សង្គម និងសេដ្ឋកិច្ច - La Reine Media

Nokia X20 ចេញលក់លើទីផ្សារ តែឆ្នាំងសាកក្នុងប្រអប់ មិនមានដាក់ឱ្យ ដូច Apple ដែរ

កាលពីពេលថ្មីៗនេះក្រុមហ៊ុន HMD Global បានប្រកាសចេញផ្លូវការ នូវស្មាតហ្វូន Nokia X20 ។ អ្វីដែលគេចាប់អារម្មណ៍នោះ គឺស្ថិតនៅត្រង់ថា ឆ្នាំងសាកស្មាតហ្វូនស៊េរីចុងក្រោយរបស់ Nokia នេះ មិនមាននៅក្នុងប្រអប់ទេ។

កាលពីឆ្នាំមុន Apple បានសម្រេចដកដុំសាកថ្មនេះមុន ដោយសារដើម្បីចូលរួមថែរក្សាបរិស្ថាន។ ដោយសារតែការផលិតពួកវា ត្រូវការបញ្ចេញឧស្ម័នពុលពីរោងចក្រ។

ដូចនេះក្រុមហ៊ុន HMD Global ដែលមានកម្មសិទ្ធិគ្រប់គ្រងម៉ាក Nokia ក្នុងពេលបច្ចុប្បន្ននេះ ក៏បានចាប់ផ្ដើមដើរតាមវិធីសាស្ដ្រនេះដូចគ្នា និងបានសរសេរបញ្ជាក់ប្រាប់ឱ្យដឹងមុន នៅលើវេបសាយផ្លូវការរបស់ខ្លួនតែម្ដង។ បន្តបន្ទាប់មក គេឃើញថា មានក្រុមហ៊ុនផលិតស្មាតហ្វូនជាច្រើន បានដើរតាមវិធីនេះ ដោយលើកហេតុផលថា អ្នកទិញមុនៗ សុទ្ធតែធ្លាប់មានឆ្នាំងសាកថ្ម រួចហើយ។

សម្រាប់ស្មាតហ្វូនតម្លៃខ្ទង់ 400ដុល្លារខាងលើ នឹងដាក់លក់នៅលើទីផ្សារក្នុងតំបន់អឺរ៉ុបមុនគេ។ សម្រាប់អ្នកដែលចង់បានយកទៅប្រើប្រាស់ ទាល់តែបញ្ជាទិញឆ្នាំងសាក ពីវេបសាយក្រៅ ក្នុងតម្លៃមានច្រើនជម្រើស។ រីឯលក្ខណសម្បត្តិរបស់វា មិនជាខ្លាំងណាស់ណាទេ តែក្រុមហ៊ុនបានផ្តោតលើតួនាទីកាមេរ៉ាថតរូបឱ្យបានល្អប្រសើរជាងមុន៕

April 22, 2021

រុស្ស៊ី បង្ហើបគម្រោងស្រាវជ្រាវបន្ត នៅភពស្ថានព្រះចន្ទ នៅឆ្នាំនេះ

ប្រទេស រុស្ស៊ី ដែលបានបង្ហើបដំណឹង អំពីគម្រោងទៅស្រាវជ្រាវបន្ត នៅភពស្ថានព្រះចន្ទ តាំងពីឆ្នាំ2015 នោះ រហូតមកដល់ពេលនេះ បានក្លាយជាការពិតហើយ បន្ទាប់ពីការចុះផ្សាយដោយ Space.com កាលពី 3ថ្ងៃមុន។ បេសកកម្មនេះនឹងប្រើប្រាស់យានមួយ ឈ្មោះថា Luna 25 ដែលបានធ្វើតេស្តសាកល្បងជាច្រើនដងមកហើយ។ យាននេះ នឹងត្រូវបាញ់បង្ហោះ ក្នុងអំឡុងខែតុលា ឆ្នាំ2021 ខាងមុខនេះ។

នេះ គឺជាកំណត់ត្រាថ្មី របស់រុស្ស៊ី ដែលបានបញ្ចប់រយៈពេលរង់ចាំអស់ 45ឆ្នាំ នៃការបង្កកកម្មវិធីស្រាវជ្រាវស្ថានព្រះចន្ទ ដែលធ្លាប់បានទៅសិក្សានៅទីនោះមុនគេ ដោយអតីតសហភាពសូវៀត។ រុស្ស៊ី នឹងធ្វើការសិក្សាអំពី ទឹកដែលកំពុងកកនៅក្នុងស្រទាប់លើនៃស្ថានព្រះចន្ទ នៅរណ្តៅឯប៉ូលខាងត្បូងនៃស្ថានព្រះចន្ទ។

