្រជាជន ក្រោយពីទទួលបានលិខិតអនុញ្ញាតរកស៊ីពីរដ្ឋាភិបាលចិន។

ម៉ូដែលតាកស៊ីហោះគ្មានមនុស្សបើករបស់ក្រុមហ៊ុនបច្ចេកវិទ្យា EHang នៅក្នុងខេត្តក្វាងចូវ ប្រទេសចិន បំពាក់ម៉ាស៊ីនរុញច្រានចំនួន16 អាចដឹកទំនិញទម្ងន់150គីឡូក្រាមនៅក្នុងជើងហោះហើរនីមួយៗ ហើយអាចហោះហើរទៅដល់តំបន់ដាច់ស្រយាល និងតំបន់ភ្នំទៀតផង។ ក្រុមហ៊ុន EHang ឱ្យដឹងថា drone ខ្នាតធំរបស់ពួកគេគឺជាមធ្យោបាយហោះហើរដឹកអ្នកដំណើរដោយស្វ័យប្រវត្ត ដែលដំណើរការដោយអគ្គិសនីដំបូងគេបង្អស់ក្នុងពិភពលោក។

កាលពីថ្ងៃទី27ឧសភា ក្រុមហ៊ុន EHang បានប្រកាសថា ពួកគេទទួលបានលិខិតអនុញ្ញាតពីរដ្ឋបាលអាកាសចរណ៍ស៊ីវិលចិន (CAAC/Civil Aviation Administration of China) រួចហើយ ដើម្បីប្រើប្រាស់ drone ដឹកទំនិញ។ ដោយមានល្បឿន 145គម/ម៉ោង ម៉ូដែលតាក់ស៊ីហោះនេះអាចដឹកទំនិញឆ្លងកាត់រវាងតំបន់វាលរាបជាមួយនឹងតំបន់ភ្នំ ឬរវាងតំបន់ដីគោកជាមួយនឹងតំបន់កោះនៅទីក្រុង Taizhou នៅក្នុងការហោះហើរសាកល្បងកន្លងមក។

ក្រុមហ៊ុន EHang បានចែករំលែកវីដេអូបង្ហាញអំពីម៉ូដែលតាក់ស៊ីហោះ EHang 216 ហោះហើរឆ្លងកាត់ផ្ទៃសមុទ្រ និងខ្នងភ្នំនានា។ Drone នេះត្រូវបានហោះហើរសាកល្បងជាលើកដំបូងនៅអឺរ៉ុបកាលពីខែមេសា2019។ EHang 216 អាចដឹកភ្ញៀវចំនួន2នាក់ក្នុងពេលតែមួយ។

កាលពីខែឧសភា2020 ក្រុមហ៊ុន EHang បានចុះកិច្ចព្រមព្រៀងជាមួយនឹងសណ្ឋាគារ LN Garden Hotel នៅខេត្តក្វាងចូវដើម្បីផ្ដល់សេវាកម្មដឹកអ្នកទេសចរក្នុងអនាគតដ៏ខ្លីខាងមុខ។ បច្ចុប្បន្ន អាជ្ញាធរចិនមិនទាន់ផ្ដល់លិខិតអនុញ្ញាតឱ្យក្រុមហ៊ុននេះដឹកអ្នកដំណើរនៅឡើយ។ ប៉ុន្តែ ការទទួលបានលិខិតអនុញ្ញាតឱ្យដឹកទំនិញគឺជាជំហានដ៏ជោគជ័យមួយសម្រាប់ក្រុមហ៊ុនបច្ចេកវិទ្យា EHang៕

ប្រភព៖ Fox News

June 12, 2020

ឆ្នេរខ្សាច់កោះដ៏ស្រស់ស្អាតដែលកកើតឡើងដោយសារ “លាមក” របស់ត្រី Parrot (វីដេអូ)

