Category: សង្គម និងសេដ្ឋកិច្ច

ប្រយោជន៍របស់ផ្លែក្រូចឆ្មារជាមួយការងារក្នុងផ្ទះ ដែលបងៗស្រ្តីមេផ្ទះជាច្រើននាក់អាចមិនធ្លាប់បានដឹងថា ការពិតទៅផ្លែក្រូចឆ្មារអាចធ្វើអ្វីៗផ្សេងទៀតបានច្រើនជាងគ្រាន់តែជាគ្រឿងគ្រៅសម្រាប់បន្ថែមរសជាតិអាហារទៅទៀត។

1. កម្ចាត់ក្លិនសំរាម : កម្ចាត់ក្លិនស្អុយៗក្នុងធុងសំរាម ដោយការពុះផ្លែក្រូចឆ្មារជា 4ចំណែក ហើយបោះចូលទៅក្នុងធុងសំរាម ព្រមជាមួយទឹកសូដា 1ស្លាបព្រាកាហ្វេ ដើម្បីជួយបង្អាក់កុំឱ្យមានក្លិនសំរាមស្អុយពេញក្នុងផ្ទះ ទម្រាំនឹងដល់ពេលត្រូវយកទៅចោលនៅពេលឡានសំរាមមកដល់។
2. បន្ថែមភាពស្រស់ស្រាយឱ្យទឹកថ្នាំជូតសម្អាត : បន្ថែមទឹកក្រូចឆ្មារ 2 – 3ស្លាបព្រាកាហ្វេ ចូលទៅក្នុងទឹកថ្នាំជូតសម្អាតវត្ថុផ្សេងៗ ដើម្បីជួយសាងក្លិនក្រអូបស្រស់ស្រាយតាមធម្មជាតិក្នុងពេលប្រើប្រាស់។
3. កម្ចាត់ស្នាមប្រឡាក់លើកម្រាលតុ : បើមានស្នាមខ្លាញ់ៗរបស់ម្ហូបអាហារជាប់នៅលើក្រណាត់កម្រាលតុ ចូរយកចំណិតផ្លែក្រូចឆ្មារមកដុសនៅលើស្នាមប្រឡាក់នោះ រួចហើយយកទៅហាលថ្ងៃចោល 2 – 3ម៉ោង បន្ទាប់ពីនោះមកសឹមយកទៅបោកគក់តាមប្រក្រតី។
4. ការពារសាច់ផ្លែប៉ាមដូរពណ៌ : យកចំណិតផ្លែប៉ោមដែលចិតហើយ ទៅដាក់ត្រាំក្នុងទឹកស្អាតដែលមានលាយទឹកក្រូចឆ្មារ ដើម្បីបង្អាក់មិនឱ្យសាច់ផ្លែប៉ោមប្តូរពណ៌ទៅជាពណ៌ស្ករ(ដោយសារជ័រ) និងដើម្បីឱ្យពណ៌របស់វានៅតែស្រស់គួរឱ្យចង់ញ៉ាំដដែល។
5. សម្អាតជ្រញ់ហាន់ម្ហូបអាហារ : កម្ចាត់ស្នាម និងក្លិននៅលើជ្រញ់ ដោយការដុសសម្អាតនឹងចំណិតក្រូចឆ្មារឱ្យសព្វលើជ្រញ់ បន្ទាប់មក លាងឱ្យស្អាត និងយកទៅដាក់ហាលថ្ងៃឱ្យស្ងួត។
6. ដេញស្រមោច និងសត្វល្អិត : បន្តក់ទឹកក្រូចឆ្មារ ដើម្បីស្ទាក់ផ្លូវដើររបស់ហ្វូងស្រមោច មិនថានៅលើកម្រាលឥដ្ឋ ឬស្នាមប្រេះបែកផ្សេងៗនោះទេ ព្រោះក្លិនឆួលរបស់ទឹកក្រូចឆ្មារ នឹងធ្វើឱ្យសត្វស្រមោចលែងហ៊ានមករញេរញ៉ៃនៅម្តុំនោះទៀត ក្រៅពីនេះនៅអាចប្រើចំណិតផ្លែក្រូចឆ្មារដេញសត្វពីងពាង ឬកន្លាតបានទៀតផង។
7. ធ្វើឱ្យកែវ និងកញ្ចក់ឡើងភ្លឺថ្លា : បន្តក់ទឹកក្រូចឆ្មារទៅក្នុងទឹកសាប៊ូលាងចាន ដើម្បីលាងកែវឱ្យស្អាតភ្លឺថ្លាដូចទើបតែទិញមកថ្មី ឬលាយជាមួយទឹកដើម្បីជូតកញ្ចក់ឱ្យស្អាតភ្លឺឆ្លុះ ក៏បានដូចគ្នា។
8. ធ្វើឱ្យឧបករណ៍ផ្ទះបាយដែលធ្វើពីដែកអុីណុកឡើងភ្លឺចាំងរលោង : កម្ចាត់ស្នាមកំណកទឹកដែលតោងជាប់ស្អិតនៅលើឧបករណ៍ដែលធ្វើពីដែកអុីណុក ដោយការយកចំណិតផ្លែក្រូចឆ្មារមកដុសលើឧបករណ៍ទាំងនោះតែម្តង មិនចាំបាច់ប្រើផលិតផលលាងសម្អាតណាបន្ថែមឡើយ តែប៉ុណ្ណឹងក៏ភ្លឺចាំងដូចថ្មីទៅហើយ។
9. ការពារបាយជាប់ឆ្នាំង : បន្តក់ទឹកក្រូចឆ្មារចូលទៅក្នុងឆ្នាំង ឬខ្ទះពេលចង់ចម្អិនអាហារប្រភេទបាយ(ដូចជាដាំបាយ ឆាបាយ ជាដើម) វានឹងជួយមិនឱ្យបាយជាប់ខ្ទះ និងថែមទាំងធ្វើឱ្យគ្រាប់បាយរៀងគ្នាល្អគួរឱ្យចង់ញ៉ាំទៀតផង។
10. កម្ចាត់ស្នាមប្រឡាក់នៅលើខោអាវ : កម្ចាត់ស្នាមញើស ស្នាមដុះផ្សឹត ខ្លាញ់ ឬស្រា លើខោអាវយ៉ាងងាយៗដោយទឹកក្រូចឆ្មារ ដោយគ្រាន់តែយកចំណិតផ្លែក្រូ​ច​ឆ្មារ​មកដុសជាមួយអំបឹលនៅលើកន្លែងដែលមានស្នាមប្រឡាក់នោះតែម្តង បន្ទាប់ពីនោះមកសឹមយកទៅបោកគក់សម្អាតតាមធម្មតា។

