Category: សង្គម និងសេដ្ឋកិច្ច

ផ្សារជួញដូរប្រាក់អេឡិចត្រូនិកធំជាងគេក្នុងពិភពលោក Coinbase ធ្វើ IPO
បច្ចុប្បន្ន អ្នកវិនិយោគលើរូបិយវត្ថុអេឡិចត្រូនិកជាង 43 លាននាក់ នៅក្នុងប្រទេសចំនួនជាង 100 កំពុងប្រើប្រាស់ផ្សារជួញដូរ Coinbase។
ផ្សារជួញដូររូបិយវត្ថុអេឡិចត្រូនិក Coinbase បានដាក់ពាក្យស្នើសុំធ្វើ IPO (បោះផ្សាយលក់មូលបត្រជាសាធារណៈដំបូង) ប្រការនេះធ្វើឱ្យទីផ្សាររូបិយវត្ថុអេឡិចត្រូនិក កាន់តែមាន «អំណាច» ថែមទៀត។
ត្រូវបានបង្កើតឡើងកាលពីឆ្នាំ 2012 Coinbase គឺជាថ្នាលដ៏ធំមួយដែលជួយឱ្យអតិថិជនអាចទិញ លក់ និងរក្សាទុករូបិយវត្ថុឌីជីថល (អេឡិចត្រូនិក) ដូចជា Bitcoin និង Ether ជាដើម។ Coinbase ត្រូវបានគេចាត់ទុកថាជាផ្សារឈ្មួញកណ្ដាលផ្នែករូបិយវត្ថុឌីជីថល ដែលប្រកួតប្រជែងផ្ទាល់់ជាមួយនឹង Coinmama, CEX.IO និង Gemini។ យោងតាម CNN ផ្សារជួញដូររូបិយវត្ថុអេឡិចត្រូនិក Coinbase រៀបចំគម្រោងធ្វើ IPO នៅខែធ្នូខាងមុខ។
ភាគីខាងក្រុមហ៊ុន Coinbase បានឱ្យដឹងថា ការធ្វើ IPO នេះនឹងត្រូវធ្វើនៅលើផ្សារហ៊ុន Nasdaq ដោយប្រើប្រាស់ឈ្មោះ COIN។ ព័ត៌មាននៅលើគេហទំព័ររបស់ Coinbase ឱ្យដឹងថា មានអ្នកវិនិយោគលើរូបិយវត្ថុឌីជីថល ចំនួន 43 លាននាក់ កំពុងប្រើប្រាស់ Coinbase ដែលការជួញដូរនេះមានតម្លៃសរុបស្មើនឹង 455 ពាន់លានដុល្លារអាមេរិក និងកាន់កាប់ទ្រព្យសរុប 9 ម៉ឺនលានដុល្លារនៅទូទាំងប្រព័ន្ធ Coinbase។
តម្លៃសរុបនៃ Bitcoin ដែលកំពុងត្រូវបានជួញដូរនាបច្ចុប្បន្ន បានឡើងដល់ជាង 1 លានលាន (1,000,000,000,000) ដុល្លារអាមេរិកនៅក្នុងសប្ដាហ៍កន្លង បន្ទាប់ពីតម្លៃរបស់ Bitcoin បានកើនដល់ជិត 60,000 ដុល្លារ/Bitcoin។ ប៉ុន្តែ បច្ចុប្បន្ន តម្លៃរបស់ Bitcoin បានធ្លាក់ចុះ និងកំពុងត្រូវបានជួញដូរក្នុងរង្វង់ 51,000 ដុល្លារ/Bitcoin។
Tesla, Mastercard, Bank of New York និងក្រុមហ៊ុនធំៗជាច្រើនទៀត បានប្រកាសជាសាធារណៈថា ពួកគេបានវិនិយោគយ៉ាងច្រើនទៅលើ Bitcoin នាប៉ុន្មានខែកន្លងទៅថ្មីៗនេះ ដែលប្រការនេះបានជួយឱ្យភាពស្របច្បាប់របស់ Bitcoin កាន់តែត្រូវបានលើកកម្ពស់។
យ៉ាងណាក៏ដោយ Bitcoin និងរូបិយវត្ថុអេឡិចត្រូនិកមួយចំនួនផ្សេងទៀត នៅតែប្រឈមមុខនឹងការប្រែប្រួលខ្លាំង ដោយសារតម្លៃរបស់វាឡើង-ចុះមិនទៀងទាត់៕
គួរអាន៖ Bitcoin បង្កើតបានសេដ្ឋីដុល្លារចំនួន 100,000នាក់ ក្នុងរយៈពេល 3ខែ
ប្រភព៖ CNN
ប្រែសម្រួល៖ បុត្រា
February 26, 2021
សេដ្ឋី 177នាក់ដែលមានដោយសារសមត្ថភាពផ្ទាល់ខ្លួន សុទ្ធតែមានវិធីសាស្ត្រដូចគ្នាដើម្បីក្លាយជាអ្នកមាន! អ្នកក៏អាចធ្វើបាន!