ឆ្នេរសមុទ្រដ៏ស្រស់ស្អាតនៅលើកោះ Vakkaru បានកកើតឡើងដោយសារលាមកដ៏ច្រើនសន្ធឹករបស់ពពួកត្រីមួយប្រភេទដែលមានឈ្មោះថា Parrot ក្រោយពីពួកវាស៊ីផ្កាថ្ម និងជុះខ្សាច់ចេញមកក្រៅ។

ប្រទេស Maldives មានឈ្មោះល្បីល្បាញខ្លាំងដោយមានឆ្នេរខ្សាច់ដ៏ស្រស់ស្អាត។ ប៉ុន្តែ យ៉ាងតិចមានកោះចំនួនមួយក្នុងចំណោមកោះដ៏ច្រើននៅទីនេះ បានកកើតឡើងតាមរយៈវិធីដ៏មហាកំពូលចម្លែក។

ចំណុចពណ៌ក្រហមគឺជាទីតាំងនៃប្រទេស Maldives

ខ្សាច់នៅលើកោះ Vakkaru របស់ប្រទេស Maldives តាមពិតគឺមានផ្ទុកទៅដោយលាមកត្រីយ៉ាងច្រើនមិនគួរឱ្យជឿ។ ជាក់ស្ដែង ខ្សាច់នៅលើឆ្នេរកោះ Vakkaru នេះគឺជាកាកសំណល់លាមករបស់ត្រី Parrot ពីរប្រភេទ។ ត្រី Parrot មានពណ៌សម្បូរបែប និងមានប្រវែងប្រមាណពី 0.3 ទៅ 1.2ម៉ែត្រ។

ត្រី Parrot ប្រើប្រាស់ធ្មេញខាងក្រៅដ៏រឹងមាំដើម្បីខាំបំបែកផ្កាថ្ម និងស៊ីប៉ូលិបរបស់ផ្កាថ្ម (Coral Polyps) រួមនឹងសារ៉ាយ។ល។ ដោយសារតែមានប្រព័ន្ធធ្មេញមួយផ្សេងទៀតនៅក្នុងបំពង់ករបស់ពួកវា បំណែកផ្កាថ្មដែលវាបានលេបចូលដល់បំពង់ក ក៏ត្រូវបានធ្មេញនៅត្រង់នោះទំពាជាកម្ទេចល្អិតជាងមុន។ បន្ទាប់មក ពួកវាក៏ជុះចេញមកក្រៅក្រោមរូបភាពជាខ្សាច់។

ប្រការខាងលើនេះបានកើតឡើងក្នុងទំហំច្រើនឡើងៗ និងឆ្លងកាត់ពេលវេលាដ៏យូរអង្វែង ខ្សាច់ដែលជាលាមករបស់ត្រី Parrot ក៏បង្កើតបានជាឆ្នេរសមុទ្រដ៏ស្រស់ស្អាតនៅលើកោះ Vakkaru រហូតមកដល់សព្វថ្ងៃ។

ត្រី Parrot ដែលមានធ្មេញរឹងមាំ អាចខាំកម្ទេចផ្កាថ្មធ្វើជាចំណី

ប្រភព៖ GeoBeats/Youtube

June 11, 2020

កូរ៉េខាងត្បូង ត្រៀមខ្លួនបានយ៉ាងល្អ ដើម្បីដណ្តើមពាន AFC U-19 Championship

សហព័ន្ធកីឡាបាល់ទាត់កូរ៉េខាងត្បូងបាន ប្រកាសកោះហៅកីឡាករចំនួន 36រួប ដើម្បីចូលក្នុងជំរំហ្វឹកហាត់ ចម្រាញ់យកកីឡាករចំនួន 23នាក់ចុងក្រោយ ឱ្យចូលទៅក្នុងឈុតយុវជនអាយុក្រោម 19ឆ្នាំរបស់កូរ៉េខាងត្បូង ដើម្បីប្រកួតក្នុងពានរង្វាន់យុវជនអាយុក្រោម 19ឆ្នាំ ប្រចាំទ្វីបអាស៊ី។

