Category: សង្គម និងសេដ្ឋកិច្ច

Oppo ចេញលក់ផ្លូវការ ម៉ូដែល Reno 5 Pro មាន 5G តម្លៃខ្ទង់ 600ដុល្លារ
បន្ទាប់ពីប្រកាសចេញម៉ូដែល Reno 5 និង Reno 5 Pro កាលពីប៉ុន្មានខែមុនរួចមក ថ្មីៗនេះ ស្រាប់តែក្រុមហ៊ុន Oppo បានប្រកាសបញ្ចេញស្មាតហ្វូនរបស់ខ្លួនមួយម៉ូដែលទៀត គឺ Oppo Reno 5 Pro+ មាន 5G ក្នុងទីផ្សារចិន ដែលបើកឱ្យកម្ម៉ង់ទិញ ចាប់ពីខែមករា ឆ្នាំ2021 និងដាក់លក់នៅពាក់កណ្ដាលខែមករា។
ស្មាតហ្វូនប្រភេទ flagship នេះមានតម្លៃខ្ទង់ 610ដុល្លារ(3999យន់) ជម្រើស RAM 8GB/128GB មេម៉ូរី។ សម្រាប់ជម្រើស RAM 12GB/256GB តម្លៃ 690ដុល្លារ(4499យន់)។ ស្មាតហ្វូនម៉ូដែលថ្មីនេះ មានជម្រើសពណ័តែ2 ប៉ុណ្ណោះគឺ ខ្មៅ និងស។
ការឌីហ្សាញរូបរាង មានភាពទាក់ទាញជាមួយនឹងអេក្រង់កោង ស្ទើរតែគ្មានគែម ទំហំ 6.55អ៊ីញ ប្រភេទ AMOLED display កម្រិត 90Hz refresh rate និងកម្រិតបង្ហាញរូបភាព 1080×2400 px។ មានកាមេរ៉ាមុខ 1គ្រាប់ បង្កប់ក្នុងអេក្រង់តែម្ដង មានទំហំ 32MP មាន Apeture f/2.4 សម្រាប់ថតរូប Selfie និងបង្កប់កាមេរ៉ាស្គែនដៃ ក្រោមអេក្រង់នោះតែម្ដង។
ផ្នែកខាងក្រោយ Oppo បំពាក់កាមេរ៉ា ដល់ទៅ 3គ្រាប់ ដែលសេនស័រលេនស៍ សហការជាមួយក្រុមហ៊ុន SONY គឺសេនស័រថ្មី IMX766 ទំហំ 50MP ។ លេនស៍ទាំង3 នោះ មាន 13MP Telephoto មានApeture f/2.4 មិនមានលេនស៍ Zoom ទេ តែអាចពង្រីកធម្មតាបាន 3x លេនស៍16MP Ultra-wide និង 2MP Macros មានតួនាទីផ្សេងគ្នា។
លក្ខណសម្បត្តិខ្លាំង ផ្នែកខាងក្នុងរបស់វា គឺបំពាក់បន្ទះឈីប Snapdragon 865 SoC គាំទ្របច្ចេកវិទ្យាផ្ទុកទិន្នន័យលឿន UFS 3.1 នៃ RAM 8GB/128GB ឬ 256GB មេម៉ូរី ថាមពលថ្ម 4500Amh បច្ចេកវិទ្យាសាកភ្លើងល្បឿន គឺ OPPO SuperVOOC 2.0 កម្លាំងបញ្ជូន 65W ដំណើការដោយ Android 11 និងស្បែក ColorOS 11 ចេញពីប្រអប់។
លើសពីនេះទៀតម៉ូដែល Limited Editions មួយទៀតរបស់ OPPO ដែលបានសហការជាមួយនឹង Joshua Vides អាចនឹងដាក់លក់ក្នុងតម្លៃប្រហាក់ប្រហែលគ្នានេះដែរ ជាមួយនឹងជម្រើស RAM 12GB/256GB មេម៉ូរី៕
December 28, 2020
