Category: សង្គម និងសេដ្ឋកិច្ច

រឿងដែលស្រ្តីមេផ្ទះគួរដឹង ពាក់ព័ន្ធនឹងចង្រ្កានម៉ៃក្រូវេហ្វ
យុគសម័យថ្មីនេះ ចង្រ្កានម៉ៃក្រូវេហ្វក្លាយជាឧបករណ៍ក្នុងផ្ទះបាយដែលមានប្រើសឹងតែគ្រប់ផ្ទះទៅហើយ ទោះវាជាឧបករណ៍ដែលយើងធ្លាប់ស្គាល់ហើយក៏ដោយ តែក៏អាចកើតមានគ្រោះថ្នាក់បានដែរបើប្រើប្រាស់មិនប្រយ័ត្ន។ នៅក្នុងប្រទេសអង់គ្លេសមានរបាយការណ៍ដែលបង្ហាញពីការរងរបួសដែលពាក់ព័ន្ធនឹងចង្រ្កានម៉ៃក្រូវេហ្វនេះក្នុងមួយឆ្នាំៗច្រើនជាង 2.000 នាក់ទៅទៀត ដូច្នេះ សុវត្ថិភាព និងការប្រើប្រាស់ដែលត្រឹមត្រូវតាមវិធីគឺជារឿងដែលយើងគួរតែរៀនយល់ដឹង ដើម្បីការពារគ្រោះភ័យដែលអាចនឹងកើតឡើង។
ឧបករណ៍ដាក់ម្ហូបអាហារដែលមិនគួរប្រើជាមួយចង្រ្កានម៉ៃក្រូវេហ្វ ឬត្រូវប្រយ័ត្ន
ឧបករណ៍ដាក់ម្ហូបអាហារដែលជាលោហៈ
ពេលរលកម៉ៃក្រូវេហ្វឆ្លងកាត់ទៅប៉ះផ្នែកដែលជាលោហៈ នឹងធ្វើឱ្យកើតចរន្តអគ្គីសនី និងកម្តៅឡើងនៅត្រង់នោះ លោហៈនឹងកើតកម្តៅខ្លាំងឡើង ជួនកាលដល់ថ្នាក់កើតការឆាបឆេះឡើងបានទៀតផង។ ទោះជាការឆេះមិនបានបំផ្លាញឧបករណ៍នោះមែន តែសារធាតុផ្សេងៗដែលប្រើក្នុងការផលិតឧបករណ៍នោះអាចនឹងជ្រាបចូលទៅលាយឡំនៅក្នងអាហារបាន។
ចានថ្មស្រោបរលោងៗ
ឧបករណ៍ដាក់ចំណីអាហារដែលជាថ្មស្រោបរលោងៗជាច្រើនប្រភេទមានចំណែកផ្សំរបស់លោហៈលើផ្នែកដែលជារូបភាពក្បាច់ក្បូរ ដោយអាចនឹងកើតកម្តៅឡើងខ្ពស់នៅត្រង់ចំណុចនោះ ក្រៅពីនេះចានថ្មរលោងៗច្រើនតែមិនធន់ជាមួយកម្តៅក្តៅខ្លាំងៗនោះទេ បើប្រើប្រាស់ក្នុងការដាក់ម្ហូបអាហារកម្តៅនោះ អាចនឹងកើតការបែកបាក់បាន។
ចានផ្លាស្ទិក និងចានស្នោ
ផ្លាស្ទិក និងស្នោមានចំណុចសីតុណ្ហភាពរំលាយខុសផ្លែកពីគ្នា ការយកចានផ្លាស្ទិកដែលមានចំណុចសីតុណ្ហភាពរលាយទាបទៅដាក់កម្តៅនៅក្នុងចង្រ្កានម៉ៃក្រូវេហ្វ នឹងធ្វើឱ្យកើតការរលាយ ឬទន់របស់ចានរហូតខូចរូបរាងអស់ និងអាចរលាយចូលទៅក្នុងម្ហូបអាហារបាន ដូច្នេះបើចង់ប្រើចានផ្លាស្ទិក ឬចានស្នោ ត្រូវសង្កេតមើលសញ្ញាសំគាល់ដែលបិទជាប់នៅលើចានទាំងនោះផងថា តើអាចយកចូលក្នុងចង្រ្កានម៉ៃក្រូវេហ្វបានឬទេ? និងគួរជ្រើសរើសម៉ាកយីហោណាដែលគួរឱ្យទុកចិត្តបានផង។
ក្រដាសអាលុយមីញ៉ូមខ្ចប់អាហារ
ក្រដាសខ្ចប់ចំណីអាហារក្នុងពេលបច្ចុប្បន្ននេះច្រើនតែធ្វើពីអាលុយមីញ៉ូមហ្វ៉យល៍ ដែលអាចឆេះនៅក្នុងចង្រ្កានម៉ៃក្រូវេហ្វបាន ដូច្នេះបើម្ហូបអាហារដែលបងៗស្រ្តីមេផ្ទះត្រូវការកម្តៅនោះមានរុំខ្ចប់ដោយក្រដាស់អាលុយមីញ៉ូម គួរតែយកចេញជាមុនសិន មុននឹងដាក់ចូលក្នុងចង្រ្កានម៉ៃក្រូវេហ្វ។
បន្ទះស្បោងផ្លាស្ទិកការពារចំណីអាហារ
បច្ចុប្បន្នយើងមានបន្ទះស្បោងផ្លាស្ទិកស្តើងដែលប្រើសម្រាប់រុំបិទពីលើចំណីអាហារដើម្បីការពារកុំឱ្យធូលីដីហុយមកចូល និងនៅពេលយើងចង់បរិភោគម្តងទៀតនោះ យើងតែងតែយកចូលទៅកម្តៅក្នុងចង្រ្កានម៉ៃក្រូវេហ្វ។ ភាពប្រថុយប្រថានដែលអាចនឹងមាននោះគឺ កម្តៅដែលកើតឡើងពីចំហាយទឹក ឬពីម្ហូបអាហារនឹងអណ្តែតឡើងទៅរកបន្ទះស្បោងផ្លាស្ទិកស្តើងនោះ និងកើតចេញជាដំណក់ទឹកតូចៗ ដែលបើសិនជាបន្ទះស្បោងផ្លាស្ទិកស្តើងនេះមិនត្រឹមត្រូវតាមស្តង់ដារទេនោះ អាចនឹងកើតការរលាយរបស់សារធាតុគីមី ហើយស្រក់ចូលទៅក្នុងអាហារបាន ដូច្នេះបើចង់កម្តៅម្ហូបអាហារដើម្បីទទួលទាននោះ គួរយកបន្ទះស្បោងផ្លាស្ទិកស្តើងនេះចេញជាមុនសិន។
