Category: សង្គម និងសេដ្ឋកិច្ច

និយមន័យរបស់ពាក្យថា “គូព្រេង” សម័យថ្មីនេះ ការពិតទៅ គឺបែបណាហ្ន៎?
ក្នុងយុគសម័យដ៏ទំនើបនាពេលបច្ចុប្បន្ននេះ និយមន័យរបស់ពាក្យថាគូព្រេងរបស់អ្នកអាចនឹងធំទូលាយខ្លាំងណាស់ ឧទាហរណ៍ដូចជា មនុស្សដែលអ្នកកំពុងមានសម្ព័ន្ធភាពយ៉ាងស៊ីជម្រៅជាមួយ មនុស្សដែលធ្វើឱ្យអ្នកមានអារម្មណ៍កក់ក្ដៅក្នុងចិត្ត និងរីកធំឡើង ជាមនុស្សដែលល្អបំផុត ជាពិសេសបើអ្នកកំពុងមានឧបសគ្គផ្សេងៗដ៏ច្រើនចូលមកក្នុងជីវិតផងនោះ តែខណៈពេលជាមួយគ្នា ខាងក្រោមនេះ គឺនិយមន័យរបស់ពាក្យថា “គូព្រេង” របស់បណ្ដាអ្នកជំនាញខាងផ្នែកសម្ព័ន្ធភាពមនុស្សនឹងមនុស្ស។
សាម៉ុនថា រ៉ុដមែន អ្នកចិត្តវិទ្យា
គូព្រេង គឺមនុស្សដែលអ្នកអាចតភ្ជាប់ទំនាក់ទំនងបានយ៉ាងងាយស្រួល និងភ្លាមៗ តែក៏មិនមែនមានន័យថា មិនចាំបាច់ប្រើការព្យាយាមអ្វីសោះនោះដែរ… “នាងខ្ញុំជឿលើរឿងគូព្រេង នៅពេលអ្នកជួបនរណាម្នាក់ដែលគិតថាត្រូវចិត្ត និងមានអារម្មណ៍ថាមានសេចក្ដីសុខខ្លាំង វាអាចថាជាអារម្មណ៍របស់គូព្រេងក៏បាន តែយ៉ាងណាក៏ដោយមានមនុស្សជាច្រើននៅលើពិភពលោកនេះដែលអាចនឹងត្រូវចិត្តសម្រាប់អ្នក នៅពេលបានជួបគ្នា។ ការពិតគឺ មិនថាអ្នកនឹងមានសេចក្ដីសុខខ្លាំងប៉ុនណា ឬមនុស្សម្នាក់នោះចូលចុះជាមួយអ្នកបានខ្លាំងប៉ុនណានោះទេ តែអ្នកត្រូវតែប្រយ័ត្នប្រយែងទង្វើរបស់ខ្លួនឯង និងកុំបង្ខំចិត្តគេជាដាច់ខាត”
មិឆេល វ៉ៃនើរ-ដេវីស អ្នកនិពន្ធរឿង Divorce Busting
ផ្នត់គំនិតរឿងគូព្រេង អាចនឹងធ្វើឱ្យមនុស្សយើងនឹករំពឹងទុកបែបខុសៗពាក់ព័ន្ធនឹងស្នេហា…“មនុស្សយើងនឹងព្រមលះបង់សម័្ពន្ធភាពដទៃទៀតដើម្បីតាមរកមនុស្ស “ដែលពួកគេចង់រស់នៅជាមួយ” ដែលនេះគឺជាការនឹកស្រមើស្រមៃម្យ៉ាង។ អ្នកអាចសម្លឹងរកមើលមនុស្សថ្មីៗបានជាប់ជានិច្ច តែនៅពេលពេលវេលាកន្លងទៅ អ្នកក៏ត្រូវតែត្រឡប់ទៅរាប់ពីលេខ1 មកជាថ្មី ដើម្បីរៀនយល់ដឹងក្នុងការធ្វើឱ្យសេចក្ដីស្នេហាគង់វង្សយូរអង្វែងដដែល”
សាស្ត្រាចារ្យ ឡូរី ស៊ូ ប្រ៊ក់វេយ៍ អ្នកនិពន្ធរឿង Your Interfaith Wedding
គូព្រេង គឺជាមនុស្សដែលរស់នៅជាមួយគ្នា បើទោះជាមានឧបសគ្គ ឬក្ដីទុក្ខលំបាកដែលត្រូវប្រឈមក៏ដោយ…“ជាគំនិតផ្ទាល់ខ្លួន ខ្ញុំជឿលើរឿងគូព្រេង…គូអាពាហ៍ពិពាហ៍ភាគច្រើនអាចឈានរំលងរឿងការរើសអើងជាតិសាសន៍ វប្បធម៌ និងសាសនាបាន ពួកគេដឹងថា ពួកគេគួរតែរស់នៅជាមួយគ្នា។ សម្ព័ន្ធភាពរបស់ពួកគេស៊ីជម្រៅខ្លាំង ទោះជាមកពីពិភពដែលខុសប្លែកគ្នាក្ដី”
