សង្គម និងសេដ្ឋកិច្ច - La Reine Media

ចេះតែមានហ្មង?! បព្វជិតម្នាក់ ផោមដាក់មុខអ្នកមកទទួលពរ នឹងនាំឱ្យមានសិរីសួស្ដី និងសំណាងល្អ

ជំនឿដ៏មហាសែនប្លែក…ឱ្យបព្វជិត(អ្នកបួស) ផោមដាក់មុខ គឺជាការឱ្យពរដ៏សែនស័ក្តិសិទ្ធិ អ្នកណាបានទទួល(ក្លិនផោម)ហើយ នឹងមានលាភសំណាងល្អៗ និងទ្រព្យសម្បត្តិ លុយកាក់ ហូរចូលមកមិនដាច់រយៈ…មានមនុស្សម្នានាំគ្នាមកឈរតម្រង់ជួរ ចាំទទួលក្លិនផោម យ៉ាងច្រើនកុះករ។

តើអ្នកណាទៅនឹកស្មានដល់ថា ការដែលយើងបញ្ចេញខ្យល់ផោមចេញមក នឹងធ្វើឱ្យយើងបានទទួលនូវការគោរពជឿជាក់ ពីអ្នកឯទៀតបានដល់ថ្នាក់នេះសោះ? ឧទាហរណ៍ បព្វជិត ជនជាតិអាហ្វ្រិកម្នាក់ ដែលអះអាងថា ខ្លួនមានថាមពលវិសេស អាចជួយសង្គ្រោះអ្នកដទៃបាន ដោយការផោម!។

លោក គ្រីស ផេណូឡូផេ បុព្វជិតរបស់លទ្ធិ SevenFold Holy Spirit មកពីទីក្រុងលីមប៉ូប៉ូ អាហ្វ្រិកខាងត្បូង កំពុងក្លាយជាបុគ្គលម្នាក់ ដែលត្រូវបានគេគោរពជឿជាក់យ៉ាងខ្លាំង ព្រោះមនុស្សទាំងអស់នោះ សុទ្ធតែជឿថា ខ្យល់ និងក្លិនផោមរបស់គាត់ មានថាមពលវិសេស អាចបង្ហាញមហិឫទ្ធិ អភិនិហារ នាំលាភសំណាង និងភាពចម្រុងចម្រើនមកឱ្យពួកគេ។

វិធីទទួលយកខ្យល់ និងក្លិនផោមមហាស័ក្តិសិទ្ធិនោះគឺ អ្នកមកទទួល ត្រូវដេកផ្ងារនៅលើកម្រាលឥដ្ឋ ចំណែកលោកគ្រីស នឹងអង្គុយដាក់គូទ ចំពីលើផ្ទៃមុខអ្នកមកទទួលពរនោះ បន្ទាប់មក ទើបបញ្ចេញខ្យល់ផោមដាក់មុខអ្នកមកទទួលពរនោះ ដោយត្រូវផោមឱ្យចំរន្ធច្រមុះ ដែលលោកគ្រីស បានអះអាងថា វាជាការជួយរំដោះវិញ្ញាណស័ក្តិសិទ្ធិ ដើម្បីឱ្យមនុស្សទាំងឡាយបានទទួលពរពេញៗតែម្ដង។

មនុស្សជាច្រើនយល់ឃើញថា វាជារឿងមួយប្លែកខ្លាំងណាស់ តែ លោកអ្នកជឿដែរឬទេ? មានមនុស្សមកឈរតម្រង់ជួរគ្នា រង់ចាំទទួលយកក្លិនផោមស័ក្តិសិទ្ធិនោះ យ៉ាងជ្រើនកុះករ។ គេល្បីថា មានការកក់ទុកមុនជារៀងរាល់ថ្ងៃ ព្រោះមនុស្សម្នាទាំងអស់ សុទ្ធតែជឿថា ខ្យល់ និងក្លិនផោម របស់លោកគ្រីស នឹងនាំមកនូវសិរីសួស្ដី ភាពមានបានធូរធារ ជាពិសេសខាងមុខរបររកស៊ីផ្សេង…អ្នកខ្លះត្រូវរង់ចាំវេនរបស់ខ្លួនយូរ រហូតដល់ទៅ 2ខែឯណោះ។ អតីតសមាជិករបស់លទ្ធិនេះ បាននិយាយថា អ្នកខ្លះជឿលើផោមស័ក្តិសិទ្ធិនេះខ្លាំងណាស់ ដល់ថ្នាក់យកដប មកច្រកក្លិនផោមនោះទុក ដើម្បីហិត មុនពេលចរចារឿងមុខជំនួញ ឬមុនពេលពិភាក្សារឿងការងាររកស៊ីផ្សេងៗទៀតផង។