ការប្រើចង្រ្កានម៉ៃក្រូវេហ្វនៅក្នុងផ្ទះដែលមានកូនក្មេង
បើនៅក្នុងផ្ទះមានក្មេងតូច គួរជ្រើសរើសប្រើចង្រ្កានម៉ៃក្រូវេហ្វប្រភេទដែលមានភាពស្មុគ្រស្មាញក្នុងការប្រើតិចបំផុត ឬទុកដាក់នៅក្នុងកន្លែងដែលក្មេងតូចៗឈោងដៃមិនដល់ និងបើសិនជាចង់ឱ្យក្មេងប្រើការចង្រ្កានម៉ៃក្រូវេហ្វដែរនោះ ក៏គួរតែបង្ហាត់បង្រៀនឱ្យដឹងអំពីអ្វីដែលអាចដាក់ចូលទៅបាន និងអ្វីដែលហាមដាក់ចុល(ដូចជា ស៊ុតទាំងមូល ទឹកសុទ្ធ និងបន្លែផ្លែឈើទាំងមូល ជាដើម ព្រោះវានឹងផ្ទុះបែក) និងគួរឱ្យមានមនុស្សធំនៅជាមួយខណៈពេលប្រើការជានិច្ចផង៕
Close-up Of A Person Removing Prepared Food From Microwave Oven; Shutterstock ID 694624912; Job (TFH, TOH, RD, BNB, CWM, CM): TOH
June 25, 2020
ប្រធានសហព័ន្ធសេវាអប់រំនៃកម្ពុជា ថ្លែងអំណរគុណរដ្ឋាភិបាលដែលស្នើរឱ្យធនាគាររៀបចំឥណទានឡើងវិញចំពោះគ្រឹះស្ថានសិក្សាឯកជន
ស្ថិតក្នុងបរិបទនៃការរីករាលដាលជំងឺ Covid-19 នេះគ្រប់វិស័យទាំងអស់សុទ្ធតែរងផលប៉ះពាល់យ៉ាងធ្ងន់ធ្ងរជាពិសេសវិស័យឯកជន ដោយក្នុងនោះរួមទាំងវិស័យអប់រំឯកជនផងដែរ។
ពាក់ព័ន្ធនឹងបញ្ហានេះ នៅក្នុងពិធីប្រកាសអនុវត្តន៍កម្មវិធីឧបត្ថម្ភសាច់ប្រាក់ ជូនដល់ប្រជាពលរដ្ឋក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺ Covid-19 សម្តេចតេជោ ហ៊ុន សែន នាយកដ្ឋមន្ត្រីនៃកម្ពុជា បានអំពាវនាវឱ្យធនាគារជាតិនៃកម្ពុជាគួរពិភាក្សាជាមួយធនាគារឯកជន និងគ្រឹះស្ថានមីក្រូហិរញ្ញវត្ថុឱ្យរៀបចំឥណទានឡើងវិញសម្រាប់គ្រឹះស្ថានសិក្សាឯកជន។
ប្រមុខរាជរដ្ឋាភិបាលកម្ពុជាបានបញ្ជាក់ផងដែរថា គ្រឹះស្ថានសិក្សាឯកជនបានដាក់ទ្រព្យបញ្ចាំរបស់ខ្លួនជាច្រើនទៅធនាគារហើយ ហេតុនេះពួកគាត់គ្មានទ្រព្យឯណាទៅបញ្ចាំបន្ថែមដើម្បីយកប្រាក់មកដោះស្រាយផលប៉ះពាល់នោះទេ ហេតុនេះធនាគារគួរពង្រីកទំហំនៃកម្ចីលើទ្រព្យបញ្ចាំដែលគ្រឹះស្ថានសិក្សាឯកជនបានដាក់តម្កល់ជាមួយគ្រឹះស្ថានហិរញ្ញវត្ថុ។ សម្តេចបានសង្កត់ធ្ងន់ផងដែរថា យើងត្រូវតែពិនិត្យមើល ធ្វើយ៉ាងណាកុំឱ្យមានគ្រឹះស្ថានសិក្សាឯកជនណាមួយដួលរលំឱ្យសោះ ហេតុនេះហើយទើបត្រូវឱ្យមានការរៀបចំឥណទានឡើងវិញចំពោះពួកគាត់។
បន្ថែមពីលើនោះផងដែរសម្តេចនាយករដ្ឋមន្ត្រី ក៏បានជំរុញផងដែរឱ្យម្ចាស់អគារដែលជួលឱ្យគ្រឹះស្ថានសិក្សាឯកជនទាំងឡាយផ្តល់នូវការយោគយល់ និងមានភាពទន់ភ្លន់ជាមួយនឹងគ្រឹះស្ថានសិក្សាឯកជន។ សម្តេចបានអំពាវនាវឱ្យម្ចាស់អគារអស់កាត់បន្ថយថ្លៃឈ្នួលក្នុងការជួលអគារដល់ម្ចាស់គ្រឹះស្ថានឯកជន ព្រោះបច្ចុប្បន្ននេះ សូម្បីតែសណ្ឋាគារក៏ចុះថ្លៃដែរ ហើយកន្លែងខ្លះការទទួលទានគេចុះរហូតដល់ 30% ឬ50% ឯណោះ។ សម្រាប់សាកលវិទ្យាល័យ និងគ្រឹះស្ថានសិក្សាខ្លះដែលមានអគារផ្ទាល់ខ្លួនមិនមានបញ្ហានោះទេ តែគ្រឹះស្ថានសិក្សាដែលជួលអគារគេទើបគាត់លំបាក។ ដូច្នេះដើម្បីកុំឱ្យក្នុងពេលមានវិបត្តិនេះ គ្រឹះស្ថានសិក្សាឯកជនខាតបង់ខ្លាំងពេកសូមម្ចាស់អគារទាំងឡាយផ្តល់នូវការយោគយល់។
