សង្គម និងសេដ្ឋកិច្ច - La Reine Media

នារីជាប្រធានក្រុមនាវិកដំបូងរបស់អេហ្ស៊ីប ត្រូវគេសង្ស័យថា «ជាអ្នកធ្វើឱ្យកប៉ាល់ Ever Given ត្រូវជាប់គាំងលើព្រែក Suez»

នាង Marwa Elselehdar ដែលជានាវិកនាយិកាដំបូងបង្អស់របស់ប្រទេសអេហ្ស៊ីប មានការភ្ញាក់ផ្អើលជាខ្លាំងនៅពេលមានព័ត៌មានចចាមអារ៉ាមថា នាងបានបង្កឱ្យមានករណីកប៉ាល់ Ever Given ជាប់គាំង ធ្វើឱ្យស្ទះផ្លូវទឹករបស់ព្រែកជីក Suez កាលពីពេលថ្មីៗនេះ។

Marwa Elselehdar បានឱ្យដឹងថា មានមតិ និងខ្លឹមសារអត្ថបទសារព័ត៌មានមួយចំនួនដែលត្រូវគេកែប្រែ ត្រូវបានបង្ហោះលើបណ្ដាញសង្គមនៅអេហ្ស៊ីបចាប់ពីថ្ងៃទី23 ខែមីនា ដោយយល់ថា នាងជាប់ទាក់ទិននឹងករណីកប៉ាល់ដឹកកុងតឺន័រ Ever Given ដែលបានជាប់គាំងទទឹងព្រែកជីក Suez។ ប៉ុន្តែ Marwa Elselehdar មិនបានឱ្យដឹងច្បាស់អំពីខ្លឹមសារនៃពាក្យចចាមអារ៉ាមទាំងនោះទេ។

«ខ្ញុំពិតជាភ្ញាក់ផ្អើលណាស់។ ខ្ញុំគិតថា ខ្ញុំត្រូវគេវាយប្រហារ ដោយសារតែជាស្ត្រីដែលទទួលបានជោគជ័យក្នុងវិស័យនេះ ឬថា ខ្ញុំគឺជាជនជាតិអេហ្ស៊ីប» នាង Marwa Elselehdar និយាយដូច្នេះ និងបានបន្ថែមថា នាងកំពុងធ្វើការនៅលើកប៉ាល់ Aida IV Alexandria ក្នុងពេលកប៉ាល់ Ever Given ជួបបញ្ហា។

Marwa Elselehdar អាយុ29ឆ្នាំ គឺជាស្ត្រីដំបូងគេដែលកាន់តំណែងជាប្រធានក្រុមនាវិករបស់ប្រទេសអេហ្ស៊ីប។ នាងធ្លាប់ទទួលរងការរិះគន់ប្រកបដោយការរើសអើងភេទកាលពីនៅសិក្សានៅឯវិទ្យាស្ថានវិទ្យាសាស្ត្រ បច្ចេកវិទ្យា និងដឹកជញ្ជូនជើងទឹកនៅ Alexandria។ នាង Marwa Elselehdar មិនត្រូវបានគេអនុញ្ញាតឱ្យចូលសិក្សានៅសាកលវិទ្យាល័យនេះ រហូតដល់មានការយល់ព្រមពីប្រធានាធិបតីអេហ្ស៊ីប ដែលពេលនោះគឺលោក Hosni Mubarak។

«សង្គមអេហ្ស៊ីប នៅតែមិនទាន់ទទួលយកគំនិតដែលថា ស្ត្រីអាចធ្វើការនៅលើសមុទ្រ និងឆ្ងាយពីផ្ទះសម្បែងក្នុងរយៈពេលយូរ។ ប៉ុន្តែ អ្នកមិនចាំបាច់សុំច្បាប់គ្រប់គ្នានោះឡើយ នៅពេលចង់ធ្វើអ្វីដែលខ្លួនចូលចិត្ត» Marwa Elselehdar ថ្លែងបញ្ជាក់។

នាង Marwa Elselehdar កំពុងត្រូវបានកាសែតនានាចាប់អារម្មណ៍ (រូបថត៖ the Sun)

Ever Given ដែលជាកប៉ាល់ដឹកកុងតឺន័រធំជាងគេមួយក្នុងពិភពលោក ដោយមានទម្ងន់សរុបជាង 200,000 តោន បានជ្រុលទៅបុកច្រាំងរបស់ព្រែកជីក Suez និងជាប់គាំងទទឹងផ្លូវទឹកកាលពីព្រឹកថ្ងៃទី 24មីនា នៅពេលកំពុងធ្វើដំណើរពីសមុទ្រក្រហម ទៅកាន់មជ្ឈិមបូព៌ា ធ្វើឱ្យកប៉ាល់ទាំងអស់ដែលមកពីមុខ និងតាមពីក្រោយ ត្រូវកកស្ទះអស់រយៈពេល 6ថ្ងៃ។

ក្រុមមន្ត្រីអេហ្ស៊ីប ក្រោយមកក៏បានបញ្ជូនកប៉ាល់អូស រួមនឹងគ្រឿងចក្រជាច្រើនគ្រឿងទៅជួយសង្គ្រោះ។ កិច្ចខិតខំរបស់អាជ្ញាធរ ទទួលបានជោគជ័យកាលពីថ្ងៃទី29 ខែមីនា ស្របពេលដេលទឹកជោរបានឡើងដល់ចំណុចកំពូល។

ក្រុមអ្នកជំនាញបានគណនាឃើញថា ទំនិញដែលបានស្ទះនៅក្នុងករណីខាងលើនេះ មានតម្លៃរហូតដល់ 9.6ពាន់លានដុល្លារអាមេរិក ខណៈដែលក្រុមហ៊ុនធានារ៉ាប់រងអាល្លឺម៉ង់ Allianz បានប្រាប់ថា វិស័យពាណិជ្ជកម្មទូទាំងពិភពលោក ទំនងជាបានខាតបង់អស់ចាប់ពី 6-10ពាន់លានដុល្លារ។

ទីប្រឹក្សាម្នាក់របស់ប្រធានាធិបតីអេហ្ស៊ីប បានឱ្យដឹងថា ទីក្រុងគែរ អាចស្នើឱ្យម្ចាស់កប៉ាល់ Ever Given សងការខូចខាត និងតម្រូវឱ្យប្រធានក្រុមនាវិកទទួលខុសត្រូវចំពោះករណីជាប់កប៉ាល់នេះ។ ប្រធានស្ថាប័នគ្រប់គ្រងព្រែកជីក Suez (SCA) លោក Osama Rabia បានឱ្យដឹងថា ប្រាក់ចំណាយទៅលើការជួយសង្គ្រោះកប៉ាល់ Ever Given នេះ កើនដល់ 1ពាន់លានដុល្លារអាមេរិក៕

ប្រភព៖ BBC
ប្រែសម្រួល៖ បុត្រា

April 5, 2021

តើក្រុម «មហាសេដ្ឋីរថយន្តអគ្គិសនី» របស់ពិភពលោក ជាអ្នកណាខ្លះ និងមានទ្រព្យច្រើនកម្រិតណា?

