សង្គម និងសេដ្ឋកិច្ច - La Reine Media

ចាងហ្វាងផលិតកម្ម Galaxy Navatra បរិច្ចាគថវិកាជូន សម្ដេចតេជោ ហ៊ុនសែន ចំនួន1លានដុល្លារដើម្បីទិញវ៉ាក់សាំង

បន្ទាប់ពីសម្តេចនាយករដ្ឋមន្រ្តី ហ៊ុន សែន ប្រកាសពីការត្រៀមថវិកាសម្រាប់ទិញវ៉ាក់សាំង ឧញ៉ាឡេង ណាវ៉ាត្រា បានប្រកាសភ្លាមៗតាមបណ្តាញសង្គមរបស់លោកផងដែរ ក្នុងការត្រៀមបរិច្ចាគថវិកាជូនប្រមុខរាជរដ្ឋាភិបាលផងដែរ។

ឧញ៉ាឡេង ណាវ៉ាត្រា បានសរសេរលើបណ្តាញសង្គមរបស់លោកថា៖ «ខ្ញុំបាទ និងក្រុមគ្រួសារត្រៀមបរិច្ចាគថវិកាជូន សម្ដេចតេជោហ៊ុនសែនចំនួន1លានដុល្លារ ដើម្បីទិញវ៉ាក់សាំងចាក់ជូនប្រជាជនងាយរងគ្រោះ។ សូមឱ្យប្រទេសយើងឆ្លងផុតនៅទុក្ខលំបាកនេះ»។ យ៉ាងណាមិញ Facebook Page Galaxy Navatra ក៏បានបង្ហោះសារដែរថា «ក្នុងនាមយើងខ្ញុំជាបុគ្គលិកគ្រប់ជាន់ថ្នាក់របស់ផលិតកម្ម Galaxy Navatra ពិតជាមានចិត្តរំភើបខ្លាំងណាស់នូវទឹកចិត្តរបស់លោកអគ្គនាយកក្រុមហ៊ុន ឧកញ៉ា ឡេង ណាវ៉ាត្រា ដែលបរិច្ចាគថវិកា១លានដុល្លា ជូនសម្ដេចតេជោ ហ៊ុន សែន ដើម្បីទិញវ៉ាក់សាំងចាក់ជូនប្រជាជនបង្ការជំងឺកូវីដ១៩។🙏🙏🙏ក្នុងនាមជាបុគ្គលិកគ្រប់ជាន់ថ្នាក់របស់ផលិតកម្ម Galaxy Navatra សូមជូនពរលោកឧកញ៉ា និងលោកជំទាវ ព្រមទាំងកូនៗសូមជួបតែសេចក្តីសុខសុភមង្គល ជោគជ័យគ្រប់មុខជំនួញ ជាពិសេសមានសុខភាពល្អ🙏🙏🙏»។

សូមជម្រាបដែរថា ក្នុងអំឡុងពេលដែលប្រទេសកម្ពុជាជួបគ្រោះទឹកជំនន់កាលពីប៉ុន្មានខែកន្លងមកនេះ ឧញ៉ាឡេង ណាវ៉ាត្រាបានផ្តល់ថវិកាជួយដល់រាជរដ្ឋាភិបាលច្រើនជាងគេគឺរហូតដល់60ម៉ឺនដុល្លារ៕

December 7, 2020

ភិន សុដាលីស បង្ហាញភាពផ្អែមល្ហែមថ្មីនៅឆ្នេរសមុទ្រ បន្ទាប់ពីឯកាយូរឆ្នាំ

ថ្វីដ្បិតតែរស់មានឈ្មោះជាស្រីមេម៉ាយកូន១ពិតមែន តែអាចនិយាយបានថា ភិន សុដាលីស មានឈ្មោះហៅក្រៅ Katy មានភាពអត់ធ្មត់ អាចចិញ្ចឹមកូនតែម្នាក់ឯងដោយគ្មានស្វាមីតស៊ូហែលឆ្លងឧបសគ្គ មកទល់ពេលនេះកូនស្រីដ៏គួរឱ្យស្រឡាញ់របស់នាង មានវ័យ៤ឆ្នាំហើយ។

តារាស្រីរូបនេះបានទុកបេះដូងឱ្យទំនេរ អស់រយៈពេលជាច្រើនឆ្នាំ បន្ទាប់ពីបែកបាក់ស្នេហាជាមួយលោក ប៉ែន ចំរុង។ ក៏ប៉ុន្តែនៅពេលថ្មីៗនេះ សុដាលីស បានបង្ហាញរូបភាពផ្អែមល្ហែមជាមួយបុរសម្នាក់ នៅលើទឹកដីឆ្នេរសមុទ្របាក់ក្លងនាខេត្តកោះកុង ដោយអមដោយ Caption យ៉ាងខ្លីថា blessed (ពរជ័យ) ។ យ៉ាងណាមិញ រូបភាពដ៏មានអត្ថន័យបង្ហាញពីភាពផ្អែមល្ហែមសម្រាប់គូស្នេហ៍នេះ បានធ្វើឱ្យអ្នកគាំទ្រ និងមិត្តរួមសិល្បៈ ចូលរួមអមអរសាទរចំពោះនាង ព្រោះនៅទីបំផុតនាងបានរកឃើញសុភមង្គលថ្មី និងអាចស្អំបេះដូងមិនឱ្យឯកាទៀតហើយ។

គួរឱ្យដឹងថែមទៀតថា ឯបុរសដែលអាចធ្វើឱ្យបេះដូងនាងកក្រើកជាថ្មី សុដាលីស មិនទាន់បើកបង្ហាញជាផ្លូវការថាជាអ្នកណានោះទេ ប្រហែលមានអ្វីពិសេសសម្រាប់អ្នកគាំទ្រហើយមើលទៅ ពោលគឺមានតែរង់ចាំដំណឹងល្អឆាប់ៗ៕

