សង្គម និងសេដ្ឋកិច្ច - La Reine Media

អាត អូនតូច មិនទាន់ហ៊ាននិយាយថា ខ្លួនជាប់ក្នុងឈុត U19 នៅចុងឆ្នាំនេះឡើយ

ក្រុមជម្រើសជាតិអាយុក្រោម 19ឆ្នាំរបស់កម្ពុជា បានឡើងទៅលេងក្នុងពានរង្វាន់ AFC U19 ប្រចាំឆ្នាំ2020 នាចុងឆ្នាំនេះ នៅក្នុងប្រទេសអ៊ូបេគីស្ថាន ដោយកម្ពុជាបានស្ថិតនៅក្នុងពូល A ជាមួយនឹងម្ចាស់ផ្ទះ អ៊ូបេគីស្ថាន ឥណ្ឌូនេស៊ី និងអ៊ីរ៉ង់។

អាត អូនតូច កីឡាករវ័យ 17ឆ្នាំ បានបញ្ជាក់ថា ខ្លួនមិនសូវជាមានសង្ឃឹមនៅក្នុងការជាប់ឈ្មោះ ក្នុងបញ្ជីកីឡាករ 23នាក់ចុងក្រោយ ដើម្បីបានទៅលេងពាននេះនៅឯប្រទេសអ៊ូបេគីស្ថានប៉ុន្មានឡើយ ដោយសារតែមូលហេតុនេះហើយ ទើបជំរុញឱ្យរូបគេខិតខំប្រឹងប្រែងហ្វឹកហាត់យ៉ាងខ្លាំង ដោយសង្ឃឹមថា គ្រូបង្វឹកនឹងបានឃើញការរីកចម្រើនរបស់គេ ហើយអាចជាប់ឈ្មោះក្នុងជម្រើស 23នាក់នោះ។

គួរបញ្ជាក់ដែរថា ក្រុមបាល់ទាត់ជម្រើសជាតិកម្ពុជា អាយុក្រោម 19ឆ្នាំ ទទួលបានកៅអីឡើងទៅប្រកួតជុំផ្ដាច់ព្រ័ត្រពានរង្វាន់ដដែលនេះ ជាលើកដំបូងក្នុងប្រវត្តិសាស្ត្ររយៈពេល 46ឆ្នាំចុងក្រោយ កាលពីចុងឆ្នាំ2019 កន្លងទៅ បន្ទាប់ពីបានប្រកួតយ៉ាងស្វិតស្វាញ ក្នុងវគ្គជម្រុះ ដោយឈរនៅលេខរៀងទី5 ក្នុងនាមជាក្រុមលេខ2 ល្អប្រចាំពូល G៕

June 29, 2020

មហាសេដ្ឋីវៀតណាមនៅកម្ពុជា! ទិដ្ឋភាពខាងក្នុងបន្ទប់គេងនិងចំការចេកជាង8,000ហិចតានៅរតនគិរីរបស់ម្ចាស់ក្រុមហ៊ុន Hoang Anh-Gia Lai

បន្ទប់គេងរបស់មហាសេដ្ឋីវៀតណាម ដែលជាប្រធានក្រុមហ៊ុន Hoang Anh-Gia Lai នៅខេត្តរតនគិរី មិនមានបន្ទប់ទឹកនៅខាងក្នុងនោះទេ ប៉ុន្តែវាជាបន្ទប់ដែលមានសុវត្ថិភាពជាងគេបង្អស់ក្នុងតំបន់ចំការចេកដ៏មហាសែនធំរបស់ក្រុមហ៊ុននេះ។

ជាន់ទី3 នៅខាងក្រោយទ្វារឈើដែលបើកចំហគ្រប់ពេល នោះគឺជាបន្ទប់របស់លោក Doan Nguyen Duc (Đoàn Nguyên Đức) ប្រធានក្រុមហ៊ុន Hoang Anh-Gia Lai ដែលធ្លាប់ជាអ្នកមានជាងគេបង្អស់នៅប្រទេសវៀតណាម (គិតតាមតម្លៃមូលបត្រនៅលើផ្សារហ៊ុនកាលណោះ)។ បន្ទប់នេះមានទំហំប្រហែល15ម៉ែត្រក្រឡា និងមានទីតាំងនៅក្បែរក្បាលជណ្ដើរនៃជាន់ទី3 ក្នុងអគារចាត់ការរបស់ក្រុមហ៊ុន។

មហាសេដ្ឋីវៀតណាមនៅកម្ពុជា! ទិដ្ឋភាពខាងក្នុងបន្ទប់គេងនិងចំការចេកជាង8,000ហិចតានៅរតនគិរី — បន្ទប់គេងរបស់ម្ចាស់ក្រុមហ៊ុនវៀតណាម Hoang Anh-Gia Lai នៅរតនគិរី

អ្នកធ្វើការនៅទីនោះបានបង្ហើបឱ្យដឹងថា បន្ទប់ស្នាក់នៅរបស់មហាសេដ្ឋីវៀតណាមរូបនេះ ហាក់ដូចជាបន្ទប់នៃផ្ទះសំណាក់មួយដូច្នោះដែរ។

នៅក្នុងបន្ទប់នេះ មានតុសម្រាប់ធ្វើការមួយ ហើយនៅលើតុនេះក៏មានទូរទស្សន៍មួយគ្រឿង ប៊ិច និងក្រដាស ហើយនៅក្បែរតុធ្វើការ មានទូទឹកកកខ្នាតតូចមួយគ្រឿង។ នៅក្បែរគ្រែ មានដែកព្យួរខោអាវមួយ ចំណែកទូដែកដែលមានច្រើនថតត្រូវបានដាក់នៅជ្រុងមួយផ្សេងទៀតក្នុងបន្ទប់នេះ។

