សង្គម និងសេដ្ឋកិច្ច - La Reine Media

Telegram ក្លាយជាកម្មវិធី ដែលមានអ្នកទាញយកប្រើ ច្រើនជាងគេលំដាប់ទី2 នៅសហរដ្ឋអាមេរិក

បន្ទាប់ពីលោកប្រធានាធិបតី Donald Trump ត្រូវបានផ្អាកពីការប្រើប្រាស់គណនី Twitter និង Facebook ក្រោយការលុកលុយវិមានកាពីតូល ហ៊ីលល៍ ដ៏សាហាវដោយអ្នកគាំទ្ររបស់លោក ដែលប្រដាប់ដោយអាវុធ និងហានិភ័យនៃការញុះញង់ឱ្យមានអំពើហិង្សារួចមក កាលពីថ្ងៃចន្ទ ប្រជាជនប្រហែល 545,000នាក់នៅសហរដ្ឋអាមេរិក បានទាញយកកម្មវិធី Telegram នៅចន្លោះថ្ងៃពុធ (ទី6មករា) និងថ្ងៃអាទិត្យ(ទី10មករា) ដែលមានចំនួនជិត 3ដង បើប្រៀបធៀបនឹងរយៈពេលដូចគ្នាកាលពីសប្តាហ៍មុនហ្នឹង។

អ្នកប្រើប្រាស់ WhatsApp ជាច្រើនលាននាក់ ក៏បានធ្វើការបោះបង់ចោលកម្មវិធីផ្ញើសារមួយនេះ មុនការអាប់ឌែត គោលការណ៍ថ្មី ដែលបង្ខំឱ្យអ្នកប្រើប្រាស់ចែករំលែកព័ត៌មាន របស់ពួកគេជាមួយ Facebook។ ការអាប់ឌែតថ្មី របស់ WhatsApp ដែលនឹងមកដល់នៅថ្ងៃទី8 ខែកុម្ភៈខាងមុខនេះ នឹងប៉ះពាល់ដល់អ្នកប្រើប្រាស់ទាំងអស់ ដែលមិនមែនរស់នៅក្នុងតំបន់អឺរ៉ុប និងចក្រភពអង់គ្លេស ដែលតំបន់ 2នេះ មានច្បាប់តឹងរ៉ឹងការពារព័ត៌មានរបស់អ្នកប្រើប្រាស់។

អ្នកប្រើប្រាស់នៅក្រៅពីតំបន់ទាំង 2ខាងលើ នឹងតម្រូវផ្ដល់សិទ្ធសម្រាប់ឱ្យ Facebook ចូលយកព័ត៌មានរបស់ពួកគេ មានរួមបញ្ចូលលេខទូរស័ព្ទ និងព័ត៌មានអំពីការទំនាក់ទំនងរបស់ពួកគេ ជាមួយអ្នកដទៃ។ ទាល់តែព្រមផ្ដល់សិទ្ធិ ទើបពួកគេអាចបន្តប្រើប្រាស់ WhatsApp បានតទៅទៀត។ ការទាមទារនេះ នឹងត្រូវអនុវត្តលើគ្រប់អ្នកប្រើប្រាស់ទាំងអស់ ទោះបីជាពួកគេមិនមានគណនី Facebook ក្ដី។

ពេល WhatsApp ប្រកាសអំពីផែនការ នៃការផ្លាស់ប្ដូរនេះភ្លាម បានធ្វើឱ្យ Telegram មានកំណើនចំនួនទាញយកជិត 1.7លានដងភ្លាមៗ ហើយកម្មវិធី Signal (ជាកម្មវិធីផ្ញើសារដែលលោក Elon Musk ណែនាំឱ្យប្រើប្រាស់) មានកំណើនចំនួនទាញយក 1.2លានដង។

ដោយឡែកចំនួនទាញយកកម្មវិធី WhatsApp ក្នុងរយៈពេល 7ថ្ងៃដំបូង នៃឆ្នាំ2021 មានការធ្លាក់ចុះចំនួន 13% មកនៅត្រឹម 10.3លានដង ប្រសិនបើធៀបនឹងអំឡុងពេល 7ថ្ងៃមុន។ ការសម្រេចចិត្តរបស់ WhatsApp នាពេលនេះ គឺខុសគ្នាទាំងស្រុង ប្រៀបនឹងពេលដែល Facebook ទើបទិញ WhatsApp ដំបូងក្នុងឆ្នាំ2014 ក្នុងទំហំទឹកប្រាក់ 19ពាន់លានដុល្លារ។

ពេលនោះ WhatsApp បានធានាថា ទិន្នន័យរបស់អ្នកប្រើប្រាស់ នឹងបន្តនៅជាឯកជន ហើយមិនចែករំលែកជាមួយ Facebook នោះទេ។ ការផ្លាស់ប្ដូរគោលការណ៍នេះ បានចាប់ផ្ដើមលេចចេញដំបូងកាលពីឆ្នាំ2016 ពេលដែល WhatsApp ចាប់ផ្ដើមចែករំលែកទិន្នន័យជាមួយ Facebook ជាលក្ខណៈ Default ដែលពេលនោះអ្នកប្រើប្រាស់ អាចមានសិទ្ធបិទមិនឱ្យមានការចែករំលែកបាន។

