LitLot ជាទម្រង់វីដេអូខ្លីៗចែករំលែកថ្មីមួយ ដែលមានរបៀបលេងដូចគ្នានឹង TikTok ដែរ។ វាទើបនឹងបង្កើតឡើងដោយវិស្វករកម្មវិធីឥណ្ឌា។ បន្ទាប់ពីរដ្ឋាភិបាល ឥណ្ឌា ប្រកាសបិទគ្រប់កម្មវិធីកម្សាន្តរបស់ចិន កាលពីជាង 1ខែមុន។
ទោះជាទើបនឹងលេចចេញមែន ប៉ុន្តែកម្មវិធីនេះកំពុងតែពេញនិយមខ្លាំងដោយទទួលបានការទាញយកច្រើនជាង 1លានដងមកហើយ។ លោកអ្នកក៏អាចដោនឡូតវាមកសាកល្បងលេងនៅលើ App Store និង Play Store បានដែរ៕
“រាត្រីផ្សំដំណេក” មនុស្សជាច្រើនអាចគិតថា ជារាត្រីដែលសែនក្រអូបផ្អែមឈ្ងុយ ពោរពេញទៅដោយសេចក្តីស្នេហា តែមិនបានដឹងឡើយថា 52% នៃគូអាពាហ៍ពិពាហ៍មិនបានមានសិចជាមួយគ្នាក្នុងរាត្រីផ្សំដំណេកឡើយ ដោយសារតែហត់ខ្លាំងពេក ស្រវឹងខ្លាំងពេក និងនឿយល្វើយពីការប្រើពេលវេលាជាមួយឪពុកម្តាយបងប្អូនមិត្តភ័ក្តិច្រើនជ្រុលពេក ដូច្នេះដើម្បីកុំឱ្យរាត្រីដ៏សែនមានសុភមង្គលនេះកន្លងផុតទៅដោយសារតែបញ្ហាខាងលើនោះ ឡារ៉ែនមានធិបល្អៗសម្រាប់រឿងនេះមកជម្រាបជូន។
1. ជ្រៀសរើសស្លៀកឈុតខាងក្នុងបែបធម្មតាៗកុំមានម៉ូដម៉ាកខ្លាំងពេក
ហេតុអីទៅ? របស់ធម្មតាៗបែបនេះឯងដែលងាយស្រួលដោះចេញ មើលទៅសប្បាយភ្នែក មិនលំបាក ទាន់ពេលវេលាក្នុងអំឡុងពេលស្រៀវស្រើបរបស់អ្នក ព្រោះបើសិនជាមានម៉ូដមានម៉ាករញេរញ៉ៃច្រើនពេក អ្នកអាចនឹងខកខានឱកាសដ៏ល្អៗនេះក៏អាចថាបានដែរ ព្រោះទំរាំតែដោះរួចក៏ប្រើពេលវេលាដល់ទៅ 30 នាទីបាត់ទៅហើយ។
2. កុំស្រវឹងដល់ថ្នាក់ដាំក្បាលចាក់ទីងជ្រុលពេក
ដឹងហើយថា កូនក្រមុំកូនកំលោះមានតែម្តងទេក្នុងជីវិតដែលបានរៀបអាពាហ៍ពិពាហ៍ ទើបចង់ឱ្យសប្បាយឱ្យអស់ដៃបំផុតតែការពិតទៅ អ្នកដែលមកចូលរួមទាំងអស់គ្មានអ្នកណាចង់ឃើញកូនកំលោះកូនក្រមុំស្រវឹងអួទីនួបែបហ្នុងទេ ដែលបើសិនជាអ្នកស្រវឹងកក្លេកកក្លាក់នោះ ឱកាសក្នុងការណែបនិត្យរួមមេត្រីគ្នាអាចនឹងសូន្យបាន ដូច្នេះញ៉ាំត្រឹមតែល្មមៗសមរម្យទៅបានហើយ។
3. កូនក្រមុំគួរតែខ្សឹបខ្សៀវយ៉ាងផ្អែមល្ហែមដាក់ត្រចៀកកូនកំលោះឱ្យបានញឹកញាប់
ខណៈពេលរាំរែកជាមួយគ្នា អំឡុងពេលដែលបាននៅជាមួយគ្នាពីរនាក់ក្នុងពិធីមង្គលការ គួរតែរកឱកាសនិយាយយ៉ាងផ្អែមល្ហែមឱ្យគេបានដឹងពីតម្រូវការរបស់អ្នក គេគ្មានឱកាសបានដឹងពីចិត្តរបស់អ្នកបានឡើយ បើអ្នកមិនបើកផ្លូវឱ្យគេទេនោះ។
4. ធ្វើយ៉ាងម៉ចក៏បានដែរ ឱ្យតែរាងកាយនឿយហត់តិចបំផុត
វារាងដូចជាពិបាកបន្តិចហើយ តែបើអ្នកញ៉ាំបាយឱ្យឆ្អែត ញ៉ាំទឹកឱ្យបានច្រើន រាត្រីនោះយ៉ាងណាៗក៏អ្នកគ្មានផ្លូវហត់នឿយខ្លាំងពេកនោះឡើយ។
5. ព្យាយាមកុំនៅជិតឱពុកម្តាយច្រើនពេក
បើអ្នកនៅកៀកតែនឹងឪពុកម្តាយច្រើនជ្រុលពេកនោះ អាចនឹងធ្វើឱ្យរាត្រីនោះកាន់តែពិបាកឡើង ព្រោះចាស់ៗអាចនឹងនិយាយតែពីរឿងចង់បានចៅឆាប់ៗ ដែលវាអាចនឹងធ្វើឱ្យអ្នកទាំងពីរមានអារម្មណ៍ថា ជីវិតអាពាហ័ពិពាហ៍មិនមែនជារឿងស្រួល ឬនឹងនិយាយពីរឿងទំនៀមទម្លាប់ពីបុរាណផ្សេងៗក្នុងការផ្សំដំណេក ដែលអាចនឹងធ្វើឱ្យរាត្រីទឹកឃ្មុំរបស់អ្នកមិនដំណើរការទៅតាមអ្វីដែលអ្នកគិតក៏អាចថាបានដែរ៕
ក្នុងយុគ្គសម័យបច្ចេកវិទ្យានេះ ពិភពលោកកំពុងរស់នៅជាមួយបច្ចេកវិទ្យា ព្រោះមិនថាការងារ ការធ្វើអាជីវកម្ម ឬជីវិតប្រចាំថ្ងៃនោះទេ មនុស្សចាំបាច់ត្រូវតែប្រើបច្ចេកវិទ្យា។ តែទោះជាយ៉ាងនេះក្តី សម្រាប់ការអប់រំកុមារតូចវិញ របត់បច្ចេកវិទ្យាអាចផ្តល់ទាំងគុណសម្បត្តិ និងគុណវិបត្តិ ដែលទាមទារឱ្យមានការយកចិត្តទុកដាក់ឱ្យបានដិតដល់ដើម្បីធានាថាពួកគេអាចរៀនតាមបច្ចេកវិទ្យាប្រកបដោយគុណភាព និងសុវត្ថិភាព។
