សង្គម និងសេដ្ឋកិច្ច - La Reine Media

មហាសេដ្ឋិនីវ័យក្មេងបំផុត ប្រចាំទឹកដីអាមេរិក៖ ធ្វើជំនួញជាមួយជំនាញនៅក្នុងចំណូលចិត្តនឹងជួយឱ្យយើងជោគជ័យ

នាង Whitney Wolfe Herd អាយុ 31 ឆ្នាំ កាលពីដើមខែកុម្ភៈនេះ បានក្លាយជាមហាសេដ្ឋិនីរកស៊ីមានបានដោយខ្លួនឯងក្នុងវ័យនៅក្មេងជាងគេ ក្រោយពីកម្មវិធី (app) ណាត់ជួបគ្នា ឈ្មោះ Bumble ដែលនាងបានបង្កើតឡើង ត្រូវបានធ្វើ IPO។

យោងតាមឯកសារដែលបានផ្ញើទៅកាន់ផ្សារហ៊ុន ជាមួយនឹងភាគហ៊ុន 11.6% នៅក្នុងក្រុមហ៊ុន នាង Wolfe Herd បច្ចុប្បន្នមានទ្រព្យ 1.5 ពាន់លានដុល្លារ និងជាមហាសេដ្ឋិនីវ័យក្មេងបំផុតនៅសហរដ្ឋអាមេរិក។ នាងក៏ជា CEO ក្មេងបំផុតដែលបានដឹកនាំក្រុមហ៊ុនចូលផ្សារហ៊ុននៅប្រទេសនេះផងដែរ។

Bumble គឺជាកម្មវិធីណាត់ជួបគ្នាធំទីពីរដែលបានធ្វើ IPO (បោះផ្សាយលក់មូលបត្រជាសាធារណៈលើកដំបូង) បន្ទាប់ពី Match Group ដែលជាក្រុមហ៊ុនមេរបស់ Match.com ឆ្នាំ 2015។ Match Group ក៏ជាអ្នកកាន់កាប់ Tinder និងធ្លាប់ព្យាយាមទិញ Bumble កាលពីឆ្នាំ 2017 ក្នុងតម្លៃ 450 លានដុល្លារអាមេរិក។ បច្ចុប្បន្ន តម្លៃមូលធនទីផ្សាររបស់ Bumble ត្រូវបានកំណត់ត្រឹម 8.3 ពាន់លានដុល្លារ។ ក្រុមហ៊ុននេះរកបានចំណូល 417 លានដុល្លារក្នុងរយៈពេល 9 ខែដើមឆ្នាំ 2020 កើនឡើងច្រើនធៀបនឹង 363 លានដុល្លារក្នុងដំណាក់កាលដូចគ្នាកាលពីឆ្នាំ 2019។

នាង Wolfe Herd បានបង្កើត Bumble ក្នុងឆ្នាំ 2014 ក្រោយពីបានប្ដឹង Tinder (ក្រុមហ៊ុនចាស់របស់ខ្លួន) ដោយសារតែបញ្ហាបៀតបៀនកេរ្ដិ៍ខ្មាស។ Wolfe Herd បានចោទប្រកាន់ថា អតីតចៅហ្វាយរបស់នាង គឺលោក Justin Mateen បានគំរាមកំហែង និងដកតំណែងសហស្ថាបនិក Tinder របស់នាង។ Tinder ក្រោយមកក៏បានបដិសេធ ហើយបញ្ហាក៏ត្រូវបានដោះស្រាយយ៉ាងឆាប់រហ័ស និងប្រកបដោយអាថ៌កំបាំង។

ក្រោយពីបានចាកចេញពី Tinder នាង Wolfe Herd បានសហការជាមួយមហាសេដ្ឋី Andrey Andreev (ជាអ្នកដែលទទួលបានជោគជ័យក្នុងការកសាងកម្មវិធីណាត់ជួបនៅក្នុងទីផ្សារអឺរ៉ុប និងអាមេរិកឡាទីន) ដើម្បីបង្កើត Bumble ក្នុងឆ្នាំ 2014។ នៅលើថ្នាល Bumble មានតែស្ត្រីប៉ុណ្ណោះដែលមានសិទ្ធិអាទិភាព។ ប្រការនេះគឺផ្ទុយពី Tinder រួមនឹងកម្មវិធីណាត់ជួបដទៃទៀត។

Andreev ចាកចេញពីក្រុមហ៊ុនកាលពីឆ្នាំ 2019 ក្រោយពី Forbes បានចុះផ្សាយការស៊ើបអង្កេតមួយដែលចោទប្រកាន់ថា មានការរើសអើងស្ត្រីភេទនៅក្នុងការិយាល័យនាទីក្រុងឡុងដ៍ ជាកន្លែងដែល Andreev ទទួលខុសត្រូវ។ បញ្ហានេះគឺដើរបញ្ច្រាសនឹងគោលការណ៍របស់ Bumble។ ក្រុមហ៊ុនបានធ្វើការស៊ើបអង្កេត និងបានប្រកាសថា ព័ត៌មាននេះមិនពិត។

ឆ្នាំ 2020 Blackstone Group បានទិញភាគហ៊ុនរបស់លោក Andreev នាំឱ្យតម្លៃមូលធនទីផ្សាររបស់ Bumble កើនដល់ 3 ពាន់លានដុល្លារអាមេរិក។ Bumble គ្រប់គ្រងទាំងកម្មវិធីណាត់ជួបមួយទៀតដែលមានឈ្មោះថា Badoo។ បច្ចុប្បន្ន app ទាំងពីរនេះមានវត្តមាននៅក្នុងប្រទេស និងដែនដីចំនួន 150 ក្នុងពិភពលោក និងមានអ្នកប្រើប្រាស់ជាង 40 លាននាក់ជារៀងរាល់ខែ។

លោក Andrey Andreev និងនាង Whitney Wolfe Herd

វិថីទៅកាន់ជោគជ័យរបស់ Wolfe Herd មិនមែនជារឿងងាយស្រួលឡើយ។ ប៉ុន្តែ នាងយល់ថា គ្រប់គ្នាអាចចាប់ផ្ដើមធ្វើជំនួញ និងជោគជ័យបានដូចគ្នា។ «ដំបូង ចូរស្វែងរកឱ្យឃើញនូវចំណង់ចំណូលចិត្តផ្ទាល់ខ្លួន។ បើសិនជាអ្នកពិតជាមានចំណេះដឹងក្នុងវិស័យណាមួយ អ្នកនឹងរកឃើញវិធីដើម្បីធ្វើជំនួញ» នាង Wolfe Herd បានប្រាប់ CNBC ដូច្នេះ។ នាងបន្តថា៖ «ឧទាហរណ៍ អ្នកគឺជាចុងភៅឆ្នើមម្នាក់ ដូច្នេះ ចូរបង្កើត blog មួយ និងនិយាយអំពីវិធីចម្អិតអាហារ ហើយចាប់ផ្ដើមលក់រូបមន្ត»។

