សង្គម និងសេដ្ឋកិច្ច - La Reine Media

Zlatan របួសជង្គង់ ត្រូវការពេលសម្រាក យ៉ាងតិច 6សប្តាហ៍

Zlatan Ibrahimović កីឡាករខ្សែប្រយុទ្ធរបស់ក្លិប AC Milan នៃលីគកំពូលអ៊ីតាលី Italy Seria A បានរងរបួសជង្គង់ទៀតហើយ ក្នុងការប្រកួត ទល់នឹងក្រុម Juventus កាលពីសប្តាហ៍មុននេះ ដោយបានយកឈ្នះ Juventus ក្នុងលទ្ធផល 3-។

របួសនេះ Zlatan Ibrahimović នឹងត្រូវអវត្តមានសម្រាប់ក្រុមនេះរយៈពេល 6សប្ដាហ៍យ៉ាងតិច។ មិនត្រឹមតែប៉ុណ្ណោះ គេក៏នឹងបាត់ឈ្មោះពីក្រុមជម្រើសជាតិស៊ុយអែតផងដែរ ក្នុងព្រឹត្តិការណ៍វគ្គជម្រុះ Euro ដែលគ្រោងនឹងប្រមូលផ្តុំ នៅដើមខែមិថុនាខាងមុខ។

ព្រឹត្តិការណ៍ Euro 2020 ដែលលើកពីឆ្នាំមុន មកលេងឆ្នាំនៅនេះ នឹងត្រូវបើកដំណើរការ នៅខែក្រោយនេះហើយ ដែលមានទាំងអស់ 24ក្រុមចូលរួមលេង និងប្រើរូបមន្ដដូចរាល់ដង។ ដោយសារតែនៅសល់ពេលខ្លីនេះហើយ ទើបក្រុមជម្រើសជាតិស៊ុយអែត នឹងត្រូវអវត្តមានខ្សែប្រយុទ្ធសំខាន់ម្នាក់នេះហើយ៕

May 20, 2021

ក្រសួងព័ត៌មាន ប្រកាសដល់ប្រព័ន្ធផ្សព្វផ្សាយដែលពុំទាន់ស្របច្បាប់ រួសរាន់មកចុះបញ្ជិកា ឱ្យបានមុនដំណាច់ឆ្នាំ2021

ភ្នំពេញ៖ ក្រសួងព័ត៌មាន ប្រកាសដល់ប្រព័ន្ធផ្សព្វផ្សាយទាំងអស់ដែលមិនទាន់បានចុះបញ្ជីពាណិជ្ជកម្ម និងកិច្ចការពារពាណិជ្ជនាម និងពាណិជ្ជសញ្ញា ឱ្យមកចុះបញ្ជីពាណិជ្ជកម្ម ឱ្យបានត្រឹមត្រូវ និងស្របតាមច្បាប់។

សេចក្ដីប្រកាសរបស់ក្រសួងព័ត៌មាននេះ ត្រូវបានធ្វើឡើងបន្ទាប់ពីក្រសួងបានសង្កេតឃើញថា នៅមានក្រុមហ៊ុន អង្គភាព និងស្ថាប័ននៃប្រព័ន្ធផ្សព្វផ្សាយមួយចំនួនតូច មិនទាន់បានមកចុះបញ្ជីត្រឹមត្រូវនៅឡើយ។ ការចុះបញ្ជិកានេះគឺ ដើម្បីការពារពាណិជ្ជនាម និងពាណិជ្ជសញ្ញារបស់ស្ថាប័ន អង្គភាព និងក្រុមហ៊ុនរបស់អស់លោក លោកស្រី ព្រមទាំងដើម្បីចៀសវាងការរំលោភបំពានពាណិជ្ជនាម និងពាណិជ្ជសញ្ញា ពីភាគីណាមួយ។

ក្រសួងព័ត៌មាន ណែនាំដល់ម្ចាស់ស្ថាប័ន អង្គភាពសារព័ត៌មាន រួមនឹងក្រុមហ៊ុនផ្តល់សេវាកម្មលើវិស័យព័ត៌មាន និងសោតទស្សន៍ទាំងអស់ ដែលមិនទាន់បានមកចុះបញ្ជិកា អញ្ជើញមកចុះឈ្មោះ ចាប់ពីថ្ងៃជូនដំណឹងនេះ រហូតដល់ដំណាច់ឆ្នាំ2021។

ក្នុងករណីមិនអនុវត្តតាមសេចក្តីជូនដំណឹងនេះ ហើយនៅតែបន្តប្រើប្រាស់ម៉ាក និងពាណិជ្ជនាមស្ថាប័ន អង្គភាព និងក្រុមហ៊ុនរបស់ខ្លួនដោយបំពានច្បាប់ ក្រសួងព័ត៌មាន នឹងបញ្ឈប់ការផ្តល់អាជ្ញាបណ្ណប្រកបអាជីវកម្ម ចាប់ពីឆ្នាំ2022 តទៅ៕
ប្រភព៖ ក្រសួងព័ត៌មាន
ដកស្រង់៖ បុត្រា

May 19, 2021

Real Madrid ទារ ManU 60លានផោន ក្នុងសំណើយកខ្សែការពារម្នាក់

Ole Gunnar Solskjaer អ្នកចាត់ការក្រុមបាល់ទាត់ ManU បានប្រកាសថា លោកកំពុងតែត្រូវការខ្សែការពារ Raphaël Varane របស់ Real Madrid មកចូលរួមជាមួយនឹងក្លិបរបស់លោក។

