សង្គម និងសេដ្ឋកិច្ច - La Reine Media

កោះកុងនឹងមានព្រលានយន្ដហោះថ្មីទីពីរ ខណៈទីមួយនឹងហោះហើរសាកល្បងនៅត្រីមាសទីបួន ឆ្នាំ2021

នៅចុងឆ្នាំ 2021 នេះ រដ្ឋាភិបាលកម្ពុជានឹងបើកដំណើរការជើងហោះហើរសាកល្បងសម្រាប់អាកាសយានដ្ឋានថ្មីដែលស្ថិតនៅក្នុងតំបន់តារាសាគរ ក្នុងស្រុកបទុមសាគរនៃខេត្តកោះកុង ដែលនេះគឺប្រសាសន៍របស់អភិបាលរងខេត្តកោះកុង។

នៅក្នុងសន្និសីទសារព័ត៌មានមួយដែលត្រូវបានធ្វើឡើងកាលពីព្រឹកថ្ងៃទី 4 កុម្ភៈនេះ អភិបាលរងខេត្តកោះកុង លោក សុខ សុទ្ធី បានឱ្យដឹងថា ផ្លូវរត់សម្រាប់យន្តហោះនៃព្រលានយន្តហោះថ្មីនេះ ត្រូវបានសាងសង់រួចរាល់ជាស្ថាពរ នៅឡើយតែការបំពាក់ភ្លើងសញ្ញាប៉ុណ្ណោះ។

ទាក់ទងនឹងការដាក់ឱ្យដំណើរការព្រលានយន្ដហោះតារាសាគរ ដែលវិនិយោគដោយក្រុមហ៊ុន Union Development Group របស់ចិន ជាមួយនឹងទំហំទឹកប្រាក់ 150 លានដុល្លារនេះ លោកអភិបាលរងខេត្តកោះកុង បានសង្កត់ធ្ងន់ថា៖ «នឹងត្រូវពន្យារពេលរហូតដល់ត្រីមាសទីបួននៃឆ្នាំ 2021 នេះ» ដោយសារតែបញ្ហាវិបត្តិសុខភាពដែលបង្កឡើងដោយ Covid-19។

អាកាសយានដ្ឋានតារាសារគរនេះ មិនមែនជាព្រលានយន្តហោះថ្មីតែមួយនៅខេត្តកោះកុងនោះទេ អភិបាលរងខេត្តកោះកុង បានបង្ហើបឱ្យដឹងថា ព្រលានយន្តហោះថ្មីមួយផ្សេងទៀតដែលអាចនឹងត្រូវសាងសង់នៅត្រង់ព្រំប្រទល់នៃស្រុកកោះកុង និងស្រុកមណ្ឌលសីមា ក៏កំពុងត្រូវបានសិក្សាលម្អិតផងដែរ៕

February 4, 2021

ក្រុមអ្នកស្រាវជ្រាវ រកឃើញកម្មវិធី មេរោគថ្មី កំពុងវាយលុកលើ WhatsApp

កាលពីពេលថ្មីៗនេះ ក្រុមអ្នកស្រាវជ្រាវ ទើបតែរកឃើញកម្មវិធីមេរោគថ្មី នៅលើទូរស័ព្ទស្មាតហ្វូនដែលប្រើប្រព័ន្ធប្រតិបត្តិការ Android ដែលអាចឆ្លងរីករាលដាល ដោយស្វ័យប្រវត្តិ តាមរយៈកម្មវិធី WhatsApp។

វិធីសាស្ត្រនៃការចម្លងមេរោគនេះគឺ ពួកគេបានប្រើប្រាស់មុខងារឆ្លើយតប ដោយស្វ័យប្រវត្តិ ដែលមាននៅក្នុងប្រព័ន្ធប្រតិបត្តិការ Android និងកម្មវិធី WhatsApp។ នៅពេលទូរស័ព្ទ ដែលមានមេរោគទទួលបានសារ តាមរយៈកម្មវិធី WhatsApp ហើយ វានឹងឆ្លើយតបទៅអ្នកផ្ញើវិញ ជាមួយនឹងតំណភ្ជាប់ ឱ្យបញ្ចូលកម្មវិធីក្លែងក្លាយ “Huawei Mobile” តាមរយៈគេហទំព័រក្លែងក្លាយ ដែលមានរូបរាងស្រដៀងគ្នានឹង គេហទំព័រ Google Play Store។

បន្ទាប់ពីលោកអ្នកបញ្ចូលកម្មវិធីមេរោគនេះហើយ វានឹងធ្វើការស្នើសុំ ដើម្បីអាចផ្ញើសារចេញដោយស្វ័យប្រវត្តិ ដែលការណ៍នេះ នឹងធ្វើឱ្យទូរស័ព្ទលោកអ្នក ក្លាយជាឧបករណ៍ សម្រាប់ចែកចាយមេរោគ បន្តទៅទូរស័ព្ទផ្សេងៗទៀត។

