សង្គម និងសេដ្ឋកិច្ច - La Reine Media

ដើមឆ្នាំ2021 Samsung នៅតែឈរលេខ1 លើការលក់ចេញស្មាតហ្វូន បានច្រើនជាងគេបំផុត

ក្រុមហ៊ុន Samsung បានហក់ឡើងមកឈរលើគេ ក្នុងលេខ1 លើការលក់ចេញស្មាតហ្វូន បានច្រើនជាងគេបំផុត គិតត្រឹម 3ខែ ដើមឆ្នាំ2021(ត្រីមាស1)។

ក្រុមអ្នកស្រាវជ្រាវក្នុងទីផ្សារស្មាតហ្វូន Strategy Analytics បានឱ្យដឹងថា ក្រុមហ៊ុនកូរ៉េខាងត្បូងនេះ បាននាំចេញទូរស័ព្ទ សរុបទាំងអស់ប្រមាណជា 77លានគ្រឿងឯណោះ និងមានចំណែកទីផ្សារខ្ទង់ 23%។ បើធៀបនឹងត្រីមាសទី1 ឆ្នាំ2020 យើងឃើញថា នេះជាចំនួនកើនឡើងដ៏ប្រសើរមួយ ព្រោះកាលពីឆ្នាំមុន ក្រុមហ៊ុនខាងលើ នាំចេញបានត្រឹមខ្ទង់ 58លានគ្រឿងប៉ុណ្ណោះ។

Apple វិញបានត្រឡប់ទៅឈរនៅចំណាត់ថ្នាក់លេខ2 ដោយបាននាំចេញទូរស័ព្ទឆ្លាតវៃសរុបខ្ទង់ 57 លានគ្រឿង និងមានចំណែកទីផ្សារខ្ទង់ 17% ដែលចំនួនលក់ចេញរបស់គេនេះ ក៏កើនឡើងខ្ពស់គួរឱ្យកត់សម្គាល់ដែរ ពោលគឺ ឆ្នាំមុនគិតត្រឹមពេលដូចគ្នានោះ គេលក់ចេញបានខ្ទង់ 39លានគ្រឿងប៉ុណ្ណោះ។

ក្រៅពី Samsung និង Apple វិញ Xiaomi បានឈរនៅចំណាត់ថ្នាក់លេខ3 ដោយបានលក់ចេញដល់ទៅ 49លានគ្រឿង មានចំណែកទីផ្សារ 15% កើនឡើងស្ទើរតែជិត 2ដងឯណោះ បើធៀបនឹងចំនួនលក់ ដែលក្រុមហ៊ុននេះធ្វើបានក្នុងឆ្នាំមុន។ ចំណែក OPPO និង vivo តំណែងលេខ4 និងលេខ5 ដោយក្រុមហ៊ុនទាំង2នេះ មានចំណែកទីផ្សារ 11% ដូចគ្នា ប៉ុន្តែចំនួនលក់គឺ OPPO ច្រើនជាងបន្តិចដោយលក់បានខ្ទង់ 38លានគ្រឿង ខណៈពេល vivo លក់បានខ្ទង់ 37លានគ្រឿង តែឆ្នាំនេះគ្មានវត្តមានរបស់ Huawei ទេ។

រំឭកផងដែរថា កាលពី ៣ខែ ចុងឆ្នាំ២០២០ (ត្រីមាសទី4) កន្លងទៅ Apple ធ្វើបានល្អមែនទែន ក្លាយជាក្រុមហ៊ុនលក់ចេញទូរស័ព្ទឆ្លាតវៃ បានច្រើនជាងគេ នៅក្នុងទីផ្សារសកលទាំងមូល ហើយក្នុងនោះដែរ ក្រុមហ៊ុនដែលធ្លាប់ឈរលេខ1 ពោលគឺ Samsung ត្រូវបានធ្លាក់នៅលេខ2 វិញ៕

April 27, 2021

ច្បាស់មែនទែន! NASA បង្ហាញរូបភាពពណ៌ ថតពីលើឧទ្ធម្ភាគចក្រ ដែលហោះ 2ជុំ លើពិភពផ្កាយព្រះអង្គារ