Corley បានសរសេរថា ភាគច្រើននៃសេដ្ឋីដែលលោកបានសិក្សាស្រាវជ្រាវ មិនបានក្លាយជាអ្នកមាននោះទេ រហូតដល់ក្រោយវ័យ 50ឆ្នាំ ប៉ុន្តែ ពួកគេសុទ្ធតែចាប់ផ្ដើមទៅតាមវិធីសាស្ត្រដូចគ្នា។
Thomas C. Corley គឺជាអ្នកជំនាញខាងផែនការហិរញ្ញវត្ថុ ជាវាគ្មិន និងជាមនុស្សម្នាក់ក្នុងចំណោមអ្នកនិពន្ធដែលមានសៀវភៅលក់ដាច់បំផុត ព្រមទាំងជាសហការីរបស់ Business Inseder, CNBC និងស្ថានីយទូរទស្សន៍ជាច្រើនផ្សេងទៀត។ លោកបានចំណាយពេល 5 ឆ្នាំ ក្នុងការស្វែងយល់អំពីក្រុមសេដ្ឋីដែលមានបានដោយការប្រឹងប្រែងផ្ទាល់ខ្លួន។
លទ្ធផលនៃការស្រាវជ្រាវទៅលើទម្លាប់ដែលនាំឱ្យក្លាយជាអ្នកមានរបស់លោក Corley បានទាក់ទាញអ្នកអានជាង 50 លានលើក នៅក្នុងប្រទេសចំនួន 25 ក្នុងពិភពលោក។ គោលដៅរបស់ការសិក្សាស្រាវជ្រាវនេះគឺ ដើម្បីឆ្លើយនឹងសំណួរសាមញ្ញចំនួនពីរ៖ «ហេតុអ្វីបានជាមនុស្សក្លាយជាអ្នកមាន ឬអ្នកក្រ?» និង «តើអ្នកមាន និងអ្នកក្រធ្វើអ្វីខ្លះចាប់តាំងពីពេលក្រោកពីគេងនៅព្រឹក រហូតដល់ពេលចូលគេងនៅពេលយប់?»។
ចំណុចរួមរបស់សេដ្ឋីដែលមានបានដោយខ្លួនឯង
លោក Corley បានសម្ភាសជាមួយមនុស្សចំនួន 233 នាក់ ដែលមានប្រាក់ចំណូលប្រចាំឆ្នាំយ៉ាងតិច 160,000 ដុល្លារអាមេរិក និងមានទ្រព្យ 3.2 លានដុល្លារ។ ក្នុងចំណោមនោះ មាន 177 នាក់ គឺជាសេដ្ឋីដែលមានបានដោយខ្លួនឯង។ តាមរយៈការសម្ភាសនេះ លោករកឃើញចំណុចរួមជាច្រើនអំពីអ្នកមាន ក៏ដូចជាទម្លាប់ប្រចាំថ្ងៃដែលនាំឱ្យពួកគេជោគជ័យ។
ចំណុច ឬប្រការរួមមួយក្នុងចំណោមប្រការទាំងឡាយដែល Corley បានរកឃើញ នោះគឺ ពួកគេសុទ្ធតែមានគោលដៅសន្សំសំច័យជាចម្បង។ ក្នុងសៀវភៅមួយក្បាលរបស់ខ្លួន លោក Corley សរសេរថា 80% នៃសេដ្ឋីដែលមានបានដោយការប្រឹងប្រែងផ្ទាល់ខ្លួន ដែលលោកបានស្រាវជ្រាវ មិនបានក្លាយជាអ្នកមាននោះទេ រហូតដល់ពួកគេមានវ័យក្រោយ 50 ឆ្នាំ។ ប៉ុន្តែ សេដ្ឋីទាំងអស់នោះ សុទ្ធតែចាប់ផ្ដើមដោយវិធីដូចគ្នាតែមួយ។
លោក Corley សរសេរថា៖ «បើទោះជាបានកំណត់គោលដៅរកឱ្យបាន 1 លានដុល្លារ, 10 លានដុល្លារ ឬច្រើនជាងនេះ អ្នកត្រូវតែចាប់ផ្ដើមពីចំណុចជាក់លាក់ណាមួយ។ សេដ្ឋីដែលក្លាយជាអ្នកមានដោយការខិតខំផ្ទាល់ខ្លួន ដែលខ្ញុំបានស្រាវជ្រាវ សុទ្ធតែបានកំណត់គោលដៅសន្សំប្រាក់ចាប់ពី 10% ទៅ 20% នៃប្រាក់ចំណូលរបស់ខ្លួន ក្នុងរយៈពេលច្រើនឆ្នាំ មុនពេលបានក្លាយជាសេដ្ឋី។ យោងតាមធនាគារកណ្ដាលអាមេរិក (FED) មធ្យមភាគនៃអត្រាសន្សំប្រាក់របស់ជនជាតិអាមេរិកាំងគឺ 8% នៃប្រាក់ចំណូល។
គោលការណ៍សន្សំប្រាក់របស់ក្រុមសេដ្ឋីដែលមានបានដោយខ្លួនឯង
លោក Corley ឱ្យដឹងថា ប្រការដែលសំខាន់បំផុត នោះគឺថា ក្រុមមនុស្សដែលមានបំណងក្លាយជាសេដ្ឋី តែងតែមានស្មារតីទទួលខុសត្រូវ និងអនុវត្តតាមគោលការណ៍ ឬវិន័យនៃការសន្សំប្រាក់ដ៏តឹងរ៉ឹង។ ពួកគេប្រើប្រាស់យុទ្ធសាស្ត្រដែល Corley ហៅថា «ប្រព័ន្ធប៉ោតដាក់ទឹក» ដើម្បីសន្សំសំច័យប្រាក់។ ពួកគេបែងចែកខ្ទង់សន្សំរបស់ខ្លួនទៅជា 4 ប្រភេទធំ៖ ខ្ទង់សន្សំសម្រាប់ពេលចូលនិវត្តន៍ ខ្ទង់សម្រាប់ការចំណាយដែលមានគម្រោងស្រាប់ ខ្ទង់សម្រាប់ការចំណាយបន្ទាន់ និងខ្ទង់សម្រាប់ចាយទៅតាមវដ្ដ។
-ខ្ទង់សន្សំសម្រាប់ពេលចូលនិវត្តន៍៖ ជាប្រាក់ដែលត្រូវបានវិនិយោគដើម្បីការរីកចម្រើន ហើយវានឹងត្រូវបានប្រើប្រាស់ពេលពួកគេឈប់ធ្វើការ។
-ខ្ទង់សម្រាប់ការចំណាយដែលមានគម្រោងស្រាប់៖ រួមមាន ការចំណាយសម្រាប់ការសិក្សាដែលបានគ្រោងទុកនាពេលអនាគត ការចំណាយលើអាពាហ៍ពិពាហ៍ផ្ទាល់ខ្លួន បង់រំលស់ផ្ទះ/ដី ឬការចំណាយដែលមានគម្រោងផ្សេងៗទៀត។
-ខ្ទង់សម្រាប់ការចំណាយបន្ទាន់៖ នេះគឺជាសាច់ប្រាក់សុទ្ធដែលបានត្រៀមនៅក្នុងផ្ទះដើម្បីបង្ការពេលមានអាសន្នបន្ទាន់កើតឡើង ដូចជាករណីបាត់បង់ការងារ ឬជួបបញ្ហាគ្រោះថ្នាក់ និងជំងឺភ្លាម។ ខ្ទង់នេះត្រូវបានគេកំណត់យ៉ាងតិចណាស់ក៏អាចឱ្យមនុស្សម្នាក់ចិញ្ចឹមជីវិតបាន 6 ខែ ក្នុងគ្រាមិនមានប្រាក់ចំណូល។
-ខ្ទង់សម្រាប់ចាយទៅតាមវដ្ដ៖ ជាប្រាក់សន្សំសម្រាប់ការដើរទេសចរណ៍ ឬសម្រាប់ទិញអំណោយចាំបាច់ប្រចាំឆ្នាំ។
យុទ្ធសាស្ត្រសន្សំសំច័យដ៏សាមញ្ញានេះ មានតួនាទីយ៉ាងសំខាន់ចំពោះសេដ្ឋីចំនួនជិតពាក់កណ្ដាលដែល Corley បានស្រាវជ្រាវ។ ជាលទ្ធផល ពួកគេអាចរស់បានដោយប្រាក់ចំណូលប្រចាំខែចំនួន 80% (ឬតិចជាងនេះ)។ ហើយនៅពេលបានក្លាយជាសេដ្ឋី ពួកគេនៅតែបន្តអនុវត្តយុទ្ធសាស្ត្រខាងលើ ព្រមទាំងមិនដែលបង្ហាញអំពីភាពមានបានរបស់ពួកគេ។
លោក Thomas C. Corley បានបន្ថែមថា៖ «ក្រុមសេដ្ឋីដែលមានបានដោយខ្លួនឯង សុទ្ធតែមានទម្លាប់សន្សំសំច័យ និងគោរពតាមគោលការណ៍សន្សំសំច័យយ៉ាងតឹងរឹង។ កាន់តែឆាប់សន្សំសំច័យ អ្នកកាន់តែឆាប់មានទ្រព្យច្រើន និងឆាប់សម្រេចបានគោលដៅរបស់ខ្លួន»៕
ប្រភព៖ Business Insider
ប្រែសម្រួល៖ បុត្រា
February 25, 2021
គិតមកទល់ថ្ងៃនេះ តើតារាប្រុសស្រីខ្មែររូបណាខ្លះហើយដែលបានទៅចាក់វ៉ាក់សាំងការពារជំងឺកូវីដ១៩?
