សង្គម និងសេដ្ឋកិច្ច - La Reine Media

ក្រុមហ៊ុន Google រកចំណូលកើនជាង 30% ពីការលក់ពាណិជ្ជកម្ម ឬ Ad របស់ខ្លួន

នៅក្នុងសេចក្តីថ្លែងការណ៍របស់លោក Ruth Porat នាយកហិរញ្ញវត្ថុរបស់ក្រុម Alphabet បានបង្ហាញឱ្យឃើញថា ក្រុមហ៊ុន Alphabet ម្ចាស់ Google រកបានប្រាក់ចំណេញប្រចាំត្រីមាស លើសពីការរំពឹងទុក និងបានប្រកាសពីការទិញភាគហ៊ុនត្រឡប់មកវិញក្នុងទំហំទឹកប្រាក់ 50ពាន់លានដុល្លារ ខណៈដែលសេដ្ឋកិច្ចកំពុងតែរើឡើងវិញ និងមានការកើនឡើងលើការប្រើប្រាស់សេវាអនឡាញ បូករួមទាំងការកើនឡើងនូវការលក់ពាណិជ្ជកម្ម និងពាណិជ្ជកម្មតាមប្រព័ន្ធ Cloud។

លទ្ធផលទាំងនេះ ឆ្លុះបញ្ចាំងពីសកម្មភាពតាមអនឡាញរបស់អ្នកប្រើប្រាស់ និងនៅក្រៅប្រទេស ដែលផ្អែកទៅលើការកើនឡើងលើប្រាក់ចំណេញពីពាណិជកម្ម។

ការលក់ពាណិជ្ជកម្ម ឬ Ad របស់ Google បានកើនឡើង 32%ក្នុងត្រីមាសទី1 បើធៀបនឹងរយៈពេលដូចគ្នាកាលពី 1ឆ្នាំមុន ពោលគឺកើនឡើងហួសពីការរំពឹងទុក។ ការលក់ Cloud បានកើនឡើង៤៥,៧% ដែលដូចការរំពឹងទុក។

នេះ គឺជាសញ្ញាដំបូងដែលបង្ហាញថា សេវា Google ទទួលបានការប្រើប្រាស់ច្រើន ដោយសារតែការបិទខ្ទប់តំបន់នានា និងការរឹតត្បិតនានាជុំវិញការឆ្លងរីករាលដាលវីរុសកូវីដ-19 ដែលបានបង្ខំឱ្យប្រជាពលរដ្ឋទិញទំនិញ និងទំនាក់ទំនងគ្នាតាមអនឡាញច្រើន ក្នុងរយៈពេល 1ឆ្នាំមកនេះ។

ភាគហ៊ុនរបស់ក្រុមហ៊ុន Alphabet បានកើនឡើងប្រមាណជា 4.7% ពោលគឺក្នុងទំហំទឹកប្រាក់ 2,398.61ដុល្លារក្នុង 1ហ៊ុន ក្នុងការពង្រីកពាណិជ្ជកម្មរបស់ខ្លួន៕

April 30, 2021

ក្រុមហ៊ុន Intel ចូលប្រឡូកវិស័យផលិតរថយន្ត ជាអ្នកផលិតបន្ទះឈីប

កាលពីពេលថ្មីៗ ក្រុមហ៊ុនផលិតបន្ទះឈីបកុំព្យូទ័រ និងស្មាតហ្វូន Intel ដែលមានឈ្មោះបោះសំឡេងល្បីល្បាញជាយូរឆ្នាំមកហើយ បានបង្ហើបឱ្យដឹងថា ខ្លួនកំពុងតែស្ថិតក្នុងការពិភាក្សាជាមួយក្រុមហ៊ុនផលិតរថយន្ដដើម្បីផលិតឈីបឱ្យពួកគេ។

លោក Pat Gelsinger នាយកប្រតិបត្តិជាន់ខ្ពស់ប្រចាំ Intel បានឱ្យដឹងថា៖ «នេះក៏ដោយសារតែឈីបលើស្ទើរតែគ្រប់ឧស្សាហកម្ម សូម្បតែរោងចក្រផលិតរថយន្ដសុទ្ធតែកំពុងមានការខ្វះខាត ដូច្នេះ Intel នឹងពង្រីកក្រុមហ៊ុនរបស់ខ្លួនតាមរយៈការផលិតឈីបឱ្យបានកាន់តែច្រើនជាងមុនទៀត»

គម្រោងពង្រីកអាជីវកម្មរបស់ខ្លួនបែបនេះ ត្រូវបានគេមើលឃើញថា ជាការផ្លាស់ប្តូរមួយដ៏ធំ បន្ទាប់ពីទីផ្សាររបស់ពួកគេធ្លាក់ចុះបន្ដិចៗម្ដង ក្នុងរយៈពេលប៉ុន្មានឆ្នាំមកនេះ។

Intel ក៏ធ្លាប់បានបញ្ជាក់ថា នឹងធ្វើការបង្កើតរោងចក្របន្ថែមនៅសហរដ្ឋអាមេរិក និងតំបន់អឺរ៉ុប ដើម្បីឆ្លើយតបទៅនឹងក្រុមហ៊ុនផលិតឈីបមកពីអាស៊ីនានាដូចជា៖ រោងចក្រនៅតៃវ៉ាន់ TSMC- Taiwan Semiconductor Manufacturing Co និង Samsung Electronics Co Ltd ជាដើម។ រោងចក្រផលិតបន្ទះឈីបទាំង2 សុទ្ធសឹងតែជា រោងចក្រដែលឈានមុខគេ។

សម្រាប់ពេលនេះ Intel កំពុងតែចរចាលើការឌីហ្សាញឈីប និងផលិតឈីបទៅឱ្យក្រុមហ៊ុនផលិតរថយន្ដធំ ដែលគេមិនទាន់បានដឹងឈ្មោះនៅឡើយក្នុងពេលនេះ តែយ៉ាងណា ដំណឹងនេះនឹងពិតជាជាក់ច្បាស់ជារូបរាងឡើង នៅរយៈពេលយ៉ាងយូរ 6ខែទៀតដូច្នេះសូមរង់ចាំដានបន្ដទៀត៕