ក្រៅពីផោមដាក់មុខ ផ្ដល់លាភសំណាងហើយនោះ លោកគ្រីស ថែមទាំងបានអះអាងទៀតផងថា លោកអាចព្យាបាលជំងឺបាន ដោយការជាន់លើខ្លួនអ្នកជំងឺ ដែលលោកមិនបានអធិប្បាយលម្អិតឱ្យបានច្បាស់លាស់ឡើយថា តើហេតុអីត្រូវធ្វើបែបនោះឡើយ តែលោកអះអាងថា វាពិតជាអាចព្យាបាលជំងឺបានប្រាកដមែន។ វាមិនមែនជាការប្រើអំពើហិង្សា ឬការធ្វើបាបលើរូបរាងកាយនោះឡើយ ព្រោះពេលដែលលោកជាន់ទៅនោះ ព្រះជាម្ចាស់ ទ្រង់បានបណ្ដាលឱ្យរូបលោកគ្មានទម្ងន់ខ្លួនឡើយ ទើបមិនធ្វើឱ្យអ្នកណាមានក្ដីឈឺចាប់ យ៉ាងពិតប្រាកដ។

ប្រភព៖ វេបសាយ ebaumsworld
ប្រែសម្រួលដោយ ទិទីតំតាតូ

March 22, 2021

Cucci លក់ស្បែកជើងស្រមោលតម្លៃចាប់ពី 9ដុល្លារអាមេរិក ដែលស្រដៀងនឹង Bitcoin

ស្បែកជើងឌីជីថល ឬហៅថាស្បែកជើងស្រមោលរបស់ក្រុមហ៊ុន Gucci មានតម្លៃទាបជាងឆ្ងាយបើធៀបនឹងស្បែកជើងពិត ក៏ប៉ុន្តែអ្វីដែលជារឿងគួរឱ្យយកចិត្តទុកដាក់ នោះគឺថា ម្ចាស់ស្បែកនេះនឹងមិនអាចយកវាមកពាក់បាននោះទេ។

Gucci ដែលជាយីហោសម្លៀកបំពាក់ដ៏ល្បីល្បាញមួយក្នុងពិភពលោក ទើបតែបានដាក់លក់ផលិតផលមួយដែលស្ថិតក្នុងប្រភេទ NFT (Non-fungible token) នោះគឺស្បែកជើងស្រមោល ពោលគឺស្បែកជើងដែលមិនមានរូបរាងអាចប៉ះពាល់បាន។

NFT គឺជាកូដតំណាងឱ្យវត្ថុជាផលិតផលដែលប្រើប្រាស់បច្ចេកវិទ្យា blockchain ដូចទៅនឹងរូបិយវត្ថុឌីជីថល Bitcoin។ ការកាន់កាប់ NFT ត្រូវបានប្រៀបប្រដូចទៅនឹងការទិញទំនិញកម្រមួយប្រភេទដែលមានតែមួយគត់នៅក្នុងលោក។ អ្នកវិនិយោគទិញ NFT ដែលភ្ជាប់ជាមួយនឹងផលិតផលអ្វីមួយគឺមានបំណងក្លាយជាម្ចាស់តែម្នាក់គត់ ឬរំពឹងថា ផលិតផលដែលខ្លួនបានទិញនោះនឹងឡើងថ្លៃ ហើយលក់វាចេញដើម្បីបានចំណេញ។ ទន្ទឹមនឹងការលេចធ្លោរបស់ប្រាក់អេឡិចត្រូនិកដូចជា Bitcoin ជាដើម NFT ក៏កំពុងក្លាយជាទំនិញថ្មីដែលត្រូវបានក្រុមអ្នកវិនិយោគយកចិត្តទុកដាក់ខ្ពស់នាពេលថ្មីៗនេះដែរ។

ដើម្បីបង្កើតបានផលិតផលស្រមោលនេះ Gucci បានសហការជាមួយក្រុមហ៊ុនបច្ចេកវិទ្យាផ្នែកសម្លៀកបំពាក់ឈ្មោះ Wanna ដែលមានទីស្នាក់ការកណ្ដាលនៅប្រទេសបេឡារុស។ ក្រុមហ៊ុន Wanna មានឈ្មោះល្បីល្បាញជាមួយនឹងការប្រើប្រាស់បច្ចេកវិទ្យា AR (Augmented reality) ដើម្បីបង្កើតបានជាម៉ូដែលផលិតផលឌីជីថល 3D ដូចជាស្បែកជើងកីឡា និងនាឡិកា។ល។

Wanna ធ្លាប់សហការជាមួយ Reebok, Puma និង Snapchat ដើម្បីពិនិត្យទៅលើររៀបដែលអតិថិជនទទួលយកបទពិសោធន៍ក្នុងការលសម្លៀកបំពាក់ស្រមោលនៅលើកម្មវិធី (App) របស់ពួកគេ។ ក្រុមហ៊ុននេះក៏ធ្លាប់សហការជាមួយ Gucci ដើម្បីជួយឱ្យអតិថិជនលសក្បែកជើងនៅលើ App ផងដែរ។

ស្បែកជើងស្រមោលរបស់ Gucci នេះនឹងមានតម្លៃ 8.99ដុល្លារនៅលើ App របស់ក្រុមហ៊ុន Wanna និង 11.99ដុល្លារនៅលើ App របស់ Gucci។ ជាមួយនឹងផលិតផលស្រមោលខាងលើ Gucci កំពុងតម្រង់ទិសដៅទៅរកអតិថិជនជំនាន់ Z (យុវវ័យ) ដែលមានការយល់ដឹងច្រើនអំពីបច្ចេកវិទ្យា ជាក្រុមមនុស្សដែលអាចមិនទាន់មានលទ្ធភាពទិញផលិតផលពិតរបស់យីហោនេះ៕

