Category: សង្គម និងសេដ្ឋកិច្ច

សម្រាប់ស្រីៗយើង ការងូតទឹកត្រូវតាមវិធី ធានាថា សាច់ស្អាត ស្បែកភ្លឺរលោង
មានសៀវភៅតម្រាមួយ បានណែនាំឱ្យងូតទឹកត្រជាក់ ដែលវាជាការធ្វើឱ្យមនុស្សយើង ស្ថិតក្នុងវ័យកំលោះក្រមុំបានយូរ ព្រោះនៅពេលស្បែក និងសាច់ ប៉ះនឹងភាពត្រជាក់របស់ទឹក ឈាមនឹងនាំគ្នាបាញ់ស្ទុះ មករកស្រទាប់ស្បែក ដើម្បីធ្វើឱ្យរាងកាយបានកក់ក្តៅឡើង និងអាចនិយាយបានថា ជាការបណ្តេញវត្ថុមិនល្អ ចេញពីរាងកាយទៀតផង។
តែអ្នកខ្លះចូលចិត្តងូតទឹកក្តៅឧណ្ហៗ ដើម្បីកុំឱ្យរងា។ បើក្នុងករណីនេះ សីតុណ្ហភាពរបស់ទឹកក្តៅនោះ មិនគួរក្ដៅខ្លាំងជាងសីតុណ្ហភាពរបស់រាងកាយ លើសពី 2អង្សាហ្វារេនហាយទេ មិនដូច្នោះទេ អាចនឹងធ្វើឱ្យស្បែកស្ងួត កើតអាការរមាស់។
ការងូតទឹក មិនថាតែទឹកក្តៅ ឬទឹកត្រជាក់ឡើយ ទាំងអស់គ្នាគួរងូត មុនទទួលទានអាហារ រយៈពេល ១ម៉ោង ឬក្រោយពេលបាយរួច យ៉ាងតិចបំផុត ២-៣ម៉ោង។ ការត្រាំខ្លួននៅក្នុងទឹកក្តៅ មុនពេលចូលគេង នឹងជួយឱ្យគេងលក់បានស្រួល។ តាមរយៈការសាកល្បងនៅលើស្រ្តីចំនួន ៩នាក់ ដែលមានបញ្ហារឿងគេងមិនលក់ បានសាកល្បងឱ្យម្នាក់ៗ ងូតទឹកក្តៅ ប្រមាណជា ១ម៉ោងកន្លៈ មុនពេលចូលគេង ជាប់ៗគ្នារយៈពេល ២យប់ក្នុង ១សប្តាហ៍។ តមក ក៏សាកល្បងឱ្យស្រ្តីក្រុមដដែលនេះ សាកល្បងងូតទឹកមិនសូវក្តៅដូចមុន វិញម្តង ដើម្បីពិនិត្យមើលលទ្ធផលប្រៀបធៀប និងបានសង្កេតឃើញថា ពេលងូតទឹកក្តៅ ក្រុមស្រ្តីទាំងនោះគេងលក់បានស្រួល និងស្កប់ជាងពេលងូតទឹកមិនសូវក្តៅ។
ចំពោះសុខភាពរូបសម្ផស្សវិញ ការងូតទឹកក្តៅ ការដុសសាប៊ូខ្លាំងៗ នឹងធ្វើឱ្យស្បែករាងកាយឡើងស្ងួត ព្រោះជាតិប្រេងដែលមាននៅលើស្បែកតាមធម្មជាតិនោះ ត្រូវបានកម្ចាត់ចេញអស់ ដូច្នេះបើស្បែករបស់អ្នកឡើងស្ងួតនោះ ចូរលាយប្រេងម្កាក់ប្រភេទថ្លា ១ស្លាបព្រាបាយ នៅក្នុងទឹកសម្រាប់ងូតនោះ ឬក៏លាបលើស្បែកឱ្យសព្វខ្លួន ដោយប្រេងម្កាក់ស្តើងៗ មុនពេលងូតទឹកក្តៅក៏បាន…នៅពេលងូតទឹកហើយ ស្បែករបស់អ្នកនឹងស្រស់ថ្លា មានសំណើម និងថែមទាំងភ្លឺរលោងទៀតផង៕
January 21, 2021
ឯកឧត្តម ជា ចាន់តូ៖ កំណើនសេដ្ឋកិច្ចកម្ពុជា ក្នុងឆ្នាំ2020 បានទទួលរងការធ្លាក់ចុះអវិជ្ជមានជាលើកដំបូង ក្នុងរយ:ពេលជាង 2ទសវត្សរ៍ចុងក្រោយ
ឯកឧត្តម ជា ចាន់តូ ទេសាភិបាលធនាគារជាតិ នៃកម្ពុជា បានថ្លែងថា កំណើនសេដ្ឋកិច្ចកម្ពុជាក្នុងឆ្នាំ2020 បានទទួលរងការធ្លាក់ចុះអវិជ្ជមានជាលើកដំបូង ក្នុងរយ:ពេលជាង 2ទសវត្សរ៍ចុងក្រោយ ដែលជាចម្បងដោយសារ ការធ្លាក់ចុះវិស័យទេសចរណ៍ ការនាំចេញផលិតផលកាត់ដេរ និងវិស័យសំណង់។
ឯកឧត្តម ជា ចាន់តូ បានមានប្រសាសន៍កាលពីម្សិលមិញ ដោយបានបញ្ជាក់ថា ទោះយ៉ាងណា កម្ពុជានៅតែអាចសម្រេចបាននូវស្ថិរភាពថ្លៃ និងអត្រាប្តូរប្រាក់ ហើយទុនបម្រុងអន្តរជាតិត្រូវបានគរពូនជាលំដាប់ និងមានកម្រិតខ្ពស់ជាង 3ដង នៃកម្រិតដែលប្រទេសកំពុងអភិវឌ្ឍន៍គួរមាន។
ទោះស្ថិតក្នុងស្ថានភាពនៃវិបត្តិជំងឺកូវីដ-19 វិស័យធនាគារមានស្ថិរភាពរឹងមាំ និងបានចូលរួមយ៉ាងសកម្ម ក្នុងការគាំទ្រសកម្មភាពសេដ្ឋកិច្ច និងកាត់បន្ថយផលប៉ះពាល់ នៃវិបត្តិមកលើអាជីវកម្ម និងប្រជាជនក្រីក្រ ស្របតាមគោលនយោបាយរបស់រាជរដ្ឋាភិបាល។