April 30, 2021

ប្លែក! នារីគ្រប់រូបនៅតំបន់នេះ ត្រូវតែមានដៃគូស្នេហា គ្រប់20នាក់ ទើបមានសិទ្ធិយកប្ដី

យោងតាមទំនៀមទម្លាប់បុរាណរបស់ជនជាតិនេះ គ្រួសារខាងប្ដី នឹងត្រូវជួបឧបទ្រពចង្រៃ បើសិនជាបានរៀបការនឹងនារីដែលនៅមានព្រហ្មចារី។

ខាងលើនេះគឺជាទំនៀមទម្លាប់របស់កុលសម្ព័ន្ធមួយនៅតំបន់ខ្ពង់រាបទីបេ (Tibetan Plateau) ជាតំបន់ខ្ពស់បំផុតរបស់ពិភពលោក ភូមិភាគដែលស្ថិតនៅក្នុងទឹកដីរបស់ប្រទេសនេប៉ាល់។

នារីទាំងឡាយណា ដែលរៀបការមុនពេលបាត់បង់ព្រហ្មចារី ត្រូវបានគេចាត់ទុកថាជារឿងឧបទ្រពចង្រៃ សម្រាប់គ្រួសារខាងស្វាមី។ ដូច្នេះ ប្រការនេះត្រូវបានគេតមគ្រប់ៗគ្នា។

នារីដែលចង់មានស្វាមី ត្រូវតែមានសម្ព័ន្ធភាពស្នេហាជាមួយបុរស ឱ្យបានគ្រប់ 20នាក់ ទើបត្រូវបានគេផ្ដល់លិខិតបញ្ជាក់ថា មានសុខភាពល្អគ្រប់គ្រាន់ ដែលអាចយកប្ដីបាន។

យោងតាមការយល់ឃើញរបស់កុលសម្ព័ន្ធនេះ ទម្លាប់នេះរបស់ពួកគេគឺ ដើម្បីហ្វឹកហាត់កម្លាំងស៊ូទ្រាំរបស់ស្ត្រី នៅពេលទៅតាមស្វាមី និងរស់នៅក្នុងគ្រួសារខាងម្ដាយក្មេក។

តាមជាក់ស្ដែង ជំនឿខាងលើនេះ បាន និងកំពុងតែធ្វើឱ្យពួកគេ ពិសេសគឺស្ត្រី ត្រូវក្លាយជាទាសករផ្លូវភេទគួរឱ្យអាម៉ាស់។ ក្រៅពីនេះ កុលសម្ព័ន្ធនៅតំបន់ខ្ពង់រាបទីបេនេះ ក៏នៅមានទំនៀមទម្លាប់ «នំមិនធំជាងនាលិ» នៅក្នុងរឿងអាពាហ៍ពិពាហ៍របស់កូនចៅផងដែរ៕

ប្រភព៖ Jimmynelson
ប្រែសម្រួល៖ បុត្រា

April 30, 2021

បង្រៀនកូនឱ្យមានរបៀបវិន័យ តាំងពីនៅក្មេង

ក្មេងនាយុគសម័យថ្មីនេះមិនសូវជាស្ដាប់ឪពុកម្ដាយប៉ុន្មានឡើយ ដោយសារតែភាពឌឺរឹង និងភាពរពឹសឥតឈប់របស់គេ ពីទង្វើការធ្វើតាមអ្វីផ្សេងៗទាំងពីសង្គមជុំវិញខ្លួន ពីទូរទស្សន៍ ឬពីមិត្តភក្តិ ដែលបើសិនជាឪពុកម្ដាយបណ្តោយឱ្យកូនតូចខ្វះរបៀបវិន័យយូរៗទៅពិតជានឹងក្លាយជាការបណ្តុះឱ្យគេប្រមូលសន្សំទម្លាប់និស្ស័យមិនល្អទាំងនោះរហូតក្លាយជាក្មេងខូចច្រងេងច្រងាង ក្លាយជាបញ្ហារបស់សង្គមទៅថ្ងៃមុខដែលសុទ្ធតែជារឿងមិនល្អសម្រាប់ឪពុកម្ដាយ និងខ្លួនគេផ្ទាល់ទាំងអស់។

វិធីការសាងរបៀបវិន័យដល់កូន

1-ប្រាប់ និងដាស់តឿនកូនដោយពាក្យសម្ដី

ពាក្យសម្ដីគឺជាគ្រឿងដាស់តឿនចិត្តដំបូងដែលយើងអាចប្រាប់ទៅកូនបានយ៉ាងងាយបំផុត តែត្រូវប្រើពាក្យសម្ដីដែលទន់ភ្លន់ ចិត្តត្រជាក់ មិនជេស្ដីបន្ទោសថាឱ្យខ្លាំងៗ កូនក៏នឹងកើតភាពទន់ភ្លន់ ដាក់ខ្លួន និងស្ដាប់យើងមិនខាន។

2-ធ្វើជាគំរូល្អដល់កូន

ព្រោះឪពុកម្ដាយគឺជាគ្រូដំបូងគេរបស់កូន មានន័យថា ទង្វើរបស់ឪពុកម្តាយគឺជាគំរូដ៏ល្អបំផុតរបស់កូន ដូច្នេះហើយទើបយើងត្រូវធ្វើខ្លួនឱ្យក្លាយជាគំរូល្អជាមួយកូន។ ត្រូវយកចិត្តទុកដាក់ពីរបៀបវិន័យរបស់ខ្លួនឯងជាមុនដូចជា ទុកដាក់របស់របរឱ្យមានរបៀប បើក-បិទភ្លើង ឬទូរទស្សន៍ឱ្យមានពេលវេលា ដើម្បីឱ្យកូនឃើញជាគំរូដែលល្អ និងប្រតិបត្តិតាមបានយា់ងងាយស្រួល។

3-ការទិតៀនប្រដៅ

យើងគួរទិតៀនប្រដៅចំពោះតែទង្វើដែលមិនត្រឹមត្រូវជារឿងៗដោយឡែកពីគ្នា ទិតៀនប្រដៅយ៉ាងមានហេតុផល មិនទាញរឿងផ្សេងមកពាក់ព័ន្ធ ឬម៉ៅរួមថា គេជាក្មេងមិនល្អនោះទេ។