Galaxy S21 Ultra នឹងមានបំពាក់ដោយបច្ចេកវិទ្យា Wi-Fi 6E ជាស្មាតហ្វូនដំបូងគេបំផុត
បច្ចេកវិទ្យាថ្មីចុងក្រោយបំផុតមួយគឺ Wi-Fi 6E ដែលជាបច្ចេកវិទ្យា Wi-Fi ជំនាន់ថ្មី ល្បឿនលឿនជាងមុន អាចនឹងត្រូវបានបំពាក់លើស្មាតហ្វូនជំនាន់ក្រោយរបស់ Samsung គឺ Galaxy S21 Ultra។
ទាក់ទងនឹង Wi-Fi 6E នេះដែរ បើផ្អែកតាមឯកសាររបស់គណៈកម្មការសហព័ន្ធទំនាក់ទំនង របស់អាមេរិក ឬហៅកាត់ FCC បានឱ្យដឹងថា Galaxy S21 Ultra នឹងមានបំពាក់ដោយបច្ចេកវិទ្យា Wi-Fi 6E ជាស្មាតហ្វូនដំបូងៗគេ ដែលមានបំពាក់បច្ចេកវិទ្យានេះ។
ចំណុចសំខាន់មួយទៀតនៃ Galaxy S21 Ultra ដែលមាននៅក្នុងឯកសាររបស់ FCC គឺមានបញ្ជាក់ អំពីការគាំទ្រការប្រើប្រាស់ប៊ិច S Pen តែគេនៅតែសន្និដ្ឋានថា ប៊ិច S Pen នេះ នឹងមានលក់ដាច់ដោយឡែក មិនមានមកជាមួយស្មាតហ្វូនឡើយ។
ក្រៅពីបញ្ជាក់អំពីមុខងារ Wi-Fi 6E ហើយ ក៏មានការបញ្ជាក់អំពីមុខងារ UWB, NFC និងអាចសាកថ្មឱ្យឧបករណ៍ផ្សេង ដោយមិនប្រើខ្សែបានផងដែរ។ អ្នកវិភាគដ៏ជំនាញ របស់ស្ថាប័ន Barclays បានឱ្យដឹងថា iPhone ដែលត្រៀមប្រកាសចេញ នាឆ្នាំក្រោយនេះ ត្រូវបានគេរំពឹងថា នឹងបំពាក់បច្ចេកវិទ្យាខាងលើនេះដូចគ្នា៕
December 28, 2020
វិធីរក្សាទុកផ្លែត្រឡាចដែលនៅសល់ពីស្ល
ត្រឡាច គឺជាបន្លែដែលខ្មែរយើងនិយមបរិភោគណាស់ ស្ងោរក៏បាន ឆាក៏បាន និងស្លម្ជូរក៏បាន តែ ពេលយើងទិញ 1ផ្លែមកធ្វើម្ហូប ហើយធ្វើមិនអស់ នៅសល់មួយកំណាត់ ដោយសារតែផ្លែត្រឡាចនោះធំពេក ហើយនៅពេលយើងចង់រក្សាទុកវាឱ្យបានយូរដើម្បីទុកធ្វើម្ហូបនៅពេលក្រោយទៀតដែរ ភាគច្រើនត្រឡាចមួយកំណាត់នោះពេលទុកយូរទៅ ច្រើនតែឡើងរលួយស្អុយខូចអស់ និងទុកមិនសូវបានយូរឡើយ។
បញ្ហានេះសូមបងៗស្ត្រីមេផ្ទះទាំងឡាយកុំបារម្ភអី គ្រាន់តែបងៗយកកំបោរពណ៌ក្រហមដែលយាយៗគាត់ពិសាជាមួយម្លូនោះ មកលាបនៅត្រង់កន្លែងស្នាមពុះនៅលើផ្លែត្រឡាចនោះ ហើយយកទៅរក្សាទុកនៅក្នុងទូទឹកកកក្នុងប្រអប់តាមធម្មតា ផ្លែត្រឡាចនោះនឹងនៅស្រស់ល្អបានជាច្រើនថ្ងៃ មិនរលួយស្អុយឡើយ ៕
December 25, 2020
Messi ក្លាយជាកីឡាករ Barcelona ដែលរកគ្រាប់បាល់បានច្រើនជាងគេបង្អស់