នៅថ្ងៃទី8 ខែកុម្ភៈខាងមុខនេះ អ្នកប្រើប្រាស់ WhatsApp នឹងមិនមានជម្រើសអ្វីឡើយ គឺត្រូវតែទទួលយកការផ្លាស់ប្ដូរ ដែលតម្រូវឱ្យមានការចែករំលែកទិន្នន័យរបស់ខ្លួនជាមួយ Facebook ប្រសិនបើពួកគេចង់ប្រើប្រាស់ WhatsApp ជាបន្ត៕

January 13, 2021

SONY បង្ហាញផលិតផលដំបូងបង្អស់ ជាដ្រូន ថតវីដេអូ (មានវីដេអូ)

ថ្មីៗនេះ ក្រុមហ៊ុន Sony បានដាក់បង្ហាញឱ្យឃើញ ការឌីហ្សាញផលិតផល Drone ជំនាន់ដំបូងគេស្របពេលដែលដ្រូននោះ មានបំពាក់មកជាមួយនូវម៉ាស៊ីនថតស៊េរី Alpha Series ថែមទៀតផង។

Drone ជំនាន់ដំបូងគេរបស់ Sony ម៉ូដែលនេះ នៅមិនទាន់មានព័ត័មានច្រើនពីលក្ខណសម្បត្តិ និងតម្លៃរបស់វានៅឡើយទេ តែគេបានដឹងថា វាមានជើងទម្រ អាចបត់ឡើងលើបាន នៅពេលកំពុងហោះហើរ និងបត់ចុះក្រោមវិញ រៀងរាល់ពេលដែលវាចុះចត។ វាជាផលិតផលពិសេសមួយ ដែលធ្វើឡើងសម្រាប់ទីផ្សារអ្នកផលិតវីដេអូ កម្រិតខ្ពស់ ឬកម្រិត Professional ក្នុងវិស័យភាពយន្តជាដើម។

សូមជម្រាបជូនផងដែរថា ចំពោះគំនិតផលិត Drone ជំនាន់ដំបូងនេះ ក៏ធ្លាប់ត្រូវបាន SONY បង្ហើបឱ្យដឹងម្ដងរួចមកហើយដែរ កាលពីឆ្នាំ2020 តែវាទើបនឹងលេចរូបរាងឡើងនៅឆ្នាំ2021 សម្រាប់ដាក់តាំងក្នុងព្រឹត្តិការណ៍តាំងពិព័រណ៍បច្ចេកវិទ្យា CES 2021។ ដ្រូនដំបូងគេនេះ មានឈ្មោះថា Sony’s Airpeak ដែលមានសមត្ថភាពខ្ពស់ប្រហាក់ប្រហែលនឹងដ្រូន របស់ក្រុមហ៊ុន DJI ដូច្នោះដែរ។

ខាងក្រោមនេះជាវីដេអូ ដែល Sony បានបង្ហាញ៖

*វីដេអូទី1 ដាក់បង្ហាញអំពី Drone ផ្ទាល់

*វីដេអូទី2 យកទៅឱ្យថតរថយន្ដ VISION-S

January 13, 2021

ក្រុមហ៊ុនអាកាសចរណ៍ ត្រូវដោះកៅអីទាំងអស់ក្នុងយន្តហោះមួយគ្រឿង ព្រោះតែចិញ្ចៀនពេជ្ររបស់អ្នកដំណើរ

ផ្នែកបច្ចេកទេសនៃក្រុមហ៊ុនអាកាសចរណ៍មួយរបស់វៀតណាម បាននាំគ្នាដោះកៅអីទាំងអស់នៅក្នុងយន្តហោះមួយគ្រឿងដើម្បីស្វែងរកចិញ្ចៀនពេជ្រមួយវង់ដែលមានតម្លៃខ្ពស់ ក្រោយពីអ្នកដំណើរម្នាក់បានជ្រុះនៅក្នុងកាប៊ីនសម្រាប់អ្នកជំនួញ។

កាលពីថ្ងៃទី 12 មករា តំណាងក្រុមហ៊ុនអាកាសចរណ៍ Vietnam Airlines បានបញ្ជាក់ថា ក្រុមហ៊ុននេះ កាលពីថ្ងៃទី 11 មករា បានប្រគល់ជូនចិញ្ចៀនពេជ្រមួយវង់ដែលបានជ្រុះបាត់នៅក្នុងយន្តហោះនៃក្រុមហ៊ុននេះកាលពីថ្ងៃទី 8 មករា នៅក្នុងជើងហោះហើរក្នុងស្រុក ទៅឱ្យអ្នកដំណើររបស់ខ្លួនវិញហើយ។

