Category: សង្គម និងសេដ្ឋកិច្ច

ការមើលថែទាំស្បែកមុខ ដើម្បីទប់ទល់នឹងរដូវរងា
រដូវរងា គឺជាអំឡុងពេលមួយ ដែលស្បែកមុខរបស់យើង ហាក់ដូចជាស្ងួត ដោយសារធាតុអាកាស និងខ្យល់ ដែលនឹងធ្វើឱ្យស្បែករបស់យើង ខ្វះសំណើម និងងាយបែកស្រកា ថ្ងៃនេះ យើងមានវិធីការមើលថែទាំស្បែកមុខ ក្នុងអំឡុងរដូវរងា មកជម្រាបជូននារីៗយើងដូចតទៅ៖
“រឿងដំបូង គឺយើងត្រូវស្គាល់ពីលក្ខណៈស្បែកមុខរបស់យើងជាមុនសិន និងជ្រើសរើសប្រើផលិតផល ឱ្យត្រូវនឹងស្បែកមុខរបស់យើង”
-ស្បែកស្ងួត ៈ ត្រូវប្រយ័ត្នប្រយែងក្នុងការមើលថែទាំស្បែក ចូរជ្រើសរើសប្រើឃ្រីម ដែលផ្តល់នូវសណើមដល់ស្បែកមុខ ចៀសវាងការប្រើទឹកក្តៅឧណ្ហៗលាងមុខ។ ក្នុងអំឡុងពេលនេះ គួរតមប្រើ ថូននើរ៍ ជូតសម្អាតមុខសិន ព្រោះភាគច្រើនផលិតផលទាំងនោះ តែងមានចំណែកផ្សំរបស់អាល់កុល ដែលអាចនឹងធ្វើឱ្យស្បែកមុខរបស់យើង កាន់តែស្ងួតខ្លាំងជាងមុនទៅទៀត។
-ស្បែកឡើងខ្លាញ់ ឬស្បែកស្ងួតផង ឡើងខ្លាញ់ផង(ស្បែកចម្រុះ) ៈ សម្រាប់ស្បែកទាំង ២នេះ ក្នុងអំឡុងរដូវរងា មិនសូវជាមានបញ្ហា រឿងស្បែកមុខស្ងួត និងបែកស្រកាប៉ុន្មានទេ តែក៏មិនអាចប្រហែសបានដែរ។ យើងសូមណែនាំ ឱ្យជ្រើសរើសលាបឃ្រីមក្នុងបរិមាណឱ្យតិច ព្រោះស្បែកមុខយើងនឹងឡើងខ្លាញ់ច្រើន ជាពិសេសក្នុងកន្លែង ធី ហ្សូន(T zone) និងថែមទាំងជួយកាត់បន្ថយបញ្ហាការញ៉ុកណែនរបស់សារធាតុគីមី ដែលប្រើនោះ មិនឱ្យកើតមុននៅលើមុខផង។
-ស្បែកងាយមានប្រតិកម្ម ៈ ជ្រើសរើសប្រើឃ្រីម ឬផលិតផលដែលមានសុវត្ថិភាព មានសារធាតុគីមីតិច គ្មានឥទ្ធិពលខ្លាំងដល់កោសិកាស្បែក។ ចៀសវាងផលិតផល ដែលមានចំណែកផ្សំរបស់អាល់កុល តែប្រើសាប៊ូប្រភេទខ្សោយៗលាងមុខ ក៏បាន។
ជ្រើសរើសប្រើផលិតផល ដែលមានចំណែកផ្សំ របស់ម៉យស៍ជើរ៉ាយហ្ស៊ើរ៍ និងក្រោយពេលលាងមុខហើយ សូមណែនាំឱ្យជូតមុខឱ្យស្អាត និងដើម្បីកុំឱ្យស្បែកខ្វះសំណើម ចូរលាបឃ្រីមថែបំប៉នភ្លាម និងញ៉ាំទឹកឱ្យបានច្រើន តែប៉ុណ្ណឹងយើងល្មមអាចនឹងទប់ទល់ជាមួយរដូវរងាបានហើយ និងដែលសំខាន់ ចូរកុំភ្លេចលាបឃ្រីមការពារពន្លឺថ្ងៃផង៕
January 27, 2021
ត្រូវឆ្នោត 60លានដុល្លារអាមេរិក ដោយសារជឿលើសុបិនរបស់ប្ដី រួមនឹងការព្យាយាម
បន្ទាប់ពីស្វាមីបានប្រាប់អំពីដំណើរដើមទងនៃងសុបិន ស្ត្រីជាភរិយាក៏បានព្យាយាមចាក់ឆ្នោតផ្សងសំណាង ហើយចុងក្រោយក៏បានត្រូវឆ្នោតតម្លៃ 60 លានដុល្លារអាមេរិក ក្រោយការ «តស៊ូ» ចាក់ឆ្នោតមិនដាច់មួយថ្ងៃ។
ឆ្នាំ 2000 ស្វាមីរបស់អ្នកស្រី Deng Pravatoudom យល់សប្ដិចម្លែកមួយ ដោយឃើញលេខមួយខ្សែយ៉ាងច្បាស់នឹងភ្នែក។ ក្រោយពីបានឮស្វាមីរៀបរាប់ប្រាប់ អ្នកស្រី Pravatoudom ក៏ចាប់ផ្ដើមយកលេខនោះទៅចាក់ឆ្នោត។
ជីវភាពរបស់គ្រួសារខាងលើ ចេះតែបន្តទៅមុខដូចធម្មតា ហើយការចាក់ឆ្នោតលេខដដែលៗនេះក៏ចេះតែធ្វើឡើងជារៀងរាល់ថ្ងៃ រហូតដល់ 20 ឆ្នាំ។
ថ្ងៃទី 1 ខែធ្នូ ឆ្នាំ 2020 អ្នកស្រី និងស្វាមីក៏បានទៅទូទាត់វិក្កយបត្រនៅក្នុងធនាគារមួយ។ ខណៈដែលអ្នកស្រីកំពុងទូទាត់ប្រាក់ ស្វាមីអ្នកស្រីក៏ចាប់ផ្ដើមផ្ទៀងលេខឆ្នោត។ ពេលត្រលប់មកកាន់រថយន្ត ស្រាប់តែស្វាមីបានប្រាប់អ្នកស្រីថា «យើងត្រូវឆ្នោតហើយ!»។ ពួកគេត្រូវឆ្នោតដែលមានតម្លៃដល់ទៅ 60 លានដុល្លារអាមេរិក។ នេះបើតាមគេហទំព័រឆ្នោត Ontario ដែលបានចុះផ្សាយកាលពីថ្ងៃទី 25 មករាកន្លងទៅ។
អ្នកស្រី Pravatoudom ក៏បានស្រែកយំ ដោយសារថា អ្នកស្រីមិននឹកស្មានថា សុបិនអាចក្លាយជាការពិតយ៉ាងដូច្នេះសោះ។ ក្នុងពិធីប្រគល់រង្វាន់ឆ្នោត អ្នកស្រីប្រាប់ថា នឹងទិញផ្ទះមួយខ្នង ហើយដើរទេសចរណ៍ជុំវិញពិភពលោក ក្រោយពី Covid-19 បានស្ងប់ស្ងាត់។