4-មិនគួរសម្លុតគំរាមកូនឱ្យខ្លាចនោះទេ

បើយើងប្រើការសម្លុតគំរាមជាប្រចាំនឹងធ្វើឱ្យក្មេងមានទស្សនគតិបែបអវិជ្ជមានចំពោះយើងកាន់តែច្រើនឡើង គួរផ្តល់ភាពសំខាន់ទៅលើការបង្ហាត់បង្រៀនរបៀបវិន័យកូនយ៉ាងសន្សឹមៗទៅជាបណ្តើរៗ និងជាប់លាប់វិញប្រសើរជាង។ មិនគួរសម្លុតគំរាមដោយពាក្យសម្ដីដែលធ្ងន់ធ្ងរដើម្បីឱ្យគេភ័យខ្លាចនោះទេ ព្រោះវានឹងក្លាយជាចំណុចអន់ខ្សោយមួយដក់ជាប់នៅក្នុងជម្រៅចិត្តគេរហូត។

5-បង្កើនសុខភាពផ្លូវចិត្តវិជ្ជមានដល់កូន

អាចនឹងរកមើលអ្វីដែលជាកម្លាំងជំរុញចិត្តដល់កូនដូចជា ឱ្យរង្វាន់បើសិនជាប្រតិបត្តិបានតាមរបៀបវិន័យបានគ្រប់មួយអាទិត្យ ឬគ្រប់មួយខែជាដើម អាចនឹងនាំទៅដើរលេងនៅខាងក្រៅ ឬទិញរបស់លេងឱ្យជាដើម។

6-បង្រៀនពីតិចនិកការចាត់ការខ្លួនឯងដល់កូន

ពោលគឺ នៅពេលមានអារម្មណ៍ធុញថប់តានតឹង ឬខឹង ក៏ឱ្យនៅម្នាក់ឯងស្ងាត់ៗ រម្ងាប់សតិអារម្មណ៍ដើម្បី

ឱ្យចិត្តត្រជាក់ដោយខ្លួនឯង ឬរកបទចម្រៀងមកស្ដាប់ មើលទូរទស្សន៍ដើម្បីបន្ធូរអារម្មណ៍ទាំងនោះឱ្យល្អឡើងវិញជាដើម។ នៅពេលលោកអ្នកបង្ហាត់កូនបែបនេះ នឹងធ្វើឱ្យគេធំឡើងព្រមជាមួយវិធីគ្រប់គ្រងចាត់ការអារម្មណ៍បានយ៉ាងល្អ និងធ្វើឱ្យគេរស់នៅរួមសង្គមជាមួយអ្នកដទៃបានយ៉ាងគ្មានបញ្ហាទៀតផង។

ការបង្ហាត់បង្រៀនពីរបៀបវិន័យទាំងនេះដល់កូននឹងទទួលបានជោគជ័យក៏នៅពេលណាដែលវាកើតឡើងយ៉ាងជាប់លាប់ មិនដាច់ ឬខ្វះចន្លោះ ប្រៀបដូចជាការធ្វើការងារ បើធ្វើមិនឈប់នឹងកើតមានប្រសិទ្ធិយ៉ាងខ្លាំង តែបើសិនមានការលើកលែង ឬការអនុលោម ឬឪពុកម្តាយនឿយណាយ ឬនឿយហត់ ព្រងើយកន្តើយចំពោះទង្វើរបស់កូននោះ វានឹងធ្វើឱ្យច្បាប់វិន័យលែងជាច្បាប់វិន័យតទៅទៀតហើយ ហើយកូនរបស់យើងក៏នឹងគ្មានផ្លូវមានរបៀបវិន័យយ៉ាងពិតប្រាកដ។ ដូច្នេះ ចូរឧស្សាហ៍បង្កើនឧបនិស្ស័យនេះដល់គេតាំងពីនៅតូចៗប្រសើរជាង ព្រោះមានឈ្មោះថា កូនឈើនៅតូចៗ យ៉ាងណាក៏ងាយពត់ជាដើមឈើដែលធំហើយដែរ៕

April 30, 2021

Elon Musk ត្រូវ tag ចូលអត្ថបទដែលចោទថា លោក «បញ្ជាលើតម្លៃ» Bitcoin និងសំងំ «ទិញថោក-លក់ថ្លៃ» ដោយប្រើ «ឧបាយកលទីផ្សារ» តែ CEO របស់ Tesla តបវិញមួយឃ្លា ទាក់ទាញបានការចូលចិត្តជិត 100,000លើក

នៅពេលត្រូវបានគេចោទថាជា អ្នក «បញ្ជាលើតម្លៃ» របស់រូបិយវត្ថុអេឡិចត្រូនិក Bitcoin និងបាន «ច្រកហោប៉ៅ» រាប់រយលានដុល្លារ មហាសេដ្ឋី Elon Musk បានចេញមុខ ឆ្លើយតបដោយផ្ទាល់ និងទទួលបានការបន្ទរ និងគាំទ្រដោយអ្នកសារព័ត៌មានរបស់ Bloomberg។

អ្នកយកព័ត៌មាន មកពីអង្គភាព Bloomberg ឈ្មោះ Matt Levine ថ្មីៗនេះ បានសរសេរអត្ថបទមួយដែលនិយាយអំពីទំនាក់ទំនងរវាងក្រុមហ៊ុន Tesla, Elon Musk និង Bitcoin។ លោក Matt Levine បានដកស្រង់ចំណុចសំខាន់ៗដែលគួរឱ្យចាប់អារម្មណ៍ ដូចខាងក្រោម៖

