សង្គម និងសេដ្ឋកិច្ច - La Reine Media

អាមេរិកបញ្ចេញវីដេអូដ៏រន្ធត់ បង្ហាញពីកុមារអាយុ2ឆ្នាំ ត្រូវបានទាញចូលម៉ាស៊ីនរត់ហាត់ប្រាណ និងណែនាំឱ្យឈប់ប្រើឧបករណ៍នេះ ប៉ុន្តែក្រុមហ៊ុនបានច្រានចោល

ស្ថាប័នគ្រប់គ្រងសុវត្ថិភាពផលិតផលប្រើប្រាស់របស់សហរដ្ឋអាមេរិក (CPSC) បានព្រមាន និងណែនាំឱ្យឈប់ប្រើប្រាស់ម៉ាស៊ីនរត់ហាត់ប្រាណ សម្រាប់គ្រួសារណាដែលមានកូនតូច បន្ទាប់ពីមានករណីកុមារាអាយុ 2ឆ្នាំម្នាក់ ត្រូវបានម៉ាស៊ីននេះទាញចូលទៅខាងក្រោម។

CPSC បានបញ្ចេញវីដេអូមួយដ៏គួរឱ្យរន្ធត់ បង្ហាញអំពីករណីកុមារាម្នាក់ដែលមានអាយុ2ឆ្នាំ ត្រូវបានអូសចូលក្រោមម៉ាស៊ីនរត់ហាត់ប្រាណរបស់ក្រុមហ៊ុន Peloton។ ក្នុងពេលកំពុងលេង គ្រាប់បាល់ក៏បានជាប់នៅក្រោមឧបករណ៍រត់ហាត់ប្រាណ។ កុមារនេះក៏បានឱបបាល់ ហើយក៏ត្រូវទាញចូលទៅជាប់នឹងម៉ាស៊ីន។

សំណាងល្អ កុមាររូបនេះបានរួចផុតពីការទាញរបស់ម៉ាស៊ីនរត់ហាត់ប្រាណដែលមានតម្លៃជាង 4,000ដុល្លារអាមេរិក ដោយមិនមានរបួសធ្ងន់ធ្ងរ។

ស្ថាប័នគ្រប់គ្រងសុវត្ថិភាពផលិតផលប្រើប្រាស់របស់សហរដ្ឋអាមេរិក (CPSC) បានព្រមាន និងណែនាំឱ្យឈប់ប្រើប្រាស់ម៉ាស៊ីនរត់ហាត់ប្រាណ សម្រាប់គ្រួសារណាដែលមានកូនតូច និងសត្វចិញ្ចឹម ដើម្បីចៀសវាងបញ្ហាសុវត្ថិភាពដូច្នេះគ្នានេះកើតឡើង។ CPSC កន្លងមក ក៏បានទទួលរបាយការណ៍ចំនួន 39ករណី ទាក់ទងនឹងបញ្ហាម៉ាស៊ីនរត់ហាត់ប្រាណរបស់ក្រុមហ៊ុន Peloton ក្នុងនោះមានករណីស្លាប់កុមារម្នាក់ផងដែរ។

CPSC «ជឿថា Peloton អាចបង្កហានិភ័យធ្ងន់ធ្ងរដល់ក្មេងតូចៗ ដូចជាបង្ករបួសស្នាម បាក់ឆ្អឹង និងស្លាប់»។ ក៏ប៉ុន្តែ Peloton បានច្រានចោលការព្រមានរបស់ CPSC និងបាននិយាយថា ការចោទប្រកាន់នោះ «មិនមានភាមត្រឹមត្រូវ និងបង្កការយល់ច្រឡំ»។