(នៅមានត)

ឧបករណ៍​បង្កើត​ប្រតិកម្ម​នុយ​ក្លេ​អែ tokamak ដែល​ប្រើប្រាស់​ដែន​ម៉ាញេទិក​ដ៏​ខ្លាំងក្លា​ដើម្បី​រារាំង plasma ដ៏​សែន​ក្ដៅ​មិនឱ្យ​ប៉ះពាល់​ទៅនឹង​គ្រឿង​ម៉ាស៊ីន ដែល​អាចធ្វើឱ្យ​លោហធាតុ​ត្រូវ​រលាយ​និង​ហួត​ជា​ចំហាយ។

ឧបករណ៍​បង្កើត​ប្រតិកម្ម​នុយ​ក្លេ​អែ tokamak របស់​កូរ៉េខាងត្បូង (KSTAR) បាន​បង្កើត​ឯតទគ្គ​ម្ម​ពិភពលោក​ថ្មី នៅពេល​រក្សា plasma ក្នុង​សីតុណ្ហភាព ion ដែល​លើសពី 100 លាន​អង្សា​សេ​ក្នុង​រយៈពេល 20 វិនាទី កាលពី​ថ្ងៃទី 24 ខែធ្នូ ឆ្នាំ 2020។ នេះ​គឺជា​ការបោះ​ជំហាន​ដ៏​ធំ និង​យ៉ាងសំខាន់​មួយ​ក្នុង​គោលដៅ​ប្រកបដោយ​មហិច្ឆតា​ក្នុងការ​បង្កើត​ថាមពល​ស្អាត​ជាង​មុន តាមរយៈ​ប្រតិកម្ម​សំយោគ​នុយ​ក្លេ​អែ។

ក្នុងដំណាក់កាល​ប្រតិកម្ម នុយ​ក្លេ​អែ​អាតូម​ពីរ​ដែលមាន​ទំហំ​តូច រួមបញ្ចូល​គ្នា​បង្កើតបានជា​នុយ​ក្លេ​អែ​អាតូម​ដែល​ធំ​ជាង នាំឱ្យ​បង្កើតបានជា​ថាមពល។ ដើម្បី​ធ្វើបាន​ដូច្នេះ បណ្ដា​អ៊ីសូតូប (isotopes) អ៊ីដ្រូសែន ត្រូវ​បានដាក់​នៅក្នុង​ឡ​ប្រតិកម្ម​នុយ​ក្លេ​អែ tokamak ដូចជា KSTAR ដើម្បី​បង្កើត plasma ជា​កន្លែង​ដែល​អ៊ីយ៉ុង(ion) និង អេ​ឡិច​ត្រុ​ង (electron) ត្រូវបាន​បំបែកចេញ​ពីគ្នា បន្ទាប់មក អ៊ីយ៉ុង​ត្រូវបាន​កម្ដៅ និង​រក្សា​នៅក្នុង​សីតុណ្ហ​​ភាព​មហា​ក្ដៅ។

Tokamak បង្កើត​ដែន​ម៉ាញេទិកខ្លាំងៗចំនួន​បី​ដើម្បី​ទប់ plasma ដែល​ឡើងក​ម្ដៅ​ខ្លាំង។ កម្លាំង​ខ្លាំង​នៃ​ដែន​ម៉ាញេទិក​ត្រូវបាន​បង្កើតឡើង​ដើម្បី​ទប់​មិនឱ្យ plasma ប៉ះ​នឹង​គ្រឿង​ម៉ាស៊ីន ព្រោះថា plasma អាចធ្វើឱ្យ​លោហធាតុ​រលាយ​បើសិន​វា​ចេញមកក្រៅ។

ប្រព័ន្ធ​ខ្សែ​រុំ​ម៉ាញេទិក​នៅ​ខាងក្រៅ ជួយ​កំណត់​ទិស និង​កំណត់​រូបរាង plasma ដែល​ក្ដៅ​ខ្លាំង ឱ្យ​ស្ថិតនៅក្នុង​ទម្រង់រ​ង្វិ​ល​ជុំ ក្នុង​បំណង​រក្សា​ស្ថិរភាព​របស់ plasma ឱ្យ​បានយូរ​គ្រប់គ្រាន់​ដើម្បី​កកើត​ប្រតិកម្ម​នុយ​ក្លេ​អែ៕

