សង្គម និងសេដ្ឋកិច្ច - La Reine Media

Pfizer រកចំណូលបាន 3.5ពាន់លានដុល្លារ ពីការលក់វ៉ាក់សាំង Covid-19 ក្នុងត្រីមាសទីមួយ

Pfizer បានប្រកាសថា រកបានប្រាក់ចំណូល 3.5ពាន់លានដុល្លារ ពីវ៉ាក់សាំង Covid-19 នៅក្នុងរយៈពេល 3ខែដើមឆ្នាំ2021 ក្នុងនោះ ក្រុមហ៊ុនអាចចំណេញ 900លានដុល្លារអាមេរិក។

យោងតាមរបាយការណ៍ដែលត្រូវបានក្រុមហ៊ុនផលិតឱសថអាមេរិក ប្រកាសកាលពីម្សិលមិញ ខ្ទង់ចំណូលបានមកពីវ៉ាក់សាំង Covid-19 ក្នុងត្រីមាសទីមួយ ស្មើនឹង ¼ នៃចំណូលសរុបរបស់ Pfizer។ ក្រុមហ៊ុននេះ មិនបានបង្ហើបឱ្យដឹងអំពីខ្ទង់ចំណេញដែលបានមកពីវ៉ាក់សាំង Covid-19 ប៉ុន្តែ បានរំលឹកអំពីខ្ទង់ចំណេញមុននេះគឺ 20% នៃប្រាក់ចំណូល។

ដូច្នេះ ខ្ទង់ចំណេញមុនការបង់ពន្ធ ដែលបានមកពីវ៉ាក់សាំង Covid-19 ក្នុង 3ខែដំបូងនៃឆ្នាំ2021 របស់ Pfizer ត្រូវបានគេគណនាឃើញថា ឡើងដល់ 900លានដុល្លារ។

យ៉ាងនេះក្ដី ខ្ទង់ចំណេញជាក់ស្ដែងរបស់ Pfizer ត្រូវបានគេជឿថា ខ្ពស់ជាងនេះឆ្ងាយ ព្រោះក្រុមហ៊ុននេះ ក៏ទទួលបានការចែករំលែកប្រាក់ចំណូលពីដៃគូសហការ BioNTech របស់អាល្លឺម៉ង់ ដែលក្រុមហ៊ុននេះ នឹងប្រកាសរបាយការណ៍ហិរញ្ញវត្ថុសម្រាប់ត្រីមាសទីមួយ នៅសប្ដាហ៍ក្រោយ។ កាលពីខែមីនា BioNTech បានឱ្យដឹងថា ពួកគេរកបានចំណូលជិត 10ពាន់លានអឺរ៉ូ (11.8ពាន់លានដុល្លារអាមេរិក) ដោយយោងទៅតាមទិន្នន័យបញ្ជាទិញនៅអំឡុងពេលនោះ។

វ៉ាក់សាំង Covid-19 ត្រូវបានគេព្យាករថា នឹងបន្តរកចំណូលបានយ៉ាងច្រើនសន្ធឹកមកឱ្យ Pfizer និង BioNTech ពិសេសគឺនៅពេលដែលគ្រប់គ្នាត្រូវការចាក់រំលឹកជាទៀងទាត់។ Pfizer ព្យាករថា វ៉ាក់សាំង Covid-19 នឹងរកចំណូលឱ្យពួកគេបាន 26ពាន់លានដុល្លារក្នុងឆ្នាំនេះ ច្រើនជាងឆ្ងាយ បើធៀបនឹងការព្យាករ 15ពាន់លានដុល្លារនាពេលកន្លង។

ក្រុមហ៊ុន Pfizer ឱ្យដឹងថា ពួកគេបានបញ្ជូនវ៉ាក់សាំង 430លានដូសទៅឱ្យប្រទេស និងដែនដីចំនួន 91 រួចហើយ។ ប៉ុន្តែ Sharon Castillo ដែលជាអ្នកនាំពាក្យរបស់ Pfizer មិនបានបង្ហើបឱ្យដឹងអំពីតួលេខនៃវ៉ាក់សាំងដែលត្រូវបានបញ្ជូនទៅឱ្យប្រទេសក្រីក្រ ជាកន្លែងដែល Pfizer ធ្លាប់បានប្រកាសថា មិនយកចំណេញ។

ចំណែកទិន្នន័យរបស់អង្គការសុខភាពពិភពលោក (WHO) បានបង្ហាញថា Pfizer ផ្ដល់ជំនួយតែ 40លានដូសប៉ុណ្ណោះ សម្រាប់កម្មវិធី Covax របស់ WHO ដែលផ្ដល់វ៉ាក់សាំងដល់បណ្ដាប្រទេសក្រីក្រ ដែលនេះមិនទាន់ដល់ 2% នៃប្រាក់ចំណូលដែល Pfizer រួមនឹង BioNTech បានកំណត់គោលដៅក្នុងការផលិតនៅក្នុងឆ្នាំនេះ។

សារព័ត៌មានជាច្រើន បានឱ្យដឹងថា បច្ចុប្បន្ន សហរដ្ឋអាមេរិកត្រូវទិញវ៉ាក់សាំង Pfizer ក្នុងតម្លៃ 19.50ដុល្លារ/ដូស ខណៈដែលអ៊ីស្រាអែល យល់ព្រមទិញក្នុងតម្លៃ 30ដុល្លារ។ ចំណែកសហភាពអឺរ៉ុបវិញ ថ្មីៗនេះ បានសម្រេចទិញ 1.8ពាន់លានដូស ប៉ុន្តែ Pfizer មិនបានបង្ហើបឱ្យដឹងអំពីតម្លៃនោះទេ៕

ប្រភព៖ NY Times
ប្រែសម្រួល៖ បុត្រា

May 5, 2021

មានលុយត្រឹម 200 ដុល្លារជាង ក៏អាចទិញរថយន្តថ្មីជិះបានដែរ!

