សង្គម និងសេដ្ឋកិច្ច - La Reine Media

មហាសេដ្ឋី និងជាស្ថាបនិករបស់ផ្សារអនឡាញ Pinduoduo លាលែងពីតំណែង

មហាសេដ្ឋី Colin Huang លាលែងពីតំណែងប្រធានក្រុមប្រឹក្សាភិបាលរបស់ Pinduoduo បន្ទាប់ពីផ្សារអនឡាញនេះបានយកឈ្នះលើក្រុមហ៊ុនយក្ស Alibaba និង JD.com បើគិតទៅលើតួលេខអ្នកប្រើប្រាស់សរុប។

Chen Lei ដែលជាមិត្តរួមថ្នាក់កាលពីនៅរៀន និងជាអ្នកធ្លាប់ទទួលតំណែង CEO ជំនួស Colin Huang ចាប់ពីខែកក្កដា ឆ្នាំ2020 នឹងឡើងកាន់តំណែងប្រធានរបស់ក្រុមហ៊ុន Pinduoduo។ នៅក្នុងលិខិតមួយដែលបានផ្ញើទៅកាន់ម្ចាស់ហ៊ុនទាំងអស់កាលពីពេលថ្មីៗនេះ លោក Huang យល់ថា លោកមានភាពសមស្របដើម្បីចាកចេញពីតំបន់សុវត្ថិភាព និងចាប់ផ្ដើមដំណើរផ្សងព្រេងថ្មី។ ទន្ទឹមនឹងនេះ មហាសេដ្ឋីចិនរូបនេះក៏បានឱ្យដឹងថា Pinduoduo កំពុងឈានចូលដល់ដំណាក់កាលពេញវ័យ ដូច្នេះ ការដែលលោកចាកចេញនឹងជួយឱ្យក្រុមហ៊ុនរីកចម្រើនដោយឯករាជ្យជាងមុន។

សេចក្ដីប្រកាសថ្មីដែលទើបត្រូវបានក្រុមហ៊ុន Pinduoduo លើកឡើងនាពេលថ្មីៗនេះ បានបញ្ជាក់ថា លោក Huang នឹងផ្ដោតការយកចិត្តទុកដាក់ និងស្រាវជ្រាវលើផ្នែកវិទ្យាសាស្ត្រទាក់ទិននឹងការរស់នៅ ជាវិស័យដែលអាចបង្កើតបានប្រការថ្មីៗដែលជួយជំរុញវិស័យកសិកម្មនៅប្រទេសចិន ឱ្យបានរីកចម្រើនជាងបច្ចុប្បន្ន។ យោងតាម Wall Street Journal លោក Huang បានទាក់ទងទៅកាន់សាកលវិទ្យាល័យជាច្រើនដើម្បីបង្កើតបន្ទប់ពិសោធន៍ សិក្សាស្រាវជ្រាវបច្ចេកវិទ្យាជីវសាស្ត្រ។

មហាសេដ្ឋីវ័យ 41ឆ្នាំ លោកColin Huang កាន់កាប់ភាគហ៊ុន 29% នៅក្នុងក្រុមហ៊ុន Pinduoduo

តម្លៃមូលធនទីផ្សាររបស់ Pinduoduo បានធ្លាក់ចុះជិត 8% បន្ទាប់ពីព័ត៌មានស្ដីអំពីការលាលែងរបស់លោក Huang ត្រូវបានប្រកាស។ ទ្រព្យរបស់មហាសេដ្ឋីវ័យ 41ឆ្នាំរូបនេះក៏ត្រូវបាត់បង់ប្រមាណ 4ពាន់លានដុល្លារ ព្រោះតែការសម្រេចចិត្តរបស់លោក។ ថ្វីបើបាត់បង់សិទ្ធិក្នុងការបោះឆ្នោត និងអំណាចក្នុងការសម្រេចចិត្តចុងក្រោយនៅក្នុងក្រុមប្រឹក្សាភិបាល បន្ទាប់ពីចាកចេញពីតំណែងចំនួនពីរ (នាយកប្រតិបត្តិ និងប្រធានក្រុមប្រឹក្សាភិបាល) លោក Huang នៅតែជាម្ចាស់ភាគហ៊ុនធំជាងគេរបស់ Pinduoduo ដោយកាន់កាប់ភាគហ៊ុនចំនួន 29%។

ជាមួយនឹងអ្នកប្រើប្រាស់ចំនួន 788លាននាក់ Pinduoduo បច្ចុប្បន្នគឺជាគូប្រជែងធំរបស់ផ្សារអនឡាញ Alibaba និង JD.com។ ជោគជ័យរបស់ Pinduoduo មួយភាគធំគឺបានមកពីរូបមន្ត «ទិញជាក្រុម» នៅពេលក្រុមហ៊ុននេះលើកទឹកចិត្តឱ្យអ្នកប្រើប្រាស់ចែករំលែកតំណភ្ជាប់អំពីផលិតផលមួយមុខ ដើម្បីអញ្ជើញមិត្តភក្ដិចូលរួមទិញជាក្រុម ក្នុងបំណងទទួលបានតម្លៃទាបបំផុត។