ប្រភព៖ Hypebeast
ប្រែសម្រួល៖ បុត្រា

March 20, 2021

តោះ! មកមើលប្រាក់ខែ Honda កាលលេងនៅក្លិបចាស់

Keisuke Honda អតីតកីឡាករខ្សែប្រយុទ្ធជម្រើសជាតិជប៉ុន និងជាអ្នកចាត់ការក្រុមជម្រើសជាតិកម្ពុជា ត្រូវបានគេស្គាល់ថា ជាកីឡាករជប៉ុនម្នាក់ ដែលសម្បូរបទពិសោធក្រៅប្រទេសបំផុត ដោយរូបគេធ្លាប់បានលេងនៅក្លិបសឹងតែគ្រប់ទ្វីបទាំងអស់ នៅតែទ្វីបអង់តាក់ទិកមួយតែប៉ុណ្ណោះ។

បើនិយាយអំពីប្រាក់ខែវិញ កីឡាកររូបនេះ អាចរកបានខ្ទង់រាប់សិបលានដុល្លារ កាលពីនៅលេងឱ្យក្លិប AC Milan នៃលីគកំពូលអ៊ីតាលី ដែលគ្រានោះ គឺជាសម័យកាលដ៏កំពូល របស់កីឡាកររូបនេះ។ មកទល់នឹងពេលនេះ ក្លិប Botafugo ដែលជាក្លិបចុងក្រោយរបស់កីឡាកររូបនេះប្រកបអាជីពចុងក្រោយបង្អស់ បានបញ្ចេញទិន្នន័យប្រាក់ខែរបស់ Honda ដោយមានតម្លៃដល់ទៅ 66ម៉ឺនដុល្លារ ក្នុង 1រដូវកាល បើគិតជាខែវិញ រូបគេអាចរកបានប្រហែលខ្ទង់ 5ម៉ឺន5ពាន់ដុល្លារ ជារៀងរាល់ខែ ពីក្លិបលីគកំពូលប្រេស៊ីលខាងលើ។

គួរឱ្យដឹងដែរថា កាលពីពេលថ្មីៗនេះ Keisuke Honda ទើបតែបានចុះកុងត្រាជាមួយនឹងក្លិបមួយ នៃលីគកំពូលអាស៊ែបៃហ្សង់ គឺក្លិប Neftçi PFK តែមិនទាន់មានភាគីណាមួយ ហ៊ានចេញមុខទម្លាយអំពីប្រាក់ខែរបស់កីឡាករម្នាក់នេះនៅឡើយទេ៕

March 19, 2021

សោកស្តាយ អ៊ុំ សេរីរ័ត្ន សម្រេចចិត្ត បោះបង់អាជីពបាល់ទាត់ហើយ

អ្នកចាំទីរបស់ក្លិបបាល់ទាត់ក្រសួងការពារជាតិ បានប្រកាសថា រូបគេនឹងបញ្ចប់អាជីពបាល់ទាត់ត្រឹមនេះហើយ ដោយសារតែបញ្ហារបួសជង្គង់ និងសរសៃពួររ៉ាំរ៉ៃ ដែលអូសបន្លាយអស់រយៈពេលជាង 4ឆ្នាំមកហើយ។

អ៊ុំ សេរីរ័ត្ន ចាប់ផ្ដើមមានបញ្ហារបួសសរសៃ MCL នៅឆ្នាំ2018 ហើយក៏បានចេញទៅព្យាបាលនៅប្រទេសវៀតណាម ដោយត្រូវសម្រាករយៈពេលជាង 10ខែ។ បន្ទាប់ពីរបួសជាសះស្បើយ សេរីរ័ត្នបានចូលលេងឡើងវិញនៅចុងឆ្នាំ2019។ លុះលីគកំពូលកម្ពុជាដំណើរការនៅឆ្នាំ2020 គេលេងបានតែ 3ប្រកួតបុណ្ណោះ ក៏របួសសរសៃ MCL ផ្សេងទៀត តែមិនអាចទៅព្យាបាលនៅក្រៅប្រទេសបានទេ ដោយសារតែការផ្ទុះនៃជំងឺកូវីដ-19។ វិបត្តិនេះបានធ្វើឱ្យគេសម្រេចចិត្តព្យាបាលនៅក្នុងប្រទេស។