ក្រុមហ៊ុន Peloton បញ្ជាក់ថា៖ «មិនមានមូលហេតុណាមួយដើម្បីឈប់ប្រើប្រាស់ម៉ាស៊ីនរត់ហាត់ប្រាណរបស់ក្រុមហ៊ុន បើសិនជាអតិថិជន ធ្វើតាមការណែនាំផ្នែកសុវត្ថិភាព។ ក្មេងអាយុក្រោម16ឆ្នាំ មិនត្រូវប្រើប្រាស់ម៉ាស៊ីនរត់ហាត់ប្រាណ និងមិនត្រូវឱ្យក្មេងតូច ឬសត្វចិញ្ចឹម លេងក្បែរម៉ាស៊ីន»៕

ប្រភព៖ CNET, CPSC
ប្រែសម្រួល៖ បុត្រា

April 20, 2021

សាច់ស្អាត សុខភាពល្អ គ្រប់ឥរិយាបថនៅក្នុងផ្ទះ

ពេលនៅក្នុងបន្ទប់ទឹក

ត្រាំទឹកក្តៅឧណ្ហៗ : ត្រាំខ្លួន នៅក្នុងទឹកក្តៅឧណ្ហៗ ដែលមានសីតុណ្ហភាពប្រមាណជា 32-37អង្សា បន្តក់ទឹកប្រេងក្រអូបក្លិន រ៉ូសមែរី ឬក្លិនមីនត៏ ដើម្បីបង្កើនការហូរវិលរបស់លោហិត ព្រោះក្លិនរ៉ូសមែរី នឹងជួយជំរុញរន្ធរោមឱ្យបណ្តេញវត្ថុកខ្វក់ចេញមកក្រៅ។ ត្រាំខ្លួន ប្រមាណជា 20នាទី នឹងជួយសម្រួលស្បែក ដែលហត់នឿយ ឬទ្រុឌទ្រោម ឱ្យល្អស្រស់ថ្លាឡើងវិញ។

ដុសខាត់ស្បែក : ក្រៅពីធ្វើការសម្អាតស្បែកយ៉ាងហ្មត់ចត់ហើយ បើចង់បង្អួតស្បែកល្អនោះ ត្រូវតែកម្ចាត់កោសិកាស្បែកចាស់ចោលជាមុនសិន ដោយផ្លែប៉េងប៉ោះ គឺជាតួឯក នៃការមានស្បែកស្អាត សុខភាពល្អ។ យកប៉េងប៉ោះ 2ផ្លែ មកខ្វេះយកគ្រាប់ចេញ រួចកិនឱ្យល្អិត ហើយបន្ថែមម្សៅសាលីម៉ដ្ឋចូលទៅ រួចយកមកខាត់ស្បែក ជារង្វង់មូលឱ្យសព្វ រួចទុកចោល 5-10នាទី សាច់ប៉េងប៉ោះនឹងជួយព្យាបាលស្បែកដែលខូចខាត ហើយពណ៌របស់វានឹងធ្វើឱ្យស្បែកឡើងស លាយផ្កាឈូកទៀតផង។

ពេលនៅក្នុងចង្ក្រានបាយ

ស្បែកដៃឡើងស្អាត មានពណ៌ស លាយផ្កាឈូក និងនៅតែស្រស់ស្អាតជានិច្ច អាស្រ័យលើការមើលថែពីខាងក្នុងរាងកាយ ដូច្នេះពេលទិញបន្លែយកមកទុកក្នុងទូទឹកកកលើកក្រោយ សូមកុំភ្លេចបន្លែខាងក្រោមនេះ៖

ស្ពៃ : ឧត្តមសម្បូរទៅដោយវិតាមីន A ៖ ការបរិភោគស្ពៃនឹងធ្វើឱ្យស្បែកស និងរាបស្មើយ៉ាងធម្មជាតិ។

គ្រាប់សណ្តែកឡាន់តៅ : សម្បូរទៅដោយវិតាមីន A ដែលនឹងធ្វើឱ្យស្បែកមុខ កាន់តែរាបម៉ដ្ឋខៃឡើង។

