Category: សង្គម និងសេដ្ឋកិច្ច

ក្រសួង​អប់រំ យុវជន និង​កីឡា បច្ចុប្បន្ននេះ កំពុង​យកចិត្តទុកដាក់​ក្នុងការ​បណ្តុះបណ្តាល​សិស្ស​តាមរយៈ​បច្ចេកវិទ្យា​ព័ត៌មាន និង​ការអប់រំ​ពី​ចម្ងាយ​ដើម្បី​ធ្វើយ៉ាងណា​ជំរុញ​ឱ្យ​សិស្ស​គ្រប់ទិសទី​នៅក្នុង​ប្រទេស​ទទួលបាន​ការអប់រំ បើទោះបី​ជាមាន​ឧបសគ្គ​ខ្លះ​កើតចេញពី​បញ្ហា Covid-19 ក៏ដោយ។

ក្រសួង​អប់រំ បាន​បញ្ជាក់ថា ចាប់តាំងពី​ដើមឆ្នាំ2019មក ក្រសួង​អប់រំ យុវជន និង​កីឡា បាន​កំណត់ថា ចក្ខុវិស័យ​ដើម្បី​ឱ្យមាន​សេដ្ឋកិច្ច​ឌីជីថល លុះត្រាតែ​មានការ​អប់រំ​បែប​ឌីជីថល។ ការអប់រំ​ឌីជីថល​ក្នុង​បរិបទ​ឧស្សាហកម្ម 4.0 មាន​សារៈសំខាន់​ខ្លាំងណាស់​សម្រាប់​កម្ពុជា​ក្នុងការ​បោះជំហាន​ឱ្យ​ក្លាយជា​ប្រទេស​ដែលមាន​សេដ្ឋកិច្ច​ឌីជីថល និង​រដ្ឋាភិបាល​ឌីជីថល ដោយសារ​ផ្នែក​ទាំងអស់នេះ​ត្រូវការ​អ្នកជំនាញ​ជាច្រើន​ដើម្បី​បំពេញការងារ និង​គ្រប់គ្រង​ប្រព័ន្ធ​ឆ្លាត​វៃ​ទាំងអស់នោះ។

ស្របតាម​ចក្ខុ​វិស័យនេះ ក្រសួង​អប់រំ យុវជន និង​កីឡា បាន និង​កំពុង​រៀបចំ មូលដ្ឋាន​មូលដ្ឋានគ្រឹះ​សម្រាប់​ការអប់រំ​ឌីជីថល  ឱ្យ​ឆ្លើយតប​ជាមួយ​យុគ្គសម័យ​បច្ចេកវិទ្យា​តាមរយៈ​ការធ្វើកំណែទម្រង់​គ្រឹះស្ថានសិក្សា និង​កំណែទម្រង់​ការបណ្តុះបណ្តាល​គ្រូ ដោយ​ធ្វើយ៉ាងណា​ឱ្យ​ភាគី​ពាក់ព័ន្ធ​ទាំងអស់​មាន​សមត្ថភាព​ខ្ពស់​ខាង​ផ្នែក​បច្ចេកវិទ្យា មុននឹង​ចែករំលែក​បន្តទៅ​ដល់​សិស្សានុសិស្ស​ដែលជា​ធនធានមនុស្ស​ជំនាន់​ថ្មី។

ក្រសួង​អប់រំ​ថា ការអប់រំ​បែប​ឌីជីថល ជាការ​ប្រើប្រាស់​ប្រកបដោយ​នវានុវត្តន៍​នៃ​ឧបករណ៍ និង​បច្ចេកវិទ្យា​ឌីជីថល​ក្នុងការ​បង្រៀន និង​ការរៀន ក៏ដូចជា​គ្រប់គ្រង​លើ​ការបង្រៀន និង​ការរៀន។ ក្នុងន័យនេះ ការអប់រំ​តាមរយៈ​ប្រព័ន្ធ​អេឡិចត្រូនិក ជា​ប្រព័ន្ធ​នៃ​ការអប់រំ​តាមបែប​ឌីជីថល​មួយបែប ដែលមាន​មូលដ្ឋាន​ចេញពី​ការអប់រំ​ផ្លូវការ និង​ប្រើប្រាស់​ធនធាន​អេឡិចត្រូនិក​ជា​ជំនួយ។ ការសិក្សា​ពី​ចម្ងាយ ជា​វិធីសាស្ត្រ​មួយ​ដែល​សិស្ស​អាច​ទទួល​បានការ​អប់រំ សម្រាប់​អភិវឌ្ឍ​សម្បទា​ទាំង4 គឺ​ពុ​ទិ្ធ​សម្បទា បំ​ណិ​ន​សម្បទា កាយសម្បទា និង​ចរិយា​សម្បទា ដោយ​ពុំ​ចាំបាច់​មាន​វត្ត​មាននៅ​សាលារៀន ឬ​ជួប​ជាមួយ​គ្រួ​ផ្ទាល់៕

យោងតាមទំព័រហ្វេសប៊ុកផ្លូវការរបស់មហោស្រពភាពយន្តខ្លីចតុមុខ ដែលបង្ហោះជាផ្លូវការប៉ុន្មានថ្ងៃមុននេះ បានប្រកាសឱ្យដឹងថា ដោយសារបញ្ហាកូវីដ19នៅកម្ពុជា ធ្វើឲ្យមហោស្រពភាពយន្តខ្លីចតុមុខ2020 សម្រេចពន្យាពេលទទួលរឿងប្រកួតរហូតដល់ ថ្ងៃទី30 ខែមិថុនា ឆ្នាំ2020 ខាងមុខនេះ ជំនួសឱ្យកាលបរិច្ឆេទចាស់ដែលបានកំណត់។