ពីមួយថ្ងៃទៅមួយថ្ងៃ មានក្រុមហ៊ុនកាន់តែច្រើនឡើងៗ បានចូលរួមប្រកួតប្រជែងក្នុងវិស័យផលិតរថយន្តអគ្គិសនី។ ខាងក្រោមនេះគឺជាស្ថាបនិកក្រុមហ៊ុនរថយន្តអគ្គិសនីមួយចំនួនដែលត្រូវបានគេស្គាល់ច្រើនបំផុត ហើយតួលេខនៃទ្រព្យសម្បត្តិរបស់ពួកគេត្រូវបានយោងទៅតាមបញ្ជីចំណាត់ថ្នាក់ Real Time របស់ទស្សនាវដ្ដី Forbes។

ទីមួយ៖ មហាសេដ្ឋី Elon Musk នាយកប្រតិបត្តិរបស់ក្រុមហ៊ុន Tesla
ទ្រព្យ៖ 163.8ពាន់លានដុល្លារអាមេរិក

តម្លៃមូលបត្រ Tesla កើនឡើងយ៉ាងលឿន ជួយឱ្យទ្រព្យរបស់លោក Elon Musk ប្រែប្រួលយ៉ាងឆាប់រហ័សក្នុងរយៈពេលជាងមួយឆ្នាំមកនេះ។ យោងតាមស្ថិតិរបស់ Forbes លោក Musk កំពុងកាន់កាប់ទ្រព្យដែលមានតម្លៃសុប 163.8ពាន់លានដុល្លារ ខ្ពស់ជាងឆ្ងាយបើធៀបនឹង 26.6ពាន់លានដុល្លារដែលគាត់មានកាលពីដើមឆ្នាំ2020។ បច្ចុប្បន្ន មហាសេដ្ឋីដែលកើតឆ្នាំ1971 រូបនេះ គឺជាអ្នកមានជាងគេលំដាប់ទីពីរក្នុងពិភពលោក បន្ទាប់ពីមហាសេដ្ឋី Jeff Bezos។ លោក Musk ក៏ធ្លាប់ជាអ្នកមានជាងគេលំដាប់លេខមួយផងដែរ កាលពីពេលថ្មីៗនេះ។

ទន្ទឹមនឹង Tesla លោក Musk ក៏ជាសហស្ថាបនិករបស់ក្រុមហ៊ុនបច្ចេកវិទ្យាអវកាស SpaceX ទៀតផង។

ទីពីរ៖ មហាសេដ្ឋី Wang Chuanfu ស្ថាបនិករបស់ BYD
ទ្រព្យ៖ 14.5ពាន់លានដុល្លារអាមេរិក

លោក Wang Chuanfu គឺជាស្ថាបនិកនៃក្រុមហ៊ុនផលិតរថយន្តអគ្គីសនី និងថ្ម/អាគុយ BYD ជាក្រុមហ៊ុនដែលមានភាគហ៊ុនមួយចំនួនរបស់មហាសេដ្ឋីអាមេរិកាំង Warren Buffett។

ឆ្នាំ2009 លោក Wang Chuanfu ធ្លាប់ជាអ្នកមានជាងគេលំដាប់ទីមួយនៅប្រទេសចិន បើយោងតាមស្ថិតិរបស់ Hurun Report (ក្រុមហ៊ុននៅសៀងហៃដែលជំនាញខាងបោះពុម្ភផ្សាយសម្រាប់ក្រុមអ្នកមាន) ដោយកាលណោះលោកមានទ្រព្យ 5.1ពាន់លានដុល្លារ និងឈរលំដាប់លេខរៀងទី103 ក្នុងពិភពលោក។ បច្ចុប្បន្ន លោកមានទ្រព្យចំនួន 14.5ពាន់លានដុល្លារអាមេរិក។

ទីបី៖ លោក He Xiaopeng ស្ថាបនិករបស់ Xpeng Motors
ទ្រព្យ៖ 7.2ពាន់លានដុល្លារ

He Xiaopeng គឺជាស្ថាបនិក និងជាប្រធានរបស់ Xpeng Motors ជាក្រុមហ៊ុនមួយដែលត្រូវបានចាប់ផ្ដើមដំបូងជាមួយនឹងផលិតផលរថយន្តអគ្គិសនី។ មុន Xpeng លោក Xiaopeng ក៏ធ្លាប់បានបង្កើតកម្មវិធីរុករក (Browser) UCWEB ដែលក្រោយមកត្រូវបានលក់ទៅឱ្យក្រុមហ៊ុន Alibaba Group។

នៅពេល Elon Musk ដែលជា CEO របស់ Tesla បានសម្រេចចិត្តចែករំលែកប័ណ្ណកម្មសិទ្ធិបញ្ហារបស់ក្រុមហ៊ុនទៅឱ្យសាធារណជនពិនិត្យមើលកាលពីឆ្នាំ2014 លោក He Xiaopenh បាននិយាយថា លោកគឺជា «អ្នកគាំទ្រផ្កាប់មុខ» របស់ Tesla ហើយ Xpeng Motors ត្រូវបានបង្កើតឡើងទៅតាមចំណូលចិត្តនេះ។ ខែតុលា ឆ្នាំ2017 Xpeng បានឧទ្ទេសនាមម៉ូដែលរថយន្ត G3 ដំបូងដែលក្រុមហ៊ុន Xpeng Motors បានអភិវឌ្ឍ។

ទីបួន៖ មហាសេដ្ឋី William Li ស្ថាបនិករបស់ Nio
ទ្រព្យ៖ 6ពាន់លានដុល្លារ

តែងត្រូវបានគេចាត់ទុកថាជា «Elon Musk នៅប្រទេសចិន» លោក William Li គឺជាស្ថាបនិកនៃក្រុមហ៊ុនផលិតរថយន្តអគ្គិសនី Nio Inc ដែលជាគូប្រជែងរបស់ Tesla នៅលើទីផ្សារប្រទេសចិន។ ដោយការស្រលាញ់ចូលចិត្តរថយន្តខ្លាំងពេក ឆ្នាំ2014 លោក William Li សម្រេចចិត្តបង្កើតក្រុមហ៊ុន Nio ដោយទទួលបានទុនវិនិយោគពីបណ្ដាក្រុមហ៊ុនធំៗ ដូចជា Tencent, Baidu និង Lenovo។

ឆ្នាំ2016 នៅឯព្រឹត្រិការណ៍តាំងពិព័រណ៍ Saatchi (អង់គ្លេស) Nio បានឧទ្ទេសនាមរថយន្តកីឡាទ្វារពីរដំបូងដែលមានឈ្មោះថា EP9 និងលក់បាន 6គ្រឿងនៅទីនេះ ជាមួយនឹងតម្លៃ 3.2លានដុល្លារ/គ្រឿង។ ឆ្នាំ 2017 ក្រុមហ៊ុននេះក៏ទទួលបានការបញ្ជាទិញជាលើកដំបូង។

ក្រៅពី Nio លោក William Li ក៏ជាស្ថាបនិករបស់ Bitauto ជាក្រុមហ៊ុនផ្គត់ផ្គង់ខ្លឹមសារសម្រាប់ផ្សាយលើគេហទំព័រ និងសេវាកម្មផ្នែកទីផ្សារសម្រាប់បណ្ដាក្រុមហ៊ុននៅក្នុងវិស័យរថយន្តនៅប្រទេសចិនផងដែរ។