បច្ចុប្បន្នយើងសង្កេតឃើញថា ទីផ្សាររថយន្តថ្មីក្នុងព្រះរាជាណាចក្រកម្ពុជាកំពុងតែមានសន្ទុះកើនឡើងគួរឲ្យកត់ សម្គាល់ ដោយសារតែតម្លៃរថយន្តថ្មីមានតម្លៃប្រហាក់ប្រហែលទៅរថយន្តមួយទឹក ឬរថយន្តជជុះដែលមានលក់នៅលើទីផ្សារដែលទាំងនេះក៏ព្រោះតែមានការកែសម្រួលអត្រាអាករពិសេសលើមុខទំនិញមួយចំនួនរបស់រដ្ឋាភិបាលក្នុងការបញ្ចុះពន្ធនាំចូលរថយន្តថ្មីប្រភេទ SUV ផងដែរ។ ម្យ៉ាងទៀតគេសង្កេតឃើញថាការទិញរថយន្តតាមរយៈការបង់រំលស់ក៏កាន់តែមានភាពទូលំទូលាយនៅប្រទេសកម្ពុជា ជាមួយនឹងលក្ខខណ្ឌនៃការបង់រំលស់ ទំហំនៃប្រាក់កម្ចី អត្រាការប្រាក់ដ៏សម្បូរបែប ទៅតាមធនាគារ និងគ្រឹះស្ថានមីក្រូហិរញ្ញវត្ថុដែលបានកំណត់ ដូច្នេះហើយទើបការបង់រំលស់កាន់តែមានភាពងាយស្រួលជាងមុនដែលអាចតម្រូវបានស្ទើរតែគ្រប់តម្រូវការរបស់លោកអ្នក ទោះបីស្ថិតក្នុងកម្រិតជីវភាពទាប មធ្យម ឬធូរធាក៏ដោយ។ ថ្ងៃនេះដែរយើងខ្ញុំសូមណែនាំរថយន្តថ្មីមួយប្រភេទដែលមានតម្លៃសមរម្យជាងគេក្នុងចំណោមរថយន្តថ្មីក្នុងទីផ្សារប្រទេសកម្ពុជា ដែលលោកអ្នកអាចបង់រំលស់ប្រចាំខែត្រឹមតែ $228 ដុល្លាតែប៉ុណ្ណោះនោះគឺរថយន្ត Ford EcoSport ស៊េរីថ្មីឆ្នាំ 2021។

សម្រាប់ចំនួនទឹកប្រាក់បង់ប្រចាំខែប៉ុននេះគឺជឿជាក់ថាពិតជាសមរម្យអាចឲ្យបងប្អូនមួយចំនួនធំដែលមានប្រាក់ចំណូលកម្រិតទាប និងកម្រិតមធ្យមអាចបង់រំលស់បានយករថយន្តថ្មីទៅប្រើប្រាស់ប្រកបដោយទំនុកចិត្ត ដូច្នេះបងប្អូនគួរតែពិចារណាការទិញរថយន្តថ្មីជាជាងរថយន្តជជុះមកពីប្រទេសគេ។ ការទិញរថយន្តថ្មីគឺមានការធានាផ្ទាល់គុណភាពត្រឹមត្រូវពីក្រុមហ៊ុន សេវាថែទាំ និងជួសជុលដោយជាងជំនាញ ជាពិសេសនោះគឺលោកអ្នកអាចក្លាយជាម្ចាស់ទីមួយនៃរថយន្តនោះ។ ផ្ទុយទៅវិញសម្រាប់ការទិញរថយន្តចាស់ជជុះពីប្រទេសគេនោះគឺប្រឈមមុខនឺងប្រវត្តិរថយន្តមិនច្បាស់លាស់ ក៏អាចជួបហានិភ័យផ្សេងៗមួយចំនួនដូចជា រថយន្តកាត់តឬស្ងោរពណ៍ រថយន្តធ្លាប់មានប្រវត្តិបុកប៉ះ ឬ ប្រវត្តិលិចទឹក និងជួបប្រទះនូវការផ្លាស់ប្តូរគ្រឿងបន្លាស់ក្លែងក្លាយដែលគ្មានគុណភាពជាដើម។

រថយន្តថ្មីមិនត្រឹមតែមានភាពធន់រឹងមាំ មិនងាយខូចនោះទេ តែថែមទាំងមានប្រព័ន្ធសុវត្ថិភាព និងបច្ចេកវិទ្យាជាច្រើនទៅតាមឆ្នាំថ្មីជានិច្ច ជាក់ស្តែងដូចរថយន្ត Ford EcoSport ស៊េរីថ្មីឆ្នាំ 2021 មានប្រព័ន្ធសុវត្ថិភាព និងបច្ចេកវិទ្យាសំខាន់រហូតដល់ទៅ 30 ចំណុចឯណោះដែលរួមមាន៖

ម៉ាស៊ីន EcoBoost ជំនាន់ថ្មី 1.0L ប៉ុន្តែពិតជាស្ទុះហួសពីការស្មានជាមួយនឹងកម្លាំងសេះ 125 PS និងកម្លាំងរមួលកង់ដល់ទៅ 170 Nm
បូករួមជាមួយនឹងប្រអប់លេខ 6 វគ្គអូតូដែលអាចប្រើប្រាស់បានទាំងលេខដៃ និងលេខអូតូ មិនតែប៉ុណ្ណោះយើងក៏អាចថែមថយលេខនៅលើដៃចង្កូតនេះបានផងដែរ (6-Speed Automatic with Paddle Shifters)
ចង្កៀងគុជជំនាន់ថ្មី និងចង្កៀងបំភ្លឺផ្នែកខាងក្រោម (New Headlamps and Fog Lamps)
ចង្កៀង LED បំភ្លឺពេលថ្ងៃរចនាម៉ូដប្លែកខុសពីរថយន្តដ៏ទៃ (LED Day Time Running Lights)
ចង្កៀងបិទ/បើក និងហ្វាកូដដោយស្វ័យប្រវត្ត (Auto On/Off Headlamps)
ប៉ាណាក្រូម៉េពណ៍ទឹកប្រាក់ភ្លឺរលោង (Chrome Front Grill)
យ៉ាន់កង់ទំហំ 17 អ៊ីញបែបស្ព័រទំនើបទាន់សម័យ (17” Alloy Wheel)

ដែកថែបពិសេសចំនួន 2ដើម សម្រាប់ការពារផ្នែកចំហៀងសងខាងនៃរថយន្ត (Ultra-High-Strength Boron Steel Side Impact Beam Bar)
បំពាក់ជូននូវពោងសុវត្ថិភាពចំនួន 6 គ្រាប់ (6 Airbags)
ប្រព័ន្ធការពារចោរកម្ម (Anti-Theft Alarm System)
ប្រព័ន្ធពន្លត់ម៉ាស៊ីនដោយស្វ័យប្រវត្តពេលបញ្ឆេះរថយន្តចោល (Auto Engine Off)
កាមេរ៉ាជំនួយចូលចតផ្នែកខាងក្រោយដែលមានខ្សែគំនូសពណ៍ស រេតាមចង្កូត (Rear View Camera)
សេនសឺផ្នែកខាងមុខចំនួន 4 គ្រាប់ (4 Front Sensors)
សេនសឺផ្នែកខាងក្រោយចំនួន 4 គ្រាប់ (4 Rear Sensors)
ប្រព័ន្ធកូនសោឆ្លាតវៃ ចុចបញ្ឆេះរថយន្ត និងចេញចូលរថយន្តដោយគ្រាន់ស៊ក / ចុចនៅលើដៃទ្វារ (Smart Key / Push Button Start-Stop)