“គូព្រេងថែមទាំងត្រូវជម្រះបំណុល និងណាត់ជួបគ្រូពេទ្យរួមគ្នាទៀតផង។ ពួកគេត្រូវចិញ្ចឹមកូន និងជួបនឹងភាពរញ៉េរញ៉ៃផ្សេងៗក្នុងជីវិត រួមទាំងធំធាត់រហូតដល់ចាស់ទៅជាមួយគ្នា ព្រោះពួកគេមានខ្សែសម្ព័ន្ធដែលកាត់ចេញពីគ្នាមិនបាន”
ចេសស៍ ខាន អ្នកអប់រំ និងជាអគ្គនាយកអង្គការ The Gender & Sexuality Therapy Collectiv
គូព្រេង គឺនិមិត្តសញ្ញានៃសេចក្ដីសង្ឃឹមថា មនុស្សម្នាក់នឹងស្រឡាញ់អ្នកដោយគ្មានលក្ខខណ្ឌ ទោះជាអ្នកមានរឿងមិនល្អ និងចំណុចអន់ក៏ដោយ… “ខ្ញុំមើលឃើញថា គូព្រេង គឺជានិមិត្តសញ្ញានៃក្ដីសង្ឃឹម ការចងភ្ជាប់សម្ព័ន្ធ និងការមើលថែ ដែលមនុស្សយើងប្រាថ្នា និងត្រូវការ…យើងនឹង “ត្រូវចិត្ត” មនុស្សដែលគួរនឹងតភ្ជាប់សម្ព័ន្ធភាពឱ្យសម្រេចបាន។ គូព្រេងនឹងសាងបន្ថែមក្ដីសង្ឃឹម និងក្ដីប្រាថ្នាក្នុងការក្លាយជាគូស្នេហ៍ និងប្រគល់ឱ្យនូវការយល់ចិត្ត ព្រមជាមួយអារម្មណ៍ដ៏មានតម្លៃ ទោះជាយើងមានចំណុចមិនល្អក៏ដោយ”
អេរិកា ឃែបលែន អ្នកប្រឹក្សាបញ្ហារើសគូស្រករនៃស្ថាប័ន Three Days Rule
“ពាក្យថា គូព្រេង អាចឱ្យនូវអារម្មណ៍ថាដូចការរៀបចំផែនការបន្តិចដែរ តែក៏ជាផ្នត់គំនិតដែលស្រស់ស្អាត និងជាលេសក្នុងការបដិសេធសម្ព័ន្ធភាពដែលមិន “ល្អឥតខ្ចោះ” បាន ដោយសារតែសព្វថ្ងៃនេះ វិវឌ្ឍនភាពធ្វើឱ្យយើងគិតថា មានជម្រើសដែលល្អជាងជានិច្ចហ្នឹងឯង ដូច្នេះហើយទើបផ្នត់គំនិតរឿងគូព្រេងក្លាយជាបច្ច័យដែលមានកម្រិតដែលធ្វើឱ្យពួកគេគិតថា ពួកគេនឹងបានអ្វីគ្រប់យ៉ាងពីមនុស្សម្នាក់ទៀត”
“ការពិតគឺ មនុស្សដែលត្រូវចិត្តសម្រាប់អ្នក នឹងជាមនុស្សឥតខ្ចោះដែលមិនឥតខ្ចោះ ខ្ញុំជឿថា មនុស្សយើងអាចមានគូព្រេងបានច្រើននាក់ សុំត្រឹមតែមានការយល់ចិត្តដូចគ្នា ក៏គ្រប់គ្រាន់ហើយ”
ធីណា ថេសស៊ីណា អ្នកចិត្តវិទ្យា និងជាអ្នកនិពន្ធរឿង Dr. Romance’s Guide to Finding Love Today
ជួនកាលមនុស្សយើងក៏យល់ខុសរវាងភាពរំភើបញាប់ញ័រពេលមានស្នេហាថ្មី ជាមួយនឹងអារម្មណ៍ដែលបានចងសម្ព័ន្ធជាមួយគូព្រេង… “មនុស្សភាគច្រើនគិតថា សារធាតុគីមីដែលនៅក្នុងខ្នួនមនុស្សយើងត្រូវគ្នា គឺជាស្នេហាពិត ចំណែកសារធាតុគីមីដែលមិនត្រូវគ្នា មិនមែនសេចក្ដីស្នេហាទេ តែយើងមិនដឹងថា បែបណាគឺបែបណាឱ្យប្រាកដទេ។ ញឹកញាប់ណាស់ដែលអ្នកភ្លាត់ភ្លាំង គ្រាន់តែដោយសារបណ្ដោយឱ្យសារធាតុគីមីនាំផ្លូវទៅដោយមិនរិះគិតឱ្យបានល្អិតល្អន់ ផ្ទុយទៅវិញសម្ព័ន្ធភាពអស់មួយជីវិត ក៏អាចចាប់ផ្ដើមបានដោយគ្មានរឿងសារធាតុគីមីចូលមកពាក់ព័ន្ធដែរ”