តាមការបញ្ជាក់របស់លោក គាំ វុត្ថា តំណាងអ្នករៀបចំមហោស្រពភាពយន្តខ្លីចតុមុខ2020 មូលហេតុដែលក្រុមការងារនៅបន្តទទួលរឿងប្រកួតបែបនេះ មិនមែនដោយសាររឿងដែលទទួលបានតាមការកំណត់មានចំនួនតិចនោះទេ តែនេះជាសំណូមពររបស់អ្នកមានបំណងដាក់រឿងចូលប្រកួត តែយឺតយ៉ាវការផលិតដោយសារការត្បាតនៃវីរ៉ុសកូ19។

លោកឱ្យដឹងបន្ថែមថា ទោះនៅបន្តទទួលរឿងប្រកួត តែការរៀបចំមហោស្រពភាពយន្តខ្លីចតុមុខ2020 លើកទី9 នៅតែប្រារព្ធឡើងតាមការគ្រោងដដែរ តែរៀបចំនៅទីតាំងណានោះ ក្រុមការងារមិនទាន់អាចបញ្ជាក់បាននៅឡើយ។ បើប្រៀបទៅនិងឆ្នាំ2019 ចំនួនរឿងដែលដាក់ចូលប្រកួតឆ្នាំនេះមានការថមថយប្រមាណ30ទៅ40%។ តែទោះយ៉ាងនេះក្តី តាមគម្រោងមហោស្រពភាពយន្តខ្លីចតុមុខ2020នឹងលេចរូបរាងឡើងនៅអំឡុង ខែ កញ្ញា ឆ្នាំ2020ខាងមុខនេះ។

នេះចាត់ទុកជាដំណឹងល្អមួយសម្រាប់អ្នកមានបំណងដាក់រឿងដែលខ្លួនផលិត ដើម្បីចូលប្រកួតមហោស្រពភាពយន្តខ្លីចតុមុខ2020។ រួសរាន់ឡើង! ប្រញាប់ដាក់ពាក្យតាមរយៈ www.filmfreeway.com/csff ឥឡូវនេះ! សម្រាប់ព័ត៌មានបន្ថែម សូមទាក់ទងប្រអប់សារ ឬ [email protected] ឬទូរស័ព្ទទៅលេខ: 016689190

ការប្រើលេខសម្ងាត់តែមួយ ត្រូវបានចាត់ទុកថា មិនគ្រប់គ្រាន់សម្រាប់ការពារគណនីសំខាន់ៗ ដូចជា គណនីធនាគារជាដើមឡើយ ដូច្នេះហើយទើបត្រូវមានប្រព័ន្ធការពារសុវត្ថិភាពតាមរយៈ two-factor authentications ដែលទាមទារឱ្យមានការបញ្ជាក់លេខសម្គាល់តាមរយៈលេខទូរស័ព្ទ ឬអ៊ីមែល បន្ថែមលើលេខសម្ងាត់ ទើបអាចចូលក្នុងគណនីបាន។

ប៉ុន្តែវិធីបញ្ជាក់នេះ ក៏នៅមានភាពចន្លោះប្រហោងក្នុងការការពារសុវត្ថិភាពដែរ ដោយជនអនាមិកអាចប្រើវិធីផ្សេងៗ ដើម្បីលួចទទួលបានលេខបញ្ជាក់ទាំងនោះ។

ដើម្បីការពារសុវត្ថិភាពឱ្យកាន់តែល្អ ក្រុមហ៊ុនមួយចំនួនបានបង្កើតកូនសោសុវត្ថិភាពដូចជា Titan Security Keys និង YubiKey 5Ci ជាដើម ដើម្បីចូលក្នុងគណនី។

ថ្មីៗនេះក្រុមហ៊ុន Google ដោយបានសហការជាមួយក្រុមហ៊ុន Apple ដោយបានកែសម្រួលការផ្ទៀងផ្ទាត់ 2ជំហាន (2-Step Verification) នេះ ឱ្យកាន់តែល្អជាមួយឧបករណ៍ប្រព័ន្ធ iOS ដោយអាចឱ្យអ្នកប្រើប្រាស់ iPhone និង iPad អាចបើកសោចូលប្រើគណនី Google តាមរយៈ USB/NFC security keys បាន ​ដើម្បី​ការពារ​សុវត្ថិភាពឯកសារសំខាន់ៗ ពីការលួចចូលយកពីដោយ​ក្រុម Hacker ឬជនអនាមិក។

ជាមួយការកែសម្រួលនេះ អ្នកគ្រាន់តែដាក់កូនសោសុវត្ថិភាពដែលមានប្រព័ន្ធ NFC នៅជិត iPhone បន្ទាប់ពីបានបញ្ចូលឈ្មោះអ្នកប្រើ និងលេខសម្ងាត់រួចរាល់ ដើម្បីដោះលេខកូដសុវត្ថិភាពតែប៉ុណ្ណោះ។ សម្រាប់ iPad Pro លោកអ្នកអាចដោះលេខកូដតាមរយៈ USB-C បាន។ ការប្រើកូនសោសុវត្ថិភាពសម្រាប់ 2-Step Verification នេះ ត្រូវបានគេចាត់ទុកថា ជាវិធីការពារដ៏ខ្លាំងបំផុត ហើយដែលក្រុមហ៊ុន Google ទាមទារសម្រាប់ការប្រើជាមួយកម្មវិធីការពារកម្រិតខ្ពស់ (Advanced Protection Program)។

ដើម្បីប្រើប្រាស់មុខងារនេះជាមួយប្រព័ន្ធ NFC ឬ USB-C លោកអ្នកត្រូវមានទូរស័ព្ទ iPhone ឬ iPad ដែលមានប្រព័ន្ធដំណើរការ iOS ចាប់ពី 13.3 ឡើងទៅ និងមានកូនសោសុវត្ថិភាព USB/NFC។