ជាងនេះទៅទៀត ក្រុមអ្នកស្រាវជ្រាវ ក៏បានរកឃើញផងដែរថា មេរោគនេះ ក៏អាចបន្ថែមស្គ្រីនទៅលើកម្មវិធីផ្សេងៗទៀត ដើម្បីលួចយកព័ត៌មានសំខាន់ៗ ដូចជាឈ្មោះ និងលេខសម្ងាត់ជាដើមបានទៀតផង។

បច្ចុប្បន្នកម្មវិធីមេរោគនេះ អាចចម្លងបានតាមតែរយៈកម្មវិធី WhatsApp ប៉ុណ្ណោះ ប៉ុន្តែជនខិលខូចក៏អាចធ្វើការកែសម្រួលវា ដែលអាចឱ្យដំណើរការបាន ជាមួយនឹងកម្មវិធីទំនាក់ទំនងសង្គមផ្សេងៗទៀតនៅពេលអនាគត។

ដូច្នេះដើម្បីការពារសុវត្ថិភាពក្នុងការប្រើប្រាស់ឧបករណ៍បច្ចេកវិទ្យា សូមលោកអ្នក កុំធ្វើការទាញយកកម្មវិធី ពីតំណភ្ជាប់មួយណា ដែលមិនមានប្រភពច្បាស់លាស់ ហើយលោកអ្នកគួរតែទាញយកកម្មវិធី តែពីក្នុងកម្មវិធីផ្លូវការ ដែលមាននៅក្នុងទូរស័ព្ទស្រាប់៕

February 4, 2021

លោក Andy Jassy អ្នកស្នងតំណែង CEO របស់ Amazon

នៅពេល Jeff Bezos ចាកចេញពីតំណែងអគ្គនាយកប្រតិបត្តិ លោក Andy Jassy ដែលជាអ្នកបើកផ្លូវឱ្យយុគសម័យ cloud-computing នៅ Amazon នឹងចូលមកគ្រប់គ្រងតំណែង CEO នេះ។

ក្រុមហ៊ុន Amazon បានប្រកាសឱ្យដឹងថា ក្រោយរយៈពេល 27 ឆ្នាំ ស្ថាបនិក Jeff Bezos នឹងលែងជា CEO របស់ក្រុមហ៊ុននេះទៀតហើយ ចាប់ពីត្រីមាសទីបី ឆ្នាំ 2021។ នេះគឺជាលើកដំបូងដែលលោក Bezos ប្រគល់សិទ្ធិចាត់ចែងក្រុមហ៊ុនទៅឱ្យអ្នកផ្សេង រាប់ចាប់ពី Amazon នៅជាឃ្លាំងសៀវភៅអនឡាញដ៏តូចមួយកាលពីខែកក្កដា ឆ្នាំ 1994។

Andy Jassy កើតឆ្នាំ 1968 បានចូលបម្រើការនៅក្នុងក្រុមហ៊ុន Amazon ចាប់ពីឆ្នាំ 1997 បន្ទាប់ពីបានបញ្ចប់ការសិក្សានៅសាលាពាណិជ្ជកម្ម Harvard (HBS)។ «ខ្ញុំបានចូលរួមប្រលងលើកចុងក្រោយនៅ HBS ក្នុងថ្ងៃសុក្រដំបូងនៃខែឧសភា ឆ្នាំ 1997។ ខ្ញុំបានចូលធ្វើការនៅ Amazon នៅថ្ងៃចន្ទនៃសប្ដាហ៍បន្ទាប់នោះ។ ពេលនោះ សូម្បីតែការងារ ឬតំណែងសម្រាប់ខ្ញុំ ក៏ខ្ញុំមិនបានដឹងដែរ» Jassy ធ្លាប់បានប្រាប់ HBS កាលពីខែកញ្ញា ឆ្នាំ 2020។

ឆ្នាំ 2006 Jassy បានចូលរួមបង្កើត Amazon Web Services (AWS) ជាសេវាកម្មរក្សាទិន្នន័យ (cloud-computing) ដែលកំពុងត្រូវបានក្រុមហ៊ុន សាលារៀន និងរដ្ឋាភិបាលរាប់លានស្ថាប័នក្នុងពិភពលោកប្រើប្រាស់ដើម្បីដំណើរការគេហទំព័រ និងកម្មវិធីទូរស័ព្ទ (app)។ Jassy កាន់តំណែងជា CEO របស់ AWS ចាប់ពីឆ្នាំ 2016 ប៉ុន្តែ បច្ចុប្បន្ន Amazon មិនទាន់បានប្រកាសអំពីអ្នកដែលត្រូវឡើងមកជំនួសតំណែងរបស់លោកនៅឡើយ ក្រោយពីលោកក្លាយជា CEO របស់ Amazon។