Tesla សំងំទិញរូបិយវត្ថុអេឡិចត្រូនិក Bitcoin មួយចំនួន (ពេលវានៅមានតម្លៃទាប)។
Tesla ប្រកាសថា Bitcoin គឺជាខ្ទង់វិនិយោគល្អ ហើយថា ពួកគេបានទិញរូបិយវត្ថុនេះ។
តម្លៃ Bitcoin ចាប់ផ្ដើមឡើងថ្លៃ ព្រោះតែមានក្រុមហ៊ុនធំៗជាច្រើន ទទួលយកការទូទាត់ដោយប្រើប្រាក់នេះ។ ប៉ុន្តែ មូលហេតុចម្បងនោះគឺ «ទ្រឹស្ដីទីផ្សារ Elon Musk» ព្រោះថា អ្វីដែលលោក Musk បានទិញ គឺវាសុទ្ធតែឡើងថ្លៃ។
Tesla សំងំលក់ចេញ Bitcoin មួយចំនួន និងរកបានប្រាក់ចំណេញរាប់រយលានដុល្លារ។
Musk បង្ហោះសារថា តម្លៃ Bitcoin ខ្ពស់ពេកហើយ។
តម្លៃ Bitcoin ចាប់ផ្ដើមធ្លាក់ ក៏ព្រោះតែ «ទ្រឹស្ដីទីផ្សារ Elon Musk»។
វិលត្រលប់ទៅរកជំហានទី1 (Tesla សំងំទិញ Bitcoin មួយចំនួន នៅពេលវាចុះថោក)។

កាលពីថ្ងៃចន្ទ ក្រុមហ៊ុន Tesla បានប្រកាសរបាយការណ៍ហិរញ្ញវត្ថុប្រចាំត្រីមាសរបស់ខ្លួន រួមនឹងអ្វីដែលបានកើតឡើងដូចទៅនឹងការព្យាករ៖

Tesla រកបានប្រាក់ចំណេញខ្ពស់ជាងមុន ដោយសារបានលក់ Bitcoin ចំនួន 10% ស្មើនឹង 101លានដុល្លារ ក្នុងចំណោម Bitcoin សរុប ដែលក្រុមហ៊ុននេះកំពុងកាន់កាប់។

អ្នកយកព័ត៌មាន Matt Levine បានផ្ញើសារអបអរជាលក្ខណៈឯកជន ជូនដល់ Tesla និង Elon Musk។ ប្រការនេះ គ្រប់គ្នាយល់យ៉ាងណា? មានពាក្យចចាមអារ៉ាមមួយចំនួន ដែលត្រូវបានលើកឡើង ដោយសង្ស័យថា មានអំពើបោកបញ្ឆោតណាមួយ នៅពេល Tesla ទិញ Bitcoin ខណៈ Elon Musk និយាយថា ចូលចិត្ត ហើយក្រោយមកក៏លក់វាចេញ។

តួយ៉ាងដូចជា ករណីអ្នកលេង Twitter ម្នាក់ដែលមានឈ្មោះថា Dave Portnoy បានបង្ហោះអត្ថបទមួយដែល tag លោក Elon Musk ចូល និយាយអំពីបញ្ហានេះ។ Dave ប្រើពាក្យ «pump» (សប់បំប៉ោង) ដើម្បីអធិប្បាយអំពីសកម្មភាពរបស់ Tesla នៅលើ Twitter។ Dave សរសេរថា៖ «តាមខ្ញុំយល់គឺយ៉ាងនេះ៖ Elon Musk ទិញ Bitcoin ហើយក្រោយមក គាត់បំប៉ោង ដោយការលើកសរសើរចំពោះ Bitcoin។ តម្លៃ របស់ Bitcoin ក៏បានកើនឡើង។ ហើយក្រោយមក Elon Musk លក់ចេញ និងរកបានប្រាក់ចំណេញយ៉ាងក្រាស់ក្រែល»។

មិនយូរប៉ុន្មាន មហាសេដ្ឋី Elon Musk បានឆ្លើយតបវិញ នៅខាងក្រោមអត្ថបទនេះថា៖ «អូ អត់ទេ ខ្ញុំមិនបានធ្វើដូច្នេះទេ។ Tesla លក់ 10% នៃ Bitcoin ដែលកំពុងកាន់កាប់គឺជា រឿងចាំបាច់ ដើម្បីបង្ហាញអំពីភាពងាយស្រួលក្នុងការដកប្រាក់របស់ Bitcoin ដែលដូចទៅនឹងស្ថាប័នជំនួស សម្រាប់ការផ្ញើប្រាក់»។

ចម្លើយរបស់លោក Musk ទទួលបានការចុចចូលចិត្តជិត 100,000លើក, ការចែករំលែកបន្តចំនួន 16.4k និងការបញ្ចេញមតិ ជិត 5k។

នៅក្នុងថ្ងៃចេញរបាយការណ៍ហិរញ្ញវត្ថុ កាលពីថ្ងៃចន្ទដើមសប្ដាហ៍នេះ CFO របស់ Tesla គឺលោក Zachary Kirkhorn បាននិយាយថា Tesla ចាត់ទុក Bitcoin ជាកន្លែងសម្រាប់រក្សាទុកសាច់ប្រាក់ ក្នុងពេលដែលវានៅតែអាចរក្សាបាននូវភាពងាយស្រួលក្នុងការដកប្រាក់ ពិសេសគឺនៅក្នុងស្ថានភាពដែលវិស័យវិនិយោគបុរាណ កំពុងប្រែជាអន់ថយ និងមិនទាក់ទាញ។

«យើងជឿជាក់ក្នុងរយៈពេលវែងចំពោះតម្លៃរបស់ Bitcoin។ គោលដៅរបស់យើងគឺបន្តរក្សានូវអ្វីដែលកំពុងមាន ក្នុងរយៈពេលវែង និងបន្តសន្សំ Bitcoin តាមរយៈការទូទាត់របស់អតិថិជនដែលទិញរថយន្តដោយប្រាក់អេឡិចត្រូនិកនេះ»។

ទាក់ទងនឹងបញ្ហានេះ ក្នុងអត្ថបទរបស់ខ្លួន អ្នកយកព័ត៌មាន Levine មកពីអង្គភាព Bloomberg ក៏បំភ្លឺលើចំណុចមួយចំនួន៖

ខ្ញុំមិនយល់ថា មានបញ្ហាអ្វីមួយដែលកើតឡើងពីការដែល Tesla ទិញ Bitcoin។ ពួកគេទិញ Bitcoin ហើយ ក្រោយមកលក់វាក្នុងតម្លៃខ្ពស់។ មិនមានសេចក្ដីលម្អិតណាបញ្ជាក់ថា Tesla និង Musk និយាយកុហក ឬមានចេតនាប្រើល្បិចក្នុងទីផ្សារ។
ខ្ញុំយល់ថា សកម្មភាពរបស់ Tesla គឺពិតជាអស្ចារ្យ ហើយខ្ញុំអបអរចំពោះពួកគេ និងសង្ឃឹមថា ពួកគេនឹងធ្វើដូច្នេះទៀត។
ខ្ញុំគិតថា ប្រសិនបើ ជា Elon Musk និងមានសមត្ថភាពធ្វើឱ្យតម្លៃ Bitcoin ឡើងថ្លៃ តាមរយៈការបង្ហោះសារមួយឃ្លា តើអ្នកនឹងធ្វើដូច្នេះដែរ ឬទេ?