December 7, 2020

អ្នកនិពន្ធល្បីឈ្មោះ សុខ ជំនោរ ទម្លាយ១០ចំណុចបង្កើតគំនិតនិពន្ធចម្រៀងបានយ៉ាងល្អ

បន្ទាប់ដកខ្លួនចេញពីផលិតកម្មធំជាងគេនៅក្នុងស្រុក ថ្មីៗនេះស្រាប់តែ អ្នកនិពន្ធល្បីឈ្មោះលោក សុខ ជំនោរ ចេញមុខប្រាប់ពី១០ចំណុចក្នុងកាសរសេរទំនុកចម្រៀងឱ្យបានល្អ។ បច្ចុប្បន្ននេះ បទចម្រៀងពីរោះឬមិនពីរោះគឺមានការវាយតម្លៃខុសគ្នា គឺខុសពីប្រហែល៥ ឆ្នាំមុន តើអ្នកនិពន្ធរូបនេះបានចែករំលែកបទពិសោធអ្វីខ្លះ?

ជាការពិតណាស់អ្នកនិពន្ធល្បីឈ្មោះរូបនេះបាននិយាយរៀបរាប់ឱ្យដឹងពិស្ដារថាក្នុងវីដេអូ «សុខ ជំនោរ » ១០ចំណុច បង្កើតគំនិតនិពន្ធចម្រៀងរួមមាន ៖
1-ភាពយន្ដ ចម្រៀង និងការមើលទូរទស្សន៍
2-ស្ដាប់ការជជែកគ្នា
3-មើលលើការផុតលើបណ្ដាញសង្គម ( News Feed)
4-មើលចំណងជើងសៀវភៅ ភាពយន្ដ និងកម្មវិធីនានា
5-មើលចំណងធំលើទំព័រកាសែត
6-គតិ Quote
7-ស្ដាប់ការចង់បានរបស់អ្នកបញ្ជាទិញ
8-បរិយាកាសជុំវិញខ្លួន
9-មើលលើអ្នកចម្រៀង / ស្ដាប់បទចម្រៀង
10-បទពិសោធន៍ អារម្មណ៍ មនោសញ្ចេតនា

គួរបញ្ជាក់ថា ទាំង១០ចំណុចនេះ ជាបទពិសោធន៍ក្រោយពីសំងំមមាញឹកក្នុងអាជីពការងារជាអ្នកនិពន្ធប៉ុន្មានឆ្នាំមកនេះ ។ សព្វថ្ងៃលោកបានបង្ហាញមុខជាអ្នកនិពន្ធ និងដឹកនាំសម្ដែងនៅក្នុងផលិតកម្ម Davitra Media ដែលបទចម្រៀងលេចធ្លោជាងគេគឺបទ« ម្អមក្រៀម» បានបង្កប់សាច់រឿងយ៉ាងជក់ចិត្ត។

តោះមកមើលវីដេអូ ១០ចំណុច បង្កើតគំនិតនិពន្ធចម្រៀងរបស់ សុខ ជំនោរ ខាងក្រោមនេះ៖

December 7, 2020

មាស សុខសោភា មិនប្រកាន់ខឹងពាក្យរិះគន់ ថែមទាំងនិយាយបែបនេះថា…

នារីម្នាក់ ប្រើប្រាស់គណនីទីកតុកឈ្មោះ«ស្រីមុច» បានលើកឡើងថា តារាចម្រៀងមាស សុខសោភា ឈ្លើយណាស់ ឫកណាស់ រើសអាងណាស់ ខំទៅរាក់ទាក់សុំថតរូបជាមួយ គេឆ្លើយវិញយ៉ាងសោះអង្គើយ ហើយថែមទាំងដើរកន្លងម្ហូបអាហារខ្លួនទៀត។ ម្ចាស់គណនីទីកតុកខាងលើ បានលើកឡើងបែបនេះ នៅតាមការបង្ហោះវីដេអូរបស់ខ្លួនជាបន្តបន្ទាប់នៅថ្ងៃទី៣ ខែធ្នូ ឆ្នាំ២០២០នេះ ក្រោយពីបានជួបតារាចម្រៀងមាស សុខសោភាដោយផ្ទាល់នៅភ្នំគូលែននោះ។