អង្គការ NASA របស់សហរដ្ឋអាមេរិក បានផ្សព្វផ្សាយរូបភាពពណ៌ ដែលថតពីលើឧទ្ធម្ភាគចក្រ “Ingenuity” ដែលហោះឡើងទៅលើពិភពផ្កាយព្រះអង្គារ ជាលើកទី2 ថ្មីៗនេះ និងកំពុងត្រៀមឡើងហោះជាលើកទី3 នៅថ្ងៃទី២៥ មេសា។

វេបសាយព័ត៌មាន CNN បានរាយការណ៍ថា អង្គការគ្រប់គ្រងការហោះហើរអវកាសនៃសហរដ្ឋអាមេរិក ឬ NASA បានផ្សព្វផ្សាយរូបភាពពណ៌ ដែលថតបានដោយគ្រឿងយន្តឧទ្ធម្ភាគចក្រ Ingenuity ដែលកំពុងហោះក្នុងរយៈកម្ពស់ ៥ម៉ែត្រ ពីលើផ្ទៃដីនៃពិភពផ្កាយព្រះអង្គារ ក្នុងអំឡុងការសាកល្បងហោះលើកទី2 កាលពីថ្ងៃទី22 មេសាកន្លងទៅ ដោយប្រើពេលវេលាទាំងអស់ 52វិនាទី ស៊ីពេលយូរជាងការហោះជុំដំបូងដល់ទៅ 12វិនាទី។

តាមរយៈរូបភាពដែលថតបាននេះ បានបង្ហាញឱ្យឃើញផ្ទៃដីរបស់ពិភពផ្កាយព្រះអង្គារ ដែលពេញទៅដោយធូលីដី និងដុំថ្ម និងថែមទាំងឃើញមានស្នាមកង់របស់គ្រឿងយន្តស្រាវជ្រាវ Perseverance ដែលនៅលើពិភពផ្កាយព្រះអង្គារនោះទៀតផង។

NASA បានបញ្ជាក់ថា ខណៈនេះ Ingenuity កំពុងត្រៀមសាកល្បងការហោះហើរលើកទី3 នៅថ្ងៃទី25 មេសា តាមផែនការហោះឡើង ក្នុងរយៈកម្ពស់ ៥ម៉ែត្រ ល្បឿន 7.2គីឡូម៉ែត្រក្នុង 1ម៉ោង ចម្ងាយហោះត្រឡប់ 100ម៉ែត្រ។

គ្រឿងយន្ត ឧទ្ធម្ភាគចក្រ Ingenuity នេះ មានទម្ងន់ 1.8គីឡូក្រាម មានតម្លៃ 85លានដុល្លារ ដោយមានការនាំយកគ្រឿងផ្គុំរបស់យន្តហោះ Wright Flyer របស់ 2នាក់បងប្អូនត្រកូល Wright ឡើងទៅជាមួយផងដែរ ដើម្បីរំឭកពីហេតុការណ៍ប្រវត្តិសាស្ត្រការហោះហើររបស់យន្តហោះ 1គ្រឿងនេះ ដែលធ្លាប់ហោះឡើងនៅឯ ឃីតធី ហក ក្នុងរដ្ឋ ណត ខារ៉ូឡៃណា កាលពីឆ្នាំ1903។

ភាពជោគជ័យក្នុងការហោះហើររបស់គ្រឿងយន្តឧទ្ធម្ភាគចក្រ 1គ្រឿងនេះ បានកើតឡើងក្រោមការសាកល្បងដ៏ពិបាក ដោយសារតែធាតុអាកាសនៅលើពិភពផ្កាយព្រះអង្គារ មានសភាពក្រាស់ណែនទាបជាងនៅលើផែនដីខ្លាំង ជាហេតុបណ្ដាលឱ្យកង្ហាររបស់គ្រឿងយន្ត ត្រូវច្នៃម៉ូដឡើងយ៉ាងពិសេស ដើម្បីឱ្យអាចវិលបានលឿនជាង ទើបអាចហោះឡើងបាន៕