លោក Andy Jassy ជាអ្នកស្នងតំណែង CEO របស់ Amazon

ល្បីឈ្មោះជាគេហទំព័រផ្សារអនឡាញលំដាប់ទីមួយក្នុងពិភពលោក ប៉ុន្តែ ប្រភពចំណូលធំបំផុតរបស់ Amazon បែរជាបានមកពី AWS ទៅវិញ។ Amazon បានយកឈ្នះលើក្រុមហ៊ុនធំៗជាច្រើន ដូចជា Microsoft និង Oracle ជាដើម និងកំពុងកាន់កាប់ 30% នៃចំណែកទីផ្សារក្នុងវិស័យ cloud-computing។

លោក Jassy ត្រូវបានគេស្គាល់ថាជាអ្នកមានការយល់ដឹងច្បាស់អំពីបច្ចេកទេសលម្អិត និងជាទីប្រឹក្សារបស់ Bezos។ ជួនកាលលោកក៏ឡើង Twitter ចែករំលែកអំពីការយល់ឃើញផ្ទាល់ខ្លួនចំពោះបញ្ហានានាក្នុងសង្គមផងដែរ។

នៅក្នុងសំបុត្រផ្ញើទៅកាន់បុគ្គលិក Amazon លោក Jeff Bezos ធ្លាប់បានអះអាងថា លោក «ជឿជាក់ទៅលើ Andy Jassy ទាំងស្រុង ដោយថា Jassy នឹងជាអ្នកដឹកនាំពូកែបំផុត»។ អ្នកវិភាគ Dan Ives ក៏ធ្លាប់បានអធិប្បាយថា Jassy គឺជា «មេដឹកនាំម្នាក់ដែលមានអំណាចបំផុត» មិនត្រឹមតែនៅក្នុងវិស័យរក្សាទិន្នន័យប៉ុណ្ណោះទេ តែនៅក្នុងពិភពជំនួញទៀតផង។

លោក Jassy ជាមនុស្សម្នាក់ក្នុងចំណោមអ្នកដែលទទួលបានប្រាក់ខែខ្ពស់បំផុតនៅក្នុងក្រុមហ៊ុន Amazon ដោយទទួលបាន 20 លានដុល្លារក្នុងអំឡុង 3 ឆ្នាំកន្លងទៅនេះ។ ប្រភពព័ត៌មានមួយចំនួនបានឱ្យដឹងថា Microsoft និង Uber ក៏ធ្លាប់បានបញ្ចុះបញ្ចូល Jassy ឱ្យមកធ្វើជា CEO នៃក្រុមហ៊ុនទាំងនេះផងដែរ៕

ប្រភព៖ NYT

February 4, 2021

ក្រុមហ៊ុន SpaceX ប្រកាសបេសកកម្មថ្មី នាំយកមនុស្សស្ម័គ្រចិត្ត 4នាក់ ទៅកាន់លម្ហអវកាស

កាលពីពេលថ្មីៗនេះ ក្រុមហ៊ុនអវកាសSpaceX បានប្រកាសឱ្យដឹងថា ពួកគេបានបង្កើតបេសកកម្មមួយ ដែលមានឈ្មោះថា Inspiration4 ដែលជាបេសកកម្មដំបូងគេបំផុតក្នុងពិពភលោក ដោយនឹងធ្វើការនាំយកជនស៊ីវិលចំនួន 4រូបទៅកាន់លម្ហ ដែលមិនធ្លាប់មានវត្តមានអាវកាសយានិក ទៅជាមួយនោះទេ។

បេសកកម្មនោះដែរ ត្រូវបាន SpaceX កំណត់យកពេលវេលា នៃការបើកដំណើរការនៅក្នុងអំឡុងត្រីមាសចុងក្រោយនៃឆ្នាំ2021 នេះ ចេញពីមជ្ឈមណ្ឌលលម្ហអវកាស Kennedy Space Center ។ ការនាំយកជនស៊ីវិលទាំង 4នាក់ ទៅកាន់លម្ហអាកាសនោះ គឺត្រូវប្រើប្រាស់យានអាវកាស Crew Dragon ។

អ្នកដឹកនាំក្នុងបេសកកម្មនោះ គឺលោក Jared Isaacman គឺជាស្ថាបនិករបស់ក្រុមហ៊ុន Shift 4 Payments ដើរតួធ្វើជាមេបញ្ជាការ ក្នុងចំណោមអ្នកដំណើរទាំងអស់។ គាត់នឹងក្លាយជាជនស៊ីវិល 1រូបក្នុងចំណោម 3រូបផ្សេងទៀត ដែលនឹងធ្វើដំណើរទៅកាន់លម្ហ ខណៈដែលជនស៊ីវិលទាំង 3នាក់ទៀតនោះ ត្រូវឆ្លងកាត់លក្ខខណ្ឌធ្វើតេស្ត ខាងកាយសម្បទាជាច្រើន។

បុគ្គលទាំង 4រូប ដែលនឹងត្រូវធ្វើដំណើរទៅកាន់លម្ហនោះ គឺនឹងទទួលបានការហ្វឹកហាត់ជាមុន ពី SpaceX នូវមុខជំនាញសំខាន់ៗជាច្រើន ដែលនឹងត្រូវប្រើប្រាស់ក្នុងការដំណើរនោះ ដែលរួមមានទាំងរបៀបប្រើប្រាស់យានអវកាស ក៏ដូចជារបៀបនៃការឆ្លើយតបបន្ទាន់ផងដែរ។