បន្ទាប់ពីបានទទួលប្រាក់ អ្នកស្រីបានទិញពេជ្រជាច្រើនគ្រាប់សម្រាប់ខ្លួនឯង។ អ្នកទាំងពីរបានគិតគូរគ្នារួចហើយថា នឹងយកប្រាក់ខ្លះទៅទូទាត់បំណុលដែលនៅសល់ និងជួយដល់កូនចៅរបស់ពួកគាត់។
អ្នកស្រី Pravatoudom គឺជាជនជាតិឡាវដែលបានទៅរស់នៅក្នុងប្រទេសកាណាដាជាមួយនឹងបងប្អូនចំនួន 14 នាក់របស់ខ្លួន កាលពីឆ្នាំ 1980។ 40 ឆ្នាំកន្លងទៅនេះ អ្នកស្រី និងស្វាមី បានធ្វើការយ៉ាងហត់នឿយ និងបានសន្សំសំច័យប្រាក់យ៉ាងលំបាកដើម្បីចិញ្ចឹមកូន។
ការព្យាយាមពិតជាអាចធ្វើឱ្យសុបិនក្លាយជាការពិតបាន ក៏ប៉ុន្តែ បើតាម La Reine នេះគ្រាន់តែជារឿងចៃដន្យដ៏កម្រមួយតែប៉ុណ្ណោះ ហើយការចាក់ឆ្នោតគឺប្រៀបបានទៅនឹងការរាវរកម្ជុលនៅក្នុងព្រែកយ៉ាងដូច្នេះដែរ៕
ប្រភព៖ CNN
January 26, 2021
ប្រធានស្ដីទីនៃក្រុមហ៊ុន Samsung យល់ព្រមទទួលទោសជាប់ពន្ធនាគារ 18 ខែ
នៅក្នុងកិច្ចសម្ភាសមួយកាលពីថ្ងៃទី 25មករា មេធាវីរបស់អនុប្រធាន និងជាប្រធានស្ដីទីរបស់ក្រុមហ៊ុន Samsung បានអះអាងថា លោក Lee Jae-yong បាន «បន្ទាបខ្លួនទទួលយក» សាលក្រមតុលាការដែលបានកាត់ទោសឱ្យជាប់ពន្ធនាគាររយៈពេល 30 ខែ។
យោងតាម Bloomberg អ្នកស្នងមរតក Samsung លោក Lee Jae-yong បានសម្រេចចិត្តមិនប្ដឹងឧទ្ធរណ៍ចំពោះការកាត់ក្ដីរបស់តុលាការក្រុងសេអ៊ូលនោះទេ។ ក្នុងកិច្ចសម្ភាសមួយកាលពីថ្ងៃទី 25 មករា មេធាវីរបស់លោក Lee បានបញ្ជាក់ថា កូនក្ដីរបស់ខ្លួនបាន «ដាក់ខ្លួនទទួលយក» ការកាត់ក្ដីរបស់តុលាការ និងយល់ព្រមជាប់ពន្ធនាគាររយៈពេល 18។
កាលពីសប្ដាហ៍មុន តុលាការជាន់ខ្ពស់នៃទីក្រុងសេអ៊ូលរបស់កូរ៉េខាងត្បូងបានប្រកាសសាលក្រមដាក់ពន្ធនាគារចំពោះលោក Lee រយៈពេល 2.5 ឆ្នាំ ព្រោះតែអំពើពុករលួយ។ ប៉ុន្តែ លោក Lee ដែលជាអនុប្រធាន និងជាប្រធានស្ដីទីរបស់ក្រុមហ៊ុន Samsung នឹងត្រូវទទួលទោសជាប់ពន្ធនាគារត្រឹមតែ 18 ខែប៉ុណ្ណោះ ដោយសារមុននេះ លោកបានអនុវត្តតាមសាលក្រមបាន 1 ឆ្នាំ មុនពេលត្រូវបានដោះលែងកាលពីខែកុម្ភៈ ឆ្នាំ 2018។
ដំបូងឡើយ ក្រុមចៅក្រមកូរ៉េខាងត្បូងបានស្នើឱ្យដាក់ពន្ធនាគារ 9 ឆ្នាំ ចំពោះលោក Lee។ ប៉ុន្តែ សារព័ត៌មាន Yonhap Television News បានឱ្យដឹងថា ក្រុមចៅក្រម ក្រោយមក មិនបានជំទាស់នឹងការស្នើឱ្យដាក់ទោសជាប់ពន្ធនាគាររយៈពេល 2.5 ឆ្នាំ សម្រាប់លោក Lee នោះដែរ។
សាលក្រមនេះបានបញ្ចប់ករណីអាស្រូវពុករលួយដែលបានអូសបន្លាយពេលអស់ជាច្រើនឆ្នាំ ទាក់ទងនឹងករណីអតីតប្រធានាធិបតីកូរ៉េខាងត្បូងដែលត្រូវបាត់បង់តំណែង។ លោក Lee ត្រូវបានចោទប្រកាន់ពីបទសូកប៉ាន់ប្រាក់សរុបចំនួន 8.6 ពាន់លានវ៉ុន (7.8 លានដុល្លារអាមេរិក) ទៅឱ្យអតីតប្រធានាធិបតី Park Geun-hye និងមិត្តជិតស្និទ្ធរបស់លោកស្រី គឺអ្នកស្រី Choi Soon-sil ដើម្បីទទួលបានការគាំទ្រពីអាជ្ញាធរសេអ៊ូល ក្នុងបំណងពង្រីកអំណាចគ្រប់គ្រង Samsung។
ភាគីខាងក្រុមហ៊ុន Samsung Electronics មិនធ្វើអធិប្បាយអ្វីទាក់ទងនឹងការសម្រេចមិនប្ដឹងឡើងឧទ្ធរណ៍របស់លោក Lee នោះទេ ខណៈមូលបត្ររបស់ក្រុមហ៊ុននេះ កាលពីថ្ងៃទី 25 មករា បានកើន 3% នៅក្នុងផ្សារហ៊ុនសេអ៊ូល បន្ទាប់ពីបានកើនជាង 40% ក្នុងឆ្នាំ 2020។
អវត្តមានរបស់លោក Lee នៅក្នុងក្រុមហ៊ុន អាចធ្វើឱ្យមានការយឺតយ៉ាវ ឬស្មុគស្មាញចំពោះខ្ទង់វិនិយោគធំៗ ឬយុទ្ធសាស្ត្រយូរអង្វែងរបស់ក្រុមហ៊ុននេះ។ លោក Lee បានដើរតួនាទីវិជ្ជមានមួយនៅក្នុងក្រុមហ៊ុន ដោយលោកតែងចូលរួមក្នុងព្រឹត្តិការណ៍បើកចំហ និងព្រឹត្តិការណ៍ដែលទាក់ទងនឹងរដ្ឋាភិបាលជាដើម ក្រោយពីលោកបានចេញពីពន្ធនាគារកាលពីឆ្នាំ 2018៕