បើតាមប្រភពសារព័ត៌មានក្រៅស្រុក បានចុះផ្សាយថា United បានដាក់សំណើលើតម្លៃខ្លួនកីឡាករវ័យ 28ឆ្នាំ ចំនួន 40លានផោន តែពេលនេះក្រុមដឹកនាំដោយលោក Zinedine Zidane បានឆ្លើយបដិសេធ ហើយទាមទារសុំពីលើហ្នឹង 20លានផោនទៀត ពោលគឺ ចង់បាន 60លានផោន សម្រាប់តម្លៃផ្ទេរ Varane។

បច្ចុប្បន្នកីឡាករបារាំងខាងលើ នៅសល់កុងត្រារយៈពេលតែ 1ឆ្នាំទៀតប៉ុណ្ណោះ ជាមួយក្លិបម្ចាស់ទឹកដី Bernabeu ពោលគឺត្រូវផុតនៅចុងខែមិថុនា ឆ្នាំ2022។ ហេតុនេះហើយ ទើបក្លិប Madrid ត្រូវប្រញាប់លក់ Varane ចេញឱ្យបានត្រឹមរដូវក្តៅខាងមុខ មិនដូច្នោះទេ គេអាចនឹងក្លាយជាកីឡាករឥតតម្លៃខ្លួន៕

May 18, 2021

មិនដឹងមូលហេតុអី បាន Dele Alli ទៅអោបថើបកូនស្រី លោក Pep Guardiola

Dele Alli កីឡាករខ្សែប្រយុទ្ធរបស់ Tootenham Hotspur បានបង្កភាពភ្ញាក់ផ្អើលមួយនៅក្រៅទីលានបាល់ទាត់សាជាថ្មីម្ដងទៀតហើយ ក្រោយពេលដែលកីឡាកររូបនេះ ត្រូវបានគេប្រទះឃើញ អង្គុយអោបថើបនារីស្រស់សោភា 1រូបនៅក្នុងក្លិបកម្សាន្តមួយ។

វាហាក់ដូចជាមិនសូវប្លែកឡើយ ដែលកីឡាករបាល់ទាត់មានលុយរាប់លានទៅអង្គុយអោបស្រីក្នុងក្លិប តែលើកនេះកាន់តែខ្លាំង នារីដែលអង្គុយអោបរឹតជាមួយនឹង Dele Alli នោះគឺជាកញ្ញា Maria Guardiola ដែលជាកូនស្រីរបស់អ្នកចាត់ការក្រុម Manchester City។

ទោះជាយ៉ាងណាក្តី គេមិនទាន់បានទទួលនូវការបកស្រាយ អំពីសាម៉ីខ្លួនទាំង2 នៅឡើយ ក្រោយពីបែកធ្លាយរូបភាព 1សន្លឹកនេះ។ គួរឱ្យដឹងដែរថា Dele Alli ទើបតែបែកគ្នាពីអតីតមិត្តស្រីរបស់គេ គឺនាង Ruby Mae ប្រហែលជា ៣ខែតែប៉ុណ្ណោះ៕

May 18, 2021

កំពូលអ្នកបោកប្រាស់ក្នុងវិស័យប្រាក់អេឡិចត្រូនិក៖ កាន់កាប់ Bitcoin តម្លៃ 1ម៉ឺនលានដុល្លារ ដោយសារបោកអ្នកវិនិយោគនៅ OneCoin រួចគេចខ្លួនបាត់ស្រមោល ជាមួយនឹងខ្ទង់ប្រាក់ដ៏ធំសម្បើម!

ដំបូងឡើយ Ruja Ignatova បានអះអាងថា OneCoin នឹងក្លាយជារូបិយវត្ថុអេឡិចត្រូនិកដែលមានឥទ្ធិពលបំផុតក្នុងពិភពលោក ប៉ុន្តែ ក្រោយរយៈពេលតែមួយឆ្នាំសោះ អ្នកស្រីបានបាត់ខ្លួនសូន្យឈឹង ជាមួយនឹងខ្ទង់ប្រាក់ដ៏ច្រើនសម្បើម ដែលបោកបានពីក្រុមអ្នកវិនិយោគ។

នៅក្នុងពាក្យបណ្ដឹង នាពេលថ្មីៗនេះ របស់ក្រុមអ្នកវិនិយោគ OneCoin (គម្រោងប្រាក់អេឡិចត្រូនិក ដែលដំណើរការតាមទម្រង់ «បណ្ដាញទីផ្សារ» (Multi-level marketing (MLM)/ Network marketing / Pyramid selling) បានឱ្យដឹងថា ស្ថាបនិករបស់ OneCoin គឺអ្នកស្រី Ruja Ignatova កំពុងកាន់កាប់រូបិយវត្ថុអេឡិចត្រូនិក Bitcoin ចំនួន 230,000 bitcoin ដែលបច្ចុប្បន្ន មានតម្លៃជាង 1ម៉ឺនលានដុល្លារអាមេរិក។

