Category: សង្គម និងសេដ្ឋកិច្ច

ប្រាក់ចំណូលប្រចាំថ្ងៃរបស់ Amazon ខ្ពស់ជាង 1ពាន់លានដុល្លារ ក្នុងឆ្នាំ 2020
វីរុសមហារាតត្បាត Covid-19 បាននាំឱ្យមនុស្សម្នាជ្រើសរើសវិធីទិញទំនិញតាមអនឡាញ ចំណែកក្រុមហ៊ុនជាច្រើនក៏បានអនុញ្ញាតឱ្យបុគ្គលិកធ្វើការពីចម្ងាយ ដែលនេះបាន និងកំពុងនាំមកនូវឱកាសយ៉ាងប្រសើរដល់ក្រុមហ៊ុន Amazon របស់មហាសេដ្ឋី Jeff Bezos។
ក្រុមហ៊ុន Amazon មានក្រុមហ៊ុនបុត្រសម្ព័ន្ធចំនួន 2 ដែលកំពុងរកចំណាយបានច្រើនជាងគេ រួមមាន ផ្សារអនឡាញ Amazon និងក្រុមហ៊ុនផ្ដល់សេវាកម្មព័ត៌មានវិទ្យា Amazon Web Services (AWS)។ របាយការណ៍ហិរញ្ញវត្ថុសម្រាប់ត្រីមាសទី 4 ដែលត្រូវបានប្រកាសកន្លងមក បានបង្ហាញថា ជាលើកដំបូងហើយដែលប្រាក់ចំណូលរបស់ Amazon បានលោតផុតចំណុច 100 ពាន់លានដុល្លារអាមេរិក។
គិតត្រឹមចុងខែមីនានេះ Amazon គ្រោងនឹងរកបានចំណូលចាប់ពី 100-106 ពាន់លានដុល្លារ និងចំណេញចាប់ពី 3-6.5 ពាន់ដុល្លារ។ ប៉ុន្តែ ក្រុមអ្នកវិភាគបានព្យាករថា ប្រាក់ចំណូលជាមធ្យមនៅក្នុងត្រីមាសទីមួយរបស់ Amazon នាឆ្នាំនេះ នឹងបានត្រឹមតែ 95.72 ពាន់លានដុល្លារប៉ុណ្ណោះ ខណៈប្រាក់ចំណេញនឹងបានត្រឹម 6.07 ពាន់លានដុល្លារ។
ប្រការដែលគួរឱ្យចាប់អារម្មណ៍ជាងគេនៅក្នុងរបាយការណ៍ហិរញ្ញវត្ថុខាងលើ នោះគឺថា ប្រាក់ចំណូលជាមធ្យមក្នុងមួយថ្ងៃរបស់ក្រុមហ៊ុននេះ ខ្ពស់ជាង 1 ពាន់លានដុល្លារទៅទៀត។ បច្ចុប្បន្ន ក្នុងចំណោមក្រុមហ៊ុនធំៗនៅសហរដ្ឋអាមេរិក មានតែក្រុមហ៊ុនលក់រាយ Wal-Mart តែមួយគត់ដែលរកបានចំណូលប្រហាក់ប្រហែលនេះ។ កាលពីអតីតកាល ឯតទគ្គកម្មនេះបានទៅលើ ExxonMobil ដែលជាក្រុមហ៊ុនសាជីវកម្មប្រេងពហុជាតិរបស់សហរដ្ឋអាមេរិក ដែលមានមូលដ្ឋាននៅទីក្រុង Irving រដ្ឋ Texas។
យោងតាមរបាយការណ៍របស់ EMarketer ការចំណាយតាមរយៈអនឡាញរបស់ជនជាតិអាមេរិកាំងនៅក្នុងឆ្នាំ 2021 នេះ នឹងឡើងដល់ 843.0 ពាន់លានដុល្លារ កើន 6.1% បើធៀបនឹងឆ្នាំ 2020។ ប៉ុន្តែ នៅពេលស្ថានភាព Covid-19 បានល្អប្រសើរឡើងវិញ កំណើននៃការទិញដូរតាមអនឡាញនឹងត្រូវថយចុះមិនខាន ហើយពេលនោះ ប្រាក់ចំណូលរបស់ Amazon ក៏អាចនឹងត្រូវថយចុះ៕
ប្រភព៖ Bloomberg
ប្រែសម្រួល៖ បុត្រា
March 4, 2021
(វីដេអូ)-យានអវកាសគំរូ Starship SN10 ហោះឡើង និងចុះចតដោយជោគជ័យ ប៉ុន្តែបានផ្ទុះខ្ទេចខ្ទីក្រោយពីឈរលើដីបាន 8នាទី