អ្វីដែលធំជាងគេនៅក្នុងបន្ទប់របស់ថៅកែវៀតណាមរូបនេះ នោះគឺគ្រែដែលមានដំបូងនិងមុងចងទុកជាស្រេច ខណៈដែលកម្រាលពូក ផួយ ខ្នើយ សុទ្ធតែមានក្លិនសាមញ្ញ និងមិនដូចទៅនឹងរបស់សម្រាប់មហាសេដ្ឋី។ តាមរយៈទិដ្ឋភាព សម្ភារៈប្រើប្រាស់ក្នុងបន្ទប់នេះ គេអាចដឹងបានថា ម្ចាស់របស់វាពិតជាមនុស្សប្រភេទសាមញ្ញនិយម។

បើនិយាយអំពីចំការចេកនៅជុំវិញនោះ គឺថា វាមានទំហំធំធេងខ្លាំងណាស់ អ្នកមិនអាចដើរដោយថ្មើរជើងដើម្បីរុករកត្រួសៗសព្វចំការនេះក្នុងរយៈពេលខ្លីនោះឡើយ។ ចំការចេកនៅទីនេះ មានទំហំផ្ទៃក្រឡារហូតដល់ជាង 8,000ហិចតា។

នៅពេលអ្នកជិះរថយន្តតាមបែបកម្សាន្តទៅតាមដងផ្លូវក្នុងចំការនេះ អ្នកនឹងត្រូវចំណាយពេលស្ទើរពេញមួយថ្ងៃដើម្បីធ្វើដំណើរបាន175គីឡូម៉ែត្រ ក៏ប៉ុន្តែនេះគ្រាន់តែជាចម្ងាយផ្លូវមួយខ្លីដែលស្មើនឹង35%នៃចម្ងាយសរុបរបស់ផ្លូវនៅទីនេះប៉ុណ្ណោះ ព្រោះថា ផ្លូវថ្នល់សរុបនៅក្នុងចំការចេករបស់មហាសេដ្ឋីវៀតណាមនេះ មានប្រវែងដល់ទៅ500គីឡូម៉ែត្រ ដែលនេះឆ្ងាយជាងប្រវែងផ្លូវ 438គីឡូមែត្រពីទីក្រុងបារិតនៃខេត្តស្វាយរៀងទៅកាន់ទីក្រុងសៀមរាបទៅទៀត (ចម្ងាយផ្លូវត្រង់ពីបាវិតទៅសៀមរាបគឺត្រឹមតែ356គីឡូម៉ែត្រប៉ុណ្ណោះ)។

“ដើមឡើយ ចំការរបស់អ្នកវិនិយោគវៀតណាមនៅក្នុងខេត្តរតនគីរីនេះ មានបុគ្គលិកត្រឹមតែជាង1,000នាក់ប៉ុណ្ណោះ ប៉ុន្តែមកដល់បច្ចុប្បន្ន ចំការនេះមានបុគ្គលិកច្រើនជាងមុនឆ្ងាយណាស់” នេះបើតាមប្រភពព័ត៌មានពីបុគ្គលិកប្រចាំនៅចំការចេកនៅក្នុងខេត្តរតនគិរិរបស់មហាសេដ្ឋីវៀតណាម Doan Nguyen Duc។ អ្នកធ្វើការនៅក្នុងចំការចេកឱ្យដឹងថា ជារៀងរាល់ថ្ងៃ មានភ្ញៀវចេញចូលចំការនេះជាហូរហែ។ ទាំងកុងតឺន័រដឹកទំនិញ ទាំងក្រុមអតិថិជនបរទេស រួមនឹងក្រុមអ្នកជំនាញផ្សេងៗ ក៏ចេញចូលទីនេះស្ទើររាល់ថ្ងៃ។

Truong Thi Tien ដែលជាអ្នកបម្រើកិច្ចការក្នុងផ្ទះរបស់ប្រធានក្រុមហ៊ុន Hoang Anh-Gia Lai ប្រចាំនៅចំការចេកក្នុងខេត្តរតនគិរី បានបង្ហើបឱ្យដឹងទៀតថា “ក្រុមមន្ត្រីជនជាតិវៀតណាមក៏មកកាន់ទីនេះកាន់តែច្រើនឡើងៗ។ ខ្ញុំមានមិត្តមួយចំនួន ដូច្នេះឱ្យតែយប់ឡើងគឺយើងនាំគ្នាចេញទៅអង្គុយជជែកគ្នាលេងនៅខាងក្រៅ។ ភ្លើងបំភ្លឺផ្លូវ មានជុំទិស មិនខ្លាចដូចប៉ុន្មានឆ្នាំមុនទៀតទេ”។ ស្ត្រីរូបនេះនិយាយបន្ថែមថា “សូម្បីតែនៅទីរួមខេត្តក៏មិនសប្បាយស្មើនឹងទីនេះដែរ”៕

June 26, 2020

ម្ចាស់ SoftBank ចាកចេញពីក្រុមប្រឹក្សាភិបាលរបស់ Alibaba តែថានៅសង្ឃឹមទៅលើ TikTok និង ARM

