Category: សង្គម និងសេដ្ឋកិច្ច

លួចស្នេហ៍ប្រុសស្អាត តើធ្វើយ៉ាងម៉េចទៅ ទើបគេដឹងខ្លួន?
បើអ្នកនាងកំពុងធ្លាក់ក្នុងអន្លង់ស្នេហ៍បុរសណាម្នាក់នោះ ខាងក្រោមនេះ គឺជាវិធី 2-3យ៉ាងដែលអាចធ្វើឱ្យបុរសម្នាក់នោះដឹងខ្លួនថា ពេលនេះអ្នកនាងកំពុងលួចស្រឡាញ់គេហើយ ដូច្នេះសូមតាមដានដូចតទៅ៖
សម្តែងអាកប្បកិរិយាបែបត្រង់ទៅត្រង់មកតែម្តង
វិធីដែលងាយបំផុតនោះគឺ ចូរដកដង្ហើមចូលឱ្យវែងៗ ហើយបើកបង្ហាញបេះដូងឱ្យគេបានដឹងត្រង់ៗតែម្តង ដោយគ្រាន់តែរកមើលពេលវេលាណាមួយ ដែលអ្នកនាង និងគេម្នាក់នោះនៅតែ 2នាក់ស្ងាត់ៗ ហើយប្រាប់អំពីអារម្មណ៍ដ៏ពឹតប្រាកដរបស់អ្នកនាងដែលមានចំពោះគេ និងសួរគេថា តើគេមានអារម្មណ៍ដូចគ្នាដែរឬអត់?។
ការធ្វើបែបនេះ អាចនឹងធ្វើឱ្យរូបអ្នកនាង ត្រូវបុរសម្នាក់នោះបដិសេធភ្លាមៗ ក៏អាចថាបានដែរ តែនេះជាវិធីមួយដ៏ឆាប់រហ័សបំផុត ដែលអ្នកនាងអាចធ្វើឱ្យខ្លួនឯងបាត់ធុញថប់តានតឹងនៅក្នុងចិត្ត ព្រោះបានទម្លាយអ្វីដែលនៅក្នុងចិត្ត(យូរមកហើយនោះ)ឱ្យគេបានដឹងហើយ តែវិធីនេះត្រូវការភាពជឿជាក់លើខ្លួនឯងខ្លាំងបំផុត ដូច្នេះបើអ្នកនាងមិនមែនជាប្រភេទមនុស្សដែលមានភាពជឿជាក់លើខ្លួនឯងយ៉ាងខ្លាំងក្លាពេញពោរហូហៀរទេនោះ ជួនកាលវិធីផ្សេងពីនេះ ដូចជាមិនបង្ហាញមុខឱ្យគេស្គាល់ច្បាស់ៗដល់ថ្នាក់នោះ អាចនឹងប្រសើរជាង ក៏ថាបានដែរ។
បង្កើនការរាយមន្តស្នហ៍
វិធីដែលល្អបំផុតក្នុងការធ្វើឱ្យដឹងពីភាពអាចទៅរួច ឬមិនរួច នៃការប្រែក្លាយពីមិត្តភាពទៅជាស្នេហានោះ គឺបង្កើនការរាយមន្តស្នហ៍បន្តិចម្តងៗទៅលើអ្នកកម្លោះ ដែលអ្នកនាងប៉ងប្រាថ្នាម្នាក់នោះឱ្យកាន់តែច្រើនឡើង ដូចជា បន្ថែមស្នាមញញឹមដាក់គេឱ្យកាន់តែច្រើនឡើង លបសម្លឹងកែវភ្នែកគេឱ្យបានញឹកញាប់ឡើង ឬធ្វើជាដើរទៅប៉ះខ្លួនគេនៅពេលដែលគេនៅជិតអ្នកនាង ជាដើម។ ទាំងអស់នេះ គឺដើម្បីឱ្យគេបានដឹងថា អ្នកនាងបាន និងកំពុងចាប់អារម្មណ៍លើរូបគេពិសេសជាងអ្នកដទៃហើយហ្នឹងឯង ។
គ្មានវិធីណាមួយដែលធានាថា នឹងជោគជ័យទាំងអស់ឡើយ
ហើយទោះយ៉ាងណា ក៏អ្នកនាងនៅតែចាំបាច់ ត្រូវតែប្រាប់គេពីអារម្មណ៍របស់ខ្លួនឯងចំពោះគេចេញមកដដែល នេះក្នុងករណីបើគេនៅតែមិនដឹងពីអត្ថន័យ និងទង្វើដែលអ្នកនាងបានធ្វើដូចបានរៀបរាប់ខាងលើរួចហើយនោះ។ តែដែលសំខាន់ជាងអ្វីទាំងអស់នោះគឺ ការសង្កេតមើលការឆ្លើយតបរបស់គេ បើគេឆ្លើយតបចំពោះពាក្យសរសើររបស់អ្នកនាងដោយក្តីធុញទ្រាន់ ឬរំខាននោះ គឺមានន័យថា គេអាចមិនគិត ដូចអ្នកនាងគិតនោះទេ(មិនចាប់អារម្មណ៍អ្នកនាងទេ) តែបើគេតបស្នងមកវិញ ចំពោះអ្វីដែលអ្នកនាងបានធ្វើទៅលើគេ ដោយស្នាមញញឹមយ៉ាងស្មោះ និងរំភើបបំផុតនោះ ហ្នឹងគឺជាសញ្ញាដ៏ល្អមួយ ដែលបង្ហាញថា គេក៏លួចស្រឡាញ់អ្នកនាងដែរ៕
ឡារ៉ែន ជូនពរឱ្យអ្នកនាងសមបំណង…៕
December 29, 2020
កម្រងពាក្យពេចន៍ដែលមហាសេដ្ឋី Jack Ma ធ្លាប់ប្រើ អាចជួយលើកទឹកចិត្តឱ្យយើងឆ្លងផុតពីការលំបាក