ទំនើបកម្មប្រព័ន្ធទូទាត់ និងការប្រើប្រាស់បច្ចេកវិទ្យាហិរញ្ញវត្ថុថ្មី ក៏នឹងរួមចំណែកគាំទ្ររាជរដ្ឋាភិបាលក្នុងការអភិវឌ្ឍសេដ្ឋកិច្ច ឱ្យទៅជាសេដ្ឋកិច្ចឌីជីថលផងដែ។ ក្នុងចំណោមប្រព័ន្ធទូទាត់ដែលកម្ពុជាបានដាក់ឱ្យប្រើប្រាស់កន្លងមក ប្រព័ន្ធបាគងដែលប្រើប្រាស់បច្ចេកវិទ្យាប្លុកឆេន (Blockchain) ត្រូវបានអន្តរជាតិទទួលស្គាល់ថា ជាប្រព័ន្ធទូទាត់មួយដែលប្រើប្រាស់បច្ចេកវិទ្យាចុងក្រោយនៅលើពិភពលោក និងកំពុងក្លាយជាប្រព័ន្ធទូទាត់ចម្បងមួយ ដែលសម្រួលដល់ការផ្ទេរប្រាក់ និងទូទាត់សងប្រាក់ភ្លាមៗ រវាងគ្រឹះស្ថានធនាគារ និងហិរញ្ញវត្ថុ៕
January 21, 2021
ទស្សនាឃ្លីប អ្នកបើកគ្រឿងចក្រ ចាប់ “យន្តហោះ ១គ្រឿង” បង្វិល ដូចរបស់លេង
គេនាំគ្នានិយាយថា ក្មេងប្រុសៗ ពេលធំឡើង របស់លេងរបស់ពួកគេ ក៏នឹងធំ ហើយថ្លៃឡើងៗទៅតាមនោះដែរ ហើយរឿងនេះ វាបានក្លាយជាការពិត យ៉ាងមិនបាច់សង្ស័យ តាមរយៈឃ្លីបវីដេអូ ដែលកំពុងល្បីល្បាញក្នុងខណៈពេលនេះ នៅពេលដែលបុរសអ្នកស្រុកហ្វ្លរីដា ម្នាក់ បានប្រើដៃចាប់ របស់រថយន្តគ្រឿងចក្រប៊ែកហូ ចាប់យន្តហោះ ១គ្រឿង បង្វិលលេងដូចកូនក្មេង។
អ្នកផូស្ត និងថតឃ្លីបវីដេអូនេះ គឺមនុស្សម្នាក់ដែលប្រើឈ្មោះថា vice.aviator ក្នុងប្រព័ន្ធអ៊ីនស្តាក្រាម ដែលធ្វើការនៅក្នុងឧស្សាហកម្មយន្តហោះ ដោយឃ្លីបមួយនេះ បានក្លាយជា វ៉ាយរ៉ាល់ ក្នុងទូទាំងប្រព័ន្ធបណ្ដាញសង្គមផ្សេងៗ ដូចជា ហ្វេសប៊ុក រេតធីង ធ្វីតធើរ និងអ៊ីនស្តាក្រាម។
ឃ្លីបវីដេអូនេះ ត្រូវបានថតនៅក្នុងព្រលានយន្តហោះ Opa-Locka Executive ក្នុងទីក្រុងម៉ៃអាមី ដោយអ្នកជំនាញផ្នែកអាកាសចរណ៍រូបនេះ បានរៀបរាប់ឱ្យដឹងថា គាត់បានសម្លឹងទៅត្រង់កន្លែងនោះ ដើម្បីស្វែងរកយន្តហោះបូអ៊ីង 707 ចាស់ៗដែលទើបត្រូវកម្ទេចចោល តែគាត់បែរជាមើលឃើញ អ្នកបញ្ជារថយន្តគ្រឿងចក្រម្នាក់ បានប្រើដៃចាប់របស់គ្រឿងចក្រនោះ ចាប់រថយន្តហោះ ១គ្រឿងបង្វិលលេង តែគាត់មិនបានថា តើអ្នកបញ្ជារថយន្តគ្រឿងចក្រនោះមានឈ្មោះអ្វីឡើយ។
លោកបានសរសេរថា “ក្រោយចាកចេញពីព្រលានយន្តហោះ នៅពេលព្រឹក បន្ទាប់ពីការហ្វឹកហាត់របស់ខ្ញុំហើយ ក្នុងឋានៈជាអ្នកចូលចិត្ត និងស្រឡាញ់យន្តហោះ ខ្ញុំក៏សម្រេចចិត្ត ជិះឡានទៅមើលយន្តហោះបូអ៊ីង707 ចាស់ៗ ដែលទើបត្រូវកម្ទេចចោល តែក៏គ្មានសំណាងបានឃើញឡើយ។ ខ្ញុំក៏បើកឡានត្រឡប់វិញ និងបានឃើញយន្តហោះប្រភេទ Jet ១គ្រឿងដែលត្រូវគេឈប់ប្រើប្រាស់ទៅហើយនោះ វាបែរជាបានហោះហើរម្ដងទៀត ជាលើកចុងក្រោយ ដោយគ្មាននរណានឹកស្មានដល់…”
ត្រូវអរគុណចំពោះ ការទៅចំពេលវេលារបស់គាត់ ទើបធ្វើឱ្យយើងទាំងអស់គ្នា បានទស្សនាអំឡុងពេលដ៏គួរអស់សំណើចមួយនេះ៕
ប្រភព៖ សារព័ត៌មានបរទេស
January 21, 2021
គម្រោងសាងសង់ស្ពានទៅអរិយក្សត្រ នៅមិនទាន់កំណត់កាលបរិច្ឆេទ និងទីតាំងច្បាស់លាស់
ការបន្តឆ្លងរាលដាលជំងឺកូវីដ-19 កំពុងធ្វើឳ្យការកំណត់កាលបរិច្ឆេទនៃការសាងសង់ស្ពាន ពីភ្នំពេញ ទៅតំបន់អរិយក្សត្រ ត្រូវអូសបន្លាយ ដោយមកដល់ពេលនេះ ក្រុមការងារជំនាញរបស់ប្រទេសទាំង2 នៅមិនទាន់បានជួបគ្នានៅឡើយ ទោះបីជាកម្ពុជា បានបង្កើតក្រុមការងាររបស់ខ្លួន រួចហើយក៏ដោយ។
