សង្គម និងសេដ្ឋកិច្ច - La Reine Media

LG ចេញគំនិតច្នៃប្រឌិតថ្មីសន្លាង ទ្វារកញ្ចក់ LED បិទ-បើកស្វ័យប្រវត្តិ ដាក់ផ្ទាំងពាណិជ្ជកម្មអ្វីក៏បាន

កាលពីពេលថ្មីៗនេះ ក្រុមហ៊ុន LG បានប្រកាសចេញគំនិតច្នៃប្រឌិតថ្មីសន្លាង ទ្វារបិទ-បើកស្វ័យប្រវត្តិ ប្រភេទកញ្ចក់LED ដូចគ្នានឹងអេក្រង់ស្មាតហ្វូន ឬកញ្ចក់របស់ទូរទស្សន៍អ៊ីចឹងដែរ។

បើយោងតាមការបញ្ជាក់ពីអ្នកដឹកនាំជាន់ខ្ពស់របស់ LG បានឱ្យដឹងថា LG តែងតែនាំមកនូវគំនិត និងស្នាដៃថ្មីសន្លាងជានិច្ច ដើម្បីជាប្រយោជន៍ដល់សាធារណជន និងដើម្បីសម្រួលដល់ការរស់នៅប្រចាំថ្ងៃ។

សូមជម្រាបផងដែរថា ទ្វារកញ្ចក់ LED បិទ-បើកស្វ័យប្រវត្តិ ដែលមិនធ្លាប់មានពីមុនមកមួយនេះ អាចអនុញ្ញាតឱ្យក្រុមហ៊ុននានា ដាក់ផ្ទាំងផ្សាយពាណិជ្ជកម្ម អ្វីក៏បាន និងថែមទាំងអាចមើលបានទាំងសងខាងទៀតផង។

តែយ៉ាងណាក្ដី គំនិតដ៏អស្ចារ្យខាងលើនេះ ប្រភពព័ត៌មាន មិនទាន់បានបញ្ជាក់ថា តើវានឹងមកដល់ទីផ្សារសកល នៅពេលណានោះទេ?៕

March 2, 2021

កុមារីម្នាក់ត្រូវគ្រូចាប់ខ្មោចវាយរហូតដល់ស្លាប់ នៅក្នុងពិធីបណ្ដេញព្រលឹងបិសាច

ក្មេងស្រីម្នាក់អាយុ 9 ឆ្នាំម្នាក់ ត្រូវម្ដាយ និងគ្រូមន្តអាគមវាយតប់ជាបន្តបន្ទាប់រហូតនាំឱ្យបាត់បង់ជីវិត ក្នុងពេលពួកគេធ្វើពិធី «ប្ដូរព្រលឹង» នៅទីរួមស្រុក Delgoda នៃប្រទេសស្រីលង្កា។

នគរបាលស្រីលង្កា កាលពីថ្ងៃទី 1 មីនា បានឱ្យដឹងថា បានចាប់ខ្លួនជនសង្ស័យ 2 នាក់ ដែលទាក់ទិននឹងការស្លាប់របស់ក្មេងស្រីខាងលើ រួមមាន គ្រូមន្តអាគម និងម្ដាយរបស់កុមារីនេះ។ ជនសង្ស័យទាំង 2 នាក់នេះ ត្រូវបានគេជឿថា បានវាយតប់កុមារីរងគ្រោះរហូតដល់បាត់បង់ជីវិត នៅក្នុងពិធីបណ្ដេញព្រាយបិសាចនៅក្នុងទីរួមស្រុក Delgoda មានចម្ងាយពីរដ្ឋធានី Colombo ប្រមាណ 40 គីឡូម៉ែត្រទៅទិសឦសាន កាលពីចុងសប្ដាហ៍កន្លងទៅ។

តុលាការបានចេញបញ្ជាឱ្យឃុំខ្លួនបណ្ដោះអាសន្នលើជនសង្ស័យរហូតដល់ថ្ងៃកាត់ក្ដីដែលនឹងត្រូវធ្វើឡើងនៅថ្ងៃទី 12 មីនាខាងមុខ។ Ajith Rohana អ្នកនាំពាក្យរបស់នគរបាលក្នុងតំបន់ ឱ្យដឹងថា ម្ដាយរបស់កុមារីរងគ្រោះជឿថា កូនស្រីរបស់ខ្លួនត្រូវខ្មោចចូល ទើបបាននាំនាងទៅជួបគ្រូមន្តអាគមដើម្បី «បណ្ដេញព្រលឹងខ្មោច»។

Ajith Rohana បន្ថែមថា ដំបូង គ្រូចាប់ខ្មោចបានលាបប្រេងខ្យល់លើដងខ្លួនរបស់កុមារីនេះ ហើយក្រោយមកក៏យករំពាត់វាយនាងរហូតដល់សន្លប់។ ក្មេងស្រីរងគ្រោះក៏ត្រូវបានបញ្ជូនទៅកាន់មន្ទីរពេទ្យដើម្បីសង្គ្រោះបន្ទាន់ ប៉ុន្តែ មិនបានប៉ុន្មានម៉ោងក៏បានដាច់ខ្យល់ស្លាប់។ នគរបាលបានធ្វើកោសល្យវិច័យសាកសពកាលពីថ្ងៃទី 1 មីនា។