ពីគ្រូបង្រៀនភាសាអង់គ្លេស លោក Jack Ma បច្ចុប្បន្នបានក្លាយជាម្ចាស់ក្រុមហ៊ុនខ្នាតយក្ស Alibaba និងបានបំផុសគំនិតដ៏អស្ចារ្យជាច្រើនសម្រាប់យុវវ័យនៅទូទាំងពិភពលោក។
ខាងក្រោមនេះគឺជាពាក្យពេចន៍ ឃ្លាឃ្លោងមួយចំនួនដែលមិត្តអ្នកអាន អាចយកមកធ្វើជាការលើកទឹកចិត្តដើម្បីបន្តដំណើរឆ្ពោះទៅមុខ សំដៅគោលដៅជោគជ័យរៀងៗខ្លួន៖
«បើសិនជាអ្នកមិនចុះចាញ់ អ្នកនឹងនៅតែមានឱកាស។ ការបោះបង់សេចក្ដីព្យាយាមគឺជាបរាជ័យធំបំផុត»។
«បើសិនជាអ្នកកំពុងស្ថិតក្នុងវ័យ 25 ឆ្នាំ ចូរកុំខ្លាចក្នុងការបង្កកំហុសឆ្គង។ កុំព្រួបារម្ភ។ ពេលដួលគឺត្រូវតែក្រោក។ អ្នកបរាជ័យ អ្នកត្រូវតែងើបឡើង»។
«កុំអស់សង្ឃឹមពេលដែលត្រូវគេបដិសេធ កុំព្រួយចិត្តពេលដែលយើងបរាជ័យ នេះគ្រាន់តែជាការពិសោធរបស់ជីវិតតែប៉ុណ្ណោះ»។
«ខ្ញុំហៅ Alibaba ថាជាកំហុសទី 1,001។ ប៉ុន្តែ ពេលមានកំហុសកាន់តែច្រើន អ្នកនឹងកាន់តែរឹងមាំ»។
«ខ្ញុំមិនគិតថា ខ្ញុំឆ្លាតជាងអ្នក។ ខ្ញុំប្រលងចូលមហាវិទ្យាល័យធ្លាក់ 3 ដង។ ខ្ញុំដួល ខ្ញុំក្រោកឡើង ខ្ញុំដួលទៀត ខ្ញុំនៅតែក្រោកឡើងទៀត។ ហើយខ្ញុំក៏បានជោគជ័យ»។
«ជាអ្នករកស៊ី ថ្ងៃនេះអ្នកជួបការលំបាក។ ថ្ងៃស្អែកវានឹងលំបាកកាន់តែខ្លាំង។ ប៉ុន្តែ ថ្ងៃបន្ទាប់ទៀត វានឹងល្អប្រសើរ។ មនុស្សភាគច្រើនបានបោះបង់នៅ «យប់ស្អែក» ជាពេលដែលកំពុងស្ថិតនៅកៀកនឹងជោគជ័យ។ អ្នកត្រូវតែធ្វើការដោយការប្រឹងប្រែង អ្នកត្រូវតែរៀនស្វែងយល់ និងចេះពឹងផ្អែកទៅលើក្រុមរបស់អ្នក»។
«ជារៀងរាល់ថ្ងៃ ខ្ញុំជួបបញ្ហាជាច្រើន ហើយបើសិនជាការយំអាចដោះស្រាយបញ្ហាបាន ខ្ញុំនឹងយំពេញមួយថ្ងៃ។ ប៉ុន្តែ ការយំស្រែកគ្រាន់តែជួយឱ្យខ្ញុំបានធូរស្រាលក្នុងចិត្តប៉ុណ្ណោះ ចំណែកក្រុមរបស់ខ្ញុំវិញ ពួកគេនឹងមិនសប្បាយចិត្ត។ ដូច្នេះ អ្វីដែលខ្ញុំត្រូវធ្វើ នោះគឺធ្វើឱ្យខ្លួនឯងរីករាយ។ ខ្ញុំយកដៃឆ្វេងក្ដាប់ដៃស្ដាំរបស់ខ្លួន»។
«ពុំមានឱកាសនៃការជួញដូរណាដែលជួយឱ្យអ្នកជោគជ័យភ្លាមៗនៅថ្ងៃស្អែក ឬឆ្នាំក្រោយឡើយ។ នៅពេលចង់ធ្វើអ្វីនៅថ្ងៃនេះ ចូរចាំថា បើសិនជានៅតែបន្តធ្វើ នោះអ្នកនឹងជោគជ័យក្នុងរយៈពេល 10 ឆ្នាំទៀតមិនខាន»។
«ខ្ញុំមើលឃើញថា អ្នកជោគជ័យជាច្រើនលើពិភពលោក ដូចជា Warren Buffett, Bill Gates, Steve Jobs ជាដើម មានចំណុចរួមមួយ នោះគឺមិនដែលត្អូញត្អែរ មិនដែលមានទុទ្ទិដ្ឋិនិយម»។
«ជ្រូកមួយក្បាលក៏អាចហោះបានបើសិនវាជួបនឹងខ្យល់ដ៏ខ្លាំង ប៉ុន្តែ ពេលខ្យល់លែងបក់ ជ្រូកនោះអាចបាត់បង់ជីវិត។ និយាយរួម វានៅតែជាជ្រូកមួយក្បាលដដែល។ អ្វីដែលគ្រប់គ្នាត្រូវគិត នោះគឺធ្វើយ៉ាងណាដើម្បីគ្រប់គ្រងខ្យល់ ដឹងអំពីទិសរបស់ខ្យល់ ហើយឱ្យវាបក់យើងឡើងទៅលើ។ ខ្ញុំយល់ថា យើងមិនគួរទៅស្វែងរកខ្យល់ដែលមានកម្លាំងខ្លាំងជាងបច្ចុប្បន្ននោះទេ តែយើងត្រូវតែប្រែក្លាយទៅជាមនុស្សដែលអាចហោះបាន សូម្បីតែនៅពេលមានខ្យល់បក់ស្រាល»៕
ប្រភព៖ Getty Images, Reuters, Bloomberg
December 29, 2020