ប្រធានាធិបតីសាធារណរដ្ឋកូរ៉េ លោក មូន ជេអ៊ីន កាលពីអំឡុងខែវិច្ឆិកា ឆ្នាំ2020 បានប្រកាសថា ប្រទេសកូរ៉េនឹងជួយសាងសង់ស្ពានមិត្តភាពកម្ពុជា-កូរ៉េ ឆ្លងកាត់ទន្លេមេគង្គ។
លោក វ៉ាស៊ឹម សូរិយា អ្នកនាំពាក្យក្រសួងសាធារណការ និងដឹកជញ្ជូន ប្រាប់ភ្នំពេញប៉ុស្តិ៍កាលពីថ្ងៃទី20 ខែមករា ថា បន្ទាប់ពីទទួលបានការសន្យាពីប្រទេសកូរ៉េខាងត្បូង អំពីការផ្ដល់អំណោយស្ពានឆ្លងទន្លេ ភ្ជាប់ពីភ្នំពេញទៅតំបន់អរិយក្សត្រហើយ កម្ពុជាក៏បានរៀបចំក្រុមការងារជំនាញរបស់ខ្លួន ដើម្បីត្រៀមធ្វើការជាមួយភាគីកូរ៉េ។ លោកបន្តថា ប៉ុន្តែដោយសារការឆ្លងកូវីដ-19 នៅលើពិភពលោក មិនទាន់អាចគ្រប់គ្រងបានទាំងស្រុង ដូច្នេះមកដល់ពេលនេះ ក្រុមការងារនៃប្រទេសទាំង2 នៅមិនទាន់បានជួបប្រជុំគ្នាទេ។
លោកបន្ថែមថា ដោយសារតែក្រុមការងារជំនាញប្រទេសទាំង2 មិនទាន់ជួបគ្នា ហេតុនេះ ទើបគេមិនទាន់អាចកំណត់ពីការសាងសង់ស្ពាននេះថា នឹងត្រូវធ្វើនៅកន្លែងណា? ពេលណា? និងមានតម្លៃប៉ុន្មាននៅឡើយទេ។
លោកនិយាយថា៖ “កម្ពុជាបានបង្កើតក្រុមការងារ សម្រាប់គម្រោងសាងសង់ស្ពាន តភ្ជាប់ពីភ្នំពេញ ទៅតំបន់អរិយក្សត្ររួចហើយ ដោយយើងនៅរង់ចាំតែការមកដល់របស់ភាគីកូរ៉េប៉ុណ្ណោះ។ លោកបន្ថែមថា៖ “សម្រាប់ពេលវេលាសាងសង់ គឺមិនទាន់អាចនិយាយថា នឹងចាប់ផ្ដើមនៅពេលណាបានទេ ព្រោះគេត្រូវការពេលវេលាសិក្សាបច្ចេកទេសសាងសង់ និងថវិកាបន្ថែមទៀត។
ប្រធានសមាគមអចលនទ្រព្យសកល លោក សំ សុខនឿន បានប្រាប់ថា ព័ត៌មានពីការផ្ដល់ជំនួយរបស់កូរ៉េសម្រាប់
សាងសង់ស្ពានទៅតំបន់អរិយក្សត្រនេះ មិនបានធ្វើឳ្យតម្លៃអចលនទ្រព្យកើនឡើងទេ តែសកម្មភាពនៃការទិញលក់ ហាក់មានច្រើនជាងមុន។ អរិយក្សត្រគឺជាទីតាំងល្អដែលអ្នកវិនិយោគមិនគួរមើលរំលង ព្រោះនៅពេលមានស្ពានតភ្ជាប់មកចំណុចកណ្ដាលភ្នំពេញហើយ ទីនោះនឹងមានការអភិវឌ្ឍលឿនមិនខាន។
លោកប្រាប់ថា៖ “ដោយសារព័ត៌មានគម្រោងសាងសង់ស្ពាននេះ បានប្រកាសក្នុងអំឡុងពេលការឆ្លងរាលដាលជំងឺកូវីដ-19 ហេតុនេះតម្លៃដីនៅអរិយក្សត្រ មិនបានហក់ឡើងខ្ពស់ទេ បើធៀបនឹងដើមឆ្នាំ2020 គ្រាន់តែចលនានៃការទិញលក់ គឺមានភាពមមាញឹកជាងមុន។
លោកបន្តថា បច្ចុប្បន្ន ដីនៅអរិយក្សត្រតំបន់ល្អបំផុត (ជាប់មាត់ទន្លេ) មានតម្លៃជាមធ្យមក្នុងរង្វង់ 1,000ដុល្លារ ក្នុង 1ម៉ែត្រការ៉េ ដីឡូត៍លំនៅឋានមានតម្លៃក្នុងរង្វង់ 300ដុល្លារ និងដីសម្រាប់អភិវឌ្ឍន៍ធំៗ មានតម្លៃជាមធ្យមចន្លោះពី 180-250ដុល្លារ។
ជាមួយគ្នានេះ លោកអះអាងថា៖ “តម្លៃដីនៅអរិយក្សត្រ នឹងស្ទុះឡើងខ្ពស់ ពេលស្ពានចាប់ផ្ដើមសាងសង់ ដែលវានឹងស្ទុះឡើងខ្ពស់ ដូចនៅតំបន់ជ្រោយចង្វារនាពេលបច្ចុប្បន្ននេះដែរ។
កន្លងមក កម្ពុជាធ្លាប់លើកយកតំបន់កំពង់ចម្លងស្វាយជ្រុំ-អរិយក្សត្រនេះ ធ្វើជាកន្លែងមានលក្ខណ:អំណោយផល សម្រាប់ការកសាងស្ពាន ប៉ុន្តែសម្រាប់ការងារជាក់ស្ដែង គឺគេនៅមិនទាន់បានកំណត់យកកន្លែងណាជាផ្លូវការនៅឡើយទេ ដោយត្រូវរង់ចាំអ្នកជំនាញការរបស់ភាគីទាំង2 សិក្សារួមគ្នាសិន។ នេះបើយោងតាមលោក វ៉ាស៊ឹម សូរិយា៕