ប្រភព៖ Bloomberg
ប្រែសម្រួល៖ បុត្រា

April 29, 2021

ប្រាក់ចំណូលរបស់ក្រុមហ៊ុន Apple និង Facebook កើនឡើងខ្ពស់ ទោះបីពិភពលោកកំពុងជាប់ដៃប្រយុទ្ធប្រឆាំង Covid-19

ប្រាក់ចំណូលនៅក្នុងត្រីមាសទីមួយរបស់ក្រុមហ៊ុន Apple និង Facebook សុទ្ធតែកើនប្រហែល 50% បើធៀបនឹងអំឡុងពេលដូចគ្នា កាលពីឆ្នាំមុន។

កាលពីថ្ងៃទី 28 ខែមេសា ឆ្នាំ2021 ក្រុមហ៊ុន Apple និង Facebook បានបញ្ចេញរបាយការណ៍ហិរញ្ញវត្ថុប្រចាំត្រីមាសទីមួយរបស់ពួកគេ។ របាយការណ៍បង្ហាញថា Apple រកបានចំណូល 89.6ពាន់លានដុល្លារ កើន 54% បើធៀបនឹងត្រីមាសទីមួយនៃឆ្នាំ2020 ដែលតួលេខនេះគឺ លើសពីការព្យាកររបស់ក្រុមអ្នកវិភាគនាពេលកន្លង។ មូលបត្រ Apple ក៏បានកើនឡើងជាង 4% នៅក្នុងការជួញដូរក្រៅម៉ោង។

នេះក៏ជាត្រីមាសទីពីរ ដែល Apple រកបានចំណូលច្រើនជាងមុនពីរខ្ទង់ ជាមួយនឹងផលិតផល និងសេវាកម្មគ្រប់ប្រភេទរបស់ក្រុមហ៊ុននេះ។ ចំពោះផ្នែកដែលសំខាន់បំផុត (iPhone) គឺមានកំណើន 65.5% បើធៀបនឹងឆ្នាំទៅ។ ជាងនេះ ចំណូលបានមកពី Mac និង iPad ក៏កើន 70% និង 79%។

Apple Store នៅទីក្រុង Charleston នៃរដ្ឋ Carolina ខាងត្បូង របស់សហរដ្ឋអាមេរិក កាលពីឆ្នាំ2020

Luca Maestri ប្រធានផ្នែកហិរញ្ញវត្ថុរបស់ Apple បានឱ្យដឹងថា ក្រុមហ៊ុននេះព្យាករថា ប្រាក់ចំណូលនៅក្នុងត្រីមាសទីពីរ នឹងកើនបន្ថែមពីរខ្ទង់ ធៀបនឹងអំឡុងពេលដូចគ្នាកាលពីឆ្នាំ2020។ Apple ក៏នឹងបង្កើនភាគលាភថែម 7% ទៀត ដល់ភាគហ៊ុនិក និងចំណាយ 90ពាន់លានដុល្លារ ដើម្បីទិញមូលបត្ររបស់ខ្លួន ដែលតួលេខនេះ ខ្ពស់ជាងពីរឆ្នាំមុននេះ។

កាលពីប៉ុន្មានខែមុន Apple បានឱ្យដឹងថា ការរកស៊ីរបស់ក្រុមហ៊ុនមានការកើនឡើងនៅក្នុងអំឡុងវិបត្តិ Covid-19 គ្រាដែលអ្នកប្រើប្រាស់ និងក្រុមហ៊ុននានា នាំគ្នាទិញកុំព្យូទ័រដើម្បីធ្វើការ និងកំសាន្តនៅផ្ទះ ក្នុងពេលសង្គមត្រូវបានបិទខ្ទប់។

ដោយឡែក Facebook វិញ ក៏រកបានចំណូលខ្ពស់ជាងត្រីមាសទីមួយនៃឆ្នាំ2020 ដល់ទៅជិត 50% នៅក្នុងត្រីមាសទីមួយនៃឆ្នាំ2021នេះ ពោលគឺឡើងដល់ 26.17ពាន់លានដុល្លារ។ ប្រាក់ចំណេញសុទ្ធ កើនដល់ 94% ស្មើនឹង 9.5ពាន់លានដុល្លារ។

តំបន់ទីស្នាក់ការកណ្តាលនៃក្រុមហ៊ុនសាជីវកម្ម Facebook នៅតំបន់ Menlo Park រដ្ឋ California សហរដ្ឋអាមេរិក កាលពីឆ្នាំ2019

ក្រុមហ៊ុន Facebook បានបង្ហើបឱ្យដឹងថា មូលហេតុនៃកំណើនខាងលើគឺដោយសារតម្លៃមធ្យមសម្រាប់ការផ្សារពាណិជ្ជកម្មមួយ កើន 30% រីឯតួលេខនៃការផ្សាយពាណិជ្ជកម្ម ក៏កើនបន្ថែម 12%។ Facebook ព្យាករថា កំណើននៃប្រាក់ចំណូល នឹងបន្តមានស្ថិរភាព ឬកើនឡើងថែមទៀតនៅក្នុងត្រីមាសទីពីរនៃឆ្នាំ2021នេះ។

នាយកប្រតិបត្តិរបស់ Facebook លោក Mark Zuckerberg បានឱ្យដឹងថា ក្រុមហ៊ុនកំពុងតែផ្ដោតលើការបន្ថែមមុខងារមួយចំនួនសម្រាប់ផ្នែកពាណិជ្ជកម្មអេឡិចត្រូនិកនៅលើ Facebook។ សេវាកម្ម Marketplace របស់ Facebook បច្ចុប្បន្ន មានអ្នកប្រើប្រាស់ជាង 1ពាន់លាននាក់ ជារៀងរាល់ខែ៕