ប្រភពព័ត៌មានពីប៉ូលិសឱ្យដឹងថា គ្រូចាប់ខ្មោចនេះ បានចូលរួមធ្វើពិធីបណ្ដេញព្រលឹងខ្មោចព្រាយបិសាចជាញឹកញាប់ក្នុងអំឡុងច្រើនខែចុងក្រោយនេះ។ ប៉ូលិសកំពុងស្រាវជ្រាវបន្តដើម្បីឱ្យដឹងថា តើមានអ្នកណាទៀតដែលជាជនរងគ្រោះនៃពិធីឆ្កួតឡប់នេះដែរ ឬអត់៕

ប្រភព៖ AP
ប្រែសម្រួល៖ បុត្រា

March 2, 2021

គិតម៉េចឥឡូវ? តាមមួយណា.. ហ៊ិន ចាន់និរ័ត្ន តាមបេះដូង រឺតាមខួរក្បាល?

ទំនាក់ទំនងរវាងពិធីការិនីសាច់សម៉ដ្ឋខ្ចី ហ៊ិន ចាន់និរ័ត្ន និងតារាចម្រៀងប្រុស Original Song ចេន បានកំពុងធ្វើឱ្យមហាជនផ្ទុះការសង្ស័យពីថ្ងៃទៅមួយថ្ងៃ។ យ៉ាងណាមិញ ទន្ទឹងមានការចាប់អារម្មណ៍បែបនេះ ពិធីការិនីស្រីរូបនេះ កាន់តែបង្ហោះសារប្លែកៗ ដែលធ្វើឱ្យគ្រប់គ្នាចាប់អារម្មណ៍ពីទំនាក់ទំនងរបស់កញ្ញាកាន់តែខ្លាំងថែមទៀត។

ថ្មីៗនេះ កញ្ញា ហ៊ិន ចាន់និរ័ត្ន បានបង្ហោះសារថា «តាមបេះដូង រឺតាមខួរក្បាល?»។ មួយឃ្លានេះ រឹតតែធ្វើឱ្យអ្នកគាំទ្រចង់ដឹងពីចម្លើយពិតរបស់កញ្ញា ឬមួយក៏ជិតមានដំណឹងល្អហើយមែនទេ។ មានអ្នកលេងបណ្ដាញសង្គមហ្វេសប៊ុកជាច្រើនចូលទៅខំមិនរូបរបស់កញ្ញាថា «តាមបងចេន» អ្នកផ្សេងទៀតនិយាយថា «បើមិនចង់ឈឺចាប់ខ្លាំងនោះទេទាំងពីរនឹងមិនអាចខ្វះមួយណាបានឡើង បេះដូងនីរ័ត្នជាទាមទារនៃក្តីស្រលាញ់ ចំនែកខួរក្បាលនីរ័ត្ន ជាអ្នកថ្លឹងថ្លែងភាពវិជ្ជមាននិងភាពអវិជ្ជមាន»។ នៅមានអ្នកផ្សេងទៀតនិយាយបែបនេះ «ព្រោះខួរក្បាលមិនល្អ ទើបតាមបេះដូង»។

យ៉ាងណាមិញ អ្នកលេងបណ្ដាញសង្គមហ្វេសប៊ុក ក៏ដូចជាអ្នកគាំទ្រជាច្រើន ហាក់បីដូចជាចង់ឱ្យទំនាក់ទំនងរវាង ហ៊ិន ចាន់និរ័ត្ន និងតារាចម្រៀងប្រុស Original Song ចេន ក្លាយជាទំនាក់ទំនងស្នេហាពិតប្រាកដ។ តែមកទល់ពេលនេះ តារាស្រីរូបនេះ នៅមិនទាន់មានការបង្ហើបឱ្យច្បាស់ពីទំនាក់ទំនងរបស់ខ្លួននោះទេ។

March 2, 2021

ស្ថាបនិករបស់ Bitcoin កំពុងកាន់កាប់ 1លាន Bitcoin តម្លៃរាប់ម៉ឺនលានដុល្លារអាមេរិក

ក្នុងរយៈពេលជាង 10 ឆ្នាំ រាប់ចាប់ពី Bitcoin បានបង្ហាញខ្លួនលើកដំបូង អត្តសញ្ញាណរបស់ស្ថាបនិកនៅពីក្រោយរូបិយវត្ថុអេឡិចត្រូនិកនេះ នៅតែជាអាថ៌កំបាំងសម្រាប់ពិភពលោកទាំងមូល។