January 21, 2021
កុំខ្ជិលកោររោមក្លៀក បើមិនចង់ជួបរឿងយ៉ាប់ៗបែបនេះ…
ទោះមិនមែនជាមនុស្សប្រុស ក៏មនុស្សស្រីយើង មានដុះរោមក្លៀកដែរ ហើយអ្នកខ្លះ ថែមទាំងខ្ជិលកោរចេញទៀតផង ខាងក្រោមនេះគឺរឿងយ៉ាប់ៗមួយចំនួន ដែលនារីៗណា ខ្ជិលកោររោមក្លៀក ច្បាស់ជាត្រូវជួបមិនខាន។
. អ្នកណាៗ ក៏សម្លឹងមើលមកអ្នកដែរ
ប្រាកដហើយ…ព្រោះមានស្រីៗឯណា គេទុករោមក្លៀកឱ្យវែង ដល់ថ្នាក់ហ្នឹងនោះ?!។ បើអ្នកចេញទៅខាងក្រៅ បែបមានរោមក្លៀកវែងៗបែបនោះ វាមិនមែនជារឿងប្លែកទេ ដែលអ្នកណាៗ ក៏បែរមកសម្លក់សម្លឹងមើលអ្នកដែរនោះ ព្រោះអ្នកដទៃគេនឹងគិតថា អ្នកជាមនុស្សកខ្វក់ មិនចេះមើលថែទាំខ្លួន ហើយបើនៅជិតផង អាចនឹងមានធំក្លិនមិនល្អ នាំឱ្យចង់វិលមុខខ្យល់គទៀតផង។
. ជួបនឹងក្លិនខាៗ មិនស្រស់ស្រាយ
រោមក្លៀកដែលវែង នឹងធ្វើឱ្យការថែទាំសម្អាតកាន់តែពិបាកឡើង ដល់ពេលនោះ នឹងមានក្លិនមិនល្អកើតឡើងយ៉ាងពិតប្រាកដ ហើយអាចនឹងគ្មាននរណាចង់ចូលមកក្បែរឡើយ ក៏អាចថាបានដែរ។
. ត្រូវគិតរាងច្រើន មុននឹងរើសខោអាវមកស្លៀក
បើខ្ជិល មិនព្រមកោររោមក្លៀកចេញសោះនោះ ប្រហែលជាលែងបានពាក់អាវដៃខ្លី អាវវៀលក្លៀក ឬក៏អាវអត់ដៃស្អាតៗទៀតហើយមើលទៅ ព្រោះប្រហែលជាគ្មានអ្នកណាគេចង់ឃើញ អ្នកដែលស្លៀកពាក់ស្អាតៗហើយ តែពេលលើកដៃឡើង មានសុទ្ធតែរោមក្លៀកវែងៗនោះទេ។ វិធីដែលល្អបំផុត គឺទុកសម្លៀកបំពាក់ទាំងនោះស្លៀក ពេលកោររោមក្លៀកចេញរួចហើយវិញប្រសើរជាង។
ខ្លួនជាស្រី យ៉ាងណាៗក៏មិនគួរទុករោមក្លៀកដែរ បើអ្នកណាស្រឡាញ់ចូលចិត្តការទុករោមក្លៀកវែងៗ បែបនារីបរទេសនោះ ក៏សូមឱ្យគិតថា វាមិនស័ក្តិសមនឹងមនុស្សស្រីស្រុកយើងទេ ព្រោះធាតុអាកាសក្តៅ វានឹងធ្វើឱ្យមានក្លិនមិនល្អ និងសូមជឿចុះថា គ្មានបុរសណា គេចូលចិត្តបែបហ្នឹងទេ៕
January 21, 2021
ឥណ្ឌា បង្ហាញគម្រោងជំនួយ និងវិនិយោគជាច្រើននៅកម្ពុជា
ក្នុងឱកាសចូលជួបសម្តែងការគួរសមជាមួយសម្តេចអគ្គមហាពញាចក្រី ហេង សំរិន ប្រធានរដ្ឋសភា លោកជំទាវបណ្ឌិត ដេវីយ៉ានី ឧត្តាំ ខូប្រាហ្គាដ (H.E. Mrs. Devyani Uttam Khobragade) ឯកអគ្គរដ្ឋទូត ដែលទើបតែងតាំងថ្មី នៃសាធារណរដ្ឋឥណ្ឌា ប្រចាំនៅព្រះរាជាណាចក្រកម្ពុជា បានជម្រាបសម្តេចពីគម្រោងជំនួយ និងការវិនិយោគជាច្រើន របស់ប្រទេសឥណ្ឌានៅកម្ពុជា។ ពិសេសលោកជំទាវ បានប្តេជ្ញាចិត្តនៅក្នុងការពង្រឹងពង្រីកចំណងមិត្តភាព កិច្ចសហប្រតិបត្តិការជាប្រពៃណី ដែលមានតាំងពីយូរលង់ណាស់មកហើយ រវាងប្រទេសទាំង2 ឱ្យកាន់តែរឹងមាំថែមទៀត ទាំងនៅស្ថាប័ននីតិប្បញ្ញត្តិ និងនីតិប្រតិបត្តិ។
នៅក្នុងជំនួបសវនាការ នាព្រឹកថ្ងៃទី២០ ខែមករា ឆ្នាំ២០២១នេះ លោកជំទាវបណ្ឌិត ដេវីយ៉ានី ឧត្តាំ ខូប្រាហ្គាដ បានលើកឡើងថា ឥណ្ឌាមានគម្រោងចូលរួមជួយជួសជុលអភិរក្សប្រាសាទព្រះវិហារ ដែលជាបេតិកភណ្ឌពិភពលោក ចូលរួមជំរុញលើកកម្ពស់ការប្រើប្រាស់ទឹកស្អាតនៅជនបទ និងជួយដល់វិស័យសុខាភិបាល ការប្រយុទ្ធប្រឆាំងជំងឺគ្រុនចាញ់ និងការកសាងសមត្ថភាពសមាជិក-សមាជិកានៃរដ្ឋសភា និងមន្ត្រីរាជការ ជាដើម។
