សង្គម និងសេដ្ឋកិច្ច - La Reine Media

Nokia ប្រភេទ 5G តម្លៃជិត 700ដុល្លារកំពុងដាក់លក់ លើវេបសាយផ្លូវការ

ថ្មីៗនេះក្រុមហ៊ុន Nokia បានចេញលក់ស្មាតហ្វូន 5G របស់ខ្លួន 1ម៉ូដែលទៀត គឺ Nokia 8 (5G) UW ហើយក្រុមហ៊ុន Nokia ក៏បានសហការយ៉ាងស្អិតល្មួតផងដែរ ជាមួយក្រុមហ៊ុនអាមេរិក Verizon ក្នុងការផ្គត់ផ្គត់បណ្ដាញសេវា 5G ដែលមកទល់ពេលនេះ អាចគ្របដណ្ដប់បានប្រសើរច្រើនឡើង ដែលជាប់ឈ្មោះជា ultra fast 5G Ultra Wideband។

Nokia ក៏នៅតែសហការជាមួយក្រុមហ៊ុនផលិតលេនស៍ Zeiss បំពាក់មកជាមួយនឹងកាមេរ៉ាក្រោយធំដល់ទៅ 64MP ដែលអាចផលិតវីដេអូ និងរូបថត បានប្រសើរជាងម៉ូដែលមុន។ Nokia 8 ជាស្មាតហ្វូនអេក្រង់កោងបន្តិច និងរចនាផ្នែកខាងមុខ បង្កប់កាមេរ៉ាក្រោមអេក្រង់ 24MP។

សម្រាប់ល្បឿន Nokia អះអាងថា ស្មាតហ្វូនរបស់ខ្លួនដំណើរការដោយស្តុកដើម Android 11 មានថាមពលថ្ម 4500mAh តែគ្មានឆ្នាំងសាកលឿន និងគ្មានកម្រិតការពារជម្រាបទឹកនោះទេ តែបំពាក់ឈីបល្បឿនលឿន Qualcomm® Snapdragon™ 765G 5G អាចអាប់ឡូតវីដេអូឡើង ដល់ទំហំ 2000 Mbps ត្រឹមតែប៉ុន្មានវិនាទីប៉ុណ្ណោះ។ សម្រាប់តម្លៃវិញ គឺ 699ដុល្លារ៕

សូមទស្សនាវីដេអូខាងក្រោម៖

December 1, 2020

Huawei ចេញលក់កុំព្យូ័រលើតុ ដំបូងបង្អស់ តម្លៃចាប់ពី 760ដុល្លារ ដល់ 1,370ដុល្លារ

កុំព្យូទ័រលើតុ ឬ Desktop របស់ក្រុមហ៊ុន Huawei ត្រូវបានគេប្រទះឃើញដាក់លក់ លើទីផ្សារប្រទេសចិន កាលពីសប្ដាហ៍មុន។ កុំព្យូទ័រស៊េរីដំបូងនោះ មានឈ្មោះថា MateStation B515។ គេសង្ឃឹមថា វានឹងមិនប្រើប្រាស់ CPU របស់ Huawei ទេ តែផ្ទុយទៅវិញ វាបានបំពាក់ CPU 2ជម្រើស ដូចជា Ryzen 5 និង Ryzen 7 របស់ក្រុមហ៊ុន AMD ទៅវិញ។ សម្រាប់តម្លៃរបស់វា មានលក់តែនៅក្នុងប្រទេសចិនប៉ុណ្ណោះឥឡូវនេះ គឺតម្លៃ 4,999យន់ និង 8,999យន់ ឬប្រមាណ 760ដុល្លារ ដល់ 1,370ដុល្លារ។

អ្វីដែលពិសេសនោះ គឺថា Huawei បានដាក់លក់វា ជាកញ្ចប់តែម្ដង ពោលគឺមានទាំងម៉ូនីទ័រ, ក្តារចុច ក៏ដូចជា Mouse ផងដែរ។ សម្រាប់កុំព្យូទ័រ MateStation B515 នេះ មានប្រើប្រាស់ CPU ចំនួន 2ជម្រើស ដូចបានបញ្ជាក់នៅខាងលើស្រាប់ ដោយ 1ជាជម្រើស Ryzen 5 4600G និង 1ទៀតគឺ Ryzen 7 4700G ចំណែកឯជម្រើស RAM វិញ វាក៏មាន 2 ជម្រើសដែរ ដូចជា 8GB និង 16GB ជាមួយអង្គផ្ទុក ទំហំ 256GB ឬ 512GB ប្រភេទ SSD និងមាន 1TB ទៀត ជាប្រភេទ SATA HDD ទៀតផង។