ក្រោមការដឹកនាំរបស់លោក Kim Jung-soo បានកត់ត្រានូវកំណត់ត្រាដ៏ល្អឥតខ្ចោះ ក្នុងការប្រកួតជម្រុះពានរង្វាន់ AFC U-19 Championship ឆ្នាំ2020 ដោយឈ្នះទាំង 3ប្រកួត ជាមួយនឹងការរកគ្រាប់បាល់បាន 18គ្រាប់ ដើម្បីក្លាយជាក្រុមលេខ1 ក្នុងពូល I។ នេះជាព្រឹត្តិការណ៍សំខាន់មួយទៀត ដោយក្រុមខ្លាំង4 នៃជុំផ្ដាច់ព្រ័ត្រ នឹងធ្វើជាតំណាងទ្វីបអាស៊ី ចូលរួមការប្រកួតបាល់ទាត់យុវជនពិភពលោក អាយុក្រោម 21ឆ្នាំ នៅឆ្នាំ2021 (2021 FIFA U-20 World Cup) នៅប្រទេសឥណ្ឌូនេស៊ី។

ការប្រកួតបាល់ទាត់ពានរង្វាន់ 2020 AFC U-19 Championship នឹងចាប់ផ្តើមនៅថ្ងៃទី 14 ខែតុលា រហូតដល់ថ្ងៃទី31 ខែតុលា ឆ្នាំ2020 នៅក្នុងប្រទេសអ៊ូបេគីស្ថាន ដោយមានក្រុមខ្លាំងៗចំនួន16 មកពីបណ្តាប្រទេសនានានៅក្នុងទ្វីបអាស៊ី៕

June 11, 2020

Xiaomi រួចរាល់សម្រាប់ការស្រាវជ្រាវ 6G ហើយ…

ខណៈដែលទីផ្សារស្មាតហ្វូន 5G នៅឆ្នាំ2019 និង2020 បានកើនឡើង ក្រុមហ៊ុន Xiaomi ដែលជាក្រុមហ៊ុនផលិតស្មាតហ្វូនដ៏ធំមួយក្នុងនៅចិន បានបំពាក់ប្រព័ន្ធ 5G ជាច្រើនម៉ូដែល និងបានចេញលក់លើទីផ្សាររួចហើយ។

យោងតាមសារព័ត៌មានចិន abacusnews ដែលបានដកស្រង់សម្ដីអគ្គនាយក និងជាស្ថាបនិកលោក Jie Lun បានបង្ហើបឱ្យដឹងពីគម្រោង 5ឆ្នាំរបស់ Xiaomi បាននិងកំពុងសិក្សា ព្រមទាំងត្រៀមរួចរាល់ហើយក្នុងការស្រាវជ្រាវអភិវឌ្ឍន៍ប្រព័ន្ធ 6G ដើម្បីអនាគតនៃការតភ្ជាប់របស់ប្រព័ន្ធទូរស័ព្ទ។

លើសពីនេះទៀត Xiaomi ទើបនឹងចុះកិច្ចព្រមព្រៀងជាមួយ ZTE ក្នុងការស្រាវជ្រាវអភិវឌ្ឍន៍ប្រព័ន្ធ 6G ប៉ុណ្ណោះមិនបានប៉ះពាល់ដល់រឿង Satellite នោះទេ។ លោក Jie Lun ក៏បានច្រានចោលផងដែរ នូវពាក្យចចាមអារ៉ាមដែលថា ក្រុមហ៊ុន Xiaomi កំពុងអភិវឌ្ឍបច្ចេកវិទ្យាផ្កាយរណប(Satellite) ទៅកាន់ទីអវកាសដោយខ្លួនឯង៕