កាលពីឆ្នាំ 2017 Wolfe Herd ត្រូវបាន Forbes បញ្ចូលឈ្មោះទៅក្នុងបញ្ជី 30 Under 30 នៅក្នុងវិស័យបច្ចេកវិទ្យាសម្រាប់ឯកជនភាព (Consumer technology)។ Bumble ក៏បានធ្វើឱ្យមានការភ្ញាក់ផ្អើលខ្លាំងនៅក្នុងថ្ងៃជួញដូរដំបូង នៅពេលមូលបត្របានឡើងថ្លៃជិតទ្វេដងនៃតម្លៃ IPO៕

ប្រភព៖ CNBC, Forbes
ប្រែសម្រួល៖ បុត្រា

February 23, 2021

ក្រុមហ៊ុន OPPO ប្រកាសចេញផលិតផលបច្ចេកវិទ្យាសំខាន់2 ក្នុងកម្មវិធី MWC Shanghai 2021

ក្រុមហ៊ុន OPPO ដែលជាក្រុមហ៊ុនផលិតឧបករណ៍វៃឆ្លាត បានប្រារព្ធកម្មវិធី បង្ហាញអំពីគំនិត និងបច្ចេកវិទ្យាថ្មីៗ នៅក្នុងព្រឹត្តិការណ៍ទូរស័ព្ទពិភពលោក MWC Shanghai 2021 កាលពីថ្ងៃទី22 កុម្ភៈ ឆ្នាំ2021 នៅទីក្រុងហ្សិនជិន គឺថ្ងៃម្សិលមិញនេះឯង។

ក្នុងនោះផងដែរ គេសង្កេតឃើញមានផលិតផលបច្ចេកវិទ្យាថ្មី2 ដែលក្រុមហ៊ុនបានដាក់បង្ហាញ ចាប់ពីថ្ងៃទី23 ដល់ 25 ខែកុម្ភៈ គឺបច្ចេកវិទ្យា 5G បំពាក់លើស្មាតហ្វូនម៉ូដែល OPPO X 2021 និងជំនាន់ចុងក្រោយបង្អស់នៃបច្ចេកវិទ្យាសាកថ្មល្បឿនលឿន125W ( VOOC) រួមទាំងឧបករណ៍ IoT និងបច្ចេកវិទ្យាផ្សេងទៀត ដែលក្រុមហ៊ុនបានចំណាយថវិកា និងពេលវេលាសិក្សាកន្លងមក។

សម្រាប់បច្ចេកវិទ្យា 5G mmWave របស់ OPPO បានសាកល្បងជោគជ័យកាលពីឆ្នាំ2020 នឹងត្រូវយកមកបំពាក់លើឧបករណ៍វៃឆ្លាតមួយ ឈ្មោះថា CPE ដែលក្រុមហ៊ុននឹងបង្ហាញជូនលម្អិតបន្ថែមទៀតនៅឆ្នាំនេះ។

ដូចនេះ សូមកុំភ្លេចរង់ចាំតាមដានការប្រកាសចេញ ពីរបកគំហើញថ្មីរបស់ OPPO ក្នុងកម្មវិធី MWC Shanghai 2021 នៅលើអនឡាញបាន។ ជម្រាបជូនដែរថា បច្ចេកវិទ្យាលេចធ្លោខ្លាំងជាងគេ កាលពីឆ្នាំមុនគឺ fast charging technology 65W និងរបកគំហើញ 5G mmWave របស់ក្រុមហ៊ុន OPPO តែម្ដង៕

ទស្សនាវីដេអូសង្ខេបខ្លីក្នុងកម្មវិធី Oppo Inno day ឆ្នាំមុន៖

February 23, 2021

«ជ្រុលដៃ» សរសេរថា «តម្លៃ Bitcoin កំពុងឡើងខ្ពស់ពេកហើយ» លោក Musk ត្រូវធ្លាក់ពីតំណែង «អ្នកមានជាងគេក្នុងពិភពលោក»

តម្លៃទ្រព្យសរុបរបស់ CEO នៃក្រុមហ៊ុន Tesla លោក Elon Musk បានធ្លាក់មកនៅត្រឹម 183.4 ពាន់លានដុល្លារ ឈរលំដាប់លេខពីរក្នុងបញ្ជីចំណាត់ថ្នាក់អ្នកមានជាងគេក្នុងពិភពលោក បន្ទាប់ពីកំពូលមហាសេដ្ឋី Jeff Bezos។

យោងតាមសារព័ត៌មាន Bloomberg មហាសេដ្ឋីអាមេរិកដើមកំណើតអាហ្វ្រិកខាងត្បូង លោក Elon Musk លែងនៅជាអ្នកមានជាងគេបង្អស់ក្នុងពិភពលោកទៀតហើយ នៅពេលមូលបត្ររបស់ក្រុមហ៊ុនផលិតរថយន្តអគ្គិសនី Tesla ធ្លាក់ថ្លៃ 8.6% នៅក្នុងការជួញដូរកាលពីម្សិលមិញ (22កុម្ភៈ 2021) ស្មើនឹង 15.2 ពាន់លានដុល្លារអាមេរិក។

មូលបត្ររបស់ Tesla បានធ្លាក់ថ្លៃខ្លាំង ក្រោយពីលោក Musk បានបង្ហោះសារមួយនៅលើ Twitter ថា រូបិយវត្ថុ Bitcoin និង Ethereum ហាក់កំពុងឡើងថ្លៃជ្រុល។ ការបញ្ចេញមតិដែលប្រកបដោយ «ភាពរសើប» នេះ ត្រូវបានធ្វើឡើងក្រោយពី Tesla បានទិញ Bitcoin រហូតដល់ 1.5 ពាន់លានដុល្លារ និងបាននាំឱ្យក្រុមអ្នកវិនិយោគមានការព្រួយបារម្ភ។

ក្រោយព្រឹត្តិការណ៍ខាងលើ តម្លៃសរុបនៃទ្រព្យរបស់មហាសេដ្ឋី Elon Musk បានធ្លាក់ចុះមកនៅត្រឹម 183.4 ពាន់លានដុល្លារអាមេរិក ឈរពីក្រោយ CEO របស់ Amazon លោក Jeff Bezos ដែលបច្ចុប្បន្នមានទ្រព្យសរុប 186.3 ពាន់លានដុល្លារ។

ការប្រែប្រួលនៃតម្លៃមូលបត្ររបស់ Tesla និងតម្លៃរបស់រូបិយវត្ថុអេឡិចត្រូនិក Bitcoin រាប់ចាប់ពីថ្ងៃទី 4 ខែមករា ឆ្នាំ 2021 (គិតជា %)