កីឡាកររបស់ក្លិប Tiffy Army រូបនេះបានរៀបរាប់អំពីអាការរបួសរបស់គេថា៖ «ពេលដែលខ្ញុំប្រកួតជាមួយវិសាខាហ្នឹង គឺនៅឆ្នាំ2019 ជាការប្រកួតចុងក្រោយហើយ ហើយបន្ទាប់ពីហ្នឹងមក ជើងខ្ញុំវាប្រសើរឡើងវិញហើយ ដល់ពេលចូលឆ្នាំ2020ហ្នឹង គឺខ្ញុំលេងជាមួយអាស៊ីអឺរ៉ុប ព្រះខ័នរាជស្វាយរៀង និងវិសាខា លេងបាន 3ប្រកួតជុំទី1 ដល់ពេលហើយ កូវីដមកដល់ ក៏សម្រាក…ពេលគេសម្រាកកូវីដហ្នឹង គឺបញ្ហាសាច់ដុំខ្ញុំ ចាប់ផ្ដើមស្រកទៅវិញ ហើយណាមួយគេអត់ឱ្យប្រមូលផ្ដុំផង បញ្ហាសាច់ដុំខ្ញុំអត់សូវបានហាត់ វាស្រក ដល់ពេលចូលទៅវិញ ខ្ញុំខំប្រឹងទាត់បាល់ទៅ វាធ្វើឱ្យប៉ះពាល់ដល់សរសៃផ្សេងមួយទៀត»៕

March 19, 2021

Honda នឹងបានពាក់អាវលេខ4 នៅលីគកំពូល អាស៊ែបៃហ្សង់

អ្នកចាត់ការទូទៅក្រុមជម្រើសជាតិកម្ពុជា លោក Keisuke Honda បានសម្រេចចិត្តផ្លាស់ទៅកាន់ក្លិប Neftci PFK នៃលីគកំពូលអាស៊ែបៃហ្សង់។

Honda វ័យ 34ឆ្នាំ ដែលត្រូវបានគេដឹងថា ពេលនេះកំពុងស្ថិតនៅក្នុងរដ្ឋធានីបាគូ របស់អាស៊ែបៃហ្សង់ គឹនៅមិនទាន់មានក្លិបលេង ចាប់តាំងពីបានចាកចេញពីក្រុមនៅប្រេស៊ីល កាលពីចុងឆ្នាំមុន។ ក្រោយមក អ្នកចាត់ការទូទៅនៃក្រុមជម្រើសជាតិកម្ពុជារូបនេះ ក៏បានចុះកិច្ចសន្យាចូលរួមជាមួយក្លិប Portimonense របស់ព័រទុយហ្គាល់ តែមិនយូរប៉ុន្មាន ស្រាប់តែកិច្ចសន្យានោះ ត្រូវបានលុបចោលទៅវិញ នៅពេលដែលក្រុម មិនអាចចុះឈ្មោះរូបលោក ឱ្យចូលប្រកួតបានទាន់ពេលវេលា។

Honda នឹងពាក់អាវលេខ4 សម្រាប់ក្លិបថ្មីរបស់ខ្លួន ដែលមានមូលដ្ឋានក្នុងរដ្ឋធានីបាគូ នៃប្រទេសអាស៊ែបៃហ្សង់ ហើយប្រទេសអាស៊ែបៃហ្សង់នេះ នឹងក្លាយជាប្រទេសទី7 ហើយ ដែល Honda បានទៅលេងបាល់ទាត់អាជីព បន្ទាប់ពីប្រទេសហូឡង់, រុស្ស៊ី, អ៊ីតាលី, ម៉ិកស៊ិក, អូស្ត្រាលី និងប្រេស៊ីល៕

March 19, 2021

OnePlus 9 Pro ចេញលក់ហើយ មានឆ្នាំងសាកក្នុងប្រអប់ស្រាប់

កាលពីពេលថ្មីៗនេះ វត្តមានស្មាតហ្វូន OnePlus 9 និង 9 Pro កំពុងតែពេញនិយមយ៉ាងខ្លាំង ដោយសារតែវាត្រៀមនឹងចេញមកកាន់ទីផ្សារ នាពេលឆាប់ៗនេះ អំឡុងថ្ងៃទី23 ខែមិនា ឆ្នាំ2021។ បើតាមដំណឹងទទួលពីច្រើនប្រភព បានបង្ហើបឱ្យដឹងថា វានឹងភ្ជាប់មកជាមួយនូវឆ្នាំងសាកនៅក្នុងប្រអប់ស្រាប់តែម្តង។

រឹតតែពិសេសទៅទៀតនោះ គឺបច្ចេកវិទ្យា LTPO ឬ LTPO (Low-Temperature Polycrystalline Oxid) គឺជាបច្ចេកវិទ្យាមួយ ដែលអនុញ្ញាតឱ្យអេក្រង់ អាចផ្លាស់ប្តូរកម្រិត Refresh Rate ទៅតាមកម្មវិធីដែលយើងកំពុងប្រើដោយស្វ័យប្រវត្តិ ហើយវាមានសមត្ថភាពធ្វើឱ្យកម្រិត Refresh Rate របស់អេក្រង់ ធ្លាក់ចុះរហូតដល់ទៅ 10Hz ឯណោះ។

OnePlus teases Morning Mist color for OnePlus 9 Pro, camera system

មានន័យថា ពេលដែលយើងកំពុងប្រើកម្មវីធី ឬហ្គេម ដែលត្រូវការកម្រិត Refresh Rate ខ្ពស់ នោះបច្ចេកវិទ្យា LTPO នឹងបញ្ជាឱ្យអេក្រង់ រត់ក្នុងកម្រិត Refresh Rate ខ្ពស់បំផុត ទៅតាមអ្វីដែលអេក្រង់របស់វា អាចធ្វើបាន។ ប៉ុន្តែ បើសិនជាទូរស័ព្ទរបស់យើងកំពុងតែដំណើរការមុខងារ Always-On Display នោះ បច្ចេកវិទ្យា LTPO នឹងបញ្ជាឱ្យអេក្រង់ រត់ក្នុងកម្រិត Refresh Rate ទាបបំផុត ដើម្បីជួយសន្សំសំចៃថាមពលថ្ម។