ជាក់ស្ដែង កាលពីឆ្នាំ2015 Ruja Ignatova គឺជាតួអង្គសំខាន់ជាងគេនៃការជួញដូរ Bitcoin ធំបំផុតក្នុងប្រវត្តិសាស្ត្រ។ នៅក្នុងការជួញដូរមួយ អ្នកស្រី Ruja Ignatova ត្រូវបាន Sheikh Al Qassimi (សមាជិកម្នាក់របស់រាជវង្ស Dubai) ប្រគល់ Bitcoin ចំនួន 230,000 ដែលមានតម្លៃប្រហែល 50លានដុល្លារអាមេរិក។ បច្ចុប្បន្ន (18 ខែឧសភា ឆ្នាំ2021) Bitcoin នេះ មានតម្លៃសរុបជាង 1ម៉ឺនលានដុល្លារ។

Sheikh Al Qassimi ប្រគល់ Bitcoin ទាំងនេះទៅឱ្យ Ignatova គឺដើម្បីទទួលបានគណនីធនាគារ OneCoin (បច្ចុប្បន្ន ត្រូវបានបង្កក), អចលនទ្រព្យនៅ UAE និងទ្រព្យមួយចំនួនទៀត។ នេះបើតាម Finance Feeds។

ក្នុងពាក្យបណ្ដឹងប្រឆាំងនឹង OneCoin ជនរងគ្រោះបានបង្ហើបឱ្យដឹងថា ក្រៅពីចំនួន Bitcoin ដ៏ច្រើនខាងលើ Ignatova ក៏កំពុងកាន់កាប់ប្រាក់ប្រហែល 500លានដុល្លារ នៅក្នុងគណនីធនាគារមួយនៅ Dubai រួមជាមួយនឹងទ្រព្យជាច្រើនផ្សេងទៀតដែលមានតម្លៃ 1ពាន់លានដុល្លារអាមេរិក។ ទ្រព្យទាំងនោះ ត្រូវបាន Sebastian Greenwood និងសហការីមួយចំនួនផ្សេងទៀតរបស់ Ignatova នៅក្នុងក្រុមហ៊ុន OneCoin ឈរឈ្មោះ។

OneCoin គឺជាកម្មវិធីទីផ្សារបណ្ដាញ (Network Marketing) ដែលត្រូវបានគេឃោសនាក្រោមរូបភាពរូបិយវត្ថុអេឡិចត្រូនិក ដោយក្រុមហ៊ុន OneCoin (ចុះឈ្មោះនៅ Dubai) និង OneLife Network (ចុះឈ្មោះនៅ Belize)។ ក្រុមហ៊ុនទាំងពីរនេះ សុទ្ធតែត្រូវបានបង្កើត និងអភិវឌ្ឍឡើងដោយ Ruja Ignatova និង Sebastian Greenwood។

នៅពេល OneCoin បង្ហាញខ្លួន អ្នកស្រី Ignatova បានអះអាងថា នេះនឹងក្លាយជារូបិយវត្ថុដែលមានឥទ្ធិពលបំផុតក្នុងពិភពលោក និងថែមទាំងអាចដណ្ដើមបានតំណែងលេខមួយពី Bitcoin។ ក៏ប៉ុន្តែ មួយឆ្នាំក្រោយមក (2017) Ignatova ក៏បានបាត់ខ្លួនសូន្យឈឹង ជាមួយនឹងខ្ទង់ដ៏ច្រើនសម្បើមដែលបានមកពីក្រុមអ្នកវិនិយោគ។ មកដល់ពេលនេះ សមត្ថកិច្ចមិនទាន់រកឃើញដំណឹងអំពីកំពូលអ្នកបោកប្រាស់នេះនៅឡើយ។

ក្រុមរដ្ឋអាជ្ញាសហរដ្ឋអាមេរិក បានគណនាឃើញថា ខ្ទង់ប្រាក់វិនិយោគសរុប ទៅលើ OneCoin គឺប្រហែល 4ពាន់លានដុល្លារអាមេរិក។ គម្រោង OneCoin រកបានប្រាក់រាប់ពាន់លានដុល្លារទៅឱ្យធនាគារនានា និងក្រុមហ៊ុនអចលនទ្រព្យជាច្រើននៅ Dubai ជាកន្លែងដែលត្រូវបានគេជឿថា មានការគាំទ្រដោយ Sheikh Al Qassimi ដែលជាកូនប្រុសរបស់បុរសអ្នកមានជាងគេមួយរូបនៅ អារ៉ាប់រួម (UAE) និងអតីតបុគ្គលិកផ្នែកអចលនទ្រព្យម្នាក់។

ជនសង្ស័យឈ្មោះ Ignatova ត្រូវបានគេចាត់ទុកថាជាកំពូលអ្នកបោកប្រាស់ធំជាងគេមួយរូបក្នុងពិភពលោក នៅក្នុងវិស័យរូបិយវត្ថុអេឡិចត្រូនិក។ ក្រៅពីនេះ អ្នកស្រី Ignatova ក៏ជាប់ទាក់ទិននឹងករណីបោកប្រាស់ BigCoin និងត្រូវទទួលទោសរយៈពេល 14ខែ ដោយនៅក្រៅឃុំ ក្នុងប្រទេសអាល្លឺម៉ង់ផងដែរ។

មកដល់បច្ចុប្បន្ន គេនៅមិនទាន់ដឹងច្បាស់ថា Ignatova បានលក់ Bitcoin ចំនួន 230,000 នេះហើយ ឬនៅ ដោយសារតែគោលការណ៍មិនបញ្ចេញអត្តសញ្ញាណក្នុងពេលជួញដូរ របស់រូបិយវត្ថុអេឡិចត្រូនិកមួយនេះ៕