លោកស្រី អ៊ុក សូនីតា នាយិការងនាយកដ្ឋានអប់រំ ទទួលបន្ទុកកម្មវិធីមត្តេយ្យ និងកុមារតូច នៃក្រុមហ៊ុនវេសឡាញ អេឌ្យូខេសិន គ្រុប បានលើកឡើងថា ទោះជាមិនមានការស្រាវជ្រាវជាក់លាស់ណាមួយដែល0បង្ហាញថាការរៀនពីចម្ងាយនៃកម្មវិធីមត្តេយ្យសិក្សានឹងទទួលបានលទ្ធផលល្អឥតខ្ចោះ 100% ដូចការសិក្សាក្នុងថ្នាក់ក៏ដោយ ក៏យើងនៅតែអាចព្យាយាមគ្រប់លទ្ធភាពដើម្បីផ្តល់ចំណេះដឹង និងកាត់បន្ថយផលប៉ះពាល់បានដែរ។ អ្នកអប់រំអាចថ្លឹងថ្លែងឱ្យបានច្បាស់លាស់ពីកម្រិតនៃការយល់ដឹងរបស់កុមារ រយៈពេលដែលកុមារអាចទទួលយកបាន និងសកម្មភាពជាច្រើនផ្សេងទៀតដែលគួរផ្តល់ឱ្យពួកគេ។ ជាក់ស្តែង នៅបណ្តាញសាលារៀនរបស់វេសឡាញ ដើម្បីធានាគុណភាពអប់រំ និងការអភិវឌ្ឍរាងកាយ បញ្ញា ស្មារតី និងភាសារបស់កុមារតូច និងដើម្បីកាត់បន្ថយផលប៉ះពាល់នៃការប្រើប្រាស់ទូរស័ព្ទ កុំព្យូទ័រ និងឧបរករណ៍ឌីជីថលក្នុងការសិក្សាតាមអនឡាញ នាយកដ្ឋានជំនាញបានរៀបចំដាក់បញ្ចូលនូវកម្មវិធីសិក្សាតាមរយៈ Zoom ដែលការសិក្សាតាមវិធីនេះអាចធ្វើឱ្យកុមារបានជួបផ្ទាល់ជាមួយនឹងលោកគ្រូអ្នកគ្រូ ដើម្បីអនុវត្តការនិយាយភាសាអ់គ្លេស និងអភិវឌ្ឍការទំនាក់ទំនង។ ក្រៅពីនេះវាក៏អាចជួយឱ្យកុមារអាចធ្វើលំហាត់តាមសន្លឹកកិច្ចការដូចជាការផាត់ពណ៌ ការគូសគំនូរ រួមទាំងអនុវត្តបំណិនជីវិតជាច្រើនផ្សេងទៀត។
លោកស្រី អ៊ុក សុនីតា បាននិយាយថា៖ «កុមារជាវ័យដែលអាចងាយនឹងប៉ះពាល់ពីបច្ចេកវិទ្យា ជាពិសេសកុមារដែលមានវ័យចាប់ពី 3ឆ្នាំ ដល់5ឆ្នាំ។ ហេតុនេះយើងគួរឱ្យគាត់ចំណាយពេលត្រឹមតែ 10នាទីប៉ុណ្ណោះដើម្បីរៀនមេរៀនតាមវីដេអូ ដែលសម្រាប់សាលាយើងគឺឱ្យពួកគាត់រៀនតាម App Testdopi មុនពេលរៀនផ្ទាល់តាម Zoom រយៈពេល 30នាទីសម្រាប់មួយមុខវិជ្ជារាល់ថ្ងៃ»។
អ្នកអប់រំខាងលើបានលើកឡើងផងដែរថា ដើម្បីបន្ថយផលប៉ះពាល់ យើងគួរឱ្យសិស្សស្តាប់គ្រូបង្រៀនតាមរយៈ Zoom ហើយឱ្យគាត់ធ្វើតាមការណែនាំក្នុងសៀវភៅ ឬក្រដាសកិច្ចការច្រើនជាងមើលមកអេក្រង់។ បន្ថែមពីលើនេះ ដើម្បីជួយកុមារឱ្យកាន់តែមានការអភិវឌ្ឍលឿន យើងក៏គួរបន្ថែមនូវកម្មវិធីមួយចំនួនដូចជាកម្មវិធីសិក្សាតាមបែប ម៉ុនតេសូរី ដែលកុមារតូចៗអាចនឹងទទួលបានកញ្ចប់សម្ភារសិក្សាសម្រាប់អនុវត្តផ្ទាល់តាមរយៈការបង្ហាត់បង្រៀនរបស់គ្រូ។ កញ្ចប់សម្ភារសិក្សាទាំងអស់នោះនឹងអនុញ្ញាតឱ្យស្សិបានចំណាយពេលវេលាច្រើនលើការសិក្សា និងកម្សាន្តដោយចំណេះដឹង ដូចជាការរៀនស្លៀកសម្លៀកបំពាក់ ការរៀនពាក់ស្បែងជើង ការរៀនកាន់ស្លាបព្រា មុខវិជ្ជាកីឡា ដែលកុមារអាចរៀនធ្វើលំហាត់តាមភ្លេង រួមទាំង មុខវិជ្ជាសិល្បៈ និងច្នៃប្រឌិត (art&craft) ជាដើម។ ក្រៅពីនេះ កុមារក៏អាចនឹងទទួលការអប់រំឱ្យចេះអនុវត្តតាមរយៈការផាត់ពណ៌ ការគូសតាមគំនូសអក្សរ ការរៀនកាត់បិទ និងមុខវិជ្ជាផ្សេងៗទៀតដើម្បីឱ្យពួកគេបានអភិវឌ្ឍផ្នែកបញ្ញាស្មារតី និងរាងកាយ។