ប្រភព៖ CNBC
ប្រែសម្រួល៖ បុត្រា

April 29, 2021

ការមើលថែទាំស្បែកមុខ ឱ្យនៅស្រស់ស្អាតជានិច្ច សម្រាប់ស្ត្រីវ័យអស់រដូវ

ស្ត្រីៗដូចពួកយើង ពេលឈានចូលដល់វ័យអស់រដូវហើយនោះ ភាពប្រែប្រួលដែលកើតឡើង ដែលមើលឃើញច្បាស់នោះគឺ បញ្ហាស្បែក ដែលរុះរោយ ស្រពោនអាប់។ មើលទៅលែងស្អាតស្រស់ ភ្លឺថ្លាដូចពីមុន រហូតធ្វើឱ្យស្ត្រីៗជាច្រើននាក់ ត្រូវប្រញាប់ស្វះស្វែង រិះរកវិធីជាច្រើន មកមើលថែបំប៉នស្បែកយ៉ាងប្រញាប់។ ថ្ងៃនេះ យើងសូមនាំយកគន្លឹះល្អៗ ដែលជួយបំប៉ន និងថែទាំស្បែកមុខ ឱ្យស្អាតម៉ដ្ឋថ្លា មកជម្រាបជូនដូចខាងក្រោមនេះ៖

-មើលថែទាំ និងបំប៉នស្បែកឱ្យសមល្មម ដោយការលាបឃ្រីមបំប៉ន ដែលមានគុណសម្បត្តិជួយពន្យារភាពចុះទ្រុឌទ្រោមរបស់កោសិកា និងស្តារសភាពស្បែក ដែលជ្រាយយារ ឱ្យស្មើតឹងឡើងវិញ ដែលមានវីតាមីនA វីតាមីនC វីតាមីនE និងខូលឡាជេន។ ក្រៅពីនេះ គួរលាបឃ្រីមការពារកម្ដៅថ្ងៃ ដែលមានចំណែកផ្សំរបស់ ម៉យ

ស្ជើរ៉ាយហ្ស័រ និងសារធាតុពន្យារការកើតស្លាកស្នាម ដើម្បីជួយការពារការឡើងស្រអាប់ខ្មៅ និងមិនឱ្យកើតស្នាមជ្រួញយារនៅលើស្បែក ដោយសារត្រូវកម្ដៅថ្ងៃ។

-សម្អាតស្បែកមុខ ឱ្យស្អាតស្រស់ថ្លាជាប់ជានិច្ច…ដោយសារតែស្ត្រីក្នុងវ័យ ៤០ជាង ភាគច្រើនតែងប្រើគ្រឿងសម្អាង បិទបាំងស្លាកស្នាម ជាប្រចាំរៀងរាល់ថ្ងៃនោះ ទើបជាហេតុធ្វើឱ្យស្បែកមើលទៅចុះខ្សោយ និងងាយកើតមានស្នាមជ្រីវជ្រួញ ដូច្នេះដើម្បីកុំឱ្យស្បែកមុខ កាន់តែមានបញ្ហាខ្លាំងជាងមុននោះ អ្នកគួរប្រើម្សៅមេកអាប់ ដូចជា ម្សៅទ្រនាប់ ឬ BBឃ្រីម សាច់ស្តើង។ បន្ទាប់ពីនោះ ពេលត្រឡប់មកដល់ផ្ទះហើយ គួរជូតសម្អាតស្បែកមុខ ដោយការយកសំលីជ្រលក់ទឹកឃ្លីនហ្ស៊ីង លាងសម្អាតគ្រឿងសម្អាង ហើយសឹមជូតចេញយ៉ាងថ្នមដៃបំផុត។

-គេងសម្រាកឱ្យបានគ្រប់គ្រាន់…ព្រោះក្នុងខណ:ដែលយើងកំពុងគេងលក់ រាងកាយនឹងបញ្ចេញសារធាតុ មេឡាថូនីន និងសារធាតុអេនដូហ្វ៊ីន ដែលមានចំណែកជួយធ្វើឱ្យផ្ទៃមុខ ឡើងស្រស់ថ្លាភ្លឺរលោង និងមើលទៅក្មេងជាងវ័យ។

-ទទួលទានអាហារបំប៉នស្បែក ដែលមានដូចជា អាហារពពួកបន្លែ និងផ្លែឈើស្រស់ពណ៌បៃតង ពណ៌លឿង និងពណ៌ក្រហម។ ដោយសារតែបន្លែផ្លែឈើទាំងអស់នោះ សម្បូរទៅដោយវិតាមីន សារធាតុរ៉ែ រួមទាំងសារធាតុប្រឆាំងសារធាតុរ៉ាឌីកាល់សេរី ធ្វើឱ្យស្បែកស្អាតស្រស់ថ្លា និងមានភាពយឺតតឹង។

-ញ៉ាំទឹកឱ្យបានច្រើន ព្រោះការញ៉ាំទឹក មិនត្រឹមតែជួយចិញ្ចឹមប្រព័ន្ធការធ្វើការងាររបស់រាងកាយ ឱ្យប្រក្រតីនោះទេ វានៅហុចផលល្អដល់ស្បែក របស់អ្នកទៀតផង។ ជួយពន្យឺតភាពជ្រួញយាររបស់ស្បែក ថែមទាំងផ្លាស់ប្តូរស្បែកចាស់ ដែលធ្លាប់តែក្រៀមស្វិត ឱ្យមើលទៅស្អាតតឹងណែន មានសុខភាពល្អមិនចាញ់ឃ្រីមបំប៉នស្បែកតម្លៃថ្លៃៗប៉ុន្មានឡើយ។

-ចៀសវាងពីអ្វី ដែលធ្វើឱ្យស្បែកក្រៀមជ្រួញមិនស្រស់ថ្លា ដូចជាការដុសមុខខ្លាំងៗ ការធុញថប់មួម៉ៅ ការញ៉ាំភេសជ្ជៈដែលមានជាតិអាល់កុល និងកាហ្វេអ៊ីន ដែលជាកត្តាបំផ្លាញភាពស្រស់ថ្លារបស់ស្បែក ឱ្យឆាប់រុះរោយ និងមើលទៅចាស់ជាងវ័យ។

កុំរវល់តែឆ្លុះកញ្ចក់ ហើយអង្គុយពិបាកចិត្តនឹងបញ្ហាស្បែកមុខតទៅទៀតអី ចូរនាំគ្នាមកចាប់ផ្តើមមើលថែបំប៉នស្បែក ឱ្យនៅតែស្អាត ចាប់ពីថ្ងៃនេះតែម្តង ក៏មិនទាន់ហួសពេលដែរ៕

April 29, 2021

តើនារីកូរ៉េ មើលថែទាំស្បែកបែបណា បានជា-សភ្លឺថ្លា មានសម្រស់ជាប់ជានិច្ច?