ក្នុងរយៈពេលជាច្រើនឆ្នាំមកនេះ Pinduoduo បានចាប់ផ្ដើមវិនិយោគច្រើនទៅលើវិស័យដែលទាក់ទងនឹងកសិកម្ម ការសិក្សាស្រាវជ្រាវលើបច្ចេកវិទ្យាថ្មី ដើម្បីអាចក្លាយជាបណ្ដាញផ្សារចាបហួយធំជាងគេបង្អស់ក្នុងពិភពលោក។ ផ្សារលក់ទំនិញចាបហួយអនឡាញ Duo Duo Grocery របស់ក្រុមហ៊ុននេះក៏ទទួលបានការគាំទ្រយ៉ាងច្រើនពីសំណាក់អតិថិជនជាមេផ្ទះ ដោយសារមានលក់ និងដឹកជញ្ជូនដល់ដៃអ្នកប្រើប្រាស់នូវផលិតផលជាគ្រឿងទេស។ ក្នុងឆ្នាំ2020 តម្លៃសរុបនៃផលិតផលកសិកម្មដែលត្រូវបានលក់នៅលើផ្សារ Pinduoduo បានកើនដល់ 270ពាន់លានយុន (41,338,755,000ដុល្លារអាមេរិក) កើនទ្វេដងបើធៀបនឹងឆ្នាំ2019 នាំឱ្យ Pinduoduo ក្លាយជាផ្សារលក់ផលិតផលកសិកម្មធំជាងគេនៅប្រទេសចិន៕

ប្រភព៖ CNBC, SCMP
ប្រែសម្រួល៖ បុត្រា

March 25, 2021

មហាសេដ្ឋីលេខមួយនៅប្រទេសថៃ កំពុងប្រមូលទិញសណ្ឋាគារទាំងឡាយដែលកំពុង «ត្រដរខ្យល់»

ជាមួយនឹងគម្រោងនេះ មហាសេដ្ឋីថៃ លោក Charoen Sirivadhanabhakdi សង្ឃឹមថា វិស័យទេសចរណ៍នឹងងើបឡើងខ្ពស់ជាថ្មីនៅក្នុងប្រទេសនេះនាពេលខាងមុខ។

សារព័ត៌មាន Bloomberg បានឱ្យដឹងថា Asset World Corp. ដែលជាក្រុមហ៊ុនអចលនទ្រព្យរបស់មហាសេដ្ឋីលំដាប់លេខមួយនៅប្រទេសថៃ លោក

Charoen Sirivadhanabhakdi កំពុងមានផែនការប្រមូលទិញសណ្ឋាគារជាច្រើនដែលកំពុង «ដកដង្ហើមចង្រិត» នៅប្រទេសនេះ ដោយសង្ឃឹមយ៉ាងមុតមាំថា វិស័យទេសចរណ៍របស់ប្រទេសថៃនឹងក្រោកឈរជាថ្មីនៅពេលបើកទ្វារទទួលភ្ញៀវទេសចរណ៍បរទេសឡើងវិញ។

បច្ចុប្បន្ននេះ ប្រទេសថៃមានសណ្ឋាគារជាង 100 កំពុងត្រូវបានដាក់លក់ ហើយ «តួលេខនេះកើនឡើងជារៀងរាល់ថ្ងៃ» នេះបើតាម Vanden Auweele នាយកផ្នែកសណ្ឋាគាររបស់ Asset World Corp។ ក្រុមហ៊ុន TTC Group របស់មហាសេដ្ឋីថៃ Charoen Sirivadhanabhakdi បច្ចុប្បន្នកាន់កាប់ភាគហ៊ុនភាគច្រើនរបស់ Asset World Corp។

ឆ្នេរ Patong របស់ Phuket កាលពីខែតុលា 2020

Vanden Auweele បានបង្ហើបឱ្យដឹងថា ក្នុងខែនេះ Asset World បានទិញសណ្ឋាគារមួយនៅលើកោះមួយរបស់ទីក្រុង Pattaya ព្រមទាំងមានគម្រោងទិញបន្ថែមទៀត។

សេដ្ឋកិច្ចប្រទេសថៃដែលធ្លាប់តែអាស្រ័យលើវិស័យទេសចរណ៍ ទើបតែបានឆ្លងកាត់រយៈពេលជាងមួយឆ្នាំដែលមិនមានវត្តមានរបស់ទេសចរបរទេស នាំឱ្យសណ្ឋាគារ និងក្រុមហ៊ុនទេសចរណ៍នានាត្រូវរស់យ៉ាងលំបាក។ យោងតាមសមាគមសណ្ឋាគាររបស់ប្រទេសថៃ ស្ថាប័នជាច្រើនត្រូវបិទទ្វារ ហើយពួកគេទំនងជាមិនអាចវិលត្រលប់វិញបាននៅពេលប្រទេសនេះចាប់ផ្ដើមបើកព្រំដែនក្នុងឆ្នាំ2021នេះ។

«គម្លាតរវាងអ្នកទិញ និងអ្នកលក់របស់សណ្ឋាគារដែលត្រូវបានដាក់លក់នាបច្ចុប្បន្ន កំពុងខិតចូលជិតគ្នា។ ប្រការនេះមានន័យថា សណ្ឋាគារបច្ចុប្បន្នមានតម្លៃសមស្របជាងមុន» Vanden Auweele ឱ្យដឹងដូច្នេះ។ «ជាមួយនឹងផលិតផលត្រឹមត្រូវ សណ្ឋាគារសមរម្យ និងតម្លៃសមហេតុផល យើងប្រាកដជានឹងពិចារណារាល់ឱកាសដែលមាន»។

Vanden Auweele បង្ហើបឱ្យដឹងថា Asset World មានគម្រោងកែប្រែសណ្ឋាគារដែលទើបបានទិញនៅ Pattaya ឱ្យទៅជាសណ្ឋាគារមួយដែលមានឈ្មោះល្បី។ ក្រុមហ៊ុននេះក៏អាចទិញអចលនទ្រព្យបន្ថែមទៀតតាមរយៈខ្ទង់វិនិយោគឯកជនរបស់ TCC Group ផងដែរ។