OnePlus 9 Pro អាចនឹងមានតម្លៃចាប់ផ្តើមដំបូងខ្ទង់ពាន់ៗដុល្លារ ដោយសារតែសមត្ថភាពវាបំពាក់មកជាមួយអេក្រង់កោង ទំហំ 6.78អ៊ីញ ប្រភេទ AMOLED អាចបង្ហាញរូបភាពក្នុងកម្រិត QHD+ និងអាចគាំទ្រអេក្រង់ Refresh Rate 120Hz បំពាក់មកជាមួយបន្ទះឈីបលំដាប់កំពូល Snapdragon 888 គួបផ្សំជាមួយជម្រើស RAM ទំហំ 12GB និងអង្គផ្ទុកទិន្នន័យទំហំ 256GB ក៏ដូចជាថាមពលថ្ម ទំហំ 4,500mAh អាចគាំទ្របច្ចេកវិទ្យាសាកថ្មឥតខ្សែ កម្លាំង 45W ទៀតផង៕

March 19, 2021

សិស្សវិទ្យាល័យអាមេរិកម្នាក់ Hack ចូល Twitter ឥឡូវ ត្រូវតុលាការសម្រេច ឱ្យជាប់គុក 3ឆ្នាំ

សិស្សសាលាវ័យ 17ឆ្នាំម្នាក់ ឈ្មោះ Graham Ivan Clark រៀននៅវិទ្យាល័យ Gaither នៅរដ្ឋហ្វ្លរីដា សហរដ្ឋអាមេរិក ត្រូវបានសមត្ថកិច្ចចាប់ខ្លួន បញ្ជូនទៅតុលាការ និងត្រូវតុលាការកាត់ក្តី សម្រេចឱ្យជាប់ឃុំ រយៈពេល 3ឆ្នាំ ពីបទពាក់ព័ន្ធនឹងការវាយប្រហារដោយខុសច្បាប់(Hack)ចូលទៅក្នុងបណ្ដាញសង្គម Twitter កាលពីខែកក្កដា ឆ្នាំ2020 កន្លងទៅ។

Graham Ivan Clark នៅមានគ្នារបស់គេប៉ុន្មាននាក់ទៀត ដែលបានលួចចូលទៅប្រើប្រាស់គណនី Twitter របស់បុគ្គលល្បីៗ និងក្រុមហ៊ុនតូច-ធំផ្សេងៗ ចំនួន 130គណនីទៀតឯណោះ។ បន្ទាប់ពីលួចចូលបានសម្រេចហើយ គ្នីគ្នារបស់គេ ក៏បានបង្ហោះសារ ដើម្បីផ្សព្វផ្សាយបញ្ឆោត ឱ្យអ្នកគាំទ្ររបស់បុគ្គលល្បីៗ ក៏ដូចជាក្រុមហ៊ុនតូច-ធំទាំងអស់នោះ ធ្វើការផ្ញើប្រាក់ជា Bitcoin ទៅឱ្យពួកគេ។

គ្រាន់តែសារដែលពួកគេ បានបង្ហោះនោះ ចេញជាសាធារណៈបានប៉ុន្មានម៉ោង ពួកគេអាចប្រមូលប្រាក់ Bitcoin បានសរុបច្រើនជាង 10ម៉ឺនដុល្លារ។

ដោយសារតែក្មេងជំទង់ម្នាក់នេះ ធ្វើអំពើខុសច្បាប់ នៅពេលដែលគេទើបមានអាយុ 17ឆ្នាំ (ឆ្នាំមុននៅមិនទាន់គ្រប់អាយុនៅឡើយ) ដូច្នេះហើយ ទើបត្រូវជាប់ពន្ធនាគារតែ 3ឆ្នាំប៉ុណ្ណោះ ព្រោះមិនទាន់គ្រប់ 18ឆ្នាំ តែបើគ្រប់វិញ អាចជាប់ទោសលើស 10ឆ្នាំ។

ក្រុមហ៊ុនធំៗ និងគណនីបុគ្គលល្បីៗជាច្រើនបានរងគ្រោះដូចជា Twitter របស់ ក្រុមហ៊ុន Apple, CEO របស់ Tesla លោក Elon Musk, ក្រុមហ៊ុន Uber គណនីអតីតប្រធានាធិបតី Barack Obama, CEO Microsoft លោក Bill Gats, CEO Amazon លោក Jeff Bezos លោក Warren Buffet គណនីតារាល្បី Kim Kardashian កីឡាប្រដាល់ Floyd Mayweather និងប្រធានាធិបតីអាមេរិកបច្ចុប្បន្ន Joe Biden ជាដើម។

