Category: សង្គម និងសេដ្ឋកិច្ច

រដ្ឋាភិបាល​សហរដ្ឋអាមេរិក​កំពុងតែ​លើក​គម្រោង​លក់​ដេញថ្លៃ​រថយន្ត sedan របស់​ក្រុមហ៊ុន Ford និង Chevy រួម​នឹង​កុងតឺន័រ​ដឹកទំនិញ​ជាង 45,000 លីត្រ និង​ម៉ាស៊ីន​អូស​នៃ​ក្រុមហ៊ុន Caterpillar ដែល​បាន​ខូច ប៉ុន្តែ ក្នុងចំណោម​នោះ​ក៏មាន​ទំនិញ​មួយ​មុខ​ដ៏​ចម្លែក នោះ​គឺ​រូបិយវត្ថុ​អេឡិចត្រូនិក​ចំនួន 0,7501 Bitcoin។

នាយកដ្ឋាន​សេវាកម្ម​ទូទៅ​សហរដ្ឋអាមេរិក (GSA) តែងតែ​អនុម័ត​លើ​ការលក់​ដេញថ្លៃ​ដែល​ពួកគេ​ជា​អ្នកធ្វើ​ដើម្បី​លក់​សម្ភារ​សេសសល់​នៅតាម​បណ្ដា​រដ្ឋ ទៅឱ្យ​ប្រជាជន។ តាមរយៈ​នេះ ជាមួយនឹង​លេខ​កូដ 4KQSCI21105001 ដែល​នឹងត្រូវ​បាន​លក់​ដេញថ្លៃ​ក្នុង​រង្វង់​មួយ​សប្ដាហ៍​ទៀត រដ្ឋាភិបាល​អាមេរិក​នឹង​លក់ Bitcoin ដែលមាន​តម្លៃ​ប្រហែល 38,000 ដុល្លារ​អាមេរិក បើ​យោងតាម​តម្លៃ​របស់ Bitcoin ដែល​បាន​ជួញដូរ​កាលពី​ថ្ងៃទី 8 មីនា 2021។

ក្រុមមន្ត្រី​រដ្ឋាភិបាល​មិនបាន​ឱ្យដឹង​អំពី​ប្រភព​របស់ Bitcoin ខាងលើនេះ​ទេ។ បើទោះជា​មាន​ភាពខុសគ្នា​ឆ្ងាយ​ទៅនឹង 30,000 Bitcoin ដែល​នាយកដ្ឋាន​ពន្ធដា​អាមេរិក (U.S Marshal Service) បាន​លក់​ដេញថ្លៃ​កាលពី​ឆ្នាំ 2014 ក្រោយពី​រឹបអូស​រូបិយវត្ថុ​អេឡិចត្រូនិក​នេះ​ពី «ផ្សារងងឹត» មួយ​ដែលមាន​ឈ្មោះថា Silk Road ប៉ុន្តែ ការលក់​ដេញថ្លៃ​លើក​នេះ​របស់ GSA បាន​បង្ហាញថា ការនិយម​ជួញដូរ Bitoin កាន់តែ​ទូលំទូលាយ​ជាង​មុន។

ក្រុមហ៊ុនធំៗរបស់​ពិភពលោក កំពុងតែ​ទទួលយក​វត្តមាន​របស់ Bitcoin។ Bank of New York Mellon Corp. បានឱ្យដឹងថា ពួកគេ​នឹង​កាន់កាប់ ផ្ទេរ និង​ប្រើប្រាស់​រូបិយវត្ថុ​អេឡិចត្រូនិក​នេះ​នាពេល​ដ៏​ខ្លី​ខាងមុខ ក្នុង​គ្រា​ដែល Mastercard ក៏បាន​ប្រកាស​អំពី​គម្រោង​អនុញ្ញាតឱ្យ​ម្ចាស់​ប័ណ្ណ ទូទាត់​ដោយ​ប្រាក់​អេឡិចត្រូនិក​មួយចំនួន​ផងដែរ​នៅក្នុង​ប្រព័ន្ធ​របស់​ពួកគេ។

ក្រុមហ៊ុន​ហិរញ្ញវត្ថុ Morgan Stanley និង Goldman Sachs ក៏មាន​បំណង​លោត​ចូល​រកស៊ី​ទាក់ទង​នឹង​ប្រាក់​អេឡិចត្រូនិក​ខាងលើនេះ​ផងដែរ។