ថ្លែងប្រាប់គេហទំព័រ Space តាមរយៈវីដេអូសម្ភាសអនឡាញ កាលពីចុងខែមីនា លោក Lev Zelenyi ជាទីប្រឹក្សាផ្នែកវិទ្យាសាស្ត្រ នៃវិទ្យាស្ថានស្រាវជ្រាវអវកាសរុស្ស៊ី បានឱ្យដឹងថា៖ «ព្រះចន្ទ ជាចំណុចស្នូលនៃកម្មវិធីស្រាវជ្រាវរបស់យើងនៅទសវត្សរ៍បន្ទាប់ទៀត។ នេះគ្រាន់តែជាជំហានដំបូងនៃការចាប់ផ្តើមឡើងវិញប៉ុណ្ណោះ។ យើងមានផែនការស្រាវជ្រាវជាច្រើនទៅថ្ងៃអនាគត ក្នុងនោះក៏មានគម្រោងកសាងអគារស្នាក់លើស្ថានព្រះចន្ទ នៅឆ្នាំ2040 ផងដែរ»

យានដ៏ថ្មីសន្លាងនោះ មានបំពាក់ដោយលេនស៍កាមេរ៉ា ផលិតដោយអង្គភាពអវកាសអឺរ៉ុប វាអាចជួយឱ្យការសិក្សាអំពីសណ្ឋានលើស្ថានព្រះចន្ទ កាន់តែស៊ីជម្រៅជាងមុន និងជាកិច្ចសហការបើកផ្លូវដ៏រលូនមួយរវាង អឺរ៉ុប-រុស្ស៊ី ក្នុងការស្រាវជ្រាវលើស្ថានព្រះចន្ទនៅថ្ងៃអនាគតទៀតផង។

ក្រៅពីយាន Luna 25 ខាងលើ រុស្ស៊ី បានរៀបចំទុកជាស្រេចនូវយាន Luna ទី 26 27, 28 ដល់ 29 សម្រាប់ឆ្នាំបន្ទាប់ទៀត ដើម្បីស្រាវជ្រាវនៅត្រង់តំបន់មួយនៃស្ថានព្រះចន្ទ ស្ថិតនៅជិតប៉ូលខាងជើងស្ថានព្រះចន្ទ។ នៅឆ្នាំ2023 ខាងមុខ រុស្ស៊ី ក៏មានគម្រោងបញ្ជូនយាន Luna 26 ទៅសិក្សាអំពីភាពមិនប្រក្រតីនៃដែនម៉ាញេទិក និងកម្លាំងទំនាញនៅក្នុងស្ថានព្រះចន្ទ រួមទាំងផ្តិតយករូបភាពអំពីទីតាំងនានាផងដែរ។

សហភាពសូវៀត ឬសហព័ន្ធរុស្ស៊ី នាពេលបច្ចុប្បន្ន ជាមហាអំណាចផ្នែកអវកាស មានធនធានមនុស្ស និងធ្លាប់ផលិតបានគ្រាប់រ៉ុក្កែតមុនគេ តាំងពីពិភពលោកមិនទាន់ជឿនលឿន សូម្បីតែអាមេរិក ក៏ធ្លាប់ជួលកន្លែងធ្វើបេសកកម្មដែរ ដូច្នេះ ការឈានជើងចូលប្រឡូកក្នុងពិភពអវកាសសាជាថ្មីនេះ ហាក់ដូចជាមិនពិបាកទេ តែក៏មិនប្រាកដជាក់ច្បាស់ថា ជោគជ័យ 100% ដែរ។

បេសកម្មស្រដៀងគ្នានេះ ធ្លាប់មានប្រទេសថ្មីថ្មោងផ្សេងៗ រងបរាជ័យរួចមកហើយ កាលពីពេលថ្មីៗនេះដូចជា៖ ឥណ្ឌា និងអ៊ីស្រាអែល ចំណែកឯចិន ទទួលបានជោគជ័យក្នុងការបញ្ជូនយាន ទៅចុះចតនៅទីងងឹតបំផុតនៃផ្ទៃម្ខាងរបស់ស្ថានព្រះចន្ទ ព្រមទាំងកំពុងស្រាវជ្រាវនៅទីនោះ រហូតមកទល់បច្ចុប្បន្ន៕