ក្រុមរបស់ពួកគេមានចេតនា ដើម្បីបោកបញ្ឆោតអ្នកប្រើប្រាស់ Twitter និងលួចយកលុយ Bitcoin ជាពិសេស គឺខ្ចីដៃគណនីបុគ្គលល្បីៗខាងលើ ឬក្រុមហ៊ុនធំៗ ដើម្បីបោកបញ្ឆោតអ្នកលេង Twitter តែម្ដង៕

March 19, 2021

Facebook បង្កើតច្បាប់ពិន័យថ្មី ចំពោះសមាជិកក្នុង Group ដែលបំពានច្បាប់

កាលពីពេលថ្មីៗនេះ ក្រុមហ៊ុន Facebook បានសម្រេចចិត្ដថា អាចនឹងធ្វើការផាកពិន័យ ទៅលើសមាជិកណាមួយ ដែលធ្វើខុសពីគោលការណ៍ Group។ Facebook បានបញ្ជាក់ថា ផែនការថ្មីនេះនឹងរឹតបន្តឹងច្បាប់បន្ថែម ដោយផ្តោតខ្លាំងទៅលើ Group ឬក៏សមាជិក Group មួយចំនួនដូចជា៖ ការផាកពិន័យដល់អ្នកប្រើប្រាស់ ដែលបានបំពានគោលការណ៍ច្បាប់, ការកាត់បន្ថយលើការផ្សព្វផ្សាយ Group ណាដែលទាក់ទងទៅនឹងរឿងនយោបាយ និងរឹតបន្ដឹងបន្ថែមលើ Group ណាដែលរំលោភបំពានគោលការណ៍របស់ Facebook ជាដើម។

ការផាកពិន័យចំពោះសមាជិក Group ដែលមិនបានគោរពតាមគោលកាណ៍ និងតែងតែបំពានជារឿយៗនេះ Facebook នឹងបិទឬហាមឃាត់សមាជិក Group ទាំងនោះជាបណ្ដោះអាសន្ន មិនឱ្យធ្វើការបង្ហោះ ឬ Comment នៅក្នុង Group រយៈពេល 7ថ្ងៃ ទៅ ១ខែ អាស្រ័យលើករណីធ្ងន់ ឬស្រាលដែលសាមីខ្លួន បានបំពាន។ អ្នកដែលធ្វើខុសច្រើនដង អាចនឹងមិនអនុញ្ញាតឱ្យ Join, Invite ឬ Create Group ថ្មីទៀតបានឡើយ។

Group ណាមួយ ដែលរកឃើញថា មានការបំពានច្បាប់ ក៏នឹងត្រូវបានកត់សម្គាល់ ដោយការព្រមានទុកជាមុន ហើយនៅពេលមានសមាជិកថ្មីចង់ចូលរួម Facebook នឹងបញ្ជាក់ប្រាប់ថា Group នោះបានបំពានគោលការណ៍ និងណែនាំឱ្យធ្វើការ Review ជាមុនសិន មុននឹងចូលរួម។ Group ទាំងនោះក៏អាចនឹងត្រូវបានកាត់បន្ថយការផ្សព្វផ្សាយនៅលើ News Feed ផងដែរ។

កន្លងមកមាន Group មួយចំនួនព្យាយាមផ្សព្វផ្សាយព័ត៌មានមិនពិតច្រើនខ្លាំងពេក ជាពិសេសការចែកចាយព័ត៌មានមិនពិត អំពីបញ្ហាកូវីដ-19 បង្កឱ្យមានភាពចលាចល ក៏ជាហេតុផលបណ្ដាលឱ្យ Facebook បង្កើតច្បាប់ពិន័យថ្មីនេះចេញមក៕

March 19, 2021

Samsung ចេញលក់ Galaxy A 2021 2ម៉ូដែល តម្លៃធូរៗថ្លៃ

គ្រួសារត្រកូល Galaxy A របស់ Samsung ក្នុងឆ្នាំ 2021នេះ គឺ Galaxy A52 | A72 បាននិងកំពុងចរាចរណ៍ លើទីផ្សារនៅគ្រប់បណ្ដាហាងនានាទូទាំងប្រទេសកម្ពុជា។

សម្រាប់ម៉ូដែល Galaxy A52 ដូចគ្នានឹងម៉ូដែលកូនពៅ A32 ដែរ ចំណែកឯម៉ូដែល Galaxy A72 ក៏កំពុងដាក់លក់ដូចគ្នាដែរ។ ក្នុងនោះផងដែរ Galaxy A52 មាន 2ម៉ូដែលប្រើសេវា 4G និងសេវា 5G។ រីឯ Galaxy A72 មិនមានម៉ូដែល 5G គឺមានត្រឹម 4G តែប៉ុណ្ណោះ។ សម្រាប់ទីផ្សារស្រុកខ្មែរ មិនទាន់មានស៊េរី 5G នៅឡើយទេ។