រូបិយវត្ថុ Bitcoin ដែល​អាមេរិក​បាន​លក់​ដេញថ្លៃ​កាលពី​ឆ្នាំ 2014 ត្រូវបាន​គេ​ប៉ាន់ប្រមាណ​ឃើញថា មានតម្លៃ​ប្រហែល 19 លាន​ដុល្លារ​អាមេរិក។ អ្នកវិនិយោគ Tim Draper គឺជា​អ្នកឈ្នះ​ក្នុងការ​ដេញថ្លៃ ប៉ុន្តែ តម្លៃ​ចុងក្រោយ​មិនត្រូវ​បាន​គេ​បង្ហើប​ឱ្យដឹង​នោះឡើយ។ ចំនួន Bitcoin នេះ​នឹងមាន​តម្លៃ 1.5 ពាន់​លាន​ដុល្លារ​អាមេរិក បើ​គិត​មកដល់​ថ្ងៃទី 8 មីនា ឆ្នាំ 2021។

ព្រឹត្តិការណ៍​លក់​ដេញថ្លៃ​របស់ GSA ចំពោះ​រូបិយវត្ថុ​អេឡិចត្រូនិក​ចំនួន 0.7501 Bitcoin ខាងលើ នឹងត្រូវ​បានធ្វើ​ឡើង ចាប់ពី​ថ្ងៃទី 15 ដល់​ថ្ងៃទី 17 ខែមីនា ឆ្នាំ 2021៕

ប្រភព៖ Yahoo
ប្រែ​សម្រួល៖ បុត្រា

នៅពេលថ្មីៗនេះ ផលិតកម្មរាម បានបញ្ចេញបទចម្រៀងថ្មីមួយបទទៀតហើយ ដែលជាបទចម្រៀងរបស់លោក ដួង វិរៈសទ្ធ បន្ទាប់ពីបានបញ្ចេញបទចម្រៀងរបស់រាជិនីសំឡេងធម្មជាតិ មាស សុខសោភា បទ«ត្រឡប់»។

បទថ្មីរបស់លោក ដួង វិរៈសិទ្ធ មានចំណងជើងថា «ឆ្នេរអនុស្សារ» ដែលរៀបរាប់ពីអារម្មណ៍ឈឺចាប់របស់មនុស្សប្រុសម្នាក់ ត្រូវបានបាត់បង់មនុស្សស្រីជាទីស្រឡាញ់របស់ខ្លួន។ បទនេះដែរ ជាបទនិពន្ធថ្មី និងសម្រូលបទភ្លេងដោយលោកផ្ទាល់តែម្ដង។ បទនេះ បានលាយបញ្ចូលលាយលំរវាងភ្លេងសម័យ និងឧបករណ៍ភ្លេងបុរាណ ដែលធ្វើឱ្យអ្នកស្ដាប់មានអារម្មណ៍លន្លង់លន្លោចសោកសៅទៅតាមចម្រៀង។

មិនត្រឹមតែមានទឹកដមសំឡេងពីរោះក្រអួនក្រអៅនោះទេ សូម្បីតែសាច់រឿងក៏រៀបរាប់បានក្បោះក្បាយផងដែរ។ យ៉ាងណាមិញ គេបានដឹងថា បទ «ឆ្នេរអនុស្សារ»  ក៏ត្រូវបានលោក ដួង វិរៈសិទ្ធ លើកយកមកច្រៀងនៅថ្ងៃមើលមុខតារាមច្រៀងប្រុសប្រចាំផលិតកម្មរាម ក៏ដូចជាថ្ងៃសម្ពោធផលិតកម្មផងដែរ។

តោះមកស្ដាប់បទ «ឆ្នេរអនុស្សារ» ដែលជា Original Version ពីផលិតម្មរាម៖

បន្ទាប់ឃើញភាពវឹកវរពេញបណ្ដាញសង្គមហ្វេសប៊ុក ខណៈដែលករណីជំងឺកូវីដ១៩ បានឆ្លងរាលដល់ចង្កោមអ្នកសិល្បៈ នៅក្នុងនោះគេឃើញមានអ្នកសិល្បៈជាច្រើន បានបញ្ចេញមតិ និងសារលើកទឹកចិត្ត និងធ្វើតាមវិធានការណែនាំការពារសុខភាពតាមក្រសួងសុខាភិបាល។

