សង្គម និងសេដ្ឋកិច្ច - La Reine Media

Pacquiao នឹងឡើងសង្វៀនជាថ្មី ប៉ះអ្នកប្រដាល់មកពីសហរដ្ឋអាមេរិក

កីឡាករប្រដាល់លំដាប់ពិភពលោក Manny Pacquiao បានប្រកាសវិលត្រឡប់ទៅកាន់សង្វៀនប្រដាល់វិញហើយ ក្រោយពីខកខានឡើងប្រកួតប្រមាណជា 2ឆ្នាំមកហើយ ចាប់តាំងពីបានយកឈ្នះ អ្នកប្រដាល់អង់គ្លេស Kell Brook ក្នុងទឹក4 រួចមក។

ការត្រឡប់មកវិញលើកនេះ កីឡាករសញ្ជាតិហ្វ៊ីលីពីន រូបនេះ គ្រោងនឹងត្រូវជួបជាមួយនឹងកីឡាករ មិនដែលចាញ់អាមេរិកាំង Terence Crawford ដែលការប្រកួតនឹងធ្វើឡើងនៅក្នុងទីក្រុង Abudabi នៃប្រទេសអារ៉ាប់រួម នៅថ្ងៃទី5 ខែមិថុនា ឆ្នាំ2021 ខាងមុខ។

គួរឱ្យដឹងដែរថា កាលពីចុងឆ្នាំ2020 កន្លងទៅ Manny Pacquiao បានប្រកាសស្វែងរកដៃគូប្រកួត ក្រោយពីទំនេរដៃ មិនបានឡើងសង្វៀនជិត 2ឆ្នាំ ដោយដាក់លក្ខខណ្ឌថា នឹងប្រកួតតែជាមួយនឹងកីឡាកររូបណាដែលមិនធ្លាប់ចាញ់សោះតែប៉ុណ្ណោះ៕

April 7, 2021

Real Madrid ត្រៀមលុយជាង $140លាន ដើម្បីចរចា យក Mbappe ពី PSG

ក្លិបបាល់ទាត់ Real Madrid បានបង្ហាញចំណាប់អារម្មណ៍យ៉ាងខ្លាំង ក្នុងការនាំយកកីឡាករខ្សែប្រយុទ្ធសញ្ជាតិបារាំង Kylian Mbappe ដោយប្រាថ្នាថា នឹងយកកីឡាកររូបនេះឱ្យទាល់តែបាន ដល់ដង្ហើមចុងក្រោយរបស់ក្លិប ។

ដើម្បីជាក្តីសង្ឃឹមក្នុងការនាំយកកីឡាករសញ្ជាតិបារាំងវ័យ 21ឆ្នាំខាងលើ Real Madrid បានរៀបចំបញ្ជីឈ្មោះកីឡាករដែលត្រូវលក់ចេញនាចុងរដូវកាលនេះ ដោយមានរហូតដល់ទៅ 9នាក់ឯណោះ ដែលភាគច្រើនជាកីឡាករដែលកំពុងតែដាក់ឱ្យក្លិបផ្សេងៗខ្ចីជើង។

ចំណូលពីការលក់កីឡាករទាំង 9រូបនោះ ត្រូវបាន Real Madried ប៉ាន់ប្រមាណថា នឹងបានប្រាក់ប្រមាណជាង 140លានដុល្លារ ដែលល្មមនឹងមានទឹកមាត់ពេញ ដើម្បីចរចាទិញ Mbappe ដែលមានតម្លៃផ្តាច់កុងត្រាប្រមាណជាង 130លានដុល្លារ៕

April 7, 2021

អ្នកចាត់ការ ManCity ៖ Haaland មិនស័ក្តិសមនឹង ManCity ឡើយ

អ្នកចាត់ការក្រុម Manchester City លោក Guardiola បានប្រកាសរួចហើយថា ខ្លួនមិនត្រូវការខ្សែប្រយុទ្ធដែលកំពុងតែលេចធ្លោរបស់ពិភពលោក Erling Haaland របស់ក្លិប Borussia Dortmund ឡើយ សម្រាប់រដូវកាលនេះ និងរដូវកាលក្រោយ។