ប្រភព៖ ទីភ្នាក់ងារព័ត៌មាន CNN
ប្រែសម្រួលដោយ តាវ៉ែនតា

April 24, 2021

CEO ផ្សាររូបិយវត្ថុឌីជីថល Thodex នាំយកប្រាក់ 2ពាន់លានដុល្លារអាមេរិក រត់ចោលស្រុក៖ អ្នកវិនិយោគ 400,000នាក់ យំលែងចេញ

ប្រធានាធិបតីប្រទេសទួរគី Recep Tayyip Erdogan ធ្លាប់បានព្រមានអំពីសញ្ញានៃការបំពានច្បាប់ និងថាមានរូបភាពបោកប្រាស់នៃទីផ្សាររូបិយវត្ថុអេឡិចត្រូនិក ក៏ប៉ុន្តែ ពុំមានពលរដ្ឋណាម្នាក់ស្ដាប់តាមនោះទេ។

សមត្ថកិច្ចនៃប្រទេសទួរគី ថ្មីៗនេះបានចាប់ខ្លួនមនុស្សចំនួន 60នាក់ ដែលទាក់ទិននឹងផ្សាររូបិយវត្ថុអេឡិចត្រូនិក Thodex ទន្ទឹមនឹងការប្រកាសតាមចាប់ខ្លួនជាលក្ខណៈអន្តរជាតិ ចំពោះនាយកប្រតិបត្តិឈ្មោះ Faruk Fatih Ozer ដោយចោទពីបទបោកប្រាស់។

សារព័ត៌មានក្នុងស្រុកបានឱ្យដឹងថា CEO នៃផ្សាររូបិយវត្ថុអេឡិចត្រូនិក Thodex បានគេចខ្លួនទៅកាន់ប្រទេសថៃ តាមជើងហោះហើរ Istanbul និងបាននាំយកទ្រព្យរបស់អ្នកវិនិយោគចំនួន 2ពាន់លានដុល្លារទៅតាមខ្លួន។ បញ្ហានេះបានធ្វើឱ្យកក្រើកទីផ្សាររូបិយវត្ថុអេឡិចត្រូនិកក្នុងពិភពលោក។ នៅពេលផ្សារជួញដូររូបិយវត្ថុអេឡិចត្រូនិក Thodex ត្រូវបានបិទទ្វារ ហើយក្រុមអ្នកវិនិយោគក្រៅប្រព័ន្ធ (speculation) ក៏មិនអាចចូលទៅកាន់គណនីរបស់ខ្លួនបាន ការិយាល័យរដ្ឋអាជ្ញានៃប្រទេសទួរគី ក៏ចាប់ផ្ដើមធ្វើការស៊ើបអង្កេត។

CEO Faruk Fatih Ozer របស់ Thedox នៅព្រលានយន្តហោះ Istanbul

សារព័ត៌មាន Demiroren News Agency ថ្មីៗនេះ បានចុះផ្សាយរូបភាពមួយសន្លឹកដែលបង្ហាញអំពីទិដ្ឋភាពដែល CEO Faruk Fatih Ozer កំពុងប្រញាប់ប្រញាល់ចាកចេញ្ពីប្រទេសទួរគី នៅឯព្រលានយន្តហោះ Istanbul។ លោក Ozer ក៏បានបិទរាល់មធ្យោបាយទំនាក់ទំនង និងបានបាត់ខ្លួនទាំងស្រុង បន្ទាប់ពីធនាគារជាតិទួរគី បានហាមទូទាត់ដោយប្រើរូបិយវត្ថុអេឡិចត្រូនិកជាផ្លូវការ។

តាមការពិត ផ្សារជួញដូររូបិយវត្ថុអេឡិចត្រូនិក Thodex ត្រូវបានគេសង្ស័យតាំងពីដំបូង ប៉ុន្តែដោយសារតែភាពលោភលន់របស់ក្រុមអ្នកវិនិយោគក្រៅប្រព័ន្ធ និងស្ថានភាពអតិផរណាខ្ពស់ ក៏ដូចជានិន្នាការប្រើប្រាស់រូបិយវត្ថុអេឡិចត្រូនិកនៅលើពិភពលោក មនុស្សជាច្រើនក៏បានវិនិយោគទៅលើផ្សារនេះ។

