សង្គម និងសេដ្ឋកិច្ច - La Reine Media

កូវីដ១៩ស្ងាត់បន្ដិច! តារាសម្ដែង គីម មួយ ស្រាប់តែបង្ហាញថែរក្សាសម្ភស្សតម្លៃជាង២០ម៉ឺនដុល្លារ

តារាសម្ដែងស្រីមានឈ្មោះបោះសំឡេង កញ្ញា គីម មួយ ត្រូវបានមហាជនស្គាល់មុខច្បាស់តាមរយៈរឿងភាគបញ្ចាំងនៅលើកញ្ចក់ទូរទស្សន៍។ ប្រឡូកសិល្បៈមកយូរឆ្នាំនេះ កញ្ញាដែលធ្លាប់បង្ហើបអំពីក្ដីស្រម៉ៃធំនៅក្នុងជីវិតនោះទេ ស្រាប់តែថ្មីៗនេះ កញ្ញាបង្ហាញពីមុខរបរធំមួយក្រៅអាជីពសិល្បៈ បើកថែរក្សាសម្ភស្សចំកណ្ដាលរាជធានីភ្នំពេញតម្លៃជាង២០ម៉ឺនដុល្លារ។

នៅថ្ងៃដំណើរការណ៍ហាងថ្មីនេះ គេឃើញមានតារាសិល្បៈជាច្រើនរូបចូលរួមអបអរ។ តារាសម្តែង គីម មួយ បានសម្តែងអារម្មណ៍រំភើបខណៈដែលវត្តមានរបស់ភ្ញៀវកិត្តិយសទាំងអស់បានមកចូលរួមយ៉ាងកកកុញ។ កញ្ញា គីម មួយ បានអោយដឹងថា នៅ ប៉ូប៉ូប៊ីយូធីស្បា & គ្លីនិក របស់នាងមានសេវាកម្មថែរក្សា សម្រស់ ពីប្រភេទសម្រាប់ភ្ញៀវជ្រើសរើស គឺការប្រើប្រាស់ផលិតផលដែលមានគុណភាព មកពីប្រទេសកូរ៉េ និង ផលិតផល គ្មានជាតិគីមី ក្នុងស្រុក ហើយអ្វីដែលសំខាន់នោះ គឺ ប៉ូប៉ូប៊ីយូធីស្បា & គ្លីនិក មានចំណុចទាក់ទាញនិងសេវាពិសេសគឺស្ប៉ាដែលទទួលបានការ កោតសរសើរពីភ្ញៀវគ្រប់ស្រទាប់វណ្ណៈ។

គីមមួយ បន្តថា សម្រាប់អតិថិជន ដែលមកទទួលសេវាកម្មនៅ ប៉ូប៊ីយូធីស្បា & គ្លីនិក ពីថ្ងៃនេះ រហូតដល់ដំណាច់ខែមករា និងទទួលបានការបញ្ចុះតំលៃ ៥០ភាគរយ ទាំងអស់ ៕

January 16, 2021

CEO ថ្មីរបស់ Intel៖ ពី «ក្មេងគង្វាលគោ និងមើលថែជ្រូក ត្រូវបាន Intel ហៅចូលធ្វើការក្នុងវ័យ 18ឆ្នាំ បើទោះមិនមានសញ្ញាបត្រមហាវិទ្យាល័យ»

កាលពីថ្ងៃទី 13 ខែមករា ក្រុមហ៊ុនបច្ចេកវិទ្យា Intel បានប្រកាសថា CEO បច្ចុប្បន្នរបស់ពួកគេគឺលោក Bob Swan នឹងលាលែងពីតំណែងនៅខែក្រោយ ហើយ Pat Gelsinger (Patrick P. Gelsinger) នឹងចូលមកជំនួស។ នេះគឺជាការវិលត្រលប់មកវិញរបស់ «កូនក្បាលខូច» ព្រោះថា Gelsinger អាយុ 59 ឆ្នាំ ធ្លាប់បានតស៊ូជាមួយ Intel រយៈពេល 3 ទសវត្សរ៍ មុនពេលចូលបម្រើការឱ្យ EMC នៅឆ្នាំ 2009 និងក្រោយមកក៏បានក្លាយជាមេដឹកនាំកំពូលនៅ VMware។