លោក Pep បាននិយាយច្បាស់ថា ក្រុមការងារកំពុងស្វែងរកខ្សែប្រយុទ្ធល្អម្នាក់ មកជំនួសតំណែងរបស់ Sergio Aguero ដែលនឹងចាកចេញទៅនៅពេលចប់រដូវកាលនេះមែន តែម្នាក់នោះ ក៏ទំនងជាមិនមានតម្លៃខ្លួនខ្ពស់ដល់ទៅជាង 100លានផោននោះដែរ។ លោកថា Haaland ទោះជាខ្សែប្រយុទ្ធវ័យក្មេង និងមានសមត្ថភាពម្នាក់ក៏ពិតមែន ប៉ុន្តែបើដាក់តម្លៃដល់ទៅ 154លានផោននោះ វាហាក់ដូចជាថ្លៃពេកហើយ។

គួរឱ្យដឹងដែរថា ក្លិបបាល់ទាត់ ManCity កំពុងតែរកខ្សែប្រយុទ្ធម្នាក់មកជំនួសកន្លែង Sergio Aguero ដែលនឹងចាកចេញនាពេលបញ្ចប់រដូវកាលនេះ ដោយសារតែចរចាមិនត្រូវរ៉ូវគ្នា នឹងប្រាក់ថ្លៃឈ្នួល និងរយៈពេលនៃកុងត្រាថ្មីរបស់គេ៕

April 7, 2021

Xiaomi វ៉ាឈ្នះ Huawei ក្លាយជាក្រុមហ៊ុនផលិតស្មាតហ្វូនធំជាងគេនៅចិន

កាលពីពេលពេលថ្មីៗនេះ សារព័ត៌មានក្នុងស្រុកចិន បានបញ្ចេញរបាយការណ៍ថ្មីចុងក្រោយបង្អស់ ដែលយោងតាម Counterpoint បានបង្ហាញថា ចំណែកទីផ្សារភាគហ៊ុនទូរស័ព្ទទូទាំងពិភពលោករបស់ក្រុមហ៊ុន Xiaomi បានហក់ឡើងខ្ពស់ដល់ទៅ 12% បានក្លាយជាក្រុមហ៊ុនផលិតស្មាតហ្វូន ធំជាងគេនៅចិន និងជាប់លេខ3 លើពិភពលោក លក់ចេញបានជាង 4.4លានគ្រឿង គិតត្រឹមដំណាច់ខែកុម្ភៈ ឆ្នាំ2021។ កាលពីខែមករា ដើមឆ្នាំ2021 តំណែងលេខ1 នេះ បានធ្លាក់លើដៃ OPPO ឯណោះទេ។

ក្នុងទីផ្សារពិភពលោក Huawei ធ្លាក់ចុះ 4% ចំណែកឯ OPPO ឈរនៅទី4 មានចំណែកទីផ្សារភាគហ៊ុនពិភពលោក 12% និង vivo ជាប់ចំណាត់ថ្នាក់ទី5 ជាមួយចំណែកទីផ្សារភាគហ៊ុន 10% ។ ដោយឡែកSamsung ឈរនៅលំដាប់កំពូល ជាក្រុមហ៊ុនផលិតទូរស័ព្ទចល័តធំជាងគេបំផុតនៅលើពិភពលោក មានចំណែកទីផ្សារភាគហ៊ុន 20% និង Apple ជាប់ចំណាត់ថ្នាក់ទី2 ចំណែកទីផ្សារភាគហ៊ុន 17%។