តាមធម្មតា CEO របស់ Thodex តែងតែប្រតិកម្មប្រឆាំង នៅពេលមានព័ត៌មានមិនល្អទាក់ទងនឹងរូបិយវត្ថុអេឡេចត្រូនិក។ ប៉ុន្តែ លើកនេះ នៅពេលដែលធនាគារជាតិ ហាមប្រើប្រាស់ប្រាក់ឌីជីថល CEO Ozer ក៏ត្រូវបង្ខំចិត្ត វេចបង្វេករត់ចោលប្រទេស ទុកឱ្យអ្នកវិនិយោគក្រៅប្រព័ន្ធជាង 400,000នាក់ ត្រូវបាត់បង់ប្រាក់។

យោងតាម Bloomberg ផ្សារជួញដូររូបិយវត្ថុអេឡិចត្រូនិក Thodex ទើបតែបានចាប់ផ្ដើមដាក់លក់ប្រាក់ Dogecoin កាលពីខែមុន។ ប្រាក់ Dogecoin ប្រមាណ 4លាន ត្រូវបានជួញដូរ ប៉ុន្តែអ្នកវិនិយោគជាច្រើនឱ្យដឹងថា ពួកគេមិនទាន់ទទួលបានរូបិយវត្ថុនេះនៅឡើយ បើទោះជាបានទូទាត់រូចរាល់។

ទាក់ទងនឹងបញ្ហារូបិយវត្ថុអេឡិចត្រូនិកនេះដែរ Bitcoin ក៏បានធ្លាក់ថ្លៃអស់ជាង 20% រាប់ចាប់ពីបានឡើងដល់កំពូល 63,000ដុល្លារ/bitcoin កាលពីថ្ងៃទី13 ខែមេសា ឆ្នាំ2021។ មូលហេតុចម្បងនៃការធ្លាក់ថ្លៃនេះគឺ ដោយសារបណ្ដាប្រទេស ចាប់ផ្ដើមរឹតបន្តឹងលើការគ្រប់គ្រងប្រាក់អេឡិចត្រូនិក។ នៅហសរដ្ឋអាមេរិក ប្រធានាធិបតី Joe Biden កំពុងពិនិត្យលើការដាក់ឱ្យប្រើប្រាស់គោលនយោបាយថ្មី ដែលយកពន្ធបន្ថែមពីវិស័យរូបិយវត្ថុអេឡិចត្រូនិក ដែលនេះនឹងធ្វើឱ្យការជួញដូរត្រូវជួបបញ្ហា៕

ប្រភព៖ CNBC
ប្រែសម្រួល៖ បុត្រា

April 24, 2021

កូនយន្តហោះដ្រោន 1,500គ្រឿង ហោះតម្រៀបជាកូដ QR «យក្ស» នៅលើផ្ទៃមេឃនៃប្រទេសចិន

ក្រុមអ្នកជំនាញ បានប្រើប្រាស់កូនយន្តហោះដ្រោនចំនួន 1,500គ្រឿង ដើម្បីបង្កើតកូដ QR ដ៏ធំ នៅលើផ្ទៃមេឃនៃទីក្រុងសៀងហៃ ប្រទេសចិន ដែលគ្រប់គ្នាអាចប្រើប្រាស់ទូរស័ព្ទដើម្បីស្គែនវាបាន។

ការបង្កើតព្រឹត្តិការណ៍ដ៏អស្ចារ្យនេះគឺជាពិធីរំលឹកខួបមួយឆ្នាំនៃវត្តមានរបស់ហ្គេមមួយប្រភេទនៅប្រទេសចិន។ កូនយន្តហោះដ្រោនទាំងនេះ បានធ្វើឱ្យរាត្រីនៅសៀងហៃ ប្រែជាភ្លឺចែងចាំង គួរជាទីគយគន់។

ពួកវាត្រូវបានគេបញ្ជាឱ្យហោះហើរទៅលើអាកាស និងតម្រៀបជារូបរាងនៃតួអង្គនានាក្នុងហ្គេម «Princess Connect! Re:Dive» រួមនឹងកូដ QR ដែលអាចស្កែនដោយទូរស័ព្ទឆ្លាតវៃ។