សម្រាប់ផត ដែលមានបំពាក់មកជាមួយ ក៏មានច្រើនដែរ ជាក់ស្ដែងមាន USB-C, USB-A, រន្ធដោតកាស, រន្ធ HDMI, រន្ធ VGA ក៏ដូចជាមានរន្ធ Ethernet ជាដើម។សម្រាប់ម៉ូនីទ័ររបស់វាវិញ គឺមានទំហំ 23.8 អ៊ីញ ជាប្រភេទ IPS Panel ដែលមានកម្រិតបង្ហាញ 1,920 X 1,080 ភិចសែល, កម្រិតសមាមាត្រអេក្រង់ 16:9 និងមានកម្រិត Contrast Ratio 1,000:1។

Huawei អះអាងថា ម៉ូនីទ័ររបស់ខ្លួន មានអេក្រង់លាតពេញផ្ទៃមុខ ដល់ទៅ 90%ឯណោះ ខណៈពេលដែលជាក់ស្ដែងវិញ យើងឃើញថា វាលាតកប់ពីលើគែម តែខាងលើ និងខាងកៀនប៉ុណ្ណោះ ចំណែកឯខាងក្រោមវិញ គឺមាននៅសល់គែមធំគ្រាន់បើដែរ។

ចំពោះក្តារចុចរបស់វាវិញ គឺជាប្រភេទក្តារចុចឥតខ្សែ ដែលមានភ្ជាប់មកជាមួយ នូវសេនស័រស្គែនស្នាមម្រាមដៃទៀតផង និងកាន់តែពិសេសទៀតនោះ គឺក្តារចុចនោះ ក៏មានបំពាក់ NFC មកស្រាប់ដែរ ដើម្បីឱ្យអ្នកប្រើប្រាស់ អាចធ្វើការភ្ជាប់កុំព្យូទ័រនោះ ទៅកាន់ទូរស័ព្ទឆ្លាត ក៏ដូចជាថេប្លេត របស់ Huawei បាន ដូចដែលធ្លាប់មានលើ Laptop របស់គេដែរ។

MateStation B515 ក៏មានដំណើរការជាមួយនឹង Window 10 Pro មកស្រាប់តែម្ដង ប៉ុន្តែសម្រាប់ព័ត៌មានទាក់ទងនឹងការដាក់លក់វិញ ប្រភពព័ត៌មានបានបញ្ជាក់ប្រាប់ថា Huawei នឹងដាក់លក់កុំព្យូទ័រលើតុនេះ សម្រាប់តែផ្នែកខាងជំនួញ នៅក្នុងប្រទេសចិនប៉ុណ្ណោះ ហើយគេមិនបានបញ្ជាក់ឡើយថា តើវានឹងមានលក់សម្រាប់អតិថិជនទូទៅ ឬមួយក៏អត់ទេនោះឡើយ៕

December 1, 2020

ចិន នឹងក្លាយជាប្រទេសទី3 បើជោគជ័យក្នុងការបាញ់បង្ហោះ យានអវកាសទៅយកសំណាកថ្ម ពីស្ថានព្រះចន្ទ មកផែនដី

ចិន បានបញ្ចេញបេសកកម្មថ្មីមួយទៀត ដោយបាន បាញ់បង្ហោះយានអវកាស ទៅពិភពស្ថានព្រះចន្ទដើម្បីប្រមូលយកដុំថ្ម និងសំណាកគំរូនានា ពីផ្ទៃដីលើពិភពនោះ មកផែនដី កាលពីថ្ងៃទី24 ខែវិច្ឆិកា ឆ្នាំ2020 កន្លងទៅ។ បើបានសម្រេចនោះ ចិន នឹងក្លាយជាប្រទេសទី3 បន្ទាប់ពីអាមេរិក និងអតីតសហភាពសូវៀត ដែលបានយកដុំថ្ម ពីស្ថានព្រះចន្ទ មកកាន់ផែនដីបានសម្រេច។

