សង្គម និងសេដ្ឋកិច្ច - La Reine Media

បើមិនប្រយ័ត្នកុមារ អាចក្លាយជាជនរងគ្រោះ ពីការរំលោភបំពានផ្លូវភេទតាមប្រព័ន្ធអ៊ីនធើណិត

បច្ចុប្បន្ននេះ ដោយសារតែបច្ចេកវិទ្យាមានភាពរីកចម្រើនខ្លាំង បានធ្វើឱ្យមនុស្សគ្រប់គ្នា រួមទាំងកុមារតូចផងមានប្រើប្រាស់ទូរស័ព្ទឆ្លាតវៃ និងឧបករណ៍អេឡិចត្រូនិកដែលអាចភ្ជាប់ប្រព័ន្ធអ៊ីនធើណិតបាន។

លោកជំទាវ ញ៉េប សុភាព អគ្គលេខាធិការ នៃអគ្គលេខាធិការដ្ឋានក្រុមប្រឹក្សាជាតិកម្ពុជាដើម្បីកុមារ បានលើកឡើងថា កុមារកម្ពុជា ងាយនឹងក្លាយជាជនរងគ្រោះ ដោយសារការរំលោភបំពាន និងកេងប្រវ័ញ្ចផ្លូវភេទតាមរយៈការប្រើប្រាស់ទូរស័ព្ទដៃវៃឆ្លាត។ លោជំទាវបញ្ជាក់ថា ការរំលោភបំពាន និងការកេងប្រវ័ញ្ចផ្លូវភេទ តាមប្រព័ន្ធអ៊ិនធើណិត កាន់តែមានភាពស្មុគស្មាញ និងកាន់តែអាក្រក់ទៅៗ ដូចជា ការចាប់ជម្រិត ការជួញដូរមនុស្ស និងពេស្សាចាជាដើម។ លើសពីនោះ កុមាររងគ្រោះពីការកេងប្រវ័ញ្ចផ្លូវភេទ បានបន្សល់នូវផលប៉ះពាល់ធ្ងន់ធ្ងរទាំងផ្លូវកាយ និងផ្លូវ កុមាររងគ្រោះទាំងនោះភាគច្រើន មានអារម្មណ៍ពិបាកក្នុងការទុកចិត្តអ្នកដទៃ អស់សង្ឈឹម បាក់ទឹកចិត្ត ឯកា ច្របូកច្របល់ ខកចិត្ត ស្តីបន្ទោសខ្លួនឯង និងឆាប់ភ័យខ្លាចជាដើម។

ហេតុនេះអាណាព្យាបាលគួរបង្កើនការប្រុងប្រយ័ត្នចំពោះកូនជាទីស្រឡាញ់ក្នុងការប្រើប្រាស់ឧបរកណ៍បច្ចេកវិទ្យា ធ្វើយ៉ាងណាបញ្ចៀសពួកគេពីផលប៉ះពាល់អវិជ្ជមានដែលអាចនឹងកើតមានឡើងដោយសារតែគុណវិបត្តិរបស់វា៕

July 9, 2020

ស្ថានភាពនៃការនាំចេញរបស់កម្ពុជានៅមានស្ថានភាពនឹងនរនៅឡើយក្នុងឆមាសទី1នេះ

ស្ថិតក្នុងផលប៉ះពាល់នៃជំងឺ Covid-19 សេដ្ឋកិច្ចពិភពលោកត្រូវបានគេព្យាករណ៍ថានឹងមានកំណើនអវិជ្ជមានសម្រាប់ឆ្នាំ 2020 នេះ ក្នុងនោះកម្ពុជាក៏ត្រូវបានគេមើលឃើញថានឹងមានកំណើនអវិជ្ជមានផងដែរ។

ទោះជាយ៉ាងនេះក្តីបើមើលលើស្ថានភាពនៃការនាំចេញរបស់កម្ពុជាជាក់ស្តែង ក្នុងរយៈពេល 5ខែដើមឆ្នាំ 2020 នេះ ឯកឧត្តម វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានបង្ហាញថាការនាំចេញរបស់កម្ពុជានៅមានស្ថានភាពវិជ្ជមាននៅឡើយ។ ក្នុងនោះវិស័យកាត់ដេរកម្ពុជាមានការធ្លាក់ចុះខ្លាំង ដោយហេតុថា ទីផ្សារអឺរ៉ុប និងអាមេរិកមួយចំនួនបានផ្អាកការទិញសិន តែបើយើងមើលទៅទំនិញផ្សេងទៀត គឺមិនទាន់ធ្លាក់នោះទេ។ ផ្ទុយទៅវិញ ទំនិញមួយចំនួនដែលមិនមែនកាត់ដេរដូចជាកសិកម្ម កង់ និងគ្រឿងអេឡិចត្រូនិកជាដើម មានការកើនឡើងទៅវិញ។

ឯកឧត្តមថា ក្នុងរយៈពេល 5ខែដើមឆ្នាំនេះ ការនាំចេញរបស់កម្ពុជាមិនទាន់អវិជ្ជមាននោះទេ បើប្រៀបធៀបនឹងឆ្នាំមុន គឺយើងនៅមើលឃើញពីកំណើននៅឡើយ។ ឆ្លើយតបនឹងបញ្ហានេះ រដ្ឋាភិបាលបានចំណាយថវិកាជាតិប្រមាណជាង 1,000លានដុល្លារអាមេរិក ដើម្បីទប់ទល់ជាមួយនឹងវិបត្តិដែលកើតឡើងដោយសារការរីករាលដាលនៃជំងឺ Covid-19នេះ៕

July 9, 2020

U22 វៀតណាម ចេញទៅបារាំង ប្រកួតជាមួយជើងខ្លាំង 10ប្រទេស ដើម្បីត្រៀមការពារមេដាយមាសស៊ីហ្គេម

ឈុតយុវជនអាយុក្រោម 21ឆ្នាំ ដែលជាឈុតត្រៀមខ្លួនការពារមេដាយមាសស៊ីហ្គេម វៀតណាម ដែលនឹងត្រូវធ្វើជាម្ចាស់ផ្ទះស៊ីហ្គេម នាឆ្នាំក្រោយនេះ នឹងចូលរួមក្នុងពានរង្វាន់ក្រៅផ្លូវការមួយ ដែលត្រូវប្រកួតប្រជែងជាមួយនឹងក្រុមខ្លាំងៗទាំង10 មកពីជុំវិញពិភពលោក។