សម្រាប់អ្នកប្រើប្រាស់ធម្មតាមួយចំនួនធំ មិនចាំបាច់ប្រើកូនសោសុវត្ថិភាពក៏បានដែរ ប៉ុន្តែត្រូវប្រើលេខសម្ងាត់ដែលពិបាកនឹងស្មាន ដូចដែលនាយកដ្ឋានបានណែនាំរួចមកហើយ ដោយឡែកចំពោះអ្នកដែលប្រើប្រាស់ទាក់ទងទៅនឹងឯកសារសំខាន់ៗ និងអ្នកគ្រប់គ្រងប្រព័ន្ធកុំព្យូទ័រព័ត៌មានវិទ្យា គួរតែប្រើកូនសោសុវត្ថិភាពនេះដើម្បីការពារគណនីរបស់អតិថិជន ក៏ដូចជាឯកសាររបស់ពួកគេផ្ទាល់ គឺជារឿងល្អប្រសើរបំផុត៕

ប្រភព៖ នាយកដ្ឋានប្រឆាំងបទល្មើសបច្ចេកវិទ្យា Anti Cyber Crime Department

បន្ទះ​ឈី​ប Snapdragon 6-series បាន​លេចចេញ​ជា​ផ្លូវការ​ដំបូង​គេ ដែល​គាំទ្រ​សេវា 5G សម្រាប់​ប្រើប្រាស់​លើ​ស្មា​ត​ហ្វូ​ន​ដែលមាន​តម្លៃ​ធូរ​ថ្លៃ បន្ថែម​ពីលើ​ឈី​ប Snapdragon 765G និង Snapdragon 865 ដែល​ប្រកាស​ចេញផ្សាយ​ដោយ Qualcomm ។

ឈី​ប​ជំនាន់​ចុងក្រោយបង្អស់ Snapdragon 690 នេះ មាន​បំពាក់​មកជា​មួយ​នូវ Modem X51 ដែលជា Modem 5G ។

គោលដៅ​របស់​ក្រុមហ៊ុន​ផលិត​បន្ទះ​ឈី​ប​ដ៏​ល្បីល្បាញ Qualcomm គឺ​ធ្វើយ៉ាងណា​ផ្ដល់នូវ​ស្មា​ត​ហ្វូ​ន 5G តម្លៃ​ធូរ​ថ្លៃ​ដល់​អតិថិជន​ទូទាំង​ពិភពលោក។ Snapdragon 690 នេះ​មាន​ល្បឿន CPU លឿន​ជាង​មុន 20% និង​ល្បឿន​ក្រាហ្វិក​លឿន​ជាង​មុន 60% បើ​ធៀប​នឹង​ឈី​ប Snapdragon 675។

ក្រៅពី​មាន​ពាំនាំ​នូវ​សេវា 5G ហើយ​នោះ ឈី​ប​ថ្មី​នេះ ក៏​អាច​គាំទ្រ​ការថត​វីដេអូ HDR កម្រិត 4K/30fps និង​គាំទ្រ​ការថតរូប​សន្លឹក​ដល់​ទំហំ 192MP ផងដែរ។

ក្រុមហ៊ុន HMD, LG, Motorola, Sharp, TCL និង Wingtech រំពឹងថា នឹង​ប្រកាស​ចេញ​ស្មា​ត​ហ្វូ​ន​ថ្មី ដែល​ប្រើ​ឈី​ប​ថ្មី​នេះ​ក្នុងពេលឆាប់ៗនេះ។ បន្ថែម​ពីលើ​នេះដែរ វា​ក៏មាន​គាំទ្រ​នូវ Refresh Rate នៃ​អេក្រង់​រហូតដល់ 120Hz នៅក្នុង​កម្រិត FHD+ និង​មាន Quick Charge 4+ ហើយ​មាន​គាំទ្រ​នូវ Wi-Fi 6 ទៀតផង។

នៅលើ​ឈី​ប​នេះ ក៏មាន AI Engine ជំនាន់​ថ្មី ដែល​ធ្វើឱ្យ​ការប្រើប្រាស់ Filter Snapchat កាន់តែ​រលូន មិនទាក់ៗដូច​មុន ហើយក៏​ជួយ​ដល់​ការផ្លាស់ប្ដូរ ពី​កាមេរ៉ា 1ប្រភេទ​ទៅ​កាមេរ៉ា 1ប្រភេទ​ទៀត ហើយ​កាន់​តែមាន​ភាពរលូន​ល្អ​ផងដែរ៕

បើតាម​ទិន្នន័យ​របស់​ក្រុមហ៊ុន​ស្រាវជ្រាវ​ទីផ្សារ Counterpoint Research បាន​បង្ហាញថា Huawei ជា​ក្រុមហ៊ុន​ដែល​កាន់កាប់​ចំណែក​ទីផ្សារ​សកល​បាន 21.4% ខណៈដែល Samsung កាន់កាប់ 18.1% ដូចនេះ Huawei បាន​ក្លាយជា​ក្រុមហ៊ុន​ដែល​អាច​លក់​ស្មា​ត​ហ្វូ​ន​បាន​ច្រើនជាងគេ​ក្នុង​លោក ប្រចាំ​ខែមេសា ឆ្នាំ2020 ដោយ​អាច​វ៉ា​ឈ្នះ Samsung បាន។