June 11, 2020

ពុទ្ធោ!! ម៉ែរួយ ឱបម្ដាយយំរំឭកអាតីតកាលរឿងភ្លើងឆេះផ្ទះ

មុនទទួលបានជោគជ័យលើអាជីវកម្មអនឡាញដូចសព្វថ្ងៃនេះ ម៉ែរួយ ដែលគ្រប់គ្នាស្គាល់ថាជាអគ្គនាយិកាក្រុមហ៊ុន Rouy Infinity Co,.ltd នោះធ្លាប់ជួបរឿងរ៉ាវ និងឧបសគ្គជាច្រើនដែលហែលឆ្លងក្នុងជីវិត។ ម៉ែរួយ បានឱ្យដឹងថា កាលពីជាង១០ឆ្នាំមុនក្រោយពីឪពុកចែកឋានទៅខ្លួន និងអ្នកម្ដាយបានទៅធ្វើការងារនៅប្រទេសថៃដើម្បីយកកម្រៃមកជួយផ្គត់ផ្គង់គ្រួសារ និងឲ្យប្អូនរៀនសូត្រ។

ធ្វើការនៅប្រទេសថៃ៣ឆ្នាំឃើញថាជីវិតគ្រួសាររបស់ ម៉ែរួយ ចាប់ផ្ដើមប្រសើរឡើងគួរឲ្យកត់សម្គាល់រហូតសន្សំប្រាក់បានទុកមករកស៊ីនៅស្រុកខ្មែរក្នុងពេលដ៏ខ្លីខាងមុខទៀតផង។ ប៉ុន្តែក្ដីសង្ឃឹមត្រូវបានរលាយដូចអំបិលត្រូវទឹកក្រោយភ្លើងឆាបឆេះផ្ទះខ្ទេចខ្ទីគ្មានសល់ បើសរុបជាទឹកប្រាក់ទ្រព្យសម្បត្តិដែលខូចខាតដោយសារភ្លើងឆេះផ្ទះអស់ជាង១ម៉ឺនដុល្លារអាមេរិក។ ដោយអំឡុងពេលនោះ ម៉ែរួយ កំពុងតែធ្វើការនៅប្រទេសថៃ គ្រាន់តែទទួលបានដំណឹងថាភ្លើងឆេះផ្ទះអស់ខ្ទេចខ្ទីគ្មានសល់បានធ្វើឲ្យអគ្គនាយិកា Rouy Infinity Co,.ltd អស់កម្លាំងទាន់ដៃជើងធ្វើអ្វីមិនកើត ព្រោះទ្រព្យសម្បត្តិខំរកច្រើនឆ្នាំបែរជាត្រូវរលាយត្រឹមមួយប៉ប្រិចភ្នែក។

ជាមួយអារម្មណ៍ក្ដុកក្ដួល ម៉ែរួយ រៀបរាប់ទាំងទឹកភ្នែកយំឱបអ្នកម្ដាយជាទីស្រឡាញ់ថា៖” ក្រោយភ្លើងឆេះផ្ទះហើយខ្ញុំមិនបានត្រឡប់មកស្រុកខ្មែរតាមការគ្រោងទុកនោះទេ ពេលហ្នឹងមានតែនៅប្រទេសថៃ ធ្វើការរកលុយជាមួយបងប្អូនបន្ថែមទៀត ដើម្បីយកមកធ្វើផ្ទះ។ ដោយកាលនោះម៉ាក់ទៅនៅផ្ទះបងប្អូន ព្រោះផ្ទះយើងឆេះអស់អត់មានកន្លែងនៅទេ។ ខ្ញុំបានខ្ចីលុយថៅកែផ្ញើរមកឲ្យម៉ែដើម្បីធ្វើផ្ទះ”។ ម៉ែរួយ បន្ថែមទៀតថា ដូច្នេះវាមិនងាយស្រួលនោះទេទម្រាំតែជីវិតខ្លួនបានជោគជ័យដូចសព្វថ្ងៃនេះគឺជួបរឿងរ៉ាវកម្សត់ជូរចត់ជាច្រើនដែលនឹកស្មានមិនដល់ ព្រោះជីវិតគ្រួសារក្រោយភ្លើងឆេះផ្ទះរួចគឺធ្លាក់ដល់សូន្យហៅលែងលឺតែម្ដង។ ជាចុងក្រោយ ម៉ែរួយ សូមផ្ដាំផ្ញើរដល់ពូកម៉ែបងប្អូន ប្រសិនបើមានរឿងអ្វីមួយដូចខ្លួនកុំបាក់ទឹកចិត្តត្រូវតែបន្តពុះពាររាល់ឧបសគ្គហើយគិតថាខ្លួនយើងអាចធ្វើវាបានហើយដាក់គោលដៅឲ្យបានច្បាស់លាស់នោះជីវិតយើងនឹងជោគជ័យហើយ៕