យានអវកាសនេះមានឈ្មោះ Chang’e 5(ឆាងអ៊ើ៥) ត្រូវបានបាញ់បង្ហោះតាមរយៈគ្រាប់រ៉ុក្កែត Long March-5Y ចេញពីទីតាំង Wenchang ក្នុងខេត្តហៃណាន់។

ចិន នឹងដាក់យានអវកាសនេះ ឱ្យចុះចតលើផ្ទៃដីភពព្រះចន្ទ ត្រង់ចំណុចមួយ ហៅថា Oceanus Procellarum ដោយប្រមូលវត្ថុធាតុពីភពស្ថានព្រះចន្ទ តាមរយៈការខួងដីជម្រៅ 7ហ្វីត ពោលគឺ នឹងយកថ្ម និងស្រទាប់ដី ប្រហែល 2គីឡូក្រាម មកកាន់ផែនដី។ គំរូដែលយកពីភពស្ថានព្រះចន្ទនេះ នឹងជួយឱ្យអ្នកវិទ្យាសាស្ត្រ យល់ដឹងកាន់តែស៊ីជម្រៅ អំពីប្រភពកកើតដំបូងនៃភពស្ថានព្រះចន្ទ និងប្រព័ន្ធព្រះអាទិត្យ៕

December 1, 2020

Samsung អាចប្រមូលលុយចំណេញ បានច្រើនសន្ធឹក លើទីផ្សារស្មាតហ្វូន ក្នុងត្រីមាសទី3 នៃឆ្នាំ 2020

បើតាមការចុះផ្សាយរបស់ Strategy Analytics បានឱ្យដឹងថា ក្រុមហ៊ុនកូរ៉េខាងត្បូង Samsungអាចយកឈ្នះលើចំនួនលក់របស់ Apple នៅអាមេរិក និងថែមទាំង អាចផ្ដួល Xiaomi ដណ្ដើមយកតំណែងកំពូលនៅក្នុងទីផ្សារនៃប្រទេសឥណ្ឌា បានទៀតផង។

Samsung អាចទទួលបានប្រាក់ចំណេញ ពីការលក់ស្មាតហ្វូនលើសកលលោក ក្នុងកម្រិតមួយខ្ពស់បំផុត ដែលមិនធ្លាប់មាន ជាច្រើនឆ្នាំមកហើយ។ Samsung អាចប្រមូលបានប្រាក់ចំណេញ ពីទីផ្សារស្មាតហ្វូនដល់ទៅ 32.6% នៅត្រីមាសទី3 នៃឆ្នាំ2020 កើនឡើងពីតួលេខ 18.8% កាលពីត្រីមាសដូចគ្នា ក្នុងឆ្នាំ2019។ វាជាចំណែកប្រាក់ចំណេញខ្ពស់បំផុតមួយ ដែលមិនធ្លាប់មាន ក្នុងរយៈពេល 6ឆ្នាំ ដែលកាលពីត្រីមាសទី2 ឆ្នាំ2014 ក្រុមហ៊ុនធ្លាប់ប្រមូលប្រាក់ចំណេញ បានខ្ពស់ដល់ទៅ 37.9% ពីទីផ្សារស្មាតហ្វូនទាំងមូល៕

December 1, 2020

បង្គោលលោហធាតុអាថ៌កំបាំងមួយផ្សេងទៀត បង្ហាញខ្លួននៅរូម៉ានី ក្នុងខណៈបង្គោលអាថ៌កំបាំងនៅអាមេរិកបានបាត់ខ្លួន

បង្គោលលោហធាតុដែលមិនមានម្ចាស់មួយផ្សេងទៀត ត្រូវបានគេប្រទះឃើញនៅប្រទេសរូម៉ានី មុនការបាត់ខ្លួនរបស់បង្គោលលោហធាតុនៅសមុទ្រខ្សាច់អាមេរិកមួយថ្ងៃ។

កាលពីថ្ងៃទី 26វិច្ឆិកា បង្គោលលោហធាតុដែលមានរាងត្រីកោណ និងរលើបរលោងថ្មីមួយ ត្រូវបានប្រទះឃើញស្ថិតនៅមិនឆ្ងាយប៉ុន្មានពីបន្ទាយ Petrodava Dacian ដែលជាទីតាំងបុរាណមួយនៅទីក្រុង Piatra Neamt ប្រទេសរូម៉ានី។