នារីម្នាក់នេះ បាននិយាយរៀបរាប់ក្នុងវីដេអូបង្ហោះនៅលើទីកតុកបែបនេះថា «ចង់និយាយពីតារាមាស សុខសោភា ជួបផ្ទាល់នៅភ្នំគូលែន ឈ្លើយណាស់ ហើយឫកណាស់ រើសអើងណាស់។ ខ្ញុំស្គាល់ច្បាស់ជាងគេឈ្មោះមាស សុខសោភា គឺមិនច្រឡំទេ។ រាក់ទាក់គេ សុំគេថតជាមួយ គេឆ្លើយមកសោះអង្គើយ គេថា គេថតមិនបានទេ។ គ្នាគេ៣នាក់ ម្នាក់កាន់កាមេរ៉ាថតប្រុសមិនប្រុស ស្រីមិនស្រី គេឆ្លើយមកថាមិនបានទេៗ មិនបានក៏អត់បញ្ហាអរគុណ ចាស អរគុណ អត់បានក៏អត់អី ស្រាប់តែអត់អីឯណា មកដណ្ដើមកន្លែងយើងលេង កន្លងម្ហូបអាហារយើងញុំា ចង់កៀរយើងទម្លាក់ទឹកទៀត នេះមីក្រមាប់ ពាក់អាវពណ៌ខ្មៅ អត់គោរពទេ មីមនុស្សអស់អញ្ចឹង អត់គោរពទេ ហើយវាមីទៅល្អជាង ហ្នឹងហើយ ពួកវា មិនបាច់សមរម្យជាមួយពួកវាទេ តារាបែបហ្នឹងខ្ញុំមិនគាំទ្រទេ»។ នៅពេលមានការសួរថាតើ«អូនភាពពិតឬអត់នឹង» ម្ចាស់គណនីទីកតុកខាងលើ បានឆ្លើយតបតាមវីដេអូទៀតថា «ចាស់សូមឆ្លើយតបខំមិនបងឬក៏ប្អូនទេ ខ្ញុំសូមហៅបងហើយ ហ្នឹងហើយរឿងនេះជារឿងពិត ខ្ញុំហ៊ានិយាយ គឺហ៊ានការពិត បើសិនជាមិនពិតទេ ខ្ញុំនឹងមិនហ៊ាននិយាយជាដាច់ខាតឡើយ ចាស់អត់ហ៊ាននិយាយទេ ចាស ឬមួយក៏បងប្អូនមួយចំនួនគិតថាខ្ញុំនិយាយនេះ បំភ្លៃគេ ចោទគេ ដើម្បីតែចង់បានបេះដូងឬចង់ល្បី ស្រេចតែបងប្អូនគិត សំខាន់គឺខ្ញុំនិយាយការពិត ខ្ញុំមិនខ្លាចទេហើយឲ្យអ្នកនឹងមកជួបខ្ញុំផ្ទាល់ក៏បាន ជួបគ្នាផ្ទាល់បាន៣នាក់ហ្នឹង ទង្វើគេធ្វើដាក់ខ្ញុំអត់មានកាមេរ៉ាថត ដោយសារនៅលើភ្នំ កន្លែងទីកម្សាន្តព្រៃភ្នំ ទឹកជ្រះ មិនអាចទៅដាក់កាមេរ៉ាអីដូចនៅទីក្រុងទេ ចឹងវាអត់មានកាមេរ៉ាសុវត្ថិ ប៉ុន្តែ ជាក់ស្ដែងប្អូនស្រី៣នាក់ ដែលនាំ៣នាក់ហ្នឹងមកលេងក្រោយខ្ញុំ គេទាំងអាណិតខ្ញុំ យកចិត្តទុកដាក់ខ្ញុំ ចង់ជួយកាន់កាមេរ៉ាឱ្យខ្ញុំ ឃើញគេធ្វើចឹងដាក់ខ្ញុំ អាណិតខ្ញុំ ស្រឡាញ់ខ្ញុំ…»។

ក្រោយពីមានការលើកឡើងបែបនេះ គេមិនឃើញតារាចម្រៀងមាស សុខ សោភា ធ្វើការឆ្លើយតបភ្លាមៗនោះទេ ប៉ុន្តែមានអ្នកគាំទ្រតារាចម្រៀងរូបនេះ ចេញមកការពារអាយដលរបស់ពួកគេ ជាមួយនឹងការលើកទឹកចិត្តតារាចម្រៀងមាស សុខសោភា ជាច្រើនផងដែរ។ ពេលមានការលើកទឹកចិត្តបែបនេះនោះ នៅថ្ងៃទី៦ ខែធ្នូ ឆ្នាំ២០២០ តារាចម្រៀងមាស សុខសោភា បានបង្ហោះរូបថតខ្លួនមួយសន្លឹក អមដោយសារឆ្លើយតបទៅកាន់អ្នកគាំទ្រខ្លួនថា «នាងខ្ញុំសូមអរគុណទៅដល់ពុកម៉ែបងប្អូន ក៏ដូចជាអ្នកគាំទ្រនាងខ្ញុំនិងបងប្អូនមិត្តសិល្បករទាំងអស់គ្នាទាំងក្នុងនិងក្រៅប្រទេស សម្រាប់ការផ្ញើសារបញ្ចេញជាមតិផ្ដល់កម្លាំងចិត្ត និងស្រលាញ់នៅអ្វីដែលនាងខ្ញុំមានហើយគាំទ្រនាងខ្ញុំតាំងពីដើមរហូតមក»៕

December 7, 2020

CEO ដែលមានប្រាក់ខែខ្ពស់ជាងគេលំដាប់ទី 5 ក្នុងពិភពលោក៖ គ្រប់គ្រងទំព័រពាណិជ្ជកម្មសម្រាប់សត្វសំណព្វ ដែលមានតម្លៃ 30ពាន់លាន ទទួលបានប្រាក់រង្វាន់រាប់លានដុល្លារ

នៅពេលដែល Chewy ត្រូវបានដាក់ចូលផ្សារហ៊ុនដំបូង (IPO) CEO Singh ទទួលបានរង្វាន់ជាមូលបត្រដែលមានតម្លៃដល់ទៅ 139លានដុល្លារអាមេរិក ហើយបើគិតមកដល់ការជួញដូរមូលបត្រក្នុងថ្ងៃទី 16វិច្ឆិកា 2020 រង្វាន់ជាមូលបត្រនេះមានតម្លៃឡើងដល់ 256លានដុល្លារអាមេរិក។

នៅក្នុងបញ្ជីឈ្មោះដែលនិយាយអំពីនាយកប្រតិបត្តិដែលទទួលបានប្រាក់ខែខ្ពស់បំផុតរបស់ Bloomberg គេឃើញថា មហាសេដ្ឋី Elon Musk ឈរនៅលើលំដាប់ទីមួយ ជាមួយនឹងក្រុមហ៊ុន Tesla។ បៀវត្សរ៍ឆ្នាំ 2019 របស់អ្នកជំនួញរូបនេះ បានកើនដល់ 600លានដុល្លារ។ ឈរលំដាប់ទីពីរគឺ Tim Cook របស់ក្រុមហ៊ុន Apple ដោយទទួលបានបៀវត្សរ៍ 134លានដុល្លារក្នុង 1ឆ្នាំ។ បន្ទាប់មកគឺ CEO របស់ Intel, Alphabet (Google) ឬ Blackstone។