ជាមួយគ្នានោះដែរ តារាសម្ដែងស្រីមានប្រជាប្រិយភាព និងមានឈ្មោះជារាជិនីក្រមា កញ្ញា មាន សូនីតា ក៏បានចេញមុខអំពាវនាវដល់មហាជនទាំងអស់ មេត្តាកុំរើសអើងដល់អ្នកសិល្បៈផងដែរ។ កញ្ញាបង្ហោះសារមុននោះនៅលើហ្វេសប៊ុកនៅថ្ងៃទី៩ ខែមីនា ឆ្នាំ២០២១នេះ ថា «ក្នុងនាមខ្ញុំជាអ្នកសិល្បៈមួយរូបដែល ខ្ញុំគិតថាប្រាកដមានទឹកចិត្តស្រដៀងគ្នា មានគោលដៅ ប្រហាក់ប្រហែលគ្នា សំខាន់គឺស្រលាញ់សិល្បៈ ក្នុងរឿងនេះខ្ញុំសុំមានយោបល់បន្តិចថាគ្មានអ្នកណាចង់អោយមានរឿង គ្មានអ្នកចង់អោយឆ្លងជំងឺនោះទេ បើគិតអោយអោយដល់ទៅចំពោះការទៅថតស្ពតក៏ក្នុងនាមជួយសង្គមដើម្បីផ្សព្វផ្សាយអនាម័យកូវិតដែរ តែដោយហេតុការណ៍អាក្រក់ក៏មានរឿងអកុសលបែបនេះកើតឡើង ចឹងសូមបងប្អូនទាំងអស់កុំមានភាពអវិជ្ជមានមានចំពោះអ្នកសិល្បៈអី 😷🙏»។

កញ្ញា​បានបន្ដទៀតថា «ក្នុងកំឡុងពេលនេះត្រូវធ្វើចិត្តអោយស្ងប់ ថែសុខភាពទាំងផ្លូវកាយ ទាំងផ្លូវចិត្ត រក្សាអនាម័យ សូមអោយមានការប្រុសប្រយ័ត្នអោយខ្ពស់ជាងមុន ហាត់ប្រាណអោយទៀងទាត់ផ្អាកជួបមនុស្សមួយរយៈ តាមដានព័ត៌មានត្រឹមត្រូវ ហើយក៏សូមជូនពរអោយអ្នកអស់គ្នារួចចាក់ផុតពីពេលវេលាដ៏អាក្រក់មួយនេះផង 🙏»៕

មុននោះបន្ដិច នៅលើបណ្ដាញសង្គមហ្វេសប៊ុករបស់តារាចម្រៀងហង្សមាស លោក ណុប បាយ៉ារិទ្ធ  បានបង្ហោះសារបញ្ជាក់ថា លោកពិតជាមានលទ្ធផលវិជ្ជមានកូវីដ១៩ និងបានអះអាងថា លោកកំពុងរៀបចំសម្លៀកបំពាក់និងរង់ចាំរថយន្តខាងក្រសួងសុខាភិបាលមកទទួល។

សារទាំងស្រុងបានសរសេររៀបរាប់ថា «មុននេះបន្តិចខ្ញុំបានទទួលលទ្ធផលហើយ គឺខ្ញុំមានវិជ្ជមានកូវីដ១៩ ខ្ញុំកំពុងរៀបចំសម្លៀកបំពាក់និងរង់ចាំរថយន្តខាងក្រសួងសុខាភិបាលមកទទួល។ អរគុណសម្រាប់ការព្រួយបារម្ភរបស់បងប្អូន🙏🏻🙏🏻🙏🏻 ខ្ញុំត្រូវតែរឹងមាំ យកឈ្នះជំងឺនេះដោយការព្យាបាលពីគ្រូពេទ្យអោយបាន ខ្ញុំមិនតក់ស្លុតនិងការពិតនេះទេ ត្បិតខ្ញុំក្តី អ្នកដែលខ្ញុំឆ្លងពីគាត់ក្តី គ្មានអ្នកណារីករាយចហ់ទទួលឡើយ មានតែពាក្យមួយប្រាប់ខ្លួនឯងគឺរឹងមាំ តស៊ូ 💪🏻💪🏻💪🏻»។

បន្ទាប់ពីបង្ហោះសារនេះហើយ គេឃើញមានអ្នកគាំទ្រជាច្រើន ក៏ដូចជាតារាសិល្បៈចូលរួមផ្ដល់កម្លាំងចិត្ត និងប្រាប់ឱ្យលោកថែរក្សាសុខភាពឆាប់ជាសះស្បើយ៕