Intel កំពុងតែជួបប្រទះការលំបាកខ្លាំងក្នុងការអភិវឌ្ឍឈីបកុំព្យូទ័រដើម្បីផ្គត់ផ្គង់ដល់ដៃគូរបស់ខ្លួន ដោយសារតែដៃគូជំនួញទាំងនេះ កំពុងចាកចោល Intel ម្ដងមួយៗ ខណៈដែលគូប្រជែងនានាក៏កំពុងពង្រីកឥទ្ធិពល និងដណ្ដើមទីផ្សារ។ ប្រការនេះបង្ហាញថា Intel ដល់ពេលត្រូវមានកំពូលយុទ្ធសាស្ត្រថ្មី ឬត្រូវប្ដូរថ្នាក់ដឹកនាំ ដែលនេះក៏អាចជាមូលហេតុដែល CEO បច្ចុប្បន្នរបស់ក្រុមហ៊ុននេះ សុំលាលែងពីតំណែង ហើយប្រការនេះដែរបាននាំឱ្យមានឱកាសសម្រាប់អតីតបុគ្គលិក Intel ម្នាក់ ក្នុងការត្រលប់មកវិញ នោះគឺ Pat Gelsinger។

ធំឡើងនៅក្នុងគ្រួសារចិញ្ចឹមសត្វគោ និងជ្រូក នៅក្នុងតំបន់ Amish ដែលជាជនបទមួយក្នុងរដ្ឋ Pennsylvania សហរដ្ឋអាមេរិក Gelsinger តែងតែត្រូវក្រោកពីព្រលឹមមុនថ្ងៃរះដើម្បីមើលថែជ្រូក និងគោ។ ភារកិច្ចចម្បងក្នុងពេលព្រឹករបស់ Gelsinger គឺ «ដើរតម្រង់ទៅកាន់កន្លែងពលកម្មដែលពោរពេញភាពកខ្វក់ ហើយត្រូវព្យាយាមគេចចេញពី “កណ្ដាប់ជើង” របស់សត្វគោទាំងផង» នេះបើតាមទស្សនាវដ្ដី Forbes។

ឪពុកម្ដាយរបស់ Gelsinger រៀនបានត្រឹមតែថ្នាក់ទី 7 ប៉ុណ្ណោះ ប៉ុន្តែ «កាលពីកូនៗនៅក្មេង ពួកគាត់តែងតែជំរុញឱ្យខំសិក្សារៀនសូត្រ»។ ដោយសារតែខំរៀន និងពូកែខាងគណិតវិទ្យា វិទ្យាសាស្ត្រ Gelsinger ក៏បានបញ្ចប់ការសិក្សាក្រោយពីទទួលបានអាហារូបករណ៍ពីសាខាមួយរបស់វិទ្យាស្ថានបច្ចេកទេស Lincoln។ នោះគឺជាកន្លែងដែល Gelsinger បានប៉ះកុំព្យូទ័រជាលើកដំបូងក្នុងជីវិត។ ក្រោយមក ព្រោះតែពូកែក្នុងវិស័យអេឡិចត្រូនិក ទើប Gelsinger ទទួលបានចំណាប់អារម្មណ៍ពីក្រុមហ៊ុន Intel។ បន្ទាប់មក Gelsinger ក៏បានជិះយន្តហោះជាលើកដំបូងដើម្បីទៅសម្ភាសការងារនៅជ្រលង Silicon។ ថ្វីបើមានអាយុទើបតែ 18 ឆ្នាំ និងមិនទាន់មានបរិញ្ញាបត្រ ប៉ុន្តែ Gelsinger នៅតែបានចូលធ្វើការងារក្នុងក្រុមហ៊ុន Intel ជាមួយនឹងតួនាទីជាបុគ្គលិកបច្ចេកទេសគ្រប់គ្រងគុណភាពក្នុងឆ្នាំ 1979។

ដោយបានប្រើប្រាស់កម្មវិធីបង់ថ្លៃសិក្សាដ៏ល្អរបស់ Intel និងម៉ោងធ្វើការដែលអាចបត់បែនបាននៅទីនេះ Gelsinger ក៏បានឆ្លៀតរៀនបន្ថែមរហូតទទួលបានបរិញ្ញាបត្រផ្នែកវិស្វកម្មអគ្គិសនីនៅសាកលវិទ្យាល័យ Santa Clara ក្នុងឆ្នាំ 1983 និងអនុបណ្ឌិតនៅ Stanford ក្នុងឆ្នាំ 1985 ដែលទាំងនេះបានកើតឡើងនៅក្នុងអំឡុងពេលកំពុងធ្វើការពេញម៉ោង។