អនុប្រធាន​ផ្នែក​ស្រាវជ្រាវ​នៃ Counterpoint Research បាន​លើកឡើងថា Huawei បានទទួល​ផលប្រយោជន៍​ធំ ពី​ទីផ្សារ​ប្រទេស​ចិន ដែល​ខ្លួន​បាន​ពង្រឹង​ម៉ាក​យីហោ​របស់ខ្លួន តាំងពី​មានរឿង​ជាប់​ឈ្មោះ​ក្នុង​បញ្ជីខ្មៅ​របស់​អាមេរិក​ម​ក។ ជាងនេះទៅទៀត ដោយសារតែ​ទីផ្សារ​ស្មា​ត​ហ្វូ​ន​ចិន វិលត្រឡប់​មករក​ស្ថានភាព​ដើម​វិញ ទាំង​តម្រូវការ និង​ការផ្គត់ផ្គង់​នោះ ទើប​ធ្វើឱ្យ​ចំនួន​លក់​របស់ Huawei មានការ​កើនឡើង។

ក្នុង​របាយការណ៍ ថែមទាំង​មាន​បញ្ជាក់​ផងដែរ​ថា ទីផ្សារសំខាន់ៗ របស់ Samsung ដែលមាន​ដូចជា ឥណ្ឌា អាមេរិក​កណ្ដាល អាមេរិក​ឡាទីន និង​ផ្នែក​ខ្លះ​នៃ​តំបន់​អឺរ៉ុប គឺ​សឹងតែ​ធ្លាក់​ដល់​ចំណុចសូន្យ​នៅក្នុង​ខែមេសា។ តំបន់​ទាំងនេះ គឺ​ស្ថិតក្រោម​ការអនុវត្ត​គម្លាត​សង្គម និង​ការបិទ​ប្រទេស យ៉ាង​តឹងរ៉ឹង​នា​ខែមេសា ដែល​ធ្វើឱ្យ​ចំនួន​លក់​ត្រកូល Galaxy S20 មាន​អត្រា​ទាប។

សរុប​ជារួម នៅ​ខែមេសា មាន​ស្មា​ត​ហ្វូ​ន​ចំនួន​ជិត 70លាន​គ្រឿង បាន​បញ្ចេញ​លក់​លើ​ទីផ្សារ​សកល ដែល​វា​មានការ​ធ្លាក់ចុះ​រហូតដល់ 41% បើ​ធៀប​នឹង​រយៈពេល​ដូចគ្នា​កាល​ឆ្នាំមុន៕

ថ្មីៗនេះ​ក្រុមហ៊ុនទូរស័ព្ទ M1 បាន​សហការ​ជាមួយ​ក្រុមហ៊ុន Airbus ដែលជា​ក្រុមហ៊ុន​ផលិត​យន្តហោះ​ដ៏​ធំ​មួយ ដើម្បី​ធ្វើការ​សាកល្បង​បង្ហោះ​ដ្រូ​ន​នៅតាម​ឆ្នេរសមុទ្រ​នៃ​ប្រទេស​សិង្ហ​បុរី ដើម្បី​ទាញយក​អត្ថប្រយោជន៍​របស់​ប្រព័ន្ធ 5G។

ការសាកល្បង​នេះ គឺ​ដើម្បី​ធ្វើការ​វាយតម្លៃថា តើ​គេ​អាច​បង្ហោះ​ដ្រូ​ន​បាន​ដោយ​សុវត្ថិភាព និង​មាន​ប្រសិទ្ធភាព ដោយ​ប្រើ​ប្រព័ន្ធ 5G របស់​ក្រុមហ៊ុនទូរស័ព្ទ M1 បាន​ដល់​កម្រិតណា? ហើយ​វា​ក៏​ជា​ឧកាស​មួយ​ដើម្បីឱ្យ​ក្រុមហ៊ុន M1 សង្កេតមើល​ពី​ដំណើរការ​ប្រព័ន្ធ 5G ដែល​ទើបបាន​ដាក់ឱ្យ​ប្រើប្រាស់រ​បស់​គេ​ផងដែរ។ ការប្រើប្រាស់​បច្ចេកវិទ្យា 5G និង​ទិន្នន័យ​ពី​ប្រព័ន្ធ​បណ្ដាញ (Network-based data) គឺ​សម្រាប់​កំណត់​ទីតាំង ដែល​អាច​ផ្ដល់​ភាព​សុក្រឹត ជាង​ប្រព័ន្ធ GPS ទៅទៀត។ នេះ​បើតាម​ការផ្សព្វផ្សាយ​រប​ស់ M1។

ក្រៅពី​ការសាកល្បង​ប្រើ​បច្ចេកវិទ្យា 5G សម្រាប់​ការ​បង្ហោះ​ដ្រូ​ន កាលពី​ខែ​មុន​ក្រុមហ៊ុន IBM ក៏មាន​ផែនការ ក្នុង​ការធ្វើ​សហប្រតិបត្តិការ​ជាមួយ​ក្រុមហ៊ុន M1 និង Samsung ដើម្បី​បង្កើត​កម្មវិធី​សម្រាប់​វិស័យ​ផលិតកម្ម ដោយ​ប្រើ​បច្ចេកវិទ្យា 5G ជាមួយ AI និង Internet of Things (IoT) ផងដែរ។

ប្រព័ន្ធ 5G អាច​ផ្ដល់​ល្បឿន​រហូតដល់ 100ដង​នៃ​ល្បឿន​ប្រព័ន្ធ 4G (150-250Mbps v 20-30Mbps) ដែល​អាចឱ្យ​លោកអ្នក​ប្រើ​អ៊ី​ន​ធើ​ណិ​ត មើល​ភាពយន្ត និង​ទាញយក​ឯកសារផ្សេងៗបាន​យ៉ាង​លឿន ម្យ៉ាងវិញទៀត ប្រព័ន្ធ 5G ក៏​អាច​កាត់បន្ថយ​រយៈពេល​រង់ចាំ ក្នុងការ​ទំនាក់ទំនង​រវាង​ឧបករណ៍ (reduce latency) ដែល​នេះ​មាន​សារប្រយោជន៍​បំផុត​សម្រាប់​ប្រើ​ជាមួយ ឧបករណ៍​នៅក្នុង​មន្ទីរពេទ្យ និង​រថយន្ត​ដែល​អាច​បើក​បាន​ដោយ​ខ្លួនឯង​ជាដើម។ បច្ចេកវិទ្យា 5G ត្រូវបាន​គេ​ចាត់ទុកថា​ជា​បច្ចេកវិទ្យា​ជំនា​ន់ទី5 ដែលមាន​ការវិវឌ្ឍ​ខ្លាំង បើ​ប្រៀប​ទៅ​បច្ចេកវិទ្យា 4G សម្រាប់​ឧបករណ៍​ចល័ត៕