បង្គោលនេះមានកម្ពស់ជិត 4ម៉ែត្រ និងមានជ្រុងមួយបែរទៅរកភ្នំ Ceahlau ដែលជាអច្ឆរិយវត្ថុធម្មជាតិមួយក្នុងចំណោម 7 របស់ប្រទេសរូម៉ានី ដែលត្រូវបានប្រជាជនក្នុងតំបន់ប្រសិទ្ធនាមថាជាភ្នំទេព។ អាជ្ញាធររបស់ប្រទេសនេះ មិនទាន់ដឹងច្បាស់អំពីប្រភពរបស់បង្គោលនេះនៅឡើយ។

បង្គោលលោហធាតុអាថ៌កំបាំងមួយផ្សេងទៀត បង្ហាញខ្លួននៅរូម៉ានី ខណៈបង្គោលអាថ៌កំបាំងនៅអាមេរិកបានបាត់ខ្លួន

ការប្រទះឃើញបង្គោលលោហធាតុនៅរូម៉ានីនេះ បានកើតឡើងនៅក្នុងគ្រាដែលបង្គោលលោហធាតុអាថ៌កំបាំងនៅក្នុងរដ្ឋ Utah នៃសហរដ្ឋអាមេរិក បានបាត់ខ្លួន ដោយពុំទាន់ដឹងអំពីមូលហេតុ។ បង្គោលដែលមានកម្ពស់ប្រហែល 3.6ម៉ែត្រនេះ ត្រូវបានក្រុមមន្ត្រីនៅ Utah ប្រទះឃើញកាលពីថ្ងៃទី 18វិច្ឆិកា ពេលកំពុងហោះហើរដើម្បីរាប់សត្វចៀមស្នែងធំនៅក្នុងតំបន់។

ក្រោយមក នៅថ្ងៃទី 27វិច្ឆិកា បង្គោលនេះក៏ស្រាប់តែបានបាត់ខ្លួនពីទីតាំងដើម។ គេសង្ស័យថា វាអាចត្រូវបានជនណាម្នាក់លួចគាស់យកទៅនៅពេលយប់។

មកដល់ពេលនេះ ពុំទាន់មានអ្នកណាម្នាក់ចេញមុខមកអះអាងថាជាទ្រព្យរបស់ខ្លួននៅឡើយ៕

ប្រភព៖ New York Post

>ប្រទះឃើញបង្គោលលោហធាតុចម្លែកនៅកណ្ដាលសមុទ្រខ្សាច់! អាជ្ញាធរថា “ទោះអ្នកដាំមកពីពិភពផ្កាយក៏ដោយ វាជារឿងខុសច្បាប់ បើសិនជាធ្វើឡើងនៅទីសាធារណៈ”

December 1, 2020

“Beauty and the Beast” ទីតាំងថ្មីពី Tokyo Disneyland ប្រកាសថ្ងៃបើកទទួលភ្ញៀវទេសចរហើយ!

បន្ទាប់ពីមានដំណឹងលេចឮមួយរយៈមកថា សួនកម្សាន្ត តូក្យូ ឌីស្នីលែនដ៍ មានផែនការចង់ជប់និម្មិតទីតាំងថ្មីចេញពីខ្សែភាពយន្តគំនូរជីវចលរឿង “Beauty and the Beast” ឬជាភាសាខ្មែរថា “ទេពអប្សរ និងព្រះអង្គម្ចាស់សត្វកំណាច” រួចមក ថ្ងៃនេះប្រទេសជប៉ុនក៏បានប្រកាសថ្ងៃបើកបម្រើសេវាកម្មសួនកម្សាន្តមួយនេះហើយ ដោយប្រើឈ្មោះថា “New Fantasyland” ដែលត្រៀមរួចរាល់ក្នុងការទទួលភ្ញៀវទេសចរនៅថ្ងៃទី15 ខែមេសា ឆ្នាំ2020 ដែលជាថ្ងៃគម្រប់ខួប 37ឆ្នាំរបស់សួនកម្សាន្ត តូក្យូ ឌីស្នីលែនដ៍ ទៀតផង។