គោលបំណង នៃក្នុងបេសកកម្មខាងលើនោះ គឺដើម្បីរៃអង្គាសថវិកា សម្រាប់ផ្តល់ទៅឱ្យមន្ទីរពេទ្យ និងកន្លែងស្រាវជ្រាវ ទាក់ទងនឹងជំងឺរបស់កុមារមួយ ដែលមានឈ្មោះថា St. Jude Children’s Research Hospital។

លោក Jared Isaacman នឹងបរិច្ចាគ 2កៅអី ដែលនៅសល់ ទៅកាន់ជនស៊ីវិល 2រូបទៀត។ កៅអីនៅសល់នេះ នឹងផ្តល់ឱកាសយ៉ាងបើកចំហ ទៅកាន់អ្នកដែលបានចូលរួមក្នុងការបរិច្ចាគ ទៅមន្ទីរពេទ្យខាងលើដែរ ហើយកន្លែងសម្រាប់ម្នាក់ទៀត នឹងផ្តល់ជូនទៅឱ្យអតិថិជនចាស់ និងថ្មី នៃជំនួញតាមអ៊ីនធើណិត Shift4Shop របស់លោក Isaacman សម្រាប់កន្លែងមួយចុងក្រោយ ដែលនៅសល់នោះ គឺនឹងត្រូវផ្តល់ឱ្យទៅ ឯកអគ្គរដ្ឋទូតនៃមន្ទីរពេទ្យខាងលើ។

សូមជម្រាបជូនផងដែរថា ក្រុមហ៊ុនអវកាស SpaceX បានក្លាយជាក្រុមហ៊ុនឯកជនដំបូងគេ ដែលជោគជ័យលើការបាញ់បង្ហោះរ៉ុក្កែត ចូលទៅស្ថានីយអវកាសអន្តរជាតិ និងជាក្រុមហ៊ុនដំបូងគេ ដែលអាចផលិតបានយានអវកាស អាចធ្វើដំណើរទៅកាន់លម្ហ ដែលអាចវិលត្រឡប់មកផែនដីបាន៕

February 4, 2021

ក្រុមហ៊ុន Elon Musk ធ្វើតេស្តជោគជ័យលើសត្វស្វា គម្រោងបន្ទះឈីប ជាមួយនឹងខ្សែអេឡិចត្រូត

កាលពីថ្ងៃទី31 ខែមករា ឆ្នាំ2021 គម្រោង Neuralink របស់លោកElon Musk ទទួលបានជោគជ័យ ក្នុងការសាកល្បងដាំបន្ទះឈីបក្នុងខួរក្បាលសត្វស្វា ដែលអាចអនុញ្ញាតឱ្យសត្វស្វានោះ មានសមត្ថភាព ចេះលេងហ្គេម PingPong តាមរយៈខួរក្បាលរបស់វា។ នេះជាជោគជ័យលើកដំបូងហើយ ក្នុងការធ្វើតេស្ត និងជាជំហានថ្មីមួយទៀតក្នុងការសិក្សាស្រាវជ្រាវបន្ថែមទៀត។

ជម្រាបជូនផងដែរថា ក្រុមហ៊ុនបច្ចេកវិទ្យាណឺរ៉ូន កំពុងសិក្សា និងធ្វើតេស្តសាកល្បង Neuralink ដែលជាឧបករណ៍បង្កប់ក្នុងលលាដ៏ក្បាល ដែលរួមមានបន្ទះឈីបជាមួយនឹងខ្សែអេឡិចត្រូតតូចៗ ដែលមានសមត្ថភាពអាចភ្ញោចណឺរ៉ូន នៅក្នុងខួរក្បាលរបស់មនុស្សបាន។

ភាពជោគជ័យនៃដំណើរការគម្រោងនេះ នៅថ្ងៃអនាគត អាចជួយដល់មនុស្សដែលមានបញ្ហាឃាងសរសៃប្រសាទបាន ដូចជា បាត់ការចងចាំ ថ្លង់ ពិការភ្នែក ខ្វិន បាក់ទឹកចិត្ត ដេកមិនលក់ ឈឺចាប់រ៉ាំរ៉ៃ ប្រកាច់ ថប់អារម្មណ៍ បញ្ហាញៀននឹងអ្វីមួយ ដាច់សរសៃឈាមខួរក្បាល ឬបញ្ហាខូចខួរក្បាល ជាដើម៕

February 4, 2021

(សង្ខេប) 10ប្រការដែលអ្នកអាចមិនបានដឹងអំពីលោក Jeff Bezos

គ្រប់គ្នាធ្លាប់តែចាប់អារម្មណ៍ថា Jeff Bezos គឺជាមហាសេដ្ឋីលំដាប់កំពូល និងល្បីឈ្មោះជាងគេមួយរូបនៅក្នុងពិភពលោក ក៏ប៉ុន្តែប្រការទាំងឡាយខាងក្រោមនេះ គ្រប់គ្នាប្រហែលជាមិនទាន់បានដឹងច្បាស់នៅឡើយ។