អតិថិជនដែលបានធ្វើដំណើរតាមជើងហោះហើរប្រភេទពាណិជ្ជកម្ម បានហោះពីទីក្រុងហូជីមិញ ទៅកាន់រដ្ឋធានីហាណូយនៃប្រទេសវៀតណាម កាលពីថ្ងៃទី 8 ខែមករា និងបានចុះចតនៅវេលាម៉ោង 15 និង 10 នាទី។ ក្នុងពេលយន្តហោះត្រៀមចុះចត ស្ត្រីជាអ្នកដំណើរម្នាក់ក៏បានជ្រុះបាត់ចិញ្ចៀនពេជ្រមួយវង់នៅក្នុងយន្តហោះនេះ។

តំណាងរបស់ក្រុមហ៊ុន Vietnam Airlines បានឱ្យដឹងថា ផ្នែកបច្ចេកទេសរបស់ខ្លួន ក្រោយមកក៏បានដោះកៅអីទាំងអស់ដែលមាននៅលើយន្តហោះ ដើម្បីស្វែងរកចិញ្ចៀន។ ប៉ុន្តែ មិនបានរកឃើញនោះទេ ដោយសារវាមានទំហំតូចពេក។ ផ្នែកបច្ចេកទេសក៏បានរាយការណ៍ហេតុការណ៍នេះដល់អង្គភាពពាក់ព័ន្ធដើម្បីបន្តរុករក។

បន្ទាប់មក យន្តហោះនេះក៏បានហោះត្រលប់មកកាន់ទីក្រុងហូជីមិញវិញ នៅវេលាម៉ោង 18 ថ្ងៃទី 8 មករា ជាមួយនឹងលេខសម្គាល់ជើងហោះហើរ VN275។

ក្រោយមក សំណាងល្អក៏បានកើតឡើងចំពោះក្រុមបុគ្គលិកនៅលើយន្តហោះនេះ នៅពេលដែលអ្នកបម្រើបានរកឃើញចិញ្ចៀនពេជ្រក្នុងពេលពិនិត្យមើលក្នុងកាប៊ីនអ្នកដំណើរ។ ពួកគេក៏បានប្រគល់មកឱ្យអង្គភាព Lost & Found នៅព្រលានយន្តហោះ Tan Son Nhat នាទីក្រុងហូជីមិញ ហើយវាក៏ត្រូវបានប្រគល់ជូនម្ចាស់ដើមនៅរសៀលថ្ងៃទី 11មករា៕

ប្រភព៖ DNTT

January 13, 2021

ប្រទេសនាំចេញប្រេងលំដាប់កំពូលរបស់ពិភពលោក ប្រកាសសាងសង់ទីក្រុងគ្មានរថយន្ត និងគ្មានកាបោន

កាលពីថ្ងៃទី 10 មករាកន្លងទៅ រាជបុត្រារបស់ប្រទេសអារ៉ាប៊ីសាអូឌីត ព្រះនាម Mohammed bin Salman បានប្រកាសបង្ហាញផែនការកសាងទីក្រុងមួយដែលមិនមានសកម្មភាពបញ្ចេញឧស្ម័នកាបោន ដែលស្ថិតក្នុងគម្រោងលំដាប់យក្ស NEOM។

អារ៉ាប៊ីសាអូឌីត ដែលជាប្រទេសនាំចេញប្រេងលំដាប់កំពូលរបស់ពិភពលោក បានប្រកាសអំពីគម្រោងបើកដំណើរការទីក្រុងធម្មជាតិ «គ្មានរថយន្ត គ្មានផ្លូវក្នុងក្រុង និងគ្មានសកម្មភាពបញ្ចេញឧស្ម័នពុលកាបោន» នៅក្នុងមហាគម្រោង NEOM។ NEOM ដែលមានតម្លៃ 500 ពាន់លានដុល្លារអាមេរិក ត្រូវបានកសាងតាមបណ្ដោយឆ្នេរសមុទ្រក្រហមនៅក្នុងប្រទេសអារ៉ាប៊ីសាអូឌីត ក្នុងបំណងធ្វើពិធិធកម្មខឿនសេដ្ឋកិច្ចជាតិ។

នៅលើកញ្ចក់ទូរទស្សន៍ជាតិអារ៉ាប៊ីសាអូឌីត រាជបុត្រា Mohammed bin Salman ឱ្យដឹងថា ទីក្រុងថ្មីនេះមានឈ្មោះថា The Line។ ក្នុងទីក្រុងឆ្លាតវៃ The Line ដែលមានបណ្ដោយ 170 គីឡូម៉ែត្រនេះ មនុស្ស 1 លាននាក់អាចស្នាក់នៅបាន និងធានាថា មិនមានរថយន្ត មិនមានផ្លូវសម្រាប់រថយន្ត និងមិនបញ្ចេញឧស្ម័នកាបោន។