បង្ហាញការគាំទ្រលើចំណុចនេះ លោក ប៉ិច បូឡែន ប្រធានសហព័ន្ធសេវាអប់រំនៃកម្ពុជា និងជាអគ្គនាយកក្រុមហ៊ុន វេសឡាញ អេឌ្យូខេសិន គ្រុប បានលើកឡើងថា៖ «យើងខ្ញុំសូមថ្លែងអំណរគុណយ៉ាងជ្រាលជ្រៅចំពោះប្រមុខរាជរដ្ឋាភិបាលកម្ពុជា ដែលបានអំពាវនាវឱ្យម្ចាស់អគារបញ្ចុះតម្លៃឈ្នួល និងជំរុញឱ្យក្រសួងសេដ្ឋកិច្ច និងហិរញ្ញវត្ថុ ធនាគារជាតិនៃកម្ពុជា និងក្រសួងអប់រំ យុវជន និងកីឡា រៀបចំឥណទានឡើងវិញសម្រាប់គ្រឹះស្ថានសិក្សាឯកជន»។
លោកបានបន្ថែមទៀតថា បច្ចុប្បន្ននេះ សាលារៀនដែលមានប្រាក់ចំណូលបង្គួរអាចមានចំណូលប្រហែល 40% ទៅ50% តែសម្រាប់សាលាភាសា និងសាលាសម្រាប់កុមារតូចជាច្រើន មានប្រាក់ចំណូលប្រហែលត្រឹមតែ 20% ទៅ30% តែប៉ុណ្ណោះ។ ហេតុនេះ ប្រសិនបើក្រសួងសេដ្ឋកិច្ច និងហិរញ្ញវត្ថុអន្តរាគមន៍លើការរៀបចំឥណទានពិសេសសម្រាប់គ្រឹះស្ថានសិក្សាឯកជន ឱ្យដូចជាសហគ្រាសធនតូច និងមធ្យម (SME) និងឥណទានរបស់ធនាគារអភិវឌ្ឍជនបទ(RDB) នោះនឹងអាចជួយដល់គ្រឹះស្ថានសិក្សាឯកជនបានយ៉ាងច្រើន។
តែទោះបីជាយ៉ាងនេះក៏ដោយ លោក ប៉ិច បូឡែន បានបញ្ជាក់ផងដែរថា សាលារៀនឯកជនខ្លួនឯងក៏គួរត្រួតពិនិត្យលទ្ធភាពហិរញ្ញវត្ថុរបស់ខ្លួនឯងរៀងៗខ្លួន ដើម្បីប្រាកដប្រជាថាយើងអាចយកកម្ចីនេះមកប្រើប្រាស់ឱ្យមានប្រសិទ្ធភាពខ្ពស់ដែលអាចបង្កើតជាចរន្តសាច់ប្រាក់ដើម្បីមានលទ្ធភាពសងត្រឡប់ទៅគ្រឹះស្ថានហិរញ្ញវត្ថុវិញបានល្អ និងបន្តនិរន្តរភាពសាលារៀនក្នុងពេល Covid-19 និងក្រោយបញ្ហា Covid-19 ត្រូវបានបញ្ចប់៕
June 25, 2020
NASA សាកល្បងដំណើរការឧទ្ធម្ភាគចក្រស្វ័យប្រវត្ត សម្រាប់ហោះនៅលើពិភពព្រះអង្គារ (វីដេអូ)
ឧទ្ធម្ភាគចក្រ Ingenuity ទទួលបានជោគជ័យក្នុងការហោះហើរសាកល្បងផ្ដាច់ខ្លួនពី “ពោះ” របស់យានរុករក និងបានចុះចតលើដីដោយសុវត្ថិភាព។
យានរុករកឈ្មោះ Rerseverance របស់ទីភ្នាក់ងារអវកាសអាមេរិក (NASA) នឹងហោះទៅកាន់ពិភពព្រះអង្គារជាមួយនឹងឧទ្ធម្ភាគចក្រស្វ័យប្រវត្តឈ្មោះ Ingenuity។ តាមគម្រោង ឧត្ធម្ភាគចក្រស្វ័យប្រវត្ត Ingenuityនេះ នឹងធ្វើការហោះហើរសាកល្បងដំបូងនៅលើពិភពដទៃក្នុងលម្ហអវកាសក្រៅពីផែនដីនាពេលដ៏ខ្លីខាងមុខ។
ដើម្បីបំពេញបេសកកម្ម ដំបូង ឧត្ធម្ភាគចក្រស្វ័យប្រវត្ត Ingenuity ត្រូវតែមានសមត្ថភាពក្នុងការញែកខ្លួនចេញពី “ពោះ” របស់យានរុករក រួចហើយចុះចតនៅលើផ្ទៃដី។ នេះគឺជាការធ្វើតេស្តប្រព័ន្ធដំណើរការរបស់ឧត្ធម្ភាគចក្រស្វ័យប្រវត្តសម្រាប់ហោះនៅលើពិភពអង្គាររបស់អង្គការ NASA។
យានរុករកឈ្មោះ Rerseverance របស់ទីភ្នាក់ងារអវកាសអាមេរិក (NASA)
ដំបូង គម្របរបស់យានរុករកត្រូវបើកគន្លឹះដោយស្វ័យប្រវត្ត បន្ទាប់មក ឧត្ធម្ភាគចក្រស្វ័យប្រវត្ត Ingenuity នឹងត្រូវបានដាក់ចុះ។ ម៉ាស៊ីនតូចមួយនឹងធ្វើការរុញច្រានរហូតដល់ឧត្ធម្ភាគចក្រស្វ័យប្រវត្ត Ingenuity មានលំនឹងស្មើគ្នា ដោយជើងទាំងអស់របស់ Ingenuity ត្រូវជ្រែងចេញជា4ទិស។ ចុងក្រោយ Ingenuity នឹងត្រូវទម្លាក់ចុះទៅកាន់ផ្ទៃដីនៃពិភពអង្គារ ហើយយាន Perseverance នឹងចាកចេញ ទុកកន្លែងឱ្យ Ingenuity ដើម្បីហោះឡើង។
តាមផែនការ យានរុករក Perseverance នឹងត្រូវបញ្ជូនទៅចុះចតនៅលើផ្ទៃពិភពព្រះអង្គារនៅក្នុងខែកុម្ភៈ ឆ្នាំ2021ខាងមុខ។ ឧត្ធម្ភាគចក្រស្វ័យប្រវត្ត Ingenuity ក៏នឹងត្រូវចាប់ផ្ដើមដំណើរការបន្ទាប់នោះរយៈពេល2ខែ៕