យានអវកាសគំរូសាកល្បង Starship SN10 របស់មហាសេដ្ឋីអាមេរិក Elon Musk ដែលបានផ្ទុះខ្ទេចខ្ទីនៅលើទីលានចុះចត ក្នុងតំបន់ Boca Chica នៃរដ្ឋ Texas អាចកើតឡើងដោយសារបញ្ហាហៀរប្រេង។
យានអវកាស Starship SN10 បានចុះចតដោយជោគជ័យក្រោយពីបានហោះសាកល្បងទៅកាន់រយៈកម្ពស់ខ្ពស់កាលពីថ្ងៃទី 3 មីនា ដែលជាជោគជ័យដ៏ធំមួយទៀតរបស់ក្រុមហ៊ុនអវកាស SpaceX។ ក៏ប៉ុន្តែ យានអវកាសនេះបានផ្ទុះខ្ទេចខ្ទីគ្មានសល់ ក្រោយការចុះចតដោយជោគជ័យបានប្រហែល 8 នាទី។
យានអវកាស SN10 ដែលត្រូវបានច្នៃពីដែកអ៊ីណុកនេះ ត្រូវបានបាញ់បង្ហោះពីមូលដ្ឋានរបស់ SpaceX នៅក្នុងរដ្ឋ Texas ខាងត្បូង នាវេលាម៉ោង 6:15នាទីយប់នៃថ្ងៃទី 3 មីនា (ម៉ោង 6:15 នាទីព្រឹក ថ្ងៃទី 4 មីនា នៅភ្នំពេញ) និងបានហោះឡើងដល់កម្ពស់ 10 គីឡូម៉ែត្រ រួចក៏ទម្លាក់ខ្លួនចុះមកកាន់ផែនដីបានយ៉ាងល្អ ក្រោយហោះឡើងបាន 6នាទី និង 20វិនាទី។ នេះគឺជាលើកទីបីហើយដែល Starship បានហោះឡើងទៅកាន់កម្ពស់ខ្ពស់ដូច្នេះ ប៉ុន្តែជាលើកដំបូងដែលយានអវកាសនេះបានចុះចតដោយជោគជ័យ។ ក៏ប៉ុន្តែ ក្រោយពីបានចុះចតដល់ដីបានជោគជ័យ អណ្ដាតភ្លើងក៏ឆាបឆេះនៅត្រង់ជើងយាន SN10 ហើយក៏បង្កឱ្យមានការផ្ទុះយ៉ាងខ្លាំងក្លា។
កំណែយានអវកាស SN8 និង SN9 ដែលជារៀមច្បងរបស់ SN10 ត្រូវបានបាញ់បង្ហោះសាកល្បងជាបន្តបន្ទាប់នៅថ្ងៃទី 9 ធ្នូ 2020 និងថ្ងៃទី 2 កុម្ភៈ 2021 សុទ្ធតែបានហោះឡើងដោយជោគជ័យ ប៉ុន្តែបានចុះចតដោយបរាជ័យ ដោយសារផ្ទុះឆេះជាបំណែកក្នុងពេលចុះចត។
SpaceX កំពុងអភិវឌ្ឍយានអវកាស Starship ដើម្បីដឹកមនុស្ស និងសម្ភារឡើងទៅកាន់ឋានព្រះចន្ទ ព្រះអង្គារ និងទីអវកាសឆ្ងាយៗផ្សេងទៀត។ ប្រព័ន្ធរបស់ Starship រួមមាន យានអវកាសកម្ពស់ 50 ម៉ែត្រដែលមានឈ្មោះថា Starship និងកាំជ្រួចរុញច្រានដ៏ធំមួយគ្រឿង ឈ្មោះ Super Heavy។ Starship និង Super Heavy សុទ្ធតែត្រូវបានរចនាឡើងដើម្បីអាចប្រើប្រាស់ឡើងវិញបានទាំងស្រុង និងឆាប់រហ័ស៕
ប្រភព៖ Space
ប្រែសម្រួល៖ បុត្រា
March 4, 2021
កាដូដែលមានតម្លៃថ្លៃបំផុតនៅក្នុងពិភពលោក សម្រាប់ទិវាសិទ្ធិនារីអន្តរជាតិ 8មីនា
ជូនកាដូណាមួយក្នុងចំណោមអំណោយទាំងឡាយខាងក្រោមនេះទៅឱ្យ Crush របស់អ្នក ខ្ញុំជឿជាក់ថា នាងនឹងយល់ព្រមរៀបការជាមួយអ្នកមិនខាន ព្រោះវាថ្លៃជាងគេក្នុងពិភពលោក។
វ៉ែនតា Chopard De Rigo Vision
តម្លៃ៖ 407,864 ដុល្លារអាមេរិក