កៅអីស្បែកទាន់សម័យ (Leather Seats)
ចុចកព្ចាក់ក្តោបដោយស្វ័យប្រវត្ត (Auto Side Mirror Folding System)
ចង្កូតបូមអេឡិចត្រូនិច ធូរងាយស្រួលបើកបរ [Electric Power-Assisted Steering (EPAS)]
ប្រព័ន្ធបញ្ជាដោយសម្លេង (Voice Command)
កញ្ចក់មើលក្រោយអាចកាត់បន្ថយចំណាំងផ្លាត (Auto-Dimming)
ប្រព័ន្ធគ្រប់គ្រងសីតុណ្ហភាពដោយស្វ័យប្រវត្ត (Automatic Temperature Control)

អេក្រង់ Touch Screen 8 អ៊ីញ សម្រាប់គ្រប់គ្រង វិទ្យុ តន្ត្រី និងការកំសាន្តផ្សេងៗ (8” Touch Screen)
អាចភ្ជាប់ជាមួយនឹង Apple CarPlay, Android Auto និង Google Map
រន្ធ USB ចំនួន 2 និងរន្ធសាកកម្លាំង 12V ផ្នែកខាងក្រោយ (2 USB Ports / 12V Invertor)

ប្រព័ន្ធទប់លំនឹងរថយន្តពេលបើកបរលើផ្លូវកោង រអិល និងបញ្ជៀសការក្រឡាប់ (Electronic Stability Control)
ប្រព័ន្ធហ្វ្រាំង ABS និងEBD
ប្រព័ន្ធទប់លំនឹងកុំឲ្យរអិលថយក្រោយពេលឡើងចំណោត (Hill Launch Assist)
ផ្លិតទឹកអូតូ (Rain Sensing Wipers)
កន្លែងដាក់ឥវ៉ាន់រហូតដល់ទៅ 25 កន្លែង (25 Spacious Areas)
កម្ពស់ខ្ពស់លើសពីរថយន្ត SUV ខ្នាតនេះ (High Ground Clearance)

ជាមួយនឹងតម្លៃពិសេស $27,900 សម្រាប់រថយន្ត Ford EcoSport ស៊េរីថ្មីឆ្នាំ 2021 និងតម្លៃពិសេស $26,000 សម្រាប់រថយន្ត Ford EcoSport ស៊េរីថ្មីឆ្នាំ 2020 ដែលមានជម្រើសរហូតដល់ទៅ 7 ពណ៍នោះគឺ៖ ស ខ្មៅ ខៀវ ក្រហម ទឹកប្រាក់ ទឹកក្រូចក្រម៉ៅ និងប្រផេះ។

រាល់ការទិញរថយន្តថ្មីពីក្រុមហ៊ុនលោកអ្នកនឹងទទួលបានបន្ថែមនូវទំនុកចិត្តដូចជា ៖

ការធានាផ្ទាល់ពីរោងចក្ររយៈពេល 3ឆ្នាំ ឬ 100,000គីឡូម៉ែត្រ
សេវាថែទាំរថយន្តរយៈពេល 1ឆ្នាំ ឬ 20,000គីឡូម៉ែត្រ
ជាពិសេសមានសេវាជួសជុលរថយន្តចល័ត២៤ម៉ោងទូទាំងប្រទេស
សេវាយករថយន្តចាស់មកផ្លាស់ប្តូររថយន្តថ្មី (Trade-In Service)
សេវាបង់រំលស់គ្រប់ខេត្តក្រុងប្រកបដោយទំនុកចិត្ត។

សម្រាប់ព័ត៍មានបន្ថែមលោកអ្នកអាចធ្វើការទំនាក់ទំនងមកកាន់យើងខ្ញុំតាមរយៈ៖

➡️Facebook: http://facebook.com/FordCambodia

➡️Messenger: http://m.me/FordCambodia

➡️Telegram: https://t.me/FordCambodia

📞ទំនាក់ទំនងផ្នែកលក់: 078 333 748 | 016 333 785

📞សាខាព្រះមុន្នីវង្ស: 085 557 760

📞សាខាទឹកថ្លា: 078 4000 66

📞សាខាទួលសង្កែ: 078 990 800 / 087 990 800

📞សាខាខេត្តសៀមរាប: 077 666 357

📞សាខាខេត្តកំពង់ចាម: 092 888 476

សូមលោកអ្នកអនុវត្តន៍វិធានការ ៣ការពារ និង៣កុំ តាមការណែនាំរបស់ក្រសួងសុខាភិបាលដើម្បីចូលរួមទប់ស្កាត់នៃការរីករាលដាលនៃជំងឺកូវីដ-១៩ ។

May 4, 2021

មហាសេដ្ឋី Bill Gates និងភរិយា លែងលះគ្នាហើយ!

មហាសេដ្ឋីអាមេរិក Bill Gates និងអ្នកស្រី Melinda ដែលជាស្វាមី-ភរិយាមួយគួ ក្នុងចំណោមគូស្នេហ៍ដែលមានទ្រព្យច្រើនជាងគេក្នុងពិភពលោក បានលែងលះគ្នា បន្ទាប់ពីរស់នៅជាមួយគ្នាអស់រយៈពេល 27ឆ្នាំ និងមានកូនបីនាក់។

«ក្រោយពីបានគិត ពិចារណាយ៉ាងល្អិនល្អន់អំពីទំនាក់ទំនង យើងបានសម្រេចបញ្ចប់សម្ព័ន្ធភាពអាពាហ៍ពិពាហ៍នឹងគ្នា» នេះបើតាមការប្រកាសកាលពីថ្ងៃទី3 ខែឧសភា ឆ្នាំ2021 នៅលើគណនីបណ្ដាញសង្គម Twitter របស់ប្ដី-ប្រពន្ធមហាសេដ្ឋី Bill Gates។ មហាសេដ្ឋី Bill Gates គឺជាសហស្ថាបនិកនៃក្រុមហ៊ុនបច្ចេកវិទ្យា Microsoft។

«ក្នុងអំឡុង 27ឆ្នាំកន្លងមក យើងបានចិញ្ចឹមបីបាច់កូនចំនួនបីនាក់ប្រកបដោយភាពអស្ចារ្យ និងបង្កើតបានអង្គការមួយដែលធ្វើសកម្មភាពទូទាំងសកលលោក ដើម្បីជួយឱ្យគ្រប់គ្នាមានជីវភាពល្អប្រសើរ។ យើងនៅតែជឿជាក់លើបេសកកម្មនោះ និងនៅតែបន្តធ្វើកិច្ចការទាំងនោះរួមគ្នា ប៉ុន្តែ លែងជឿជាក់ថា នឹងអាចរស់នៅជាប្ដី-ប្រពន្ធនឹងគ្នាទៀតហើយ ក្នុងដំណាក់កាលចុងក្រោយនៃជីវិត» ការប្រកាសរបស់គ្រួសារ Bill Gates បានសរសេរដូច្នេះ។