ទីក្រុងនេះនឹងមានសេវាកម្មនានាដូចជាសាលារៀន មជ្ឈមណ្ឌលសុខភាព និងទីលានធម្មជាតិ ក៏ដូចជាប្រព័ន្ធដឹកជញ្ជូនសាធារណៈល្បឿនលឿនជាមួយនឹងការធ្វើដំណើរមិនលើសពី 20 នាទី។ បញ្ញាសិប្បនិម្មិតនឹងដើរតួនាទីសំខាន់ក្នុងទីក្រុងនេះ។ សកម្មភាពរបស់ទីក្រុងនេះនឹងដំណើរការដោយថាមពលស្អាត 100% នាំមកនូវបរិស្ថានស្អាត បរិសុទ្ធ និងស្ថិរភាពយូរអង្វែងសម្រាប់ប្រជាជន។

ការសាងសង់ទីក្រុងនេះនឹងត្រូវបានធ្វើឡើងចាប់ពីត្រីមាសទីមួយនៃឆ្នាំ 2021 នេះ ជាមួយនឹងជំនួយរបស់មូលនិធិវិនិយោគសាធារណៈរបស់អារ៉ាប៊ីសាអូឌីត។ តាមផែនការ គម្រោងនេះនឹងបង្កើតការងារចំនួន 380,000 មុខតំណែង និងរួមចំណែក 180 ពាន់លានរីយ៉ាល់ (48 ពាន់លានដុល្លារអាមេរិក) ទៅក្នុង GDP របស់ប្រទេសនេះក្នុងឆ្នាំ 2030។

នេះគឺជាផែនការសាងសង់ធំដំបូងនៅក្នុងគម្រោងយក្ស NEOM រាប់ចាប់ពីគម្រោងនេះត្រូវបានរាជបុត្រា bin Salman ប្រកាសកសាងកាលពីឆ្នាំ 2017 ដោយចាត់ទុកដូចជាសសរទ្រូងក្នុងគម្រោងចក្ខុវិស័យឆ្នាំ 2030 ដើម្បីកាត់បន្ថយការពឹងផ្អែករបស់អារ៉ាប៊ីសាអូឌីត ទៅលើប្រភពចំណូលពីប្រេង៕

ប្រភព៖ Economic Times

January 12, 2021

មហាសេដ្ឋីលំដាប់ទីមួយដំបូងគេក្នុងពិភពលោក ជាអ្នកណា និងមានស្ថានភាពបែបណានាបច្ចុប្បន្ន?

បច្ចុប្បន្ន ឈ្មោះ Bill Gates, Warren Buffett, Jeff Bezos និង Elon Musk ជាដើម ជាបុគ្គលធ្លាប់នាំមុខគេនៅក្នុងបញ្ជីចំណាត់ថ្នាក់អ្នកមានជាងគេរបស់ទស្សនាវដ្ដី Forbes ឬ Bloomberg (ឬទាំងពីរតែម្ដង) ដែលត្រូវមហាជនស្គាល់ច្រើន ប៉ុន្តែ គេហាក់ដូចកម្របានឮឈ្មោះ Yoshiaki Tsutsumi ដែលធ្លាប់ជាអ្នកមានផុតលេខកាលពីប៉ុន្មានទសវត្សរ៍មុន។

ជាមួយនឹងទ្រព្យដែលមានតម្លៃសរុបជិត 20 ពាន់លានដុល្លារអាមេរិក អ្នកជំនួញជនជាតិជប៉ុន Yoshiaki Tsutsumi គឺជាបុគ្គលដំបូងគេដែលត្រូវបាន Forbes លើកជាមហាសេដ្ឋីដែលមានទ្រព្យច្រើនជាងគេបង្អស់ក្នុងពិភពលោកកាលពីឆ្នាំ 1987។ បន្ទាប់មក លោក Yoshiaki Tsutsumi ក៏បានបន្តគ្រប់គ្រងតំណែងនេះរហូតដល់ឆ្នាំ 1990 និងឆ្នាំ 1993-1994។ ជាសរុប លោក Yoshiaki Tsutsumi ធ្លាប់បានស្ថិតនៅលើកំពូលតារាងចំណាត់ថ្នាក់អ្នកមានជាងគេរបស់ទស្សនាវដ្ដី Forbes ដល់ទៅ 6 លើក។

លោក Yoshiaki Tsutsumi កើនឆ្នាំ 1934 នៅក្នុងគ្រួសារអ្នកមានស្ដុកស្ដម្ភមួយនៅជប៉ុន។ ឪពុករបស់លោក Yoshiaki Tsutsumi គឺជាជីតារបស់ក្រុមគ្រួសារមួយក្នុងចំណោមត្រកូលនានាដែលមានឥទ្ធិពលខ្លាំងក្លាបំផុតក្នុងសង្គមជប៉ុននាសម័យទំនើប។ លោក Yoshiaki Tsutsumi កាលនោះគឺជាប្រធានក្រុមហ៊ុន Seibu ដែលជាក្រុមហ៊ុនមានអំណាចបំផុតក្នុងវិស័យផ្លូវដែក សណ្ឋាគារ និងអចលនទ្រព្យ នៅប្រទេសជប៉ុន។