ចាប់តាំងពីថ្ងៃដំបូងដែលព្រះរាជាណាចក្រកម្ពុជាបើកឲ្យចាក់វ៉ាក់សាំងការពារជំងឺកូវីដ១៩ពោលគឺនៅថ្ងៃទី១០ខែកុម្ភៈឆ្នាំ២០២១ មកដល់ត្រឹមថ្ងៃទី ២៤ ខែកុម្ភៈនេះមានរយៈពេល១៤ថ្ងៃហើយ។ នៅរវាង១៤ថ្ងៃកន្លងមកនេះ មានអ្នកទៅទទួលចាក់វ៉ាក់សាំងជាច្រើននាក់រួចមកហើយ ក្នុងនោះក៏មានសិល្បករសិល្បការិនីនិងបុគ្គលិកដែលធ្វើការក្នុងប្រព័ន្ធផ្សព្វផ្សាយជាច្រើននាក់បានស្ម័គ្រចិត្តទៅចាក់វ៉ាក់សាំងបង្ការជំងឺកូវីដ១៩។
ថ្ងៃនេះយើងសូមលើកមកបង្ហាញជូនសិល្បករសិល្បការិនីចំនួន៧រូបដែលបានចាក់វ៉ាក់សាំងបង្ការជំងឺកូវីដ១៩លើកទីមួយរួចរាល់។
១. លោក យុត្ថារ៉ា ឆានី
២. លោក ជួង ជី ហៅកុយ
៣. លោក ប៊ុនថុល ប៊ុនថង ហៅ Tommy
៤. នាយ ហុង ដា
៥. នាយ ក្រិន
៦. អ្នកនាង ប៉ែន ស្រីពេជ្រ
គួរឲ្យដឹងដែរថាមកទល់នឹងពេលនេះការឆ្លងរាលដាលជំងឺកូវីដក្នុងសហគមន៍កំពុងតែលុកលុយប្រទេសកម្ពុជាពិសេសទីក្រុងភ្នំពេញជាលើកទីបី ដោយគិតត្រឹមថ្ងៃទី២៤ ខែ កុម្ភៈឆ្នាំ ២០២១នេះមានអ្នកឆ្លងសរុប ៦៣៣ នាក់ ក្នុងនោះអ្នកជាសះស្បើយ ៤៧៦ នាក់ និងអ្នកកំពុងព្យាបាល១៤២ នាក់៕
February 25, 2021
Bitcoin បង្កើតបានសេដ្ឋីដុល្លារចំនួន 100,000នាក់ ក្នុងរយៈពេល 3ខែ
តម្លៃរបស់ Bitcoin បានកើនឡើងខ្លាំងក្នុងរយៈពេលប៉ុន្មានខែកន្លងទៅនេះ នាំឱ្យគណនីប្រាក់អេឡិចត្រូនិកតម្លៃចាប់ពីលានដុល្លារឡើងទៅ កើនឡើងខ្ពស់ជាងមុនទៅដល់ 4 ដង ដោយចំណាយពេលតែ 3 ខែប៉ុណ្ណោះ។
សារព័ត៌មាន CBS ដកស្រង់ទិន្នន័យពីទីភ្នាក់ងារស្រាវជ្រាវទីផ្សារ BitInfoCharts បានឱ្យដឹងថា ពិភពលោកនាពេលបច្ចុប្បន្ន មានគណនី Bitcoin ប្រមាណ 100,000 ដែលមានតម្លៃចាប់ពី 1 លានដុល្លារឡើងទៅ ក្នុងនោះមានគណនីជាង 8,000 ដែលមានតម្លៃចាប់ពី 10 លានដុល្លារ។ តួលេខសេដ្ឋីជាង 100,000 នាក់នេះ ច្រើនជាងឆ្ងាយ បើធៀបនឹង 25,000 នាក់ កាលពី 3 ខែមុន និង 15,000 នាក់ កាលពីមួយឆ្នាំមុន។
តម្លៃរបស់រូបិយវត្ថុអេឡិចត្រូនិក Bitcoin កាលពីដើមខែកុម្ភៈនេះ បានហក់ឡើងដល់ 50,000 ដុល្លារក្នុង 1 Bitcoin។ កាលពីចុងសប្ដាហ៍មុន តម្លៃរបស់វា ពេលខ្លះបានលោតឡើងដល់ 58,000ដុល្លារអមេរិក។ កំណើននៃតម្លៃនេះ បានជួយឱ្យក្រុមសេដ្ឋី Bitcoin កើនឡើងដល់ខ្ទង់សែននាក់នៅក្នុងសប្ដាហ៍កន្លងទៅ នេះបើតាមរបាយការណ៍របស់ BitInfoCharts។
មូលហេតុធំបំផុតដែលនាំឱ្យតម្លៃរបស់ Bitcoin បន្តឡើងថ្លៃ ហើយជួយឱ្យចំនួនសេដ្ឋីដែលកំពុងវិនិយោគទៅលើ Bitcoin កើនឡើងខ្ពស់បែបនេះ ក៏ព្រោះតែក្រុមហ៊ុនផលិតរថយន្តអគ្គិសនីអាមេរិក Tesla របស់មហាសេដ្ឋី Elon Musk បានប្រកាសថា បានទិញ Bitcoin ចំនួន 1.5 ពាន់លានដុល្លារអាមេរិក។ ប្រការនេះក៏បង្ហាញថា ក្រុមហ៊ុនផ្សេងៗក៏អាចវិនិយោគទៅលើប្រាក់ឌីជីថល Bitcoin នេះដែរ។
ក៏ប៉ុន្តែ តួលេខពិតប្រាកដនៃចំនួនសេដ្ឋី Bitcoin ពិតជាពិបាកស្មាន។ ព្រោះថា អត្តសញ្ញាណរបស់អ្នកនៅពីក្រោយគណនី Bitcoin នីមួយៗ មិនត្រូវបានបញ្ចេញជាសាធារណៈ ពោលគឺមានតែចំនួនគណនី និងតម្លៃរបស់វាតែប៉ុណ្ណោះដែលត្រូវបានផ្សាយជាសាធារណៈ។ មនុស្សម្នាក់អាចមានគណនី Bitcoin លើសពីមួយ ហើយគណនី bitcoin មួយ ក៏អាចគ្រប់គ្រងដោយមនុស្សច្រើននាក់ផងដែរ។