June 11, 2020

វិធីសាស្ត្រចម្បងៗសម្រាប់ជំរុញការទិញដូររបស់ពលរដ្ឋដែលអាជ្ញាធរចិនកំពុងអនុវត្តដើម្បីសង្គោះសេដ្ឋកិច្ចក្រោយវិបត្តិ COVID-19

ដើម្បីអាចជួយសង្គ្រោះសេដ្ឋកិច្ចរបស់ខ្លួន ប្រទេសចិនបាននិងកំពុងចែកជូនប័ណ្ណទិញទំនិញដល់ពលរដ្ឋ បើកបន្ថែមផ្សាររាត្រីនិងហាងទំនិញអនុគ្រោះពន្ធ ព្រមទាំងអនុញ្ញាតឱ្យមានការលក់ទំនិញចល័តក្នុងក្រុងទៀតផង។ល។

កាលពីចុងសប្ដាហ៍កន្លងទៅ មនុស្សម្នានាំគ្នាទៅកាន់វិថីណានជីងខាងកើត (Nanjing Dong) ដែលជាតំបន់ទិញដូរដ៏ធំមួយរបស់ទីក្រុងសៀងហៃ។ តូបលក់ទំនិញប្រមាណជា20 ត្រូវបានសង់ឡើងនៅក្នុងតំបន់ក្បែរផ្លូវ Nanjing Dong ដើម្បីលក់អាហារ ផ្កា និងទំនិញផ្សេងៗ។ ស្ត្រីវ័យ25ឆ្នាំម្នាក់បានអះអាងថា “ប្រទេសចិនបានយកឈ្នះលើ COVID-19ហើយ។ ខ្ញុំបានជាប់នៅក្នុងផ្ទះអស់រយៈពេលជាច្រើនសប្ដាហ៍ ដូច្នេះ ព្រឹត្តិការណ៍បែបនេះគឺពិតជាគួរឱ្យចាប់អារម្មណ៍ខ្លាំងណាស់”។

ព្រឹត្តិការណ៍នៅតំបន់ក្បែរផ្លូវ Nanjing Dong នេះគ្រាន់តែជាផ្សាររាត្រីមួយក្នុងចំណោមផ្សាររាត្រីជាច្រើនដែលទីក្រុងសៀងហៃបានចាប់ផ្ដើមបង្កើតឡើងតាំងពីដើមខែមិថុនានេះ។ អាជ្ញាធរទីក្រុងសហការជាមួយបណ្ដាក្រុមហ៊ុនលក់រាយ និងក្រុមហ៊ុនបច្ចេកវិទ្យាដើម្បីបង្កើតព្រឹត្តិការណ៍ទិញដូរទ្រង់ទ្រាយធំជាបន្តបន្ទាប់។ អាជ្ញាធរទីក្រុងសៀងហៃក៏បានលើកទឹកចិត្តឱ្យមជ្ឈមណ្ឌលពាណិជ្ជកម្មនានា អូសបន្លាយពេលវេលានៃការបើកទ្វារនៅចុងសប្ដាហ៍ផងដែរ។