ទីប្រាំ៖ លោក Li Xiang ស្ថាបនិករបស់ Li Auto
ទ្រព្យ៖ 4.5ពាន់លានដុល្លារ

មហាសេដ្ឋី Li Xiang គឺជាស្ថាបនិករបស់ក្រុមហ៊ុនផលិតរថយន្តអគ្គិសនី Li Auto ដែលមានទីស្នាក់ការកណ្ដាលនៅទីក្រុងប៉េកាំង។ ក្រុមហ៊ុននេះបានចុះបញ្ជីនៅឯផ្សារហ៊ុន Nasdaq របស់សហរដ្ឋអាមេរិកកាលពីខែកក្កដា ឆ្នាំ2020។ ផលិតផលល្បីឈ្មោះបំផុតរបស់ក្រុមហ៊ុននេះ នោះគឺ Li One ដែលជារថយន្តអគ្គិសនីប្រភេទ SUV 6កៅអី។

រថយន្តរបស់ Li Xiang ត្រូវបានបំពាក់ទាំងម៉ាស៊ីនប្រើប្រេងឥន្ធនៈ ទាំងម៉ាស៊ីនប្រើថាមពលអគ្គិសនី។

យោងតាមរបាយការណ៍ ក្រុមហ៊ុន Li Auto លក់រថយន្តបានចំនួន 10,400គ្រឿង គិតត្រឹមថ្ងៃទី30 ខែមិថុនា ឆ្នាំ2020 បន្ទាប់ពីបានចាប់ផ្ដើមផលិតទ្រង់ទ្រាយធំកាលពីខែវិច្ឆិការ ឆ្នាំ2019។

ទីប្រាំមួយ៖ មហាសេដ្ឋី RJ Scaringe ស្ថាបនិករបស់ Rivian Automotive
ទ្រព្យ៖ 3.4ពាន់លានដុល្លារអាមេរិក

RJ Scaringe គឺជាស្ថាបនិករបស់ក្រុមហ៊ុនផលិតរថយន្តអគ្គិសនី Rivian។ គាត់មានបំណងបង្កើតក្រុមហ៊ុនផលិតរថយន្តតាំងតែពីនៅរៀនមធ្យមសិក្សា។ បន្ទាប់ពីទទួលបានសញ្ញាបត្របណ្ឌិតពីសាកលវិទ្យាល័យ MIT ឆ្នាំ2009 លោក Scaringe ក៏បានត្រលប់មកស្រុកកំណើតនៅឯ Melbourne រដ្ឋ Florida និងបង្កើតក្រុមហ៊ុនដំបូងរបស់ខ្លួន មុនពេលត្រូវប្ដូរឈ្មោះមកជា Rivian។

ក្រុមហ៊ុន Rivian ទទួលបានទុនវិនិយោគពី Amazon, Ford រួមនឹងអ្នកវិនិយោគមួយចំនួនទៀត។ គិតមកដល់ដើមឆ្នាំ2021 ក្រុមហ៊ុន Rivian ត្រូវបានគេកំណត់តម្លៃឡើងដល់ 27.6ពាន់លានដុល្លារអាមេរិក។ Scaringe បានឧទ្ទេសនាមរថយន្តចំនួនពីរម៉ូដែលដំបូងរបស់ Rivian នៅក្នុងព្រឹត្តិការណ៍ Auto Show កាលពីខែវិច្ឆិកា 2018 នោះគឺប្រភេទ SUV មួយគ្រឿង និងប្រភេទ pickup មួយគ្រឿង ដែលតាមគម្រោងនឹងត្រូវផលិតនៅពាក់កណ្ដាលឆ្នាំ2021នេះ៕

ប្រភព៖ Forbes, Bloomberg
ប្រែសម្រួល៖ បុត្រា

April 5, 2021

គម្រោងអូសខ្សែកាប្លិ៍ថ្មីរបស់ Facebook និង Google នឹងធ្វើឱ្យតំបន់អាស៊ី កាន់ជិតជាងមុន

កាលពីពេលថ្មីៗនេះ សារព័ត៌មាន CNA បានចុះផ្សាយពីគម្រោងអូសខ្សែកាប្លិ៍បាតសមុទ្រថ្មី 2ខ្សែរបស់ Facebook នឹងត្រូវធ្វើឡើង ដើម្បីភ្ជាប់ប្រទេសសិង្ហបុរី ឥណ្ឌូនេស៊ី និងអាមេរិកខាងជើង នៅក្នុងគម្រោងមួយ ជាមួយនឹងក្រុមហ៊ុន Google និងក្រុមហ៊ុនទូរគមនាគមន៍ក្នុងតំបន់ ដើម្បីបង្កើនសមត្ថភាពការតភ្ជាប់អ៊ិនធើណិត កាន់តែជិតជាងមុន។

តាមប្រភពខាងលើ បានលើកឡើងថា លោក Kevin Salvadori អនុប្រធានផ្នែកបណ្តាក់ទុននៅក្រុមហ៊ុន Facebook បានប្រាប់ Reuters ថា៖ “ខ្សែកាប្លិ៍ឈ្មោះ Echo និង Bifrost នឹងក្លាយជាខ្សែកាប្លិ៍2 ដំបូងគេដែលនឹងត្រូវអូសលើផ្លូវថ្មីមួយ ឆ្លងកាត់ទន្លេ Java ហើយខ្សែកាប្លិ៍ទាំងនោះ នឹងបង្កើនសមត្ថភាពខ្សែកាប្លិ៍ក្រោមសមុទ្រជារួម រហូតដល់ 70%”។ លោកបានបន្ថែមថា ខ្សែកាប្លិ៍ទាំង 2ខ្សែនេះ នឹងក្លាយជាខ្សែកាប្លិ៍ដំបូងដែលភ្ជាប់តំបន់អាមេរិកខាងជើងដោយផ្ទាល់ ទៅកាន់តំបន់សំខាន់ៗជាច្រើនរបស់ឥណ្ឌូនេស៊ី និងបង្កើនការតភ្ជាប់សម្រាប់ខេត្តនៅភាគកណ្តាល និងខាងកើតនៃរដ្ឋដែលមានអត្រាប្រជាជនច្រើនជាងគេលំដាប់ទី3 ក្នុងពិភពលោក។

សម្រាប់ខ្សែកាប្លិ៍ទាំង2 មានគម្រោងដោយឡែកពីគ្នា ទី1 គឺខ្សែកាប្លិ៍ Echo កំពុងតែត្រូវបានដំឡើងក្រោមភាពជាដៃគូជាមួយនឹង Google របស់ក្រុមហ៊ុន Alphabet និងក្រុមហ៊ុនទូរគមនាគមន៍ឥណ្ឌូនេស៊ី XL Axiata ហើយគម្រោងនេះ គួរតែដំឡើងរួចរាល់នៅត្រឹមឆ្នាំ2023។ សម្រាប់ខ្សែកាប្លិ៍ទី2 គឺ Bifrost នឹងត្រូវដំឡើងតាមរយៈការចាប់ដៃគូជាមួយនឹងក្រុមហ៊ុន Telin ដែលជាក្រុមហ៊ុនឧបសម្ព័ន្ធរបស់ក្រុមហ៊ុនឥណ្ឌូនេស៊ី Telkom និងក្រុមហ៊ុនពហុសាជីវកម្មសិង្ហបុរី Keppel ដែលនឹងត្រូវអូសឱ្យរួចរាល់នៅត្រឹមឆ្នាំ2024៕