«វិស័យទេសចរណ៍របស់ថៃនឹងវិលត្រលប់មកវិញយ៉ាងលឿន នៅពេលព្រំដែនត្រូវបានបើកទាំងស្រុងក្នុងខែតុលា។ ប៉ុន្តែ ក្រុមហ៊ុនមួយចំនួនដែលត្រូវប្រឈមនឹងបញ្ហាជាច្រើននៅមុន Covid-19 នឹងមិនអាចរស់ឡើងវិញបានទេ» លោក Vanden Auweele អះអាងដូច្នេះ។ «យុទ្ធនាការចម្រាញ់មួយកំពុងកើតឡើង ហើយវានឹងបំបាត់រាល់ក្រុមហ៊ុនទាំងឡាយណាដែលរកស៊ីមិនមានប្រសិទ្ធភាពមុនវិបត្តិសុខភាព»។

Asset World បច្ចុប្បន្នកាន់កាប់គម្រោងអចលនទ្រព្យដែលមានតម្លៃជាង 50ពាន់លានបាត (ជាង 1.6ពាន់លានដុល្លារអាមេរិក)។ គម្រោងភាគច្រើនដែលត្រូវបានប្រកាសឱ្យដឹងមុននោះរបស់ Asset World គឺជាប់ទាក់ទងនឹងសណ្ឋាគារចំនួនបីដែលគ្រោងនឹងបើកដំណើរការនៅក្នុងឆ្នាំនេះ ក្នុងនោះក៏មានអគារខ្ពស់ជាងគេបង្អស់នៅប្រទេសថៃ ដែលគ្រោងនឹងបុកគ្រឹះនៅក្នុងត្រីមាសទីមួយនៃឆ្នាំ 2023៕

ប្រភព៖ Bloomberg
ប្រែសម្រួល៖ បុត្រា

March 24, 2021

Apple ដាក់គម្រោង តម្លៃ 1ពាន់លានដុល្លារ បង្កើតមជ្ឈមណ្ឌលផលិតឈីប 5G ផ្ទាល់ខ្លួន

បើយោងតាមសេចក្តីប្រកាសព័ត៌មានផ្លូវការ ពីការិយាល័យកណ្ដាលរបស់ Cupertino របស់ Apple កាលពីសប្ដាហ៍មុនបានឱ្យដឹងថា ក្រុមហ៊ុនបច្ចេកវិទ្យាដ៏ល្បីល្បាញមួយនេះ បានបញ្ចេញឱ្យដឹងនូវគម្រោងថ្មីមួយទៀត នោះគឺ ការចំណាយ 1ពាន់លានដុល្លារដើម្បីបង្កើតមជ្ឈមណ្ឌលផលិតឈីប 5G ដោយផ្ទាល់ខ្លួន។

ការប្ដេជ្ញាចិត្តនេះ បានបញ្ជាក់យ៉ាងច្បាស់ថា Apple កំពុងត្រៀមខ្លួន ដើម្បីដើរចេញពីម៉ូឌឹម 5G របស់ Qualcomm ដែលពួកគេធ្លាប់សហការគ្នាប្រើវាកន្លងមក យកមកដាក់ក្នុងផលិតផល Apple ទ្រទ្រង់សេវា 5G បាន ហើយកាន់តែច្បាស់បន្ថែមទៀតនោះ គឺកាលពី ឆ្នាំ2019 ក្រុមហ៊ុន Apple ថែមទាំងបានទិញយកអាជីវកម្មផលិតម៉ូឌឹម 5G របស់ស្មាតហ្វូន ពីក្រុមហ៊ុន intel ទៀតផង។

ទឹកប្រាក់ដែល Apple បានត្រៀមជាង 1ពាន់លានដុល្លារនោះ នឹងធ្វើឱ្យលេចចេញជារូបរាង ក្នុងរយៈពេល 3ឆ្នាំខាងមុខ ទៅកាន់មជ្ឈមណ្ឌលស្រាវជ្រាវ និងអភិវឌ្ឍន៍ថ្មី របស់ពួកគេនៅទីក្រុងមុយនិច ប្រទេសអាល្លឺម៉ង។

បច្ចុប្បន្នទីតាំងចាស់នៅទីក្រុងមុយនិច នៅប្រទេសអាល្លឺម៉ងរបស់ Apple នៅអឺរ៉ុប មានវិស្វករជំនាញ 1,500នាក់ ដោយបម្រើការលើផ្នែកស្រាវជ្រាវ និងអភិវឌ្ឍន៍ ចាប់ពីផ្នែកបច្ចេកវិទ្យាឥតខ្សែ រហូតដល់ប្រព័ន្ធកម្មវិធីសំខាន់ៗដទៃទៀតផងដែរ តែទាំងអស់នេះ មិនទាន់រាប់បញ្ចូលគម្រោងថ្មីខាងលើនោះទេ៕

March 23, 2021

បាត់មុខយូរ ស្រាប់តែលោក ដូណាល់ ត្រាំ បញ្ចេញគម្រោង បង្កើត Social Media ផ្ទាល់ខ្លួនតែម្ដង