សូមជម្រាបជូនដែរថា តំណែងលេខ1 នេះធ្លាប់ត្រូវបានគ្រប់គ្រងដោយក្រុមហ៊ុនបច្ចេកវិទ្យា Huawei អស់ជាច្រើនឆ្នាំមកហើយ តែយ៉ាងណាមិញ គេបានសង្កេតឃើញថា ចាប់តាំង Huawei ត្រូវបានហាមឃាត់ មិនឱ្យនាំយកផលិតផលទៅលក់ក្នុងទីផ្សារអាមេរិកមក បានធ្វើឱ្យក្រុមហ៊ុនមួយនេះបាត់បង់ទីផ្សារមួយចំណែកដ៏ធំ៕

April 7, 2021

LG បញ្ជាក់ច្បាស់ហើយថា ពិតជាដើរចេញមែន ចាប់ពីថ្ងៃទី31 ខែកក្កដា 2021 តទៅ!

បន្ទាប់ពីមានការសម្រេចចិត្តចុងក្រោយដោយក្រុមប្រឹក្សាភិបាលរបស់ខ្លួន ដែលសារព័ត៌មានអន្តរជាតិនានា បានចុះផ្សាយព្រោងព្រាត កាលពីម្សិលមិញ បានបញ្ជាក់ជាផ្លូវការថា ក្រុមហ៊ុន LG នឹងចាកចេញពីអាជីវកម្មផលិតស្មាតហ្វូន របស់ប្រទេសកូរ៉េខាងត្បូង ពិតប្រាកដមែនហើយ។

LG បានបញ្ជាក់ថា ការសម្រេចចិត្តចាកចេញនេះ នឹងធ្វើឡើងចាប់ពីថ្ងៃទី31 ខែកក្កដា ឆ្នាំ2021។ ដូច្នេះយើងនឹងលែងឃើញមានទូរស័ព្ទឆ្លាតវៃ ស៊េរីថ្មីៗផលិតក្រោមម៉ាក LG ទៀតហើយ។

យ៉ាងណាមិញ ក្រុមហ៊ុន LG នឹងផ្ដោតទៅលើធនធានរបស់ខ្លួនដែលមានស្រាប់ ហើយនឹងបន្ដអាជីវកម្មរបស់ខ្លួនផ្សេងទៀត គឺនៅក្នុងវិស័យគ្រឿងបន្លាស់រថយន្តអគ្គិសនី, ឧបករណ៍IoT (ឧបករណ៍វៃឆ្លាតដោយប្រើអ៊ីនធឺណិត), ឧបករណ៍ទំនើបសម្រាប់ផ្ទះវៃឆ្លាត, មនុស្សយន្ត, បច្ចេកវិទ្យា AI និងផ្នែកប្រឹក្សាដោះស្រាយអាជីវកម្មវិញម្ដង។ ក្រៅពីនេះ LG ក៏នឹងបន្ដខិតខំស្រាវជ្រាវផ្នែកបណ្ដាញទំនាក់ទំនង 6G ផងដែរ៕

April 7, 2021

លោក Trump ធ្លាក់300ថ្នាក់ នៅក្នុងបញ្ជីចំណាត់ថ្នាក់មហាសេដ្ឋីរបស់ Forbes ខណៈពិភពលោកមានមហាសេដ្ឋីថ្មីជាង600នាក់ក្នុងឆ្នាំ2021

ក្រោយការឡើងដឹកនាំប្រទេសអាមេរិក ទ្រព្យសម្បត្តិរបស់អតីតប្រធានាធិបតី Donald Trump បានថយចុះពី 3.5ពាន់លានដុល្លារ មកនៅត្រឹម 2.4ពាន់លានដុល្លារ ហើយបច្ចុប្បន្ន លោក Trump ស្ថិតនៅលេខរៀងទី 1,299 នៅក្នុងបញ្ជីចំណាត់ថ្នាក់មហាសេដ្ឋីរបស់ Forbes ដូច្នេះ លោកបានធ្លាក់ចុះអស់ 300ថ្នាក់ បើធៀបនឹងឆ្នាំមុន។