ខាងក្រោមនេះ គឺជាលក្ខណសម្បត្តិសំខាន់ៗ ដែលក្រុមហ៊ុនបានបំពាក់ មកជាមួយសមត្ថភាពខ្ពស់ ស័ក្តិសមនឹងតម្លៃស្មាតហ្វូន Galaxy A72 មានរចនាប័ទ្ម ខាងមុខបង្កប់កាមេរ៉ា Selfie ស្រដៀងប្រជ្រុយ (Infinity-O) ផ្ទៃអេក្រង់ទំហំ 6.7អ៊ិញ កម្រិត FHD+ ប្រភេទSuper AMOLED មានកម្រិតអេក្រង់ 90 Hz Refresh rate មានជម្រើស RAM8 GB មេម៉ូរី 256 GB (បន្ថែមកាតក្រៅដល់ 1TB) បន្ទះឈីបល្បឿនដំណើរការគឺ Snapdragon 720G ។ រីឯផ្នែកកាមេរ៉ាក្រោយ មាន 4 គ្រាប់៖ 64 MP (កាមេរ៉ាមេ) 1គ្រាប់ទៀត 12 MP (ប្រភេទលេនស៍ Ultra-Wide) 1គ្រាប់ទៀត 8 MP (ប្រភេទលេនស៍Telephoto) និង 1គ្រាប់ចុងក្រោយ 5 MP (ប្រភេទលេនស៍ Macro) ចំណែកកាមេរ៉ាមុខ 1គ្រាប់ទំហំ៖ 32 MP (លេនស៍ធំមែនទែន)។

A72 បំពាក់មកជាមួយថ្មធំ ដល់ 5000 mAh អាចជួយឱ្យអ្នកប្រើបានស្ទើរតែពេញ 1ថ្ងៃ។ ចេញមកជាមួយនឹងដុំសាកថ្មល្បឿនលឿន 25W ថែមទៀត និងបំពាក់មកជាមួយបច្ចេកវិទ្យាការពារជម្រាបទឹក ឬអាវក្រោះការពារទឹកជ្រាបកម្រិត IP67 និងបច្ចេកវិទ្យាសុវត្ថិភាព ស្គែនខ្ចៅដៃលើអេក្រង់ ដោះសោលឿនណាស់ តែមួយប៉ប្រិចភ្នែកប៉ុណ្ណោះ។ ក្រឡេកមកមើលពណ៌វិញ មាន 4ជម្រើសដូចជា សសុទ្ធ, ខ្មៅសុទ្ធ, ខៀវសុទ្ធ និងពណ៌ស្វាយដ៏ស្រស់ស្អាត។

Samsung announces Galaxy A52, A52 5G and A72 with 90 Hz displays, 64 MP quad cameras

ចំណែកឯ Galaxy A52 មានចំណុចប្លែកពី A72 លើទំហំអេក្រង់ ទំហំ RAM ជម្រើសមេម៉ូរី និងទំហំថ្ម។ ក្រៅពីនោះ ច្រើនចំណុចទៀតសឹងតែដូចគ្នា ដូចជារចនាប័ទ្មខាងមុខ បង្កប់កាមេរ៉ា Selfie ស្រដៀងប្រជ្រុយ (Infinity-O) ផ្ទៃអេក្រង់ទំហំ 6.5អ៊ិញ កម្រិតFHD+ ប្រភេទSuper AMOLED មានកម្រិតអេក្រង់ 90 Hz Refresh rateមានជម្រើស RAM8 GB មេម៉ូរី 128 GB (បន្ថែមកាតក្រៅដល់ 1TB) បន្ទះឈីបល្បឿនដំណើរការគឺ Snapdragon 720G ដូចគ្នា។ កាមេរ៉ាក្រោយមាន 4 គ្រាប់៖ 64 MP (កាមេរ៉ាមេ) 1គ្រាប់ទៀត 12 MP (ប្រភេទលេនស៍ Ultra-Wide) 1គ្រាប់ទៀត 8 MP (ប្រភេទលេនស៍Telephoto) និង 1គ្រាប់ចុងក្រោយ 5 MP (ប្រភេទលេនស៍ Macro) ចំណែកកាមេរ៉ាមុខ ១គ្រាប់ទំហំ៖ 32 MP (លេនស៍ធំមែនទែន)។

A52 បំពាក់មកជាមួយថ្មធំ ដល់ 5000 mAh អាចជួយឱ្យអ្នកប្រើបានស្ទើរតែពេញ 1ថ្ងៃ និងចេញមកជាមួយនឹងដុំសាកថ្មល្បឿនលឿន 25W ថែមទៀត និងបំពាក់មកជាមួយបច្ចេកវិទ្យាការពារជម្រាបទឹក ឬអាវក្រោះការពារទឹកជ្រាបកម្រិត IP67 និងបច្ចេកវិទ្យាសុវត្ថិភាពស្គែនខ្ចៅដៃលើអេក្រង់ ដោះសោលឿនណាស់តែមួយប៉ប្រិចភ្នែកប៉ុណ្ណោះ។ ក្រឡេកមកមើលពណ៌វិញមាន 4ជម្រើសដូចជា សសុទ្ធ, ខ្មៅសុទ្ធ, ខៀវសុទ្ធ និងពណ៍ស្វាយដ៏ស្រស់ដូចគ្នា៕