បន្ទាប់ពីសហរដ្ឋអាមេរិក ធ្វើការបោះឆ្នោតជ្រើសតាំង បានប្រធានាធិបតីថ្មី គឺលោក ចូ បៃឌិន មក គេក៏លែងសូវបានឃើញវត្តមាន និងឮដំណឹងអ្វី ពីអតីតប្រធានាធិបតិអាមេរិកទី45 គឺលោក ដូណាល់ ត្រាំ អស់ជាច្រើនសប្ដាហ៍មកហើយ តែកាលពីពេលថ្មីៗនេះ អ្នកនាំពាក្យជំនិតម្នាក់ ឈ្មោះលោក Jason Miller មកពីគណបក្សសាធារណរដ្ឋ បានបង្ហើបឱ្យដឹងថា លោក ត្រាំ នឹងវិលត្រឡប់មកវិញ ជាមួយនឹងការបង្កើត Social media ផ្ទាល់ខ្លួនមួយ។

ដំណឹងដ៏ភ្ញាក់ផ្អើលនោះ គឺលោកនឹងបង្កើតប្រព័ន្ធបណ្ដាញសង្គមផ្ទាល់ខ្លួន ដែលអាចនឹងដាក់ឱ្យប្រើប្រាស់នៅក្នុងរយៈពេលដ៏ខ្លីខាងមុខនេះ តែគេមិនទាន់ទទួលបានព័ត៌មានច្រើននៅឡើយថា តើវាមានឈ្មោះអ្វី ហើយដំណើរការយ៉ាងដូចម្តេច?។

សូមរំឭក ថយទៅក្រោយវិញបន្តិច…រឿងរ៉ាវបង្កើត Social media ផ្ទាល់ខ្លួននេះ គេធ្លាប់បានឮម្ដងរួចមកហើយ កាលពីអំឡុងពេល ដែលលោកនៅកាន់តំណែង ដោយសារមិនពេញចិត្តលើចំណាត់ការរបស់ Twitter ក៏ដូចជាក្រុមហ៊ុនបច្ចេកវិទ្យាធំៗនៅសហរដ្ឋអាមេរិក ដែលហាមឃាត់មិនឱ្យមានការចូលទៅប្រើប្រាស់បាន។ លោក ត្រាំ ក៏ត្រូវបានក្រុមហ៊ុនបណ្ដាញសង្គមនានា ដូចជា Facebook, Twitter, និង Reddit លុបគណនីរបស់លោកចោលតែម្ដង កាលពីដើមឆ្នាំ2021កន្លងទៅហើយដែរ ហើយលោកក៏ត្រូវបានហាមឃាត់ មិនឱ្យធ្វើការបង្ហោះសារផ្សេងៗណាមួយ ដែលអាចបង្កជាហានិភ័យ ឬជាការញុះញង់អ្នកគាំទ្រ ឱ្យធ្វើការតវ៉ាប្រឆាំងនឹងរដ្ឋាភិបាលជាប់ឆ្នោតនោះដែរ។

គម្រោងការបង្កើតប្រព័ន្ធផ្សព្វផ្សាយថ្មីនេះ អាចនឹងត្រូវដាក់ឱ្យប្រើប្រាស់ យ៉ាងយូរបំផុតនៅពាក់កណ្ដាលឆ្នាំ2021 នេះឯង ដោយអតីតប្រធានាធិបតីទី45 រូបនេះ បានរំពឹងទុកថា អាចទាក់ទាញអ្នកគាំទ្របានជាថ្មីម្ដងទៀត យ៉ាងហោចណាស់ក៏ 10លាននាក់ដែរ។ មានន័យថា បើអត់ពី Twitter ទៅ អ្នកដែលធ្លាប់គាំទ្រលោក ត្រាំ អាចតាមដានលើ platform ថ្មីនេះជំនួសវិញបាន៕

March 23, 2021

(វីដេអូ)-កូនដង្កូវ Maggots របស់សត្វរុយខ្មៅ ប្រែក្លាយសំរាមឱ្យទៅជាប្រាក់

កូនដង្កូវដែលកើតចេញពីសត្វរុយខ្មៅម្យ៉ាងដែលមានឈ្មោះថា maggots ត្រូវគេយកមកធ្វើជាអាហារសម្រាប់សត្វចិញ្ចឹម និងជីសម្រាប់ដាក់ដំណាំ បានក្លាយជាសត្វដ៏មានតម្លៃ ដោយសារបច្ចេកទេសចម្រាញ់យកសារធាតុជីវសាស្ត្ររបស់កសិដ្ឋាន Insectta នៅប្រទេសសិង្ហបុរី។

កូនដង្កូវរបស់សត្វរុយ maggots មានសមត្ថភាពស៊ីកាកសំណល់អាហារបានយ៉ាងច្រើន ហើយធំឡើងយ៉ាងឆាប់រហ័ស ដែលកម្រមានសត្វណាមួយអាចធ្វើបានយ៉ាងដូច្នេះ។ កសិដ្ឋាន Insectta នៅប្រទេសសិង្ហបុរីគឺជាកន្លែងប្រមូលយកសាធាតុជីវសាស្ត្រពីកូនដង្កូវរបស់រុយខ្មៅ maggots ដែលផ្ដល់ប្រាក់ចំណេញឱ្យពួកគេបានយ៉ាងច្រើន។

Chua Kai-ning ប្រធានផ្នែកទីផ្សាររបស់ក្រុមហ៊ុន Insectta ឱ្យដឹងថា៖ «ការងារជំនាញរបស់យើងខ្ញុំនៅទីនេះគឺចម្រាញ់យកសារធាតុ chitosan, melanin និងប្រភេទបាក់តេរីមានប្រយោជន៍ពីកាកសំណល់របស់ដង្កូវ maggots»។