អាយុ 30 ឆ្នាំ លោក Yasujiro បានទទួលមរតក និងគ្រប់គ្រងក្រុមហ៊ុន ក្រោយមរណភាពរបស់ស្ថាបនិកដែលជាឪពុករបស់ខ្លួន។ ក្រោយពីបានឡើងកាន់កាប់ លោកTsutsumi ក៏បានបន្តដឹកនាំក្រុមហ៊ុន Seibu ប្រកបដោយការរីកចម្រើន។ Tsutsumi បានទិញសណ្ឋាគារជាច្រើនកន្លែង តំបន់លេងស្គីលើទឹកកក ទីលានវាយកូនគោលជាដើម និងបានធ្វើឱ្យក្រុមហ៊ុនអចលនទ្រព្យរបស់ខ្លួនក្លាយជាក្រុមហ៊ុនមេធំដ៏សម្បើមមួយក្នុងពិភពលោក។

ហេតុអ្វីពេលនេះ មិនមានអ្នកណារំលឹកដល់ឈ្មោះ Tsutsumi ទៀត?

Tsutsumi ធ្លាប់មានអ្វីៗគ្រប់យ៉ាង និងធ្លាប់ស្ថិតនៅលើចំណុចកំពូលនៃក្ដីសង្ឃឹម។ ប៉ុន្តែ គួរឱ្យស្ដាយ ជីវិតបន្ទាប់មករបស់លោក បែរជាមិនទទួលបានលទ្ធផលល្អទៅវិញ។ វិបត្តិអចលនទ្រព្យនៅជប៉ុនបានដួលកើតឡើងចន្លោះឆ្នាំ 1986 ដល់ 1991 បណ្ដាលឱ្យសេដ្ឋកិច្ចជាតិត្រូវដាំក្បាលចុះ។ បញ្ហានេះបានធ្វើឱ្យ Seibu ធ្លាក់ទៅក្នុងវិបត្តិយ៉ាងធ្ងន់ធ្ងរ។ ប៉ុន្តែ នៅមានកត្តាផ្សេងមួយទៀតដែលនាំឱ្យ Seibu ត្រូវដួលរលំទាំងស្រុង នោះគឺចំណាត់ការរបស់រដ្ឋាភិបាលជប៉ុន។

ក្នុងឆ្នាំ 2004 ជប៉ុនបានបង្កើតស្ដង់ដាគណនេយ្យថ្មី និងគ្រប់គ្រងលើបណ្ដាក្រុមហ៊ុនយ៉ាងតឹងរ៉ឹង។ Seibu បានក្លាយជាគោលដៅរបស់រដ្ឋាភិបាល និងត្រូវបានរកឃើញកំហុសយ៉ាងច្រើន។ ចុងក្រោយ ពួកគេក៏ត្រូវបង្ខំចិត្តលុបចោលការបោះផ្សាយលក់មូលបត្រនៅក្នុងផ្សារហ៊ុន Tokyo។

លោក Yoshiaki Tsutsumi បច្ចុប្បន្នមានអាយុ 86 ឆ្នាំ

នេះគឺជាកាលៈទេសៈដ៏មហាសែនអាក្រក់នៅក្នុងជីវិតរបស់លោក Yoshiaki Tsutsumi ក៏ដូចជាសមាជិករបស់ត្រកូល Tsutsumi។ ឆ្នាំ 2005 លោក Yoshiaki Tsutsumi ត្រូវបានចាប់ខ្លួនក្រោមបទចោទថាបានធ្វើការជួញដូរក្រៅច្បាប់ និងក្លែងឯកសារ។ លោក Yoshiaki Tsutsumi ត្រូវពិន័យ 50,000 ដុល្លារអាមេរិក និងជាប់ពន្ធនាគារ 4 ឆ្នាំ។

ប៉ុន្តែ ភាពអាម៉ាស់របស់លោក មិនមែនជាការដែលត្រូវពិន័យ និងជាប់ពន្ធនាគារនោះទេ តែគឺជាការបាត់បង់ «អាណាចក្រ» Seibu។ នៅពេល Seibu ជួបរឿងអាស្រូវ លោក Yoshiaki Tsutsumi ក៏ត្រូវចាកចេញពីតំណែងនានាដែលលោកកំពុងកាន់កាប់នៅក្នុងក្រុមហ៊ុននេះ។ «ទ្រព្យសម្បត្តិរាប់ពាន់លានដុល្លាររបស់លោក ត្រូវបាត់បង់ទាំងស្រុងក្នុងរយៈពេលដ៏ខ្លីជាទីបំផុត» នេះបើតាមសារព័ត៌មាន Business Insider។

បច្ចុប្បន្ន លោក Tsutsumi មានវ័យ 86 ចូល 87 ឆ្នាំហើយ។ ដូច្នេះ ពិតជាពិបាកខ្លាំងណាស់ក្នុងការដែលលោកអាចសាងកេរ្តិ៍ឈ្មោះជាថ្មី៕