ឆ្នាំ 2007 សេដ្ឋកិច្ចពិភពលោកធ្លាក់ចូលទៅក្នុងវិបត្តិធ្ងន់ធ្ងរ ដោយមូលហេតុដំបូងគឺការដួលរលំរបស់ Lehman Brothers ដែលជាធនាគារធំជាងគេលំដាប់ទីបួននៅសហរដ្ឋអាមេរិកកាលពីជំនាន់នោះ។ បន្ទាប់មកគឺជាការដាំក្បាលចុះរបស់ផ្សារមូលបត្រ និងធនាគារជាច្រើន រួមនឹងបណ្ដាក្រុមហ៊ុនធំៗ ត្រូវក្ស័យធនជាបន្តបន្ទាប់។ នៅក្នុងអំឡុងពេលនោះ ឈ្មោះ Bitcoin-Satoshi Nakamoto បានបង្ហាញខ្លួនជាលើកដំបូង។

នៅក្នុងខែតុលា ឆ្នាំ 2007 ជាលើកដំបូង Bitcoin ត្រូវបានរំលឹកដល់នៅក្នុងអត្ថបទមួយនិយាយអំពីរបៀបទូទាត់របស់បុគ្គលម្នាក់ មានឈ្មោះថា Satoshi Nakamoto។

យោងតាមឯកសារ P2P Foundation បុគ្គលឈ្មោះ Satoshi Nakamoto បានហៅខ្លួនឯងថាជាបុរសម្នាក់មកពីប្រទេសជប៉ុន កើតឆ្នាំ 1975។ ប៉ុន្តែ មានមតិជាច្រើននិយាយថា បុរស់នេះមិនមែនមកពីប្រទេសជប៉ុននោះទេ។

មូលហេតុដែលថាបុរសនេះមិនមែនជាមនុស្សមកពីជប៉ុន នោះគឺ ទីមួយ អត្ថបទសាធារណៈរបស់ Satoshi សរសេរជាភាសាអង់គ្លេសយ៉ាងស្ទាត់ជំនាញដូចទៅនឹងជនជាតិអង់គ្លេសពិត។ ទីពីរ ពេលវេលាឈប់សម្រាករបស់បុរសនេះក៏ផ្ទុយពីល្វែងម៉ោងរបស់មនុស្សម្នាក់ដែលរស់នៅក្នុងប្រទេសជប៉ុន។

ហេតុអ្វីបានជា Satoshi Nakamoto មិនបង្ហាញអត្តសញ្ញាណពិតរបស់ខ្លួន? មានសម្មតិកម្មជាច្រើនត្រូវបានលើកឡើង ក្នុងនោះមានមូលហេតុដូចជា «ដើម្បីចៀសវាងការតាមដានរបស់រដ្ឋាភិបាលនានា» «ដើម្បីលើកកម្ពស់ភាពអាថ៌កំបាំងរបស់ប្រព័ន្ធជួញដូរ» ឬ «ដើម្បីចៀសវាងការធ្លាក់ថ្លៃរបស់ប្រាក់ Bitcoin»។ល។

ផ្សារជួញដូររូបិយវត្ថុអេឡិចត្រូនិក Coinbase សង្កត់ធ្ងន់ថា៖ «បើសិនជាអត្តសញ្ញាណរបស់បុគ្គលិអាថ៌កំបាំងនេះត្រូវបានបង្ហើបឱ្យដឹង នោះតម្លៃរបស់ Bitcoin អាចដាំក្បាលចុះ»។

ឯកសាររបស់ Coinbase ក៏បានឱ្យដឹងថា Satoshi Nakamoto បច្ចុប្បន្ន កាន់កាប់ Bitcoin ជាង 1 លានឯណោះ។ បើគណនាទៅតាមតម្លៃ 50,000 ដុល្លារអាមេរិក/Bitcoin កាលពីខែកុម្ភៈ ដូច្នេះ Bitcoin ចំនួនជាង 1 លាននេះ មានតម្លៃស្មើនឹងជាង 5 ម៉ឺនលាន (50,000,000,000) ដុល្លារអាមេរិក៕

ប្រភព៖ BI, Republicworld
ប្រែសម្រួល៖ បុត្រា

March 2, 2021

ដួង ម៉ានិច បង្ហាញដៃគូថ្មីនិយាយថា «ច្នៃខ្លួនឯងអោយមានតម្លៃ ទើបអ្នកដ៏ទៃត្រូវការយើង»

តារាសម្ដែងស្រី ដួង មានិច ត្រូវបានមហាជនចាប់អារម្មណ៍ចំពោះរូបភាពថ្មី ៣ សន្លឹកនឹងសារទាក់ទាញយ៉ាងខ្លាំងនៅលើបណ្ដាញសង្គមហ្វេសប៊ុក។ ម្ដងនេះកញ្ញាមិនបានបង្ហោះរូបភាពស្និតស្នាលកៀកកើយជាមួយ លោក បុត្រ នោះទេ តែជាតួប្រុសវ័យក្មេង និងជា Vlogger ថែមទៀត មានឈ្មោះ PuthyChhat VanLy។