ក៏ប៉ុន្តែ ប្រការដែលគួរឱ្យភ្ញាក់ផ្អើល នោះគឺ Sumit Singh ដែលជា CEO របស់ក្រុមហ៊ុនលក់សម្ភារសម្រាប់សត្វសំណព្វ Chewy ដោយទទួលបានប្រាក់បៀវត្សរ៍ 108.2លានដុល្លារអាមេរិក។ គិតត្រឹមខែកុម្ភៈ ឆ្នាំ2020 Chewy បានលក់សម្ភារសម្រាប់សត្វសំណព្វទៅឱ្យអតិថិជនចំនួន 13.5លាននាក់ កើន 27% ធៀបនឹងដំណាក់កាលដូចគ្នាកាលពីឆ្នាំមុន។ ប្រាក់ចំណូលរបស់ក្រុមហ៊ុនក៏បានកើន 37% ឡើងដល់ 4.9ពាន់លានដុល្លារ។

របាយការណ៍របស់សមាគមអ្នកធ្វើជំនួញជាមួយសត្វសំណព្វសហរដ្ឋអាមេរិក (APPA) បានឱ្យដឹងថា 2/3 នៃចំនួនគ្រួសារសរុបរបស់ប្រទេសនេះ មានសត្វចិញ្ចឹមសំណព្វ ហើយពួកគេនឹងចំណាយយ៉ាងតិច 99ពាន់លានដុល្លារដើម្បីថែទាំសត្វចិញ្ចឹមទាំងនោះនៅក្នុងមួយឆ្នាំៗ ដែលជាតួលេខមួយមិនគួរឱ្យជឿ។

ចាប់តាំងពី Covid-19 បានបង្ហាញខ្លួន តម្រូវការនៃការទិញសម្ភារទូទៅតាមអនឡាយ ក្នុងនោះមានសម្ភារសម្រាប់សត្វចិញ្ចឹមជាដើម បានកើនឡើងយ៉ាងឆាប់រហ័ស។ ប្រការនេះបានជួយឱ្យផ្សារអេឡិចត្រូនិកដូចជា Chewy ទទួលបានផលប្រយោជន៍ច្រើន។ ក្នុងអំឡុងចាប់ពីខែកុម្ភៈ ដល់ខែកក្កដា ឆ្នាំ2020 Chewy រកបានអតិថិជនថ្មីច្រើនជាងឆ្នាំ2019។ តម្លៃមូលបត្ររបស់ក្រុមហ៊ុននេះក៏បានកើនពី 30ដុល្លារនៅដើមឆ្នាំ ឡើងដល់ 72ដុល្លារ/ហ៊ុន នៅក្នុងខែតុលា ឆ្នាំ2020។ តម្លៃទីផ្សាររបស់ក្រុមហ៊ុន Chewy ក៏បានកើនដល់ជិត 30ពាន់លាន
zដុល្លារអាមេរិក។

ចំណុចខ្លាំងរបស់ Chewy

រាល់ពេលដែលមានការហៅទូរស័ព្ទមកសុំការប្រឹក្សាយោបល់ គឺសុទ្ធតែមានបុគ្គលិកចាំទទួល ដោយរង់ចាំមិនដល់ 6វិនាទី ខណៈសំបុត្រអេឡិចត្រូនិក (email) ក៏ត្រូវបានឆ្លើយតបក្នុងរង្វង់1ម៉ោង។ ផលិតផលដែលមានកំហុស ក៏សុទ្ធតែត្រូវបានប្ដូរជំនួស ឬទទួលត្រលប់មកវិញដោយមិនមានការសួរនាំច្រើន ឬការតម្រូវឱ្យអតិថិជនបង់ប្រាក់អ្វីមួយឡើយ។

ជាងនេះ សត្វសំណព្វរបស់អតិថិជន នឹងទទួលបានសំបុត្រជូនពរថ្ងៃកំណើត និងកម្រងផ្កាពេលលាចាកលោកទៀតផង។ អតិថិជនខ្លះថែមទាំងទទួលបានរូបគំនូរពេញលេញរបស់សត្វសំណព្វរបស់ខ្លួនប្រកបដោយការភ្ញាក់ផ្អើលពីក្រុមហ៊ុន Chewy ផងដែរ។

ដើមឆ្នាំ 2012 ប្រាក់ចំណូលប្រចាំខែរបស់ Chewy បានត្រឹមតែ 1លានដុល្លារប៉ុណ្ណោះ ប៉ុន្តែតួលេខនេះបានកើនដល់ជាង 10លានដុល្លារ នៅក្នុងរយៈពេល 2ឆ្នាំបន្ទាប់។

Chewy បន្តខ្ចីប្រាក់ដើម្បីពង្រីកសកម្មភាពពាណិជ្ជកម្មរបស់ខ្លួន ហើយយុទ្ធសាស្ត្ររបស់ពួកគេ នោះគឺ ពង្រីកឥទ្ធិពលកាន់តែធំ កាន់តែល្អ ដើម្បីទប់ទល់នឹង Amazon។ ឆ្នាំ 2016 ប្រាក់ចំណូលរបស់ Chewy កើនដល់ 900លានដុល្លារ។ ឆ្នាំ 2017 ក្រុមហ៊ុននេះ មានបុគ្គលិកដល់ទៅ 10,000នាក់។

មហិច្ឆតាធំរបស់ CEO Singh

ពេលចូលធ្វើការឱ្យ Chewy កាលពីឆ្នាំ 2017 CEO Singh គឺជាមនុស្សម្នាក់ដែលមិនទាន់បានយល់ដឹងអ្វីសោះអំពីពាណិជ្ជកម្មរបស់ Chewy ព្រោះថា លោករៀនផ្នែកបច្ចេកវិទ្យា និងធ្វើការឱ្យក្រុមហ៊ុន Dell និង Amazon អស់រយៈពេល 10ឆ្នាំ។ ប៉ុន្តែ ក្រុមប្រឹក្សាភិបាលរបស់ Chewy នៅតែសម្រេចទទួលយក Singh មកកាន់តំណែងជាអ្នកគ្រប់គ្រង។