ថ្មីៗនេះ ទស្សនាវដ្ដីហិរញ្ញវត្ថុ Forbes របស់អាមេរិក បានប្រកាសបញ្ជីចំណាត់ថ្នាក់ប្រចាំឆ្នាំរបស់ខ្លួនស្ដីអំពីមហាសេដ្ឋីពិភពលោក ដែលកំពុងរកស៊ីក្នុងវិស័យផ្សេងៗ តាំងពីបច្ចេកវិទ្យា ហិរញ្ញវត្ថុ វិនិយោគ រហូតដល់វិស័យសម្លៀកបំពាក់ និងលក់រាយ។ល។

នៅក្នុងបញ្ជីចំណាត់ថ្នាក់របស់ឆ្នាំនេះ មានមហាសេដ្ឋីសរុបចំនួន2,755នាក់ ច្រើនជាង660នាក់ បើធៀបនឹងឆ្នាំមុន។ ក្នុងបញ្ជីចំណាត់ថ្នាក់ថ្មីនេះ មានមហាសេដ្ឋីថ្មីចំនួន493នាក់។ នៅក្នុងអំឡុងមួយឆ្នាំកន្លងទៅនេះ គិតជាមធ្យម រៀងរាល់17ម៉ោងគឺមានវត្តមានមហាសេដ្ឋីថ្មីម្នាក់។

យោងតាមតារាងចំណាត់ថ្នាក់របស់ Forbes លោក Trump ជាប់ចំណាត់ថ្នាក់ទី1,299 ដោយមានទ្រព្យ 2.4ពាន់លានដុល្លារ។ កាលពីឆ្នាំ2020 លោក Trump ស្ថិតក្នុងចំណាត់ថ្នាក់ទី1,001 នៅក្នុងបញ្ជីប្រចាំឆ្នាំមួយនេះ។

នៅក្នុងគ្រាស្បថចូលកាន់តំណែងប្រធានាធិបតីកាលពីខែមករា2017 ទ្រព្យសម្បត្តិរបស់លោក Trump បានឡើងដល់ 3.5ពាន់លានដុល្លារ។ ដូច្នេះ នៅពេលចាកចេញពីសេតវិមាន ទ្រព្យរបស់លោកបានថយចុះអស់ជិត1/3 នៃទ្រព្យសរុប។ យោងតាម Forbes ការដែលលោក Trump ត្រូវទម្លាក់ចំណាត់ថ្នាក់គឺដោយសារការតាមមិនទាន់ល្បឿននៃកំណើនរបស់ទ្រព្យរបស់មហាសេដ្ឋីផ្សេងៗ ក្នុងនោះ មូលហេតុចម្បាំងដែលនាំឱ្យមានបញ្ហានេះ នោះគឺការថយចុះនៃចំណូលដែលបានមកពីវិស័យទេសចរណ៍ ព្រោះថា ចំណូលមួយចំនួនធំរបស់លោក Trump គឺបានមកពីសណ្ឋាគារ។

យោងតាម Bloomberg ប្រាក់ចំណូលដែលបានមកពីសណ្ឋាគារនានានៅ Washington DC និង Las Vegas របស់ក្រុមហ៊ុន Trump Organization ក្នុងឆ្នាំ2020 បានថយចុះជាងពាក់កណ្ដាល បើធៀបនឹងឆ្នាំ2019។ ចំណូលផ្សេងក្រៅពីនេះ ក៏មានការថយចុះច្រើន។

យោងតាមទស្សនាវដ្ដី Forbes តម្លៃសរុបនៃទ្រព្យសុទ្ធរបស់ក្រុមមហាសេដ្ឋីពិភពលោកនាឆ្នាំ2021នេះគឺ 13.1លានលាន (13,100,000,000,000) ដុល្លារអាមេរិក កើន 5.1លានលាន (5,100,000,000,000) ដុល្លារបើធៀបនឹងឆ្នាំ2020។ សហរដ្ឋអាមេរិកនៅតែជាប្រទេសដែលមានមហាសេដ្ឋីច្រើនជាងគេបង្អស់ (724នាក់) ខណៈដែលចិនមាន 698នាក់ ឈរលំដាប់ទីពីរ។