Manchester City រកឃើញកីឡាករ និងគ្រូបង្វឹក 7នាក់ ផ្ទុកកូវីដ-19
ការប្រកួតរបស់ក្រុម Manchester City ទល់នឹងក្រុម Everton កាលពីយប់មិញត្រូវបានពន្យារពេល ដោយសារមានករណីផ្ទុះឆ្លង covid 19 ជាច្រើន ក្នុងចំណោមកីឡាករក្រុមបាល់ទាត់ Man City ។
ទាក់ទងនឹងបញ្ហានេះ ត្រូវបានក្លិប Everton ដែលជាក្រុមដៃគូបដិបក្ខ បញ្ចេញជាផ្លូវការ ដោយមូលហេតុពិតប្រាកដនោះគឺ មានកីឡាករក្លិប ManCity សរុបដល់ទៅ 7រូប ត្រូវបានរកឃើញថា មានផ្ទុកកូវីដ-19 ដោយក្នុងនោះមានកីឡាករសរុបចំនួន 4រូប និងគ្រូបង្វឹក 2រូប។
ក្នុងនោះដែរ ត្រូវបានគេដឹងថា មានកីទ្បាករ Grabriel Jesus, Kyle Walker ក៏បានធ្វើតេស្តឃើញថា វិជ្ជមាននៃជំងឺ Covid-19ដែរ។ សូមបញ្ជាក់ថា បច្ចុប្បន្ននេះប្រទេសអង់គ្លេស កំពុងតែឆ្លងរាលដាលរលកទី3 នៃជំងឺ Covid-19 ខ្លាំងក្លាទ្បើង៕
December 29, 2020
ក្រសួងអប់រំកម្ពុជាអនុញ្ញាតឱ្យគ្រឹះស្ថានសិក្សាឯកជនដំណើរការឡើងវិញ ចាប់ពីថ្ងៃជូនដំណឹងនេះតទៅ
នៅព្រឹកថ្ងៃទី 29 ខែធ្នូ ឆ្នាំ 2020 នេះ ក្រសួងអប់រំយុវជននិងកីឡាកម្ពុជា បានប្រកាសជូនដំណឹងថា ក្រសួងសម្រេចអនុញ្ញាតឱ្យគ្រឹះស្ថានសិក្សាឯកជនដំណើរការឡើងវិញ ចាប់ពីថ្ងៃជូនដំណឹងនេះតទៅ។
ចំណែកកាលបរិច្ឆេទនៃការបើកបវេសនកាលឆ្នាំសិក្សាថ្មី សម្រាប់គ្រឹះស្ថានសិក្សាចំណេះទូទៅសាធារណៈ ក្រសួងអប់រំសម្រេចយកថ្ងៃទី 11 ខែមករា ឆ្នាំ២០២។
December 29, 2020
រឿងធម្មតាៗ 10យ៉ាងដែលយើងច្រើនតែភ្លេចក្នុងការតុបតែងផ្ទះ
តើលោកអ្នកធ្លាប់ដែរឬទេ ធ្លាប់មានអារម្មណ៍ថា ទោះជាខំតុបតែងផ្ទះយ៉ាងណា ក៏នៅតែមិនស្អាតដូចរូបនៅក្នុងទស្សនាវដ្តីដែរ និងមានអារម្មណ៍ថា ដូចជារាងទើសភ្នែក ខ្វះនេះ លើសនោះយ៉ាងម៉េចក៏មិនដឹង…។ ព្រោះថា ទោះជាផ្ទះរបស់លោកអ្នក ទំនើប និងថ្លៃប៉ុនណាក៏ដោយ តែរឿងការតុបតែងលម្អមិនមែនជារឿងងាយដូចការគិតនោះទេ។ ខាងក្រោមនេះគឺ ឧទាហរណ៍ខ្លះៗដែលយើងច្រើនតែភ្លាត់ភ្លាំងក្នុងការតុបតែងផ្ទះ ដូច្នេះបើអ្នកណាមិនចង់ខុសឆ្គងក្នុងការតុបតែងផ្ទះ សូមតាមដានដូចតទៅ។
-តែងផ្ទះច្រើនពេក ឡើងស៊ុបទ្រុប
កុំគិតតែពីតុបតែងផ្ទះដោយរបស់លម្អច្រើនពោរពាស រហូតមើលទៅដូចជាចង្អៀតហប់នោះ បើលោកអ្នកត្រូវដើរចៀសរបស់នេះ ដើរគេចរបស់នោះពេលដើរចេញ-ចូលក្នុងផ្ទះរបស់ខ្លួនឯងនោះ នោះបញ្ជាក់ថា លោកអ្នកមានរបស់របរច្រើនជ្រុលពេកហើយ ដូច្នេះគួរទុកឱ្យមានកន្លែងចន្លោះទំនេរគ្រាន់នឹងសម្រាកខ្សែភ្នែកខ្លះផង។
-ពេញទៅដោយរបស់ប្រមូលសន្សំទុក
ផ្ទះដែលពោរពេញទៅដោយរបស់ប្រមូលសន្សំ ដែលជាចំណង់ចំណូលចិត្តផ្ទាល់ខ្លួននោះ អ្នកអាចមើលឃើញថាវាស្អាតក៏ពិតមែន តែអ្នកជឿទេថា ភ្ញៀវដែលមកលេងផ្ទះយើង គេមិនបានគិតបែបហ្នឹងទេ ហើយគេមានអារម្មណ៍ថា ដូចជារំខានទៀតផង ដូច្នេះចូរសាកល្បងតុបតែងផ្ទះតាមបែបស្ទីលធម្មតាវិញ ប្រហែលជាគួរឱ្យគយគន់ជាង។
-ទិញគ្រឿងសង្ហារិមមកដាក់ក្នុងផ្ទះ ខុសទំហំ