ប្រភព៖ Next

ក្រុមហ៊ុន Boston Dynamics បាន​ចែករំលែក​វីដេអូ​ថ្មី​បំផុត​មួយ​របស់ខ្លួន បង្ហាញ​អំពី​សកម្មភាព​របស់​ឆ្កែ​យន្ត និង​រ៉ូ​បូត​ជាច្រើន​ទៀត នាំគ្នា​រាំរែក​ទៅតាម​ចង្វាក់​នៃ​បទ​ចម្រៀង​ដែលមាន​ចំណងជើង​ថា «Do You Love Me» របស់​ក្រុម​ចម្រៀង Contours ដើម្បី​ជូនពរ​ឆ្នាំ​ថ្មី។

ក្នុង​វីដេអូ​នេះ គេ​ឃើញ​មាន​វត្តមាន​របស់​មនុស្ស​យន្ត Atlas ឆ្កែ​យន្ត Spot និង​រ៉ូ​បូត​ជញ្ជូន​ទំនិញ Handle ផងដែរ។ ពួកគេ​រាំ​ទៅតាម​ចង្វាក់ភ្លេង​នៃ​បទ​ចម្រៀង​ដ៏​ល្បីល្បាញ​នៃ​ទសវត្សរ៍​ឆ្នាំ 1962 ហើយ​បាន​ទាក់ទាញ​អ្នក​ចូល​មើល​ជិត 5 សែន​នាក់។

មហាសេដ្ឋី​អាមេរិក​ដើមកំណើត​អាហ្វ្រិក​ខាងត្បូង លោក Elon Musk ក៏បាន​សំដែង​ការកោតសរសើរ​ផងដែរ បន្ទាប់ពី​បាន​មើល​វីដេអូ​នេះ។ លោក Musk បញ្ចេញយោបល់​ថា៖ «នេះ​មិនមែនជា​ការកាត់ត​នោះទេ»។

Boston Dynamics បានធ្វើឱ្យ​មានការ​ភ្ញាក់ផ្អើល​ខ្លាំង​បន្ទាប់ពី​បាន​ដំណើរការ​កាលពី​ឆ្នាំ 2009 ហើយ​បាន​ឧទ្ទេសនាម Atlas ក្នុង​ឆ្នាំ 2013 និង Spot Classic ក្នុង​ឆ្នាំ 2015។ ចាប់ពីពេលនោះ​មក ក្រុមហ៊ុន​ក៏បាន​អភិវឌ្ឍ​ម៉ូ​ដែល​រ៉ូ​បូត​ជាច្រើន​ផ្សេងទៀត​ប្រកបដោយ​ភាព​ទាក់ទាញ និង​អាច​ប្រើប្រាស់​ក្នុង​វិស័យ​ឧស្សាហកម្ម និង​ពាណិជ្ជកម្ម។ រ៉ូ​បូត​របស់ Boston Dynamics អាច​ឈរ​ដោយ​ជើង 2 ឬ​ជើង 4 ក៏មាន។

ក្រុមហ៊ុន Boston Dynamics ឱ្យដឹងថា រ៉ូ​បូត Atlas ដែលមាន​កម្ពស់ 145សម និង​ទម្ងន់​ជាង 75គក ត្រូវបាន​រចនា​ឡើង​សម្រាប់​ធ្វើការ​នៅ​ខាងក្រៅ អគារ ឬ​លើ​ទីតាំង​ដែលមាន​សណ្ឋាន​ដី​រដិបរដុប។ Atlas អាច​ដើរ​ដោយ​ជើង 2 និង​ធ្វើការ​ស្ទើរតែ​ដូច​ទាំងស្រុង​ទៅនឹង​មនុស្ស។

ចំណែក​រ៉ូ​បូត Spot វិញ វា​អាចជួយ​ក្រុមគ្រូពេទ្យ​ក្នុងការ​ប្រយុទ្ធ​ប្រឆាំងនឹង Covid-19 និង​ដើរល្បាត​ជុំវិញ​ទីតាំង​ពិសោធន៍​នានា​របស់លោក Elon Musk នៅ​តំបន់ Boca Chica នៃ​រដ្ឋ Texas សហរដ្ឋអាមេរិក។

ចុងក្រោយ​គឺ​រ៉ូ​បូត Handle។ រ៉ូ​បូត​នេះ​អាច​ឈរ​នៅលើ​ប្រព័ន្ធ​កង់2 នៅក្នុងពេល​លើកដាក់​ទំនិញ។ ខណៈដែល Atlas និង Handle កំពុងស្ថិត​ក្នុងការ​អភិវឌ្ឍ​បន្ថែម រ៉ូ​បូត Spot ត្រូវបាន​ដាក់លក់​ក្នុង​ទីផ្សារ​ទៅហើយ៕

ប្រភព៖ New Atlas

ស្មា​ត​ហ្វូ​ន​ថ្មី​នេះ ត្រូវបាន Xiaomi ដាក់ឈ្មោះថា ជា​ស្មា​ត​ហ្វូ​ន Android ដំបូង​គេ​បង្អស់​ដែលមាន​បំពាក់​បន្ទះ​ឈី​ប លំដាប់​កំពូល​របស់ Qualcomm គឺ Snapdragon 888 ។ Xiaomi mi 11 ក៏​ជា​ស្មា​ត​ហ្វូ​ន​ដំបូង​គេ ដែល​អាច​វាស់​ចង្វាក់បេះដូង តាមរយៈ​បច្ចេកវិទ្យា​ស្គែ​ន​ដៃ​ក្រោម​អេក្រង់​មួយ​ដែរ។