ចំពោះការចូលរួមរបស់អាណាព្យាបាលវិញ លោកស្រីណែនាំឱ្យឪពុកម្តាយគ្រប់រូបគួរចូលរួមចំណែកដើម្បីកាត់បន្ថយភាពតានតឹងរបស់កុមារ និងជួយបង្កើនភាពរីករាយ ដោយក្រៅពីសកម្មភាពដែល អ្នកអាណាព្យាបាលបានដឹកនាំធ្វើរាល់ចុងសប្តាហ៍ជាមួយកូនៗនៅក្នុងផ្ទះហើយ អ្នកអាណាព្យាបាលអាចនាំកូនៗទៅធ្វើទស្សនកិច្ចសិក្សានៅខាងក្រៅ ចំនួន 2ដងក្នុង 1ត្រីមាស។ សកម្មភាពទាំងនោះអាចជាការនាំពួកគេទៅកាន់ទីកន្លែងកម្សាន្តដែលមានសុវត្ថិភាពដើម្បីរៀនសូត្រពីមជ្ឈដ្ឋានខាងក្រៅដូចជា ទស្សនកិច្ចសួនសត្វ សួនច្បារ ទិញសៀវភៅនៅបណ្ណាគារ ទស្សនកិច្ចផ្សារទំនើប និងទស្សនកិច្ចតាមសារមន្ទីរសារមន្ទីរជាដើម។ បន្ថែមពីលើនេះអ្នកអាណាព្យាបាលត្រូវគោរពតាមការណែនាំរបស់ក្រសួងសុខាភិបាល ដោយមានជាអាលកុល ម៉ាសការពាររាល់ពេលដែលជូនកូនៗធ្វើទស្សនកិច្ចសិក្សា៕
តារាសម្ដែងជើងចាស់ទាំងពីរលោក យុត្ថារ៉ា ឆាន្នី និងអ្នកនាង ចន ច័ន្ទលក្ខិណា ត្រូវបានមហាជនជាច្រើនស្គាល់យ៉ាងជាក់ច្បាស់ហើយ ថាអ្នកទាំងពីរបានលែងលះគ្នា ប៉ុន្តែអ្នកទាំងពីរនៅតែរាប់អានគ្នាបាន ដូចបងប្អូនអ៊ីចឹង ដែលមនុស្សភាគច្រើនមិនអាចធ្វើបានដូចឡើយ។
បន្ទាប់ពីអ្នកនាងចន ច័ន្ទលក្ខិណា បានលែងលះជាមួយអតីតប្តី លោកយុត្ថារ៉ា ឆាន្នី កាលពីឆ្នាំ2011 និងបន្សល់ចំណងដៃកូនស្រីម្នាក់នោះ ពេលនេះអ្នកនាងបានភ្ជាប់ស្នេហ៍ថ្មីជាមួយពោះម៉ាយកូន1 លោកហេង ឡុង ដែលជាប្រធានសមគមមិត្តសិល្បៈស្មគ្រ័ចិត្តជួយសង្គម តែចំណងស្នេហ៍រស់ក្រោមដំបូលតែមួយ ជាង6ឆ្នាំនេះ មិនទាន់មានពន្លឺនៃការចូលរោងការឡើយ ស្របពេលដែលអ្នកនាងចន ច័ន្ទលក្ខិណា ធ្លាប់អះអាងថា នឹងរៀបការ ក្រោយពេលសាងសង់វីឡាទ្រនំស្នេហ៍ដែលជាកាដូគូស្នេហ៍ថ្មីរួច។
យ៉ាងណាមិញនៅមុននេះបន្តិចឃើញថាអ្នកនាង ចន ច័ន្ទលក្ខិណា បានបង្ហាញអារម្មណ៍របស់ខ្លួនបែបនេះនៅលើបណ្តាញសង្គមហ្វេសប៊ុកទៅកាន់អតិតប្តីថា៖ « ព្រោះតែមានសន្តិភាពនៃជីវិតលែងលះទើបគ្រួសារទាំងសងខាងរបស់ពួកខ្ញុំនៅរាប់អានគ្នាដូចបងប្អូន ។ សូមបញ្ឈប់ទង្វើភាពជាសត្រូវរបស់គ្រួសាររបស់ខ្លួនយកមកសាបព្រួសលើគ្រួសារពួកខ្ញុំ យ៉ាងណាក៏កូនខ្ញុំ និងកូនគាត់មានឈាមឪពុកតែមួយ ខ្ញុំឃើញកូនគាត់មានអារម្មណ៍ដូចកូនខ្លួនឯង ចង់ឱ្យពួកគាត់ស្រលាញ់ យកចិត្តទុកដាក់ មើលថែគ្នា ព្រោះតែឈាមឪពុកវាដិតដាមដល់មនោសញ្ចេតនាដែលមិនអាចកាត់បាន »។
សូមជម្រាបដែរថា បន្ទាប់កាន់តំណែងប្រធានសមាគមសិល្បៈខ្មែរ និងជាជាថៅកែផលិតកម្មសិល្បៈខ្មែរភាពយន្តតារាសម្ដែងស្រី ចន ច័ន្ទលក្ខិណា ហៅមុំ កន្លងមកធ្លាប់ប្រកាសជំហរម្ដងហើយម្ដងទៀតថា អ្នកនាងនឹងសម្រចចិត្តដើរចេញពីអាជីពភាពយន្តយ៉ាងពិតប្រាកដ ហើយគិតចាប់ពីពេលនោះតទៅមុខ ព្រោះអ្នកនាងចង់ផ្តល់ឱកាសឱ្យប្អូនៗជំនាន់ក្រោយ ដែលមានទេពកោសល្យបានសាងស្នាដៃម្តង៕
ហ្វេនៗជាពិសេសបណ្តាអ្នកលេងហ្វេសប៊ុក បានសម្តែងការភ្ញាក់ផ្អើលយ៉ាងខ្លាំងក្នុងពេលដែលពួកគេ បានឃើញតារាសម្តែងនាង ហ៊ិន ច័ន្ទនីរ័ត្ន បានប្រកាសក្តែងៗពីគម្រោងរៀបការនៅឆ្នាំក្រោយ ខណៈពេលរឿងរ៉ាវនេះកំពុងក្លាយជាចម្ងល់ថា តើវាជាការពិតឬយ៉ាងណា។ ទស្សនិកជនជាច្រើនតែងតែរង់ចាំមើលថា តើបុរសរូបណានឹងអាចមានសំណាងឆាបយកបេះដូងស្រីស្អាតម្នាក់នេះយកមកឃុំគ្រងបាន ក្នុងពេលដែលតារារូបនេះហាក់មិនដែលបានលេចឮពីដំណឹងស្នេហាជាមួយបុរសរូបណាឱ្យពិតប្រាកដ បើទោះបីជានាងបានចូលវ័យកាន់តែច្រើនក៏ដោយក្តី។