វៀតណាម ត្រូវបានប្រទេសបារាំងអញ្ជើញ ក្នុងចំណោមក្រុមផ្សេងៗទៀតចំនួន9 ដែលជាក្រុមខ្លាំងបំផុត តំណាងឱ្យតំបន់នីមួយៗមកពីជុំវិញពិភពលោក ហើយវៀតណាម គឺជាក្រុមខ្លាំងបំផុតតំណាងឱ្យតំបន់អាស៊ាន។ ខណៈដែលប្រទេស9 ផ្សេងទៀតរួមមាន អង់គ្លេស បារាំង អូស្ត្រាលី ជប៉ុន ម៉ិកស៊ិក កុងហ្គោ រ៉ូម៉ានី កូឌីវ័រ និង ម៉ូរ៉ូកូ។

គួរបញ្ជាក់ដែរថា នៅខែធ្នូ ក្រុមនេះនឹងចេញទៅប្រទេសបារាំង ដើម្បីហ្វឹកហាត់ និងប្រកួតប្រជែងក្នុងព្រឹត្តិការណ៍ខាងលើនេះ ដែលនេះ គឺជាឱកាសដ៏មានតម្លៃសម្រាប់ U22វៀតណាម ព្រោះពួកគេនឹងត្រូវប្រកួតជាមួយក្រុមអឺរ៉ុប និងអាមេរិក ហើយនឹងក្លាយជាការរៀបចំដ៏ល្អសម្រាប់ការប្រកួតជម្រុះ (AFC U-23 Championship) នៅឆ្នាំ2022 និងស៊ីហ្គេម លើកទី31 ឆ្នាំ2021ផងដែរ៕

July 9, 2020

Zlatan អួតខ្ទរ និងតាំងខ្លួនថា ជាអ្នកជួយក្រុមឱ្យឈ្នះ Juventus

ក្នុងការប្រកួតលីកកំពូលអ៊ីតាលី (Italia Seria A) រវាងក្រុមបាល់ទាត់ AC Milan និង Juventus បានបញ្ចប់ទៅដោយលទ្ធផល AC Milan ឈ្នះ Juventus 4ទល់នឹង2។

ក្រុម Juventus ជាអ្នករកគ្រាប់បាល់បាន 2គ្រាប់មុនដោយAdrien Rabiot និង Cristiano Ronaldo។ តែបន្ទាប់ពី Zlatan ទទួលបានបាល់ប៉េណាល់ទី 1គ្រាប់ឱ្យ AC Milan មក ការប្រកួតហាក់ដូចជាមានការប្រែប្រួលខ្លាំងមែនទែន។ AC Milan កាន់តែធ្វើបានល្អដោយបន្ថែមបាន 3គ្រាប់ទៀត ខណៈដែលក្រុម Juventus វិញ កីឡាករនៅតំបន់ការពារ ហាក់ដូចជាមិនមានអារម្មណ៍លេងក្នុងខ្លួនសោះឡើយ។ ចប់ការប្រកួត AC Milan យកឈ្នះ Juventus បានក្នុងលទ្ធផល 4-2។

ក្រោយបញ្ជប់ការប្រកួត Zlatan Ibrahimovic ដែលបានជាប់ជាកីឡាករល្អបំផុតក្នុងការប្រកួតនេះ (MVP) បានផ្តល់បទសម្ភាសថា គ្រប់ពេលប្រកួត គេតែងតែបំពេញតួនាទីជាច្រើនដូចជា គ្រូបង្វឹកផង ប្រធានក្រុមផង អ្នករកគ្រាប់បាល់ផង ហើយក៏ជាអ្នកជួយឱ្យក្រុមឈ្នះផងដែរ តែ AC Milan ហៅគេមកយឺតបន្តិច និងបានបន្ថែមទៀតថា បើគេបានមកតាំងពីដើមរដូវកាលនោះ ម្ល៉េះក្លិបមួយនេះ ឈ្នះជើងឯកបាត់ទៅហើយ៕

July 9, 2020

6ចំណុចដែលក្រសួងតម្រូវឱ្យសាលាដែលស្នើរសុំបើកឡើងវិញនៅខែក្រោយអនុវត្ត

ថ្មីៗនេះ អ្នកនាំពាក្យក្រសួងអប់រំ យុវជន និងកីឡា បានថ្លែងប្រាប់បណ្តាញព័ត៌មានក្នុងស្រុងកថា ក្រសួងនឹងស្នើរទៅនាយករដ្ឋមន្ត្រីដើម្បីសុំគោលការណ៍បើកសាលារៀនសាកល្បងនៅដំណាក់កាលទី1 ក្នុងដើមខែសីហាខាងមុខនេះ។

ឯកឧត្តម រស់ សុវាចា អ្នកនាំពាក្យក្រសួងអប់រំ យុវជន និងកីឡា បានលើកឡើងថា ក្រសួងអប់រំ បានពិភាក្សាជាមួយក្រសួងសុខាភិបាល ក្រសួងសេដ្ឋកិច្ច និងភាគីពាក់ព័ន្ធ ដើម្បីសុំការសម្រេចពីប្រមុខរាជរដ្ឋាភិបាល ដោយក្នុងនោះយើងនឹងមានវិធានការចាំបាច់មួយចំនួនដើម្បីដាក់ឱ្យដំណើរការសាលារៀននៅដំណាក់កាលទី1នេះ។