នៅយប់ថ្ងៃម្សិលមិញនេះ គេទទួលបានព័ត៌មានបឋមពីករណីពិធីការិនីល្បីឈ្មោះ អ្នកនាង កែវ ចន្ទនិមល ស្វាមី និងកូន បានឆ្លងជំងឺកូវីដ១៩ និងបានចម្លងដល់តារាល្បីៗឈ្មោះរបស់ក្រុមហ៊ុនហង្សមាសថែមទៀត។ លុះដល់ព្រឹកថ្ងៃទី ៩ ខែមីនា ឆ្នាំ២០២១នេះ ពិធីករព័ត៌មានប្រចាំស្ថានីទូរទស្សន៍ហង្សមាស លោក មាស រិទ្ធី បានចេញការអះអាងការពិតពីករណី អ្នកនាង កែវ ចន្ទនិមល និងគ្រួសារ ពិតបានឆ្លងមែន។

លោក មាស រិទ្ធី បានអះអាងប្រាប់មហាជនថា តាមសម្ដីឆ្លងឆ្លើយរបស់លោកតាមទូរស័ព្ទជាមួយ អ្នកនាង កែវ ចន្ទនិមល បានឱ្យដឹងថា អ្នននាងបានប្រាប់ថា “កន្លងមក ខ្ញុំបានព្យាយាមការពារខ្លាំងណាស់ ខ្ញុំសូមអធ្យាស្រ័យពីបងប្អូនទាំងអស់គ្នាផង!”។ អ្នកនាងក៏បានប្រាប់មូលហេតុពិតទៀតថា អ្នកនាងបានចូលរួមថតស្ពតមួយ ដែលណែនាំអំពីការការពារឆ្លងជំងឺកូវីដ១៩ ក៏ប៉ុន្ដែអ្នកនាងជាត្រូវអ្នកថតស្ពតជាអ្នកចម្លងដោយមិនដឹងខ្លួនទៅវិញ ដោយនៅក្នុងនោះ អ្នកនាងបានការពារ និងប្រុងប្រយ័ត្នចំពោះការឆ្លងមេរោគនេះខ្លាំងបំផុត។

ពិធីករព័ត៌មានប្រចាំស្ថានីទូរទស្សន៍ហង្សមាសរូបនេះ​ បានអះអាងទៀតថា អ្នកនាងបានអំពាវនាវដល់បងប្អូនទាំងអស់ មេត្តាកុំរើសអើងរូបអ្នកនាង និងក្រុមគ្រួសារ ហើយអ្នកនាងថា មិនអាចលាក់ព័ត៌មាននេះបានទេ។ យ៉ាងណាមិញ អ្នកនាង កែវ ចន្ទនិមល ស្វាមី និងកូន កំពុងសម្រាកព្យាបាលខ្លួនហើយ ចំពោះអ្នកដែលពាក់ព័ន្ធ ក៏កំពុងធ្វើចតាឡីស័ក្ដផងដែរ៕

ទស្សនាវីដេអូ ខាងក្រោមនេះ៖

MacKenzie Scott ដែលជា​អតីត​ភរិយា​របស់​មហាសេដ្ឋី Jeff Bezos និង​ជាម​ហា​សេដ្ឋិនី​ម្នាក់​ដែលមាន​ទ្រព្យ​ច្រើនជាងគេ​ក្នុង​ពិភពលោក បាន​រៀប​អាពាហ៍ពិពាហ៍​ជាមួយ Dan Jewett ដែលជា​គ្រូបង្រៀន​មុខវិជ្ជា​វិទ្យាសាស្ត្រ។

លោក Jewett កំពុង​បង្រៀន​នៅ​សាលា​ឯកជន Lakeside School នៅក្នុង​ទីក្រុង Seattle។ ថ្មីៗនេះ បុរស​រូបនេះ​បាន​និយាយ​ដល់​អាពាហ៍ពិពាហ៍​របស់ខ្លួន​នៅ​គេហទំព័រ Giving Pledge ដែលជា​អង្គការ​មួយ​ត្រូវបាន​បង្កើតឡើង​ដោយ​មូលនិធិ Bill & Melinda Gates និង​លោក Warren Buffett ដើម្បី​ជំរុញ​ឱ្យ​ក្រុម​មហាសេដ្ឋី ចូលរួម​ធ្វើ​កិច្ចការ​មនុស្សធម៌។

នៅលើ​ទំព័រ Giving Pledge កាលពី​ថ្ងៃទី 6 មីនា លោក Jewett បានសរសេរថា៖ «នៅក្នុង​សុភមង្គល​ដ៏​ចៃដន្យ​មួយ ខ្ញុំ​បាន​រៀបការ​ជាមួយ​ស្ត្រី​ម្នាក់​ក្នុងចំណោម​អ្នក​ដែលមាន​ចិត្ត​ទូលាយ និង​ចិត្តល្អ​បំផុត​ដែល​ខ្ញុំ​ធ្លាប់បាន​ជួប។ ខ្ញុំ និង​នាង សន្យាថា​នឹង​បរិច្ចាគ​ទ្រព្យ​យ៉ាងច្រើន​ដើម្បី​ជួយ​ដល់​អ្នកដទៃ»។