អ្វីដែល​គេ​ចាប់អារម្មណ៍​ខ្លាំង​បំផុត​នោះ គឺ​ការ​រចនា​អេក្រង់​រូបរាង​កោង ស្ទើរតែ​គ្មាន​គែម ទំហំ 6.81អ៊ិ​ញ Super AMOLED ជាមួយនឹង QHD+ resolution និង​កម្រិត​អេក្រង់ 120Hz refresh rate ឯណោះ។ មិន​ត្រឹម​តែមាន​កម្រាស់​ស្ដើង​នោះទេ ប៉ុន្តែ​នៅមាន​កំណត់ចំណាំ​មុខងារ​មួយចំនួន ដូចជា​កាមេរ៉ា 108MP ទ្រាំទ្រ HDR10+ និង​ប្រព័ន្ធ​សំឡេង Harman Kardon ដ៏​ល្អ​មួយ នាពេល​បច្ចុប្បន្ន​ទៀតផង។

សម្រាប់​លក្ខណសម្បត្តិ​ផ្សេងទៀត​ដូចជា ថាមពល​ថ្ម​ទំហំ ៤៦០០ mAh មាន​ជម្រើស​ឆ្នាំង​សាក 55W wired fast-charging មួយទៀត 50W wireless និង​10W reverse charging តែ​មិន​ដាក់​ក្នុង​ប្រអប់​ឱ្យ​នោះទេ ត្រូវ​ទិញ​ថែម​ក្រៅ។

កាមេរ៉ា​មុខ​ក្រោម​អេក្រង់ ដែល​មើលទៅ​ហាក់ដូច​ប្រជ្រុយ​មួយ​នោះ មាន​ទំហំ​ដល់​ទៅ 20MP selfie ។ ឯ​កាមេរ៉ា​ក្រោយ2 គឺ​ទំហំ 13MP ultrawide angle ថត​បាន​មុំ 123-degree FoV  និង 1ទៀត លេន​ស៍ 5MP macro lens អាច​ថតរូប​នឹង​វីដេអូ​បានល្អ​ប្រសើរ​ដែរ។

Xiaomi mi 11 ជម្រើស RAM 8GB និង​មេម៉ូរី 128/256GB និង 1ទៀត គឺ RAM 12GB មេម៉ូរី 256GB ដាក់លក់​ក្នុងតម្លៃ​ប្រមាណ​ជា 610ដុល្លារ៕

កាលពី​ម្សិលមិញ​នេះ​ក្រុមហ៊ុន Xiaomi បានប្រកាស​ចេញ​ទូរស័ព្ទ​វៃឆ្លាត​ជំនាន់​ថ្មី Xiaomi Mi 11 ជា​ផ្លូវការ ដែល​ធ្វើឡើង​នៅក្នុង​ប្រទេស​ចិន។ Xiaomi Mi 11 នេះ មានតម្លៃ​ស្ថិតនៅ​ខ្ទង់ 610ដុល្លារ។

Xiaomi Mi 11 បាន​ក្លាយទៅជា​ទូរស័ព្ទ​ដំបូង​គេ ដែលមាន​សមត្ថភាព​អាច​វាស់​ចង្វាក់បេះដូង តាមរយៈ​បច្ចេកវិទ្យា​ស្គែ​ន​ក្រយៅដៃ ក្រោម​អេក្រង់ ហើយ​វា​ជា​ស្មា​ត​ហ្វូ​ន Android លំដាប់​កំពូល​ដំបូង​គេ​ដែល​មិនមាន​ឆ្នាំង​សាក​ភ្ជាប់​មកជា​មួយ​ដែរ។

បើ​យោងតាម​ការប្រកាស​ដោយ Xiaomi ផ្ទាល់ មូលហេតុ​ដែល Xiaomi មិន​ដាក់​ឆ្នាំង​សាក​នៅក្នុង​ប្រអប់​ទូរស័ព្ទ Xiaomi Mi 11 ក៏​ព្រោះតែ​ពួកគេ​ចង់​ចូលរួមចំណែក​ការពារ​បរិស្ថាន​ពិភពលោក ដូច Apple ដែរ។

យ៉ាងណាមិញ Xiaomi ក៏បានផ្តល់​ជម្រើស​ចំនួន2 សម្រាប់​អ្នក​ដែល​ចង់​ទិញ​ទូរស័ព្ទ​ឆ្លាត​វៃ ជំនាន់​ថ្មី Mi 11 យកទៅ​ប្រើប្រាស់ ដោយ​ជម្រើស​ទី1 មិនមាន​ឆ្នាំង​សាក​ភ្ជាប់​មកជា​មួយ និង​ជម្រើស​ទី2 ភ្ជាប់​មកជា​មួយ​ឆ្នាំង​សាក ពី​ក្រៅ​បន្ថែម ខុសពី​ក្រុមហ៊ុន Apple។

សម្រាប់​ជម្រើស​ទី2 ខាងលើនេះ គឺ​ផ្តល់ជូន​តែ​សម្រាប់​ដំណាក់កាល​ដាក់លក់​ដំបូង​តែប៉ុណ្ណោះ។ សម្រាប់​ដំណាក់កាល​ដាក់លក់ក្រោយៗ អ្នក​ត្រូវតែ​ចំណាយលុយ​ទិញ ឆ្នាំង​សាក​ពី​ក្រៅ​បន្ថែមទៀត៕