ចំណុចសំខាន់ៗទាំងអស់នោះរួមមាន៖

គ្រឹះស្ថានសិក្សាត្រូវចុះកិច្ចសន្យាទទួលខុសត្រូវ លើការអនុវត្តន៍វិធានការសុវត្ថិភាពសិក្សារបស់ ក្រសួងអប់រំ យុវជន និងកីឡា ក្រសួងសុខាភិបាល និងអង្គការសុខភាពពិភពលោក ដូចជាការអនុវត្តន៍លក្ខខណ្ឌតម្រូវនៃការលើកកម្ពស់សុខភាពសិក្សាក្នុងបរិបទ Covid-19 ការរៀបចំបរិស្ថានសាលារៀន និងថ្នាក់រៀនឱ្យស្របតាមស្តង់ដាសុវត្ថិភាពសុខភាពសិក្សា ការរក្សាគម្លាតសុវត្ថិភាព ការវាស់កម្តៅបុគ្គលជាប្រចាំ និងការលាងដៃជាប្រចាំជាដើម។
គ្រឹះស្ថានសិក្សាត្រូវអនុវត្តការអប់រំតាមគន្លងថ្មី ការរៀនក្នុងថ្នាក់ខ្លះ រៀនអនឡាញខ្លះ តាមគោលការណ៍ស្ម័គ្រចិត្ត និងការយល់ព្រមពីមាតាបិតា។
គ្រឹះស្ថានសិក្សាត្រូវរៀបចំក្រុមការងារទទួលបន្ទុកសុវត្ថិភាពសុខភាពសិក្សា ដើម្បីត្រួតពិនិត្យជាប្រចាំក្រោមការដឹកនាំរបស់ប្រធានគ្រឹះស្ថានសិក្សា និងម្ចាស់ភាគហ៊ុន។
គ្រឹះស្ថានសិក្សាត្រូវតម្រូវឱ្យមានការធ្វើតេស្តពិនិត្យសុខភាព និងរកមេរោគ Covid-19 សម្រាប់បុគ្គលិកអប់រំ និងសិស្សានុសិស្ស។
គ្រឹះស្ថានសិក្សាត្រូវអនុវត្តវិធានការតម្រូវនានា។
ក្រសួងអប់រំ យុវជន និងកីឡា នឹងចុះត្រួតពិនិត្យវាយតម្លៃយ៉ាងម៉ឹងម៉ាត់លើការអនុវត្តរបស់គ្រឹះស្ថានសិក្សា៕

July 9, 2020

ហេតុអីបានក្រោយពេលចាក់វ៉ាក់សាំងហើយ កូនតូចក្តៅខ្លួន?

បើអ្នកម្តាយធ្លាប់នឹកឆ្ងល់នៅក្នុងចិត្តថា តើហេតុអីបានកូនតូចជាទីស្រឡាញ់ក្តៅខ្លួន ក្រោយពេលចាក់វ៉ាក់សាំងហើយនោះ ខាងក្រោមនេះគឺជាចម្លើយ សូមតាមដានទាំងអស់គ្នា។

– វ៉ាក់សាំងគឺអ្វី?

វ៉ាក់សាំង គឺ ជីវវត្ថុដែលផលិតចេញមកពីមេរោគ ឬពិសរបស់មេរោគដែលត្រូវបានធ្វើឱ្យមិនអាចបង្កជាជំងឺបាន ដោយចាក់ចូលទៅក្នុងរាងកាយមនុស្សដើម្បីជំរុញប្រព័ន្ធការពារជំងឺចំពោះមេរោគ ដែលវាមានផលការពារការកើតជំងឺ ឬធ្វើឱ្យកម្រឹតភាពធ្ងន់ធ្ងររបស់ជំងឺនោះថយចុះ។

– ហើយចុះហេតុអីបានក្រោយពេលចាក់វ៉ាក់សាំងហើយ កូនតូចក្តៅខ្លួន?

នៅពេលវ៉ាក់សាំងចូលទៅក្នុងរាងកាយ ប្រព័ន្ធការពារជំងឺរបស់យើងនឹងបញ្ជូន ” Antibody ” ដែលមានតួនាទីចាត់ការពួកមេរោគ(វ៉ាក់សាំង)ដែលចូលមកខាងក្នុងរាងកាយ ហើយក្នុងអំឡុងពេលដែលប្រព័ន្ធរាងកាយកំពុងចាត់ការជាមួយអ្វីដែលប្លែកនេះឯងដែលវាជាមូលហេតុធ្វើឱ្យកើតអាការក្តៅខ្លួន។ នៅពេល antibody ចាត់ការជាមួយវ៉ាក់សាំងរួចរាល់ហើយ រាងកាយក៏នឹងវឹលត្រឡប់ទៅរកភាពប្រក្រតីវិញ និងបន្ទាប់ពីនោះទៅ បើមានមេរោគដូចគ្នានោះចូលមកទៀត រាងកាយនឹងចាត់ការភ្លាមតែម្តង ព្រោះរាងកាយរបស់យើងស្គាល់មេរោគនោះមុនរួចមកហើយតាមរយៈការចាក់វ៉ាក់សាំងហ្នឹងឯង តែ…តែប្រតិកម្មដែលរាងកាយរបស់កូនតូចម្នាក់ៗមានចំពោះវ៉ាក់សាំងនោះ មានច្រើនតិចមិនដូចគ្នាទេ ៖

– វ៉ាក់សាំងដែលគ្រូពេទ្យប្រាប់ថា “ចាក់ហើយ កូនអាចនឹងក្តៅខ្លួនណា៎” ក៏មិនចាំបាច់ត្រូវតែក្តៅខ្លួនគ្រប់គ្នានោះទេ ព្រោះវ៉ាក់សាំងតែមួយដូចគ្នានោះ ក្មេងខ្លះក្រោយពីចាក់ហើយ ក្តៅខ្លួន តែក្មេងខ្លះនៅប្រក្រតីធម្មតា។

– “មិនមែនទេ!” ដែលថា វ៉ាក់សាំងគ្រប់ប្រភេទ ពេលចាក់ហើយត្រូវតែក្តៅខ្លួននោះ។

– ក្មេងដែលមានអាការក្តៅខ្លួន មិនបានមានន័យថា កើតប្រតិកម្មចាញ់វ៉ាក់សាំងនោះទេ។

ចុងក្រោយបំផុតដែល ឡារ៉ែនចង់ផ្តាំផ្ញើនោះគឺ ប្រហែលជាគ្មានឪពុកម្តាយម្នាក់ណាចង់ឃើញកូនឈឺថ្កាត់ ឬមិនស្រួលខ្លួនសូម្បីតែបន្តិចណាឡើយ ដូច្នេះហើយទើបការសាងប្រព័ន្ធការពារជំងឺដល់រាងកាយតូចមួយរបស់កូនដោយវិធីការចាក់វ៉ាក់សាំងនេះ គឺជាវិធីការមួយដែលល្អបំផុតក្នុងការការពារជំងឺ ជាពិសេសបំផុតនៅលើក្មេងតូចដែលប្រព័ន្ធការពារជំងឺនៅមិនទាន់ល្អឥតខ្ចោះ។

បានដឹងបែបនេះហើយ កុំភ្លេចនាំកូនតូចទៅទទួលយកវ៉ាក់សាំងតាមដែលក្រសួងសុខាភិបាលបានកំណត់ទុកតាមពេលវេលាដែលត្រឹមត្រូវស័ក្តសមផង៕