កូដ QR នៅលើអាកាសនេះ នឹងនាំម្ចាស់ទូរស័ព្ទទៅកាន់គេហទំព័ររបស់ហ្គេម។ ព្រឹត្តិការណ៍ដ៏គួរឱ្យភ្ញាក់ផ្អើលនេះ ត្រូវបានចុះផ្សាយនៅលើបណ្ដាញសង្គមចែករំលែកវីដេអូ Bilibili របស់ចិន៕

ប្រភព៖ SCMP, Techtimes
ប្រែសម្រួល៖ បុត្រា

April 23, 2021

អាល្លឺម៉ង់ ប្រកាសដកខ្លួនពីពាន European Super League

លោក Florentino Perez ប្រធានក្លិប Real Madrid គឺជាអ្នកផ្ដួចផ្ដើមបង្កើតពានរង្វាន់ European Super League ជាមួយក្លិបដទៃទៀត ដូចជា Barcelona, Atletico Madrid, AC Milan, Arsenal, Chelsea, Inter, Juventus, Liverpool, Manchester City, Manchester United និង Tottenham ដែលជាសមាជិក។ ស្របពេលក្លិបមួយចំនួនទៀត ក៏បានចេញមុខអះអាងថានឹងចូលរួមដែរ។

យ៉ាងណាមិញ កាលពីដើមឆ្នាំ2021នេះ ក្រោយលេចឮគម្រោងនៃការបង្កើតពាន European Super League នេះ សហព័ន្ធបាល់ទាត់ពិភពលោក FIFA ក៏បានលូកដៃចូល និងធ្វើការព្រមានផងដែរ ប្រសិនបើពាននេះកើតឡើងពិតមែននោះ ។

លោក Hans Joachim Watzke នាយកប្រតិបត្តិក្លិប Bayern Munich បានចេញសេចក្ដីថ្លែងការណ៍នៅក្នុងថ្ងៃនេះថា ក្លិបរបស់លោក និងក្លិប Borussia Dortmund នឹងមិនចូលរួមនៅក្នុង European Super League នោះទេ ដោយសារខ្លាចរងផលប៉ះពាល់ខ្លាំងទាក់ទិនទៅនឹងបម្រាមនានារបស់ FIFA ៕

April 22, 2021

កម្ពុជា ចុះឈ្មោះប្រកួត Pub-G និង Mobile Legend ក្នុងព្រឹត្តិការណ៍ស៊ីហ្គេម ចុងឆ្នាំនេះ

កម្ពុជា បានសម្រេចថា នឹងចូលរួមក្នុងវិញ្ញាសា ៣ (PUBG Mobile-Team, PUBG Mobile-Individual និង Mobile Legends) នៃប្រភេទកីឡាអេឡិចត្រូនិក 2ប្រភេទ គឺ Pub-G និង Mobile Legend ក្នុងការប្រកួតប្រជែងនៅក្នុងព្រឹត្តិការណ៍ស៊ីហ្គេមចុងឆ្នាំនេះ នៅប្រទេសវៀតណាម។

ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា សម្រាប់ប្រភេទកីឡាអេឡិចត្រូនិក ឬ E-Sports នេះ កម្ពុជាបានបញ្ចូលក្នុងកីឡាទាំង 32ប្រភេទ ដែលត្រូវបញ្ជូនទៅចូលរួមប្រកួតកីឡាស៊ីហ្គេមរួចហើយ នៅឡើយតែវិញ្ញាសាថ្មីនេះប៉ុណ្ណោះ ដែលគណៈកម្មាធិការជាតិអូឡាំពិកកម្ពុជា ជំរុញឱ្យសហព័ន្ធ ពន្លឿនធ្វើការងារបច្ចេកទេស ដើម្បីកំណត់វិញ្ញាសា និងចុះឈ្មោះការប្រកួតផ្លូវការ ស្របពេលកីឡា E-Sports វៀតណាមបានដាក់វិញ្ញាសាចំនួន8 រួមមានវិញ្ញាសា Arena Of Valor, PUBG Mobile-Team, PUBG Mobile-Individual, Free Fire, League of Legends, FIFA Online, Cross Fire និងវិញ្ញាសា Mobile Legends។