ថ្មីៗនេះ មាន​ព័ត៌មាន​លេចឮ​មួយ​ចេញពី Galaxy Club បានឱ្យដឹងថា ក្រុមហ៊ុន Samsung គ្រោង​នឹង​បញ្ចេញ​ស្មា​ត​ហ្វូ​ន​អាច​បត់​បាន ខ្សែស្រឡាយ Galaxy Z Flip3 ជាមួយនឹង​ជម្រើស​បន្ទះ​ឈី​ប​កម្រិត​កណ្ដាល និង​មានតម្លៃ​ធូរ​ថ្លៃ ជាង​ម៉ូ​ដែល  Z Flip 1 និង Z Flip 2 ដែល​ស្ថិតក្នុង​គម្រោង “mid-range foldables” ។

ស្មា​ត​ហ្វូ​ន​អាច​បត់​បាន ដូច​ប្រអប់​តុបតែង​មុខ​របស់នារីៗនេះ អាច​នឹង​រក្សា​ទំហំ​ប៉ុន​នេះ​ដដែល ប៉ុន្តែ​មាន​លក្ខ​ណស​ម្ប​តិ្តផ្សេងៗខ្លះ អាច​នឹងត្រូវ​កាត់បន្ថយ។ សម្រាប់ Z Flip ជំនា​ន់ទី1 មានតម្លៃ 1,949ដុល្លារ​អាមេរិក នៅ​កូរ៉េខាងត្បូង និង​ជំនា​ន់ទី2  Z Flip 2 មានតម្លៃ 1999ដុល្លារ។

Z Flip3 អាច​នឹងមាន​ជម្រើស​ដល់​ទៅ3 ឯណោះ គឺ​ធម្មតា 4G  និង 5G ដែល​សុទ្ធតែ​បំពាក់​បន្ទះ​ឈី​ប ស៊េរី Snapdragon 800 ដូចគ្នា។ នេះ​មានន័យថា  Z Flip3 ម៉ូ​ដែល​ធម្មតា ច្បាស់​ជាមាន​តម្លៃ​ធូរ​ថ្លៃ ក្រោម 1,000ដុល្លារ​មិន​ខាន៕

ស្ថាបត្យកម្ម​ចម្លាក់​ទឹកកក​ដែល​យក​គំរូ​តាម​ស្ថាបត្យកម្ម​ល្បីឈ្មោះ​នានា​របស់​ពិភពលោក កំពុង​ត្រូវបាន​តាំង​បង្ហាញ​នៅក្នុង​ឧទ្យាន​ដែលមាន​ទំហំ 600,000 ម៉ែត្រការ៉េ នៅ​ប្រទេស​ចិន។

ស្ថាបត្យកម្ម​ល្បីឈ្មោះ​នានា​របស់​ពិភពលោក មានដូចជា វិហារ Yekaterinburg របស់​រុស្ស៊ី មហោស្រប Dionysus របស់​ប្រទេស​ក្រិ​ក វិហារ Peter នៅ​ប្រទេស​ឡា​ត​វី​យ៉ា (Latvia) និង​ក្លោងទ្វារ Viru របស់​ប្រទេស​អេ​ស្តូ​នី (Estonia) ជាដើម ត្រូវបាន​ចម្លង​តាម​ដោយ​ក្រុម​ស្ថាបត្យករ តាមរយៈ​ចម្លាក់​នៅលើ​ទឹកកក និង​ត្រូវបាន​ចាប់ផ្ដើម​តាំង​បង្ហាញ​នៅក្នុង​ឧទ្យាន​មួយ​ដែលមាន​ទំហំ 600,000 ម៉ែត្រក្រឡា កាលពី​ថ្ងៃទី 24 ខែធ្នូ ឆ្នាំ2020 នៅក្នុង​ខេត្ត Heilongjiang ប្រទេស​ចិន។

ស្ថាបត្យកម្ម​ចម្លាក់​ទឹកកក​នេះ ត្រូវបាន​បង្កើតឡើង​ដោយ​ក្រុម​ស្ថាបត្យករ មកពី​ប្រទេស និង​តំបន់​ចំនួន 17 ក្នុង​ពិភពលោក ដោយ​ពួកគេ​នឹងចូលរួម​ប្រកួតប្រជែង​ស្នាដៃ​របស់ខ្លួន​តាមរយៈ​ចម្លាក់​ទឹកកក ដែល​តាម​គម្រោង​នឹងត្រូវ​បាន​ប្រារព្ធ​ឡើងជា​ផ្លូវការ​ចាប់ពី​ថ្ងៃទី 5 ខែមករា ឆ្នាំ 2021 ហើយក៏​នឹង​អូសបន្លាយ​រហូតដល់ 1 ខែ​ឯណោះ។

https://www.youtube.com/watch?v=l4NcKV-1Iww

នេះ​គឺជា​មួយ​ក្នុងចំណោម​ពិធីបុណ្យ​ទឹកកក​ធំជាងគេ​ទាំង 4 របស់​ពិភពលោក។ Harbin គឺជា​ទីកន្លែង​ចាប់កំណើត​នៃ​សិល្ប «គោម​ទឹកកក» របស់​ប្រទេស​ចិន៕

ប្រភព៖ Xinhua/CNS

អ្នក​ដែល​បាន​ចំណាយ​ប្រាក់​ច្រើនជាងគេបង្អស់​ដើម្បី​ទិញ​ផ្ទះមួយ​ខ្នង​នៅ​សហរដ្ឋអាមេរិក​ក្នុង​ឆ្នាំ 2020 នេះ​គឺជា​មហាសេដ្ឋី​លំដាប់​ទីមួយ​ក្នុង​ពិភពលោក និង​ជា​ម្ចាស់​នៃ​ក្រុមហ៊ុន​ផ្សារ​អន​ឡាញ Amazon។