« ចាំច័ន្ទប្រណី » ជាចំណងជើងបទចម្រៀងថ្មីដែលបង្កប់រឿងរ៉ាវស្នេហាកំឡោះក្រមុំ លន្លង់លន្លោចអណ្ដែតអណ្ដូង កម្សត់ខូចចិត្ត ដែលជាការបកស្រាយយ៉ាងពីរោះរណ្ដំផ្អែមត្រជាក់ចិត្តដោយលោក ដួង វិរៈសិទ្ធ។ ជាការពិតណាស់គ្រប់បទចម្រៀងរបស់តារាចម្រៀងប្រុសរូបនេះ គឺមិនដែលធ្វើឱ្យហ្វេនៗទាំងឡាយខកបំណងនោះទេ ​គឺ​សុទ្ធ​សឹង​តែ​ជា​បទ​ពីរោះៗ​ខ្លាំង​ដែល​ពេញ​និយម​ក្នុង​ចិត្ត​យុវ​វ័យ ​ព្រម​ទាំង​ទទួល​បាន​​សន្ទុះ​នៃ​​ការ​គាំទ្រ​យ៉ាង​ខ្លាំងក្លា។

មួយរយៈចុងក្រោយនេះដែរ តារាចម្រៀង ដួង វិរៈសិទ្ធ មិនត្រូវបានគេឃើញបញ្ចេញបទចម្រៀងនៅក្នុងផលិតកម្មរស្មីហង្សមាសនោះទេ ពោលគឺ យូរៗទើបបានចេញមួយបទ ជាពិសេសគឺបទចម្រៀងបែបមនោសញ្ចេតនាស្រុកស្រែ។ លោកបែរជាងាកមកចេញបទចម្រៀងនៅលើបណ្ដាញសង្គមយូរធូប ដែលជាប្រភេទបទខូវើ និងបទនិពន្ធថ្មីជាដើម។ គេនៅមិនទាន់ច្បាស់ថា តារាចម្រៀងប្រុសសំឡេងផ្អែមរូបនេះ នៅមានកុងត្រាក្នុងផលិតកម្មធំដូចមុនទៀតឬអត់ទេ។ មានអ្នកខ្លះបានបន្ថែមថា តារាចម្រៀង ដួង វិរៈសិទ្ធ អាចជាតារាចម្រៀងឯក។ ក៏ប៉ុន្ដែ បើទោះបីជាបទចម្រៀងនៅក្នុងផលិតកម្មពុំសូវឃើញមានច្រើនក៏ពិតមែន តែអាស្រ័យលើទេពកោសល្យ និងទឹកដមសំឡេងរបស់តារាប្រុសរូបនេះ ទើបធ្វើឱ្យប្រជាប្រិយភាពពីអ្នកគាំទ្រនៅតែមិនបាត់បង់។

ដើម្បីកុំឱ្យខាតពេលយូរ សូមស្ដាប់ និងទស្សនាបទចម្រៀងថ្មីរបស់តារាចម្រៀងប្រុស ដួង វិរៈសិទ្ធ គឺបទ« ចាំច័ន្ទប្រណី » ៖

ក្រុម​អ្នក​វិទ្យា​សាស្ត្រ​នៅ​ឯសាកល​វិទ្យា​ល័យ​បច្ចេក​វិទ្យា​ Queensland (QUT) បាន​ពិសោធ​រក​ប្រភព​ធន​ធាន​ថ្មី​​ ចម្លែក​ ដើម្បី​ប្រើ​ប្រាស់​ជា​ផលិត​ផល​បច្ចេក​វិទ្យា​។ ពួកគេ​បាន​រកឃើញ​ថា សក់​របស់​មនុស្ស​ដែល​បាន​មក​ពី​ហាង​កាត់​សក់​នានា​ អាច​យក​មក​ច្នៃ​ជា​អេក្រង់​​​ OLED ប្រភេទ​សរី​រាង្គ​បាន​។

សក់​គឺជា​ប្រភព​នៃ​កាបូន​ និង​​អាសូត​សរីរាង្គ​ដ៏​ល្អ​ ដែលមាន​ប្រយោជន៍​ក្នុង​ការ​បង្កើត​បាន​ជា​គ្រាប់​ល្អិត​បញ្ចេញ​ពន្លឺ​។ សក់​ត្រូវ​បាន​អ្នក​វិទ្យា​សាស្ត្រ​ដុត​​ដោយ​ប្រើ​កម្ដៅ​240​អង្សាសេ​ដើម្បី​បង្កើត​ជា​វត្ថុ​ធាតុ​មួយ​ដែល​មាន​ផ្ទុក​សារ​ធាតុ​កាបូន​និង​អាសូត​។ បន្ទាប់​មក​ វត្ថុ​ធាតុ​នេះ​ត្រូវ​បាន​ច្នៃ​ឱ្យ​ទៅ​ជា​គ្រាប់​​មហា​ល្អិត​ណាណូ​កាបូន (carbon nano​dots) ដែល​មាន​ទំហំ​តូច​ជាង​10ណាណូម៉ែត្រ​ (nanometer)។ សក់​មនុស្ស​1សរសៃ​មាន​ទំហំ​ស្មើ​នឹង​ 75,000​ណាណូម៉ែត្រ។