យ៉ាងណា ហ៊ិន ច័ន្ទនីរ័ត្ន បានប្រកាសដំណឹងគួរឱ្យភ្ញាក់ផ្អើលមួយនៅតាមបណ្តាញសង្គមហ្វេសប៊ុកកាលពីពេលថ្មីៗនេះ ដោយនាងបានអះអាងពីគម្រោងរៀបការនៅឆ្នាំក្រោយ ដោយមិនបញ្ជាក់ពីអត្តសញ្ញាណគូស្នេហ៍របស់នាងជាបុរសរូបណានោះឡើយ។ ហ៊ិន ច័ន្ទនីរ័ត្ន បានសសេរបង្ហោះសារថា ឆ្នាំនឹងអត់ទាន់ការ ព្រោះកូវីដ ចាំឆ្នាំក្រោយ ដែលពាក្យមួយនេះបានធ្វើឱ្យមហាជនាមានការភ្ញាក់ផ្អើលយ៉ាងណាខ្លាំង ក្នុងពេលដែលស្ងាត់ៗនាងបែរជាបង្ហោះសារបែបនេះទៅវិញ។
ជាការកត់សម្គាល់ បើទោះបីជាសារនោះ ហ៊ិន ច័ន្ទនីរ័ត្ន បានសរសេរជាការលេងសើចក៏ដោយ ប៉ុន្តែមហាជនបានដាក់ការសង្ស័យថា តារារូបនេះអាចនឹងមានដំណឹងល្អក្នុងពេលឆាប់ៗខាងមុខនេះ ដោយសារតែនាងបានចូលវ័យកាន់តែច្រើន ខណៈពេលមិត្តភក្តិក្នុងសិល្បៈស្រករនាងក៏បានចូលរោងការជាបន្តបន្ទាប់ហើយដែរ។ មួយរយៈចុងក្រោយនេះ ហ៊ិន ច័ន្ទនីរ័ត្ន ហាក់រសាត់ខ្លួនកាន់តែឆ្ងាយពីការងារសម្តែង ដោយនាងនៅតែការងារជាពិធីការិនីប្រចាំស្ថានីយទូរទស្សន៍បាយ័នតែមួយមុខប៉ុណ្ណោះ ដែលការដកឃ្លាពីការសម្តែងនេះត្រូវបានគេសង្ស័យថា ទំនងជាគូស្នេហ៍របស់នាងហាមឃាត់។
ទោះជាយ៉ាងណា ជុំវិញរឿងរ៉ាវនៅពីក្រោយជីវិតឯកជនរបស់ ហ៊ិន ច័ន្ទនីរ័ត្ន រហូតមកទល់ពេលនេះមិនត្រូវបានគេដឹងយ៉ាងទូលំទូលាយនោះឡើយ ប៉ុន្តែយោងតាមរូបសម្រស់ដ៏ស្រស់សោភារបស់នាងគឺគ្មានអ្នកណាមិនដឹងទេថា នាងពិតជាមានម្ចាស់គ្រងបេះដូងរួចហើយ។ ហ៊ិន ច័ន្ទនីរ័ត្ន ត្រូវបានគេដឹងថា នាងបានក្លាយជាតំណាងផ្សព្វផ្សាយឱ្យផលិតផលសម្អាងការដ៏ធំមួយប្រចាំប្រទេសកម្ពុជា បន្ទាប់ពីនាងបានដកឃ្លាពីការងារសម្តែងក្នុងរយះពេលប៉ុន្មានឆ្នាំចុងក្រោយនេះ ដោយនៅសល់តែការងារជាពិធីការិនីនៅទូរទស្សន៍បាយ័នមួយប៉ុណ្ណោះ។ បើទោះបីជានាងបានខកខានពីការបង្ហាញមុខសម្តែងភាពយន្តថ្មីក៏ដោយ ប៉ុន្តែខ្សែជីវិតឯកជនរបស់តារារូបនេះនៅតែមានការចាប់អារម្មណ៍ខ្លាំងដដែលពីសំណាក់ទស្សនិកជន ក្នុងពេលដែលពួកគេកំពុងរង់ចាំមើលថា តើបុរសរូបណាដែលមានសំណាងឆក់យកបេះដូងតារាដែលមានរូបសម្រស់ស្រស់ផូរផង់មួយនេះ មកថែរក្សាផ្តាច់មុខ៕
យន្តហោះដំបូងបង្អស់របស់ប្រទេសចិនដែលមានផ្ដល់សេវាអ៊ីនធើណិតល្បឿនលឿនពីផ្កាយរណប បានទទួលជោគជ័យក្នុងការហោះហើរសាកល្បងកាលពីថ្ងៃទី7កក្កដាកន្លងទៅ។
យន្តហោះដែលមានស្លាកលេខ QW9771 របស់ក្រុមហ៊ុនអាកាសចរណ៍ Qingdao Airlines បានហោះឡើងពីអាកាសយានដ្ឋានអន្តរជាតិ Qingdao International Airport នៅវេលាម៉ោង16និង46នាទី (ម៉ោងក្នុងស្រុក) និងចុះចតដោយសុវត្ថិភាពនៅព្រលានយន្តហោះអន្តរជាតិ Chengdu (Chengdu Shuangliu International Airport) ដែលស្ថិតក្នុងទីក្រុង Chengdu ខេត្ត Sichuan ប្រទេសចិន នៅវេលាម៉ោង19និង21នាទី ក្នុងថ្ងៃដដែល។
អតិថិននៅលើយន្តហោះ អាចប្រើប្រាស់អ៊ីនធើណិតដែលមានល្បឿនជាង 100 megabyte ក្នុង1វិនាទី ដែលនេះបាននាំមកនូវបទពិសោធន៍ក្នុងការចូលមើលគេហទំព័រនានាដូចទៅនឹងនៅនឹងការប្រើប្រាស់នៅលើដី។
ប្រការនេះគឺជាលើកដំបូងក្នុងប្រវត្តិសាស្ត្រអាកាសចរណ៍ចិន។ ភ្ញៀវនៅលើយន្តហោះអាចហៅទូរស័ព្ទវីដេអូទៅកាន់មនុស្សនៅលើដី និងចែករំលែកទេសភាពនៅលើ “មេឃ” ជាមួយមិត្តភក្តិនៅលើដីក្នុងពេលវេលាតែមួយ។
ប្រភពអ៊ីនធើណិតពីផ្កាយរណបនេះ ត្រូវបានផ្គត់ផ្គង់ដោយក្រុមហ៊ុន China Satcom ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុនវិទ្យាសាស្ត្រនិងបច្ចេកវិទ្យាអវកាសចិន។ China Satcom បច្ចុប្បន្នមានផ្កាយរណបចំនួន15ដែលកំពុងដំណើរការនៅលើគន្លងគោចរផែនដី។