April 22, 2021

ក្រសួងពាណិជ្ជកម្ម ប្រកាសដាក់ឱ្យប្រើប្រាស់ផ្សារអនឡាញរបស់ក្រសួងពាណិជ្ជកម្ម ក្នុងអំឡុងពេលបិទខ្ទប់ទីក្រុងភ្នំពេញ និងទីក្រុងតាខ្មៅនៃខេត្តកណ្តាល

ដើម្បីចូលរួមដោះស្រាយបញ្ហាលំបាកនានាដែលទាក់ទងនឹងការហូបចុក នៅក្នុងអំឡុងពេលបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅនៃខេត្តកណ្តាល នាថ្ងៃទី21 ខែមេសា ឆ្នាំ2021នេះ ក្រសួងពាណិជ្ជកម្ម បានចេញសេចក្តីប្រកាសមួយ ស្តីពីការដាក់ឱ្យប្រើប្រាស់ទីផ្សារអនឡាញនៃក្រសួងពាណិជ្ជកម្មផ្ទាល់ សម្រាប់ការបញ្ជាទិញគ្រឿងឧបភោគបរិភោគចាំបាច់។

ដើម្បីអាចបញ្ជាទិញទំនិញដែលបានរៀបរាប់ខាងលើពីផ្សារអនឡាញរបស់ក្រសួងពាណិជ្ជកម្ម ពលរដ្ឋត្រូវចូលទៅកាន់គេហទំព័រ https://shop.moc.gov.kh/ ឬតាមរយៈ QR code ដែលមានដូចនៅក្នុងសេចក្ដីប្រកាសរបស់ក្រសួង។ ព័ត៌មានលម្អិត សូមបន្តអានសេចក្ដីប្រកាសខាងក្រោម៖

ប្រភព៖ ក្រសួងពាណិជ្ជកម្ម
ដកស្រង់៖ បុត្រា

April 21, 2021

ស្ត្រីជនជាតិហុងកុងម្នាក់ វ័យ90ឆ្នាំ ត្រូវគេបោកតាមទូរស័ព្ទ យកប្រាក់អស់ 250លានដុល្លារ

លោកយាយម្នាក់មានវ័យ 90ឆ្នាំ នៅទីក្រុងហុងកុង ត្រូវបានជនខិលខូច បន្លំខ្លួនជាប៉ូលិសចិនដីគោក បោកប្រាស់តាមទូរស័ព្ទយកប្រាក់អស់ចំនួន 32លានដុល្លារអាមេរិក។

ពលរដ្ឋវ័យចំណាស់នៅហុងកុង កំពុងក្លាយជាគោលដៅរបស់ក្រុមជនខិលខួច ដែលបោកប្រាស់តាមទូរស័ព្ទ ដោយពួកគេសំដៅលើក្រុមមនុស្សចាស់ដែលងាយរងគ្រោះ និងជាអ្នកមានទ្រព្យច្រើន ដែលអាចមានលទ្ធភាពវេរលុយ ឬធ្វើការវិនិយោគលើគម្រោងដែលមិនមានពិត។

មន្ត្រីប៉ូលិសហុងកុង កាលពីថ្ងៃទី20មេសា បានឱ្យដឹងថា កាលពីរដូវក្ដៅឆ្នាំទៅ (2020) ក្រុមជនខិលខូចបានទាក់ទងលោកយាយវ័យ90ឆ្នាំ ដែលរស់នៅក្នុងភូមិគ្រឹះ ក្នុងតំបន់ The Peak ជាទីប្រជុំជនលំដាប់ប្រណិតបំផុតប្រចាំក្រុងហុងកុង ដោយបន្លំជាមន្ត្រីប៉ូលិសរបស់ចិនដីគោក។ ក្រុមជនខិលខូចបាននិយាយថា អត្តសញ្ញាណរបស់លោកយាយខាងលើ ត្រូវបានប្រើប្រាស់នៅក្នុងរឿងក្ដីព្រហ្មទណ្ឌកម្រិតធ្ងន់មួយនៅឯចិនដីគោក ហើយបានស្នើឱ្យលោកយាយផ្ទេរប្រាក់ចូលទៅក្នុងគណនីធនាគាររបស់ «ក្រុមមន្ត្រីស៊ើបអង្កេត» ដើម្បីបញ្ជាក់។