ក្នុងមួយរយៈពេលខ្លីកន្លងទៅនេះ កំពូលមហាសេដ្ឋីបច្ចេកវិទ្យាទាំងពីររូបខាងលើ បានប្ដូរតំណែងអ្នកមានជាងគេក្នុងពិភពលោកទៅឱ្យគ្នាជាបន្តបន្ទាប់។ មហាសេដ្ឋី Elon Musk ធ្លាប់ដណ្ដើមបានតំណែងនេះជាលើកទីពីរពីលោក Jeff Bezos កាលពីដើមខែកុម្ភៈ ឆ្នាំ 2021 នៅពេលគម្រោង SpaceX របស់លោក ប្រមូលទុនបាន 850 លានដុល្លារ ដែលនាំឱ្យក្រុមហ៊ុននេះ ត្រូវបានកំណត់តម្លៃឡើងដល់ 74 ពាន់លានដុល្លារអាមេរិក។

អំពី Jeff Bezos វិញ លោកធ្លាប់បានគ្រងតំណែងជាអ្នកមានជាងគេបំផុតក្នុងពិភពលោកអស់រយៈពេល 3 ឆ្នាំបន្តបន្ទាប់ នៅក្នុងបញ្ជីចំណាត់ថ្នាក់របស់ Bloomberg Billionaires Index មុនពេលត្រូវ Elon Musk ដណ្ដើមបានលើកដំបូងកាលពីខែមករា 2021។

ទ្រព្យសម្បត្តិរបស់លោក Elon Musk ឡើងចុះមិនប្រក្រតី ដោយសារតែតម្លៃរបស់ប្រាក់អេឡិចត្រូនិក Bitcoin ប្រែប្រួលមិនទៀង ព្រោះតែដែលក្រុមហ៊ុនផលិតរថយន្ត Tesla របស់លោកបានទិញរូបិយវត្ថុ Bitcoin នេះ ចំនួន 1.5 ពាន់លានដុល្លារ៕

ប្រភព៖ Bloomberg

February 23, 2021

NASA បញ្ចេញវីដេអូបង្ហាញអំពីការចុះចតរបស់យានស្រាវជ្រាវលើផ្កាយព្រះអង្គារ និងសំឡេងដំបូងពីពិភពក្រហមនេះ

ទីភ្នាក់ងារអវកាសអាមេរិក (NASA) កាលពីថ្ងៃទី 22 កុម្ភៈ បានបញ្ចេញវីដេអូដំបូងបង្ហាញអំពីទិដ្ឋភាពនៃការចុះចតរបស់យានស្រាវជ្រាវ Perseverance ទៅលើពិភពអង្គារ រួមនឹងសំឡេងដំបូងដែលយាននេះថតបានពីពិភពមួយនេះ។

ទិដ្ឋភាពយានដំណើរស្វ័យប្រវត្តិ Perseverance ដែលបានចុះចតលើដីពិភពព្រះអង្គារកាលពីថ្ងៃទី 18 កុម្ភៈនេះ គឺជារូបភាពដ៏អស្ចារ្យបំផុតដែលថតបាននៅលើផ្កាយព្រះអង្គារ ហើយវាផ្ដល់នូវបទពិសោធន៍ថ្មីដែលមិនធ្លាប់បានឃើញពីមុនមក។

រួមជាមួយនឹងវីដេអូ ក៏មានអូឌីយ៉ូផងដែរ ដែលលាតត្រដាងអំពីសំឡេងខ្យល់បក់នៅលើផ្ទៃរបស់ភពអង្គារ ដែលយានស្រាវជ្រាវថតបានក្នុងគ្រាដំបូងនៃការចុះចតរបស់ខ្លួន។

Thomas Zurbuchen អនុប្រធានផ្នែកគ្រប់គ្រងរបស់គណៈកម្មការនាយកនៃបេសកកម្មវិទ្យាសាស្ត្ររបស់ NASA បានឱ្យដឹងថា ទិដ្ឋភាព និងសំឡេងថ្មីគឺជា «អ្វីដែលអ្នកអាចថតបាននៅពេលចុះចតលើពិភពអង្គារដោយមិនចាំបាច់ស្លៀកពាក់ឈុតទប់ទល់នឹងសម្ពាធ»។

ប្រភព៖ NASA/REUTERS/ABC News

February 23, 2021

ទើបតែទិញ Bitcoin តម្លៃ 1.5ពាន់លានដុល្លារ ពេលនេះ ក្រុមហ៊ុនផលិតរថយន្ត Tesla ចំណេញរាប់ពាន់លានដុល្លារទៅហើយ ប៉ុន្តែ…

ក្រុមហ៊ុនផលិតរថយន្តអគ្គិសនីរបស់មហាសេដ្ឋី Elon Musk រកបានប្រាក់ចំណេញ 1 ពាន់លានដុល្លារ ដោយសារបានវិនិយោគទៅលើ Bitcoin ក្នុងគ្រាដែលតម្លៃរបស់ប្រាក់អេឡិចត្រូនិកនេះកើនឡើងខ្ពស់យ៉ាងឆាប់រហ័ស។

យោងតាមទំព័រ Business Insider អ្នកវិភាគ Dan Ives មកពីក្រុមហ៊ុន Wedbush Securities បានលើកឡើងដូចខាងលើនេះ កាលពីថ្ងៃទី 21 កុម្ភៈ។ លោក Dan ឱ្យដឹងថា៖ «ការគណនារបស់យើងបង្ហាញថា Tesla មកដល់ពេលនេះបានចំណេញប្រហែល 1 ពាន់លានដុល្លារក្នុងខែកន្លងទៅ ដោយសារវិនិយោគទៅលើ Bitcoin ដែលជារូបិយវត្ថុអេឡិចត្រូនិកកំពុងឡើងថ្លៃខ្ពស់បំផុត និងមានតម្លៃមូលធនទីផ្សារ 1 លានលាន (1,000,000,000,000)ដុល្លារអាមេរិក»។

លោក Dan ព្យាករថា នាពេលខាងមុខ Tesla នឹងរកបានប្រាក់ពី Bitcoin ច្រើនជាងពីរថយន្តអគ្គិសនីរបស់ខ្លួនទៅទៀត។

ដើមខែនេះ Tesla បានប្រកាសថា បានវិនិយោគ 1.5 ពាន់លានដុល្លារទៅលើ Bitcoin ហើយថា នឹងអនុញ្ញាតឱ្យអតិថិជនរបស់ខ្លួន ប្រើប្រាស់ប្រាក់ Bitcoin ដើម្បីទូទាត់ទំនិញរបស់ Tesla ផងដែរ។ ក្រោយការប្រកាសខាងលើ Bitcoin បានឡើងថ្លៃជិត 72% ខណៈតម្លៃមូលធនទីផ្សារក៏បានកើនដល់ 1 លានលានដុល្លារអាមេរិក។