ប្រភព៖ សារព័ត៌មានបរទេស
June 25, 2020
ចិន បង្កើតឡានវែនឆ្លាតវៃ បើកដឹកឥវ៉ាន់ខ្លួនឯង ជាជំនួយការ Delivery ដែលដឹកទំនិញបាន 1តោន
បន្ទាប់ពីវីរុសកូវីដ-19 បានរាតត្បាតពេញពិភពលោក ជាពិសេសក្នុងប្រទេស ចិន ក្នុងទីក្រុងវូហានដំបូងគេនោះ ឥលូវថ្មីៗនេះ ទីក្រុង Zibo និង Shenzhen ភាគខាងកើតប្រទេសចិន បានផលិតឡានវែនដែលអាចបើកដឹកឥវ៉ាន់ដោយខ្លួនឯង និងមានសមត្ថភាពអាច ធ្វើជាជំនួយការ Delivery ម្ហូបអាហារ និងដឹកទំនិញបានរហូតដល់ 1,000គីឡូក្រាម និងកំពុងបម្រើសេវាកម្មបានជាង 2ខែមកហើយ។
រថយន្តវែនឆ្លាតវៃនេះ មានឈ្មោះថា Hercules ដំណើរការបង្កើតដោយក្រុមអ្នកជំនាញផ្នែកវិទ្យាសាស្ត្រកុំព្យូទ័រ និងក្រុមអ្នកស្រាវជ្រាវវិស្វកម្ម របស់ចិន ដោយប្រើវិធីសាស្ត្របង្រៀន deep-learning algorithm ជាការបញ្ចូលកម្មវិធី AI ទៅក្នុងនោះ ដើម្បិបញ្ជាឱ្យវាស្គាល់ផ្លូវសម្រាប់ធ្វើដំណើរ ៕
ទស្សនាវីដេអូខាងក្រោម៖
Self-driving vans are delivering food and disinfecting streets in China pic.twitter.com/T7Bw45iVof
— Mashable (@mashable) June 20, 2020
June 25, 2020
ចិន បាញ់ផ្កាយរណបថ្មី 1ទៀត ដើម្បីប្រជែងនឹង GPS របស់អាមេរិក
កាលពីថ្ងៃទី23 ខែមិថុនា 2020 ផ្កាយរណបចិនថ្មីផ្សេង 1ទៀតឈ្មោះថា DBS (ជាប្រភេទ Navigation system satellite) ត្រូវបានបាញ់បង្ហោះសាកល្បងដោយជោគជ័យ បន្ទាប់ពីជួប បញ្ហាបច្ចេកទេសតាំងពីថ្ងៃទី13 មិថុនា កន្លងទៅ។
ផ្កាយរណប BDS-3 ថ្មីនេះ ត្រូវបានបាញ់បង្ហោះនៅស្ថានីយអវកាស Xicheng ស្ថិតក្នុងភាគខាងត្បូងខេត្តស៊ីឈួន។ គ្រាប់រ៉ុក្កែតចុងក្រោយបំផុតនេះ គឺជាលើកទី 30 ហើយក្នុងត្រកូល BDS-3 និងជាលើកទី55 ក្រោមឈ្មោះសាកល្បងរ៉ុក្កែត BeiDou ដែលបានសាកល្បងមកតាំងពីឆ្នាំ2012។
វាត្រូវបានគេដឹងថា ផលិតឡើងដើម្បីប្រជែងនឹង GPS (Global Positioning System) ដែលគ្រប់គ្រងដោយអាមេរិកជាយូរឆ្នាំមកហើយ។
ការចំណាយលើបាញ់បង្ហោះនេះ ត្រូវបានគេដឹងថា អស់ខ្ទង់ 10ប៊ីលានដុល្លារដោយនឹងបង្កើតបានផ្កាយរណបច្រើនជាង 35ដួង គ្របដណ្ដប់ពេញផ្ទៃប្រទេសចិន។
មហិច្ឆតារបស់ចិន ដែលចង់ពង្រឹកដែនអំណាចនៅលើអាកាស ត្រូវបានបង្ហាញច្បាស់ៗក្រោមការដឹកនាំរបស់លោកប្រធានាធិបតី ស៊ី ជីនភីង ដើម្បីប្រជែងមហាអំណាចចាស់ គឺសហរដ្ឋអាមេរិកហ្នឹងឯង៕
ប្រភព៖ CGTN
June 25, 2020
មើលថែទាំស្បែកកូនតូចយ៉ាងងាយៗ ឱ្យមានសុវត្ថិភាពពីពន្លឺថ្ងៃ
ចូលដល់រដូវក្តៅពេញទំហឹងហើយ ដោយមួយរយៈនេះយើងសង្កេតឃើញថា សីតុណ្ហភាពក្នុងស្រុកយើងកាន់តែក្តៅឡើងៗជារឿយៗ…ក្តៅរហូតឡើងចង់ឆេះតែម្តង។ ឡារ៉ែនគិតថា អ្នកម្តាយទាំងឡាយច្បាស់ជាដឹងហើយថា ការចេញទៅត្រូវកំដៅថ្ងៃយូរៗអាចសាងនូវភាពខូចខាតដល់ស្បែក និងអាចមានគ្រោះថ្នាក់ដល់ជីវិតទៀតផង ជាពិសេសចំពោះកូនក្មេងតូចៗ ថ្ងៃនេះឡារ៉ែនមានវិធីការពារស្បែកកូនតូចពីកំដៅថ្ងៃ និងខ្លួនអ្នកម្តាយខ្លួនឯងជាច្រើនវិធីមកជម្រាបជូន។
– ក្នុងអំឡុងពេលនៃថ្ងៃដែលមានពន្លឺព្រះអាទិត្យក្តៅខ្លាំងនោះ បើអ្នកគ្មានភាពចាំបាច់អីត្រូវចេញទៅខាងក្រៅទេនោះ វិធីងាយៗ គឺគ្មានអ្វីល្អជាងការគេចពីពន្លឺថ្ងៃដោយការចូលទៅនៅក្នុងទីដែលមានម្លប់ ឬនៅក្នុងផ្ទះនោះឡើយ។