យោងតាម Washington Post មហា​សេដ្ឋិនី Scott ទំនងជា​បាន​ជួប​លោក Jewett នៅ​សាលា Lakeside School ព្រោះកូនៗរបស់​អ្នកស្រី​កំពុង​រៀន​នៅ​ទីនោះ។ មហាសេដ្ឋី Bill Gates ក៏​ធ្លាប់បាន​រៀន​នៅ​សាលារៀន​នេះដែរ។

ឆ្នាំនេះ អ្នកស្រី Scott មាន​អាយុ 50 ឆ្នាំ។ អ្នកស្រី​គឺជា​អ្នកមាន​ជាងគេ​លំដាប់​ទី 22 ក្នុង​ពិភពលោក ដោយមាន​ទ្រព្យ​សរុប 53.5 ពាន់​លាន​ដុល្លារ​អាមេរិក នេះ​បើតាម​សារព័ត៌មាន Bloomberg។ ក្រោយពី​បាន​លែងលះគ្នា​ជាមួយនឹង​មហាសេដ្ឋី Jeff Bezos កាលពី​ឆ្នាំ 2019 អ្នកស្រី Scott ក៏បាន​ក្លាយជា​សប្បុរស​ជន​មួយរូប​ដែលមាន​ឥទ្ធិពល​ជាងគេ​នៅក្នុង​ជំនាន់​របស់ខ្លួន។

កាលពី​ឆ្នាំទៅ អ្នកស្រី Scott បាន​បរិច្ចាគ​ប្រាក់ 6 ពាន់​លាន​ដុល្លារ​អាមេរិក។ គោលដៅ​មនុស្សធម៌​របស់​អ្នកស្រី ភាគច្រើន​ផ្ដោតលើ​អង្គការ​មនុស្សធម៌តូច។ អ្នកស្រី​ក៏​ធ្លាប់បាន​អំពាវនាវ​ឱ្យ​ក្រុម​របស់​អ្នកស្រី រិះរក​វិធី​ដើម្បី​ធ្វើ​កិច្ចការ​មនុស្សធម៌​ឱ្យបាន​លឿន​ផងដែរ។

«Dan គឺជា​បុរស​ម្នាក់​ដ៏​អស្ចារ្យ ហើយ​ខ្ញុំ​ចូលរួម​អបអរសាទរ​ចំពោះ​ពួកគេ» Bezos បាន​និយាយ​ដូច្នេះ​នៅក្នុង​ប្រកាស​មួយ​ដែល​ត្រូវ​បានលើកឡើង​ដោយ​អ្នកនាំពាក្យ​របស់ Amazon កាលពីពេលថ្មីៗនេះ។ មហាសេដ្ឋី Bezos បច្ចុប្បន្ន​ជា​អ្នកមាន​ជាងគេ​បង្អស់​ក្នុង​ពិភពលោក ដោយមាន​ទ្រព្យ​សរុប ជាង 176.6 ពាន់​លាន​ដុល្លារ​អាមេរិក៕

ប្រភព៖ Bloomberg
ប្រែ​សម្រួល៖ បុត្រា

ហាង​កាហ្វេ​ឈ្មោះ Black Madonna មាន​ទីតាំង​ស្ថិតនៅក្នុង​តំបន់​ប្រវត្តិសាស្ត្រ​របស់​រដ្ឋធានី Prague នៃ​សាធារណរដ្ឋ​ឆេ​ក កំពុង​លក់​នំ​ជាច្រើន​ប្រភេទ ក្នុងនោះ​មាន​ទាំង​នំ cake ដែលមាន​រូបរាង​ដូច​វីរុស Covid-19 និង​វ៉ាក់សាំង​ផងដែរ។

ហាង​ខាងលើនេះ ធ្លាប់ជា​កន្លែង​មួយ​ដែល​បាន​ឧទ្ទេសនាម​នំ cake ដែលមាន​រូបរាង​ដូច​វីរុស Corona កាលពី​រដូវ​ស្លឹកឈើ​ជ្រុះ​នា​ឆ្នាំ 2020។ បច្ចុប្បន្ន ហាង​នេះ​មាន​លក់ «ថ្នាំ​ព្យាបាល​ជំងឺ​ឃ្លាន» ដ៏​គួរឱ្យ​ចាប់អារម្មណ៍ នោះ​គឺ​បង្អែម​លាង​មាត់​ដែលមាន​រស់ជាតិ​ស្ត្រូ​បូរី និង​ចេក និង​មាន​រូបរាង​ជា​វ៉ាក់សាំង​គួរឱ្យ​ចង់​ទទួលទាន។