ទំហំរបស់វត្ថុប្រើប្រាស់គួរតែឱ្យវាសមល្មមនឹងទំហំរបស់បន្ទប់ មិនគួរតូច ឬធំជ្រុលពេកឡើយ ដូច្នេះសូមកុំភ្លេចវាស់ទំហំទីកន្លែងដែលត្រូវដាក់តាំង មុននឹងចេញទៅរកទិញរបស់ទាំងនោះផងទើបជាការប្រសើរ។
-វ៉លផេភើរ៍(ក្រដាសរូបភាពបិទជញ្ជាំង)មានរូបភាពក្បាច់ក្បូរគួរឱ្យខ្លាច
វ៉លផេភើរ៍ មានរូបដូចសត្វពស់ ដូចសត្វចម្លែក គួរឱ្យខ្លាចញញើត…សូមសាកល្បងគិតទៅមើលថា បើភ្ញៀវមកលេងផ្ទះយើង តើគេហ៊ានឈានជើងចូលមកក្នុងផ្ទះឬទេ? ដូច្នេះ ចូរកុំតុបតែងផ្ទះដោយវ៉លផេភើរ៍បែបនេះជាដាច់ខាត។
-ដើមផ្កាជ័រ
ពិតប្រាកដហើយថា ដើមឈើ និងផ្កា នឹងជួយឱ្យផ្ទះមើលទៅស្រស់ស្អាត តែដើមផ្កាក្លែងក្លាយ ឬជ័រ នឹងធ្វើឱ្យផ្ទះមើលទៅមានតម្លៃថោក បង្ហាញពីចំណង់ចំណូលចិត្តរបស់អ្នកស្នាក់នៅ មិនហាយក្លាស់ ដូច្នេះគួរចំណាយប្រាក់ទិញដើមផ្កាមែនទែនមកតុបតែងលម្អវិញ ដែលទោះជាថ្លៃជាងមែន តែមើលទៅល្អស្រស់ស្រាយជាងច្រើនណាស់។
-បន្ទប់គេងប្រើពណ៌ផ្កាឈូកពេញទាំងបន្ទប់
តើអ្នកគិតយ៉ាងណាដែរ ពេលជួបមនុស្សដែលតុបតែងខ្លួនដោយសម្លៀកបំពាក់ពណ៌តែមួយតាំងពីក្បាលដល់ចុងជើងនោះ? ការតុបតែងបន្ទប់ ឱ្យអ្វីៗគ្រប់យ៉ាងមានពណ៌ផ្កាឈូកទាំងអស់ ទោះជាមើលយ៉ាងម៉េច ក៏នៅតែដូចជាដែលគ្មានសិល្ប:ក្នុងការតុបតែងដែរ។ ដូច្នេះសូមសាកល្បងរករបស់តុបតែងណា ដែលមានពណ៌ស៊ីគ្នានឹងពណ៌ផ្កាឈូកមកដាក់លាយឡំខ្លះ ទើបជាការប្រសើរជាង ។
-មិនព្រមបកថង់ប្លាស្ទិកចេញពីវត្ថុតុបតែងលម្អ
មានវិធីផ្សេងទៀតជាច្រើនក្នុងការថែទាំរបស់ប្រើប្រាស់ឱ្យនៅថ្មី ជាប់ធន់បានយូរ និងមិនប្រឡាក់ តែមិនមែនជាវិធីបែបនេះទេ…។
-ព្យួររូបភាពលើជញ្ជាំងខ្ពស់ជ្រុលពេក
មើលទៅដូចជាស្អាត តែតើវានឹងវារួយ-កទេ ពេលយើងងើយមើលវា? រូបភាព ឬរូបថតផ្សេងៗមិនគួរព្យួរខ្ពស់ជ្រុលពេក ដល់ថ្នាក់ត្រូវងើបមុខឡើងមើលនោះទេ គួរព្យួរនៅក្នុងកម្ពស់ដែលយើងអង្គុយ ឬឈរក៏អាចមើលឃើញដែរទើបជាការប្រសើរ។
-ខ្សែភ្លើងច្រវេតច្រវាត់ រញេរញ៉ៃ គ្មានរបៀប
ខ្សែភ្លើងរបស់ទូរទស្សន៍ កង្ហារ ឬគ្រឿងប្រើប្រាស់អគ្គិសនីទាំងអស់ដែលមាននៅក្នុងផ្ទះ មិនថាតែក្នុងបន្ទប់ណាក៏ដោយ គួររៀបចំប្រមូលចង ឬរុំបញ្ចូលគ្នាជាខ្សែតែមួយដាក់ទៅកៀនជញ្ជាំង ទើបមើលទៅមិនកេកកាក រញេរញ៉ៃ និងមានសណ្តាប់ធ្នាប់។
-ដាក់កៅអីសាឡុងឃ្លាតឆ្ងាយពីគ្នាជ្រុលពេក
នេះគឺជាចំណុចខុសឆ្គងមួយ ដែលមិនអាចទទួលយកបានជាទីបំផុត ដូច្នេះមិនចាំបាច់ដាក់កៅអីសាឡុងទៅជាប់នឹងជញ្ជាំងពេកទេ នឹងទោះជាបន្ទប់ទទួលភ្ញៀវមានទីធ្លាធំទូលាយយ៉ាងណាក៏ដោយ ក៏គួររៀបចំឱ្យបានសមរម្យ និងមានរយ:ឆ្ងាយពីគ្នាសមល្មម ដើម្បីងាយស្រួលក្នុងការសំណេះសំណាលគ្នា៕
December 29, 2020
កសិដ្ឋានរបស់ Michael Jackson ត្រូវបានលក់ក្នុងតម្លៃជាង 20 លានដុល្លារអាមេរិក
ធ្លាប់ត្រូវបានដាក់លក់ក្នុងតម្លៃ 100 លានដុល្លារអាមេរិក ប៉ុន្តែមកដល់បច្ចុប្បន្ន កសិដ្ឋានរបស់អតីតកំពូលតារាចម្រៀង លោក Michael Jackson ទើបតែមានអ្នកទិញក្នុងតម្លៃត្រឹមតែ 22 លានដុល្លារប៉ុណ្ណោះ។