– បើចៀសមិនរួចពីការត្រូវនាំកូនតូចចេញទៅនៅកណ្តាលថ្ងៃទេនោះ ចូរចៀសវាងអំឡុងពេលដែលមានកាំរស្មី UV ច្រើន ចាប់ពីម៉ោង 10ៈ00 – 16ៈ00 និងខ្លាំងបំផុតនៅពេលថ្ងៃត្រង់។
– បាំងឆ័ត្រ ឬពាក់មួកដែលមានហាមធំ តែកុំភ្លេចជ្រើសរើសយកខ្នាតដែលសម និងត្រូវជាមួយក្បាលកូនផង បើជាកូនតូចដែលជិះក្នុងរទេះរុញវិញ កុំភ្លេចបិទដំបូល និងបាំងក្រណាត់ការពារពន្លឺក្តៅឱ្យផង។
– ជ្រើសរើសស្លៀកសម្លៀកបំពាក់ឱ្យកូន និងខ្លួនឯងយ៉ាងគត់មត់ តែធ្វើពីសាច់ក្រណាត់ដែលត្រជាក់ បញ្ចេញកំដៅបានល្អនិងស្លៀកពាក់ទៅសប្បាយស្រួលខ្លួនទាំងកូនតូច និងអ្នកម្តាយខ្លួនឯង។
– បើនាំកូនតូចទៅហែលទឹក ឬលេងទឹក គួរជ្រើសរើសស្លៀកឈុតលេងទឹកដែលមានដៃវែង ជើងវែង ព្រោះពេលកូនតូចអង្គុយលេងដីខ្សាច់នៅលើឆ្នេរសមុទ្រ បែរខ្នងដាក់កំដៅថ្ងៃនោះ ខោជើងខ្លីតែមួយមិនអាចទប់ទល់បានទេ។
– ពាក់វ៉ែនតាការពារពន្លឺថ្ងៃឱ្យកូនតូច(ជ្រើសរើសវ៉ែនតាដែលស័ក្តិសមនឹងភ្នែកកូន) និងខ្លួនឯង ដើម្បីការពារកែវភ្នែក កាត់បន្ថយពន្លឺដែលចាំងពីព្រះអាទិត្យ ឬកន្លែងដែលមាន UV ច្រើន ជាពិសេសពេលជិះរថយន្ត។
– ឱ្យកូនញ៉ាំទឹក និងញ៉ាំទឹកខ្លួនឯង(សម្រាប់អ្នកម្តាយ)ឱ្យបានញឹកញាប់ ព្រោះក្នុងអំឡុងពេលធាតុអាកាសក្តៅ រាងកាយមនុស្សយើងបាត់បង់ជាតិទឹកច្រើន បើញ៉ាំទឹកមិនបានគ្រប់គ្រាន់ អាចនឹងធ្វើឱ្យកើតសភាវខ្វះជាតិទឹកបាន។
សម្រាប់ទារកតូចក្នុងវ័យ 0 – 6 ខែវិញនោះ ឡារ៉ែនសូមណែនាំថា មិនគួរលាបឃ្រីមការពារកំដៅថ្ងៃឱ្យឡើយ ព្រោះក្មេងតូចក្នុងវ័យនេះស្បែកនៅស្តើងខ្លាំងណាស់ អាចនឹងមានឱកាសកើតប្រតិកម្មចាញ់ឃ្រីមការពារកំដៅថ្ងៃបានងាយទៀតផង វិធីដែលល្អ គឺគួរប្រើវិធីចៀសវាងពីពន្លឺថ្ងៃប្រសើរជាង៕
June 25, 2020
ចង់មានលឿនពេកជាដើមហេតុនាំឱ្យមានជំងឺបាក់ទឹកចិត្ត
បច្ចុប្បន្ននេះ ដោយសារតែមនុស្សរស់នៅក្នុងពិភពលោកដែលស្ទើរតែគ្រប់គ្នាមានប្រព័ន្ធផ្សព្វផ្សាយសង្គមធ្វើឱ្យការបង្អួតសម្ភារៈនិយម និងការបង្ហាញពីឥទ្ធិពលនៃមាសប្រាក់បានកើតឡើងយ៉ាងព្រោងព្រាត។ បញ្ហាទាំងអស់នេះបានធ្វើឱ្យមនុស្សជាច្រើន ជាពិសេសអ្នកដែលស្ថិតនៅក្នុងជីវៈភាពមធ្យម ចាប់ផ្តើមបណ្តុះគំនិតចង់ក្លាយជាអ្នកមាន ដោយមិនបានសិក្សាពីដើមហេតុ និងហេតុផលសមស្របដែលគេទទួលបានសម្ភារៈទំនើប និងថ្លៃៗទាំងអស់នោះ។
លោក គីម ដារ៉ា ស្ថាបនិកគ្រឹះស្ថានអប់រំ Start Up Cambodia បានលើកឡើងថា ចង់មានលឿនពេក ក៏ជាមូលហេតុមួយនាំទៅរកជំងឺបាក់ទឹកចិត្តផងដែរ។ ពេលអ្នកឃើញអ្នកណាម្នាក់ដែលអ្នកស្គាល់មានបាន ហើយអ្នកក៏ចង់មានដូចគេ ហើយអ្នកសង្កេតឃើញថា ការងារគេខុសពីអ្នក ធ្វើឱ្យអ្នកមានអារម្មណ៍លែងចូលចិត្តការងារខ្លួនឯងទៀត ហើយធ្វើការទាំងធុញ ពេលធ្វើការទាំងធុញធ្វើឱ្យគុណភាពការងារធ្លាក់ចុះ កាន់តែមិនសប្បាយចិត្ត។ ក្រោយមកអ្នកអាចបោះបង់ការងារដែលខ្លួនធ្លាប់ស្រលាញ់ទៅធ្វើការងារដូចគេ ព្រោះចង់មានដូចគេ តែពេលចាប់ផ្ដើមធ្វើទើបអ្នកដឹងថា វាមិនមែនជាការងារដែលអ្នកចូលចិត្តនោះទេ ហើយអ្នកក៏ធ្វើវាមិនបានល្អ គុណភាពការងារអន់ ធ្វើឱ្យអ្នកអស់សង្ឃឹម ហើយឈានទៅរកជំងឺបាក់ទឹកចិត្ត។