July 9, 2020

ទ្រព្យសម្បត្តិពាន់លានដុល្លាររបស់ Kanye West គូប្រជែងថ្មីរបស់លោក Trump សម្រាប់ការបោះឆ្នោតជ្រើសរើសប្រធានាធិបតីឆ្នាំនេះ

Kanye West ដែលទើបតែបានប្រកាសថានឹងឈរឈ្មោះជាបេក្ខភាពប្រធានាធិបតី ប្រជែងជាមួយលោក Trump ក្នុងឆ្នាំនេះ គឺជាតារាចម្រៀងរ៉ែប និងជាអ្នករចនាម៉ូដសម្លៀកបំពាក់កីឡា មានទ្រព្យសម្បត្តិចំនួន 1.3ពាន់លានដុល្លារអាមេរិក។

តារាចម្រៀងរ៉ែប លោក Kanye West ទើបតែបានប្រកាសឈរឈ្មោះជាបេក្ខភាពប្រធានាធិបតីសហរដ្ឋអាមេរិកនៅក្នុងការប្រជែងរកសន្លឹកឆ្នោតក្នុងការបោះឆ្នោតអាណត្តិថ្មីក្នុងឆ្នាំនេះ ក្នុងនាមជាបេក្ខភាពរបស់គណបក្ស Birthday Party។ កំពូលទីប្រឹក្សាសម្រាប់យុទ្ធនាការរកសំឡេងឆ្នោតរបស់លោក West បច្ចុប្បន្ន នោះគឺភរិយារបស់លោក អ្នកស្រី Kim Kardashian West ដែលជាកំពូលតារាទូរទស្សន៍ និងមហាសេដ្ឋី Elon Musk ដែលជាម្ចាស់ក្រុមហ៊ុនផលិតរថយន្តអគ្គិសនី Tesla។

លោក George Lucas, លោក Kanye West និង លោក Elon Musk នៅក្នុងកម្មវិធី TIME 100 Gala កាលពីឆ្នាំ 2015

យោងតាមស្ថិតិរបស់ទស្សនាវដ្ដី Forbes លោក Kanye West មានទ្រព្យសម្បត្តិប្រមាណជា 1.3ពាន់លានដុល្លារអាមេរិក។ លោក West ត្រូវបានបញ្ចូលឈ្មោះទៅក្នុងបញ្ជីមហាសេដ្ឋីកាលពីខែមេសា2020។

West ឆ្នាំនេះមានអាយុ43ឆ្នាំ ជាអ្នកដែលមានឈ្មោះល្បីថារកបានប្រាក់ចំណូលខ្ពស់ក្នុងឆ្នាំនេះ ដោយរកបាន170លានដុលលារ នេះបើតាមទស្សនាវដ្ដី Forbes។ ឆ្នាំ2014 Forbes បានចុះផ្សាយថា ទ្រព្យសម្បត្តិរបស់លោក West មានត្រឹមតែប្រមាណជា30លានដុល្លារប៉ុណ្ណោះ។

ទ្រព្យសម្បត្តិពាន់លានដុល្លាររបស់ Kanye West និងអ្នកនៅពីក្រោយ — លោក West និងលោក Elon Musk នៅក្នុងក្រុមហ៊ុន SpaceX

ជាកំពូលតារាចម្រៀងរ៉ែបម្នាក់ ក៏ប៉ុន្តែទ្រព្យសម្បត្តិភាគច្រើនរបស់ West គឺបានមកពីផលិតផលស្បែកជើងកីឡា Yeezy ដែលត្រូវបាន Forbes វាយតម្លៃថាជា “មួយក្នុងចំណោមរឿងរ៉ាវលក់រាយដ៏អស្ចារ្យបំផុតប្រចាំសតវត្សរ៍”។ ភាគហ៊ុនរបស់លោក West នៅក្នុងក្រុមហ៊ុនស្បែកជើង Yeezy នេះ មានតម្លៃ 1.26ពាន់លានដុល្លារ។ នេះគឺជាសែស្រឡាយផលិតផលដែល West សហការជាមួយក្រុមហ៊ុន Nike កាលពីឆ្នាំ2009 ហើយក្រោយមក លោកក៏បានសហការជាមួយក្រុមហ៊ុន Adidas ក្នុងឆ្នាំ2013។ កាលពីឆ្នាំទៅ (2019) Yeezy ត្រូវបានធនាគារ Bank of America កំណត់តម្លៃរហូតដល់ទៅ 3ពាន់លានដុល្លារអាមេរិក។

ទន្ទឹមនឹងនេះ West ក៏មានខ្ទង់ប្រាក់សុទ្ធចំនួន17លានដុល្លារ និងមូលបត្រដែលមានតម្លៃប្រហែល35លានដុល្លារផងដែរ។ ទ្រព្យសម្បត្តិដែលល្បីឈ្មោះផ្សេងទៀតរបស់លោក West រួមមានផ្ទះដែលមានតម្លៃ81លានដុល្លារ និងដី 21លានដុល្លារ។ West និងភរិយា Kim Kardashian ដែលជាតារាទូរទស្សន៍នៅសហរដ្ឋអាមេរិក មានឈ្មោះល្បីល្បាញថាមានអចលនទ្រព្យច្រើននៅទីក្រុង Los Angeles និងនៅរដ្ឋ Wyoming។

នៅក្នុងកិច្ចសម្ភាសមួយនៅលើវិទ្យុកាលពីឆ្នាំ2018 លោក West ឱ្យដឹងថា លោកចង់ក្លាយជា “អ្នកអភិវឌ្ឍអចលនទ្រព្យធំជាងគេបង្អស់ដែលដូចទៅនឹងលោក Howard Hughes ដែលមានឈ្មោះល្បីជាមួយយន្តហោះ និងលោក Henry Ford ល្បីឈ្មោះជាមួយនឹងរថយន្ត”។