ដំឡូងបារាំង : មានប្រូតេអ៊ីន និងវិតាមីនC អាចកាត់បន្ថយកូលេស្តេរ៉ូល និងខ្លាញ់នៅក្រោមស្បែកបាន និងជួយឱ្យស្បែកស្រស់ភ្លឺថ្លា។

មើមការ៉ុត : ផ្តល់ប្រយោជន៏ដល់ស្បែកយ៉ាងល្អ សម្បូរទៅដោយសារធាតុភែកទីន ដែលជួយកម្ចាត់សារធាតុពុលចេញពីរាងកាយ និងធ្វើឱ្យស្បែកមើលទៅរាបម៉ដ្ឋខៃពណ៌ផ្កាឈូកខ្ចី។

សណ្តែកបណ្តុះ : អាចការពារការកើតស្នាមជាំ អាចម៏រុយ និងជួយឱ្យស្បែកស្រស់ថ្លាឡើង។

ត្រសក់ : មានសារជាតិអាស៊ីត អាមីណូ ដែលជួយលុបបំបាត់ស្នាមជាំអុចខ្មៅ ធ្វើឱ្យស្បែកឡើងស ភ្លឺរលោង និងកាត់បន្ថយអាការប្រតិកម្មរបស់ស្បែកបាន។

ពេលនៅក្នុងបន្ទប់ទទួលភ្ញៀវ

ការហាត់ប្រាណជាប់ជាប្រចាំ មិនត្រឹមតែជួយឱ្យមានសុខភាពល្អប៉ុណ្ណោះទេ តែនៅបានជួយឱ្យឈាមរត់បានល្អ និងជួយបណ្តេញជាតិពុលចេញមកតាមរយៈញើសទៀតផង។ ការហាត់ប្រាណត្រឹមតែ 20នាទីនៅថ្ងៃធម្មតា និង 60នាទីនៅថ្ងៃឈប់សម្រាក ដោយធ្វើការហាត់ប្រាណ ឬធ្វើលំហាត់លើអវយវៈណាមួយក៏បាន ឱ្យអត្រាការលោតរបស់បេះដូងកើនឡើង 40-60% រួចសឹមបន្ថែមឡើងសន្សឹមៗ តាមភាពរឹងមាំរបស់រាងកាយ។

ពេលនៅក្នុងបន្ទប់គេង

បំប៉នឱ្យពេញទំហឹង គេងឱ្យបានឆ្អែត…គ្មានអ្វីសំខាន់ជាងការគេងឱ្យបានគ្រប់គ្រាន់នោះទេ ហើយបន្ទាប់មក គឺការជ្រើសរើសប្រើ ឡេថែបំប៉នស្បែក ដែលក្រៅពីឡេបែប វ៉ៃថេននីង(ធ្វើឱ្យសាច់ស) ហើយ គួររកមើលវិតាមីន B3 វិតាមីនC និង វិតាមីនE មកញ៉ាំផង វានឹងរឹតតែជួយឱ្យស្បែកមុខភ្លឺថ្លា និងតឹងណែនទៀតផង៕

April 19, 2021

PSG ប៉ះ ManCity ឯ Real ប៉ះ Chelsea វគ្គ 4ក្រុមចុងក្រោយ Champions League

ពានរង្វាន់ UEFA Champions League បានឈានមកដល់វគ្គពាក់កណ្តាលផ្តាច់ព្រ័ត្រហើយ ដោយរកឃើញក្រុមខ្លាំងចំនួន4 ដែលរួមមាន Paris Saint Germain, Manchester City , Real Madrid និង Chelsea ។

ក្នុងនោះដែរ ការប្រកួត វគ្គពាក់កណ្តាលផ្តាច់ព្រ័ត្រ នឹងធ្វើឡើងជើងទី1 នៅថ្ងៃទី27 និង28 ខែមេសា ខណៈដែលជើងទី2 នឹងធ្វើឡើងនៅថ្ងៃទី4 និងទី5 ខែឧសភា ឆ្នាំ2021។ ដោយក្រុម Paris Saint Germain ត្រូវជួបជាមួយនឹង Manchester City ឯ Real Madrid ប៉ះជាមួយនឹង Chelsea៕