ប៉ុន្មានថ្ងៃក្រោយមក មនុស្សម្នាក់បានមកផ្ទះលោកយាយខាងលើ ដោយយកទូរស័ព្ទ និងស៊ីមដែលប្រើសម្រាប់ទាក់ទងជាមួយក្រុមប៉ូលិសក្លែងក្លាយ។ ក្នុងរយៈពេលត្រឹមតែ 5ខែ ពួកគេបានបញ្ចុះបញ្ចូលឱ្យលោកយាយរូបនេះ វេរប្រាក់នៅធនាគារចំនួន 11លើក ជាមួយនឹងទឹកប្រាក់សរុបឡើងដល់ 250លានដុល្លារហុងកុង (32លានដុល្លារអាមេរិក)។ នេះគឺជាទឹកប្រាក់ដែលមានទំហំធំបំផុតដែលត្រូវបានបោកប្រាស់យកបានតាមរយៈទូរស័ព្ទ នៅកុងកុង។

ក្រោយពីមានស៊ើបអង្កេត ជនសង្ស័យម្នាក់ អាយុ19ឆ្នាំ ត្រូវបានចាប់ខ្លួន ព្រោះតែរឿងបោកប្រាស់ និងកំពុងត្រូវបានធានាឱ្យនៅក្រៅឃុំ។ សារព័ត៌មាន SCMP បានឱ្យដឹងថា ជនដែលត្រូវបានចាប់ខ្លួននោះគឺជាជនដែលបានទៅកាន់ផ្ទះរបស់ស្ត្រីរងគ្រោះ។

យោងតាមមន្ត្រីប៉ូលិសហុងកុង តួលេខនៃករណីបោកប្រាស់តាមទូរស័ព្ទ បានកើន 18% នៅក្នុងត្រីមាសទីមួយនៃឆ្នាំ2021នេះ ក្នុងនោះ ទឹកប្រាក់ចំនួន 350លានដុល្លារហុងកុងត្រូវបានបោកយក នាទីក្រុងនេះ។ ឆ្នាំ2020 ប៉ូលិសបានចាត់ការលើសំណុំរឿងបោកប្រាស់តាមទូរស័ព្ទចំនួន 1,193ករណី ជាមួយនឹងទឹកប្រាក់ចំនួន 574លានដុល្លារហុងកុង។ កាលពីឆ្នាំទៅ ស្ត្រីវ័យ 65ឆ្នាំម្នាក់ ក៏ត្រូវបានគេបោកយកប្រាក់អស់ចំនួន 68.9លានដុល្លារហុងកុង ដោយជនខិលខូចបន្លំធ្វើជាប៉ូលិសចិនដីគោក ដូចទៅនឹងករណីស្ត្រីវ័យ90ឆ្នាំខាងលើនេះដែរ៕

ប្រភព៖ AFP
ប្រែសម្រួល៖ បុត្រា

April 21, 2021

នារីជប៉ុន ច្នៃម៉ូដកាបូបស្ពាយរូបឆ្មា អ្នកណាឃើញហើយ ត្រូវតែសួរ ព្រោះស្មានថា ឆ្មាមែនទែន!

នារីជប៉ុន មហាកំពូលអៃឌៀ ច្នៃម៉ូដកាបូបស្ពាយរូបឆ្មា ដូចមែនទែនបំផុត រហូតក្លាយជា Fashion ដ៏ល្បីល្បាញ អ្នកណាៗឃើញហើយ ត្រូវតែសួរ ព្រោះស្មានថា ស្ពាយឆ្មាពីក្រោយខ្នងមែនទែន!!