Masayoshi Son ចាក់ចេញពីក្រុមប្រឹក្សាភិបាលនៃក្រុមហ៊ុនចិន Alibaba ក្រោយរយៈពេល15ឆ្នាំនៅជាមួយគ្នា ប៉ុន្តែបានអះអាងថា មិនមែនដោយមូលហេតុបាត់បង់ទំនុកចិត្តលើក្រុមហ៊ុន “យក្ស” របស់ចិនមួយនេះទេ។

បិទបញ្ចប់មហាសន្និបាតនៃភាគហ៊ុនិករបស់ Softbank កាលពីថ្ងៃទី25មិថុនា ស្ថាបនិក Masayoshi Son បានធ្វើឱ្យមានការភ្ញាក់ផ្អើលជាខ្លាំងនៅពេលលោកប្រកាសថា នឹងចាកចេញពីក្រុមប្រឹក្សាភិបាលនៃក្រុមហ៊ុន Alibaba។ លោកថ្លែងថា ជិត “បញ្ចប់ការសិក្សា” ពីក្រុមប្រឹក្សាភិបាលនៃក្រុមហ៊ុននេះហើយ។

Masayoshi Son បានបកស្រាយថា មូលហេតុដែលលោកចាកចេញនេះ មិនមែនដោយសារមានទំនាស់អ្វីនោះឡើយ បើទោះជាលោក Jack Ma (សហស្ថាបនិករបស់ Alibaba) កាលពីខែមុនក៏បានប្រកាសចាកចេញពីក្រុមប្រឹក្សាភិបាលរបស់ SoftBank។ មហាសេដ្ឋីទាំងពីររូបនេះនៅតែរក្សាទំនាក់ទំនងយ៉ាងជិតស្និទ្ធ ក្រោយពីលោក Masayoshi Son បានក្លាយជាវិនិយោគិនម្នាក់ក្នុងចំណោមមនុស្សដែលបានវិនិយោគទៅលើ Alibaba មុនគេ។ បច្ចុប្បន្ន ក្រុមហ៊ុនចិន Alibaba នេះ មានតម្លៃសរុបប្រមាណជា600ពាន់លានដុល្លារអាមេរិក និងត្រូវបានចាត់ទុកថាជាគ្រាប់ពេជ្រនៅក្នុងបញ្ជីវិនិយោគរបស់ SorfBank។

“យើងពុំមានការខ្វែងគំនិតគ្នាអ្វីនោះទេ។ នេះគឺជាការពេញចិត្តដ៏ល្អមួយ” លោក Masayoshi Son បានថ្លែងបែបនេះនៅក្នុងកិច្ចប្រជុំប្រចាំឆ្នាំរបស់ក្រុមហ៊ុន។

ការចាកចេញរបស់លោក Masayoshi Son និងលោក Jack Ma ហាក់មិនទាន់មានផលប៉ះពាល់ផ្ទាល់អ្វីមួយដល់ក្រុមហ៊ុនទាំងពីរខាងលើនៅឡើយ ប៉ុន្តែប្រការនេះបានក្លាយជាទីបញ្ចប់នៃយុគសម័យមួយ។ លោក Masayoshi Son និងលោក Jack Ma គឺជាអ្នកជំនួញពីររូបក្នុងចំណោមអ្នកជោគជ័យបំផុតនៃជំនាន់របស់ពួកគេ ហើយអាចពឹងផ្អែកទៅលើការណែនាំពីគ្នាទៅវិញទៅមកអស់រយៈពេលជាច្រើនទសវត្សរ៍កន្លងមកនេះ។

លោក Son បានចូលជាសមាជិកនៃក្រុមប្រឹក្សាភិបាលរបស់ Alibaba តាំងពីឆ្នាំ2005។ នៅពេល SoftBank ជួបបញ្ហាជាមួយនឹងខ្ទង់ខាតបង់ក្នុងឆ្នាំនេះ លោក Son អាចប្រើប្រាស់ភាគហ៊ុននៅ Alibaba ដើម្បីធ្វើជាទុនចាំបាច់នៅ SoftBank។

គិតមកដល់បច្ចុប្បន្ន Alibaba នៅតែជាខ្ទង់វិនិយោគជោគជ័យបំផុតរបស់ SoftBank។ ឆ្នាំ2000 លោក Son បានវិនិយោគ20លានដុល្លារទៅលើ Alibaba (ដែលកាលណោះ Alibaba មិនទាន់មានឈ្មោះល្បីនៅឡើយ) ដើម្បីតភ្ជាប់ទំនាក់ទំនងក្រុមអ្នកផលិតនៅប្រទេសចិនជាមួយនឹងអតិថិជននៅបរទេស។ បច្ចុប្បន្ន ភាគហ៊ុនខាងលើនេះ មានតម្លៃឡើងដល់ជាង150ពាន់លានដុល្លារអាមេរិកទៅហើយ។ ការវិនិយោគខាងលើ បានជួយឱ្យលោក Son មានឈ្មោះល្បី ហើយក្រោយមកក៏បង្កើតបាន Vision Fund ដែលមានតម្លៃជាទឹកប្រាក់ឡើងដល់ 100ពាន់លានដុល្លារអាមេរិក។

ម្ចាស់ SoftBank ចាកចេញពីក្រុមប្រឹក្សាភិបាល Alibaba តែនៅសង្ឃឹមទៅលើ TikTok — លោក Masayoshi Son