ពេលធ្វើការនៅ Intel កំលោះ Gelsinger ទទួលបានការយកចិត្តទុកដាក់ច្រើនពីសំណាក់ CEO ដែលពេលនោះគឺលោក Andy Grove។ កាលនោះ Gelsinger ទទួលភារកិច្ចជាអ្នករចនាឈីប 486 ដ៏ល្បីឈ្មោះ ខណៈលោកមានអាយុ 20 ឆ្នាំ។ មិនយូរប៉ុន្មាន Gelsinger ក៏បានក្លាយជានាយកបច្ចេកវិទ្យាដំបូងរបស់ក្រុមហ៊ុននេះ នាឆ្នាំ 2001 ក្នុងពេលមានវ័យ 40 ឆ្នាំ។

បើទោះជាបានខំប្រឹងប្រែងអស់ពីសមត្ថភាពក្នុងរយៈពេលយ៉ាងយូរ ប៉ុន្តែចុងក្រោយ Gelsinger នៅតែមិនបានទទួលតំណែងខ្ពស់បំផុតក្នុងឆ្នាំ 2005 ដោយពេលនោះ Paul Otellini ជាអ្នកត្រូវបានជ្រើសរើស។ ដោយសារខកចិត្ត Gelsinger ក៏បានសុំឈប់ និងទៅធ្វើការឱ្យក្រុមហ៊ុនរក្សាទិន្នន័យ EMC ក្នុងឋានៈជាប្រធានផ្នែកមួយរូប នាឆ្នាំ 2009។

ក្នុងបំណងក្លាយជា CEO លោក Gelsinger បានស្នើឱ្យក្រុមហ៊ុន អនុញ្ញាតឱ្យខ្លួនបានចូលរួមកិច្ចប្រជុំនៃក្រុមប្រឹក្សាភិបាលរបស់ EMC ដែលក្រោយមកក៏ទទួលបានដំបូន្មានច្រើនពីសហស្ថាបនិក Jack Egan ក្នុងនោះក៏មានបញ្ហាទាក់ទងនឹងការស្លៀកពាក់ ការយល់ដឹងអំពីហិរញ្ញវត្ថុក្រុមហ៊ុន។ល។ ដូច្នេះ Gelsinger ក៏បានចំណាយពេលមួយឆ្នាំដើម្បីទទួលយកចំណេះដឹងពីសាស្ត្រាចារ្យផ្នែកហិរញ្ញវត្ថុម្នាក់នៅសាកលវិទ្យាល័យ Columbia។

ការប្រឹងប្រែងរបស់ Gelsinger ចុងក្រោយក៏ទទួលបានលទ្ធផលល្អ នៅពេលលោកបានឡើងគ្រប់គ្រងតំណែងខ្ពស់បំផុតនៅក្នុងក្រុមហ៊ុន VMware ដែលជាក្រុមហ៊ុនបុត្រសម្ព័ន្ធរបស់ EMC នាឆ្នាំ 2012។

ការដឹកនាំក្រុមហ៊ុននេះក្នុងគ្រាដំបូងរបស់ Gelsinger បានបរាជ័យ ទាក់ទងនឹងការទប់ទល់នឹងបច្ចេកវិទ្យា cloud computing។ ក្រោយមក បន្ទាប់ពីបានយល់ច្បាស់ពីបញ្ហា លោកក៏បានកែប្រែយុទ្ធសាស្ត្រទាំងស្រុង និងបានសហការជាមួយ Amazon និង Microsoft ទន្ទឹមនឹងការបង្កើតផ្នែកទន់ (software) ដើម្បីជួយដល់អតិថិជនរបស់ខ្លួន ក្នុងការងាកទៅរកបច្ចេកវិទ្យាខាងលើ។

ចំណេះដឹង និងបទពិសោធន៍ស៊ីជម្រៅរបស់ Gelsinger នឹងអាចជួយដឹកនាំ Intel ឱ្យគេចផុតពីការលំបាកនៅក្នុងវិស័យផលិតឈីបនាពេលខាងមុខ។ សូមរង់ចាំតាមដានមើលទាំងអស់គ្នា!