បើអ្នកណាបានឃើញរូបភាពនេះលើកដំបូង ប្រហែលជាមានអាការភ្ញាក់ផ្អើលមិនតិចទេ ព្រោះតែគិតថា ប្រហែលជាគេចាប់សត្វឆ្មា យកមកធ្វើជាកាបូបស្ពាយមែនទែនហើយ…តែបើសិនពិនិត្យមើលឱ្យច្បាស់ម្ដងទៀត ទើបដឹងថា អ្វីដែលយើងបានឃើញនោះ មិនមែនជាសត្វឆ្មាម៉េវៗ ដែលមានជីវិតនោះទេ តែគ្រាន់តែជាតុក្កតារូបសត្វឆ្មាប៉ុណ្ណោះ។

ក្លាយជារូបភាពដែលត្រូវបានគេចែករំលែកតៗគ្នាយ៉ាងច្រើន នៅពេលដែលគណនីធ្វីតធើរ @picopoco08 របស់ហាងលក់ផលិតផលធ្វើដោយដៃនៅក្នុងប្រទេសជប៉ុន ដែលបានផូស្តរូបភាពកាបូបស្ពាយរូបសត្វឆ្មាម៉េវៗ អមដោយឃែបស្សិនថា “ថ្ងៃនេះធាតុអាកាសល្អមែនទែន ធ្វើឱ្យបានចេញមកថតរូបនៅក្រៅផ្ទះម្ដង…មានអតិថិជនចង់បានច្រើនណាស់ កុម្ម៉ង់ទាំងអស់ហ្នឹងតែម្ដង បន្តិចទៀតនឹងបញ្ជូនទៅដល់ដៃអតិថិជនហើយ!”

រូបភាពទាំងនោះ ក្រៅពីធ្វើឱ្យអ្នកលេងបណ្ដាញសង្គមភ្ញាក់ផ្អើលហើយ នៅឆក់យកបេះដូងអ្នកដែលបានឃើញរូបភាពទាំងនោះទៀតផង ព្រោះស្នាដៃផលិតចេញមក ដូចសត្វឆ្មាមែនទែនពិតៗតែម្ដង… ដោយកាបូបស្ពាយរូបសត្វឆ្មានេះ ជាស្នាដៃរបស់សិល្បការិនីជនជាតិជប៉ុនម្នាក់ ដែលស្រឡាញ់ចូលចិត្តសត្វឆ្មា ស្មើនឹងជីវិតរបស់នាង ធ្វើឱ្យនាងអាចប្រមូលព័ត៌មានលម្អិតពាក់ព័ន្ធនឹងសត្វឆ្មា និងផលិតចេញមក ដូចសត្វឆ្មាមែនទែនពិតៗតែម្ដង មិនថាតែរូបរាង កែវភ្នែក ពុកមាត់ រោម រួមទាំងឥរិយាបថផ្សេងៗរបស់វាទៀតផង ហើយកាបូបស្ពាយរូបសត្វឆ្មានេះ ត្រូវបានដាក់លក់ក្នុងតម្លៃ 1ប្រមាណជាជាង 1,000ដុល្លារឯណោះ។

បន្ទាប់ពីផូស្តរូបភាពទាំងនោះចេញទៅ ធ្វើឱ្យមានអ្នកចូលមកកុម្ម៉ង់ទិញផលិតផលនេះយ៉ាងច្រើន រហូតដល់ធ្វើឱ្យខាងអ្នកផលិត ត្រូវបិទឈប់ទទួលការកុម្ម៉ង់ជាបណ្ដោះអាសន្នសិន និងបើសិនជាមានការបើកទទួលការកុម្ម៉ង់ទិញជាថ្មីនោះ នឹងជូនដំណឹងនៅពេលក្រោយទៀត។ ក្រៅពីផលិតផលរូបសត្វឆ្មាហើយ អ្នកផលិត ថែមទាំងមានផលិតរូបតុក្កតាសត្វដូចមែនទែនផ្សេងៗទៀតផង។

ដំណាក់កាលការផលិតកាបូបស្ពាយតុក្កតារូបសត្វឆ្មា

ប្រភព៖ សារព័ត៌មានបរទេស
ប្រែសម្រួលដោយ អ្នកគ្រូ ឆវី

April 21, 2021

វ័យ36 របស់សហស្ថាបនិកនៃក្រុមហ៊ុន Facebook ៖ ក្លាយជា «មនុស្សមិនអាចប៉ះពាល់បាន» ខណៈទ្រព្យកំពុងកើនឡើងយ៉ាងឆាប់រហ័ស

គ្រាន់តែក្នុងឆ្នាំ2020 ទ្រព្យសម្បត្តិរបស់ Mark Zuckerberg បានកើនជាង40ពាន់លានដុល្លារបន្ថែមទៀត ដែលតួលេខនេះ មនុស្សភាគច្រើនត្រូវរកស៊ីអស់ច្រើនជាតិក៏រកមិនបានស្មើនឹងមួយភាគតូចនោះដែរ។