ទន្ទឹមនឹងការបើកបន្ថែមផ្សាររាត្រី សកម្មភាពចែកប័ណ្ណទិញទំនិញបញ្ចុះតម្លៃ coupon និងប័ណ្ណប្ដូរយកទំនិញឬទិញទំនិញបញ្ចុះតម្លៃ voucher ក៏ជាជម្រើសដ៏ពេញនិយមនៅតំបន់ផ្សេងៗទៀតរបស់ប្រទេសចិន។ ទីក្រុងសៀងហៃបានចែកប័ណ្ណ coupon ដែលមានតម្លៃសរុបឡើងដល់2ពាន់លានដុល្លារអាមេរិក និងបានសហការជាមួយក្រុមហ៊ុន Alibaba ដើម្បីចែកប័ណ្ណ voucher ដែលមានតម្លៃសរុប13ពាន់លានយន់ (1.84ពាន់លានដុល្លារអាមេរិក) ចាប់ពីខែឧសភាដល់ខែមិថុនា2020។ ពលរដ្ឋចិនអាចប្រើប្រាស់ប័ណ្ណ voucher ដើម្បីទិញទំនិញនៅលើគេហទំព័រនានា ផ្សារលក់ទំនិញចាបហួយ ផ្សារទំនើប ភោជនីយដ្ឋាន និងទីតាំងពាណិជ្ជកម្មផ្សេងៗទៀត។

ដូចគ្នានេះដែរ រដ្ឋធានីប៉េកាំង ក៏បានសម្រេចចិត្តចែកប័ណ្ណ voucher ដែលមានតម្លៃ12.3ពាន់លានយន់ (1,742,000,000 ដុល្លារអាមេរិក) ទៅឱ្យពលរដ្ឋរបស់ខ្លួន ដោយមានកិច្ចសហការពីក្រុមហ៊ុនលក់រាយ។ នៅឯទីក្រុង Wuhan វិញ ក្រុមហ៊ុន Alibaba និង Tencent Holdings បានផ្ដល់ជំនួយជាប័ណ្ណ voucher ដែលមានតម្លៃសរុប 500លានយន់ (70,825,812ដុល្លារអាមេរិក) នៅក្នុងចំណោម voucher ដែលមានតម្លៃ 2.3ពាន់លានយន់ (325,798,739) ដែលទីក្រុងនេះបានបោះផ្សាយចែកជូនពលរដ្ឋ។

ដើម្បីជំរុញការទិញដូរ តំបន់ខ្លះរបស់ប្រទេសចិន ក៏បានលុបចោលបម្រាមដែលទាក់ទងនឹងការលក់ទំនិញចល័ត។ កន្លងមក រាប់ចាប់ពីឆ្នាំ2000 សកម្មភាពលក់ដូរចល័តត្រូវបានចាត់ទុកថាជាអំពើខុសច្បាប់នៅក្នុងតំបន់មួយចំនួន ដោយមូលហេតុថា ដើម្បីសុខភាពសាធារណៈ និងដើម្បីរួមចំណែកក្នុងការកែលម្អសោភ័ណភាពរបស់ទីក្រុង។ ក្រុមអ្នកលក់ទំនិញចល័ត កោះណោះត្រូវប្រឈមនឹងដេញចាប់របស់ក្រុមប៉ូលិស និងសន្តិសុខ។ល។

យុវវ័យកំពុងដើរឆ្លងកាត់មជ្ឈមណ្ឌលពាណិជ្ជកម្មមួយរបស់ Wangfujing

ប៉ុន្តែ បច្ចុប្បន្ន តំបន់ជាច្រើនបានផ្អាក ឬបន្ធូរបន្ថយបញ្ហាខាងលើនេះហើយ ដើម្បីជួយសង្គ្រោះបណ្ដាក្រុមហ៊ុន សហគ្រាសខ្នាតតូច។ នៅទីក្រុងក្វាងចូវ (Guangzhou) ទីលាននានាក្នុងមជ្ឈមណ្ឌលពាណិជ្ជកម្ម និងចំណតរថយន្ត កំពុងត្រូវបានប្រើប្រាស់ដើម្បីជួលទៅឱ្យក្រុមអ្នកលក់ទំនិញចល័ត។