ប្រភព៖ Finance Feeds
ប្រែសម្រួល៖ បុត្រា

May 18, 2021

សក់រួញសំពោង ក៏ស្អាតបានដែរ

នារីម្នាក់ៗ មានសភាពសក់មិនដូចគ្នាទេ នារីខ្លះមានសក់រាបស្មើ ត្រង់រំសាយ ស្អាតពីធម្មជាតិ គួរឱ្យនឹកច្រណែនខ្លាំងណាស់ តែសម្រាប់នារីៗដែលមានសក់រួញទឹករលក ធំសំពោង ដែលតែងតែខំព្យាយាម ផ្លុំពន្លាសក់ឱ្យត្រង់រំសាយ មុននឹងចេញពីផ្ទះជារៀងរាល់ថ្ងៃ វានឹងធ្វើឱ្យមានផលមិនល្អចំពោះសុខភាពសរសៃសក់ខ្លាំងណាស់ បើប៉ះនឹងសារធាតុគីមី ឬកម្តៅក្តៅខ្លាំងពេកនោះ។

ដូច្នេះហើយ ទើបថ្ងៃនេះ យើងមានគន្លឹះល្អៗ មកជម្រាបជូនកញ្ញាៗ ដែលមានសក់រួញសំពោង ឱ្យស្គាល់ពីផលិតផល និងវិធីការប្រើប្រាស់យ៉ាងត្រឹមត្រូវ ចាប់ផ្តើមតាំងពីការកក់សក់ រហូតទៅដល់ការតុបតែងទ្រង់ទ្រាយសក់នៅពេលសក់ស្ងួតហើយ ដែលកញ្ញាសក់រួញ ចាំបាច់ត្រូវដឹងពីវិធី និងដំណាក់កាលរបស់ការមើលថែទាំសក់។

1.មិនគួរកក់សក់ រាល់ថ្ងៃនោះទេ ព្រោះភាគច្រើន សក់ដែលរួញសំពោង មានទម្ងន់ស្រាលនោះ ច្រើនតែស្ងួត ហើយមើលទៅគ្មានទន់រំសាយស្រាប់ទៅហើយ ដូច្នេះគួរកក់សក់ 2 – 3ថ្ងៃម្តង ដើម្បីឱ្យជាតិប្រេងដែលចិញ្ចឹមសរសៃសក់នោះ មិនមើលទៅស្ងួតខ្លាំងជ្រុលពេក និងអាចធ្វើឱ្យសក់ខូចបានយ៉ាងងាយទៀតផង។

2.ប្រើផលិតផល Conditionner រូបមន្តបង្កើនសំណើមដល់សរសៃសក់ ព្រោះនឹងជួយឱ្យសក់ មើលទៅមានទម្ងន់ឡើង តែគួរលាង Conditionner ចាប់ពី 2នាទីឡើងទៅ ដើម្បីឱ្យប្រាកដក្នុងចិត្តថា លាងបានស្អាតហ្មត់ចត់ហើយ ព្រោះបើលាង Conditionner មិនស្អាត អាចធ្វើឱ្យសក់ស្ងួត និងកើតមានអង្គែបាន។

3.ផលិតផលថែទាំសរសៃសក់ ដូចជាសេរ៉ូម(Serum) ឬ ខន់ឌិសឹននើរ៍ (Conditionner)ផលិតផលថែបំប៉នសក់ គួរប្រើនៅក្នុងអំឡុងពេលដែលសក់កំពុងជិតស្ងួត ឬក៏អំឡុងពេលដែលសក់នៅសើមតិចៗ មុននឹងផ្លុំដោយខ្យល់ត្រជាក់ រហូតដល់ស្ងួត។

4.បន្ទាប់ពីសក់ស្ងួតហើយ ប្រើផលិតផលទឹកមូច ដែលធ្វើឱ្យសរសៃសក់មានទម្ងន់ និងងាយស្រួលរៀបចំទ្រង់ទ្រាយ ហើយដែលសំខាន់នោះគឺ គួរជ្រើសរើសប្រើផលិតផលទឹកមូច ដែលលាបហើយមិនរលោងជ្រុលពេក។

5.រៀបចំតុបតែងម៉ូដសក់ តាមប្រក្រតី និងកុំភ្លេចប្រើផលិតផលការពារសរសៃសក់ពីខ្យល់អាកាសកខ្វក់ផ្សេងៗផង ព្រោះសក់រួញសំពោង គឺជាប្រភពប្រមូលសន្សំរបស់ល្អងធូលីហ្នឹងឯង។

ក្រៅពីការមើលថែទាំ និងការរៀបចំតុបតែងសក់ តាមស្ទីលកញ្ញាសក់រួញ ដែលបានណែនាំហើយនោះ រឿងមួយទៀត ដែលមិនគួរធ្វើញឹកញាប់នោះគឺ ការប្រើកម្តៅគ្រប់ប្រភេទជាមួយសរសៃសក់ មិនថាតែការផ្លុំសម្ងួតសក់ គាបសក់ ឬមូរសក់ក៏ដោយ ព្រោះសក់រួញនេះ វាស្តើង ផុយស្រួយ និងងាយឆាប់ខូចណាស់ ដូច្នេះកញ្ញាៗយើង កុំភ្លេចផ្តល់ភាពសំខាន់ចំពោះរឿងនេះផង៕

May 18, 2021

សេរ៉ូម (Serum) សំខាន់សម្រាប់ស្បែកមែនឬ?