ជាមួយគ្នានេះ លោកជំទាវ បានប្តេជ្ញាថា នឹងខិតខំជំរុញដល់អ្នកវិនិយោគិនពីប្រទេសឥណ្ឌា មកបណ្ដាក់ទុននៅកម្ពុជា ក្នុងវិស័យសុខាភិបាល ជំរុញឱ្យមានជើងហោះហើរត្រង់ រវាងប្រទេសទាំង2។ លោកជំទាវ ឯកអគ្គរដ្ឋទូត បានជម្រាប សម្តេចដែរថា ឥណ្ឌានឹងលើកកម្ពស់ការទំនាក់ទំនងរវាងប្រជាជន និងប្រជាជន តាមបែបឌីជីថល នៅក្នុងនោះមាន ប្រជាជនកម្ពុជា និងប្រជាជនឥណ្ឌា ប្រជាជនឥណ្ឌា និងប្រជាជនក្នុងតំបន់អាស៊ាន ហើយឥណ្ឌា នឹងកសាងផ្លូវគមនាគមន៍ដ៏ធំមកកាន់បណ្តាប្រទេសសមាជិកអាស៊ានផងដែរ។
លោកជំទាវ ឯកអគ្គរដ្ឋទូត បានជម្រាប សម្តេចប្រធានរដ្ឋសភា ផងដែរថា ចំពោះសំណើរបស់សម្តេចនាយករដ្ឋមន្ត្រី ដែលបានស្នើដល់ប្រទេសឥណ្ឌា ជួយផ្តល់ជំនួយមនុស្សធម៌វ៉ាក់សាំងការពារកូវីដ-១៩ ដល់ប្រទេសកម្ពុជានោះ លោកជំទាវ នឹងរាយការណ៍ជូនថ្នាក់ដឹកនាំឥណ្ឌាបានជ្រាប និងសម្រេចនៅក្នុងកិច្ចការនេះ។
សម្តេចអគ្គមហាពញាចក្រី ហេង សំរិន បានគាំទ្របេសកកម្មការទូតថ្មី របស់លោកជំទាវ នៅកម្ពុជា។ សម្តេចបានលើកឡើងថា បេសកកម្មនេះ ពិតជាមានសារៈសំខាន់ខ្លាំងណាស់ ក្នុងការបន្តរួមចំណែកលើកកម្ពស់ទំនាក់ទំនង ចំណងមិត្តភាព និងកិច្ចសហប្រតិបត្តិការរវាងប្រទេសយើងទាំង2 ដែលមានស្រាប់ ឱ្យកាន់តែល្អប្រសើរ ថែមឡើងមួយកម្រិតទៀត។
កម្ពុជា-ឥណ្ឌា មានទំនាក់ទំនង និងកិច្ចសហប្រតិបត្តិការលើវិស័យការទូតនេះ ជាមួយគ្នាជាយូរយារណាស់មកហើយ ទាំងផ្នែកសិល្បៈ វប្បធម៌ និងជំនឿសាសនា។ សម្តេចប្រធានរដ្ឋសភា បានមានប្រសាសន៍ថា ឥណ្ឌាជាប្រទេសមួយ ក្នុងចំណោមប្រទេសមិនច្រើនទេ ដែលបានគាំទ្រដល់រដ្ឋាភិបាលកម្ពុជា នៅក្រោយថ្ងៃរំដោះ ៧មករា ឆ្នាំ១៩៧៩ ខណៈប្រទេសជាច្រើន ពិសេសប្រទេសលោកខាងលិច បានហ៊ុមព័ទ្ធសេដ្ឋកិច្ចកម្ពុជា។
សម្តេចបានលើកឡើងថា រដ្ឋសភាកម្ពុជា មានការពេញចិត្ត ដោយសង្កេតឃើញពីវឌ្ឍនភាពនៃទំនាក់ទំនង និងកិច្ចសហប្រតិបត្តិការទ្វេភាគី រវាងប្រទេសយើងទាំង2 កម្ពុជា-ឥណ្ឌា មានការរីកចម្រើនឥតឈប់ឈរ ទាំងវិស័យ នយោបាយ ការទូត សេដ្ឋកិច្ច ពាណិជ្ជកម្ម សង្គមកិច្ច វប្បធម៌ អប់រំ សុខាភិបាល និងការអភិវឌ្ឍធនធានមនុស្ស។
ក្នុងនាមរដ្ឋសភាកម្ពុជា សម្តេចអគ្គមហាពញាចក្រី ហេង សំរិន បានថ្លែងអំណរគុណដល់ប្រទេសឥណ្ឌា ដែលរយៈពេលកន្លងមកនេះ បានជួយបណ្តុះបណ្តាលធនធានមនុស្ស រយៈពេលខ្លី និងវែង ដល់និស្សិត និងមន្ត្រីកម្ពុជា ជាង 1ពាន់នាក់ និងសូមស្នើឥណ្ឌា បន្តជួយបណ្តុះបណ្តាលជំនាញផ្សេងៗបន្ថែមទៀត។ សម្តេចប្រធានរដ្ឋសភាបានគូសបញ្ជាក់ថា រដ្ឋសភាកម្ពុជាសូមអបអរសាទរ រដ្ឋាភិបាលប្រទេសទាំង2 ដែលបានចុះកិច្ចព្រមព្រៀង និងអនុស្សរណៈជាមួយគ្នា ក្នុងកិច្ចសហប្រតិបត្តិការលើវិស័យអាទិភាពជាច្រើន និងបានត្រៀមចុះហត្ថលេខាលើឯកសារសំខាន់ៗជាច្រើនទៀត។
លោកជំទាវ ដេវីយ៉ានី ឧត្តាំ ខូប្រាហ្គាដ បានស្នើសុំសម្តេច បន្តពង្រឹងពង្រីកកិច្ចសហប្រតិបត្តិការរវាងសភាប្រទេសទាំង2 ឱ្យកាន់តែរឹងមាំថែមទៀត និងបានគោរពអញ្ជើញសម្តេចដឹកនាំគណៈប្រតិភូរដ្ឋសភាកម្ពុជា ទៅបំពេញទស្សនកិច្ចនៅប្រទេសឥណ្ឌាក្រោយពេលជំងឺកូវីដ-១៩ បានធូរស្រាល។