Tesla បានទិញ Bitcoin តាំងពីខែមករា ក្នុងគ្រាដែលតម្លៃរបស់រូបិយវត្ថុអេឡិចត្រូនិកនេះ ត្រូវបានជួញដូរក្នុងរង្វង់ពី 30,000 ដល់ 40,000 ដុល្លារ/bitcoin។

ពាណិជ្ជសញ្ញានៃក្រុមហ៊ុនផលិតរថយន្ត Tesla (ឆ្វេង) និង Bitcoin

ក្រុមហ៊ុន Tesla មិនបានបង្ហើបឱ្យដឹងច្បាស់អំពីពេលវេលា និងតម្លៃ Bitcoin ដែលខ្លួនបានទិញកន្លងមកនេះទេ ហើយគេក៏មិនទាន់ដឹងថា Tesla បានលក់ Bitcoin ខ្លះ ឬយ៉ាងណានៅឡើយ។

អ្នកវិភាគខាងលើនិយាយថា មានក្រុមហ៊ុនសាធារណៈមិនដល់ 5% ដែលនឹងដើរតាមគន្លងរបស់ Tesla ដោយសារតែបញ្ហាផ្លូវច្បាប់របស់រូបិយវត្ថុនេះមិនទាន់មានភាពច្បាស់លាស់។

លោក Jeffrey Halley អ្នកវិភាគទីផ្សារជាន់ខ្ពស់ប្រចាំក្រុមហ៊ុន Oanda Asia Pacific Pte យល់ថា ការឡើងថ្លៃយ៉ាងគំហុករបស់ប្រាក់ Bitcoin គឺដោយសារកត្តាជំរុញពីក្រុមអ្នកវិនិយោគរយៈពេលខ្លីតែមួយគត់។

ចំណែកក្រុមអ្នកជួញដូរក៏មានការព្រួយបារម្ភអំពីលទ្ធភាពដែលរដ្ឋាភិបាលរបស់លោក Biden នឹងព្យាយាមកែសម្រួលវិស័យរូបិយវត្ថុអេឡិចត្រូនិកនេះដែរ ដែលនេះអាចបង្កសម្ពាធដល់ផ្លូវចិត្តរបស់អ្នកវិនិយោគ។

រដ្ឋមន្ត្រីក្រសួងហិរញ្ញវត្ថុអាមេរិក Janet Yellen ថ្មីៗនេះ បានសម្ដែងការព្រួយបារម្ភថា ប្រាក់ឌីជីថល ឬប្រាក់អេឡិចត្រូនិក អាចត្រូវបានប្រើប្រាស់ដើម្បីគាំទ្រដល់សកម្មភាពល្មើសច្បាប់។ ដូច្នេះ រដ្ឋាភិបាលអាមេរិក ត្រូវការពិនិត្យរកវិធីដើម្បីកាត់បន្ថយការប្រើប្រាស់ប្រាក់ប្រភេទនេះ និងត្រូវធានាឱ្យបានប្រាកដថា សកម្មភាពលាងលុយនឹងមិនកើតមានតាមរយៈរូបិយវត្ថុអេឡិចត្រូនិក៕

ប្រភព៖ Business Insider

February 23, 2021

មនុស្សរាប់ពាន់នាក់តាមដានទស្សនាផ្កាដ៏កម្រមួយប្រភេទ រីកក្នុងរយៈពេល 12ម៉ោង

មនុស្សរាប់ពាន់នាក់មកពីប្រទេសនានា បានតាមដានទស្សនាផ្ទាល់នូវទិដ្ឋភាពផ្កាមួយប្រភេទដ៏កម្រ ដែលមានឈ្មោះជាភាសាអង់គ្លេសថា Moonflower (ផ្កាយចន្ទ) រីកក្នុងរយៈពេល 12ម៉ោង។

សារព័ត៌មាន Guardian បានរាយការណ៍អំពីដំណើរការនៃការរីករបស់ផ្កា Moonflower (selenicereus wittii) នេះ ដែលត្រូវបានចាក់ផ្សាយតាមរយៈទំព័រ Youtube Botanic Garden របស់សាកលវិទ្យាល័យ Cambridge នៃប្រទេសអង់គ្លេស។

Selenicereus wittii រីកនៅម៉ោងប្រហែលជា 3 រសៀល ថ្ងៃទី 20 កុម្ភៈ ឆ្នាំ 2021 និងបញ្ចប់នៅវេលាអរុណរះថ្ងៃបន្ទាប់។

បុប្ផាពណ៌សនេះ ដំបូងសាយគន្ធាក្រអូប ផ្អែម ឈ្ងុយឈ្ងប់ ប៉ុន្តែ ក្រោយរយៈពេល 2 ម៉ោង វាបែរជាងាកមកបញ្ចេញក្លិនយ៉ាងអាក្រក់។ ផ្កានេះ រីកតែនៅក្នុងតំបន់ព្រៃ Amazon ដែលសម្បូរទឹកភ្លៀងប៉ុណ្ណោះ។

ផ្កាប្រភេទនេះ ត្រូវបាននាំយកពីឧទ្យាន Bonn នៅប្រទេសអាល្លឺម៉ង់ ទៅកាន់សាកលវិទ្យាល័យ Cambridge កាលពីឆ្នាំ 2015។ Selenicereus wittii មានប្រភពពីកោះ Sumatra ប្រទេសឥណ្ឌូនេស៊ី៕

ប្រភព៖ Guardian

February 23, 2021

QR Code «ទប់ស្កាត់ Covid-19» មានស្ថាប័នរដ្ឋនិងឯកជនជាង1ម៉ឺនកន្លែង កំពុងប្រើ

សណ្ឋាគារ ភោជនីយដ្ឋាន រោងចក្រ និងគ្រឹះស្ថានសាធារណៈនិងឯកជន ចំនួន 10,366 ទីតាំង បានចុះឈ្មោះបង្កើត QR Code ដើម្បីចូលរួមទប់ស្កាត់ការឆ្លងរាលដាលនៃវីរុស Covid-19 គិតត្រឹមរសៀលថ្ងៃទី 22 កុម្ភៈ 2021 នេះបើតាមក្រសួងប្រៃសណីយ៍ និងទូរគមនាគមន៍កម្ពុជា។

ប្រព័ន្ធបច្ចេកវិទ្យា QR Code «ទប់ស្កាត់ជំងឺ Covid-19 ឬ Stop Covid» ត្រូវបានដាក់ឱ្យប្រើប្រាស់កាលពីថ្ងៃទី 20 ខែកុម្ភៈ ក្រោយពីកម្ពុជាមានករណីឆ្លងក្នុងសហគមន៍ជាលើកទីពីរ។ សាធារណជនអាចស្កេន QR Code នេះ នៅពេលចូលទៅកាន់កន្លែងដែលមានមនុស្សច្រើន រួចនឹងទទួលបានដំណឹងយ៉ាងឆាប់រហ័ស បើសិនទីតាំងនោះមានករណីឆ្លង Covid-19។ ក្រសួងប្រៃសណីយ៍ អះអាងថា QR Code នេះ នឹងជួយបង្ការហានិភ័យនៃឆ្លងរាលដាលនៃវីរុស Covid-19 នៅក្នុងសហគមន៍។