វ៉ែនតាដែលផលិតដោយក្រុមហ៊ុន De Rigo Vision និង Chopard នេះ មានរូបរាងស្រស់ស្អាតបំផុត ហើយត្រូវបានចាត់ទុកជាអំណោយយ៉ាងមហាអស្ចារ្យសម្រាប់ជូនដល់នារីជាទីស្រលាញ់របស់អ្នកនៅក្នុងទិវាសិទ្ធិនារី 8 មីនា ឬក៏បុណ្យនៃក្ដីស្រលាញ់។ ផ្នែកខាងចុងរបស់វ៉ែនតានេះ ត្រូវបានលម្អដោយមាសសុទ្ធទម្ងន់ 60 ក្រាម ហើយជុំវិញវាគឺជាពេជ្រចំនួន 51 គ្រាប់។
ប៊ិកដាំពេជ្រ Mystery Masterpiece Limited Edition
តម្លៃ៖ 719,760 ដុល្លារ
ប៊ិក Mystery Masterpiece Limited Edition ត្រូវបានផលិតឡើងដោយក្រុមហ៊ុន Montblanc សហការជាមួយ Van Cleef & Arpels។ ប៊ិកនេះ ត្រូវបានដាំពេជ្រ 840 គ្រាប់។
កាបូបដៃ 1001 Nights Diamond Purse របស់ Mouawad
តម្លៃ៖ 3,8 លានដុល្លារ
កាបូបរាងបេះដូងនេះ ត្រូវបានច្នៃឡើងដោយជាងច្នៃត្បូងលំដាប់កំពូលៗចំនួន 10 នាក់ និងចំណាយពេលអស់ 8,800 ម៉ោងដើម្បីធ្វើការ។ 1001 Nights Diamond Purse ត្រូវបានធ្វើអំពីមាសពណ៌ស 18K និងលម្អដោយពេជ្រចំនួន 4,517 គ្រាប់ ក្នុងនោះមាន 105 គ្រាប់ជាពេជ្រពណ៌លឿង និង 56 គ្រាប់ជាពេជ្រពណ៌ផ្កាឈូក ចំណែក 4,356 គ្រាប់ទៀត ជាពេជ្រពណ៌ស ដែលមានទម្ងន់សរុប 381.92 ការ៉ាត។
ចិញ្ចៀនពេជ្រពណ៌ផ្កាឈូក
តម្លៃ៖ 1.8 លានដុល្លារ
ចិញ្ចៀនពេជ្រពណ៌ផ្កាឈូកតែងតែជាជម្រើសលំដាប់កំពូលរបស់អ្នកជំនួញ ព្រោះវាតំណាងឱ្យមនោសញ្ចេតនាស្នេហាយ៉ាងជ្រាលជ្រៅ នាំមកនូវភាពប្រណិត និងថ្លៃថ្នូរជាទីបំផុត។
កងកពេជ្រ
តម្លៃ៖ 4 លានដុល្លារអាមេរិក
កងកពេជ្រនេះ មានដាំពេជ្រពណ៌លឿងចំនួន 183.08 ការ៉ាត បង្កើតបានជាគ្រឿងអលង្ការមួយប្រភេទដែលមានតម្លៃខ្ពស់ និងប្លែកពីគេទាំងស្រុង។
ចិញ្ចៀនត្បូងមរកត
តម្លៃ៖ 5 លានដុល្លារអាមេរិក
ចិញ្ចៀនដាំត្បូងមរកត 22.91 ការ៉ាតនេះ ទទួលបានការយកចិត្តទុកដាក់យ៉ាងច្រើនពីសំណាក់ក្រុមអ្នកមាន។
នាឡិកា Graff Hallucination
តម្លៃ៖ 60 លានដុល្លារអាមេរិក
Graff Hallucination គឺជាម៉ូដែលនាឡិកាដែលមានតម្លៃថ្លៃជាងគេបំផុតក្នុងពិភពលោក ព្រោះវាត្រូវបានច្នៃឡើងដោយមានដាំពេជ្រដែលមានពណ៌ដ៏កម្រ និងមានទំហំធំនៅពីលើផ្លាទីន។
យ៉ាងនេះក្ដី ក្នុងឱកាសទិវាសិទ្ធិនារីអន្តរជាតិ 3 មីនាខាងមុខ អ្នកគួរតែទិញកាដូអ្វីមួយដែលមានអត្ថន័យសម្រាប់មនុស្សជាទីស្រលាញ់របស់អ្នក ដោយមើលទៅលើស្ថានភាពហិរញ្ញវត្ថុ សមស្របនឹងកត្តាផ្លូវចិត្ត និងវិស័យនាងកំពុងធ្វើការ ហើយអំណោយនេះក៏គួរតែជារបស់ដែលមានប្រយោជន៍ អាចប្រើប្រាស់ប្រចាំថ្ងៃបាន៕
ប្រភព៖ Catawiki, Webuy
ប្រែសម្រួល៖ បុត្រា
March 3, 2021
ភាពសោកសៅរបស់ Jack Ma ៖ ធ្លាក់ពីតំណែងអ្នកមានជាងគេនៅប្រទេសចិនហើយ ថែមទាំងមិនជាប់ Top 3 ទៅទៀត!