សម្តេចប្រធាន បានទទួលយកសំណើនេះ និងបានគូសបញ្ជាក់ថា រដ្ឋសភាកម្ពុជា បានធ្វើកិច្ចសហប្រតិបត្តិការជាច្រើនជាមួយរដ្ឋសភាឥណ្ឌា នៅក្នុងក្របខ័ណ្ឌក្រុមមិត្តភាពសភាទាំង2 តាមរយៈការផ្លាស់ប្តូរទស្សនកិច្ច ការគាំទ្រគ្នាទៅវិញទៅមក នៅលើវេទិកាអន្តរសភានានា នៅក្នុងតំបន់ និងសកលលោក ដែលមានជាអាទិ៍ អន្តរសភាអាស៊ាន និងសហភាពអន្តរសភា(IPU) ជាដើម៕

January 20, 2021
របស់សំខាន់ 3យ៉ាង ដែល Samsung បានដកចេញពីស្មាតហ្វូនឆ្លាតវៃ ជំនាន់ថ្មី Galaxy S21 Series
Samsung ដែលទើបនឹងប្រកាសចេញស្មាតហ្វូនឆ្លាតវៃ ជំនាន់ថ្មី Galaxy S21 Series បានភ្ជាប់មកជាមួយលក្ខណសម្បត្តិពិសេសៗជាច្រើន ក៏ដូចជាការទទួលបានមុខងារថ្មីៗ មួយចំនួនផ្សេងទៀត ដូចជាបន្ថែមការគាំទ្រប៊ិច S Pen ឱ្យត្រកូល S (Galaxy S21 Ultra) របស់ខ្លួនជាលើកដំបូង ជាដើម តែក្នុងនោះ Samsung ក៏បានដកចេញផងដែរ នូវរបស់សំខាន់ 3យ៉ាង មានដូចជា៖ ក្បាលឆ្នាំងសាកល្បឿនលឿនកម្លាំង 25W, កាសខ្សែ AKG និង microSD។
Samsung បានដកចេញពីប្រអប់ របស់ Galaxy S21 Series គឺក្បាលឆ្នាំងសាកល្បឿនលឿនកម្លាំង 25W ដែលជា វត្ថុដំបូងគេ កំពុងទទួលបានការចាប់អារម្មណ៍ខ្លាំង ឯរបស់បន្ទាប់ដែលត្រូវដកចេញដែរនោះ គឺកាសខ្សែ AKG ដែលធ្លាប់ឃើញមាននៅក្នុងប្រអប់របស់ Galaxy S10 និង S20 Series កន្លងមក។ មានន័យថា នៅក្នុងប្រអប់របស់ Galaxy S21 Series បានភ្ជាប់មកជាមួយសៀវភៅណែនាំ, ខ្សែ USB-C និងម្ជុលចាក់ SIM មួយប៉ុណ្ណោះ។
សម្រាប់មួយតួខ្លួន លើស្មាតហ្វូនដែល Samsung បានដកចេញពី Galaxy S21 Series ទី3 នោះគឺ រន្ធបន្ថែម microSD មានន័យថា ម្ចាស់ Galaxy S21 Series ទាំងអស់ មិនចាំបាច់បារម្ភ រឿងបន្ថែមមេម៉ូរី ពីខាងក្រៅនោះទេ។
សម្រាប់ម៉ូដែលខ្ពស់ជាងគេ Galaxy S21 Ultra ក៏មិនអាចគាំទ្របច្ចេកវិទ្យាសាកថ្មល្បឿនលឿនកម្លាំង 45W ដូចទៅនឹង S20 Ultra ដែរ។ សរុបមក Samsung យកចិត្តដាក់ទៅលើ Galaxy S21 Series របស់ខ្លួនខ្លាំងមែនទែន ដោយពួកវាទទួលបានលក្ខណសម្បត្តិថ្មីៗជាច្រើន គួរឱ្យចាប់អារម្មណ៍ ប៉ុន្តែជាមួយគ្នានោះដែរ Samsung ក៏បានដកលក្ខណសម្បត្តិមួយចំនួន ដែលអ្នកប្រើប្រាស់មិនចង់ឱ្យដកចេញពី Galaxy S21 Series ផងដែរ៕
January 20, 2021
Store របស់ Huawei ឈ្មោះ “App Gallery” ឌីហ្សាញ អាប់ឌែតថ្មី ស្អាតទាក់ទាញជាងមុន
ក្រុមហ៊ុន Huawei បានបញ្ចេញនូវ App Gallery ដែលជាបណ្ដុំកម្មវិធីផ្ដាច់មុខ ឬ Huawei Store កាលពីម្សិលមិញនេះ ដោយឌីហ្សាញអាប់ឌែតថ្មី លើផ្ទាំង Interface និងមុខងារផ្សេងៗទៀត។
មុខងារថ្មីមួយ គឺ Feature Tab អាប់ឌែតរបៀបប្រើប្រាស់ គឺ scroll អូសឡើងលើ, បន្ថែមកម្មវិធីថ្មីបំផុត-ចាស់បំផុត និងកម្មវិធីណាល្បីជាងគេជាមួយនឹង រូបភាព, ការណែនាំ(guide) និងអត្ថបទខ្លីៗទាក់ទងនឹង app នោះ។ វាក៏បានផ្ដល់ភាពងាយស្រួលដល់អ្នកប្រើប្រាស់ ដែលនឹងអាចមើលឃើញ Card-style feed ផងដែរ។