លោក Son មានឈ្មោះល្បីថាជាមនុស្សដែលយកចិត្តទុកដាក់នៅលើបណ្ដាក្រុមហ៊ុនដែលលោកគិតថា មានលទ្ធភាពក្លាយជា “Jack Ma បន្ទាប់”។ Alibaba ក៏បានក្លាយជាស្ដង់ដាមួយដើម្បីឱ្យលោក Son អាចធ្វើកិច្ចព្រមព្រៀងក្នុងការវិនិយោគទៅលើបណ្ដាក្រុមហ៊ុន startup ផ្សេងៗ។ ប៉ុន្តែ ថ្មីៗនេះ លោក Son ត្រូវរងការខាតបង់ច្រើនទៅលើខ្ទង់វិនិយោគនៅក្នុងបណ្ដាក្រុមហ៊ុនថ្មីៗ ដូចជា Wag Labs, Zume Pizza និង Brandless ជាដើម។ មុននោះ SoftBank ក៏ទទួលរងការខាតបង់យ៉ាងធ្ងន់ធ្ងរដោយសារតែ WeWork ផងដែរ។

យ៉ាងនេះក្ដី នៅក្នុងកិច្ចប្រជុំកាលពីថ្ងៃទី25មិថុនាកន្លងទៅ លោក Masayoshi Son នៅតែបង្ហាញការជឿជាក់។ នៅពេលត្រូវបានក្រុមភាគហ៊ុនិកសួរថា “តើមានចំនួនប៉ុន្មានក្នុងចំណោមក្រុមហ៊ុនទាំង88ដែលត្រូវបាន Vision Fund បណ្ដាក់ទុកនាបច្ចុប្បន្ន អាចក្លាយជា Alibaba បន្ទាប់?” លោក Son ថ្លែងថា “មាន mini Alibaba មួយ ឬពីរ”។

លោក Son ក៏បានបញ្ជាក់អំពីការជឿជាក់របស់ខ្លួនទៅលើការប្ដូរផ្លាស់ទៅរកឌីជីថល់និយមនៅទូទាំងពិភពលោក រួមនឹងការបង្ហាញវត្តមាននៃបច្ចេកវិទ្យាបញ្ញាសិប្បនិម្មិត។ ទាំងពីរនេះកំពុងតែរីកចម្រើនយ៉ាងល្បឿននៅក្នុងសម័យCOVID-19 ហើយវានឹងជួយនាំមកនូវប្រយោជន៍សម្រាប់ខ្ទង់វិនិយោគរបស់លោកទៅលើក្រុមហ៊ុនចិន ByteDance ដែលជាម្ចាស់បណ្ដាញសង្គម TikTok និងក្រុមហ៊ុនផលិតឈីប ARM របស់អង់គ្លេស៕

ប្រភព៖ Bloomberg

June 26, 2020

ផ្លាស់ប្តូរទង្វើកូនតូចដែលពិបាកញ៉ាំអាហារ

បញ្ហាការពិបាកញ៉ាំ មិនព្រមញ៉ាំអាហារ និងរើសច្រើនរបស់កូន ជាបញ្ហាដែលធ្វើឱ្យឪពុកម្តាយឈឺក្បាលជាច្រើនយុគសម័យមកហើយ ទង្វើទាំងនេះអាចនឹងក្លាយជាបញ្ហាធំរបស់គ្រួសារបាន ដោយសារតែឪពុកម្តាយព្រួយបារម្ភថា កូនញ៉ាំបានតិច បានទទួលសារជាតិអាហារមិនគ្រប់គ្រាន់ នឹងក្លាយជាក្មេងដែលខ្វះសារជាតិអាហារ មានរូបរាងកាយតូចជាងក្មេងក្នុងវ័យដូចគ្នា។

កូនខ្លួនតូច មិនងាយ និងពិបាកញ៉ាំអាហារ ប្រថុយនឹងសភាវខ្វះសារជាតិអាហារ!

“កូនខ្លួនតូច ពិបាកញ៉ាំ រើសច្រើន” ដែលឪពុកម្តាយព្រួយបារម្ភនោះ ខាងផ្នែកវេជ្ជសាស្រ្ត និងភោជនាហារមានន័យពី ក្មេងដែលមានទម្ងន់ខ្លួនតិចជាងទម្ងន់ខ្លួនជាមធ្យមរបស់ក្មេងក្នុងវ័យដូចគ្នា ដោយមានមូលហេតុមកពីទង្វើជ្រើសរើសញ៉ាំអាហារប្រភេទខ្លះមិនសម្បូរបែប ដែលនឹងធ្វើប្រថុយប្រថានដល់ការបានទទួលសារជាតិអាហារមិនគ្រប់គ្រាន់សម្រាប់ការរីកចម្រើនធំធាត់របស់រាងកាយ ដូចជាសារធាតុអាហារពពួក ប្រូតេអ៊ីន វីតាមីន A B C D E អ៊ីយ៉ូដ កាល់ស្យូម ស័ង្កសី និងជាតិដែក ហុចផលឱ្យកូនមាន “ខ្លួនតូច” ទម្ងន់ខ្លួនតិច។

បញ្ហា “ក្មេងពិបាកញ៉ាំ រើសច្រើន” នេះ តាមរយៈការសិក្សាស្រាវជ្រាវ បានរកឃើញថា អាចកើតឡើងបានលើក្មេងគ្រប់វ័យដោយអាចកែខៃ និងកែសម្រួលទង្វើនេះបាននៅលើក្មេងដែលមានអាយុចន្លោះពី 1 – 3 ឆ្នាំ ព្រោះឪពុកម្តាយអាចទប់ទល់បានងាយខ្លាំងជាងក្មេងដែលធំហើយ។

អ្នកម្តាយកុំបារម្ភអី “កូនពិបាកញ៉ាំ រើសច្រើន” អាចកែសម្រួលបាន!