Chitosan មានប្រសិទ្ធភាពក្នុងការបង្ការជំងឺរលាក ដែលត្រូវបានគេប្រើប្រាស់ច្រើននៅក្នុងផលិតផលថែទាំសម្រស់ និងឱសថ។ ចំណែកសារធាតុ melanin អាចត្រូវបានគេបំប្លែងទៅជាធាតុចម្លងអគ្គិសនីដែលប្រើប្រាស់ក្នុងការផលិតគ្រឿងអគ្គិសនី។

ក្រុមហ៊ុន Insectta ក៏កំពុងតែចិញ្ចឹមសត្វល្អិននេះដើម្បីយកបាក់តេរីល្អ សម្រាប់ផលិតជាចំណីសត្វ។ ភាគីក្រុមហ៊ុនបានអះអាងថា ការចិញ្ចឹម និងការដោះស្រាយបញ្ហាកាកសំណល់របស់ដង្កូវ maggots គឺពិតជាល្អសម្រាប់បរិស្ថាន។

កូនដង្កូវ maggots រាប់លានក្បាលអាចស៊ីកាកសំណល់អាហាររហូតដល់ 400គីឡូក្រាមជារៀងរាល់ថ្ងៃ។ សំណល់អាហារនៅប្រទេសសិង្ហបុរី មានរហូតដល់ 10% ក្នុងចំណោមសំរាមសរុបនៅប្រទេសនេះក្នុងឆ្នាំ 2019។ ឆ្នាំ 2020 សំណល់អាហារនៅសិង្ហបុរី បានកើនឡើងដល់ 744,000តោន៕

ប្រភព៖ SCMP
ប្រែសម្រួល៖ បុត្រា

March 23, 2021

Saudi Aramco បាត់បង់តំណែង «ក្រុមហ៊ុនរកបានប្រាក់ចំណេញច្រើនជាងគេក្នុងពិភពលោក» ទៅលើដៃ Apple

Saudi Aramco ដែលជាក្រុមហ៊ុនប្រេងជាតិដ៏ធំរបស់ប្រទេសអារ៉ាប៊ីសាអូឌីត លែងជាក្រុមហ៊ុនដែលរកបានប្រាក់ចំណេញច្រើនជាងគេបង្អស់ក្នុងពិភពលោកទៀតហើយ ដោយតំណែងនេះបានធ្លាក់ទៅលើដៃក្រុមហ៊ុន Apple។

ក្រុមហ៊ុន Saudi Aramco បានជួបបញ្ហានេះ បន្ទាប់ពី Covid-19 បានធ្វើឱ្យតម្រូវការប្រើប្រាស់ប្រេងបានធ្លាក់ចុះខ្លាំងក្នុងឆ្នាំ2020។ យោងតាម CNN Business កាលពីថ្ងៃទី21 មីនា 2021 ក្រុមហ៊ុន Aramco បានប្រកាសលទ្ធផលនៃការរកស៊ីក្នុងឆ្នាំ2020 ឱ្យដឹងថា ប្រាក់ចំណេញបានធ្លាក់ចុះ44% ពោលគឺចំណេញបានតែ49ពាន់លានដុល្លារអាមេរិក។

តម្រូវការលើការប្រើប្រាស់ប្រេងរបស់ពិភពលោក ទទួលរងឥទ្ធិពលយ៉ាងធ្ងន់ធ្ងរក្នុងឆ្នាំ2020 នៅពេលដែលប្រទេសនានាបានដាក់បំរាមគោចរដើម្បីទប់ស្កាត់ Covid-19 បណ្ដាលឱ្យសកម្មភាពចរាចរណ៍ទូទាំងពិភពលោកត្រូវផ្អាកបណ្ដោះអាសន្ន។ កាលពីឆ្នាំ2020 មានពេលខ្លះតម្លៃប្រេងបានធ្លាក់ដល់ក្រោមសូន្យជាលើកដំបូងក្នុងប្រវត្តិសាស្ត្រ ដោយសារតែមិនមានតុល្យភាពរវាងតម្រូវការជាមួយនឹងការផ្គត់ផ្គង់ នាំឱ្យឃ្លាំងដាក់ប្រេងសល់ ស្ទើរតែអស់ពីទីផ្សារ។

Aramco ឱ្យដឹងថា លទ្ធផលជំនួញដែលបានធ្លាក់ចុះគឺកើតឡើងដោយសារកត្តាជាច្រើន រួមមាន តម្លៃប្រេងធ្លាក់ថ្លៃ បរិមាណប្រេងដែលបានលក់ចេញថយចុះ ក៏ដូចជាអត្រាចំណេញថយចុះនៅតាមផ្នែកចម្រាញ់គីមីប្រេងផងដែរ។

បញ្ហាខាងលើនេះមានន័យថា ក្រុមហ៊ុនបច្ចេកវិទ្យាអាមេរិក Apple ដណ្ដើមបានតំណែងជាក្រុមហ៊ុនរកបានប្រាក់ចំណេញច្រើនជាងគេបង្អស់ក្នុងពិភពលោក ពីក្រុមហ៊ុនប្រេង Aramco។ ពេញមួយឆ្នាំ2020 Apple រកបានប្រាក់ចំណេញចំនួន59ពាន់លានដុល្លារ។ ក៏ប៉ុន្តែ តំណែងនេះទំនងជាមិនអាចនៅជាមួយ Apple បានយូរឡើយ ព្រោះថា តម្លៃប្រេងពិភពលោកបានចាប់ផ្ដើមងើបឡើងវិញនៅក្នុងរយៈពេលប៉ុន្មានខែចុងក្រោយនេះ។ ឆ្នាំ2019 មុនពេល Covid-19 ក្លាយជាមហារោគរាតត្បាត ក្រុមហ៊ុនប្រេង Aramco រកបានប្រាក់ចំណេញ 88ពាន់លានដុល្លារអាមេរិកឯណោះ៕