ភ្លាមនោះ CEO Singh ក៏ប្រញាប់កែលម្អបណ្ដាញផ្គត់ផ្គង់ ប្រព័ន្ធដំណោះស្រាយ ក៏ដូចជាការសម្រួលរូមន្តពាណិជ្ជកម្មរបស់ Chewy។ ផលិតផលរបស់ក្រុមហ៊ុន បានកើនឡើងដល់ 67,000ប្រភេទ។ លោក Singh ក៏បានជំទាស់ទៅនឹងការយកតម្រាបតាម Amazon នៅពេលពង្រីកវិសាលភាពរបស់ខ្លួនតាមតែចិត្ត។ ជំនួសមកវិញ លោកបានដាក់ចេញនូវផែនការជាក់លាក់ជាងមុន។

ជាមួយនឹងបទពិសោធន៍របស់ខ្លួន លោក Singh បានស្នើឱ្យបុគ្គលិកធ្វើបទបង្ហាញដោយផ្ទាល់មាត់នូវគំនិត និងលទ្ធផលនៃការបំពេញការងាររបស់ខ្លួន ជំនួសឱ្យរបាយការណ៍នៅលើ Power Point។ ជំនួសឱ្យការពង្រីកសាខា CEO Singh បានផ្ដោតទៅលើមជ្ឈមណ្ឌលដោះស្រាយទិន្នន័យ និងប្រើប្រាស់បច្ចេកវិទ្យាសម្រាប់ការទទួលការបញ្ជាទិញ ការចែកចាយ រួមនឹងការថែទាំអតិថិជន។

លោក Singh តែងតែកោះប្រជុំ និងស្នើឱ្យមានការជជែកតតាំងគ្នាដោយមិនប្រកាន់ឋានៈ ដើម្បីទទួលមតិពីបុគ្គលិកគ្រប់ជាន់ថ្នាក់។ Singh ក៏បានបញ្ជូនថាមពលថ្មីដល់ក្រុមបុគ្គលិករបស់ខ្លួន នៅពេលដែលលោកចង់ប្រែក្លាយ Chewy ពីគេហទំព័រលក់សត្វសំណព្វទៅជាក្រុមហ៊ុនយក្សដែលមានទុនរាប់ពាន់លានដុល្លារ។

អតីតប្រធានផ្នែកទីផ្សារ Andrea Wolfe របស់ Chewy បានឱ្យដឹងថា៖ «យើងទាំងអស់គ្នាសុទ្ធតែដឹងថា ខ្លួនគ្រាន់តែលក់សម្ភារសម្រាប់សត្វចិញ្ចឹមប៉ុណ្ណោះ ប៉ុន្តែ CEO Singh បានធ្វើឱ្យគ្រប់គ្នាដឹងខ្លួនថា កំពុងតែបង្កើតនូវអ្វីដែលធំធេងជាងនេះ និងខុសប្លែកសម្រាប់ជីវិតរបស់សត្វសំណព្វ ក៏ដូចជាម្ចាស់របស់ពួកវា»។

នៅពេលដែល Chewy ត្រូវបានដាក់ចូលផ្សារហ៊ុនដំបូង (IPO) CEO Singh ទទួលបានរង្វាន់ជាមូលបត្រដែលមានតម្លៃដល់ទៅ 139លានដុល្លារអាមេរិក ហើយបើគិតមកដល់ការជួញដូរមូលបត្រក្នុងថ្ងៃទី 16វិច្ឆិកា ឆ្នាំ2020 រង្វាន់ជាមូលបត្រនេះមានតម្លៃឡើងដល់ 256លានដុល្លារអាមេរិក។

តាមការព្យាករ ប្រាក់ចំណូលរបស់ Chewy អាចកើនដល់ 7ពាន់លានដុល្លារអាមេរិកក្នុងឆ្នាំសារពើពន្ធ 2020 កើនជាង 40% ធៀបនឹងឆ្នាំមុន។ ប្រការដែលគួរនិយាយ នោះគឺ ក្រោមការកែលម្អផ្នែកបច្ចេកវិទ្យាក្នុងជំនាន់របស់ CEO Singh ក្រុមហ៊ុន Chewy កាត់បន្ថយការចំណាយបានយ៉ាងច្រើនទៅលើការគ្រប់គ្រង ក៏ដូចជាការធ្វើទីផ្សារ។ ការព្យាករនានាបានបង្ហាញថា ប្រាក់ចំណេញក្នុងឆ្នាំសារពើពន្ធ2020 របស់ Chewy អាចកើនដល់ 20.4លានដុល្លារអាមេរិក៕

ប្រភព៖ Bloomberg/Businesswire

December 7, 2020

បង្គោលលោហធាតុអាថ៌កំបាំងទីបួន ត្រូវបានប្រទះឃើញនៅអង់គ្លេស

បង្គោលលោហធាតុអាថ៌កំបាំងទីបួន ដែលប្រហាក់ប្រហែលនឹងបណ្ដាបង្គោលលោហធាតុមុនៗ ត្រូវបានប្រជាជនក្នុងតំបន់ប្រទះឃើញនៅលើកោះភាគខាងត្បូងប្រទេសអង់គ្លេស។