ស្ថាបនិករបស់ Alibaba និង Ant Group លោក Jack Ma បានបាត់បង់តំណែងជាអ្នកមានជាងគេបង្អស់នៅប្រទេសចិន នៅក្នុងបញ្ជីចំណាត់ថ្នាក់ថ្មីមួយដែលទើបត្រូវបានប្រកាសកាលពីថ្ងៃទី 2 មីនា ឆ្នាំ 2021។
លោក Jack Ma និងគ្រួសារ ធ្លាប់កាន់កាប់តំណែងអ្នកមានជាងគេនៅប្រទេសចិន នៅក្នុងបញ្ជីចំណាត់ថ្នាក់អ្នកមានទូទាំងពិភពលោករបស់ Hurun (Hurun Global Rich List) កាលពីឆ្នាំ 2019 និង 2020។ ប៉ុន្តែ នាពេលបច្ចុប្បន្ន (3មីនា 2021) លោកបានធ្លាក់មកនៅត្រឹមលេខ 4 ទៅវិញ។
Hurun បានឱ្យដឹងថា ការដែលលោក Jack Ma បានធ្លាក់ពីតំណែងអ្នកមានជាងគេលំដាប់ទី 3 នៅប្រទេសចិននេះ បានកើតឡើងក្រោយពីអាជ្ញាធរចិនត្រួតពិនិត្យយ៉ាងតឹងរ៉ឹងទៅលើសកម្មភាពរបស់ក្រុមហ៊ុន Ant Group និង Alibaba ដោយសារមានការបារម្ភអំពីបញ្ហារកស៊ីផ្ដាច់មុខ។ បើទោះជាទ្រព្យសម្បត្តិបានកើនបន្ថែម 22% នាំឱ្យទ្រព្យសរុបឡើងដល់ 55.6 ពាន់លានដុល្លារ ប៉ុន្តែ Jack Ma នៅតែមិនអាចរក្សាបានចំណាត់ថ្នាក់លេខ 1 របស់ខ្លួននៅក្នុងបញ្ជីប្រចាំឆ្នាំរបស់ Hurun។
ព្រឹត្តិការណ៍ IPO ដែលមានតម្លៃ 37 ពាន់លានដុល្លាររបស់ Ant Group ត្រូវបានពន្យារពេលអស់ជាច្រើនថ្ងៃ មុននឹងមានវត្តមាននៅលើផ្សារហ៊ុន
សំណាងអាក្រក់កាលពីពេលថ្មីៗនេះ បានកើតឡើងជាបន្តបន្ទាប់ចំពោះលោក Jack Ma ចាប់តាំងពីលោកបានរិះគន់ចំពោះប្រព័ន្ធហិរញ្ញវត្ថុរបស់ប្រទេសចិន កាលពីខែតុលា 2020។ ជាលទ្ធផល ព្រឹត្តិការណ៍ IPO ដែលមានតម្លៃ 37 ពាន់លានដុល្លាររបស់ Ant Group ត្រូវបានពន្យារពេលអស់ជាច្រើនថ្ងៃ មុននឹងមានវត្តមាននៅលើផ្សារហ៊ុន។ មកដល់ខែធ្នូ ឆ្នាំ 2020 ក្រុមហ៊ុន Alibaba ក៏ត្រូវបានស៊ើបអង្កេតទាក់ទងនឹងបញ្ហារកស៊ីផ្ដាច់មុខ។
ក្រោយមក ស្ថាប័នពាក់ព័ន្ធរបស់ប្រទេសចិន ក៏បានរឹងបន្តឹងលើការត្រួតពិនិត្យចំពោះក្រុមហ៊ុន Alibaba រួមនឹងវិស័យបច្ចេកវិទ្យាទាំងមូលរបស់ប្រទេសនេះផងដែរ។ អាជ្ញាធរបានបង្ខំឱ្យ Ant Group កែទម្រង់មុខជំនួញរបស់ខ្លួន។ ពួកគេក៏បន្តចេញអនុក្រឹត្យថ្មីជាច្រើន បង្ខំឱ្យ Ant Group វិលត្រលប់ទៅរកធាតុដើម នោះគឺក្រុមហ៊ុនផ្គត់ផ្គង់សេវាកម្មទូទាត់ប្រាក់។ សេវាកម្មផ្សេងៗទៀតរបស់ Ant មានដូចជា ធនាគារអនឡាញ ធានារ៉ាប់រង គ្រប់គ្រងទ្រព្យ និងឈ្មួលកណ្ដាលផ្នែកហិរញ្ញវត្ថុក៏នឹងត្រូវបង្ខំឱ្យបែងចែកដាច់ដោយឡែកយ៉ាងច្បាស់លាស់។ ប្រការនេះនឹងជួយឱ្យអាជ្ញាធរចិន ងាយស្រួលក្នុងការគ្រប់គ្រងសកម្មភាពរបស់ Ant Group។
បន្ទាប់ពីមានដំណឹងមិនល្អខាងលើ Jack Ma ក៏ស្រាប់តែបានបាត់ខ្លួនអស់រយៈពេលប្រហែលជា 3 ខែ ប៉ុន្តែ ក៏បានបង្ហាញខ្លួនជាថ្មីកាលពីខែមករា 2021។