ក្រោយការហោះហើរប្រកបដោយជោគជ័យជាលើកដំបូងនេះ ក្រុមហ៊ុនមានគោលដៅសហការជាមួយបណ្ដាក្រុមហ៊ុនអាកាសចរណ៍ជាច្រើនទៀតនាពេលខាងមុខ ដើម្បីពង្រីកសេវាកម្មអ៊ីនធើណិតល្បឿនលឿននៅតាមជើងហោះហើរនានា។
ក្រុមហ៊ុន China Satcom ក៏មានបំណងធ្វើពិពិធកម្មដៃគូសហការផងដែរ ដើម្បីផ្គត់ផ្គង់សេវាអ៊ីនធើណិតដល់វិស័យផ្សេងៗគ្នា ដូចជា វិស័យថាមពល គ្រប់គ្រងធនធាន កសិកម្មនិងនេសាទ គ្រប់គ្រងអាសន្ន វិទ្យុទូរទស្សន៍ សេវាកំណត់ទិស និងវិស័យអប់រំជាដើម៕
ប្រភព៖ ECNS
វត្ថុមួយចំនួន នៅពេលវាមានចំណុចល្អ ក៏ច្បាស់ជាមានចំណុចអាក្រក់ដូចគ្នា បើកូនតូចរបស់លោកឪពុកអ្នកម្តាយចាប់ផ្តើមញៀនលេងអៃភែដហើយនោះ អត្ថបទ Do & Don’t ខាងក្រោមនេះអាចជួយអ្នកបាន។
នៅពេលដែលរបស់លេងបែបពីដើមៗ លែងគួរឱ្យចាប់អារម្មណ៍សម្រាប់សម្រាប់កុមារក្នុងយុគសម័យឌីជីថលហើយនោះ អ្វីដែលលោកឪពុកអ្នកម្តាយគួរធ្វើនោះគឺ ឱ្យកូនលេងអៃភែដបាន តែត្រូវតែជាអ៊ែបដែលបង្កើនការរៀនយល់ដឹងរបស់កូនប៉ុណ្ណោះ។
– រឿងដែលគួរធ្វើនៅពេលកូនញៀនលេងអៃភែដ
ប្លុកវេបសាយរបស់មនុស្សធំ ឬដាក់ផាសវើដ ដើម្បីកំណត់ការប្រើប្រាស់អ៊ីនធើណេតរបស់កូន ទាំងអស់នេះអាស្រ័យលើអាយុ និងភាពដឹងក្តីរបស់កូន។
លោកអ្នកគួរប្រើប្រាស់ផាស់វើដដើម្បីចូលអ៊ីមេល ឬបញ្ជីឈ្មោះបុគ្គលដែលទំនាក់ទំនង ដើម្បីឱ្យប្រាកដក្នុងចិត្តថា កូនតូចនឹងមិនអាចលប់បាន ឬផ្លាស់ប្តូរព័ត៌មានណាមួយដោយលោកអ្នកមិនដឹងខ្លួន។
ដោនឡូតហ្គេម បទចម្រៀង ឬតុក្កតាណា ដែលកូនអាចរៀនយល់ដឹងពីតួអក្សរ វាក្យស័ព្ទផ្សេងៗ រួមទាំងការរៀនយល់ដឹងអំពីតួលេខ ហ្គេមប្រស្នាស្រួលៗ មានប្រយោជន៍ចំពោះក្មេងៗក្នុងការហ្វឹកហាត់ខួរក្បាល និងជួយឱ្យកូនមានសមាធិផ្ចង់នៅលើរឿងអ្វីមួយបានល្អនៅពេលដែលគេធំឡើង។
ចាំបាច់បំផុតក្នុងការដែលត្រូវដាក់ស្រោមក្រាស់ៗ ឬបិទកញ្ចក់ការពារលើអេក្រង់អៃភែដ ដើម្បីការពារការខូចខាតបើសិនកូនធ្វើអៃភែដជ្រុះ និងលោកឪពុកអ្នកម្តាយកុំភ្លេចសង្កេតមើលពីរឿងភាពមុតស្រួច នៅលើគែម ឬជ្រុងរបស់ស្រោមអៃភែដ និងគួរជ្រើសរើសប្រើស្រោមណាដែលមានភាពទន់ស្រួលកាន់ ដើម្បីកុំឱ្យមានគ្រោះថ្នាក់ដល់កូន។
– រឿងដែលមិនគួរធ្វើពេលកូនញៀនលេងអៃភែដ
ស្ថាប័នកុមារវេជ្ជសាស្រ្តនៃអាមេរិក បានរៀបរាប់ថា លោកឪពុកអ្នកម្តាយមិនគួរឱ្យកូនអាយុតិចជាង 2 ឆ្នាំប្រើអៃភែដយូរលើសពី 2 ម៉ោងក្នុងមួយថ្ងៃឡើយ ឬមិនទេក៏មិនគួរឱ្យកូនលេងអៃភែដតែម្តង។
ដាក់ល័ក្ខខណ្ឌក្នុងការមិនឱ្យលេងចំពោះកូន បើកូននៅមិនទាន់ធ្វើកិច្ចការងារផ្សេងទៀត ដូចជា រត់ហាត់ប្រាណ អានសៀវភៅ ធ្វើកិច្ចការផ្ទះ ឬលេងរបស់លេងផ្សេងទៀតនោះ។
ហាមយកអៃភែដទៅទុកក្នុងបន្ទប់គេងរបស់កូន ព្រោះពន្លឺដែលជះចេញពីអេក្រង់នឹងទៅរំខានការគេងលក់របស់កូន។
បើលេងអៃភែដច្រើនជ្រុលពេកសម្រាប់ក្មេងអាយុ 3 - 4 ឆ្នាំ ក្មេងអាចមានអាការសោកសៅ ស្រងូតស្រងាត់ វិតក្កកង្វល់ និងមានបញ្ហាខាងផ្លូវចិត្តផ្សេងៗ ដូចជា ពេលកូនមិនអាចដោះស្រាយបញ្ហាដែលកើតឡើងនៅក្នុងអ៊ែប ឬពេលអស់ថ្ម ជាដើម។
មិនគួរឱ្យសិទ្ធិកូនច្រើនជ្រុលពេកដល់ថ្នាក់អាចស្វែងរកព័ត៌មានតាមរយៈស៊ើចអេនជីនបានដោយខ្លួនឯងនោះទេ គួរឱ្យកូនលេងអៃភែដដើម្បីគ្រាន់តែស្តាប់បទចម្រៀង ឬលេងហ្គេមបានហើយ។