April 19, 2021

Europa League វគ្គពាក់កណ្តាលផ្តាច់ព្រ័ត្រ ធ្វើឡើងនៅចុងខែនេះ

ពានរង្វាន់ដ៏ធំជាងគេបំផុតលំដាប់ទី2 របស់អឺរ៉ុប UEFA Europa League បានឈានចូលមកដល់វគ្គពាក់កណ្តាលផ្តាច់ព្រ័ត្រហើយ ក្រោយរកឃើញក្រុមចំនួន4 ដែលឡើងមកពីវគ្គ 8ក្រុមចុងក្រោយ កាលពីពេលកន្លងទៅ។

ក្នុងនោះមានក្រុមមកពីអង់គ្លេស ចំនួន2 គឺ Arsenal និង Manchester United ចំណែក 2ក្រុមទៀត មកពីអេស្ប៉ាញ (Villareal) និងអ៊ីតាលី (Roman) ។ ដោយក្នុងនោះ Villareal ត្រូវប៉ះជាមួយនឹង Arsenal

ឯ ManU ត្រូវប៉ះជាមួយនឹង Roma។

ការប្រកួតវគ្គពាក់កណ្តាលផ្តាច់ព្រ័ត្រនេះ នឹងធ្វើឡើងនៅថ្ងៃទី29 ខែមេសា ចំណែកជើងទី2 នឹងធ្វើឡើងនៅថ្ងៃទី6 ឧសភា ឆ្នាំ2021៕

April 19, 2021

លោក Perez ឈ្នះការបោះឆ្នោត ក្លាយជាប្រធានក្លិប Real Madrid ក្រោយគូប្រជែងធ្វើពហិការ

ក្លិបបាល់ទាត់ Real Madrid បានប្រកាសអំពីបេក្ខភាពប្រធានក្លិបថ្មីរបស់ខ្លួន ដោយនឹងបានទៅលើលោក Florentino Perez ក្រោយពីឈ្នះឆ្នោតដោយគ្មានគូប្រជែង។ ការឈ្នះឆ្នោតនេះ គឺដោយសារតែបេក្ខជន 1រូបទៀត ដែលជាបេក្ខភាពប្រកួតប្រជែងខ្លាំងជាមួយនឹងលោក បានដកខ្លួនពីការបោះឆ្នោត ដោយយកលេសថា ការបោះឆ្នោតនៅ Real Madrid ធ្វើឡើងដោយគ្មានភាពសុក្រឹត និងយុត្តិធម៌។

ជាមួយនឹងការឡើងកាន់តំណែងថ្មីនេះ លោកនឹងបន្តតំណែងក្នុងអាណត្តិថ្មី ពីឆ្នាំ2022 រហូតដល់ឆ្នាំ2025។ លោកបានប្រកាសថា លោកនឹងធ្វើឱ្យក្លិប រកថរិកាឱ្យបានច្រើនឡើងវិញ នៅអាណត្តិក្រោយ បន្ទាប់ពីកូវីដ-19 រលាយបាត់ទៅ។

គួរឱ្យដឹងថា លោក Florentino Perez ធ្លាប់កាន់តំណែងជាប្រធានក្លិបនេះ ពីឆ្នាំ2000 ដល់2006 និងពីឆ្នាំ2009 មកទល់នឹងបច្ចុប្បន្ន ពោលគឺ អស់រយៈពេលសរុប 18ឆ្នាំមកហើយ ខណៈដែលពេលនេះ លោកមានវ័យ 74ឆ្នាំទៅហើយ៕

April 19, 2021

Bezema បន្តនៅ Real Madrid 2ឆ្នាំទៀត

ក្លិបបាល់ទាត់ស្តេចស Real Madrid បានប្រកាសកាលពីពេលកន្លងទៅថា ក្លិបបានបន្តកុងត្រាថ្មីរួចរាល់ហើយ ជាមួយនឹងខ្សែប្រយុទ្ធកំពូលរបស់ខ្លួនក្នុងពេលបច្ចុប្បន្ន Karim Benzema ឱ្យបន្តដំណើរជាមួយនឹងក្លិបរបស់ខ្លួន។