ស្ថាបនិករបស់ Amazon លោក Jeff Bezos បន្តជាអ្នកមានជាងគេបង្អស់ក្នុងពិភពលោក នៅក្នុងរយៈពេល4ឆ្នាំជាប់ៗគ្នានេះ។ លោក Bezos មានទ្រព្យសរុបចំនួន 177ពាន់លានដុល្លារ។ ឈរលើចំណាត់ថ្នាក់លេខពីរគឺ CEO របស់ Tesla លោក Elon Musk ដោយមានទ្រព្យ 151ពាន់លានដុល្លារអាមេរិក។ នៅក្នុងចំណោមមហាសេដ្ឋីទាំង10រូបដែលមានទ្រព្យច្រើនជាងគេក្នុងពិភពលោកគឺមាន8នាក់ជាជនជាតិអាមេរិកាំង៕

ប្រភព៖ Forbes, Bloomberg
ប្រែសម្រួល៖ បុត្រា

April 7, 2021

កំលោះជនជាតិអាល្លឺម៉ង់ វ័យ18ឆ្នាំ ក្លាយជាមហាសេដ្ឋីដែលមានវ័យនៅក្មេងជាងគេបំផុតក្នុងពិភពលោក

កំលោះជនជាតិអាល្លឺម៉ង់ វ័យ18ឆ្នាំ ឈ្មោះ Kevin David Lehmann គឺជាមហាសេដ្ឋីវ័យក្មេងជាងគេបំផុតនៅក្នុងបញ្ជីចំណាត់ថ្នាក់មហាសេដ្ឋីវ័យក្មេងជាងគេក្នុងពិភពលោក ដែលទើបត្រូវបានទស្សនាវដ្ដីហិរញ្ញវត្ថុ Forbes ប្រកាសកាលពីថ្ងៃទី 6មេសា។

នៅក្នុងបញ្ជីចំណាត់ថ្នាក់ខាងលើ Kevin David Lehmann គឺជាមហាសេដ្ឋីដែលមានវ័យនៅក្មេងជាងគេបំផុត និងមានទ្រព្យ 3.3ពាន់លានដុល្លារអាមេរិក។ Kevin David Lehmann ទទួលបានមរតកជាភាគហ៊ុនចំនួន 50% ពីឪពុកខ្លួន នៅក្នុងក្រុមហ៊ុនគ្រប់គ្រងបណ្ដាញឱសថស្ថាន drogerie markt របស់អាល្លឺម៉ង់។ ជាក់ស្ដែង Kevin David Lehmann បានទទួលភាគហ៊ុននេះតាំងតែពីទើបមានអាយុ14ឆ្នាំ ពីឪពុក ឈ្មោះ Guenther ប៉ុន្តែក្នុងទម្រង់ផ្ដល់សិទ្ធិបែបផ្សេង។ នៅខែកញ្ញា 2020 ពេលមានអាយុពេញ 18ឆ្នាំ Kevin ក៏កាន់កាប់ពេញសិទ្ធិលើភាគហ៊ុនទាំងនេះ ហើយក៏មានឈ្មោះនៅក្នុងបញ្ជីចំណាត់ថ្នាក់មហាសេដ្ឋីពិភពលោក។

ក៏ប៉ុន្តែ អ្វីដែលគួរឱ្យស្ដាយនោះគឺថា មកដល់ពេលនេះ គេមិនទាន់បានស្គាល់មុខមាត់របស់កំលោះ Kevin David Lehmann នៅឡើយ ដោយសារថា សូម្បីតែ Forbes ក៏មិនបានបង្ហាញរូបថតរបស់មហាសេដ្ឋីរូបនេះដែរ។