លោក West លែងគាំទ្រលោក Trump ហើយសម្រេចចិត្តធ្វើជាគូប្រជែងជាមួយប្រធានាធិបតីរូបនេះ

ក៏ប៉ុន្តែ លោក West ក៏ជាតារាចម្រៀងម្នាក់ដែលសម្បូរដោយស្នាដៃ និងរកបានប្រាក់ចំណូលមិនតិចពីវិស័យនេះនោះដែរ។ Forbes បានឱ្យដឹងថា ក្រុមហ៊ុន GOOD Music និងស្នាដៃពាក់ព័ន្ធរបស់ West ត្រូវបានកំណត់តម្លៃយ៉ាងតិច 90លានដុល្លារ។ ក៏ប៉ុន្តែ ទស្សនាវដ្ដី Forbes យល់ថា West មានឯកសារតិចតួចដែលអាចផ្ទៀងផ្ទាត់ជាមួយនឹងតួលេខនេះ ហើយលោកក៏នៅមានខ្ទង់បំណុលប្រមាណជា 100លានដុល្លារផងដែរ។ ជាសរុប លោក West មានទ្រព្យប្រមាណជា 1.3ពាន់លានដុល្លារអាមេរិក។

បើទោះជាត្រូវបានបញ្ចូលឈ្មោះទៅក្នុងបញ្ជីមហាសេដ្ឋី ប៉ុន្តែ West នៅតែមិនទាន់ពេញចិត្តជាមួយនឹង Forbes នៅឡើយ ហើយយល់ថា ទស្សនវដ្ដីនេះបានវាយតម្លៃទាបទៅលើទ្រព្យសម្បត្តិរបស់ខ្លួន។ កាលពីខែមេសា លោក West ឱ្យដឹងថា “មិនមែន 1ពាន់លានដុល្លារនោះទេ។ តាមពិត វាគួរតែ 3.3ពាន់លានដុល្លារអាមេរិកឯណោះ”៕

ប្រភព៖ Forbes, Guardian

July 9, 2020

យុទ្ធសាស្ត្រ “ចងជើង” បុគ្គលិកពួកែៗរបស់ក្រុមហ៊ុន FWD ដែលទើបទទួលបានពានរង្វាន់ ”កន្លែងធ្វើការល្អបំផុតប្រចាំទ្វីបអាស៊ី ឆ្នាំ2020″

FWD ផ្ដល់សិទ្ធិដល់បុគ្គលិក បង្កើតបរិយាកាសការងារល្អ ដែលមានលក្ខណៈតភ្ជាប់ទំនាក់ទំនងគ្នា គោរពគ្នាទៅវិញទៅមក ផ្ដល់អត្ថប្រយោជន៍ល្អៗ និងនាំមកនូវឱកាសអភិវឌ្ឍខ្លួនសម្រាប់បុគ្គលិកគ្រប់រូប។ល។

FWD វៀតណាមគឺជាក្រុមហ៊ុនមួយក្នុងចំណោមបណ្ដាក្រុមហ៊ុនដែលទើបតែទទួលបានការលើកតម្កើងដោយពានរង្វាន់ “កន្លែងធ្វើការល្អបំផុតប្រចាំទ្វីបអាស៊ី2020” (Best Companies To Work For In Asia Awards) ពី HR Asia Awards។ អ្នកស្រី Nguyen Kim Mai Thu (អគ្គនាយិការងផ្នែកអភិវឌ្ឍធនធានមនុស្សរបស់ក្រុមហ៊ុន FWD បានចែករំលែងនូវវិធីសាស្ត្រដែលក្រុមហ៊ុននេះបានប្រើប្រាស់ដើម្បីទាក់ទាញ ក៏ដូចជា “ចងជើង” បុគ្គលិកឆ្នើមៗ ដែលនេះបានជួយឱ្យក្រុមហ៊ុនក្លាយជាកន្លែងធ្វើការមួយដែលត្រូវបានវាយតម្លៃខ្ពស់លំដាប់អន្តរជាតិ។

FWD ទទួលបានការកោតសរសើរនៅក្នុងបញ្ជីចំណាត់ថ្នាក់ស្ដីអំពីបណ្ដាក្រុមហ៊ុនដែលមានបរិយាកាសការងារល្អបំផុតនៅក្នុងទ្វីបអាស៊ីប្រចាំឆ្នាំ2020 ដែលត្រូវបាន HR Asia ដែលជាទស្សនាវដ្ដីមានកេរ្តិ៍ឈ្មោះល្អគួរទុកចិត្តកម្រិតកំពូលស្ដីអំពីធនធានមនុស្សនៅក្នុងតំបន់អាស៊ី ជាអ្នករៀបចំ និងជ្រើសរើស។

ខាងក្រោមនេះគឺជាសំណួរ និងចម្លើយសំខាន់ៗដែលត្រូវបានធ្វើឡើងនៅក្នុងកិច្ចសម្ភាសរបស់សារព័ត៌មាន ជាមួយនឹងអ្នកស្រី Nguyen Kim Mai Thu ៖

អ្នកស្រី Nguyen Kim Mai Thu (អគ្គនាយិការងផ្នែកអភិវឌ្ឍធនធានមនុស្សរបស់ក្រុមហ៊ុន FWD

– កត្តាអ្វីខ្លះដែលបានជួយឱ្យក្រុមហ៊ុនដែលទើបតែរកស៊ីនៅវៀតណាមត្រឹមរយៈពេល4ឆ្នាំសោះ អាចទទួលបានពានរង្វាន់ HR Asia Awards 2020 ?

+ ក្រុមធនធានមនុស្សដ៏ពូកែ និងពោរពេញដោយថាមពល បានរួមចំណែកនាំមកនូវពានរង្វាន់នេះ ជូនដល់ក្រុមហ៊ុន។ FWD វៀតណាម គឺជាក្រុមហ៊ុន “វ័យក្មេង” មានមហិច្ឆតាខ្ពស់ក្នុងវិស័យធានារ៉ាប់រង។ ពានរង្វាន់នេះគឺជាការទទួលស្គាល់នូវការប្រឹងប្រែងមិនឈប់ឈររបស់យើងខ្ញុំក្នុងការបង្កើតបរិយាកាសការងារល្អ ឆ្ពោះទៅរកការទទួលអារម្មណ៍និងបទពិសោធន៍ពិសេសសម្រាប់បុគ្គលិក ក្នុងបំណងបង្កើតបានជាជំហានដ៏អស្ចារ្យក្នុងវិស័យធនារ៉ាប់រងនេះ។

ខ្ញុំមានមោទនភាពខ្លាំងណាស់ ដោយសារបុគ្គលិកមានការជឿជាក់លើទស្សនវិស័យរបស់ក្រុមហ៊ុន។ សំខាន់ជាងនេះ ពួកគេមានអារម្មណ៍ថា ទទួលបានការស្ដាប់ ផ្ដល់ឱកាសក្នុងការអភិវឌ្ឍខ្លួន ព្រមទាំងដើរទន្ទឹមគ្នាជាមួយនឹងការរីកចម្រើនរបស់ក្រុមហ៊ុន។

- ទីផ្សារធនារ៉ាប់រងអាយុជីវិត មានការចូលរួមប្រកួតប្រជែកពីក្រុមហ៊ុនធំៗជាច្រើន តើ FWD ធ្វើយ៉ាងណាដើម្បីទាក់ទាញធនធានមនុស្ស សម្រាប់បង្កើនសមត្ថភាពប្រកួតប្រជែងក្នុងរយៈពេលខ្លីបានដូច្នេះ?