ក្មេងខ្លះជ្រើសរើសក្នុងការមិនញ៉ាំបន្លែព្រោះគិតថាល្វីង តែក្មេងខ្លះជ្រើសរើសមិនញ៉ាំសាច់សត្វព្រោះស្វិត ពិបាកទំពារ ឬមិនធ្លាប់ ក្មេងខ្លះទៀតមិនចូលចិត្តញ៉ាំរបស់ចៀនបំពង ឬញ៉ាំតែនំមិនញ៉ាំបាយ ជាដើម។ ទង្វើទាំងអស់នេះធ្វើឱ្យឪពុកម្តាយមានអារម្មណ៍ភ័យបារម្ភ ខ្លាចកូនទទួលបានសារធាតុអាហារមិនគ្រប់គ្រាន់ ទើបចេះតែបង្ខំឱ្យកូនញ៉ាំអាហារឱ្យអស់ ហុចផលឱ្យកូនកើតមានអារម្មណ៍ធុញថប់តានតឹងនៅពេលដល់ម៉ោងញ៉ាំបាយម្តងៗ តែយើងអាចកែសម្រួលទង្វើទាំងនោះរបស់កូនបាន បើគ្រប់គ្នាក្នុងគ្រួសារផ្តល់នូវការសហការទៅក្នុងទិសដៅតែមួយ។

ឪពុកម្តាយគួរចាប់ផ្តើមសង្កេតប្រភេទអាហារដែលកូនចូលចិត្ត និងមិនចូលចិត្ត ដែលអាចកើតចេញពី រសជាតិ ពណ៌ ក្លិនរួមទាំងការប៉ះពាល់ទៀតផង។

1 – ធ្វើជាអ្នកភ្លក់អាហារដើម្បីកូន ៈ ឪពុកម្តាយគួរតែបង្ហាញទឹកមុខថាឆ្ងាញ់ ព្រមទាំងសម្តែងក្តីចូលចិត្តមុខម្ហូបនោះ ដើម្បីជំរុញឱ្យកូនចង់ញ៉ាំដែរ។

2 – កុំគាបសង្កត់ អត់ប្រយោជន៍ទេ ៈ មិនគួរប្រើការគាបសង្កត់ ដាក់សម្ពាធ ឬបង្ខំឱ្យកូនញ៉ាំមុខម្ហូបដែលមិនធ្លាប់ញ៉ាំឱ្យសោះ ព្រោះបើបទពិសោធន៍លើកដំបូងយ៉ាប់យ៉ឺនហើយនោះ កូនក៏នឹងលែងចង់ញ៉ាំមុខម្ហូបមួយនោះរហូត។

3 – ដាក់លាយឡំគ្នា ៈ គួររៀបចំមុខម្ហូបដែលកូនចូលចិត្ត ចូលគ្នាជាមួយមុខម្ហូបប្លែកថ្មី ដែលនឹងធ្វើឱ្យកូនហ៊ានសាកល្បងញ៉ាំ និងទទួលយកមុខម្ហូបថ្មីនោះបានកាន់តែងាយឡើង។

4 – តុបតែងមុខម្ហូបឱ្យមើលទៅគួរឱ្យកាន់តែចង់ញ៉ាំឡើង : អាចដាក់ក្នុងចានរូបតុក្កតាស្អាតៗ និងជំរុញឱ្យកូនចង់ញ៉ាំអាហារ ដោយការលេងហ្គេមរកមើលរូបតុក្កតានៅបាតចានជាដើម។

5 – ញ៉ាំអាហារជុំគ្នាជាមួយមនុស្សក្នុងក្រុមគ្រួសារ : ដើម្បីជួយសាងបរិយាកាសក្នុងពេលញ៉ាំបាយឱ្យសប្បាយរីករាយ និងកក់ក្តៅ។

6 – កំណត់រយៈពេលក្នុងការញ៉ាំអាហារមួយពេលៗឱ្យច្បាស់លាស់ : បើចប់ម៉ោងបាយហើយគួររៀបចំទុកដាក់ភ្លាមតែម្តង ដើម្បីឱ្យកូនរៀនយល់ដឹងថា គួរតែញ៉ាំបាយឱ្យឆ្អែតៗក្នុងអំឡុងពេលនោះតែម្តង មិនដូច្នោះទេនឹងត្រូវទ្រាំហេវ និងរង់ចាំដល់ពេលបាយបន្ទាប់ទៀត។

ការផ្លាស់ប្តូរទង្វើ “ពិបាកញ៉ាំ រើសច្រើន” របស់កូននឹងកើតឡើងបាន នៅពេលឪពុកម្តាយរួមគ្នាកែសម្រួលទង្វើការញ៉ាំរបស់កូនយ៉ាងពិតប្រាកដ ដោយអាចស្វែងរកព័ត៌មានបន្ថែមដើម្បីឆ្លើយតបនឹងចម្ងល់របស់ខ្លួនឯង រួមទាំងប្រឹក្សាជាមួយអ្នកជំនាញខាងភោជនាហារកុមារផងដែរ៕

June 26, 2020

ពាន យុវជនអាយុក្រោម 16ឆ្នាំ និង 18ឆ្នាំ នឹងចាប់ផ្តើមឡើងវិញ នៅ 2សប្តាហ៍ទៀត

ពានរង្វាន់ជម្រើសជើងឯកយុវជនអាយុក្រោម 16ឆ្នាំ និងយុវជនអាយុក្រោម 18ឆ្នាំ ឆ្នាំ2019 របស់សហព័ន្ធកីឡាបាល់ទាត់កម្ពុជា នឹងបើកដំណើរការប្រកួតឡើងវិញ នៅថ្ងៃទី19 ខែកក្កដា ឆ្នាំ2020 ខាងមុខនេះហើយ ក្រោយទទួលបានការអនុញ្ញាតពីក្រសួងនឹងស្ថាប័នពាក់ព័ន្ធនានារួចមក។