យ៉ាងនេះក្ដី គណនី Bitcoin ភាគច្រើនគឺមានតម្លៃទាបខ្លាំង។ យោងតាម BitInfoCharts បច្ចុប្បន្ន មានគណនីជាង 55 លាន កំពុងដំណើរការនៅលើបណ្ដាញ Bitcoin ប៉ុន្តែ ក្នុងចំណោមនោះ មានគណនីជិត 45 លាន មានតម្លៃក្រោម 100 ដុល្លារ។
ឆ្នាំនេះ បើទោះជាមានពេលខ្លះត្រូវធ្លាក់ថ្ងៃ ប៉ុន្តែ តម្លៃ Bitcoin នៅតែខ្ពស់ជាងជិត 70% បើធៀបនឹងតម្លៃកាលពីដើមឆ្នាំ។ ចំណែកមាស ដែលជាគូប្រជែងផ្ទាល់របស់ Bicoin បែរជាធ្លាក់ថ្លៃ 5% ទៅវិញ ខណៈសន្ទស្សន៍ DJIA, S&P 500 និង Nasdaq Composite នៅក្នុងផ្សារហ៊ុនអាមេរិក កើនឡើង 5%៕
ប្រភព៖ Market Watch, CBS
ប្រែសម្រួល៖ បុត្រា
February 25, 2021
ហុយៗ! ស្ថាបនិកគ្រួសារតារាកម្ពុជា ចេញមុខបង្ហោះសារពន្លាស់អ្នកហែកហួរម្ចាស់ផលិតកម្ម រាម
នៅពេលថ្មីៗនេះ គេកត់សម្គាល់ឃើញមានសកម្មភាពវាយប្រហាមកលើលោកស្រី ស៊ុន្ទរី នួន ជាអគ្គនាយិកាផលិតកម្មរាម និងក្រុមហ៊ុនសម្រស់ធម្មជាតិ តាមវិធីផ្សេងៗនៅលើបណ្ដាញសង្គមហ្វេសប៊ុក។ ជាពិសេស គេបានឃើញម្ដាយធម៌លោកស្រី ដែលជាតារាសម្ដែងជើងចាស់ លោកស្រី ញឹម សុខា ក៏បញ្ចេញវីដេអូបកស្រាយពីការរងគ្រោះព្រោះម្ដាយធម៌ ដែលហាក់ដូចជា បានវាយបកមកកាន់លោកស្រី ស៊ុន្ទរី នួន ដែលជាកូនធម៌។ ដូច្នោះហើយទើបគេសង្ស័យថា តើមានរឿងអ្វីកើតឡើងឱ្យពិតប្រាកដ។ រហូតមកទល់ពីនេះ នៅមិនទាន់មានការបកស្រាយណាមួយជាផ្លូវការចេញពីម្ចាស់ផលិតកម្មរាម។
តែយ៉ាងណាមិញ គេបានឃើញមួយដែលបង្ហោះដោយលោក ផាត់ តារារដ្ឋ ជាស្ថាបនិកគ្រួសារតារាកម្ពុជា បានចេញមុខឈឺឆ្អាលជំនួសលោកស្រីនាយិកាម្ចាស់ផលិតកម្មរាម ប្រាប់ដល់អ្នកកំពុងតាមហែកហួរឱ្យដឹងខ្លួន។ លោកបានរៀបរាប់ថា «មួយរយៈនេះ ឃើញគេហែកហួរគាត់ច្រើនមែនទែន រឿងគាត់ជួយគេមិនដូចសន្យា ខ្ញុំសួរត្រលប់ទៅវិញ តើគាត់នឹងអ្នកដែលរិះគន់គាត់ ថាគាត់មិនបានជួយតាមសន្យាហ្នឹង ត្រូវជាសាច់ញាតិអ្វីនឹងគ្នា ជាបងប្អូនទេ ជាអ្នកដែលធ្លាប់ជំពាក់គុណស្រ័យទេ។ សម្រាប់ខ្ញុំគាត់គ្រាន់តែជួយមួយគ្រា ឬ ផ្ដល់ពាក្យសម្ដីមួយលើកទឹកចិត្ត ជាការអាណិតអាសូរ ក្នុងពេលដែលគាត់រវល់១០០មុខបែបហ្នឹង គឺជាទឹកចិត្តមួយរបស់គាត់ហើយ តើរឿងអីត្រូវដាក់បន្ទុកលើគាត់ថា មិចមិនជួយបែបនេះ មិនជួយបែបនោះបន្ថែម មិចទុកអោយអ្នកនេះអ្នកនោះដាច់ពោះ សាកត្រលប់សួរទៅកាន់កូនចៅខ្លួនឯងទៅមើល ថាយើងជាសាច់ជាឈាម ធ្លាប់មានគុណលើពួកគាត់ផង មិចក៏មិនដឹងគុណយើង មិចទុកអោយយើងវេទនា មិចទុកអោយយើងទៅលើកដៃសំពះសុំលុយគេរស់ទៅកើត។ ចុះត្រឹមគាត់គ្រាន់តែជាអ្នកឃើញហើយអាណិត និង សន្យា តើវាចាំបាច់ទេ ដែលគាត់ត្រូវអ្នកនឹងជេថាមិនជួយដូចចិត្ត។ ក្នុងនាមខ្ញុំ ដែលធ្លាប់ឈឺឆ្អាលគេ ហើយរមែងទទួលបាបបែបហ្នឹង ខ្ញុំយល់អារម្មណ៍មួយនឹង យល់អាស្ថានភាព ដែលជួយគេមិនដូចបំណងហើយ ត្រូវអ្នកគាំទ្រគេ ឬ បុគ្គលគេខ្លួនឯង ដើរសម្អុយ និង ព្រួតគ្នាហែកហួរ»។