January 15, 2021

Barcelona គ្រោងនាំយក Agüero មក La Liga វិញ

Agüero កីឡាករខ្សែប្រយុទ្ធអាហ្សង់ទីនរូបនេះ ប្រហែលជានឹងចាកចេញពី ManCity ក្រោយបញ្ចប់រដូវកាល 2021 នេះហើយ និងក៏ប្រហែលជានឹងមិនបន្តកុងត្រាជាមួយនឹងក្លិប ManCity របស់គេទៀតឡើយ។ មូលហេតុនេះ នឹងធ្វើឱ្យក្លិបថ្មីណាមួយរបស់គេ មិនចាំបាច់ត្រូវចំណាយប្រាក់សូម្បីតែ 1សេន ដើម្បីទិញយកកីឡាករដ៏ល្អមួយនេះឡើយ។

ក្នុងនោះ Barcelona បានដាក់ការចាប់អារម្មណ៍លើអតីតកីឡាកររបស់ Atletico Madrid រូបនេះ ដើម្បីនាំយកមកអេស្ប៉ាញវិញ ។ Aguero កាលពីពេលមុននេះ បានរង់ចាំការផ្ដល់កុងត្រាថ្មីពី City ដែលជាកន្លែងគេលេងអស់រយៈពេលដល់ទៅ ៩ឆ្នាំទៅហើយ។

ការពិតទៅ ManCity ក៏មានបំណងទុកកីឡាកររូបនេះដែរ ក៏ប៉ុន្តែរូបគេ គឺជាកីឡាករដែលស៊ីថ្លៃបំផុត នៅក្នុងក្រុម ហើយក៏មានវ័យជ្រេណាស់ទៅហើយដែរ (វ័យ ៣២ឆ្នាំ)។ ដូច្នេះ ប្រសិនបើចង់បន្តកុងត្រាថ្មី ក្លិបត្រូវរ៉ាប់រងទៅលើការបន្ថែមប្រាក់ខែ និងអត្ថប្រយោជន៍ជាច្រើនទៀតសម្រាប់រូបគេ៕

January 15, 2021

Ronaldo ក្លាយជាកីឡាករលំដាប់ពិភពលោក អាចមកពី Barcelona បដិសេធ

កីឡាករខ្សែប្រយុទ្ធ Christiano Ronaldo ត្រូវបានគេដឹងថា បានឡើងជើងខ្លាំង កាលពីអំឡុងឆ្នាំ2005 ពោលគឺ ក្រោយពេលដែលគេបានផ្លាស់ទៅនៅ Manchester United កាលពីឆ្នាំ2003។ ដោយសារតែឱកាសដ៏ល្អមួយ បានធ្វើឱ្យគេល្បីល្បាញនៅ ManU រហូតដល់ឡើងជើងខ្លាំងនៅ Real Madrid និងក្លាយជាកីឡាករលំដាប់ពិភពលោកដល់សព្វថ្ងៃនេះ។

កាលគ្រានោះ ក្នុងឆ្នាំ2003 ភ្នាក់ងារកីឡាកររបស់ Ronaldo បានដាក់សំណើសុំទៅលេងនៅ Barcelona តែត្រូវក្លិបមួយនេះបដិសេធ ដែលវាបានធ្វើឱ្យកីឡាកររូបនេះ ប្តូរចិត្តទៅលេងនៅ ManU វិញ។

អតីតប្រធានក្លិប Barcelona លោក Laporta បានបញ្ជាក់ថា៖ “ទោះជាកាលនោះ ភ្នាក់ងារកីឡាករមួយនោះ មកប្រាប់យើងថា គេលក់ឱ្យទៅ ManU ក្នុងតម្លៃ 23លានដុល្លារ តែលក់ឱ្យយើងតែក្នុងតម្លៃ 20លានទេ ក៏យើងនៅតែមិនព្រមដែរ ដោយសារតែពេលនោះ យើងបានទិញយក Ronaldinho រួចទៅហើយ”៕

January 15, 2021

West Ham United នាំយកអតីតតារាសិច មកដឹកនាំក្រុមរបស់ខ្លួន

West Ham United បានធ្វើការតែងតាំង អ្នកស្រី Eve Vorley អតីតតួសម្ដែងរឿងអាសអាភាស និងជាអ្នកដឹកនាំសម្ដែងរឿងនេះផ្ទាល់ ធ្វើជាសមាជិកក្រុមប្រឹក្សាភិបាលរបស់ក្លិប ដែលមានឋានៈស្មើ អ្នកដឹកនាំក្លិបក្នុងថ្ងៃនេះ។ នេះបើយោងតាមការចុះផ្សាយរបស់កាសែត Daily Mail។