លោក Zhang Shanshan
អ្នកមានជាងគេលំដាប់ទី 1 នៅប្រទេសនាពេលបច្ចុប្បន្នគឺលោក Zhang Shanshan ដែលជាស្ថាបនិកនៃក្រុមហ៊ុនផលិតភេសជ្ជ និងទឹកបរិសុទ្ធ Nongfu Spring ។ លោក Shanshan បានឡើងកាន់កាប់តំណែងនេះជាលើកដំបូង ជាមួយនឹងទ្រព្យតម្លៃ 550 ពាន់លានយុន (85 ពាន់លានដុល្លារអាមេរិក)។ ទ្រព្យរបស់លោក ភាគច្រើនបានមកពីមូលបត្ររបស់ក្រុមហ៊ុន Nongfu Spring និងក្រុមហ៊ុនផលិតវ៉ាក់សាំង Beijing Wantai Biological Pharmacy Enterprise ដែលលោកជាអ្នកគ្រប់គ្រង។
មហាសេដ្ឋី Pony Ma ដែលជាស្ថាបនិកនៃក្រុមហ៊ុន Tencent ឈរលំដាប់លេខ 2 ដោយមានទ្រព្យសរុប 74 ពាន់លានដុល្លារអាមេរិក បន្ទាប់ពីបានកើន 70% ក្នុងឆ្នាំ 2020។ ចំណែកចំណាត់ថ្នាក់លេខ 3 បានទៅមហាសេដ្ឋី Collin Huang ដែលជា CEO របស់ក្រុមហ៊ុនអេឡិចត្រូនិក Pinduoduo ដោយមានទ្រព្យសរុបចំនួន 69.5 ពាន់លានដុល្លារអាមេរិក។
Zhang Yiming ស្ថាបនិករបស់ក្រុមហ៊ុន ByteDance ដែលជាភាគីគ្រប់គ្រងបណ្ដាញសង្គម TikTok ក៏បានហក់ឡើងកាន់កាប់ចំណាត់ថ្នាក់លេខ 5 នៅក្នុងបញ្ជីរបស់ Hurun ដោយមានទ្រព្យសរុបចំនួន 54 ពាន់លានដុល្លារអាមេរិក៕
ប្រភព៖ Reuters
ប្រែសម្រួល៖ បុត្រា
March 3, 2021
រំដួលលិចទឹក ច្នៃបទស្លឹកអន្សែជាឈុតក្ងោក អបអរសាទរទិវាវប្បធម៌ជាតិ និងប្រកាសឆន្ទៈមួយ
នៅថ្ងៃទី៣ខែមីនា ឆ្នាំ2021នេះ គេបានឃើញអ្នកជំនាញច្នៃម៉ូដប្លែកៗ កញ្ញា រំដួលលិចទឹក បានបញ្ចេញស្នាដៃថ្មីក្នុងឈុត «ក្ងោកស្លឹកអន្សែ» ដើម្បីបង្ហាញពីការអបអរសាទរទិវាវប្បធម៌ជាតិ។
កញ្ញាបានបង្ហោះរូបភាពជាច្រើនសន្លឹក និងសាររៀបរាប់ថា «អបអរសាទរទិវាវប្បធម៌ជាតិ៣មីនា លើកទី ២៣ ឆ្នាំ២០២១ 👏ក្រោមប្រធានបទ #យុវជនដើម្បីវប្បធម៌ជាតិ ❤️🙏🇰🇭🇰🇭🇰🇭💐💐🌿ឈុត ក្ងោកស្លឹកអន្សែ របស់អូន ច្នៃឡើងដើម្បីបង្កើតភាពប្លែកភ្នែកបែបសម័យទំនើប ពិសេសចង់បង្ហាញអំពីភាពសំបូរសប្បាយស្រស់ស្អាតរបស់សត្វព្រៃនឹងព្រៃឈើពណ៌បៃតងរបស់កម្ពុជានិងពិភពលោក ក៏ដូចជាការចូលរួមពញ្ញាក់អារម្មណ៍បងប្អូនប្រជាពលរដ្ឋយើងអោយចូលរួមរក្សាបរិស្ថានជុំវិញខ្លួនយើងនិងជីវិតសត្វព្រៃអោយបានល្អនិងស្រស់បំព្រងដូចឈុតអូនអញ្ចឹង 😁🙏🥰🌿 ចាប់ផ្តើមពីយើងម្នាក់ៗ ខ្ញុំបានចូលរួមហើយចុះអ្នកបានចូលរួមការពារ រក្សា ក៏ដូចជាការដាំដុះបន្ថែមដើមឈើនៃព្រៃកម្ពុជានៃយើងហើយឬនៅ ?! 🙏🥰🌿🇰🇭🇰🇭 រួមគ្នាការពារ ថែរក្សា ដើម្បីជិវិតសត្វព្រៃនិងព្រៃឈើកម្ពុជា🙏🥰🇰🇭🇰🇭🇰🇭🌿🌿