បច្ចុប្បន្ន គេមិនទាន់ដឹងលម្អិតអំពីព័ត៌មានទាក់ទងនឹងហិរញ្ញវត្ថុ ក្រោយការលែងលះរបស់អ្នកទាំងពីរនៅឡើយ។ ពួកគេគឺជាគូស្នេហ៍មួយគូក្នុងចំណោមគូស្នេហ៍ដែលមានទ្រព្យច្រើនជាងគេក្នុងពិភពលោក ដោយមានទ្រព្យប្រមាណ 130ពាន់លានដុល្លារអាមេរិក និងមានកូនចំនួនបីនាក់។ ការប្រកាសបានបន្ថែមថា៖ «យើងស្នើឱ្យមានបរិយាកាស និងភាពឯកជនសម្រាប់គ្រួសារ នៅពេលចាប់ផ្ដើមកំណត់គោលដៅថ្មីសម្រាប់ជីវិត»។

យោងតាមបញ្ជីចំណាត់ថ្នាក់អ្នកមានជាងគេក្នុងពិភពលោក ដែលត្រូវបានទស្សនាវដ្ដី Forbes ប្រកាសកាលពីដើមខែមុន Bill Gates បច្ចុប្បន្ន មានទ្រព្យ 124ពាន់លានដុល្លារ ដែលភាគច្រើនបានមកពីភាគហ៊ុននៅ Microsoft។ លោក Gates រកបាន 26ពាន់លានដុល្លារបន្ថែមទៀត ប៉ុន្តែចំណាត់ថ្នាក់នៅតែធ្លាក់ចុះពីរថ្នាក់ ដោយឈរលំដាប់ទីបួនក្នុងតារាងចំណាត់ថ្នាក់នេះ។

Bill និង Melinda គឺជាសហប្រធាន និងជាអ្នកដែលទទួលបានទំនុកចិត្តបំផុតរបស់អង្គការមនុស្សធម៌ឯកជនធំជាងគេបង្អស់ក្នុងពិភពលោក នោះគឺមូលនិធិ Bill and Melinda Gates មានទីស្នាក់ការកណ្ដាលស្ថិតនៅក្នុងទីក្រុង Seattle ក្នុងរដ្ឋ Washington ដែលពួកគេបានបង្កើតកាលពីឆ្នាំ2000។ ដំណាច់ឆ្នាំ2019 មូលនិធិនេះមានទ្រព្យ 43.3ពាន់លានដុល្លារអាមេរិក។

លោក Bill Gates អាយុ65ឆ្នាំ និងអ្នកស្រី Melinda Gates អាយុ56ឆ្នាំ បានបរិច្ចាគទ្រព្យដែលមានតម្លៃប្រមាណជាង 36ពាន់លានដុល្លារអាមេរិកទៅឱ្យមូលនិធិខាងលើ រាប់ចាប់ពីឆ្នាំ1994 ដល់ឆ្នាំ2018។

មូលនិធិខាងលើ ផ្ដោតសំខាន់ទៅលើវិស័យសុខាភិបាលសាធារណៈ អប់រំ និងអាកាសធាតុ។ ប៉ុន្តែ មូលនិធិនេះមិនទាន់មានយោបល់អ្វីចំពោះរបៀបដំណើរការរបស់ខ្លួន ក្រោយពីការលែងលះរបស់ប្ដី-ប្រពន្ធ Bill Gates នៅឡើយ។

ការលែងលះដ៏គួរឱ្យភ្ញាក់ផ្អើលនេះ កើតឡើងបន្ទាប់ពីស្ថាបនិករបស់ Amazon គឺលោក Jeff Bezos ប្រកាសថា លោក និងភរិយា MacKenzie បានសម្រេច «ចែកផ្លូវគ្នា»។

លោក Bill Gates បានបោះបង់ការសិក្សានៅសាកលវិទ្យាល័យ Harvard ដើម្បីបង្កើតក្រុមហ៊ុន Microsoft ជាមួយនឹងមិត្តរួមថ្នាក់ Paul Allen កាលពីឆ្នាំ1975។ Gates កាន់កាប់ភាគហ៊ុន 49% របស់ Microsoft ក្នុងឆ្នាំ1986 ធ្វើឱ្យលោកក្លាយជាសេដ្ឋីភ្លាម។ ការរីកចម្រើនខ្លាំងរបស់ Microsoft បានជួយឱ្យលោកក្លាយជាអ្នកមានជាងគេម្នាក់ក្នុងពិភពលោក ដោយប្រើពេលយ៉ាងខ្លី។

លោក Gates បានលាលែងពីតំណែងនាយកប្រតិបត្តិកាលពីឆ្នាំ2000 ដើម្បីផ្ដោតទៅលើកិច្ចការមនុស្សធម៌ ប៉ុន្តែ លោកនៅតែកាន់កាប់តំណែងប្រធានរហូតដល់ឆ្នាំ2014 និងបានចាកចេញពីក្រុមប្រឹក្សាភិបាលរបស់ Microsoft កាលពីខែមីនា ឆ្នាំ2020។

ច្រើនឆ្នាំចុងក្រោយនេះ លោក Bill Gates ភាគច្រើនលើកឡើងអំពីបញ្ហាក្រីក្រ សុខាភិបាល ក៏ដូចជាបញ្ហា Covid-19។ កាលពីឆ្នាំមុន មូលនិធិ Bill and Melinda Gates បានសន្យាផ្ដល់ជំនួយប្រមាណ 250លានដុល្លារ ដើម្បីប្រយុទ្ធប្រឆាំងនឹងវិបត្តិសុខភាពដែលបង្កឡើងដោយវីរុសCovid-19 ក្នុងនោះក៏មានជំនួយសម្រាប់ចែករំលែកវ៉ាក់សាំងទៅឱ្យតំបន់អាហ្វ្រិក និងអាស៊ីផងដែរ។

Melinda Gates ថ្មីៗនេះ បានហៅខ្លួនឯងថា Melinda French Gates។ អ្នកស្រីបានចាប់កំណើតនៅក្នុងទីក្រុង Dallas នៃរដ្ឋ Texas សហរដ្ឋអាមេរិក និងបានសិក្សាជំនាញផ្នែកកុំព្យូទ័រ និងសេដ្ឋកិច្ចនៅសាកលវិទ្យាល័យ Duke។ អ្នកស្រីបានចូលបម្រើការនៅក្នុងក្រុមហ៊ុន Microsoft និងបានជួប Gates កាលពីឆ្នាំ1987 ហើយបានរៀបការជាមួយគ្នាកាលពីឆ្នាំ1994។ ឆ្នាំ2015 អ្នកស្រីបានបង្កើត Pivotal Ventures ជាក្រុមហ៊ុនវិនិយោគមួយដែលផ្ដោតទៅលើកិច្ចការទាក់ទិននឹងស្ត្រី៕