ប្រភព៖ CNN Business
ប្រែសម្រួល៖ បុត្រា

March 22, 2021

Xiaomi ចាប់ផ្ដើមអភិវឌ្ឍរថយន្តអគ្គិសនីផ្ទាល់ខ្លួន

ប្រភពព័ត៌មានពីប្រទេសចិនដែលដកស្រង់សំដីរបស់ក្រុមអ្នកវិនិយោគដែលស្និទ្ធនឹង CEO Lei Jun បានឱ្យដឹងថា ក្រុមហ៊ុន Xiaomi កំពុងចាប់ផ្ដើមដំណើរការយ៉ាងលឿននូវគម្រោងអភិវឌ្ឍរថយន្តអគ្គិសនីរបស់ខ្លួន។ គម្រោងនេះនឹងត្រូវចាប់ផ្ដើមដំណើរការជាផ្លូវការនៅក្នុងរយៈពេលពីមួយទៅពីរខែខាងមុខ។

រថយន្តរបស់ Xiaomi នឹងមានរូបរាងដូចទៅនឹងរថយន្តយីហោ Xiaopeng (Xiaopeng P7) របស់ចិន និងត្រូវបានផ្ដោតសំខាន់ទៅលើបច្ចេកវិទ្យាចុងក្រោយបំផុត។ សហស្ថាបនិក និងជាអនុប្រធានក្រុមហ៊ុន លោក Wang Chuan នឹងទទួលខុសត្រូវលើកិច្ចការអភិវឌ្ឍគម្រោងនេះ។

កាលពីចុងខែកុម្ភៈ CEO Lei Jun បានជួបប្រជុំជាមួយនឹងលោក Li Bin ដែលជាស្ថាបនិករបស់ Weilai Automobile ពិភាក្សាគ្នាអំពីបញ្ហាផលិតរថយន្ត។ ក្រៅពីនេះ អនុប្រធាន Wang Chuan ក៏កំពុងតែស្វែងរកកម្លាំងសម្រាប់វិស័យនេះដែរ រួមមានទាំងការសិក្សាស្រាវជ្រាវ និងដំណើរការនៃការផលិត។

ក៏ប៉ុន្តែ មុននេះមិនយូរប៉ុន្មាន Xiaomi បានប្រកាសជាផ្លូវការ បដិសេធរាល់ដំណឹងចចាមអារ៉ាមមុននោះស្ដីអំពីការអភិវឌ្ឍរថយន្តរបស់ក្រុមហ៊ុននេះ។ នៅក្នុងសេចក្ដីប្រកាសនោះ Xiaomi បញ្ជាក់ថា៖ «Xiaomi តែងយកចិត្តទុកដាក់លើការរីកចម្រើននៃវិស័យរថយន្តអគ្គិសនី ដោយវាតម្លៃ និងស្រាវជ្រាវលើនិន្នាការថ្មីៗទាក់ទងនឹងការរីកចម្រើន។ ប៉ុន្តែ ដំណាក់កាលនៃការសិក្សាស្រាវជ្រាវរបស់ Xiaomi ក្នុងវិស័យរថយន្តអគ្គិសនី នៅតែមិនទាន់ដើរដល់ដំណាក់កាលផ្លូវការនៅឡើយ»។

Xiaomi ទំនងជាមិនចង់បង្ហើបឱ្យដឹងអំពីព័ត៌មានណាមួយរបស់ខ្លួនទាក់ទិននឹងការអភិវឌ្ឍរថយន្តអគ្គិសនី នៅមុនពេលដើរដល់ដំណាក់កាលផលិត ឬទទួលបានជោគជ័យជាក់លាក់ណាមួយ ដែលនេះគឺប្រហាក់ប្រហែលទៅនឹងគម្រោងអភិវឌ្ឍរថយន្តរបស់ក្រុមហ៊ុន Apple ដូច្នោះដែរ៕

ប្រភព៖ Gizchina
ប្រែសម្រួល៖ បុត្រា

March 22, 2021

ត្រូវតំណាងរាស្ត្ររិះគន់ថា «មានហូសហេតុ» Elon Musk ថា «ខ្ញុំកំពុងសន្សំប្រាក់ដើម្បីជួយដល់មនុស្សជាតិ»

ដោយមានទ្រព្យសរុបចំនួន 170ពាន់លានដុល្លារអាមេរិក មហាសេដ្ឋីអាមេរិកាំងដើមកំណើតអាហ្វ្រិក លោក Elon Musk បានអះអាងថា ទ្រព្យដែលលោកមានគឺទុកសម្រាប់ «ជួយដល់មនុស្សជាតិ» ដើម្បីបានរស់នៅលើ «ពហុភព»។