អ្វីដែលគួរឱ្យចាប់អារម្មណ៍ខ្លាំងនោះគឺ Eve Vorley ត្រូវបានគេស្គាល់ថា ជាតារាសិច ដ៏ល្បីឈ្មោះកាលពីជំនាន់វីដេអូ ស-ខ្មៅ ដោយក្នុងនោះ 2រឿង របស់នាង គឺ «horny housewives» និង «lesbian nurse» បានក្លាយជាវីដេអូដែលលក់ឌីសដាច់ខ្លាំង កាលពីជំនាន់ឆ្នាំ1990។

គួរឱ្យដឹងដែរថា Eve Vorley បានចាកចេញពីវិស័យនេះអស់ជាច្រើនឆ្នាំមកហើយ ក្រោយមកបានទាក់ទងជាមួយនឹងលោក David Sullivan ដែលជាប្រធានក្លិប Westham United តាំងពីឆ្នាំ 2010 មក៕

January 15, 2021

Bayern Munich ធ្លាក់ពីពាន DFB-Pokal ត្រឹមវគ្គ 32ក្រុមចុងក្រោយ

កាលពីព្រឹកទៀបភ្លឺ ថ្ងៃព្រហស្បតិ៍ ទី14 ខែមករា ក្លិបបាល់ទាត់ FC Bayern Munich បានធ្លាក់ចេញពីពានរង្វាន់ DFB-Pokal 2021-2022 ក្រោយពីចាញ់ក្រុម Holstein Kiel ដោយបាល់ប៉េណាល់ទីកាត់សេចក្តី។

ការប្រកួតរវាងក្រុមខាងលើនេះ បានធ្វើឡើងនៅពានរង្វាន់ DFB-Pokal ឬហៅស្រួលស្ដាប់ថា Cup របស់អាល្លឺម៉ង់។ ការប្រកួតនេះ ក្រុម Bayern Munich បាននាំមុខមុន ដោយ Gnabry នៅនាទីទី14 មុនពេល Bartels របស់ក្រុម Holstein តាមស្មើបានវិញ នៅនាទី37។ ការប្រកួតឈានចូលតង់ទី2 Sane បានបើកការនាំមុខជាថ្មីម្ដងទៀត ឱ្យ Bayern Munich តែយ៉ាងណាមិញ ជិតចប់ការប្រកួត Wahl ក៏រកគ្រាប់បាល់តាមស្មើវិញបាន នៅនាទី90+5។

ដោយសារនេះ ជាការប្រកួតវគ្គជម្រុះ ដូច្នេះការប្រកួតត្រូវបានពន្យារពេល ដល់ការទាត់ប៉េណាល់ទី។ ការទាត់ប៉េណាល់ទីនេះ ក្រុមទាំង2 ស៊ុតចូលដូចគ្នាដល់ទៅ 5គ្រាប់។ តែអ្វីដែលគួរឱ្យសោកស្តាយសម្រាប់ Bayern Munich នោះគឺ គ្រាប់ទី6 កីឡាករ Marc Roca បែរជាស៊ុតមិនចូល ធ្វើឱ្យក្រុមជើងឯកចាស់ Bayern Munich ធ្លាក់ពីពាននេះត្រឹមវគ្គ 32ក្រុមចុងក្រោយ ដែលវាបានក្លាយជាកំណត់ត្រាដ៏អាក្រក់បំផុតរបស់ក្លិប ដ៏ខ្លាំងជាងគេរបស់អាល្លឺម៉ង់មួយនេះ៕

January 15, 2021

ចិនបង្ហាញគំរូក្បាលរថភ្លើងមហាល្បឿន៖ 620 គីឡូម៉ែត្រ/ម៉ោង និងអាចធ្វើដំណើរបាន 1,600គម/ម៉ោង នៅក្នុងបំពង់ដែក

គំរូរថភ្លើងថ្មី និងទំនើបបំផុតនេះ ប្រើប្រាស់បច្ចេកវិទ្យាមេដែកនាំកម្ដៅកម្រិតកំពូល maglev/HTS (high-temperature superconducting) អនុញ្ញាតឱ្យវាធ្វើដំណើរពីក្រុងឡុងដ៍ទៅកាន់ក្រុងបារីស (344 គម) ក្នុងរយៈពេល 47 នាទី។