ប្រភព៖ Bloomberg
January 26, 2021
វិធីលាបឡេ យ៉ាងត្រឹមត្រូវតាមវិធី ដើម្បីស្បែកស្អាតម៉ដ្ឋខៃ
វិធីលាបឡេ ជារឿងងាយៗ ដែលកញ្ញាៗគ្រប់រូបត្រូវតែដឹង ព្រោះការលាបឡេ ដែលត្រឹមត្រូវតាមវិធី នឹងជួយធ្វើឱ្យសាច់ឡេ អាចធ្វើការបានយ៉ាងមានប្រសិទ្ធភាព និងធ្វើឱ្យស្បែករបស់យើងស្អាត និងមានសុខភាពល្អទ្វេឡើងទៀតផង។
វិធីលាបឡេដែលត្រឹមត្រូវ និងទទួលបានលទ្ធផលល្អ

-ការលាបឡេលើផ្ទៃមុខ
បរិមាណឡេ ដែលត្រូវលាបនៅលើផ្ទៃមុខម្តងៗនោះ ត្រូវឱ្យសមល្មម ប្រមាណជា ១ចុងម្រាមដៃ ចំពោះការលាបឡេ ១ដង ព្រោះបើតិចជាងហ្នឹងពេក ក៏ក្រទទួលបានលទ្ធផលដែរ ឬបើច្រើនជ្រុលពេកនោះ ក៏នឹងធ្វើឱ្យផ្ទៃមុខឡើងខ្លាញ់បានដែរ។ ពេលច្របាច់សាច់ឡេ ដាក់លើបាតដៃហើយ ចូរប្រើចុងម្រាមដៃ បៀកសាច់ឡេ មកដាក់លើផ្ទៃមុខទាំងអស់ ៥កន្លែង គឺថ្ងាស ច្រមុះ ថ្ពាល់ទាំងសងខាង និងចង្កា បន្ទាប់មក ចូរប្រើម្រាមនាងដៃ និងម្រាមកណ្តាលរបស់ដៃទាំង២ខាង កៀរប៉ាតសាច់ឡេយឺតៗ ចេញជារង្វង់ធំ ដោយដៃឆ្វេងកៀរប៉ាតទៅខាងឆ្វេង ដៃស្តាំកៀរប៉ាតទៅខាងស្តាំ ដោយចាប់ផ្តើមពីថ្ពាល់ តាមដោយបណ្តោយក្តោងច្រមុះ ក្រោមច្រមុះ ចង្កា និងថ្ងាស លើកលែងបរិវេណជុំវិញភ្នែក។ ក្នុងអំឡុងពេលលាបឡេ ចូរប្រើទម្ងន់ម្រាមដៃឱ្យស្រាលបំផុត ព្រោះស្បែកមុខនារីៗយើង ស្តើងណាស់ បើប្រើទម្ងន់ដៃធ្ងន់ពេក អាចធ្វើឱ្យផ្ទៃមុខរបស់យើង កើតមានស្នាមជ្រីវជ្រួញមុនអាយុបាន។
-ការលាបឡេ បរិវេណបំពង់ក
ការលាបឡេ នៅលើបំពង់កនេះ ចូរប្រើបរិមាណសាច់ឡេ ឱ្យស្មើគ្នានឹងការលាបលើផ្ទៃមុខដែរ ដោយចាប់ផ្តើមពីម្តុំគល់ក ដោយប្រើចុងម្រាមដៃទាំងអស់លាបប៉ាតសាច់ឡេ ពីក្រោមឡើងទៅលើ។
-ការលាបឡេ បរិវេណដើមទ្រូង និងដងខ្លួន
ច្របាច់សាច់ឡេ ដាក់បាតដៃ និងប្រើចុងម្រាមដៃលាបអង្អែលជារង្វង់ៗ ឱ្យសព្វលើដើមទ្រូង បន្ទាប់ពីនោះសឹមលាបដេញចុះទៅរកក្បាលពោះ និងខ្នង។
-ការលាបឡេ លើបរិវេណដៃ
គួរលាបឡេ នៅលើបរិវេណដើមដៃផ្នែកខាងក្នុងមុនគេ រួចហើយសឹមលាបឡើងទៅបរិវេណដើមដៃផ្នែកខាងក្រោយ ដោយការប្រើចុងម្រាមដៃលាបអង្អែលយឺតៗ ដើម្បីឱ្យសាច់ឡេ ជ្រាបចូលទៅក្នុងស្បែកបានល្អ។
-ការលាបឡេ លើជើង
គួរចាប់ផ្តើមលាបឡេ ពីបរិវេណភ្លៅជាមុន រួចសឹមលាបចុះទៅរកចុងជើង ដោយត្រូវសង្កត់ធ្ងន់ លើបរិវេណស្មងជើងជាពិសេស ព្រោះបរិវេណនេះស្បែកហាក់ដូចជាស្ងួតខ្លាំងជាងកន្លែងផ្សេងទៀត។
បានដឹងពីការណែនាំល្អៗ សម្រាប់វិធីការលាបឡេ ដែលត្រឹមត្រូវហើយ ដូច្នេះចាប់ពីពេលនេះតទៅ ទោះជាអ្នកណាចង់ទិញឡេ តម្លៃថោក ឬថ្លៃប៉ុនណាមកប្រើក៏ដោយ ក៏មិនបាច់ភ័យថា ចំណាយលុយដោយអត់ប្រយោជន៍ដែរ៕
January 26, 2021
Reuters៖ សភាជាន់ទាបអាមេរិក ចោទប្រកាន់លោក Trump ជាផ្លូវការ
សភាជាន់ទាបអាមេរិក កាលពីថ្ងៃទី 25 មករា បានធ្វើការចោទប្រកាន់លើអតីតប្រធានាធិបតី Donald Trump ជាផ្លូវការ ព្រោះបាន «ញុះញង់ឱ្យមានការបះបោរ» ដោយការអធិប្បាយនៅចំពោះមុខអ្នកគាំទ្ររបស់លោក មុនពេលសភាទទួលស្គាល់ជ័យជំនះរបស់បេក្ខភាព Joe Biden។
កាលពីថ្ងៃទី 6 មករា ឆ្នាំ 2021 ក្រុមបាតុករគាំទ្រលោក Trump បាននាំគ្នាសម្រុកចូលកាន់កាប់វិមានសភា Capitol និងបង្កភាពវឹកវរ បណ្ដាលឱ្យសភាអាមេរិកត្រូវផ្អាកកិច្ចប្រជុំដែលទទួលស្គាល់ជ័យជំនះរបស់លោក Biden សម្រាប់ការបោះឆ្នោតឆ្នាំ 2020។ បាតុកម្មហិង្សានេះបានសម្លាប់មនុស្សចំនួន 5នាក់ ក្នុងនោះមានមន្ត្រីប៉ូលិសផងដែរ។
ពាកក្យបណ្ដឹងចោទប្រកាន់ប្រឆាំងនឹងលោក Trump ត្រូវបានបញ្ជូនឡើងទៅកាន់សភាជាន់ខ្ពស់នៅព្រឹកថ្ងៃទី 25 មករា (ម៉ោងក្នុងស្រុក)។ តំណាងរាស្ត្របក្សប្រជាធិបតេយ្យចំនួន 9 រូបនៅសភាជាន់ទាបនឹងដើរតួនាទីជាចៅក្រម។