ទីមួយ៖ Warner Estate (ក្នុង​ទីក្រុង Los Angeles រដ្ឋ California សហរដ្ឋអាមេរិក)

តម្លៃ​ទិញដូរ៖ 165 លាន​ដុល្លារ​អាមេរិក

កាលពី​ខែមេសា ឆ្នាំ 2020 លោក Jeff Bezos ដែលជា CEO របស់​ក្រុមហ៊ុន Amazon បានសម្រេច​ចិត្ត​ទិញ​ភូមិគ្រឹះ​មួយ​ដែលមាន​ឈ្មោះថា Warner Estate ដែល​ត្រូវបាន​សាងសង់ឡើង​សម្រាប់​លោក Jack Warner ដែលជា​អតីត​ប្រធាន​ក្រុមហ៊ុន Warner Bros កាលពី​ទសវត្សរ៍​ឆ្នាំ 1930។ នៅ​មុនពេល​ត្រូវបាន​លក់​មកឱ្យ Jeff Bezos ម្ចាស់​ចុងក្រោយ​របស់​ភូមិគ្រឹះ​នេះ​គឺមាន​ឈ្មោះថា David Gefen ។

ភូមិគ្រឹះ​ដែល​ត្រូវបាន​សាងសង់​នៅលើ​ផ្ទៃដី​ទំហំ 3.6 ហិកតា និង​ស្ថិតនៅក្នុង​តំបន់ Benedict Canyon នេះ មាន​ទីលាន​វាយកូនគោល ទីលាន​វាយ​កូន​បាល់ ផ្ទះ​សម្រាប់​ទទួលភ្ញៀវ និង​សួនច្បារ​ដែលមាន​ទំហំ​ធំ​ផងដែរ។

ទី​ពីរ៖ Jeffrey Katzenberg Estate (នៅ​ទីក្រុង Beverly Hills រដ្ឋ California)

តម្លៃ​ទិញដូរ៖ 125 លាន​ដុល្លារ​អាមេរិក

កាលពី​ខែសីហា អ្នក​ផលិត​ភាពយន្ត Jeffrey Katzenberg បាន​លក់​ផ្ទះ​របស់ខ្លួន​នៅ​ទីក្រុង Beverly Hills ក្នុងតម្លៃ 125 លាន​ដុល្លារ ទៅឱ្យ Jan Koum ដែលជា​សហ​ស្ថាបនិក​ម្នាក់​របស់​កម្មវិធី​ផ្ញើ​សារ WhatsApp។ ផ្ទះ​នេះ​មាន​ទំហំ 2,400 ម៉ែត្រការ៉េ ស្ថិតនៅលើ​ផ្ទៃដី​ទំហំ 2.8 ហិកតា។

ទី​បី៖ លំនៅដ្ឋាន​ដែល​ស្ថិតនៅ​ជាន់​លើ​គេ​បង្អស់ (Penthouse) នៃ​អគារ 220 Central Park South (Manhattan, New York)

តម្លៃ​ទិញដូរ៖ 99 លាន​ដុល្លារ​អាមេរិក

លំនៅដ្ឋាន​ដែល​ហៅថា penthouse ដែលមាន​បន្ទប់​គេង​ចំនួន 4 និង​មាន​ទំហំ 910 ម៉ែត្រការ៉េ ស្ថិតនៅលើ 220 Central Park South ដែលជា​អគារ​មួយ​ត្រូវបាន​រចនា​ដោយ​ក្រុមហ៊ុន​ស្ថាបត្យកម្ម Robert A.M. Stern Architects នេះ ត្រូវបាន​លក់​ឱ្យ​ម្ចាស់​ថ្មី​កាលពី​ខែកក្កដា ឆ្នាំ2020។ វា​ត្រូវបាន​ទិញ​ដំណាលគ្នា​ជាមួយនឹង​ជាន់​បន្ទាប់​ផ្ទាល់ ដែល​ត្រូវបាន​ប្រើប្រាស់​សម្រាប់​ទទួលភ្ញៀវ ឬ​កន្លែង​ស្នាក់នៅ​របស់​ម្ចាស់ penthouse ដូច្នេះហើយ​ទើប​តម្លៃ​សរុប​របស់​វា បាន​ឡើងដល់​ជិត 102 លាន​ដុល្លារ។

នេះ​គឺជា​ការ​ទិញដូរ​គេហដ្ឋាន​ដែលមាន​តម្លៃ​ខ្ពស់​ជាងគេ​លំដាប់​ទី​បី​នៅ​តំបន់ Manhattan។ ក៏ប៉ុន្តែ អត្តសញ្ញាណ​​របស់​​អ្នក​ទិញ​ penthouse នេះ មិនត្រូវ​បាន​គេ​បង្ហើប​ឱ្យដឹង​នោះទេ៕

ប្រភព៖ WSJ

ក្រុមហ៊ុន​អភិវឌ្ឍ និង​ផលិត​យន្តហោះ Airbus បានប្រកាស​បង្ហាញ​អំពី​គំរូ​យន្តហោះ​ដំណើរការ​ដោយ​ថាមពល​អ៊ីដ្រូសែន ដែលមាន​ប្រអប់​ម៉ាស៊ីន​ដាច់ដោយឡែក និង​ងាយស្រួល​ដោះចេញ នៅពេល​ជួប​បញ្ហា​ពេល​កំពុង​ហោះហើរ។