កសិដ្ឋាន Neverland នៅ California របស់ Michael Jackson បានរកឃើញម្ចាស់ថ្មីរបស់វា នោះគឺមហាសេដ្ឋី Ron Burkle។ អ្នកជំនួញនេះ ធ្លាប់ជាសហការីរបស់ Michael Jackson និងជាសហស្ថាបនិកនៃក្រុមហ៊ុនវិនិយោគ Yucaipa Compaies។
Neverland ធ្លាប់ត្រូវបានដាក់លក់ក្នុងតម្លៃ 100 លានដុល្លារកាលពីឆ្នាំ 2015 ហើយក្រោយមកក៏បានថយមកនៅត្រឹម 67 លានដុល្លារក្នុងឆ្នាំ 2016 រួចក៏ធ្លាក់ថ្លៃមួយកម្រិត ដោយមកនៅត្រឹម 31 លានដុល្លារកាលពីឆ្នាំមុន។ ប៉ុន្តែ មហាសេដ្ឋី Burkle បានយល់ព្រមទិញក្នុងតម្លៃ 22 លានដុល្លារ នាចុងឆ្នាំ 2020 នេះ។ អ្នកនាំពាក្យរបស់លោក Burkle និយាយថា ថៅកែរបស់លោកចាត់ទុកដីទំហំ 1,000 ហិកតានេះថាជាឱកាសល្អសម្រាប់ជំនួញ។
លោក Burkle ចាប់អារម្មណ៍ទៅលើ Zaca Lake ដែលស្ថិតនៅក្បែរកសិដ្ឋានរបស់ Michael Jackson និងទុកវាដូចទៅនឹងទីតាំងថ្មីសម្រាប់ Soho House ជាក្លឹបមួយសម្រាប់តែសមាជិកប៉ុណ្នោះ ដែលវាមានទីតាំងនៅ Los Angeles, Miami, New York និង Toronto។
ប៉ុន្តែ ចុងក្រោយ Burkle យល់ថា Zaca Lake មានទីតាំងនៅឆ្ងាយ និងថ្លៃពេក ដូច្នេះ ក្រោយពីបានពិនិត្យមើលកសិដ្ឋានរបស់ Michael Jackson ពីលើអាកាស លោកក៏បានទាក់ទងដើម្បីទិញ។ មហាសេដ្ឋី Burkle បច្ចុប្បន្នគឺជាម្ចាស់ភាគហ៊ុនធំបំផុតរបស់ Soho House។
មុនពេលបានធ្លាក់មកដល់ដៃម្ចាស់ថ្មី កសិដ្ឋាន Neverland ត្រូវបានគ្រប់គ្រងដោយលោក Michael Jackson និងមូលនិធិវិនិយោគលើអចលនទ្រព្យ Colony Capital។ ក្រុមហ៊ុនវិនិយោគរួមគ្នានេះត្រូវបានបង្កើតឡើងក្រោយពី Colony «សង្គ្រោះ» Michael Jackson ពីការក្ស័យធនដោយប្រាក់ឥណទានដែលយកកសិដ្ឋានខាងលើធ្វើជារបស់បញ្ចាំ។
ដំបូងឡើយ Michael Jackson បានទិញកសិដ្ឋាន Neverland នេះក្នុងតម្លៃ 19.5 លានដុល្លារអាមេរិកកាលពីឆ្នាំ 1987។ លោកបានធ្វើឱ្យ Neverland ល្បីឈ្មោះ ដោយសារសាងសង់ហេដ្ឋារចនាសម្ព័ន្ធជាច្រើនបន្ថែមទៀត ដូចជា ផ្លូវរថភ្លើង និងឧទ្យាសម្រាប់កម្សាន្តជាដើម។ ក្នុងឧទ្យាននេះក៏មានចិញ្ចឹមសត្វស្វាធំៗ និងសត្វដំរីផងដែរ។
កសិដ្ឋាននេះមានសំណង់សរុបចំនួនជាង 22 ក្នុងនោះមានវិមានបែប Normandy ដែលមានផ្ទៃក្រឡាទំហំ 1,100 ម៉ែត្រ។ ក្រៅពីនេះក៏មានផ្ទះសម្រាប់សម្រាកលម្ហែកាយ ទីលានបាល់បោះ ទីលានវាយកូនបាល់ រោងភាពយន្តដែលអាចផ្ទុកមនុស្សបាន 50 នាក់។ បន្ទាប់ពិលោក Jackson បានទទួលមរណភាព កសិដ្ឋាននេះត្រូវបានប្ដូរឈ្មោះទៅជា Sycamore Valley Ranch។
មហាសេដ្ឋី Ron Burkle គឺជាមនុស្សម្នាក់ដែលស្រលាញ់ចូលចិត្តស្ថាបត្យកម្មល្បីៗ និងបានកាន់កាប់ផ្ទះជាច្រើនខ្នងដែលគួរឱ្យចាប់អារម្មណ៍ រួមមាន Ennis House នៅ Los Angeles ដែលរចនាដោយ Frank Lloyd Wright និងត្រូវបានលក់ក្នុងតម្លៃ 18 លានដុល្លារកាលពីឆ្នាំមុន ក្រោយពីជួសជុលអស់ 10 លានដុល្លារ។ Burkle ក៏កាន់កាប់ផ្ទះមួយខ្នងមានឈ្មោះថា John Lautner នៅតំបន់ Palm Springs ដែលត្រូវបានរចនា និងសាងសង់កាលពីទសវត្សរ៍ឆ្នាំ 70 សម្រាប់តារាសិល្បអាមេរិក ដែលមានឈ្មោះថា Bob និង Dolores Hope៕