April 2, 2021

ផ្លូវការ៖ ក្រុមហ៊ុន Xiaomi ឈ្នះក្តី រួចផុតពីការចោទប្រកាន់ដោយសហរដ្ឋអាមេរិក

បន្ទាប់ពីក្រុមហ៊ុនបច្ចេកវិទ្យាចិន Xiaomi រងការដាក់ពាក្យបណ្ដឹងតវ៉ាលើរឿងក្តី ដែល “ក្រសួងការពារជាតិសហរដ្ឋអាមេរិក ចោទប្រកាន់ថា ជាក្រុមហ៊ុនដែលមានទំនាក់ទំនងជាមួយយោធាចិន” កាលពីពេលកន្លងមកនោះ មកទល់ពេលនេះ រឿងរ៉ាវដ៏ក្តៅគគុក ដែលអូសបន្លាយពេលជាង 3ខែមកហើយនេះ ទើបនឹងសម្រេចជាផ្លូវការ ដោយតុលាការសហរដ្ឋអាមេរិក។

កាលពីពេលថ្មីៗនេះ គេបានឃើញលិខិតផ្លូវការមួយ បង្ហោះដោយគណនីក្រុមហ៊ុន Xiaomi បង្ហាញថា ក្រុមហ៊ុន នឹងមិនត្រូវទទួលរង នូវការពិន័យណាមួយឡើយ។ នៅក្នុងន័យនេះ លិខិតផ្លូវការនោះ បានបន្ថែមទៀតថា Xiaomi បានឈ្នះ លើរឿងក្តីនេះរួចរាល់ហើយ ព្រមទាំងបានបន្តស្នើសុំទៅតុលាការ ដើម្បីឱ្យធ្វើការលុបឈ្មោះក្រុមហ៊ុនរបស់ខ្លួន ចេញពីបញ្ជាចោទប្រកាន់ខាងលើជាបន្ទាន់ទៀតផង។ ដោយឡែក ចៅក្រមរបស់អាមេរិក បានបញ្ជាក់ថា ការចោទប្រកាន់ពីសំណាក់ក្រសួងការពារជាតិអាមេរិកនេះ គឺជាការបំពាន និងធ្វើឱ្យប៉ះពាល់យ៉ាងខ្លាំង ដល់ក្រុមហ៊ុន Xiaomi។

សូមជម្រាបជូនផងដែរថា កាលពីដើមឆ្នាំ2021 កន្លងទៅថ្មីៗ ក្រសួងការពារជាតិនៃសហរដ្ឋអាមេរិក បានបញ្ចេញបញ្ជីក្រុមហ៊ុនអាជីវកម្មចិនជាច្រើន ដែលស្ថិតក្នុងការតាមដាន ឬបញ្ជីខ្មៅ ចំពោះក្រុមហ៊ុនចិនណា ដែលមានទំនាក់ទំនងជាមួយរដ្ឋាភិបាលចិន ដោយមានការសំអាងតិចតួចប៉ុណ្ណោះ ដែលក្នុងនោះ ក៏មាន Xiaomi មួយដែរ។

ផ្ទុយពីក្រុមហ៊ុនដទៃទៀតដែលសម្ងំនៅស្ងៀម ក្រុមហ៊ុន Xiaomi បានដាក់ពាក្យប្តឹងប្រឆាំងតបតវិញភ្លាមៗ ដែលធ្វើឱ្យរឿងរ៉ាវ ត្រូវអូសបន្លាយរហូតអស់រយៈពេលជាង 3ខែ ទើបដោះស្រាយរួច។ កន្លងទៅ Xiaomi ក៏ធ្លាប់បានចេញលិខិតអះអាងជាច្រើនដងរួចមកហើយថា ពួកគេមិនត្រូវបានគ្រប់គ្រង ឬមានទំនាក់ទំនងណាមួយ ជាមួយយោធាចិន ដូចការចោទប្រកាន់នោះទេ។ ការចោទប្រកាន់នេះ បានធ្វើឱ្យប៉ះពាល់យ៉ាងធ្ងន់ធ្ងរដល់ក្រុមហ៊ុន Xaiomi ក្នុងទីផ្សារសកល ជាពិសេសនោះគឺ ធ្វើឱ្យវិនិយោគិន ដែលភាគច្រើនជាជនជាតិអាមេរិក មិនអាចបន្តការវិនិយោគតទៅទៀតបាន៕

April 2, 2021

ម្ចាស់កប៉ាល់ Ever Given ប្ដឹងក្រុមហ៊ុនគ្រប់គ្រងកប៉ាល់នេះ ក្រោយមានករណីជាប់គាំងនៅលើព្រែកជីក Suez

ម្ចាស់កម្មសិទ្ធិនៃកប៉ាល់ដឹកកុងតឺន័រ Ever Given បានដាក់ពាក្យប្ដឹងក្រុមហ៊ុនដឹកជញ្ជូនផ្លូវសមុត្រដែលជាភាគីគ្រប់គ្រងកប៉ាល់ ក្រោយពីហេតុការណ៍កប៉ាល់ Ever Given ជាប់គាំង បណ្ដាលឱ្យមានបញ្ហាកកស្ទះផ្លូវទឹកនៅឯព្រែកជីក Suez។

ពាក្យបណ្ដឹងនេះត្រូវបានដាក់ទៅកាន់តុលាការជាន់ខ្ពស់នៅទីក្រុងឡុងដ៍ ប្រទេសអង់គ្លេស កាលពីម្សិលមិញ (1មេសា)។ ភាគីចុងចោទ រួមមាន ក្រុមហ៊ុន Evergreen Marine Corp ដែលជាអ្នកគ្រប់គ្រងកប៉ាល់ Ever Given និងក្រុមមនុស្សដែលកំពុងទាមទារសំណង ឬមានសិទ្ធិទាមទារសំណងលើការខាតបង់នានា។

កប៉ាល់ Ever Given ជាកម្មសិទ្ធិរបស់ក្រុមហ៊ុន Luster Maritime និងក្រុមហ៊ុន Higaki Sangyo Kaisha ដែលមានទីស្នាក់ការកណ្ដាលនៅប្រទេសជប៉ុន។ កប៉ាល់នេះកំពុងត្រូវបានជួលទៅឱ្យ Evergreen Marine Corp ជាក្រុមហ៊ុនដឹកជញ្ជូនកុងតឺន័រតាមផ្លូវសមុទ្ររបស់តៃវ៉ាន់។