Tom Dunford អាយុ 29ឆ្នាំ បានប្រទះឃើញបង្គោលលោហធាតុមួយពេលកំពុងនាំអនាគតភរិយា និងប្អូនស្រីដើរលេងតាមឆ្នេរសមុទ្រ Compton នៃកោះ Wight កាលពីព្រឹកថ្ងៃទី 6ធ្នូ។ Dunford និយាយថា៖ «ខ្ញុំបានដឹងអំពីព័ត៌មានទាំងឡាយទាក់ទងនឹងបង្គោលលោហធាតុកាលពីពេលថ្មីៗនេះ ដូច្នេះ ខ្ញុំស្គាល់វាច្បាស់»។

យោងតាម Dunford បង្គោលលោហធាតុនេះ មានមុខបី កម្ពស់ប្រហែល 3ម៉ែត្រ និងមានភ្លឺរលោង ប្រហាក់ប្រហែលនឹងបង្គោលលោហធាតុដែលត្រូវបានប្រទះឃើញនៅសហរដ្ឋអាមេរិក និងរូម៉ានីមុននេះ។

ក្រោយពីដំណឹងខាងលើបានលេចឮ ភ្លាមនោះ ប្រជាជនក្នុងតំបន់ក៏នាំគ្នាទៅកាន់កន្លែងកើតហេតុដើម្បីបានឃើញផ្ទាល់នឹងភ្នែក។

Dunford និយាយថា៖ «អ្នកដែលបានដាក់បង្គោលលោហធាតុនៅទីនោះ ដឹងថា ពួកគេកំពុងធ្វើអ្វី។ ប្រហែលជាមានអ្នកណាម្នាក់កំពុងតែលេងល្បែងបញ្ឆោតលក្ខណជាក់ស្ដែង»។

បណ្ដាបង្គោលលោហធាតុដ៏អាថ៌កំបាំង បានបង្កឱ្យមានការភ្ញាក់ផ្អើលនៅទូទាំងពិភពលោក ក្រោយពីវាបានបង្ហាញខ្លួនជាលើកដំបូងនៅសមុទ្រខ្សាច់មួយក្នុងរដ្ឋ Utah សហរដ្ឋអាមេរិក និងនៅលើភ្នំមួយក្នុងប្រទេសរូម៉ានី ហើយថ្មីៗនេះទៀត គឺនៅលើកំពូលភ្នំមួយក្នុងរដ្ឋ California សហរដ្ឋអាមេរិក។

ការបង្ហាញខ្លួនរបស់ពួកវា (បង្គោលលោហធាតុ) នាំឱ្យមានពាក្យចចាមអារ៉ាមជាច្រើនអំពីប្រភពរបស់វា ក្នុងនោះមានអ្នកខ្លះជឿថា វាអាចជាឧបករណ៍វិទ្យាសាស្ត្ររបស់មនុស្សពិភពផ្កាយដទៃ ខណៈដែលអ្នកខ្លះថា ជាការលេងសើច ឬជាស្នាដៃសិល្បៈរបស់មនុស្សមួយក្រុម។ល។

>បង្គោលលោហធាតុអាថ៌កំបាំងនៅរូម៉ានី បានបាត់ខ្លួនដែរហើយ! ប្រជាជនក្នុងតំបន់ អះអាងថា មានពន្លឺចម្លែកនៅត្រង់ទីតាំងនៃបង្គោលនោះ

>ប្រទះឃើញបង្គោលលោហធាតុចម្លែកនៅកណ្ដាលសមុទ្រខ្សាច់! អាជ្ញាធរថា “ទោះអ្នកដាំមកពីពិភពផ្កាយក៏ដោយ វាជារឿងខុសច្បាប់ បើសិនជាធ្វើឡើងនៅទីសាធារណៈ”

ប្រភព៖ NY Post

December 7, 2020

SpaceX បាញ់បង្ហោះយានដឹកទំនិញជិត 3,000គីឡូក្រាមឡើងទៅកាន់ ISS

រ៉ុកកែតពីរជាន់ Falcon 9 ដែលមានភ្ជាប់យានអវកាស Dragon បានហោះឡើងពីមជ្ឈមណ្ឌលអវកាស Kennedy រដ្ឋ Florida នៃសហរដ្ឋអាមេរិក នៅវេលាម៉ោង 11និង17នាទី ថ្ងៃទី 6ធ្នូ ឆ្នាំ2020។

ក្រុមហ៊ុន SpaceX ធ្វើការដឹកជញ្ជូនទំនិញឱ្យទីភ្នាក់ងារអវកាសអាមេរិក (NASA) លើកទី 21 ដោយជោគជ័យ។ នេះគឺជាការបាញ់បង្ហោះលើកទី 24 របស់ SpaceX នៅក្នុងឆ្នាំនេះ ហើយវាក៏ជាការបាញ់បង្ហោះលើកទី 101 របស់រ៉ុកកែត Falcon 9 ផងដែរ។ បញ្ហាអាកាសធាតុបានបណ្ដាលឱ្យក្រុមហ៊ុននេះត្រូវពន្យារពេលបាញ់បង្ហោះមួយថ្ងៃធៀបនឹងកាលបរិច្ឆេទដំបូង។

ប្រហែលជា 9នាទីបន្ទាប់ពីបានបាញ់បង្ហោះ ជាន់ទីមួយរបស់រ៉ុកកែត Falcon 9 ដែលមានឈ្មោះថា B1058 បានត្រលប់មកកាន់ផែនដី និងចុះចតនៅលើស្រឡាង “Of Course I Still Love You” របស់ SpaceX ដែលស្ថិតនៅលើមហាសមុទ្រអាត្លង់ទិក។ ដូច្នេះ B1058 ត្រូវបានប្រើប្រាស់ជាលើកទី4 ដោយសុវត្ថិភាព។ មុននេះ B1058 ក៏ធ្លាប់ចូលរួមក្នុងបេសកកម្ម Demo-2 ដែលនាំយកអវកាសចរ 2រូប ឡើងទៅកាន់ស្ថានីយអវកាសអន្តរជាតិ (ISS) ការបាញ់បង្ហោះផ្កាយរណបព័ត៌មានរបស់កងទ័ពកូរ៉េខាងត្បូង និងការបាញ់បង្ហោះផ្កាយរណប Starlink របស់ SpaceX ផងដែរ។