លោកថា ភាគជោគជ័យមិនមែនវាស់ដោយចំនួនលុយឡើយ គឺវាស់ដោយសុភមង្គលដែលអ្នកមាន ភាពរីករាយដែលអ្នកមាន ហេតុនេះ ត្រូវចេះរីករាយជាមួយការងាររបស់អ្នក ខិតខំធ្វើវាប្រកបដោយគុណភាពខ្ពស់៕
June 24, 2020
ប្រជាជនថៃកំពុង “ប្រយុទ្ធ” ដណ្ដើមទីក្រុងពី “កណ្ដាប់ដៃ” ហ្វូងសត្វស្វា
នៅ Lopburi ដែលជាទីក្រុងស្វាដ៏ល្បីឈ្មោះនៅប្រទេសថៃ ប្រជាជនត្រូវធ្វើរបងការពារជុំវិញផ្ទះ និងមានទាំង “តំបន់ហាមឃាត់” សម្រាប់មនុស្សទៀតផង ដើម្បីការពារសុវត្ថិភាពពីការវាយប្រហាររបស់ហ្វូងស្វា។
Kuljira Taechawattanawanna ជាពលរដ្ឋម្នាក់នៅក្នុងទីក្រុង Lopburi ដែលកំពុងតែជ្រោកក្រោមសំណាញ់នៃទីលានលើដំបូលផ្ទះ បានត្អូញត្អែរអំពីការគំរាមកំហែងរបស់ហ្វូងសត្វស្វានៅកណ្ដាលទីក្រុងនៃខេត្ត Lopburi ភាគកណ្ដាលប្រទេសថៃ។
“ពួកយើងរស់នៅក្នុងទ្រុង ចំណែកហ្វូងសត្វស្វាបែរជារស់នៅខាងក្រៅ”។ Taechawattanawanna និយាយបន្តថា “លាមករបស់ពួកវាមានគ្រប់កន្លែង ក្លិនស្អុយស្ទើរទ្រាំមិនបាន ពិសេសគឺពេលមានភ្លៀង។
ហ្វូងសត្វស្វាដែលមិនមានការភ័យខ្លាចអ្វីសោះ ហាក់កំពុង “គ្រប់គ្រង” ដងផ្លូវគ្រប់ទីកន្លែងក្នុងទីប្រជុំជននៅជុំវិញតំបន់ប្រាសាទ Prang Sam Yod នៅកណ្ដាលទីក្រុង Lopburi។ ពួកវាតែងនាំគ្នាតោងឡើងជញ្ជាំងខ្ពស់ៗ ដើម្បី “ត្រួតពិនិត្យ” ស្ថានការណ៍ ហើយសម្រុកចូលទៅហែកបន្ទះកៅស៊ូនៃទ្វាររថយន្តដែលនៅក្បែរនោះ។
សកម្មភាពប្លែកៗដែលគួរឱ្យចង់សើចរបស់ហ្វូងសត្វស្វា ត្រូវបានគេទទួលស្គាល់ជាទូទៅថាជាការទាក់ទាញចំណាប់អារម្មណ៍របស់អ្នកទេសចរណ៍នៅតំបន់ Lopburi។ នៅមុន COVID-19 មកដល់ ក្រុមអ្នកទេសចរណ៍មកកាន់ទីក្រុង Lopburi សុទ្ធតែផ្ដល់ចំណីឱ្យហ្វូងសត្វស្វា ហើយថតរូបជាមួយពួកវាយ៉ាងសប្បាយ។
ប៉ុន្តែ យុទ្ធនាការសម្អាតមេរោគពីសំណាក់អាជ្ញាធរទីក្រុង ដោយសារតែ COVID-19 ហាក់បានធ្វើឱ្យប៉ះពាល់ដល់អារម្មណ៍របស់ហ្វូងសត្វស្វាទាំងនោះ ធ្វើឱ្យឥរិយាបថរបស់ពួកវាប្ដូរផ្លាស់។ ម្យ៉ាងទៀត ការដែលមិនមានភ្ញៀវបរទេសមកកាន់ទីក្រុងនេះ គឺស្មើនឹងការបាត់បង់អាហារមួយភាគធំសម្រាប់ហ្វូងស្វា នាំឱ្យពួកវាក្លាយទៅជាសត្វសាហាវ។
ប្រជាជនថៃកំពុង “ប្រយុទ្ធ” ដណ្ដើមទីក្រុងពី “កណ្ដាប់ដៃ” ហ្វូងសត្វស្វា
ល្បឿននៃការកើនឡើងដ៏ឆាប់រហ័សក្នុងរយៈពេល3ឆ្នាំមកនេះ បាននាំឱ្យចំនួនសត្វស្វាកើនឡើងដល់ប្រមាណជា6,000ក្បាលនៅក្នុងទីក្រុង Lopburi។ ប្រការនេះបានធ្វើឱ្យបរិស្ថានប្រែទៅជាអាក្រក់សម្រាប់មនុស្ស ខណៈប្រជាជនមួយចំនួនមិនអាចទ្រាំនឹងស្ថានភាពនេះបាន។ តំបន់ជាច្រើននៅក្នុងទីក្រុង ថែមទាំង “សុំចុះចាញ់” ហ្វូងសត្វស្វាទាំងនេះទៀតផង។
រោងភាពយន្តមួយកន្លែងដែលត្រូវគេទុកចោល បានក្លាយជាទីដាក់សាកសព និងជាទីស្នាក់នៅរបស់ហ្វូងសត្វស្វា។ សត្វស្វាដែលបានងាប់ ត្រូវបានគ្នាវាដាក់នៅក្នុងបន្ទប់មួយរបស់រោងកុន ហើយនៅពេលមានមនុស្សណាម្នាក់ឈានជើងចូល គឺសុទ្ធតែត្រូវហ្វូងស្វាវាយប្រហារភ្លាមៗ។
នៅក្បែររោងកុនខាងលើ ម្ចាស់ហាងមួយកន្លែងក៏ត្រូវយកខ្លានិងក្រពើតុក្កតាមកតាំងដើម្បីបន្លាចហ្វូងស្វា ព្រោះតែពួកវាតែងតែនាំគ្នាមក “ឆក់ប្លន់” ទំនិញរបស់ហាងនេះ។