ទោះជាកម្ពុជាមិនសូវបានចូលរួមប្រកួតប្រជែងក្នុងប្រភេទកីឡាអេឡិចត្រូនិក និងវិញ្ញាសានេះក្តី ក៏ប៉ុន្តែវិញ្ញាសាទាំងនោះ គឺកម្ពុជាមានសង្ឃឹមខ្ពស់ក្នុងការស្វែងរកមេដាយជូនជាតិ ដោយសារតែកម្ពុជា ធ្លាប់មានការប្រកួតប្រជែងជ្រើសរើសជើងឯកវិញ្ញាសាទាំងអស់នេះរួចមកហើយ ទាំងក្នុងស្រុក និងអន្តរជាតិ ដែលធ្លាប់ទាំងបាននាំមេដាយមកកម្ពុជាជាច្រើនទៀតផង៕

April 22, 2021

iPad Pro គេចាប់អារម្មណ៍គ្រប់គ្នា តម្លៃលក់ដំបូងចាប់ពី 799ដុល្លារ ដល់ 1,099ដុល្លារ

iPad Pro ជំនាន់ថ្មី ឆ្នាំ2021 ដែល Apple ទើបប្រកាសចេញ មានបំពាក់បន្ទះប្រព័ន្ធ ជាបន្ទះឈីប M1 ដែលមានកម្លាំង CPU ខ្លាំងជាងមុនដល់ទៅ 50% និង GPU លឿនជាងមុនដល់ទៅ 40% នេះបើប្រៀបទៅនឹងបន្ទះឈីបចាស់ A12Z ត្រូវបានគេចាប់អារម្មណ៍ខ្លាំងណាស់។

ក្រៅពីនេះ វាប្រើរន្ធ Thunderbolt ដែលធ្វើឱ្យល្បឿនផ្ទេរទិន្នន័យ ឡើងដល់ 40 Gbps និងអាចភ្ជាប់ទៅនឹងម៉ូនីទ័រខាងក្រៅ មានកម្រិតបង្ហាញ 6K បាន និងប្រើឈីបខ្លាំងស្រាប់ ចំណែកទំហំផ្ទុកក៏មិនតូចដែរ គឺឡើងដល់ទៅ 2TB និងមាន RAM 16GB។ លើសពីនេះទៀត iPad Pro មានលទ្ធភាពទ្រទ្រង់ល្បឿនអ៊ីនធើណិត តាម Ethernet ដល់ទៅ 10 gigabit ផងដែរ។

iPad Pro បំពាក់សិនស័រកាមេរ៉ា TrueDepth ទំហំ 12MP ជាប្រភេទលេនស៍ ultrawide-angle ហើយលេនស៍នេះផងដែរ ក៏មានចំណុចពិសេស ពេលខលវីដេអូ បើអ្នកនិយាយម្នាក់ឯង វានឹងកាត់រូបភាពឱ្យចំកណ្ដាល ពេលមានមនុស្សនិយាយ 2នាក់ វានឹងចាប់យករូបមនុស្ស ឱ្យឃើញច្បាស់ដោយស្វ័យប្រវត្តិ។

កាមេរ៉ាក្រោយ 2គ្រាប់ នៅរក្សាទំហំ 12 MP ជាលេនស៍ដើម និង 10 MP ជាលេនស៍ ultra wide និងមានសិនស័រ LiDAR ដែលដំណើរការលឿនជាមុន ដ្បិតបានជំនួយពីបន្ទះឈីប M1 ដោយធ្វើឱ្យវាអាចដំណើរការមុខងារ Smart HDR 3 និងថតចាប់យកវត្ថុមានពន្លឺទាប និងសម្រួលដល់មុខងារ autofocus បានល្អ។