លោក Bezos កើតក្នុងគ្រួសារសាមញ្ញមួយគ្រួ ប៉ុន្តែបច្ចុប្បន្ន ទ្រព្យរបស់លោកបានកើនឡើងដល់ 197 ពាន់លានដុល្លារអាមេរិក និងជាអ្នកមានជាងគេលំដាប់ទីពីរក្នុងពិភពលោក បន្ទាប់ពីមហាសេដ្ឋីជនជាតិអាមេរិកាំងដើមកំណើតអាហ្វ្រិក Elon Musk នេះបើតាមទំព័រ Bloomberg។

ខាងក្រោមនេះគឺជាប្រការទាំង 10 ដែលអ្នកគួរតែដឹងអំពីម្ចាស់ Amazon៖

1-ម្ដាយរបស់លោក Jeff Bezos ឈ្មោះ Jacklyn Bezos បានបង្កើតលោកក្នុងគ្រាកំពុងរៀននៅវិទ្យាល័យ

2-ឪពុកបង្កើតរបស់លោក Bezos គឺជាអ្នកសំដែងសៀក

3-Bezos ចូលចិត្តស្វែងយល់គ្រប់យ៉ាង និងមានចំណូលចិត្តស្វែងរករបកគំហើញថ្មីតាំងតែពីនៅក្មេង

4-Bezos ធ្វើជំនួញជាលើកដំបូងនៅពេលកំពុងសិក្សាកម្រិតវិទ្យាល័យ

5-Bezos ធ្លាប់ធ្វើការនៅតំបន់ Wall Street ក្នុងទីក្រុង New York កាលពីដើមទសវត្សរ៍ 1990

6-Bezos បង្កើតក្រុមហ៊ុន Amazon នៅក្នុងយានដ្ឋាន

7-ដើមឡើយ Bezos ធ្លាប់បានដាក់ឈ្មោះឱ្យក្រុមហ៊ុនរបស់ខ្លួនថា Cadabra មិនមែន Amazon ទេ

8-លោកធ្លាប់ជួបគ្រោះថ្នាក់ឧទ្ធម្ភាគចក្រ

9-Bezos គឺជាម្ចាស់នៃទីភ្នាក់ងារសារព័ត៌មាន Washington Post

10-Bezos មានក្រុមហ៊ុនអវកាសផ្ទាល់ខ្លួន

ប្រភព៖ BI, BB

February 3, 2021

យានអវកាស Starship របស់មហាសេដ្ឋី Elon Musk ផ្ទុះនៅពេលចុះចត

យានអវកាស Starship គំរូថ្មីបំផុតរបស់ក្រុមហ៊ុន SpaceX បានផ្ទុះម្ដងទៀតនៅពេលកំពុងចុះចត បើទោះជាបានហោះចេញពីទីលានបាញ់បង្ហោះដោយជោគជ័យ។

គំរូយានអវកាស Starship ថ្មីបំផុតនេះ ត្រូវបានបាញ់បង្ហោះដោយជោគជ័យកាលពីថ្ងៃទី 2 កុម្ភៈ ប៉ុន្តែបានផ្ទុះដោយសារតែមានការប៉ះទង្គិចនៅក្នុងការព្យាយាមចុះចតតាមលក្ខណបញ្ឈរត្រង់។ យានគំរូនេះមានលេខសម្គាល់ជាលេខ 9 ឬ SN9។ វាត្រូវបានបាញ់បង្ហោះសាកល្បងក្នុងរយៈកម្ពស់ប្រហែល 10 គីឡូម៉ែត្រ ដូចទៅនឹងយាន Starship មួយគ្រឿងផ្សេងទៀតដែលបានហោះឡើងកាលពីខែធ្នូ ឆ្នាំ 2020។ យាន SN8 ក៏បានផ្ទុះនៅក្នុងពេលចុះចត។

John Insprucker ដែលជាវិស្វករសំខាន់របស់ SpaceX បានឱ្យដឹងនៅក្នុងសេចក្ដីប្រកាសព័ត៌មានមួយថា៖ «យើងត្រូវប្រឹងប្រែងតែបន្តិចទៀតប៉ុណ្ណោះ នឹងមានការចុះចតដោយជោគជ័យ»។

គំរូនៃយាន Starship របស់ Elon Musk ត្រូវបានរចនាឡើងដោយប្រើប្រាស់ដែកអ៊ីណុក ដូចទៅនឹងកំណែដំបូងដែលត្រូវបានប្រកាសកាលពីចុងឆ្នាំមុន។ ក្រុមហ៊ុន SpaceX កំពុងតែអភិវឌ្ឍយានអវកាស Starship ដើម្បីដឹកទំនិញ ឬមនុស្សឱ្យបាន 100 នាក់ ឡើងទៅកាន់ឋានព្រះចន្ទ និងពិភពព្រះអង្គារដោយចំណាយការហោះហើរតែមួយលើក។