ថ្មីៗនេះ ក្រុមហ៊ុន Airbus បាន​ឧទ្ទេសនាម​ប្រភេទ​យន្តហោះ​ដំណើរការ​ដោយ​អ៊ីដ្រូសែន​ដែលមាន​លក្ខណពិសេស​ជាង​មុន ដោយ​ប្រព័ន្ធ​ថាមពល​អ៊ីដ្រូសែន​ត្រូវ​បានដាក់​នៅក្នុង​ប្រអប់​ដាច់ដោយឡែក ដែល​ងាយ​ឱ្យគេ​ដោះចេញ និង​បំពាក់​ឡើងវិញ​នៅលើ​ស្លាប​យន្តហោះ។

ប្រអប់​នេះ​នឹងមាន​ផ្ទុក​ឧស្ម័ន និង​ប្រព័ន្ធ​ម៉ាស៊ីន​ដោយឡែក​របស់​វា អនុញ្ញាតឱ្យ Airbus យក​ធុង​ដាក់​ឥន្ធនៈ​ទាំងអស់​ចេញពី​តួ​យន្តហោះ ដែល​ប្រការនេះ​នឹង​ជួយ​ឱ្យ​យន្តហោះ​មាន​កន្លែង​ទំនេរ​ច្រើនជាង​មុន​សម្រាប់​ដាក់​អីវ៉ាន់ និង​កៅអី​សម្រាប់​អ្នកដំណើរ។

ប្រអប់​ម៉ាស៊ីន និង​ឥន្ធនៈ​ដាច់ដោយឡែក​នេះ ក៏​ជួយ​កែលម្អ​ផ្នែក​សុវត្ថិភាព​ដល់​យន្តហោះ​ផងដែរ ព្រោះថា បើសិន​ប្រអប់​ម៉ាស៊ីន​ណាមួយ​ត្រូវ​ខូច ឬ​ឆេះ អ្នកបើកបរ​អាច​ឈប់​ប្រើប្រាស់ ឬ​ទម្លាក់​វា​ចោល រួច​ធ្វើឱ្យមាន​តុល្យភាព​លើ​កម្លាំង​រុញច្រាន​ឡើងវិញ តាមរយៈ​ប្រអប់​ម៉ាស៊ីន​ដែល​នៅសល់។

តាម​គម្រោង Airbus នឹង​បំពាក់​ប្រអប់​ម៉ាស៊ីន​ចំនួន 3 ទៅលើ​ស្លាបនីមួយៗ ហើយ​ប្រអប់នីមួយៗមាន​ធុង​អ៊ីដ្រូសែន​រាវ​អម​ជាមួយនឹង​ប្រព័ន្ធ​ទប់ទល់​កម្ដៅ​ដោយឡែក។ ក្រៅពីនេះ ប្រអប់​ម៉ាស៊ីន​ក៏​នឹងមាន​អាគុយ​ថាមពល​មួយ​គ្រាប់ ឧបករណ៍​អេ​ឡិ​ក​ត្រូ​និក​មួយឈុត និង​ម៉ាស៊ីន​មួយគ្រឿង​ផងដែរ។

នៅលើ​ដី គេ​អាច​ប្ដូរ​ប្រអប់​ម៉ាស៊ីន​មួយ ជំនួស​ដោយ​ប្រអប់​ម៉ាស៊ីន​មួយ​ផ្សេងទៀត និង​បំពេញ​ថាមពល​បាន​ដោយ​ងាយ។ ប្រការនេះ​នឹង​ជួយ​កាត់បន្ថយ​ពេលវេលា​បាន​ច្រើន​នៅក្នុង​ការចាក់​ឥន្ធនៈ ដែលជា​ដំណាក់កាល​មួយ ទាម​ទារ​ឱ្យមាន​ប្រព័ន្ធ​ស្មុគស្មាញ​ដើម្បី​រក្សា​អ៊ីដ្រូសែន​ឱ្យមាន​សីតុណ្ហភាព​ត្រជាក់​ខ្លាំង៕

ប្រភព៖ Next

នេះ​ប្រហែលជា​មូលហេតុ​ដែលនាំឱ្យ​មហាសេដ្ឋី Elon Musk យកចិត្តទុកដាក់​ទៅលើ​រូបិយវត្ថុ bitcoin នាពេលថ្មីៗនេះ។

មហាសេដ្ឋី​អាមេរិកាំង​ដើមកំណើត​អាហ្វ្រិក​ខាងត្បូង លោក Elon Musk ដែលជា CEO របស់​ក្រុមហ៊ុន​អវកាស SpaceX កំពុង​តែមាន​គម្រោង​នាំ​មនុស្ស​ឡើងទៅ​កាន់​ភព​ព្រះ​អង្គារ​ចាប់ពី​ឆ្នាំ 2024 ជាមួយនឹង​គោលដៅ​បង្កើត «ទីក្រុង​ស្វ័យគ្រប់គ្រង​មួយ​នៅលើ​ភព​ព្រះ​អង្គារ»។ ដើម្បី​មាន​ទីក្រុង​បែបនេះ វា​ត្រូវតែ​គ្រប់គ្រង​ដំណើរការ​សេដ្ឋកិច្ច​ដោយឡែក​របស់​ខ្លួន ហើយ​បើតាម​លោក Musk ទីក្រុង​នេះ​នឹង​ទូទាត់​ថ្លៃទំនិញ​ជាដើម ដោយ​ប្រើប្រាស់​រូបិយប័ណ្ណ​ស្រមោល ដែល​គេ​ហៅថា ប្រាក់​ឌីជីថល។