Messi បានជួយក្រុមអ្នកមានបុណ្យ យកឈ្នះលើក្រុម Real Valladolid ក្នុងលទ្ធផល 3-0 នៅក្របខ័ណ្ឌ La Liga។ 1គ្រាប់របស់ប្រធានក្រុមខាងលើ ក៏បានធ្វើឱ្យរូបគេបំបែកកំណត់ត្រាមួយ របស់កំពូលវីរបុរសបាល់ទាត់ Pele ផងដែរ។ ពោលគឺបច្ចុប្បន្ននេះ លេងឱ្យតែ Barcelona បានធ្វើឱ្យ Messi មាន 644គ្រាប់ហើយ ស្របពេលកំណត់ត្រា លេងឱ្យតែ 1ក្លិបដែរ របស់ Péle មានត្រឹមតែ 643គ្រាប់ប៉ុណ្ណោះ។
ក្រោយពីរកបានកំណត់ត្រាមួយនេះ Messi បានថ្លែងថា គេមិនដែលស្រមៃថា ខ្លួនគេអាចមកដល់ចំណុចនេះឡើយ ទាំងដែលគេមិនអាចប្រៀបផ្ទឹមទៅនឹងវីរបុរសបាល់ទាត់ Péle បានឡើយ ។ គួរឱ្យដឹងដែរថា Péle ត្រូវបានគេស្គាល់ថា ជាកីឡាករបាល់ទាត់លំដាប់លេខ1 របស់ពិភពលោកក្នុងទសវត្សរ៍ឆ្នាំ60 និង70 ដោយបានជួយឱ្យ Barcelona ប្រមូលស្ទើរគ្រប់ពានទាំងអស់ ហើយថែមទាំងជួយឱ្យប្រស៊ីលលើកពាន World Cup ជាច្រើនលើកទៀតផង៕

December 25, 2020
និមិត្តសញ្ញាបាល់ទាត់មួយ នៅខេត្ត Dalian ត្រូវអគ្គិភ័យលេបត្របាក់ស្ទើរគ្មានសល់
រូបសំណាក់បាល់ទាត់ដ៏ធំ ដែលតំណាងឱ្យវិស័យបាល់ទាត់របស់ខេត្ត Dalian ក្នុងប្រទេសចិន បានឆេះខ្ទេចអស់ទៅហើយ កាលពីយប់មិញនេះ។
រូបចម្លាក់បាល់ទាត់នេះ ស្ថិតក្នុងឧទ្យានជាតិ Dalian’s Labour Park ហើយវាជារូបតំណាងឱ្យទីក្រុង Dalian ដែលមានឈ្មោះក្រៅថា ‘Football City’ ឬទីក្រុងបាល់ទាត់ហ្នឹងឯង។
មូលហេតុនៃការឆេះនេះ ត្រូវបានគេរាយការណ៍ថា បណ្ដាលមកពីទុស្សេខ្សែភ្លើង។ រូបបាល់ទាត់ដ៏ធំនេះ ត្រូវបានសាងសង់ឡើងកាលពីឆ្នាំ1995 ខណៈទសវត្សរ៍ឆ្នាំ1990 ក្លិបDalian Wanda ជាក្រុមតែ ១គត់ដែលគ្រប់គ្រងពានលីគកំពូលចិន៕

December 25, 2020
វិធីយល់ពីចិត្តអ្នកដទៃ ដោយការសម្លឹងពីខ្លួនឯងឱ្យតិចបំផុត
មនុស្សជាច្រើនអាចនឹងមានចរិតនិស្ស័យដែលគិតតែពីខ្លួនឯង(អាត្មានិយម) សម្លឹងតែអ្វីដែលនៅជិតៗខ្លួន ដូចជាអារម្មណ៍របស់ខ្លួនឯង ការខាតបង់របស់ខ្លួនឯង តម្រូវការរបស់ខ្លួនឯង ហើយបន្ទាប់ពីនោះ ក៏បញ្ចេញនូវទង្វើផ្សេងៗដែលតបស្នងនឹងរឿងផ្សេងៗទាំងនោះ សម្តែងចេញមកដោយការយកខ្លួនឯងជាធំ ជាគោល ដែលមកដល់ពេលនោះ ការយល់ពីអ្នកដទៃក៏លែងកើតមានដែរ។