ការចង់ហាមកូនមិនឱ្យលេងអៃភែដ ទាល់តែលោកឪពុកអ្នកម្តាយខ្លួនឯងក៏ត្រូវតែមិនញៀនស្មាតហ្វូនដែរ ពេលដែលមានមេសសេច ឬឡាញចូលមក អ្នកមិនគួរចាប់អារម្មណ៍ ឬចាប់យកមកមើលនៅចំពោះមុខកូននោះទេ ព្រោះវានឹងក្លាយជាគំរូមិនល្អចំពោះកូន បើសិនលោកអ្នកនៅតែជក់នឹងស្មាតហ្វូនរបស់ខ្លួននោះ កូនក៏នឹងរៀនយល់ដឹងក្នុងការធ្វើបែបនោះដូចលោកអ្នកដែរមិនខាន៕
កូនស្រីរបស់លោក អេ ភូថង គឺកីឡាការិនីក្បាច់គុនខ្មែរ អេ យ៉ានុត បានរៀបចំពិធីភ្ជាប់ពាក្យ ជាមួយគូអនាគត ហើយ នៅគេហដ្ឋានខាងស្រី ក្រោយពីបានស្វែងយល់ចិត្តគ្នា អស់រយៈពេលយ៉ាងយូរ ហើយឪពុកម្តាយទាំងសងខាងក៏បានឯកភាពគ្នា ដើម្បីរៀបចំពិធីភ្ជាប់ពាក្យតាមប្រពៃណីខ្មែរ មុនពេលរៀបចំពិធីមង្គលការ។
ជាមួយនឹងការរៀបចំពិធីនេះ លោក អេ ភូថង បានរៀបចំជាលក្ខណៈសាច់ញាតិ ដោយមិនសូវមានអ្នកនៅក្នុងវិស័យកីឡាបានដឹងប៉ុន្មានឡើយ តែទោះបីជាបែបនេះក្តី នៅមិនទាន់មានព័ត៌មានជាក់លាក់នៅឡើយទេថា តើពួកគេនឹងក្រាបផ្ទឹមរៀបការនៅថ្ងៃណាឱ្យប្រាកដនៅឡើយ។
ជាមួយគ្នានេះដែរ អេ យ៉ានុត ដែលជាកូនស្រីរបស់អតីតកំពូលអ្នកប្រដាល់គុនខ្មែរ អេ ភូថង បានឱ្យដឹងថា នាងបានស្គាល់គ្នា និងស្វែងយល់ចិត្តគ្នាជាមួយនឹងខាងប្រុស អស់រយៈពេលជាច្រើនឆ្នាំមកហើយ ហើយគាត់មានមុខងារជាមន្ត្រីនគរបាល៕
មូលបត្រ Alibaba នៅផ្សារហ៊ុនហុងកុង បានបង្កើតកំណត់ត្រាថ្មីរបស់ខ្លួនកាលពីល្ងាចម្សិលមិញ(9កក្កដា) ដោយបានទាញតម្លៃទុនរបស់ក្រុមហ៊ុននេះឡើងដល់720ពាន់លានដុល្លារ ខ្ពស់ជាង Facebook ទៅទៀត។
មូលបត្រ Alibaba របស់មហាសេដ្ឋីចិន Jack Ma នៅលើផ្សារហ៊ុនហុងកុងកាលពីល្ងាចម្សិលមិញ បានកើន10% ពោលគឺ មានតម្លៃ261.6ដុល្លារហុងកុងក្នុង1ហ៊ុននៅពេលបិទការជួញដូរ។ មូលបត្រនេះក៏បានកើន9% ដោយវាមានតម្លៃ257ដុល្លារអាមេរិកនៅលើផ្សារហ៊ុននីវយ៉ក សហរដ្ឋអាមេរិក។ កំណើនខាងលើនេះបានជួយអូសទាញតម្លៃទុនរបស់ Alibaba ឡើងដល់5.614លានលានដុល្លារហុងកុង (720ពាន់លានដុល្លារអាមេរិក) ខ្ពស់ជាង Facebook ដែលមានត្រឹមតែ694.5ពាន់លានដុល្លារ។ ដូច្នេះ គិតមកដល់បច្ចុប្បន្ន Alibaba គឺជាក្រុមហ៊ុនដែលមានតម្លៃទុនខ្ពស់ជាងគេលំដាប់ទី6ក្នុងពិភពលោក។
ក្រុមហ៊ុនផ្ដល់ប្រឹក្សា Jefferies យល់ថា ក្រុមអ្នកវិនិយោគបានសម្រុកទិញមូលបត្ររបស់ Alibaba គឺដោយសារខ្លាចបាត់បង់ឱកាសនៅពេលក្រុមហ៊ុននេះរកបានចំណេញច្រើន។ Jefferies បានផ្ដល់អនុសាសន៍ថា គួរតែ “ទិញ” មូលបត្រនេះជាមួយនឹងតម្លៃគោលត្រឹម300ដុល្លារហុងកុង។
“Alibaba មានភាពមាំមួនក្នុងការរកស៊ីជាមួយនឹងរូបមន្តច្រើនបែប ហើយបច្ចុប្បន្ន ក្រុមហ៊ុននេះមានក្ដីសង្ឃឹមក្នុងការងើបឡើងវិញយ៉ាងប្រសើរ ដោយសារបច្ចេកវិទ្យា។ ក្នុងត្រីមាសទី2 យើងព្យាករថា លទ្ធផលជំនួញរបស់ពួកគេនឹងបានល្អ ដោយមានផ្នែកពាណិជ្ជកម្មអេឡិចត្រូនិចជា “មេមាន់ពងមាស””។
ក្នុងចំណោមក្រុមអ្នកវិភាគចំនួន21នាក់ ដែល Bloomberg តាមដាន គឺសុទ្ធតែលើកទឹកចិត្តឱ្យអ្នកវិនិយោគទិញមូលបត្រ Alibaba ជាមួយនឹងតម្លៃគោលដៅគឺ263ដុល្លារហុងកុងក្នុង1ហ៊ុន។ Alibaba គឺជាឈ្មោះដែលនាំមុខគេនៅក្នុងចំណោមក្រុមហ៊ុនចិនដែលបានចូលផ្សារហ៊ុន (IPO) ហុងកុង បន្ទាប់ពីបានធ្វើនៅសហរដ្ឋអាមេរិក។ ក្រុមហ៊ុននេះ បានចាប់ផ្ដើមដាក់ឱ្យជួញដូរមូលបត្រនៅលើផ្សារហ៊ុនហុងកុងចាប់តាំងពីខែវិច្ឆិកា2019។