បញ្ហាមួយដែលត្រូវបាននារីៗយើង តែងសួរគ្នាជាច្រើនដងច្រើនគ្រាមកនោះគឺ រឿងសេរ៉ូម (Serum) សម្រាប់ស្បែកមុខ… តើវាជាការពិបាក ក្នុងការសម្រេចចិត្តមែនទេថា តើទិញតែ Moisturizer តែ 1មុខ ឬក៏ប្រើតែសេរ៉ូម បានដែរឬទេ? ឬចាំបាច់ត្រូវប្រើទាំង 2យ៉ាងហ្នឹងតែម្តង?

ចម្លើយក៏គឺ

សេរ៉ូមច្រើនតែមានចំណែកផ្សំ របស់សារធាតុអាហារ ដែលជួយក្នុងការមើលថែទាំស្បែកបានច្រើន ហើយសេរ៉ូមនៅអាចជ្រាបចូលទៅក្នុងស្រទាប់ស្បែក បានជ្រៅជាង Moisturizer ទូទៅដែលច្រើនតែថែបំប៉ន ចំពោះតែស្រទាប់ស្បែកខាងលើប៉ុណ្ណោះ។ សេរ៉ូម មានច្រើនប្រភេទ តាំងពី សេរ៉ូមសម្រាប់ប្រឆាំងនឹងស្នាមជ្រីវជ្រួញ សេរ៉ូមដើម្បីស្បែកភ្លឺថ្លា ឬសូម្បីតែសេរ៉ូម ដែលជួយការពារមុន ក៏មានដែរ។

ការប្រើសេរ៉ូមនេះ ចូរប្រើបន្ទាប់ពីយើងជូតសម្អាតមុខដោយ Tonner រួច និងប្រើមុនពេលលាប Moisturizer។

Moisturizer (ម៉យស៍ជើរ៉ាយហ្ស៊ើរ៍) ច្រើនតែមានម៉ូលេគុល ធំជាងសេរ៉ូម ទើបវាជាមូលហេតុដែលថា ហេតុអីបានសេរ៉ូមជ្រាបចូលជ្រៅទៅក្នុងស្រទាប់ស្បែកបានច្រើនជាងហ្នឹងឯង។ ក្នុងន័យមួយទៀត សេរ៉ូមជួយបន្ថែមសារធាតុអាហារដល់ស្បែក ខណៈដែលម៉យស៍ជើរ៉ាយហ្ស៊ើរ៍ ផ្តល់សំណើមដល់ស្បែកបានល្អជាង។

ឥលូវសំណួរដែលសំខាន់នោះគឺ តើយើងចាំបាច់ត្រូវទិញទាំង 2យ៉ាងដែរទេ?

អ្នកជំនាញខាងថែសម្អាតផ្ទៃមុខ ប្រាប់ថា តាមពិតទៅ មិនចាំបាច់ទេ តែក៏ត្រូវមើលទៅតាមករណីនីមួយៗដែរ ដូចជា បើយើងមានបញ្ហារឿងស្បែក ដូចជាបញ្ហាស្នាមអុចៗខ្មៅ ឬមានស្នាមជ្រីវជ្រួញ មុនអាយុនោះ សេរ៉ូមអាចជួយយើងបានខ្លាំងជាង Moisturizer ហើយបើយើងមានស្បែកឡើងខ្លាញ់ស្រាប់ហើយ យើងអាចប្រើតែសេរ៉ូមមួយ ក៏គ្រប់គ្រាន់ហើយសម្រាប់ការថែបំប៉នស្បែកនោះ តែបើពេលនេះយើងប្រើ Moisturizer ស្រេចហើយ យើងមានអារម្មណ៍ថា ស្បែកយើងគ្មានបញ្ហាអ្វីទេនោះ ប្រើតែប៉ុណ្ណឹងក៏គ្រប់គ្រាន់ហើយ។

ដូច្នេះ អ្វីដែលគួរគិតដល់ខ្លាំងជាងគេបំផុត ក្នុងការជ្រើសរើសទិញគ្រឿងសម្អាងថែបំប៉នស្បែករបស់យើងនោះគឺ សភាពស្បែក និងតម្រូវការរបស់យើង តែអ្វីដែលមិនអាចខ្វះបាននោះគឺ ឃ្រីមការពារកម្ដៅថ្ងៃ តែបើយើងមានអារម្មណ៍កង្វល់ពីស្បែកនោះ ការប្រើទាំងសេរ៉ូម និង Moisturizer ក៏មិនខុសអ្វីដែរ៕

May 18, 2021

កុំខ្ជិលកោររោមក្លៀក បើមិនចង់ជួបរឿងយ៉ាប់ៗបែបនេះ…

ទោះមិនមែនជាមនុស្សប្រុស ក៏មនុស្សស្រីយើង មានដុះរោមក្លៀកដែរ ហើយអ្នកខ្លះ ថែមទាំងខ្ជិលកោរចេញទៀតផង ខាងក្រោមនេះគឺរឿងយ៉ាប់ៗមួយចំនួន ដែលនារីៗណា ខ្ជិលកោររោមក្លៀក ច្បាស់ជាត្រូវជួបមិនខាន។