ក្រសួងបានឱ្យដឹងថា គិតមកដល់ថ្ងៃទី 22 កុម្ភៈនេះ មានការស្កេនចំនួន 107,696 ដង នៅតាមសណ្ឋាគារ ភោជនីយដ្ឋាន រោងចក្រ និងគ្រឹះស្ថានសាធារណៈនិងឯកជន សរុបចំនួន 10,366 ទីតាំងដែលបានចុះឈ្មោះបង្កើត QR Code ដើម្បីចូលរួមទប់ស្កាត់ការឆ្លងរាលដាលនៃវីរុស Covid-19។

អ្នកនាំពាក្យក្រសួងប្រៃសណីយ៍ និងទូរគមនាគមន៍ លោក មាស ប៉ូ បានឱ្យដឹងថា លោកមានការជឿជាក់ខ្លាំងចំពោះការដាក់ឱ្យប្រើប្រាស់ QR Code នេះ។ លោកបន្ថែមថា គ្រប់គ្នាត្រូវតែប្រើ QR Code នេះ ដើម្បីបានដឹងអំពីដំណើររបស់បុគ្គលនីមួយ។ នៅពេលមានបុគ្គលណាមួយមានជំងឺ Covid-19 អាជ្ញាធរនឹងមានភាពងាយស្រួលក្នុងការតាមរក តាមរយៈទិន្នន័យដែលបានកត់ត្រាដោយ QR Code នេះ៕

February 22, 2021

ក្រោយរកឃើញអាថ៌កំបាំងនៃការចេញលទ្ធផលឆ្នោត គណិតវិទូម្នាក់រកបាន26លានដុល្លារ បន្ទាប់ពីលេងឆ្នោត10ឆ្នាំ

ក្រោយការចំណាយពេលអស់ជាច្រើនថ្ងៃដើម្បីគណនាអំពីវិធីដែលអាចនាំឱ្យត្រូវឆ្នោត ជាចុងក្រោយ គណិតវិទូអាយុ 64 ឆ្នាំ បានរកឃើញចន្លោះប្រហោងក្នុងប្រព័ន្ធចេញលេខឆ្នោតរបស់រដ្ឋ ដែលនេះបានជួយឱ្យលោកត្រូវឆ្នោតជាបន្តបន្ទាប់ក្នុងរយៈពេលយ៉ាងយូរ រហូតដល់បានប្រាក់ជាង 26 លានដុល្លារអាមេរិក។

ព្រឹកមួយនៃថ្ងៃចុងសប្ដាហ៍ ដែលជាថ្ងៃបើកទំព័រថ្មីដ៏គាប់ប្រសើរនៃជីវិតគ្រួសារមួយគ្រួនៅសហរដ្ឋអាមេរិក។ អ្នកស្រី Marge Selbee បានឆុងកាហ្វេយកទៅឱ្យស្វាមីដែលកំពុងធ្វើកិច្ចការម្យ៉ាងដែលគាត់មិនធ្លាប់បានធ្វើទាល់តែសោះ នោះគឺការគណនាលេខដ៏ស្មុគស្មាញនៅលើក្រដាសដែលទំនងជាមិនមានអ្នកណាអាចមើលយល់។

ឆ្ងល់ពេក អ្នកស្រី Marge ជាភរិយាក៏បានសួរ៖ «បងកំពុងធ្វើអ្វីហ្នឹង?»។

ស្វាមីអ្នកស្រីក៏ងាកមករក ហើយនិយាយថា៖ «បងគិតថា បងទើបតែបានរកឃើញវិធី «ហែក» ប្រព័ន្ធចេញលទ្ធផលឆ្នោតរបស់រដ្ឋ Michigan»។

អ្នកស្រី Marge ញញឹម ហើយក៏មិនបានគិតអ្វីនោះដែរ។ ប៉ុន្តែ ក្រោយពីអ្នកស្រីញ៉ាំកាហ្វេអស់ពីពែង ភ្លាមនោះ Jerry ដែលជាស្វាមី ក៏បានមកអង្គុយក្បែរ និងបង្ហាញអាថ៌កំបាំងដ៏អស្ចារ្យដែលមានតម្លៃឡើងដល់ 26 លានដុល្លារអាមេរិក។

រូបរាងខាងក្រៅរបស់លោក Jerry មើលទៅដូចធម្មតាណាស់ ប៉ុន្តែតាមពិត គាត់គឺជាអនុបណ្ឌិតផ្នែកគណិតវិទ្យា។ លោកមានបញ្ញាយ៉ាងពិសេសតាំងពីនៅជាកុមារ។

ពុំមានអ្នកណាម្នាក់អាចនឹកស្មានដល់ថា គ្រួសារដែលមិនចេះផឹកស្រា ជក់បារី ឬលេងល្បែងមួយនេះ បែរជាធ្វើរឿងរ៉ាវមួយដ៏មហាអស្ចារ្យយ៉ាងដូច្នេះសោះ។

លោក Jerry Selbee ធ្លាប់ធ្វើការក្នុងវិស័យលក់ទំនិញឱ្យរោងចក្រ និងការិយាល័យ នៅមុនពេលលោកធុញធប់នឹងការងារស៊ីឈ្នួលទាំងនេះ។ ត្រូវចិញ្ចឹមប្រពន្ធ និងកូន 6 នាក់ លោក Jerry Selbee ក៏បានសម្រេចចិត្តបើកហាងទំនើបតូចមួយនៅតំបន់ Evart រដ្ឋ Michigan (សហរដ្ឋអាមេរិក)។ ពួកគេមិនបានគិតថានឹងក្លាយជាសេដ្ឋីនោះឡើយ។

ក្រោយមក គ្រួសារនេះបានងាកមកធ្វើជាតំណាងចែកចាយរបស់ក្រុមហ៊ុនឆ្នោតនៃទីក្រុង Evart។ អតិថិជនរបស់គ្រួសារនេះជាច្រើនដែលនៅឆ្ងាយៗ តែងនាំគ្នាមកទិញឆ្នោតដែលលោកកំពុងលក់។

លោក Jerry Selbee ទំនងជាយល់ច្បាស់អំពីតួលេខជាងអ្នកណាៗទាំងអស់។ ដើម្បីជាការកំសាន្ត លោកតែងតែស្វែងយល់អំពីទិន្នន័យនៅលើខ្នងសន្លឹកឆ្នោត។