លោកបន្ដថា «សួរថា ទង្វើនេះត្រូវទេ ដែលគេមានចិត្តមកលើយើងហើយ តែយើងបែរជាអោយទោសគេ ទាំងមិនខ្មាស់ ទាំងមិនមើលថា ខ្លួនឯងធ្លាប់មានគុណស្រ័យអីនឹងអ្នកដែលសន្យានឹង សួរថាយើងនឹងគេ ជាអ្នកណា។ ដោយសារតែមានគំរូបែបនេះ ទើបអ្នកខ្លះលែងចង់ធ្វើបុណ្យ រួមទាំងខ្ញុំផង ក៏លែងចង់ធ្វើបុណ្យនឹងមនុស្ស ព្រោះជួបរឿងទោសច្រើនជាងគុណចឹង ខ្ញុំនៅតែប្រើពាក្យថា ទើសភ្នែក ហើយបើទើសខ្លាំងពេក ខ្ញុំអាចនឹងចេញមុខវែកញែក អោយគេយល់ខ្លះ ថាតើអ្នកធ្វើបុណ្យត្រូវគេអោយទោសបែបនឹង ជារឿងសមហេតុផលឬទេ គេជួយបានត្រឹមណា អរគុណគេត្រឹមហ្នឹងទៅ អ្វីៗវាមាននិស្ស័យរបស់វា គ្នានអ្នកណាគេមកជួយយើងបាន១០០ជំពូកទេ ធម្មតាគេជួយយើងបានតែមួយដំណើរៗនឹងឯង អរគុណការលះបង់គេទៅ ទោះត្រឹមតែជាពាក្យសម្ដីក៏ដោយ កុំផ្ដេកផ្ដួលលើគេ គ្មានអ្វីមានតម្លៃជាងប្រឹងខ្លួនឯងទេ ចាំបាច់អីទៅអោយទោសគេ ពេលគេមិនជួយអ្នកណាម្នាក់ដូចបំណង រឿងគេមិនជួយជានិស្ស័យបុណ្យគេតើ គេត្រឹមជាអ្នកដទៃនឹងយើងគេធ្វើបុិនណាអរគុណគេបុិននឹងទៅ កុំចឹង ទើសភ្នែកណាស់»។

February 25, 2021
លោកស្រី ញឹម សុខា តារាសម្ដែងចេញមុខទួញសោកទ្រហ៊ោយំថា ដាច់បាយម្ដងៗរងគ្រោះព្រោះពាក្យម្ដាយធម៌
កាលពីពេលថ្មីៗនេះ នៅលើបណ្តាញសង្គមហ្វេសប៊ុកបានធ្វើការចែករំលែក នៅជីវិតដ៏លំបាករបស់ តារាសម្តែងជើងចាស់ អ្នកគ្រូ ញឹម សុខា ដែលមានជីវភាពក្រលំបាក និងមានជំងឺ គ្មានប្រាក់ដើម្បីព្យាបាល រហូត ដើរលាងចានតាមផ្ទះឲ្យគ្រាន់បានប្រាក់ខ្លះទិញម្ហូបអាហារ និងទិញថ្នាំពិសារ។ ខណៈភ្លាមៗនេះ តារាសម្ដែងជើងចាស់រូបនេះ ក៏ទទួលបានការឧបត្ថម្ភប្រាក់ពីលោកស្រី ទ្រី ដាណា ដែលគេស្គាល់ថាជាអ្នកជំនួញល្បីនៅលើអនឡាញន៍។

អ្វីដែលចាប់អារម្មណ៍នៅពេលនេះ គឺលោកស្រី ញឹម សុខា ត្រូវបានទម្លាយថា កំពុងរងគ្រោះព្រោះពាក្យម្ដាយធម៌ បើតាមការបង្ហោះរបស់លោក អឹម ជីវ៉ា បានសរសេររៀបរាប់ថា « តើពិតទេ ម្តាយធម៌ ស្រីអូនសម្រស់ធម្មជាតិ យំចេញមុខបកស្រាយថា តាំងពីក្លាយជាម្តាយធម៌មក គាត់ដាច់បាយ..! ហើយគ្មានលុយឡើយ.. ! ការបកស្រាយបែបនេះបន្ទាប់ពីតារាជើងចាស់រូបនេះបានធ្វើដំណើមកជួបខ្ញុំបាទអុឹមជីវ៉ា និងសូមសំណូមពអោយខ្ញុំបាទជួយផ្សាយអោយ ដើម្បីកុំអោយមហាជនមួយចំនួន និងអ្នកសិល្បៈខ្លះថា តារាជើងចាស់រូបនេះតាំងពីបានកូនធម៌ជាសេដ្ឋីមក មានលុយច្រើន មានផ្ទះ នៅ មានប្រាក់ខែរាប់ពាន់ដុល្លារ តែធាតុ ពិត គឺមិនដូចពាក្យនិយាយឡើយ ។ សូមស្តាប់ការបកស្រាយរបស់តារសម្តែងជើងចាស់ អ្នកមីង ញឹម សុខា នៅក្នុងនាទី ជីវិតសិល្បករកម្ពុជា នៅលើផេកសិល្បករកម្ពុជា នៅវេលារម៉ោង៦ល្ងាចនេះ »។

គួរឱ្យដឹងដែរថា លោក ញឹម សុខា បានយំនិងនិយាយក្នុងវីដេអូថា លោកស្រីមានឈ្មោះតែជាម្ដាយធម៌ទេកាលគ្រាកន្លងមក តែមិនដែលបានទទួលការទំនុកបម្រុងពីខាងកូនចិញ្ចឹមបានទៀងទាត់នោះទេ។ ជាក់ច្បាស់ទស្សនាវីដេអូខាងក្រោមនេះ ៖
February 25, 2021
វិទ្យាស្ថានតេជោសែនសាធារណការ និងដឹកជញ្ជូន ផ្ដល់អាហារូបករណ៍ 100% និង 50% ! ផុតកំណត់ថ្ងៃទី 28 កុម្ភៈ
ក្រសួងសាធារណការ និងដឹកជញ្ជូនបានប្រកាសឱ្យដឹងថា វិទ្យាស្ថានតេជោសែនសាធារណការ និងដឹកជញ្ជូន ចាប់ផ្ដើមទទួលពាក្យប្រលងចូលរៀនចាប់ពីពេលនេះ រហូតដល់ចុងខែកុម្ភៈ ក្នុងនោះក៏មានការផ្ដល់អាហារូបករណ៍ 100% និង 50% ដល់សិស្សផងដែរ។
ការជ្រើសរើសមានដូចខាងក្រោម៖
*ថ្នាក់បរិញ្ញបត្រ+១ (វិស្វករ ៥ឆ្នាំ)
១- សំណង់ផ្លូវថ្នល់ ផ្លូវល្បឿនលឿន ស្ពាន ផ្លូវដែក និងកំពង់ផែ
២- ប្រព័ន្ធចម្រោះទឹកកខ្វក់
*ថ្នាក់បរិញ្ញបត្រ (៤ឆ្នាំ)
៣- សេដ្ឋកិច្ច និងគ្រប់គ្រងការដឹកជញ្ជូនផ្លូវគោក
៤- គ្រប់គ្រងភស្តុភារកម្ម និងខ្សែច្រវាក់ផ្គត់ផ្គង់