មាតិកាថ្មីនេះ ត្រូវបានគ្រប់គ្រងយ៉ាងយកចិត្តទុកដាក់ ដោយ Editor ដើម្បីឱ្យអ្នកប្រើប្រាស់អាចងាយយល់ និងអ្វីដែលពួកគេចង់បានពី កម្មវិធីដែលពួកគេចង់ដោនឡូត។ ជាមួយគ្នានោះ ការអាប់ឌែតថ្មី ក៏មានចំណុចបញ្ចុះតម្លៃ ថែមទៀតដូចជា៖ Cashback discount, Lucky draw និង Challenges with reward សម្រាប់ឱ្យអ្នកប្រើប្រាស់់អាចទិញ ឬសាកល្បងកម្មវិធីថ្មី។ ម្យ៉ាងទៀត វាក៏មានមុខងារដូច Store ដទៃដែរ គឺ reviews និង rating ឱ្យផ្កាយដល់កម្មវិធីដែលអ្នកគិតថា ល្អប្រើ។
សូមជម្រាបជូនដែរថា App Gallery របស់ Huawei មកទល់ពេលនេះ ទទួលបានអ្នកប្រើប្រាស់ជាប្រចាំថ្ងៃ ឡើងដល់ 500លាននាក់ គិតចាប់តាំងការប្រកាសចេញកាលពីឆ្នាំមុន។ បច្ចុប្បន្ន App Gallery បានដាក់ដំណើរការទូទាំងអឺរ៉ុបរួចរាល់ហើយ និងជាពិសេសការអាប់ឌែតថ្មីខាងលើ នឹងបង្ហាញមុខឆាប់ៗនេះនៅលើ Store ប្រទេសអឺរ៉ុបដូចជា៖ ស្វ៊ីស, ន័រវែស, ហ្វាំងឡង់, ដាណឺម៉ាក, រ៉ូម៉ានី, សាធារណរដ្ឋឆែក, ប៉ូឡូញ, ប៊ុលការី, ប៉ូឡូញ, តួរគី, អូទ្រីស, លីទុយអានី, ហុងគ្រី និងអ៊ុយក្រែន ជាដើម៕
January 20, 2021
អ្នកនៅពីក្រោយមហាជោគជ័យរបស់ហ្គេម PUBG ធ្លាប់បរាជ័យជាច្រើនលើកក្នុងអាជីពជាអ្នកសរសេរកូដ
បន្ទាប់ពីបានទទួលបរាជ័យជាមួយនឹង startup ចុងក្រោយចំនួន 3 ទើប «កំពូលអ្នកសរសេរកូដ» រូបនេះ អាចបង្កើតបានជោគជ័យជាមួយនឹងកំពូលហ្គេម PUBG។
Kim Chang-han មានឈ្មោះបោះសំឡេងនៅក្នុងសហគមន៍អ្នកអភិវឌ្ឍហ្គេមនៅប្រទេសកូរ៉េខាងត្បូង ប៉ុន្តែ ក្នុងអាជីពជាអ្នកបង្កើតហ្គេម បុរសនេះបានឆ្លងកាត់បរាជ័យជាច្រើនគួរឱ្យកត់សម្គាល់។
ឆ្នាំ 2014 Kim Chang-han ត្រូវបង្ខំចិត្តបញ្ឈប់បុគ្គលិកចំនួន 1/3 ពីក្រុមហ៊ុនហ្គេមរបស់ខ្លួន។ ចាប់ពីឆ្នាំ 2020 លោក Kim Chang-han បង្កើតបានហ្កេមអនឡាញចំនួន 3 ជាមួយនឹងក្រុមហ៊ុនថ្មីចំនួន 3 ផ្សេងៗគ្នាផងដែរ។ ក៏ប៉ុន្តែ ចុងក្រោយ សុទ្ធតែត្រូវបរាជ័យ។
Kim Chang-han និយាយថា៖ «នោះគឺជាកាលៈទេសៈដ៏មហាសែនជូរចត់នៃជីវិតរបស់ខ្ញុំ»។ ក្នុងអំឡុងពេលបរាជ័យ គាត់បានលក់ក្រុមហ៊ុនទៅឱ្យ Krafton Inc និងចូលបម្រើការក្នុងក្រុមហ៊ុនថ្មីនេះដោយមានតួនាទីជានាយកផ្នែកផលិត។
ចាប់តាំងពីពេលនោះ អាជីពរបស់ Kim Chang-han ក៏ចាប់ផ្ដើមផ្លាស់ប្ដូរ។ គាត់បានសម្រេចចិត្តធ្វើការប្រឹងប្រែងជាលើកចុងក្រោយជាមួយនឹងក្ដីសង្ឃឹមថាអាចជោគជ័យក្នុងការងារនេះ នោះគឺ «បង្កើតហ្គេមអនឡាញមួយដែលអ្នកលេងប្រយុទ្ធគ្នាជាមួយនឹងអ្នកលេងដទៃ ហើយអ្នកចុងក្រោយដែលនៅមាន «ជីវិត» គឺជាអ្នកឈ្នះ។
Kim Chang-han បានបញ្ចុះបញ្ចូល Brendan Greene ឱ្យចូលមកជួយក្រុមហ៊ុននៅកូរ៉េខាងត្បូង ដោយឱ្យធ្វើជានាយកផ្នែកច្នៃប្រឌិតសម្រាប់ហ្គេមនេះ។
ឆ្នាំ 2017 Bluehole (ឈ្មោះចាស់របស់ Krafton) ក៏បានឧទ្ទេសនាមហ្គេមមួយដែលមានឈ្មោះថា PUBG ហើយវាក៏បានក្លាយជាហ្គេមមួយដែលមានឈ្មោះល្បីល្បាញ និងជោគជ័យបំផុតមិនធ្លាប់មានពីមុនមក ក្នុងនោះកំណែសម្រាប់កុំព្យូទ័រ លក់បានជាង 70 លានឈុតនៅទូទាំងពិភពលោក និងកំណែសម្រាប់ទូរស័ព្ទត្រូវបានទាញយកជាង 600 លានលើក។
បច្ចុប្បន្ន ក្រុមហ៊ុនកំពុងតែមានគម្រោងធ្វើ IPO (បោះផ្សាយលក់មូលបត្រដំបូងនៅផ្សារហ៊ុន) នៅពាក់កណ្ដាលចុងឆ្នាំ 2021 ហើយវានឹងអាចក្លាយជាករណី IPO ធំបំផុតនៅកូរ៉េខាងត្បូងក្នុងអំឡុងប៉ុន្មានឆ្នាំមកនេះ។