ក្រុមហ៊ុន drogerie markt ត្រូវបានបង្កើតឡើងដោយមហាសេដ្ឋី Goetz Werner កាលពីឆ្នាំ 1973 និងមានឱសថស្ថានដំបូងនៅតំបន់ Karlsruhe ប្រទេសអាល្លឺម៉ង់។ ក្រោយដំណើរការបានមួយឆ្នាំ លោក Guenther Lehmann ដែលកាលណោះកំពុងគ្រប់គ្រងបណ្ដាញហាងលក់គ្រឿងទេស Pfannkuch របស់គ្រួសារ ក៏បានវិនិយោគទៅលើ drogerie markt ហើយក៏មានភាគហ៊ុន 50% នៅក្នុងបណ្ដាញឱសថស្ថាននេះ។

បច្ចុប្បន្ន drogerie markt គឺជាឱសថស្ថានដែលមានកេរ្ដិ៍ឈ្មោះល្អ និងលេចធ្លោជាងគេមួយនៅប្រទេសអាល្លឺម៉ង់។ ដោយមានបុគ្គលិក 50,000នាក់ និងហាងចំនួន 2,900កន្លែង នៅក្នុងប្រទេសចំនួន12 drogerie markt ត្រូវបានកំណត់តម្លៃប្រមាណ 6.5ពាន់លានដុល្លារអាមេរិក និងរកបានចំណូលរហូតដល់ 12ពាន់លានដុល្លារជារៀងរាល់ឆ្នាំ៕

April 7, 2021

មហាសេដ្ឋី 10រូប ដែលមានវ័យនៅក្មេងជាងគេបំផុតក្នុងពិភពលោក

កាលពីដើមសប្ដាហ៍នេះ ទស្សនាវដ្ដី Forbes បានបញ្ចេញតារាងចំណាត់ថ្នាក់ស្ដីអំពីមហាសេដ្ឋីពិភពលោកចំនួន 2,674នាក់ ក្នុងនោះ គេឃើញមានមហាសេដ្ឋី10រូប ដែលមានវ័យនៅក្មេងជាងគេបំផុតក្នុងពិភពលោក ដោយរាប់ចាប់ពីអាយុ 18 ដល់ 29ឆ្នាំ។

Kevin David Lehmann

អាយុ៖ 18ឆ្នាំ
ទ្រព្យ៖ 3.3ពាន់លានដុល្លារ
ប្រភពទ្រព្យ៖ ជំនួញផ្នែកឱសថ
សញ្ជាតិ៖ អាល្លឺម៉ង់

Wang Zelong

អាយុ៖ 24ឆ្នាំ
ទ្រព្យ៖ 1.5ពាន់លានដុល្លារ
ប្រភពទ្រព្យ៖ ផលិតធាតុគីមី
សញ្ជាតិ៖ ចិន

3. Alexandra Andresen

Alexandra Andresen (ឆ្វេង) និង Katharina Andresen

អាយុ៖ 24ឆ្នាំ
ទ្រព្យ៖ 1.4ពាន់លានដុល្លារ
ប្រភពទ្រព្យ៖ ក្រុមហ៊ុនវិនិយោគ
សញ្ជាតិ៖ ន័រវែស

4. Katharina Andresen

អាយុ៖ 25ឆ្នាំ
ទ្រព្យ៖ 1.4ពាន់លានដុល្លារ
ប្រភពទ្រព្យ៖ ក្រុមហ៊ុនវិនិយោគ
សញ្ជាតិ៖ ន័រវែស

5. Austin Russell

អាយុ៖ 25ឆ្នាំ
ទ្រព្យ៖ 2.4ពាន់លានដុល្លារ
ប្រភពទ្រព្យ៖ បច្ចេកវិទ្យារថយន្ត
សញ្ញាតិ៖ អាមេរិកាំង