ក្រោយ​​មក​ គ្រាប់​ណាណូ (nanodots) ទាំង​នេះ​ត្រូវ​បាន​បែង​ជា​ចំណែក​តាម​រយៈ​ការ​ប្រើ​សារ​ធាតុ​ polymer ដើម្បី​​ឱ្យ​ពួក​វា​តភ្ជាប់​ជាមួយ​គ្នា​ ក្នុង​បំណង​បង្កើត​បាន​ជា​វត្ថុ​ធាតុ​មួយ​ដែល​ក្រុម​អ្នក​វិទ្យា​សាស្ត្រ​ហៅ​ថា “កោះ​ណាណូ” (nano island)​។ នេះ​គឺជា​វត្ថុ​ធាតុ​ដែល​អាច​យក​ទៅ​ធ្វើ​ជា​ស្រទាប់​សកម្ម​នៅក្នុង​ឧបករណ៍អេក្រង់​ OLED។

នៅ​ពេល​ដែល​ចរន្ត​អគ្គិសនី​តូច​មួយ​ត្រូវ​បាន​បញ្ជូន​ឆ្លង​កាត់​ បណ្ដា​ណាណូ​ដត​ទាំង​នេះ​នឹង​បញ្ចេញ​ពន្លឺ​ពណ៌​ខៀវ។​ ថ្វី​បើ​វា​មិន​ភ្លឺ​ពេក​ ប៉ុន្តែ​វា​នៅ​តែ​មាន​ប្រយោជន៍​សម្រាប់​ផលិត​អេក្រង់​ខ្នាត​តូច​ ដូច​ជា​ឧបករណ៍​ពាក់​នៅ​លើ​រាង​កាយ​មនុស្ស​ជា​ច្រើន​។

Prashant Sonar ដែល​ជា​សមាជិក​សំខាន់​ម្នាក់របស់​ក្រុម​អ្នក​វិទ្យា​សាស្ត្រ​ខាង​លើ​បាន​ឱ្យ​ដឹង​ថា៖ “បណ្ដា​ឧបករណ៍​បញ្ចេញ​ពន្លឺ​តាម​បែប​សរីរាង្គ​​ដែល​មាន​ប្រភព​ពី​កាបូន​ (ដូច​ជា​សក់) អាច​ត្រូវ​បាន​ប្រើ​ជា​ឧបករណ៍​ក្នុង​ផ្ទះ​ ដូច​ជា​​ប្រអប់​ឆ្លាត​វៃ​ជា​ដើម​។ ពួក​វា​ក៏​អាច​ត្រូវ​បាន​ប្រើ​ប្រាស់​ពេល​គេ​ត្រូវ​ការ​ប្រភព​ពន្លឺ​​ស្រាលៗ​​ដូច​ជា​នៅ​លើ​បន្ទះ​ក្ដារ​ជូន​ដំណឹង​។ល។ ក្រៅ​ពី​នេះ ដោយ​សារ​តែ​​មិន​ប៉ះពាល់​ដល់​សុខ​ភាព​ វា​ក៏​អាច​ត្រូវ​បាន​ប្រើ​នៅ​ក្នុង​វិស័យ​វេជ្ជ​សាស្ត្រ​ផងដែរ”​។

ក្រុម​អ្នក​វិទ្យា​សាស្ត្រ​ខាងលើ​បាន​បញ្ជាក់​ថា ក្នុង​អនាគត​ដ៏ខ្លី​ខាងមុខ រោម​សត្វ​ ដូច​ជា​ចៀម​ និង​សត្វ​ចិញ្ចឹម​ផ្សេង​ទៀត​ ក៏​នឹង​ត្រូវ​បាន​យក​មក​ធ្វើ​ជា​ឧបករណ៍​បច្ចេក​វិទ្យា​ដូច​គ្នា​នេះ​ដែរ​។

លទ្ធផល​នៃ​ការ​សិក្សា​ស្រាវ​ជ្រាវ​ខាង​លើ​ ត្រូវ​បាន​ចុះ​ផ្សាយ​នៅ​លើ​ទំព័រ​ទស្សនាវដ្ដី Advanced Materials៕

ប្រភព៖ New Atlas

Thai Kim Sim មក​ពី​ក្រុម​ហ៊ុន​ Supermax Corp និង Lim Kuang Sia មក​ពី​ក្រុម​ហ៊ុន​ Kossan Rubber មាន​ទ្រព្យ​លើស​ពី​1​ពាន់​លាន​ដុល្លារ​អាមេរិក​គិត​មក​ដល់​ឆ្នាំ​នេះ​ ដោយ​សារ​ពួកគេ​​​ផលិត​ស្រោម​ដៃ​កៅ​ស៊ូ។