ទង្វើខាងលើនេះក៏បង្កើតឱ្យមានកំណត់ត្រាថ្មីចំនួនពីរដំបូងគេក្នុងប្រវត្តិសាស្ត្រអាមេរិក នោះគឺ ទីមួយ លោក Trump គឺជាប្រធានាធិបតីអាមេរិកតែមួយគត់ដែលត្រូវបានសភាជាន់ទាបចោទប្រកាន់ដល់ទៅពីលើក និងជាមនុស្សដំបូងដែលប្រឈមនឹងការចូលខ្លួនទៅបំភ្លឺនៅតុលាការ ក្រោយពីបានចប់អាណត្តិ។ ការដែលត្រូវកាត់ទោសនៅសភាជាន់ខ្ពស់អាចនឹងក្លាយជារនាំងឧបសគ្គដ៏ធំចំពោះការបន្តឈរឈ្មោះជាបេក្ខភាពប្រធានាធិបតរបស់លោក Trump នាពេលអនាគត។
អនុប្រធានាធិបតីអាមេរិក លោកស្រី Kamala Harris
មេដឹកនាំសភាជាន់ខ្ពស់អាមេរិក មុននេះ បានយល់ស្របគ្នាថានឹងមិនកាត់ក្ដីលើការចោទប្រកាន់ចំពោះលោក Trump រហូតដល់ថ្ងៃទី 9 កុម្ភៈ។ សភាជាន់ខ្ពស់អាមេរិក បច្ចុប្បន្នត្រូវបានបែងចែកស្មើគ្នាសម្រាប់បក្សប្រជាធិបតេយ្យ និងបក្សសាធារណរដ្ឋ ប៉ុន្តែ ក្នុងករណីមិនមានអ្នកឈ្នះ-ចាញ់ក្នុងការបោះឆ្នោតនៅសភាជាន់ខ្ពស់ ក្រុមប្រជាធិបតេយ្យក៏នៅតែមានប្រៀបជាងក្រុមសាធារណរដ្ឋ ដោយសារតែមានសំឡេងឆ្នោតសម្រេចចុងក្រោយពីអនុប្រធានាធិបតី Kamala Harris។
ការយឺតយ៉ាវក្នុងការកាត់ទោស អាចផ្ដល់ពេលវេលាបន្ថែមដល់លោក Trump ដើម្បីត្រៀមខ្លួនសម្រាប់រៀបចំមេធាវី និងយុទ្ធសាស្ត្រទប់ទល់ក្នុងការការពារខ្លួន ព្រមទាំងអនុញ្ញាតឱ្យសភាជាន់ខ្ពស់អាចផ្ដោតទៅលើបញ្ហាអាទិភាពរបស់ប្រធានាធិបតី Joe Biden ក្នុងនោះក៏មានការតែងតាំងមន្ត្រីនានាសម្រាប់តំណែងនៅក្នុងជួរគណៈរដ្ឋមន្ត្រីផងដែរ៕
ប្រភព៖ Reuters
January 26, 2021
តើអ្នកបានដឹងហើយ ឬនៅថា ទ្រព្យសរុបរបស់ប្រធានាធិបតី Joe Biden មានចំនួនប៉ុន្មានលានដុល្លារ?
លោក Joe Biden បានធ្វើនយោបាយរាប់សិបឆ្នាំមកហើយ ប៉ុន្តែ លោកទើបតែបានក្លាយជាសេដ្ឋីបន្ទាប់ពីចប់អាណត្តិអនុប្រធានាធិបតី និងបោះពុម្ភសៀវភៅ។
ប្រធានាធិបតីថ្មីរបស់សហរដ្ឋអាមេរិក លោក Joe Biden ត្រូវបានទស្សនាវដ្ដី Forbes ស្រាវជ្រាវឃើញថា មានទ្រព្យសម្បត្តិប្រមាណជា 9 លានដុល្លារអាមេរិក។ ពេលចាប់ផ្ដើមឃោសនារកសំឡេងឆ្នោតកាលពីឆ្នាំ 2020 លោក Biden បានប្រកាសព័ត៌មានអំពីហិរញ្ញវត្ថុរបស់ខ្លួន។
មុនពេលក្លាយជាអនុប្រធានាធិបតីអាមេរិកក្នុងអាណត្តិរបស់លោក Barack Obama លោក Biden គឺជាតំណាងរាស្ត្រនៅសភាជាន់ខ្ពស់ចាប់ពីឆ្នាំ 1973 ដល់ឆ្នាំ 2009។ ក្នុងអំឡុងពេលនោះ ប្រាក់បៀវត្សរបស់លោកបានកើនពី 42.500 ដុល្លារ ឡើងដល់ 174,000 ដុល្លារ/ឆ្នាំ នេះបើតាមឯកសាររបស់សភាជាន់ខ្ពស់។ នៅពេលបានជាប់ឆ្នោតជាអនុប្រធានាធិបតីចាប់ពីឆ្នាំ 2009 ដល់ 2017 ប្រាក់បៀវត្សរបស់លោក Biden បានកើនឡើងដល់ 230,000 ដុល្លារ/ឆ្នាំ។
ចាប់ពីបានចាកចេញពីតំណែងអនុប្រធានាធិបតីកាលពីជំនាន់លោក Obama លោក Biden ទើបតែរកបានប្រាក់ច្រើនជាលើកដំបូងពីការបោះពុម្ភសៀវភៅ និងធ្វើជាវាគ្មិន។ ខែវិច្ឆិកា ឆ្នាំ 2019 ទ្រព្យរបស់លោកមានតម្លៃមិនដល់ 30,000 ដុល្លារនោះទេ នេះបើតាមបណ្ដាញទូរទ្សន៍ និងវិទ្យុអាមេរិក CBS។ ប៉ុន្តែ បើយោងតាមរបាយការណ៍ហិរញ្ញវត្ថុកាលពីខែកក្កដា ឆ្នាំ 2019 លោក Biden និងភរិយា រកបានប្រាក់ជិត 16 លានដុល្លារក្នុងឆ្នាំ 2017 និង 2018 ក្នុងនោះក៏មានចំណូលដែលបានមកពីការសហការបោះពុម្ភសៀវភៅជាមួយនឹងក្រុមហ៊ុន Flatiron Books ដែលមានតម្លៃ 8 លានដុល្លារ។
លោក Biden បានសរសេរសៀវភៅចំនួនពីរក្បាលក្នុងរយៈពេល 11 ឆ្នាំកន្លងទៅ រួមមាន «Promises to keep» (បកប្រែក្រៅផ្លូវការថា «សន្យាដែលនឹងត្រូវរក្សា») កាលពីឆ្នាំ 2008។ ឆ្នាំ 2017 សៀវភៅ «Promise me, Dad» (សន្យានឹងកូនណា៎ ពុក) ក៏ត្រូវបានបោះពុម្ភ បន្ទាប់ពីកូនប្រុស Beau Biden របស់លោកបានស្លាប់ដោយសារជំងឺមហារីក។ «Promise me, Dad» បានក្លាយជាសៀវភៅមួយក្នុងចំណោមសៀវភៅដែលលក់ដាច់ជាងគេនៅអាមេរិក ដោយលក់ជាង 300,000ក្បាល។