“New Fantasyland” គឺជាផ្នែកតពង្រីកពីទីតាំង Fantasyland ដោយសាងសង់ឡើងតាមរចនាបទរបស់ខ្សែភាពយន្តគំនូរជីវចលដ៏ល្បីល្បាញរឿង“Beauty and the Beast” ដោយទឹកប្រាក់វិនិយោគច្រើនដល់ទៅ 75,000យេន។ នៅក្នុងទីតាំងនោះ នឹងមានភូមិអ្នកស្រុកតូចមួយដែល “ប៊ែលល៍” រស់នៅ ផ្លូវចូលខាងមុខភូមិមានខ្ទមរបស់ “ម៉ូរីស” ដែលជាចំណុចចុចយកសំបុត្រចូលកម្សាន្ត(Fast Pass)។ ខាងក្នុងភូមិមានរង្វង់មូលបាញ់ទឹក “ហ្គេស្តង់” ភោជនីយដ្ឋាន និងហាងលក់ទំនិញផ្សេងៗតាំងនៅជាប់ៗគ្នាជាច្រើន។ ជ្រៅចូលទៅក្នុងព្រៃនឹងឃើញមានប្រាសាទរបស់ព្រះអង្គម្ចាស់សត្វកំណាច ដែលជាគ្រឿងលេង “ទេពអប្សរ និងព្រះអង្គម្ចាស់សត្វកំណាច (រឿងនិទាននៃវេទមន្ត)” ជាគ្រឿងលេងដែលភ្ញៀវទេសចរគ្រប់គ្នាអាចព្រលែងការនឹកស្រមៃ និងហោះហើរទៅតាមឈុតឆាកផ្សេងៗនៃរឿងនិទានបានយ៉ាងសប្បាយរីករាយ។

ក្រៅពីនេះ នៅក្នុងព្រៃថែមទាំងមានរោងល្ខោន “Fantasyland Forest Theater” ដែលអាចហៅបានថា ជារោងល្ខោនដំបូងគេនៅក្នុងសួនកម្សាន្ត តូក្យូ ឌីស្នីលែនដ៍ មួយនេះ។ ភ្ញៀវទេសចរ និងអ្នកនិយមចូលចិត្តនឹងបានសប្បាយជក់ចិត្តជាមួយនឹងការសម្ដែងផ្សេងៗពីតួឯកទាំងអស់របស់ផលិតកម្ម វ៉ល ឌីស្នី ដូចជា មិកគី ម៉ៅស៍ និងមិត្តភក្តិទាំងឡាយរបស់គេផងដែរ។

ក្រៅពីទីតាំងថ្មីដូចជា ទេពអប្សរ និងព្រះអង្គសត្វកំណាច ហើយ នៅក្នុងផ្នែកនៃទីតាំង Tomorrowland នៅបានបន្ថែមឧបករណ៍លេងកម្សាន្ត “Baymax Happy Ride” ថែមទាំងនៅក្នុងផ្នែករបស់ទីតាំង Toontown នៅបានបន្ថែម Minnie Style Studio” ជាស្ទូឌីយោដែលភ្ញៀវទេសចរទាំងអស់អាចចូលទៅស្វាគមន៍ និងថតរូបជាមួយនឹងតួឯកល្បី ដូចជា មីននី បានយ៉ាងជិតស្និទ្ធបំផុតទៀតផង។

ទីកន្លែងមួយចំនួនដែលកសាងហើយនោះ បានបើកឱ្យភ្ញៀវទេសចរដើរឆ្លងកាត់ចូលទៅទស្សនាកម្សាន្តបាន តែក្នុងផ្នែករបស់តួអគារផ្សេងៗទៀត នឹងបើកឱ្យទស្សនាក្នុងអំឡុងពេល Grand Opening ដូចដែលបានរៀបរាប់រួចហើយខាងលើ។

អាចនិយាយបានថា គ្រប់គ្រឿងរឿងទេសចរណ៍កម្សាន្តមែនទែន ហើយរឹតតែប្រកាសបើកទីតាំងថ្មី និងថ្ងៃគម្រប់ខួបកំណើតក្នុងថ្ងៃតែមួយទៀតផងនោះ ប្រហែលជានឹងធ្វើឱ្យសួនកម្សាន្តមួយនេះមើលទៅរឹតតែអ៊ឹកធឹកគគ្រឹកគគ្រេងខ្លាំងឡើងមិនខាន៕

December 1, 2020

CEO របស់ JPMorgan Chase៖ «ជោគជ័យមិនត្រឹមតែត្រូវការឧស្សាហ៍ និងភាពឆ្លាតវៃទេ»