ឆ្នាំ2020 កន្លងទៅ គឺជាពេលវេលាដែលសហស្ថាបនិករបស់ Facebook បានឆ្លងកាត់ឧបសគ្គ និងជួបបញ្ហាជាច្រើនត្រូវដោះស្រាយនៅក្នុងមុខជំនួញរបស់ខ្លួន។

ម្ចាស់ក្រុមហ៊ុន Facebook ត្រូវបានសភាអាមេរិកកោះហៅទៅសួរនាំជាច្រើនលើក ហើយលោកក៏បានប្រឹងប្រែងគ្រប់គ្រងព័ត៌មានមិនពិតស្ដីអំពី Covid-19 រួមនឹងការបិទគណនីរបស់អតីតប្រធានាធិបតី Donald Trump ព្រមទាំងការរាំងខ្ទប់មិនឱ្យអូស្ត្រាលីប្រើប្រាស់ Facebook ទៀតផង។

កាលពីដើមខែមេសានេះ បញ្ហាបែកធ្លាយទិន្នន័យរបស់អ្នកប្រើប្រាស់ Facebook ចំនួន 533គណនី បានធ្វើឱ្យលោក Mark Zuckerberg ឈឺក្បាលម្ដងទៀត។ ប៉ុន្តែ បញ្ហានេះ ទំនងជាមិនបានជះឥទ្ធិពលអ្វីដល់មហាសេដ្ឋីរូបនេះឡើយ។ ទីភ្នាក់ងារសារព័ត៌មានជាច្រើនបានហៅគាត់ថា ជាមនុស្សដែល «មិនមានអ្នកណាប៉ះពាល់បាន» នៅក្នុងវិស័យបច្ចេកវិទ្យា។

នៅក្នុងវ័យ 36ឆ្នាំ Zuckerberg កំពុងតែមានឡើងយ៉ាងឆាប់រហ័ស។ កាលពីរដូវក្ដៅឆ្នាំទៅ បន្ទាប់ពី Facebook បានបញ្ចេញមុខងារថ្មីមួយនៅលើ Instagram ដើម្បីប្រជែងជាមួយ TikTok នៅសហរដ្ឋអាមេរិក ទ្រព្យរបស់ Zuckerberg ក៏បានកើនឡើងដល់ 100ពាន់លានដុល្លារជាលើកដំបូង។

យោងតាមសារព័ត៌មាន Business Insider គិតដោយឡែកក្នុងឆ្នាំ2020 ទ្រព្យសម្បត្តិរបស់ Zuckerberg បានកើនជាង 40ពាន់លានដុល្លារ។ ជាមួយនឹងតួលេខនេះ បើធៀបនឹងពលរដ្ឋភាគច្រើនក្នុងពិភពលោក គេត្រូវការពេលរកស៊ីរាប់ជាតិឯណោះ ទើបអាចរកបានស្មើនឹងមួយចំណែកតូច។

ភាគច្រើននៃទ្រព្យសម្បត្តិរបស់ Zuckerberg គឺបានមកពីភាគហ៊ុនចំនួន 13% របស់គាត់នៅក្នុងក្រុមហ៊ុន Facebook បើទោះជាទទួលបានប្រាក់បៀវត្សរ៍ប្រចាំឆ្នាំ ត្រឹមតែ 1ដុល្លារ។ បច្ចុប្បន្ន លោក Mark Zuckerberg មានទ្រព្យសម្បត្តិសរុប ចំនួន 114ពាន់លានដុល្លារអាមេរិក៕

ប្រភព៖ BI
ប្រែសម្រួល៖ បុត្រា

April 20, 2021

UEFA និង FIFA ប្រកាសថា នឹងតាមត្រួតពិនិត្យដល់ទីបញ្ចប់ សម្រាប់ក្រុមណាដែលលេងពាន ESL

ព័ត៌មានដ៏កក្រើកមួយ បានលេចឡើងកាលពីយប់មិញ ដោយសារក្លិបធំទាំង12 នៅអឺរ៉ុប បានយល់ព្រមចូលរួមលេងពានរង្វាន់ European Super League ហៅកាត់ ESL។