យោងតាមរបាយការណ៍ហិរញ្ញវត្ថុថ្មីៗនេះ លោក Biden ទទួលបានប្រាក់ប្រមាណពី 8,000 ដល់ 9,000 ដុល្លារនៅរៀងរាល់ចំណុចនៃការផ្អាកការឃោសនាសម្រាប់សៀវភៅដែលលោកបានសរសេរ និងបោះពុម្ភ។ សកម្មភាពនេះ ចុងក្រោយក៏រកបានប្រាក់ចំណូលប្រមាណ 1.8 លានដុល្លារ។
សារព័ត៌មាន AP បានឱ្យដឹងថា ការធ្វើជាវាគ្មិនរបស់លោក Biden មានតម្លៃចាប់ពី 40,000 ដល់ 190,000 ដុល្លារ/ពេល បើទោះជាលោកក៏មានកិច្ចសម្ភាសដោយមិនគិតថ្លៃ។ CNBC បានរាយការណ៍ថា លោក Biden ធ្លាប់ទទួលបានប្រាក់ 190,000 ដុល្លារ សម្រាប់ការធ្វើបទបង្ហាញមួយនៅសាកលវិទ្យាល័យ Drew រដ្ឋ New Jersey កាលពីខែមីនា ឆ្នាំ 2018។ សកម្មភាពធ្វើជាវាគ្មិនបាននាំមកនូវខ្ទង់ប្រាក់ 2.4 លានដុល្លារសម្រាប់គ្រួសារនេះ។
ឆ្នាំ 2019 ពេលធ្វើការឃោសនារកសំឡេងឆ្នោតសម្រាប់តំណែងប្រធានាធិបតី លោក និងលោកស្រី Jill ក៏រកបានប្រហែល 1 លានដុល្លារ។ ក្រៅពីនេះ អតីតអនុប្រធានាធិបតីអាមេរិករូបនេះក៏ទទួលបានប្រាក់ 540,000 ដុល្លារសម្រាប់តួនាទីជាសាស្ត្រាចារ្យនៅមជ្ឈមណ្ឌលការបរទេសនិងអន្តរកម្មសកល Penn Biden នៃសាកលវិទ្យាល័យ Pennsylvania។
មកដល់ចុងឆ្នាំ 2019 លោក Biden បានក្លាយជាបេក្ខភាពប្រធានាធិបតីរបស់បក្សប្រជាធិបតេយ្យ និងជាអ្នកនយោបាយដែលមានទ្រព្យច្រើនមួយរូបផងដែរ ដោយរកបាន 16.7 លានដុល្លារក្នុងរយៈពេល 3 ឆ្នាំ។ រាប់ចាប់ពីឆ្នាំ 1998 លោក Biden បង់ពន្ធលើប្រាក់ចំណូលជូនរដ្ឋបានចំនួន 6.7 លានដុល្លារ ក្នុងនោះមាន 5.5 លានដុល្លាររាប់ចាប់ពីឆ្នាំ 2017។
ក្នុងរយៈពេល 3 ឆ្នាំកន្លងទៅថ្មីៗនេះ គ្រួសារលោក Biden ក៏ចំណាយប្រាក់ជាង 1 លានដុល្លារសម្រាប់សកម្មភាពមនុស្សធម៌ទៀតផង។
ទ្រព្យសម្បត្តិភាគច្រើនរបស់គ្រួសារលោក Biden គឺជាអចលនទ្រព្យ ប៉ុន្តែពួកគេក៏មានខ្ទង់វិនិយោគផងដែរ។ Forbes ឱ្យដឹងថា ផ្ទះចំនួនពីរខ្នងរបស់លោក Biden នៅរដ្ឋ Delaware មានតម្លៃសរុប 4 លានដុល្លារ។ ពួកគេមានទ្រព្យជាសាច់ប្រាក់សុទ្ធ និងខ្ទង់វិនិយោគ មានតម្លៃ 4 លានដុល្លារ រួមនឹងប្រាក់ចូលនិវត្តន៍ចំនួន 1 លានដុល្លារ។
នៅពេលបានក្លាយជាប្រធានាធិបតីអាមេរិក លោក Biden ទទួលបានប្រាក់បៀវត្សចំនួន 400,000 ដុល្លារ/ឆ្នាំ។ យោងតាមច្បាប់ Cornell ប្រធានាធិបតីអាមេរិកក៏ទទួលបានខ្ទង់ប្រាក់ជំនួយបន្ថែមចំនួន 50,000 ដុល្លារ/ឆ្នាំ ដើម្បីអនុវត្តភារកិច្ចរបស់ខ្លួន៕
ប្រភព៖ Business Insider
January 25, 2021
កម្ពុជាថា វិស័យចំនួន 3 ក្នុងចំណោម 4 ដែលមានឥទ្ធិពលខ្លាំងជាងគេដល់សេដ្ឋកិច្ចកម្ពុជា បានធ្លាក់ចុះគួរឱ្យកត់សម្គាល់ ក្នុងឆ្នាំ 2020
ទាក់ទងនឹងកំណើនសេដ្ឋកិច្ចរបស់កម្ពុជាក្នុងឆ្នាំ 2020 កន្លងទៅ ធនាគារជាតិនៃកម្ពុជាបានចេញរបាយការណ៍ប្រចាំឆ្នាំរបស់ខ្លួន ឱ្យដឹងថា ក្នុងចំណោមវិស័យដែលរងផលប៉ះពាល់ពីវិបត្តិសុខភាព Covid-19 គឺមានវិស័យចំនួន 3 ដែលរងឥទ្ធិពលខ្លាំងជាងគេ ដោយសារវិស័យទាំងនេះមានការពឹងផ្អែកច្រើនទៅលើតម្រូវការក្រៅប្រទេស។
លទ្ធផលនៃកំណើតសេដ្ឋកិច្ចកម្ពុជាទទួលរងផលប៉ះពាល់ធ្ងន់ធ្ងរពីឥទ្ធិពលនៃការឆ្លងរាលដាលរបស់វីរុស Covid-19 ពិសេសគឺបណ្ដាវិស័យដែលទាក់ទងនឹងតម្រូវការក្រៅប្រទេស មានដូចជា វិស័យទេសចរណ៍ វិស័យកម្មន្តសាល (Manufacturing) និងវិស័យសំណង់។
វិស័យទេសចរណ៍