“បើអ្នករវល់តែ Fucus ថា ខ្លួនឯងរំភើប ឬមិនរំភើបជាមួយមនុស្សម្នាក់នោះខ្លាំងជ្រុលពេក អ្នកក៏អាចអស់ឱកាសក្នុងការអភិវឌ្ឍសម្ព័ន្ធភាពដែលថានោះតទៅទៀតបានដែរ”
ហួន អូលមីដូ អ្នកចិត្តវិទ្យា
ការចងសម្ព័ន្ធជាមួយគូព្រេង គឺការតាមរកមនុស្សដែលមើលឃើញអ្នក និងស្រឡាញ់អ្នកក្នុងបែបដែលជារូបអ្នកពិតៗ… “អ្នកគួរដឹងថា “ចិត្តគំនិត” គឺការចែករំលែកខ្លួនឯងជាមួយមនុស្សម្នាក់ទៀត ដែលរួមទាំង “រូបកាយដែលពិតប្រាកដ និងល្អបំផុតរបស់អ្នក” ផងដែរ។ ឧទាហរណ៍ដូចជា អ្វីដែលអ្នកត្រូវការពីមនុស្សម្ខាងទៀតគឺ គុណសម្បត្តិផ្សេងៗ ដូចជាចងសម្ព័ន្ធភាព សុវត្ថិភាព និងការជឿចិត្តជាដើម”៕
December 2, 2020
បង្គោលលោហធាតុអាថ៌កំបាំងនៅសមុទ្រខ្សាច់អាមេរិក ត្រូវមនុស្ស 4 នាក់លួចគាស់យកទៅទាំងយប់
Ross Bernards ដែលជាជាងថតរូបម្នាក់ បានឱ្យដឹងថា គាត់បានឃើញបង្គោលលោហធាតុអាថ៌កំបាំងនៅកណ្ដាលសមុទ្រខ្សាច់នៃរដ្ឋ Utah ត្រូវបានមនុស្ស 4 នាក់ គាស់យកពីកន្លែងដើម។
Bernards និយាយថា កាលពីថ្ងៃទី 27 វិច្ឆិកា គាត់រួមនឹងមិត្តចំនួន 3 នាក់ បានបើករថយន្តរយៈពេល 6 ម៉ោង ពីរដ្ឋ Colorado ទៅកាន់រដ្ឋ Utah ដើម្បីពិនិត្យមើលបង្គោលលោហធាតុនេះ។ ក្រោយពីទៅដល់ទីតាំងនៅវេលាម៉ោងជិត 21 យប់ និងបានថតរូបរួចរាល់ ក៏ស្រាប់តែមានបុរសមួយក្រុមបង្ហាញខ្លួន។
មនុស្សម្នាក់ក្នុងក្រុមនោះ បានស្នើឱ្យថតរូប មុននឹងពួកគេចាប់ផ្ដើមរុញច្រានបង្គោលទៅមកដើម្បីលើកវាចេញពីដី។ ក្រោយរយៈពេលប្រហែល 10-15នាទី បង្គោលនេះក៏រលំ បង្កើតបានជាសំឡេងមួយយ៉ាងធំ។ ក្រុមមនុស្សនេះ បន្ទាប់មកក៏បានដោះបំបែកបង្គោលនេះជាបំណែក និងដាក់វាឡើងរទេះមួយ រួចបរចេញទៅ។
«នៅពេលក្រុមមនុស្សនេះបាននាំយកបង្គោលនេះចេញទៅ សមាជិកខ្លះរបស់ពួកគេបានរំឭកថា មិនត្រូវទុកដានអ្វីនៅទីនេះទេ» Bernards រៀបរាប់ដូច្នេះ។
ទិដ្ឋភាពបង្គោលលោហធាតុ មុន និងក្រោយការលួចគាស់
Bernards មិនហ៊ានប្រើប្រាស់កាមេរ៉ាធំដើម្បីថតរូបពួកនេះទេ ដោយសារខ្លាចពួកនេះមានអាវុធ។ ប៉ុន្តែ មិត្តម្នាក់របស់ Berbards គឺ Michael James Newlands ថតបានរូបភាពមួយចំនួនដោយប្រើទូរស័ព្ទដៃ។
Bernards ជឿថា ក្រុមមនុស្ស 4 នាក់ខាងលើនេះ មិនមែនជាអ្នកដែលបានកប់បង្គោលអាថ៌កំបាំងនេះទេ ហើយពួកគេលួចយកវាទៅក៏ព្រោះតែមើលឃើញថា វា «ទើសភ្នែក និងប៉ះពាល់ដល់សោភ័ណភាព» នៅទីនេះ។ ព្រោះថា ចាប់តាំងពីបានប្រទះឃើញបង្គោលនេះ មានរថយន្តរាប់សិបគ្រឿង និងមនុស្សជាច្រើនមកកាន់ទីនេះ។