ខ្ញុំចង់ឃើញធម្មជាតិបៃតងនៃកម្ពុជាគ្រប់កន្លែងនិងគ្រប់រដូវកាល ចុះអ្នក..?! 🙏🇰🇭🌿 អរគុណបងសម្លាញ់ អុី សុខជា ប្អូន ហ៊ត តៃហ៊ ប្អូន Minamiko Tharo និងប្អូនក្រុមការងារដែលបានជួយច្នៃ 🙏🥰 😂😂»៕

March 3, 2021
បវរកញ្ញាចក្រវាឡ2018 កញ្ញា រឿន ណាត ប្រកាសចង់រៀបការ
បវរកញ្ញាចក្រវាឡឆ្នាំ២០១៨ មានសម្រស់ស្អាត និងល្បីមានដំណើរស្អាតគឺ កញ្ញា រឿន ណាត ដែលខណៈថ្មីៗនេះ គេបានឃើញកញ្ញាបង្ហាញវត្តមាននៅវិស័យភាពយន្ដយ៉ាងមាញឹកតែម្ដង។ តារាស្រីរូបនេះ ត្រូវបានក្លាយជាមួយភាពយន្ដភាគបន្ដបន្ទាប់របស់ផលិតកម្មក្នុងស្រុក។
អ្វីដែលភ្ញាក់ផ្អើលខ្លាំងនាពេលនេះ ស្រាប់តែគេឃើញកញ្ញាបង្ហោះថា ចង់រៀបការ ខណៈដែលសាមីខ្លួនសព្វថ្ងៃក៏ពុំទាន់មានអ្នកចូលចែវចូវនៅឡើយទេ។ រឿន ណាត បានរៀបរាប់ថា «ខ្ញុំឃើញគេរៀបកាចិត្តចង់តែរៀបកាដែរ Congratulations jj @lim_sangly_official»។ ការបង្ហោះនេះបានធ្វើឱ្យមហាជនអ្នកគាំទ្រកំពុងសង្ស័យថា កញ្ញាចង់រៀបការមែន ឬគ្រាន់តែបង្ហោះលេងសើចតែប៉ុណ្ណោះ។
តែយ៉ាងណាមិញ កញ្ញា រឿន ណាត បានបង្ហោះរូបភាពនិង Caption បែបទាក់ទាញនេះ បន្ទាប់ពីបានចូលរួមពិធីមង្គលការមួយផងដែរ។ គេនៅមិនទាន់ច្បាស់ថា កញ្ញាសព្វថ្ងៃកំពុងតែមើលចិត្តជាមួយតួប្រុសណាមួយក្នុងដួងចិត្តនៅឡើយទេ បន្ទាប់ពីបានបែកបាក់ទំនាក់ទំនងស្នេហាចាស់អស់រយៈជាង១ឆ្នាំមកហើយ៕

March 3, 2021
យ៉ា សុផាម៉ៃ ក្ដោបតំណែងជាតួឯកស្រីក្នុងរឿង «រសជាតិអ្នកមាន» វគ្គ២
តារាសម្ដែងវ័យក្មេងកំពុងតែទទួលបានការចាប់អារម្មណ៍យ៉ាងខ្លាំងពីសំណាក់អ្នកគាំទ្រនាពេលថ្មីៗនេះ គឺកញ្ញា យ៉ា សុផាម៉ៃ ។ កញ្ញាបានប្រឡូកគ្រប់រសជាតិគ្រប់ឈុតឆាកដែលតម្រូវឲ្យកញ្ញាដើរតួសម្តែង ដែលមានចរិតជាតួក្មេង តួមនុស្សចាស់ទុំ និងតួអង្គវិកលចរិត។ ថ្មីៗនេះ កញ្ញាក៏ក្ដោបបានតំណែងតួស្រីក្នុងរឿង «រសជាតិអ្នកមាន» វគ្គ២។
តារាស្រីរូបនេះ បានបញ្ជាក់ថា វាពិតជាមិនងាយស្រួលក្នុងការសម្ដែងតួច្រើនក្នុងរូបរាងតែមួយ អាចពិបាកទៅលើការផ្លាស់ប្តូរចរិតតួអង្គពីមួយទៅមួយ។ កញ្ញាថា កញ្ញានឹងខិតខំព្យាយាម ហើយប្រមូលបទពិសោធន៍សម្ដែងដែលខ្លួនមានបញ្ចេញមកឱ្យអស់។ ឲកញ្ញាបានលើកឡើងទៀតថា តួឯកស្រីរឿង «រសជាតិអ្នកមាន» វគ្គ២នេះ ត្រូវមានការតាំងចិត្តខ្ពស់ ប្រឹងប្រែង ដាក់អារម្មណ៍ឲ្យចូលទៅក្នុងសាច់រឿងដូចជាពិតៗតែម្តង។