ការធ្វើ IPO របស់ក្រុមហ៊ុនថ្មីនេះ ត្រូវគេវាយតម្លៃថានឹងប្រមូលបានយ៉ាងតិច 30 ពាន់លានវ៉ុន ដែលប្រហាក់ប្រហែលនឹង 27.2 ពាន់លានដុល្លារអាមេរិក។ ការធ្វើ IPO ដែលធំបំផុតក្នុងប្រវត្តិសាស្ត្រកូរ៉េខាងត្បូងគឺ Samsung Life Insurance ដោយប្រមូលបានទុន 4.3 ពាន់លានដុល្លារអាមេរិកកាលពីឆ្នាំ 2020។
ក្រុមហ៊ុន Krafton បច្ចុប្បន្នគ្រប់គ្រង studio ហ្គេមចំនួន 4 ប៉ុន្តែ PUBG រកបានចំណូល និងចំណេញច្រើនជាងគេបង្អស់។ PUBG រកបាន 1.1 ពាន់លានដុល្លារក្នុងរយៈពេល 9 ខែដើមឆ្នាំ 2020។
ស្ថាបនិករបស់ Krafton លោក Chang Byung-gyu បច្ចុប្បន្នជាម្ចាស់ភាគហ៊ុនធំជាងគេ ដោយកាន់កាប់ភាគហ៊ុន 17% គិតត្រឹមខែកញ្ញា។ តាមពីក្រោយគឺក្រុមហ៊ុន Tencent Holdings ដោយមានភាគហ៊ុន 16% ខណៈដែលលោក Kim Chang-han កាន់កាប់ 1.5%។
Kim Chang-han ធ្លាប់ទទួលបានជ័យជំនះនៅក្នុងការប្រកួតផ្នែកកុំព្យូទ័រដែលត្រូវបានរៀបចំដោយក្រសួងវិទ្យាសាស្ត្រកូរ៉េខាងត្បូងកាលពីឆ្នាំ 1985 នៅពេលគាត់មានវ័យទើបតែ 10 ឆ្នាំ។ ក្រោយមក លោកក៏ដណ្ដើមបានពានរង្វាន់ជាច្រើនផ្សេងទៀតដែលទាក់ទងនឹងការសរសេរកម្មវិធីកុំព្យូទ័រ។ លោក Chang-han ក៏ជាសហស្ថាបនិករបស់ហ្គេម Ginno Games កាលពីឆ្នាំ 2009 ក្រោយពីបរាជ័យជាមួយក្រុមហ៊ុនថ្មីចំនួន 2 មុននោះ។
ក៏ប៉ុន្តែ បរាជ័យទាំងនោះបានក្លាយជាអតីតកាលទៅហើយ ចំណែកបច្ចុប្បន្ន Chang-han កំពុងតែជួយ Krafton ក្នុងការធ្វើ IPO នាពេលខាងមុខ។ លោក Chan-han និយាយថា ការសម្រេចពង្រីកប្រភេទហ្កេមរបស់ក្រុមហ៊ុន ទទួលបានជោគជ័យលើសពីការរំពឹងទុកគ្រាដំបូង៕
ប្រភព៖ Bloomberg
January 19, 2021
GDP របស់ចិនកើន 2.3% ក្នុងឆ្នាំ 2020 ជាមួយនឹងការងើបឡើងពីវិបត្តិ Covid-19
នាថ្ងៃទី 18 មករា ឆ្នាំ 2021 នេះ នាយកដ្ឋានស្ថិតិជាតិ (NBS) របស់ប្រទេសចិន បានបញ្ចេញរបាយការណ៍មួយបង្ហាញថា ផលិតផលក្នុងស្រុកសរុប (GDP) ឆ្នាំ 2020 របស់ប្រទេសនេះ ទទួលបានចំនួន 101,598,000,000,000 ឬ 101.598 លានលានយន់ (ប្រហែល 15,666,000,000,000 ឬ 15.666 លានលានដុល្លារអាមេរិក) ជាមួយនឹងអត្រាកំណើន 2.3%។
នេះគឺជាកំណើនទាបបំផុតរបស់ប្រទេសចិន រាប់ពីពេលប្រទេសនេះបានចាប់ផ្ដើមធ្វើកំណែទម្រង់បើកទ្វារសដ្ឋកិច្ចជាតិកាលពីឆ្នាំ 1978 ប៉ុន្តែ ខឿនសេដ្ឋកិច្ចដែលធំជាងគេលំដាប់ទីពីរក្នុងពិភពលោកនេះ ត្រូវបានគេចាត់ទុកថាជាខឿនសេដ្ឋកិច្ចតែមួយគាត់ដែលមានកំណើនបូក នៅក្នុងគ្រាដែលពិភពលោកទាំងមូលត្រូវរងផលប៉ះពាល់ខ្លាំងដោយសារជំងឺរលាកសួតដែលបង្កឡើងដោយវីរុស Covid-19។ កំណើនខាងលើរបស់ចិន ក៏ជាអត្រាខ្ពស់ជាងបើធៀបនឹង 2% ដែលជាការព្យាកររបស់ទីភ្នាក់ងារសារព័ត៌មានបារាំង AFP។
ការទទួលបានលទ្ធផលខាងលើគឺអាស្រ័យទៅលើកំណើន GDP កាលពីត្រីមាសទីបួន ឆ្នាំ 2020 ដែលបន្តកើនឡើងយ៉ាងឆាប់រហ័ស ពោលគឺកើន 6.5% បើធៀបនឹងដំណាក់កាលដូចគ្នាក្នុងឆ្នាំ 2019។ ទន្ទឹមនឹងនេះ ទិន្នផលឧស្សាហកម្ម (ជាសន្ទស្សន៍សេដ្ឋកិច្ចសំខាន់មួយរបស់ចិន) ក្នុងឆ្នាំ 2020 ក៏បានកើន 2.8% បើធៀបនឹងដំណាក់កាលដូចគ្នាក្នុងឆ្នាំ 2019៕
ប្រភព៖ SCMP
January 18, 2021