«នោះគឺជាមូលហេតុដែលមិនគួរទុកសំរាមនៅលើសមុទ្រខ្សាច់» Bernards រៀបរាប់អំពីសម្ដីរបស់សមាជិកម្នាក់នៃក្រុមមនុស្សខាងលើ។
Bernards និយាយថា គាត់និងមិត្តរបស់គាត់ ក៏មិនបានព្យាបាលរារាំងសកម្មភាពរបស់ក្រុមមនុស្សនេះដែរ ព្រោះពួកនេះបានប្ដេជ្ញាយកបង្គោលនេះឱ្យខាងតែបាន។ «យើងមិនដឹងថា ពួកគេជាអ្នកណាទេ ហើយយើងក៏មិនបានធ្វើអ្វីដើម្បីរារាំងពួកគេដែរ។ ពួកគេទៅទីនោះគឺគ្រាន់តែដើម្បីទម្លាក់បង្កោលនេះតែប៉ុណ្ណោះ ហើយវាហាក់ដូចជាភារកិច្ចរបស់ពួកគេអីចឹង»។
គួររំឭកថា ក្រុមបុគ្គលិកនៅអង្គភាពសុវត្ថិភាពសាធារណៈនៃរដ្ឋ Utah (DPS) សហរដ្ឋអាមេរិក កាលពីថ្ងៃទី18វិច្ឆិកា បានប្រើប្រាស់ឧទ្ធម្ភាគចក្រជួយដល់នាយកដ្ឋានការពារធនធានសត្វព្រៃ ដើម្បីរាប់សត្វចៀមស្នែងធំនៅលើសមុទ្រខ្សាច់ភាគអាគ្នេយ៍របស់រដ្ឋនេះ។ ពួកគេស្រាប់តែបានប្រទះឃើញវត្ថុមួយដែលដូចទៅនឹងដុំថ្មអាថ៌កំបាំងដែលមាននៅក្នុងខ្សែភាពយន្តរឿង “2001: A Space Odyssey” ផលិតឆ្នាំ 1968។
កាលពីថ្ងៃទី 27 វិច្ឆិកា នាយកដ្ឋានគ្រប់គ្រងដីធ្លីនៃរដ្ឋ Utah បានប្រកាសថា បង្គោលនេះបានបាត់ខ្លួន និងសង្ស័យថា មានមនុស្សលួចគាស់យកទៅនៅពេលយប់៕
ប្រភព៖ Guardian
December 2, 2020
ប្រទេសថៃ គ្រប់គ្រងទីផ្សារ IPO នៅអាស៊ីអាគ្នេយ៍ ក្នុងឆ្នាំ 2020
ប្រទេសថៃ បច្ចុប្បន្ន កំពុងកាន់កាប់ទីផ្សារបោះផ្សាយមូលបត្រលើកដំបូង (IPO) នៅអាស៊ីអាគ្នេយ៍ នៅពេលដែលប្រទេសនេះគ្រប់គ្រងទុនសរុបឡើងដល់ 60% ក្នុងចំណោមទុនដែលផ្សារហ៊ុននានាប្រមូលបានពីតំបន់នេះ។
ព័ត៌មានខាងលើត្រូវបាន Deloitte ដែលជាក្រុមហ៊ុនសវនកម្មនិងគណនីដ៏ធំមួយ លើកឡើង បន្ទាប់ពីបានធ្វើការស្រាវជ្រាវទៅលើទិន្នាការ IPO (Initial Public Offering/ការបោះផ្សាយលក់មូលបត្រកម្មសិទ្ធិដំបូងនៅផ្សារហ៊ុន) នៅក្នុងទីផ្សារមូលបត្រធំៗចំនួន 6 នៅអាស៊ីអាគ្នេយ៍ ដែលរួមមាន ឥណ្ឌូនេស៊ី ម៉ាឡេស៊ី ហ្វីលីពីន សិង្ហបុរី ថៃ និងវៀតណាម។
គិតត្រឹមពាក់កណ្ដាលខែវិច្ឆិកា ឆ្នាំ 2020 ប្រទេសថៃមានព្រឹត្តិការណ៍ IPO ចំនួន 23 លើក។ ទឹកប្រាក់ដែលប្រមូលបានដោយការធ្វើ IPO នានាក្នុងឆ្នាំនេះ មានចំនួន 3.94 ពាន់លានដុល្លារអាមេរិក ច្រើនជាងឆ្ងាយបើធៀបនឹងឆ្នាំមុន។ ការឈានមុខគេផ្នែក IPO នៅតំបន់អាស៊ីអាគ្នេយ៍នេះ បានកើតឡើងនៅក្នុងគ្រាដែលសេដ្ឋកិច្ចប្រទេសថៃ ទទួលរងផលប៉ះពាល់ធ្ងន់ធ្ងរបំផុតពីវិបត្តិសុខភាពដែលបង្កឡើងដោយ Covid-19។
មូលនិធិរូបិយវត្ថុអន្តរជាតិ (IMF) បានព្យាករថា សេដ្ឋកិច្ចប្រទេសថៃអាចថយចុះ 7.1% ក្នុងឆ្នាំ 2020 ដែលវាគឺជាកម្រិតអាក្រក់ជាងគេបង្អស់លំដាប់ទីពីរនៅតំបន់អាស៊ីអាគ្នេយ៍ បន្ទាប់ពីប្រទេសហ្វីលីពីន៕