យុទ្ធសាស្ត្រ "ចងជើង" បុគ្គលិកពួកកែៗរបស់ក្រុមហ៊ុន FWD ដែលទើបទទួលបានពានរង្វាន់ "កន្លែងធ្វើការល្អបំផុតប្រចាំទ្វីបអាស៊ី ឆ្នាំ2020" — ក្រុមហ៊ុន FWD ទើបទទួលបានពានរង្វាន់ ”កន្លែងធ្វើការល្អបំផុតប្រចាំទ្វីបអាស៊ី ឆ្នាំ2020″

+ ទស្សនវិស័យរបស់ FWD គឺ “ការផ្លាស់ប្ដូរការយល់ឃើញរបស់អ្នកគ្រប់គ្នាចំពោះធនារ៉ាប់រង”។ ដូច្នេះ យើងខ្ញុំបានបង្កើតក្រុម “សកម្មជន” វ័យក្មេងប្រកបដោយថាមពល ដែលមានមហិច្ឆតាក្លាយជាផ្នែកមួយនៅក្នុងដំណើរការបង្កើតលក្ខណៈពិសេសថ្មីៗ ប្លែកៗ សម្រាប់អតិថិជន។

គ្រប់បុគ្គលិករបស់ក្រុមហ៊ុនតែងតែជាមនុស្សនាំមុខក្នុងការទទួលយកឧបសគ្គ និងមានការច្នៃប្រឌិតជារៀងរាល់ថ្ងៃ ព្រមទាំងស្ម័គ្រចិត្តទទួលយកការរៀនសូត្រ និងបទពិសោធន៍ថ្មីៗ។

– កត្តាអ្វីខ្លះដែលបានជួយបំផុសបំផុលឱ្យបុគ្គលិកមានអារម្មណ៍ល្អនៅពេលធ្វើការក្នុងក្រុមហ៊ុន FWD?

+ និយមន័យ “មនុស្សគឺជាទ្រព្យសម្បត្តិសំខាន់បំផុតរបស់ក្រុមហ៊ុន” មិនមែនថ្មីនោះទេ ប៉ុន្តែសម្រាប់ FWD វាគឺជាត្រីវិស័យដ៏ពិតប្រាកដមួយដើម្បីឱ្យយើងខ្ញុំអាចធ្វើឱ្យទស្សនវិស័យ “ផ្លាស់ប្ដូរការយល់ឃើញរបស់គ្រប់គ្នាចំពោះការធនារ៉ាបរង” ក្លាយជាការពិត។

យើងបង្កើតបរិយាកាសការងារប្រកបដោយទំនាក់ទំនងល្អ ដោយរួមមាន ការសន្យា ការកែលម្អ ភាពម្ចាស់ការ ការបើកទូលាយ និងការថែរក្សាបុគ្គលិក។ ក្រុមហ៊ុនក៏យកចិត្តក្នុងការលើកសរសើរ និងផ្ដល់រង្វាន់ដល់បុគ្គលិកតាមរយៈឧបករណ៍គ្រប់គ្រងលទ្ធផលការងារល្អប្រសើរ រួមនឹងបណ្ដាកម្មវិធីដូចជា Star Award, i-Appreciate ។ល។

បុគ្គលិកទទួលបានការផ្ទេរសិទ្ធិ បង្កើនសមត្ថភាពដឹកនាំ ការអភវឌ្ឍខ្លួនមិនឈប់ឈរ និងទទួលបានលទ្ធផលតាមការជាក់ស្ដែងនៅក្នុងបរិយាកាសការងារប្រកបដោយទំនាក់ទំនងល្អ និងបទពិសោធន៍ពិសេសៗ។ គ្រប់គ្នាតែងទទួលបានការបណ្ដុះបណ្ដាលប្រកបដោយការពេញចិត្ត ជាមួយនឹងស្មារតី “រស់ដោយពេញលេញចាប់ពីថ្ងៃនេះ” និងទទួលបានឱកាសតាមចាប់ចំណូលចិត្ត និងការដុសខាត់ភាពក្លាហានជាដើម ដែលនេះនឹងជួយពួកគេឱ្យមានភាពជឿជាក់ក្នុងសាមគ្គីភាព ដើម្បីអនុវត្តនូវទស្សនវិស័យដែលក្រុមហ៊ុនបានដាក់ចេញ។ យើងខ្ញុំតែងតែជឿជាក់គ្នាទៅវិញទៅមក និងរួមគ្នាដើម្បីរីកចម្រើន និងជោគជ័យ។

– តើមានកត្តាអ្វីខ្លះដែលត្រូវបានធ្វើឡើងដើម្បីទាក់ទាញ និងរក្សាបុគ្គលិកដែលមានទេពកោសល្យល្អ?

+ ខ្ញុំពិតជាសប្បាយចិត្តណាស់ នៅពេលបុគ្គលិកតែងតែមានអារម្មណ៍ថា ពួកគេទទួលបានការផ្គាប់ចិត្ត និងការយកចិត្តទុកដាក់ថែរក្សានៅក្នុងក្រុមហ៊ុន FWD តាមរយៈកម្មវិធីនានាដែលត្រូវបានរៀបចំដោយឡែកសម្រាប់ពួកគេ ដូចជា Newbie Anchor, FWD Maven ឬថ្ងៃនៃគ្រួសារជាដើម។ គោលនយោបាយធនធានមនុស្សរបស់ក្រុមហ៊ុន គឺឆ្ពោះទៅរកការបង្កើតក្រុមបុគ្គលិកដែលពោរពេញដោយសុភមង្គល និងថាមពល។