លោក Musk បានបង្វែរចំណាប់អារម្មណ៍របស់សាធារណជន ទៅរកយាន Starship កាលពីខែឧសភា ក្រោយពី SpaceX ទទួលបានជោគជ័យក្នុងបេសកកម្មទេសចរណ៍អវកាសដំបូងរបស់ខ្លួន។ លោក Musk ចាត់ទុក Starship ជាអាទិភាពដំបូងរបស់ក្រុមហ៊ុន។ កាលពីឆ្នាំមុន ក្រុមហ៊ុនបានស្នើឱ្យមានការពន្លឿនកម្មវិធីនេះភ្លាមៗផងដែរ។

បើទោះជា SN9 មានវាសនាមិនខុសពី SN8 ដែលបានផ្ទុះកាលពីពីរខែមុន ប៉ុន្តែ SpaceX បានចាត់ទុកថា ការសាកល្បងហោះហើរនេះជាជំហានដ៏សំខាន់នៅក្នុងការអភិវឌ្ឍរ៉ុកកែតរបស់ខ្លួន។ SN10 អាចនឹងជោគជ័យក្នុងការហោះឡើង និងចុះចតនាពេលខាងមុខ៕

ប្រភព៖ CNBC

February 3, 2021

Jeff Bezos លាលែងពីតំណែង CEO របស់ Amazon

ការលាលែងពីតំណែង CEO របស់ Jeff Bezos នឹងត្រូវបានធ្វើឡើងនៅពេលដែលក្រុមហ៊ុន Amazon កំពុងស្ថិតក្នុងសម័យកាលរីកចម្រើនបំផុត។

សារព័ត៌មាន Bloomberg ទើបតែបានរាយការណ៍ថា ស្ថាបនិករបស់ Amazon គឺលោក Jeff Bezos នឹងចាកចេញពីតំណែង CEO របស់ក្រុមហ៊ុននេះនៅក្នុងត្រីមាសទីបី ឆ្នាំ 2021 ហើយអ្នកចូលមកជំនួសលោក Bezos នោះគឺ Andy Jassy ដែលកំពុងគ្រប់គ្រងផ្នែក cloud-computing របស់ Amazon។

Jassy វ័យ 53 ឆ្នាំ ជាច្រើនឆ្នាំមកនេះ ត្រូវបានគេយល់ថាជាមនុស្សម្នាក់ដែលមានសក្ដានុពលដែលអាចជំនួសលោក Bezos បាន។ លទ្ធភាពនេះកាន់តែត្រូវបានបញ្ជាក់ នៅពេលបេក្ខភាពដែលមានសក្ដានុពលម្នាក់ទៀតគឺ Jeff Wilke ដែលបច្ចុប្បន្នជានាយកផ្នែកអតិថិជន បានប្រកាសថានឹងចាកចេញពីក្រុមហ៊ុននេះ។

Bezos អាយុ 57 ឆ្នាំ បានដឹកនាំ Amazon អស់រយៈពេល 25 ឆ្នាំ រាប់ចាប់តាំងពីត្រូវបានបង្កើតឡើង។ ក្រោយចាកចេញពីតំណែង CEO លោក Bezos នឹងក្លាយជាប្រធានរបស់ក្រុមហ៊ុននេះ។

ការផ្លាស់ប្ដូរខាងលើ ត្រូវបានធ្វើឡើងចំពេលដែល Amazon កំពុងស្ថិតក្នុងស្ថានភាពល្អប្រសើរជាទីបំផុត ដោយសារតែ Covid-19។ Jassy ដែលបានបម្រើការនៅ Amazon ចាប់ពីឆ្នាំ 1997 ទំនងជានឹងដឹកនាំក្រុមហ៊ុនទៅតាមគន្លងបច្ចុប្បន្ន៕

ប្រភព៖ Bloomberg

February 3, 2021

ភ្ញាក់ដឹងខ្លួនឡើង ស្រាប់តែ Covid-19 រាលដាលពេញពិភពលោក ខណៈខ្លួនឯងអត់ដឹងអីសោះ

Joseph Flavill អាយុ 19 ឆ្នាំ មិនបានដឹងអ្វីសោះអំពី Covid-19 ដែលបាន និងកំពុងរាតត្បាតពេញពិភពលោក នៅពេលបានដឹងខ្លួនឡើងវិញក្រោយការសន្លប់រយៈពេល 10 ខែ ដោយសារគ្រោះថ្នាក់ចរាចរណ៍ បើទោះជាកំលោះរូបនេះបានឆ្លងវីរុសពីរលើកមកហើយក៏ដោយ។