CEO របស់ក្រុមហ៊ុន JPMorgan យល់ថា ថ្នាក់ដឹកនាំដែលជោគជ័យតែងតែមានចំណុចពិសេសមួយចំនួន ដូចជា ការដាក់ខ្លួន ការបើកចិត្តឱ្យទូលាយ ភាពយុត្តិធម៌ និងស្មោះត្រង់។

ប្រការខាងលើនេះត្រូវបាន CEO របស់ក្រុមហ៊ុន JPMorgan លោក Jamie Dimon ចាត់ទុកថាជាបញ្ហាស្នូលចំពោះក្រុមមេដឹកនាំជោគជ័យ ពោលគឺមិនមែនជាមនុស្សដែលមានតែភាពឆ្លាតវៃបំផុត ឬឧស្សាហ៍ជាងគេនៅក្នុងក្រុមហ៊ុនឡើយ។

លោក Jamie Dimon បានចែករំលែកបន្ថែមទៀតថា៖ “ការគ្រប់គ្រងគឺជាការអនុវត្តទិសដៅ ការតភ្ជាប់ ការមានវិន័យ ការរៀបចំផែនការ ការវិភាគ និងប្រកបដោយតម្លាភាព។ ជាងនេះ វាគឺជាការជ្រើសរើសមនុស្សស័ក្ដិសមសម្រាប់ការបំពេញការងារ ការបំបាត់ចោលបញ្ហាការិយាធិបតេយ្យ រួមនឹងបញ្ហាមិនត្រឹមត្រូវមួយចំនួនទៀត»។

យោងតាម CEO រូបនេះ កត្តាសំខាន់បំផុតនោះគឺការគោរពចំពោះអ្នកដទៃ ពោលគឺមិនមែនត្រឹមតែមានកេរ្ដិ៍ឈ្មោះល្អ និងខួរក្បាលឆ្លាតវៃទេ។

នៅពេលអ្នកមានគុណសម្បត្តិដូចខាងលើហើយ វាក៏នឹងជួយឱ្យអ្នកបង្កើនប្រសិទ្ធភាពការងារ ហើយបន្ទាប់មកាវានឹងជួយឱ្យអ្នកទទួលបានជោគជ័យ។ បើសិនជាអ្នកមានចរិតអាត្មានិយម ឬដណ្ដើមស្នាដៃពីអ្នកដទៃដោយអ្នកមិនអាចបង្ហាញអំពីភាពត្រឹមត្រូវ ពេលនោះអ្នកផ្សេងនឹងលែងចង់ធ្វើការជាមួយអ្នក ហើយបញ្ហានេះនឹងប៉ះពាល់យ៉ាងធ្ងន់ធ្ងរដល់ប្រសិទ្ធភាពការងាររបស់អ្នកនាពេលខាងមុខ។

CEO របស់ JPMorgan Chase៖ «ជោគជ័យមិនត្រឹមតែត្រូវការឧស្សាហ៍ និងឆ្លាតវៃនោះទេ» — ទីស្នាក់ការរបស់ក្រុមហ៊ុនវិនិយោគផ្នែកធនាគារ JPMorgan Chase

លោក Dimon ដែលបច្ចុប្បន្នមានទ្រព្យប្រមាណ 1.6ពាន់លានដុល្លារអាមេរិក ក៏ស្វែងរកបេក្ខភាពយ៉ាងដូច្នេះសម្រាប់បំពេញការងារនៅក្នុងក្រុមហ៊ុនវិនិយោគផ្នែកធនាគាររបស់លោក។ នៅពេលធ្វើការសម្ភាស ឬវាយតម្លៃមុននឹងមានការដំឡើងតំណែង លោក Dimon តែងតែសួរសំនួរមួយចំនួន ដូចជា៖ «តើអ្នកចង់ធ្វើការឱ្យអ្នកនោះទេ? អ្នកចង់ឱ្យកូនរបស់អ្នកធ្វើការឱ្យអ្នកនោះទេ?»។ល។

CEO របស់ JPMorgan ក៏មានការយកចិត្តទុកដាក់ទៅលើការចេះទទួលខុសត្រូវរបស់បុគ្គលិក ឬរបៀបដែលពួកគេប្រតិកម្មនៅពេលមានបញ្ហាកើតឡើង។