ថ្មីៗនេះ CEO របស់ Tesla លោក Elon Musk បានឆ្លើយតបនឹងការរិះគន់របស់តំណាងរាស្ត្រអាមេរិក Bernie Sanders ទាក់ទិននឹងទ្រព្យសម្បត្តិរបស់លោក។ លោក Musk ប្រាប់ថា លោកនឹងប្រើប្រាស់ប្រាក់ទាំងនេះដើម្បីជួយដល់មនុស្សជាតិ។ «ខ្ញុំកំពុងសន្សំប្រាក់ពីប្រភពមួយចំនួនដើម្បីជួយបង្កើតជីវភាពរស់នៅនៅលើអន្តរភព និងពង្រីកការយល់ដឹងអំពីតារា» លោក Musk បានសរសេរឆ្លើយតបដូច្នេះនៅលើ Twitter។ យោងតាមស្ថិតិរបស់ Bloomberg បច្ចុប្បន្នលោក Elon Musk កំពុងកាន់កាប់ទ្រព្យក្នុងដៃចំនួន 170ពាន់លានដុល្លារ និងជាអ្នកមានជាងគេលំដាប់ទីពីរក្នុងពិភពលោក បន្ទាប់ពីមហាសេដ្ឋី Jeff Bezos។

តំណាងរាស្ត្រមួយចំនួននៅសភាអាមេរិកតែងតែស្នើឱ្យមានការយកពន្ធច្រើនពីក្រុមមហាសេដ្ឋី។ «យើងកំពុងស្ថិតក្នុងយុគសម័យជាប្រវត្តិសាស្ត្ររបស់សហរដ្ឋអាមេរិក ជាកន្លែងដែលមនុស្សពីរនាក់ រួមមាន Elon Musk និង Jeff Bezos មានទ្រព្យច្រើនជាងអ្នកក្របំផុតចំនួនជាង40% នៅសហរដ្ឋអាមេរិកទៅទៀត» Bernie Sanders ដែលជាតំណាងរាស្ត្រនៅព្រឹទ្ធសភា បាននិយាយដូច្នេះ។

លោក Bernie Sanders បន្ថែមថា៖ «កម្រិតនៃការលោភលន់ និងមិនស្មើភាពគ្នា មិនត្រឹមតែមិនប្រកបដោយសីលធម៌ប៉ុណ្ណោះទេ តែវាថែមទាំងមិនអាចព្យាបាលបានទៀតផង»។

ឆ្លើយតបនឹងបញ្ហានេះ លោក Musk បានឱ្យដឹងថា លោកមានគម្រោងប្រើប្រាស់ខ្ទង់ប្រាក់របស់ខ្លួនដើម្បីបង្កបង្កើតជីវភាពរស់នៅលើពហុភព។ កាលពីឆ្នាំមុន លោក Musk បានរៀបគម្រោងនាំមនុស្សចំនួន1លាននាក់ឡើងទៅរស់នៅលើភពព្រះអង្គារនាឆ្នាំ2050 និងបង្កើតការងារនៅលើភពក្រហមនេះ។ លោក Musk និយាយថា «មានជំនឿយ៉ាងមុតមាំ» ថា យានអវកាស Starship ដំបូងរបស់ SpaceX អាចចុះចតនៅលើភពអង្គារក្នុងឆ្នាំ2026។ ប៉ុន្តែ ក្រុមអ្នកជំនាញខាងអវកាសបានសំដែងការសង្ស័យទៅលើពេលវេលាដែលលោក Musk បានលើកឡើង។

លោក Musk និយាយថា «មានជំនឿយ៉ាងមុតមាំ» ថា យានអវកាស Starship ដំបូងរបស់ SpaceX អាចចុះចតនៅលើភពអង្គារក្នុងឆ្នាំ2026

មហាសេដ្ឋី Elon Musk បានបញ្ជាក់យ៉ាងច្បាស់ៗថា លោកកំពុងប្រឹងប្រែងសន្សំទ្រព្យសម្រាប់សម្រេចគោលដៅចុងក្រោយ នោះគឺទៅរស់នៅលើភពព្រះអង្គារ។

លោក Elon Musk និយាយថា «ខ្ញុំគិតថា ប្រការដែលសំខាន់គឺមនុស្សជាតិត្រូវតែក្លាយជាអរិយធម៌ដែលមានសមត្ថភាពដើរទេសចរណ៍នៅទីអវកាស ឬជាសត្វលោកដែលរស់នៅលើពហុភព។ ដើម្បីកសាងទីក្រុងមួយនៅលើពិភពអង្គារគឺត្រូវការប្រភពធនធានច្រើន ហើយខ្ញុំមានបំណងចូលរួមចំណែកច្រើនបំផុតតាមដែលអាចធ្វើទៅបាន»។

មហាសេដ្ឋី Elon Musk និង Jeff Bezos កំពុងតែប្ដូរវេនគ្នាកាន់កាប់តំណែងជាអ្នកមានជាងគេក្នុងពិភពលោក។ លោក Musk ធ្លាប់ដណ្ដើមបានតំណែងនេះពី Bezos កាលពីខែមករា នៅពេលទ្រព្យរបស់លោកបានឡើងដល់188ពាន់លានដុល្លារអាមេរិក។

កាលពីសប្ដាហ៍មុន តំណាងរាស្ត្រ Sanders បានដាក់សំណួរជាច្រើនអំពីទ្រព្យសម្បត្តិរបស់ Bezos តាមរយៈ Twitter ហើយក្រោយមក លោកក៏បាននិយាយដល់ទ្រព្យរបស់មហាសេដ្ឋីទាំងពីរគឺ Musk និង Bezos នៅក្នុងសវនាការមួយរបស់សភាកាលពីថ្ងៃពុធកន្លងទៅ។