អង់គ្លេសជាប្រទេស ដែលមានក្លិបចូលរួមច្រើនជាងគេដល់ទៅ 6ក្រុម មានដូចជា Arsenal, Chelsea, Liverpool, Manchester City, Manchester United និង Spurs។ ចំណែកអេស្ប៉ាញមាន 3ក្រុម គឺ Real Madrid, Barcelona និង Atletico Madrid ខណៈដែលអ៊ីតាលីវិញ ក៏មាន 3ក្រុមដែរ ដូចជា AC Milan, Inter Milan និង Juventus ឯខាងលីគរបស់បារាំង និងអាល្លឺម៉ង់ មិនទាន់មានក្រុមណា ប្រកាសចូលរួមនៅឡើយទេ។

ESL ត្រូវបានបង្កើតឡើងកាលពីពេលថ្មីៗនេះ ដោយមានក្លិបធំៗចំនួន12 ចូលរួម។ ក្រោយការប្រកួតនេះបានបង្កើតឡើង ខាង UEFA និង FIFA មិនពេញចិត្តឡើយ និងបានប្រកាសថា នឹងដាក់សម្ពាធចំពោះក្លិបណា ដែលចូលរួមក្នុងការប្រកួតពានមួយនេះ ហើយមិនត្រឹមតែក្លិបនោះទេ សូម្បីតែកីឡាករ និងគ្រូបង្វឹកក៏នឹងរងពិន័យដូចគ្នា បើសិនពួកគេនៅតែចចេសចូលរួមការប្រកួតខាងលើ៕

April 20, 2021

កៀកប្រកួតផ្តាច់ព្រ័ត្រ Jose Mourinho ត្រូវ Spurs ដេញចេញពីតំណែង

Jose Mourinho ដែលធ្លាប់ដឹកនាំក្រុម Manchester United, Chelsea និង Real Madrid ដែលបានមកជំនួសលោក Mauricio Pochettino កាលពីចុងឆ្នាំ2019 កន្លងទៅនោះ ពេលនេះត្រូវបាន Tottenham Hotspur បណ្តេញពីតំណែងហើយ។

ការបណ្តេញចេញនេះ ត្រូវបានប្រធានក្លិបខាងលើប្រកាសថា ជំនួយការគ្រូបង្វឹករបស់ Mourinho គឺ Joao Sacramento, Nuno Santos, Carlos Lalin និង Giovanni Cerra ក៏ត្រូវបានបណ្តេញចេញពីតំណែងដូចគ្នាដែរ ដោយសារតែដឹកនាំក្លិបមិនសូវបានល្អ ដោយ Spurs គឺអស់ឱកាសហើយ ក្នុងការគ្រងជើងឯក Premier League រដូវកាលនេះ ទោះបីជានៅសល់ 8ប្រកួតទៀតក្តី។

ទោះជាដឹកនាំការប្រកួតលីគ មិនសូវបានល្អមែន ក៏ប៉ុន្តែលោកបានដឹកនាំក្រុមមួយនេះ ឱ្យឡើងទៅដល់វគ្គផ្តាច់ព្រ័ត្រពាន EFL Cup ដែលនឹងប្រកួតនៅប្រមាណជា 1សប្តាហ៍ខាងមុខនេះ ដោយនឹងត្រូវប្រកួតប៉ះក្រុម Manchester City៕

April 20, 2021

គន្លឹះល្អៗក្នុងការថែរក្សាពណ៌សក់ ឱ្យស្អាតបានយូរ

បើអ្នកមិនចង់ឱ្យពណ៌សក់ដ៏ស្រស់ស្អាត គួរឱ្យគយគន់របស់អ្នក ឡើងស្លេកស្លាំងយ៉ាងឆាប់រហ័សនោះ សូមសាកល្បងប្រើវិធីដូចខាងក្រោមនេះ៖

-ជ្រើសរើសប្រើផលិតផលឱ្យត្រឹមត្រូវ : គួរប្រើសាប៊ូកក់សក់ និងឃ្រីម Conditioner រូបមន្តការពារពណ៌សក់ជាពិសេស និងព្យាយាមចៀសពីផលិតផលតុបតែងសក់ណា ដែលមានចំណែកផ្សំរបស់អាល់កុល (ដូចជា ផលិតផលជែល ជាដើម) ព្រោះវានឹងធ្វើឱ្យសរសៃសក់របស់អ្នកស្ងួត នាំឱ្យពណ៌កាន់តែឆាប់ស្លេកឡើង។