ម៉ាឡេស៊ី​ដែល​ជា​ប្រទេស​ផលិត​ស្រោម​ដៃ​កៅស៊ូ​ប្រមាណ​ជា​65​%​ ក្នុង​ចំណោម​ស្រោម​ដៃកៅ​ស៊ូ​សរុប​​ដែល​ត្រូវ​បាន​ផលិត​នៅ​ទូទាំង​ពិភពលោក​ បច្ចុប្បន្ន​មាន​មហា​សេដ្ឋី​យ៉ាង​តិច​ចំនួន​4​រូប​ដែល​ស្ថិត​ក្នុង​វិស័យ​នេះ​។ ក្នុង​នោះ មាន​2​រូប​ទើប​តែ​​បាន​ក្លាយ​ជា​មហា​សេដ្ឋី​នៅក្នុង​ឆ្នាំ​2020​។​ យោង​តាម​ Bloomberg Billionaires Index អ្នក​ជំនួញ​ Thai Kim Sim មក​ពី​ក្រុម​ហ៊ុន​ Supermax Corp គឺជា​ឈ្មោះ​ថ្មី​បំផុត​ដែល​ទើប​ត្រូវ​បាន​កត់​ត្រា​ក្នុង​បញ្ជី​នេះ​ (Bloomberg Billionaires Index) ជាមួយ​នឹង​ទ្រព្យ​សម្បត្តិ​បច្ចុប្បន្ន​ឡើង​ដល់ខ្ទង់​​1​ពាន់​លាន​ដុល្លារ​អាមេរិក​។ លោក Thai Kim Sim បាន​ក្លាយ​ជា​មហា​សេដ្ឋី​ក៏​ព្រោះ​តែ​តម្លៃ​មូល​បត្រ​របស់​ក្រុ​ម​ហ៊ុន​នេះ​បាន​កើន​ឡើង​ខ្ពស់​​ក្នុង​ខែ​មិថុនា​។ ចំណែក​ Lim Kuang Sia មក​ពី​ក្រុម​ហ៊ុន​ Kossan Rubber ក៏​ជា​មហាសេដ្ឋី​ថ្មី​នៅក្នុង​ឆ្នាំ​2020​នេះ​ ដោយ​មាន​ទ្រព្យ​​ 1.1​ពាន់​លាន​ដុល្លារ​។

តម្រូវ​ការ​ទូទាំង​ពិភពលោក​បាន​កើន​ឡើង​ខ្ពស់​ នាំ​ឱ្យ​តម្លៃ​មូលបត្រ​របស់​បណ្ដា​ក្រុម​ហ៊ុន​ផលិត​សម្ភារ​ការ​ពារ​សុខ​ភាព​ក៏​បាន​ឡើង​ខ្ពស់​ ជួយ​ឱ្យ​ប្រទេស​ម៉ាឡេស៊ី​មាន​មហា​សេដ្ឋី​កាន់​តែ​ច្រើន​។ Top Glove Corp ដែល​ជា​ក្រុម​ហ៊ុន​ផលិត​ស្រោម​ដៃ​កៅស៊ូ​ធំជាង​គេ​បង្អស់​ក្នុង​ពិភព​លោក​ និង​​ក្រុម​ហ៊ុន​ Hartalega Holdings រួម​នឹង​ក្រុម​ហ៊ុន​ Kossan Rubber Industries សុទ្ធ​តែ​ទទួល​បាន​ផល​ប្រយោជន៍​ច្រើន​ពី​ COVID-19។ ប៉ុន្តែ ដោយ​មាន​កំណើន​​ខ្ពស់​ជាង​មុន​ដល់​ទៅ​5​ដង Supermax ឯណេះ​វិញ​ទេ​ទើប​ជា​ឈ្មោះ​ដែល​ត្រូវ​បាន​គេ​ចាប់​អារម្មណ៍​បំផុត​នៅក្នុង​ឆ្នាំ​នេះ​។

“ការ​ពាក់​ស្រោម​ដៃ​ដើម្បី​ធ្វើ​ការ​គ្រប់​បែប​សព្វយ៉ាង​ បាន​ក្លាយ​ជា​រឿង​ធម្មតា​ទៅ​ហើយ​​ មិន​ថា​​​នៅ​ក្នុង​វិស័យ​សុខាភិបាល​ ឬ​វិស័យ​លក់​រាយ​។ កំណើន​នៃ​ការ​ប្រើ​ប្រាស់​ស្រោម​ដៃ​កៅ​ស៊ូ នឹង​ផ្ដល់​ផល​ប្រយោជន៍​ច្រើន​ក្នុង​រយៈ​ពេល​វែង​ដល់​បណ្ដា​ក្រុម​ហ៊ុន​ផលិត​ស្រោម​ដៃ” នេះ​បើ​តាម​ Walter Aw អ្នកវិភាគ​មក​ពី​ក្រុម​ហ៊ុន CGS-CIMB Research។​ អ្នក​វិភាគ​រូប​នេះ​បន្ត​ថា “Supermax គឺជា​ដំណើរ​រឿង​ដែល​គួរ​ឱ្យ​ចាប់​អារម្មណ៍​បំផុត​ ព្រោះ​ថា ពួកគេ​ធ្វើ​ការ​ផលិត​ស្រោម​ដៃ​ដោយ​ខ្លួន​ឯង​ ខណៈ​ដែល​ក្រុម​ហ៊ុន​ដទៃ​ ភាគ​ច្រើន​គឺជា​អ្នក​ផ្គត់​ផ្គង់​បន្ត​”។

Thai Kim Sim និង​ភរិយា​ បាន​បង្កើត​ Supermax កាល​ពី​ឆ្នាំ​1987​ ដែល​ដំបូង​ឡើយ​ ពួកគេ​គ្រាន់​តែ​រកស៊ី​លក់​ដូរ​ស្រោម​ដៃ​ប៉ុណ្ណោះ​។ រហូត​ដល់​ឆ្នាំ​1989 ទើប​ពួកគេ​ចាប់​ផ្ដើម​ផលិត​។ នេះ​គឺជា​ក្រុម​ហ៊ុន​ផលិត​ដំបូង​គេ​ដែល​មាន​ពាណិជ្ជ​សញ្ញា​ដោយ​ឡែក​ដើម្បី​គាំទ្រ​ដល់​ការ​អំពាវ​នាវ​របស់​រាជ​រដ្ឋាភិបាល​ម៉ាឡេស៊ី​។ បច្ចុប្បន្ន​ ក្រុម​ហ៊ុន​នេះ​ បាន​និង​កំពុង​នាំចេញ​ស្រោម​ដៃ​កៅស៊ូ​ទៅ​កាន់​ប្រទេស​ជាង​160​ ដោយ​​ផ្គត់​ផ្គង់​ស្រោម​ដៃ​សុខាភិបាលបាន​​ប្រមាណ​ជា​12​%​ នៃ​​តម្រូវ​ការ​​សរុប​នៅ​ទូទាំង​ពិភពលោក​។