ប្រភព៖ CNBC
December 2, 2020
បង្គោលលោហធាតុអាថ៌កំបាំងនៅរូម៉ានី បានបាត់ខ្លួនដែរហើយ! ប្រជាជនក្នុងតំបន់ អះអាងថា មានពន្លឺចម្លែកនៅត្រង់ទីតាំងនៃបង្គោលនោះ
សារព័ត៌មានក្នុងស្រុកបានឱ្យដឹងថា បង្គោលលោហធាតុមិនមានម្ចាស់កម្មសិទ្ធិដែលត្រូវបានគេប្រទះឃើញនៅលើចង្កេះភ្នំមួយនៃប្រទេសរូម៉ានី បានបាត់ខ្លួនយ៉ាងអាថ៌កំបាំងជាទីបំផុតកាលពីថ្ងៃទី 30វិច្ឆិកា។
បង្គោលលោហធាតុដែលមានរាងត្រីកោណ ភ្លឺរលោងនេះ ត្រូវបានប្រទះឃើញកាលពីថ្ងៃទី 26 វិច្ឆិកា នៅក្បែរបន្ទាយ Petrodava Dacian ជាទីតាំងបុរាណមួយនៅក្នុងទីក្រុង Piatra Neamt នៃប្រទេសរូម៉ានី។ យោងតាមស្ថានីយវិទ្យុ Juranl FM មានសាក្សីជាច្រើនបានឃើញ «ពន្លឺដ៏ចម្លែក» ដែលកើតមាននៅតំបន់ដែលគេរកឃើញបង្គោលអាថ៌កំបាំងនោះ។
បង្គោលលោហធាតុដែលមានកម្ពស់ជិត 4 ម៉ែត្រ និងបែរមុខទៅរកភ្នំ Ceahlau ដែលជាអច្ឆរិយវត្ថុធម្មជាតិ 1 ក្នុងចំណោម 7 របស់ប្រទេសរូម៉ានី និងត្រូវបានប្រជាជនហៅថា «ភ្នំទេព»។ អាជ្ញាធររបស់ប្រទេសនេះ មិនទាន់ដឹងថា បង្គោលនេះមានប្រភពពីណានៅឡើយ ធ្វើឱ្យមានពាក្យចចាមអារ៉ាមជាច្រើននិយាយអំពីវា ដោយអ្នកខ្លះបានដាក់សំណួរថា «តើវាជាអ្វីឱ្យពិតប្រាកដ? ហេតុអ្វីបានជាវាអាចបង្ហាញខ្លួននៅទីនោះ?» ឬថា «ហេតុអ្វីបានជាបាត់ខ្លួនភ្លាមៗ បន្ទាប់ពីត្រូវបានប្រទះឃើញ?»។
ទាក់ទងនឹងរឿងចម្លែកនេះដែរ កាលពីថ្ងៃទី 18 វិច្ឆិកា បង្គោលលោហធាតុអាថ៌កំបាំងមួយដែលមានកម្ពស់ប្រហែល 3.6 ម៉ែត្រ ក៏ត្រូវបានប្រទះឃើញនៅក្នុងតំបន់សមុទ្រខ្សាច់នៃរដ្ឋ Utah សហរដ្ឋអាមេរិក ប៉ុន្តែ វាបានបាត់ខ្លួនពីកន្លែងកើតហេតុទៅហើយ។ នាយកដ្ឋានគ្រប់គ្រងដីធ្លីរបស់រដ្ឋ Utah ឱ្យដឹងថា បង្គោលនេះត្រូវបានមនុស្សមួយក្រុមដែលគេមិនទាន់ស្គាល់អត្តសញ្ញាណ បានលួចយកបង្គោលនេះកាលពីយប់ថ្ងៃទី 27 វិច្ឆិការ។
មកដល់បច្ចុប្បន្ន មិនទាន់មានអ្នកណាម្នាក់ចេញមុខមកអះអាងថា ជាម្ចាស់កម្មសិទ្ធិនៃបង្គោលលោហធាតុដ៏អាថ៌កំបាំងនេះនៅឡើយ៕
>បង្គោលលោហធាតុអាថ៌កំបាំងមួយផ្សេងទៀត បង្ហាញខ្លួននៅរូម៉ានី ក្នុងខណៈបង្គោលអាថ៌កំបាំងនៅអាមេរិកបានបាត់ខ្លួន
ប្រភព៖ Fox News
December 2, 2020
ត្រកូលទាំង 5 ដែលមានទ្រព្យសម្បត្តិច្រើនជាងគេបង្អស់នៅក្នុងទ្វីបអាស៊ី
គ្រួសារត្រកូល Ambani បច្ចុប្បន្នមានទ្រព្យ 76ពាន់លានដុល្លារអាមេរិក ច្រើនជាងពីរដងធៀបនឹងត្រកូល Kwok (ហុងកុង) និងបីដងធៀបនឹងត្រកូល Lee (កូរ៉េខាងត្បូង)។