FWD Care និង FWD Wellbeing ដែលជាកម្មវិធីសុខុមាលភាព ត្រូវបានបង្កើតឡើងដោយផ្ដោតទៅលើកត្តាសុខភាពរាងកាយ អារម្មណ៍ ហិរញ្ញវត្ថុ និងតភ្ជាប់បណ្ដាញសង្គម ក៏ត្រូវបានជំរុញបន្ថែមដើម្បីនាំមកនូវសន្តិសុខពេញលេញដល់បុគ្គលិកផងដែរ។ ទន្ទឹមនឹងនេះ ក្រុមហ៊ុនក៏បានផ្ដល់ឱកាសដល់បុគ្គលិកក្នុងការចំណាយពេលសម្រាប់គ្រួសាររបស់ពួកគេនៅពេលចាំបាច់ ឬសម្រាកយកកម្លាំង តាមរយៈកម្មវិធីដូចជា ការធ្វើការពីផ្ទះ ឬការបំពេញការងារតាមពេលវេលាជាក់ស្ដែងប្រកបដោយការបត់បែន (flexible work hours) ជាដើម។

ការរួមចំណែកបំពេញការងារ ឬការផ្ដល់យោបល់របស់បុគ្គលិកម្នាក់ៗ សុទ្ធតែទទួលបានការយកចិត្តទុកដាក់ស្ដាប់ លើកទឹកចិត្ត និងផ្ដល់កិត្តិយសទាន់ពេលវេលា។ នេះក៏ជាកត្តាជំរុញឱ្យបុគ្គលិកកែលម្អសមត្ថភាពជាបន្តបន្ទាត់ និងតភ្ជាប់ទំនាក់ទំនងជាមួយមិត្តរួមការងារ បង្កើតបានជាកម្លាំងរួមសម្រាប់បំពេញការងារថ្មីៗដែល FWD បានសន្យាថានឹងនាំមកជូនអតិថិជន៕

ប្រភព៖ សារព័ត៌មានបរទេស

July 8, 2020

តុបតែងបន្ទប់ទទួលភ្ញៀវឱ្យស្អាតជាងទីកន្លែងធម្មតា

បន្ទប់ទទួលភ្ញៀវគឺជាទីកន្លែងដែលសំខាន់មួយរបស់ផ្ទះ ព្រោះក្រៅពីសមាជិកក្នុងក្រុមគ្រួសារបានប្រើពេលវេលាអង្គុយលេងជាមួយគ្នាហើយនោះ នៅបានប្រើប្រាស់សម្រាប់ទទួលភ្ញៀវ ឬមិត្តភ័ក្តិដែលមកលេងផ្ទះទៀតផង ដូច្នេះបន្ទប់ទទួលភ្ញៀវគួរតែមានភាពទាក់ទាញ ភាពគួរឱ្យចង់អង្គុយបន្ធូរអារម្មណ៍ ទើបយើងគួរផ្តល់ភាពសំខាន់លើការតុបតែងបន្ទប់ទទួលភ្ញៀវឱ្យក្លាយជាទីកន្លែងមួយដែលយើងចង់ប្រើពេលវេលានៅជាមួយគ្នាឱ្យបានច្រើនបំផុត តាមវិធីតុបតែងបន្ទប់ទទួលភ្ញៀវឱ្យស្អាត ប្លែក និងគួរឱ្យចង់អង្គុយលេងដូចខាងក្រោមនេះ។

1. ឈានឆ្ពោះទៅរកភាពប្លែកភ្នែក

សាកល្បងច្នៃម៉ូដបន្ទប់អង្គុយលេងឱ្យទាបជាងកម្រាលឥដ្ឋរបស់ផ្ទះប្រក្រតីប្រមាណជា 2 – 3 កាំជណ្តើរ ជាវិធីសាងទីកន្លែងដែលធ្វើឱ្យប្លែកភ្នែក និងគួរឱ្យចាប់អារម្មណ៍ខ្លាំងឡើង។

2. បូកផ្សំជាមួយទីកន្លែងផ្សេងទៀត

សាកល្បងប្រើគំនិតច្នៃបង្កើត រៀបចំបន្ទប់ទទួលភ្ញៀវរួមជាមួយទីកន្លែងផ្សេងទៀតរបស់ផ្ទះ ឧទាហរណ៍ដូចជា រួមជាមួយបន្ទប់អានសៀវភៅ ជាដើម គឺជាការប្រើប្រាស់ទីកន្លែងយ៉ាងឆ្លាតវៃ និងមានឯកលក្ខណៈ ដោយការតុបតែងដែលរួមផ្សំគ្នាយ៉ាងល្អ។

3. នាំមកនូវភាពជិតស្និទ្ធ

បន្ទប់ទទួលភ្ញៀវដែលល្អត្រូវធ្វើឱ្យអ្នកដែលចូលមកអង្គុយមានអារម្មណ៍បានចែករំលែកអំឡុងពេលពិសេសនេះជាមួយគ្នា ដូច្នេះចូររៀបចំកៅអីសាឡុង ឬកៅអីសម្រាប់អង្គុយផ្សេងៗឱ្យតភ្ជាប់គ្នា ដោយវិធីងាយៗ ដូចជា ការបែរមុខកៅអីចូលមករកគ្នា ជាដើម

4. បង្អួចទាក់ទាញភាពសប្បាយអារម្មណ៍

ព្យាយាមដាក់កៅអីសាឡុងឱ្យជិតមាត់បង្អួចខ្លាំងបំផុត ដើម្បីទទួលពន្លឺធម្មជាតិដែលធ្វើឱ្យមានអារម្មណ៍ធូរស្រាល ព្រោះប្រហែលជាគ្មានអ្វីនឹងល្អជាងពន្លឺព្រះអាទិត្យដែលបបោសអង្អែលស្បែកស្រាលៗពេលអង្គុយអានសៀវភៅ ឬក្រេបកាហ្វេនោះឡើយក្រៅពីនេះ សាកល្បងប្រើគ្រឿងសង្ហារិមដែលមានពណ៌ស្រទន់ដែលស៊ីគ្នាជាមួយពន្លឺធម្មជាតិផង។

5. ទាន់សម័យដោយអំពូលភ្លើងគោម

អំពូលភ្លើងគោមក្លាយជាវត្ថុតុបតែងដើម្បីភាពស្រស់ស្អាតទាន់សម័យខ្លាំងឡើង ដែលចំណុចល្អរបស់វានោះគឺ ទាំងផ្តល់នូវភាពភ្លឺស្វាង ទាំងភាពស្រស់ថ្លាក្នុងការតុបតែង ដូច្នេះសាកល្បងតុបតែងដោយអំពូលភ្លើងគោមច្រើនម៉ូដ ច្រើនបែប ទាប ខ្ពស់ ឬវត្ថដែលជួយបង្កើនចំណាប់អារម្មណ៍ដល់បន្ទប់ទទួលភ្ញៀវបានផង។