ដោយឡែក Apple ប្រើបច្ចេកវិទ្យាអេក្រង់ជំនាន់ថ្មី mini-LED ដែលជាអេក្រង់បង្ហាញពណ៌ដិតបានល្អ មានពន្លឺខ្ពស់ដល់ 1600nits កាត់បន្ថយចំណាំងប្លាតបានច្រើន និងទ្រទ្រង់មុខងារ HDR10, Dolby Vision និង HLG ផងដែរ។ ប៉ុន្ដែអេក្រង់នេះមានតែនៅលើ iPad Pro 12.9អ៊ិញប៉ុណ្ណោះ ចំណែកឯ iPad Pro 11អ៊ិញ គឺនៅប្រើត្រឹមអេក្រង់ LCD ដូចជំនាន់មុនដដែល។

Apple ឱ្យឈ្មោះអេក្រង់ថ្មីនេះថា Liquid XDR display ដោយ iPad ទាំង 2ម៉ូដែលនេះ ក៏មានមុខងារ Promotion ដែលមានកម្រិត adaptive refresh rate ដល់ទៅ 120Hz។ ចំពោះផ្នែកសេវាវិញ iPad Pro ទ្រទ្រង់សេវា 5G និងមាន eSim ភ្ជាប់មកជាមួយផងដែរ។

ក្រៅពីមានកម្លាំងស្មើនឹងកុំព្យូទ័រហើយ តម្លៃរបស់វា ក៏មិនលើសគ្នាប៉ុន្មានដែរ ពោលគឺ Apple ចាប់ផ្ដើមបើកឱ្យ Pre-order នៅថ្ងៃសុក្រ ទី30 មេសាខាងមុខនេះ៕

សូមទស្សនាវីដេអូខាងក្រោម៖

https://www.youtube.com/watch?v=aOq49euWnIo

April 22, 2021

Apple ធ្វើកម្មវិធីដើមឆ្នាំ2021 ចេញលក់ផលិតផលថ្មីៗ 5 ផ្សេងៗគ្នា

កាលពីយប់មិញនេះ នៅក្នុងព្រឹត្តិការណ៍ធំដើមឆ្នាំ “Spring Loaded” របស់ Apple បានប្រកាសចេញផលិតផលពិសេសៗ ចំនួន 5មុខ ដើម្បីចូលរួមប្រកួតនឹងក្រុមហ៊ុនដទៃ ក៏ដូចជាធ្វើការអាប់ឌែតថ្មីៗរបស់ខ្លួនដែរ ដែលមានដូចជា៖

-កុំព្យូទ័រលើតុ iMac ម៉ូដែលថ្មី មានជម្រើសដល់ទៅ 7ពណ៌ បំពាក់ដោយប្រព័ន្ធបន្ទះឈីបថ្មី M1 ហើយអ្វីដែលពិសេសនោះ គឺរូបរាងរបស់វា មានសភាពស្ដើងស្អាតជាងមុន ក្នុងទំហំអេក្រង់ 24អ៊ិញ និងកម្រិតបង្ហាញ 4.5K។

-iPad Pro ម៉ូដែលថ្មី ខ្នាតអេក្រង់ 12.9អ៊ិញ បានប្ដូរទៅប្រើប្រព័ន្ធបន្ទះឈីបថ្មី M1 ផងដែរ ហើយវាក៏ចាប់ផ្ដើមទ្រទ្រង់សេវា 5G បាន និងមានកាមេរ៉ាមុខប្រើលេនស៍ Ultra Wide ផងដែរ។

-iPhone 12 និង 12 mini គឺជាស្មាតហ្វូនតម្លៃកម្រិតមធ្យមរបស់ Apple ពេលនេះមានជម្រើសពណ៌ថ្មីដ៏ស្រស់ស្អាត គឺពណ៌ស្វាយ។ គេរំពឹងថា វានឹងក្លាយជាស្មាតហ្វូន លក់បានច្រើនបំផុតរបស់ Apple នៅឆ្នាំនេះ។

-ដែកឆក់ AirTag ជាឧបករណ៍តាមដានរបស់ប្រើប្រាស់សម្រាប់ថ្ពក់ភ្ជាប់ទៅនឹងអ្វីមួយ ដូចជាសោផ្ទះ ឬកាបូបស្ពាយ ដើម្បីតាមដានរបស់ទាំងនោះពេលទៅឆ្ងាយ ឬបាត់ ភ្ជាប់តាមកម្មវិធី Find My របស់ Apple។