ទេសចរណ៍គឺជាវិស័យមួយដែលបាន និងកំពុងទទួលរងផលប៉ះពាល់ធ្ងន់ធ្ងរជាងគេបង្អស់នៅកម្ពុជា ព្រោះតែ Covid-19 ដោយកំណើនរបស់វិស័យនេះ បានធ្លាក់ចុះ 9.7%។ អត្រាធ្លាក់ចុះនៃភ្ញៀវទេសចរណ៍បរទេសគឺប្រមាណជា 80% ធៀបនឹងកំណើន 6.6% កាលពីឆ្នាំមុន។
វិស័យកម្មន្តសាល
ចំណែកកំណើននៅក្នុងវិស័យកម្មន្តសាលវិញ បានធ្លាក់ចុះគួរឱ្យកត់សម្គាល់ ដោយសារតម្រូវការខាងក្រៅត្រូវថយចុះ។ តួលេខពីរបាយការណ៍នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ របស់កម្ពុជា បានឱ្យដឹងថា រោងចក្រចំនួន 95 បានបិទទ្វារ ធ្វើឱ្យប៉ះពាល់ដល់កម្លាំងពលកម្មជាង 5 ម៉ឺននាក់។ ផលិតផលសម្រេចក្នុងវិស័យនេះ បានធ្លាក់ចុះ 27%។ ប៉ុន្តែ វិស័យនេះនៅមានសង្ឃឹមច្រើនដោយសាររោងចក្រថ្មី ដែលភាគច្រើនជារោងចក្រកែច្នៃលោហធាតិចំនួន 209 ត្រូវបានបង្កើតឡើង។
វិស័យសំណង់
តាមរយៈរបាយការណ៍ប្រចាំឆ្នាំ 2020 របស់ធនាគារជាតិកម្ពុជា កំណើននៃវិស័យសំណង់បានធ្លាក់ចុះ 3% ដោយសារតែសកម្មភាពវិនិយោគក្នុងស្រុក និងលំហូរទុនពីបរទេសក្នុងវិស័យនេះ ត្រូវបានកាត់បន្ថយ។ កំណើននៃចំនួនគម្រោង តម្លៃ និងផ្ទៃក្រឡានៃគម្រោងសំណង់ក៏បានធ្លាក់ចុះ 0.5%, 25% និង 17% តាមលំដាប់លំដោយ។
វិស័យកសិកម្ម
វិស័យកសិក្មទទួលបានកំណើនជិត 1% ធៀបនឹងឆ្នាំមុន ដោយសារតែកម្លាំងពលកម្មក្នុងវិស័យផ្សេងៗដែលរងផលប៉ះពាល់ពី Covid-19 បានងាកចូលមកវិស័យនេះ រួមនឹងការធ្វើពិពិធកម្មទៅកាន់វិស័យកសិ-ឧស្សាហកម្មរបស់រាជរដ្ឋាភិបាល៕
January 25, 2021
ក្រុមហ៊ុនវៀតណាមបង្ហាញរថយន្តស្វ័យប្រវត្ត ប្រើបញ្ហាសិប្បនិម្មិត និងទទួលការបញ្ជាទិញចាប់ពីខែឧសភា
ក្រុមហ៊ុនផលិតរថយន្តវៀតណាម VinFast បានស្រាវជ្រាវ និងអភិវឌ្ឍដោយជោគជ័យនូវរថយន្តឆ្លាតវៃ 3 ម៉ូដែលដំបូងរបស់ខ្លួន ដោយប្រើប្រាស់បច្ចេកវិទ្យាបញ្ញាសិប្បនិម្មិត (AI/Artificial intelligence) រួមនឹងកាមេរ៉ាពិសេសៗ និងអង្គញាណជាច្រើនផងដែរ។
ក្រុមហ៊ុន VinFast ថ្មីៗនេះបានប្រកាសបង្ហាញម៉ូដែលរថយន្តប្រភេទ SUV ឆ្លាតវៃចំនួន 3 ម៉ូដែល បន្ទាប់ពីការសិក្សាស្រាវជ្រាវ និងអភិវឌ្ឍអស់រយៈពេល 3 ឆ្នាំ។
ម៉ូដែលរថយន្តខាងលើនេះ មានឈ្មោះថា VF31, VF32 និង VF33 ក្នុងនោះ VF31 គឺជារថយន្តប្រភេទ SUV ខ្នាតតូច និងមានតែកំណែប្រើអគ្គិសនីប៉ុណ្ណោះ ចំណែក VF32 គឺជាប្រភេទ SUV ខ្នាតមធ្យម ខណៈដែល VF33 ជាប្រភេទ SUV ខ្នាតធំ។ VF32 និង VF33 សុទ្ធតែមានកំណែអគ្គិសនី និងកំណែសាំង។
VinFast VF31
រថយន្តទាំងនេះសុទ្ធតែមានបំពាក់មុខងារបើកបរស្វ័យប្រវត្តិកម្រិត 2-3។ មុខងារឆ្លាតវៃចំនួន 30 នៅលើក្នុងរថយន្តនេះត្រូវបានចែកជា 7 ប្រភេទ រួមមាន ប្រព័ន្ធជំនួយការបើកបរឆ្លាតវៃ ប្រព័ន្ធគ្រប់គ្រងគន្លងចរាចរណ៍ ប្រព័ន្ធគ្រប់គ្រងការធ្វើដំណើរ ប្រព័ន្ធព្រមានការប៉ះទង្គិចពហុទិស ប្រព័ន្ធកាត់បន្ថយបញ្ហាប៉ះទង្គិចទូទៅ ប្រព័ន្ធចូលចតស្វ័យប្រវត្តិឆ្លាតវៃ និងប្រព័ន្ធតាមដានអ្នកបើកបរ។
កំណែលំដាប់ខ្ពស់របស់ VF31, VF32 និង VF33 ក៏សុទ្ធតែមានអង្គញាណ LiDAR កាមេរ៉ាមើលឃើញឧបសគ្គរយៈចម្ងាយ 687 ម៉ែត្រ ចំនួន 17 គ្រាប់ និងអង្គញាណ 360 អង្សាចំនួន 19 គ្រាប់ដែលអនុញ្ញាតឱ្យព្រមាន និងចាត់ការនៅក្នុងល្បឿនលើសពី 100 គម/ម៉ោង។
VinFast VF32
កំណែលំដាប់ខ្ពស់របស់ម៉ូដែលរថយន្តទាំងនេះក៏ត្រូវបានបំពាក់បន្ថែមនូវមុខងារបើកបរស្វ័យប្រវត្តិកម្រិត 4 មួយចំនួនទៀត ដូចជា ការបង្កើតផែនទី 3 ទិសស្វ័យប្រវត្ត រួមនឹងមុខងារតភ្ជាប់ប្រព័ន្ធចរាចរណ៍ឆ្លាតវៃ។