-កុំអប់សក់ច្រើនពេក : សារធាតុគីមីនៅក្នុងផលិតផលប្តូរពណ៌សក់ នឹងធ្វើឱ្យសរសៃសក់ស្ងួត ហើយស្រួយ ដូច្នេះគួរប្រើឃ្រីម Conditioner ប្រភេទដែលអាចជ្រាបចូលជ្រៅទៅក្នុងសរសៃសក់ បន្ទាប់ពីកក់រួចក្នុងអំឡុងសប្តាហ៍ដំបូង ដោយលាបតាំងពីគល់ រហូតមកដល់ចុងសក់ ហើយពាក់មួកងូតទឹកគ្របទុកចោលប្រមាណ 10នាទី។

-ចៀសពីទឹក : ទឹក គឺជាមូលហេតុចម្បង ដែលធ្វើឱ្យពណ៌សក់ឡើងស្លេកបានយ៉ាងងាយ ដូច្នេះចូរកុំកក់សក់ញឹកញាប់លើសពីភាពចាំបាច់ពេក និងកុំប្រើទឹកក្តៅកក់សក់ឱ្យសោះ។

-ការពារសរសៃសក់ : បើអ្នកចូលចិត្តហែលទឹក សារធាតុរ៉ែ ដែលនៅសេសសល់នៅក្នុងអាងហែលទឹក(មិនមែនមានតែ chlorin ទេ) គឺជាបច្ច័យអាក្រក់មួយ ដែលធ្វើឱ្យសរសៃសក់ក្លាយទៅជាពណ៌បៃតងលាយលឿង… តែសូមកុំបារម្ភអី បញ្ហានេះ អាចការពារបានដោយការលាប Baby oil 2 – 3ដំណក់ នៅលើសរសៃសក់ ខណ:ពេលស្ងួត ហើយប្រញាប់លាងចេញវិញភ្លាម ក្រោយពេលងូតទឹករួច៕

April 20, 2021

ចង់បានផ្ទៃមុខ ស្អាតក្មេងជាងវ័យ “ស្លឹកត្រចៀកក្រាញ់” អាចជួយបាន

នារីៗណា ដែលផ្ទៃមុខទៅលឿនជាងតួលេខអាយុរបស់ខ្លួនឯងនោះ…ពេលនេះ សូមឈប់កង្វល់បារម្ភទៅ ព្រោះស្លឹកត្រចៀកក្រាញ់អាចជួយអ្នកបាន ដូច្នេះបើចង់ឱ្យផ្ទៃមុខ ត្រឡប់មកក្មេងជាងវ័យវិញនោះ សូមសាកល្បងធ្វើតាមវិធីដូចខាងក្រោមនេះ(ងាយៗ និងធានាថា មិនខកបំណងឡើយ)៖

ទឹកស្លឹកត្រចៀកក្រាញ់ មិនមែនគ្រាន់តែសម្រាប់ផឹក បំបាត់អាការគ្រាំក្នុងប៉ុណ្ណោះទេ តែនៅអាចជួយឱ្យយើងត្រឡប់មកមានផ្ទៃមុខស្អាត ក្មេងជាងវ័យ និងស្រស់ថ្លាបានទៀតផង…។

វិធីធ្វើ ក៏ងាយៗមែនទែន គឺគ្រាន់តែដើរទៅផ្សារ រកទិញបន្លែស្លឹកត្រចៀកក្រាញ់ ហើយយកមកលាង ឱ្យស្អាត រួចយកទៅដាក់ចូលក្នុងកែវម៉ាស៊ីនក្រឡុក និងក្រឡុកកិនវា ឱ្យល្អិត ឬក៏បុកឱ្យល្អិតនឹងត្បាល់ក៏បាន។ បន្ទាប់ពីនោះមក ចូរពូតវា យកតែទឹក មកបំពោកមុខ ទុកចោលប្រមាណ 10នាទី រួចសឹមលាងសម្អាតចេញ។

ចូរឧស្សាហ៏ធ្វើបែបនេះ ឱ្យបានជាប់ជាប្រចាំ តែប៉ុណ្ណឹង ផ្ទៃមុខស្រស់ថ្លា ស្អាត ក្មេងជាងវ័យ នឹងត្រឡប់មករកអ្នកវិញ ជាថ្មីម្តងទៀតមិនខាន៕

April 20, 2021

Category: សង្គម និងសេដ្ឋកិច្ច