ប្រភព៖ Reuters, AFP
ប្រែសម្រួល៖ បុត្រា

May 4, 2021

មិនធម្មតាទេ បើបានដឹងពីប្រវត្តិ Frutos កីឡាកររបស់ក្លិប Levante ហើយ

Jorge de Frutos កីឡាករសញ្ជាតិអេស្ប៉ាញ កំពុងតែលេងនៅក្លិប Levante ដែលជាក្លិបមួយនៅលីគកំពូលអេស្ប៉ាញ។ ទោះជាក្លិបមួយនេះ មិនសូវជាខ្លាំងប៉ុន្មានមែន ក៏ប៉ុន្តែខ្សែប្រយុទ្ធរូបនេះ បានទទួលការចាប់អារម្មណ៍យ៉ាងខ្លាំង ក្រោយពីកាសែតអេស្ប៉ាញមួយ បានទម្លាយអំពីជីវប្រវត្តិរបស់គេ។

Jorge de Frutos មានអាយុ 24ឆ្នាំ ទើបតែបានចាប់ផ្តើមលេងបាល់នៅអាយុ 17ឆ្នាំប៉ុណ្ណោះ ដោយលេងឱ្យក្លិប R. Majadahonda ។ លុះចូលដល់វ័យ 19ឆ្នាំ គេបានជួយឱ្យក្រុមរបស់គេឡើងមកកាន់លីគទី2 បានសម្រេចជាលើកដំបូង ដែលនេះហើយជាមូលហេតុដែល Real Madrid យកគេ មកចូលរួមក្រុមក្នុងឆ្នាំ2019 មុននឹងផ្លាស់មកលេងនៅក្លិបបច្ចុប្បន្នកាលពីឆ្នាំ2020 មកទល់នឹងបច្ចុប្បន្ន។

កីឡាករដែលសព្វថ្ងៃមានតម្លៃខ្លួនដល់ទៅ 10លានដុល្លារនេះ ត្រូវបានគេដឹងថា ជាកីឡាករដំបូងរបស់តំបន់ Navares de Enmedio នៃទីក្រុង Segovia ដែលមានលេងនៅ La Liga ។ ក្នុងរដូវកាលនេះ គេបានកំពុងតែឡើងជើងខ្លាំង ដោយជាកីឡាករបញ្ចូនបាល់ឱ្យមិត្តរួមក្រុមបានច្រើនជាងគេ និងជាកីឡាករតែម្នាក់គត់របស់ក្លិបនេះ ដែលបានស៊ុតបញ្ចូលទី 4ព្រឹត្តិការណ៍ផ្សេងៗគ្នា៕

May 3, 2021

Messi ប្តូរចិត្ត នៅបន្តជាមួយនឹង Barcelona

កុងត្រារបស់កីឡាករកំពូល Lionel Messi របស់ក្លិប FC Barcelona នឹងត្រូវផុតនៅចុងរដូវកាលនេះ ដោយកីឡាករសញ្ជាតិអាហ្សង់ទីនរូបនេះ មិនព្រមទទួលយកសំណើ ក្នុងការបន្តកុងត្រានេះជាថ្មីឡើយ កាលពីដើមឆ្នាំ2021 កន្លងទៅ។

មកទល់នឹងពេលនេះ ក្លិប FC Barcelona បានបង្ហើបថា កីឡាករដ៏ល្អមិនធា្លប់មានរបស់ក្លិបរូបនេះ អាចនឹងបន្តកុងត្រាថ្មីបន្តទៀតជាមួយខ្លួន ពីព្រោះខាងភាគីក្លិប បានប្រជុំពិភាក្សា ជាមួយនឹង Messi ផ្ទាល់ជាលក្ខណបឋម ដោយភាគីទាំងសងខាង បានព្រមព្រៀងគ្នាជាមួយនឹងលក្ខខណ្ឌមួយចំនួន ដើម្បីបន្តកុងត្រាថ្មី។

ទោះបីជាមិនទាន់ចេញសេចក្ដីប្រកាសជាផ្លូវការក្តី ក៏ប៉ុន្តែព័ត៏មាននេះ វាល្មមគ្រប់គ្រាន់ក្នុងការបំបាក់ទឹកចិត្តក្លិបធំ3 នៅអឺរ៉ុប ដែលក្នុងនោះមានដូចជា ManCity, PSG និង InterMilan ដែលគ្រោងនឹងដាក់ស្នើតម្លៃពលកម្មដ៏ខ្ពស់មួយ ដើម្បីទាក់យកកីឡាកររូបនេះ៕

May 3, 2021

Lukaku ទទួលសំណើពី Chelsea ក្នុងតម្លៃផ្តាច់កុងត្រា 135លានដុល្លារ

Chelsea នឹងមិនមានប្រៀបឡើយ ក្នុងការនាំចូល Haaland មកកាន់ក្លិបរបស់ខ្លួននារដូវកាលនេះ ដោយសារតែ Manchester City បាននាំមុខមុនរួចទៅហើយ ក្នុងការចរចាយកកីឡាករវ័យក្មេងរូបនេះ។

គ្រូបង្គោលក្លិប Chelsea លោក Thomas Tuchel បានបង្ហាញការចាប់អារម្មណ៍ទៅលើកីឡាករ ខ្សែប្រយុទ្ធមាឌឌាំង Romelu Menama Lukaku របស់ក្លិប InterMilan កំពុងតែទទួលបានការចាប់អារម្មណ៍ខ្លាំងនៅលីគកំពូលអ៊ីតាលី ដោយកំពុងតែកាន់កំណត់ត្រាកីឡាកររកគ្រាប់បាល់បានច្រើនជាងគេនៅអ៊ីតាលី និងកំពុងតែជួយក្លិប ឱ្យឈរនៅកំពូលតារាងទៀតផង។

មកទល់នឹងពេលនេះ ខាងក្លិប Chelsea បានដាក់សំណើទៅកាន់ក្លិប InterMilan ក្នុងតម្លៃផ្តាច់កុងត្រា 135លានដុល្លារ គឺធ្វើយ៉ាងណាមិនឱ្យ កីឡាកររូបនេះ ងាករេទៅក្លិបណាផ្សេងឡើយ ៕

May 3, 2021

មិនគួរឱ្យជឿ! កីឡាករម្នាក់ បង្ហាញខ្លួនមិនដែលខាននៅ La Liga ជិត 6រដូវកាលជាប់ៗគ្នា

Iñaki Williams កីឡាករខ្សែប្រយុទ្ធរបស់ក្លិប Athletic Bilbao កំពុងតែកាន់កំណត់ត្រា ជាកីឡាករដែលបង្ហាញខ្លួនបានច្រើនជាប់ៗគ្នាបំផុត នៅ La Liga ដោយតាមពីក្រោយ Juan Antonio Larrañaga ដែលមានកំណត់ត្រាចំនួន 202លើក។