បើមិននិយាយពីរឿងវះកាត់ កែកុនរូបសម្ផស្ស និងការតុបតែងមុខស្ទីលកូរ៉េ ទេនោះ ការមានស្បែកមុខដ៏សស្អាត ម៉ដ្ឋខៃ របស់ក្រមុំៗជនជាតិកូរ៉េ បានធ្វើឱ្យនារីៗស្រុកយើង នាំគ្នាលួចនឹកច្រណែនមិនស្ទើរឡើយ… ព្រោះមិនថាពួកនាងចង់តុបតែងមុខ ឬតែងខ្លួនម៉ូដណាក៏ដោយ ក៏មើលទៅឃើញស្អាត ស្រស់ប្រឹមប្រីយ៍ទាំងអស់តែម្ដង។ ថ្ងៃនេះ យើងសូមនាំយកគន្លឹះល្អៗ ក្នុងការមើលថែទាំស្បែក របស់នារីៗកូរ៉េ មកជម្រាបជូនដូចខាងក្រោម៖

-យកចិត្តទុកដាក់ ថែបំប៉នស្បែក យ៉ាងពេញទំហឹង

ដោយការជ្រើសរើសប្រើឃ្រីមបំប៉នស្បែកសម្រាប់ពេលថ្ងៃ និងពេលយប់យ៉ាងទៀងទាត់ និងជាប់ជានិច្ច។ ជាពិសេសសម្រាប់អ្នកដែលមានស្បែកមុខស្ងួត ឬស្បែកមុខដែលខ្វះការថែបំប៉ន ចាំបាច់ត្រូវតែប្រើជំនួយការ ជួយបន្ថែម ដូចជា សេរ៉ូមថែបំប៉នប្រភេទខាប់ ឬម៉ាស់ផ្ទៃមុខ មុនពេលគេងជាប្រចាំ ដើម្បីជួយបង្កើនសំណើម និងរក្សាតុល្យភាពរបស់ស្បែកមុខ។

-មិនធ្វេសប្រហែស ក្នុងការលាបឃ្រីមការពារកម្ដៅថ្ងៃ

នេះគឺជាគន្លឹះសំខាន់ ក្នុងការមើលថែទាំស្បែក ដែលនារីៗកូរ៉េ បានទទួលការបណ្តុះបណ្តាលមកតាំងពីក្មេង។ សម្រាប់ការលាបឃ្រីមមការពារពន្លឺថ្ងៃ មុនពេលតុបតែងមុខគ្រប់ពេលនេះ គឺដើម្បីជួយការពារស្បែកមុខ មិន

ឱ្យខ្មៅស្រពោន និងស្អាតស្រស់ថ្លាជាប់ជានិច្ច ថែមទាំងជួយថែរក្សាសភាពស្បែកផ្ទៃមុខ ឱ្យនៅតែស្រស់ស្អាត ភ្លឺរលោង មិនចាស់មុនអាយុទៀតផង។

-ប្រើប្រាស់ផលិតផល ដែលមានចំណែកផ្សំរបស់សារធាតុ វ៉ៃធេននីង (Whitening)

ដើម្បីជាការការពារ មិនឱ្យស្បែករបស់ផ្ទៃមុខ កើតស្នាមជាំអុចខ្មៅ និងមានភាពស្រពោនខ្មៅនោះ ក្រមុំៗកូរ៉េ និយមប្រើឃ្រីមថែបំប៉នស្បែកមុខ រួមទាំងគ្រឿងថែបំប៉នស្បែក ដែលមានសារធាតុ វ៉ៃធេននីង ដើម្បីជួយសម្រួលសភាពស្បែកឱ្យម៉ដ្ឋ ភ្លឺថ្លា និងមានភាពជឿជាក់ក្នុងចិត្តរៀងរាល់ថ្ងៃ។

-ធ្វើស្ក្រាប់ផ្ទៃមុខ ខាត់ស្បែកឱ្យស្អាតជាប្រចាំ

ដោយការយកបន្លែ និងផ្លែឈើស្រស់ ដែលសម្បូរដោយវីតាមីន ដែលចាំបាច់ចំពោះស្បែក ដូចជា ផ្លែក្រូច ស្ត្រប៊ើរី គីវី ឬមើមការ៉ុតជាដើម ដោយអាចយកមកកិនក្រឡុក រួមជាមួយទឹកដោះគោឆៅ ឬទឹកឃ្មុំបន្តិច ហើយយកមកបំពោកលើផ្ទៃមុខ ទុកចោល 20នាទី។ ធ្វើជាប្រចាំ 1សប្តាហ៍ 3-4ដង នឹងជួយស្តារសភាពស្បែកដែលខូច ឱ្យស្អាតស្រស់ ថ្លា ដូចក្រមុំកូរ៉េ តែម្តង។