បង្អែម​នេះ​មាន​ឈ្មោះថា Vaccine Cake។ Olga Budnik ដែលជា​អ្នកធ្វើ​នំ​នេះ និយាយថា៖ «នេះ​គឺជា​បង្អែម​លាង​មាត់​ធ្វើ​អំពី​ស្រទាប់​នំ​ពង​ទា​ទន់​ស្ដើង និង​ស្នូល​ធ្វើ​អំពី​ស្ត្រូ​បូរី និង​ចេក»។

ចំណែក​អតិថិជន​ម្នាក់​មាន​ឈ្មោះថា Tatiana Rysko និយាយថា៖ «ខ្ញុំ​បាន​ទិញ​នំ​ទាំងពីរ​ប្រភេទ នោះ​គឺ វីរុស និង​វ៉ាក់សាំង។ ខ្ញុំ​បាន​ភ្លក់​នំ​វីរុស​ហើយ ខ្ញុំ​ចូលចិត្ត​វា​ណាស់។ ខ្ញុំ​ក៏​ចង់​ភ្លក់​នំ​វ៉ាក់សាំង​វិញ​ម្ដង ខ្ញុំ​កំពុង​រង់ចាំ»៕

ប្រភព៖ RT, Yahoo
ប្រែសម្រួល​៖ បុត្រា

លេខ​គណនី​ធនាគារ​ដែល​ដូច​ទៅនឹង​លេខ​ទូរស័ព្ទដៃ ត្រូវបាន​គេ​យល់ថា មាន​ភាពងាយស្រួល​ក្នុងការ​ចងចាំ និង​មិន​បង្ក​ការលំបាក​ក្នុងការ​វេរ​លុយម្ដង។

យោងតាម​ប្រភពព័ត៌មាន​ពី​ធនាគារ​របស់​កងទ័ព​វៀតណាម MB Bank (Vietnam’s Military Commercial Joint-Stock Bank) នៅ​ប្រទេស​វៀតណាម ក្នុង​ខែមីនា​នេះ ធនាគារ​នឹង​អនុញ្ញាតឱ្យ​អតិថិជន​ជ្រើសរើស​លេខ​គណនី​ដូច​ទៅនឹង​លេខ​ទូរស័ព្ទដៃ​របស់​ពួកគេ។

ដូច្នេះ អតិថិជន​នឹងមិន​ចាំបាច់​ចងចាំ​លេខ​គណនី​ដ៏​វែង (13លេខ) ដូច​មុន​ទៀតហើយ ដោយ​គ្រាន់តែ​យក​លេខ​ទូរស័ព្ទ​ផ្ទាល់ខ្លួន​ធ្វើជា​លេខ​គណនី។ អតិថិជន​ក៏​មិនចាំបាច់​ទៅកាន់​ធនាគារ​នេះ​ដោយផ្ទាល់ ព្រោះ​អាច​ប្រើប្រាស់​កម្មវិធី (App) របស់​ធនាគារ​នេះ​នៅលើ​ទូរស័ព្ទដៃ។

កន្លងមក ធនាគារ​របស់​កងទ័ព​វៀតណាម​មួយ​នេះ​ក៏​ធ្លាប់បាន​អនុវត្ត​កម្មវិធី​ជាច្រើន​ទាក់ទង​នឹង​លេខ​គណនីល្អៗផងដែរ​ដើម្បី​ទាក់ទាញ​អតិថិ​ច​ន។

យោងតាម​របាយការណ៍​ហិរញ្ញវត្ថុ​របស់ MB ប្រាក់​បញ្ញើ​របស់​អតិថិជន​នៅ​ធនាគារ​នេះ​កាលពី​ថ្ងៃទី 31 ខែធ្នូ 2020 មាន​ចំនួន 310,960 ពាន់​លាន​ដុង (13,392,021,032 ដុល្លារ​អាមេរិក) កើន 14% ធៀប​នឹង​ដើមឆ្នាំ។ MB Bank ចំណេញ​បាន 310,960 ពាន់​លាន​ដុង (460,296,889 ដុល្លារ​អាមេរិក) កើន 6.5% ធៀប​នឹង​ឆ្នាំ 2019៕