ប្រភព៖ WSJ
December 29, 2020
ចិនបើកទ្វារតេឡេស្កុបវិទ្យុធំជាងគេលើផែនដី ដើម្បីទទួលសហគមន៍អ្នកតារាសាស្ត្រអន្តរជាតិ
តេឡេស្កុបរលកវិទ្យុ FAST ចូលមកជំនួសស្ថានីយសង្កេតតារា Arecibo ដើម្បីជួយដល់សហគមន៍អ្នកស្រាវជ្រាវ បន្តស្វែងរកដាននៃជីវិតនៅក្នុងចក្រវាល។
តេឡេស្កុបដែលមានរូបរាងពាក់កណ្ដាលរង្វង់មូល និងមានជម្រៅ 500ម ស្ថិតនៅក្នុងស្រុក Pingtang ខេត្ត Quizhou ប្រទេសចិន និងមានឈ្មោះថា FAST បានយកឈ្នះលើស្ថានីយសង្កេតអវកាស Arecibo នៅតំបន់ Puerto Rico ហើយក្លាយជាតេឡេស្កុបវិទ្យុធំជាងគេក្នុងពិភពលោក បន្ទាប់ពីត្រូវបានសាងសង់រួចរាល់កាលពីឆ្នាំ 2016។ មុននេះ ស្ថានីយ Arecibo កាន់កាប់ឯតទគ្គកម្មនេះក្នុងរយៈពេល 53 ឆ្នាំ។ ក្រោយការដាច់ខ្សែកាបពីរលើកកាលពីដើមឆ្នាំ 2020 ស្ថានីយ Arecibo ក៏បានដួលរលំកាលពីខែវិច្ឆិកា 2020 បណ្ដាលឱ្យវាត្រូវបញ្ចប់សកម្មភាពទាំងស្រុង។ ជំនួសឱ្យ Arecibo ស្ថានីយតេឡេស្កុប FAST របស់ចិន កំពុងបើកទ្វារទទួលក្រុមតារាវិទូមកពីជុំវិញពិភពលោក។
«ក្រុមប្រឹក្សាវិទ្យាសាស្ត្ររបស់យើង មានទិសដៅបើកទ្វារទទួលសហគមន៍អន្តរជាតិ» Wang Qiming អ្នកគ្រប់គ្រងនៃមជ្ឈមណ្ឌលដំណើរការ និងអភិវឌ្ឍ FAST បានឱ្យដឹងដូច្នេះ។
ប្រទេសចិននឹងទទួលយកសំណើក្នុងការប្រើប្រាស់ឧបករណ៍ពីក្រុមអ្នកវិទ្យាសាស្ត្រអន្តរជាតិចាប់ពីឆ្នាំ 2021 តទៅ។ ជាមួយនឹងថាសស្រូបរលកវិទ្យុដែលមានអង្កត់ផ្ចិត 500 ម៉ែត្រ តេឡេស្កុប FAST មិនត្រឹមតែធំជាងតេឡេស្កុប Arecibo ដែលបានខូចទាំងស្រុងហើយនោះទេ តែវាក៏មានថាមពលខ្លាំងជាងដល់ទៅ 3 ដងឯណោះ។ ត្រូវបានចាប់ពីដំណើរការតាំងតែពីខែមករា ឆ្នាំ 2020 តេឡេស្កុប FAST ថែមទាំងព័ទ្ធជុំវិញដោយតំបន់ដែលត្រូវកាត់បន្ថយរលកសញ្ញារំខានដែលមានអង្កត់ផ្ចិត 5 គម ដែលក្នុងតំបន់នេះ មិនអនុញ្ញាតឱ្យប្រើប្រាស់ទូរស័ព្ទចល័ត និងកុំព្យូទ័រនោះទេ។
តេឡេស្កុបរលកវិទ្យុដូចជា FAST នេះ ប្រើប្រាស់អង់តែន និងបង្គោលស្រូបរលកសញ្ញាដើម្បីរុករករលកវិទ្យុដែលផ្សាយចេញពីទីអវកាស ដូចជាផ្កាយ កាឡាក់ស៊ី និងប្រហោងខ្មៅជាដើម។ ឧបករណ៍បែបនេះអាចប្រើដើម្បីបញ្ចេញរលកវិទ្យុ ឬចំណាំងផ្លាតពន្លឺពីវត្ថុអវកាសនៅក្នុងប្រព័ន្ធព្រះអាទិត្យទៀតផង។ អ្នកវិទ្យាសាស្ត្រអាចប្រើប្រាស់ FAST (Five-hundred-meter Aperture Spherical Radio Telescope) ដើម្បីស្វែងយល់អំពីអវកាស ក៏ដូចជាភពដែលនៅក្រៅប្រព័ន្ធព្រះអាទិត្យ ហើយអាចកំណត់បានថា ពួកវាកំពុងស្ថិតនៅក្នុងតំបន់អំណោយផលសម្រាប់កកើតជីវិតបានដែរ ឬយ៉ាងណាផងដែរ៕
ប្រភព៖ Live Science
December 28, 2020