តារាស្រីល្បីឈ្មោះរូបនេះ បានបង្ហោះសារថា « ច្នៃខ្លួនឯងអោយមានតម្លៃ ទើបអ្នកដ៏ទៃត្រូវការយើង។ បើនៅតែបន្តការអភិវឌ្ឍន៍ខ្លួនឯង ភាពជោគជ័យដែលវាកំពុងរត់មករកយើងនោះវាក៏នៅតែបន្តរត់មករកយើងដូចគ្នា PuthyChhat VanLy»។ សារនេះគេមិនបានដឹងប្រាកដថា កញ្ញាកំពុងលើកទឹកចិត្តដល់ដៃគូក្នុងរូបភាព ឬយ៉ាងណានោះទេ។

បន្ទាប់គេឃើញតារាស្រីរូបនេះ បង្ហោះរូបភាពជាមួយតួប្រុសថ្មីហើយនោះ អ្នកគាំទ្រគ្រប់គ្នា ក៏តាម Comment រូបកញ្ញានិង លោក បុត្រ នៅពីក្រោមរូបភាពនោះថែមទៀត៕

March 2, 2021

សណ្ឋាគារអវកាសដំបូងគេបង្អស់ក្នុងពិភពលោក នឹងហោះចូលគន្លងគោចរចាប់ពីឆ្នាំ 2025

ការសាងសង់សណ្ឋាគារអវកាសដំបូងគេបង្អស់ក្នុងពិភពលោក កំពុងស្ថិតក្នុងដំណាក់កាលចាប់ផ្ដើម ហើយវាគ្រោងនឹងត្រូវបានបញ្ជូនឡើងទៅកាន់គន្លងគោចរកម្ពាស់ទាបរបស់ផែនដី នៅក្នុងឆ្នាំ 2025 ខាងមុខ។

ទីភ្នាក់ងារសារព័ត៌មានអង់គ្លេស Daily Mail កាលពីថ្ងៃទី 1 មីនា ឆ្នាំ 2021 បានចុះផ្សាយថា សណ្ឋាគារអវកាសដែលមានឈ្មោះថា Voyager Station នេះ ត្រូវបានអភិវឌ្ឍដោយក្រុមហ៊ុន OAC របស់សហរដ្ឋអាមេរិក។ Voyager Station នឹងមានរូបរាងជារង្វង់មូលដ៏ធំ ដោយមានអង្កត់ផ្ចិត 61 ម៉ែត្រ ដែលក្នុងនោះមានភោជនីយដ្ឋាន រោងកុន ស្ប៉ា និងបន្ទប់សម្រាប់ទេសចរចំនួន 400 នាក់។

នៅលើ Voyager Station ក៏មានកាប៊ីនភ្ជាប់បន្ថែមនៅជុំវិញសណ្ឋាគារ ដែលគ្រោងនឹងលក់ទៅឱ្យទីភ្នាក់អវកាសអាមេរិក (NASA) និងអឺរ៉ុប (ESA) សម្រាប់ការសិក្សាស្រាវជ្រាវ។ ក្រុមហ៊ុន OAC ឱ្យដឹងថា គម្រោងនេះនឹងត្រូវបើកដំណើរការទទួលភ្ញៀវចាប់ពីឆ្នាំ 2027។

OAC មិនទាន់ប្រកាសអំពីខ្ទង់ចំណាយនៅក្នុងការសាងសង់ Voyager Station ប៉ុន្តែ ក្រុមហ៊ុននេះបង្ហើបឱ្យដឹងថា ការចំណាយលើការសាងសង់នឹងអាចកាត់បន្ថយបានច្រើន ដោយសារតែមធ្យោបាយដឹកជញ្ជូនពីផែនដីអាចប្រើប្រាស់ឡើងវិញ ដូចជាកាំជ្រួច Falcon 9 និងយានអវកាស Starship របស់ក្រុមហ៊ុន SpaceX ជាដើម។

ខ្ទង់ចំណាយសម្រាប់ការដឹកជញ្ជូនសម្ភារឡើងទៅកាន់ទីអវកាសគឺ 8,000ដុល្លារ/គីឡូក្រាម ប៉ុន្តែ ការប្រើប្រាស់ Falcon 9 ការចំណាយនេះអាចធ្លាក់មកនៅត្រឹម 2,000ដុល្លារ/គីឡូក្រាម៕

ប្រភព៖ Daily Mail
ប្រែសម្រួល៖ បុត្រា

March 2, 2021

ធ្វើអ៊ីចឹងក៏បានដែរឬ? ស្ត្រីម្នាក់មិនពាក់ម៉ាស់ការពារ សន្តិសុខបណ្ដេញចេញពីហាង ស្រាប់តែដោះ…យកមកពាក់តែម្ដង