កីឡាករវ័យ 26ឆ្នាំ សញ្ជាតិអេស្ប៉ាញរូបនេះ បានបង្ហាញខ្លួនជម្រើសដំបូងឱ្យក្លិប រហូតមិនដែលខកខាន 1លើកណាសោះឡើយ ដោយរាប់មក គឺចាប់តាំងពី ជាពីរបួសក្នុងឆ្នាំ2016 មក គឺគេបានបង្ហាញខ្លួននៅ La Liga មិនដែលខាន 1លើកឡើយ។

គួរឱ្យដឹងដែរថា កីឡាករ Iñaki Williams ជាកីឡាករខ្សែប្រយុទ្ធរបស់ក្លិប Athletic Bilbao ដែលសឹងតែមិនអាចខ្វះបានរាល់ការប្រកួត គេត្រូវបានគ្រូបង្វឹក ចាត់ទុកថា ជាគ្រាប់ពេជ្រនៅក្នុងការរកពិន្ទុ ឱ្យក្រុមដែលមិនសូវសម្បូរធនធានមួយនេះ៕

May 3, 2021

ប្រាសាទ Hurst «អណ្ដែត» ក្នុងអាកាស លើផ្ទៃទឹកសមុទ្រអង់គ្លេស និងអាថ៌កំបាំងដែលនៅពីក្រោយ

សីតុណ្ហភាពនៃបរិយាកាសមិនស្មើគ្នា បានធ្វើឱ្យរូបភាពរបស់ប្រាសាទដែលមានអាយុកាលជិត 500ឆ្នាំ នៅចក្រ ភពអង់គ្លេស មើលទៅហាក់បីដូចជាកំពុងអណ្ដែតក្នុងអាកាស លើផ្ទៃទឹកសមុទ្រ។

អ្នកថតរូបម្នាក់ឈ្មោះ Joss Mullinger ថតបានរូបភាពប្រាសាទ Hurst «អណ្ដែត» នៅខាងលើឆ្នេរសមុទ្រ Lepe ដែលស្ថិតនៅភាគខាងលិចតំបន់ Hampshire កាលពីថ្ងៃទី28 ខែមេសា ឆ្នាំ2021។ នេះបើតាមសារព័ត៌មាន The Sun។ ប្រាសាទ Hurst ត្រូវបានសាងសង់ឡើងដោយស្ដេច Henry ទី8 ចន្លោះឆ្នាំ1541-1544 នៅតំបន់ Hurst។ ស្ថាបត្យកម្មនេះ ស្ថិតក្នុងគម្រោងការពារឆ្នេរសមុទ្រ Device Forts របស់មហាក្សត្រ ដើម្បីទប់ទល់នឹងការឈ្លានពានពីបារាំង និងចក្រភពរ៉ូម។

«នៅលើដងផ្លូវទៅកាន់ចំណតរថយន្ត ខ្ញុំស្រាប់តែបានឃើញទិដ្ឋភាពដ៏គួរឱ្យភ្ញាក់ផ្អើលនេះ។ ខ្ញុំក៏ប្រញាប់លោតចេញពីរថយន្ត ដើម្បីថតយករូបភាពនេះ ព្រោះថា វាអាចបាត់ទៅវិញមួយរំពេច ដោយសារអាកាសធាតុ និងពន្លឺ។ ពិតជាដូចទៅនឹងការស្មាន ពេលយើងទៅដល់ចំណតរថយន្ត និងដើរបានមួយភ្លែត រូបភាពនេះ ក៏បានបាត់ខ្លួន» Joss Mullinger រៀបរាប់ឡើងវិញ។

ទិដ្ឋភាពខាងលើនេះ កើតឡើងដោយរូបភាពដែលទទួលឥទ្ធិពលពីកាំរស្មី និងសីតុណ្ហភាព។ បាតុភូតដែលត្រូវបានគេហៅថា Fata Morgana នេះ កើតឡើងនៅពេលព្រះអាទិត្យជះកំដៅទៅលើបរិយាកាសនៃផ្ទៃដី ឬផ្ទៃទឹកសមុទ្រ។ ស្រទាប់បរិយាកាសក្ដៅ សង្កត់លើស្រទាប់បរិយាកាសត្រជាក់ បណ្ដាលឱ្យរស្មីត្រូវបានកាច់ឱ្យកោង ធ្វើឱ្យទិដ្ឋភាពដែលនៅឆ្ងាយ ត្រូវប្រែប្រួល។

Fata Morgana អាចកើតឡើងនៅលើដីគោក ប៉ុន្តែ បាតុភូតនេះ ភាគច្រើនមាននៅលើផ្ទៃទឹកសមុទ្រ ព្រោះទឹកជួយបង្កើតបរិយាកាសត្រជាក់។ ឈ្មោះនៃបាតុភូតនេះ មានដើមកំណើតមកពីពាក្យ Morgan le Fay ជាធ្មប់ដែលប្រើប្រាស់មន្តអាគម ដើម្បីទាក់ទាញក្រុមនាវិកឱ្យចូលទៅក្នុងអន្ទាក់ នៅក្នុងរឿងព្រេងបុរាណ Arthur៕

ប្រភព៖ Sun
ប្រែសម្រួល៖ បុត្រា

May 3, 2021

តើមហាសេដ្ឋីពិភពលោក គេជិះឡានអីទៅហ្ន៎?

មហាសេដ្ឋីក្នុងពិភពលោកជាច្រើននាក់ បើតាមយើងគិតមើលទៅ ប្រហែលជាមានរសនិយម និងមានFashion ជាមួយនឹងរថយន្តប្រភេទ Super Car ស្អាតៗ Limited Edition ដែលក្នុងពិភពលោក មានតែប៉ុន្មានគ្រឿងហើយមើលទៅ…តែខុសស្រឡះ បណ្ដាមហាសេដ្ឋី ដែលមានទ្រព្យច្រើនបំផុតក្នុងពិភពលោកទាំងនោះ បែរជាប្រាប់ដូចៗគ្នាថា ពួកគេចូលចិត្តរថយន្តធម្មតាៗច្រើនជាង ត្រឹមតែវាអាចនាំយើងទៅណាមកណាបាន គឺគ្រប់គ្រាន់ណាស់ទៅហើយ…(ហេសៗ ម្យ៉ាងដែរ!)។