ក្បាលរថភ្លើងគំរូនេះត្រូវបានឧទ្ទេសនាមនៅក្នុងទីក្រុង Chengdu ប្រទេសចិន។ រថភ្លើងនេះធ្វើដំណើរក្នុងល្បឿនអតិបរមា 620 គម/ម៉ោង។ ដងខ្លួនរបស់វាត្រូវបានធ្វើឡើងអំពីសរសៃកាបោនមហាស្រាល ចំណេកច្រមុះរបស់វាមានរាងស្រដៀងនឹងច្រមុះជ្រូកផ្នែកខាងលើ។ វាប្រើប្រាស់បច្ចេកវិទ្យាមេដែកនាំកម្ដៅកម្រិតកំពូល ដូចបានរៀបរាប់ខាងដើម។

ផ្លូវដែកប្រវែង 165 ម៉ែត្រ សម្រាប់ប្រើក្នុងការពិសោធក្បាលរថភ្លើងថ្មីនេះ ក៏ត្រូវបានដាក់ឱ្យដំណើរការក្នុងថ្ងៃជាមួយគ្នានេះដែរ។

មធ្យោបាយធ្វើដំណើរនេះ មានបច្ចេកវិទ្យាហ្វ្រាំងបន្ទាន់ពិសេស ប៉ុន្តែជាក់ស្ដែងពួកគេមិនត្រូវការប្រើវាទេ។ អ្នកនាំពាក្យក្រុមហ៊ុននេះ ឱ្យដឹងថា ពួកគេក៏អាចតាមដានគ្រប់យ៉ាងនៃរថភ្លើងនេះពីចម្ងាយនៅលើដី។

យោងតាមសាកលវិទ្យាល័យ Southwest Jiaotong ដែលជាក្រុមអ្នករចនាមួយនៃគម្រោងរថភ្លើងនេះ ឱ្យដឹងថា រថភ្លើងប្រភេទ maglev នេះ ត្រូវបានរចនាឡើងក្នុងប្រទេស និងអាចធ្វើដំណើរបាន 620 គម/ម៉ោង។ ធៀបនឹងបច្ចេកវិទ្យា «មហាស្រាលដែលប្រើប្រាស់កម្លាំងម៉ាញេទិក» (magnetic levitation) ដែទៃ រថភ្លើងនេះសមស្របសម្រាប់អនាគតនៃបណ្ដាញគមនាគមន៍ល្បឿនមហាលឿនដែលធ្វើដំណើរក្នុងបំពង់ដែក ជាកន្លែងដែលរថភ្លើងអាចធ្វើដំណើរបាន 1,600 គម/ម៉ោង៕

ប្រភព៖ Xinhua, CCTV

January 15, 2021

PSG គ្រោងដាក់ Neymar ចូលលេងវិញភ្លាមៗ ក្រោយជាពីរបួស

កីឡាករខ្សែប្រយុទ្ធ Neymar JR របស់ក្លិប Paris Saint Germain (PSG) ត្រូវបានគេប្រទះឃើញថា បានធ្វើការហ្វឹកហាត់ជាមួយនឹងក្រុមរបស់ខ្លួនសាជាថ្មីវិញហើយ កាលពីថ្ងៃអង្គារ ទី12 ខែមករា ឆ្នាំ2021 កន្លងទៅ។

ការចូលហ្វឹកហាត់សាជាថ្មីនេះ ត្រូវបានគេដឹងថា Neymar JR បានជាសះស្បើយ 100% ហើយ។ ខាងក្លិប បានអះអាងថា Neymar មានកម្លាំងពេញ និងអាចចូលលេងបាននៅប្រកួតក្រោយនេះ នៅថ្ងៃទី14 ខែមករា ខាងមុខនេះ ដែល PSG ត្រូវជួបជាមួយនឹង Marsille ក្នុងការប្រកួតលីគកំពូលបារាំង។

គួររំឭកដែរថា Neymar JR បានសម្រាកព្យាបាលអស់រយៈពេលជាង 1ខែមកហើយ ដោយរងរបួសកាលពីថ្ងៃទី14 ខែធ្នូ ឆ្នាំកន្លងទៅ ក្នុងការប្រកួតលីគកំពូលបារាំង ទល់នឹងក្រុម Lyon៕