យោងតាមស្ថិតិរបស់សារព័ត៌មានសេដ្ឋកិច្ច Bloomberg បើទោះជា Anil Ambani ទទួលបរាជ័យក្នុងការរកស៊ី និងឥទ្ធិពលរបស់ Covid-19 ប៉ុន្តែត្រកូល Ambani (ឥណ្ឌា) នៅតែរកបានប្រាក់ 25ពាន់លានដុល្លារបន្ថែមទៀតបើធៀបនឹងឆ្នាំ2019 ដែលនេះបានជួយឱ្យទ្រព្យសម្បត្តិរបស់គ្រួសារត្រកូល Ambani កើនឡើងដល់ 76 ពាន់លានដុល្លារអាមេរិក។ ហើយប្រការនេះក៏ជួយឱ្យពួកគេបន្តរក្សាបានចំណាត់ថ្នាក់ជាអ្នកមានជាងគេបង្អស់នៅក្នុងទ្វីបអាស៊ីផងដែរ។
ខាងក្រោមនេះគឺជាគ្រួសារទាំង 10 ដែលមានទ្រព្យច្រើនជាងគេបង្អស់នៅទ្វីបអាស៊ី នេះបើយោងតាមស្ថិតិរបស់ Bloomberg ៖
1 គ្រួសារត្រកូល Ambani (លោក Dhirubhai Ambani ឪពុករបស់លោក Mukesh និងលោក Anil គឺជាស្ថាបនិកដំបូងគេនៃក្រុមហ៊ុនរបស់ត្រកូល Ambani)
គ្រួសារត្រកូល Ambani
-ក្រុមហ៊ុន៖ Reliance Industries
-ទីស្នាក់ងារ៖ ឥណ្ឌា
-ជំនាន់ដែលគ្រប់គ្រងក្រុមហ៊ុន៖ 3
-ទ្រព្យ៖ 76 ពាន់លានដុល្លារអាមេរិក
2 គ្រួសារត្រកូល៖ Kwok (លោក Kwok Tak-seng ដែលជាឪពុករបស់លោក Walter, Thomas និង Raymond គឺជាស្ថាបនិករបស់ក្រុមហ៊ុន Sun Hung Kai Properties)
-ក្រុមហ៊ុន៖ Sun Hung Kai Properties
-ទីស្នាក់ងារ៖ ហុងកុង (ប្រទេសចិន)
-ជំនាន់ដែលគ្រប់គ្រងក្រុមហ៊ុន៖ 3
-ទ្រព្យ៖ 33 ពាន់លានដុល្លារអាមេរិក
3. គ្រួសារត្រកូល៖ Chearavanont (Chia Ek Chor មកពីប្រទេសចិន រស់នៅនិងរកស៊ីក្នុងប្រទេសថៃជាមួយបងប្អូនប្រុសម្នាក់ទៀតរបស់គាត់ ហើយក្រោយមកក៏ប្ដូរត្រកូលទៅជា Chearavanont)
-ក្រុមហ៊ុន៖ Charoen Pokphand Group
-ទីស្នាក់ងារ៖ ប្រទេសថៃ
-ជំនាន់ដែលគ្រប់គ្រងក្រុមហ៊ុន៖ 4
-ទ្រព្យ៖ 31.7 ពាន់លានដុល្លារអាមេរិក
4. គ្រួសារត្រកូល៖ Hartono (ឆ្នាំ 1950, Oei Wie Gwan បានទិញក្រុមហ៊ុនផលិតថ្នាំជក់មួយ ហើយក្រោយមកក៏ប្ដូរឈ្មោះក្រុមហ៊ុននេះទៅជា Djarum)
-ក្រុមហ៊ុន៖ Djarum, Bank Central Asia
-ទីស្នាក់ងារ៖ ឥណ្ឌូណេស៊ី
-ជំនាន់ដែលគ្រប់គ្រងក្រុមហ៊ុន៖ 3
-ទ្រព្យ៖ 31.3 ពាន់លានដុល្លារអាមេរិក
5. គ្រួសារត្រកូល៖ Lee (ឆ្នាំ 1938, Lee Byung-chul បង្កើតក្រុមហ៊ុន Samsung ដែលនាំចេញបន្លែផ្លែឈើ និងត្រី។ លោកចាប់ផ្ដើមរកស៊ីក្នុងវិស័យអេឡិចត្រូនិកកាលពីឆ្នាំ 1969 ដោយបង្កើតក្រុមហ៊ុន Samsung Electronics)
-ក្រុមហ៊ុន៖ Samsung
-ទីស្នាក់ងារ៖ កូរ៉េខាងត្បូង
-ជំនាន់ដែលគ្រប់គ្រងក្រុមហ៊ុន៖