គន្លឹះល្អៗក្នុងការចម្អិនម្ហូបអាហារបែបចៀន ឬបំពង
មានប្អូនៗស្ត្រីមេផ្ទះថ្មោងថ្មីជាច្រើននាក់ណាស់ ដែលតែងតែមានបញ្ហាក្នុងរឿងចៀន ឬបំពងត្រី ឬសាច់ផ្សេងៗ ដោយមិនដឹងជាត្រូវធ្វើយ៉ាងណាដើម្បីឱ្យឆ្អិនល្អ មិនជាប់ខ្ទះ និងមានពណ៌ស្អាតគួរឱ្យចង់ទទួលទាន…។ ខាងក្រោមនេះ គឺជាចំណេះដឹងល្អៗពាក់ព័ន្ធនឹងការចៀន ឬបំពងត្រី ឬសាច់ផ្សេងៗដែលស្ត្រីមេផ្ទះយើងបានដឹងហើយ ច្បាស់ជាចង់សាកល្បងធ្វើតាមជាមិនខាន។
មើមខ្ញីជួយឱ្យត្រីចៀនមិនជាប់ខ្ទះ
នេះជាវិធីមួយដែលនឹងជួយឱ្យពេលចុងភៅ(មិនសូវ)ចំណានដូចយើងប្រុងចៀនត្រី វិធីតទៅនេះនឹងមិនធ្វើឱ្យត្រីជាប់ខ្ទះឡើយ។ វិធីនោះគឺ ពេលចាក់ខ្លាញ់ ឬប្រេងឆាចូលទៅក្នុងខ្ទះ និងទុកឱ្យក្តៅល្មមហើយ សូមយកមើមខ្ញីស្រស់ៗមកហាន់ជាបន្ទះស្តើងៗប្រមាណជា 2-3បន្ទះ រួចដាក់ចូលទៅក្នុងខ្ទះដែលមានខ្លាញ់ក្តៅស្រាប់ហើយនោះ។ រង់ចាំឱ្យបន្ទះខ្ញីនោះឡើងក្រៀមហើយសឹមដួសចេញ រួចដាក់ត្រីចូលទៅចៀន ត្រីនោះនឹងមិនជាប់ខ្ទះឡើយ(ធានា!)។
វិធីចៀនសាច់ត្រីឱ្យមានពណ៌លឿងស្អាត មិនបែក ឃើញហើយគួរឱ្យចង់ទទួលទាន
ស្ត្រីមេផ្ទះទាំងឡាយប្រហែលជាធ្លាប់ជួបច្រើនដងមកហើយ នៅពេលដែលចង់ពិសាសាច់ត្រីចៀនឱ្យឆ្ងាញ់មាត់ម្តង តែបែរជាជួបនូវសាច់ត្រីចៀនដែលបែកខ្ទេច ឬបាក់ដាច់ជាបំណែកតូចៗ ឃើញហើយមិនចង់ឱ្យទទួលទានសោះ…ថ្ងៃនេះ អ្នកគ្រូ ឆវីមានតិចនិកក្នុងការចៀនត្រីបែបថ្មី មកជម្រាបជូន ធានាថា សាច់ត្រីនឹងនៅជាដុំមូល មិនបែក និងមានពណ៌គួរឱ្យចង់ញ៉ាំទៀតផង ។
- ដាក់ខ្លាញ់ ឬប្រេងចៀននៅលើភ្លើងឱ្យក្តៅខ្លាំងជាមុនសិន។
- ដាក់សាច់ត្រីចូលទៅចៀន ដោយដាក់ខាងស្បែកចុះក្រោម ព្រោះកន្លែងសាច់ជាប់ស្បែកក្រឆ្អឹនជាងកន្លែង សាច់សុទ្ធ។
- យកវែកឆា ឬវែកឈើសម្រាប់ចៀនសាច់សង្កត់លើសាច់ត្រីតិចៗ ដើម្បីកុំឱ្យសាច់ត្រី-ងឡើង និងកុំប្រែចុះឡើងញឹកញាប់ដោយមិនចាំបាច់ គួរទុកឱ្យឆ្អឹនម្តងម្ខាង។
- ពេលសាច់ខាងស្បែកនោះឆ្អឹនក្រៀមល្អហើយ សឹមត្រឡប់ឱ្យសាច់ខាងលើទៅនៅខាងក្រោមម្តង និងចៀនរហូតឡើងឆ្អឹនក្រៀម សឹមស្រង់ឡើង ទុកឱ្យស្រក់ខ្លាញ់អស់។
ចូរកុំភ្លេច មុនពេលដាក់ចៀន អ្នកគួររោយអំបឹលពីលើសាច់ត្រីឱ្យសព្វ ដើម្បីការពារកុំឱ្យសាច់ត្រីជាប់ខ្ទះ។
គន្លឹះក្នុងការបំពងសាច់មាន់ ឱ្យស្រួយខាងក្រៅ ទន់ខាងក្នុង
យកសាច់មាន់ដែលលាងហើយទៅដាក់សំដឹលខ្យល់ឱ្យស្ងួត។ បុកមើមខ្ទឹមស និងគ្រាប់ម្រេញឱ្យបែកល្អិតចូលគ្នាសព្វ ដាក់អំបឹលចូល ហើយយកទៅប្រឡាក់ផ្អាប់ជាមួយសាច់មាន់ដែលសំដឹលស្ងួតហើយនោះ រួចទុកចោលយ៉ាងតិចឱ្យបានកន្លះម៉ោង។ បន្ទាប់ពីនោះយកមកដាក់ក្នុងចាន ហើយយកទៅដាក់ចំហុយនៅក្នុងឡាំងស៊ឹង(ឆ្នាំងសម្រាប់ចំហុយ) ដែលមានទឹកពុះជាស្រេច(ដាំទឹកឱ្យពុះសិន សឹមដាក់សាច់មាន់ចូលចំហុយ)។ ចំហុយរហូតសាច់មាន់ឆ្អឹនល្មម សឹមយកចេញពីក្នុងឡាំងស៊ឹង ទុកឱ្យត្រជាក់ និងដាក់សំដឹលខ្យល់ឱ្យស្ងួត រួចហើយយកសាច់មាន់មកច្របល់ជាមួយ និងម្សៅសាលី(ឬម្សៅបំពងស្រួយក៏បាន) បន្ទាប់មកយកទៅជ្រលក់នៅក្នុងទឹកស៊ុតក្រឡុក រួចទើបយកទៅចៀនបំពងនៅក្នុងខ្លាញ់ដែលកំពុងក្តៅខ្លាំង ដោយប្រើភ្លើងខ្លាំងល្មម។ ពេលមើលឃើញម្សៅស៊ុតខាងក្រៅឆ្អឹនឡើងពណ៌លឿងស្រួយហើយ ចូរយកចង្កឹះចាប់ស្រង់ឡើងយកមកទុកឱ្យស្រក់ខ្លាញ់អស់…តែប៉ុណ្ណឹងលោកអ្នកនឹងបានសាច់មាន់បំពងដែលស្រួយក្រៅ ទន់ក្នុង មកទទួលទានយ៉ាងឆ្ងាញ់មាត់មិនខាន៕