-ហាត់ប្រាណ និងគេងសម្រាកឱ្យបានគ្រប់គ្រាន់

ព្រោះការហាត់ប្រាណ ក្រៅពីជួយឱ្យលំហូរវិលរបស់ឈាមនៅក្នុងរាងកាយដំណើរការល្អ ជួយធ្វើឱ្យរាងកាយមាំមួនស្វាហាប់ឡើងហើយ នៅបានបង្កើនការបន្សាយឈាម ធ្វើឱ្យសាច់ស្បែក បានទទួលការជំរុញរហូតមើលឃើញស្រស់ថ្លា ភ្លឺរលោងទៀតផង។ ក្រៅពីនេះ នារីៗកូរ៉េ នៅបានប្រើគន្លឹះងាយៗក្នុងការថែទាំស្បែក ដោយគ្រាន់តែគេងឱ្យលក់ សម្រាកឱ្យបានគ្រប់គ្រាន់ ក៏វាមានចំណែកជួយ ឱ្យប្រព័ន្ធឈាមរត់ ធ្វើការបានប្រក្រតី ធ្វើឱ្យស្បែកស្អាត ស្រស់ថ្លា ផូរផង់ឡើងបានដែរ។

-អាហារ ការហូបចុក ក៏សំខាន់

អ្នកដែលគិតថា ការមានស្បែកស្រស់ស្អាត គឺបានមកពីការលាបឡេ លាបឃ្រីម តែម្យ៉ាងនោះ ប្រហែលជាត្រូវផ្លាស់ប្តូរគំនិតនេះជាថ្មីហើយ ព្រោះក្រមុំៗកូរ៉េ ជឿជាក់ថា បើយើងបានទទួលទានអាហារ ដែលមានប្រយោជន៍ មានវីតាមីន និងសារជាតិអាហារល្អៗដល់ស្បែកយ៉ាងពេញទំហឹង ដូចជា ទឹកដោះ តៅហ៊ូ សាច់ត្រី បន្លែស្លឹកបៃតង និងផ្លើឈើផ្សេងៗនោះ វាមានចំណែកជួយឱ្យស្បែកស្អាតភ្លឺថ្លា ចេញពីខាងក្នុងមកបានដូចគ្នាដែរ។

ថាៗទៅ គន្លឹះក្នុងការមានផ្ទៃមុខស្រស់ស្អាតភ្លឺថ្លា បែបក្រមុំកូរ៉េ មិនមានអ្វីពិបាកដូចដែលមនុស្សជាច្រើនគិតនោះឡើយ គ្រាន់តែយើង យកចិត្តទុកដាក់ និងមើលថែទាំស្បែកឱ្យបានច្រើន លើសពីអ្វីដែលយើងធ្លាប់តែខ្ជិល ឬខ្វះការថែបំប៉នស្បែក យូររាប់ខែមកហើយនោះ តែបន្តិចប៉ុណ្ណោះ។ សូមនាំគ្នាសាកល្បង បែរមកមើលថែទាំស្បែក និងរាងកាយចាប់តាំងពីថ្ងៃនេះតែម្តង ក៏មិនទាន់ហួសពេលដែរចា៎ស៕

April 29, 2021

សហម្ចាស់ក្លិប ManU ចង់លក់ក្លិបចេញ កុំឱ្យខាតទាន់

ក្រោយបរាជ័យក្នុងការចូលរួមលេងនៅលីកថ្មី European Super League ម្ចាស់ភាគហ៊ុនធំរបស់ក្លិបបិសាចក្រហម Manchester United លោក Joel និង Avram Glazer ពិតជាខកចិត្តយ៉ាងខ្លាំង និងកំពុងមានគម្រោងដាក់លក់ក្លិបនៅ Premier League មួយនេះប្រសិនបើមានសំណើសមរម្យណាមួយនោះ។

ក្នុងនោះបើតាមគេហទំព័រ The Mirror បានឱ្យដឹងថា លោក Joel និង Avram Glazer គ្រោងនឹងដាក់លក់ក្លិប Man UTD ក្នុងចំនួនទឹកប្រាក់ 4ពាន់លានផោន (ឬប្រមាណ 5.5ពាន់លានដុល្លារ)ុ។

គួរឱ្យដឹងដែរថា ដោយសារតែកូវីដ-19 ទើបធ្វើឱ្យក្លិបធំៗជាច្រើននៅអឺរ៉ុប ហាក់រារែកចិត្តនៅក្នុងការដឹកនាំ និងវិនិយោគបន្ថែមទៅលើក្លិបរបស់ពួកគេ ដោយសារតែមិនអាចទាញយកផលចំណេញមកវិញបានគ្រប់គ្រាន់ហ្នឹងឯង៕

April 29, 2021

បើ Ronaldo ទៅ ManU 1រដូវកាល បានតែ 14លានដុល្លារប៉ុណ្ណោះ

ក្លិបបាល់ទាត់ Manchester United បានប្រកាសអំពីចំណាប់អារម្មណ៍របស់ខ្លួន ក្នុងការនាំយកអតីតកីឡាកររបស់ខ្លួន Christiano Ronaldo មកកាន់ក្លិបវិញ សម្រាប់រដូវកាល ២០២២ ខាងមុខនេះ។

ការដែល Manchester United ចាប់អារម្មណ៍បែបនេះ គឺដោយសារតែបានទទួលដំណឹងថា Juventus គ្រោងនឹងសេរ៉េ Ronaldo ចេញក្រោយចប់រដូវកាលនេះ ដោយសារតែកីឡាកររូបនេះ មិនសូវជាជួយក្លិបបានច្រើនប៉ុន្មាន ខណៈដែលក្លិបត្រូវចំណាយលុយច្រើនសន្ធឹក ដើម្បីចិញ្ចឹមកីឡាកររូបគេ។

យ៉ាងណាមិញ ប្រសិនបើ Ronaldo សុខចិត្តមកក្លិបចាស់វិញមែន គេត្រូវកាត់បន្ថយថ្លៃនឿយហត់អស់ពាក់កណ្ដាលដែលគេធ្លាប់ទទួលបានពេលនៅ Juventus ចំនួន 27លានផោនក្នុង 1ឆ្នាំ។ Juventus សព្វថ្ងៃក៏កំពុងជួបបញ្ហាហិរញ្ញវត្ថុដូចគ្នា និងកំពុងបារម្ភ ពីការមិនបានទៅលេង UCL នៅឆ្នាំក្រោយ។ ពួកគេស្ថិតនៅលេខ4 នៃតារាងពិន្ទុ Serie A លើក្រុមលេខ5 Napoli តែ 2ពិន្ទុប៉ុណ្ណោះ៕

April 29, 2021

Category: សង្គម និងសេដ្ឋកិច្ច