មនុស្សយើងច្រើនតែធ្លាក់ទៅក្នុងស្ថានការណ៍បែបហ្នឹងដោយមិនដឹងខ្លួន ជួនកាលក៏អាចហុចផលឱ្យយើងកាត់ក្តីអ្នកដទៃដោយអារម្មណ៍របស់ខ្លួនឯង យល់តែពីខ្លួនឯង គិតតែពីខ្លួនឯង ទើបគ្មានភាពយល់់ចិត្ត សល់ឱ្យអ្នកដទៃឡើយ។
តើមិត្តអ្នកអានធ្លាប់ទេ នៅពេលដែលយើងសម្តែងកាយវិការអ្វីមួយបែបតក់ក្រហល់ចេញទៅ ដោយអារម្មណ៍ឆាបឈួល ក្រោធខឹងមួយវឹបនោះ? ពេលនោះយើងអាចនឹងសប្បាយចិត្ត ដែលបានទម្លាយវាចេញមក តែនៅពេលដែលព្យុះអារម្មណ៍ទាំងនោះស្ងប់ទៅវិញហើយ យើងសាកល្បងបែរទៅពិនិត្យមើលពីភាពខូចខាតដែលបានកើតឡើងវិញ យើងអាចនឹងនឹកសោកស្តាយចំពោះអ្វីដែលយើងបានធ្វើទៅហើយនោះក៏អាចថាបានដែរ។ ដូច្នេះបើសិនជានៅកើតមានអារម្មណ៍សោកស្តាយ យ៉ាងហោចណាស់ក៏វាមានន័យថា នៅមិនទាន់ហួសពេលដែរ ព្រោះយើងនៅមានអារម្មណ៍ដឹងខ្លួននៅឡើយ តែបើនៅតែឆ្ងាញ់ដៃនឹងភាពខូចខាតដែលខ្លួនឯងបានធ្វើនេះវិញនោះ វាប្រហែលជារឿងមួយដែលគួរឱ្យបារម្ភខ្លាំងណាស់…។
អារម្មណ៍ មិនមែនជាមធ្យោបាយក្នុងការកែបញ្ហាដែលត្រឹមត្រូវនោះទេ សតិស្មារតីទៅវិញទេ ដែលគួរតែដឹកនាំអារម្មណ៍ក្នុងការដោះស្រាយបញ្ហានោះ។ រឿងតមកទៀតគឺ ការយល់ពីបញ្ហា ដែលត្រូវតែកើតចេញពីការយល់ និងស្គាល់ពីអ្នកដទៃឱ្យបានច្រើន និងកាន់ជើងខ្លួនឯងឱ្យតិចបំផុត។
ជួនកាលបើសិនជាយើងតាំងសតិបានតែមួយភ្លែត វាអាចនឹងធ្វើឱ្យអ្វីៗប្រែប្រួលទៅបែបផ្សេងមួយទៀតក៏អាចថាបានដែរ សាកល្បងសម្លឹងមើលឱ្យធំទូលាយ កុំសម្លឹងតែពីខ្លួនឯងពេក…៕
December 25, 2020
បងៗស្ត្រីមេផ្ទះដឹងទេ អាហារ 14ប្រភេទដែលយើងតែងទុកដាក់រក្សាដោយវិធីដែលខុសមករហូត(តចប់)
បងៗស្ត្រីមេផ្ទះប្រហែលជាធ្លាប់គិតថា យើងអាចរក្សាទុកគ្រប់យ៉ាងនៅក្នុងទូទឹកកករបស់យើងបាន ទាំងបន្លែផ្លែឈើ បង្អែម និងនំប៉័ង-ល- អ្នកខ្លះថែមទាំងទុកទឹកស៊ីអ៊ីវ និងអាហារកំប៉ុងនៅក្នុងទូទឹកកកទៀតផង តែបងៗដឹងទេថា អាហារប្រភេទខ្លះមានរូបបែបនៃការរក្សាទុកខុសប្លែកពីគ្នា ហើយវិធីដែលខុស វាអាចធ្វើឱ្យកើតផលអាក្រក់ដល់អាហារទាំងនោះបាន។ ថ្ងៃនេះ អ្នកគ្រូ ឆវី មានគន្លឹះល្អៗក្នុងការទុកដាក់រក្សាចំណីអាហារមកជម្រាបជូនបងៗមេផ្ទះទាំងអស់គ្នាជាបន្ត…។