ប្រភព៖ CB

យោងតាម Hurun (Hurun Global Rich List) ចិន​គឺជា​ប្រទេស​ដំបូង​គេ​ក្នុង​ពិភពលោក​ដែលមាន​មហាសេដ្ឋី​ដុល្លារ​ច្រើនជាង 1,000 នាក់ ក្នុងនោះ មាន​មហាសេដ្ឋី​ថ្មី​ជាង 200 នាក់ បានបង្ហាញ​ខ្លួន​នៅ​ប្រទេស​នេះ​នា​ឆ្នាំ 2020។

សារព័ត៌មាន AFP ដកស្រង់​របាយការណ៍​របស់ Hurun បាន​បង្ហាញថា ក្នុង​ឆ្នាំ 2020 អ្នកមាន​ចំនួន 259 នាក់ បាន​ក្លាយជា​មហាសេដ្ឋី​ដុល្លារ​នៅ​ប្រទេស​ចិន។ ដូច្នេះ បច្ចុប្បន្ន ប្រទេស​ចិន​មាន​មហាសេដ្ឋី​សរុប​ចំនួន 1,059នាក់។ សហរដ្ឋអាមេរិក​ជាប់​លេខ 2 ដោយមាន​មហាសេដ្ឋី​សរុប​ចំនួន 696 នាក់ ក្នុងនោះ​មាន​មហាសេដ្ឋី​ថ្មី​ចំនួន 70 នាក់។

តួលេខ​មហាសេដ្ឋី​នៅ​ប្រទេស​ចិន បាន​កើន​ជិត​ទ្វេដង​នៅក្នុង​អំឡុង 5 ឆ្នាំ​កន្លងទៅនេះ។ អ្នកមាន​ជាងគេ​បង្អស់​នៅ​ប្រទេស​ចិន​នាបច្ចុប្បន្ន​គឺ​លោក Zhong Shanshan ជា​ថៅកែ​ក្រុមហ៊ុន​ផលិត​ភេសជ្ជ Nongfu។ ដោយមាន​ទ្រព្យ​សរុប 74 ពាន់​លាន​ដុល្លារ លោក Zhong គឺជា​អ្នកមាន​ជាងគេ​លំដាប់​ទី​ពីរ​នៅក្នុង​ទ្វីបអាស៊ី ឈរ​ពីក្រោយ​មហាសេដ្ឋី​ឥណ្ឌា លោក Mukesh Ambani ដែលមាន​ទ្រព្យ​សរុប 81.2 ពាន់​លាន​ដុល្លារ​អាមេរិក។

ពិភពលោក​បច្ចុប្បន្ន​មាន​មហាសេដ្ឋី​ចំនួន 3,228 នាក់ កាន់កាប់​ក្រុមហ៊ុន​ចំនួន 2,402 ស្ថាប័ន នៅក្នុង​ប្រទេស​​ចំនួន 68។ នៅ​ប្រទេស​ចិន រដ្ឋធានី​ប៉េកាំង មាន​មហាសេដ្ឋី​ចំនួន 145 នាក់ រីឯ​ទីក្រុង​សៀង​ហៃ​ឈរ​លេខ 2 ដោយមាន​មហាសេដ្ឋី 113 នាក់ ចំណែក​ទីក្រុង សិន​ជិន (Shenzhen) មាន 105 នាក់ ខណៈ​ហុងកុង​មាន 82 នាក់។

យោងតាម Bloomberg Billionaires Index អគ្គនាយក​ប្រតិបត្តិ​របស់​ក្រុមហ៊ុន Amazon លោក Jeff Bezos បច្ចុប្បន្ន (ថ្ងៃទី 5 មីនា 2021) ជា​អ្នកមាន​ជាងគេ​ក្នុង​ពិភពលោក ដោយមាន​ទ្រព្យ​សរុប​ចំនួន 175 ពាន់​លាន​ដុល្លារ។ ឈរ​លំដាប់​លេខ 2 គឺ​អគ្គនាយក​ប្រតិបត្តិ​របស់​ក្រុមហ៊ុន Tesla លោក Elon Musk ដោយមាន​ទ្រព្យ​សរុប 162 ពាន់​លាន​ដុល្លារ។ ចំណែក​លេខ 3 គឺ​លោក Bill Gates មាន 134 ពាន់​លាន​ដុល្លារ៕