តំណាងរាស្ត្រ Sanders និយាយថា៖ «Bezos និង Musk បច្ចុប្បន្នមានទ្រព្យច្រើនជាងទ្រព្យរបស់អ្នកក្របំផុតដែលមានចំនួន40% នៅសហរដ្ឋអាមេរិក ក្នុងគ្រាដែលយើងមើលឃើញថា មនុស្សម្នាកំពុងអត់ឃ្លាននៅសហរដ្ឋអាមេរិកច្រើនជាងពេលណាៗទាំងអស់»៕

ប្រភព៖ BI
ប្រែសម្រួល៖ បុត្រា

March 22, 2021

បទសម្ភាស នៅអៀកឡង់ បង្ហាញមូលហេតុនៃការចាកចេញរបស់ Barret ពីព្រះខ័នរាជស្វាយរៀង

ខ្សែការពារកណ្តាលសញ្ជាតិអៀកឡង់ Paddy Barret បានចាកចេញពីក្លិបព្រះខ័នរាជស្វាយរៀងហើយកាលពីពេលកន្លងទៅនេះ ក្រោយចុះកុងត្រាមិនបានប៉ុន្មានផង។ ការចាកចេញនេះ ត្រូវបានគេដឹងថា កីឡាកររូបនេះ នឹងទៅចូលរួមជាមួយនឹងក្លិបនៅលីគកំពូលរបស់ប្រទេសអៀកឡង់ St Patrick’s Athletic FC។

ទោះជាក្លិបព្រះខ័នរាជស្វាយរៀង បានបញ្ជាក់ថា គេចាកចេញដោយសារតែបញ្ហាផ្ទាល់ខ្លួន ដើម្បីទៅជួបជុំគ្រួសារ ក្នុងពេលវិបត្តិកូវីដ-19 ក៏ដោយ ក៏ប៉ុន្តែកីឡាករវ័យ 27ឆ្នាំរូបនេះ បានផ្តល់បទសម្ភាសដល់សារព័ត៌មានក្នុងស្រុក អៀកឡង់ ថា មូលហេតុគឺមានដូចតទៅនេះ៖

-ពិបាកសម្របខ្លួននឹងស្ថានភាពនានាក្នុងប្រទេសកម្ពុជា(អាកាសធាតុ ម្ហូបអាហារ មជ្ឈដ្ឋានជុំវិញខ្លួន…)

-ទម្រង់លេងមិនល្អតាមការទាមទាររបស់ក្លិប និងគ្រូបង្វឹក

-ប្រាក់ឈ្នួលតិច លីគកំពូលកម្ពុជា ជាលីគប្រកួតប្រជែងទាប មិនស័ក្តិសមនឹងរូបគេ

-ក្លិបផ្សេងឱ្យប្រាក់ឈ្នួលខ្ពស់ជាងនៅកម្ពុជា និងមានលក្ខខណ្ឌល្អជាងគ្រប់យ៉ាង

ខណៈកូតាកីឡាករបរទេស នៅសល់តែ៤នាក់នេះ ក្លិបបាល់ទាត់ព្រះខ័នរាជស្វាយរៀង បានបន្ថែមកីឡាករម្នាក់ភ្លាមៗ គឺកីឡាករខ្សែប្រយុទ្ធសញ្ជាតិសេណេហ្គាល់ Robert Lopez Mendy មកជំនួសតំណែងកីឡាកររូបនះ៕

March 22, 2021

ខាន់ ចេសា ត្រូវប៉ះកីឡាការិនី មកពីប្រេស៊ីល នៅដើមខែមេសានេះ

កីឡាការិនីកូនកាត់កម្ពុជា-មិកស៊ិក-អាមេរិកាំង ខាន់ ចេសា ឈ្នះខ្សែក្រវាត់ Who Number One នឹងឡើងទៅកាន់សង្វៀន Evolve Ur Game ដោយត្រូវប្រកួតជាមួយកីឡាការិនីមកពីប្រទេសប្រេស៊ីល Thamires Aquino។ ហើយនេះជាការប្រកួត Superfight ដែលធ្វើនៅទីក្រុងឡាសវេហ្គាស់ រដ្ឋណេវ៉ាដា សហរដ្ឋអាមេរិក នៅថ្ងៃទី3 ខែមេសា ឆ្នាំ2021។

នេះជាការបង្ហាញខ្លួនជាថ្មីម្តងទៀតរបស់ ចេសា បន្ទាប់ពីឈ្នះកីឡាការិនី Danielle Kelly ក្នុងកម្មវិធី Who Number One នៅតិចសាស់ កាលពីពេលថ្មីៗកន្លងទៅ។ ដោយមានឪពុកជាកូនកាត់កម្ពុជា-អាមេរិក និងម្តាយជាកូនកាត់មិកស៊ិក-អាមេរិក ខាន់ ចេសា ត្រូវបានគេចាត់ទុកថា ជាកីឡាការិនី ដែលលេងកីឡាជូជីតស៊ូបានល្អបំផុតក្នុងពិភពលោក ដោយឈ្នះជើងឯកពិភពលោក 3ដង, ជើងឯកទ្វីបអាមេរិក 4ដង, ជើងឯកពិភពលោក NoGi 3ដង និងជើងឯកអឺរ៉ុប 2ដង។ នៅឆ្នាំ2018 និង2019 កីឡាការិនីរូបនេះ បានប្រកួតតំណាងឱ្យកម្ពុជា ហើយដណ្តើមបានមេដាយមាស កីឡាអាស៊ីនៅប្រទេសឥណ្ឌូនេស៊ី និងកីឡាអាស៊ីអាគ្នេយ៍នៅហ្វ៊ីលីពីន៕

March 22, 2021

Category: សង្គម និងសេដ្ឋកិច្ច