.អ្នកណាៗ ក៏សម្លឹងមើលមកអ្នកដែរ

ប្រាកដហើយ…ព្រោះមានស្រីៗឯណា គេទុករោមក្លៀកឱ្យវែង ដល់ថ្នាក់ហ្នឹងនោះ?!។ បើអ្នកចេញទៅខាងក្រៅ បែបមានរោមក្លៀកវែងៗបែបនោះ វាមិនមែនជារឿងប្លែកទេ ដែលអ្នកណាៗ ក៏បែរមកសម្លក់សម្លឹងមើលអ្នកដែរនោះ ព្រោះអ្នកដទៃគេនឹងគិតថា អ្នកជាមនុស្សកខ្វក់ មិនចេះមើលថែទាំខ្លួន ហើយបើនៅជិតផង អាចនឹងមានធំក្លិនមិនល្អ នាំឱ្យចង់វិលមុខខ្យល់គទៀតផង។

.ជួបនឹងក្លិនខាៗ មិនស្រស់ស្រាយ

រោមក្លៀកដែលវែង នឹងធ្វើឱ្យការថែទាំសម្អាតកាន់តែពិបាកឡើង ដល់ពេលនោះ នឹងមានក្លិនមិនល្អកើតឡើងយ៉ាងពិតប្រាកដ ហើយអាចនឹងគ្មាននរណាចង់ចូលមកក្បែរឡើយ ក៏អាចថាបានដែរ។

.ត្រូវគិតច្រើន មុននឹងរើសខោអាវមកស្លៀក

បើខ្ជិល មិនព្រមកោររោមក្លៀកចេញសោះនោះ ប្រហែលជាលែងបានពាក់អាវដៃខ្លី អាវវៀលក្លៀក ឬក៏អាវអត់ដៃស្អាតៗទៀតហើយមើលទៅ ព្រោះប្រហែលជាគ្មានអ្នកណាគេចង់ឃើញ អ្នកដែលស្លៀកពាក់ស្អាតៗហើយ តែពេលលើកដៃឡើង មានសុទ្ធតែរោមក្លៀកវែងៗនោះទេ។ វិធីដែលល្អបំផុត គឺទុកសម្លៀកបំពាក់ទាំងនោះស្លៀក ពេលកោររោមក្លៀកចេញរួចហើយវិញប្រសើរជាង។

ខ្លួនជាស្រី យ៉ាងណាៗក៏មិនគួរទុករោមក្លៀកដែរ បើអ្នកណាស្រឡាញ់ចូលចិត្តការទុករោមក្លៀកវែងៗ បែបនារីបរទេសនោះ ក៏សូមឱ្យគិតថា វាមិនស័ក្តិសមនឹងមនុស្សស្រីស្រុកយើងទេ ព្រោះធាតុអាកាសក្តៅ វានឹងធ្វើឱ្យមានក្លិនមិនល្អ និងសូមជឿចុះថា គ្មានបុរសណា គេចូលចិត្តបែបហ្នឹងទេ៕

May 18, 2021

ហុងស៊ុយបន្ទប់ផ្សេងៗក្នុងផ្ទះ បើរៀបចំត្រូវ នឹងមានហេង!

មនុស្សជាច្រើនគិតថា ការរៀបចំផ្ទះឱ្យមានហុងស៊ុយ គឺជារឿងមួយ ដែលហាក់ដូចជាស្មុគស្មាញ និងច្របូកច្របល់ណាស់ ទើបបានត្រឹមតែស្តាប់ ហើយក៏បណ្តោយឱ្យរំលងចោលទៅ ទាំងនៅក្នុងចិត្តវិញ ក៏នឹកចង់សាកល្បងផ្លាស់ប្តូរស្ទីលការរៀបចំផ្ទះ ឱ្យត្រូវតាមក្បួនហុងស៊ុយនឹងគេដូចគ្នាដែរ ។ ការពិតការរៀបចំហុងស៊ុយផ្ទះ មិនមែនសុទ្ធតែពិបាកទាំងអស់នោះទេ ថ្ងៃនេះយើងមានវិធីងាយៗក្នុងការរៀបចំបន្ទប់ផ្សេងៗនៅក្នុងផ្ទះ ឱ្យត្រឹមត្រូវតាមក្បួនហុងស៊ុយ មកជម្រាបជូនមិត្តអ្នកអានដូចតទៅ៖

ហុងស៊ុយបន្ទប់គេង

ក្នុងបន្ទប់គេង គួររៀបចំដាក់គ្រែឱ្យឆ្ងាយពីជញ្ជាំងទាំងសងខាង និងមិនគួរដាក់គ្រែនៅកន្លែងដែលជិតមាត់បង្អួច និងថែមទាំងមិនគួរដាក់គ្រែឱ្យចំទ្វារចូលដែរ មិនគួរព្យួររូបភាពធំៗ ឬរបស់ធ្ងន់ៗនៅលើក្បាលដំណេកឡើយ។ រៀងរាល់លើក មុនពេលគេង ត្រូវបិទទ្វារទូដាក់សម្លៀកបំពាក់ និងទ្វារបន្ទប់ទឹកឱ្យជិត និងដែលសំខាន់នោះ គួររកដើមឈើផ្សេងៗ ដូចជាដើមប្រទាលសេដ្ឋី ដើមអណ្តាតនាគ ឬកូនដើមដូងលឿង មកដាក់ក្នុងបន្ទប់គេងផង ដើម្បីឱ្យបន្ទប់គេងមើលទៅមានជីវិតជីវ៉ា ហើយដើមឈើទាំងនេះ ថែមទាំងជួយបឺតយកសារធាតុពុល និងសម្រួលធាតុអាកាសក្នុងបន្ទប់គេង ឱ្យបានកាន់តែស្អាតបរិសុទ្ធឡើងទៀតផង។