ប្រភព៖ AFP, Bloomberg
ប្រែសម្រួល​៖ បុត្រា

មនុស្ស​ម្នាក់​រស់នៅក្នុង​រដ្ឋ Connecticut បាន​ទិញ​ចាន​សេ​រ៉ា​មិច​មួយ​តម្លៃ 35 ដុល្លារ​អាមេរិក ពី​ទីតាំង​លក់ទំនិញចាស់ៗមួយកន្លែង ដោយ​មិន​បានដឹង​ទាល់់តែសោះ​ថា វា​គឺជា​វត្ថុ​បុរាណ​ជំនាន់​រាចវង្ស​មីង (Ming Dynasty) របស់​ចិន ដែលមាន​តម្លៃ​រហូតដល់ 5,00,000 ដុល្លារ​អាមេរិក។

ចាន​ដែលមាន​រូបគំនូរ​ស្លឹកឈើ​ដ៏​អស្ចារ្យ​មួយ​នេះ ត្រូវបាន​មនុស្ស​ម្នាក់​ទិញ​ពី​កន្លែង​លក់ទំនិញចាស់ៗ ដែល​ស្ថិត​នៅក្នុង​រដ្ឋ Connecticut ភាគ​ឦសាន​នៃ​សហរដ្ឋអាមេរិក។ អត្តសញ្ញាណ​របស់​អ្នកទិញ​រូបនេះ បច្ចុប្បន្ន​ត្រូវបាន​គេ​លាក់​​ជា​អាថ៌កំបាំង។

អ្នកទិញ​ខាងលើ​បា​នរក​ក្រុម​អ្នកជំនាញ​ខាង​សេ​រ៉ា​មិច​ ប៉សឺឡែន​ ដើម្បី​ពិនិត្យ​ចាន​នេះ ដោយ​ការផ្ញើ​រូបថត​ជាដំបូង ហើយ​ក្រោយមក​ក៏បាន​យក​វា​ទៅកាន់​សាល​ដេញថ្លៃ​ដើម្បី​ពិនិត្យ​ឱ្យបាន​ច្បាស់។ ក្រុម​អ្នកជំនាញ​បានឱ្យដឹងថា ចាន​នេះ​ត្រូវបាន​ផលិតឡើង​សម្រាប់​រាជបល្ល័ង្ក​របស់​មហាក្សត្រ Yongle (ព្រះនាម​ផ្ទាល់ខ្លួន​គឺ Zhu Di) ដែលជា​ស្ដេច​ទី​បី​របស់​រាជវង្ស​មីង សោយរាជ​ចាប់ពី​ឆ្នាំ 1402 ដល់ 1424។

«នៅក្នុង​ពិភពលោក​នេះ មាន​ចាន​ដូច្នេះ​ចំនួន​តែ 6 ប៉ុណ្ណោះ​ដែល​ត្រូវបាន​គេ​ដឹង។ នោះ​គឺជា​សម្ភារ​សម្រាប់តែ​រាជវង្ស​ប៉ុណ្ណោះ» នេះ​បើតាម Angela McAteer អ្នកជំនាញ​ខាង​ស្នាដៃ​សិល្បៈ​ចិន មកពី​ការិយាល័យ​កណ្ដាល​របស់ Sotheby’s នៅ​ទីក្រុង New York។ Sotheby’s គឺជា​ក្រុមហ៊ុន​ឈ្មួញ​ជើងសា​ធំជាងគេ​បង្អស់​មួយ​នៅក្នុង​ពិភពលោក ដែល​រកស៊ី​ខាង​វត្ថុ​បុរាណ គ្រឿងអលង្ការ គ្រឿង​សិល្បៈ​តុបតែង អចលនទ្រព្យ និង​វត្ថុចម្លែក។

Sotheby’s នឹង​នាំយក​ចានទី 7 នៃ​រាជបល្ល័ង្ក​របស់​មហាក្សត្រ Yongle នេះ ទៅ​ដាក់លក់​ដេញថ្លៃ​នៅ​ថ្ងៃទី 17 មីនា​ខាងមុខ ដោយ​ចាប់ផ្ដើម​ពី​តម្លៃ 300,000 ដុល្លារ ដល់ 500,000 ដុល្លារ​អាមេរិក។

ចាន​ចំនួន 5 ក្នុងចំណោម​ចាន​ដែល​ត្រូវបាន​គេ​ស្គាល់ កំពុងស្ថិត​ក្នុង​សារមន្ទីរ រួមមាន៖ 2 នៅ​កោះ​តៃវ៉ាន់, 2 នៅ​ក្រុង​ឡុង​ដ៍ ប្រទេស​អង់គ្លេស និង 1 នៅ​ទីក្រុង​តេ​ហេ​រ៉ង់ ប្រទេស​អ៊ីរ៉ង់៕

ប្រភព៖ SCMP
ប្រែ​សម្រួល៖ បុត្រា