December 28, 2020
Ronaldo ឈ្នះពានកីឡាករប្រចាំសតវត្សរ៍ទី21 ក្រោយយកឈ្នះ Messi, Ronaldinho និង Salah ដោយការបោះឆ្នោត
Global Soccer បានប្រកាសពីបុគ្គលជយលាភីនានា ដែលបានឈ្នះពានរង្វាន់ចំនួន10 ពីកម្មវិធី Global Soccer Award របស់ខ្លួន ដែលកម្មវិធីនេះ បានប្រារព្វឡើង កាលពីយប់រំលងអធ្រាត្រ ថ្ងៃច័ន្ទ ទី18 ខែធ្នូ នៅទីក្រុងឌូបៃ ប្រទេសអារ៉ាប់រួម។ អ្វីដែលគួរឱ្យចាប់អារម្មណ៍ខ្លាំងនោះ គឺនៅឆ្នាំនេះ Messi ត្រូវបានគេអញ្ជើញឱ្យធ្វើជាវាគ្មិនកិត្តិយស ក្នុងកម្មវិធីនេះ តែមិនបានឈ្នះពានអ្វីឡើយ បើទោះបីជាមានឈ្មោះប្រជែងពានកីឡាករល្អ ប្រចាំទសវត្សរ៍ក៏ដោយ ។
Christiano Ronaldo ទទួលបានសំឡេងគាំទ្រច្រើនជាង Lionel Messi , Ronaldinho និង Mohamed Salah ទៅទៀត។ ដោយរូបគេ ត្រូវបានចាត់ទុកជាកីឡាករល្អបំផុតនៅសតវត្សរ៍ទី21នេះ ក្រោយពីឈ្នះពានរង្វាន់ UEFA Champions League 5ដង Premier League 3ដងនៅ Man Utd , La Liga 2ដង ជាមួយ Real Madrid និង Euro 1ដង និង Nations League 1ដង ជាមួយក្រុមជម្រើសជាតិព័រទុយហ្គាល់។
ព្រឹត្ដិការណ៍ Globe Soccer Awards គឺជាកម្មវិធី ដែលជ្រើសរើសកីឡាករ និងគ្រូបង្វឹកឆ្នើម មកពីទូទាំងពិភពលោក ដែលតែងតែធ្វើឡើងជារៀងរាល់ឆ្នាំ ចាប់តាំងពីឆ្នាំ2010 មក នៅក្នុងទីក្រុង Dubai ប្រទេសអារ៉ាប់រួម ដែលផ្តួចផ្តើមឡើងដោយ Globe Soccer៕
December 28, 2020
Messi ចង់ទៅបញ្ចប់អាជីពបាល់ទាត់នៅអាមេរិក ហើយថា ក្លិប Barcelona ឆ្កួត!
កាលពីពេលថ្មីៗនេះ កីឡាករខ្សែប្រយុទ្ធ Lionel Messi របស់ FC Barcelona បានបង្ហើបពីគោលដៅអនាគតរបស់ខ្លួនថា រូបគេមានគោលបំណងមួយ គឺទៅប្រកបអាជីពបាល់ទាត់ នៅលីគកំពូលសហរដ្ឋអាមេរិក (Major Soccer League – MSL)។
កីឡាករអាហ្សង់ទីនរូបនេះ បានបង្ហាញថា គេនឹងចាកចេញពីក្លិប FC Barcelona ក្រោយពីបញ្ចប់រដូវកាលនេះ តែមិនទាន់ច្បាស់ថា នឹងទៅកាន់ក្លិបថ្មីណាមួយនៅឡើយទេ។ គេក៏បានបញ្ជាក់ដែរថា គម្រោងទៅលេងនៅអាមេរិកនេះ គេនឹងសម្រេចឱ្យខាងតែបាន តែមិនមែនក្រោយពេលដែលគេចេញពី Barcelona នេះឡើយ។
Messi បានហៅការចាកចេញរបស់ Suarez ថា ជារឿងឆ្កួតបំផុត ដែលក្លិប Barcelona បានធ្វើចំពោះកីឡាកររបស់ខ្លួន។ ការបណ្ដោយឱ្យខ្សែប្រយុទ្ធដែលធ្លាប់ជួយឱ្យក្លិបឈ្នះពានជាច្រើន ចាកចេញដោយរបៀបនេះ គឺមិនស័ក្ដិសមនោះទេ។ Suarez មិនគួរទទួលបានការចាកចេញបែបនេះឡើយ ព្រោះរូបគេបានជួយដល់ក្លិបមួយនេះច្រើនណាស់៕
December 28, 2020