-ទ្រព្យ៖ 26.6 ពាន់លានដុល្លារអាមេរិក
ប្រភព៖ Bloomberg
December 1, 2020
Kobu ប្រហែលជាត្រូវ ប្តូរក្លិបទៀតហើយ
Real Madrid មិនសប្បាយចិត្តឡើយ ពេលឃើញស្ថានភាពរបស់កីឡាករ Takefusa Kubo នៅ Villarreal ហើយពួកគេ អាចនឹងស្វែងរកក្លិបថ្មី ឱ្យកីឡាករវ័យក្មេងជម្រើសជាតិជប៉ុន នៅខែមករា ខាងមុខនេះហើយ។
កាសែតអេស្ប៉ាញ Estadio Deportivo’ និយាយថា Real Madrid បានស្នើឱ្យកីឡាករជប៉ុន វ័យ 18ឆ្នាំរូបនេះ ទៅលេងនៅក្លិប Real Betis ក្នុងលក្ខខណ្ឌខ្ចីជើង នៅខែមករាខាងមុខនេះវិញទើបអាចមានឱកាសបានចូលតារាងលេងបានច្រើន។
គួរឱ្យដឹងថា Real Madrid បានទិញកីឡាករជម្រើសជាតិរូបនេះពីក្លិប Yokohama F.Marinos ដើម្បីយកមកដុសខាត់បន្ថែម ឱ្យក្លាយជាកីឡាករលំដាប់ពិភពលោក និងបានដាក់ឱ្យក្លិប Mallorca ខ្ចីជើងកាលពីឆ្នាំ2019 និង Villarreal ខ្ចីជើងនៅឆ្នាំនេះ៕
December 1, 2020
Mike Tyson បានត្រឹមស្មើ Roy Jones ក្នុងការប្រកួតដំបូង ក្រោយពីការចូលនិវត្តន៍
កាលពីវេលាយប់រំលងអធ្រាត្រ ថ្ងៃច័ន្ទ ទី30 ខែវិច្ឆិកា ឆ្នាំ2020 កន្លងទៅ មានការប្រកួតប្រដាល់សកល រវាងកីឡាវ័យវ័យចំណាស់ 1គូ ដែលទទួលបានការចាប់អារម្មណ៍យ៉ាងខ្លាំង ពីសំណាក់អ្នកស្នេហាវិស័យកីឡាប្រដាល់សកល។ ដែលការប្រកួតនោះ គឺជាការប៉ះគ្នារវាង ស្តេចប្រដាល់លំដាប់ពិភពលោក Mike Tyson និងអតីតកីឡាករជើងខ្លាំង Roy Jones Jr។
ក្រោយប្ដូរកណ្ដាប់ដៃគ្នាទៅវិញទៅមក អស់ ៨ទឹកពេញរួចមក ជាលទ្ធផល ពួកគេបានត្រឹមស្មើពិន្ទុគ្នា។ Tyson បាននិយាយថា ការប្រកួតនេះ គឺល្អមើលជាងការវាយដណ្ដើមខ្សែក្រវាត់ទៅទៀត។
ថវិកាដែលរៃអង្គាសបានពីការប្រកួតលើកនេះ គេនឹងយកទៅជួយក្នុងកម្មវិធីសប្បុរសធម៌ផ្សេង៕
December 1, 2020
ស្មាតហ្វូនពិសេស ZTE កាមេរ៉ាមុខ នៅក្រោមអេក្រង់ដំបូងគេ ចេញលក់ហើយ តម្លៃជាង 500ដុល្លារ
ស្មាតហ្វូន របស់ក្រុមហ៊ុន ZTE ម៉ូដែលពិសេស គឺ Axon 20 5G Extreme Edition បានប្រកាសចេញលក់ផ្លូវការហើយ នៅថ្ងៃនេះ(ទី២ ធ្នូ) ក្នុងតម្លៃ 3,495យន់ ប្រហែលជា 532ដុល្លារ តែ មានលក់តែនៅលើទីផ្សារ ស្រុកចិន តែមួយគត់។
ខាងក្រោមនេះ គឺជាលក្ខណៈពិសេសរបស់វា៖ ZTE Axon 20 5G Extreme Edition រចនាឡើងដោយគ្មានសល់គែមបន្តិចសោះ គឺ លាតពេញអេក្រង់ប្រភេទល្អ OLED 90Hz refresh rate កម្រិតបង្ហាញរូបភាព FHD+ ។ សម្រាប់ផ្ទៃខាងមុខ ក្រុមហ៊ុនបានបង្កប់កាមេរ៉ា និងបច្ចេកវិទ្យា ស្គែនខ្ចៅដៃដោះសោ បាត់ឈឹងនៅក្រោមអេក្រង់ជាមួយគ្នាតែម្តង។