ចំណែកការពង្រីកសកម្មភាពលក់ទំនិញអនុគ្រោះពន្ធក៏ជាជម្រើសមួយផ្សេងទៀតដើម្បីជំរុញការទិញដូរនៅទីក្រុងប៉េកាំង។ កាលពីថ្ងៃទី10មិថុនាកន្លងទៅ Wangfujing Group ដែលជាក្រុមហ៊ុនលក់រាយធំជាងគេមួយនៅប្រទេសចិន បានឱ្យដឹងថា ខ្លួនបានទទួលលិខិតអនុញ្ញាតឱ្យលក់ទំនិញអនុគ្រោះពន្ធពីក្រសួងហិរញ្ញវត្ថុរួចហើយ។ នេះគឺជាលិខិតអនុញ្ញាតលើកទី8 ដែលក្រសួងនេះបានផ្ដល់ឱ្យក្រុមហ៊ុនផ្សេងៗ ហើយលើកនេះគឺដើម្បីជំរុញការទិញដូរក្រោយសម័យ COVID-19។

Wangfujing Group គឺជាម្ចាស់គ្រប់គ្រងនៃមជ្ឈមណ្ឌលពាណិជ្ជកម្មប៉េកាំងដ៏ល្បីឈ្មោះនៅក្នុងរដ្ឋធានីរបស់ប្រទេសចិន។ ក្រុមហ៊ុននេះមានមជ្ឈមណ្ឌលពាណិជ្ជកម្មយ៉ាងតិច54នៅក្នុងទីក្រុងចំនួន33របស់ចិន។

អ្នកវិភាគ Fan Junhao និង Xu Zhuonan មកពីក្រុមហ៊ុន China International Capital Corp (CICC) កាលពីថ្ងៃទី10មិថុនា បានឱ្យដឹងថា “ការចាយវាយនឹងងើបឡើងវិញក្រោយពីគោលនយោបាយបើកទូលាយសកម្មភាពលក់ទំនិញអនុគ្រោះពន្ធនៅលើកបណ្ដាកោះ និងនៅតាមតំបន់ទីក្រុង”។

លោក Li Keqiang នាយករដ្ឋមន្ត្រីចិន (រូបខាងស្ដាំ)

កាលពីខែមេសា រដ្ឋមន្ត្រីក្រសួងពាណិជ្ជកម្មចិនក៏បានឱ្យដឹងថា នឹងកែលម្អគោលនយោបាយ និងជួយបង្កើនចំនួនហាងលក់ទំនិញអនុគ្រោះពន្ធនៅតាមអាកាសយានដ្ឋាននិងនៅទីក្រុងនានា ដើម្បីជាផ្នែកមួយនៃផែនការជំរុញការទិញដូរ។ ថ្មីៗនេះ ទីក្រុងក្វាងចូវក៏កំពុងតែដាក់ពាក្យសុំបង្កើតហាងទំនិញអនុគ្រោះពន្ធជាច្រើនផងដែរ។

យោងតាម SCMP ការបង្កើនចំនួនផ្សារ និងហាងលក់ទំនិញអនុគ្រោះពន្ធក៏នឹងជួយឱ្យទីក្រុងប៉េកាំង ឆ្លើយតប បានល្អទៅនឹងការសន្យាបើកទ្វារសេដ្ឋកិច្ចសម្រាប់បណ្ដាក្រុមហ៊ុនបរទេស នៅក្នុងស្ថានភាពដែលដៃគួពាណិជ្ជកម្មធំៗ កំពុងតវ៉ាអំពីភាពអយុត្តិធម៌ដែលអាជ្ញាធរចិនបានធ្វើចំពោះបណ្ដាក្រុមហ៊ុនបរទេសដែលកំពុងរកស៊ីនៅប្រទេសនេះ។