ឃ្លីបវីដេអូដ៏គួរឱ្យភ្ញាក់ផ្អើលមួយនេះ ត្រូវបានថតនៅក្នុងហាងស៊ូភើរម៉ាខេតមួយ ដែលមានឈ្មោះថា Pick n Pay ក្នុងប្រទេសអាហ្វ្រិកខាងត្បូង ដោយមានស្ត្រីម្នាក់ កំពុងដើរទិញទំនិញនៅក្នុងហាង និងមិនបានពាក់ម៉ាស់អនាម័យការពារអ្វីទាំងអស់។ នៅពេលដែលខាងបុគ្គលិកសន្តិសុខប្រទះឃើញ ក៏បានចូលមកដាស់តឿន និងប្រាប់ថា នឹងមិនអនុញ្ញាតឱ្យប្រើ សេវាកម្មហាងនេះទៀតទេ បើនាងនៅតែមិនព្រមពាក់ម៉ាស់អនាម័យការពារ តែនាងហាក់ដូចជាគ្មានឥរិយាបថភិតភ័យ ឬញាប់ញ័រអ្វីទាំងអស់ ព្រមទាំងអះអាងថា មិនបានយកម៉ាស់មកជាមួយទៀតផង។

សូមរំឭកថា កាលពីឆ្នាំ2020 លោក សៃរ៊ីល រ៉ាម៉ាហ្វូសា ប្រធានាធិបតីនៃប្រទេសអាហ្វ្រិកខាងត្បូង បានថ្លែងថា អ្នកណាដែលមិនពាក់ម៉ាស់អនាម័យការពារនៅក្នុងទីសាធារណៈ គឺនឹងមានកំហុសស្មើនឹងទោសឧក្រិដ្ឋ អាចត្រូវចាប់ខ្លួន និងអនុវត្តតាមនីតិវិធីច្បាប់។

បុគ្គលិកសន្តិសុខរូបនោះ បានព្យាយាមនិយាយបញ្ចុះបញ្ចូល ឱ្យនាងព្រមពាក់ម៉ាសកាពារ តែនៅតែមិនទទួលបានការសហការអំពីស្ត្រីរូបនោះឡើយ។ ទីបំផុត ក៏ប្រើក្បាច់ចុងក្រោយ ដោយគំរាមថា បើនៅតែមិនព្រមធ្វើតាមរបៀបវិន័យទេ គេនឹងនាំខ្លួននាង ចេញពីហាងនេះភ្លាមតែម្ដង…។

ភ្លាមៗនោះឯង ស្ត្រីរូបនោះ ក៏ចាប់ផ្ដើមធ្វើរឿងមួយ ដែលគ្មានអ្នកណានឹកស្មានដល់ គឺនាងបានលូកដៃចូលទៅក្នុងសំពត់រ៉ូប ដែលនាងកំពុងស្លៀក ចាត់ការដោះខោលីអូពណ៌ខ្មៅចេញមក ហើយលើកយកមកពាក់នៅលើផ្ទៃមុខ ដើម្បីជំនួសឱ្យម៉ាស់អនាម័យការពារបណ្ដោះអាសន្ន បន្ទាប់ពីនោះ ក៏លើកមេដៃ ដាក់ភ្នាក់សន្តិសុខនោះ ក្នុងទំនងជាសំណួរថា ប៉ុនហ្នឹងអូខេនៅ? ក្រោមក្ដីភ្ញាក់ផ្អើល និងហួសចិត្តរបស់អ្នកដែលនៅក្បែរៗនោះគ្រប់គ្នា។

https://www.youtube.com/watch?v=Aw1eJOipLG0

ទិដ្ឋភាពទាំងនេះ បានក្លាយជាឃ្លិបវីដេអូដ៏សែនហួសចិត្តមួយ នៅក្នុងបណ្ដាញសង្គមអនឡាញ អ្នកដែលបានឃើញជាច្រើននាក់ បានភ្ញាក់ផ្អើល និងមិនយល់ស្របចំពោះទង្វើរបស់ស្ត្រីរូបនោះឡើយ ដោយអ្នកខ្លះនិយាយថា “គួរឱ្យស្អប់ខ្ពើម”, “នៅផ្ទះ ហើយទិញអីវ៉ាន់តាមអនឡាញវិញទៅ បើមិនចូលចិត្តពាក់ម៉ាស់ការពារបែបនេះ”, “ពួកគេមិនគួរឱ្យនាងចូលទៅក្នុងស៊ូភើរម៉ាខេត ដោយមិនបានពាក់ម៉ាស់ការពារបែបនេះតាំងពីដំបូង…គួរឱ្យខ្ពើមឆ្អើមបំផុត”៕

ប្រភព៖ ទីភ្នាក់ងារព័ត៌មាន dailystar
ប្រែសម្រួលដោយ ទិទីតំតាតូ

March 1, 2021

«ត្រឡប់» មាស សុខសោភា ក្នុងបទចម្រៀងឡើងកម្សត់ មកមើលសកម្មភាពក្រៅឆាកផ្ទុះសំណើចយ៉ាងនេះ

រាជិនីសំឡេងធម្មជាតិ មាស សុខសោភា បានទម្លាយរូបភាពជាច្រើនសន្លឹក ដែលឃើញពីសកម្មភាពថត MV និង Short Film បទ«ត្រឡប់» ជាបទដំបូងនៅក្នុងផលិតកម្មរាម។