ឆ្នាំ 2003 រង្វាន់ឆ្នោតមួយប្រភេទត្រូវបានក្រុមហ៊ុនឆ្នោតបង្កើតឡើង និងមានឈ្មោះថា Winfall។ លក្ខខណ្ឌដើម្បីឈ្នះគឺសាមញ្ញណាស់៖ អ្នកជ្រើសរើសលេខចាប់ពី 1 ដល់ 49។ បើសិនត្រូវមួយលេខ ពីរលេខ បីលេខ ឬបួនលេខ ប្រាក់រង្វាន់នឹងត្រូវកើនឡើង។ ប៉ុន្តែ បើសិនជាត្រូវទាំង 6 លេខ អ្នកនឹងឈ្នះយ៉ាងតិច 2 ពាន់លានដុល្លារ។

បើសិនពុំមានអ្នកត្រូវ តម្លៃនៃប្រាក់រង្វាន់ក៏នឹងត្រូវកើនឡើងជារៀងរាល់សប្ដាហ៍។ ក្រោយការចេញលទ្ធផលឆ្នោតបាន 6 សប្ដាហ៍ នៅពេលរង្វាន់ពិសេសមានតម្លៃឡើងដល់ 5 លានដុល្លារ ក្រុមប្រឹក្សាភិបាលនៃក្រុមហ៊ុនឆ្នោតនឹងមានកម្មវិធី «Roll Down»។ Roll Down កើតឡើងនៅពេលប្រាក់រង្វាន់ត្រូវចែកដល់ក្រុមអតិថិជនដែលត្រូវប្រាំលេខ បួនលេខ និងបីលេខ។

នេះគឺជាចំណុចដែលក្រុមប្រឹក្សាភិបាលនៃក្រុមហ៊ុនឆ្នោតរបស់រដ្ឋ Michigan បង្កើតឱ្យមានកំហុសឆ្គង។ ពួកគេស្រង់ស្ថិតិនៃប្រូបាបឈ្នះទាក់ទងនឹងខ្ទង់លេខនីមួយ។

ការបកស្រាយអំពីក្បួនគណនានេះនឹងត្រូវចំណាយពេលច្រើន ប៉ុន្តែនិយាយរួម Jerry បានសិក្សាស្រាវជ្រាវទៅលើប្រូបាបឈ្នះទាំងនោះ ក៏ដូចជាការគណនាអំពីពេលវេលាដែល «Roll Down» នឹងកើតឡើង។ តាមការវិភាគ លោក Jerry Selbee រកឃើញថា សន្លឹកឆ្នោតមួយសន្លឹកដែលមានតម្លៃ 1 ដុល្លារ នឹងមានតម្លៃច្រើនជាង 1 ដុល្លារ នៅក្នុងសប្ដាហ៍ចុងក្រោយមួយចំនួន មុននឹងមានព្រឹត្តការណ៍ «Roll Down»។

ដោយហេតុខាងលើនេះ Jerry Selbee បានសម្រេចចិត្តរៀបចំផែនការដើម្បីតាមប្រមាញ់ប្រាក់រង្វាន់។

លោក Jerry Selbee បានដឹងថា លោកត្រូវចាក់ធំដើម្បីបានប្រាក់ចំណេញច្រើន។ ក្នុងការសាកល្បងដំបូង Jerry Selbee បានទិញសន្លឹកឆ្នោតជាច្រើនសន្លឹកដែលមានតម្លៃសរុប 2,000 ដុល្លារ។

ជាលទ្ធផល Jerry Selbee ខាតអស់ 50 ដុល្លារ។ លោកចាត់ទុកថា នេះគ្រាន់តែជាសំណាងមិនល្អមួយ និងនៅតែស្ថិតក្នុងតួលេខដែលអាចទទួលយកបាន។ គណិតវិទូរូបនេះ ក្រោយមកក៏បានរកឃើញ្ថា ខ្លួនត្រូវលេងធំជាងនេះ។

បីខែក្រោយ ព្រឹត្រិការណ៍ «Roll Down» បន្ទាប់ ត្រូវបានប្រកាស។ Jerry Selbee បានទិញសន្លឹកឆ្នោតយ៉ាងច្រើន និងមានតម្លៃសរុប 8,000 ដុល្លារ។ លោកឈ្នះបាន 15,700 ដុល្លារ ក្នុងនោះចំណេញបាន 7,700 ដុល្លារ។ ចាប់តាំងពីពេលនេះ អ្វីៗគ្រប់យ៉ាង បានដំណើរការល្អ។

រៀងរាល់សប្ដាហ៍ លោក Jerry Selbee ក៏ចេះតែចំណាយប្រាក់ច្រើនជាងមុនដើម្បីទិញសន្លឹកឆ្នោត ហើយមានពេលខ្លះ លោកចំណាយដល់រាប់សែនដុល្លារឯណោះ។

គ្រួសាររបស់លោក Jerry Selbee បានធ្វើដូច្នេះអស់រយៈពេលពេញមួយទសវត្សរ៍ ដោយពុំមានអាជ្ញាធរណាចាប់អារម្មណ៍។ រហូតដល់ថ្ងៃមួយ មាននិស្សិតមួយក្រុមមកពីវិទ្យាស្ថានបច្ចេកវិទ្យា Massachusetts (MIT) បានរកឃើញចន្លោះប្រហោងនេះដែរនៅក្នុងប្រព័ន្ធលទ្ធផលឆ្នោត ហើយពួកគេក៏បានប្រមូលប្រាក់សម្រុកទិញឆ្នោត។

នៅពេលព័ត៌មានខាងលើត្រូវបានចុះផ្សាយលើទំព័រកាសែត ក្រុមប្រឹក្សាភិបាលនៃក្រុមហ៊ុនឆ្នោតរបស់រដ្ឋ Michigan ក៏បានបិទរង្វាន់ Winfall នេះភ្លាម។ ក៏ប៉ុន្តែ ពេលនោះ គ្រួសាររបស់លោក Jerry រកបានជាង 26 លានដុល្លារពីប្រព័ន្ធឆ្នោតរបស់រដ្ឋ Michigan ទៅហើយ។ ក្រោយពីបានដកការចំណាយនានា Jerry នៅសល់ប្រាក់ចំណេញជាង 8 លានដុល្លារអាមេរិក។

នៅពេលគ្រប់យ៉ាងត្រូវបានទម្លាយ គូស្វាមី-ភរិយានេះ មានអាយុជិត 80 ឆ្នាំអស់ទៅហើយដែរ។ ពួកគេនៅតែរស់នៅយ៉ាងសាមញ្ញ បើទោះបានក្លាយជាសេដ្ឋី។

ដោយប្រើប្រាស់ចំណេះដឹងផ្នែកគណិតវិទ្យារបស់ខ្លួន Jerry បានក្លាយជាអ្នកមានយ៉ាងឆាប់រហ័សជាទីបំផុត ដោយមិនបានបំពានលើច្បាប់អ្វីមួយទាំងអស់។ យ៉ាងណាក៏ដោយ មិត្តអ្នកអានមិនអាចធ្វើដូច្នេះបានឡើយ ព្រោះថា នៅកម្ពុជាមិនមានឆ្នោតដែលមានរង្វាន់ប្រភេទ Winfall ដូចនៅក្នុងរដ្ឋ Michigan នៃសហរដ្ឋអាមេរិក៕