មហាសេដ្ឋីលំដាប់លេខ1 របស់ពិភពលោក Jeffrey Preston Bezos ឬ Jeffrey Bezos ម្ចាស់អាណាចក្រ Amazon ដែលជាស្ថាបនិក នាយកប្រតិបត្តិ និងជាប្រធានរបស់ អាម៉ាហ្សូន ដត់ ខម ដែលមុនពេលក្លាយជាអ្នកមាន លោករៀនចប់ផ្នែកវិស្វកម្មអគ្គិសនី និងវិទ្យាសាស្ត្រកុំព្យូទ័រ មុននឹងចូលទៅអង្គុយធ្វើការនៅ Wall Street និងកើតមានអៃឌៀ រឿងអាម៉ាហ្សូន ឡើងក្នុងអំឡុងពេលបើកឡានពីនីវយ៉ក ស៊ីធី ទៅទីក្រុង ស៊ីអ៊ែតថល។ លោកចេហ្វ ប្រើរថយន្តយីហោតែមួយគត់គឺ ហុងដា ដោយលោកប្រាប់ថា ចាប់ផ្ដើមរៀនបើក Honda Accord មកតាំងពីឆ្នាំ2013 បន្ទាប់ពីនោះមក លោកក៏ប្រើវាមករហូត។ “ខ្ញុំថា វាជាឡានមួយដែលល្អឥតខ្ចោះមែនទែន។

មហាសេដ្ឋីលំដាប់លេខ2 របស់ពិភពលោក Bill Gates ស្ថាបនិក Microsoft ក៏ចេញមកក្នុងខន់សិប ដូចគ្នាដែរគឺ ទោះបីជាពួកគាត់អាចធ្វើជាម្ចាស់រថយន្តបែបណាក៏បាននៅលើពិភពលោកនេះក៏ដោយ តែរថយន្តដែលលោក និងភរិយា Melinda Gates ចូលចិត្តប្រើរៀងរាល់ថ្ងៃនោះគឺ រថយន្តម៉ាក Ford Focus ស៊េរីឆ្នាំ2008 ដែលនៅតែរក្សាទុកប្រើ នៅក្នុងផ្ទះរហូតមក។

អ្នកវិយោគទុន ដែលទទួលបានជោគជ័យខ្ពស់បំផុត រហូតក្លាយជាម្ចាស់ទ្រឹស្ដីរបស់ប្រទេសអាមេរិក លោក Warren Buffett នាយកប្រតិបត្តិ ក្រុមហ៊ុន Berkshire Hathaway មហាសេដ្ឋីលំដាប់លេខ៣ របស់ពិភពលោក ដែលតាំងខ្លួនជាគ្រូណែនាំមនុស្សជំនាន់ក្រោយឱ្យទទួលបានជោគជ័យខាងផ្នែកហិរញ្ញវត្ថុជាច្រើននាក់នោះ បានប្រាប់ថា លុយមិនមែនមាន សម្រាប់ឱ្យយើងចាយវាយខ្ជះខ្ជាយនោះទេ សុខចិត្តយកទៅជួយមូលនិធិសប្បុរសធម៌វិញប្រសើរជាង បើចាយវាយខ្ជះខ្ជាយដដែលនោះ។ ដូច្នេះហើយទើបលោកបរិច្ចាគ 99% នៃប្រាក់ចំណូល ឱ្យទៅមូលនិធិ Bill and Melinda Gates ខណៈដែលកូនស្រីរបស់លោក ប្រាប់ឱ្យទិញរថយន្តថ្មិ តែលោក វ៉ារេន ប្រាប់ថា លោកពេញចិត្ត Cadillac DTS ស៊េរីឆ្នាំ2006 នេះហើយ ព្រោះ “ទើបនឹងជិះបានមិនប៉ុន្មានម៉ាយល៍ប៉ុណ្ណោះឯង។

ជាប់លំដាប់មហាសេដ្ឋីដែលមានឥទ្ធិពលខ្លាំងបំផុតម្នាក់របស់ពិភពលោក ដោយប្លាតហ្វ៉មបណ្ដាញសង្គម ហ្វេសប៊ុក ដែលមនុស្សគ្រប់រូបជក់ចិត្ត លោក Mark Zuckerberg មហាសេដ្ឋីអាយុតិចជាងគេបំផុតក្នុង Top 10 list និយមពេញចិត្តរថយន្តស៊េរីថ្មី Honda Akura TSX ព្រោះថា “វាងាយស្រួល សុវត្ថិភាព និងមើលទៅ មិនជ្រុលហួសហេតុពេកទៀតផង”

Lawrence Page និង Sergey Brin បុរស 2នាក់ ស្ថាបនិក Google ជានាយកប្រតិបត្តិ និងជាប្រធានក្រុមហ៊ុន Alphabet។ ពួកគេជាមហាសេដ្ឋីលំដាប់ទី9 និងទី10 របស់ពិភពលោក ដែលជីវិតតែងតែផ្ដល់ភាពសំខាន់ទៅរឿងតិចណូឡូជី ដែលទាន់សម័យ។ នោះគឺ 1ផ្នែកនៃអ្វីដែលពួកគេទាំង2 ជ្រើសរើសប្រើរថយន្ត Toyota Prius រថយន្តដែលមានភាពទំនើបទាន់សម័យខាងតិចណូឡូជី ថែមទាំងសន្សំសំចៃថាមពលទៀតផង។

អ្នកនយោបាយ និងជាអ្នកធុរកិច្ចល្បីឈ្មោះ Michel Blooberg ដែលមានទ្រព្យសម្បត្តិ ជាប់លំដាប់ទី17 របស់ពិភពលោក ម្ចាស់ក្រុមហ៊ុន Blooberg ដែលជាទីប្រឹក្សាខាងហិរញ្ញវត្ថុផង ជាអ្នកសារព័ត៌មានផង និងជាអ្នកអភិវឌ្ឍន៍សូហ្វវែរ តម្រាការវិនិយោគទុនផងដែរ។ ក្រៅពីនេះ លោកម៉ៃឃើល ថែមទាំងធ្លាប់ធ្វើជាអភិបាលក្រុងនីវយ៉កទៀតផង និងតែងតែមានឈ្មោះ ចូលរួមប្រជែងតំណែងប្រធានាធិបតីសហរដ្ឋអាមេរិកជាញឹកញាប់ទៀតផង។ លោកនិយមរថយន្ត ដែលធន់នឹងការប្រើប្រាស់ គឺ Chevrolet Suberbun។

មហាសេដ្ឋីលំដាប់លេខ1 របស់ប្រទេសចិន ស្ថាបនិកវេបសាយ អាលីបាបា ដែលតែងតែបង្ហាញឈ្មោះឡើងក្នុងឋានៈ អ្នកមានឥទ្ធិពលខាងសេដ្ឋកិច្ចពិភពលោក លោកជែក ម៉ា មិនមែនគ្រាន់ជាមនុស្សសន្សំសំចៃនោះទេ តែថែមទាំងជាតិនិយមទៀតផង លោកប្រើរថយន្តយីហោរបស់ប្រទេសចិន គឺ Roave RX 5 SUV។