ការបន្តការប្រកួតឡើងវិញនេះផងដែរ គឺមិនអនុញ្ញាតឱ្យមានអ្នកគាំទ្រចូលរួមទស្សនាការប្រកួតនេះដោយផ្ទាល់ឡើយ ខណៈដែលអ្នកនៅក្នុងកីឡដ្ឋានសម្រាប់រៀបចំការប្រកួត គឺអនុញ្ញាតឱ្យមានតែចំនួនប្រមាណ 100នាក់ប៉ុណ្ណោះ។

គួររំឭកដែរថា ការប្រកួតជម្រើសជើងឯកយុវជនអាយុក្រោម 16ឆ្នាំ និងយុវជនអាយុក្រោម 18ឆ្នាំ គឺបានឈានដល់ការប្រកួតជុំទី2 ហើយ ដោយបានរកឃើញក្រុមមួយចំនួន ដែលបានកក់កៅអីជុំទី3 ខណៈពាន U18 ទើបដំណើរការប្រកួតបាន 1ប្រកួតប៉ុណ្ណោះ នៅក្នុងពូលទាំង4 ដែលមានទាំងអស់ 16ក្រុមចូលរួម៕

June 25, 2020

ការប្រកួត ពានរង្វាន់ Adria Tour ត្រូវលុបចោលទាំងស្រុង ដោយសារ Novak Djokovic ឆ្លងកូវីដ-19

កីឡាករវាយកូនបាល់ ឬតិន្និសចំណាត់ថ្នាក់លេខ1 របស់ពិភពលោក Novak Djokovic បាននិយាយសុំទោស បន្ទាប់ពីក្លាយជាកីឡាករតិន្នីសចុងក្រោយ ដែលធ្វើតេស្ដហើយរកឃើញមេរោគ Covid-19។

ក្នុងនោះដែរ ក្រោយពីតេស្តទៅលើអ្នកដែលប៉ះពាល់ផ្ទាល់ជាមួយនឹងកីឡាករខាងលើនេះ គេបានរកឃើញកីឡាករចំនួន 3រូបផ្សេងទៀតបានឆ្លងវីរុសនេះពីគាត់ រួមមានកីឡាករ Grigor Dimitrov, Borna Coric និង Viktor Troicki ដែលជាអ្នកដែលបានចូលរួមប្រកួតក្នុងពានរង្វាន់ Adria Tour ដែលរៀបចំដោយ Djokovic។

ទោះជាបែបនេះក្តី Djokovic បានបង្ហាញការសុំទោសទៅដល់អ្នកឆ្លងបន្តពីគាត់ទាំង 3រូប ដោយបានថ្លែងថាគាត់គ្មានចេតនាឡើយ គាត់រៀបចំការប្រកួតនោះ គឺដោយចិត្តបរិសុទ្ធជាទីបំផុត។ ចំពោះកម្មវិធីប្រកួតពានរង្វាន់ Adria Tour នេះ នឹងត្រូវលុបចោលទាំងស្រុងត្រឹមតែប៉ុនហ្នឹង៕

June 25, 2020

បន្ទាប់ពីបុរសម្នាក់បង្ហោះឱ្យ ឱក សុគន្ធកញ្ញា ថា « កូនមិនស្គាល់ឪពុក » ស្រាប់តែតារាចម្រៀងស្រីរូបនេះលាន់មាត់ថា….

នៅលើបណ្ដាញសង្គមហ្វេសប៊ុកដែលមានឈ្មោះថា Aok Bony បានសរសេរបង្ហោះ ដោយភ្ជាប់ជាមួយនឹងរូបថតមង្គលការរបស់ ឱក សុគន្ធកញ្ញា ជាមួយនឹងស្វាមីថា «ទោះជាកូនមិនស្គាល់ឪ ក៏ឪនៅតែចាំឈ្មោះកូនដែរ ព្រោះឪអ្នកដាក់ឱ្យ»។

តាមរយៈប្រយោគមួយឃ្លានេះ បានធ្វើឱ្យមហាជនសម្ដែងការភ្ញាក់ផ្អើល និងចាប់អារម្មណ៍ខ្លាំង ដោយមិននឹកស្មានថា រឿងរ៉ាវដែលបានកប់ទុករាប់ឆ្នាំមកហើយនោះ បែរជាត្រូវលើកបើកកកាយ យកមកនិយាយរំឭកឡើងវិញ ទាំងដែលកូនស្រីកំពុងជោគជ័យ ក្នុងជីវិតទៅហើយនោះ។ ភ្លាមៗនោះ កំពូលតារាចម្រៀងស្រីប្រចាំផលិតកម្មរស្មីហង្សមាស បានប្រាប់អ្នកសារព័ត៌មានយ៉ាងលាន់មាត់ថា និយាយថា «ខ្ញុំមិនបានដឹងទេបង..! ខ្ញុំអត់ទាន់យល់ បើគាត់ (ឪពុក) បង្ហោះបែបនេះមែន ខ្ញុំចង់ឲ្យទៅសួរគាត់ទៅថា ហេតុអីគាត់បង្ហោះអ៊ីចឹង? (រួចក៏ចុចបិទទូរស័ព្ទ និងទំនាក់ទំនងលែងបានតែម្ដង)»៕