ប្រភព៖ BI

January 11, 2021

Lenovo បញ្ចេញផលិតផលវ៉ែនតាឆ្លាតវៃ 3D និង AR អាចបង្ហាញម្ដង 5ផ្ទាំងកម្មវិធី លើកុំព្យូទ័រ

ក្នុងព្រឹត្តិការណ៍ CES 2021 ជាព្រឹត្តិការណ៍ដាក់តាំងពិព័រណ៍បច្ចេកវិទ្យាដ៏ធំ នាដើមឆ្នាំ2021 នេះ ក្រុមហ៊ុនទាំងអស់ ដែលមានឈ្មោះចូលរួម បានបញ្ចេញ Prototype (គំរូ) ផលិតផលរបស់ខ្លួន ក៏ដូចជាដាក់បង្ហាញផលិតផលរបស់ពួកគេ ជាបណ្តើរៗហើយដែរ។

ជាក់ស្ដែងក្រុមហ៊ុន Lenovo ដែលល្បីល្បាញខាងផលិតគ្រឿងអេឡិចត្រូនិកយូរឆ្នាំមកហើយនោះ ក៏បានបង្ហាញឱ្យឃើញពី វ៉ែនតាឆ្លាតវៃ ThinkReality A3 ដែលក្នុងនោះ វាមាន 2ជម្រើស ទៅតាមប្រភេទអ្នកប្រើប្រាស់ ដែលសុទ្ធតែមានសមត្ថភាព 3D visualizations និង AR-guided ដូចគ្នា។

Lenovo ក៏បានបញ្ជាក់ដែរថា គោលដៅនៃការផលិតវ៉ែនតាឆ្លាតវៃខាងលើនេះ មិនមែនសម្រាប់លក់ឱ្យអតិថិជនទូទៅនោះទេ ផ្ទុយទៅវិញគឺ គោលដៅសម្រាប់សហគ្រាស។

លក្ខណសម្បត្តិវ៉ែនតា AR ទាំង ២ម៉ូដែល ស្ទើរតែដូចគ្នាទាំងស្រុង គ្រាន់តែថា វាទាំង2 ត្រូវបានធ្វើឡើង ដើម្បីតម្រូវទៅតាមករណី នៃការប្រើប្រាស់ផ្សេងគ្នា។

សម្រាប់ម៉ូដែល ThinkReality A3 បំពាក់មកជាមួយនឹងឈីប Snapdragon XR1 សម្រាប់វ៉ែនតាឆ្លាតវៃ និង 1ទៀត ម៉ូដែលThinkReality A3 PC Edition ដែលត្រូវបានបង្កើតឡើង សម្រាប់ឱ្យវាភ្ជាប់ជាមួយនឹង PC តែម្ដង ដើម្បីធ្វើការប្រើប្រាស់វា ឱ្យអាចធ្វើការបង្ហាញកម្មវិធីនៅលើ Windows បាន5 នៅលើផ្ទៃបង្ហាញនិម្មិតនៃវ៉ែនតានោះ។

ថាមពលថ្ម របស់វា អាស្រ័យទៅលើឧបករណ៍ ដែលនឹងតភ្ជាប់មកជាមួយប៉ុណ្ណោះ ដោយធ្វើបែបនេះ នឹងជួយឱ្យវា កាន់តែស្រាលងាយស្រួលពាក់ ប៉ុន្តែអ្នកប្រើត្រូវការភ្ជាប់វាដោយប្រើខ្សែ USB-C 3.1 ទៅកាន់ឧបករណ៍ដែលភ្ជាប់ជាមួយនោះ។

សូមជម្រាបជូនដែរថា Lenovo មិនទាន់បញ្ជាក់ពីតម្លៃរបស់ ThinkReality A3 ទាំង 2ម៉ូដែលខាងលើនៅឡើយទេ ប៉ុន្តែត្រូវបានគេរំពឹងថា វ៉ែនតាឆ្លាតវៃនោះ នឹងបង្ហាញខ្លួន នៅអំឡុងពាក់កណ្ដាលឆ្នាំ2021 ខាងមុខនេះ៕

January 11, 2021

LG ឌីហ្សាញគ្រែគេង បំពាក់អេក្រង់ OLED ឆ្លាតវៃ បញ្ជាដោយសំឡេង ដូចក្នុងរឿងហូលីវូដ

ក្នុងព្រឹត្តិការណ៍ CES 2021 ក្រុមហ៊ុនទាំងអស់ ដែលមានឈ្មោះចូលរួម បានបញ្ចេញ Prototype (គំរូ) ផលិតផលរបស់ខ្លួន។ ជាក់ស្ដែងក្រុមហ៊ុនផលិតគ្រឿងអេឡិចត្រូនិកធំបំផុតមួយ របស់កូរ៉េខាងត្បូង LG បានបញ្ចេញឱ្យឃើញ នូវគំនិតច្នៃប្រឌិតថ្មីសន្លាងមួយគឺ គ្រែគេងឆ្លាតវៃ ភ្ជាប់ជាមួយនឹងអេក្រង់ហូតឡើងបញ្ជាដោយសំឡេង ហាក់បីដូចជានៅក្នុងខ្សែភាពយន្តហូលីវូដដូច្នេះដែរ។