ផ្លែប៉េងប៉ោះ ៈ មិនគួររក្សាទុកនៅក្នុងទូទឹកកកទេ ដោយសារតែវានឹងបាត់បង់រសជាតិពីធម្មជាតិអស់។ សីតុណ្ហភាពដែលត្រជាក់នឹងធ្វើឱ្យកម្មវិធីការបន្ទុំខ្លួនរបស់វាតាមធម្មជាតិកាន់តែយឺតឡើង និងបំផ្លាញសរសៃសាច់ស្ដើងៗនៅខាងក្នុងផ្លែដែលនឹងហុចផលឱ្យវាមិនទុំជោរ។ គួររក្សាផ្លែប៉េងប៉ោះនៅក្នុងសីតុណ្ហភាពក្នុងបន្ទប់ធម្មតា ដោយដាក់នៅក្នុងកញ្ច្រែង ឬក្នុងឡាំង។
វត្ថដែលគួររក្សាទុកនៅក្នុងទូទឹកកក
ស៊ុត ៈ បងៗស្ត្រីមេផ្ទះជាច្រើនមានការរក្សាទុកស៊ុតខុសប្លែកពីគ្នា តែទាំងអស់គ្នាបានអះអាងដូចៗគ្នាថា មិនគួរទុកស៊ុតនៅក្នុងប្រឡោះសម្រាប់ដាក់ស៊ុតនៅខាងមាត់ទ្វារទូទឹកកកទេ តែគួរទុកនៅក្នុងកន្លែងដាក់របស់របរធម្មតាក្នុងទូទឹកកក ហើយអ្នកជំនាញបានណែនាំមិនឱ្យយកស៊ុតចេញពីកញ្ច្រែង ឬបន្ទះស្នោរទ្រស៊ុតដែលជាប់មកជាមួយស៊ុតនោះទេ គឺដើម្បីឱ្យវារក្សាភាពស្រស់បានយូរ។
ម្សៅ ៈ មើលទៅហាក់ដូចជាងាយស្រួលក្នុងការរក្សាទុក តែការពិតវិញ មិនមែនងាយស្រួលឡើយ។ សំណើម និងសីតុណ្ហភាពដែលខ្ពស់ នឹងនាំឆ្ពោះទៅរកការកើតមេរោគផ្សិត និងសត្វល្អិតក្នុងម្សៅ ដែលហុចផលធ្វើឱ្យពេលយកទៅកែច្នៃជាអាហារបរិភោគមិនបាន។ ជម្រើសដែលល្អ គឺការដាក់នៅក្នុងដបកែវបិទជិតទុកនៅក្នុងទូទឹកកក។
គ្រាប់សណ្ដែក ៈ ការរក្សាទុកដាក់របស់បងៗស្ត្រីមេផ្ទះភាគច្រើនគឺ ទុកគ្រាប់សណ្ដែកគ្រប់ប្រភេទនៅក្នុងសីតុណ្ហភាពក្នុងបន្ទប់ធម្មតា តែការពិតវិញ គ្រាប់សណ្ដែកប្រភេទខ្លះ ដូចជាអាល់ម៉ុន និងវ៉លណាត់ ជាដើម អាចស្ថិតក្នុងសភាពដើមបាន 1-2សប្ដាហ៍នៅក្នុងសីតុណ្ហភាពដែលកក់ក្ដៅ រួចហើយនឹងខូចអស់បន្ទាប់ពីនោះ។ ជម្រើសដែលល្អ គួរទុកដាក់គ្រាប់សណ្ដែកនៅក្នុងកន្លែងដែលឆ្ងាយពីពន្លឺថ្ងៃ សំណើម និងសីតុណ្ហភាពដែលខ្ពស់។ ពួកវាគួរត្រូវបានរក្សាទុកនៅក្នុងទូទឹកកក ដើម្បីថែរក្សាសភាពទុកឱ្យបានយូរដល់ទៅ 9ខែ។
បន្លែឃឹនឆាយបារាំង ៈ គួររក្សាទុកនៅក្នុងទូទឹកកក តែមិនគួរខ្ចប់នៅក្នុងថង់ប្លាស្ទិកដែលនឹងធ្វើឱ្យវាឆាប់ស្អុយរលួយខូចនោះទេ។ បងៗអាចប្រើក្រដាសអាលុយមីញ៉ូមដើម្បីខ្ចប់បន្លែឃឹនឆាយនេះបាន៕
December 24, 2020
Toyota ថា រថយន្តអគ្គិសនីនាំឱ្យខួចបរិស្ថាន រីឯក្រុមហ៊ុនរថយន្តអគ្គិសនីរំលឹកថា៖ «អស់លោកចង់យកគំរូតាម Nokia?»