កប៉ាល់ Even Given កាលពីថ្ងៃទី 23មីនា បានជួបនឹងព្យុះខ្សាច់មួយនៅពេលធ្វើដំណើរតាមព្រែកជីក Suez ហើយក៏បានបុកចូលច្រាំង និងត្រូវជាប់គាំងអស់រយៈពេល 6ថ្ងៃ។ ហេតុការណ៍នេះ បានធ្វើឱ្យទំនិញដែលមានតម្លៃសរុបប្រមាណ 9.6ពាន់លានដុល្លារ ត្រូវជាប់គាំងនៅឯព្រែកជីក Suez ខណៈវិស័យពាណិជ្ជកម្មទូទាំងពិភពលោក ត្រូវខាតបង់អស់ប្រមាណពី 6-10ពាន់លានដុល្លារ។ នេះបើតាមក្រុមអ្នកជំនាញ និងក្រុមហ៊ុនធានារ៉ាប់រងអាល្លឺម៉ង់ Allianz។

កាលពីថ្ងៃទី 31មីនា ក្រុមមន្ត្រីអេហ្ស៊ីប ដែលជាភាគីគ្រប់គ្រងព្រែក Suez ក៏បានព្រមានថានឹងទាមទារសំណងលើការខាតបង់នានា។ «យើងនឹងទាមទារសំណងជាងមួយពាន់លានដុល្លារអាមេរិក។ យើងនឹងដាក់សំណើឱ្យបង់ថ្លៃខូចខាតក្នុងទំហំទឹកប្រាក់សមស្រប» នេះបើតាម Osama Rabie ប្រធាន និងជានាយកប្រតិបត្តិរបស់ស្ថាប័នគ្រប់គ្រងព្រែកជីក Suez (SCA) ដែលបានឱ្យដឹងកាលពីថ្ងៃទី 31មីនា៕

ប្រភព៖ BI
ប្រែសម្រួល៖ បុត្រា

April 2, 2021

តម្លៃ Bitcoin ត្រលប់មករកចំណុច 60,000ដុល្លារ/bitcoin ធ្វើឱ្យអ្នកវិនិយោគ មាន «ទឹកមាត់» លេបបន្តទៀត

ដោយសារតែមានដំណឹងវិជ្ជមានច្រើននាពេលថ្មីៗនេះ តម្លៃរបស់ Bitcoin កំពុងតែត្រូវបានអូសឡើងដល់ចំណុចដែលវាធ្លាប់បានឡើងដល់កាលពីពាក់កណ្ដាលខែមីនា នោះគឺតម្លៃ 60,000ដុល្លារអាមេរិកក្នុង 1 Bitcoin។

នៅក្នុងការជួញដូរដំបូងនៃខែមេសានេះ Bitcoin បានឡើងថ្លៃដល់ 60,000ដុល្លារ/bitcoin ដូចកាលពីពាក់កណ្ដាលខែមីនាកន្លងទៅ ដែលលទ្ធផលនេះត្រូវបានគេមើលឃើញថា ដោយសារព័ត៌មានល្អៗជាច្រើននៅសហរដ្ឋអាមេរិក ដែលបានជះឥទ្ធិពលរបស់ការជួញដូរ Bitcoin របស់ក្រុមអ្នកវិនិយោគក្នុងទ្វីបអាស៊ី។

ថ្មីៗនេះ មានព័ត៌មានថា Goldman Sachs នឹងបង្ហាញបណ្ដាញវិនិយោគលើប្រាក់ឌីជីថលសម្រាប់អតិថិជន នៅក្នុងរង្វង់ 3ខែទៀត ខណៈដែល BlackRock ក៏បានបោះទុន 6.5លានដុល្លារដើម្បីទិញកិច្ចសន្យាអនាគតរបស់ Bitcoin កាលពីដើមឆ្នាំ។ តម្លៃនៃកិច្ចសន្យានេះបានកើនបន្ថែម 360,000ដុល្លារអាមេរិក គិតត្រឹមពេលមានរបាយការណ៍។

ការឡើងថ្លៃរបស់ Bitcoin នៅដើមខែមេសានេះ បាននាំមកនូវ «ការសប្បាយរីករាយ» នៅក្នុងទីផ្សាររូបិយវត្ថុអេឡិចត្រូនិក។ ភ្លាមៗក្រោយការឡើងថ្លៃនេះ មហាសេដ្ឋី Elon Musk ក៏បានបង្ហោះសារមួយឃ្លានៅលើ Twitter ជំរុញឱ្យតម្លៃរបស់ប្រាក់ឌីជីថល Dogecoin ឡើងថ្លៃយ៉ាងខ្ពស់ ដោយមានអ្នកទិញច្រើន។

មុននេះ Bitcoin បានបង្កើតកំណត់ត្រាថ្មីជាមួយនឹងតម្លៃ 60,000ដុល្លារ/bitcoin កាលពីថ្ងៃទី14មីនា ប៉ុន្តែ ក្រោយមកវាក៏បានដាំក្បាលចុះ។

បច្ចុប្បន្ន Bitcoin កំពុងបន្តឡើងថ្លៃ ដែលរុញច្រានតម្លៃឱ្យត្រលប់ទៅរកចំណុច 60,000ដុល្លារ។ ក៏ប៉ុន្តែ មិនមានអ្វីមកធានាបានថា រូបិយវត្ថុអេឡិចត្រូនិកនេះនឹងបំបែកកំណត់ត្រាចាស់ ឬដាំក្បាលចុះនោះឡើយ៕

ប្រភព៖ Coinmarketcap
ប្រែសម្រួល៖ បុត្រា

April 2, 2021

ករណីជាប់គាំងកប៉ាល់ Ever Given នៅព្រែកជីក Suez៖ អេហ្ស៊ីបទាមទារសំណងជាងមួយពាន់លានដុល្លារ

ក្រុមមន្ត្រីនៃប្រទេសអេហ្ស៊ីប អាចទាមទារសំណងជាងមួយពាន់លានដុល្លារអាមេរិក បន្ទាប់ពីបានជួយសង្គ្រោះកប៉ាល់ «យក្ស» Even Given ជាកម្មសិទ្ធិរបស់ជប៉ុន ដំណើរការដោយតៃវ៉ាន់ និងដោតទង់ជាតិប៉ាណាម៉ា ដែលបានជាប់នៅក្នុងព្រែកជីក Suez អស់រយៈពេល 6ថ្ងៃកាលពីចុងខែមិនា។

«យើងនឹងទាមទារសំណងជាងមួយពាន់លានដុល្លារអាមេរិក។ យើងនឹងដាក់សំណើឱ្យបង់ថ្លៃខូចខាតក្នុងទំហំទឹកប្រាក់សមស្រប» នេះបើតាម Osama Rabie ប្រធាន និងជានាយកប្រតិបត្តិរបស់ស្ថាប័នគ្រប់គ្រងព្រែកជីក Suez (SCA) ដែលបានឱ្យដឹងកាលពីថ្ងៃទី 31មីនា។

លោក Rabie និយាយថា លោកសង្ឃឹមថា ការព្រមព្រៀងលើសំណងខាងលើអាចសម្រេចបាន «ក្នុងអំឡុងពីរ ឬបីថ្ងៃទៀត» ហើយបើមិនដូច្នេះទេ អេហ្ស៊ីបនឹងអាចរក្សាកប៉ាល់នេះទុកនៅលើបឹង Great Bitter នៅភាគខាងជើងនៃព្រែកជីក Suez។