កំលោះ Joseph Flavill ត្រូវបានរថយន្តបុកពេញ្មួយទំហឹងពេលកំពុងដើរនៅក្នុងទីរួមស្រុក Burton upon Trent ក្នុងតំបន់ Staffordshire ប្រទេសអង់គ្លេសកាលពីថ្ងៃទី 1 មីនា ឆ្នាំ 2020 ពោលគឺ 3 សប្ដាហ៍មុនពេលអង់គ្លេសដាក់បំរាមគោចរទូទាំងប្រទេសលើកដំបូង។ កំលោះនេះធ្លាក់ក្នុងសភាពបាត់បង់ស្មារតីអស់ជាច្រើនខែព្រោះត្រូវរបួសដល់ខួរក្បាល ប៉ុន្តែថ្មីៗនេះ Joseph ចាប់ផ្ដើមដឹងខ្លួន និងមានប្រតិកម្ម។

«ក្មួយខ្ញុំមិនដឹងអ្វីទាំងអស់អំពីរោគរាតត្បាតនៅពេលវាត្រូវសន្លប់ជាង 10 ខែមកនេះ។ ពេលនេះ វាចាប់ផ្ដើមដឹងខ្លួនឡើងវិញហើយ ប៉ុន្តែខ្ញុំមិនដឹងថា វាដឹងអ្វីខ្លះនោះទេ» Sally Flavill Smith ដែលជាម្ដាយមីងរបស់ Joseph រៀបរាប់។ «ខ្ញុំមិនប្រាកដថា Joseph យល់នូវអ្វីដែលយើងកំពុងតែឆ្លងកាត់ដែរ ឬយ៉ាងណា»។

Sally ឱ្យដឹងថា គ្រួសារបានព្យាបាលពន្យល់តាមរយៈការហៅទូរស័ព្ទជាវីដេអូថា ពួកគេមិនអាចមកនៅក្បែរ Joseph បាន ដោយសារតែបំរាមគោចរដើម្បីកាត់បន្ថយការឆ្លងរាលដាលនៃវីរុស Covid-19។ «ពេលអាក្មួយខ្ញុំដឹងខ្លួន វាមិនបានដឹងថា ហេតុអ្វីបានជាវានៅទីនោះ។ ពួកយើងបានព្យាយាមនិយាយបកស្រាយតាមទូរស័ព្ទ។

Joseph Flavill ជាមនុស្សស្វាហាប់ និងចូលចិត្តលេងកីឡា

Joseph បានចាប់ផ្ដើមកម្រើកដៃជើង បិទបើកភ្នែក និងញញឹម នៅពេលក្រុមគ្រួសារ និងមិត្តភក្ដិសួរនាំ។ អ្នកស្រី Sally និយាយថា ក្មួយរបស់គាត់អាចធ្វើតាមអ្វីដែលពួកគេបានស្នើ ដូចជាយកដៃប៉ះត្រចៀកឆ្វេងនិងស្ដាំង លើកដៃជើង និងឆ្លើយថាយល់ព្រម ឬមិនយល់ព្រម តាមរយៈការធ្មេច និងបើកភ្នែក។ ស្នាមញញឹមដំបូងរបស់ Joseph បានធ្វើឱ្យគ្រប់គ្នាស្រក់ទឹកភ្នែក។

Joseph ក៏ធ្លាប់បានឆ្លង Covid-19 ចំនួនពីរលើកក្នុងពេលសម្រាកព្យាបាលនៅមន្ទីរពេទ្យ ប៉ុន្តែបានជាសះស្បើយហើយ។ អ្នកស្រី Sharon ម្ដាយរបស់ Jeseph ធ្លាប់ទទួលបានការអនុញ្ញាតឱ្យចូលមកមើលកូនក្នុងថ្ងៃខួបកំណើតលើកទី 19 កាលពីខែធ្នូ ឆ្នាំ 2020 ប៉ុន្តែ ត្រូវរក្សាគម្លាត និងពាក់ឈុតការពារវីរុស។

Sally រៀបរាប់ប្រាប់ថា៖ «ពេលនោះ Joseph មិនដឹងអ្វីទាំងអស់ ហើយខ្ញុំគិតថា ម្ដាយរបស់វាបារម្ភខ្លាំងណាស់ ព្រោះមិនដឹងថា កូនប្រុសរបស់គាត់នៅស្គាល់គាត់ដែរ ឬអត់។ ម្ដាយ Joseph ត្រូវរង់ចាំអស់ជាច្រើនខែដើម្បីបានជួបកូនប្រុស»។

មុនពេលជួបគ្រោះថ្នាក់ Joseph គឺជាកំលោះដ៏ស្វាហាប់ និងចូលចិត្តលេងកីឡា។ ក្នុងយុទ្ធនាការស្វែងរកមូលនិធិដើម្បីជួយដល់ Joseph ក្រុមគ្រួសារទទួលបានប្រាក់ឧបត្ថម្ភជាង 30,000 ផោន (41,000 ដុល្លារអាមេរិក) សម្រាប់ការព្យាបាល និងថែទាំកូនប្រុសរបស់ពួកគេ៕