March 19, 2021

ចានបុរាណចិនដែលទិញពីកន្លែងលក់ទំនិញមួយទឹក ពេលនេះលក់បានជាង 700,000ដុល្លារអាមេរិក

ចានធ្វើអំពីប៉សឺឡែនពណ៌សជំនាន់រាជវង្សមីងនៃប្រទេសចិន ដែលត្រូវបានរកឃើញនៅក្នុងកន្លែងលក់វត្ថុមួយទឹក ដែលមានទីតាំងនៅសហរដ្ឋអាមេរិក ត្រូវបានលក់ក្នុងតម្លៃជាង 722,000ដុល្លារអាមេរិក ខ្ពស់ជាងការព្យាករទៅទៀត។

ចានពណ៌សមួយដែលមានរចនារូបភាពស្លឹកឈើពណ៌ទឹកសមុទ្រដ៏ស្រស់ស្អាត ស្ថិតក្នុងចំណោមស្នាដៃសិល្បៈចិន ត្រូវបាន Sotheby’s ដាក់លក់ដេញថ្លៃកាលពីថ្ងៃទី 17 មីនា 2021 នៅក្នុងព្រឹត្តិការណ៍ Asia Week។ Sotheby’s គឺជាក្រុមហ៊ុនឈ្មួញជើងសាធំជាងគេមួយនៅលើពិភពលោក ទាក់ទងនឹងសិល្បៈលម្អ គ្រឿងអលង្ការ អចលនទ្រព្យ និងវត្ថុបុរាណ។ អត្តសញ្ញាណរបស់អ្នកលក់ និងអ្នកទិញចានបុរាណខាងលើ មិនត្រូវបានគេបង្ហើបឱ្យដឹងនោះទេ។

ក្រុមអ្នកជំនាញបានឱ្យដឹងថា ចានបុរាណនេះត្រូវបានផលិតឡើងសម្រាប់តែរាជវាំងរបស់មហាក្សត្រ Yongle (ព្រះនាមផ្ទាល់ខ្លួនគឺ Zhu Di) ដែលជាស្ដេចទីបីរបស់រាជវង្សមីង សោយរាជចាប់ពីឆ្នាំ 1402 ដល់ 1424។ នេះគឺជាចានបុរាណ 1 ក្នុងចំណោម 7 ដែលនៅមាននៅលើពិភពលោក។ កាលពីខែមុន ចានបុរាណនេះ ត្រូវបានអ្នកស្រលាញ់វត្ថុបុរាណម្នាក់ទិញពីកន្លែងលក់ទំនិញចាស់ៗមួយកន្លែងដែលស្ថិតនៅក្នុងរដ្ឋ Connecticut ភាគឦសាននៃសហរដ្ឋអាមេរិក ក្នុងតម្លៃ 35ដុល្លារ។

អ្នកទិញខាងលើ ក្រោយមកក៏បានផ្ញើព័ត៌មាន និងរូបថតតាមអ៊ីមេលទៅកាន់ Sotheby’s ដើម្បីស្នើឱ្យជួយវាយតម្លៃ។ Sotheby’s បានបញ្ជាក់ថា ចាននេះមានតាំងពីអំឡុងឆ្នាំ 1400 នៃគ្រិស្តសករាជមកម្ល៉េះ។

បច្ចុប្បន្ន មិនទាន់ដឹងច្បាស់ថា ហេតុអ្វីបានជាចានបុរាណនេះអាចមានវត្តមាននៅក្នុងតំបន់លក់ទំនិញមួយទឹកនៅក្នុងរដ្ឋ Connecticut នៅឡើយ។ Angela McAteer ដែលជាអ្នកគ្រប់គ្រងផ្នែកស្នាដៃសិល្បៈចិនរបស់ក្រុមហ៊ុន Sotheby’s បានឱ្យដឹងថា ចាននេះប្រហែលជាត្រូវបានគ្រួសារមួយរក្សាទុកពីជំនាន់មួយ ទៅជំនាន់មួយ ហើយពួកគេមិនបានដឹងអំពីតម្លៃពិតរបស់វា។

កន្លងមក មុនពេលដាក់លក់ដេញថ្លៃ Sotheby’s ព្យាករថា ចាននេះមានតម្លៃចាប់ពី 300,000 ដល់ 500,000ដុល្លារអាមេរិក។ ប៉ុន្តែ ជាក់ស្ដែងពេលនេះ វាត្រូវបានគេទិញក្នុងតម្លៃជាង 722,000ដុល្លារអាមេរិក។

ចានចំនួន 5 ក្នុងចំណោមចានដែលត្រូវបានគេស្គាល់ កំពុងស្ថិតក្នុងសារមន្ទីរ រួមមាន៖ 2 នៅកោះតៃវ៉ាន់, 2 នៅក្រុងឡុងដ៍នៃប្រទេសអង់គ្លេស និង 1 នៅទីក្រុងតេហេរ៉ង់ ប្រទេសអ៊ីរ៉ង់៕

ព័ត៌មានទាក់ទង> ចានបុរាណចិននៅអាមេរិក ត្រូវគេទិញក្នុងតម្លៃ 35ដុល្លារ តែលក់វិញតម្លៃ 500,000ដុល្លារ

ប្រភព៖ AP, CNN
ប្រែសម្រួល៖ បុត្រា

March 19, 2021

Category: សង្គម និងសេដ្ឋកិច្ច