«យើងអាចព្រមព្រៀងគ្នាលើសំណងជាក់លាក់ណាមួយ ឬនាំយកបញ្ហានេះឡើងតុលាការ។ បើសិនពួកគេសម្រេចឡើងតុលាការ នោះកប៉ាល់គួរតែត្រូវបានឃាត់ទុក» លោក Rabie ព្រមានដូច្នេះ។ លោកបន្តថា ខ្ទង់សំណងនេះគឺយោងទៅតាមការខាតបង់នានា ដូចជាការបាត់បង់ប្រាក់ចំណូលបានមកពីព្រែកជីក ថ្លៃសម្ភារ ម៉ាស៊ីន ក៏ដូចជាប្រាក់ចំណាយទៅលើថ្លៃជួលបុគ្គលិកចំនួន 800នាក់ដែលបានចូលរួមជួយសង្គ្រោះកប៉ាល់ Ever Given។

ព័ត៌មានបន្ថែម សូមចូលអានអត្ថបទ «បេសកកម្មសង្គ្រោះកប៉ាល់ Ever Given ដែលជាប់គាំងនៅឯព្រែកជីក Suez ត្រូវចំណាយប្រាក់អស់មិនតិចឡើយ»៕

ប្រភព៖ CNBC
ប្រែសម្រួល៖ បុត្រា

April 2, 2021

បេសកកម្មសង្គ្រោះកប៉ាល់ Ever Given ដែលជាប់គាំងនៅឯព្រែកជីក Suez ត្រូវចំណាយប្រាក់អស់មិនតិចឡើយ

ស្ថាប័នគ្រប់គ្រងព្រែកជីក Suez របស់អេហ្ស៊ីប កាលពីថ្ងៃទី 31មីនា ឆ្នាំ2021 បានឱ្យដឹងថា បញ្ហាជាប់គាំងរបស់កប៉ាល់ដឹកកុងតឺន័រ Ever Given បានបណ្ដាលឱ្យចរាចរណ៍ផ្លូវទឹកនៃព្រែកនេះត្រូវស្ទះអស់រយៈពេល 6ថ្ងៃ ហើយការចំណាយសម្រាប់សកម្មភាពជួយសង្គ្រោះ អាចកើនដល់ 1ពាន់លានដុល្លារអាមេរិក។

«យើងនឹងបន្តគណនាទៅលើការចំណាយទាំងអស់ដែលត្រូវបានប្រើប្រាស់ចាប់ពីថ្ងៃដំបូងនៃហេតុការណ៍ជាប់គាំង។ល។ តួលេខសរុបគឺប្រហែល 1ពាន់លានដុល្លារអាមេរិក» នេះបើតាមសម្ដីរបស់លោក Osama Rabia ប្រធានស្ថាប័នគ្រប់គ្រងព្រែកជី Suez ដែលបានប្រាប់ទូរទស្សន៍ Sada el-Balad TV របស់ប្រទេសអេហ្ស៊ីប។

ក្រៅពីនេះ លោក Rabia កន្លងមកក៏ធ្លាប់បានសង្កត់ធ្ងន់ថា រដ្ឋាភិបាលអេហ្ស៊ីបបានខាតបង់ប្រាក់ដែលត្រូវប្រមូលបានពីថ្លៃប្រើប្រាស់ព្រែក Suez ចំនួន 14លានដុល្លារ/ថ្ងៃ ដោយសារតែបញ្ហាស្ទះផ្លូវទឹកដ៏សំខាន់នេះ។

ព្រែកជីក Suez តភ្ជាប់សមុទ្រមេឌីទែរ៉ាណេ ទៅកាន់សមុទ្រក្រហម ដោយឆ្លងកាត់តំបន់ Isthmus of Suez និងបែងចែកទ្វីបអាហ្វ្រិក និងទ្វីបអាស៊ី

បច្ចុប្បន្ន កប៉ាល់ Ever Given ដែលជាកម្មសិទ្ធិរបស់ប្រទេសជប៉ុន គ្រប់គ្រងដោយតៃវ៉ាន់ និងដោតទង់ជាតិ Panama នេះ ត្រូវបានសង្គ្រោះ និងអូសទៅកាន់បឹង Great Bitter។ កប៉ាល់នេះនឹងត្រូវនៅលើបឹង រហូតដល់ការស៊ើបអង្កេតរកមូលហេតុត្រូវបានបញ្ចប់។

លោក Rabia បន្តថា ក្រុមនាវិករបស់កប៉ាល់ Ever Given នៅមិនទាន់ប្រគល់ប្រអប់ខ្មៅរបស់កប៉ាល់ រួមនឹងលិខិតផ្សេងៗមកឱ្យសមត្ថកិច្ចអេហ្ស៊ីបដើម្បីត្រួតពិនិត្យនៅឡើយ។

កប៉ាល់ Ever Given បានជាប់គាំង និងរាំងស្ទះផ្លូវទឹករបស់ព្រែកជីក Suez កាលពីថ្ងៃទី 23មីនា 2021។ យោងតាមការស្រាវជ្រាវ ការដឹកជញ្ជូនតាមសមុទ្រនៅទូទាំងពិភពលោក ប្រហែលជាត្រូវចំណាយពេល 6ខែទៀត ទើបអាចត្រលប់មករកភាពដើមវិញបាន។

លោក Ferdinand de Lesseps ជាជាតិបារាំង និងជាអ្នកបង្កើតក្រុមហ៊ុន Suez Canal Company ហើយព្រែកជីក Suez ក៏ត្រូវបានជីកចាប់ពីឆ្នាំ1859 ដល់ឆ្នាំ1869 និងដាក់ឱ្យប្រើប្រាស់ចាប់ពីឆ្នាំ1869៕

ប្រភព៖ ABC
ប្រែសម្រួល៖ បុត្រា

April 1, 2021

Nike ប្ដឹងក្រុមហ៊ុនផលិតស្បែកជើងដែលមានផ្ទុកឈាមមនុស្ស

Nike ដាក់ពាក្យប្ដឹងប្រឆាំងនឹងក្រុមហ៊ុន MSCHF ដោយសារតែបានរំលោភលើពាណិជ្ជសញ្ញានៅពេលបញ្ចេញម៉ូដែលស្បែកជើង Satan Shoes (ស្បែកជើងបីសាចសាតាន)។

ក្រុមហ៊ុនស្បែកជើងអាមេរិក Nike បានសម្រេចចិត្តដាក់ពាក្យប្ដឹង MSCHF ពីព្រោះតែរួមដៃជាមួយអ្នកចម្រៀងរ៉ែប Lil Nas X បញ្ចេញម៉ូដែលស្បែកជើង Satan Shoes។ នៅក្នុងពាក្យបណ្ដឹងនេះ Nike បាននិយាយថា MSCHF បានបំពានលើយីហោរបស់ខ្លួន នៅពេលកែទម្រង់រចនារបស់ស្បែកជើង Nike Air Max 97 ពណ៌ខ្មៅ ទៅតាមប្រធានបទបីសាច ជាមួយនឹងការបំពេញប្រហោងរបស់បាតស្បែកជើងដោយប្រើទឹកប៊ិកពណ៌ក្រហម ហើយក្នុងមួយគូៗ សុទ្ធតែមានផ្ទុកឈាមមនុស្សចំនួន 1តំណក់។