ឯផ្ទៃខាងក្រោយ បំពាក់ដោយស្បែកពណ៌លឿងស្រស់ មកជាមួយនឹងកាមេរ៉ា 4គ្រាប់ (64MP+8MP Ultra wide+2MP+2MP Macro លេនស៍ និង Depth sensor) ដែលអាចផលិតរូបភាព និងវីដេអូបានយ៉ាងល្អ។
ម៉ូដែលពិសេសនេះ ដំណើការដោយ Android 10 ប្រើប្រាស់បន្ទះឈីប Snapdragon 756G និងមានជម្រើស RAM12GB មេម៉ូរី 256GB ៕
សូមទស្សនាវីដេអូខាងក្រោម៖
December 1, 2020
ទូរស័ព្ទអេក្រង់បត់ 3តង់ របស់ Samsung អាចនឹងបង្ហាញខ្លួន នៅឆ្នាំ2022
កាលពីពេលថ្មីៗនេះ គេហទំព័រផ្លូវការរបស់ Samsung បានបង្ហោះរូបភាពមួយចំនួន ដែលបង្ហាញឱ្យពី គម្រោងនាពេលអនាគតរបស់ពួកគេ ដែលគ្រោងផលិតទូរស័ព្ទអេក្រង់បត់ ដែលមានទម្រង់បត់ខុសគ្នាពី Galaxy Z Flip និង Galaxy Fold2 ពោលគឺ មានសមត្ថភាពអាចបត់បានជា 3គន្លាក់។
Samsung ក៏មានគម្រោងផលិតឧបករណ៍ ដែលភ្ជាប់មកជាមួយអេក្រង់ អាចរំកិលចេញ-ចូលបានថែមទៀតផង ដែលអាចនឹងដាក់បង្ហាញក្នុងអំឡុងឆ្នាំ2022 ខាងមុខដែរ។
លក្ខណៈបត់បែបនេះ ស្រដៀងនឹងទូរស័ព្ទអេក្រង់បត់ គំរូរបស់ TCL ដែលបានដាក់បង្ហាញកាលពីឆ្នាំកន្លងទៅ។ សូមជម្រាបជូនដែរថា Samsung គឺជាក្រុមហ៊ុនមួយ ក្នុងចំណោមក្រុមហ៊ុនដទៃទៀត ដែលបានបញ្ចេញលក់ទូរស័ព្ទអេក្រង់បត់ នៅលើទីផ្សារជាផ្លូវការ កាលពីឆ្នាំ2019។
Samsung ក៏ត្រូវបានគេស្គាល់ថា ជាក្រុមហ៊ុនដែលបានបញ្ចេញលក់ទូរស័ព្ទអេក្រង់បត់ ច្រើនទម្រង់ជាងគេផងដែរ ដូចជា ទូរស័ព្ទអេក្រង់បត់ Galaxy Z Flip និង Galaxy Z Fold2 នៅក្នុងឆ្នាំ2020 នេះជាដើម៕
December 1, 2020
ថ្ងៃ Black Friday ក្រុមហ៊ុន Samsung បញ្ចុះតម្លៃទូរទស្សន៍ 8K ពី 10ម៉ឺនដុល្លារនៅត្រឹម 5ម៉ឺនដុល្លារ
ក្នុងព្រឹត្តិការណ៍លក់ទំនិញ បញ្ចុះតម្លៃ “Black Friday” នៅសហរដ្ឋអាមេរិក Samsung បានបញ្ចុះតម្លៃ ទូរទស្សន៍ម៉ូដែល Q900 QLED Smart 8K UHD ទំហំ 98អ៊ីញ របស់ខ្លួន រហូតដល់ 50% ដោយចុះពីតម្លៃ 10ម៉ឺនដុល្លារ មកនៅត្រឹម 5ម៉ឺនដុល្លារ។
ចំពោះប្រភេទអេក្រង់ទំហំ 55អ៊ីញ របស់ទូរទស្សន៍ម៉ូដែលនេះដែរ Samsung ក៏បានលក់បញ្ចុះតម្លៃពី 3,500ដុល្លារ មកនៅត្រឹម 2,000ដុល្លារផងដែរ។
ការបញ្ចុះតម្លៃនេះធ្វើឱ្យទូរទស្សន៍របស់ Samsung មានតម្លៃ ធូរថ្លៃជាងទូរទស្សន៍របស់ Sony ដែលជាគូប្រជែង ដោយទូរទស្សន៍ 98អ៊ីញ កម្រិត 8K របស់ Sony កំពុងលក់នៅសហរដ្ឋអាមេរិក ក្នុងតម្លៃ 6ម៉ឺនដុល្លារ៕
សូមទស្សនាវីដេអូ៖
https://www.youtube.com/watch?v=l2Z22LinW_4
December 1, 2020