ជាមេដឹកនាំម្នាក់ លោក Dimon តែងតែប្រឹងប្រែងអនុវត្តនូវអ្វីដែលលោកបានណែនាំដល់គ្រប់គ្នានៅក្នុងក្រុមហ៊ុន។ លោកថ្លែងថា៖ «ពុំមានអ្នកណាម្នាក់ប្រាប់ឱ្យ Jamie Dimon បន្ទាបខ្លួនសោះឡើយ»។

ប៉ុន្តែ លោកឱ្យដឹងថា ខ្លួនលោកផ្ទាល់តែងតែប្រព្រឹត្តចំពោះអ្នករាល់គ្នាប្រកបដោយយុត្តិធម៌ ហើយលោកក៏ប្រាថ្នាឱ្យគ្រប់គ្នាធ្វើដូចរូបលោក។ «អ្នកចង់ធ្វើការឱ្យខ្ញុំ បើសិនអ្នកពិតជាគិតថា ខ្ញុំយកចិត្តទុកដាក់ចំពោះអ្នក។ ប្រសិនជាខ្ញុំប្រព្រឹត្តិចំពោះអ្នកប្រកបដោយយុត្តិធម៌ ជាមួយអ្នកដទៃ ខ្ញុំក៏ធ្វើដូច្នេះ» លោក Dimon បញ្ជាក់បន្ថែម។

ដើម្បីទទួលបានជោគជ័យ «ចូរប្រព្រឹត្តិចំពោះគ្រប់គ្នាឱ្យដូចអ្វីដែលអ្នកប្រាថ្នាឱ្យអ្នករាល់គ្នាប្រព្រឹត្តចំពោះអ្នក» លោក Dimon ថ្លែងដូច្នេះ និងសង្កត់ធ្ងន់ថា៖ «ចូរមានការគោរពចំពោះមនុស្សគ្រប់គ្នា»៕

ប្រភព៖ CNBC, Celebritynetworth

November 30, 2020

ManU កំពុងតែស្រេកឃ្លាន Dembale ក្នុងការដោះដូរកីឡាករ នាពាក់កណ្តាលរដូវកាលនេះ

ក្រោយពីខកខានក្នុងការនាំយកកីឡាករខ្សែប្រយុទ្ធ Ousamane Dembela របស់ FC Barcelona មកកាន់ទឹកដីអង់គ្លេស កាលពីមុនចាប់ផ្តើមរដូវកាលថ្មី2021 ក្លិប Manchester United បានប្រកាសអំពីគម្រោងរបស់ខ្លួន ក្នុងការនាំយកកីឡាកររូបនេះ មកកាន់ក្លិបរបស់ខ្លួន ឱ្យបានក្នុងពេលឆាប់ៗខាងមុខនេះ។

Manchester United កំពុងចរចាចង់នាំយកខ្សែប្រយុទ្ធរបស់ក្លិប Barcelona កីឡាករ Ousmane Dembele មកកាន់ក្លិបរបស់ខ្លួន ទោះក្នុងលក្ខខណ្ឌខ្ចីជើងក៏ដោយ នៅអំឡុងពេលទិញដូរកីឡាករ នៅពេលខាងមុខនេះ។

គួរឱ្យដឹងដែរថា កីឡាករសញ្ជាតិបារាំងស្បែកខ្មៅ វ័យ 23ឆ្នាំខាងលើនេះ កំពុងតែត្រូវប៉ាន់ខ្លាំង ពីក្លិបធំៗ ខណៈដែលក្លិបបច្ចុប្បន្ន Barcelona កំពុងតែដុនដាបខ្លាំង ហើយកីឡាករជាច្រើនកំពុងត្រៀមជើងព្រួល ផ្ទេរទៅក្លិបផ្សេងទៀតរៀងៗខ្លួន៕

November 30, 2020

Napoli គ្រោងប្តូរឈ្មោះកីឡដ្ឋាន ដើម្បីឧទ្ទិសដល់ Maradona

ក្លិបល្បីឈ្មោះរបស់អ៊ីតាលី Napoli កំពុងតែពិចារណាក្នុងការ ផ្លាស់ប្ដូរឈ្មោះកីឡដ្ឋានរបស់ខ្លួន ដោយចង់ដាក់ឈ្មោះអតីតខ្សែប្រយុទ្ធអាហ្សង់ទីនដ៏ល្បីល្បាញ Diego Maradona ដែលទើបតែស្លាប់ដោយសារអាការគាំងបេះដូងកាលពីប៉ុន្មានថ្ងៃមុន ដើម្បីទុកជាអនិស្សាវរីយ៍ ដល់អតីតកីឡាករដ៏អមតៈរូបនោះ។