៥- បរិបាលនាវា
៦- ម៉ាស៊ីននាវា
:::::::::::::::::::::::::::::::::::::
ក::: តម្លៃសិក្សា
:::::::::::::::::::::::::::::::::::::
១- អាហារូបករណ៍ ១០០% សម្រាប់និស្សិតឆ្នើម ចំនួន ៥០នាក់
២- អាហារូបករណ៍ ៥០% សម្រាប់និស្សិតនារី
៣- តម្លៃសិក្សា៖ $៦០០ ក្នុង១ឆ្នាំ
:::::::::::::::::::::::::::::::::::::
ខ::: លក្ខខណ្ឌដាក់ពាក្យ
:::::::::::::::::::::::::::::::::::::
១- បេក្ខជនត្រូវមានសញ្ញាបត្រមធ្យមសិក្សាទុតិយភូមិ ឬសញ្ញាបត្រសមមូល។ បេក្ខជនអាចផ្តល់ សញ្ញាបត្រថតចម្លងនៅពេលក្រោយ។
២- ទាញយកពាក្យស្នេីសុំប្រឡង៖ https://qrgo.page.link/4Wfzb
៣- មកដាក់ពាក្យប្រឡងផ្ទាល់នៅទីតាំងវិទ្យាស្ថាន ឬផ្ញេីពាក្យស្នើសុំប្រឡងដោយស្គេន ជាទម្រង់ PDF ទៅកាន់ Telegram (០៩៦-៥៣០-៥០៨៩) ឬតំណភ្ជាប់ https://t.me/tsipwt
:::::::::::::::::::::::::::::::::::::
គ::: កាលបរិច្ឆេទ
:::::::::::::::::::::::::::::::::::::
– បេីកទទួលពាក្យប្រឡងពីពេលនេះតទៅ!
– ឈប់ទទួលពាក្យនៅថ្ងៃទី២៨ ខែកុម្ភ: ឆ្នាំ២០២១ វេលាម៉ោង៥:០០ល្ងាច
– ថ្ងៃប្រឡងចូលរៀន៖ ប្រឡងតាមអនឡាញ (Entrance Exam-Online) នៅថ្ងៃទី០៣ ខែមីនា ឆ្នាំ២០២១ វេលាម៉ោង ៨:០០ព្រឹកតទៅ។ មុខវិជ្ជាត្រូវប្រឡង៖ គណិតវិទ្យា រូបវិទ្យា គីមីវិទ្យា
– ថ្ងៃប្រកាសលទ្ធផលប្រឡង៖ នៅថ្ងៃទី០៥ខែមីនា ឆ្នាំ២០២១ តាមរយៈផេករបស់ក្រសួង
– ថ្ងៃបើកទទួលពាក្យចូលរៀន៖ និស្សិតដែលបានប្រឡងជាប់ អាចចុះឈ្មោះចូលរៀន ចាប់ពីថ្ងៃទី០៦ ខែមីនា ដល់ថ្ងៃទី១៥ ខែមីនា ឆ្នាំ២០២១ វេលាម៉ោង ៥:០០ល្ងាច
– ថ្ងៃចូលរៀន៖ បើកបវេសនកាលចូលរៀន ថ្ងៃទី២២ ខែមីនា ឆ្នាំ២០២១ វេលាម៉ោង ៨:០០ព្រឹក
:::::::::::::::::::::::::::::::::::::
ឃ::: ការប្រលង ONLINE
:::::::::::::::::::::::::::::::::::::
ការប្រលងនឹងធ្វើតាម ONLINE។ វិធីភ្ជាប់ និងការចូលប្រលងតាមប្រព័ន្ធអនឡាញនឹង ជូនដំណឹងតាមក្រោយ។ ដូច្នេះ សូមសិស្ស-និស្សិត តាមដានពត៌មានតាមទំព័រ FACEBOOK របស់ក្រសួងសាធារណការ និងដឹកជញ្ជូន និង ទំព័រ FACEBOOK របស់វិទ្យាស្ថានតេជោសែន សាធារណការ និងដឹកជញ្ជូន។
:::::::::::::::::::::::::::::::::::::
ង::: ទំនាក់ទំនង
:::::::::::::::::::::::::::::::::::::
– ០៩៦ ៩៣៣ ៤២៥៣
– ០៩៥ ៤០៤ ៥៩០
– អាសយដ្ឋាន៖ ផ្លូវលេខ ៥៩៨ (ផ្លូវឯកឧត្តម ជា សុផារ៉ា)សង្កាត់ច្រាំងចំរេះ២ ខណ្ឌឬស្សីកែវ រាជធានីភ្នំពេញ(ខាងក្រោយទីស្តីការក្រសួងសាធារណការ និងដឹកជញ្ជូន)។
February 24, 2021
Bitcoin ឡើងថ្លៃខ្ពស់វិញហើយ! លើកនេះឡើងដល់ត្រឹម 51,000ដុល្លារ/bitcoin
តម្លៃរបស់រូបិយវត្ថុអេឡិចត្រូនិក Bitcoin បានងើបឡើងវិញ និងបានកើនដល់ជាង 51,000 ដុល្លារ នៅក្នុង 1 bitcoin ក្រោយពីវាទទួលបានការសរសើរពីអ្នកគ្រប់គ្រងការវិនិយោគដ៏មានឈ្មោះល្បីម្នាក់។ល។
នៅវេលាម៉ោងជាង 11 ថ្ងៃត្រង់ ថ្ងៃទី 24 កុម្ភៈ (ម៉ោងនៅភ្នំពេញ) តម្លៃរបស់ Bitcoin ស្មើនឹង 51,000 ដុល្លារ/bitcoin នេះបើតាមទំព័រ Coinmarketcap.com។ ក្នុងការជួញដូរកាលពីព្រឹកនេះ តម្លៃរបស់វាស្ថិតក្នុងរង្វង់ 48,000 ដុល្លារ/bitcoin។