ប្រភព៖ Medium

February 22, 2021

កក់ក្ដៅបេះដូង! រូបភាពរៀបការ រវាងអាម៉ានឹងអ្នកកំលោះជំនាន់ចៅ ដែលបង្កប់ដោយរឿងរ៉ាវល្អៗជាច្រើន

កាលពីពេលថ្មីៗនេះ មានការចែករំំលែករូបភាព លោកយាយម្នាក់គ្រងឈុតអាពាហ៍ពិពាហ៍ ថតទន្ទឹមគ្នានឹងអ្នកកំលោះរូបសង្ហាជំនាន់ចៅម្នាក់ ទៅទូទាំងពិភពអនឡាញរបស់ប្រទេសចិន ដោយនៅពីក្រោយរូបភាពទាំងនោះ មានបង្កប់ដោយរឿងរ៉ាវ ដ៏សែនកក់ក្ដៅបេះដូងជាច្រើន។

អ្នកកំលោះម្នាក់នេះ មានឈ្មោះថា ចាង ចៀកាំង ជាមន្ត្រីពន្លត់អគ្គិភ័យនៅតំបន់ហ្វឹនអ៊ី មណ្ឌលចៀងស៊ី អាយុ 24ឆ្នាំ ចំណែកលោកយាយ មានឈ្មោះថា ថាំង សៃអ៊ីង អាយុ 85ឆ្នាំ។ ទាំង 2នាក់ មានអាយុខុសគ្នា 61ឆ្នាំ តែនេះមិនមែនជាអាយុខុសគ្នារបស់គូស្នេហ៍ទេ តែជាអាយុខុសគ្នារបស់យាយ និងចៅទៅវិញទេ។

ចាង រៀបរាប់ថា លោកយាយថាំង តែងតែរើសក្មេងដែលត្រូវគេបោះបង់ចោលនៅក្នុងមន្ទីរពេទ្យ យកមកចិញ្ចឹម…បើក្មេងណាម្នាក់មានរាងកាយរឹងមាំ លោកយាយនឹងបញ្ជូនទៅមណ្ឌលកុមារកំព្រា ឬស្វែងរកអ្នកទទួលចិញ្ចឹមធ្វើជាកូនធម៌ តែបើក្មេងណា មានរាងកាយទន់ជ្រាយ លោកយាយនឹងចិញ្ចឹមមើលថែទាំដោយខ្លួនឯង ហើយ ចាង ក៏ជាក្មេងម្នាក់ដែលមានសុខភាពទន់ជ្រាយដែរ។

លោកយាយ និងស្វាមី បានជួយគ្នាចិញ្ចឹមមើលថែក្មេងកំព្រាដល់ទៅ 6នាក់ ទាំងលោកយាយខ្លួនឯង ក៏មានកូនៗបង្កើតដល់ទៅ 5នាក់ទៀតដែរ តែលោកយាយនៅតែមានដួងចិត្តដ៏សែនល្អប្រពៃ ចិញ្ចឹមមើលថែទាំពួកគេ ប្រៀបដូចជាកូនបង្កើតដូច្នោះដែរ។

ចំណែកថ្លៃចាយវាយក្នុងការចិញ្ចឹមមើលថែ លោកយាយបានមកពីប្រាក់ខែចូលនិវត្តន៍ និងការលក់បន្លែ ដែលប្រាកដណាស់ថា ការចិញ្ចឹមគ្រួសារដ៏ធំមួយ ច្បាស់ជាមានការលំបាកខ្លាំងមិនខាន។ មានពេលខ្លះខ្វះខាតលុយកាក់ តែសំណាងល្អដែរ ដែលខាងអង្គភាពពន្លត់អគ្គិភ័យក្នុងតំបន់ហ្វឹនអ៊ី បានដឹងរឿងនេះ ក៏បានផ្ដល់អាហារូបករណ៍ការសិក្សា ឱ្យចាង និងប្អូនស្រី រយៈពេល 10ឆ្នាំ ដែលទោះជាក្រោយមក មានការប្រែប្រួលកិច្ចការផ្ទៃក្នុង របស់ស្ថាប័នក្ដី តែ ក៏អង្គភាពពន្លត់អគ្គិភ័យ នៅតែផ្ដល់ការឧបត្ថម្ភ រហូតដល់ ចាងបញ្ចប់ការសិក្សាកម្រិតមធ្យមសិក្សា ចំណែកប្អូនស្រី ចប់វិទ្យាល័យ។

ការជួយយកអាសាក្នុងគ្រានោះ ប្រៀបដូចជាការបណ្ដុះគ្រាប់ពូជនៅក្នុងបេះដូងរបស់ចាងដូច្នោះដែរ… ក្រោយរៀនចប់ គេសម្រេចចិត្តចូលរួមក្នុងកងទ័ពបម្រើប្រទេសជាតិ បន្ទាប់ពីនោះ ក៏ចូលរួមជាមួយអង្គភាពពន្លត់អគ្គិភ័យ។ គេទទួលស្គាល់ថា ការធ្វើការនៅក្នុងអង្គភាពពន្លត់អគ្គិភ័យ ពិបាកខ្លាំងជាងការនឹកស្មានទៅទៀត តែគេបានគិតជាប់ជានិច្ចថា វាគឺជាការបម្រើប្រជាជន ទើបមិនដែលនឹកសោកស្ដាយចំពោះការសម្រេចចិត្តនេះឡើយ។

“លោកយាយ បានផ្ដល់ជីវិតទី2 ដល់ខ្ញុំ ចំណែកអង្គភាពពន្លត់អគ្គិភ័យ បានផ្ដល់ជីវិតទី3 ដល់ខ្ញុំ”

ពេលនេះ ចាង មិនសូវបាននៅក្បែរលោកយាយថាំងប៉ុន្មានឡើយ ដោយសារតែកាលវិភាគការងារដ៏មមាញឹក តែបើសិនជាថ្ងៃណា មានពេលទំនេរ គេតែងនាំលោកយាយចេញទៅដើរកម្សាន្តជានិច្ច។ គេនិយាយថា លោកយាយជាមនុស្សស្រឡាញ់ភាពស្រស់ស្អាតខ្លាំងណាស់ តែ ដោយសារតែត្រូវមើលថែទាំក្រុមគ្រួសារ ធ្វើឱ្យលោកយាយមិនមានឱកាសបានមើលថែទាំខ្លួនឯង និងដែលសំខាន់នោះ គឺលោកយាយ មិនដែលធ្លាប់បានស្លៀកឈុតរៀបការម្ដងណាឡើយក្នុងមួយជីវិតនេះ។