January 14, 2021

Ozil នឹងទៅលេងនៅលីគ ប្រទេសតួរគី ឬមិនទេក៏អាមេរិក ក្រោយចាកចេញពី Arsenal

ខ្សែបម្រើប្រយុទ្ធដ៏ល្បីល្បាញ Mesut Ozil របស់ក្លិប Arsenal បានបង្ហើបឱ្យដឹងអំពីគម្រោងក្រោយការចាកចេញពី Arsenal។ កីឡាករអាល្លឺម៉ង់រូបនេះ បាននិយាយថា រូបគេចង់ទៅលេងនៅលីគកំពូលអាមេរិក ឬ លីគកំពូលតួរគី។

Ozil ចង់ចាកចេញពី Arsenal នៅពេលនេះតែម្តង។ ចំពោះលីគកំពូលអាមេរិក គេមិនច្បាស់ថា នឹងទៅក្លិបមួយណានៅឡើយទេ តែប្រសិនបើគេផ្លាស់ទៅកាន់លីគកំពូលតួរគីវិញ គេនឹងទៅលេងឱ្យក្លិប Fenerbahce ជាក្លិបដែលរូបគេតែងតែគាំទ្រតាំងពីតូចមក។

សូមជម្រាបផងដែរថា កីឡាករវ័យ 32ឆ្នាំរូបនេះ ត្រូវបានលោក Mikel Arteta ដែលជាគ្រូនៅ Arsenal ដកឈ្មោះចេញពីក្រុមកីឡាករ សម្រាប់ប្រកួតក្នុងគ្រប់កម្មវិធីរបស់ក្លិបតាំងពីចុងឆ្នាំ2020 ហេតុនេះហើយមានផ្លូវតែមួយគត់សម្រាប់កីឡាកររូបនេះ គឺចាកចេញពីក្លិបក្នុងទីក្រុងឡុងដ៍មួយនេះតែប៉ុណ្ណោះ៕

January 14, 2021

កូវីដ-19 រាតត្បាតមែន តែឆ្នាំ2020 Apple នៅតែកើបលុយរាប់ពាន់លានដុល្លារពី App Store

ថ្មីៗនេះ របាយការណ៍ពីអ្នកវិភាគ នៅទីភ្នាក់ងារព័ត៌មាន CNBC បានបង្ហាញថា នៅក្នុង ឆ្នាំ2020 Apple រកចំណូលបានច្រើនជាង 64ពាន់លានដុល្លារ ពី App Store ទីផ្សារកម្មវិធីរបស់ខ្លួន។

ទោះយ៉ាងណា ចំណូលក្នុង ឆ្នាំ2020 ជាចំនួនកើនឡើង ដ៏សន្ធឹកសន្ធាប់មួយ ដ្បិតក្នុង ឆ្នាំ2018 គឺរកបានតែ 48.5លានដុល្លារ និងមានកំណើនត្រឹមតែ 3.1% ប៉ុណ្ណោះ បើធៀបទៅនឹង ឆ្នាំ2019។ ចំណូលនេះមានការកើនឡើងដល់ទៅ 28% បើប្រៀបធៀបទៅ ឆ្នាំ2019 ដែលរកបានត្រឹម 50ពាន់លានដុល្លារប៉ុណ្ណោះ។

អ្នកវិភាគដដែលនោះ បានបន្ថែមថា ការលក់កម្មវិធីនៅលើ App Store មានសម្ទុះកើនឡើង ខណៈមានការរាតត្បាតនៃ ជំងឺកូវីដ-19 ដោយមនុស្សចាប់ផ្ដើមសម្រាកនៅផ្ទះ មានពេលវេលាច្រើន និងចំណាយលុយទៅលើកម្មវិធីផ្សេងៗ ដែលលេចធ្លោជាងគេជា ផលិតផលហ្គេម។

App Store គឺជាទីផ្សារកម្មវិធីរបស់ Apple បង្កើតឡើងតាំងពី ឆ្នាំ2008 បន្ទាប់ពី iPhone ដំបូងបានប្រកាសចេញ។ នៅឆ្នាំនោះផងដែរ ក្រុមហ៊ុនបច្ចេកវិទ្យាដ៏ធំរបស់អាមេរិកខាងលើ បានចំណាយថវិកាប្រមាណ 200ពាន់លានដុល្លារ ទៅលើអ្នកអភិវឌ្ឍន៍កម្មវិធី ដើម្បីផលិតកម្មវិធីគាំទ្រលើប្រព័ន្ធប្រតិបត្តិការ iOS របស់ខ្លួន៕

January 14, 2021

Category: សង្គម និងសេដ្ឋកិច្ច