ប្រធានក្រុមហ៊ុនផលិតរថយន្តអគ្គិសនីរបស់ចិន Xiaopeng Motors បានឆ្លើយតបទៅនឹងសាររបស់ប្រធានក្រុមហ៊ុនផលិតរថយន្ត Toyota ថា ការដែល ក្រុមហ៊ុនផលិតរថយន្តធម្មតា មើលស្រាលរថយន្តអគ្គិសនី ឬមិនមើលឃើញអំពីការនិយមថ្មី នឹងធ្វើឱ្យពួកគេជាន់ដានក្រុមហ៊ុនផលិតទូរស័ព្ទ Nokia។
លោក Akio Toyoda ដែលជាមេដឹករបស់ក្រុមហ៊ុន Toyota Motor បានឱ្យដឹងនៅក្នុងសន្និបាទចុងឆ្នាំរបស់សមាគមអ្នកផលិតរថយន្តជប៉ុន កាលពីថ្ងៃទី 17 ខែធ្នូថា៖ «យើងផលិតរថយន្តអគ្គិសនីកាន់តែច្រើន បរិមាណនៃឧស្ម័ន carbon dioxide នឹងកាន់តែអាក្រក់ជាងមុន»។
តាមការយល់ឃើញរបស់ Akio Toyoda រថយន្តអគ្គិសនីត្រូវបានគេលើកតម្កើង និងបំប៉ោងហួសហេតុ ហើយអ្នកគាំទ្ររថយន្តអគ្គិសនីមិនបានពិចារណាទៅលើបរិមាណឧស្ម័ន carbon dioxide និងថ្លៃប្ដូរផ្លាស់ដែលរថយន្តអគ្គិសនីបង្កើតឡើង។
សារព័ត៌មាន WSJ ដកស្រង់សម្ដីរបស់លោក Toyoda ឱ្យដឹងថា៖ «បើសិនជាអ្នកនយោបាយនិយាយថា «ចូរយើងទាំងអស់គ្នាឈប់ប្រើរថយន្តប្រើសាំង» តើពួកគេអាចយល់បានថា វាជាអ្វីដែរឬទេ?»។ លោកបន្តថា៖ «នៅពេលរថយន្តទាំងអស់សុទ្ធតែប្រើអគ្គិសនី នោះប្រទេសជប៉ុននឹងមិនមានអគ្គិសនីប្រើប្រាស់នៅក្នុងរដូវក្ដៅ។ នៅក្នុងប្រទេសមួយដូចជាជប៉ុន អគ្គិសនីស្ទើរតែទាំងអស់គឺសុទ្ធតែបានមកពីការដុតធ្យូង និងឧស្ម័នធម្មជាតិ ហើយរថយន្តអគ្គិសនីមិនមានប្រយោជន៍សម្រាប់បរិស្ថាន»។
លោក Akio Toyoda មេដឹករបស់ក្រុមហ៊ុន Toyota Motor
លោក Akio Toyoda ក៏បានសង្កាត់ធ្ងន់ថា បើសិនជប៉ុនប្រញាប់ប្រញាល់ក្នុងការហាមមិនឱ្យមានរថយន្តប្រើសាំង នោះ «ជំនួញបច្ចុប្បន្ននៃវិស័យឧស្សាហកម្មរថយន្តនឹងត្រូវដួលរលំ» បណ្ដាលឱ្យមនុស្សរាប់លាននាក់ត្រូវបាត់បង់ការងារ។ លោកមានការព្រួយបារម្ភថា ការហាមឃាត់រថយន្តប្រើសាំងក៏នឹងធ្វើឱ្យរថយន្តក្លាយជា «ផ្កានៅលើកំពូលភ្នំ» ជារបស់ដែលមនុស្សធម្មតាមិនអាចចាប់យកបាន។
យោបល់របស់ប្រធានក្រុមហ៊ុន Toyota ទំនងជាជាប់ទាក់ទងនឹងគោលនយោបាយថ្មីរបស់រដ្ឋាភិបាលជប៉ុន។ កាលពីដើមខែធ្នូ សារព័ត៌មានជប៉ុនបានចេញផ្សាយថា រាជរដ្ឋាភិបាលប្រទេសនេះ ជិតចេញបទបញ្ជាហាមលក់រថយន្តថ្មីដែលដើរដោយម៉ាស៊ីនចំហេះក្នុង ចាប់ពីឆ្នាំ 2035 ប៉ុន្តែ រថយន្តប្រភេទ hybrid នៅតែបន្តលក់បាន។