-Apple TV ម៉ូដែលថ្មីនេះ ប្រើបន្ទះឈីបថ្មី A12 Bionic មានតេឡេបញ្ជា Siri Remote ថ្មី ជាពិសេសគឺកម្រិតបង្ហាញ 4K មាន Frame Rate ខ្ពស់ HDR ទៀតផង។ សរុបមកផលិតផលទាំង 5នេះ នឹងដាក់ឱ្យ

កុម្ម៉ង់ទិញ ក្នុងរយៈពេលជាង 1ខែទៀត នៅតាមបណ្ដាប្រទេសនានា៕

April 22, 2021

La Liga និង Premier League ដាច់ណាត់ មិនទទួលស្គាល់ក្រុមដែលលេង ESL ឡើយ

ក្នុងរយៈពេលប៉ុន្មានថ្ងៃនេះ ពិភពបាល់ទាត់ កំពុងតែវែកញែករឿងបង្កើតក្របខ័ណ្ឌថ្មី របស់ក្លិបអ្នកមានៗ ១២ក្លិប ខណៈខាងស្ថាប័នបាល់ទាត់ ដូចជា FIFA និង UEFA កំពុងតែរកវិធីដាក់ទណ្ឌកម្មក្លិប និងកីឡាករនៃក្លឹបទាំងនោះ។

រដ្ឋលេខាធិការក្រសួងកីឡា របស់ប្រទេសអង់គ្លេស លោក Oliver Dowden បានព្រមានថា ក្លិបធំៗ អាចនឹងត្រូវហាមមិនឱ្យទិញកីឡាករបរទេសចូល សម្រាប់គម្រោងពាន European Super League របស់ពួកគេ។

ចំណែកឯ La Liga វិញ ក៏បានចេញសេចក្តីប្រកាសជាផ្លូវការមួយដែរថា ខ្លួនមិនគាំទ្រដល់ការបង្កើតពានរង្វាន់ថ្មី European Super League នេះឡើយ ហើយនឹងពិន័យធ្ងន់ធ្ងរដល់ក្លិបណាដែលចូលរួមពាននេះទៀតផង៕

April 22, 2021

អ៊ីចឹងសោះ បានជាក្លិបធំៗ ចង់ឱ្យ ESL កើតមានឡើង…

ពានរង្វាន់ដ៏ថ្មីសន្លាងមួយ ដែលផ្តួចផ្តើមឡើងដោយក្រុម Real Madrid និងក្លិបកំពូលៗរបស់អឺរ៉ុប ចំនួន ១២ គ្រោងនឹងធ្វើឡើងនៅពាក់កណ្តាលឆ្នាំ2021 នេះ។

ទោះបីជាមិនបានការទទួលស្គាល់ដោយសហព័ន្ធកីឡាបាល់ទាត់ពិភពលោក និងអឺរ៉ុបក្តី តែក្រុមដែលគ្រោងនឹងចូលរួមពានរង្វាន់នេះ បានប្រកាន់ជំហររឹងមាំ យ៉ាងដាច់ណាត់ថា នឹងធ្វើឱ្យពាននេះលេចជារូបរាងឡើង។

ចំពោះមូលហេតុដែលក្លិបទាំងឡាយ នាំគ្នាចង់ធ្វើពាននេះឡើង គឺដោយសារតែក្រុមដែលចូលរួមក្នុងពានរង្វាន់នេះ នឹងទទួលបានទឹកប្រាក់ ម្នាក់ប្រមាណជា 400លានដុល្លារ ខណៈដែលក្រុមដែលឈ្នះពាន និងចំណាត់ថ្នាក់ល្អនៃពាននេះ នឹងមានកញ្ចប់ទឹកប្រាក់ប្រមាណជាង ២ពាន់លានដុល្លារផ្សេងទៀត៕

April 22, 2021

Category: សង្គម និងសេដ្ឋកិច្ច