ការដែល MSCHF បញ្ចេញស្បែកជើងដែលយកតាមលំនាំស្បែកជើងរបស់ Nike និងនៅតែប្រើប្រាស់ពាណិជ្ជសញ្ញា«swoosh» បែបនេះ នាំឱ្យអ្នកប្រើប្រាស់យល់ច្រឡំថា Nike គឺជាអ្នកផលិត Satan Shoes។ ប្រការនេះបានបណ្ដាលឱ្យមានការអំពាវនាវឱ្យឈប់ប្រើប្រាស់ផលិតផលរបស់ Nike ដើម្បីប្រឆាំងនឹងម៉ូដែលស្បែកជើង Satan។

«Nike ដាក់ពាក្យបណ្ដឹងនេះគឺដើម្បីរក្សាសិទ្ធិគ្រប់គ្រងពាណិជ្ជសញ្ញា និងការពារបញ្ញាទ្រព្យរបស់ក្រុមហ៊ុន និងដើម្បីលុបបំបាត់រាល់ការយល់ច្រឡំនានា ដោយការប្រកាសយ៉ាងច្បាស់លាស់ថា៖ Nike មិនបានផ្ដល់សិទ្ធិ និងមិនបានផ្ដល់ការអនុញ្ញាតឱ្យផលិតស្បែកជើងដែលមានលក្ខណៈដូច Satan របស់ MSCHF នោះឡើយ» នេះបើតាមខ្លឹមសារខ្លះនៃពាក្យបណ្ដឹង។

ចំណែកភាគីក្រុមហ៊ុន MSCHF វិញ មិនទាន់បានបញ្ចេញប្រតិកម្មអ្វីឡើយ ទាក់ទិននឹងពាក្យបណ្ដឹងរបស់ក្រុមហ៊ុន Nike។

ក្រុមហ៊ុន Nike ស្នើឱ្យតុលាការប្រញាប់រារាំងក្រុមហ៊ុន MSCHF បន្តចាត់ការលើការបញ្ជាទិញចំពោះម៉ូដែលស្បែកជើងនេះ ព្រមទាំងទាមទារឱ្យ MSCHF សងការខូចខាតផងដែរ។ ជាក់ស្ដែង MSCHF ត្រូវទូទាត់រាល់ការចំណាយលើរឿងក្ដី ក៏ដូចជាការខូចខាតដែលកើតឡើងដោយអំពើរំលោភពាណិជ្ជសញ្ញា នាំឱ្យមានការខាតបង់ដែល «ប្រាក់មិនអាចប៉ះប៉ូវបាន» សម្រាប់កេរ្តិ៍ឈ្មោះរបស់ Nike។

យោងតាមការប្រកាសពី MSCHF ម៉ូដែលស្បែកជើង Satan Shoe បានអស់ពីឃ្លាំងបន្ទាប់ពីដាក់លក់បាន 1នាទី។ MSCHF ផលិតស្បែកជើងនេះត្រឹមតែ 666គូប៉ុណ្ណោះ ហើយក្នុង 1គូ មានតម្លៃ 1,018ដុល្លារ។ តួលេខទាំងពីរ (666 និង 1,018) នេះ ផ្សារភ្ជាប់ទៅនឹងរឿងព្រេងស្ដីអំពីបីសាច Satan។ ដងខ្លួនរបស់ស្បែកជើង និងប្រអប់ស្បែកជើង ត្រូវបានបោះពុម្ភគាថា Luke 10:18 ដែលនិយាយអំពីរឿងរ៉ាវ Satan ត្រូវបានបណ្ដេញឱ្យចុះពីឋានសួគ៌៖ «ខ្ញុំមើលឃើញ Satan ធ្លាក់ចុះ ដូចទៅនឹងរន្ធះពីសួគ៌ា»។

នៅក្នុងប្រកាសមួយដែលបានផ្ញើទៅកាន់ The New York Times ក្រុមហ៊ុន Nike បានបញ្ជាក់ថា៖ «Nike មិនមានទំនាក់ទំនងអ្វីជាមួយនឹងតារាចម្រៀងរ៉ែប Little Nas X ឬក្រុមហ៊ុន MSCHF។ Nike មិនបានរចនា មិនបានផលិត និងមិនបានផ្ដល់សិទ្ធិឱ្យផលិតម៉ូដែលស្បែកជើងនេះ»។

មុននោះ MSCHF បានកែច្នៃគំរូស្បែកជើង Nike Air Max 97s ទៅជា Jesus Shoes (ស្បែកជើងរបស់ព្រះយេស៊ូ) ដោយនៅត្រង់បាតកែងជើងមានផ្ទុកទឹកដែលយកពីទន្លេ Jordan និងត្រូវបានអាចារ្យមួយរូបជូនពរ។ ស្បែករបស់ព្រះនេះ ត្រូវបានលក់ក្នុងតម្លៃ 3,000ដុល្លារអាមេរិក/គូ។

អំពីតារាចម្រៀង Lil Nas X វិញ ក៏បានបង្ហោះរូបភាព meme មួយនៅលើបណ្ដាញសង្គម បន្ទាប់ពីបានដឹងថា Nike ដាក់ពាក្យប្ដឹង។ ការបង្ហោះរូបភាពនេះ ត្រូវបានធ្វើឡើងទៅតាមទម្លាប់របស់ Lil Nas X ដែលតែងតែធ្វើដើម្បីឆ្លើយតបទៅនឹងការរិះគន់ពីសំណាក់អ្នកស្ដាប់ ចំពោះផលិតផលតន្ត្រីរបស់ខ្លួន៕

ប្រភព៖ BI
ប្រែសម្រួល៖ បុត្រា

March 31, 2021

ដោយការកាន់កាប់ 1លាន Bitcoin បែបនេះ តើស្ថាបនិកមហាអាថ៌កំបាំង Satoshi Nakamoto នឹងក្លាយជាអ្នកមានជាងគេបំផុតក្នុងពិភពលោក?

យោងតាមការស្រាវជ្រាវ និងការគណនា អ្នកសរសេរកម្មវិធីកុំព្យូទ័រ (Programmer) ដែលជាស្ថាបនិករបស់ប្រាក់ឌីជីថល Bitcoin កំពុងកាន់កាប់ប្រាក់នេះចំនួនរហូតដល់ 1លានឯណោះ។

កាលពីសប្ដាហ៍មុន ឯកសារមួយរបស់ផ្សារហ៊ុនជួញដូរប្រាក់អេឡិចត្រូនិក Coinbase បានឱ្យដឹងថា ស្ថាបនិករបស់ Bitcoin គឺ Satoshi Nakamoto (រហ័សនាមអាថ៌កំបាំងសំដៅលើអ្នកបង្កើត Bitcoin) បច្ចុប្បន្ន កាន់កាប់ Bitcoin ជាង 1លានឯងណោះ ដែលក្នុង 1Bitcoin ស្មើនឹង 57,945ដុល្លារអាមេរិក (ថ្ងៃទី 30មីនា 2021)។

យោងតាម Cointelegraph បើសិនជាតម្លៃ Bitcoin ឡើងដល់ 182,000ដុល្លារ/Bitcoin នោះ Satoshi Nakamoto អាចក្លាយជាអ្នកមានជាងគេបំផុតក្នុងពិភពលោក។