មនុស្សមួយចំនួននៅក្នុងទីក្រុង Lopburi យល់ថា មូលហេតុដែលនាំឱ្យហ្វូងស្វាមានឱកាសលុកចូល “គ្រប់គ្រង” ទីក្រុងនេះ អាចបណ្ដាលមកពីទីក្រុងចេះតែពង្រីកខ្លួនចូលទៅកាន់តំបន់ព្រៃដែលនៅមិនឆ្ងាយពីទីនោះ។
ប្រជាជនជាច្រើននៅទីក្រុង Lopburi តែងយកចំណីមកឱ្យហ្វូងស្វា ក្នុងបំណងកាត់បន្ថយ “ភាពតានតឹងនិងជម្លោះ” ដែលកើតឡើងដោយសារការ “ឆក់ប្លន់” អាហារនិងទ្រព្យរបស់អ្នកស្រុក ពីសំណាក់ហ្វូងសត្វស្វា។ ក៏ប៉ុន្តែមានអ្នកខ្លះជឿថា អាហារដែលមានផ្ទុកជាតិស្ករច្រើន ទឹកដែលមានហ្គាស និងធញ្ញជាតិ បានជំរុញឱ្យជីវភាពផ្លូវភេទរបស់ពួកវាកាន់តែល្អប្រសើរ។
Pramot Ketampai ដែលជាអ្នកគ្រប់គ្រងបណ្ដាប្រាសាទតូចៗនៅជុំវិញប្រាសាទ Prang Sam Yod បានឱ្យដឹងថា៖ “ពួកវាស៊ីកាន់តែច្រើន កាន់តែមានកម្លាំង ទើបពួកវាកើតកូនចៅកាន់តែច្រើន”។
“សង្គ្រាម” នានារវាងហ្វូងស្វា ថ្មីៗនេះបានបង្កការចាប់អារម្មណ៍ពីក្រុមមន្ត្រីនៅទីក្រុង Lopburi នាំឱ្យពួកគេសម្រេចចិត្តដំណើរការឡើងវីញនូវកម្មវិធីគ្រៀវសត្វស្វានៅក្នុងខែមីថុនានេះ ក្រោយពីបានផ្អាកតាំងតែពី3ឆ្នាំមុន។
ក្រុមបុគ្គលិកនៃការិយាល័យជំនាញផ្នែកសត្វព្រៃ បានយកផ្លែឈើទាក់ទាញហ្វូងស្វាឱ្យចូលទៅក្នុងទ្រុង ហើយនាំពួកវាទៅកាន់បន្ទប់ពិនិត្យសុខភាពដើម្បីចាក់ថ្នាំសណ្ដំនិងគ្រៀវ រួចហើយក៏ចាក់សាក់ជាសម្គាល់ មុននឹងលែងពួកវាទៅវិញ។
អាជ្ញាធរទីក្រុង Lopburi បានកំណត់គោលដៅក្នុងការគ្រៀវស្វាចំនួន500ក្បាលឱ្យបានមុនថ្ងៃទី26មិថុនាខាងមុខ។ ប៉ុន្តែ យុទ្ធនាការនេះនឹងមិនអាចគ្រប់គ្រងហ្វូងស្វាបានទាំងស្រុងទេ ដូច្នេះអាជ្ញាធរក៏បានរៀបផែនការបង្កើតតំបន់អភិរក្សសត្វស្វាមួយនៅក្នុងទីក្រុង៕
ប្រភព៖ សារព័ត៌មានបរទេស
June 24, 2020
ដំណើងល្អ! Elon Musk អញ្ជើញអ្នកគ្រប់គ្នាប្រើប្រាស់សាកល្បងសេវាកម្មអ៊ីនធើណិតពីផ្កាយរណប
ក្រុមហ៊ុន SpaceX របស់មហាសេដ្ឋី Elon Musk កំពុងតែស្វែងរកមនុស្សឱ្យចូលរួមប្រើប្រាស់សាកល្បងសេវាអ៊ីនធើណិតពីផ្កាយរណប Starlink របស់ខ្លួន។
គេហទំព័ររបស់ Starlink បានអនុញ្ញាតឱ្យមានការចុះឈ្មោះទទួលព័ត៌មានអំពីគម្រោងអ៊ីនធើណិតរបស់ក្រុមហ៊ុននេះ។ អ្នកដែលចង់ប្រើប្រាស់សាកល្បង ត្រូវបញ្ចូលអាសយដ្ឋានអ៊ីមេលនិងលេខសម្គាល់ប្រៃសណីយ៍។ ក្រោយមក Starlink នឹងផ្ញើសារជូនដំណឹងនៅពេលណាដែលមានកម្មវិធីប្រើប្រាស់សាកល្បងត្រូវបានធ្វើឡើងនៅក្នុងតំបន់ដែលអ្នកចង់ប្រើប្រាស់បានចុះឈ្មោះ ដោយយោងទៅតាមលេខកូដប្រៃសណីយ៍។
យោងតាមខ្លឹមសារដែលលោក Elon Musk បានសរសេរនៅលើទំព័រ Twitter កម្មវិធីសាកល្បងប្រើអ៊ីនធើណិតដំបូងគេនឹងត្រូវចាប់ផ្ដើមនៅក្នុងបណ្ដាតំបន់ដែលស្ថិតក្នុងរយៈទទឹងខ្ពស់ ដូចជាតំបន់ Seattle នៅសហរដ្ឋអាមេរិក និងនៅប្រទេសអាល្លឺម៉ង់ជាដើម។
បច្ចុប្បន្ន ផ្កាយរណបប្រមាណជា500របស់ក្រុមហ៊ុន SpaceX កំពុងហោះហើរជុំវិញផែនដី។ SpaceX មានបំណងប្រើប្រាស់ផ្កាយរណបរបស់ខ្លួនធ្វើជាស្ពានដើម្បីលុបបំបាត់ “ភាពអយុត្តិធម៌” នៅក្នុងការប្រើប្រាស់ព័ត៌មានវិទ្យានិងទូរគមនាគមន៍រវាងតំបន់នានាក្នុងពិភពលោក។ ពាក់កណ្ដាលនៃពិភពលោកនាបច្ចុប្បន្ន (ភាគច្រើនគឺនៅតំបន់ជនបទ និងអ្នកក្រីក្រ) នៅតែមិនអាចប្រើប្រាស់អ៊ីនធើណិត ឬត្រូវបង្ខំចិត្តប្រើប្រាស់សេវាអ៊ីនធើណិតកម្រិតខ្សោយតែតម្លៃខ្ពស់។