លោក Jong-sun Park ជាអនុប្រធានផ្នែកផលិតអេក្រង់របស់ LG បានបង្ហាញចំណាប់អារម្មណ៍ថា៖ “ជាមួយនឹងផលិតផលនេះ វាអាចឱ្យយើងរីកចម្រើនទៅមុខ ទៅកាន់ជំនាន់ចុងក្រោយនៃអេក្រង់ ដែលយើងមានលទ្ធផលគ្រប់គ្រាន់ ក្នុងការផ្លាស់ប្តូរបែបផែននៃការផលិតអេក្រង់”

សូមជម្រាបជូនផងដែរថា អេក្រង់ទំហំ 55អ៊ីញ ត្រូវបានគេចាប់អារម្មណ៍ខ្លាំង ព្រោះមានតួនាទី ដូចនឹងអេក្រង់កុំព្យូទ័រ នៅចុងជើងរបស់យើងតែម្ដង ពេលមុន ឬក្រោយក្រោកពីគេងមក អាចបញ្ជាបាន មិនចាំបាច់រង់ចាំយូរឡើយ។ មកទល់ពេលនេះ មិនទាន់មានព័ត៌មានច្រើន អំពីគ្រែគេងដ៏ទំនើបមួយនេះនៅឡើយ៕

January 11, 2021

ទ្រព្យរបស់ Elon Musk បន្តកើនឡើងលើសពី 200 ពាន់លានដុល្លារ

មហាសេដ្ឋី Elon Musk បន្តបង្កើតកំណត់ត្រាថ្មីអំពីទំហំទ្រព្យសម្បត្តិដែលលោកកំពុងកាន់កាប់ ក្រោយពីបានដណ្ដើមបានតំណែងជាអ្នកមានជាងគេលំដាប់ទីមួយក្នុងពិភពលោក ពីមហាសេដ្ឋី Jeff Bezos។

បញ្ចប់ការជួញដូរកាលពីថ្ងៃទី 8 មករា មូលបត្រ Tesla បានកើនឡើងខ្ពស់ ជួយឱ្យទ្រព្យរបស់លោក Elon Musk កើនលើសពី 200 ពាន់លាន (200,000,000,000) ដុល្លារអាមេមេរិកជាលើកដំបូង។

យោងតាម Bloomberg Billionaires Index បច្ចុប្បន្ន មហាសេដ្ឋីអាមេរិកាំងដើមកំណើតអាហ្វ្រិកខាងត្បូងរូបនេះ កាន់កាប់ទ្រព្យសម្បត្តិដែលមានតម្លៃសរុបចំនួន 209 ពាន់លានដុល្លារអាមេរិក ច្រើនជាង 23 ពាន់លានដុល្លារបើធៀបនឹងមហាសេដ្ឋី Jeff Bezos។ រាប់ចាប់ពីដើមឆ្នាំ 2021 មកដល់បច្ចុប្បន្ន CEO របស់ Tesla រកបានប្រាក់បន្ថែមចំនួន 39.6 ពាន់លានដុល្លារ។

កាលពីខែសីហា ឆ្នាំ 2020 អគ្គនាយកប្រតិបត្តិរបស់ក្រុមហ៊ុន Amazon លោក Jeff Bezos បានក្លាយជាមនុស្សដំបូងគេក្នុងពិភពលោកដែលមានទ្រព្យចំនួន 200 ពាន់លានដុល្លារ។ ប៉ុន្តែ មិនយូរប៉ុន្មាន តួលេខនេះបានធ្លាក់ចុះ ដោយសារមូលបត្រ Amazon ធ្លាក់ថ្លៃ។ ក្រោយមក ទ្រព្យរបស់លោក Bezos ជាថ្មីម្ដងទៀត បានកើនឡើងលើសពី 200 ពាន់លានដុល្លារកាលពីខែតុលា ឆ្នាំ 2020។

បច្ចុប្បន្ន ពិភពលោកទាំងមូល មានមហាសេដ្ឋីចំនួន 5 រូប ដែលមានទ្រព្យចាប់ពី 100 ពាន់លានដុល្លារអាមេរិកឡើងទៅ។ ក្រៅពី Elon Musk និង Jeff Bezos ក៏មានលោក Bill Gates សហស្ថាបនិករបស់ Microsoft (134 ពាន់លានដុល្លារ) លោក Bernard Arnault ប្រធានក្រុមហ៊ុន LVMH (117 ពាន់លានដុល្លារ) និងលោក Mark Zuckerberg CEO របស់ Facebook (101 ពាន់លានដុល្លារ)។