ក៏ប៉ុន្តែ មិនយូរប៉ុន្មានក្រោយការបញ្ចេញយោបល់របស់លោក Akio Toyoda ពោលគឺនៅថ្ងៃទី 21 ខែធ្នូ ប្រធានក្រុមហ៊ុនរថយន្តអគ្គិសនី Xiaopeng Motor គឺលោក He Xiaopeng បានបង្ហោះនៅលើបណ្ដាញសង្គម Weibo របស់ចិន នូវរូបភាពដែលថតពីអត្ថបទសារព័ត៌មានដែលនិយាយអំពីប្រសាសន៍របស់លោក Akio Toyoda អមជាមួយនឹងរឿងរ៉ាវមួយយ៉ាងជូរចត់ និងគួរឱ្យពិចារណា ទាក់ទងនឹងការទិញក្រុមហ៊ុន Nokia ពីសំណាក់ Microsoft កាលពីឆ្នាំ 2014។
ប្រធានក្រុមហ៊ុនរថយន្តអគ្គិសនី Xiaopeng Motor គឺលោក He Xiaopeng
ភ្លាមៗនោះ ក្រុមអ្នកលេងបណ្ដាញសង្គមនៃប្រទេសចិន ក៏យល់ថា រឿងរ៉ាវដែលលោក He Xiaopeng បានបង្ហោះ គឺបានប្រដូចបណ្ដាក្រុមហ៊ុនរថយន្តអគ្គិសនីទៅនឹងក្រុមហ៊ុន Microsoft និងប្រដូចបណ្ដាក្រុមហ៊ុនរថយន្តប្រើសាំងដែលមើលស្រាលក្រុមហ៊ុនរថយន្តអគ្គិសនី ឬមិនផ្ដោតសំខាន់ទៅលើនិន្នាការរីកចម្រើននៃអគ្គិសនី ដូចទៅនឹងក្រុមហ៊ុន Nokia។
គិតមកដល់បច្ចុប្បន្ន ប្រទេស និងតំបន់ចំនួន 22 ក្នុងពិភពលោក បានប្រកាសអំពីកាលបរិច្ឆេទសម្រាប់ការចេញបទបញ្ជាហាមរថយន្តដែលប្រើប្រាស់ម៉ាស៊ីនចំហេះក្នុង ក្នុងនោះ អឺរ៉ុបមាន 13 ប្រទេស ដែលក្នុងចំណោមនេះ ប្រទេសហូឡង់ ន័វ៉ែស និងអាល្លឺម៉ង់ បានចាប់ផ្ដើមអនុវត្តតាំងពីឆ្នាំ 2016។ រាប់ចាប់ពីដើមឆ្នាំ 2020 នេះ អង់គ្លេស និងសហរដ្ឋអាមេរិក ក៏បានយកតម្រាប់តាមប្រទេសទាំងនោះផងដែរ៕
ប្រភព៖ iFeng
December 24, 2020
រថយន្តអគ្គិសនីនៅប្រទេសថៃ នឹងមានប្រព័ន្ធបង់ប្រាក់ Smart-card រាល់ពេលប្រតិបត្តិការសាកភ្លើង
សមាគមយានយន្តអគ្គិសនីប្រចាំប្រទេសថៃ គ្រោងនឹងដំណើរការប្រព័ន្ធបង់ប្រាក់ Smart-card រាល់ពេលប្រតិបត្តិការសាកភ្លើងរថយន្ត នៅតាមស្ថានីយនីមួយៗទូទាំងទីក្រុងបាងកក នៅដើមឆ្នាំ2021 ខាងមុខនេះ។ សមាគមដដែលខាងលើ ក៏កំពុងពិចារណាជ្រើសយកប្រព័ន្ធបង់ប្រាក់ទំនើប 1ទៀត គឺតាមរយៈ Radio Frequency Identification ឬ RFID credit cards ឬបង្កើតកម្មវិធីទូរស័ព្ទដៃថ្មីមួយ។ ប្រសិនបើប្រព័ន្ធដំណើរការនេះ បានជោគជ័យ នោះសមាគម នឹងបន្ថែមចំនួនស្ថានីយសាកភ្លើងឱ្យកាន់តែច្រើនទីតាំងទៀត នោទូទាំងប្រទេស។