គេហទំព័ររបស់ Starlink បានអនុញ្ញាតឱ្យមានការចុះឈ្មោះទទួលព័ត៌មានអំពីគម្រោងអ៊ីនធើណិតរបស់ក្រុមហ៊ុននេះ។
តាមគម្រោង ក្រុមហ៊ុននេះនឹងចាប់ផ្ដើមសាកល្បងសេវាអ៊ីនធើណិតផ្កាយរណបនៅក្នុងរដូវក្ដៅឆ្នាំនេះ ហើយនឹងធ្វើពាណិជ្ជកម្មនៅអាមេរិកខាងជើងចាប់ពីចុងឆ្នាំ2020។ គោលដៅចុងក្រោយរបស់លោក Elon Musk គឺការផ្គត់ផ្គង់អ៊ីនធើណិតនៅទូទាំងពិភពលោកនាឆ្នាំ2021។
គោលដៅដំបូងរបស់ Starlink គឺការផ្គត់ផ្គង់សេវាកម្មសម្រាប់តំបន់ដែលមានសេវាអ៊ីនធើណិតខ្សោយ។ ប៉ុន្តែ លោក Musk ក៏បានរៀបចំគម្រោងសម្រាប់ផ្ដល់សេវាអ៊ីនធើណិតតម្លៃទាបនៅក្នុងតំបន់ទីក្រុងផងដែរ។ លោក Musk ឱ្យដឹងថា អ៊ីនធើណិតផ្កាយរណបនេះនឹងមានល្បឿន1Gb/វិនាទី ជាមួយនឹង latency (ភាពយឺតនៃល្បឿនអ៊ីនធើណិត) ប្រមាណជា30មីលីវិនាទី។ ល្បឿននេះគ្រប់គ្រាន់សម្រាប់ការលេងហ្គេមវីដេអូកម្រិតខ្ពស់ ដែលនេះអាចប្រកួតប្រជែងបានជាមួយនឹងថ្នាលអ៊ីនធើណិតបុរាណនាបច្ចុប្បន្ន។ ដើម្បីធ្វើការប្រៀបធៀប សូមពិនិត្យមើលទៅលើល្បឿនអ៊ីនធើណិតប្រភេទលឿន (broadband) នៅអង់គ្លេស៖ ជាមធ្យមវាមានល្បឿនត្រឹមតែ 64Mb/វិនាទីតែប៉ុណ្ណោះ។
គូប្រជែងជាច្រើនរបស់ SpaceX ក៏កំពុងតែមានគម្រោងបញ្ចេញប្រព័ន្ធផ្កាយរណបដែលហោះហើរលើគន្លងគោចរកម្រិតទាប ដូចជា OneWeb, Amazon, Facebook, Space Norway និង Telesat ជាដើម។ ជាងនេះ លោក Musk ថែមទាំងបានស្នើផ្ដល់សេវាកម្មបាញ់បង្ហោះផ្កាយរណបរបស់គូប្រជែងទាំងនេះ ឡើងទៅកាន់គន្លងគោចរទៀតផង៕
ប្រភព៖ សារព័ត៌មានបរទេស
June 24, 2020
(វីដេអូ) ហេតុអ្វីមនុស្សយើងតែងតែហៀរសម្បោរពេលហូបអាហារហឹរ?
អាហារដែលមានរសជាតិហឹរបង្កើតឱ្យមានប្រតិកម្មតបតពីភ្នាសនៅខាងក្នុងរន្ធច្រមុះ ធ្វើឱ្យភ្នាសនេះបញ្ចេញទឹកសម្បោរមកខាងក្រៅច្រើនជាងធម្មតាដើម្បីការពារកោសិកានានាពីសារជាតិក្ដៅហឹរទាំងនោះ។
ច្រមុះរបស់មនុស្សមានរោមតូចៗជាច្រើន និងមានធាតុរាវនិងស្អិតៗមួយប្រភេទដែលត្រូវបានហៅថាទឹករម្អិល។
“តើខ្ញុំអាចប្រើប្រាស់ធាតុរាវស្អិតនេះដើម្បីប៉ះភ្ជាប់ដបដែលប្រេះបែកបានដែរឬទេ?”…
“វាគួរឱ្យខ្ពើមរអើមណាស់! កុំធ្វើបែបនេះ។ សូមមេត្តាស្ដាប់បន្តទៀត!”…
នៅក្នុងពេលដកដង្ហើម រោមច្រមុះ និងទឹករម្អិលនេះ រួមដៃគ្នា “ចាប់យក” ធូលីនិងសារធាតុអាក្រក់ៗមិនឱ្យពួកវាចូលជ្រៅទៅក្នុងរាងកាយ។
អាហារដែលមានជាតិហឹរ មានដូចជាម្ទេស ម្រេច និងអាហារផ្សេងមួយចំនួនទៀត មានផ្ទុកសារជាតិ capsaicin និង allyl isothiocyanate។
នៅពេលហូបអាហារទាំងនេះ សារជាតិ capsaicin និង allyl isothiocyanate ក៏ធ្វើដំណើរឆ្លងកាត់បំពងក និងទៅដល់ច្រមុះ។ នៅទីនេះ សារជាតិ capsaicin និង allyl isothiocyanate រំញោចទៅលើកោសិកា receptor ដែលជាអ្នកទទួលនិងបញ្ជូនសញ្ញាទាក់ទិននឹងកម្ដៅឬហឹរ ធ្វើឱ្យភ្នាសក្នុងច្រមុះបញ្ចេញប្រតិកម្ម។
ដើម្បីការពារកោសិកាពីសារជាតិហឹរ ឬក្ដៅ ដែលបង្កឡើងដោយ capsaicin និង allyl isothiocyanate ភ្នាសក្នុងច្រមុះក៏បញ្ចេញទឹករម្អិលមកក្រៅច្រើនជាងធម្មតា ក្នុងបំណងបណ្ដេញឬលាងជម្រះសារជាតិអាក្រក់ទាំងនេះ៕
ប្រភព៖ សារព័ត៌មានបរទេស
June 24, 2020