តាមគម្រោង VF31 កំណែស្ដង់ដានឹងចាប់ផ្ដើមទទួលការបញ្ជាទិញនៅវៀតណាម ចាប់ពីខែឧសភា ឆ្នាំ 2021 និងប្រគល់ជូនដល់ដៃអតិថិជនចាប់ពីខែវិច្ឆិកា ឆ្នាំ 2021។ VF32 និង VF33 នឹងទទួលការបញ្ជាទិញនៅវៀតណាមចាប់ពីខែកញ្ញា ឆ្នាំ 2021 និងប្រគល់ចាប់ពីខែកុម្ភៈ ឆ្នាំ 2022 ខណៈនៅអាមេរិក កាណាដា និងអឺរ៉ុប ទទួលការបញ្ជាទិញចាប់ពីខែវិច្ឆិកា ឆ្នាំ 2021 និងប្រគល់ចាប់ពីខែ មិថុនា ឆ្នាំ 2022៕
VinFast VF33
ក្រៅពីមានរោងចក្រទំនើបលេចធ្លោជាងគេនៅអាស៊ីអាគ្នេយ៍ប្រចាំនៅវៀតណាម ក្រុមហ៊ុន VinFast បច្ចុប្បន្នមានបណ្ដាញមជ្ឈមណ្ឌលស្រាវជ្រាវ និងអភិវឌ្ឍ R&D (Research and development) នៅអូស្ត្រាលី អាល្លឺម៉ង់ និងអាមេរិក និងមជ្ឈមណ្ឌលធ្វើតេស្តរថយន្តទំនើបនៅអូស្ត្រាលីផងដែរ៕
ប្រភព៖ Vingroup, Taiwannews
January 22, 2021
វិធីធ្វើឱ្យ រោមភ្នែកវែង ងឡើង បានដោយរូបមន្តធម្មជាតិ
រោមភ្នែកដែលវែង ង អាចនិយាយបានថា ជារឿងមួយដែលនារីៗយើង ប្រាថ្នាចង់បានគ្រប់គ្នា ព្រោះបើមានរោមភ្នែកវែង ងស្អាតហើយនោះ ទោះជាមិនចាំបាច់ថែមថយអ្វីច្រើន ក៏នៅតែស្អាតបានយ៉ាងធម្មជាតិដែរ បើមិនអ៊ីចឹងទេ មិនមែនគេខំផលិតរោមភ្នែកសិប្បនិម្មិត មកដាក់លក់សម្រាប់នារីៗយើងនោះទេ។ តែបើកញ្ញាៗដែលមានរោមភ្នែកខ្លីៗ និងចាប់ផ្ដើមធុញទ្រាន់នឹងការពាក់រោមភ្នែកសិប្បនិម្មិតនោះហើយ សូមសាកល្បងយករូបមន្តពីធម្មជាតិខាងក្រោមនេះ ទៅប្រើសាកលមើល៍ ធានាថា វានឹងជួយឱ្យរោមភ្នែករបស់អ្នកនាងនឹងឡើងវែង-ង-ស្អាត ដូចធម្មជាតិមិនខាន។
-ក្រូចឆ្មារ និងប្រេងម្កាក់
នៅក្នុងប្រេងម្កាក់ សម្បូរទៅដោយវីតាមីនE និងសារធាតុប្រឆាំងរ៉ាឌីកាល់សេរី ដែលនឹងជួយឱ្យរោមភ្នែករបស់នារីៗយើងឡើងវែង-ងស្អាតបានកាន់តែខ្លាំងជាងមុន។ ចំណែកទឹកក្រូចឆ្មារវិញ គឺជាប្រភពរួមរបស់វីតាមីនA និងC ដែលនឹងជួយឱ្យសរសៃសក់ និងរោមវែងឡើងបាន។ នៅពេលយកទឹកប្រេងម្កាក់ ១ពែងមកលាយជាមួយសម្បកផ្លែក្រូចឆ្មារ ទុកចោល ១យប់ បន្ទាប់ពីនោះ ព្រឹកស្អែកឡើង ចូរយកជក់សម្រាប់សិតរោមភ្នែក មកជ្រលក់ទឹកល្បាយនោះ ហើយយកមកសិតរោមភ្នែករៀងរាល់ព្រឹក វានឹងជួយឱ្យរោមភ្នែកវែងឡើង និងងស្អាតជាងមុន។
-ប្រេងល្ហុងខ្វង និងផ្លែរ៉ូសមែរីស្រស់
នារីៗទាំងអស់ប្រហែលជាធ្លាប់បានដឹងច្បាស់ហើយថា ប្រេងល្ហុងខ្វង ជួយបង្ខំឱ្យសរសៃសក់ឆាប់វែងឡើងបាន តែមានចំណុចមិនល្អ១ គឺវាខាប់ ធ្ងន់ និងមានក្លិនមិនសូវល្អ តែបើចង់ឱ្យរោមភ្នែកវែងនោះ ក៏ប្រហែលជាត្រូវទ្រាំអត់ធ្មត់បន្តិចហើយ។ ចូរយកប្រេងល្ហុងខ្វង មកលាយជាមួយផ្លែរ៉ូសមែរីស្រស់ បន្ទាប់មក យកទៅដាក់ចំហុយក្នុងចង្ក្រានម៉ៃក្រូវេហ្វ ក្នុងសីតុណ្ហភាពទាប ទុកចោលប្រមាណជា ១០នាទី រួចហើយសឹមយកជក់សិតរោមភ្នែកដែលស្អាត មកជ្រលក់នៅក្នុងល្បាយនោះ ហើយសិតវាសយឺតៗនៅលើរោមភ្នែក។ ចូរធ្វើ ពេលមុនចូលគេង ទើបជាការល្អ ព្រោះអ្នកនាងប្រហែលជា មិនចង់ចេញទៅក្រៅផ្ទះទាំងរោមភ្នែកស្អិតៗ និងធំក្លិនមិនល្អបែបនោះទេ មែនអត់?។
-តែបៃតង
នៅក្នុងទឹកតែបៃតង សម្បូរទៅដោយសារធាតុប្រឆាំងរ៉ាឌីកាល់សេរី និងមានគុណសម្បត្តិ សម្លាប់មេរោគបាក់តេរី ដែលមានប្រយោជន៍លើសលប់ចំពោះសរសៃសក់ និងដែលសំខាន់នោះគឺ វាថែមទាំងធ្វើឱ្យស្រទន់ខ្លាំង ប្រភេទដែលអាចហៅបានថា យកមកប្រើនៅជិតៗកែវភ្នែក ក៏មិនបណ្តាលឱ្យប៉ះពាល់អ្វីដែរ។ នៅពេលយកទឹកតែបៃតង មកលាបលើរោមភ្នែកហើយ វានឹងជួយឱ្យរោមភ្នែកមានសុខភាពល្អ និងវែងឡើងយ៉ាងធម្មជាតិ។
វ៉ាវ…ស្រស់ស្អាតបែបងាយៗយ៉ាងនេះ ក្រៅពីធ្វើឱ្យសន្សំសំចៃលុយកាក់បានហើយនោះ រូបមន្តទាំងនេះថែមទាំងប្រាសចាកសារធាតុគីមីទៀតផង។ បែបនេះប្រហែលជាត្រូវចិត្តនារីៗយើងច្រើននាក់ហើយមើលទៅ!៕
January 22, 2021
Trump នៅសល់ទ្រព្យប៉ុន្មានទៀត ក្រោយ 4ឆ្នាំធ្វើជាប្រធានាធិបតី?