តាមរយៈ MV បានបញ្ចាំងឱ្យឃើញសាច់រឿងយ៉ាងកម្សត់រវាងស្នេហាប្រុសស្រីមួយគូ ដែលមានក្ដីស្រឡាញ់ស្មោះនឹងគ្នា។ ក៏ប៉ុន្ដែអ្វីគ្រប់យ៉ាងហាក់បីដូចជាក្ដីស្រម៉ៃ ដែលធ្វើឱ្យមនុស្សស្រីម្នាក់ត្រូវរងចាំការត្រឡប់មកវិញរបស់គូស្នេហ៍ ដើម្បីបន្ដក្ដីសន្យាម្ដងទៀត ដែលថាស្រឡាញ់គ្នាមិនលែងដៃ។

សាច់រឿងមើលទៅកម្សត់ តែសកម្មភាពក្រៅឆាកថតសម្ដែងវិញ ម្នាក់ផ្ទុះសំណើចមិនបាត់ឡើយ។ ចង់ដឹងថា សកម្មភាពបែបណាខ្លះ ទស្សនារូបភាពខាងក្រោមនេះ៖

February 27, 2021

ដេញថ្លៃត្បូងពេជ្រទម្ងន់ 242ការ៉ាត 1គ្រាប់ តម្លៃបឋម 2លានដុល្លារអាមេរិក

ពេជ្រមិនទាន់ច្នៃដែលមានទម្ងន់ 242 ការ៉ាតដ៏កម្រមួយគ្រាប់របស់ក្រុមហ៊ុនរុករកត្បូងពេជ្រ Alrosa នៅរុស្ស៊ី នឹងដាក់លក់ក្នុងព្រឹត្តិការណ៍ដេញថ្លៃ ដែលនឹងត្រូវធ្វើឡើងនៅទីក្រុង Dubai នៃប្រទេសអារ៉ាប់រួម (UAE) ក្នុងថ្ងៃទី 22 មីនាខាងមុខ។

នៅក្នុងសេចក្ដីប្រកាសមួយកាលពីថ្ងៃទី 26 កុម្ភៈ ក្រុមហ៊ុន Alrosa ឱ្យដឹងថា ត្បូងពេជ្រនេះមានទំហំប៉ុនពងមាន់តូចមួយគ្រាប់ ហើយវានឹងត្រូវដាក់លក់ដេញថ្លៃ ដោយចាប់ផ្ដើមពីតម្លៃ 2 លានដុល្លារអាមេរិក។ នេះគឺជាពេជ្រមួយគ្រាប់ក្នុងចំណោមត្បូងពេជ្រធំជាងគេដែល Alrosa បានរកឃើញនៅក្នុងសតវត្សរ៍នេះ។

លោក Evgeny Agureev នាយកផ្នែកជំនួញរបស់ Alrosa បានអះអាងថា គ្រាប់ពេជ្រដែលមានទម្ងន់ចាប់ពី 100 ការ៉ាតឡើងទៅគឺពិតជាកម្របានជួបខ្លាំងណាស់ ហើយវាក៏កម្រនឹងបានឃើញគេដាក់លក់ដេញថ្លៃផងដែរ។

5 ឆ្នាំមុន ពេជ្រមិនទាន់ច្នៃមួយគ្រាប់ដែលមានទម្ងន់ស្រដៀងគ្រាប់ពេជ្រខាងលើក ក៏ត្រូវបានគេដាក់លក់ដេញថ្លៃ។ នេះគឺជាព្រឹត្តិការណ៍លក់ដេញថ្លៃជាអន្តរជាតិលើកទី 100 របស់ Alrosa។

Alrosa គឺជាក្រុមហ៊ុនរុករកត្បូងពេជ្រមិនទាន់ច្នៃធំជាងគេបង្អស់ក្នុងពិភពលោក បើគិតអំពីទំហំនៃគ្រាប់ពេជ្រទាំងឡាយដែលក្រុមហ៊ុននេះបានរកឃើញ។ បច្ចុប្បន្ន Alrosa កំពុងប្រកួតប្រជែងនឹងក្រុមហ៊ុនបុត្រសម្ព័ន្ធផ្នែកពាណិជ្ជកម្មពេជ្រ De Beers របស់ក្រុមហ៊ុន Anglo American មកពីចក្រភពអង់គ្លេស។ De Beers គឺជាក្រុមហ៊ុនផ្គត់ផ្គង់ពេជ្រមិនទាន់ច្នៃធំជាងគេបង្អស់ក្នុងពិភពលោក បើគិតអំពីតម្លៃ៕

ប្រភព៖ RT
ប្រែសម្រួល៖ បុត្រា

February 27, 2021

CEO របស់ Coinbase ទទួលបានជោគជ័យ បន្ទាប់ពីចាត់ទុក Bitcoin ជា «គូស្នេហ៍ដំបូង»