ហុងស៊ុយបន្ទប់ធ្វើការក្នុងផ្ទះ

បើនៅក្នុងផ្ទះ មានបន្ទប់ធ្វើការ ហើយអ្នកក៏មានឱកាសបានប្រើប្រាស់វាញឹកញាប់ផងដែរនោះ ក៏គួរតែរៀបចំបន្ទប់ធ្វើការ តាមក្បួនហុងស៊ុយផង ដោយព្យាយាមកុំដាក់តុធ្វើការឱ្យចំទ្វារ ផ្លូវចេញចូលចំៗពេក។ រៀបចំសណ្តាប់ធ្នាប់តុធ្វើការឱ្យបានស្អាតជានិច្ច និងតុបតែងតុធ្វើការ ដោយពណ៌ស្វាយ ឬខ្មៅ ដើម្បីឱ្យជួយជំរុញកម្លាំងចិត្ត និងភាពស្វាហាប់ និងដែលសំខាន់នោះ សូមកុំភ្លេចរកថូផ្កាមកដាក់លម្អផង ដើម្បីសម្រួលតុល្យភាពថាមពលការងារ មិនឱ្យតានតឹង ធុញថប់ជ្រុលពេក និងជួយឱ្យលោកអ្នកមានថាមពលក្នុងការធ្វើការ បានច្រើនឡើងទៀតផង។

ហុងស៊ុយបន្ទប់ទទួលភ្ញៀវ

បន្ទប់ទទួលភ្ញៀវ គួររៀបចំតុបតែងឱ្យមានបរិយាកាសកក់ក្តៅ លោកអ្នកអាចតុបតែងតាមស្ទីលរបស់ខ្លួនអ្នកក៏បាន តែគួរយកផ្ទាំងរូបថតក្រុមគ្រួសារ រូបថតពេលរៀបការ ឬរូបណាដែលមើលឃើញហើយ ផ្តល់នូវអារម្មណ៍កក់ក្តៅ មកតុបតែងលម្អផង។ ក្រៅពីនេះ គួរបើកវាំងននឱ្យពន្លឺពីធម្មជាតិបានចាំងចូលមកក្នុងបន្ទប់ទទួលភ្ញៀវឱ្យបានច្រើនបំផុត ចៀសវាងការបើកភ្លើងអគ្គិសនីគ្រប់ពេលរហូត ព្រោះវានឹងរឹតតែធ្វើឱ្យថាមពល “ស៊ី” មានភាពស្មុគស្មាញ អាចនឹងនាំជីវិតឱ្យរញ៉េរញ៉ៃទៅដែរ។

ហុងស៊ុយបន្ទប់ចង្ក្រានបាយ

គ្រប់ចំណែកនៅក្នុងផ្ទះ គួរតែស្អាតបាតរៀបរយជានិច្ច សូម្បីតែចង្ក្រានបាយក៏ដោយ ជាពិសេសថតតុ ថតទូដែលទុកដាក់អីវ៉ាន់ និងរបស់ប្រើប្រាស់ក្នុងចង្ក្រានគ្រប់ប្រភេទ ចំណែកតុត្រៀមរៀបចំអាហារ ក៏ត្រូវតែស្អាតរៀបរយដូចគ្នាដែរ។ ក្រៅពីនេះ គួរតុបតែងបន្ទប់ចង្ក្រានបាយដោយពណ៌បៃតង ជាពណ៌គោល ឬក៏ចង់យកដើមឈើពណ៌បៃតងខ្ចីមកដាក់លម្អក្នុងបន្ទប់ចង្ក្រានបាយ ក៏រឹតតែល្អដែរ។ តុរៀបចំធ្វើម្ហូប គួរបែរមុខទៅរកមាត់ទ្វារ ដើម្បីទទួលយកថាមពល “ស៊ី” បានយ៉ាងពេញទំហឹង តែបើសិនជាមិនអាចបែរមុខ ទៅរកមាត់ទ្វារបានទេនោះ ក៏គួររកកញ្ចក់មកដាក់ជាប់ជញ្ជាំងមួយផ្ទាំង ឱ្យឆ្លុះទៅមើលឃើញមាត់ទ្វារចេញចូលបន្ទប់ចង្ក្រានបាយបាន ក៏បានដែរ។

ហុងស៊ុយបន្ទប់ទឹក

យើងប្រើប្រាស់បន្ទប់ទឹកក្នុងការសម្អាតខ្លួនប្រាណ និងបន្ធូរអារម្មណ៍ក្នុងពេលជាមួយគ្នា ដូច្នេះនៅក្នុងចំណែកនេះ គួរតែត្រូវបានសម្អាតឱ្យបានស្អាតរៀបរយជានិច្ច និងគួរតុបតែងដោយពណ៌ផ្ទៃមេឃជាពណ៌គោល ដើម្បីឱ្យពេលយើងចូលទៅប្រើការ ឬនៅក្នុងបន្ទប់ទឹក នឹងមានអារម្មណ៍ធូរស្រាល និងត្រជាក់ស្រួលទាំងកាយ និងចិត្ត។