លោក​ Thai និង​គ្រួសារ​របស់​លោក​ កាន់​កាប់​ភាគ​ហ៊ុន​ 38​% នៅក្នុង​ក្រុម​ហ៊ុន​ Supermax។ ប្រាក់​ចំណូល​របស់​ក្រុម​ហ៊ុន​នេះ​បាន​កើន​24​%​ (447​លាន​រីងហ្គីត​/​104,461,262​លាន​ដុល្លារ​អាមេរិក​) នៅក្នុង​ខែ​មីនា​ឆ្នាំ​2020​ ក្នុង​នោះ​មួយ​ភាគ​ធំ​គឺ​បាន​មក​ពី​ឥទ្ធិ​ពល​របស់​ COVID-19។ ក្រុម​ហ៊ុន​នេះ​ផលិត​ស្រោម​ដៃ​ចំនួន​24​ពាន់​លាន​ស្រោម​​ជា​រៀង​រាល់​ឆ្នាំ​ ហើយ​តាម​គម្រោង​ ពួកគេ​នឹង​ផលិត​44​ពាន់​លាន​ស្រោម​នៅ​ក្នុង​ឆ្នាំ​2024​។ នៅក្នុង​ខែ​មិថុនា​នេះ​ Supermax បាន​ទិញ​ដី​បន្ថែម​ទៀត​ដើម្បី​ពង្រីក​​ទំហំ​នៃ​ទីតាំង​ផលិត​ ក៏ដូច​ជា​ដើម្បី​បង្កើន​ផលិត​ភាព​​។

តម្រូវ​ការ​​ស្រោម​ដៃ​កៅស៊ូ​នៅ​ទូទាំង​ពិភពលោក​ អាច​កើន​11​% ឡើង​ដល់​330​ពាន់​លាន​ស្រោម​នៅក្នុង​ឆ្នាំ​នេះ​។ ផលិត​ផល​ចំនួន​ 2/3​នៃ​តួលេខ​នេះ​នឹង​អាច​មក​ពី​ប្រទេស​ម៉ាឡេស៊ី​។ នេះ​បើ​តាម​សមាគម​នៃ​ក្រុម​ហ៊ុន​ផលិត​ស្រោម​ដៃ​កៅស៊ូ​របស់​​ម៉ាឡេស៊ី​។

ម៉ាឡេស៊ី​បាន​ក្លាយ​ជា​ប្រទេស​នាំមុខ​គេ​ក្នុង​ការ​ផលិត​ស្រោម​ដៃ​កៅស៊ូ​តាំង​ពី​ទសវត្សរ៍​ទី​80​នៃ​សហស្សវត្ស​មុន​ ដោយ​សារ​តែ​តម្រូវ​ការ​កើន​ឡើង​ខ្ពស់​ព្រោះ​​ជំងឺ​អេដស៍ (AIDS)។ ប្រាក់​ចំណាយ​ទៅ​កម្មករ​មាន​កម្រិត​ទាប​ ដើម​កៅស៊ូ​ច្រើន​ និង​វិស័យ​ឧស្សាហកម្ម​រ៉ែប្រេង​ធំ​ គឺជា​មូល​ហេតុ​ដែល​បាន​ជួយឱ្យ​បណ្ដា​ក្រុម​ហ៊ុន​នៅក្នុង​ប្រទេស​នេះ​ មាន​ភាព​ងាយ​ស្រួល​ក្នុង​ការ​ផលិត​ស្រោម​ដៃ​កៅស៊ូ។

ក្រៅ​ពី​ Supermax មូលបត្រ​របស់​ Top Glove ដែល​បាន​កើន​ឡើងច្រើន​ជាង​មុន​​3​ដង​នៅ​ក្នុង​ឆ្នាំ​នេះ​ក៏​បាន​ជួយ​ឱ្យ​ទ្រព្យ​របស់​ស្ថាបនិក​ Lim Wee Chai ឡើង​ដល់​​2.5​ពាន់​លាន​ដុល្លារ​អាមេរិក​។ ក្រុម​ហ៊ុន​នេះ​ក៏​រក​បាន​ប្រាក់​ចំណេញ​ច្រើន​ជាង​មុន​4ដង​ ពោល​គឺ​ឡើង​ដល់​ 348​លាន​រីងហ្គីត (81​លាន​ដុល្លារ​) ក្នុង​រយៈ​ពេល​ពី​ខែ​មីនា​ដល់​ខែ​ឧសភា​​2020។ ចំណែក​ប្រាក់​ចំណូលសរុប​​ក៏​កើន​ឡើង​ខ្ពស់​មិនធ្លាប់​មាន​ពីមុន​មក​ផង​ដែរ​។

មូលបត្រ​របស់​ Hartalega និង Kossan Rubber ​ក៏​បាន​កើន​ឡើង​ទ្វេដង​ក្នុង​ឆ្នាំ​នេះ​។ ស្ថាបនិក​ Hartalega Kuan Kam Hon និង​គ្រួ​សារ​ បច្ចុប្បន្ន​មាន​ទ្រព្យ​ 4.8​ពាន់​លាន​ដុល្លារ​អាមេរិក។ ចំណែក​ Lim Kuang Sia មក​ពី​ក្រុម​ហ៊ុន​ Kossan Rubber ក៏​មាន​ទ្រព្យ​ 1.1​ពាន់​លាន​ដុល្លារ​៕

ប្រភព៖ Bloomberg