ដោយសារតែការបង្ហាញខ្លួនបានល្អ និងការស៊ុតបានច្រើនជាងគេនៅក្នុងរដូវកាលនេះ និងបានជួយឱ្យក្លិប បានឡើងឈរលេខ2 ប្រជែងជើងឯក La Liga ក្នុងរដូវកាលនេះ។ ក្លិប Real Madrid បានបន្តកុងត្រាថ្មីជាមួយកីឡាកររូបនេះ រហូតដល់ចុងឆ្នាំ2023។

នេះ មានន័យថា កីឡាករសញ្ជាតិបារាំង វ័យ 33ឆ្នាំរូបនេះ នឹងបន្តជាមួយ Real Madrid រហូតដល់វ័យ 35ឆ្នាំ។ គួរបញ្ជាក់ផងដែរថា គិតមកទល់ពេលនេះ គេរកបាន 188គ្រាប់ ក្នុងការបង្ហាញខ្លួនបាន 375ប្រកួត តាំងពីឆ្នាំ2009 មក៕

April 19, 2021

វិធីថែទាំបបូរមាត់ ឱ្យមានពណ៌ស្អាត ក្រហមស្រស់ និងមើលទៅមានសុខភាពល្អ

1.ទឹកដោះគោត្រជាក់ៗ ជាមួយម្សៅរមៀត

នារីៗយើង អាចប្តូរពីបបូរមាត់ពណ៌ស្រគាំខ្មៅ ឱ្យមានពណ៌ស្រស់ថ្លាឡើងបាន ដោយការប្រើម្សៅមើមរមៀត 1ស្លាបព្រាកាហ្វេ លាយជាមួយនឹងទឹកដោះគោ ដែលក្លាស្សេត្រជាក់បន្តិច ល្មមតែលាយចូលគ្នាហើយ ក្លាយជាម្សៅឃ្រីមខាប់ៗ រួចយកមកលាបបំពោកលើបបូរមាត់ទុកចោលរយៈពេល 5នាទី ហើយសឹមលាងចេញថ្នមៗដោយទឹកស្អាត។ ធ្វើបែបនេះឱ្យបានរៀងរាល់ថ្ងៃ រយ:ពេល 2សប្តាហ៍ អ្នកនឹងសង្កេតឃើញថា បបូរមាត់របស់អ្នកនឹងឡើងពណ៌ក្រហមព្រឿងៗស្រស់ស្អាតមិនខាន។

2.ម៉យស៍ជើរ៉ៃហ្សើរ៍ (Moisturiser)

បបូរមាត់ ក៏មិនខុសពីស្បែក ដែលត្រូវតែមើលថែបំប៉នឱ្យស្រស់ថ្លាជាប់ជានិច្ចដែរ មិនថាតែប្រើឡេ វ៉ាសឺលីន ឬក្រែមលាបបបូរមាត់នោះទេ គឺសុទ្ធតែជាការថែបំប៉នដ៏ល្អទាំងអស់។ បបូរមាត់ដែលស្រស់ថ្លាមានសំណើមល្អ នឹងមិនបែកប្រេះ មិនស្ងួតក្រៀម មិនមើលទៅឃើញស្រគាំខ្មៅ តែនឹងមើលឃើញពណ៌ក្រហមព្រឿងៗតាមធម្មជាតិកាន់តែច្បាស់ឡើង។

3.ទឹកមើម ប៊ីធ្រូត(មើមរ៉ាឌីក្រហម)