បចុច្បន្ន ក្រុមហ៊ុនដែលមានតម្លៃទុនខ្ពស់ជាងគេបង្អស់នៅក្នុងពិភពលោក គឺ Saudi Aramco។ ក្រុមហ៊ុន Saudi Aramco របស់មហាសេដ្ឋីប្រេងនៃប្រទេសអារ៉ាប់ប៊ីសាអូឌីត បានធ្វើ IPO កាលតាំងពីខែធ្នូ ឆ្នាំ2019 ហើយមកដល់ពេលនេះ Saudi Aramco មានតម្លៃទុនប្រមាណជា1.77លានលានដុល្លារអាមេរិក។
ក្លឹបក្រុមហ៊ុនដែលមានទុនលានលានដុល្លាររបស់ពិភពលោក បច្ចុប្បន្នមានសមាជិកចំនួន5 រួមមាន Aramco, Apple, Microsoft, Amazon និង Alphabet (ក្រុមហ៊ុនមេរបស់ Google)។ ចំណែក Top 10 នៃក្រុមហ៊ុនដែលមានតម្លៃទុនខ្ពស់ជាងគេក្នុងពិភពលោក ក៏មានឈ្មោះ Alibaba, Facebook, Tencent, Berkshire Hathaway និង Visa ផងដែរ។
បើទោះជា Alibaba របស់លោក Jack Ma ត្រូវបានគេមើលឃើញថា ជាក្រុមហ៊ុនលេចធ្លោជាងគេនៅប្រទេសចិន ប៉ុន្តែ មហាសេដ្ឋី Jack Ma មិនមែនជាអ្នកមានទ្រព្យច្រើនជាងគេនៅប្រទេសនេះឡើយ។ លោក Jack Ma ឈរលំដាប់ទី2 នៅប្រទេសចិន ដោយមានទ្រព្យសរុប 52ពាន់លានដុល្លារ ដែលឈរនៅពីក្រោយម្ចាស់ក្រុមហ៊ុន Tencent លោក Ma Huateng (Pony Ma)។ មហាសេដ្ឋី Pony Ma ដែលមានទ្រព្យសរុប64.4ពាន់លានដុល្លារអាមេរិក គឺជាមហាសេដ្ឋីលំដាប់ទី18នៅក្នុងពិភពលោកផងដែរ។ យោងតាម Bloomberg ទ្រព្យរបស់លោក Jack Ma បានកើន2.7ពាន់លានដុល្លារកាលពីល្ងាចម្សិលមិញ ខណៈដែល Pony Ma កើន2.5ពាន់លានដុល្លារ៕
ប្រភព៖ SCMP
ធនាគារអភិវឌ្ឍន៍អាស៊ី(ADB)បានអនុម័តកម្ចីចំនួន 250លានដុល្លារ ដើម្បីជួយរាជរដ្ឋាភិបាលកម្ពុជា ក្នុងការឆ្លើយតបទៅនឹងជំងឺរាតត្បាតដែលបង្កដោយវីរុសកូរ៉ូណា (COVID-19)តាមរយៈការពង្រឹងប្រព័ន្ធគាំពារសុខភាពក្នុងប្រទេស បង្កើនជំនួយសង្គមដល់ប្រជាពលរដ្ឋក្រីក្រ និងងាយរង គ្រោះ ព្រមទាំងផ្តល់ការគាំទ្រសេដ្ឋកិច្ចសម្រាប់អាជីវកម្ម ដែលរួមមាន សហគ្រាសខ្នាតតូច និងមធ្យម ផងដែរ។ នេះបើយោងតាមសេចក្ដីប្រកាសព័ត៌មានរបស់ធនាគារអភិវឌ្ឍន៍អាស៊ី។
លោក Masatsugu Asakawa ប្រធានធនាគារអភិវឌ្ឍន៍អាស៊ី បានមានប្រសាសន៍ថា៖ «កម្ពុជាមានកំណត់ត្រា នៃការគ្រប់គ្រងម៉ាក្រូសេដ្ឋកិច្ចល្អ ប៉ុន្តែCOVID-19 បានគំរាមធ្វើឱ្យថយចុះនូវការរីកចម្រើនក្នុងការកាត់បន្ថយភាពក្រីក្រ ជាពិសេសក្នុងចំណោមក្រុមងាយរងគ្រោះ ដូចជាស្ត្រី និងកម្មករចំណាកស្រុក»។
លោកបានបញ្ជាក់ថា៖«ការគាំទ្រនេះ នឹងជួយរាជរដ្ឋាភិបាលកម្ពុជាក្នុងការកាត់បន្ថយឥទ្ធិ ពលអវិជ្ជមាននៃជំងឺរាតត្បាតនេះលើសុខភាព សង្គម និងសេដ្ឋកិច្ច។ កម្ចីនេះជាផែនការចូលរួមរយៈពេលវែងរបស់ ADB ដែលផ្តោតទៅលើការគាំទ្រការស្ទុះងើបឡើងវិញនៃសេដ្ឋកិច្ច និងនិរន្តរភាពហិរញ្ញវត្ថុ សាធារណៈរបស់កម្ពុជា»។
លោកបានបន្ដថា ប្រទេសកម្ពុជាងាយរងគ្រោះខ្លាំងពីផលប៉ះពាល់អវិជ្ជមាននៃ COVID-19 ដោយសារសេដ្ឋកិច្ចបើកចំហ មូលដ្ឋានសេដ្ឋកិច្ចចង្អៀត និងប្រជាពលរដ្ឋចល័តច្រើន។ ទន្ទឹមនេះ ADB រំពឹងថា សេដ្ឋកិច្ចកម្ពុជាអាចធ្លាក់ចុះក្នុងរង្វង់ -5.5%ក្នុងឆ្នាំ2020 ដោយសារការថយចុះនៃវិស័យទេសចរណ៍ ការនាំចេញសម្លៀកបំពាក់ ស្បែកជើង និងសម្ភារធ្វើដំណើរ តិចជាងមុន និងការចុះថយនៃសកម្មភាពសំណង់។ ហានិភ័យនៃការធ្លាក់ចុះនេះ អាចនឹងនាំឱ្យប្រជាពលរដ្ឋប្រមាណ 1,3លាននាក់ ធ្លាក់ក្នុងភាពក្រីក្រ។