លោកស្រី Alice Louis Walton ទាយាទ Super Store Walmart របស់អាមេរិក លោកស្រីមានទ្រព្យធនជាប់លំដាប់ទី18 របស់ពិភពលោក និងជាស្ត្រីដែលមានទ្រព្យសម្បត្តិច្រើនជាងគេលំដាប់លេខ2 របស់ពិភពលោកទៀតផង។ Alice ដើរតាមគន្លងរបស់ឪពុក លោក Sam Walton ស្ថាបនិក វ៉លម៉ាត ក្នុងគ្រប់ៗផ្នែក រួមទាំងការស្រឡាញ់រថយន្តប្រភេទ Truck បែបអាមេរិកាំងទៀតផង ខណៈដែលឪពុករបស់លោកស្រី ប្រើរថយន្តម៉ាក Ford F-150 ស៊េរីឆ្នាំ1979 ឯលោកស្រីក៏ប្រើរថយន្តស៊េរីដូចគ្នា តែឆ្នាំ2006 និងនៅតែប្រើរហូតដល់សព្វថ្ងៃនេះ៕

ប្រភព៖ សារព័ត៌មានបរទេស
ប្រែសម្រួលដោយ៖ ទិទីតំតាតូ

May 3, 2021

ការអនុញ្ញាតឱ្យបុគ្គលិកធ្វើការពីផ្ទះ Google នឹងសំច័យបានជាង 4លានលានរៀល ក្នុងឆ្នាំ2021

ការកាត់បន្ថយចំណាយសម្រាប់សកម្មភាពផ្សព្វផ្សាយ, ទេសចរណ៍ និងកំសាន្ត អាចជួយឱ្យ Google សន្សំសំច័យបានជាង 1ពាន់លានដុល្លារ ក្នុងឆ្នាំនេះ។

នៅពេលដែលបំរាមគោចរត្រូវបានគេដកចេញជាបណ្ដើរៗ គេឃើញថា មនុស្សកាន់តែច្រើនឡើងៗ បានកក់សំបុត្រធ្វើដំណើរ និងសណ្ឋាគារតាមអនឡាញ។ ប្រការនេះល្អសម្រាប់ផ្នែកផ្សព្វផ្សាយពាណិជ្ជកម្មរបស់ Google។ ក៏ប៉ុន្តែ ការដែលបុគ្គលិករបស់ក្រុមហ៊ុននេះ នៅតែបន្តធ្វើការពីផ្ទះ មិនត្រូវធ្វើដំណើរ ក៏មានប្រយោជន៍ដល់សកម្មភាពជំនួញរបស់ក្រុមហ៊ុននេះដែរ។

នៅក្នុងត្រីមាសទីមួយ Alphabet ដែលជាក្រុមហ៊ុនមេរបស់ Google សន្សំសំច័យបាន 268លានដុល្លារ ពីខ្ទង់ចំណាយសម្រាប់ការផ្សព្វផ្សាយ, ទេសចរណ៍ និងកំសាន្ត បើធៀបនឹងអំឡុងពេលដូចគ្នានៃឆ្នាំ2020 ដែលភាគច្រើនគឺដោយសារ Covid-19។ ប្រសិនបើគិតជាសរុបពេញមួយឆ្នាំ នោះតួលេខនេះនឹងឡើងដល់ជាង 1.07ពាន់លានដុល្លារអាមេរិក (ជាង 4,361,150,000,000រៀល)។

នៅក្នុងរបាយការណ៍ប្រចាំឆ្នាំនៃត្រីមាសទីមួយ ឆ្នាំនេះ Alphabet ក៏បានឱ្យដឹងថា ខ្ទង់ចំណាយសម្រាប់ការផ្សព្វផ្សាយ បានថយចុះ 1.4ពាន់លានដុល្លារក្នុងឆ្នាំ2020 ខណៈដែលក្រុមហ៊ុនផ្អាក ឬប្ដូរសកម្មភាពធ្វើផ្ទាល់មួយចំនួន ដោយងាកទៅធ្វើតាមរូបភាពអំឡាញ។ Alphabet ក៏សន្សំសំច័យបាន 371លានដុល្លារពីខ្ទង់ចំណាយសម្រាប់ទេសចរណ៍ និងកំសាន្តផងដែរ។ ប្រាក់ដែលសន្សំសំច័យបាននេះ អាចប៉ះប៉ូវទៅលើការចំណាយសម្រាប់ជួលបុគ្គលិកបន្ថែមរាប់ពាន់នាក់។

Google មានឈ្មោះល្បីខ្លាំង ទាក់ទិននឹងការផ្ដល់អត្ថប្រយោជន៍ដល់បុគ្គលិក មានដូចជា តុសម្រាប់ធ្វើសរសៃ, សេវាហូបចុក និងសម្រាកកំសាន្តនៅក្នុងក្រុមហ៊ុន។ ប៉ុន្តែ បុគ្គលិកស្ទើរតែទាំងអស់នៃក្រុមហ៊ុនបច្ចេកវិទ្យាអាមេរិកមួយនេះ ត្រូវបានតម្រូវឱ្យធ្វើការពីផ្ទះ និងមិនបានទទួលអត្ថប្រយោជន៍ទាំងនេះ ចាប់តាំងពីខែមីនា ឆ្នាំ2020 មកម្ល៉េះ។

យ៉ាងនេះក្ដី Google នៅតែមានគម្រោងសម្រាប់ឱ្យបុគ្គលិកត្រលប់មកធ្វើការក្នុងការិយាល័យវិញ នៅចុងឆ្នាំ2021។ ប្រធានផ្នែកហិរញ្ញវត្ថុ Ruth Porat បានឱ្យដឹងថា តាមផែនការ Google នឹងបញ្ចេញរូបមន្ត «hybrid» ដែលក្នុងនោះនឹងមានការកាត់បន្ថយបរិវេណសម្រាប់បុគ្គលិកផងដែរ។

នៅក្នុងរយៈពេល 3ខែដើមឆ្នាំ Google រកចំណូលបាន 55.3ពាន់លានដុល្លារ កើន 34% បើធៀបនឹង 3ខែដើមឆ្នាំ2020។ ដូច្នេះ នៅក្នុងត្រីមាសទីមួយនៃឆ្នាំ2021 ក្រុមហ៊ុននេះចំណេញបាន 18ពាន់លានដុល្លារអាមេរិក ខ្ពស់ជាងការព្យាកររបស់ក្រុមអ្នកវិភាគ៕

ប្រភព៖ Bloomberg
ប្រែសម្រួល៖ បុត្រា

May 3, 2021

Category: សង្គម និងសេដ្ឋកិច្ច