កញ្ញា សុផាន់ម៉ៃ បានបន្តទៀតថា មានឈុតខ្លះ កញ្ញាមានការខ្មាសអៀនខ្លះៗដែរ និងដូចជារឹងៗខ្លួន ដូចជាពេលត្រូវចំឈុតមានតួអង្គផ្សេងមកចាប់បង្ខំលើរូបរាងកាយ ហើយមានឈុតខ្លះ ត្រូវតួអង្គបងប្រុស វាយធ្វើបាប និងមួយវិញទៀត ធ្វើជាតួអង្គ មនុស្សវិកលចរិត។ វាជាការលំបាកមួយដែរ សម្រាប់កញ្ញា ក្នុងការសម្តែងមួយសាច់រឿងនេះ ប៉ុន្តែទោះជាយ៉ាងណាក្តី កញ្ញា ក៏បានបញ្ជាក់ដែរថា វាគឺជាបទពិសោធន៍ និងចំណេះដឹងបន្ថែម ដែលផ្តល់ឱ្យកញ្ញា បានយល់ដឹងកាន់តែច្បាស់ពីសង្គម ពីមនុស្ស គួរធ្វើអ្វីដើម្បីឲ្យជីវិតមានក្តីសុខ។ សិល្បៈនៃការសម្តែង បានបង្រៀនឲ្យកញ្ញា ដូចជាមេរៀនមួយ ដែលអប់រំផ្លូវចិត្តកុំឱ្យមានភាពលោភលន់ និងអ្វីហៅថា ភាពរឹងមាំ និងការទទួលខុសត្រូវដោយខ្លួនឯង៕

March 3, 2021
ស្ពានស្ទឹងត្រង់-ក្រូចឆ្មារ នឹងបើកឱ្យធ្វើចរាចរណ៍មុនបុណ្យចូលឆ្នាំខ្មែរ 2021
ស្ពានមិត្តភាពកម្ពុជា-ចិន ដែលតភ្ជាប់ស្រុកក្រូចឆ្មារនៃខេត្តត្បូនឃ្មុំ ជាមួយនឹងស្រុកស្ទឹងត្រង់នៃខេត្តកំពង់ចាម ត្រូវបានស្ថាបនារួចរាល់ប្រមាណជាង 90%។ តាមគម្រោង ស្ពាននេះនឹងត្រូវដាក់ឱ្យធ្វើចរាចរណ៍មុនពិធីបុណ្យចូលឆ្នាំប្រពៃណីខ្មែរនាឆ្នាំ 2021 នេះ។
ស្ពានឆ្លងកាត់ទន្លេមេគង្គនេះ គឺជាជំនួយឥតសំណងពីរដ្ឋាភិបាលចិន នេះបើតាមប្រសាសន៍របស់រដ្ឋមន្ត្រីក្រសួងសាធារណការ និងដឹកជញ្ជូន។ លោកបន្តថា មកដល់បច្ចុប្បន្ន ស្ពាននេះត្រូវបានសាងសង់រួចរាល់ប្រមាណ 96% ហើយថា នឹងត្រូវដាក់ឱ្យធ្វើចរាចរណ៍នៅមុនពិធីចូលឆ្នាំថ្មីប្រពៃណីខ្មែរក្នុងឆ្នាំ 2021 នេះ។
ស្ពានបេតុងសរសៃដែកដែលមានតម្លៃ 56.998 លានដុល្លារ ប្រវែង 1,131 ម៉ែត្រ និងទទឹងប្រវែង 13.50 ម៉ែត្រនេះ ត្រូវបានសាងសង់ចាប់ពីដើមខែកុម្ភៈ ឆ្នាំ 2018។ តាមគម្រោង ការសាងសង់ស្ពាននេះ នឹងស៊ីពេលអស់ 42 ខែ។
ស្ពានស្ទឹងត្រង់-ក្រូចឆ្មារ ស្ថិតនៅក្នុងភូមិបឹងដែង ឃុំព្រែកកក់ ស្រុកស្ទឹងត្រង់ ខេត្តកំពង់ចាម និងឆ្លងកាត់ទន្លេមេគង្គទៅកាន់ត្រើយខាងកើតស្ថិតនៅភូមិក្តុលលើ ឃុំ ទ្រា ស្រុកក្រូចឆ្មារ ខេត្តត្បូងឃ្មុំ។ ស្ពាននេះ សាងសង់ដោយក្រុមហ៊ុនចិន Shanghai Construction Group និងត្រូវបានត្រួតពិនិត្យបច្ចេកទេសដោយក្រុមហ៊ុនចិន Guangzhou Wanan Construction Supervision៕
March 3, 2021
ចំនួនមហាសេដ្ឋីនៅឥណ្ឌា កើន 40 នាក់បន្ថែមទៀត នៅក្នុងឆ្នាំ 2020 បើទោះប្រឈមនឹង Covid-19
បើទោះជាសេដ្ឋកិច្ចត្រូវបានព្យាករថានឹងដាំក្បាលចុះនៅក្នុងឆ្នាំសារពើពន្ធបច្ចុប្បន្ន (បញ្ចប់នៅក្នុងខែមីនា ឆ្នាំ2021) ប៉ុន្តែ ក្លឹបមហាសេដ្ឋីរបស់ឥណ្ឌា នៅតែកើនឡើង 40 នាក់បន្ថែមទៀងកាលពីឆ្នាំមុន ជួយឱ្យតួលេខសរុបនៃមហាសេដ្ឋីនៅឥណ្ឌា កើនដល់ 177 នាក់។
សារព័ត៌មាន Business Today ដកស្រង់របាយការណ៍របស់ Hurun Global Rich List ដែលបានប្រកាសកាលពីថ្ងៃទី 2 មីនា 2021 ឱ្យដឹងថា លោក Mukesh Ambani នៅតែជាអ្នកមានជាងគេបង្អស់នៃប្រទេសឥណ្ឌា ដោយមានទ្រព្យសុទ្ធសរុប 83 ពាន់លានដុល្លារអាមេរិក។