ឧស្សាហ៍ញ៉ាំបន្លែមើម ដែលមានពណ៌ក្រហមចាស់ លាយស្វាយតិចៗ ដូចជាមើមប៊ីធ្រូត ជាដើម ពេលញ៉ាំហើយអាចធ្វើឱ្យបបូរមាត់ និងអណ្តាតឡើងក្រហមបាន។ ដូច្នេះចូរសាកល្បង យកមើមប៊ីធ្រូត មកកៀបយកតែទឹក ហើយលាបលើបបូរមាត់ មុនពេលគេង វានឹងបំពេញតួនាទីជា ក្រែមលាបមាត់ស្តើងៗ ឱ្យក្លាយទៅជាពណ៌ក្រហមស្រស់។ លុះពេលភ្ញាក់ឡើង អ្នកនឹងបានឃើញថា បបូរមាត់របស់អ្នកមានពណ៌ក្រហមស្រស់ស្អាតមែនទែន ។

4.ស្រទាប់ផ្កាកុលាប កិនឱ្យម្ម៉ដ

ផ្កាកុលាបមិនមែនល្អ ត្រឹមតែមានក្លិនក្រអូបប៉ុណ្ណោះទេ អ្នកអាចបេះយកស្រទាប់ផ្កាកុលាប មកកិនឱ្យម៉ដ្ឋរហូតក្លាយជាល្បាយខាប់ៗ រួចយកមកលាបលើបបូរមាត់ នោះអ្នកនឹងបានបបូរមាត់ពណ៌ក្រហមស្រស់ ដូចពណ៌ផ្កាកុលាបមិនខាន ។

5.ច្រាសដុសធ្មេញ ដែលមានសរសៃទន់ៗ

ប្រើច្រាសដុសធ្មេញដែលមានសរសៃទន់ៗ ជ្រលក់ទឹកក្តៅឧណ្ហៗ មកដុសខាត់បបូរមាត់របស់អ្នកថ្នមៗ ដើម្បីឱ្យស្បែកបបូរមាត់ផ្នែកខាងក្រៅ ដែលស្ងួតហើយនោះរបកជ្រុះចេញ។ នេះក៏ជាវិធីមួយដែលធ្វើឱ្យបបូរមាត់របស់អ្នក នៅតែមានពណ៌ក្រហមព្រឿងៗស្អាតជានិច្ចដែរ។

6.ទឹកឃ្មុំ

ទឹកឃ្មុំ គឺជាវត្ថុធាតុដើមពីធម្មជាតិ ដែលអាចបង្កើនភាពស្រស់បស់ដល់ស្បែកបានយ៉ាងល្អបំផុត និងថែមទាំងមានឬទ្ធិអាចសម្លាប់មេរោគបានតិចៗទៀតផង។ យកទឹកឃ្មុំមកលាបស្តើងៗ លើបបូរមាត់ មុនពេលចូលគេងជាប្រចាំរៀងរាល់ថ្ងៃ។ ពេលភ្ញាក់ឡើង អ្នកនឹងបានជួបនឹងរសជាតិផ្អែមលែមៗ និងមើលឃើញថា បបូរមាត់របស់អ្នកឡើងទន់ និងមើលទៅក្រហមថ្លាព្រឿងៗ ដូចធម្មជាតិ គួរឱ្យចង់ថើបនាពេលព្រឹកព្រលឹមមែនទែន៕

April 19, 2021

ការប្រើឃ្រីមការពារកម្ដៅថ្ងៃយ៉ាងត្រឹមត្រូវ ពេលទៅកម្សាន្តនៅមាត់សមុទ្រ

ពេលយើងទៅដើរលេងកម្សាន្ត លម្ហែកាយនៅតាមមាត់សមុទ្រ ដែលចាំងចែងទៅដោយពន្លឺថ្ងៃ ដែលទោះបីជាយើងជ្រើសរើសយក ឃ្រីមការពារពន្លឺថ្ងៃបានល្អត្រឹមត្រូវហើយមែនក្ដី តែបើប្រើប្រាស់មិនបានត្រឹមត្រូវ ក៏ប្រសិទ្ធភាពរបស់ឃ្រីមការពារកម្ដៅថ្ងៃ នឹងថយចុះតាមនោះដែរ។