ប្រភព៖ Guardian

February 3, 2021

គេភ័យនឹងរដ្ឋប្រហារ ឯនាងជាគ្រូបង្វឹកកីឡា បែរជារាំយ៉ាងសង្ហាតាមចង្វាក់ភ្លេងទៅវិញ

នារីជនជាតិមីយ៉ានម៉ាម្នាក់មានឈ្មោះថា Wai កំពុងតែធ្វើឱ្យកក្រើកបណ្ដាញសង្គម ដោយសារតែវីដេអូដែលបង្ហាញថា នាងរាំតាមចង្វាក់ភ្លេង aerobic យ៉ាងក្លាហាន ក្នុងពេលកងទ័ពមីយ៉ានម៉ាកំពុងធ្វើរដ្ឋប្រហារ។

ក្រូបង្វឹកផ្នែកលំហាត់ប្រាណ ឈ្មោះ Khing Hnin Wai កាលពីថ្ងៃទី 1 មករា បានបង្ហោះវីដេអូនៅលើ Facebook ដែលបង្ហាញអំពីសកម្មភាពដែលនាងកំពុងរាំហាត់ប្រាណនៅខាងក្រៅអគារមួយ ក្នុងគ្រាដែលក្បួនរថយន្តរបស់កងទ័ពកំពុងធ្វើដំណើរ និងទិដ្ឋភាពរណាំងដែកកំពុងត្រូវបានដាក់បញ្ឈរក្រោយខ្នងរបស់នាង។ នេះក៏ជាពេលដែលកងទ័ពមីយ៉ានម៉ា កំពុងធ្វើរដ្ឋប្រហារ និងចាប់ខ្លួនទីប្រឹក្សារដ្ឋ លោកស្រី Aung San Suu Kyi និងប្រធានាធិបតី រួមនឹងថ្នាក់ដឹកនាំជាន់ខ្ពស់ជាច្រើនរូបទៀតរបស់រដ្ឋាភិបាល។

ក្នុងរយៈពេលប្រហែល 3 នាទី នាង Wai ហាក់មិនបានដឹងអំពីហេតុការណ៍មិនប្រក្រតីដែលកំពុងកើតឡើងនៅក្រោយខ្នង ហើយនាងនៅតែបន្តចាក់ក្បាច់រាំតាមចង្វាក់តន្ត្រីធ្វើព្រងើយ។ មនុស្សជាច្រើនមានការសង្ស័យអំពីវីដេអូនេះ ប៉ុន្តែ ក្រោយមក នាង Wai បានបញ្ជាក់ឱ្យដឹងថា នាងពិតជាគ្រូបង្វឹកដែលបានថតវីដេអូរាំតាមចង្វាក់ aerobic នៅទីតាំងនេះប្រាកដមែន។

វីដេអូរបស់ Wai ដែលបានបង្ហោះនៅលើ Facebook ទទួលបានការចុចចូលចិត្តជាង 36,000 លើក និងមតិជាង 1,600 ដង រួមនឹងការចែករំលែកជាង 12,000 ដងផងដែរ។

សូមបញ្ជាក់ថា គណបក្សសម្ព័ន្ធដើម្បីប្រជាធិបតេយ្យ (NLD) ដែលកំពុងកាន់អំណាចរបស់ទីប្រឹក្សារដ្ឋនៃប្រទេសមីយ៉ានម៉ា លោកស្រី Aung San Suu Kyi ទទួលបាន 346 ក្នុងចំណោមអាសនៈចំនួន 412 នៅសភាជាតិ ក្រោយការបោះឆ្នោតនៅចុងឆ្នាំ 2020។ ប៉ុន្តែ កងទ័ពមីយ៉ានម៉ាបានចោទថា មានការលួចបន្លំសន្លឹកឆ្នោតចំនួនជាង 10 លានករណី និងស្នើឱ្យគណកម្មការរៀបចំការបោះឆ្នោត ប្រកាសបញ្ជីឈ្មោះអ្នកបោះឆ្នោតដើម្បីពិនិត្យឡើងវិញ ប៉ុន្តែត្រូវបានបដិសេធ។

ប្រការខាងលើនេះហើយ ជាលេសមួយដែលត្រូវបានកងទ័ពប្រើប្រាស់ដើម្បីរដ្ឋប្រហារ និងបានប្រកាសអាសន្នទូទាំងប្រទេសដើម្បីគ្រប់គ្រងអំណាចក្នុងរយៈពេលមួយឆ្នាំ។ ក្រោយមក កងទ័ពក៏បានដកតំណែងរដ្ឋមន្ត្រី និងអនុរដ្ឋមន្ត្រីចំនួន 24 រូបរបស់បក្ស NLD ហើយបានតែងតាំងជំនួសដោយមនុស្សចំនួន 11 នាក់ ឱ្យកាន់កាប់ក្រសួងមួយចំនួន ដូចជា ក្រសួងហិរញ្ញវត្ថុ សុខាភិបាល ព័ត៌មាន ការបរទេស និងក្រសួងការពារជាតិ រួមនឹងក្រសួងមហាផ្ទៃនិងការពារព្រំដែនផងដែរ៕

https://www.youtube.com/watch?v=Uc-v7y1wDDk

ប្រភព៖ Sputnik

February 2, 2021

Category: សង្គម និងសេដ្ឋកិច្ច