ឈ្មោះកីឡដ្ឋានថ្មីនេះ អាចទំនងជាត្រូវដាក់ថា San Paolo-Diego Armando Maradona ខណៈដែលឈ្មោះបច្ចុប្បន្នគឺ San Paolo តែទោះជាយ៉ាងណាក្ដី ប្រធានក្លិបកំពុងតែដំណើរការនីតិវិធី ក្នុងការផ្លាស់ប្តូរឈ្មោះនេះ ដោយទំនងជាអាចចេញជាផ្លែផ្កា ក្នុងពេលឆាប់ៗខាងមុខនេះ។

គួររំឭកដែរថា Napoli ជាក្លិបនៅប្រទេសអ៊ីតាលី ក៏ប៉ុន្តែជាទីកន្លែងដែលលោក Diego Maradona ទទួលបានជោគជ័យខ្លាំងនៅទីនោះ ដោយលោកធ្លាប់បានបង្ហាញខ្លួន 188ប្រកួត រកបាន 81គ្រាប់ និងជួយឱ្យក្រុមលើកពានរង្វាន់ជាច្រើន ហើយវាក៏ជាសម័យកាលដ៏រុងរឿងបំផុតរបស់ក្លិបមួយនេះផងដែរ៕

November 30, 2020

Samsung គ្រោងនឹងបញ្ចេញ Galaxy Z Flip ជំនាន់ទី3 អេក្រង់កម្រិតខ្ពស់ 120Hz

ថ្មីៗនេះ មានលេចឮដំណឹងថា ក្រុមហ៊ុន Samsung កំពុងត្រៀមនឹងបញ្ចេញស្មាតហ្វូន Galaxy Z Flip ជំនាន់ទី3 ខណៈកាលពីពេលកន្លងមក ក្រុមហ៊ុនបានធ្វើការប្រកាសចេញ ត្រកូលមួយនេះចំនួន 2 ម៉ូដែលរួចមកហើយ។

Galaxy Z Flip ជំនាន់ថ្មីនេះ អាចនឹងត្រូវ Samsung យកទៅប្រកាសដាក់បង្ហាញ នៅក្នុងអំឡុងត្រីមាសទី2 ឆ្នាំក្រោយវិញ ពោលគឺ មិនមែនបញ្ចេញជាមួយគ្នានឹង Galaxy S ជំនាន់ថ្មី ដូចកាលពីដើមឆ្នាំនេះនោះទេ នេះគឺដោយសារតែពេលវេលា នៃការបង្ហាញខ្លួនរបស់ទូរស័ព្ទវៃឆ្លាតខាងលើនោះ នៅសល់រយៈពេលយូរទៀតហ្នឹងឯង។

ហេតុដូច្នេះហើយ នៅក្នុងពេលនេះ យើងហាក់ដូចជាទទួលបានដំណឹងទាក់ទងនឹងវា មិនច្រើននោះទេ ហើយដំណឹងទាំងនោះដែរ ក៏មិនទាន់ប្រាកដឡើយថា ជាការពិត ឬក៏មិនពិតនោះដែរ អ៊ីចឹងហើយ ដើម្បីឱ្យច្បាស់ជាងនេះ គឺមានតែរង់ចាំមើលបន្តទៀតប៉ុណ្ណោះឯង។

សូមជម្រាបជូនដែរថា Galaxy Z Flip ម៉ូដែលដំបូងគេ គឺទ្រទ្រង់ត្រឹមតែសេវា 4G នោះ ត្រូវបានប្រកាសចេញកាលពីដើមឆ្នាំ និង 1ម៉ូដែលទៀត ទើបប្រកាសចេញ កាលពីអំឡុងខែសីហា កន្លងទៅនេះ គឺជាម៉ូដែល 5G ដែលសុទ្ធតែមានតម្លៃលើសពី 1,000ដុល្លារទាំងអស់៕

November 30, 2020

Category: សង្គម និងសេដ្ឋកិច្ច