មហាសេដ្ឋីដែលមានទ្រព្យច្រើនជាងគេបង្អស់នៅអាស៊ី Zhong Shanshan (អ្នកជំនួញចិន) និងកំពុងកាន់កាប់ទ្រព្យដែលមានតម្លៃសរុប 95.1 ពាន់លានដុល្លារអាមេរិក នឹងអាចមានឈ្មោះក្នុងក្រុមមហាសេដ្ឋីដែលមានទ្រព្យលើសពី 100 ពាន់លានដុល្លារនាពេលដ៏ខ្លីខាងមុខ៕

ប្រភព៖ Bloomberg

January 9, 2021

ស្មាតហ្វូន Mi 11 របស់ Xiaomi ប្រើពេលត្រឹមតែ 5នាទីប៉ុណ្ណោះ លក់បានជាង 35ម៉ឺនគ្រឿង

ក្រុមហ៊ុន Xiaomi អាចលក់ស្មាតហ្វូន Mi 11 បានជាង 35ម៉ឺនគ្រឿង ដោយប្រើពេលត្រឹមតែ 5នាទី ដែលគិតជាទឹកប្រាក់វិញ គឺលើសពី 1.5ពាន់លានយន់ (ឬប្រមាណ 230លានដុល្លារ)។

ក្រុមហ៊ុន បានចាប់ផ្ដើមបើកការលក់លើកដំបូងក្នុងប្រទេសចិន ដែលទទួលបានជោគជ័យខ្លាំងបំផុត កាលពីថ្ងៃទី1 ខែមករា ឆ្នាំ2021 កន្លងទៅ។

Xiaomi ទើបនឹងបង្ហាញរូបរាងស្មាតហ្វូន Mi 11 ជាផ្លូវការកាលពីចុងឆ្នាំ2020 កន្លងទៅ ជាស្មាតហ្វូនដំបូងគេក្នុងលោក ដែលមានប្រើប្រាស់បន្ទះឈីប Snapdragon 888 របស់ក្រុមហ៊ុន Qualcomm និងមានបង្កប់បច្ចេកវិទ្យាស្គែនចង្វាក់បេះដូងថែមទៀតផង។

លក្ខណសម្បត្តិរបស់ Mi 11 មានថ្មទំហំ 4600mAh, អាចសាកថ្មកម្លាំង 55W និងសាកដោយឥតប្រើខ្សែកម្លាំង 50W ។ ប្រើប្រាស់អេក្រង់ AMOLED ទំហំ 6.81អ៊ីញ ដែលមានកម្រិតបង្ហាញ 2K និងមាន Refresh Rate 120Hz។ វាមានកាមេរ៉ាក្រោយ 3គ្រាប់ ដែលកាមេរ៉ាមេ ទំហំ 108MP, កាមេរ៉ា Ultrawide ទំហំ 13M, កាមេរ៉ា Macro ទំហំ 5MP, កាមេរ៉ា Selfie ទំហំ 20MP និងមានជម្រើស RAM ទំហំ 8GB ឬ 12GB ជាមួយអង្គផ្ទុក 128GB ឬ 256GB ។

Xiaomi mi 11 ជម្រើស RAM 8GB និងមេម៉ូរី 128/256GB និង 1ទៀត គឺ RAM 12GB មេម៉ូរី 256GB និងដាក់លក់ក្នុងតម្លៃប្រមាណជា 610ដុល្លារ៕

January 8, 2021

ឆ្នាំងសាកល្បឿនលឿនដាច់គេ 135W របស់ Huawei ត្រៀមចេញហើយ តែមិនច្បាស់ថាសម្រាប់ទូរស័ព្ទ ឬកុំព្យូទ័រ

ថ្មីៗនេះ ឆ្នាំងសាកល្បឿនលឿនកម្លាំង 135W Super fast របស់ក្រុមហ៊ុន Huawei បានលេចចេញវត្តមាន បញ្ជាក់ដោយវិញ្ញាបនបត្រ 3C (China Compulsory Certificate) តែយ៉ាងណាមិញ គេនៅពុំទាន់ដឹងច្បាស់នៅឡើយថា តើវានឹងត្រូវយកទៅប្រើជាមួយទូរស័ព្ទ ឬក៏កុំព្យូទ័រយួរដៃ របស់ Huawei ឬក៏ឧបករណ៍ផ្សេងទៀត?។

ស្របពេលនេះដែរ ទូរស័ព្ទលំដាប់កំពូល Huawei P50 Pro+ ក៏ត្រៀមនឹងប្រកាសចេញដូចគ្នា។ បើសិនជាបែបនេះពិតមែន ភាគរយដែលខ្ពស់នោះគឺ ឆ្នាំងសាកល្បឿនលឿនកម្លាំង 135W អាចនឹងយកទៅប្រើជាមួយ P50 ជាមិនខានឡើយ។

សម្រាប់កាលបរិច្ឆេទប្រកាសចេញ ក៏ពុំទាន់ប្រកាសឱ្យដឹងដែរ។ ដូច្នេះមានតែរង់ចាំតាមដានទាំងអស់គ្នាជាបន្តទៀត៕

January 8, 2021

Category: សង្គម និងសេដ្ឋកិច្ច