June 25, 2020

ប្រើសំឡេង បញ្ជាឧបករណ៍ Smart Home កំពុងក្លាយជាគោលដៅ ប្រព្រឹត្តបទល្មើស

កម្មវិធីបញ្ជាដោយសំឡេងថ្មី (Voice Liveness Detection) អាចធ្វើឱ្យជនខិលខូចតែងតែថតសំឡេងគេទុក ដើម្បីយកទៅប្រព្រឹត្តអំពើបទល្មើស ដូចជា ការជ្រៀតចូលគណនី ឬឧបករណ៍ណាមួយ និងការក្លែងបន្លំដើម្បីបោកយកប្រាក់កាសជាដើម ដូច្នេះហើយទើប អង្គការស្រាវជ្រាវវិទ្យាសាស្ត្រ និងឧស្សាហកម្ម (CSIRO) រួមជាមួយក្រុមហ៊ុនសាំស៊ុង និងសាកលវិទ្យាល័យ Sungkyunkwan របស់ប្រទេសកូរ៉េខាងត្បូងបានរួមគ្នាបង្កើតដំណោះស្រាយ ដើម្បីការពារអ្នកប្រើប្រាស់ពីការលួចប្រើសំឡេងនេះ។

ក្រុមអ្នកស្រាវជ្រាវ បាន និងកំពុងបង្កើតកម្មវិធីដែលគេឱ្យឈ្មោះថា Voice liveness detection (Void) ដែលអាចបង្កប់ (Embedded) នៅក្នុងស្មាតហ្វូន ឬកម្មវិធីជំនួយសំឡេងបាន។

កម្មវិធីនេះអាចចាប់យកសំឡេងដែលកំពុងនិយាយភ្លាមៗ ដើម្បីបញ្ជាក់ពីភាពខុសគ្នារវាងសំឡេងមនុស្សកំពុងនិយាយ និងសំឡេងដែលបានចាក់ផ្សាយឡើងវិញតាមរយៈ Speaker ដើម្បីឱ្យអ្នកប្រើប្រាស់មានការប្រុងប្រយ័ត្ន។

បច្ចេកទេសក្នុងការផ្ទៀងផ្ទាត់សំឡេងនេះ ត្រូវបានសាកល្បងដោយប្រើទិន្នន័យដែលបានកំណត់អត្តសញ្ញាណពីក្រុមហ៊ុនសាំស៊ុង និងការផ្ទៀងផ្ទាត់ដោយស្វ័យប្រវត្តិ ព្រមជាមួយឧបករណ៍ឆ្លើយតប ដែល Data61 ទទួលបានកម្រិតនៃភាពត្រឹមត្រូវរហូតដល់ទៅ 99% និង 94% សម្រាប់ទិន្នន័យនីមួយ។

ជាងនេះទៅទៀតកម្មវិធីនេះអាចរកឃើញការវាយប្រហារ បានលឿនជាង 8ដង បើធៀបទៅនឹងវិធីសាស្ត្រ Deep Learning ដែលអ្នកស្រាវជ្រាវបានប្រើកន្លងមក៕

June 25, 2020

ប្រព័ន្ធទទួលសញ្ញាអ៊ីនធើណិតពីផ្កាយរណបរបស់ Elon Musk មានរូបរាងខុសគេ

ឧបករណ៍ចាប់យកសញ្ញាអ៊ីនធើណិតពីផ្កាយរណប Starlink របស់ក្រុមហ៊ុន SpaceX មានរូបរាងប្រហាក់ប្រហែលនឹងថាសហោះ ដែលវាដូចទៅនឹងអ្វីដែលលោក Elon Musk ធ្លាប់បានលើកឡើងកាលពី5ឆ្នាំមុន។

អ្នកប្រើប្រាស់ Reddit (គេហទំព័រប្រមូលព័ត៌មានសង្គម…នៅអាមេរិក) ថតបានរូបភាពជាច្រើនសន្លឹកបង្ហាញអំពីឧបករណ៍ពិសេសដែលមានរូបរាងស្រដៀងទៅនឹងថាសហោះ UFO នៅក្នុងតំបន់សាកល្បងឧបករណ៍អវកាសរបស់ក្រុមហ៊ុន SpaceX ដែលស្ថិតនៅក្នុងភូមិ Merrillan ក្នុងតំបន់ Jackson នៃរដ្ឋ Wisconsin របស់សហរដ្ឋអាមេរិក។

បើទោះជាភាគីខាង SpaceX បានបដិសេធក្នុងការបញ្ជាក់ ឬបញ្ចេញមតិអំពីបណ្ដារូបភាពទាំងនេះ ប៉ុន្តែ សារព័ត៌មាន Business Insider យល់ថា នេះគឺជាឧបករណ៍ដែលធ្លាប់ត្រូវបានលោក Musk លើកឡើងកាលពីច្រើនឆ្នាំមុន។ ឧបករណ៍ទាំងនេះមានរូបរាងតូចល្មម និងហាក់មានភាពរឹងមាំល្អ និងមានកម្ពស់ប្រហែល1.5ម៉ែត្រ ដោយផ្នែកខាងលើមានបំពាក់ថាសសម្រាប់ចាប់រលកសញ្ញាអ៊ីនធើណិត ស្រដៀងទៅនឹងចានទូរទស្សន៍ផ្កាយរណប។