ដូចដែលបានរាប់រាប់ក្នុងអត្ថបទមុន Coinbase ដែលជាផ្សារជួញដូររូបិយវត្ថុអេឡិចត្រូនិក (ឌីជីថល) ធំជាងគេ និងមានអាយុកាលចាស់ជាងគេនៅសហរដ្ឋអាមេរិក ទើបតែបានដាក់ពាក្យស្នើសុំធ្វើ IPO (បោះផ្សាយលក់មូលបត្រជាសាធារណៈដំបូង) ជាផ្លូវការ។ Coinbase គឺជាថ្នាលដ៏ធំមួយដែលជួយឱ្យអតិថិជនអាចទិញ លក់ និងរក្សាទុករូបិយវត្ថុឌីជីថល ដូចជា Bitcoin និង Ether ជាដើម។ Coinbase ត្រូវបានគេចាត់ទុកថាជាផ្សារឈ្មួញកណ្ដាលផ្នែករូបិយវត្ថុឌីជីថល ដែលប្រកួតប្រជែងផ្ទាល់់ជាមួយនឹង Coinmama, CEX.IO និង Gemini។ យោងតាម CNN ផ្សារជួញដូររូបិយវត្ថុអេឡិចត្រូនិក Coinbase រៀបចំគម្រោងធ្វើ IPO នៅខែធ្នូខាងមុខ។

ព័ត៌មាននៅលើគេហទំព័ររបស់ Coinbase ឱ្យដឹងថា មានអ្នកវិនិយោគលើរូបិយវត្ថុឌីជីថល ចំនួន 43 លាននាក់ កំពុងប្រើប្រាស់ Coinbase ដែលការជួញដូរនេះមានតម្លៃសរុបស្មើនឹង 455 ពាន់លានដុល្លារអាមេរិក និងកាន់កាប់ទ្រព្យសរុប 9 ម៉ឺនលានដុល្លារនៅទូទាំងប្រព័ន្ធ Coinbase។

Coinbase ត្រូវបានបង្កើតឡើងដោយ Brian Armstrong និង Fred Ehrsam កាលពីខែមិថុនា ឆ្នាំ 2012។ ក្រុមហ៊ុននេះមានការិយាល័យកណ្ដាលនៅទីក្រុង San Francisco រដ្ឋ California សហរដ្ឋអាមេរិក។ បច្ចុប្បន្ន Brian បានក្លាយជាមហាសេដ្ឋីវ័យក្មេងជាងគេម្នាក់នៅសហរដ្ឋអាមេរិក ដោយមានទ្រព្យ 6.5 ពាន់លានដុល្លារ នេះបើតាមស្ថិតិរបស់សារព័ត៌មាន Forbes។ ក្រោយពីប្រមូលទុនបាន 300 លានដុល្លារពីមូលនិធិវិនិយោគ Tiger Global កាលពីឆ្នាំ 2018 ក្រុមហ៊ុន Coinbase ត្រូវបានកំណត់ថ្លៃត្រឹម 8 ពាន់លានដុល្លារ។

Brian Armstrong ចាត់ទុក Bitcoin ជា «គូស្នេហ៍ដំបូង»

Brian Armstrong កើតថ្ងៃទី 25 មករា ឆ្នាំ 1983 គឺជា CEO បច្ចុប្បន្នរបស់ Coinbase ដែលជាផ្សារជួញដូរ Bitcoin ធំបំផុត និងពេញនិយមបំផុតក្នុងពិភពលោក។ បុរសនេះធ្លាប់បានបង្ហាញវត្តមានជាច្រើនលើកនៅក្នុងបញ្ជីចំណាត់ថ្នាក់ Under 40 និងត្រូវបានសរសើរថាជា «Rockstar មួយរូបនៅក្នុងសហគមន៍ Bitcoin»។ Brian Armstrong គឺជាអ្នកគាំទ្រនៅជួរមុខទាក់ទងនឹងការប្រើប្រាស់ និងជួញដូរ Bitcoin។

លោក Brian Armstrong បានដឹងច្បាស់អំពី Bitcoin ជាលើកដំបូង កាលពីឆ្នាំ 2010។ មុននេះ លោកធ្លាប់បាននិយាយប្រាប់អំពីការដែលលោកបានដឹងការពិតថា មានទីផ្សារជាច្រើនកំពុងជួញដូរ Bitcoin ហើយភ្លាមនោះ លោកក៏មើលឃើញឱកាសល្អ។ Brian Armstrong ចាប់ផ្ដើមគិតរកវិធីដើម្បីប្រើប្រាស់ទីផ្សារដ៏ធំមួយនេះ ហើយវាគឺជាវិធីដែល Coinbase ត្រូវបានបង្កើតឡើង។

នៅខែឧសភា ឆ្នាំ 2011 Brian Armstrong ចាប់ផ្ដើមចូលធ្វើការឱ្យ Airbnb ក្នុងនាមជាវិស្វករផ្នែកទន់។ Brian Armstrong បានចូលជាសមាជិករបស់ UniversityTutor.com ក្នុងគ្រាកំពុងធ្វើការឱ្យ Airbnb។ លោកធ្វើការនៅទីនេះបានជាងមួយឆ្នាំ ហើយក៏ចាកចេញនៅក្នុងខែមិថុនា 2012 នៅពេលបង្កើត Coinbase។