ការងើបឡើងវិញនេះ បានកើតឡើងក្រោយរយៈពេលជិតមួយសប្ដាហ៍ដែល Bitcoin បានជួបការលំបាក រួមមាន ការធ្លាក់ថ្លៃមកនៅត្រឹម 45,000 ដុល្លារក្នុងថ្ងៃទី 23 កុម្ភៈ ដោយសារតែមានយោបល់ទាក់ទងនឹងកម្រិតនៃភាពផុយស្រួយរបស់តម្លៃ Bitcoin ដែលបានឡើងថ្លៃខ្ពស់ជាងមុន 5 ដង បើធៀបនឹងមួយឆ្នាំកន្លងទៅនេះ។
លោក Jerome Powell ប្រធានធនាគារកណ្ដាលរបស់សហរដ្ឋអាមេរិក
យោងតាមសារព័ត៌មាន Bloomberg ការព្រួយបារម្ភរបស់ក្រុមអ្នកវិនិយោគលើប្រាក់អេឡិចត្រូនិក ទទួលបានភាពកក់ក្ដៅឡើងវិញ បន្ទាប់ពីសេចក្ដីថ្លែងការណ៍កាលពីថ្ងៃទី 23 កុម្ភៈ របស់អគ្គនាយកធនាគារកណ្ដាលអាមេរិក (Fed) Jerome Powell។ បង្ហាញខ្លួននៅចំពោះមុខគណៈកម្មការធនាគារនៃសភាជាន់ខ្ពស់ លោក Jerome Powell បាននិយាយថា នឹងមិនដកហូតគោលនយោបាយរូបិយវត្ថុក្នុងពេលឆាប់នេះឡើយ។
រូបិយវត្ថុអេឡិចត្រូនិក គឺជាទ្រព្យមួយក្នុងចំណោមទ្រព្យដែលទទួលបានផលប្រយោជន៍ច្រើនជាងគេពីគោលនយោបាយរូបិយវត្ថុធូររលុង (Ultra-loose monetary policies) និងកញ្ចប់ថវិកាជំនួយសេដ្ឋកិច្ចដ៏ធំ រាប់ចាប់ពី Covid-19 បានក្លាយជាមហារោគរាតត្បាតពិភពលោក។
កត្តារួមចំណែកមួយទៀតដែលជួយឱ្យតម្លៃរបស់ Bitcoin ងើបឡើងវិញ នោះគឺលោកស្រី Cathie Wood ដែលជាអ្នកគ្រប់គ្រងផ្នែកវិនិយោគដ៏មានឥទ្ធិពលម្នាក់ មកពី Ark Investment Management។ ក្នុងកិច្ចសម្ភាសមួយជាមួយ Bloomberg លោកស្រី Wood និយាយថា «ពិតជាមានការជឿជាក់លើ Bitcoin និងសប្បាយរីករាយនៅពេលបានឃើញមានការកែសម្រួលប្រកបដោយវិជ្ជមាននៅទីនេះ»។
លោកស្រី Cathie Wood
នៅក្នុងអត្ថបទមួយ ក្រុមហ៊ុន Bespoke Investment Group សរសេរថា បើទោះជាបានធ្លាក់ពីចំណុចឯតទគ្គកម្ម (ជាង 59,000 ដុល្លារ/bitcoin) ដែលត្រូវបានបង្កើតឡើងកាលពីពេលថ្មីៗនេះ ការធ្លាក់ថ្លែងនេះរបស់ Bitcoin គឺនៅមានកម្រិតនៅឡើយ។
កាលពីពេលថ្មីៗនេះ ក្រុមអ្នកគាំទ្រ Bitcoin បាននិយាយ Bitcoin គឺជាទ្រព្យដែលត្រូវបានគេទទួលយកច្រើន ដោយសារតែប្រសិទ្ធភាពនៃការទប់ទល់នឹងហានិភ័យនៃបញ្ហាអតិផរណា។ ចំណែកក្រុមមួយទៀតគិតថា នេះគ្រាន់តែជាការរំភើបបណ្ដោះអាសន្នប៉ុណ្ណោះ។ យ៉ាងនេះក្ដី ក្រុមអ្នកគាំទ្រ Bitcoin នៅតែជជែកតវ៉ាជាមួយនឹងក្រុមដែលសង្ស័យអំពីកត្តាលើកទឹកចិត្តនៅពីក្រោយការឡើងថ្លៃរបស់រូបិប័ណ្ណឌីជីថល Bitcoin នេះ៕
ប្រភព៖ Bloomberg
ប្រែសម្រួល៖ បុត្រា
February 24, 2021
Donald Trump រកបាន 1.6ពាន់លានដុល្លារ ក្នុងអាណត្តិប្រធានាធិបតី
អង្គការតាមដានរដ្ឋាភិបាលអាមេរិក ហៅកាត់ថា CREW បាននិយាយថា លោក Trump រកបានប្រាក់ចំនួន 1.6 ពាន់លានដុល្លារនៅក្នុងរយៈពេល 4 ឆ្នាំនៃការកាន់តំណែងប្រធានាធិបតី ប៉ុន្តែ ប្រាក់ទាំងនេះ ភាគច្រើនបានមកពីសកម្មភាពជំនួញដែលលោក Trump ជាអ្នកឈរឈ្មោះ។
ក្រោយពីបានត្រួតពិនិត្យលើរបាយការណ៍ហិរញ្ញវត្ថុរបស់អតីតប្រធានាធិបតីអាមេរិក Donald Trump អង្គការមិនស្វែងរកកម្រៃ Citizens for Responsibility and Ethics (ពលរដ្ឋដើម្បីការទទួលខុសត្រូវ និងក្រមសីលធម៌) ហៅកាត់ថា CREW ដែលមានមូលដ្ឋាននៅវ៉ាស៊ីងតោន បានអះអាងកាលពីថ្ងៃទី 22 ខែកុម្ភៈថា បើទោះជាលោក Trump ទទួលបានការកោតសរសើរច្រើនចំពោះការបរិច្ចាគប្រាក់ខែរបស់លោក ប៉ុន្តែ នោះគ្រាន់តែជាផ្នែកមួយដ៏តូច បើធៀបនឹងប្រាក់ចំណូលដែលក្រុមហ៊ុនរបស់លោករកបាននៅក្នុងពេលលោកកំពុងកាន់អំណាច។