ថ្ងៃនេះ យើងមាន Tips ល្អៗ ក្នុងការប្រើឃ្រីមការពារពន្លឺថ្ងៃ មកជម្រាបជូន ដើម្បីកុំឱ្យដំណើរកម្សាន្តដ៏រីករាយរបស់អ្នក ក្លាយជារឿងគួរឱ្យភ័យខ្លាច ចំពោះស្បែកដ៏ស្រស់ស្អាតភ្លឺរលោងរបស់អ្នក ដូចតទៅ៖

1.ការលាបឃ្រីមការពារពន្លឺថ្ងៃ…បើចង់ឱ្យមានប្រសិទ្ធភាព ដូចដែលគេបានកំណត់នោះ ត្រូវប្រើបរិមាណឃ្រីមប្រមាណជា 1ស្លាបព្រាកាហ្វេ សម្រាប់លាបផ្ទៃមុខ និង-ក ដោយយើងសូមណែនាំ ឱ្យបែងលាបជា 2ដង។

2.លាបឃ្រីមការពារថ្ងៃ មុនពេលចេញទៅលេងនៅកណ្តាលថ្ងៃ ប្រហែលជា 15នាទី ដើម្បីឱ្យសាច់ឃ្រីមតោងស្អិតជាប់នឹងស្បែក បានល្អជាមុនសិន ហើយបើសិនជានៅកណ្តាលថ្ងៃ ក្នុងរយ:ពេលយូរផងនោះ គួរតែលាបឃ្រីមការពារថ្ងៃ បន្ថែមទៀត រៀងរាល់ 2ម៉ោងម្តង។

3.បើសិនជាត្រូវមានកិច្ចការកម្សាន្តសប្បាយៗកណ្តាលថ្ងៃជាបន្តបន្ទាប់ ដូចជាលេងល្បែងកម្សាន្តប្រជាប្រិយ លេងបាល់ក្នុងទឹក កណ្តាលថ្ងៃជាដើមនោះ គួរជ្រើសរើសប្រើឃ្រីមការពារកម្ដៅថ្ងៃ ប្រភេទការពារទឹក មិនរលាយនៅពេលត្រូវទឹកសមុទ្រ និងគួរលាបរៀងរាល់ 2ម៉ោងម្តង។

4.ត្រូវលាបឃ្រីមការពារកម្ដៅថ្ងៃ ជាប់ជាប្រចាំ ពេលនៅក្រោមពន្លឺថ្ងៃដែលក្តៅខ្លាំង។

ជាសរុបទៅ ការចៀសវាងពីកម្ដៅថ្ងៃ គឺជាការកាត់បន្ថយបញ្ហា ដែលកើតពីកម្ដៅថ្ងៃ បានយ៉ាងល្អបំផុត ក្រៅអំពីនេះ គួរការពារខ្លួនពីពន្លឺថ្ងៃ ដោយវិធីផ្សេងទៀតរួមជាមួយផង ដូចជា នៅក្នុងម្លប់ ឬបាំងឆត្រ ជាដើម ដើម្បី

ឱ្យដំណើរកម្សាន្ត នាពេលចុងសប្ដាហ៍របស់អ្នក និងក្រុមគ្រួសារ បានសុខសប្បាយ និងរីករាយដោយគ្មានក្ដីបារម្ភ៕

April 19, 2021

យានគ្មានមនុស្សបើករបស់ NASA ចុះដល់ដីពិភពផ្កាយព្រះអង្គារហើយ ត្រៀមបង្ហោះកូនយន្តហោះលើកដំបូងនៅថ្ងៃនេះ

ក្រុមការងារអវកាស NASA បានចុះផ្សាយអំពីបេសកកម្មជំហានបន្ទាប់របស់ពួកគេ គឺត្រូវបញ្ជាដ្រូន ឬ ឧទ្ធម្ភាគចក្រ ឈ្មោះថា Ingenuity ឱ្យវាដំណើការជាលើកដំបូងបង្អស់នៅលើពិភពផ្កាយព្រះអង្គារ នៅថ្ងៃនេះតែម្ដង។