ក្នុងរយៈពេល4ខែដើមឆ្នាំ2020 ចំណូលបានមកពីការលក់រាយនៅប្រទេសចិន បានថយចុះ 16.2% បើធៀបជាមួយនឹងអំឡុងពេលដូចគ្នាកាលពីឆ្នាំ2019 ខណៈដែល GDP បានធ្លាក់ចុះ 6.8% នៅក្នុងត្រីមាសដំបូង។ នៅក្នុងរបាយការណ៍ស្ដីអំពីការងាររបស់រដ្ឋាភិបាលនៅចំពោះសភាជាតិកាលពីខែមុន នាយករដ្ឋមន្ត្រីចិន Li Keqiang បានអះអាងថា សកម្មភាពជំរុញការទិញដូរក្នុងប្រទេសនឹងជួយរក្សាលំនឹងសេដ្ឋកិច្ច និងជាកម្លាំងជំរុញចម្បងសម្រាប់ជួយដល់កំណើនសេដ្ឋកិច្ចក្នុងឆ្នាំនេះ៕

ប្រភព៖ SCMP/Nikkei

June 11, 2020

សំណួរសាកល្បងភាពឆ្លាតវៃលំដាប់ភ្នាក់ងារ FBI…ដើម្បីសាកល្បងសមត្ថភាពក្នុងការសង្កេតរបស់លោកអ្នក

ភ្នាក់ងារ FBI របស់អាមេរិក គឺជាអាជីពមួយ ដែលពិបាកក្នុងការប្រឡងចូលទៅបម្រើការខ្លាំងបំផុតលើពិភពលោក តាមរយៈស្ថិតិដែលមានមិនដល់ 5%ផង របស់អ្នកចូលប្រឡង ដែលអាចឆ្លងផុតការសាកល្បង…។

ខាងក្រោមនេះ គឺជាសំណួរមួយ ដែលឡារ៉ែន បានចម្រាញ់យកមកសាកល្បងសមត្ថភាពក្នុងការសង្កេត និងប្រើហេតុផលរបស់មិត្តអ្នកអាន ថាតើលោកអ្នកអាចឆ្លងផុតសំណួរសាកល្បងក្នុងការប្រឡងចូលធ្វើជាភ្នាក់ងារ FBI បានដែរឬទេ?

សំណួរ៖ ឃាតកររោគចិត្តដ៏ឃោរឃៅម្នាក់ ដែលចូលចិត្តចាប់ពង្រត់មនុស្សយកមកសម្លាប់ បានបង្ខំឱ្យជនរងគ្រោះជ្រើសរើសលេបថ្នាំ 1គ្រាប់ ក្នុងចំណោមថ្នាំ 2គ្រាប់។ គេប្រាប់ថា 1គ្រាប់ ជាថ្នាំពុល(លេបទៅស្លាប់ភ្លាម) និង 1គ្រាប់ទៀត ជាថ្នាំធម្មតា(មិនពុល)។ រៀងរាល់លើក ឃាតករនឹងឱ្យជនរងគ្រោះជាអ្នកជ្រើសរើសយកថ្នាំមុនជានិច្ច បន្ទាប់ពីនោះគេនឹងលេបថ្នាំ ដែលជនរងគ្រោះមិនជ្រើសយកនោះ ហើយគេមិនដែលស្លាប់ឡើយ។

សំណួរសួរថា តើហេតុអ្វីបានជារៀងរាល់លើក គេមិនលេបចំថ្នាំពុល?

ចម្លើយ៖ ការពិតទៅ ថ្នាំទាំង 2គ្រាប់នោះ មិនមែនជាថ្នាំពុលទាំងអស់ តែទឹកនៅក្នុងកែវរបស់ជនរងគ្រោះទៅវិញទេ ដែលមានជាតិពុល ព្រោះគ្រប់ពេលដែលជនរងគ្រោះលេបថ្នាំ គឺត្រូវតែលេបជាមួយទឹកជាធម្មតា…ដូច្នេះប្រាកដណាស់ ជនរងគ្រោះនឹងស្លាប់ យ៉ាងមិនបាច់សង្ស័យឡើយ៕

ប្រែសម្រួលពីឯកសារបរទេសដោយ ទិទីតំតាតូ

June 11, 2020

Category: សង្គម និងសេដ្ឋកិច្ច