ឆ្លើយតប​នឹង​ការ​បង្ហោះ​សារ​នៅលើ Twitter របស់​អ្នកស្រាវជ្រាវ AI លោក Lex Fridman លោក Musk ក៏បាន​យល់ស្រប​នឹង​គំនិត​ដែលថា «ខឿនសេដ្ឋកិច្ច​លើ​ពិភព​ព្រះ​អង្គារ​នឹងត្រូវ​ដំណើរការ​ដោយយោង​ទៅលើ​ប្រាក់​ឌីជីថល»។ មហាសេដ្ឋី Elon Musk ថែមទាំង​បាន​បង្ហើប​ឱ្យដឹងថា រូបិយវត្ថុ​នោះ​អាចជា​ប្រាក់ Dogecoin ឬ​ប្រភេទ​ប្រាក់​ឌីជីថល​ថ្មី​មួយ​ដែលមាន​ឈ្មោះថា Marcoin។

គម្រោង Marcoin ត្រូវបាន​បង្កើតឡើង​កាលពី​ឆ្នាំ 2014 និង​ទទួលបាន​ស្គាល់​កំណើន​រយៈពេល​ខ្លី​ក្នុងដំណាក់កាល​ទើប​ចាប់ផ្ដើម​នៃ​រូបិយវត្ថុ​ស្រមោល​កាលពី​ឆ្នាំ 2017 ប៉ុន្តែ ចាប់ពីពេលនោះ​មក វា​ហាក់ដូចជា​បាន​បាត់​ខ្លួន​ពី​ទីផ្សារ​ទៅហើយ។ ទំព័រ CoinMarketCap ឱ្យដឹងថា ប្រាក់​ឌីជីថល​នេះ បច្ចុប្បន្ន​មានតម្លៃ​ទីផ្សារ​មិន​ដល់ 100,000 ដុល្លារ​អាមេរិក។

Dogecoin ទំនងជា​បេក្ខភាព​សមស្រប​ជាង នៅពេល​វា​មានឈ្មោះ​ល្បី​គួរសម បើ​ធៀប​នឹង Marcoin និង​មាន​លក្ខណ​ស្រដៀង​ទៅនឹង bitcoin។

កាលពី​សប្ដាហ៍​មុន តម្លៃ​របស់​ប្រាក់ Dogecoin នេះ បាន​កើនឡើង 1/3 បន្ថែមទៀត បន្ទាប់ពី​លោក Musk បាន​ប្ដូរ story របស់ខ្លួន​នៅលើ Twitter ទៅជា «អតីត CEO របស់ Dogecoin» និង​បង្ហោះ​សារ៖ «One word: Doge»។

កាលពី​ច្រើន​ខែ​មុន លោក Musk ធ្លាប់បាន​ណែនាំ​ឱ្យ​តារា​សម្ដែង Maisie Williams ថា មិនគួរ​វិនិយោគ​ទៅលើ bitcoin ហើយ​ថែមទាំង​ប្រាប់ថា វា​ជា​ប្រាក់​បី​សាច។ ប៉ុន្តែ ប៉ុន្មាន​ថ្ងៃមុន​នេះ លោក Musk បែរជា​ងាក​មក​សួរ​លោក Micheal Saylor ដែលជា​បុគ្គល​ល្បីឈ្មោះ​ក្នុង​វិស័យ​ប្រាក់​ឌីជីថល អំពី​សក្ដានុពល​សម្រាប់​ការទូទាត់​ដោយ​ប្រើ​រូបិយវត្ថុ bitcoin ទៅវិញ។

មិន​ត្រឹមតែ​នៅក្នុង​វិស័យសេដ្ឋកិច្ច​នៅលើ​ផែនដី​នោះទេ មុននេះ លោក Musk ក៏​ធ្លាប់បាន​ធ្វើឱ្យ​មានការ​រឿងចម្រូងចម្រាស​ផងដែរ នៅពេល​លោក​ប្រកាសថា ច្បាប់​អន្តរជាតិ​នឹងមិន​ត្រូវបាន​អនុវត្ត​នៅលើ​ឋាន​ព្រះ​អង្គារ។ ជំនួស​មកវិញ វា​នឹង​ជា​ប្រព័ន្ធ «បទបញ្ជា​ស្វ័យគ្រប់គ្រង»។

យោងតាម​ប្រការ​ដែល​បានចែង​នៅក្នុង​លក្ខខណ្ឌ​នៃ​ការផ្ដល់សេវា​សម្រាប់​គម្រោង​អ៊ី​ន​ធើ​ណិ​ត​ពី​ផ្កាយរណប Starlink របស់ SpaceX រាល់​ពលរដ្ឋ​ដែល​នឹង​រស់​នៅលើ​ឋាន​ព្រះ​អង្គារ ក៏​នឹង «ទទួលស្គាល់ថា ពិភព​ព្រះ​អង្គារ​គឺជា​ភព​សេរី» ហើយ​ថា «មិនមាន​រដ្ឋាភិបាល​ណាមួយ​នៅលើ​ផែនដី មានអំណាច ឬ​សកម្ម​សិទ្ធិ​លើ​សកម្មភាព​នៅលើ​ពិភព​ព្រះ​អង្គារ» នោះឡើយ៕