6. Gustav Magnar Witzoe

អាយុ៖ 27ឆ្នាំ
ទ្រព្យ៖ 4.4ពាន់លានដុល្លារ
ប្រភពទ្រព្យ៖ ជលផល
សញ្ជាតិ៖ ន័រវែស

7. Andy Fang

អាយុ៖ 28ឆ្នាំ
ទ្រព្យ៖ 2ពាន់លានដុល្លារ
ប្រភពទ្រព្យ៖ សេវាប្រគល់អាហារ
សញ្ជាតិ៖ អាមេរិកាំង

8. Stanley Tang

អាយុ៖ 28ឆ្នាំ
ទ្រព្យ៖ 2ពាន់លានដុល្លារ
ប្រភពទ្រព្យ៖ ជំនួញផ្នែកឱសថ
សញ្ជាតិ៖ អាមេរិកាំង

9. Sam Bankman-Fried

អាយុ៖ 29ឆ្នាំ
ទ្រព្យ៖ 8.7ពាន់លានដុល្លារ
ប្រភពទ្រព្យ៖ ជួញដូររូបិយវត្ថុឌីជីថល
សញ្ជាតិ៖ អាមេរិកាំង

10. Jonathan Kwok

អាយុ៖ 29ឆ្នាំ
ទ្រព្យ៖ 2.4ពាន់លានដុល្លារ
ប្រភពទ្រព្យ៖ អចលនទ្រព្យ
សញ្ជាតិ៖ ចិន

ប្រភព៖ Forbes
ប្រែសម្រួល៖ បុត្រា

April 7, 2021

តម្លៃមូលធនទីផ្សារនៃរូបិយវត្ថុអេឡិចត្រូនិក នៅទូទាំងពិភពលោក កើនឡើងដល់ 2,000,000,000,000ដុល្លារអាមេរិក

ការឡើងថ្លៃនៃប្រាក់អេឡិចត្រូនិក/ឌីជីថល (cryptocurrency) ដែលនាំមុខដោយ Bitcoin បានអូសបន្លាយជាច្រើនខែកន្លងមក ហើយពួកវាក៏បានទាក់ទាញចំណាប់អារម្មណ៍របស់អ្នកវិនិយោគឯកជន និងក្រុមហ៊ុនធំៗជាច្រើនផងដែរ។

លទ្ធផលនៃការសិក្សាស្រាវជ្រាវរបស់ក្រុមហ៊ុន CoinGecko និង Blockfolio បានបង្ហាញថា បច្ចុប្បន្ន មូលធនទីផ្សារនៃរូបិយវត្ថុអេឡិចត្រូនិកទូទាំងពិភពលោក បានកើនឡើងដល់ 2លានលាន (2,000,000,000,000) ដុល្លារអាមេរិក (ស្មើនឹង 8,086,905,117,150,951រៀល) ដែលជាតម្លៃខ្ពស់បំផុតក្នុងប្រវត្តិសាស្ត្រ។

ក្នុងចំណោមរូបិយវត្ថុអេឡិចត្រូនិកទាំងអស់ គេឃើញថា Bitcoin កំពុងតែនាំមុខគេ និងត្រូវបានប្រើប្រាស់ច្រើនបំផុត។ តម្លៃមូលធនទីផ្សាររបស់ Bitcoin ក៏បង្កើតបានកំណត់ត្រាថ្មី ដោយបានរក្សាត្រឹម 1លានលានដុល្លារអាមេរិកពេញមួយសប្ដាហ៍កន្លងទៅ។ បច្ចុប្បន្ន ប្រាក់នេះត្រូវបានជួញដូរក្នុងរង្វង់តម្លៃ 59,000ដុល្លារអាមេរិក/bitcoin។