ដូច្នេះហើយទើប ចាង រៀបចំធ្វើស៊ើផ្រៃស៍ ដោយការថតរូប “ព្រីវេដឌីង” ជូនលោកតា និងលោកយាយថាំង តែ ថ្ងៃនោះ លោកតាមិនអាចមកបាន ដោយសារតែមូលហេតុខាងសុខភាព ហើយគេក៏មិនចង់ឱ្យអ្វីៗដែលបានត្រៀមរួចហើយនោះ ខាតបង់ទទេៗដែរ ក៏ស្លៀកឈុតឯកសណ្ឋាន ហើយថតរូបកំដរលោកយាយ។

នៅពេលឃើញរូបថតភ្លាម លោកយាយរាងអៀនៗបន្តិចដែរ តែក៏មានសេចក្ដីសុខយ៉ាងខ្លាំង។

ចាង និយាយថា គេពេញចិត្តចំពោះជីវិតក្នុងពេលនេះខ្លាំងណាស់ ក្ដីប្រាថ្នារបស់គេ គឺលោកយាយថាំងមានសុខភាពរឹងមាំ មានពេលវេលារស់នៅជាមួយគ្នាកាន់តែច្រើនឡើង ហើយគេថែមទាំងបានលើកតម្កើងទឹកចិត្តរបស់លោកយាយយ៉ាងខ្លាំង ដែលទោះជាលោកយាយ រៀនចប់ត្រឹមតែថ្នាក់បឋមមែន តែលោកយាយមានដួងចិត្តដ៏ល្អស្រស់ ពោរពេញដោយការផ្ដល់ឱ្យ…”ទោះជាលោកយាយមានមាឌតូចមួយមែន តែលោកយាយអាចធ្វើរឿងជាច្រើនបាន ដោយបេះដូងដ៏រឹងមាំរបស់លោកយាយ”

ប្រភព៖ worldofbuzz

ប្រែសម្រួលដោយ ទិទីតំតាតូ

February 22, 2021

រដ្ឋមន្ត្រីមហាផ្ទៃលីប៊ី ត្រូវរថពាសដែកបាញ់រះ នៅក្បែររដ្ឋធានី Tripoli

រដ្ឋមន្ត្រីក្រសួងមហាផ្ទៃលីប៊ី ត្រូវបានត្រូវខ្មាន់កាំភ្លើងបាញ់រះ នៅពេលក្បួនរថយន្តរបស់លោកកំពុងធ្វើដំណើរនៅលើដងផ្លូវល្បឿនលឿន នៅក្បែររដ្ឋធានី Tripoli ប៉ុន្តែ សំណាងល្អ បានរួចពីការស្លាប់។

«ក្បួនរថយន្តរបស់លោក ត្រូវបានបាញ់ប្រហារពីរថពាសដែក នៅពេលកំពុងធ្វើដំណើរតាមដងផ្លូវល្បឿនលឿន» មន្ត្រីម្នាក់ដែលស្និទ្ធនឹងរដ្ឋមន្ត្រីក្រសួងមហាផ្ទៃលូប៊ី Fathi Bashagha និយាយកាលពីថ្ងៃទី 21 កុម្ភៈ។

ក្រុមខ្មាន់កាំភ្លើងបានបាញ់រះជាបន្តបន្ទាប់ទៅលើក្បួនរថយន្តនៅភាគខាងលិចនៃរដ្ឋធានី Tripoli ក្រោយពីលោក Fathi Bashagha ធ្វើដំណើរទៅទស្សនកិច្ចក្រុមហ៊ុនប្រេង និងទីស្នាក់ការនៃកងកម្លាំងអនុវត្តច្បាប់របស់ក្រសួងមហាផ្ទៃ។

«2នាក់ ក្នុងចំណោមក្រុមខ្មាន់កាំភ្លើងត្រូវបានចាប់ខ្លួន ចំណែកជនទីបីកំពុងស្ថិតក្នុងមន្ទីរពេទ្យ» មន្ត្រីស្និទនឹងលោក Fathi Bashagha ប្រាប់ដូច្នេះ និងបានបន្ថែមថា លោក Fathi Bashagha មានសុវត្ថិភាព និងមានសុខភាពល្អដូចធម្មតា។

រដ្ឋមន្ត្រីក្រួសួងមហាផ្ទៃលីប៊ី លោក Fathi Bashagha

លោក Fathi Bashagha គឺជាអ្នកនយោបាយដែលមានអំណាចខ្លាំងនៅលីប៊ី។ បុរសវ័យ 58 ឆ្នាំរូបនេះ បានឡើងកាន់កាប់តំណែងជារដ្ឋមន្ត្រីក្រសួងមហាផ្ទៃក្នុងរដ្ឋាភិបាលដែលត្រូវបានអង្គការសហប្រជាជាតិទទួលស្គាល់ចាប់ពីឆ្នាំ 2018 និងទទួលបានការគាំទ្រច្រើននៅក្នុងការប្រយុទ្ធប្រឆាំងនឹងអំពើពុករលួយ។

ប្រទេសលីប៊ី បានធ្លាក់ក្នុងសង្គ្រាមស៊ីវិល ក្រោយពីមេដឹកនាំ Muammar al-Gaddafi ត្រូវបានផ្ដួលរំលំនៅក្នុងចលនាមួយដែលគាំទ្រដោយបណ្ដាប្រទេសលោកខាងលិច ក្នុងឆ្នាំ 2011។ សង្គ្រាមដ៏បង្ហូរឈាមនាបច្ចុប្បន្ន កើតឡើងរវាងរដ្ឋាភិបាលលីប៊ី (GNA) ដែលទទួលស្គាល់ដោយអង្គការសហប្រជាជាតិ ជាមួយនឹងក្រុមបះបោរ LNA ដែលដឹកនាំដោយសេនាប្រមុខ Khalifa Haftar។

លោក Fathi Bashagha ធ្លាប់ត្រូវបានចាត់ទុកថាជាមនុស្សដែលអាចដឹកនាំរដ្ឋាភិបាលបណ្ដោះអាសន្នថ្មី នៅក្នុងកិច្ចប្រឹងប្រែងដើម្បីសន្តិភាព ដែលដឹកនាំដោយអង្គការសហប្រជាជាតិ ក្រោយពីមានបទឈប់បាញ់កាលពីខែតុលា ឆ្នាំ 2020។ ប៉ុន្តែ ចុងក្រោយ Abdul Hamid Dbeibah វ័យ 61 ឆ្នាំ ជាវិស្វករ និងជាអ្នកជំនួញ ត្រូវបានជ្រើសរើសជានាយករដ្ឋមន្ត្រីកាលពីខែមករា ឆ្នាំ 2021 ជាមួយនឹងការអំពាវនាវឱ្យមានការស្ដារប្រទេសជាតិ ស្ដារប្រជាធិបតេយ្យ និងបង្រួបបង្រួមជាតិឡើងវិញ៕

ប្រភព៖ AFP

February 22, 2021

Category: សង្គម និងសេដ្ឋកិច្ច