ដោយមានជំនាញខាងវិទ្យាសាស្ត្រកុំព្យូទ័រ និងសេដ្ឋកិច្ច ក៏ដូចជាបទពិសោធន៍លើការសរសេរកូដកុំព្យូទ័រ Brian Armstrong បានត្រៀមខ្លួនជាស្រេចសម្រាប់ជំហានចេញធ្វើជំនួញក្នុងវិស័យបច្ចេកវិទ្យា។ នៅពេលបានដឹងច្បាស់អំពី Bitcoin បុរសនេះក៏បានរិះរកវិធីដើម្បីពង្រីកទីផ្សារសម្រាប់រូបិយវត្ថុអេឡិចត្រូនិកមួយនេះ។

ខែកក្កដា ឆ្នាំ 2017 Brian Armstrong និង Fred Ehrsam បានរួមដៃគ្នាបង្កើត Coinbase។ Coinbase ត្រូវបានគេចាត់ទុកថាជាផ្សារមួយដែលអនុញ្ញាតឱ្យគ្រប់គ្នាទិញ Bitcoin។ រដូវក្ដៅឆ្នាំ 2012 Brian និង Fred បានទៅចុះឈ្មោះ Coinbase នៅក្នុងថ្នាលបណ្ដុះបណ្ដាលសម្រាប់អ្នកបើកមុខជំនួញថ្មី Y Combinator។ ថ្នាលនេះមានឈ្មោះល្បីល្បាញ ដោយសារបានវិនិយោគទៅក្នុងក្រុមហ៊ុនថ្មីជាច្រើន ដូចជា Dropbox, Weebly, Reddit និង Airbnb ជាដើម។ Coinbase បានបង្ហាញខ្លួនពេញលេញកាលពីខែតុលា 2012 នៅពេលចាប់ផ្ដើមផ្ដល់សេវាកម្មទិញ និងលក់ Bitcoin តាមរយៈការផ្ទេរប្រាក់នៅធនាគារ។

Coinbase គឺជាថ្នាលដ៏ធំមួយដែលជួយឱ្យអតិថិជនអាចទិញ លក់ និងរក្សាទុករូបិយវត្ថុឌីជីថល ដូចជា Bitcoin និង Ether ជាដើម

រៀបរាប់អំពីដំណាក់កាលដំបូងៗ សហស្ថាបនិករបស់ Coinbase លោក Brian បាននិយាយថា៖ «Coinbase គឺជារបកគំហើញដ៏សំខាន់សម្រាប់សម័យទំនើប និងនាំឱ្យពិភពលោកត្រូវផ្លាស់ប្ដូរ។ ពិតជាអស្ចារ្យនៅពេលបានឃើញប្រព័ន្ធទាំងមូលកំពុងរីកចម្រើនជុំវិញរបកគំហើញដ៏មហិមានេះ ប៉ុន្តែ សម្រាប់ខ្ញុំ Bitcoin នៅតែជាក្ដីស្នេហ៍ដំបូង»។

សន្យាថានឹងបរិច្ចាគទ្រព្យភាគច្រើនរបស់លោក កាលពីអាយុទើបតែ 34ឆ្នាំ

កាលពីខែធ្នូ ឆ្នាំ 2018 នៅក្នុងវ័យ 34 ឆ្នាំ លោក Brian Armstrong បានចុះកិច្ចសន្យាជាផ្លូវការមួយ ជាមួយនឹង The Giving Pledge ដែលត្រូវបានមហាសេដ្ឋី Warren Buffett និង Bill Gates បង្កើតឡើងកាលពីឆ្នាំ 2010។ បុគ្គលទាំងឡាយដែលបានចុះហត្ថលេខាលើកិច្ចសន្យានេះគឺ សុទ្ធតែជាមហាសេដ្ឋី ឬជិតក្លាយជាមហាសេដ្ឋី ប៉ុន្តែមានចិត្តសប្បុរស ចង់បរិច្ឆាគទ្រព្យភាគច្រើនរបស់ខ្លួនសម្រាប់សកម្មភាពមនុស្សធម៌។

មុននោះ Brian ក៏សកម្មនៅក្នុងកិច្ចការមនុស្សធម៌ ដោយលោកបានបង្កើត GiveCrypto (givecrypto.org)។ អង្គការមិនស្វែងរកកម្រៃនេះ ទទួលយក បែងចែកប្រាក់អេឡិចត្រូនិក និងធ្វើការប្រគល់ប្រាក់ដោយផ្ទាល់ទៅឱ្យអ្នកក្រីក្រដែលជាក្រុមគោលដៅរបស់ពួកគេ៕

ប្រភព៖ Forbes, BI
ប្រែសម្រួល៖ បុត្រា

February 26, 2021

Category: សង្គម និងសេដ្ឋកិច្ច