នៅក្នុងភារកិច្ចថ្មីនេះ យាន Dragon បាននាំយកទំនិញ 2,903គីឡូក្រាមទៅកាន់ស្ថានីយ ISS។ ទំនិញទាំងនេះ រួមមាន ឧបករណ៍វិទ្យាសាស្ត្រ និងសម្ភារមួយចំនួនសម្រាប់រដូវបុណ្យណូអែល។

យាន Dragon នឹងតភ្ជាប់ជាមួយស្ថានីយ ISS ក្រោយពីបានបាញ់បង្ហោះជាង 24ម៉ោង។ ខណៈនោះ គឺជាលើកដំបូងហើយដែល ISS នឹងតភ្ជាប់ជាមួយនឹងយានអវកាស Dragon ចំនួន 2 ក្នុងពេលតែមួយ។ ក្រៅពីនេះក៏នៅមាន Crew Dragon Resilience ដែលជាយានដឹកអ្នកអវកាស 4រូប ឡើងទៅកាន់ ISS កាលពីថ្ងៃទី 15វិច្ឆិកា។

នៅពេលត្រលប់មកកាន់ផែនដី យាន Dragon នឹងចុះចតលើស្រឡាងដែលស្ថិតនៅលើមហាសមុទ្រអាត្លង់ទិក ជំនួសឱ្យមហាសមុទ្រប៉ាស៊ីហ្វិក ដែលនេះនឹងជួយកាត់បន្ថយពេលវេលាសម្រាប់ក្រុមការងាររបស់ SpaceX៕

ប្រភព៖ Space

December 7, 2020

Messi រងពិន័យជាទឹកប្រាក់ ក្រោយធ្វើតម្រាប់តាម Maradona

គណៈកម្មការរៀបចំការប្រកួតលីគកំពូលអេស្ប៉ាញ (La Liga) បានចេញវិធានការ ពិន័យទៅលើកីឡាករ Lionel Messi ដោយសារតែបានបង្ហាញ (ផ្សព្វផ្សាយ) ឯកសណ្ឋានក្រុមផ្សេង ដែលមិនមាននៅក្នុងការប្រកួត ដែលនឹងត្រូវរ៉ាប់រងបង់ប្រាក់ចំនួន ៣ពាន់អឺរ៉ូ ចំពោះកំហុសនេះ។

កីឡាករសញ្ជាតិអាហ្សង់ទីនខាងលើ បានដោះអាវក្រុម Barcelona ចេញ ដោយបង្ហាញអាវក្រុម Newell’s Old Boys ដែលជាក្រុមដែលលោក Maradona ប្រកបអាជីពចុងក្រោយជាកីឡាករបាល់ទាត់ ក្រោយពេលដែលរូបគេ បានស៊ុតបញ្ចូលទី កាលពីថ្ងៃទី១ ខែធ្នូ ឆ្នាំ2020 កន្លងទៅនេះ ដើម្បីជាការរំឭកដល់វីរបុរសអាហ្សង់ទីន។

Maradona ដែលបានស្លាប់កាលពីសប្ដាហ៍មុន ក្នុងវ័យ 60ឆ្នាំ ធ្លាប់លេងឱ្យក្រុម Newell’s Old Boys នៅចុងអាជីពរបស់លោក ហើយ Messi ក៏ធ្លាប់ជាយុវជនក្នុងក្រុមនេះដែរ កាលពីគេនៅក្មេង។ Messi ក៏បានធ្វើកាយវិការ ថើបដៃ រួចលើកឡើងទៅលើ ធ្វើដូច Maradona ដែលធ្លាប់ធ្វើពីពេលមុនមដូចគ្នា៕

December 4, 2020

ស្ថាបនិក BioNTech ក្លាយជាមហាសេដ្ឋី បន្ទាប់ពីមូលបត្រកើនឡើង 250%

Sahin បច្ចុប្បន្នគឺជាអ្នកមានជាងគេលំដាប់ទី 493 ក្នុងពិភពលោក ជាមួយនឹងទ្រព្យសរុបចំនួន 5.1ពាន់លានដុល្លារអាមេរិក នេះបើតាមស្ថិតិរបស់ Bloomberg Billionaires Index។

សហស្ថាបនិករបស់ក្រុមហ៊ុន BioNTech ទើបតែមានឈ្មោះនៅក្នុងបញ្ជីមហាសេដ្ឋីទាំង 500នាក់ដែលមានទ្រព្យច្រើនជាងគេក្នុងពិភពលោក ក្រោយពីមុននេះប៉ុន្មានថ្ងៃត្រូវបានរដ្ឋាភិបាលអង់គ្លេសសម្រេចអនុម័តប្រើប្រាស់វ៉ាក់សាំង Covid-19 ដែលក្រុមហ៊ុនអាល្លឺម៉ង់សហការជាមួយក្រុមហ៊ុន Pfizer ក្នុងការអភិវឌ្ឍ។

ចាប់ពីដើមសប្ដាហ៍រហូតដល់ពេលនេះ មូលបត្រ BioNTech បានកើនឡើងជិត 10% និងកើនសរុបជាង 250% រាប់ចាប់ពីដើមឆ្នាំ។ Ugur Sahin បច្ចុប្បន្នគឺជាអ្នកមានជាងគេលំដាប់ទី 493 ក្នុងពិភពលោក ជាមួយនឹងទ្រព្យសរុបចំនួន 5.1ពាន់លានដុល្លារអាមេរិក នេះបើតាមស្ថិតិរបស់ Bloomberg Billionaires Index។