ហុងស៊ុយទូដាក់សម្លៀកបំពាក់

បើលោកអ្នកមានអារម្មណ៍ថា សម្រាន្តមិនសូវលក់ ឬដូចជាមិនចង់នៅក្នុងបន្ទប់គេងប៉ុន្មាននោះ ចូរសាកល្បងបើកទូដាក់ខោអាវ ហើយរកពេលវេលារៀបចំសម្អាតទូសម្លៀកបំពាក់ ឱ្យមានរបៀបរៀបរយម្តងមើល៍ ដូចជា សម្លៀកបំពាក់ណាលែងពាក់ហើយ ក៏គួរតែយកចេញពីក្នុងទូ ទុកយកទៅបរិច្ចាគក៏បាន និងព្យាយាមរៀបចំឱ្យក្នុងទូដាក់សម្លៀកបំពាក់ មានទីកន្លែងទំនេរខ្លះផង ដើម្បីឱ្យថាមពល “ស៊ី” ហូរវិលចូលមកបានស្រួលឡើង។

ឃើញទេ ថា ការរៀបចំផ្ទះ តាមក្បួនហុងស៊ុយ មិនមានលំបាកលំបិនត្រង់ណាឡើយ គ្រាន់តែរំកិលឧបករណ៍ប្រើប្រាស់ ទៅដាក់ឱ្យចំកន្លែងដែលត្រឹមត្រូវ និងតុបតែងលម្អដោយពណ៌ដែលសក្តិសម រួមទាំងបន្ថែមរបស់លម្អផ្សេងៗបន្តិចបន្តួចប៉ុណ្ណោះឯង និងដែលសំខាន់នោះ គឺគួរមើលថែទាំផ្ទះសំបែងឱ្យបានស្អាតជាប់ជានិច្ច ព្រោះភាពស្អាត មានអនាម័យ គឺជាសិរីមង្គលខ្លាំងណាស់ សម្រាប់ផ្ទះរបស់យើង៕

May 18, 2021

កម្ពុជា ចាប់ផ្ដើមរឹតបន្តឹងលើការគ្រប់គ្រងក្រុមឧកញ៉ា

រាជរដ្ឋាភិបាល កម្ពុជា បានចេញសេចក្តីសម្រេច ស្តីពីការបង្កើតក្រុមការងារអន្តរក្រសួង ដើម្បីសិក្សា រៀបចំលិខិតបទដ្ឋានគតិយុត្ត សម្រាប់ការគ្រប់គ្រងក្រុមឧកញ៉ា ឱ្យមានប្រសិទ្ធភាពជាងបច្ចុប្បន្ន។

ក្រុមការងារអន្តរក្រសួងនេះ មានសមាសភាពចំនួន 12រូប ដែលមាន ឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃជាប្រធាន និងមានអនុប្រធាន និងសមាជិក 11រូបផ្សេងទៀត មកពីបណ្តាក្រសួងស្ថាប័នពាក់ព័ន្ធផ្សេង។ នេះបើតាមសេចក្ដីសម្រេចរបស់ សម្ដេចតេជោ ហ៊ុន សែន ប្រមុខរដ្ឋាភិបាលកម្ពុជា។

ក្រុមការងារខាងលើនេះ មានភារកិច្ច សិក្សាស្រាវជ្រាវ ផ្តួចផ្តើមក្នុងការបង្កើតលិខិតបទដ្ឋានគតិយុត្តសម្រាប់បម្រើដល់ការផ្តល់គោរមងារឧកញ៉ា និងការដកហូតគោរមងារឧកញ៉ា។ ក្រុមការងារអន្តរក្រសួងនេះ ក៏ត្រូវសិក្សាអំពីសិទ្ធិ និងកាតព្វកិច្ចរបស់ឧកញ៉ា ក្នុងការចូលរួមកិច្ចការសង្គម ធ្វើការពិគ្រោះយោបល់ ជាមួយបណ្តាក្រសួង ស្ថាប័ន អាជ្ញាធរ រដ្ឋបាលថ្នាក់ក្រោមជាតិ និងវិស័យឯកជនពាក់ព័ន្ធ ដើម្បីប្រមូលព័ត៌មានបម្រើឱ្យការរៀបចំ។

ក្រុមការងារថ្មីនេះ ក៏នឹងត្រូវធ្វើរបាយការណ៍អំពីវឌ្ឍនភាព នៃការងារជូន សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដើម្បីពិនិត្យ សម្រេច និងផ្តល់យោបល់ដឹកនាំ រួមនឹងការរៀបចំឯកសារពាក់ព័ន្ធ ជូនរាជរដ្ឋាភិបាល ដើម្បីពិនិត្យ សម្រេច និង បំពេញភារកិច្ចផ្សេងៗទៀត តាមការចាំបាច់។

អនុប្រធាន និងសមាជិកក្រុមការងារអន្តរក្រសួងនេះ ត្រូវចូលរួមប្រជុំតាម ការកោះអញ្ជើញ និងទទួលភារកិច្ចតាមការចាត់ចែង របស់ប្រធានក្រុមការងារ។ ក្រុមការងារនេះ មានសិទ្ធិ ប្រើប្រាស់មន្ត្រីក្រោមឱវាទរបស់ខ្លួន ដើម្បីជួយការងារតាមតម្រូវការចាំបាច់ និងអាចប្រើប្រាស់ត្រា របស់ក្រសួងមហាផ្ទៃ ដើម្បីចាត់ចែងការងាររបស់ខ្លួន។ នេះបើតាមសេចក្តីសម្រេចរបស់ ប្រមុខរដ្ឋាភិបាលកម្ពុជា៕

ប្រភព៖ ក្រសួងព័ត៌មាន
ដកស្រង់៖ បុត្រា

May 18, 2021

Category: សង្គម និងសេដ្ឋកិច្ច