បេសកកម្មចុងក្រោយបង្អស់របស់ NASA លើកនេះ ត្រូវចំណាយពេលអស់ជាង 7ខែ ទើបបានចុះចតដោយជោគជ័យ ជាមួយនឹងយានគ្មានមនុស្សបើក ឈ្មោះថា Perseverance នៅផ្ទៃពិភពក្រហម ដែលដំណើការរបស់វា ស្មុគស្មាញខ្លាំង និងថែមទាំងត្រូវមានការប្រុងប្រយ័ត្នខ្ពស់ទៀតផង។

ក្រៅពីតួយានដូចកូនឡានទូរបញ្ជា បានធ្វើការរុករក និងខួងដីពិភពផ្កាយព្រះអង្គាររួចហើយ NASA ក៏បានបង្កប់កូនយន្តហោះមួយផងដែរ ដើម្បីបង្ហោះសិក្សាបន្ថែមឱ្យកាន់តែស៊ីជម្រៅ។ តម្លៃនៃការផលិតកូនដ្រូនតូចនេះ គឺចំណាយអស់ជាង 85លានដុល្លារឯណោះ។

បើមានអ្នកចាប់អារម្មណ៍ អាចចូលទៅយូធូបផ្លូវការរបស់ NASA [ដូចបង្ហាញនៅខាងក្រោម] រួចចុចលើពាក្យ Set remember ដើម្បីឱ្យយូធូបលោតប្រាប់ ពេលចាប់ផ្តើមបង្ហោះផ្សាយផ្ទាល់៕

April 19, 2021

របាយការណ៍៖ Apple សន្សំលោហៈបាន 86ម៉ឺនតោន បន្ទាប់ពីអត់ដាក់ឆ្នាំងសាកឱ្យក្នុងប្រអប់

Apple បានបញ្ចេញរបាយការណ៍ថ្មីចុងក្រោយមួយឱ្យដឹងថា ក្រុមហ៊ុនសន្សំសារធាតុលោហៈ បានចំនួន 861,000តោន។ គោលការណ៍ការពារបរិស្ថានរបស់ Apple បានបង្ហាញច្បាស់ៗឱ្យអតិថិជនរបស់ខ្លួនបានដឹងនៅពេលបញ្ចេញលក់ iPhone 12 Series ដោយមិនដាក់ដុំសាកថ្មក្នុងប្រអប់។

របាយការណ៍បានបន្ថែមទៀតថា ការដឹកជញ្ជូនរបស់ Apple អាចដំឡើងចំនួនប្រអប់ iPhone បានដល់ទៅខ្ទង់ 70% ឯណោះក្នុង 1ជើង។ នេះក៏ដោយសារតែ ប្រអប់របស់ iPhone 12 Series មានទំហំតូច និងស្ដើងជាងមុន។

Apple ក៏បានលើកឡើងទៀតដែរថា កាលពីឆ្នាំ2020 ពួកគេបានសម្អាតឧស្ម័នកាបូនិក បានចំនួន 22.6 លានតោន។ ចំនួននេះបើប្រៀបធៀបទៅឆ្នាំ2019 ពួកគេអាចសម្អាតបានចំនួន 25.1លានតោន។

លើសពីនេះទៀត ក្រុមហ៊ុន Apple បានប្រើប្រាស់អគ្គិសនីកែច្នៃសុទ្ធ 100% សូម្បីតែ Data Centers។ Apple ក៏បានសន្យាដែរថា នឹងជួយសម្អាតឧស្ម័នកាបូនិកឱ្យកាន់តែតិចបំផុត នៅឆ្នាំ2030 ខាងមុខនេះ៕

April 19, 2021

Category: សង្គម និងសេដ្ឋកិច្ច