ទ្រព្យរបស់មេដឹកនាំក្រុមហ៊ុន Reliance Industries បានកើន 24% ក្នុងឆ្នាំ 2020 ដែលនេះបានជួយឱ្យលោកក្លាយជាអ្នកមានជាងគេលំដាប់ទី 8 ក្នុងពិភពលោក។ ចំណែកលោក Gautam Adani ក៏បានក្លាយជាអ្នកមានជាងគេទី 2 នៅឥណ្ឌា បន្ទាប់ពីទ្រព្យសម្បត្តិរបស់លោក បានកើនទ្វេដង ឡើងដល់ 32 ពាន់លានដុល្លារក្នុងឆ្នាំ 2020 និងក្លាយជាអ្នកមានលំដាប់ទី 48 ក្នុងពិភពលោក។ បងប្រុសរបស់ Gautam Adani គឺលោក Vinod Adani ក៏បានឃើញទ្រព្យសម្បត្តិរបស់ខ្លួនកើនឡើងដល់ 9.8 ពាន់លានដុល្លារ (កើន 128%) ផងដែរ។
លោក Gautam Adani
ប្រការដែលគួរចាប់អារម្មណ៍ នោះគឺថា បញ្ជីរាយនាមមហាសេដ្ឋីនៅឥណ្ឌា ត្រូវបានអូសសន្លាយយ៉ាងវែងនៅក្នុងគ្រាដែលសេដ្ឋកិច្ចប្រទេសអាស៊ីខាងត្បូងនេះត្រូវបានគេព្យាករថា នឹងដាំក្បាលចុះជាង 7% ដោយសារតែ Covid-19។
សារព័ត៌មាន PTI News ដកស្រង់សម្ដីរបស់លោក Anas Rahman Junaid ដែលជានាយកប្រតិបត្តិ និងជាប្រធានក្រុមស្រាវជ្រាវរបស់ Hurun Global Rich List ប្រចាំឥណ្ឌា យល់ថា ទ្រព្យនៅឥណ្ឌាត្រូវបានបង្កើតឡើងភាគច្រើនគឺអាស្រ័យលើវិស័យឧស្សាហកម្មប្រពៃណី ឬមានលក្ខណជាវដ្ដ ពោលគឺមិនមែនអាស្រ័យលើបច្ចេកវិទ្យាដូចនៅសហរដ្ឋអាមេរិក និងប្រទេសចិននោះឡើយ៕
ប្រភព៖ Business Today
ប្រែសម្រួល៖ បុត្រា
March 3, 2021
Huawei ដាក់ឱ្យប្រើ Harmony OS ផ្ទាល់ខ្លួន លើស្មាតហ្វូន ចាប់ពីខែមេសា ឆ្នាំ2021
កាលពីពេលថ្មីៗនេះ ក្រុមហ៊ុន Huawei ទើបតែប្រកាសចេញទូរស័ព្ទឆ្លាតវៃ អេក្រង់បត់ជំនាន់ថ្មីរបស់ខ្លួនជាផ្លូវការ ដែលមានឈ្មោះស៊រីថា Huawei Mate X2 ហើយអ្វីដែលគេចាប់អារម្មណ៍នោះ គឺស្មាតហ្វូនម៉ូដែលថ្មីនេះ ជាស្មាតហ្វូនដំបូងរបស់ Huawei ដែលដំឡើងទាំងស្រុងក្នុងស្តុក គឺ Harmony OS ផ្ទាល់ខ្លួន។
បើតាមការបង្ហាញរបស់ Huawei គេនឹងអាចឃើញ Harmony OS ផ្លូវការ នឹងចេញកំណែអាប់ឌែត នៅក្នុងមេសា ឆ្នាំ2021 ដាក់លើស្មាតហ្វូនអេក្រង់បត់ Huawei Mate X2 មុនគេ តែយ៉ាងណាមិញ 3ខែខាងមុខនេះ វាត្រូវដំណើរការដោយ Android 10 ជាបណ្ដោះអាសន្នសិន។
សូមរំឭកផងដែរថា ប្រព័ន្ធប្រតិបត្តិការផ្ទាល់ខ្លួនរបស់ Huawei នេះ ត្រូវបានប្រកាសចេញកាលពី 2ឆ្នាំមុន។ មុននឹងយក OS មកបំពាក់លើស្មាតហ្វូន Huawei ក៏បានប្រើប្រាស់វា ដាក់នៅលើផលិតផលសំខាន់ៗជាច្រើនទៀត ក្នុងគោលបំណងសាកល្បងក្នុងទីផ្សារប្រទេសចិន ជាក់ស្ដែងដូចជា ទូរទស្សន៍ឆ្លាតវៃ និងរថយន្តរបស់ក្រុមហ៊ុន BYD ជាដើម៕
March 2, 2021