កាលពីឆ្នាំ2015 លោក Musk ធ្លាប់បាននិយាយអំពីឧបករណ៍ដែលជួយឱ្យអតិថិជនអាចប្រើប្រាស់សេវាកម្មអ៊ីនធើណិតពីផ្កាយរណបរបស់លោក៖ “វាមានរូបរាងដូចទៅនឹងថាសហោះ UFO ស្ដើង ស្មើ នឹងត្រូវបានភ្ជាប់ទៅនឹងផ្នែកខាងលើនៃដែកមួយកំណាត់។ វាមានប្រព័ន្ធម៉ាស៊ីនស្វ័យប្រវត្តដែលមានតួនាទីបង្វែងថាសទៅរកទិសដែលមានរលកសញ្ញាអ៊ីនធើណិតច្រើនដែលបាញ់ចេញពីផ្កាយរណប Starlink របស់ SpaceX”។ ក៏ប៉ុន្តែ 5ឆ្នាំកន្លងមកហើយបន្ទាប់ពីលោក Musk បាននិយាយដូចខាងលើ គេមិនទាន់បានឃើញរូបរាងជាផ្លូវការណាមួយបញ្ជាក់អំពីឧបករណ៍ចាប់សញ្ញាអ៊ីនធើណិតនេះនៅឡើយ។

បណ្ដារូបភាពជាក់ស្ដែងដែលទើបបែកធ្លាយនាពេលថ្មីៗនេះ ទទួលបានប្រតិកម្មវិជ្ជមានពីសង្គមបច្ចេកវិទ្យា។ អត្ថបទចែករំលែករូបភាពដំបូងៗនៅលើគេហទំព័រ Reddit បាននាំឱ្យមានការបញ្ចេញមតិប្រមាណជា100លើក ព្រមទាំងទទួលបានការវាយតម្លៃល្អ99%។ មនុស្សជាច្រើនយល់ឃើញថា វត្តមាននៃរូបភាពខាងលើនេះបានបង្ហាញថា គម្រោងផ្គត់ផ្គង់អ៊ីនធើណិតពីផ្កាយរណប់របស់មហាសេដ្ឋី Elon Musk នឹងក្លាយជាការពិតក្នុងពេលឆាប់ៗនេះ។

សូមរំឭកថា កាលពីប៉ុន្មានថ្ងៃកន្លងទៅនេះ គេហទំព័ររបស់ Starlink ក៏បានចាប់ផ្ដើមអនុញ្ញាតឱ្យមនុស្សគ្រប់គ្នាចុះឈ្មោះទទួលព័ត៌មានថ្មីស្ដីអំពីគម្រោងនិងការប្រើប្រាស់សាកល្បងសេវាកម្មអ៊ីនធើណិតពីផ្កាយរណបរបស់ក្រុមហ៊ុន SpaceX ផងដែរ៕

ប្រភព៖ Bussiness Insider

June 25, 2020

តារាសម្តែង គីម លីហ្សា ប្រាប់យុទ្ធសាស្ត្រដល់អ្នកមិនចូលចិត្តលក់អនឡាញន៍

តាមរយៈ វីដេអូឃ្លីប របស់តារាសម្តែង គីម លីហ្សា ដែលមានរយៈពេលប្រហែលជាប្រាំនាទី បានបង្ហាញពីអត្ថប្រយោជន៍ របស់អ្នកប្រកបរបរ អនឡាញន៍ និងការលើកទឹកចិត្តដល់ស្រ្តីមេផ្ទះ ដែលមិនមានពេលគ្រប់គ្រាន់ សម្រាប់ធ្វើការងារ ដូច្នេះអាចធ្វើការពីផ្ទះ ដោយចំណាយដើមទុនបន្តិចបន្តួចប៉ុណ្ណោះ។

តារាសម្តែងកូនពីររូបនេះ បាននិយាយថា ការរើសអើង សម្រាប់អ្នកមួយចំនួនថា ធ្វើជំនួញតាមអនឡាញន៍ ទាល់តែត្រូវការនិយាយ បែបឡប់ៗ ជេរបញ្ចោរគ្នា ទើបអាចលក់ដាច់ នោះជាការយល់ច្រឡំខុស ពីអ្នកលក់អនឡាញន៍អាជីព។ គីម លីហ្សា ថា ប្រសិនបើការងារអនឡាញន៍ មិនអាចរកកម្រៃបានច្រើនគួរសមទេ នាងច្បាស់ជាមិនលះបង់ការរស់នៅប្រទេសអូស្រ្តាលី ហើយនាំកូននិងប្តីមកលក់ដូរអនឡាញនោះឡើយ។

តាមរយៈវីដេអូ នេះ គីម លីហ្សា ចង់លើកទឹកចិត្ត និងជម្រុញដល់ការគិត ដែលអ្នកខ្លះ មិនសូវអោយតំលៃលើការងារលក់អនឡាញន៍ ព្រោះតែការគិតខ្លះថា មុខរបរនេះ មិនថ្លៃថ្នូរ និងមិនសូវរកចំណូល បានច្រើន។ ប៉ុន្តែតាមការបកស្រាយ របស់នាង គឺមានអត្ថប្រយោជន៍ច្រើនមែនទែន ព្រោះការងារមួយនេះ មិនចាំបាច់មានចំណេះវិជ្ជាជ្រៅជ្រះ មិនចំណាយដើមទុនច្រើន មិនត្រូវការពេលវេ ជាក់លាក់ណាមួយឡើយ។ តោះចង់ដឹងកាន់តែច្បាស់ ចូលទៅស្តាប់ការបកស្រាយរបស់គីម លីហ្សាបន្តិចមើល!៖

June 25, 2020

Category: សង្គម និងសេដ្ឋកិច្ច