ឆ្នាំ 2020 គឺជាឆ្នាំអាក្រក់បំផុតសម្រាប់អតីតប្រធានាធិបតីអាមេរិក Donald Trump ព្រោះថា ទន្ទឹមនឹងការចាញ់ឆ្នោត លោក Trump ក៏ជួបបញ្ហាហិរញ្ញវត្ថុផងដែរ។
ឆ្នាំ 2016 លោក Trump បានក្លាយជាមហាសេដ្ឋីដំបូងដែលជាប់ឆ្នោតជាប្រធានាធិបតីអាមេរិក។ ប៉ុន្តែ នៅក្នុងអំឡុង 4 ឆ្នាំនៅសេតវិមាន ចំណាត់ថ្នាក់មហាសេដ្ឋីរបស់លោក Trump បានធ្លាក់មកនៅលំដាប់ទី 1001 នៅក្នុងបញ្ជីចំណាត់ថ្នាក់អ្នកមានជាងគេក្នុងលោករបស់ទស្សនាវដ្ដី Forbes។
តាមការស្រាវជ្រាវ ទ្រព្យសុទ្ធរបស់លោក Trump បានថយចុះពី 4.5 ពាន់លានដុល្លារកាលពីខែមីនា ឆ្នាំ 2016 (មុនពេលជាប់ឆ្នោតជាប្រធានាធិបតី) មកនៅត្រឹម 2.1 ពាន់លានដុល្លារក្នុងឆ្នាំ 2020។ ក្នុងឆ្នាំ 2016 លោកបានចំណាយប្រាក់ផ្ទាល់ខ្លួនចំនួន 66 លានដុល្លារដើម្បីធ្វើសកម្មភាពឃោសនារកសំឡេងឆ្នោត ក្នុងដែលប្រាក់ប្រមូលបានពីការអ្នកគាំទ្រ មានចំនួន 368 លានដុល្លារ។
យោងតាម Forbes ទ្រព្យរបស់លោក Trump បានថយចុះច្រើនបំផុតគឺនៅក្នុងឆ្នាំ 2017 និង 2020។ ទ្រព្យរបស់មហាសេដ្ឋីរូបនេះ បានថយពី 3.7 ពាន់លានដុល្លារកាលពីចុងឆ្នាំ 2016 មកនៅត្រឹម 3.1 ពាន់លានដុល្លារក្នុងឆ្នាំ 2017 ដោយសារតែ «ឱនភាព» ក្នុងវិស័យលក់រាយ និងទីផ្សារអចលនទ្រព្យនៅទីក្រុង New York ព្រោះលោកមានទ្រព្យច្រើនក្នុងវិស័យទាំងនេះ។
អគារសណ្ឋាគារ Trump International Hotel Las Vegas
ការថយចុះនៃទ្រព្យដ៏គួរឱ្យកត់សម្គាល់របស់អតីតប្រធានាធិបតី Trump គឺកើតឡើងនៅក្នុងឆ្នាំ 2020។ បច្ចុប្បន្ន ទ្រព្យសុទ្ធរបស់លោកគឺមានត្រឹមតែ 2.1 ពាន់លានដុល្លារប៉ុណ្ណោះ នេះបើតាមស្ថិតិរបស់ Forbes។ ទស្សនាវដ្ដី Forbes បានរកឃើញថា Covid-19 គឺជាកត្តាសំខាន់បំផុតដែលបានធ្វើឱ្យទ្រព្យរបស់លោក Trump ត្រូវថយចុះនៅក្នុងឆ្នាំ 2020។
ប្រភពចំណូលសំខាន់របស់លោក Trump គឺបានមកពីបណ្ដាញហាង អគារការិយាល័យ និងសណ្ឋាគារខ្ពស់ៗ រួមនឹងទីលានវាយកូនគោលជាដើម។ ជាក់ស្ដែង ដើម្បីទប់ស្កាត់ការឆ្លងវីរុស Covid-19 ប្រជាជនទូទៅត្រូវធ្វើការពីផ្ទះ ក្រុមហ៊ុនត្រូវបិទទ្វារ ធ្វើឱ្យប្រភពចំណូលរបស់លោក Trump ក៏ត្រូវថយចុះទៅតាមនោះដែរ។
យោងតាមរបាយការណ៍ហិរញ្ញវត្ថុចុងក្រោយរបស់លោក Trump បង្ហាញថា ចំណូលរបស់លោកបានថយចុះនៅត្រឹមពី 273 ដល់ 308 លានដុល្លារក្នុងដំណាក់កាលពីឆ្នាំ 2020 បូកនឹង 20 ថ្ងៃដើមឆ្នាំ 2021។ ក្នុងរបាយការណ៍ឆ្នាំ 2017 លោករកបានជាង 528.9 លានដុល្លារក្នុងរយៈពេល 15.5 ខែ ដោយបានបូកជាមួយនឹង 3 ខែដើមអាណត្តិប្រធានាធិបតីរបស់លោក។
ជាងនេះ ក្រុមហ៊ុនអចលនទ្រព្យរបស់លោក Trump ក៏កំពុងតែលិចលង់ក្នុងបំណុលជាង 1 ពាន់លានដុល្លារផងដែរ ដែលភាគច្រើននឹងដល់ថ្ងៃកំណត់នៅ 3 ឆ្នាំទៀត។ ក្នុងចំណោមនេះ មានបំណុលចំនួន 1/3 ត្រូវបានធានាដោយបុគ្គល៕
ប្រភព៖ ព័ត៌មានចម្រុះ
January 22, 2021