នាបច្ចុប្បន្ន ស្ថាបនិកនៃក្រុមហ៊ុនផ្សារអនឡាញ Amazon លោក Jeff Bezos គឺជាអ្នកមានជាងគេបង្អស់លើពិភពលោក ដោយមានទ្រព្យសរុប 181ពាន់លានដុល្លារអាមេរិក។ ចំណែក CEO របស់ក្រុមហ៊ុនផលិតរថយន្ត Tesla លោក Elon Musk ឈរលំដាប់ទីពីរ ដោយមានទ្រព្យ 163.7ពាន់លានដុល្លារ ខណៈលោក Bill Gates មាន 140ពាន់លានដុល្លារ ឈរលំដាប់លេខបី។

បើសិនថ្ងៃណាមួយ តម្លៃ Bitcoin កើនឡើងដល់ 182,000ដុល្លារ/Bitcoin ខណៈដែលទ្រព្យរបស់លោក Bezos នៅដដែល នោះ Satoshi Nakamoto នឹងក្លាយជាអ្នកដណ្ដើមតំណែងជើងឯកកំពូលមហាសេដ្ឋីដ៏គួរឱ្យចាប់អារម្មណ៍ជាទីបំផុត។

ខែតុលា ឆ្នាំ2008 ស្ថាបនិកដ៏អាថ៌កំបាំង បានបង្ហោះសៀវភៅសស្ដីអំពី Bitcoin។ ថ្ងៃទី 3មករា ឆ្នាំ2009 បណ្ដាញ Bitcoin ដំបូងត្រូវបាន Satoshi Nakamoto ចាប់ផ្ដើមទាញយកនៅក្នុងប្រព័ន្ធកុំព្យូទ័ររបស់ខ្លួន ដែលនេះក៏ជាការបង្ហាញខ្លួនលើកដំបូងនៃបណ្ដាញ Bitcoin ក៏ដូចជាការចាប់ផ្ដើមនៃចលនា ឬនិន្នាការប្រាក់ឌីជីថល (cryptocurrency) និង blockchain។

បើទោះជាទិន្នន័យពិតមិនទាន់ច្បាស់លាស់ ប៉ុន្តែ ចាប់ពីខែមករា ដល់ខែកក្កដា ឆ្នាំ2009 Satoshi Nakamoto ត្រូវបានគេគណនាឃើញថា រកបានប្រមាណ 1លាន Bitcoin។ ឆ្នាំ 2010 Sergio Demian Lerner ដែលជាអ្នកស្រាវជ្រាវអំពីប្រាក់ឌីជីថលដ៏ល្បីឈ្មោះ បានប្រកាសអំពីការស្រាវជ្រាវមួយដែលគណនាអំពីចំនួន Bitcoin ដែល Satoshi Nakamoto កំពុងកាន់កាប់។

ដោយការវិភាគទៅលើបណ្ដាញដំបូងដែល Satoshi Nakamoto រកបាន Lerner គណនាឃើញថា ចំនួន Bitcoin ដែលជាកម្មសិទ្ធិរបស់ស្ថាបនិកនេះ មានរហូតដល់ 1លាន Bitcoin ឯណោះ។ «Satoshi Nakamoto មានបណ្ដុំដែលអាចរកបាន Bitcoin ជិត 22,000 បណ្ដុំ នៅក្នុងបណ្ដាញរបស់ខ្លួន ហើយអ្នកសរសេរកូដដ៏អាថ៌កំបាំងនេះ កំពុងកាន់កាប់ប្រហែល 1លាន Bitcoin»។

កន្លងមកនេះ មានរូបមន្តជាច្រើនបានព្យាករអំពីតម្លៃរបស់ Bitcoin ថា នឹងកើនដល់ 200,000ដុល្លារ ដល់1លានដុល្លារអាមេរិកក្នុង 1Bitcoin។ ក្នុងនោះ រូបមន្តដែលល្បីល្បាញជាងគេគឺ Stoc-to-Flow (S2F)។

S2F ព្យាករថា តម្លៃរបស់ Bitcoin នឹងកើនដល់ 100,000ដុល្លារ ហើយបន្តឡើងរហូតដល់ 288,000ដុល្លារ/Bitcoin នៅចុងឆ្នាំ2021។ ការព្យាករនេះគឺយោងទៅតាមទំនាក់ទំនងរវាងតម្លៃ Bitcoin ជាមួយនឹងមូលបត្រនានាដែលកំពុងមាន ក៏ដូចជាចំនួន Bitcoin ដែលនឹងត្រូវបានទាញយកក្នុងអនាគត។

កាលពីខែវិច្ឆិកា ឆ្នាំ2020 PlanB ដែលជាអ្នកបង្កើតរូបមន្ត S2F បានឱ្យដឹងថា៖ «ខ្ញុំមិនមានការសង្ស័យអ្វីឡើយអំពីការដែល Bitcoin ឡើងថ្លៃដល់ចាប់ពី 100,000ដុល្លារ រហូតដល់ 288,000ដុល្លារអាមេរិក មុនខែធ្នូ ឆ្នាំ2021»។

ប្រសិនបើតម្លៃរបស់ Bitcoin ពិតជាកើនឡើងដល់ 288,000ដុល្លារ/Bitcoin នោះទ្រព្យរបស់ Satoshi Nakamoto នឹងមានតម្លៃដល់ 288ពាន់លានដុល្លារអាមេរិក (288,000,000,000) ច្រើនជាងឆ្ងាយបើធៀបនឹងមហាសេដ្ឋី Bezos និង Musk។

ជាងនេះ តម្រូវការនៃការទប់ស្កាត់អតិផរណារបស់ស្ថាប័ននានា និងការធ្លាក់ថ្លៃរបស់ប្រាក់ដុល្លារអាមេរិក នឹងជួយជំរុញឱ្យតម្លៃរបស់ Bitcoin ឡើងដល់ 400,000ដុល្លារ/Bitcoin។ នេះបើតាមអ្នកគ្រប់គ្រងយុទ្ធសាស្ត្រជាន់ខ្ពស់របស់ Bloomberg Intelligence។

រហូតដល់បច្ចុប្បន្ន អត្តសញ្ញាណរបស់ Satoshi Nakamoto នៅតែជារឿងអាថ៌កំបាំង ហើយគេក៏មិនដឹងច្បាស់ថា បុគ្គលនេះនៅមានជីវិតដែរ ឬយ៉ាងណា។ មតិមួយចំនួនជឿថា Satoshi Nakamoto អាចជាមនុស្សមួយក្រុម។

កាលពីខែមុន Coinbase យល់ថា «ការដែល Satoshi Nakamoto បង្ហាញខ្លួន នឹងជះឥទ្ធិពលអាក្រក់ដល់តម្លៃរបស់ Bitcoin។ ដោយការរក្សាអាថ៌កំបាំងនៃអត្តសញ្ញាដូចបច្ចុប្បន្ន នោះ Satoshi Nakamoto ក៏អាចគេចផុតពីលទ្ធផលអាក្រក់ទាក់ទិននឹងផ្លូវច្បាប់»៕

ប្រភព៖ CoinTelegraph
ប្រែសម្រួល៖ បុត្រា

March 30, 2021

Category: សង្គម និងសេដ្ឋកិច្ច