បច្ចុប្បន្នប្រទេសថៃ កំពុងដំណើរការស្ថានីយសាកភ្លើង ដែលប្រើប្រាស់វិធីសាស្ត្របង់ប្រាក់ផ្សេងៗពីគ្នា (អាស្រ័យលើក្រុមហ៊ុននីមួយ័) មិនទាន់រកវិធីបង់ប្រាក់រួមគ្នាមួយបាននៅឡើយ។ ស្ថានីយសាកភ្លើងរបស់ ថៃ បច្ចុប្បន្នមាន 570ទីតាំងធំៗទូទាំងប្រទេស និងមានទីតាំងតូចៗ សរុប 1,800កន្លែង។
កាលពីឆ្នាំ2019 កន្លងទៅ មានអ្នកចុះឈ្មោះប្រើប្រាស់រថយន្តអគ្គិសនីតែ 1,572នាក់ប៉ុណ្ណោះ ប៉ុន្តែតួលេខនេះ បានកើនឡើងដល់ 3,076 នៅឆមាស2 ឆ្នាំ2020 និងគេរំពឹងថា នឹងកើនឡើងដល់ 5,000នាក់នៅដំណាច់ឆ្នាំ៕
December 24, 2020
អ្នកស្នងមរតកពីប្រធាន Samsung ត្រូវបង់ពន្ធឯកត្តជន ច្រើនបំផុត ក្នុងប្រវត្តិសាស្ត្រកូរ៉េខាងត្បូង
លោក Lee Kun-hee ប្រធានក្រុមហ៊ុន Samsung ដែលបានទទួលមរណភាព កាលពីថ្ងៃទី25 ខែតុលា ក្នុងវ័យ 78ឆ្នាំ បានបន្សល់ទុកនូវភាគហ៊ុន និងទ្រព្យសម្បត្តិដែលមានតម្លៃដល់ទៅរាប់ពាន់លានដុល្លារ។ នៅថ្ងៃទី22 ខែធ្នូ តម្លៃហ៊ុនជាក់ស្ដែង ដែលលោក Lee បានបន្សល់ទុក ត្រូវបានគេគិតគូររួចហើយ ឃើញថា មានតម្លៃ 19.9ពាន់លានដុល្លារ។
គិតចាប់ពីថ្ងៃទី24 ខែសីហា ដល់ខែធ្នូ តម្លៃហ៊ុននោះ ត្រូវបានគិតគូរ ផ្អែកលើតម្លៃជាមធ្យម នៃភាគហ៊ុនក្នុងរយៈពេល 4ខែចុងក្រោយ។ សារព័ត៌មានក្នុងស្រុកកូរ៉េ The Korea Herald បានចុះផ្សាយឱ្យដឹងថា អ្នកស្នងមរតកលោក Lee នឹងទទួលបានមរតកភាគហ៊ុនដែលមានតម្លៃសរុប ១៧ពាន់លានដុល្លារ។ បើតាមច្បាប់ពន្ធកូរ៉េខាងត្បូង បានកំណត់ពន្ធខ្ពស់បំផុតដល់ 50% លើមរតកភាគហ៊ុនដែលមានតម្លៃលើសពី 2.7លានដុល្លារ។ បន្ថែមពីនេះអ្នកកាន់កាប់ភាគហ៊ុនច្រើនជាងគេ ក៏ត្រូវបង់ពន្ធមរតក 20% ផងដែរ។
សរុបជារួមទៅ ពន្ធមរតកចំពោះភាគហ៊ុនទាំងអស់ដែលលោក Lee បានបន្សល់ទុក គឺមានរហូតដល់ 9ពាន់លានដុល្លារឯណោះ ដែលនេះ គឺជាការយកពន្ធឯកត្តជនច្រើនបំផុតក្នុងប្រវត្តិសាស្ត្ររបស់ប្រទេសកូរ៉េខាងត្បូង។
អ្នកស្នងមរតករបស់លោក Lee អាចមានសិទ្ធិជ្រើសរើសបង់ពន្ធមរតក ក្នុងអំឡុងពេល 5ឆ្នាំបន្ទាប់ ដោយមិនចាំបាច់បង់ម្ដងទាំងអស់នោះទេ៕
December 24, 2020