សូមរំឭកថា កាលពីខែមីនា ឆ្នាំ2020នេះ កម្ពុជាបានប្រកាសដំណើរការការឆ្លើយតបស៊ីជម្រៅទៅនឹង COVID-19 ជាមួយនឹងកញ្ចប់ថវិកា វិធានការដំបូងសរុប 815.7លានដុល្លារ ដែលស្មើនឹង 3.2% នៃផលិតផលក្នុងស្រុកសរុប រំពឹងទុកសម្រាប់ឆ្នាំ2020។ ទាំងនេះរួមបញ្ចូល នូវការគាំទ្រ ទៅលើប្រព័ន្ធសុខាភិបាល ដើម្បីត្រៀមបង្ការការកើនឡើងនៃករណីCOVID-19។ សម្រាប់កម្មករ និង សហគ្រាស ដែលរួមមានការចាក់បញ្ចូលដើមទុន 150លានដុល្លារ ដើម្បីគាំទ្រធនាគារ ដែលផ្តល់ដល់អាជីវកម្មខ្នាតតូច និងមធ្យម។
កញ្ចប់ថវិកាគាំទ្រនេះ រួមមាន 300លានដុល្លារ សម្រាប់ការផ្តល់ជំនួយជាសាច់ប្រាក់ដល់ គ្រួសារក្រីក្រ និងងាយរងគ្រោះ ដែលមានក្នុងបញ្ជីទិន្នន័យរបស់រាជរដ្ឋាភិបាល។ ចំពោះបញ្ជីទិន្នន័យ(IDPoor)នេះ មានបញ្ចូលគ្រួសារក្រីក្រ 2.4លានគ្រួសារ ហើយកំពុងត្រូវបានបញ្ចូលបន្ថែមគ្រួសារ ដែលរងប៉ះពាល់ដោយCOVID-19។
កម្មវិធីគាំទ្រការចំណាយ និងឆ្លើយតបសកម្មភាពទៅនឹង COVID -19 របស់ADB (ដែលហៅ កាត់ថា CARES) ត្រូវបានផ្តល់ថវិកាតាមរយៈជម្រើស ឆ្លើយតបនឹងជំងឺរាតត្បាតCOVID-19 (ហៅ កាត់ថា CPRO)ក្រោមការជ្រោមជ្រែងរបស់ADB ដើម្បីដោះស្រាយដំណើរសេដ្ឋកិច្ចមិនប្រក្រតី។
CPRO ផ្តួចផ្តើមឡើងតាមរយៈជំនួយរបស់ADB ដែលត្រូវបានពង្រីករហូតដល់ 20ពាន់លាន ដុល្លារ កាលពីថ្ងៃទី13 ខែមេសា ឆ្នាំ2020 សម្រាប់សមាជិកជាប្រទេសកំពុងអភិវឌ្ឍន៍ ក្នុងការឆ្លើយ តបនឹងជំងឺរាតត្បាត។
ក្រៅពីនេះ កម្មវិធីនេះក៏រួមបញ្ចូលនូវក្របខ័ណ្ឌចូលរួមរបស់ប្រទេស ដែលទទួលបានការគាំទ្រ ដើម្បីធានាថា រាជរដ្ឋាភិបាល និងADB បន្តកិច្ចពិភាក្សាគោលនយោបាយជុំវិញការអនុវត្ត និងតាម ដានការឆ្លើយតបទៅនឹង COVID-19 របស់កម្ពុជា។ ក្របខ័ណ្ឌនេះក៏រួមមានការប្រឹក្សាយោបល់ ជា មួយវិស័យឯកជន និងអង្គការសង្គមស៊ីវិល។
កម្មវិធីនេះ ក៏បានផ្សារភ្ជាប់ទៅនឹងសកម្មភាពគាំទ្របច្ចុប្បន្ន របស់ADB សម្រាប់កំណែទម្រង់ ការគ្រប់គ្រងហិរញ្ញវត្ថុសាធារណៈ ដើម្បីពង្រឹងអភិបាលកិច្ច និងតម្លាភាពព្រមទាំងបង្កើនប្រសិទ្ធផល ក្នុងការបង្កើតគោលនយោបាយ និងថវិកា ការតាមដានការចំណាយ និងសវនកម្ម។
កម្មវិធី CAREនេះ ត្រូវបានបង្កើតឡើងដោយមានការសម្របសម្រួលជាមួយដៃគូអភិវឌ្ឍន៍នា នា និងបំពេញបន្ថែមទៅនឹងការគាំទ្ររបស់ADB បច្ចុប្បន្ន ដើម្បីផ្គត់ផ្គង់ឧបករណ៍ត្រួតពិនិត្យ សីតុណ្ហ ភាព សម្រាប់ប៉ុស្តិ៍ត្រួតពិនិត្យអន្តរជាតិ និងធានាការផ្តល់បច្ចុប្បន្នភាពទៀងទាត់ដល់វេបសាយ ក្រសួងសុខាភិបាល ដែលបង្ហាញរបាយការណ៍តាមដានCOVID-19 និងព័ត៌មានពាក់ព័ន្ធផ្សេងៗ រៀងរាល់ថ្ងៃ។
នេះ គឺជាផ្នែកមួយនៃសក្តានុពលភាពដ៏រឹងមាំនៃគម្រោងវិនិយោគ និងជំនួយបច្ចេកទេសដែលផ្សារភ្ជាប់ទៅនឹងយុទ្ធសាស្ត្រភាពជាដៃគូប្រចាំប្រទេសសម្រាប់កម្ពុជារបស់ADB ចាប់ពីឆ្នាំ2019-2023ហើយគាំទ្រដល់ការស្តារឡើងវិញ ក្រោយពីការរាតត្បាតនៃCOVID-19។
លោក Masatsugu Asakawa បានបញ្ជាក់បន្ថែមថា ធនាគារអភិវឌ្ឍន៍អាស៊ី ប្តេជ្ញានាំមកនូវ វិបុលភាពបរិយាប័ន្ន ភាពធន់ និងនិរន្តរភាពសម្រាប់តំបន់អាស៊ី និងប៉ាស៊ីហ្វិក ហើយស្របពេលជា មួយគ្នានេះ ក៏នឹងបន្តរក្សាចីរភាពនៃកិច្ចខិតខំរបស់ខ្លួន ក្នុងការលុបបំបាត់ភាពទីទ័លក្រផងដែរ៕