6. ប្រើធម្មជាតិព្យាបាលអារម្មណ៍

ការតុបតែងបន្ទប់ដោយវត្ថុធម្មជាតិនឹងផ្តល់ឱ្យនូវភាពក្លាសស៊ិក និងមានស្ទីលទៀតផង ក្រៅពីនេះសម្ភារៈប្រភេទឈើនៅសាងភាពទំនើប និងធូរស្រាលអារម្មណ៍ក្នុងពេលតែមួយទៀតផង។

សាកល្បងនាំយកវិធីដែលរៀបរាប់មកខាងលើនេះទៅកែសម្រួលប្រើសាកលមើល ដើម្បីសាងនូវភាពពិសេសដល់បន្ទប់ទទួលភ្ញៀវនៅក្នុងផ្ទះឱ្យក្លាយជាទីកន្លែងដ៏ពេញចិត្តបំផុតមួយរបស់ទាំងសមាជិកក្នុងក្រុមគ្រួសារ និងអ្នកមកលេង៕

July 8, 2020

អ្នកមានជាងគេនៅទ្វីបអឺរ៉ុប និងជាម្ចាស់ក្រុមហ៊ុនសម្លៀកបំពាក់ Zara បង្ហើបជាលើកដំបូងអំពីទំហំអចលនទ្រព្យ

មហាសេដ្ឋី Amancio Ortega កំពុងកាន់កាប់ទ្រព្យសម្បត្តិដែលមានតម្លៃសុបចំនួន 58.5ពាន់លានដុល្លារ ក្នុងនោះអចលនទ្រព្យរបស់គាត់មានតម្លៃខ្ទង់ 17.2ពាន់លានដុល្លារអាមេរិក។

យោងតាមសេចក្ដីប្រកាសក្នុងថ្ងៃទី7កក្កដារបស់ Pontegadea ដែលជាក្រុមហ៊ុនគ្រប់គ្រងភាគហ៊ុន59.3%នៅក្នុងក្រុមហ៊ុនផលិតសម្លៀកបំពាក់ Inditex (ក្រុមហ៊ុនមេរបស់ Zara) បានឱ្យដឹងថា ម្ចាស់ក្រុមហ៊ុន Zara លោក Amancio Ortega បច្ចុប្បន្នមានអចលនទ្រព្យដែលមានតម្លៃប្រមាណជា 15.2ពាន់លានអឺរ៉ូ (17.2ពាន់លានដុល្លារអាមេរិក)។ នេះគឺជាលើកដំបូងហើយដែលអចលនទ្រព្យរបស់លោក Ortega ត្រូវបានបង្ហើបឱ្យដឹងជាសាធារណៈ។ យោងតាម Bloomberg តួលេខនេះបានជួយឱ្យម្ចាស់ Zara ក្លាយជាអ្នកដែលមានអចលនទ្រព្យធំជាងគេក្នុងចំណោមកំពូលអ្នកមាននៅទ្វីបអឺរ៉ុប។

កាលពីឆ្នាំមុន តាមរយៈក្រុមហ៊ុនបុត្រសម្ព័ន្ធនៃក្រុមហ៊ុន Pontegadea លោក Ortega បានវិនិយោគទឹកប្រាក់2.1ពាន់លានអឺរ៉ូទៅក្នុងវិស័យអចលនទ្រព្យ។ ក្រុមហ៊ុននេះ រកបានចំណូលប្រមាណជា1.8ពាន់លានអឺរ៉ូក្នុងឆ្នាំ2019 រួមមាន ភាគលាភចំនួន1.64ពាន់លានអឺរ៉ូពីក្រុមហ៊ុនសម្លៀកបំពាក់ Inditex និង 621លានអឺរ៉ូ ពីអចលនទ្រព្យ។

ក្នុងរយៈពេលប៉ុន្មានឆ្នាំចុងក្រោយនេះ លោក Ortega បានប្រើប្រាស់យុទ្ធសាស្ត្រពហុវិស័យក្នុងមុខជំនួញរបស់ខ្លួនដើម្បីការពារហានិភ័យនៃការបាត់បង់ទ្រព្យ។ ដូច្នេះ លោកក៏បានវិនិយោគទៅលើអចលនទ្រព្យ។ មហាសេដ្ឋីរូបនេះ បានទិញអគារ Haughwout Building ដ៏ល្បីឈ្មោះនៅ Manhattan និងអគារការិយាល័យខ្ពស់បំផុតនៅទីក្រុង Miami ក្នុងរដ្ឋ Florida សហរដ្ឋអាមេរិក។

កាលពីឆ្នាំមុន ក្រុមហ៊ុនរបស់លោក ក៏បានចំណាយប្រាក់72.5លានដុល្លារ ក្នុងការទិញសណ្ឋាគារមួយនៅក្នុងទីក្រុង Chicago ផងដែរ។ មុននោះ លោក Ortega ក៏បានទិញអគារមួយនៅក្នុងរដ្ឋធានីវ៉ាស៊ីងតោន និងអគារការិយាល័យចំនួន2ផ្សេងទៀតនៅទីក្រុង Seattle ក្នុងរដ្ឋវ៉ាស៊ីងតោនទៀតផង។

យោងតាម Bloomberg Billionaires Index លោក Ortega ឆ្នាំនេះមានអាយុ84ឆ្នាំ និងកាន់កាប់ទ្រព្យសម្បត្តិដែលមានតម្លៃ58.5ពាន់លានដុល្លារ។ ដោយសារតែ COVID-19 រាប់ចាប់ពីដើមឆ្នាំ ទ្រព្យសម្បត្តិរបស់មហាសេដ្ឋីអេស្ប៉ាញរូបនេះ បានថយចុះ20%។ ក្រុមហ៊ុន Inditex ត្រូវបង្ខំចិត្តបិទហាងមួយចំនួនធំ បណ្ដាលឱ្យមូលបត្ររបស់ក្រុមហ៊ុននេះធ្លាក់ចុះ22%៕

ប្រភព៖ Bloomberg

July 8, 2020

Category: សង្គម និងសេដ្ឋកិច្ច