ចាប់ពីពេលតម្លៃកើនដល់ 61,000ដុល្លារ Bitcoin ក៏ត្រូវជួញដូរក្នុងកម្រិតតូចចង្អៀត។ ក្រុមអ្នកវិភាគនិយាយថា ឱ្យតែ Bitcoin រក្សាបានតម្លៃលើ 53,000ដុល្លារ/bitcoin នោះប្រាក់នេះនឹងរក្សាបានមូលធនទីផ្សាររបស់ខ្លួន ត្រឹម 1លានលានដុល្លារអេមេរិក។

អំពី Ethereum ដែលជារូបិយវត្ថុអេឡិចត្រូនិកមានមូលធនទីផ្សារធំជាងគេលំដាប់ទីពីរ បច្ចុប្បន្នត្រូវបានជួញដូរក្នុងរង្វង់ 2,100ដុល្លារ/ethereum។ មូលធនទីផ្សាររបស់ប្រាក់នេះ បច្ចុប្បន្នកើនដល់ 244ពាន់លានដុល្លារអាមេរិក។

នៅក្នុងឆ្នាំនេះ Bitcoin បានឡើងថ្លៃជាង 100% ចំណែក Ethereum វិញ ឡើងថ្លៃជិត 190%។ មូលហេតុចម្បងដែលនាំឱ្យតម្លៃរបស់រូបិយវត្ថុទាំងនេះឡើងថ្លៃខ្ពស់គឺដោយសារក្រុមហ៊ុនធំៗ មានដូចជា Tesla និង BNY Mellon ជាដើម បានបង្កើនការវិនិយោគទៅក្នុងវិស័យប្រាក់អេឡិចត្រូនិកទាំងនេះ៕

ប្រភព៖ Reuters
ប្រែសម្រួល៖ បុត្រា

April 6, 2021

Son ទាមទារថ្លៃឈ្នួល 1អាទិត្យ 20ម៉ឺនដុល្លារ ទើបបន្តកុងត្រាថ្មី នៅ Spur

កីឡាករខ្សែប្រយុទ្ធលេខ1 របស់អាស៊ី ជនជាតិកូរ៉េខាងត្បូង Son Heung-Min នឹងផុតកុងត្រាជាមួយក្លិបបាល់ទាត់ Tottenham Hotspur នាចុងរដូវកាល2022 ខាងមុខនេះហើយ ដោយនៅមិនទាន់មានតម្រុយក្នុងការបន្តកុងត្រាជាថ្មីឡើយ ដោយសារតែមានបញ្ហារបួស។

យោងតាម Football Insider បានឱ្យដឹងថា ក្លិបយក្សនៅអាល្លឺម៉ង់ គឺ Bayern បានរៀបចំដាក់សំណើកុងត្រារយៈពេល 5ឆ្នាំទៅឱ្យ Son ខណៈតម្លៃខ្លួន អាស្រ័យលើ Spurs ថា តើចង់បានប៉ុន្មាន?។ Son វ័យ 28ឆ្នាំ ធ្លាប់មានបទពិសោធលេងនៅអាល្លឺម៉ង់ជាមួយក្លិប Hamburg និង Bayer Leverkusen មុនពេលផ្លាស់ទៅអង់គ្លេស នៅឆ្នាំ2015។

គួរឱ្យដឹងដែរថា កុងត្រាថ្មីរបស់ Son Heung-Min ត្រូវបានគេដឹងថា ភ្នាក់ងារចាត់ចែងកីឡាកររូបនេះ បានទាមទារតម្លៃ 20ម៉ឺនដុល្លារ ក្នុង 1សប្តាហ៍ ហើយសំណើនេះត្រូវបាន Tottenham Hotspur ពន្យារពេលចរចា មកទល់នឹងពេលនេះ៕

Soccer Football – Audi Cup – Final – Tottenham Hotspur v Bayern Munich – Allianz Arena, Munich, Germany – July 31, 2019 Tottenham’s Son Heung-Min in action REUTERS/Michael Dalder

April 5, 2021

Category: សង្គម និងសេដ្ឋកិច្ច