អង់គ្លេសគឺជាប្រទេសដំបូងគេមួយនៅអឺរ៉ុបដែលបានអនុម័តប្រើប្រាស់វ៉ាក់សាំង Covid-19 ដែលជាជំហានដ៏ធំមួយសម្រាប់វ៉ាក់សាំងដែលក្រុមហ៊ុន Pfizer និង BioNTech អះអាងថា មានប្រសិទ្ធភាពរហូតដល់ 95% ក្នុងការទប់ស្កាត់វីរុស Covid-19។ BioNTech កំពុងតែរង់ចាំការសម្រេចពីនាយកដ្ឋានគ្រប់គ្រងឱសថ និងចំណីអាហារអាមេរិក (FDA) និងក្រុមអ្នកគ្រប់គ្រងរបស់សហភាពអឺរ៉ុប។

មុននេះ ក្រុមហ៊ុន BioNTech ផ្ដោតទៅលើតែការព្យាបាលជំងឺមហារីក ប៉ុន្តែចាប់តាំងពីខែមករា Sahin និងភរិយា Ozlem Tureci បានងាកមកផ្ដោតទៅលើ Covid-19 ក្រោយពីបានដឹងអំពីការឆ្លងរាលដាលនៃវីរុសនេះនៅទីក្រុង Wuhan ប្រទេសចិន។ លទ្ធផលនៃការសិក្សាស្រាវជ្រាវរបស់គូស្វាមីភរិយានេះ បានរកឃើញថ្នាំថ្មីមួយប្រភេទដែលពួកគេចំណាយពេលជាច្រើនឆ្នាំដើម្បីតាមរក។

Sahin ដែលជាអ្នកវិទ្យាសាស្ត្រដើមកំណើតទួរគី គឺជាម្ចាស់ភាគហ៊ុនតែមួយគត់នៃក្រុមហ៊ុនមួយរបស់អាល្លឺម៉ង់ដែលកំពុងកាន់កាប់ភាគហ៊ុន 18% របស់ BioNTech។ កាលពីឆ្នាំទៅ BioNTech ប្រមូលទុនបាន 150លានដុល្លារនៅក្នុងការធ្វើ IPO នៅសហរដ្ឋអាមេរិក។

ក្រៅពី Sahin បងប្អូនត្រកូល Struengmann ដែលកំពុងកាន់កាប់ BioNTech ចំនួនពាក់កណ្ដាល ក៏ស្ថិតក្នុងបញ្ជីអ្នកមានជាងគេទាំង 500នាក់នៅក្នុងពិភពលោករបស់ទស្សនាវដ្ដី Bloomberg។ ពួកគេក៏គាំទ្រដល់ក្រុមហ៊ុនបច្ចេកវិទ្យាជីវសាស្ត្រ Ganymed Pharmaceuticals ដែលប្ដីប្រពន្ធ Sahin បានបង្កើតឡើងផងដែរ។

ការប្រជែងគ្នាក្នុងវិស័យវ៉ាក់សាំង Covid-19 ក៏បង្កើតបានមហាសេដ្ឋីមួយចំនួននៅក្នុងក្រុមហ៊ុន Moderna ដែលជាគូប្រជែងធំបំផុតរបស់ BioNTech។ មូលបត្ររបស់ក្រុមហ៊ុន Moderna ដែលមានទីស្នាក់ការកណ្ដាលនៅ Massachusetts សហរដ្ឋអាមេរិកបានកើនឡើងជាង 650% ចាប់តាំងពីដើមឆ្នាំរហូតដល់ពេលនេះ ដែលនេះបានជួយឱ្យក្រុមមនុស្សដែលបានវិនិយោគដំបូងៗ ដូចជាសាស្ត្រាចារ្យ Bob Langer មកពីសាកលវិទ្យាល័យ MIT និងសាស្ត្រាចារ្យ Tim Springer មកពីសាកលវិទ្យាល័យ Harvard រួមនឹង CEO Stephane Bancel ក្លាយជាមហាសេដ្ឋីទៀតផង៕

December 4, 2020

Hazard ចូលលេងឱ្យ Real Madrid 2រដូវកាល គ្រាន់តែរបួស ចង់អស់ 1រដូវកាល

កីឡាករ ជម្រើសជាតិបេលហ្ស៊ិក Eden Michael Hazard បានទទួលរងរបួសសាច់ដុំម្តងទៀតហើយ កាលពីថ្ងៃអង្គារ៏ ទី1 ខែវិច្ឆិកា ឆ្នាំ2020 កន្លងទៅ ដែលនេះ គឺជាការរងរបួសជាលើកទី8 ហើយ គិតត្រឹម រយៈពេល 1ឆ្នាំជាង នៃការផ្ទេរមក Real Madrid នេះ។

ខ្សែបម្រើស្លាប សញ្ជាតិបែលហ្ស៊ិក Eden Hazard ទើបតែមកដល់ក្លិប Real Madrid បានជាង 1ឆ្នាំកន្លះប៉ុណ្ណោះ តែកីឡាកររូបនេះខកខានលេងអស់ 42ប្រកួត (ទិន្នន័យរបស់ Transfermarket) ព្រោះតែការញាំញីដោយរបួស។

គួររំឭកដែរថា កីឡាកររូបនេះ ធ្លាប់រងរបួសជាច្រើនលើកមកហើយ ដូចជា របួសសរសៃពួរជើង (សម្រាក 1ខែជាង), របួសប្រេះឆ្អឺង (សម្រាក 3ខែ), របួសសាច់ដុំ (សម្រាកកន្លះខែ), កូវីដ-១៩ (សម្រាកកន្លះខែ) រួមនឹងរបួសរយៈពេលខ្លីៗជាច្រើនទៀត៕

December 4, 2020

Category: សង្គម និងសេដ្ឋកិច្ច