CREW ដែលជាអង្គការក្រៅរដ្ឋាភិបាល ត្រូវបានបង្កើតឡើងពីឆ្នាំ 2003 ដើម្បីតាមដានលើក្រមសីលធម៌ និងការទទួលខុសត្រូវលើការបកស្រាយរបស់រដ្ឋាភិបាលអាមេរិក បានបញ្ជាក់ថា ខ្ទង់ប្រាក់យ៉ាងហោច 1,613,583,013 ដុល្លារ ដែលបានមកពីក្រុមហ៊ុន Trump Organization រួមនឹងខ្ទង់ចំណូលដទៃមួយចំនួនទៀត ត្រូវបានលោក Trump ប្រកាស។
ជាងនេះ លោក Trump ក៏ធ្លាប់បានបង្ហើបឱ្យដឹងអំពីប្រាក់ចំណូលលើសពីខ្ទង់ខាងលើទៅទៀត ពោលគឺ 1,790,614,202 ដុល្លារ ប៉ុន្តែ រូបភាពនៃការប្រកាសទ្រព្យសម្បត្តិនេះ ហាក់មានភាពស្រពេច ស្រពិល។
Trump National Golf Club នៅ Virginia
ខ្ទង់ចំណូលមួយភាគធំរបស់ Trump Organization បានមកពីអចលនទ្រព្យល្បីឈ្មោះមួយចំនួន ដូចជា តំបន់លម្ហែកាយ Mar-a-Lago, សណ្ឋាគារអន្តរជាតិ Trump នៅរដ្ឋធានី វ៉ាស៊ីងតោន និងទីលានវាយកូនគោលមួយចំនួននៅ Doral ក្នុងរដ្ឋ Florida, Bedminster នៅ New Jersey និង Trump National នៅ Virginia។
CREW យល់ឃើញថា ភាគច្រើននៃប្រាក់ចំណូលនេះ បានមកពីក្រុមអ្នកជំនួញដែលចង់ទទួលបានការយកចិត្តទុកដាក់ និងផលប្រយោជន៍ពីប្រធានាធិបតី Trump ដោយការ «នៅជាមួយ» នឹងអចលនទ្រព្យដែលមានឈ្មោះលោក Trump។
របាយការណ៍របស់ CREW ត្រូវបានលើកឡើងនៅពេលតុលាការកំពូលបានចេញសេចក្ដីសម្រេច បង្គាប់ឱ្យលោក Trump ប្រគល់ឯកសារប្រកាសពន្ធមកឱ្យការិយាល័យរដ្ឋអាជ្ញានៅ New York។ ប៉ុន្តែ អតីតប្រធានាធិបតី Trump បានរិះគន់លើបញ្ហានេះ និងបាននិយាយថា នឹងធ្វើការតវ៉ាជាបន្តទៀត។
ក្នុងគ្រាទើបតែបានឡើងកាន់អំណាច CREW បានដាក់ពាក្យប្ដឹងលោក Trump ដោយចោទប្រកាន់ថា បានរំលោភរដ្ឋធម្មនុញ្ញ ព្រោះតែបន្តទទួលយកខ្ទង់ប្រាក់ទូទាត់ពីរដ្ឋាភិបាលបរទេសនានា ដោយពឹងលើសកម្មភាពជំនួញដែលក្រុមគ្រួសាររបស់លោក Trump កាន់កាប់៕
ប្រភព៖ Independent
ប្រែសម្រួល៖ បុត្រា
February 24, 2021
ទិដ្ឋភាពដ៏ត្រជាក់ភ្នែកនៃជ្រោះទឹកធ្លាក់ Niagara Falls ដែលកំពុងកកស្ទើរទាំងស្រុង
ពេញមួយឆ្នាំ ទឹកធ្លាក់ Niagara Falls តែងតែទាក់ទាញភ្ញៀវទេសចរណ៍គ្រប់រូប មិនថារដូវណា ជារដូវណានោះឡើយ ក្នុងនោះ នារដូវរងា Niagara Falls តែងមានទិដ្ឋភាពពេញដោយមន្តស្នេហ៍យ៉ាងចម្លែក។
កាលពីថ្ងៃទី 21 កុម្ភៈ ការធ្លាក់ព្រឹលនៅភាគខាងជើងរដ្ឋ New York នៃសហរដ្ឋអាមេរិក បាននាំឱ្យទិដ្ឋភាពនៅ Niagara Falls កាន់តែអស្ចារ្យ។ ព្រឹលធ្លាក់ បានធ្វើឱ្យទឹកស្ទើរទាំងអស់របស់ជ្រោះ Niagara Falls ត្រូវកក នាំឱ្យស្រទាប់ថ្មតូចធំទាំងឡាយនៅជុំវិញ ត្រូវគ្របដណ្ដប់ដោយពណ៌សក្បុស ព្រមទាំងមានលេចរូបរងឥន្ទធនូ 7ពណ៌គួរឱ្យគយគន់ផងដែរ។
អាកាសធាតុនៅ Bufalo នៃរដ្ឋ New York ត្រូវបានព្យាករថានឹងបន្តចុះត្រជាក់ខ្លាំងក្នុងរយៈពេលច្រើនថ្ងៃទៀត។ ខាងក្រោមនេះគឺជាទិដ្ឋភាពមួយចំនួន ស្ដីអំពីសម្រស់ដ៏ស្រស់ត្រកាលរបស់ Niagara Falls ដែលត្រូវបានថតដោយអ្នកសារព័ត៌មានរបស់ Reuters កាលពីថ្ងៃទី 21 ធ្នូ ឆ្នាំ2021។
ទិដ្ឋភាពនៃផ្លូវដើរនៅទីតាំងទេសចរណ៍ Niagara Falls

ប្រភព៖ Reuters
ប្រែសម្រួល៖ បុត្រា
February 24, 2021